تفسير سورة الأنعام (3) | الآيات (17-24) | د. أحمد عبد المنعم

بسم الله والصلاة والسلام على رسول الله صلى الله عليه وسلم. نكمل إن شاء الله ما بدأناه في سورة الأنعام. إحنا متوقفين عند قول الله عز وجل: ﴿وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ * وَهُوَ الْقَاهِرُ فَوْقَ عِبَادِهِ وَهُوَ الْحَكِيمُ الْخَبِيرُ﴾ [الأنعام: 17-18].

بعد قول الله عز وجل: ﴿وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ﴾، هذي الآيات فعلاً تعتبر سيل هادر من معاني الربوبية ومعاني معرفة الله عز وجل بتقذف في قلب الإنسان قوة بتخلي الإنسان يستطيع إنه يواجه أي باطل. لذلك لما تجي تقرا الآيات من أول: ﴿قُل لِّمَن مَّا فِي السَّمَاوَاتِ وَالْأَرْضِ﴾ [الأنعام: 12]، الصفحة دي تقراها كذا مرة أنت وتعيش معها، تجد أن الآيات دي بتقول لك: لمن ما في السماوات؟ الملك له وحده سبحانه وتعالى، له ما سكن في الليل والنهار، هو سبحانه وتعالى يدبر الحركة والسكون في الكون.

أغير الله أتخذ ولياً؟ هو الولي سبحانه وتعالى، هو فاطر السماوات، هو الذي يدبر الطعام والرزق، يطعم ولا يُطعم، هو الذي يصرف عنا عذاب جهنم، وهو الذي يملك النفع والضر، وهو الذي يقهر عباده سبحانه وتعالى، هو الحكيم هو الخبير سبحانه وتعالى. لذلك هذه الصفات اللي نسبت إلى الله عز وجل من معرفة الله، قلما يبقى موجود في القرآن هذا الشوط بيبقى موجود في بعض الأماكن، دايماً بيجي بعده في الغالب هذا الشوط بيجي بعده تحدي، بيجي بعده إيه؟ تحدي. وكأن الإنسان اكتسب قوة من هذه المعاني. لذلك بعد هذه المعاني يقول الله عز وجل: ﴿قُلْ أَيُّ شَيْءٍ أَكْبَرُ شَهَادَةً﴾ [الأنعام: 19]، خلاص بقى أنت عرفت الله المالك، الملك، الولي، فاطر السماوات والأرض، يطعم ولا يُطعم، تملك النفع والضر، هو القاهر، هو الحكيم والخبير؛ هذه المعاني لما امتلأت في قلبك وانسكبت في قلبك، أصبحت تستطيع أنك تواجه العالم وتقول له أنا معي الحق: ﴿قُلِ اللَّهُ شَهِيدٌ بَيْنِي وَبَيْنَكُمْ﴾ [الأنعام: 19].

وهنقول معنى كيف يشهد الله عز وجل للنبي صلى الله عليه وسلم أنه على الحق لما نجي عند هو القاهر. الأول الشاهد أنا عايز أقول أن هذه الآيات هي سيل هادر من معرفة الله عز وجل، من معاني بتطوف في النفس بتسدها من كل الجوانب أن لا يملك النفع والضر إلا الله عز وجل، أشبه بدعاء النبي صلى الله عليه وسلم: «أعوذ برضاك من سخطك، وبمعافاتك من عقوبتك». ما قالش أعوذ برضاك من سخط فلان الفلاني عشان ما يأذينيش، ما قالش معافاتك من عقوبة فلان الفلاني، لا، هو لا يرى في الكون إلا الله، فلا يعافي ولا يعاقب إلا الله، لا ضار ولا نافع إلا الله. فهو بيستعيذ برضا الله من سخط الله، ويستعيذ بمعافاة الله من عقوبة الله، وفي الآخر انتقل من رؤية الصفات إلى رؤية الذات، دي أعلى مرتبة الإحسان، وبك منك أي أعوذ بك منك، لا أحصي ثناء عليك.

تدرج في مرتبة الإحسان أن تعبد الله كأنك تراه، تصل إلى مرحلة أنك لا ترى في الوجود إلا أفعال الله وصفات الله سبحانه وتعالى، وده الطريقة لأهل السنة، غير مذهب اللي بيسموه بقى مذهب الفناء، قلب بعض الصوفية غلاة الصوفية إلى فكرة وحدة الوجود، أن ما فيش غير ربنا في الكون حتى المخلوقات. لكن كأهل السنة، إحنا بنقول أن الفاعل الحقيقي لكل شيء هو الله عز وجل. لذلك هنيجي عند قول الله عز وجل: ﴿وَهُوَ الْقَاهِرُ فَوْقَ عِبَادِهِ﴾ [الأنعام: 18]. حقيقة القهر -كأغلب حتى كنت جاب لكم ورقة كده من كلام بعض المفسرين في القهر- أغلب معاني القهر بتدور على الإرادة، أن الله عز وجل يكسر إرادة من يريد سبحانه وتعالى، ولا يتم إرادة ولا إرادة تتم في الكون إلا برضاه سبحانه وتعالى.

الإمام البقاعي بيقول: هو القاهر الذي يعمل مراده كله، ربنا يعمل ما يريد ويمنع غيره مراده إن شاء. يعني ربنا يفعل ما يريد، لكن العبد لا يتحقق من مراده إلا ما شاء الله، معي؟ ﴿مَن كَانَ يُرِيدُ الْعَاجِلَةَ عَجَّلْنَا لَهُ فِيهَا مَا نَشَاءُ﴾ [الإسراء: 18]، مش كل اللي عايزه من الدنيا ياخده، ومش كل الناس ماشي في الدنيا هتاخد، عجل له فيها، القاعدة اللي بتضبط كل آيات السعي في الدنيا: ﴿مَن نَّشَاءُ لِمَن نُّرِيدُ﴾ [الإسراء: 18]. فدي بتتعلق باسم الله القهار أن هو يفعل مراده كله سبحانه وتعالى، ويمنع مراد العبيد إن شاء سبحانه وتعالى، خلاص؟ وقمة القهر صورت في الآية بكلمة: ﴿وَهُوَ الْقَاهِرُ فَوْقَ عِبَادِهِ﴾. كل الناس عباد لله، فهو القاهر سبحانه وتعالى يفعل مراده كله سبحانه وتعالى، فقال إيه؟ ﴿فَوْقَ عِبَادِهِ﴾ فالامام البقاعي بيقول: وكل ما سواه عبد.

ولما كان في القهر ما يكون مذموماً أحياناً -القهر ده يكون مذموم- فقال: ﴿وَهُوَ الْحَكِيمُ﴾ أيفعل ذلك عن حكمة سبحانه وتعالى، فلا يوصل أثر القهر إلا لمستحق، مش أي يعني ربنا سبحانه وتعالى بيقهر ما يشاء بحكمته سبحانه وتعالى لأنه يستحق أن يُقهر. وأتم المعنى بقوله: ﴿الْخَبِيرُ﴾ هذه الحكمة مبنية على خبرة، الخبير أي بما يستحق كل شيء. خلاص، الإمام ابن عاشور قال معنى تاني في القهار قال معنى جميل قوي، بيقول إيه: صيغة هو القاهر بتفيد القصر، أي لا قاهر في الحقيقة إلا الله، لا يستطيع أن يقهر على الحقيقة -يعني لو في واحد معه أسلحة وبطش فيقول لك أنا بقهر المواطنين، لكن قهره ده محدود، محدود في أشياء معينة، محدود في أزمنة معينة، محدود بأدوات معينة- خلاص؟ الله عز وجل بيقهر العباد في كل شيء، بيقول إيه: لأن قهر الله تعالى هو القهر الحقيقي الذي لا يجد المقهور منه ملاذاً.

ليه بقى؟ ليه المقهور ما يعرفش يخرج برة دايرة أن ربنا يقهره؟ لأن الله عز وجل قهره بأسباب لا يستطيع خلق ما يضاده. إزاي؟ الله عز وجل قهر العبد بالنوم مثلاً أنه مضطر أنه ينام، العبد ما يعرفش يخلق شيء عكس النوم يريح به نفسه، ما يعرفش. الله عز وجل قهر العباد بالموت، مهما بلغ العباد من العلم لن يستطيعوا أن يخلقوا شيء يصلح لهم قضية الموت، مش هيقدروا. فالله عز وجل قهرهم بأسباب لا يستطيعون خلق ما يضادونها، كما كذلك في النوم وفي الموت وغير ذلك. خلاص؟ بيقول: والله عز وجل في حياة الناس جعل لهم أشياء صور للقهر منها أنه يوجد سبحانه وتعالى ما لا يريدون وجوده كالموت، ويمنع ما يريدون تحصيله كالعقيم والجهل لمن يريد أن يتعلم، مهما بلغ الإنسان من علم هيظل في جهل.

لذلك الآن عصر التطور العلمي مخ الإنسان حتى الآن جزء كبير منه غير معروف عند الأطباء، مش مفهوم، يعني الأداة اللي بيفكر بها الإنسان وبيصل بها العلم جزء كبير منها مش مفهوم بيتم ازاي من عمليات كتير بتتم داخل المخ مش مفهومة. خلاص، بيقول: أن الإنسان حتى الإنسان نفسه بيجد أن في أمور بيستطيع أنه يفعلها يجي يعملها تاني ما يعرفش، الله عز وجل قهره في ذلك، بل ييجي يمشي ممكن رجله تنمل ما يقفش يمشي، يعني ممكن ييجي له جلطة، يعني ممكن الإنسان يُقهر بأتفه الأسباب، بعوضة زي ما قلنا يهلك يأجوج ومأجوج، بالنغف يهلك سد بفقرة. إذاً القهر لا حدود له، يبقى القهر مع جولة كده في كلام العلماء تلاقيهم ركزوا على معنى الإرادة، أن الله عز وجل يمنع إرادة العباد إذا شاء أن يمنع ذلك.

أحد معاني قوله جل وعلا: ﴿وَاللَّهُ غَالِبٌ عَلَى أَمْرِهِ﴾ [يوسف: 21]، وأحد معاني قول الله عز_وجل: ﴿وَاعْلَمُوا أَنَّ اللَّهَ يَحُولُ بَيْنَ الْمَرْءِ وَقَلْبِهِ﴾ [الأنفال: 24]. يعني إيه يحول بين المرء وقلبه؟ الإمام ابن الجوزي في زاد المسير ذكر ما يقرب من عشر أقوال في يعني إيه يحول بين المرء وقلبه، غالبها بيلف حوالين معنى أن يحول بينك وبين تفكيرك، بينك وبين حياتك، بينك وبين عزيمتك، بينك وبين مرادك، بينك وبين مشيئتك، بينك وبين أمنياتك. أن الله عز وجل قادر إنه يمنعك من تحقيق أمنيتك، قادر إنه يخليك ما تعرفش تفكر، قادر إنه يخليك جاهل، قادر إنه يخليك بعد ما فهمت وعرفت ما تعرفش تنفذ، قادر إنه يخليك وأنت بتنفذ تغلط، قادر إنه يخليك بعد ما فهمت وعرفت ونفذت أنك تبوظ اللي أنت عملته.

يسلط عليك جندي من جنودي وهو الغباء مثلاً، زي ما بنشوف في بعض الناس دلوقتي يسلط عليهم الغباء فيدمرون ما فعلوا، ويدمر ما حققه من مكاسب في ظنه بغبائه ويخربون بيوتهم بأيديهم. يبقى إذاً قهر الله عز وجل العباد له صور غير متناهية، لأن الأسباب اللي بيتم بها ذلك مخلوقة، وخلق الله غير متناه. لذلك قال الله عز وجل: ﴿وَمَا يَعْلَمُ جُنُودَ رَبِّكَ إِلَّا هُوَ﴾ [المدثر: 31]. إذاً الآية دي بتخلي الإنسان، وكلمة هو القاهر، طب افرض هم راحوا جابوا حد تاني؟ لأ، وهو القاهر فوق عباده، لأن دلوقتي ربنا بيقول: ﴿وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ﴾. فانت ممكن ييجي طب ده لو ربنا اللي أصابني بالضر، طب افرض واحد تاني أصابني بالضر أو افرض واحد هيعمل حاجة فيا أو هيضرني؟ فربنا بيقول لك هو الذي يملك الإرادات ويقدر بقدرته سبحانه وتعالى وبحكمته أنه يمنع مراد أي إنسان.

وأظهر صورة جمعت موضوع الإرادة دوت وقهر الله عز وجل للإرادات، وأن الله عز وجل يحقق ما يريد في سورة يوسف في قول عز وجل: ﴿وَاللَّهُ غَالِبٌ عَلَىٰ أَمْرِهِ﴾ [يوسف: 21]. أراد إخوة يوسف ليوسف شيئاً وأراد الله ليوسف شيئاً فكان ما أراده الله، أرادت امرأة العزيز ليوسف شيئاً وأراد الله عز_وجل ليوسف شيئاً فكان ما أراده الله، كلما اجتمع عليه قوم أو ناس أو أي شيء كان ما يريده الله عز وجل لهم وأخرج له المنحة من المحنة بقدرته سبحانه وتعالى. يبقى الآية ديت بتخلي الإنسان بعد الشوط الطويل دوت أن الله عز_وجل يملك السماوات والأرض، وأن الله عز_وجل هو الولي وفاطر السماوات والأرض، وهو الرزاق وهو يملك النفع والضر سبحانه وتعالى، يملك كل شيء ويقدر على كل شيء ويقهر كل شيء.

وهذا القاهر على الإطلاق، قهر الله عز وجل على الإطلاق، وهو القاهر فوق عباده أي لا يخرج أحد من خلقه عن قهره سبحانه وتعالى. تاني: لا يخرج أحد من خلقه عن قهره سبحانه وتعالى، مهما أُوتي من قوة ومهما تمكن من أسبابه. وزي ما قلنا في تفسير المجلس الأول في تفسير قول الله عز وجل: ﴿أَلَمْ يَرَوْا كَمْ أَهْلَكْنَا مِن قَبْلِهِم مِّن قَرْنٍ مَّكَّنَّاهُمْ فِي الْأَرْضِ مَا لَمْ نُمَكِّن لَّكُمْ﴾ [الأنعام: 6]، دايماً كل إنسان يمكن له ببعض الأسباب يظن الأسباب ديت لن تقهر. وشعار كل أحد يمكن في سبب من الأسباب ما يظن أن تبيد هذه أبداً: ﴿وَظَنُّوا أَنَّهُمْ مَانِعَتُهُمْ حُصُونُهُم مِنَ اللَّهِ﴾ [الحشر: 2]، كل واحد بيخطط لأشياء معينة يظن أنها تمنعه من قهر الله عز وجل، لكن زي ما قلنا دايماً النتيجة: ﴿فَأَتَاهُمُ اللَّهُ مِنْ حَيْثُ لَمْ يَحْتَسِبُوا﴾ [الحشر: 2].

فالشوط ده بتخلي الإنسان -الإنسان يا جماعة زي ما قلنا مش مجرد عقل، مش مجرد سمع، مش مجرد بصر- الإنسان مخلوق على بعضه، له حواس، له مشاعر. القرآن كان بيخاطب الإنسان كبني آدم، كبني آدم على بعضه، مش بيخاطب عقله بس، ولا بيخاطب سمعه بس، ولا بيخاطب بصره بس. القرآن بيخاطبه كبني آدم ومشاعر خوف ورجاء وطمأنينة وحب وسكون، وخوف من المستقبل وحزن على الماضي. فالانسان بيخاطب الإنسان كإنسان، الآيات دي بتعالج كل المشاكل النفسية اللي ممكن تصيب الإنسان اللي يختار طريق صعب. تاني: الآيات ديت تعالج كل المشاكل النفسية اللي تصيب إنسان بيختار طريق صعب، طريق الأنبياء طريق مليء بالابتلاء، واللي بيسير في طريق الأنبياء اللي يظن أنه بيسير في طريق الأنبياء ولا يبتلى يبقى دي سكة غلط، مش ده مش سكة طريق الأنبياء، وكذلك جعلنا لكل نبي عدواً. فمن سار على طريق الأنبياء فلابد له من أعداء، ده طبيعي.

فاذا الآيات ديت بتخليك تخوض المعركة، معركة الحق والباطل بنوع من الطمأنينة. لذلك الشوط الأول بتاع سورة طه: ﴿طَهَ * مَا أَنزَلْنَا عَلَيْكَ الْقُرْآنَ لِتَشْقَىٰ * إِلَّا تَذْكِرَةً لِّمَن يَخْشَىٰ * تَنزِيلًا مِّنْ خَلَقَ الْأَرْضَ وَالسَّمَاوَاتِ الْعُلَى الرَّحْمَنُ عَلَى الْعَرْشِ اسْتَوَىٰ * لَهُ مَا فِي السَّمَاوَاتِ وَمَا فِي الْأَرْضِ وَمَا بَيْنَهُمَا وَمَا تَحْتَ الثَّرَىٰ * وَإِن تَجْهَرْ بِالْقَوْلِ فَإِنَّهُ يَعْلَمُ السِّرَّ وَأَخْفَى اللَّهُ لَا إِلَهَ إِلَّا هُوَ لَهُ الْأَسْمَاءُ الْحُسْنَى﴾ [طه: 1-8]. المعاني دي ليه؟ عشان لما بيقول له: ﴿اذْهَبْ إِلَى فِرْعَوْنَ إِنَّهُ طَغَى﴾ [طه: 24] يقول له حاضر. من غير المعاني دي هقول لك إذهب إلى فرعون إنه تقعد تقول لي لأ، ده طاغية، ده ممكن يأذيني، لأ، مش هقدر أتكلم معه. يا رب أنت عايزني أروح وبتقول لي إنه طاغية، لا، أنا مش هقدر. لذلك لما سيدنا موسى بعد المقدمة دي علم أن اللي يقع في قلب المقدمة دي بتاعة معرفة الله، يستطيع أن يقف في وجه فرعون، طلب الطلبات دي عشان المعاني دي ما تضيعش منه. لذلك الطلبات الطويلة: ﴿رَبِّ اشْرَحْ لِي صَدْرِي * وَيَسِّرْ لِي أَمْرِي * وَاحْلُلْ عُقْدَةً مِّن لِّسَانِي * يَفْقَهُوا قَوْلِي * وَاجْعَل لِّي وَزِيرًا﴾ [طه: 25-29].

ومن أهلي هارون أخي أشد به أزري وأشركه في أمري. ليه؟ كل ده ليه؟ كي إيه؟ كي نسبحك كثيرا. التسبيح تنزيه الله عن كل نقص. أكثر موقف يخليك تسيء الظن بالله أنك تتعرض مواقف الضر.

يعني مواقف الرخاء بتخليك تنسى الله، مواقف الضر تخليك والعياذ بالله تسيء الظن بالله. ليه كده يا رب؟ سيدنا يونس لما التقمه الحوت قال: ﴿لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ﴾ [الأنبياء: 87] عشان ما يجيش خاطرة في سوء ظن، ليه يا رب؟ لأ، لا إله إلا أنت سبحانك، تنزيه على طول. فجاب التسبيح. فدائما لما الإنسان بيجي له خواطر سوء ظن يسبح الله، ينزه الله عن كل نقص.

فإذا سيدنا موسى يتعرض مواقف فيها ابتلاء وضر، فعايز المعاني بتاعت سورة طه تفضل معه على طول، فطلب وسائل مساعدة إزاي ما ينسى المعاني دي في الطريق؟ إذا نسيان المعاني بتاعت غير الله يتخذ وليا اللي موجودة معنا في أول الأنعام، أو اللي موجودة في أول طه، بتحول العمل لنصرة الدين المليء بالبلاء بتحوله إلى شقاء. تذكر هذه المعاني دائما يحول العمل للدين في الطريق المليء بالبلاء، يحوله إلى لذة ومتعة، معي؟

تاني هذه المعاني اللي مليئة بمعرفة الله، وخاصة قضية النفع والضر أكثر قضية يعني بتلمس القلب لمس مباشر. لو رحت لأي ناس، إن شاء الله يعني قمة المعاصي، رحت لناس والعياذ بالله في الزنا ومخدرات وقمة المعاصي، وكلمتهم عن أن الله عز وجل يصلح لهم حياتهم وبيده أن يفسد عليهم حياتهم، تأثر النفع والضر بيلمس القلب لمس مباشر. ذلك أكثر موقف كان يخلي المشركين بتوع الأصنام يقولوا يا رب أمتاه في الضهر وفي نص البحر! وإن كان للأسف الوقتي الناس بتشغل أغاني في نص البحر، يعني يعني في نص البحر، فإن في نص البحر والموج بيلعب بهم وخلاص هيُهلك، يقوموا راميين إيه؟ الأصنام! الأصنام وزي ما بيروى في السير في قصة إسلام عكرمة، لما هرب من النبي صلى الله عليه وسلم لما قال: «لو رأيتموه متعلق بأستار الكعبة فاقتلوه». فهرب، فركب البحر، لعبت الأمواج، فالناس اللي في السفينة قعدوا يرموا إيه؟ الأصنام في البحر. فقال لهم بتعملوا إيه؟ مش دي أصنامكم؟ قالوا يا عكرمة، هذا يوم لا ينفع فيه إلا من في السماء.

وفرق إيه اليوم ده عن؟ فعدا ده كان يعني بيروي، يعني ده من أسباب إسلام عكرمة بن أبي جهل. وسبحان الله وقاتل لنصرة دين الله حتى قتل شهيدا. الشاهد أن المعاني دي بتلمس القلب لمس مباشر. بعد تأصيل المعاني دي وبيان أن اللي بيملك الأسباب سبحانه وتعالى ويملك النفع والضر، وهو القاهر أي وهو القاهر وحده سبحانه وتعالى فوق عبادي، وكل ذلك بحكمة وخبرة. الخبير يا جماعة من أسماء الله الخبير. يعني إيه الخبير؟ احنا كده بنتعدى على تخصص أحمد سيف، لأن هو راجل بتاع أسماء حسنى، كده احنا إيه لقطة كده. يعني إيه الخبير؟ إمتى يتقال على واحد في أهل الدنيا خبير؟ متخصص في حاجة معينة. بس التخصص في حاجة معينة؟ يعني لو أنا مثلا دلوقتي لسه متخرج واتخصصت في حاجة معينة، يتقال عليا خبير؟ عنده خبرة، الخبرة دي بيكتسبها إيه؟ بالوقت، مارس حاجات كتير، فيبقى عمل حاجات كتير وغلط وجرب وغلط وجرب، وبعدين عرف يعملها، عملها أول مرة ب30% صح، بعدين 50%، 60%، 90%، 99%. كدة نقول ده معه خبرة، لأنه مارس كتير. الإنسان عشان يعمل الحاجة بإتقان لازم جرب كتير، ما بتجيش معه من أول مرة متكاملة.

يعني الإنسان عشان العربية اللي أنت راكبها دي، أنت لو جيت تشوف أول مرة حاولوا يعملوا عربية تضحك، أو الطيارة أو أي شيء، ما بيظهرش في صورته اللي عايزينها النهائية إلا بعد إيه تجارب، خلاص؟ لكن الله عز وجل سبحانه وتعالى يعلم ما لو كان ما لم يكن لو كان كيف يكون؟ الحاجة اللي ما اتعملتش، لو اتعملت كانت هتبقى عاملة إزاي؟ ربنا يعرفها، يعلمها سبحانه وتعالى. لذلك الله لا يحتاج إلى التجربة سبحانه وتعالى. الله عز وجل يعلم أعلى شيء كيف يكون فيه الإنسان فيخلقه سبحانه وتعالى. النظرية الداروينية دي بتتبنى فكرتها، بتقيس قدرة الله على قدرة الإنسان أنه بيحتاج إلى إيه إلى تطور؟ أن ما ينفعش الإنسان اتخلق من أول مرة بهذا الخلق العظيم، أنه يحتاج إنه يبقى سواء خلية أميبا أو إنه يمر بمراحل الحيوان أو غير ذلك. لكن الله عز وجل خلق آدم وصوره كما هو، نفخ فيه من روحه من أول مرة، هي مش لازم تمر بالمراحل، فالله عز وجل خبير. الإنسان اللي ما عندوش خبرة قراراته بتفضل غلط فترة، فلو أنت شغال مع انسان ما عندوش خبرة تبقى قلقان، قلقان لا يضيعك. لو أنت حاطط راس مالك مع واحد وما عندوش خبرة، خايف يوديك في داهية، تطق في دماغه فكرة ما يعرفش أبعادها، ييجي يعملها يضيع كل حاجة. لكن العامل لدين الله لما يحط راس ماله عمره ودمه ونفسه وحياته وبذله ومجهوده مع ربنا مطمن، مطمن! الله عز وجل يعلم عاقبة الأمور، مش يعلم عاقبة الأمور، الله يقدر عاقبة الأمور، لذلك ﴿وَإِلَى اللَّهِ عَاقِبَةُ الْأُمُورِ﴾ [لقمان: 22]، فيه ﴿وَلِلَّهِ عَاقِبَةُ الْأُمُورِ﴾ [الحج: 41]، والله عز وجل يملك عاقبة الأمور، هو الذي يقدرها، هو الذي يدبرها سبحانه وتعالى، معي؟ وهو القاهر فوق عباده وهو الحكيم الخبير.

بعد الشوط ده بيكتسب الإنسان قوة نفسية هائلة: الاتصال بالله، معرفة ربوبية، لا يرى في الكون إلا الله. خلاص بقى، أعوذ برضاك من سخطك وبمعافاتك وعقوبتك. وكمان بينتقل وأعوذ بك.

قمة اليقين والطمأنينة، بيذهب بقى يقول لهم: ﴿قُلْ أَيُّ شَيْءٍ أَكْبَرُ شَهَادَةً﴾ [الأنعام: 19]. هم عمالين يقولوا له إيه؟ عشان ما ننساش سياق الأنعام، المقدمة ثلاث آيات، الله عز وجل يملك كل شيء، قالوا له عايزين آية، قرأ عليهم القرآن، ما آمنوش، فقال الله عز وجل: ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ إِلَّا كَانُوا عَنْهَا مُعْرِضِينَ﴾ [الأنعام: 4]. قالوا مش عاجبنا القرآن، عايزين آية حسية، قال لهم انظروا إلى آثار السابقين الهالكين. قالوا لأ، عايزين آية حسية تانية، كتاب من السماء، قال لهم لو نزل عليكم كتاب من السماء ولمستوه بايديكم مش هتؤمنوا. قالوا له عايزين ملك من السماء، قلنا هو الملك حاجة من اثنين: هيجي ملك في صورة ملك كده هينتهي تعذب وينزل العذاب لو ما آمنتوش، أو ملك في صورة بشر يبقى احنا كده دخلنا هيقول لك إيش ضمنا أن ده ملك في صورة بشر؟ ما جايز بشر وببيضحك علينا، عايزين إيه؟ هيا يا أيها الملك الذي في صورة بشر، عايزين آية، هيقولهم الآية اللي معايا القرآن، فلفينا ورجعنا تاني للقرآن، مش كده؟ قال لهم روحوا قل سيروا في الأرض، ما عنديش غير الآية دي، ثم أنظروا كيف كان عاقبة المكذبين.

بدأ يشوط في معرفة الله عز وجل، قالوا له برضه احنا عايزين حد يشهد لك ويشهد للقرآن، قال لهم إيه أكثر حد؟ كلمة شيء دي بيسموها أوسع كلمة في اللغة. يقال يعني أن كلمة شيء أوسع كلمة في اللغة، خلاص؟ قل أي شيء أكبر شهادة، عايز هما عمالين يقولوا له إيه؟ مين يشهد لك؟ قال لهم إيه أكبر شيء في الكون يشهد لي؟ فما استناهمش يردوا وقال لهم: ﴿قُلِ اللَّهُ﴾ [الأنعام: 19]. وأزاي نقول سورة الانعام فيها كلمة قل كتير؟ إذا فيها الجانب الإعلامي والدعوي قوي، فانت دايما بتبادر بالجواب، ﴿قُل لِّمَن ما فِی السَّمَاوَاتِ وَالْأَرْضِ قُل لِلَّهِ﴾ [الأنعام: 12]. تسأل وأنت تبادر بالجواب، قلنا المبادرة بالجواب دي عشان تفحمه وعشان تزيل الركام اللي على الفطرة، لو ترك وفطرته لقال هذا الجواب: ﴿قُلِ اللَّهُ﴾.

فطالما أن الله عز وجل هو الكبير سبحانه وتعالى، وهو الأعلى سبحانه وتعالى، خلاص: ﴿شَهِيدٌ بَيْنِي وَبَيْنَكُمْ﴾ [الأنعام: 19] أي هو شهيد بيني وبينكم. مش أنتم عايزين حد يشهد لي؟ أنهم بيقولوا في سبب نزول الآية دي أنهم قالوا له شوف حد يشهد لك، ما فيش حد يشهد لك، حتى أهل الكتاب يشهدوك ضدك، لذلك الآية اللي بعدها جت إيه؟ ﴿الَّذِينَ آتَيْنَاهُمُ الْكِتَابَ﴾ [الأنعام: 20] هترد عليهم بقى لأن هم وقفوا مع المشركين ضد النبي صلى الله عليه وسلم، وما كانش ده المنتظر منهم، يعني هم أهل كتاب ونزل كتاب اللي هو القرآن، كان المتوقع يقفوا مع الموحدين أمام الوثنيين، لكن المصالح والبغي اللي بينهم خلاهم يختاروا إنه يفضل الصنم على التوحيد والعياذ بالله.

قل أي شيء، قل أي شيء أكبر شهادة، قل الله. بعض المفسرين قال: يستحب أنك تقف هنا أو تقول قل الله شهيد، لو قلت قل الله شهيد خلاص هتبقى شهيد خبر، لو قلت قل أي الله عجل أكبر شيء في الكون، وبعدين تقف وتقول شهيد أي هو شهيد بيني وبينكم. كيف يشهد الله عز وجل للنبي صلى الله عليه وسلم أنه صادق؟ هل هينزل ملائكة تشهد دلوقتي زي برضه قل كفى بالله شهيدا بيني وبينكم ومن عنده علم الكتاب، آخر سورة إيه؟ آخر سورة الرعد: ﴿قُلْ كَفَى بِاللَّهِ شَهِيدًا بَيْنِي وَبَيْنَكُمْ وَمَنْ عِندَهُ عِلْمُ الْكِتَابِ﴾ [الرعد: 43] في قراءة -وأظنها خارج العشر-: ومن عنده علم الكتاب، يعني أنا ما جبتش علم الكتاب ده من عندي، ده من عنده.

خلاص، طيب الشهادة هنا هتكون إزاي؟ كيف يشهد الله للنبي؟ أهم شهادة، تكملة الآية: ﴿وَأُوحِيَ إِلَيَّ هَذَا الْقُرْآنُ﴾ [الأنعام: 19]. يبقى أكبر شهادة أنه ينزل لي إيه؟ طب أنتم عايزين إيه؟ ده يبقى احنا عمالين نلف ونتراجع تاني بنفس القضية، أنا ما معييش غير القرآن من أول آية بدأ فيها الإعراض، ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ﴾ [الأنعام: 4] اللي هو القرآن، لغاية ما احنا طول ما احنا ماشيين هنفضل ماشيين لغاية لما نشوف آخر الأنعام، أنا ما معييش آية غير الآية غير القرآن، ﴿وَأُوحِيَ إِلَيَّ هَذَا الْقُرْآنُ﴾. دي أكبر شهادة من الله عز وجل، أكبر شهادة من الله عز وجل للنبي صلى الله عليه وسلم، خلاص؟

وقيل يشهد له بالفطرة، يعني ربنا هيشهد لي أن لما أجي أقرأ عليك القرآن هتحس من جواك أن الكلام ده صح، الإحساس ده مين اللي حطه جواك؟ ربنا، دي شهادة الله عز وجل. وقيل يشهد له بس ده هيبقى في زمن النبي صلى الله عليه وسلم بالمعجزات الحسية اللي هتشوفوها: نبع الماء من بين الأصابع، خسوف القمر، وغير ذلك.

لأ، هم المشركين هنا يعني اللي أنت بتقوله هو ممكن يقول لي أنا أصلا مش معترف بالشهيد اللي أنت جبته، قل لا مش معترف بالله. فينا حاجتين هنا، المشركين هم يؤمنون بالله ولكن أن هو زي ما بيقولوا: ﴿وَلَئِن سَأَلْتَهُم مَّنْ خَلَقَ السَّمَاوَاتِ وَالْأَرْضَ لَيَقُولُنَّ اللَّهُ﴾ [الزمر: 38]. هم لا ينكرون وجود الله، هم بينكروا البعث، ينكروا الوحي، خلاص، فهنا أنت بتخاطب ناس مشركين مش جاحدين، مش ملحدين. طب حتى لو ملحد؟ أه، حتى لو ملحد، أنا هقول له بقى أنا إلهي يشهد لي وأنت هتشوف، يعني لو واحد ملحد أنا هقول له والله ليتمن الله هذا الأمر، الدليل أننا على الحق أن إلهي سيتم هذا الأمر رغم عز عزيز وذل ذليل، هيتم الأمر ده بعز عزيز أو بذل ذليل، هيتم الأمر ده في حياته بقى، في حياتي، في حياتي الأجيال، أنا أقسم أن الأمر ده هيتم، وأقسم أن القرآن لن يحرف، وأقسم أن القرآن سيبلغ الآفاق، أنا أقسم على ذلك، الثقة دي بتخليك أنت أكيد جايب الكلام ده من غيب، زيك زي ما قلنا في سورة طه، لما جه سيدنا موسى وراح لفرعون قال: ﴿اذْهَبَا إِلَى فِرْعَوْنَ إِنَّهُ طَغَى * فَقُولَا لَهُ قَوْلًا لَّيِّنًا لَّعَلَّهُ يَتَذَكَّرُ أَوْ يَخْشَى * قَالَا رَبَّنَا إِنَّنَا نَخَافُ أَن يَفْرُطَ عَلَيْنَا أَوْ أَن يَطْغَى * قَالَ لَا تَخَافَا إِنَّنِي مَعَسَ أَسْمَعُ وَأَرَى * فَأْتِيَاهُ فَقُولَا إِنَّا رَسُولَا رَبِّكَ﴾ [طه: 43-47].

لما راحوا قالوا له إيه؟ قالوا له إن رسول إيه ربك! طب ما هو فرعون مش معترف أصلا! طب ده واحد أصلا بيقول إنه ربهم! فراح بيقول له إيه؟ ﴿إِنَّا رَسُولَا رَبِّكَ﴾، أجي لك من عند سيدك، الأسلوب الضغط ده يخليه يتأثر: أن رسول ربك، فأرسل معنا بني إسرائيل ولا تعذبهم، قد جئناك باية من ربك، شوف التكرار، ولو سمعت الكلام مش هيحصل فيك حاجة، والسلام على من اتبع الهدى، أنا قد أوحي إلينا أن العذاب، طب ولو ما سمعتش الكلام؟ ربنا هيعذبك، إن العذاب على من كذب وتولى.

فرعون لما خطيبته أنت ده قال إيه؟ قال: ﴿فَمَنْ رَبُّكُمَا﴾ [طه: 49]، هو اتهز، أنتم جايين تبع مين؟ أنت أكيد وراكم حد، طالما أنت بتتكلم بالثقة دي يبقى أنت أكيد وراك حد، وده الأسلوب القرآني المتبع دايما: الضغط النفسي على المخالف أنك تكلفه عما يشك فيه على أنه وقائع. تاني، القاعدة دي مهمة جدا في القرآن: القرآن بيستعمل أسلوب ضغط نفسي على المخالف أنك بتتكلم مع عن الحاجات اللي بينكرها على أنها واقع مش بيتناظروا فيها، يعني بتتكال، ييجي مثلا في البعث أنت بتكلمه عن البعث بصورة الماضي كمان، ده أنا مش عايز أقول لك أنك مش بتكلمه بصورة الماضي، ده أنت تصور له شكله وهو قاعد في الجحيم يأكل من شجرة الزقوم، ويشرب من الحميم، ويصب فوق رأسه من عذاب الحميم، ده أنت بتخاطب واحد إيه اللي أنت بتقول له تفاصيل الآخرة دي؟ أنت بتخاطب واحد إيه منكر للبعث.

بتخاطبه على أنها وقائع سوف تحدث وسوف تمر بك شئت أم أبيت، ومش معنى أن أنت منكرها أن هي مش هتحصل، هتحصل غصب عنك، ويوم تقوم الساعة يومئذ يخسر المبطلون. ساعتها نشوف بقى إيه؟ مين اللي كان على الحق من اللي على الباطل.

فالآيات بتاعة معرفة الله تدي ثقة ويقين، خليك بقى زي إيه؟ زي سيدنا موسى كده وهو رايح لفرعون، قمة القوة في الطرح، قل أي شيء؟ قل أي شيء، أكبر شيء تقول له مين عايز؟ مين أي شيء في الكون أكبر؟ فقلت له قول الله، أنت جاوبت وقلت له هو شهيد، على حسب هو يعني شهيد بيني وبينكم. بماذا يشهد لك الله؟ أشهد ليه بأهم حاجة؛ القرآن: ﴿وَأُوحِيَ إِلَىَّ هَٰذَا الْقُرْءَانُ لِأُنذِرَكُم بِمِنه﴾ وليس أنتم فقط، ولكن ومن بلغه القرآن. هنا يقول له لأ، وكأن النبي صلى الله عليه وسلم وهو في المناظرة سحب نفسه خارج المناظرة، وخلى المناظرة بينهم وبين إيه؟ القرآن، بين الناس وبين إيه؟ القرآن.

لأن النبي صلى الله عليه وسلم عمره محدود بزمن وهيَموت، لكن القرآن مش محدود زمنه، لذلك قال: لأنذركم به، ومش معنى أن أنا مش... لو أنا رحت لناس أو القرآن وصل لناس مش أنا اللي بلغتهم، سوف يكون حجة عليهم، مش لازم أنا اللي أبلغه، لذلك قال: لأنذركم به، أي لينذركم أنا به، ومن بلغ، أي ومن سيبلغه القرآن، أياً كان المبلغ، وأياً كان المبلغ؛ إن الحجة تقوم بالايه؟ بالقرآن، الحجة تقوم ببلاغ القرآن. لذلك: ﴿وَإِنْ أَحَدٌ مِّنَ الْمُشْرِكِينَ اسْتَجَارَكَ فَأَجِرْهُ حَتَّىٰ يَسْمَعَ كَلَامَ اللَّهِ﴾ دي الحجة، طب مش هيَفهم؟ يبقى دورنا إن إحنا نعمل إيه؟ نفهمه إيه؟ كلام الله، يبقى دورنا مع الناس نفهمهم إيه؟ كلام الله حتى تقوم عليهم الحجة، حتى ننذرهم: ﴿لِأُنذِرَكُم بِهِ وَمَنْ بَلَغَ﴾ أي ومن بلغه هذا القرآن.

يبقى أنت كأنك بتقول له: أكبر شهادة من الله لي أنه نزل لي معجزة باقية إلى يوم القيامة، هي معجزة إيه؟ القرآن. معجزة القرآن في ما كل ما في القرآن من إعجاز، ده أنواع من الإعجاز، أن القرآن نفسه باقي إلى يوم القيامة، ده إعجاز، أنهم لن يستطيعوا أن أن يتكلموا بمثل القرآن، ده أيضاً نوع من الإعجاز. يبقى إذاً شهادة الله للنبي صلى الله عليه وسلم بالقرآن أنهم لن يستطيعوا أن يأتوا بمثل القرآن، وأن القرآن لن يحرف إلى يوم القيامة، وأن القرآن باق إلى يوم القيامة، وأثره باق إلى يوم القيامة، فدي أكبر شهادة.

خلاص؟ بعد القوة دي فبيقول لهم إيه بقى؟ بعد كل ما ما في السماوات والأرض وغير الله يتخذ ولياً: ﴿أَفَغَيْرَ اللَّهِ أَبْتَغِي حَكَمًا﴾ أأنتم بعد كل اللي قلته لكم ده تشهدون أن مع الله آلهة أخرى؟ أنتم لسه مصرين وهتشهدوا أن فيه آلهة في الكون؟ لو هم قالوا كده أنت تقول إيه؟ قل لا أشهد، قل إنما هو إله واحد، وإنني بريء مما تشركون. نقطة هنا مهمة قوي في مسألة قل لا أشهد، مسألة عدم شهود مواقف فيها شرك. لما يبقى فيه مجلس، هذا المجلس يشهد أن مع الله آلهة أخرى، أنت لازم تقول إيه؟ لا أشهد بكلامك أو بفعلك، تقول إيه؟ والموقف ده متكرر معنا في سورة الأنعام إذن ثلاث مرات، اللي هي إن الله حرم هذا، وقل لا ايش؟ فلا تشهد معه. وفي برضو: ﴿فَلَا تَقْعُدْ بَعْدَ الذِّكْرَىٰ مَعَ الْقَوْمِ الظَّالِمِينَ﴾ دي، و: ﴿وَإِذَا رَأَيْتَ الَّذِينَ يَخُوضُونَ فِي آيَاتِنَا﴾ يبقى اللي بيخوضوا في آيات الله، أو لا يشركوا مع الله، أو اللي هيحرموا ما أحل الله، دول الثلاث حاجات اللي جم في سورة الأنعام؛ شيء فيه إشراك، شيء فيه خوض في الآيات تحريف للقرآن، شيء فيه تحريم ما أحل الله.

ما لكش عذر أنك تبقى متواجد، لازم إيه؟ لا أشهد، لازم إيه؟ معنى الكلام ده إيه؟ واحد هيقول لي: طب معنى كلامك كده أن لو فيه مجلس شعب أو في دستور وفي شركيات لا يجوز لنا قطعا المشاركة؟ لا يجوز لنا قطعا إيه؟ المشاركة. إحنا بنقول ده أحد الأقوال آه، أن المسائل اللي فيها شركيات لا يجوز لك بأي حال من الأحوال أنك أنت تشارك، وأن مسألة المصالح والمفاسد لا تدخل في هذا الباب. بعض الناس يقول لك: لأ، في فارق أنك أنت تشارك تضع هذا الشرك، وأنك تشارك تخفف هذا الشرك؛ لو فيه مثلاً دستور وثيقة مجلس فيه شركيات تصل إلى تسعين في المية، وأنت شاركت عشان تخففوه من تسعين في المية إلى ثلاثين في المية، أنت تشارك، ولكن بشرط إيه بقى؟ الشرط أن التبيين بتاعك لا يتوقف على قدر التطبيق بتاعك. تاني، تاني نقطة دي، أن التبيين بتاعك، أنك تبين أن هنا في شركيات، وأن هذه الشركيات مما حرمها الله عز وجل وأخبرنا أنها حرام، وإحنا اضطررنا للجلوس هنا ونحن نرفض هذا، ولكن دي لأنها ميتة مضطر بنعبر بها إلى مرحلة قد تكون مرحلة وسيطة للوصول للخير الأمثل. يبقى أنت بايه؟ بتصل، بتصل كمرحلة مع التبيين، جلوسك من غير تبيين بيضفي شرعية على ما يحدث، هترجع تغير بعد كده تقول: أصل أنا... كان بيقول لك: لأ، أنت وافقت، أنت مضيت أهو، اسمك أهو، أنت من اللي إيه؟ من اللي موافقين على إيه؟ على الوثيقة دي، أنتم مين اللي النعم على إيه؟

فهو تيجي بعد كده تنقض، يقول لك: لأ، أنت ما بينتش. فلازم التبيين يبقى كامل، إحنا قلنا هنعذر في التطبيق، لكن لا نعذر في إيه؟ في التبيين. واحد هيقول لي: طب ازاي؟ طب ما يعني في مسألة مثلاً عقائد معينة أذن النبي صلى الله عليه وسلم أن أنت بتقول دلوقتي، وأنا باقول الكلام ده عشان أناقش نفسي عشان لو حد جاب حاجة يبقى إحنا الصورة تبقى متكاملة، أنت بتقول دلوقتي إحنا لا نعذر في إيه ولكن نعذر في إيه؟ في التطبيق: ﴿لَا يُكَلِّفُ اللَّهُ نَفْسًا إِلَّا وُسْعَهَا﴾. طب مش ربنا قال: ﴿إِلَّا مَنْ أُكْرِهَ وَقَلْبُهُ مُطْمَئِنٌّ﴾؟ يعني هينطق بكلمة إيه؟ شف، هيبين شيء عكس المطلوب، بعض العلماء اللي ترخصوا في مسألة خلق القرآن؛ هنا بنقول لا يجوز للأمة اسمع أن هي تعمل كده، هذا عذر وترخص لبعض إيه؟ الأفراد. إنما أن الأمة كلها تعمل كده، إحنا كده بنضيع الدين، لذلك أحمد بن حنبل كان رأى أنه ملوش رخصة، هو كعالم ثقة وفيه ترخص من كثير من العلماء، هو هنا ملوش رخصة أنه يتكلم بهذا الكلام. يبقى إذاً الأمة جمعاء لا عذر لها في تأخير التبيين عن وقت الحاجة، ودي القاعدة الأصولية المشهورة: لا يجوز البيان عن وقت الحاجة. قاعدة أصولية معروفة: لا يجوز تأخير البيان؛ يعني بيان سواء ده حلال أو حرام عن وقت الحاجة اللي إحنا محتاجينه، فوقت الحاجة هو إيه؟ هو شهودك مجلس فيه شرك، فانت لازم تقول إيه؟ قل لا أشهد.

أنا بطول في النقطة دي ليه؟ النقطة ديت هي اللي خلت بعض أفعالنا في الفترة الأخيرة يقولوا عليها متسمة بالتناقض، أن أنتم لما تبقى في صالحكم تقولوا نعم، ولما تبقى عليكم تقولوا إيه؟ قولوا لأ، إحنا مش واضحين من الأول وضوح كامل، فبيخلينا أن إحنا ظاهرياً متناقضين. لازم الوضوح، أنك أنت لما بتختار القانون ده أو الدستور ده أو الشخص ده وأنت عارف أن مش ده الاختيار الأمثل وأن هو فيه دخن، أنت تبين ذلك للناس عشان ما يتحولش الدخن ده إلى دين بعد كده، ويجي الناس يدينوا بالدخن اللي أنت طرحته، ترجع تقول لهم: لا يا جماعة، ده أنا إيه؟ لكن من الأول... ده نقطة، نقطة التبيين الكامل.

النقطة التانية اللي عايز أسقط فيها الواقع أيضاً من المشهد ده: قل لا أشهد، بوضوح. في فارق بين... في فارق بين العجز عن نصرة المظلوم، وبين مواقف عملية ظاهرياً شهادة وتأييد للظالم. تاني، في فارق بين العجز عن نصرة المظلوم؛ يعني الحجاج مثلاً وموقفه مع ابن الزبير وقتله لابن الزبير وصلبه لابن الزبير وإلقائه جثته في قبور اليهود، ده ظلم بين. من العلماء من قال إن دي فتنة، مع أن الحجاج هو آه ما كانش هو الخليفة، ده واحد عند الخليفة، اللي الخليفة ده أصلاً بيقيم الشرع وبيطبق الشرع، لكن عندهم جور وظلم، لكن هم أساساً كانوا بيعملوا كده وهم إيه؟ بيحجوا وبيجاهدوا نصرة الدين، يعني ما أوقفوش تطبيق الحدود الشرعية، لكن خلاف مين هو الخليفة ده ولا ده؟ فحصل القتال بينهم، واكتبوا علماء الحق مع ابن الزبير، أياً كان أن الحجاج هنا كان ظالم، معايا؟ ده كمان يعني الحجاج هنا ضمن خليفة بيطبق شرعه بيقيم حدود وجزء من خلافة إسلامية.

مواقف العلماء اللي اختاروا أن ده فتنة وانعزلوا زي ابن عمر، ما كانش تفسر إمام العامة أنه بيضفي شرعية على الحجاج، أن هو بيؤيد فعل الحجاج مع على مين؟ على ابن الزبير، لأ، بدليل لما صلب ابن الزبير راح ابن عمر وقف عليه وقال كلمتين يوضحوا التناقض اللي الناس مش فاهماه، أو ظاهرياً عند الناس تناقض في مواقف بعض العلماء، قال له: لقد كنت أنهاك عن... لقد كنت أنهاك عن هذا، لقد كنت أنهاك عن هذا. كده بيقول له: أنا كنت مخالفك في وجهة النظر، وبعدين ثم أثنى عليه وقال: والله ما علمتك إلا صواماً قواماً، والله لا أمة أنت شرها زي ما بيقولوا عليك، لا أمة خير... جمع ما بين الثناء عليه وبين أن أنا مخالفك في إيه؟ يبقى مش معنى أن أنا مخالفك وجهة نظر أن أنا بأيد اللي عمله الحجاج فيك وأقول عليك إيه؟ تستاهل، أو ظاهرياً أفعال... أفعالي من سكوتي وجلوسي بجانبه يؤيد أن أنا بأيد الفعل للحجاج فيك، لأ، وبلغ الحجاج ثناء ابن عمر وعنفه، لكن استمر ابن عمر على الثناء. معايا شمس المشهد يا مرتضى؟

فارق، لأن دلوقتي بيحصل مشاهد بيتلبس على الناس، في عالم هيقول في بعض المواقف دي فتنة وينعزل، انعزاله واعتياره أن ده فتنة ما يسمحش له بمواقف عملية ظاهرة أنه بيطفي شرعية على إيه؟ واضحة، ده آخري: ﴿قُلْ إِنَّمَا هُوَ إِلَٰهٌ وَاحِدٌ وَإِنَّنِي بَرِيءٌ مِّمَّا تُشْرِكُونَ﴾.

طب هم قالوا له: مين يشهد لك؟ أنت راجل معك كتاب، المفروض اللي يشهد لك بتوع الكتاب. إحنا طول عمرنا أميين، خدوا يا بتوع الكتاب، اللي هم مين؟ اليهود والنصارى، تعرفوا الراجل ده عندكم في الكتاب؟ ولا عمرنا شفناه. متأكدين؟ متأكدين. طب أنتم شايفين ده... ده حوار بين المشركين واليهود، المشركين راحوا لليهود: عندكم الراجل ده في الكتاب بتاعكم؟ اليهود: ولا عمرنا شفناه. متأكدين؟ متأكدين. طب هنسألكم سؤال، المشركين بيسألوا مين؟ اليهود، هنسألكم سؤال: إحنا أفضل ولا هم؟ وقبل ما يجاوبوا المشركين قالوا اليهود إحنا، عشان اليهود يجاوبوا إجابة كاملة بقى يبقوا فاهمين الوضع، المشركين بيقولوا اليهود: إحنا بنصل الرحم وبنسقي الحاج وبنقري الضيف، هو الدين الجديد فرق به بين الاب وابنه وقطع الارحام، أنتم إيه رأيكم؟ اليهود قالوا: والله لدينكم خير من دينه، بل في رواية أن هو إيه؟ ظل يتأمل شوية، يقعد يفكر، فايه؟ بعد ما درس المسألة قال إيه؟ لأن دينكم خير من إيه؟ من دين هؤلاء أهدى، اللي هي إيه؟ في تفسير سورة النساء: ﴿هَٰؤُلَاءِ أَهْدَىٰ مِنَ الَّذِينَ آمَنُوا سَبِيلًا﴾ هؤلاء المشركين أهدى، قول ده لليهود: أهدى من الذين... وبعض الروايات حتى ذكرها الإمام الطبري أن لولا إحنا مش... طالما دينا خير مش هنصدقك إلا أما تسجد لهذه الأصنام، وماله؟ فسجد للايه؟ للأصنام.

فهنا فربنا بيقول: الناس اللي ما رضيتش تشهد للنبي صلى الله عليه وسلم، دول: ﴿الَّذِينَ آتَيْنَاهُمُ الْكِتَابَ يَعْرِفُونَهُ كَمَا يَعْرِفُونَ أَبْنَاءَهُمْ﴾ اللي ما رضوش يشهدوا للنبي صلى الله عليه وسلم، دول عارفين أن هو رسول كما يعرفون أبناءهم: ﴿فَإِنَّهُمْ لَا يُكَذِّبُونَكَ﴾ زي ما هتيجي لنا: ﴿وَلَٰكِنَّ الظَّالِمِينَ بِآيَاتِ اللَّهِ يَجْحَدُونَ﴾ جحدوا بها واستيقنتها أنفسهم ظلماً وعلواً طلباً للعلو، وطلباً للظلم، ولكن وقعوا في نفس ما وقع فيه المشركين أنهم دمروا فطرتهم، الذين إيه؟ خسروا أنفسهم فهم يؤمنون، ودي شرحناها بالتفصيل في المرة اللي فاتت أن مش معناها زي ما بعض المفسرين قال: الذين لا يؤمنون هم الذين خسروا أنفسهم يوم القيامة. لأ، الذين خسروا أنفسهم في الدنيا. يعني إيه خسروا أنفسهم؟ يعني قروا فطرتهم، ما عاملش نفسه على أنها نفس بني آدم، نفس إنسان: ﴿الَّذِينَ خَسِرُوا أَنْفُسَهُمْ فَهُمْ﴾ أي فبالتالي هم لا يؤمنون، أي فينتج عن إهمال الإنسان نفسه، النفس البشرية محتاجة أنك تعاملها كنفس، النفس البشرية تعاملها إيه؟ يعني الحيوان بتعاملّه كحيوان، يعني من الرفق بالحيوان، من الرفق بالحيوان أنك أنت وأنت بتذبحه تحد الشفرة وتريح الذبيحة، مش معنى أنك ذبحته أنك أنت كده مجرم معه، لأن هذا ما يفعل مع الحيوان، ما أذن لنا أن نفعله مع إيه؟ مع الحيوان.

الرفق بالنفس البشرية كإنسان يرفق بنفسه أنه يسمح لها أن ترى الهدى والعلم، ما يعملش مع نفسه زي ما المرأة اللي دخلت النار عملت مع الهرة، لا هي أطعمتها ولا هي تركتها تأكل من خشاش الأرض، لا هو بيعلم نفسه الدين، ولا سايب نفسه يسمع كلمتين عن ربنا، ييجي حد يكلمه عن ربنا يسد ودانه مش عايز يسمع، ولا هو راح يتعلم دينه. ﴿الَّذِينَ خَسِرُوا أَنْفُسَهُمْ﴾ فنفس المرض اللي وقع فيه المشركون وقع فيه اليهود حرصاً على الدنيا، وأن الرابط المشترك دايماً بين الاثنين...

والحرص على الدنيا، وربنا جمع ده في سورة البقرة: ﴿وَلَتَجَدَّنَّهُمْ أَحْرَصَ النَّاسِ عَلَى حَيَاةٍ وَمِنَ الَّذِينَ أَشْرَكُوا﴾ [البقرة: 96]. يعني الرابط المشترك بين اليهود والمشركين هو إيه؟ لكن لو عملنا مقارنة مين اللي يبقى أحرص على الدنيا؟

اليهود؛ ولستنجهم أحرص الناس على حياة ومن الذين أشركوا، أي أحرص من الذين أشركوا. معي؟ قل إنما هو إه واحد والناس بريء مما تشركوا، الذين آتيناهم الكتاب اليهود والنصارى اللي رفضوا يشهدوا للنبي صلى الله عليه وسلم يعرفونه كما يعرفون أبناءهم، الذين خسروا أنفسهم فهم لا يؤمنون بما قرأت في معنى آية تعرفونها وكما يعرفون أبناءهم، إنهم هي بذلوا مجهود ضخم للمعرفة التفصيلية لهذا الدين لأجل أن ينقضوه، معي؟ يعني هي بذلوا مجهود ضخم جدا زي المستشرقين كده، يدرسوا الدين ده دراسة تفصيلية عشان إيه؟ عشان ينقضوه من الداخل.

لأن دايما اللي بينقد من برة ده بيرجو من مكان بعيد ما بتجيش، إنما لما ينقد من الداخل يقول لك ده الحديث رقم تلتلاف وربعمية وخمسين في صحيح البخاري، فتلاقيه بيتكلم من إيه؟ من الداخل.

أيوه إن هو لا ده حد زي جلال بطرس مستعلن، يعني هو نصراني بيعلق الصليب، لكن في واحد يقول لك أنا باحث عن الإنسانية، يعني يقول لك أنا باحث عن الإنسانية، أنا ما أنا باحث عن الحق بيظهر في هذه الصورة.

خلاص! لذلك ربنا جمع ما بين الطائفتين. السورة في غالبها بتخاطب المشركين وهي مكية، لكن في تعريض بأهل الكتاب في ثنايا هذه السورة في أكتر من موضع، فجابت طائفتين: ﴿وَمَنْ أَظْلَمُ مِمَّنِ افْتَرَى عَلَى اللَّهِ كَذِبًا﴾، دول المشركين ولا اليهود؟ اليهود. ﴿أَوْ كَذَّبَ بِآيَاتِهِ﴾، دول اللي هم مين؟ المشركين، كذب بآيات الآيات اللي عمالة تتعرض عليهم: ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ﴾ مش عايز يسمعها، والتانيين افتروا على الله الكذب وحرفوا دين الله عز وجل، وبدأ باليهود لأنهم أشد إجراما.

أهل الدين المفسدين أشد إجراما من العصابة الشهوانية اللي عايزة دنيا؛ أهل الدين المفسدين المنحرفين عن الدين أشد إجراما من أهل الشهوات، دول بيبقوا عذر لاهل الشهوات أن هم يسيروا في الطريق المنحرف.

دايما المشركين لما كانوا يحبوا يستدلوا على صحة ما هم فيه كانوا يروحوا لليهود والنصارى في أكتر من موطن؛ عندنا موطن: ﴿هَؤُلَاءِ أَهْدَى مِنَ الَّذِينَ آمَنُوا سَبِيلًا﴾ في سورة النساء، وموطن ده لليهود، راحوا سألوا اليهود: مين أحسن احنا ولا هم؟ قالوا: اليهود قالوا لهم: أنتم.

موطن في سورة الزخرف: ﴿مَا سَمِعْنَا بِهَذَا فِي الْمِلَّةِ الْآخِرَةِ﴾ [صد: 7]، قيل الملة الآخرة آخر ملة كانت قبل بعث النبي صلى الله عليه وسلم اللي هو مين؟ النصارى، النصارى قالوا بالتثليث، قالوا اجعل الآلهة إلها واحدا إن هذا لشيء عجاب بعدها قال إيه: ما سمعنا بهذا في الملة الآخرة، ده الملة الآخرة حتى بتقول إن هم تلاتة، أنت ازاي جاي تقول واحد؟ فبيستدلوا بأهل الدين المفسدين على باطلهم. ودايما كل واحد من أهل الباطل يبحث عن أحد من أهل الدين يدعمه.

مين دلوقتي حضرتك ممكن تقول ده ممكن نخليه السؤال للحلقة؟ لذلك أنا هقول لكم على نقطة مهمة قوي كنت بقرأها في كتاب رائع بصراحة اسمه سنن الله في الأمم للشيخ صالح الحميد، بيقول إيه؟ بيقول دايما الدول الفاسدة الظالمة لازم تقنع الناس أن هي عايشة على مبدأ ديني، ده على مدار التاريخ، عشان لما ييجي يستنصروهم يحسسوهم أن الدين بيقع، لذلك قال لهم إيه: ﴿إِنِّي أَخَافُ أَن يُبَدِّلَ دِينَكُمْ﴾ [غافر: 26] هيغير هوية مصر، ﴿أَوْ أَن يُظْهِرَ فِي الْأَرْضِ الْفَسَادَ﴾، ده من زمان، وكمان من أيام سيدنا نوح لما جم عايزين اعملوا السورة على سيدنا نوح قالوا إيه؟ قالوا: ﴿لَا تَذَرُنَّ آلِهَتَكُمْ﴾ [نوح: 23]، ومش بس آلهتهم ده جابوهم إله: ﴿وَلَا تَذَرُنَّ وَدًّا وَلَا سُوَاعًا وَلَا يَغُوثَ وَيَعُوقَ وَنَسْرًا﴾ [نوح: 23]. أوعوا تسيبوا آلهتكم اللي أنتم تعبدوا دينكم وكذا. تخيل لما واحد عايز يحمس المسلمين أوعى تسيب الصلاة والصوم والحج، هم جابوا تفاصيل شركياتهم لأن ده بالنسبة عايزين يقنعوا مثلا ده دين، لذلك قالوا: حرقوه وانصروا آلهتكم، احنا مش مش بنحرقه عشان هو وحش ولا هو عشان عنده مشكلة سياسية أبدا، ده عشان عنده مشكلة إيه عقدية؟ عنده مشكلة في العقيدة، احنا بندافع عن عقيدتنا وانصروا آلهتكم.

يبقي دايما على مدار التاريخ زي ما قلنا أهو في سيدنا نوح وسيدنا إبراهيم وسيدنا موسى وفرعون وعمل معه غالب القضية دي أنه بيجمع الناس ودايما الدول على الفكرة لازم تبحث نفسها عن عقيدة ولو فاسدة، زي إسرائيل زي إيران، لازم تهيج الناس على العقيدة. لذلك تجد إيران بيتعمدوا أنه يصرفوا مصارف ضخمة على تهييج الناس تجاه العقيدة الشيعية، أن الدولة بتاعتهم قائمة على العقيدة الشيعية ديت.

فتلاقيهم إيه الناس اللي بتعيط ويصوتوا ودول على طول عندهم كتير، طب معهم عمرات بأسعار زهيدة جدا، ويطلعوا معهم مرشدين يقعدوا يهيجوهم بالمشاعر ويقعدوا العياط والقتل والتعذيب والتشريد اللي حصل لهم بيزكي هذه العاطفة، فتجد الشيعة أنت معتقد أنه إنسان شهواني لا ده هو عنده عقيدة فاسدة.

لذلك إسرائيل أو الدولة اليهودية المحتلة لأرض فلسطين فتجد أن لازم يبحثوا عن عقيدة فاسدة، ده دور مين بقى هنا؟ اللي ينصر السلطان الظالم اهل الدين المفسدين. مين اللي يعرف يقوم بالدور ده كويس؟ أهل الدين المفسدين.

السلطان الظالم الطبيعي ما عندوش ده، لازم يستعين بساحر ديني، كان فيمن كان قبلكم ملك وكان له كل ملك ظالم له ساحر، السحر نوعين: سحر إعلامي وساحر ديني يهيج العقائد الدينية الفاسدة دي عند الناس.

طيب: ﴿وَمَنْ أَظْلَمُ مِمَّنِ افْتَرَى عَلَى اللَّهِ كَذِبًا﴾ فابتدأ بهم.

نبدأ بهم اللي هم مين؟ المفسدين اليهود، ﴿أَوْ كَذَّبَ بِآيَاتِهِ إِنَّهُ لَا يُفْلِحُ الظَّالِمُونَ﴾ [الأنعام: 21]، ﴿وَيَوْمَ نَحْشُرُهُمْ جَمِيعًا﴾ [الأنعام: 22] جميعاً قيل المشركين واليهود وقيل جميعا المشركين وشركاؤه، وده أنسب للسياق: ﴿ثُمَّ نَقُولُ لِلَّذِينَ أَشْرَكُوا أَيْنَ شُرَكَاؤُكُمُ الَّذِينَ كُنتُمْ تَزْعُمُونَ﴾ [الأنعام: 22].

والسؤال ده برضه سواء تصريحا أو تلميحا تكرر في القرآن كثيرا وتكرر في الأنعام، هم فين؟ سؤال تبكيتى، مش أنت كنت بتقول الآلهة هتنصرك؟ مش أنت كنت بتقول دول هينصروك؟ ﴿أَيْنَ شُرَكَاؤُكُمُ الَّذِينَ كُنتُمْ تَزْعُمُونَ﴾.

فيقول الله عز وجل: ﴿ثُمَّ لَمْ تَكُن فِتْنَتُهُمْ إِلَّا أَن قَالُوا وَاللَّهِ رَبِّنَا مَا كُنَّا مُشْرِكِينَ﴾ [الأنعام: 23]. الآية ديت فيها إشكال عند، يعني كلمة فيها إشكال يعني العلماء بيجدوا النيابة ظاهريا تتعارض مع بعض الآيات وبيفكوا الإشكال ده.

ودي أحد أفكار مثلا، دي فكرة كتاب الإمام الشنقيطي صاحب التفسير: دفع إيهام التضارب عن آيات الكتاب. دفع إيهام أنت ممكن تهم أن فيه اضطراب ما بين آيات الكتاب، فقالوا دي ظاهرها متعارض مع قول الله عز وجل: ﴿وَلَا يَكْتُمُونَ اللَّهَ حَدِيثًا﴾ [النساء: 42]. هم هنا بيحلفوا والله ربنا ما كنا مشركين، هم هنا بيكذبوا على ربنا صح؟ ظاهر الآية بيقول كده، وفي كلمة ولا يكتم الله حديثا أن هم مش هيخبوا حاجة في الجمع، ازاي هنقوله دلوقتي؟

معنى الآية إيه الأول؟ يعني إيه كلمة ثم لم تكن فتنتهم إلا أن قالوا والله ربنا ما كلهم. أنتم الأول صاحيين ولا إيه؟ عشان الآية عايزة تركيز شوية، ولا نكتفي كده ونكمل، طيب. تأخر الرد ده يدل على الاستغراق في التفكير.

﴿ثُمَّ لَمْ تَكُن فِتْنَتُهُمْ إِلَّا أَن قَالُوا وَاللَّهِ رَبِّنَا مَا كُنَّا مُشْرِكِينَ﴾، فتنتهم أن هم قالوا، يعني لو شیلنا «لم» و«إلا»، أما أقول: وما محمد إلا رسول، كانت أصلها محمد رسول وبعدين جبتها في صيغة الحصر والقصر. أنا بقى هنا عايز أشيلها عشان أفهَم، يبقى فتنتهم: والله ربنا ما كنا مشركين، يعني إيه بقى فتنتهم؟

كتير من المفسرين قال إن الفتنة هنا بمعنى الاختبار، وايه الاختبار؟ السؤال، إن كان جواب سؤالهم يوم القيامة بتاع: أين شركاؤكم؟ ده سؤال إجابته: والله ربنا ما كنا مشركين، أي التنصل من الإشراك، حاولوا يعملوها على الظاهر كده، قالوا إن الفتنة هنا بمعنى السؤال والاختبار. طب فين السؤال اللي في الآية اللي قبلها؟ اللي هو إيه؟ أين شركاؤكم؟ وكانت الإجابة إيه؟ ثم لم تكن إجابة السؤال إلا أن قالوا والله ربنا ما كنا مشركين. ده المعنى، سيبك الوقت من التعارض اللي أنا كنت ذكرته، كده الآية واضحة أن اتسأل يعني إيه كفر بشركائه؟

اللي قال المعنى ده: يوم القيامة، ما هو ده الآية ماشية يوم القيامة ربنا بيقول: ﴿وَيَوْمَ نَحْشُرُهُمْ جَمِيعًا * ثُمَّ نَقُولُ لِلَّذِينَ أَشْرَكُوا أَيْنَ شُرَكَاؤُكُمُ الَّذِينَ كُنتُمْ تَزْعُمُونَ * ثُمَّ لَمْ تَكُن فِتْنَتُهُمْ إِلَّا أَن قَالُوا وَاللَّهِ رَبِّنَا مَا كُنَّا مُشْرِكِينَ﴾. يعني إيه؟ ثم لم يكن جواب هذا السؤال، أي هذا الاختبار، أي هذه الفتنة بالسؤال، إلا أن هم تبرأوا من الشركاء، دلوقتي عرف أن الله حق، ده معنى فكرة بقى طيب ازاي ما بيكذبوش؟

فيه رد عن الإمام ابن عباس قال إن ده في موطن وده في موطن، أن في موطن هيشوفوا المؤمنين يقولوا إن احنا كنا مخلصين ولم نكن مشركين فينجوا، فيجوا يقلدوا المؤمنين، ييجوا يقولوا: والله ربنا ما كنا مشركين فيفضحوا، فعندها لا يكتمون الله حديثا، كانوا بيقولوا كل حاجة.

خلاص! دعكوا من الإشكال، أنا عايز أفهَم الأقوال اللي في السياق. أول قول اتفهم سام يا عم إسلام، دي معناه إيه بقى؟ أنا عايز المعنى يتربط بنص الآية، يبقى معنى الآية إيه؟ ثم لم يكن جواب السؤال، اللي هو إيه؟ أين شركاؤكم؟ يبقى كلمة فتنة معناها اختبار وسؤال ومحذوف منها كلمة جواب، يبقى جواب سؤالهم، يبقى معنى الآية ربنا يريد أن يقول لنا إيه: كفروا بشركائهم عند العذاب، يعني قعدوا يعبدوهم ويعبدوهم وفي الآخر باعوهم، ده معنى الآية.

من المعاني التانية للآية: الفتنة هنا برضه بمعنى الاختبار ولكن في الدنيا، أن هم كانوا مفتونين بشركائهم وبيحبوهم جدا، وجه في الآخر كفر به في الآخر، ثم لم تكن عاقبة فتنتهم في الدنيا إلا أن قالوا والله ربنا ما كنا مشركين في الآخرة. أنا عايزكم تركزوا معي، أنا هقول هي فيها كذا قول، أنا هذكر تلاتة عايز نخرج بهم.

الأولانية: أن الفتنة والقسم الاتنين في الآخرة، فكده الفتنة بمعنى السؤال، يبقى لم يكن الجواب على السؤال في الآخرة إلا أنهم قالوا والله ربنا ما كنا مشركين، قصده يعني كنا في الدنيا، بس الإجابة اتنالت فين؟ في الآخرة.

المعنى التاني: أن الفتنة في الدنيا والإجابة في الآخرة، الفتنة في الدنيا ثم لم تكن عاقبة فتنتهم بالأصنام وحبهم للاصنام إلا أن تبرأوا بها، وجابوا مثال لها في اللغة العربية: والله ما كانت فتنتك بفلان إلا أن كفرت به. يعني مثلا أحد الناس اللي مواليين لبشار جدا وجنبه وبيحبوه وبيعزموه وبيسجدوا له وده اللي هينقذنا، ما بشار سقط بدأ إيه؟ أنا طول عمري بقول بشار وحش وقاعد يتنصل منه، فنقول له إيه؟ والله ما كان فتنتك ببشار إلا أنك تنصلت منه، يعني آخِر حبك لبشار، آخِرك مشيك مع بشار أن أنت في الآخر جيت بعته، إنما أهل الإيمان لما ارتبطوا بالله عز وجل نجاهم الله عز وجل يوم القيامة، إنما دول لما كانوا مفتونين بالأصنام جم يوم القيامة باعوا الأصنام، فكأن الكلام إيه؟ ده آخر حبكم للأصنام في الدنيا. وضحت؟

بمعنى إيه الفتنة؟ أن هو مفتون بها، بس هنقول عاقبة فتنتهم في الدنيا بالأصنام. الفتنة اللي هي الفتنة العادية أن هو مفتون بحاجة بيحبها. هما قالوا الفتنة لها أصلين في اللغة: الحب والاختبار، أن هو كان عاقبة حبك مفتون بحاجة بيحبها حب زائد عن اللزوم يفقد معه الوعي والعقل. الواحد مفتون بحاجة بيحبها حب زائد عن اللزوم تفقده عن الوعي والعقل، لما نقول واحد مفتون بامرأة مش بس بيحبها لأ، ما بيتصرفش معها التصرفات العاقلة أن هي فتنته، مفتون بالدنيا، طب ما الناس بتحب الدنيا، لأ ده الحب للدنيا وصل لدرجة أنه اضطراب الرأي، فلذلك يقولوا الفتنة: حب مع اضطراب في الرأي، أو خوف مع اضطراب في الرأي، أو اختبار مع اضطراب في الرأي، خلاص؟

هنا الفتنة أن هو فتن وهو لا، ده دي لسه اللي هنقولها بقى، ده القول التاني، دي معناها ثم لم تكن في محذوف اسمه عاقبة، الأولاني فيه محذوف اسمه جواب، الأولاني ثم لم تكن عاقبة جوابهم أو اختبارهم إلا، ثم لم تكن فتنتهم أي ثم لم يكن جواب فتنتهم جواب اختبارهم إلا أن قالوا.

التانية معناها: ثم لم تكن عاقبة فتنتهم بالأصنام في الدنيا نتيجة حبهم في الأصنام في الدنيا كانت كفروا بهم في الآخرة.

التالت بقى المعنى اللي أنت قلته: أن الفتنة والقسم المقصود به الدنيا، أن كانت الحاجة أكتر حاجة ضيعتني، وفتنتهم ثم لم تكن فتنتهم إلا أكتر شيء فتنهم ظنهم أن هم مش مشركين، اللي هي بقى: ﴿مَا نَعْبُدُهُمْ إِلَّا لِيُقَرِّبُونَا إِلَى اللَّهِ زُلْفَى﴾ [الزمر: 3]، اللي هي قول الله عز وجل في آخر يوسف: ﴿وَمَا يُؤْمِنُ أَكْثَرُهُم بِاللَّهِ إِلَّا وَهُم مُّشْرِكُونَ﴾ [يوسف: 106]، ﴿الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا﴾ [الكهف: 104].

يبقى القول التالت معناه: ثم لم تكن فتنتهم في الدنيا، يعني أكتر شيء فتنهم في الدنيا إيه؟ أكتر حاجة وفتنتهم، فتنهم يعني ضيعهم ووصلهم لجهنم هنا إيه؟ هل الفلوس؟ هل الدنيا؟ لا، لم تكن فتنتهم إلا ظنهم والله ربنا ما كنا مشركين، أن هو معتقد على الحق. الله! طبعا كل قول من ده له أخذ ورد.

احنا إيه فهمنا المضمون؟ أن أيا كانت دي آخرة نتيجة الأصنام أو الفهم الخاطئ للتوحيد، القول التالت: الفهم الخاطئ للتوحيد لما بيقول والله ربنا ما كنا مشركين ويتحاكم إلى غير الله، ده فاهم التوحيد غلط.

اتخذوا أحبارهم ورهبانهم أرباباً من دون الله، زي ما بيُروى في الحديث عن عدي بن حاتم، فقال رسول الله صلى الله عليه وسلم: «ما احنا ما بنعبدهمش ولا بنسجد لهم». فحصر العبادة في السجود غلط، لا العبادة مش بس في السجود، في طلب النفع والضر. الله بيضر، اعتقاد من يملك النفع والضر. مش النبي صلى الله عليه وسلم قال في صبيحة يوم المطير في حنين، قال الله عز وجل بيقول: «أصبح من عبادي مؤمن بي وكافر». الكافر فإن قال: مطرنا بنوء كذا وكذا فهو كافر بي. قالوا: اللي هيعتقد اعتقاد يقيني إن مش الله اللي بيدبر المطر، وأن هذه الأنواع من ذاتها خارج الإرادة الإلهية اللي بتنزل المطر ده كافر.

لا، ده دي حاجة تانية، ده معنى تاني في الآية، مش الكفر المخرج من الملة. خلاص يبقى إذا: ﴿وَمَا يُؤْمِنُ أَكْثَرُهُم بِاللَّهِ إِلَّا وَهُم مُّشْرِكُونَ﴾ [يوسف: 106]. ده أحد معاني: ﴿ثُمَّ لَمْ تَكُن فِتْنَتُهُمْ إِلَّا أَن قَالُوا وَاللَّهِ رَبُّنَا مَا كُنَّا مُشْرِكِينَ﴾ [الأنعام: 23]. انظر كيف كذبوا على أنفسهم! الإشكال ما احنا قلنا ابن عباس حلوها، لو القول التالت كده ما فيش إشكال، لأن القول ده أصلاً معناه في الآية في الدنيا، فما فيش إشكال.

أما يوم القيامة: ﴿لَا يَكْتُمُ اللَّهَ حَدِيثًا﴾ [النساء: 42]. القولين التانيين إن ده يتقال يوم القيامة، قالوا إن ده في موطن وده في موطن. في معنى رابع بقى، إن القول بتاع: ﴿وَاللَّهِ رَبُّنَا مَا كُنَّا مُشْرِكُونَ﴾ [الأنعام: 23] إن الفطرة يوم القيامة بتنطق بطبيعتها، لأنهم اعتقدوا لما شافوا كل حاجة بالزبط زي اللي إيه عشان تفهم القول الرابع ده.

بالزبط زي المؤمن، أيوه المؤمن الفقير اللي اتغمس غمسة في الجنة واتقال له: هل ذقت بؤساً؟ فقال: والله ما ذقت بؤساً قط. أهو بيحلف أهو، هو مش بيكذب، الغمسة نسته اللي كان في الدنيا، فمشاهد يوم القيامة نسته اللي كان بيعمله في الدنيا، لما رأى الله يملك كل شيء وهو لا يملك كل شيء، وكل العبيد خاضعين لله، وإبراهيم يجسو على ركبتيه ويقول: يا رب سلم سلم، والناس مشيكين يجسون على شفير جهنم.

لما شاف المشاهد دي قال: ﴿وَاللَّهِ رَبُّنَا مَا كُنَّا مُشْرِكُونَ﴾ [الأنعام: 23]. قالوا: ده لما قالها لا يقصد بها الكذب. ولكن في آيات في القرآن بتدل إن هم يحلفوا بالكذب يوم القيامة، فعشان كده ترجيح ابن عباس هو الأولى، إن ده موطن وده موطن، اللي هي آيات سورة المجادلة: ﴿يَحْلِفُونَ عَلَى اللَّهِ الْكَذِبَ﴾ [المجادلة: 14]، ﴿يَحْلِفُونَ لَهُ كَمَا يَحْلِفُونَ لَكُمْ﴾ [المجادلة: 14]. هو معتقد إن الكذب على الله هيمشي زي الكذب على الناس.

انظر كيف كذبوا إيه؟ شف ما قالش: كيف كذبوا على الله. دي نفس فكرة الذين خسروا أنفسهم، هو كان بيضيع نفسه، نفسه كبشر كانت محتاجة إلى إله، ضحك على نفسه وكذب عليها، قال لها: أنا هشوف لك إله. يعني النفس البشرية خد بالك من كلمة كذب على أنفسهم، كذبوا، النفس تحتاج إلى إله تسجد له وتلجأ إليه. النفس البشرية تحتاج إلى إله فبيكدب على نفسه يقول لها: الصنم ده هيحل لنا مشاكلنا، فلان ده هيظبطنا، هو عمال يكذب على نفسه.

فقعد يكذب على نفسه لغاية لما خسر نفسه: ﴿الَّذِينَ خَسِرُوا أَنفُسَهُمْ﴾ [الأنعام: 12]. وفي الآخر الناس اللي كان بقى عمال يطمن نفسه بهم راحوا فين؟ دعوا وضل عنهم ما كانوا يفترون. ضل أصله يقال في اللغة: ضل اللبن في الماء، لما تحط شوية لبن صغيرين في برميل مية وتبص كده تلاقي إيه؟ فين اللبن؟ ضاع. هو ده كده بالزبط، ييجي مشهد إن اللي يبيعك وتيجي تدور عليه ما تلاقيهوش، هو ده المشهد: ﴿وَضَلَّ عَنْهُم مَّا كَانُوا يَفْتَرُونَ﴾ [الأعراف: 153].

إيه رأيكم؟ أزيدكم؟ إحنا بادئين الساعة كم؟ إحنا بقالنا قد إيه كده؟ الساعة عشرة بالليل، إحنا بقالنا ساعة وعشر دقايق؟ إن شاء الله، لا أكيد الكاميرا دي مش موجودة، لأ اتصرف أستاذ عشر دقايق كده، أنا هوقف نكتفي بهذا؛ لأن منهم ده صنف جديد من المشركين، يعني: ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ إِلَّا كَانُوا عَنْهَا مُعْرِضِينَ﴾ [الأنعام: 4]. دول بيعرضوا، في صنف بقى بيجي يسمع، جاي يسمع بقى ليه؟ وايه أغراضه؟ هزا ما سنعرفه في الحلقة القادمة. سبحانك اللهم وبحمدك، أشهد أن لا إله إلا أنت، أستغفرك وأتوب إليك.