د. أحمد عبد المنعمالسلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم.
نستكمل بإذن الله عز وجل ما بدأناه من وقفات مع سورة الأعراف. كنا توقفنا عند الآية، انتهينا المرة الماضية آية ثمان عشرة، نبدأ بإذن الله عز وجل الآية التاسعة عشرة.
عند قوله سبحانه وتعالى: ﴿وَيَا آدَمُ اسْكُنْ أَنتَ وَزَوْجُكَ الْجَنَّةَ فَكُلَا مِنْ حَيْثُ شِئْتُمَا وَلَا تَقْرَبَا هَٰذِهِ الشَّجَرَةَ فَتَكُونَا مِنَ الظَّالِمِينَ﴾ [الأعراف: 19].
تكلمنا في المرات الماضية عن مقدمة عن سورة الأعراف، وعن كيف يسير السياق القرآني؟ من تحذير الأقوام من تكذيب الرسل وكيف ينتقل السياق مباشرة إلى الدار الآخرة والتذكير بالإهلاك الدنيوي قبل الانتقال للدار الآخرة؟ ثم الانتقال إلى مشهد في السماء لتكريم آدم عليه السلام ثم لمعصية إبليس.
وسؤال الله عز وجل لإبليس عليه لعنة الله ثم كيف أجاب إبليس؟ وانتهينا عند آخر مشهد مشهد الطرد؛ طرد اللعين، قال ربنا سبحانه وتعالى: ﴿اخرج منها مذئوما مدحورا﴾ لمن تبعك منهم وكان هنا في إشارة أن في ناس سوف تتبع إبليس سوف تترك آيات الله سبحانه وتعالى وتتبع إبليس، وهؤلاء الناس كثر.
كثرة المتبعين لإبليس أيضا من الأمور التي تم الإشارة إليها في هذه السورة كثيرا. سواء عن طريق قوله سبحانه وتعالى: «قليلا ما تذكرون قليلا ما تشكرون». أو بالإشارة لقوله سبحانه وتعالى: ﴿لأملأن جهنم منكم أجمعين﴾ [السجدة: 13]. امتلاء جهنم -نعوذ بالله عز وجل من جهنم- يوحي أيضا بكثرة الذين يسيرون خلف إبليس عليه لعنة الله.
ثم الآية التي نبدأ فيها النهارده بإذن الله عز وجل يقول ربنا سبحانه وتعالى: ويا آدم لما الله عز وجل يترك تخيل كده ولله المثل الأعلى أنا عايزك تخيل مشهد معي لما انت تقول لاثنين وقاعدين قدامك وبتقول لواحد اطلع برة، ثم في نفس المقام وفي نفس المشهد تلتفت لآخر وتقول له تعالى يا محمد، انت خليك جنبي انت هنا. إكرام آدم في هذه اللحظة كان أيضا زيادة غيظ للشيطان، كان زيادة من الأسباب التي سببت غيظا وحقدا للشيطان من لأبينا آدم عليه السلام.
وايضا هذا من كمال تكريم آدم، أن مشهد الطرد يليه مباشرة مشهد الإكرام؛ إني أخرج منها ثم الآية التي تليها ويا آدم اسكن، الله عز وجل يقول له اسكن، نداء والقرب يعني متخيل لما ربنا سبحانه وتعالى يقول يا آدم، هذا النداء الذي يوحي بالقرب، يقول له يا آدم اسكن.
تخيل لما واحد يقول لك استريح، اسكن أنت حتى لا تمل من السكن أنت وزوجك. ويا آدم اسكن أنت وزوجك. هم قالوا إن الجنة لا تكتمل بدون الزوجة، احنا مصدقينهم إن شاء الله، قال: اسكن أنت وزوجك الجنة. وأيضا تخيل أنت قاعد في مكان أنت وزوجك وقمة السكن، عايز حاجة تاكلها بقى؟ اسكن أنت وزوجك الجنة فكلا من حيث شئتما.
فكلا من حيث شئتما. يعني دايما الإنسان مفطور على حب الحرية، وأن هو يكون عنده اختيارات كتير. دايما الإنسان لما يطلب منه أو ينهى عن شيء هذا الشيء بيظل بيحيك في صدره، حتى لو هو مش عايز الشيء ده، اللي هي القاعدة التي بيسموها الممنوع مرغوب. فهنا ربنا سبحانه وتعالى قبل أن يقول له ولا تقربا، قال له فكلا من حيث شئتما.
فأيضا في الدعوة الكلام عن كثرة المباحات قبل الكلام عن المحرمات، لأن المحرمات معدودات. الأصل في الأشياء الإباحة والحِل فيما أنزله الله عز وجل للناس الأصل فيه الإباحة. فدايما احنا نتكلم عن كثرة نعم الله عز وجل على العباد وكثرة المباحات التي أعطاها الله عز وجل للناس، ثم في أشياء معينة وأصناف معينة هي المحرمة.
فأيضا كما هنا في خطاب الله عز وجل لادم عليه السلام قال له كل الجنة مباحة، فكلا حيث شئتما، حتى يكسر ما بداخله من قضية الممنوع مرغوب وأن هو عايز يشتهي الممنوع، فربنا سبحانه وتعالى في الحلال غني عن الحرام. فكلا من حيث شئتما، ولا تقربا هذه الشجرة فتكونا من الظالمين.
بعض العلماء قالوا إن ده كان نوع من تدريب آدم عليه السلام قبل النزول إلى الأرض، لأن من أول خلق آدم قال ربنا سبحانه وتعالى: ﴿إِنِّي جَاعِلٌ فِي الأَرْضِ خَلِيفَةً﴾ [البقرة: 30]. عايزكم تركزوا معي النهارده، الدرس دسم شوية؛ لأنه بيتكلم على العداوة الأصلية بين آدم وبين الشيطان، وبالتالي احنا المفروض نستمر في هذه العداوة، والآيات بتشرح كيفية مداخل الشيطان لإيقاع بني آدم.
فاحنا عايزين نكون مركزين، لأن ربنا أمرنا أن نتخذه عدوا، احنا عندنا أمر من ربنا سبحانه وتعالى أن احنا ما نتعاملش في الحياة بلا مبالاة كأن مافيش شيطان. في ناس بتتعامل كأن الشيطان مش موجود، لأ الشيطان عدو ومتربص وأقسم وقال: ﴿لأَقْعُدَنَّ لَهُمْ صِرَاطَكَ الْمُسْتَقِيمَ * ثُمَّ لآتِيَنَّهُم مِّن بَيْنِ أَيْدِيهِمْ وَمِنْ خَلْفِهِمْ وَعَنْ أَيْمَانِهِمْ وَعَنْ شَمَائِلِهِمْ﴾ [الأعراف: 16-17].
فعايزين نشوف المشهد الأول للمعصية الأولى كيف تمت حتى لا نكرر هذه التجربة؟ في ناس مصممة تاكل من الشجرة عشان تصدق أن أوامر ربنا سبحانه وتعالى يعني كانت صح، في ناس مصممة تمشي لغاية آخر الطريق! طب كانت تجربة آدم عليه السلام التجربة الأولى ولم يكن يعلم، فهذه التجربة قصها الله عز وجل علينا كثيرا حتى لا نفعل مثل ما فعل.
طيب نعود، فقال ربنا سبحانه وتعالى: فكلا من حيث شئتما ولا تقربا هذه الشجرة. بعض العلماء قال زي ما قلنا إن ده كان نوع من التدريب لادم تقوية ملكات الامتناع، أنك انت تتعود إن في شيء انت تمنع منه. وزي ما قلنا الإنسان دايما الممنوع عنده مرغوب.
حتى بعضهم كان بيقول في سلوك نفسي للإنسان لو اتقال له أنت ممنوع من الكلام -أنت طول اليوم تتكلم براحتك وممنوع من الكلام من الساعة اتنين للساعة تلاتة بالليل- هو غالبا في الوقت ده بيكون نائم، لكن لما بيجيله الأمر ده بيفضل إيه متوتر ويحس إن الكلام كله هيطلع الساعة اتنين لتلاتة بالليل، ويحس إن هو بيعمل شيء عظيم وهو وتلاقيه يسهر اليوم ده تحديدا اللي اتمنع فيه من اتنين لتلاتة، وقاعد بيقاوم وكل شوية يبص في الساعة وفاضل عشر دقايق عشان أتكلم. هو أصلا الموضوع ما كانش مهم، لكن لما جاله الأمر أصبح الشيطان والنفس تهول هذا الأمر ويحس إنه إن النهي ده من اتنين لتلاتة أكيد في حاجة هتحصل لو اتكلم، فيضخم له الشيطان هذا الأمر، ممكن يكون الأمر كان عادي. وهذا أول سبيل من سبل الشيطان كما سنرى قضية التزيين.
فهنا قال ربنا سبحانه وتعالى: كلا من حيث شئتما ولا تقربا هذه الشجرة. الله عز وجل هو الذي خلق الإنسان، وقال ربنا سبحانه وتعالى: ﴿أَلَا يَعْلَمُ مَنْ خَلَقَ﴾ [الملك: 14]؟ الله عز وجل يعلم مدى ضعف الإنسان، ويعلم ما هي نقاط ضعف الإنسان، فلما تأتينا الأوامر من الملك سبحانه وتعالى لابد أن ننفذها كما أمرنا ربنا.
فهنا ربنا سبحانه وتعالى لم يقل ولا تأكلا ولكن قال ولا تقربا. لماذا قال ربنا سبحانه وتعالى ولا تقربا هذه الشجرة؟ ليه؟ لأن الإنسان ضعيف، خلق الإنسان ضعيفا. الإنسان فيه ضعف، لما صور الله عز وجل آدم في الجنة -كما يقول النبي صلى الله عليه وسلم في صحيح مسلم- لما صور الله عز وجل آدم في الجنة وتركه ما شاء الله أن يتركه جعل إبليس يطيف به، فعلم أنه أجوف.
لما عرف الشيطان أن سيدنا آدم أجوف قبل أن تنفخ فيه روح، علم أنه خلق خلقا لا يتمالك. ده نص النبي صلى الله عليه وسلم: خلق خلقا إيه؟ لا يتمالك. قال النووي: أي لا يتمالك أمام الشهوات. أن الإنسان وهو بعيد عن الشهوة عنده قوة عنده مناعة، كلما ازداد قربه -طالما باختيارك مش بلاء- كلما ازداد قربه كلما قلت المناعة والضعف يزداد. فالأولى دايما الإنسان يكون بعيد. فربنا سبحانه وتعالى قاله ولا تقربا، حتى لا تضعف؛ لأنك انت لو قربت ثم امرتك بعد أن أقتربت ثم نهيتك بعد أن أقتربت بيكون الأمر شديد على النفس. لذلك دايما الوقاية خير من العلاج.
وهنشوف أن ازاي آخر الأعراف مرتبط بهذه القصة؟ آخر سورة الأعراف مرتبط بهذه القصة. الأوامر الختامية خلاص اللي بتختم بها سورة الأعراف والوحدة الواحدة اللي مرتبطة بها هذه السورة، كيف مرتبطة إزاي ختمت السورة بإشارات لهذه القصة؟
فقال ربنا سبحانه وتعالى: ولا تقربا هذه. برضو عايزين نركز في الآيات هنا على أسماء الإشارة، اسم الإشارة مهم جدا معنا النهارده. هذه اسم إشارة للقريب مفرد مؤنث قريب. يعني هو نهى عن كم شجرة؟ عن شجرة واحدة، والجنة مليانة شجر، بالرغم إن هي شجرة واحدة، وإن كان بعضهم قلة من المفسرين قال إن هو نهى عن جنس مش شجرة واحدة، يعني مجموعة من الشجر لكن الشجر حاجة واحدة، ثمرة معينة يعني.
أيا كان، هذه اسم إشارة للإيه؟ للقريب. طب وهنا ليه الإشارة جت للقريب؟ حتى يعلمها جيدا، عشان ما يقولوش يا رب أنا ما خدتش بالي أصل أنا كلت الشجرة دي كنت فاكر إن المنهي عنه إيه الشجرة اللي جنبها؟ لأ هي الشجرة دي، دي اللي حرام. انت بتبقى عارف هل الإنسان لما بيحب يتحايل على نفسه -يعني مش بيتحايل على ربنا بيتحايل على نفسه- أصل أنا ما خدتش بالي ما كنتش عارف إن ده بالضبط إلا حرام، أنا كنت معتقد إن لأ هو الحرام واضح. الحلال بين والحرام بين وبينهما أمور مشتبهات، فمن اتقى الشبهات فقد استبرأ لدينه وعرضه. هنا الحرام واضح، لا تقربا هذه، دي واضحة قدامك لا تقربها؛ لأنك انت لو قربت هتضعف هتأكل.
فمن الأول امتنع عن اللحظة الأولى. زي ما قلنا كيف كان يأمر النبي صلى الله عليه وسلم بعض الصحابة بكتمان بعض المشاعر اللي ممكن الإنسان لا يتحكم فيها كالغضب مثلا؟ قال له: لا تغضب. طب ازاي الغضب ده أصلا شيء ممكن يحصل لا إراديا؟ خلاص لا تضع نفسك في المواطن التي تجلب لك الغضب. يبقى أحيانا الأمر بيجي أنك تبتعد عن المواطن اللي بتجعلك تقع في المعصية.
يعني أنت مش هترروح تقعد في مكان فيه معاصي وتقعد تتفرج وتزداد الشهوة وتستعر الشهوة وبعدين تقول أنا مش قادر. طب ما هو انت اللي عملت في نفسك كده، أنت اللي اقتربت من النار. ولا تقربا هذه الشجرة فتكونا -أي بمجرد الاقتراب- فهنا رتبت رتبت أن الإنسان يقع في الظلم مجرد الإقتراب: ولا تقربا هذه الشجرة فتكونا من الظالمين؛ لأن غالبا غالبا اللي هيقترب هيسقط.
لذلك دايما انت المفروض يتحط على المعصية كده يافطة من بعيد ممنوع الاقتراب أو التصوير، وعلامة جمجمة كده وعضمتين هتنفجر فيك. المعصية دي لو قربت أنت بيزداد بعدك عن الشيء على قدر خطورته. يعني مثلا لو فيه مثلا كشك كهربا، وناس خايفين الناس تتكهرب فتلاقيهم إيه يحطوا مش عارف معدن وحاجات وبعدين يعملوا إيه سور صغير كده عشان ما حدش يقرب من المكان ده.
طب تخيل لو ده مكان فيه ألغام ممكن تنفجر؟ طب تخيل فيه قنبلة نووية؟ على قدر خطورة الشيء على قدر ما يكون المسافة من قبلها مثلا يقول لك على بعد خمسين كيلو متر مثلا مكان خطر. فالذنب أخطر؛ لأن الذنب تسبب في هبوط آدم من الجنة وتسبب في هزيمة أحد وتسبب في إهلاك الأقوام. فإذا كان الذنب بهذه الخطورة كلما أنا أيقنت بخطورة الذنب كلما ابتعدت عنه.
الجريء على الذنب هو لا يعلم خطورته، يقول لك إيه يعني أنتم أصلا متشددين أنتم بتعملوا ليه كده؟ لان أنا خايف، هي القضية مش تشدد القضية أنا خايف على نفسي. أنا أعلم ضعفي جيدا، أنا مش محتاج حد هنا يشرح لي، أنا أعلم ضعفي طالما وقعت، أنا إيه اللي يخليني أقدر أنا هاضحي بنفسي ليه؟ اللي عايز يقرب هو يقرب، لكن كيف أضحي بديني؟ الأمر عندي أخطر من ذلك. اللي دينه عنده عظيم وبيخاف من الذنب يبتعد، وتلاقيه لا يسأل كثيرا في نقاط المكروه والحرام -وارسم لي الخط الفاصل بين المكروه والحرام لو سمحت- هو ما بيتكلمش في المنطقة دي كتير وبيبتعد أصلا.
فالأمر الأول لآدم بعدم القرب. النهي الأول لآدم عليه السلام بعدم الاقتراب: ولا تقربا هذه الشجرة فتكونا من الظالمين، من الذين ظلموا أنفسهم. احنا قلنا بما كانوا بآياتنا يظلمون، ويقول لك خسروا أنفسهم. هنا فتكونا من الظالمين؛ لأن بيظلم نفسه هيضيع الخير اللي هو عايش فيه.
أول لما بيجي نهي، فوسوس لهما الشيطان. ناس معها مصاحف تبص كده: ولا تقربا هذه الشجرة فتكونا من الظالمين فوسوسة. احنا قلنا الشيطان قاعد منتظر أي أمر أو أي نهي عشان يتدخل. قال صلى الله عليه وسلم: «إن الشيطان قعد لابن آدم بطرقه كلها». أراد هو لسه ما أسلمش أراد أن يسلم فاتاه الشيطان، أراد أن يهاجر فاتاه الشيطان، أراد أن يجاهد فاتاه الشيطان. الشيطان بيجي لك وأنت بتفكر تعمل الطاعة، بيجي معك بيتبدأ معك القصة من الأول.
وأنت لسه والمنبه بيضرب عشان تقوم تصلي الفجر، لأ من قبل ما الولد بيضرب وأنت داخل تنام يعقيد الشيطان على قافية أحدكم ثلاث عقد يضرب على كل عقدة عليك ليل طويل فارقد. شف الشيطان بيجهز من إمتى؟ يعني شف بيجهز موضوع قيام الليل والفجر من وأنت داخل تنام، يعني لو أنت داخل تنام الساعة عشرة وناوي تصحى الساعة ثلاثة، هو مش بيجي الساعة ثلاثة عشان بيجي معك من الساعة عشرة عشان ما تقومش للقيام.
الشيطان دايماً بيستعد من بدري؛ فأول ما بيجي أمر ولسه سيدنا آدم ما فكرش في الأمر ولا النهي ولا هيعمل فيه إيه، جه الشيطان مباشرة، فالسرعة فوسوسة.
فوسوس لهما الشيطان. الوسوسة فعل، ده بيسموه فعل رباعي مكرر؛ يعني بييجي دايماً إن الفعل ده إيه بيتكرر. الشيطان مش بييجي مرة واحدة، يقول لك اعمل المعصية دي: بلاش تصلي الفجر، فتقول له لأ هقوم أصلي، يقول لك طب خلاص أنا آسف سلام عليكم. الشيطان ما بيزهقش، ما بيزهقش شوف؛ يقول النبي صلى الله عليه وسلم: «فإذا قام وذكر الله انحلت عقدة». يعني واحد قايم من النوم وذكر ربنا والشيطان لسه معاه مش هيسيبه.
فإذا قام بعد أن ذكر الله وتوضأ انحلت عقدة؛ يعني ممكن واحد يقوم، ويزكر ربنا، ويتوضأ، ويرجع ينام تاني. عارفينها طبعا، قديمة بكم متكرر معتادة. فيقول لك إيه: طب بس دقيقتين ونص، دقيقتين إنت ياما عملتها دقيقتين، إنت أصلاً ما شاء الله عندك يعني يعني لياقة وإنت متميز في موضوع الدقيقتين ده. إيه المشكلة دقيقتين بس؟ وبعدين هو معقول بعد ما اتوضيت هتنام! اه.
فالشيطان لا ييأس، فكلمة إيه: وسوس. والوسوسة بيقولوا ده صوت الحلي؛ الصوت اللي هو الإيه المحبب للنفس، الخفي مش المزعج، المتكرر، صوت خفي محبب إلى النفس، متكرر. يبقى المعركة دايماً مع الشيطان معركة صبر ومصابرة؛ إنك إنت تفضل ثابت. الشيطان بيعتمد إن إنت جواك أجوف فيه ضعف، يستغله، يداعب هذا الضعف. في زراير معينة كده جواك الشيطان عارف إن لو ضغط عليها إنت بتضعف، فبيقعد يدرسك كويس جداً. فإنت من الأول لازم تبتعد عن مواطن هذا الضعف.
لذلك ربنا قال في ختام السورة: ﴿إِنَّ الَّذِينَ اتَّقَوْا إِذَا مَسَّهُمْ طَائِفٌ مِّنَ الشَّيْطَانِ تَذَكَّرُوا﴾ [الأعراف: 201]. لسه بيلف وبيطوف عشان يقرر هيدخل منين، ولسه بادئ يمس، الشيطان بيقوم مباشرة ينتفض، ويتذكر حتى يصرف هذا الشيطان. لكن اللي هيستمع للوسوسة وهيصغي إليه، غالباً هيقع. طب أنا لما تيجي لي الوسوسة لذلك ختام السورة الأوامر للمتقين: لا يصغوا إلى الوسوسة ولكن يصغوا إلى الإيه؟ وإذا قرأ القرآن فاستمعوا له وأنصتوا.
ولما تيجي لي الوسوسة أقوم أسمع قرآن، أذكر نفسي بآيات الله حتى لا أسمع إلى الوسوسة. في ناس إذا جاءتها الوسوسة بتسمع وتنصت وتستمع وتركز وتطبق بالحرف، وإذا جه القرآن هو لا يفكر، ده المفروض نعكس. فهنا فوسوس لهما، اللام الخاصة دي، إن دخل له المدخل بتاعه، خاص، كل واحد له اللام بتاعتِهِ المدخل الخاص. زي ما قلنا الشيطان بيدرس: ده عنده ضعف في مسألة النساء، ده ضعف في مسألة الشهرة، ده ضعف في مسألة المال، ده عنده مشكلة كذا، وسوسة خاصة. مش مش حاجة كده أسطمبة الشيطان حافظها بيجي لكل واحد: يلا اعمل كذا، اعمل كذا، لأ؛ ده بيدخل له مدخل: ده بتاع دين، خلاص نخش له من الدين، إيه المشكلة يعني؟
يعني شياطين الإنس في عهد النبي صلى الله عليه وسلم لما كانوا يحبوا يروحوا بمحاولات إن هم إضلال للنبي صلى الله عليه وسلم -وحاشاه ولم يقع صلى الله عليه وسلم، وأخبرنا الله عز وجل أن الله عز وجل حفظه، حفظه صلى الله عليه وسلم دي- كان غالباً مدخلها من الدين، يقولوا له إيه: اطرد الضعفاء عشان نسلم. واحنا زي ما بتقولوا الضعفاء ليه يعني؟ عشان إاحنا بس نسلم، مش عارفين نقعد معهم. إنت بس لو تطرد الضعفاء إحنا هنكون من المقبلين على الدين.
ودي أمنية عند النبي صلى الله عليه وسلم أن يؤمن الناس؛ فالشيطان بيدخل، سواء شياطين الإنس أو الجن، كل واحد الحاجة الخاصة بتاعتِهِ اللي هو عايزها. فوسوس لهما الشيطان. يبقى الشيطان أول لما بييجي الأمر أو النهي، بيجي صوت محبب للنفس، خفي، متكرر، لا يمل، وحاجة خاصة بك إنت. ليه الشيطان يعمل كده؟ في نقطة مهمة جداً: الشيطان مش غرضه المعصية فقط؛ يعني لو على قد معصية إنك تعمل معصية، لأ، الشيطان احنا قلنا الشيطان عنده إيه المرة اللي فاتت؟ عند علو همة.
وتكلمنا إزاي نتعلم علو الهمة من الشيطان؛ شلون طلب الإنذار إلى يوم البعث عشان ما يفوتش ولا واحد، بيتبدأ مع كل واحد من لحظة الولادة، مش بيستنى مرحلة البلوغ، الشيطان بيقعد على كل الطرق، أطرق كله. الشيطان عنده إيه؟ علو همة. الشيطان لما بييجي برضو يطلب منك، يعني في واحد لما بييجي يدعو الناس مثلاً إلى الدين أو الالتزام بيرضى بالقليل، لأ، في واحد عايز يعلم الناس، هو الشيطان كده، عايز ينزل بالناس تحت قوي؛ يعني بيطلب مش بس انك تعمل معصية، لأ.
فوسوس لهما الشيطان، ركز معي في الحتة دي، ليبدي لهما ما ووري عنهما من سوءاتهما. يعني إيه بقى الكلام ده؟ نتكلم بس بسرعة كده في الحاجات اللي بتضايقكم دايماً في اللغة، معلش أنا آسف، أنا بعتذر يعني. فيوسوس لهما الشيطان، ديالهم اللام دي، اللام دي اسمها إيه؟ العلماء اختلفوا: آه لو الشيطان كان عارف إيه اللي هيحصل، وكان متوقع إيه اللي هيحصل، يبقى اللام دي لام التعليل، يبقى هو كان قاصد إظهار السوءات، كان عارف إن ده هيحصل، متوقع إن ده، سواء عارف أو متوقع.
بعضهم قال لأ، الشيطان ما كانش يعرف إيه اللي هيحصل؛ فاللام دي بيسموها لام العاقبة. لام العاقبة دي إن ممكن واحد يعمل حاجة تؤدي إلى عاقبة معينة هو لم يكن يعرفها، فالتقطه آل فرعون ليعدو له وحزنا. هو فرعون لما التقط سيدنا موسى كان قاصد إن سيدنا موسى يكون له عدو وحزن؟ لأ، ده بالعكس قال إيه: عسى أن نتخذه ولداً، زوجته قالت له كده. فهو لما التقط سيدنا موسى لم يكن يتعمد أن يكون موسى عليه السلام عدواً له وحزناً.
فاللام دي هناك سموها لام العاقبة؛ إن الفعل بتاع فرعون من غباءه كان مآل هذا الفعل إنه كان ومآلاً عليه. فهنا قالوا: لو لو الشيطان، لو أن الشيطان لا لم يكن يعلم ذلك، قالوا اللام دي هنسميها لام العقل. لو كان عارف ومتوقع، قالوا اللام دي لام التعليل. بعض العلماء أصروا إن هي لام التعليل، وقال: حتى لو مش عارف بالضبط إيه المشكلة اللي هتحصل تحديدا، لكن هو موقن إن طالما ربنا نهى عن شيء، إن الأمر ده أكيد لو اتعمل، النهي ده لو إنت عصيت ربنا أكيد فيه مفسدة؛ عشان كده قالوا إيه؟ الشيطان موقن إن فيه مفسدة هتحصل بعصيان الله عز وجل، هو يعلم ذلك.
طيب، الشيطان وسوس عشان إيه، سواء بقى العاقبة أو التعليل وأنا أميل إن هي للتعليل يعني، ليه؟ عشان يظهر ما ووري عنهما من سوءاتها. الكلام اللي موجود في التفاسير اختلفوا: هل السوءة هنا المقصود بها سوءة حسية، ولا سوءة معنوية حب المعصية؟ واللي قال إن هي سوءة حسية ده كتير من المفسرين استناداً على آثار عن بعض السلف المروية في الإسرائيليات، قال إن السوءة كان آدم عليه السلام وحواء كانت سوأة مغطاة بنور أو آه أو بغير ذلك، وهم لم يكونوا يدركون ذلك، أشبه بعض الشباب أشبه بالطفل الصغير الذي لا يشعر بسوأته، لا يشعر بها ولا ما عندوش إدراك لهذا الأمر.
فسقط هذا الغطاء فلما رأوا السوءة فقالوا هنا المقصود السوءة الحسية، وإن كان الشيطان يريد ذلك، وهم إن لا السوءة المعنوية حب المعصية ظهر جواهم. أياً كان، ده اللي حصل مع سيدنا آدم. طب أمال إحنا بقى الشيطان عايز يعني إحنا الشيطان يوسوس لنا حتى يبدي لنا ما ووري عنا من سوءاتنا، يعني إيه بقى الشيطان يعمل معنا كده؟ إحنا الآيات دي عايزين نعيش بها في حياتنا. بداخل كل نفس -أنا أؤكد دائماً على هذا المعنى- بداخل كل نفس فجور وتقوى.
أنا ممكن مش عارف الفجور اللي جوايا مش عارف، تلاقي مثلاً الشاب أو الفتاة في ثانوي أو في إعدادي أو في جامعة، هي فيها نوع أو الشاب فيه نوع من الإيه الطيبة والسذاجة كده، ما يعرفش، ما يعرفش المعاصي، ما يعرفش، فتلاقيه في أول دخوله، سواء ثانوي أو جامعة، تلاقيه طيب، مالوش علاقة بالبنات، مش بيفكر في معاصي معينة، ما يعرفش حاجة. ممكن تسيبه في الجامعة مثلاً تلات أربع سنين، شوف التحول اللي بيحصل له! تلاقي شكله اتغير وشعره اتغير ولبسه اتغير وطريقة كلامه اتغيرت، كل حاجة اتغيرت؛ ده كان فين؟ ده كان ده كان جواه، البيئة اللي اتحط فيها أظهرت هذا الفجور.
أنا كان لي آه أحد أصدقائي يعني أعرفه، كان طيب جداً وغلبان ووو سافر برة في لدولة أوروبية والعياذ بالله، رجع قمة الجرأة! أنا تعجبت: فلان أصبح عنده جرأة يتكلم عن الزنا إنه أمر عادي؛ هذا الفجور كيف ظهر؟ هذا الفجور كان بداخل النفس؛ يبقى دور الشيطان إظهار الفجور اللي بداخلنا، إنه يحطك في بيئات معينة، تجد بنت طيبة ممكن تبقى غلبانة مثلاً من الأرياف حييّة، آه تميل إلى الستر، تستحي، تشوفها مثلاً في بداية دخول الجامعة هتلاقيها طيبة جداً وغلبانة وقاعدة بينها وبين أي ولد مسافة عشرين متر وتستحي، شوف تلت أربع سنين في الجامعة تشوف، تلاقيها قاعدة إزاي! صوتها قد كده هوه، وتنادي هي على الولد، رحت إنت كلمته تقول لك في إيه اللي حصل؟ إيه اللي حصل يعني غلط؟ إيه ده، ده حصل ازاي؟ التطور ده حصل ازاي؟
هذا كان بداخله، الشيطان مش بس عايزك تحسد، عايز يطلع اللي جوه ده؛ حتى لا تكون المعصية لحظة عابرة، حتى تتحول المعصية إلى إلى طبع، إلى خلق مستمر، إلى شهوة مستعرة. وشلون يريد استعار الشهوات؟ عايز يخلي الشهوات مستعرة، لذلك ممكن المصيبة اللي بتحدث مش انك انت عملت المعصية، السوق اللي بتحدث أن السوءة ظهرت، أن الشهوة استعرت، أن تحولت إلى أحلام يقظة مستمرة في الذهن، هي دي المصيبة.
إزاي العلماء لما بيقارنوا: الأفضل اللي ما عملش معصية خالص وفضل طول عمره على الطاعة، ولا اللي عمل معاصي وتاب؟ ويقارنوا أن اللي عمل معاصي وتاب دا بتتحول سيئاته حسنات، وأن التاني ومقارنات طويلة. في الآخر العبرة بمن صدق فيهما يعني، لكن من مشاكل، كل واحد عنده مشكلة فيهم. من مشاكل مشاكل اللي عمل معاصي وتاب -وكلنا ذلك الرجل- إني بيفضل يجاهد نفسه دايماً، يفضل الأمر جوه في صدره، هذا الأمر في داخل صدري يجاهد دائماً، لابد أن يكون على حذر حتى يتخلص من هذه الشهوة. وهنتكلم إن التوبة شيء، التوبة من الذنب شيء، والتخلص من آثار المعصية من المعصية شيء آخر؛ يعني إن أنت ممكن واحد يتوب لكن لسه آثار المعصية عليه، يحتاج أن يدفع ثمن التخلص من أثر الذنب، زي اللي بيشرب مخدرات كده، هو على جنازة صاحبه لما مات، أو في درس وعظة أو أو تاب إلى الله، لكن لسه المخدرات في دمه، محتاج بقى شهر شهرين تلاتة سنة عشان يتخلص تماماً؛ كل هذه الفترة تحتاج إلى مجاهدة.
فهنا الشيطان عايز إيه؟ الشيطان مش بس عايزك تعصي، الشيطان عايز يغير أخلاقك، يغير طموحاتك وهمومك وشهواتك. بعد ما كنت ممكن تنام، قبل ما تنام تفكر تنصر الدين ازاي؟ لأ، هو تنام ازاي تعمل معصية؛ فأحلام اليقظة عايز يظهر، وإنت تستغرب: أنا ما كانش جوايا كده، أنا كنت طيب، أنا ما كنتش بفكر التفكير ده، إيه اللي حصل؟ ليبدي لهما ما ووري، كان مستخبي عنك ده، كان ده مستخبي عنك، كنت طيب، ما كنتش عارف إن الشهوات دي موجودة، اللي ما يعرفش إن فيه قنوات وأفلام وفيديوهات، ما يعرفش الحاجات دي خالص، ويبدأ الشيطان يوقعه، يبدأ يكتشف جواه هذه الشهوة وتستعر ويجاهد ليتخلص؛ فدور الشيطان مش بس إنك تأكل من معصية أو تعمل معصية، لأ، إن هو الشيطان عايز يطمن إن حتى لو تبت إنت لسه ممكن أوقعك تاني، خلاص.
ليبدي لهما ما ووري ما كانوش عارفين، ما ووري عنهما من سوءاتهما. وقال، يبقى الشيطان بدأ الوسوسة، حدد الهدف بتاعه، حدد الهدف: أنا عايز من ده إن أنا أغير وجهته، إن أنا أظهر جوه حاجة ما كانتش موجودة، وبدأ ينفذ وقال: ما نهاكما ربكما عن هذه الشجرة إلا أن تكونا ملكين أو تكونا من الخالدين. لما ربنا يقول لنا هنا في القرآن كلام الشيطان يبقى ده محتاج يتدرس، إن دي أساليب شيطانية لإيقاع الناس. بعض العلماء قال: عشان يفهم الجملة دي محتاجين نربط نربط قصص القرآن ببعضه، وقالوا إن أول جملة قالها الشيطان لآدم اللي كانت في سورة طه مش اللي في سورة الأعراف، وإن الجملة الأولى كانت: هل أدلك على شجرة الخلد وملك لا يبلى؟ ثم الجملة التانية: ما نهاكما ربكم. وبْتجميع قصص القرآن بنفهم تمت إزاي؟
يبقى الشيطان أول لما جه، نبدأ بقى بسورة طه قال له إيه؟ ما قالوش زي ما قلنا، الشيطان مش بييجي يقول لك: يلا روح اعمل المعصية دي، بص على البنت الفلانية، مش باصة، لأ هات بص. هو لو عمل معي كده والله ما أنا باصص، إنت أصلاً هيستسير جواك الإيه، لكن الشيطان! إيه ده! إيه ده! إيه اللي هناك ده؟ لأ مش البنت، الشجرة اللي هو، آه شف يا أخي الشجرة سبحان الله يا أخي! هو مش بيقول لك بص على البنت! إنت اللي بصيت له إنت حر بقى، أنا ما قلتلكش بص على البنت. الشيطان بييجي يقول لك إيه؟ ما يقول لكش اعمل معصية، يجيبها لك صورة إيه؟ استفهام كأنه إيه: عارف تحب تشرب حاجة؟
هل أدلك لو مش عايز خلاص أنت حر. أنا كنت عايز أقول لك بس لو أنت بتسأل يعني لو أنت مش من هنا وغريب وبتسأل على شجرة الخلد أنا ممكن مش عايز خلاص أنت حر. هل أدلك؟ على شجرة الخلد وملك لا يبلى.
ربنا ما قالش ولا تقربا من شجرة الخلد. مين اللي سماه شجرة الخلد؟ شيطان. يعني ربنا ما قلوش ربنا ما سماش يبقى أول حاجة غير اسمها. لعب في المصطلحات. إنه يغير اسم الآيه؟ المعصية. ما يسميهوش زنا ما يسمهوش ربا ما يسمهوش كده. لأن ده هيفضل يعني مبغض إلى النفس لو فضل باسمه المعصية. أخطر لعبة دايما اللعب بالمصطلحات. اللي يسميه حرية وممكن يكون الحرية دي مش لازم لكن ممكن يكون ده فجور أصلاً بل يريده الإنسان ليفجر أمامه.
زي ما أتكلم مع أحد الشباب بتناقش معه في يعني بعض القضايا الإلحادية. فبيقول لي خلاص ده اللي ما عندوش نضج فكري ما يقراش الكلام ده. قلت له ده ما اسمهوش نضج فكري. ده اسمه ضلال. ده اسمه ضلال ما اسمهوش نضج نضج. أنت نسمي الحاجات باسمائها. لذلك أهم خطوة للرجوع تسمية الرجوع للاستعمالات القرآنية. مؤمن منافق كافر فاسق معصية حرام حلال. نرجع لاستعمال مش مش نرجع نسمي الأشياء بغير مسمياتها.
فأول حاجة عملها الشيطان إنه غير الاسم. طيب لما أغير الاسم سماها إيه؟ شجرة الحنظل مثلاً سماها شجرة المر. سماها شجرة العلقة. سماها شجرة الآيه؟ يختار اسم إيه؟ محبب. يعني حاجة أنت إيه لما تسمع الاسم تحبها. شجرة الخلد اللي هو إيه؟ بنسميه الفوايد. الربا بنسميه إيه؟ أنت لو عايز تستفاد تعالي عندنا مش عايز تستفاد أنت حر. بيسميه فأن أنت لو عايز تستفيد تعالي أتعمل إيه بالربا.
فهنا سماها شجرة الخلد. طب ليه اختار الخلد؟ ليه الشيطان لما اختار الاسم؟ قلنا الشيطان درس سيدنا آدم وقعد يطيف وعلم أنه أجوف. دائماً الأجوف يحتاج إلى من يسد هذا النقص. لذلك الله سبحانه وتعالى هو الصمد لا يحتاج إلى أحد سبحانه وتعالى. يطعم ولا يطعم. هو يصمد إليه سبحانه وتعالى. هذا الضعف الذي بداخلك لن يكتمل ولن تشعر بالراحة إلا أن تلجأ إليه.
الشيطان بيحسسك أنك ممكن تسد هذا الأجوف اللي بداخلك تسد بأشياء أخرى. فالشيطان عارف أن بني آدم خايفين عندهم جوف يحتاج إلى فدائماً تخلوا من قضية الآيه؟ الخلد. لو أنت عايز ما تموتش. الخلد والملك أكثر حاجين محببين للإنسان. إنسان خايف يموت! ولما عايز يعيش عايز يعيش حياة الملك. أكبر مدخلين للشيطان. أن هو خايف على حياتك وحياتك ما تبقاش منغصة. فقال له هل أدلك على شجرة الخلد وملك لا يبلى. دخل له الناحيتين دول. والشيطان لما طلب طلب الخلد برضو. قال أنظرني إلى يوم يبعثون. وقلنا ربنا ما أداش إلى يوم يبعثون. أدى له إلى يوم الوقت المعلوم. عشان يذوق الموت. فهنا دخل له نفس المدخل. شجرة الخلد وملك مالي.
السؤال ده استثار شيء كان بداخل سيدنا آدم لم يكن يعلم أنه يحب الخلد. يعني زي ما قلت لكم أنت ممكن في حاجة أنت مش واخد بالك أن الشهوة دي جواك. لما تتعرض تنظر لمشهد حرام أو يتحط أنت طول عمرك أنا همشي في دماغي الفلوس. لا لا لا أنا ممكن يكون مثلاً أتأثر بأي حاجة. لكن أنا موضوع الفلوس ده أطمن ما تقلقش. لأ ما هو أصل أنت ما شفتش فلوس قبل كده. أنت ما جربتش نفسك في الفلوس. ما أنت لو جربت نفسك يعني أنت هنحكم إمتى؟ لما يتحط قدامك فلوس بجد اللي معك ده ما اسمهوش فلوس. أما يتحط قدامك فلوس بجد وتثبت ساعتها نقول أنت ما لكش فلوس.
هو ما كانش عارف أن هو بيحب كده. دلوقتي أنا موضوع المناصب ده والشهرة لا لا هو ما حدش عارفه أصلاً دلوقتي. يقول لك لأ الموضوع ده أنا بستغرب والله الناس اللي بتتشهر وتضل دي أنا بتعجب والله. وتلاقي عند أول خمسة لايك تلاقيه إيه يا ابني اللي حصل فيه؟ أنت ما أنت ما ما كنت إيه اللي حصل لك؟ ما هو ما جربش. فأحياناً الإنسان ما يبقاش متوقع أن دي نقطة ضعف عنده. فالشيطان بيستثير ده.
الخلد. سيدنا آدم لما يسمع الخلد يعني مش هموت؟ وملك وعلى طول وأكلة وتب بعدها عارف أنت أنت تبدأ إيه؟ التساؤلات دي ما كانتش جواك أصلاً. يعني أنت كل يوم بتروح الجامعة وترجع عادي تنام تذاكر تروح وترجع. الشيطان خلاك تبص على حد. بدأت تفكر قعد يكلمك عن عن معصية عن رحلة حرام. أنت ما كانش في ذهنك. يا ريت الإعلان رحلة لمكان كذا بس ده هيبقى فيه حرام. أنت ما كانش في دماغك أصلاً ده تم استثارته بداخلك.
فترروح تقعد تفكر. طب أروح ولا ما أروحش؟ طب هينفع طب طب أفرض مت هناك بس أفرض ما متتش. طب أفرض ما لحقتش أتوب بس أفرض لحقت أتوب تبقى أنت ضيعت عليك الفرصة. وتدخل في نقاشات مع نفسك أنت ما كانتش جواك أصلاً.
فشيطان يعمل رقم واحد التزيين عن طريق تسمية الأشياء بأسماء محببة للنفس. رقم اثنين استثارة الدوافع اللي جواك يستثيروا. الشيطان قبل ما يقول لك على حاجة لازم يحول الشيء ده لأمنية عندك. أحد معاني قول الله عز وجل إن كان اللغويين اختلفوا في المعنى ده. الشيطان سول لهم وأملى لهم. بعضهم قال سول أي سهل. خل المعصية سهلة وبعضهم قال سول أي جعل المعصية سؤلك. طموحك يخلي المعصية أمنيتك. يعدوه ويمنيهم.
الشيطان عايزك لأمنينه ولأمرنه. قبل ما يأمرك الشيطان يعمل إيه؟ يخلي المعصية أمنياتك. الشيطان يعدكم الفقر ويأمركم. الشيطان بيلعب على المشاعر الأول قبل ما بيدي أوامر. لذلك الداعية المفروض يعمل كده. إنه يغير مشاعر الإنسان تجاه الله تجاه الجنة تجاه النار قبل أن يعطيها العمر وأنه إيه؟ الشيطان بيلعب على المشاعر يخلي المعصية تتحول إلى حلم إلى أمنية إلى طموح إلى سؤل عندك.
ثم بعد ذلك يقول لك طب ما سهلة خالص ما هي طريقة أهو. يبقى شيطان يدخل تزيين استثارة الدوافع وبطريقة غير مباشرة ما يخخش وش في وش كده. يعني يجيبها إيه؟ رفرف من الجنب ما يخخش إيه؟ رح اعمل هل أدلك؟ على شجرة الخلد وملك لا بله سيدنا آدم يقعد يفكر. طب إزاي؟ طب فين؟ لأ مش عايز أعرف. طب قل لي. طب ويدخل في تساؤلات معلش. عارف يجي لك واحد يقول لك أقول لك على شغلانة. الشغلانة دي هتاخد عشر آلاف دولار أصل الجنيه ما قعدتش نوبين. عشر آلاف دولار في الشهر. فتقول له قل. قال لك طب استنى بس. أنا لسة خلصت العروض وهيسلموك عربية تبقى بتاعتك أنت. هو قاعد بيتكلم وأنت قاعد إيه قاعد بتحلم. أنت قاعد بتعد عشر آلاف وتغلط وتعدهم تاني وقاعد بايه تحلم. والعربية بعد تحلم وأنت بتخبط برجلك في العجل كده بتاعها. قاعد تعيش وتطلع إيدك بقى من الشباك.
تقول له قل يا عم إخلص. يا عم أنا لسة خلصت العروض. يقعد يسيبك الأول إيه تعيش. بعد ما تعيش يقول لك ده حاجة بسيطة خالص أنا أشتغل في الخمر. إيه إيه إيه يا عم في إيه خلاص بلاش العربية إمش يا عم موضوع العربية ده خلاص خلاص طب ما فيش حاجة تاني ويقعد يخش لك دخلة إيه تحس أنك تسقط. تخلي القوة الممانعة اللي بداخلك تنهار.
فدخل المدخل ده مع سيدنا النبي هل أدلك على ما دخل المدخل ده وتمكن واستثار قضية الخلد واستثار قضية الملك وخلاص بقت مستثارة. دخل بقى الأمر المباشر. قال له طب بص بقى أنا عايز أقول لك على حاجة. هنا بقى دخلة الأعراف داخلة نوع من الصدام. قلنا ما بيتبدأش بها.
الشيطان من أهم أغراضه أن يجعلك أن يجعلك تعترض على أمر الله. لا أن تعصي الله فقط. شيطان الهدف النهائي بتاعه أنك تعترض على الشرع وعلى القدر. لذلك لو اللي فيها اعتراض على القدر تفتح عمل الشيطان. لأن الشيطان عايزك تقف تقف كما وقف هو. قال له ليه أسجد؟ مش ما سجدش وخلاص لأ أنا خير من أترض. هو الشيطان عايزك تعترض طب الشيطان يخليك تعترض إزاي إزاي الشيطان يستثير بداخلك دوافع الاحترام؟ أنه يصور لك أن أوامر الله فيها نوع من التقييد لحريتك. لطموحاتك لدنياك لأمانيك. يصور لك أن أنت مسجون. أن الطاعة دي سجن. يصور لك أن أنت عايش في كرب بسبب الطاعة. وأن أنت لو قررت تعصي أن الحياة كلها مفتوحة قدامك.
الشيطان بيلعب على المنطقة دي. لذلك قال له إيه؟ شوفي الخبيث اللعين. ما نهاكما ربكما عن هذه الشجرة إلا أن تكونا ملكين أو تكونا من الخليل؟ قال له طب أنا هاأقول لك بقى. خلاص طب ما تأكد أن الموضوع تمكن في القلب. وبعضهم هنا قال فيه إشارة جميلة جداً. نرجع لأسماء الإشارة. ما نهاكم ربكم عن إيه؟ عن هذه هذه دي للايه؟ أنتم إيه اللي قربكم من الشجرة؟ مش ربنا قال لا تقربا. ليه الحوار ده يحصل جنب الشجرة؟ لأن بعد كده ربنا هيقول إيه الم أنهكما عن تلكوما تلك دي اسم إشارة للبعيد. لما أكلوا واتظهرت سواء طلعوا يجروا بعيد عنها. لكن بعد إيه! بعدت عنها بعد إيه الحوار ده بيتم بجوار الشجرة. ما نهاكم وربكم عن واقفين جنب الشجرة. طب وأنت ليه واقف جنبها؟ وسوست الشيطان مع الاقتراب تسهل الوقوع.
ما نهاكما ربكما عن هذه الشجرة إلا أن تكونا ملكين. بيقول له ربنا يريد أن أنت ما تبقاش كويس. هو ربنا لما نهاك عن دي عشان أنت ما تبقاش ملك. وعشان ما تبقاش ملك. وعشان ما تبقاش مخلد. يعني بيحطك يعني قصاد أوامر ربنا. هو ده اللي بيعملوه في الطريقة المعاصرة لتبغيض الناس في الشرع على فكرة الشرع ده هو اللي مسبب لنا الفقر. والشرع ده هو اللي مسبب لنا كذا وهو اللي سبب لنا التخلف وهو اللي مسبب لنا التأخر. وكأن ويتكلموا عن وكأن أن احنا لو خلصنا خلصنا من الشرع كل حاجة في حياتها هتتصلح.
فهنا الشيطان بيقول له إيه؟ ما نهاكما ربكما حتى الكلام المتناقض إزاي يبقى ربكما الذي يربيكم بنعمه. وينهاكم عن شيء بيكون فيه مصلحتك. المصلحة إزاي ما نهاكما ربكما وبصيغة الحصر والخصر يعني بيقول له الغرض الوحيد من النهي عن الشجرة أنك ما تبقاش كويس. ما نهاكما ربكما عن هذه الشجرة إلا أن تكونا ملكين. القراءة المتواترة ملكية. القراءة خارج المتواتر مالكين. الملك يعني زي زي سورة طه. إنما هنا ملكين. كأن أيضاً من الدوافع اللي ممكن تستثار. أن سيدنا آدم قعد يبص على الملائكة. وأن دائماً من أسباب الوقوع في المعصية النظر إلى الغير.
طب ربنا فضلك وعلمك من الأسماء. وعلمك الأسماء كلها. وأسجد لك الملائكة. لكن هو لقى أن الملائكة عندها حاجات مش عنده. ممكن مثلاً بتطوير العبادة بطريقة معينة. فبقى عايز يبقى زيهم. طب ولماذا تنظر إلى غيرك؟ أحياناً ربنا يديك. نعمة معينة. أرض بهذه النعمة اجتهد فيها تعبد إلى الله بها لا تنظر إلى غيرك. أحياناً من أسباب الوقوع أنك أنت مشغول بغيرك. طب أنت وفقت أنك أنت في العلم في الدعوة في الحركة في أي ثغر من ثغور الدين. شيطان عشان يصرفك عن ده يخليك تنظر إلى غيرك. في الآخر لا تجمع بين فعلك ولا بين فعل غيرك.
أحياناً بيكون في فارق دقيق وده عايز يعني يعني ممكن لقاء آخر أو ممكن ترجعوا لمقطع كده اسمه فارق بين تحقيق العبودية وتحقيق الإنجاز. فيه فارق دقيق بين علو الهمة والطمع. ممكن الشيطان عايزك تبقى طماع وفي الآخر تسقط.
فالشيطان الشيطان هنا جى لسيدنا آدم قال له أنت كمان ممكن تبقى ملك. يعني هتبقى مخلد وهتبقى ملك وهتبقى ملك كل ده من الشجرة! والشجرة دهي اللي أنا ماني عنهم. والنهي أساساً عشان ما تبقاش كده. ما نهاكما ربكما عن هذه الشجرة إلا أن تكونا ملكين أو تكونا من الخالدين.
طبعا لازم يدخل الدين في الموضوع. والله العظيم أنا بتكلم بجد. وقاسمهما. إني لكما من المحسنين. حلفان يقسم بالله ويعزم وتحس أن دايما كلام الشيطان متناقض لكن بيوافق هوى النفس. يعني يقولوا منهاكم وربكما وبعدين يحلف بالرب. وقاسماهما وقالوا أن الصيغة المفاعلة دي قاسم المفروض صيغة الفعالة دي تأتي للمشاركة. يعني تقاتل فلان وفلان تصارع فلان والفلان. الاتنين بيعملوا نفس الفعل. فقالوا إزاي قاسماهما؟ بعضهم قال هم طلبوا منه القسم. وقالوا بعضهم قال أن أحياناً هذه الصيغة صيغة المفاعلة تأتي للاجتهاد في الفعل. يعني بنقول جاهد نفسه يعني إيه جاهد نفسه؟ يعني يعني بلغ ودفع كل ما في وسعه. وأعطى كل ما في وسعه حتى يجاهد نفسه. أو في مقاومة قصاد الفعل. هو عمال يحلف وهم بيقاومه. يحلف ويقاومه.
وقاسماهما وأقسم ويؤكد إني لك ما لمن الناصحين. أنا والله ما عايز حاجة ليه. أنا فاعل خير معدي كده. مش عايز حاجة. ودائماً زي ما قلت لكم الشيطان الإنس والجن ما يظهرش أن هو عايز حاجة. أنا ناصح مش عايزين تأكلوا من الشجرة ما تأكلوش. إني لكم لمن الناصحين.
فدلاهما خدوا بالكم. الأمور بتمشي ورا بعضها. فوسوس فدلاهما بغرور فلما ذكر. فده اللي هم بيقولوه يعني إيه ده اللي هم بيغروه؟ دلاهما العلماء قالوا فيها معنى من اتنين الأشر اللي عليه الجماهير أن دلاهما يعني أوقعهما. والمعنى التاني أجرأهما على المعصية. أن دا اللي أحياناً تأتي بمعنى
يكون الإنسان جريئاً على شيء، وده خلاف على حسب الجذر بتاع الكلمة لكن خلينا في الأشهر دل، الدلو.
إلا لما حد يكون عايز مية من البئر يظن واهماً أن في البئر ماء، ينزل البئر يدلل البئر خطوة بخطوة بخطوة ثم لا يجد شيئاً، وقال له: ده مثل يضرب لمن تتبع شيئاً فشيئاً فشيئاً ولم يجد ما يريده. يا إما الفريسة بتقع، تقعد تحط لها، تقع وتسحبها تسحبها تسحبها لغاية لما الفريسة تسقط في الشبكة. انت كده عملت إيه؟ دليت هذه إيه؟ الفريسة، أغريتها.
اللي بعضهم كانوا يقولوا من معاني الغرور أن في بعض الحيوانات تختبئ بالليل وتظهر بالنهار، لأن هي بالليل ما بتشوفش اللي ممكن يفترسها الأعداء، فأحياناً في ليلة مقمرة تظن أن النهار، فتظهر هذه الفريسة، تظهر معتقدة أن النهار جه فتهجم عليها إيه؟ يهجم عليها العدو ويأكله. فهنا يقول له إيه: غر بها، غر بها.
في أنك تعتقد في الشيء فوق قيمته أو على غير قيمته أياً كان فوق أو تحت، هذا الاعتقاد ده نوع من الغرور، فهم اعتقدوا أن في الشجرة فوق قيمتي، أنك تعتقد في المعصية فوق قيمتها، تعتقد أن المعصية هتسعدك، تعتقد أن ده هيبسطك، تعتقد أن ده هيجيب لك فلوس، اعتقاد واهم. والشيطان بايه؟ خطوة بخطوة، عارف لما تحط لواحد مثلاً مبلغ على الأرض فلوس ويجي يوطي ياخدها تقوم شاددها شوية، يقوم واخد خطوة، ييجي يوطي ياخدها تقوم إيه شاددها شوية، هو ده هو ده التدلية خطوة بخطوة، يقولوا شبهة يرد عليهم، بيقولوا ييجوا يمتنعوا يدخل لهم المدخل ده، قعد الموضوع فترة فترة واحدة واحدة بغرور.
أي الباء بعضهم أي ملابسة أو المصاحبة، كل ده بيصاحبهم الغرور أو استعمل الغرور، فدلاهما، وقعد معهم الشيطان باله طويل قوي، خد بالك الشيطان ممكن يقعد مع واحد عشان يوقعه في معصية خمس سنين ما عندوش مشكلة. هتقول لي خمس سنين عشان يوقعه في معصية؟ أه، لأن المعصية الأولى تاخد من الشيطان خمس سنين، التانية تاخد منه خمس دقايق، التالتة خلاص بقى أسير عند الشيطان. هو الشيطان بيعتمد أن هو يسيطر، أن هو يضع اللجام على الحنك: «لأحتنكن ذريتي»، أن هو يظهر السوء، والشيطان بيعتمد أن هو يغير منك أصلاً مش على قد معصية وخلاص.
فدلاهما بغرور، أحد شيطان يدرس ويطيف ويقرر ومداخل ومدخل غير مباشر ومدخل مباشر، ويستثير الدوافع، ويضع يضعك في أمر مباشر ضد أمر الرحمن، في حالة ضد أمر الملك سبحانه وتعالى حتى يظهرك بداخلك الاعتراض، بعد كل ده وبعد كل هذه المحاولات نجح الشيطان.
فلما ذاق الشجرة، فلما ذاق، لسه ما بلعوش، لسه ما لحقش يتمتع بالمعصية، وهذه هذه المعاملة هي معاملة من أراد الله به خيراً؛ أنّه ما يسيبوش يتمتع بالمعصية: ﴿وَعَصَيْتُم مِّن بَعْدِ مَا أَرَاكُم مَّا تُحِبُّونَ﴾ المعصية تذهب بكل ما تحب، إن كنت ممن يريد الله به خيراً، معاملة الاستدراج ربنا يسيبه ويتذوق ويأكل ويشبع ويحوش، ربنا سايبه ما ينزلش عليه العقوبة، وقد تكون العقوبة معنوية أنه يزداد بعداً من الله والعياذ بالله.
فلما بمجرد الذوق، فلما ذاق الشجرة بدت لهما سوآتهما وطفقا يخصفان عليهما من ورق الجنة، نكمل بإذن الله عز وجل بعد الأذان.
الحمد لله وحده والصلاة والسلام على من لا نبي بعده، محمد صلى الله عليه وسلم.
آه، توقفنا عند قوله سبحانه وتعالى: فلما ذاق الشجرة بدت لهما سوآتهما، قلنا أن ده من رحمة الله عز وجل بالعبد عن أنه يبغض له المعصية، المعصية في أولها لها لذة، وأحساس الجرأة واللذة بتاع المعصية بالنسبة للمؤمن بينتهي بمجرد اقتراب المعصية، ثم يشعر بندم، ويشعر بضيق، ويشعر بألم في ظلمه، ويشعر كما سنسمع الآن نداء الرب سبحانه وتعالى: ألم أَنْهَكُمَا؟ يشعر بالعتاب النفسي اللوامة.
هذا الشعور قد يطمحل مع تكرار الأكل من الشجرة، فمع تكرار المعصية قد يعاقب الإنسان والعياذ بالله بالاستدراج، وهيجي لنا في السورة أناس عاملهم الله عز وجل بالاستدراج؛ أن ربنا سبحانه وتعالى عاملهم بالبأساء فلم يرتدعوا، فأعطاهم السراء حتى عفوا، عفونا نموا وكثرت كثرت أموالهم، قالوا: مس آباؤنا الضراء والسراء، عادي دي تقلبات في الأحوال مالهاش علاقة بالعقوبات الربانية، هنا تكون الفتنة.
فلما ذاق الشجرة بدت لهما سوآتهما، وظهر سواء بقى السوءة الحسية على قول الجمهور أو المعنوية، الراجح غالباً المقصود في الآية الحسية لكن إسقاطه علينا بيبقى المعنوية، بدت لهما سوآتهما، ولما ظهرت السوءة شعور فطري بداخل إنسان يريد أن يستر نفسه، شعور فطري بداخل الإنسان، فالعجيب كيف يصفون التقدم بالتعري؟ في حين أن التعري من أخلاق الحيوانات، يعني التعري يعني الحيوانات مش ماشية لابسة في الشارع، التعري ده تنزل عن تكريم بني آدم، فكيف يرتضي الإنسان لنفسه هذا؟ من فطرة الإنسان له هو ما جالوش أمر بالستر يعني ما جالوش أمر ربنا قال له استر نفسك، الأمر اللي قاله: لا تقربا، أو النهي اللي قاله: لا تقربا، هذا الشعور فطري مفطور عليه الإنسان أنه يسعى إلى أن يستر نفسه، سواء يستر السوءة الحسية أو يستر نفسه من المعصية لا يجاهر، لا يتكبر.
فالإنسان يتعجب لمن يفعل المعصية أمام الناس ولا يستحي، أو للمرأة التي تفعل معصية أمام الناس ولا تستحي، يتعجب يناقض فطرته.
فلما ذاق الشجرة بدت لهما سوآتهما بمجرد الذوق بدت وظهرت السوءة، وطفقا يخصفان مباشرة يخصفان عليهما من ورق الجنة، خصف تجميع الورق فوق بعضه حتى يستراني أو حتى يسترا نفسهما، يخصفان عليهما من ورق الجنة.
وناداهما ربهما ألم أَنْهَكُمَا؟ ابن عاشور هنا بيقول معنا لطيف يقول: تأخر النداء (يعني مش ربنا ما قالش فلما ذاق الشجرة ناداهما ربه لأ)، تأخر النداء إلى أن ظهرت السوءة وشعروا بضرر المعصية ثم انطلقوا يبحثان عن ستر للمعصية، جاء نداء في هذه اللحظة، ليه؟ حتى يكون أمكن للنفس لما أنت تشعر بغلطتك وتحس أن أنت ضريت نفسك بالمعصية فيأتيك العتاب في هذه اللحظة، لكن لو أنت لسه لم تشعر بضرر المعصية واتاك العتاب لا تشعر بضرر المعصية، لكن في هذه اللحظة بعد أن ظهرت وبدأت السوءة وينطلقان في الجنة يبحثان عن ورق يستران أنفسهما بالورق جاء نداء في هذه اللحظة فيتمكن العتاب ويعطي أثره: ألم أَنْهَكُمَا، عتاب يذيب القلب المؤمن.
أما تتذكر معصيتك وأنت تقرأ هذه الآيات وتفتكر لما ربنا قال لك ما تعملش دي وحذرك وأبعث لك إنذار ومنعك وحال بينك وبين المعصية ثم تصر وتفعل مصيبة ثم تشعر بضرر في دينك ودنياك وتجلس مع نفسك تذكر هذا العتاب: ألم أَنْهَكُمَا عَن تِلْكُمَا الشَّجَرَةِ؟ أنا مش قلت لكم ابعدوا عنها الوقتي الآن تبتعدان عن الشجر.
قال بعد المعصية؟ بعد أن ظهرت السوءات: ألم أَنْهَكُمَا؟ عملت لكم، مش قلت لكم إن ده غلط؟ فالإنسان يتذكر هذه اللحظات قبل أن يقع في المعصية.
أصعب شيء على من ذاق حلاوة القرب أن يذوق مرارة البعد، أصعب شيء على النفس على النفس التي ذاقت حلاوة القرب أن تذوق هذه الحالة، أن تذوق مرارة البعد أصعب من فقدان أي شيء دنيوي، يعني في واحد ربنا بيربيه أنه يكره المعصية، كل واحد ربنا بيربيه أنه يكره المعصية بطريقة هو الرب سبحانه وتعالى، يعني زي باب ابنك أنت بتخوفه من حاجة فتقول له دي هتلسعك، دي هتعورك، ربنا سبحانه وتعالى يربي عباده، في واحد كل ما بيعمل معصية بيسقط، في واحد كل ما بيعمل معصية بيحصل له مشكلة في عربيته، في واحد كل ما بيعمل معصية بيحصل له مشكلة في بيته، في واحد مش منتظر أن ده يحصل أما بيحصل له معصية يفقد لذة المناجاة، يفقد قيام الليل، يفقد صلاة الفجر، فلما بييجي الشيطان يقول له اعمل المعصية على طول رد فعل طبيعي رفليكس داخلي بيحصل جواه، التاني بيفتكر العربية المخبوطة بيفتكر رئيسه في الشغل اللي بيزعق له، هو عنده ربطة ما بين ده، في واحد بيفتكر مرارة البعد لأ مش هأقدر، لأ أنا المرة اللي فاتت لما حسيت بفجوة أنا تعبت مش قادر أرجع للموقف ده تاني.
لذلك النبي صلى الله عليه وسلم في أشد لحظات القرب في السجود يقول: «يا مقلب القلوب ثبت قلبي»، أنت بيبقى نفسك تثبت على كده، حينما تذوق لذة الطاعة تتمنى أن تظل هكذا، تبقى خايف تروح منك، اللي بيذوق حلاوة القرب يتألم ويخشى مرارة البعد، فتأتي هذه الآية لتذكرك: ابتعد عن المعصية حتى لا تذوق هذه المرارة، حتى لا تشعر بهذه الغصة، مرارة البعد مؤلمة على القلب المؤمن، وكم من انسان يقول فعلت المعصية ولم أعاقب وهو لا يشعر بالعقوبة، لا يشعر بها إلا القلب المؤمن، هذا القلب الذي لا يشعر بالعقوبة هذا قلب فقد الإحصاس، وفقد الإحصاس بأعظم الأشياء للقرب من الله، فقد الإحصاس به فلا يعلم أنه معاقبة والعياذ بالله، حاسس أن عربيته كويسة وشغله كويس وبيته كويس وفلوسه كويسة فمش حاسس أن فيه مشكلة، وهذا من الاستدراج.
تخيل معي، تخيل لو تخيل لو سيدنا آدم لو لما ذاق من الشجرة ما حصلش حاجة، ما فيش عقاب حصل ولا بدأت السوءة ولا حصل حاجة وظاهرياً ما حصلش أي تغيير، بل بالعكس تخيل لو لما ياكل من الشجرة انتقل إلى مكان أفضل في الجنة، تخيل لو كان ده حصل؟ هنا ممكن وده يكون من البلاء؛ أنك تعمل المعصية فدنيتك تتحسن فتبدأ إيه ده ده من البلاء، وهذا ما حدث في مع كتير من الدول والأمم في الوقت المعاصر؛ أن كان ما ثاروا على الدين في الغرب ثاروا على الكنيسة، وثاروا على الدين عندهم وهو كان دين باطل أساساً، لكن لما ثاروا على الدين حصل عندهم تقدم، فنشأت فكرة الإلحاد، طيب يبقى إذاً الدين اللي كان مأخرنا، الأول نشأت فكرة العلمانية أن نحاصر الدين داخل دور العبادة، طالما الدين عامل لنا نوع من أنواع التخلف الدنيوي خلاص احنا نحاصر الدين داخل دور العبادة، ودائماً كل ما الدين بيتراجع كل ما الباطل بيتقدم، لما حاصروا الدين في الكنيسة قال لك طب واحنا ليه نسيب الدين؟ طب ما احنا نهد الكنيسة أصلاً على الدين، وظهر الإلحاد، ده ظهر ليه البداية دي؟ الفتنة حصلت أمتی؟ أني لما أزاحوا الدين حصل تقدم هنا بتحصل الفتنة.
هتقول لي طب إزاي ده يحصل إن كان الدين باطل أصلاً؟ وهذا أيضاً ما حدث في أواخر خلافة الدولة العثمانية أن لما هم في آخر الدولة العثمانية غيروا وبدلوا وضيعوا أجزاء من الدين، فلما حصل الثورة على الدين قام بها أتاتورك عليه من الله ما يستحق في تركيا ونشر العلمانية وأزاح الخلافة حصل نوع من التقدم الدنيوي، فحسوا أن الدين كان مقيدهم، لكن هو الدين ما كانش مقيدهم، تقييد الدين هو ده معنى: ﴿مَا نَهَاكُمَا رَبُّكُمَا عَنْ هَٰذِهِ الشَّجَرَةِ إِلَّا أَن تَكُونَا مَلَكَيْنِ﴾ [الأعراف: 20]، هذا الشعور الذي يريد أن يبثه الشيطان في نفوس الناس؛ أن الدين نوع من التقيد نوع من القيد، الشيطان يصور للإنسان أن الداعية هو عبارة عن أسد أسد يريد أن يفترسه: ﴿كَأَنَّهُمْ حُمُرٌ مُّسْتَنفِرَةٌ * فَرَّتْ مِن قَسْوَرَةٍ﴾ [المدسر: 50-51] أسد أو صياد، الشيطان عايز يصور الداعية أنه عايز يصطاده ويحطه في الحبس، ويصور له الداعية بمنظر مرعب كده، هو الشيطان عايز يخوفك من الدين، يصور لك أن الدين هو قيد وحبس.
الفتنة تحدث حينما تأتي المعصية بدنياً، هنا فتنة استدراج زي ما قلنا هيجي لنا أسأل الله عز وجل أن يتم علينا هذه السورة، هيجي لنا في منتصف السورة أن في ناس حصل معهم كده؛ لما البأساءة ما رجعتهمش وده بيحصل معك، أنك تعصي فيعاقبك الله يرسل لك إنذار عقوبة، تستمر في المعصية خلاص، الانتقال للمرحلة اللي بعد كده: ﴿فَتَحْنَا عَلَيْهِم أَبْوَابَ كُلِّ شَيْءٍ﴾ [الأنعام: 44] خلاص خد الدنيا وهي في المعصية، فإذا رأيت الله عز وجل يعطي العبد وهو مقيم على معاصيه فاعلم أن ذلك منه استدراج كما روي عن النبي صلى الله عليه وسلم.
من رحمة الله عز وجل هنا أن بمجرد ذوق المعصية ظهرت السوءة، وناداهما ربهما: ألم أَنْهَكُمَا عَن تِلْكُمَا الشَّجَرَةِ وَأَقُل لَّكُمَا إِنَّ الشَّيْطَانَ لَكُمَا عَدُوٌّ مُّبِينٌ؟ أنا قلت لك حاجتين: الشيطان عدو، وقلت لك ما تقربش من الشجرة، يعني أنت مش قربت من الشجرة من نفسك؟ أنت كمان استمعت إلى الشيطان، أنا مش قلت لكم أن الشيطان عدو: ﴿اتَّخِذُوهُ عَدُوّاً﴾ [فاطر: 6]، إن الشيطان لكما عدو مبين.
هنا في قضية لغوية سريعة: مسألة تلكوما، اسم إشارة للبعيد، لو عايز تشاور على حاجة مؤنث بعيد بتستعمل تلك، أمال كوما دي إيه؟ دي كاف الخطاب، لو أنت بتخاطب اتنين: تلكما، إن شاء الله ممكن عشان بس تأخرنا لما يجي لنا الموضوع التاني هأشرحه لكم بالتفصيل أكثر في القرآن.
قال ربنا: ﴿رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ﴾ [الأعراف: 23]. فارق رهيب بين كلمة بما أغويتني وبين ربنا ظلمنا أنفسنا، الشيطان إبليس لما وقع في المعصية قال أنت يا رب أغويتني، لم لم يعترف بخطئه، هنا اعتراف آدم عليه السلام بخطئه، لذلك من قول أبي جمعة عن شيخ الإسلام ابن تيمية وغيره؛ أن الذي يسقط في المعصية ثم يتهم الرب فيه شعبة من أخلاق إبليس، والذي يسقط في المعصية ويتهم نفسه ويتوب هنا يتخلق بأخلاق أبينا آدم في لحظات التوبة، ماذا ستفعل بعد المعصية؟ هنا مباشرة احنا اللي غلطانين، ربنا ظلمنا أنفسنا. طب هم عرفوا منين ظلمنا أنفسنا؟ ربنا قال لهم فتكونا من الظالمين.
ولا تقربا هذه الشجرة فتكونا من الظالمين. قالوا: يا رب، بالفعل صدقنا الله وكذبنا عدو الله، ظلمنا أنفسنا.
هذا الشعور، شعور أنه ليس لك مخرج إلا منه، هذا الشعور حينما يستقر في قلبك يتوب الله عليك. ربنا ظلمنا أنفسنا وإن لم تغفر لنا وترحمنا لنكونن من الخاسرين، ليس لنا مخرج إلا منك، لا ملجأ ولا منجى منك إلا إليك. وظنوا أن لا ملجأ من الله إلا إليه، فتاب عليهم ليتوبوا.
حينما تضيق عليك الأمور وتضيق عليك الأرض وتضيق عليك نفسك، تشعر أنه لا مخرج إلا من الله. هذا الشعور يجعلك أقبل على التوبة ويستنزل التوبة، فيقول: يا رب، أنا ما لي غيرك.
وهذه أخطر مرحلة في الذنب، مرحلة الضعف النفسي التي تحصل بعد الذنب. أنت بعد الذنب تكون في حالة من الضعف، إما أن تلجأ إليه، وإما أن تيأس وتقنط. الشيطان بيجي لك قبل المعصية يزين لك المعصية، ويجي لك أثناء المعصية يخليك ما تفكرش خالص في أي حاجة، تنسى كل حاجة، تنسى التوبة واطلاع الله وعلم الله وقدرة الله.
بعد المعصية مش الشيطان يسكت بقى، لأ، يجي لك، يقول لك: إيه اللي أنت هببته ده؟ يا عم، أنت اللي قايل لي وتسمع كلامي؟ طب أنا الشيطان تسمع كلامي؟ ويقعد يأنبك. حاجة عجيبة جداً، الشيطان يقعد هو اللي يأنبك؛ إيه اللي أنت عملته ده؟ طب أعمل إيه؟ أعمل إيه، خلاص راحت! تعمل إيه؟ الموضوع انتهى، أنت أنت فاشل، طب ما فيش توبة، الموضوع انتهى، قم قم شف معصية تانية خلاص، هي باظت أصلاً، يعني ما فيش، لا، ما فيش، انسى، طب أنا أعرف واحد، ما فيش، ده وقع تاني، أنت ما تعرفش. هو الشيطان عايزك، استغلال أخطر مرحلة للحظة الضعف اللي بعد المعصية دي؛ إياك أن تيأس، وإياك أن تستسلم.
اللحظات دي عايزة إقبال على الله مباشرة. ﴿وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ﴾ [آل عمران: 135] مباشرة. إن الذين اتقوا إذا مسهم طائف من الشيطان تذكروا على طول. طول الفترة بين المعصية وبين التوبة بيقسي القلب، فطال عليهم الأمد فقست قلوبهم.
طول الفترة ما بين الوقوع في المعصية وبين التوبة بيخلي الرجوع أصعب، بيخلي القلب ييبس، في نوع من اليبس بيحدث والطبقات بتزداد على القلب. ده أحد معاني ﴿وَلَا تُلْقُوا بِأَيْدِيكُمْ إِلَى التَّهْلُكَةِ﴾ [البقرة: 195]. إياك أنك تقول ما فيش أمل. الشيطان يجي لك في اللحظة دي، أنت مباشرة لازم تلجأ إلى الله؛ ﴿رَبَّنَا ظَلَمْنَا أَنْفُسَنَا وَإِنْ لَمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ﴾ [الأعراف: 23].
قال اهبطوا بعضكم لبعض عدو ولكم في الأرض مستقر ومتاع إلى حين. قال فيها تحيون وفيها تموتون ومنها تخرجون.
كان نفسي نكمل لغاية آية خمسة وعشرين لكن أنا كده هنطول، فأن شاء الله نكمل الآيتين دول المرة القادمة. أسأل الله عز وجل أن يصرف عنا الفتن ما ظهر منها وما بطن، وأن يستعملنا ولا يستبدلنا. اللهم اجعلنا من أهل القرآن الذين هم أهلك وخاصتك، اللهم ارزقنا العمل بالقرآن وتلاوة القرآن آناء الليل وأطراف النهار على الوجه الذي يرضيك عنا. ربنا آتنا في الدنيا حسنة وفي الآخرة حسنة وقنا عذاب النار. أقول قولي هذا واستغفر الله لي ولكم.