د. أحمد عبد المنعمالسلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم.
نستكمل بإذن الله عز وجل تفسير سورة الأنعام، توقفنا عند قول الله عز وجل الآية خمسين، صفحة مئة وثلاثة وثلاثين في المصحف السعودي.
ختمنا في المرة الماضية بعد ما وضحنا الضغط اللي القرآن بيضغط به على نفوس أهل الباطل، وقلنا من وسائل القرآن للدعوة إنه بيعيش المخاطب في وضع الابتلاء؛ بيقول له: تخيل نفسك في نص البحر، تخيل نفسك في المرض، تخيل نفسك وأنت بتموت، تخيل نفسك، وبحطه في الأوضاع اللي أنت عارف إن الفطرة البشرية عارفة مدى ضعفها؛ يعني الإنسان ضعيف. فرعون اللي كان بيقول: أنا ربكم الأعلى، أول لما حس بالغرق قال: آمنت أنه لا إله إلا الذي آمنت به بنو إسرائيل وأنا من المسلمين.
فالفطرة البشرية عارفة مواطن ضعفها، فانت دورك -احنا قلنا من أساليب القرآن زي ما شفنا- دورك إنك بتحسس اللي قدامك وبتوضحه وبتبين له إن هو هيمر بهذه المواقف؛ ليه هيمر بهذه المواقف؟ لأنه إنسان بشر ضعيف، والأمور بتتبدل تلك الأيام ونداولها، ما فيش حاجة ثابتة، وليس معه من الأسباب ما يمنع عنه هذه الأشياء. وكما أهلكنا قبله من قرن هل تحس منهم من أحد أو تسمع لهم ركزا؟ فين اللي كان بيقول: أنا ربكم الأعلى؟ فين اللي كان بيقول: من أشد منا قوة؟ كل الأشخاص دي زالوا.
القرآن بيضغط على الضعف اللي موجود في الفطرة، الضعف اللي داخل الفطرة ده هو اللي محتاج ربنا، ألا يعلم من خلق وهو اللطيف الخبير؟ الضعف اللي داخل الفطرة البشرية ديت، لحظات الضعف دي هي اللي بتتجه إلى إيه؟ إلى الرب سبحانه وتعالى. فاحنا دورنا إن احنا نذكر الناس؛ لما الناس بيطغوا وبيبعدوا وبيطول عليهم الأمد في فترات من الرزق والصحة وغير ذلك، نذكرهم بفترات الضعف اللي الفطرة بتلجأ فيها إلى الله عز وجل.
وبعدين قلنا: ﴿وَمَا نُرْسِلُ الْمُرْسَلِينَ إِلَّا مُبَشِّرِينَ وَمُنذِرِينَ﴾ [الأنعام: 48]. قلنا وظيفة الرسل مش إيجاب خوارق الآيات اللي هم بيطلبوها، الرسل مش جايين يعملوا ما يطلبه المستمعون؛ عايزين نفق في الأرض، حاضر، عايزين سلم في السماء، حاضر، عايزين ينبوع في الأرض، عايزين كتاب في قرطاس، عايزين أطلعكم سما، عايزين تطلعوا أنتم السماء، ليست هذه وظائف الرسل.
أمال إيه وظيفة الرسل؟ معه رسالة، مبشر ومنذر، فبالتالي في ناس هتؤمن وفي ناس هتكذب؛ اللي هيؤمن ويصلح فلا خوف عليهم ولا هم يحزنون، والذين كذبوا بآياتنا يمسهم العذاب بما كانوا يفسقون.
ثم الآية بقى بتاعة النهاردة، يقول الله عز وجل آمراً النبي صلى الله عليه وسلم أن يستعلن وأن يعلن ويقول للمشركين ولغيرهم: قل -قلنا سورة الأنعام أكتر من أربعين مرة فيها قل، هجوم إعلامي، رد على الهجمة الإعلامية اللي عملها المشركون، هجوم إعلامي-. في مواطن معينة في سورة الأنعام لازم تذاع وتتعلى، اللي بيبقى قبلها قل، منها: ﴿قُل لَّا أَقُولُ لَكُمْ عِندِي خَزَائِنُ اللَّهِ وَلَا أَعْلَمُ الْغَيْبَ وَلَا أَقُولُ لَكُمْ إِنِّي مَلَكٌ ۖ إِن أَتَّبَعُ إِلَّا مَا يُوحَى إِلَيَّ ۚ قُل هل يستوي الأعمى والبصير ۚ أفلا تتفكرون﴾ [الأنعام: 50].
النبي صلى الله عليه وسلم هنا ربنا أمره إنه يقول إنه ما عندوش تلات حاجات؛ ما عندوش خزائن الله، ما عندوش علم الغيب، ليس ملكاً. أمره إنه يقول التلات حاجات دول؛ ليه النبي صلى الله عليه وسلم أُمِر أن يقول لهم التلات حاجات دول؟
أولاً: سياق الآيات دي في نفس المعنى؛ إن أنا ما عنديش الخوارق اللي أنتم عايزينها، اللي أنتم عمالين تقولوا: طب لولا نزل عليه ملك! طب كتاب في قرطاس! طب نفق في الأرض! طب سلم في... ده مش عندي، وده مش عندي، وما عنديش غيره كمان؛ يعني عشان ما تقعدش تفكر بقى وتقعد تطلب حاجات تانية، أنا ما عنديش ده. ﴿قُل لَّا أَقُولُ لَكُمْ﴾ -أنا ما قلتلكوش عندي خزائن الله ولا أعلم الغيب ولا أقول لكم إنني ملك-.
إشمعنى التلاتة دول؟ بعضهم قال: خزائن الله دي المقصود بها الغنى المال، وأعلم الغيب العلم بتاع المستقبل، والملك ده القوة. قال لهم: أنا ما قلتلكوش إن أنا أغنى البشر ولا هخليكم تبقوا أغنى البشر، وما قلتلكوش إن أنا عندي حل لكل مشاكلكم الدنيوية وعارف حلها وعارف إيه اللي هيحصل، ده مش عندي، ولا قلت لكم إن أنا عندي قوة خارقة.
خطورة طرح الدعوة إنها خطورة طرح الدين على أنه لمسة سحرية هتدخل حياة الناس تصلح لهم كل مشاكلهم الدنيوية، خطر جداً الموضوع ده. خطورة طرح الدين على أن الدين لمسة سحرية؛ بمجرد ما الإنسان ينطق بالشهادتين أو يقترب من الدين أو يمسك المصحف أو يبوس المصحف ويحطه في رأسه، أو يمسح الحجر الأسود أو يبوس الحجر الأسود، اعتقاد اللمسات السحرية التي تحدث في الدين، ده خطر أن احنا نوصل للناس إن ده الدين كده، إن أنتم بمجرد ما تختارونا عشان أصحاب دين، أو بمجرد ما تأمنوا بالكتاب ده، هتفاجئوا هتلاقوا سرائركم بقت دهب وبيوتكم بقت مليانة فلوس، والزبالة اتشالت من الشوارع، والمطر نزل من السماء. لأ، مش لازم.
احنا لازم نعرفهم -لما زي ما سيدنا نوح... في حاجة اسمها الأثر الدنيوي للدين، ده قطعا موجود؛ ﴿وَلَوْ أَنَّ أَهْلَ الْقُرَى آمَنُوا وَاتَّقَوْل لَفَتَحْنَا﴾ دي بتاعة ربنا، يرسل السماء عليهم مدراراً-. لكن أنا عبد، أنا بأبلغ الرسالة، لكن زي ما ربنا قال إنه بيفتح، قال إنه يبتلي، زي ما ربنا قال إنه يعطي الدين ويمنع، وقال إن الحاجات دي بتحصل ابتلاعات، لكن أنا مش هديكم... أنا من الأول ما طرحتش عليكم الدين... إنما ربنا أصل اللي بيعمل الحاجات دي ربنا.
فدخلت عندهم رهبة ما بين كذا حاجة؛ رقم واحد: الخلطة اللي عندهم بين مقام الألوهية والربوبية وبين مقام العبودية، ولازم النبي صلى الله عليه وسلم والأنبياء كلهم وبالتالي الدعاة، يفضل الفاصل الواضح ده بين الربوبية وبين العبودية واضح عند الناس.
النبي صلى الله عليه وسلم كثيراً ما يقول: إنما أنا عبد. يقول للراجل اللي قال: من يطع الله ورسوله فقد رشد ومن يعصهما فقد غوى، قال: بئس خطيب القوم أنت؛ عشان حط ربنا والنبي صلى الله عليه وسلم في ضمير واحد: ومن يعصهما. لما قال له: ما شاء الله وشئت، قال: أجعلتني لله ندّاً؟ كان حرص غير عادي على الفصل الواضح بين مقام الربوبية مقام الرب ومقام العبد. والنبي صلى الله عليه وسلم: إنما أنا عبد.
والآخرة، فاحذر قبل أن يموت يقول: «لعن الله اليهود والنصارى اتخذوا قبور أنبيائهم مساجد»، لغاية وهو بيموت وخايف من الموضوع ده؛ النبي صلى الله عليه وسلم أن يحصل الغلو زي ما حصل الصلاة عند النصارى. ده خلط.
الخلط التاني: مقام الرسالة غير مقام الإصلاح الدنيوي، دي نقطة مهمة جداً واتكلمنا فيها بتحتاج تفصيل. مش معنى أن احنا بنقول إن مقام الرسالة غير مقام الإصلاح الدنيوي أن احنا نقول إن الدعاة إلى الله ما لَهُمش علاقة بإصلاح دنيا الناس، لأ؛ الدعاة إلى الله واجب عليهم السعي في إصلاح دنيا الناس، وضع برامج شرعية لإصلاح دنياهم، لكن مش بمجرد ما هيقولوا: آمنا، حياتهم كلها هتتحول لذهب وفضة. لأ، يظل فيه سنن للدنيا محتاجة بذل، محتاجة بحث علمي، ومحتاجة تقدم، ومحتاجة سعي في الدنيا.
الخلط ده وهيستمر معانا، واضح إن الخلط مستمر معانا النهاردة في الآيات، عند قول الله عز وجل: ﴿وَكَذَلِكَ فَتَنَّا بَعْضَهُم بِبَعْضٍ لِّيَقُولوا أَهَؤُلَاءِ مَنَّ اللَّهُ عَلَيْهِم مِّن بَيْنِنَا﴾ [الأنعام: 53]. مقام الرسالة أنك... الرسالة، أنا قلت لك: أنا رسول من عند الله. عايز إيه؟ جايب لكم رسالة من عند ربنا عشان الهدى، يبقى تطالبني بأشياء فيها إيه؟ هدى. فانا جبت لكم الآية، القرآن، ربنا نزل علي القرآن، ما قلتلكوش أنا جاي أحول لكم حياتكم بلمسات سحرية إلى أفضل بقعة في بقاع الأرض الدنيوية.
لو الناس وصل لها المعنى ده، هتفضل زي ما قلنا، هتفضل تطالبك وتضغط عليك نفسياً: صلح لنا دنيتنا! صلح لنا دنيتنا! لكن أنا ما عنديش... احنا نشوف بقى السنن الدنيوية لإصلاح الدنيا، سواء زي ما بنقول بحث، مذاكرة، جهد، زراعة، صناعة، تجارة، أياً كان، دي لها سنن غير قضية الهدى الخوف من الدار الآخرة، دي لها طريق. أنا بقى ما تقوليش: يلا أنا بقيت مؤمن، أيوه هنعمل إيه؟ يعني المفروض بما إن أنا مؤمن يبقى احنا نبقى أغنى دولة في العالم! واتقي الله، وأعمل إيه بس الدنيوية زي ما أنت بتقول بقى كده؟ لا، امنح صلاح ما تحت قواعد الشرع، ما احنا بنقول يعني زي ما الزواج يعني مش معنى أنك بقيت مؤمن أني مطالب أني أوفر لك زوجة وأولاد ومسكن، مش أنا مؤمن يعني؟ أنا مؤمن يعني إيه؟ المفروض بقى أن أنت أول لما تبقى مؤمن أنك أنت فجأة يجي لك زوجة ويجي لك أولاد! لا، طب هيجي لك زوجة وأولاد ازاي؟ هتبحث عن زوجة وتجيب فلوس عشان تتجوز، لكن هتعمل ده داخل إطار الشرع برضه؛ يعني اللي هيبحث عن زوجة هيتزوجها بما يرضي الله، هيشوف القواعد الشرعية للزواج وللنكاح والآداب والطلاق ومعاملة الأولاد.
كل ده الحياة الاجتماعية دي مذكورة في القرآن، لكن مش معنى أن هو يقول: إيه ده؟ ازاي أنا مؤمن وما جاليش زوجة؟ ازاي أنا مؤمن واتغلبنا في أحد؟ ازاي أنا... دي أصبح الفكر ده تسرب حتى عند المؤمنين، عند بعض المؤمنين وهو معتقد أنه بمجرد ما يمسك المصحف كده خلاص، إذن كان المفروض حياته تتحول على طول، إن العربية السبعة وعشرين اللي برة تبقى بي إم، هو معتقد خلاص إن الحياة تتقلب، يعني بمجرد ما عملت كده أو أن أنا أروح... نفسه يروح يعمل عمرة، ليه؟ أول لما يمسح على الحجر الأسود كده وبس خلاص كل حياته هتتقلب وهتتغير! اللمسات السحرية دي مش موجودة، بالدعاء يدعي ربنا سبحانه وتعالى، يرجو الله عز وجل، يسعى في الأسباب، يأخذ الأسباب، دي سكة. أنا ما قلتلكوش إن ده عندي من الأول.
لذلك لما هم نفس التلات حاجات دول؛ إنه ما عندوش خزائن الله ولا يعلم الغيب ولا أنه ملك، نفس الحاجات دول سيدنا نوح نفاهم عن نفسه في سورة هود، نفاهم عن نفسه ليه؟ هم قالوا له: ﴿مَّا نَرَاكَ إِلَّا بَشَرًا مِّنۡلَا وَمَا نَرَاكَ اتَّبَعَكَ إِلَّا الَّذِينَ هُمْ أَرَاذِلُنَا بَادِيَ الرَّأْيِ وَمَا نَرَى لَكُمْ عَلَيْنَا مِن فَضْلٍ﴾ [هود: 27]. يعني إيه: وما نرى لكم علينا من فضل؟ يعني بيقولوا لهم إيه؟ الإيمان بتاعكم يعني ما عملكوش حاجة جديدة، يعني هم قالوا له إيه؟ وما نَرَاكَ إلا بشراً مثلنا، وما نراك اتبعك إلا الذين هم أراذل، وأنتم أنتم الاتنين على بعض، وما نرى لكم علينا من فضل، أنتم يعني... يعني آمنتم يعني إيه اللي جد عليكم؟ يعني أنزل لكم سفينة من السما يعني ولا طرتم في الهوا ولا بقيتم أحسن من أي فلوس؟ ما أنتم بقيتم زي ما أنتم.
هو عنده فهم أن اللي يدخل في الدين ده يحصل فيه إيه؟ تحول مباشرة. وربنا قال إن ربنا كان ممكن يعمل كده، بس ما أرادش عشان الناس ما تفتنش: ﴿وَلَوْلَا أَن يَكُونَ النَّاسُ أُمَّةً وَاحِدَةً لَّجَعَلْنَا لِمَن يَكْفُرُ بِالرَّحْمَٰنِ لِبُيُوتِهِم سُقُفًا مِّن فَضَّةٍ وَمَعَارِجَ عَلَيْهَا يَظْهَرُونَ * وَلِبُيُوتِهِمْ أَبْوَابًا وَسُرُرًا عَلَيْهَا يَتَّكِئُونَ * وَزُخْرُفًا وَإِن كُلُّ ذَلِكَ لَمَّا مَتَاعُ الْحَيَاةِ الدُّنْيَا وَالْآخِرَةُ عِندَ رَبِّكَ لِلْمُتَّقِينَ﴾ [الزخرف: 33-35].
فالشاهد لما قالوا له تلات حاجات: ﴿ما نراك إلا بشراً مثلنا، وما نراك اتبعك إلا الذين هم أراذلنا بادي الرأي، وما نرى لكم علينا من فضل﴾. سيدنا هود في خطاب رائع في سورة هود رد على الأولانية، قال لهم: ماشي أنا بشر وربنا آتاني رحمة من عندي. رد على التانية: الأراذل؛ لأن أنا مش هطرد المؤمنين، وحسابهم إلى أن... حسابهم إلا على ربي. رد على التالتة بمسألة: أنا ما عنديش خزائن الله ولا أعلم الغيب ولا قلت لكم أني ملك؛ عشان من الأول ما تجيش تحاسبني وتقول لي: أنتم ما لكم علينا من فضل.
يبقى طرح الدين على أنه لمسة سحرية بمجرد ما الإنسان هيدخل فيها هيتحول فجأة... لأ. المثل المشهور اللي بيقال: إن لو واحد كافر جاب البذرة وحطها في الأرض وسقاها ورعاها واهتم بها، هتثمر. لو واحد مؤمن جاب البذرة وحطها في الأرض وقعد يقرأ عليها آية الكرسي، مش هتثمر، يعني دي لها سنن ربنا وضعها وأراد ذلك؛ ﴿كُلًّا نُّمُدُّ هَٰؤُلَاءِ وَهَٰؤُلَاءِ مِنْ عَطَاءِ رَبِّكَ ۚ وَمَا كَانَ عَطَاءُ رَبِّكَ مَحْظُورًا﴾ [الإسراء: 20].
فبالأول بيقول لهم: أنا ما قلتلكوش إن أنا عندي خزائن الله أنا المتحكم فيها عشان تقول لنا: يلا نزل لنا من الخزائن دهب، يلا بقى نزل لنا من الخزائن فضة، نزل لنا من الخزائن مطر، لأ؛ ﴿وَإِن مِّن شَيْءٍ﴾ -ربنا بيقول- ﴿إِلَّا عِندَنَا خَزَائِنُهُ وَمَا نُنَزِّلُهُ إِلَّا بِقَدَرٍ مَّعْلُومٍ﴾ [الحجر: 21]. أنت مطالب انك تقول لهم... تخيل أنت رايح كده آية تقول لهم: أنا ما عنديش خزائن الله! تخيل ده البرنامج الانتخابي بتاعك: ما عنديش خزائن الله! طب إيه اللي هيحصل لو احنا آمنَّا بك؟ إيه اللي هيحصل في المستقبل؟ لا أعلم الغيب. طب أنت فيك حاجة مختلفة عننا؟ لا، أنا مش ملك، أنا بشر زيكم.
امال نيجي وراك ليه، امال اللي ييجي وراك، لأن أنا معي وحي ﴿إِن أَتَّبِعُ إِلَّا مَا يُوحَى إِلَيَّ﴾. تعالوا نشوف الوحي بيأمرنا بإيه، وثقوا إن الطريق ده فيه العاقبة للمتقين، والخير في الدنيا والآخرة. يعني برضه لازم، مش معنى كده، لكن في يقين إن طريق الدين ده التطبيق الكامل، هو طريق الفلاح والنجاح في الدنيا والآخرة، لكن مش لازم يبقى لجيلنا، يمكن يبقى العشرة أجيال بعد كده، مش لازم احنا اللي نشعر بالتمكين ده، طريق الدين الكامل اللي ما بيجزش وما فيش تجزئة، العلمانية ديت اللي بين الدين والدنيا، طريق الدين الكامل فيه الفوز والنصرة، نجاح وسداد في الدنيا قبل الآخرة.
ولكن النبي صلى الله عليه وسلم زي ما قالوا غنائم من كل حتة في الدنيا، مر بمرحلة شعب أبي طالب، صح ولا لا؟ وصورة الصور، ولو أن أهل القرى آمنوا واتقوا لفتحنا عليهم بركات من السماء والأرض، سورة إيه دي؟ الأعراف. دي في الأعراف، والأعراف مكية ولا مدنية؟ والتمكين حصل امتى؟ يعني الآية دي نزلت وهم بيتضربوا، الآية دي نزلت في عز التعذيب، متخيل لو الأعراف كمان من الأواخر؟ نزلت في وسط التعذيب، ما حدش قال إيه ده! إزاي؟ هم فاهمين إن دي العاقبة ﴿رَبِّي أَعْلَمُ مَنْ تَكُونُ لَهُ عَاقِبَةُ الدَّارِ﴾، العاقبة دايماً للمؤمنين والعاقبة للمتقين. سيدنا موسى قال لي كده لبني إسرائيل وهم في عز الاستضعاف: ﴿الْعَاقِبَةُ لِلْمُتَّقِينَ﴾، دايماً العاقبة تكون للمتقين.
لكن أثناء هذا الطريق فيه بلاء، في ضغط، في ضيق في الرزق، ده أثناء هذا الطريق ﴿أَشَدُّ النَّاسِ بَلَاءً الْأَنْبِيَاءُ﴾، ده ده موجود وده موجود، طرح الدين، الدين الدين، إنه مجرد... شوف المعنى اللي أنا عايز أصله، طرح الدين إنه مجرد حل سحري لمشاكل الناس الدنيوية، خطر! الدنيا تأتي تبعاً، لكن الخطاب الهُدَى الإيماني للناس هو خطاب أخروي بالأصالة، دي قاعدة مهمة جداً، خطاب الهُدَى الإيماني للناس هو خطاب إيه؟ أخروي بالأصالة، أصالة هو خطاب أخروي. الأول: يغفر لكم من ذنوبكم، الأول: يجيركم من عذاب أليم، وبعدين إن شاء الله: ﴿يُرْسِلِ السَّمَاءَ عَلَيْكُمْ مِدْرَارًا﴾ ويعطيكم في الدنيا إن أنتم أطعتم الله عز وجل.
نزع سمة الخطاب الأخروي، نزع هذه السمة من الخطاب الديني يفقد أهم ما فيه، ويحول اللي قدامك لراغب دنيا مش راغب... هيبيعك عند أول ملف، هيبيعك عند أول ابتلاء، وهيحصل هيحصل ابتلاء، هيبيعك عند أول ابتلاء تمر به، لأن قطعا هتبتلى، السؤال المشهور: الإمام الشافعي، أيمُكِّن المرء أم يبتلى؟ قال: لن يمكن المرء حتى يبتلى، يبقى فيما قبل الفتح فيه ابتلاء.
فهو هيختار، لذلك السيناريو المشهور دلوقتي في العالم إنه يعمل إيه؟ إنه يسمح بالتمكين للايه؟ للإسلاميين، بعد ما يسمح لهم، يضغط عليهم اقتصادياً، يقوم يرتبط في أذهان عامة الناس إن الضغط الاقتصادي ده زي ما حصل مثلاً في غزة، إن الضغط الاقتصادي ده نتيجة اختيار الإسلام، فالتجربة دي تففضل راسخة في أذهان الناس، فيبدأ الناس نظراً لححب الدنيا ونظراً لأخطاء بعض الإسلاميين، إن هم عرضوا إن منهجهم إن هو مجرد إصلاح دنيوي فقط ما لوش علاقة بالدار الآخرة، فربط أذهان الناس: آه، يبقى إذاً الإسلام فاشل! وبما أن احنا عايزين دنيا، يبقى ما لناش دعوة بالإسلام. بل حتى التجارب الناجحة اقتصادياً زي تركيا برضه بيبيعوا عند أول ضغط من غير حتى ضغوط بيبيعوا، لذلك في سنن، دي سنن يا جماعة.
لذلك الآية اللي بعدها على طول: ﴿وَأَنْذِرْ بِهِ الَّذِينَ يَخَافُونَ أَنْ يُحْشَرُوا﴾، اللي عايز بقى من الخزائن فتحة على طول وعايز فلوس ده مش هيستفيد من القرآن أصلاً، وماشي وراك عشان تقول له الغيب فيه كذا وكذا وكذا، ويحس إن أنت قوة خارقة وإنك أنت مالك، ده مش عندنا. يبقى أنا ما عنديش الخزائن، يعني أنا تخيل عمرك شفت داعية أو حد بيدعو ناس بينفي عن نفسه صفات؟ دايماً الحاجات يقول لك ده أنا عندنا كذا وعندنا كذا وعندنا كذا، لكن لازم عشان ما يحصلش خلط بين مقام الربوبية ومقام العبودية، ننفي عن أنفسنا أشياء، نقول إنها بيد الله.
زي الغلام كده لما جاله جليس الملك، الملك وجاب له فلوس كتير وبيقول له إيه؟ ما ها هنا لك أجمع إن أنت شفعتني، قال له إيه؟ قال له إيه الغلام؟ ها؟ قال له: أنا لا أشفِي أحداً إنما يشفي الله. أومال أنا جاي لك ليه يا عم الحاج؟ انت إيه اللي... أنا لي أشفِي يا حاج؟ لأ، انت بتشفي وبتاع، قال له: أنا لا أشفِي أحداً إنما يشفي الله تعالى. فإن أنت آمنت بالله دعوت الله لك فشفاك. ثم هي ظاهرياً قدامه لو هو مش... يعني لو الملك جليس الملك ده مش فاهم الغلام بيعمل ايه؟ طب ما أنت شفيتني أهو! لا، الفرق ده، المهم لذلك الرواية الجميلة بتاعة مسلم: النبي صلى الله عليه وسلم بيقول إيه؟ فقال له الغلام: إن أنت آمنت بالله تعالى دعوت الله لك فشفاك. فآمن جليس الملك فشفاه الله. ده حتى الرواية ما جابتش إنه حتى إيه؟ إنه حتى دعى له! حتى عشان احنا نتعلق بلا تعلق مباشر. تخيل لو دكتور يكتب على العيادة: أنا لا أشفِي أحداً إنما يشفي الله تعالى، ما حدش يروح! لكن لازم هو يعلق قلوب الناس بالله.
يعني تعليق قلوب الناس بالله ده أهم يعني إيه ما يطلب من الداعية، نربط الناس بالله، ما يحصلش الخلط بين مقام الربوبية ومقام العبودية: ﴿قُلْ لَا أَقُولُ لَكُمْ عِنْدِي خَزَائِنُ اللَّهِ﴾، ما عنديش خزائن الله عشان ما تقعديش تطلبي كل شوية بقى إيه: طب نزل لنا كذا، طب اعمل لنا طب ينبوع في الأرض، طب ما عنديش دي بتاعة ربنا، وأنا من الأول ما جيتلكوش، لذلك احنا دايماً قلناها في مقدمة سورة الأنعام وزي ما قلنا، زي ما الظلال استفاض فيها في ذكرها: دعوة النبي صلى الله عليه وسلم بدأت من أول لحظاتها دعوة دينية.
أول لما قام على الصفا قال: ﴿إِنِّي نَذِيرٌ لَكُمْ بَيْنَ يَدَيْ عَذَابٍ شَدِيدٍ﴾، مش أول لما بدأ عمل إصلاح اقتصادي، يعني إيه؟ ناس كتير يقول لك إيه: بلاش تواجههم بأصل الدعوة، لأ، أنت صلح لهم دنيتهم الأول، فبعد ما دنيتهم تتصلح كلمهم في الدين، ساعتها يقبلوا، إنما طول ما هو كده مش هيقبلوا، والفكرة كانت بتروج عند كثير من الناس خاصة مع تجربة تركيا.
ولكن احنا بنقول في سنن، يعني بنقول إيه؟ في سنن، لذلك لأ، انت ربنا قال لك ابدأ بالدين ولهم إن شاء الله احنا نمشي مع الدين، لكن ربنا سبحانه وتعالى يكرمنا، هنمر بمراحل، هنمر بابتلاءات، هنمر وهنمر، نمشي مع الدين لكن الله عز وجل وإن شاء الله يمكن لنا، لكن لازم هنمر بمراحل الابتلاء، وده اللي بيحصل، إن أنت لما بتصلح لهم الدنيا هو يقول لك: أنا جيت معاك عشان الآي... جيت معاك عشان الدنيا، تيجي تكلمه في الدين يقول لك: لأ، أنا مشيت وراك عشان كده، ما على هذا تبعتك، أنا معنى أنا الأول جيت وراك عشان الدنيا، هتيجي بقى تقول لي أصل الخمرة حرام أصل مش عارف إيه، مش هنكمل! أهو، وده اللي بيحصل الآن، ربنا يعينه يا رب أردوغان ويفك أزمته يا رب، ده اللي بيحصل الآن هناك.
انت لازم من الأول تبقى النبي صلى الله عليه وسلم أول لما قال: لا إله إلا الله، أنا لا أغني عنكم من الله شيئاً، كان واضح. أغلب اتباع الأنبياء هم الفقراء أصلاً، اللي انت عايز تنقل... يعني انت انت دلوقتي عايز تنقل الفقراء يبقوا أغنياء يزهدوا فيك؟ يعني لو أنت معتقد إن الحل إن الناس تبقى كلها أغنيا وبعدين تكلمهم في الدين، هو يحس إنه مش محتاج الدين أصلاً، هو يحس إنه ليس في حاجة إلى الدين: ﴿قُلْ لَا أَقُولُ لَكُمْ عِنْدِي خَزَائِنُ اللَّهِ وَلَا أَعْلَمُ الْغَيْبَ﴾ ﴿قُلْ لَا أَقُولُ لَكُمْ عِنْدِي خَزَائِنُ اللَّهِ وَلَا أَعْلَمُ الْغَيْبَ وَلَا أَقُولُ لَكُمْ إِنِّي مَلَكٌ إِنْ أَتَّبِعُ إِلَّا مَا يُوحَى إِلَيَّ قُلْ هَلْ يَسْتَوِي الْأَعْمَى وَالْبَصِيرُ أَفَلَا تَتَفَكَّرُونَ﴾.
لذلك ربنا بيقول إيه؟ إن أتبع إلا... وظيفة النبي صلى الله عليه وسلم هي إيه؟ انت دلوقتي وحدت الله! طب أنت ما عندكش خزائن الله ولا تعلم الغيب ولا أنت ملك، أومال إيه؟ أنا عندي وحي وأنا تابع للوحي، قمة التجرد يا جماعة أغلب الناس فعلاً هي مش بتحارب الدين، هي بتحارب اللي معتقدين أنهم تجار دين! أغلب الناس سيبك من رؤوس أهل الباطل، رؤوس أهل الباطل عارفين كويس إنهم بيحاربوا الدين، أنا بكلمك على عامة الأتباع الغلابة، هو بيحارب اللي معتقد أنهم تجار دين، فاحنا لازم نتجرد إلى أعلى درجة.
كلمة ﴿لَا أَسْأَلُكُمْ عَلَيْهِ أَجْرًا﴾ من الأصول اللي تكررت على ألسنة الأنبياء، أصول، أنا اللي أنا بقول لك لا هوعدك وعد خرافي عشان ما بقاش كذاب وتحاسبني عليه إن أنا أقول لك عندي خزائن الله، وفي نفس الوقت مش هقول لك... يعني مش هقول لك إن أنا عندي خزائن الله وفي نفس الوقت مش هفرض عليك حاجات وأمور هي ليست من الله، مش هقول لك لأ لازم تعمل كده، لأ أنا تابع، ولا هادعي إن أنا لي حاجة، يعني الآية هنا تجرد غير عادية، مم، النبي صلى الله عليه وسلم، ولا أطلب منك حاجة ولا عايز منك فلوس ولا عايز منك أجر ولا عايز منك أي حاجة.
على قدر التجرد بتاعنا ما بيقل، على قدر سوء ظنهم ما يزيد، على قدر ما تجرد أهل الدين بيقل وعدم وضوح الرسالة الواضحة بتاعتهم إن هو مجرد إنه عايز يهدي الناس إلى الله فقط، كل ده ما بيقل، كل ما هم سوء ظنهم... وطبعا أهل الباطل بيستغلوا أخطاء العاملين لدين الله ويضخموها، يقول لك: شفت؟ ده بيكذب، ده بيتاجر بالدين، ده بيطلب منك كذا، بيستغل هذه الآيه؟ الأخطاء.
﴿إِنْ أَتَّبِعُ إِلَّا مَا يُوحَى إِلَيَّ قُلْ هَلْ يَسْتَوِي الْأَعْمَى وَالْبَصِيرُ أَفَلَا تَتَفَكَّرُونَ﴾، آه قيل في الأعمى والبصير دي كلام جميل جداً، قالوا: مين الأعمى ومين البصير؟ يعني إيه الفكرة اللي لو الإنسان عاش بها في الحياة يبقى أعمى، وإيه الفكرة اللي لو الإنسان عاش فيها في الحياة يبقى بصير؟ قيل المعنى الأول: اللي يظن أن خزائن الله وعلم الغيب وقوة الملائكة في يد بشر فهو أعمى، واللي يوقن أن القدرة والغنى والعلم المطلق لله فهو البصير. كل ما انسان يعتقد في نفسه أو في غيره أنه يملك شيء في الكون بعيدا عن الله فهو أعمى، سواء بيظن في نفسه أنه قادر على شيء بعيداً عن الله أو يظن أن فلان عنده حل مشكلته بعيداً عن الله، ده نوع من أنواع العمى. على قدر نسبة هذه الأشياء مطلقة إلى الله لا يشاركه سبحانه وتعالى لا يشاركه فيها أحد، ده اللي يوقن كده ده قمة الإبصار، يبقى ده المعنى الأول، أن الإنسان ما يظنش في نفسه ولا في أحد أنه يملك شيء.
«أعوذ برضاك من سخطك وبمعافاتك من عقوبتك وبك منك»، هو النبي صلى الله عليه وسلم لا يرى إلا الله، مش أعوذ بمعافاتك من عقوبة فلان، لا، بمعافاة الله عز وجل، هو الذي يعطي ويمنع والذي يرفع ويخفض، هو الذي يقبض ويبسط سبحانه وتعالى: ﴿مَا يَفْتَحِ اللَّهُ لِلنَّاسِ مِنْ رَحْمَةٍ فَلَا مُمْسِكَ لَهَا وَمَا يُمْسِكْ فَلَا مُرْسِلَ لَهُ مِنْ بَعْدِهِ﴾، يبقى إذاً كل شيء بيد الله، ده الأعمى وده البصير.
وقيل يعني الأعمى والبصيرة متعلقة بنص الآية الأولاني اللي هو خزائن الله وعلم الغيب وإني ملك، وقيل متعلقة ﴿إِنْ أَتَّبِعُ إِلَّا مَا يُوحَى إِلَيَّ﴾، فاللي هيتبع الوحي هو البصير، واللي هيترك الوحي هو الايه هو الأعمى، اللي هيتبع الوحي هو البصير، وعلى قدر ما يزداد الإنسان اتباعاً للوحي على قدر ما يزداد بصيرة، وعلى قدر ما يبتعد الإنسان عن الوحي على قدر ما يزداد عمى، لذلك تقييم الناس للأمور من غير وحي هو عمى مهما كان ذكي ومهما كان يفهم ومهما كان عنده علم، تقييمك للأمور من غير وحي ده نوع من أنواع العمى، على قدر اتباعك للوحي ده قمة الايه؟ الاستبصار.
إن أتبع إلا... كان النبي صلى الله عليه وسلم بيقول لهم: أنا قدامي واحد وأنا ماشي وراه بحط رجلي، إن أتبع، قمة الاتباع للوحي، أنا ما بجيبش حاجة من عندي، ما بقولكوش أي شيء من عندي، أنا عبد بل المسألة اللي بتحصل وأنا ما عنديش فيها حكم بانتظر الوحي، ده النبي صلى الله عليه وسلم بينتظر الوحي إلى أن اكتمل الوحي ﴿قُلْ هَلْ يَسْتَوِي الْأَعْمَى وَالْبَصِيرُ أَفَلَا تَتَفَكَّرُونَ﴾.
يبقى قيل: أفلا تتفكرون؟ أتخلطون بين مقام الربوبية ومقام العبودية؟ وقيل: أفلا تتفكرون؟ ألا تعلمون أني رسول ليس معي إلا وحي فلا تطلبوا مني غير الوحي؟ أفلا تتفكرون؟ يبقى إذاً في ناس مشغولة دائماً زي ما قلنا بالحركات، عايزة سلم في السماء، عايزة نفق في الأرض، عايزة كتاب في قرطاس، عايزة ملائكة، عايزة خزائن الله، عايزة علم الغيب، كل اللي عايز الحاجات دي لن ينتفع بالقرآن، مين اللي ينتفع بالقرآن؟ اللي خايف من يوم القيامة، اللي موقن أن الغيب اللي جاي في حاجة هتحصل، يعني حتى أنت لو رحت لواحد بفطرته كده إن المستقبل أكيد فيه حاجة، يا جماعة ده حتى المشركين والكفار حتى الفراعنة لما كانوا يدفنوا واحد كانوا يحطوا معه بعض الأدوات المنزلية ويعينوا حاجات في القبور بتاعته، ليه؟ بيقول لك عشان لما يصحى تاني يلاقي الحاجات ايه بتاعتها.
فكرة البعث، حتى لو الإنسان حاول يهرب منها أو يحرفها، هي فطرة الإنسان. هي داخل الفطرة. يقول لك: ليه الحيوانات ما كانتش بتفكر التفكير ده، والانسان القديم كان بيفكر بالتفكير ده؟ لأن في فطرة الإنسان أن فيه بعث.
داخل فطرة الإنسان مفطور أن فيه بعث، فمهما راوغ؛ لذلك اليهود لما حبوا يروغوا وقالوا إيه: أنتم حرفتوا في الشرع، قال لك: فيه بعث بس هنتعذب كلنا، هنتعذب سبع أيام بس، عايز يهرب. المشرك قال لك: لأ لأ لأ ما فيش بعث عشان ما نتحاسبش. في ناس قالت: فيه، عشان ما نتحاسبش، المشرك المشرك الكافر. فيه ناس قالت: لأ فيه بعث بس احنا لاقيين رجعت إلى ربي، لأ أنا هخش الجنة. في ناس قالت: آه فيه بعث، وكان ده نوع من أنواع المشركين بس كان قليل في جزيرة العرب: اللي غني في الدنيا يبقى غني في الآخرة. الهروب!
لكن داخل فطرة الإنسان فيه بعث، اللي خايف من المستقبل، وخايف إنه يعاقب ويحاسب على أعماله غلط، وعنده ضمير، عنده كده لسة اللي النبي صلى الله عليه وسلم سماه: واعدوا الله في قلب كل مسلم. جواه ده، ده اللي جواه، ده اللي يخاف، وده اللي ينتفع بالقرآن؛ لذلك: ﴿وَأَنذِرْ بِهِ﴾ أي بالوحي بالقرآن، ﴿وَأَنذِرْ بِهِ﴾ مين؟ ﴿الَّذِينَ يَخَافُونَ أَن يُحْشَرُوا إِلَىٰ رَبِّهِمْ﴾ دول اللي هيستفيدوا، غيرهم مش هيستفيد. اللي هيقعد بقى يقول لك: عايز خزائن الله، كلمني عن الغيب وورينا ملك وورينا قوتك، ده مش هيستفيد بشيء. وأغلب اللي عايز كده، عايز كده عشان يحل مشاكل دنيوية فقط.
تاني يا جماعة، أغلب اللي بيطلب هذه الأشياء هو زي ما قلت لكم بيتعامل مع الدين إنه مجرد حل لمشاكله الدنيوية. يا جماعة، الالتزام، الالتزام اتكلمنا قبل كده على فكرة أن الالتزام ده يعني إيه؟ معنى بيعيش في كيانك كله، مش مجرد قرار أنك مثلاً سبت دقنك أو كذا، لأ، الالتزام ده معنى بيغيرك، عقيدة بتدخل جواك بتغيرك. الالتزام مش إن واحد تعبان نفسيا فنقول: التزم عشان تبقى مبسوط نفسيا، ولا إن الالتزام عنده مشاكل دنيوية فنقول له: التزم عشان مشاكلك الدنيوية تتصلح، ولا الالتزام واحد زي ما قلت لكم عنده عربية مضايقاه فالتزم عشان يجي لك عربية أحسن. لأ، ده مش الالتزام؛ الالتزام عبودية، عبد لله يبحث عن مراد الله، يشوف إيه اللي ربنا يريده منه عشان ينفذه، ده الالتزام. الرسول جه عشان يعرفك إيه هي العبودية، فاللي باحث عن مراد الله في العبودية ده اللي هيستفيد من الرسالة، واللي باحث عن حلول مشاكله الشخصية ده مش هيستفيد من الرسالة.
تاني، الباحث عن مراد الله في العبودية ده يستفيد من الرسالة والوحي، اللي باحث عن حلوله الدنيوية ده مش هيستفيد، ده هتلاقيه بينتقي من الدين اللي يحل له مشاكله ويناسبه، غير كده لأ مش عايز، وأي حاجة تصادم هواه وشهواته مش عايزها. وضحت؟
فالنقلة اللي بعد كده: سيبك منهم، ﴿وَأَنذِرْ بِهِ الَّذِينَ يَخَافُونَ أَن يُحْشَرُوا﴾ لأن احنا قلنا في الآية زي ما ربنا قال: ﴿وَمَا نُرْسِلُ الْمُرْسَلِينَ إِلَّا مُبَشِّرِينَ وَمُنذِرِينَ﴾. وظيفتك بشرى وإنذار؛ ربنا هيجيب لنا نموذج للإنذار ونموذج للإيه للبشرى. نموذج الإنذار: ﴿وَأَنذِرْ بِهِ الَّذِينَ يَخَافُونَ﴾، نموذج البشرى (٥٤): ﴿وَإِذَا جَاءَكَ الَّذِينَ يُؤْمِنُونَ بِآيَاتِنَا فَقُل سَلَامٌ عَلَيْكُمْ﴾. ده نموذج للإنذار وده نموذج للبشرى، دي وظيفة النبي صلى الله عليه وسلم. المعرض، اللي خايف من المستقبل بس لسة ما آمنش، ده تخوفه. اللي عصى وقبل الإنذار وخاف وجا لك، قل له: سلام عليكم. اجمع بين الإنذار والبشرى.
﴿وَأَنذِرْ بِهِ الَّذِينَ يَخَافُونَ أَن يُحْشَرُوا إِلَىٰ رَبِّهِمْ لَيْسَ لَهُم مِّن دُونِهِ وَلِيٌّ وَلَا شَفِيعٌ لَّعَلَّهُمْ يَتَّقُونَ﴾، يبقى فيه هنا معنيين في الآية تعرفك مين اللي هيقبل الدعوة: اللي يعلم أنه ليس له من الله ولي ولا شفيع، أن المتصرف الأوحد المدبر الأوحد للكون هو الله. رقم اتنين: خايف من البعث، دول اللي يستفيدوا من الدعوة؛ لذلك آيات كتير، أكبر مثال على ذلك الجن. والجن نفسهم لما ربنا ضرب للمشركين مسألة إيمان الجن في موضعين من القرآن، سورة الجن وفي سورة الأحقاف؛ لأن كان العرب يعظمون الجن، وكانوا يخافون منهم وكان عندهم أساطير عن الجن، بل كان العرب العرب لما كان ينزل وادي مهجور كان يقول: أعوذ بسيد هذا الوادي، سيد الوادي من الجن يعني؛ لذلك ربنا بيقول لهم في سورة الإسراء: ﴿أُولَٰئِكَ الَّذِينَ يَدْعُونَ﴾ اللي أنتم بتدعوه من الجن أصلاً ﴿يَبْتَغُونَ إِلَىٰ رَبِّهِمُ الْوَسِيلَةَ أَيُّهُمْ أَقْرَبُ﴾ ده اللي أنتم بتعبدوهم بيعبدوا ربنا، ﴿أُولَٰئِكَ الَّذِينَ يَدْعُونَ يَبْتَغُونَ إِلَىٰ رَبِّهِمُ الْوَسِيلَةَ أَيُّهُمْ أَقْرَبُ﴾.
فربنا قال من أهم أهم أسباب إيمان الجن، قالوا إيه: ﴿وَأَنَّا ظَنَنَّا أَن لَّن نُّعْجِزَ اللَّهَ فِي الْأَرْضِ وَلَن نُّعْجِزَهُ هَرَبًا﴾، جوهرهم معرفتهم ويقينهم أن ليس لهم من دون الله ولي ولا إيه، ده المعنى الأول. السبب التاني في إيمان الجن: ﴿وَأَنَّا ظَنَنَّا أَن لَّن نُّعْجِزَ اللَّهَ فِي الْأَرْضِ وَلَن نُّعْجِزَهُ﴾، دي في سورة الإيه سورة الجن.
الموضع التاني بتاع إيمان الجن في سورة الأحقاف: ﴿وَإِذْ صَرَفْنَا إِلَيْكَ نَفَرًا مِّنَ الْجِنِّ يَسْتَمِعُونَ الْقُرْآنَ فَلَمَّا حَضَروهُ قَالُوا أَنصِتُوا فَلَمَّا قُضِيَ وَلَّوْا إِلَىٰ قَوْمِهِم مُّنذِرِينَ * قَالُوا يَا قَوْمَنَا إِنَّا سَمِعْنَا كِتَابًا أُنزِلَ مِعْمُوسَىٰ مُصَدِّقًا لِّمَا بَيْنَ يَدَيْهِ يَهْدِي إِلَى الْحَقِّ وَإِلَىٰ صِرَاقٍ مَّسْتَقِيمٍ * يَا قَوْمَنَا أَجِيبُوا دَاعِيَ اللَّهِ وَآمِنُوا بِهِ يَغْفِرْ لَكُم مِّن ذُنُوبِكُمْ وَيُجِرْكُم مِّنْ عَذَابٍ أَلِيمٍ﴾. يبقى حاجتين خلوا الجن يؤمنوا: ظننا ألا نعجز الله في الأرض ولن نعجزه هرباً، يغفر لكم ذنوبكم ويجركم من عذاب أليم. دول اللي معانا في الآية: ﴿وَأَنذِرْ بِهِ الَّذِينَ يَخَافُونَ أَن يُحْشَرُوا إِلَىٰ رَبِّهِمْ لَيْسَ لَهُم مِّن دُونِهِ وَلِيٌّ وَلَا شَفِيعٌ﴾ يقين أن ليس ليس لهم من دون الله ولي ولا شفيع، يقين أن فيه بعث هيتحاسبوا، ده يخلي أي انسان على طول يؤمن ويتأثر بالقرآن.
طيب، ﴿وَأَنذِرْ بِهِ الَّذِينَ يَخَافُونَ أَن يُحْشَرُوا إِلَىٰ رَبِّهِمْ لَيْسَ لَهُم مِّن دُونِهِ وَلِيٌّ وَلَا شَفِيعٌ لَّعَلَّهُمْ يَتَّقُونَ * وَلَا تَطْرُدِ الَّذِينَ يَدْعُونَ رَبَّهُم بِالْغَدَاةِ وَالْعَشِيِّيُرِيدُونَ وَجْهَهُ مَا عَلَيْكَ مِنْ حِسَابِهِم مِّن شَيْءٍ وَمَا مِنْ حِسَابِكَ عَلَيْهِم مِّن شَيْءٍ فَتَطْرُدَهُمْ فَتَكُونَ مِنَ الظَّالِمِينَ﴾.
ربنا بيقول للنبي صلى الله عليه وسلم: اللي عمالين يطلبوا منك الآيات دي مش وظيفتك أنت، أنت وظيفتك البشارة والنذارة، وقل للي بيطلبوا آيات كتير: أنا ما عنديش خزائن الله ولا أعلم الغيب وأنا مش ملك. ثم أعرض عنهم والتفت إلى الذين يخافون أن يحشروا ربهم وأنذرهم؛ نتيجة هذا الإنذار أن في ناس آمنت، لكن كانت النتيجة أن أغلب من آمن من هؤلاء هم والإيه، هم الفقراء، اللي هو: ﴿وَمَا أَنَا بِطَارِدِ الَّذِينَ آمَنُوا﴾، ﴿وَمَا أَنَا بِطَارِدِ الَّذِينَ آمَنُوا﴾ أو ﴿أَرَأَيْتَ إِن كُنتُ عَلَىٰ بَيِّنَةٍ مِّن رَّبِّي وَآتَانِي رَحْمَةً مِّنْ عِندِهِ فَعُمِّيَتْ عَلَيْكُمْ أَنُلزِمُكُمُوهَا وَأَنتُمْ لَهَا كَارِهُونَ﴾ أو ﴿وَمَا أَنَا بِطَارِدِ الَّذِينَ آمَنُوا﴾، أو ﴿وَمَا أَنَا بِقَارِدِ الَّذِينَ آمَنُوا﴾ اللي تأثر بآية واحد وخمسين: ﴿وَأَنذِرْ بِهِ الَّذِينَ يَخَافُونَ أَن يُحْشَرُوا إِلَىٰ رَبِّهِمْ﴾ طلعوا مين؟ طلعوا الفقراء.
الداعية كان نفسه أن اللي يؤمن به الأغنياء عشان ينشروا الدين، مش عشان هو عايز فلوس، عشان ينشروا الدين وعشان السلطان بتاعهم، أن الله يجعل السلطان ما لا يزع بالقرآن. فاللي حصل أن الأغنياء ما آمنوش ليه؟ دايماً في الغالب الأغنياء ما بيأمنوش ليه يا جماعة؟ دايماً الغني إلا من رحم الله حاسس أن اللي معه من أسباب بيخليه مش محتاج الدين، بيقول لك: هنحتاج الدين أعمل به إيه؟
وعشان كده، احنا قلنا ده أخطر مفهوم عن الدين، خطر جداً إن الدين يوصل للناس كده: إن الدين يحل لك مشاكلك. كان بعض العلماء يقول لك إيه: بلاش شعار "الإسلام هو الحل"، خليه شعار "الإسلام هو الحق". أنك لو قلت لهم: "الإسلام هو الحل" وهو هو الحل فعلاً قطعاً، لكن لو دخل على دي بس وقعد معاك سنة واحدة وما لقاش الإسلام هو الحل، مش بس هيكفر بك؟ فيكفر بالإسلام خلاص. يا ريت لو نعمل الدرس ده بتاريخ قديم بحيث إنك آه تعمله بتاريخ سنتين ثلاثة فاتوا كده.
المهم فبنقول إن الأغنياء ما بيعملوش اعتقاداً أنه معه من الأسباب، يقول لك: أنا آمن ليه؟ أنا ما عنديش، أنتم أما بتقولوا الإسلام هو الحل، يقول لك: أنا أصلاً ما عنديش إيه؟ ما عنديش مشاكل عشان عايز لها حل، أنا ما عنديش مش محتاج أصلاً، ما بيؤمنش والعياذ بالله استغناء؛ لذلك لما ربنا قال: قال من شروط لا يؤمن بيخاف وفي نفس الوقت ليس له من دونه إيه؟ عارف أن ده اللي أدى له المال ده من عند ربنا سبحانه وتعالى، والله قادر إنه ينزع منه هذا المال.
طب الناس اللي آمنت بك؟ فقراء، ﴿وَلَا تَطْرُدِ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ﴾. وفي نفس الوقت مش معنى أن هم فقراء أنهم جايين عشان الفلوس، لأ ربنا قال إيه: ﴿يُرِيدُونَ وَجْهَهُ﴾ دول عايزين يرضوا ربنا بس، مش مشغولين بشيء آخر.
المشركين عملوا حركة خبيثة جداً، أول حركة خبيثة عملوها في السورة أن القادة المشركين المتبوعون القادة الأغنياء عملوا حركة خبيثة. أول حركة خبيثة عملوها في السورة إيه؟ ﴿وَمِنْهُم مَّن يَسْتَمِعُ إِلَيْكَ﴾ عملوا نفسهم الو طيب، احنا هنروح نشوف ده بيقعدوا في المجلس، عملوا نفسهم إيه بيسمعوا، وبعدين قالوا: لأ دي أساطير الأولين.
الحركة التانية قالوا له إيه: أنت عارف إياه، كنا سنؤمن بك، قاربنا أن نؤمن وأن نجلس لك ونطيعك ونسمع كلامي بس حاجة واحدة بس اللي مانعاه. تخيل لما داعية يسمع أن كبار قومه كلهم هيسلموا بس في حاجة واحدة المانعة، إيه المانع؟ اطرد الفقراء. إيه الغرض من كده؟ ده ده المانع كبر، لكن هل هو فعلاً لو طردهم هيقعدوا؟ دي خطة خبيثة؛ لذلك ربنا بيقول: ﴿وَكَذَلِكَ نَفَصِّلُ الْآيَاتِ وَلِتَسْتَبِينَ سَبِيلُ الْمُجْرِمِينَ﴾ عشان سبيل المجرمين تبقى واضحة والمجرم أصلاً أجرم أي قطع الثمرة منعها من أن هي تكبر، المجرم ده الجرم ده قاطع الطريق، فالمجرم ده اللي عايز قاطع الطريق على أهل الإيمان، مش قضية أن هو يؤمن بس، فعايز ما يبقاش أن الفقراء حصلوا حاجة هو مش عارف يحصلها نتيجة الكبر. وفي نفس الوقت يطرد المؤمنين وأيه؟ ويسيب الناس ينفضوا حوالين النبي صلى الله عليه وسلم: ﴿لَا تُنفِقُوا عَلَىٰ مَنْ عِندَ رَسُولِ اللَّهِ حَتَّىٰ يَنفَضُّوا﴾ استعمال سلاح المال عشان يحصل انفضاض، فبالتالي يبقى كلهم في الهوا سوا، ودوا لو تكفرون كما كفروا فتكونون سواء، عايزه يبقى كلهم كفار وفي نفس الوقت الناس دي تنفض عن النبي صلى الله عليه وسلم.
فحركة خبيثة وبعدين دخل له من مدخل ما قالوش يطردهم وأنا أدي لك فلوس، شوف راح للدعاية ما قالوش إيه؟ ما قالوش اطرد الفقراء وأنا أدي لك خمسين ألف جنيه، لا قال له اطرد الفقراء وأنا وأنا أبقى مؤمن. هو عارف أن الداعية عايز يؤمن، يعني هو فاهم أن الداعية مش بتاع فلوس، هو فاهم فبيدخل له من مدخله، معي في الفكرة يعني؟ ما قالوش اطردهم وأنا أجوزك أربعة، ما قالوش اطردهم لأ، يقول له اطردهم وأنا أطلعك في قناة فضائية تدعو إلى الله، يقول له كده، يقول له اطردهم وأنا أفتح لك حاجات في الدعوة، يقول له اطردهم وفلان هيلتزم لو طردته، يعني إيه؟ يقول له سيب دول واشتغل في الدعوة في كذا. لأن لو دخل له من مدخل لو ما طردتهمش هعتقلك، مش هيطردهم، مش هيخاف، لو لو قال لهم لو قال له لو ما طردتهمش هعتقلك، مش هيخاف، يقول له اعتقلني مش هترده. لو قال له لو ما طردتهمش مش هديك فلوس، قل له مش عايز فلوس.
إنما يدخل له من مدخل أمنية الداعية، واحنا اتكلمنا دي قبل كده كتير: ﴿وَمَا أَرْسَلْنَا مِن قَبْلِكَ مِن رَّسُولٍ وَلَا نَبِيٍّ إِلَّا إِذَا تَمَنَّىٰ أَلْقَى الشَّيْطَانُ فِي أُمْنِيَّتِهِ﴾ وأمنية الداعية هي إيمان قومي، فالشيطان دايماً يجي لك من: اعمل كده عشان يؤمنوا، تنازل عن دي عشان يؤمنوا، ما تقولش الآية دي عشان يجي لك. من المدخل غير مداخل ده أنا بكلمك على الحريصين على الإيمان والدعاة الحقيقية، مش بكلمك بقى على الداعية اللي انتكس وعايز فلوس فيجي له يقول له إيه: غير في الدين وأنا أطلعك تتفسح مثلاً برة مش عارف إيه، فيقول له ماشي، سيبك من ده خالص الوقتي، ده مش الكلام عليه.
لأ، الكلام أن المدخل الخبيث أن يدخل لك من الأمنية بتاعتك، يقول لك: أنت عارف أنت لو طردتهم كلنا هنؤمن، طب بص، ما تقعدهمش في الصف الأول حسب باقي الروايات، طب اعمل لنا مجلس ما حدش يقعد معنا فيه منهم، يبقى لنا تمييز كده، أنت بتصادم دعوتك، دي أصول في دعوتك: المساواة بين الناس في الصلاة وتلقي العلم، دي أصول عندك في الدعوة أصلاً، يبقى أنت كده هتغير في أصولك عشانهم؟ الدين يرغب الناس فيه مش يرغب الدين إلى الناس، ده دي أصول عندك، ﴿وَلَا تَطْرُدِ الَّذِينَ﴾.
وبعدين أنت غرضك من اللي قدامك إيه؟ بتتناقشوا في الدين ليه؟ عشان يدعو الله عز وجل بالغداة والعشية يريدون أجرًا، دول عملوا، يبقى دول أحق بك منهم، هي القضية مش معايير أهل الدنيا، ودي النقطة التانية الخطيرة: أوعى معايير أهل الباطل تأثر في الداعية. خطر جداً أن الداعية وأهل الدين -وده بدأ يحصل عندنا دون أن نشعر- بدأنا نقيم الناس ونقيم الأفكار بمعايير أهل الدنيا مش بمعايير الدين.
زي ما ربنا بيقول في سورة البقرة: ﴿وَلَعَبْدٌ مُّؤْمِنٌ خَيْرٌ مِّن مُّشْرِكٍ وَلَوْ أَعْجَبَكُمْ﴾ عارف يعني إيه ولو أعجبكم دي؟ يعني هو عجبك، يعني أنت هو عجبك، طب هو عجبك ليه؟
مش حرام على فكرة، مش حرام الإعجاب الفطري بشخص كافر، ده مش حرام. يعني لو واحد كافر متميز عقلياً، دنيوياً، ده مش حرام؛ بل بدليل أن الرجل المسلم ممكن يتزوج امرأة نصرانية تعجبه.
أو أم -نعوذ بالله من ذلك، أسأل الله ألا يقدرها على أحد فينا يعني- أحد أقرباؤه؛ أبوه، وأمه، وابنه كافر ومعجب به، بيحبوه الحب الفطري. لذلك فيه فارق بين الموالاة الدينية والحب الفطري. ليه الكافر ما هو يقول لك إزاي بينكروا علينا؟ بيقولوا إزاي أنتم بتقولوا إنك أنت تبرأ من الكافر، وفي نفس الوقت ممكن يتزوج؟ لأ، الحب الفطري والرغبة الفطرية للبشر غير الولاء الديني. الشاهد، خد بالك من كلمة: ولو أعجبوا. يعني ممكن تبقى معجب بشخص دنيوي كافر، لكن تقييمك النهائي أن العبد المؤمن أفضل، يعني أوعى تخلي المعيار ده يأثر على المعيار الديني.
وزي ما بنقول، ده الخطر اللي حصل لما بقينا نقيم الأشخاص، لما بقينا نقول المذيع الفلاني وحش ليه؟ يتريق عليه، أو الرئيس الفلاني وحش ليه؟ ويجيب حاجات مش شرعية. يعني المفروض لما نيجي نقول مثلاً أتاتورك دول، نقيمه تقييم شرعي، لما بقى كل تقييمنا: أنتخبوا دول الإسلاميين عشان الاقتصاد، أنتخبوا دول، طب ما أتاتورك عمل اقتصاد مثلاً، يبقى خلاص يبقى هو كده؟ طب ما هو بمقاييسه يبقى هو حلو! يعني أنت أحياناً تغير للناس قناعاتي، يحاسبوك عليها فيضلوا، فهمت معي في الفكرة؟ فأوعى معايير أهل الباطل تأثر عليه. من معايير أهل الباطل الغنى والفقر، من معايير أهل الباطل الكثرة والقلة.
معي؟ أنك أنت تختار الحاجة، تختار المنهج اللي بيجيب ناس كتير، المنهج اللي بيجيب ناس قليلين وحش، والمنهج اللي بيجيب ناس كتير حلو، المنهج اللي بيجيب فلوس أسرع حلو، المنهج اللي يجيب فلوس أبطأ وحش. التقييمات ديت مش بتاعتنا. في أحياناً الدعاية تأثروا في دعوتهم بمعايير فرضها عليهم الواقع أو فرضها عليهم أهل الباطل، فبدأ يقول: آه، فلان فلان وحش، ما عادش يجي الدرس تاني. فلان ليه؟ أصله هو فقير أعمى مسكين، هيعمل إيه يعني؟ هستفيد به في إيه في الدين يعني؟
وأنت خد بالك أنت كمان مش بتقيمه عشان يجيب لك فلوس بعد الدرس ولا حاجة، لأ ده أنت بتقول: أنا هعمل إيه يعني؟ وربنا عاتب النبي صلى الله عليه وسلم في أعمى ابن أم مكتوم، وكان النبي صلى الله عليه وسلم مشغول بأن صناديق قريش الكبار يؤمنوا، لكن ربنا عاتبه في أعمى. دي مش... فالمعايير دي لما بتختلط على أهل الدين، يتحول والعياذ بالله أنه بيحط نفسه في مقام مش بتاعه، عشان كده ربنا بيقول له: ﴿وَلَا تَطْرُدِ الَّذِينَ يَدْعُونَ رَبَهُم﴾ دي مش وظيفتك. إحنا يا جماعة عندنا غير الدين، النصارى، دين النصارى واليهود عندهم أن العالم الديني بتاعهم عنده سلطة على البشر، ممكن يطرده، بيقول له أنت ما لكش مغفرة، أنت ضعت خلاص، طب خلاص، طب أعمل إيه؟ ممكن تدفع فلوس أو تعمل... لا، أنت خلاص بقيت كويس، السلطة دي مش عندنا، لذلك في حاجات الدعاية مش مخير يتعامل مع الناس فيها.
لما ربنا يقول: ﴿وَأَمَّا مَنْ جَاءَكَ يَسْعَى﴾ لو جالك فقير أعمى مسكين يعني فيه كل الحاجات العيوب وجاءك يسعى وهيموت عشان يتعلم، أنت لو طردته تبقى ظالم، مش من حقك تطرده، مش من حقك. لذلك حتى بعض... كان رشيد رضا كاتب أن ده ممكن كمان إسقاطها على التعليم الديني، معلمي الدين اللي بيعلموا الدين العام يعني، لو فيه محدث بيحدث الناس بأحاديث عامة أو بيفسر لعامة الناس، مش من حقك تطرد حد من... مش من حقك، ﴿مَا عَلَيْكَ مِنْ حِسَابِهِمْ مِنْ شَيْءٍ﴾ بس أنا هطردكم بقى، ﴿وَمَا مِنْ حِسَابِكَ عَلَيْهِمْ مِنْ شَيْءٍ فَتَطْرُدَهُمْ فَتَكُونَ مِنَ الظَّالِمِينَ﴾. طبعا أنا عارف أن واحد يقول لك إيه: طب أصل المجالس الخاصة لها شروط، طب أنا اللي ما أحضرش من حقي أطرده ولا هي... ولا إيه يا شيخ؟ من حقي أطرده اللي ما يحضرش القرآن بقى دلوقتي، يا واد يا مؤمن، ماشي.
فعلا الإنسان اللي محتاج للدين، لذلك مثلاً: من كتم علماً ألجم بلجام من نار يوم القيامة، لأن مش من حقك دي نعمة ربنا أداها لك، مش من حقك، مش من حقك تقول: لأ أصل أنا مش هعلم فلان، لا لا لا أنا مش... أنا مش... هو جاي يطالب وراغب، لأ مش هعلمه. برضه ليه مش هتعلمه؟ مش من حقك أصلاً. لذلك كان برضه كاتب بحث جميل قوي، يقول لك: اتباع الأنبياء ليسوا عبيداً للأنبياء، اتباع الأنبياء مش عبيد للأنبياء، أمال ليه ناس عايزة تحولهم مع... مع مين؟ زي بعض الطرق الصوفية، ده أشبه بالعبد عند الشيخ، واللي يعترض ينترض، ومش... لذلك حتى قال من معاني: ﴿وَمَا مِنْ حِسَابِكَ عَلَيْهِمْ مِنْ شَيْءٍ فَتَطْرُدَهُمْ﴾ بعضهم بيطردهم لما ييجي حد يحاسبه، يعني لما الطالب يحاسب أو يسأل الشيخ، يطرده، هو مش من حقك ﴿فَتَطْرُدَهُمْ فَتَكُونَ مِنَ الظَّالِمِينَ﴾ مش من حقك.
فإحنا لذلك قال كلمة جميلة جداً برضه، قال: إن كان اتباع المسيح اسمهم تلاميذ وحواريين، كان هو بيسموه المعلم، اتباع النبي صلى الله عليه وسلم كان اسمهم إيه؟ الصحابة، قال: ده رفعة لمنزلتهم أكثر يعني، شوف النبي صلى الله عليه وسلم قال: دول الصحابة، أصحابه، تخيل لما يبقوا النبي صلى الله عليه وسلم والحقيقة دول سماهم أصحابه، كان الرجل يدخل مجلس النبي صلى الله عليه وسلم وقاعد وسط الناس ما يعرفش مين النبي صلى الله عليه وسلم، ما يعرفش مين من اللي قاعد، هو يأكل مما تأكلون منه ويشرب مما تشربون، اللي كان ده عيب؟ ده هو الصح، يأكل الطعام ويمشي في الأسواق، ده الصح.
فمعايير كلمة: ولو أعجبكم، لو بقت معيار خطر، لو بقت معيار أساسي عند الدعاة، تبقى خطر؛ أن معايير أهل الدنيا تنتقل عند أهل الدين، بقى يقيم الأفكار الشرعية بمعايير دنيوية، يقيم الشخص الملتزم بمعايير دنيوية. أنت بتقيم الشخص ده على أساس إيه؟ هل هو بار بوالديه؟ هل هو متقن للفرائض؟ بتقيمه على أساس إيه؟ لذلك كان مثلاً أبو العالية من التابعين كان يقول: لما كان يذهب ليطلب من شجر التابعين، التابعين، أو من التابعين، لما كان يسافر لأحد العلماء عشان يطلب عنده العلم، ما كانش... مش يقول إيه؟ ما كانش يبص على عدد اللي قاعدين في المجلس، لأ، كان يقول: أرقب صلاتي، أقعد فترة أراقب الصلاة بتاعته في الفراغ، لقيته بيقيم الصلاة أطلب عنده العلم، لقيته بيقصر في الصلاة ما أطلبش عنده الآن، فيه معايير شرعية. اختلاط المعايير الشرعية بالمعايير الدنيوية نتيجة ضغط الواقع علينا وضغط أهل الباطل خطر، ﴿فَتَطْرُدَهُمْ﴾ تخيل لما ربنا يقول للنبي صلى الله عليه وسلم: ﴿فَتَطْرُدَهُمْ﴾ وحاشاه صلى الله عليه وسلم: ﴿فَتَكُونَ مِنَ الظَّالِمِينَ﴾.
وفي أثر في حديث صحيح مسلم، سعد بن أبي وقاص: أن ستة من الصحابة كانوا مع النبي صلى الله عليه وسلم وجاء المشركين وخاطبوا النبي صلى الله عليه وسلم طويلاً، فالحديث بيقول: فوقع في نفس رسول الله صلى الله عليه وسلم ما شاء الله أن يقع. إيه اللي وقع؟ ما نعرفش، قال إن إيه اللي وقع؟ هل يعملوه مجلس خاص؟ هل هم بشيء؟ هل فكر؟ هل تردد؟ هل هيشاورهم؟ الرواية ما ذكرتش. فوقع في نفس الرسول صلى الله عليه وسلم ما شاء الله أن يقع، فانزل الله عز وجل... الفقراء دول هم عماد الدعوة، أنت متهيأ لك أن الحل في الأغنياء، لا، إحنا ما يبقاش الدعاية... ما يبقاش آه معتقد أن الحل فيه فلوس الأغنياء، أن الأغنياء لو آمنوا هيجيبوا فلوس هتنصر الدعوة. دايماً بتفاجئ أن الأغنياء عبء، إلا من رحم الله، ولا إي يا شيخ خالد؟ بيبقى في الغالب عبء، الفقير يعني اللي يدعو الله عز وجل بالغداة والعشي يريدون وجهه كلهم عماد الدعوة. لذلك ربنا قال له: ﴿وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ﴾ بالنسبة للنبي صلى الله عليه وسلم أي تريد زينة الحياة الدنيا لنصرة الدعوة، ممكن بالنسبة لغيره تريد زينة الحياة الدنيا ومش عايز الفقراء، لكن النبي صلى الله عليه وسلم هو عايز اللي عنده دول ليه؟ عشان منصور الدين. ﴿فَتَطْرُدَهُمْ فَتَكُونَ مِنَ الظَّالِمِينَ * وَكَذَلِكَ فَتَنَّا بَعْضَهُمْ بِبَعْضٍ لِيَقُولُوا أَهَؤُلَاءِ مَنَّ اللَّهُ عَلَيْهِمْ مِنْ بَيْنِنَا أَلَيْسَ اللَّهُ بِأَعْلَمَ بِالشَّاكِرِينَ﴾ المعنى الأششهر اللي عليه جماهير المفسرين، وكذلك فتنا بعضهم أي: فتنا بعض المشركين ببعض المؤمنين، ليقول المشركين... معي؟ أنا هقولها كده، هفصل الآية أوضح الضمائر هفكها وبعدين هشرع بالتفصيل.
وكذلك فتنا بعض المشركين ببعض المؤمنين، ليقول المشركون استهزاءً وسخريةً: أهؤلاء الفقراء يعتقدون أن ما هم فيه منة من الله؟! والله ليست منةً، ولكن المنة الحقيقية ما نحن فيه من الغنى. ده معنى الآية، بمعنى الآية أن المشركين هيقولوا إيه؟ ربنا فتنهم وابتلاهم، ابتلاهم بإيه؟ ابتلاهم أن اللي سبقهم في الإسلام فقراء، ده ابتلاء. طب ده إسقاطه على واقعنا إيه يا جماعة؟ الفروقات اللي بين الملتزمين وبين الناس وبعضهم في الدين، الفروقات ديت والأخطاء اللي عند الملتزمين وعند أهل الدين قد تكون فتنة لبعض الناس ألا يلتزم، معي؟ تاني، يعني أحياناً مثلاً واحد عايز يلتزم، وتلاقيه يختلط بواحد ملتزم ودين بس عنده بعض الأخطاء، أخطاؤه دي ربنا ابتلاه، التاني ده عشان ما يلتزمش قد تكون سبب في عدم التزامه، يقول لك: لا يا عم، ده فلان أخلاقه وحشة، طب إيه علاقة أن فلان اللي بيصلي أخلاقه وحشة بأن أنت ما تصليش؟ فقد يبتلى بذلك. أنت نفسك ممكن تيجي تبتلى بسوء خلق عالم، بزيغة الحكيم، أن عالم يظل أو يزل زلة، ده ابتلاءات؛ لأن الصادق الحاجات دي ما تصدوش عن الالتزام، الصادق الباحث عن مراد الله، الفروقات والتغييرات دي ما تصدوش.
وده هيحصل، ده هيحصل أنك هتشوف داخل أهل الإيمان حاجات معينة، المشركين شافوا الفقر فالفقر صدهم. لأ، أنا عايز أقول لك أنك تشوف حاجات أشد من الفقر، قد تشوف أخطاء، قد تشوف شدة، قد ترى خلاف، قد ترى زيغة حكيم، قد ترى زلة عالم، الأشياء دي لو صدتك يبقى أنت كده فتنت. ممكن واحد يفتن بأن الكوتشي اتسرق من المسجد مثلاً ما عادش يرجع تاني، وممكن واحد زي ما نقول أنت... أنا على الكوتشي موجود؟ ماشي الحمد لله. وممكن واحد يفتن بابسط من كده أو بأصعب من كده.
بل بالعكس، تيجي مثلاً... أضرب لكم أمثلة كمان، ممكن واحد مثلاً لقى حد سبقه في طلب العلم، فلقى اللي سبقه في طلب العلم ده... لا، لقاه مثلاً ربنا كان مفرغه ورزقه من المال، فانت تقول للشخص التاني تقول له: أنت ما بتطلبش العلم ليه زي فلان؟ يقول لك: لا، أصل فلان عشان بس متفرغ وربنا رازقه، هو لو ما كانش كده ما كانش طلب علم. يقعد أي حد سابقه يقول: أصل هو ربنا أدا له كذا، طب وأنت ما بتطلبش العلم ليه؟ أنا لو ربنا فرغني زي فلان هطلب العلم! فلان سبقه في حفظ القرآن وفلان مثلاً إيه... في كلية مثلاً علمية معينة، وهو في كلية مثلاً بسيطة، فبتقول له: أنت ما حفظتش القرآن؟ يقول لك: لا، أصل هو في كلية علمية يا إبني الحفظ ما لوش علاقة بكذا. فتلاقي الفروقات الفردية ديت فتنة، الفروقات التفضيل اللي بين البشر ده ربنا وضعه فتنة، قد يفتن الناس عن الدين، الفروقات الفردية اللي بين الناس دي فتنة.
ممكن واحد فعلاً يتأفف أنه يبقى جنب فلان، واحد منفسن من فلان، ممكن واحد فيه درس مهم بالنسبة له ما يحضروش عشان منفسن من فلان، ممكن واحد يحتاج إلى علم فلان ومش عايز يروح له عشان متضايق منه، ممكن واحد يحتاج أنه يعمل... يعمل في الدعوة مع فلان بس مش عايز يعمل معه عشان منفسن معه. الفروقات ديت اللي بين البشر الطفيفة ديت تفتن الناس عن أجزاء من دينهم، وقد تفتن الناس عن كل دينهم، معي؟ وضحت كده ولا إيه؟ يبقى الفقر بتاع المؤمنين؟
وكذلك فتنا بعضهم ببعض ليقولوا... هؤلاء يبقى مين اللي بيقول كده هنا دلوقتي؟ الكفار. بيقولوا على مين؟ بيقولوا: ﴿أَهَؤُلَاءِ مَنَّ اللَّهُ عَلَيْهِمْ مِنْ بَيْنِنَا﴾ يعني بقول إيه؟ أنت عايز تقول لي أن الإيمان منة عظيمة، وأن ربنا اختار الفقراء بالمنة العظيمة دي وما أداهاش وما اختارهاش أن إحنا، إزاي؟ ده إحنا اللي معنا الفلوس، الطبيعي أن لما كان ربنا يختار، كان يختارنا، وبما أن ربنا ما اختارناش، يبقى أكيد دي مش منة! ده معنى الكلام. زي آية بالضبط: ﴿وَقَالُوا لَوْلَا نُزِّلَ هَذَا الْقُرْآنُ عَلَى رَجُلٍ مِنَ الْقَرْيَتَيْنِ عَظِيمٍ﴾ وبما أن القرآن ما نزلش على رجل من القريتين عظيم، يبقى اللي نزل ده مش قرآن! معي في الفكرة اللي عايزين يوصلوها؟ ﴿أَهَؤُلَاءِ مَنَّ اللَّهُ عَلَيْهِمْ مِنْ بَيْنِنَا﴾ فربنا بيقول لهم: ﴿أَلَيْسَ اللَّهُ بِأَعْلَمَ بِالشَّاكِرِينَ﴾ الله أعلم من يستحق النعمة، فلما تلاقي واحد ربنا أدا له نعمة وأنت قصرت فيها اتهم نفسك، ﴿أَلَيْسَ اللَّهُ بِأَعْلَمَ بِالشَّاكِرِينَ﴾ هم هيشكروا نعمة الإسلام، أنتم مش هتشكروها. ﴿أَلَيْسَ اللَّهُ بِأَعْلَمَ بِالشَّاكِرِينَ﴾.
فيه معنى تاني ده اللي عليه جماهير المفسرين، معنى تاني ذكره ابن عاشور وقلة قليلة من المفسرين قالوا: الآية بتاعة إثنين وخسين قيمة أن مين اللي طلب أن النبي صلى الله عليه وسلم يطرد الفقراء؟ المشركين، وأن المشركين قالوا له: إحنا مش هنؤمن إلا لما تطردهم، فالنبي صلى الله عليه وسلم ما طردهمش، فبالتالي هم إيه...
في آية اثنتين وخمسين وضحت فتنة أغنياء المشركين بفقراء المؤمنين، آية ثلاثة وخمسين بتقول إن في بعض ضعاف الإيمان فتنوا بالأغنية المشركين واستغربوا إزاي ربنا يديهم الفلوس وما يديلهمش هم الفلوس. فهل معنى الآية وكذلك فتنا بعض المؤمنين ببعض المشركين الأغنياء ليقول المؤمنون الفقراء هؤلاء المشركون يعطيهم الله المال ولا يعطينا نحن سؤال استنكاري؟ فهمت المعنى التاني، حد وقع مننا؟
فإن أحياناً بعض أهل الإيمان يستغرب إزاي المشرك معه فلوس وأنا ما معييش فلوس، ودي كتير الفترة دي. وده ابتلاء الزمان خاصة مع استضعاف المؤمنين وقلة الحيلة بتاعتهم وعدم تقدمهم الدنيوي، فتخيل إزاي الكفار معهم فلوس واحنا ما عناش فلوس؟ فيسأل السؤال ده: معقول ربنا بيحبوهم ويدوني فلوس وما يديناش؟ هؤلاء من الله عليهم من بيننا؟ فربنا بيقول لهم: أليس الله بأعلم بالشاكرين؟ ربنا سبحانه وتعالى يعلم مين اللي هياخد وشكر ومين اللي هياخد فيكفر، وأدا لهم الفلوس دي لتكون عليهم حسرة وليزدادوا إثماً وده استدراج. معي؟ ولكن زي ما قلت لكم، أنا قلت أقول لكم المعنى ده الأشهر اللي عليه جماهير المفسرين المعنى الأول.
أن اللي قال كلمة هؤلاء من الله مين؟ الكفار، قالوا كده استهزاء بضعاف المؤمنين. وإذا جاءك، احنا كده بقالنا قد إيه؟ ساعة، خلاص نختم. وإذا جاءك الذين يؤمنون بآياتنا فقل سلام عليكم كتب ربكم على نفسه الرحمة. ربنا قال له في تلات أصناف: الصنف الأول اللي عايز خزائن الله، أتعرض عنه تماماً. الصنف التاني اللي تنذره ويؤمن ويستجيب ويدعو الله بالغداة والعشي، ده تلزمه وتقعد معه. الصنف التالت اللي هيعصي وييجي، أو اللي هيبقى كافر ويقتنع وييجي، ده برده ما تطردوش، لا تستقبله بالحفاوة، بس هنا تدي له مزيد حفاوة ليه؟ عشان ما يحسش بالنقص، دايماً اللي جاي جديد في مجتمع لازم المجتمع يحتويه.
لما يبقى ناس قاعدة كلها ملتزمة في مسجد ويدخل واحد عاصي وباين عليه قمرات المعصية، بقاله كتير عاصي عشر سنين، ولسه ما بيعرفش يصلي ولا بيعرف يتوضأ، بلاش الناس تقعد ترمقه بالأبصار وتحسسه أنه وحش. لأ، الناس ده هنا بيقول لك إيه؟ بعض المفسرين قال معنى جميل جداً قال: وإذا جاءك الذين يؤمنون، يعني اللي لسه هيسلموا لأول مرة، بآياتنا فقل سلام عليكم. يقولوا: الأصل أن القادم يلقي السلام على إيه؟ على القاعد، يعني اللي جاي هو اللي يقول السلام عليكم، إلا في حالة واحدة، أن اللي جاي ملتزم أنت اللي تقوم له، واللي جاي يؤمن به أنت اللي تقوم تلقي عليه السلام، وده أمر للنبي صلى الله عليه وسلم أن اللي جاي هو اللي أنت اللي تقوم له وتسلم عليه وتهش له وتمس رعاية خاطره وجبر خاطره، ده مهم جداً، وتبشيره وتقول له: كتب ربكم على نفسه الرحمة أنه من عمل منكم سوءاً، بعد ما أنذر وخاف وتردد وعمل معاصي وجه، فاستقبله بقى مش تقعد تأدبه، مش تقعد تقول له أنت جاي دلوقتي! أنت جاي بعد إيه الموضوع خلص؟ لأ، كتب ربكم على نفسه الرحمة أنه من عمل منكم سوءاً بجهالة، وهنتكلم المرة الجاية إن شاء الله عن بجهالة، ثم تاب من بعده وأصلح فإنه غفور رحيم.
يبقى أنك أنت تستقبله وتحتفي به، لذلك جبر الخواطر ده مهم جداً من المعاني الجميلة قوي في المعنى ده. لما ربنا سبحانه وتعالى قال مع التلاثة اللي خلفوا في سورة التوبة، ربنا قال إيه: لقد تاب الله على النبي والمهاجرين والأنصار الذين اتبعوه في ساعة العسرة من بعد ما كاد يزيغ قلوب فريق منهم ثم تاب عليهم إنه بهم رءوف رحيم * وعلى الثلاثة الذين خلفوا حتى إذا ضاقت عليهم الأرض بما رحبت وضاقت عليهم أنفسهم. كان المتوقع أن ربنا يقول: لقد تاب الله على الثلاثة الذين خالفوا حتى إذا ضاقت عليهم.
من المعاني الجميلة: ليه ربنا قال في الآية اللي قبلها تاب الله على النبي والمؤمنين والأنصار؟ ليه جاب لفظ التوبة؟ يعني ما جاتش الآية إيه: لقد رضي الله وأعطاهم وفازوا المؤمنين النبي والمؤمنين ثم تاب على عشان ما يحسش أن التوبة ناقصة؟ عشان بس مجرد أن لما يعني شف حطوا ضمنهم هو بس فصلوا عنهم بآية لأنه تأخر عنه، لكن عشان ما يحسش أن كلمة التوبة دي كلمة ناقصة ويحس بمركب النقص في المجتمع أنه هو بقى ده التائب اللي عمل معصية، لأ، دخل وسطهم بواسطة تأخر عنهم بآية لأنه مجرد تخلف عنهم، فتأخر عنهم بآية فقط.
شوف الحكمة الربانية في معاملة الناس، فكذلك القادم ده: وإذا جاءك الذين يؤمنون بآياتنا فقل سلام عليكم كتب ربكم على نفسه الرحمة أنه من عمل منكم سوءاً بجهالة ثم من بعده وأصلح فله مغفور. اللي قال المعنى ده بتاع سورة التوبة ده بنسبة الفضل يعني لأبي الحسن الندوي، الإمام أبو الحسن الندوي. سيدنا موسى في المطر اللي هي القصة اللي هو اللي ربنا ستره يعني، فلذلك دايماً القادم الإنسان إيه يهش له ويبش ويقول له سلام عليكم، ويستحب أن أنت تقوم وتضحك له وتهش له وتبش وتبشره. وإن المرة الجاية إن شاء الله هنتكلم عن معنى يعني إيه السوء بجهالة وتكملة الآيات. نكتفي بهذا القدر، سبحانك اللهم وبحمدك أشهد أن لا إله إلا أنت أستغفرك وأتوب إليك، وجزاكم الله خيراً.