د. أحمد عبد المنعمالسلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم. بإذن الله عز وجل نستكمل تفسير سورة الأنعام. كنا توقفنا عند قول الله عز وجل بعد الآية واحد وسبعين: ﴿قُلْ أَنَدْعُو مِن دُونِ اللَّهِ مَا لَا يَنفَعُنَا وَلَا يَضُرُنَا وَنُرَدُّ عَلَى أَعْقَابِنَا بَعْدَ إِذْ هَدَانَا اللَّهُ كَالَّذِي اسْتَهْوَتْهُ الشَّيَاطِينُ فِي الأَرْضِ حَيْرَانَ لَهُ أَصْحَابٌ يَدْعُونَهُ إِلَى الْهُدَى اِئْتِنَا قُلْ إِنَّ هُدَى اللَّهِ هُوَ الْهُدَى وَأُمِرْنَا لِنُسْلِمَ لِرَبِّ الْعَالَمِينَ * وَأَنْ أَقِيمُوا الصَّلَاةَ وَاتَّقُوهُ وَهُوَ الَّذِي إِلَيْهِ تُحْشَرُونَ﴾ [الأنعام: 71-72].
توقفنا آخر حاجة في الآية واحد وسبعين وبداية الآية اتنين وسبعين. أهم مصطلح كنا توقفنا عنده المرة اللي فاتت وقلنا المصطلح ده جه مخصوص في الموضع ده في القرآن تحديدا في هذا الموضع منفردا، مصطلح مهم جدا، والانسان يعوذ بالله أنه يتلبس بمصطلح كلمة حيران. كالذي استهوته الشياطين في الأرض إيه؟ حيران. كلمة حيران فيما أذكر يعني لم تأتي في القرآن إلا في هذا الموضع، وتدل على حالة يتلبس بها الانسان من عدم اليقين، انسان تايه. آه الموضع ده في القرآن له أهمية خاصة للخروج من الحيرة.
قبلها جئت الآيات التي قبل كلمة حيران: أهم سبب من أسباب دخول الانسان في حيرة من أمره إيه اللي يخلي انسان بعد ما كان على يقين دخل في حيرة؟ قول الله عز وجل، الآية ثمانية وستين: ﴿وَإِذَا رَأَيْتَ الَّذِينَ يَخُوضُونَ فِي آيَاتِنَا فَأَعْرِضْ عَنْهُمْ حَتَّى يَخُوضُوا فِي حَدِيثٍ غَيْرِهِ﴾ [الأنعام: 68]. أن يبقى في مجالس بتخوض في الآيات وهو جالس وما عندوش علم، والمفروض أنه يقوم. تلاقي واحد دخل منتدى من المنتديات، دخل موقع من المواقع، عرض نفسه لشبهات، جاي يقول لك: الحقني ده أنا حاسس بشبهة في البخاري، أنا مش مصدق، مش عارف إيه في آية كذا. وتجد أن المفروض أن العوام اللي هي بتزود الإيمان أصلاً آيات وأحاديث انقلبت عنده الشبهات بسبب جلوسه في المجالس اللي فيها خوض في آيات الله.
فالمفروض الانسان لما يرى هذه المجالس يقوم وينتفض فزعا، أما يبقى عنده القدرة على الرد، وقلنا حتى إن مش أي حد يبقى عنده قدرة رد يجلس، لازم يشوف الظروف المحيطة؛ هل الجو ده جو بحث عن الإيمان؟ ولا جو مجرد جدال وخلاص؟ ما ضربوه لك زي ما قلنا قبل كده في سورة الزخرف: ﴿مَا ضَرَبُوهُ لَكَ إِلَّا جَدَلًا﴾ [الزخرف: 58]. في أحيانا كلام مجرد جدال فقط. وجود اللي يسبب بقى، ممكن واحد ما حضرش هذه المجالس بس دخل في الحائر أيضاً، وجود ناس من أهل العلم المعروفين في هذه المجالس ولا ينكرون ولا يغيرون.
والخطاب هنا للنبي صلى الله عليه وسلم: ﴿وَإِذَا رَأَيْتَ الَّذِينَ يَخُوضُونَ فِي آيَاتِنَا فَأَعْرِضْ عَنْهُمْ حَتَّى يَخُوضُوا فِي حَدِيثٍ غَيْرِهِ وَإِمَّا يُسْلِيَنَّكَ الشَّيْطَانُ فَلَا تَقْعُدْ بَعْدَ الذِّكْرَى مَعَ الْقَوْمِ الظَّالِمِينَ * وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ﴾ [الأنعام: 68-69]. احنا قلنا فسرنا الأقوال في الآية ديت، وأن أحد الأقوال أن الحكم ده نسخ أو على الاستحباب لعامة المؤمنين، إنما للنبي صلى الله عليه وسلم لا، وكذلك على العلماء أنهم يجلسوا في مجلس فيه انتقاص من الشرع وانتقاص من الدين ولا ينكر ولا يتحرك ولا يقوم ولا ينتفض. ده بيخلي الناس تشك في تشاهده كده، فتدخل في هذه الحيرة من الأمر.
إزاي بقى الانسان يخرج سواء كان على يقين وتعرض لمجالس اللغو دي فدخل في الحيرة من أمره، أو هو أصلاً لسة باحث عن الحق حيران؟ ﴿لَهُ أَصْحَابٌ يَدْعُونَهُ إِلَى الْهُدَى اِئْتِنَا﴾ [الأنعام: 71]. أعرف أن الانسان الحيران ما بيتسابش، في ناس بتحاول تشده للهدى وناس بتحاول تشده للضلال، حتى يستقر على أمر من اتنين في الآخر. يعني ما فيش حد زي ما النبي صلى الله عليه وسلم قال: «كل الناس يغدو فبائع نفسه فمعتقها أو موبقها». كل واحد في الغالب بيتدين بدين، سواء عالم أو لا يعلم، ممكن يبقى عبد لهواه وهو لا يشعر، ما بيتسابش، ما فيش حاجة اسمها إن هو كده انسان فاضي، لا. هو جوا شيطان، جوا هوى، جوا شهوات أو دين أو غير ذلك وهو لا يشعر، ما فيش حاجة اسمها إنه انسان فاضي.
له أصحاب يدعونه إلى الهدى. قلنا على قولين إن ممكن يكونوا الأصحاب دول، أصحاب الحق، في ناس قالوا إن دول أصحاب الحق، وناس قالوا إن دول بيدعوا أن معهم الحق. الشاهد أنه مش هيتساب، اللي هيفضل حيران مش هيتساب، هيلاقي ناس بتحاول تشده كده وناس بتحاول تشده كده، ولازم يبقى هو على بينة من أمره، اللي ماشي في الدين مش على بينة من أمره، في الغالب أي حاجة بتصيبه بالشك. لازم الانسان يبقى على بينة من أمره في هذا الدين: ﴿قُلْ إِنَّ هُدَى اللَّهِ هُوَ الْهُدَى وَأُمِرْنَا لِنُسْلِمَ لِرَبِّ الْعَالَمِينَ﴾ [الأنعام: 71].
هو ده واحد اللي هو بتاع ربنا، وامرنا لنسلم لرب العالمين. دي أكثر إشكالية بتبقى عند الحيران أنه لسه مش عايز يستسلم للنص، مش عايز يستسلم للوحي، مش عايز يبقى منقاد للشريعة. في حين أن هو بيكتسب اليقين لما بيستسلم، بيقرب شبر فبيجد نور ذراع، أمشي في نور الذراع فيجد نور الباع، ثم يسير في الطريق خلاص يبقى الطريق بالنسبة له هين، ثم يهرول في الطريق، لكن مشكلة الانسان أن هو مش عايز يستسلم، عايز يشوف آخر الطريق قبل ما يمشي فيه.
ربنا بيقول: ﴿وَلَوْ أَنَّ أَهْلَ الْقُرَى آمَنُوا وَاتَّقَوْا لَفَتَحْنَا عَلَيْهِم بَرَكَاتٍ﴾ [الأعراف: 96]. هو يقول لربنا: لا، افتح علي بركات وأنا أمشي في الطريق. يعني دائماً أنت لازم الخطوة الأولى تبقى عليك: ﴿إِذْ قَامُوا فَقَالُوا رَبُّنَا رَبُّ السَّمَاوَاتِ وَالأَرْضِ﴾ [الكهف: 14]. هما قاموا الأول، وربنا بيقول: ﴿وَرَبَطْنَا عَلَى قُلُوبِهِمْ إِذْ قَامُوا﴾ [الكهف: 14]. يعني هما قاموا فقالوا فربط الله على قلوبهم. احنا نقول: لا يا رب اربط على قلبي وأنا أقيم وأقول كلمة الحق. لازم الشبر الأول عليك. لذلك الخروج من حالة الحيرة ديت مش هيجي لك ملك من السماء، أو الخروج من أي حالة معينة من ذنب معين، أنت لازم تبحث ولو حتى مشاعر جواك كده الحزن أنك نفسك توصل لربنا: ﴿وَأُمِرْنَا لِنُسْلِمَ لِرَبِّ الْعَالَمِينَ﴾ [الأنعام: 71].
وقلنا دائماً اللي بيدخل في هذه الحيرة الكلام معه دائماً يبقى في الأصول، في الاستسلام لله وقضية الصلاة: ﴿وَأَنْ أَقِيمُوا الصَّلَاةَ وَاتَّقُوهُ وَهُوَ الَّذِي إِلَيْهِ تُحْشَرُونَ﴾ [الأنعام: 72]. الاستسلام لله، الصلاة، الدار الآخرة. ولما تيجي تكلمه عن ربنا اتكلم عن الصفة التي لا ينازع فيها، صفة الخالقية. الله عز وجل أول لما تعرف إلى العباد في كتابه تعرف إليهم بهذه الصفة: ﴿اقْرَأْ بِاسْمِ رَبِّكَ الَّذِي خَلَقَ﴾ [العلق: 1]. أول صفة تعرف الله عز وجل بها إلى الخلق هي صفة الخالقية التي لا ينازع فيها.
احنا قلنا دائماً عندنا التحدي في القرآن بحاجتين، بيخلقوا ذباباً أو يأتوا بقرآن، التحدي بصفة الخلق والتحدي بالقرآن اللي هو كلام الله عز وجل معجز. فالأتنين دول التحديين دول ينقلوا الانسان زي ما قلنا من الإلحاد إلى الإسلام. يعني التحدي بالخالقية ينقله من الإلحاد إلى إثبات وجود الله، ومن إثبات وجود الله طب إيه الدين الحق؟ الإسلام من بقية الأديان عشان القرآن. فالتحديين دول ينقلوا الانسان من أبعد نقطة إلى داخل الإسلام: ﴿وَهُوَ الَّذِي خَلَقَ السَّمَاوَاتِ وَالأَرْضَ بِالْحَقِّ وَيَوْمَ يَقُولُ كُن فَيَكُونُ﴾ [الأنعام: 73].
أمتى يوم يقول كن فيكون ده؟ قيل: أي يوم البعث. وقيل: يوم النفخة الأولى، لما الناس كلها تموت: ﴿قَوْلُهُ الْحَقُّ وَلَهُ الْمُلْكُ يَوْمَ يُنفَخُ فِي الصُّورِ﴾ [الأنعام: 73]. قيل: النفخة الأولى لما الناس كلها تموت: ﴿يَوْمَ يُنفَخُ فِي الصُّورِ لَهُ الْمُلْكُ﴾. أي لا ينازعه أحد ولو ظاهراً في الملك. الله عز وجل له الملك في كل وقت وحين، لذلك احنا بنقول: الحمد لله رب العالمين، الرحمن الرحيم إيه؟ مالك يوم الدين. وفي قراءة: ملك يوم الدين.
طب الله عز وجل يملك كل الأيام، ليه يوم الدين تحديدا؟ هذا اليوم لا ينازع فيه، ما فيش حد بيقدر يدعي الملك، الكل بيهرب والكل بيقول: سلم سلم، ما فيش حد يقول: أنا لي الملك، بل حتى الجلود بتاعة الانسان تتبرأ منه، حتى إيديه ورجليه ولسانه يتبرأ منه ويقول لهن: تباً لَكُنَّ عنكن كنت أنازع أو أدافع. الوقت ده لا ينازع الله عز وجل في ملكه أبداً. فكذلك من الأوقات اللي بيظهر فيها الملك واضحاً جلياً وله الملك أمتى؟ يوم ينفخ في الصور ويقول الله عز وجل: أنا الملك أنا الديان. الله عز وجل ملك الملوك سبحانه وتعالى لا ينازع، كل الناس ميتة، كل الخلق، ما فيش لا يوجد إلا الله سبحانه وتعالى في هذه اللحظة، لا ينازع سبحانه وتعالى: ﴿وَلَهُ الْمُلْكُ يَوْمَ يُنفَخُ فِي الصُّورِ عَالِمُ الْغَيْبِ وَالشَّهَادَةِ وَهُوَ الْحَكِيمُ الْخَبِيرُ﴾ [الأنعام: 73]. صفة العلم واتكلمنا فيها باستفاضة في قول الله عز وجل: ﴿وَمَا تَسْقُطُ مِن وَرَقَةٍ إِلَّا يَعْلَمُهَا﴾ [الأنعام: 59]، عالم الغيب والشهادة وهو الحكيم الخبير.
بعد كده ننتقل إلى هذه القصة العظيمة اللي جت في الموضع ده بعد كلمة حيران ولها دلالة، قصة سيدنا إبراهيم. هذه القصة حقيقة يعني الواحد كان متهيب يدخل سورة الأنعام بسبب وجود هذه القصة، بالرغم من جمال هذه القصة وروعة هذه القصة، أن للأسف الآيات دي آيات مظلومة في التفاسير. الآيات على ما فيها من، آه زي ما ربنا قال: وليكون من الموقنين، هذه الرحلة الجميلة التي تنقل الانسان من كلمة حيران إلى كلمة وليكون من الموقنين. شوف إزاي الرحلة دي بتنقلك على طول بعد كلمة حيران إلى كلمة ليكون من الموقنين.
هذه الرحلة اللي بتاخدك من أول: لا أحب الآفلين، لكلمة: إني وجهت وجهي. وهنشوف المراحل الثلاثة دول. هذه الرحلة العظيمة المليئة بالإيمانيات مظلومة، وأقول مظلومة في كثير من كتب التفاسير. ليه؟ انشغل كثير من المفسرين -يعني أنا كثير من التفاسير في الآيات ديت، أغلب التفاسير ما يقرب من ثمانية وتسعين في المية أو أكثر من التفاسير- مشغولة: هل سيدنا إبراهيم كان ناظراً؟ كان باحث عن الحق؟ ولا كان مناظراً؟ كان يناظر قومه؟
هل سيدنا إبراهيم كان ناظراً؟ يعني كان هو اللي باحث عن الحق؟ ولا كان بيعمل كده قدام قومه بيستدركهم أو بيجادلهم؟ نزل معهم، تنزل مع الخصم، يفترض معهم افتراضات، ثم يبحث، يعني زي بيمثل قدامهم أنه يبحث عن الحق عشان يبين لهم أن الآلهة اللي بيعبدوها باطلة؟ فبيسموه ده مناظراً، مقام المناظرة. فهل كان إبراهيم ناظراً أو مناظراً؟
والخلافات رهيبة اللي في التفاسير، وإن كان أغلب المفسرين اختار أن سيدنا إبراهيم كان مناظراً. طبعا هم مع أن ممكن ظاهرياً اللي يقرأ الآيات سلاسة وهو لسه ما يعرفش أي حاجة، ربنا بيقول: ﴿فَلَمَّا جَنَّ عَلَيْهِ اللَّيْلُ رَأَى كَوْكَبًا قَالَ هَذَا رَبِّي فَلَمَّا أَفَلَ قَالَ لَا أُحِبُّ الآفِلِينَ﴾ [الأنعام: 76]، وهو لوحده بيقول: ﴿لَّئِن لَّمْ يَهْدِنِي رَبِّي لَأَكُونَنَّ مِنَ الْقَوْمِ الضَّالِّينَ﴾ [الأنعام: 77]. ظاهرياً كده أن هو كان لوحده سيدنا إبراهيم. إيا بقى كان تأويل الآيات اللي قال هرب من أن هو كان ناظراً.
عشان حاجتين؛ عشان إزاي يمر على سيدنا إبراهيم وقت من الأوقات يقول هذا ربي على النجم وهو مش عارف ربنا، وأن الأنبياء لا يجوز عليهم هذا الكلام قبل النبوة على رأي جمهور العلماء أن الأنبياء معصومون من الشرك قبل النبوة. السبب التاني، دي مباحث في العقيدة هي اللي لما هجمت على كثير من المفسرين أثناء الكلام كان حاطط في ذهنه المباحث دي، كان حاطط في ذهنه وهو بكتب التفسير، إيه مباحث عصمة الأنبياء؟
المبحث التاني: أن هل الانسان محاسب من غير رسالة؟ هل الانسان مطلوب أنه يصل بعقله إلى الله عز وجل حتى لو ما جاش وحي ولا لا؟ المسألتين في كتب العقيدة وفيهم استفاضة، أياً كان أقحموا في التفسير دوت وانشغلوا. أنا عايز أقول لك إن المباحث اللي انشغل بها كثير مفسرين، مبحث: هل أبو سيدنا إبراهيم كان مؤمن ولا لا؟ وهل أبو النبي صلى الله عليه وسلم وأمه كان مؤمنين ولا لا؟ وإزاي يقول لأبيه آزر؟ وهل آباء الأنبياء؟ والشيعة بقى طبعا عندهم إن موضوع رابطين دايماً الإيمان بالنسل، آل البيت رابطين فقال لك أبو طالب في الجنة، وأبو النبي صلى الله عليه وسلم في الجنة، وأمه في الجنة. ودخلوا في مباحث تأثر بها بعض المفسرين وكتبوا مباحث الواحد تعجب، إيه اللي دخل الآيات؟
سيدنا إبراهيم مليانة إيمان ومليانة يقين. ما فيش إشكالية أن ده يتحل في كتاب العقيدة، لكن الإشكالية اللي بتحصل إيه؟ أن أنت بتقرأ، هو التفسير اللي كاتب التفسير ممكن يكون ده الغرض من كتاب التفسير بتاعه، لكن أنت لما بتقرأ التفسير أنت عايز تعيش مع آية، عايز تخرج بمعين، إيه المعاني الإيمانية؟ كلمات الأنبياء أعلى كلمات على وجه التاريخ، مليانة إيمان، أعلى قلوب على وجه الأرض، أفضل عزائم على وجه الأرض بتتكلم الآن. فالمفروض دائماً لما تلاقي الأنبياء بيتكلموا في القرآن تقف مع الكلمات دي، الكلمات دي فيها نور، الكلمات دي توفر عليك عشر كتب زي مدارج السالكين، ده كلام الأنبياء.
فبنقول كلمات الأنبياء تدرس، فاحنا عايزين ما نخشش في تفاصيل جانبية، لكن كاتب التفسير هو بالضبط كأنه بيعمل لك إيه؟ زي كتاب العقيدة كده؛ كتاب العقيدة هو بيقول لك: أنا مش مسئول أن أنا أخلي إيمانك يزداد. أمال كتاب العقيدة غرضه منك إيه؟ يضبط لك، يحط لك حدود في العقيدة، عشان ما تضلش. عشان لما تيجي تعيش في إيمانياتك، عشان لما تيجي تربط عقائد -هي دي كلمة عقيدة- لما تيجي تربط عقائد تربط عقائد على قلبك، ما تربطش حاجة غلط.
لما تيجي تدخل في مباحث التوكل وصفات الله وتعيش مع أسماء الله وصفاته ما تنسُبش لله شيء غلط، دي كتب العقيدة. فأحياناً يجي واحد يقرأ كتب العقيدة معتقد أن إيمانه هيزيد، لا، كتاب العقيدة بيحطوا لك حدود عشان ما تضلش بس؛ بالضبط زي أرض بينظفها لك كتاب العقيدة، يقول لك: ابني أنت بقى. إنما العقيدة اللي كانت في قلب إراهيم عليه السلام وهو في النار في الهواء قبل ما يسقط في النار وهو بيقول: ﴿حَسْبُنَا اللَّهُ وَنِعْمَ الْوَكِيلُ﴾ [آل عمران: 173]، دي مش هتلاقيها في كتاب العقيدة.
المعاني الإيمانية بتاعة التوكل: «لو أنكم توكلوا على الله حق توكله»، دي مش العقيدة، وهيحط لك ضوابط للتوكل. فكذلك كتاب التفسير بيحط لك ضوابط -اللي اشترط على نفسه كده- ضوابط لفهم الآيات، عشان لما تعيش أنت بالآيات ما تضلش. معايا؟ فلذلك فيه فارق بين كتاب مثلاً زي كتاب في ظلال القرآن، هو قال: أنا هيعيش في ظلال الآيات، مش هيرتبط إنه يدخل نفسه في هذه المباحث، فبعض الناس يلوم عليه إنه ما حلش إشكالياته، وهو أصلاً ما اشترطش على نفسه كده، أو واحد يزعل من كتاب تفسير، وهو أصلاً ما اشترطش على نفسه إنه يعيشك في الإيمانيات.
فالشاهد، زي ما بنقول هذه الرحلة، الآيات اللي ظلمت كثيراً عايزين نبلغ، وأنا طبعا أميل لاختيار أن سيدنا إبراهيم كان ناظراً -الإام الطبري وقوله ينسب لابن خزيمة والامام الخطابي وقلة حقيقة- لكن جماهير المفسرين قالوا إن سيدنا إبراهيم -أنا أمل إن هو كان ناظراً- حقيقة أن سيدنا إبراهيم كان لوحده، أياً كان بقى المقام ده كان إيه أو تأويل اللي عايز بقى يعود شوف إيه إيه دلالات ده؟ الإمام الخازن والامام الرازي ولا ابن كثير اختاروا من أكثر ثلاثة اختاروا أن هو مناظر، وأصلوا تأصيل قوي جداً. والامام الطبري وناس من المعاصرين، مبحث ظريف ستين صفحة كده ملخص بس مختار إنه كان ناظر، اسمه «شواهد اليقين على استدلال الخليل»، واحد اسمه سامي سويلم، «شواهد اليقين على استدلال أن الخليل هنا عليه على النبي أفضل الصلاة والسلام كان ناظراً»، عمل مبحث.
الشاهد، اللي عايز يرجع للخلاف وما بين المفسرين يقرا المبحث ده، ويقرا رد الخازن والرازي وابن كثير. لكن عايزين نقول احنا بقى إيه كدرس؟ أياً كان سيدنا إبراهيم كان ناظراً أو مناظراً، ربنا بيقول: ﴿وَكَذَلِكَ نُرِي إِبْرَاهِيمَ مَلَكُوتَ السَّمَاوَاتِ وَالْأَرْضِ وَلِيَكُونَ مِنَ الْمُوقِنِينَ﴾ [الأنعام: 75]. أن رؤية ملكوت السماوات والأرض، سواء منفرداً أو معه أحد، تؤدي إلى الوصول للإيه؟ اليقين. كيف نصل إلى اليقين؟ هي دي الإشكالية.
طب سيدنا إبراهيم كان معه حد بيعلمهم؟ طب علمهم إيه؟ هي دي الإشكالية كتير من التفاسير انشغل عنها. قال: إنه كان مناظراً. طب ماشي، كان بيناظر، لكن كان يريد إيه من المناظرة؟ أو كيف وصل بهم تدريجياً أن ربنا يقول: ﴿وَلِيَكُونَ مِنَ الْمُوقِنِينَ﴾ [الأنعام: 75]؟ دلالات كلمات إبراهيم: ﴿لَا أُحِبُّ الْآفِلِينَ﴾ [الأنعام: 76]، ﴿إِن لَّمْ يَهْدِنِي رَبِّي﴾ [الأنعام: 77]، ﴿إِنِّي وَجَّهْتُ وَجْهِيَ﴾ [الأنعام: 79]، كلمات الجمل الثلاثة دي دلالتها إيه أياً كان سيدنا إبراهيم قال الكلام ده؟ سواء قاله لوحده أو غرضه أن الناس تتعلمه، دلالات الكلام ده إيه؟ مش هتفرق نظرة أو مناظرة، وده اللي احنا عايزين نقف معه. خلاص، عشان نبقى خرجنا من الإشكالية ديت، أياً كان إبراهيم عليه السلام كان ناظراً أو مناظراً، ربنا قال إنه قال: ﴿وَلِيَكُونَ مِنَ الْمُوقِنِينَ﴾ [الأنعام: 75]، وقال كلمات معينة قالها إبراهيم، خلاص؟
طيب، ﴿وَإِذْ قَالَ إِبْرَاهِيمُ لِأَبِيهِ آزَرَ أَتَتَّخِذُ أَصْنَامًا آلِهَةً إِنِّي أَرَاكَ وَقَوْمَكَ فِي ضَلَالٍ مُّبِينٍ﴾ [الأنعام: 74]. هنجد هنا الحاجات فارق ما بين الأصنام وبين عبادة الكواكب؛ اللي قال إن إبراهيم كان مناظراً قال إن هم قومه كانوا بيعبدوا الكواكب، عشان كده قال لهم إن النجم ما ينفعش، قالها، والشمس ما تنفعش، قالها، والقمر ما ينفعش إلهاً. طب إذا كان هو في الأول قال: ﴿أَتَتَّخِذُ أَصْنَامًا آلِهَةً﴾ [الأنعام: 74]؟ وبعض المفسرين أنكر أن قومه يكونوا بيعبدوا الكواكب، يبقى فيه مرحلتين، فيه مرحلة كلمة آلهة ومرحلة كلمة ربي.
تاني، سيدنا إبراهيم بيقول: ﴿وَإِذْ قَالَ إِبْرَاهِيمُ لِأَبِيهِ آزَرَ أَتَتَّخِذُ أَصْنَامًا﴾ إيه؟ ﴿آلِهَةً﴾ [الأنعام: 74] بيتكلم هنا على الآلهة، أن الأصنام دي ما تنفعش آلهة، ما تنفعش دي اللي تقدم لها العبادة. كلمة «هذا ربي» البحث عن الرب الخالق، خلاص فيه فارق بين الآلهة وبين الرب، هنتكلم في الكلام ده، شاهد احنا عايزين بس نجيب الفروقات دي، الفرق الثاني ما بين «اني أراك» هو شايف وبينه، وكذلك نري، ربنا اللي بيوريه يبقى لازم الشبر الأول عليك.
سدنا إبراهيم بدأ الشبر الأول أنه بيتسائل، ودي أهم خلق في سيدنا إبراهيم؛ خلق التساؤل عشان كده هنا قال: ﴿أَتَتَّخِذُ أَصْنَامًا آلِهَةً﴾ [الأنعام: 74]. ولما ييجي دايماً يتكلم مع قومه تجد سيدنا إبراهيم يكثر من التساؤلات زي ما قلنا قبل كده في آيات سورة الصافات: ﴿إِذْ جَاءَ رَبَّهُ بِقَلْبٍ سَلِيمٍ * إِذْ قَالَ لِأَبِيهِ وَقَوْمِهِ مَاذَا تَعْبُدُونَ * أَئِفْكًا آلِهَةً دُونَ اللَّهِ تُرِيدُونَ * فَمَا ظَنُّكُم بِرَبِّ الْعَالَمِينَ * فَنَظَرَ نَظْرَةً فِي النُّجُومِ * فَقَالَ إِنِّي سَقِيمٌ * فَتَوَلَّوْا عَنْهُ مُدْبِرِينَ * فَرَاغَ إِلَى آلِهَتِهِمْ فَقَالَ أَلَا تَأْكُلُونَ * مَا لَكُمْ لَا تَنطِقُونَ * فَرَاغَ عَلَيْهِمْ ضَرْبًا بِالْيَمِينِ * فَأَقْبِلُوا إِلَيْهِ يَزِفُونَ * قَالَ أَتَعْبُدُونَ مَا تَنْحِتُونَ﴾ [الصافات: 84-95]. نص صفحة فيها ست سبع أسئلة، كلها أسئلة.
الأسئلة ديت في الجو اللي مليان ركود فكري وتقاليد الآباء مستمرة، بيرمي لهم حجر كده في البحر الراكد ده، ويقول لهم: فوقوا، فكروا، أنتم ما بتفكروش ليه؟ ده ينفع آلهة؟ طب أنا هكسره لك. زي ما هو سواء عمل مع نفسه أو معهم: ده ينفع رب؟ فلما قفل قال: ده ما ينفعش رب. طب اللي بعده ينفع رب؟ لا، قفل ما ينفعش رب. طب اللي بعده تنفع رب؟ لا، دي قفلت ما تنفعش رب. يبقى إذاً سيدنا إبراهيم، لذلك حتى سيدنا إبراهيم بيقول: ﴿رَبِّ أَرِنِي كَيْفَ تُحْيِي الْمَوْتَى﴾ [البقرة: 260]. شف الخلق ده مستمر مع سيدنا إبراهيم لا على درجات اليقين، وحتى بعد ما حَجَّ قومه قال: كلها أسئلة: ﴿أَتُحَاجُّونِّي فِي اللَّهِ وَقَدْ هَدَانِ﴾ [الأنعام: 80]، ﴿فَأَيُّ الْفَرِيقَيْنِ أَحَقُّ بِالْأَمْنِ﴾ [الأنعام: 81]. ما بديش جمل خبرية، بيدي جمل استفهامية، عايز اللي قدامه يشاركه في التفكير.
يعني هو ممكن يقول له الفريق الأحق بالامن والفريق المؤمن. هو ما جبهالوش كده، وسأله الأول لو فيه ناس بتشرك بالله وناس موحدة: أي الفريقين أحق بالأمن؟ كل كل تعاملات سيدنا إبراهيم أنه بيسأل قومه، عايز يفوقهم، بيراجوهم بهَزِّهم، بيوقظهم، فوقوا من الركود والتقاليد اللي أنتم فيه ده، ودي أهم حاجة تعملها في مجتمع. يعني تلاقي زي ما بيقول واحد بقاله مثلاً عشرين سنة زملكاوي، بقاله عشرين سنة مثلاً بيتغلب زملكاوي، يعني هو وزعلان وكل مرة يزعل ويعيط، ما وقفش يسأل نفسه: هو أنا ليه زملكاوي؟ وأنا جيت لقيت نفسي كده. طب هو ده ليه أهلاوي؟ طب وهو الإنسان كيف يصبح الإنسان أهلاوياً أو زملكاوياً؟ ما سألش ده بتتحصل إزاي؟ هل بيقدم كارنيهات في مكان؟ هل وهو صغير حد قدم له؟ لقى نفسه كده. طب إزاي ينتقل؟ هل بيقدم ورق وبعدين وبيحسوا إنه إيه خلاص الموضوع اتدبس ولو جينا قال يقولوا عليه إنه هو ندل لو جى ساب الزمالك وراح للاهلي أو ساب الأهلي يقولوا عليه ندل طب ندل ليه؟ طب هو أنا إيه اللي خلاني كده؟ طب إيه العمر المعين اللي أنا بعده ما ينفعش أغير؟ طب هو ما بيسألش نفسه إيه التساؤلات دي؟
يعني هو ما بيوقفش مع نفسه. كتير من العقائد والأفكار اللي منتشرة هو ما بيسألش نفسه ليه هو لقى الناس كده؛ زي عقيدة الشبشب المقلوب، عارفين عقيدة النيابة عن هي حرام. طب هو ليه حرام؟ أنا مش أنا بحثت في الموضوع فعلاً نفسي ألاقى أصل. وتجد ناس ممكن ما بيصليش، يقول لك: حرام! وتلاقي ساعة لما يلاقي الشبشب بينتفض، فعلاً وأنا شفت ده بنفسي، واحد لابس دهب وجه شاف حاجة الشبشب مقلوب وشايل حاجة تقيلة، وقف وتعب ونزل عشان يعدل! طب طب صلّ!
الواحد فاشل، احنا عايزين نقول إيه؟ عقيدة انك تسأل: إيه الدليل؟ إيه الدليل على كده؟ لما يبقى مجتمع غالب عليه التقليد وعقائد معينة، سواء وطنية أو قومية، وإنسان ما هوش فاهم هو كره الجزائري ليه في الماتش؟ هو عمل معهم مشكلة؟ ولا كانت مش فاكر الجزائر ولا كانت تونس ولا إيه؟ الجزائر، طب على إيه؟ إيه الإشكالية؟ التساؤلات دي في لما بيبقى بحر الركود ده لازم يتهز، لازم هنا الإنسان يبدأ يسألهم: ﴿فَمَا ظَنُّكُم بِرَبِّ الْعَالَمِينَ﴾ [الصافات: 86] فسيدنا إبراهيم بيقول له: أَتَتَّخِذُ أصناماً آلهة؟ إزاي الأصنام عملتها آلهة؟ أنت عارف إن هي أصنام، وأنت اللي عملتها آلهة. ينفع الإله يتعامل؟ طب ما أنا اللي أنا قائلها أنا كمان! وتتخذ أصناماً آلهة! عشان كده قال له: ﴿إِنِّي أَرَاكَ وَقَوْمَكَ فِي ضَلَالٍ مُّبِينٍ﴾ [الأنعام: 74].
لما كسر سيدنا إبراهيم التقليد ده ربنا وراه بقى ملكوت السماوات، وبعدها على طول: ﴿وَكَذَلِكَ نُرِي﴾ [الأنعام: 75] كان لازم ياخد الشبر الأولاني. ليه سيدنا إبراهيم اللي ربنا وراه؟ لأن الباقي ما رضاش يكسر التقليد، الباقي ما رضاش يسأل، وهو شايف إن هم على ضلال بس ما رضاش يتسائل، ما رضاش يقف مع نفسه وقفة. كتير من الناس هو عارف إن لو وقف مع نفسه وقفة هيتغير، بس هو مش عايز يوقفها، لو وقف سأل نفسه أسئلة كتير هو عارف إنه هيتغير، يعني هو لو وقف في أشياء كتير هو عارف إنه لو وقف وسأل عن حكمها هيسيبها، أو هيبقى على الأقل ضميره بيأنبه عارف إن هي حرام، فلا يرضاش يسأل. هو معتقد أن هروبه من السؤال معناه إنه بيريح ضميره، أبداًَ! السؤال هيفضل وراك لغاية يوم القيامة، لغاية: ﴿هَذَا كِتَابُنَا يَنطِقُ عَلَيْكُم بِالْحَقِّ﴾ [الجاثية: 29].
كتير امرأة امرأة بتعمل شيء معين في الحجاب مش عايزة تاخد القرار، أو حد معين مش عايز ياخد قرار في معصية أو معاملة مالية أو غيره، هو بيهرب وهو عارف إنه لو وقف هو مش عايز يسمع؛ زي بالضبط اللي مش عايز يسمع عن الموت كده، لا لا لا ما تتكلمش عن الموت. هو لما يعني أنت معنى أن أنا ما تكلمتش عن الموت أنك مش هتموت أو أنك مش هتبْعَث أو أنك مش هتسأل؟
فأنت دورك هنا زي ما قلنا زي الصورة هنا مليانة كلمة «قل»، قذائف تفوق الإنسان، تخرجه من هذه الحيرة. هذه القذائف اللي مليانة معنا طول الصورة، قلنا أكتر من أربعين مرة في الصورة سورة الأنعام كلمة «قل»، دلائل توحيد وآيات بينات أن هم بيهربوا من هذه الآيات. إذاً، وجود هذه القصة في سياق سورة الأنعام دلالته إيه؟ أن المجتمع المكي الذي نشأ على التقليد الأصنام وتقليد الآباء القصة دي تيجي تفوقهم: مش أنتم بتقولوا سيدنا إبراهيم وبتطوفوا حوالين الكعبة وبتستفيدوا اقتصادية من الكعبة اللي بناها إبراهيم؟ طب شوفوا سيدنا إبراهيم كان بيعمل إيه؟ شوفوا سيدنا إبراهيم كان بيسأل إزاي؟ شف سيدنا إبراهيم قال لقومه إيه؟ دي النقطة الأولى.
النقطة الثانية: أن ده طريق الخروج من الحيرة اللي أنتم بتقولوا: حيران، وأنا ما عدتش عارف الحق فين؛ أنظر في ملكوت السماوات والأرض، وأنت توقن أن لهذا الكون إلهاً خالقاً واحداً، تناسق رهيب: ﴿هَلْ تَرَى مِنْ فُطُورٍ﴾ [الملك: 3]؟ هذا التناسق الموجود في الكون، هذا الإبداع المبهر الذي موجود في ملكوت السماوات والأرض توقن أن لهذا الكون إلهاً واحداً. الخروج من الحيرة.
يبقى رقم واحد: كسر التقليد. رقم اثنين: الخروج. رقم ثلاثة: أنتم من أول السورة عمالين تقولوا عايزين آية، عايزين آية: ﴿لَوْلَا نُزِّلَ عَلَيْهِ آيَةٌ مِّن رَّبِّهِ﴾ [الأنعام: 37] من أول السورة عمالين تطلبوا آيات، ويجيب لكم القرآن مش عاجبكم. ربنا جاب لهم نموذج الوصول بابسط الآيات، أيها المتعنتون في طلب الآيات، هذا نموذج للوصول، سواء هو كان بيوصل أو بيوصل قومه ما رضوش يوصلوا معه، أياً كان ناظراً أو مناظراً، عالماً أو يعني يبحث عن العلم أو يعلم، أياً كان سيدنا إبراهيم كان باحثاً أو معلماً، طريق الخروج من الحيرة إلى اليقين مش محتاج كتاب في قرطاس ينزل ولا ملك في صورة رجل. لا لا لا، محتاج انك تبص بس للشمس. بس؟ آه، بس! ده الباحث عن الحق الحقيقي الباحث عن الحق هيوصل بأبسط الآيات، سورة واحدة توصله، آية واحدة من القرآن توصله للباحث عن الحق فعلاً. كم من أناس باحثين عن الحق هُدُوا بأبسط الكلمات وآيات بسيطة في القرآن أثرت فيهم.
يبقى إذاً اشمعنى القصة ديت المقطع ده بسيدنا إبراهيم ما جاى في القرآن كله غير في سورة الأنعام؟ واشمعنى الجزء ده من قصة سيدنا إبراهيم ييجي في سورة الأنعام؟ زي ما قلنا الثلاث حاجات دول؛ الخروج من الحيرة وده الارتباط.
الآيات اللي قبلها مباشرة كسر التقاليد، ورقم ثلاثة الوصول بأبسط الآيات. الناس اللي عمالة تتعنت من أول السورة عايزين آية عايزين آية عايزين آية، الوصول بأبسط الآيات. سيدنا إبراهيم مجرد قمر وشمس ونجم، قال في الآخر: ﴿إِنِّي وَجَّهْتُ وَجْهِيَ لِلَّذِي فَطَرَ السَّمَاوَاتِ وَالْأَرْضَ﴾ معي؟ ﴿وَإِذْ قَالَ إِبْرَاهِيمُ لِأَبِيهِ آزَرَ أَتَتَّخِذُ أَصْنَامًا آلِهَةً﴾ قلنا أسلوب التساؤلات اللي بينفع جداً إنك لما تلاقي قوم ساد عليهم الركود الفكري إنك أنت تسأله تفوقه؛ اسألوا هل لهذا الكون إله؟ طب الكون ده نز هذا الإله نزل رسالة للأرض ولا سابهم كده عبثاً؟ طب إنك أنت تسألهم تفوقهم أنت اللي تهجم أنت اللي تسأل.
وأحياناً تسأل السؤال وأنت اللي تجاوب زي كتير معنا في السورة: ﴿قُلْ أَيُّ شَيْءٍ أَكْبَرُ شَهَادَةً قُلِ اللَّهُ﴾ ﴿فَأَيُّ الْفَرِيقَيْنِ أَحَقُّ بِالْأَمْنِ إِنْ كُنْتُمْ تَعْلَمُونَ * الَّذِينَ آمَنُوا﴾ هي الحقيقة كمان أنت اللي تسأل وأنت اللي تستبق الإجابة. ﴿إِنِّي أَرَاكَ﴾ لما خد هو كلمة ﴿إِنِّي أَرَاكَ﴾ الآية اللي بعدها على طول ﴿وَكَذَلِكَ نُرِي﴾ يبقى الشطر الأول عليك: ﴿وَرَبَطْنَا عَلَى قُلُوبِهِمْ إِذْ قَامُوا﴾ أنت تقوم ربنا يربط على قلبك. أنت لازم تبحث، أنت لازم تتحرك، أنت لازم تخرج من حالة الحيرة دي، أنت اللي تتعب عشان ربنا يبصرك.
وكذلك نري إبراهيم؛ زي ما ربنا وراه الباطل باطلاً: ﴿إِنِّي أَرَاكَ وَقَوْمَكَ فِي ضَلَالٍ مُبِينٍ﴾ لما أراه الله عز وجل الباطل باطلاً شاف إن دول في ضَلَال مُبِين، جه هنا بينتقل إلى رؤية ملكوت السماوات والأرض: ﴿وَكَذَلِكَ نُرِي إِبْرَاهِيمَ مَلَكُوتَ السَّمَاوَاتِ وَالْأَرْضِ وَلِيَكُونَ مِنَ الْمُوقِنِينَ﴾ هنا هنا يريه الله الحق حقاً. اللهم أرنا الحق حقاً وارزقنا اتباعه، وأرنا الباطل باطلاً وارزقنا اجتنابه. وهنا جهة التخلية قبل التحلية: ﴿فَمَنْ يَكْفُرْ بِالطَّاغُوتِ وَيُؤْمِنْ بِاللَّهِ﴾ ربنا وراه الأول ﴿إِنِّي أَرَاكَ وَقَوْمَكَ فِي ضَلَالٍ مُبِينٍ﴾ لما أراه الله عز وجل الباطل باطلاً شاف إن دول في ضَلَال مُبِين، جه هنا بينتقل إلى رؤية ملكوت السماوات والأرض.
وكذلك نري إبراهيم ملكوت السماوات والأرض وليكون من الموقنين. إذا خد بالك من كلمة وكذلك نري ديت، أجمل حاجة إنك توصل لمرحلة وكنت بصره الذي يبصر به، يا سلام لما ولاية ربنا كنت بصره الذي يبصر به. لما ربنا يتولاك ويكون الله عز وجل هو بصرك الذي تبصر به، وسمعك الذي تسمع به؛ ممكن حاجات بسيطة جداً تعلي إيمانك جداً، ممكن رؤية الشروق تعلي إيمانك، يمكن رؤية الغروب تعلي إيمانك. معلومات كتير جداً جداً احنا عارفينها لما بتيجي تقولها لغيرك تفاجئ أن ممكن واحد قاعد يبكي من خشية الله. طب المعلومات دي أنا عارفها! تيجي تكلمه مثلاً عن المعلومات في جسم الإنسان، أو في خلق السماوات والأرض، أو في البكتريا والفيروسات، أو أو في الأرض أو في الزرع، أي شيء في الخلق ممكن واحد يسمع منك معلومة بسيطة جداً تلاقيه تفيض عيناه من الدمع. الله! طب ما أنت عارف المعلومة دي أصلاً ما أثرتش فيك؟ هنا ربنا وراها له، هنا بيعها كنت سمعه الذي يسمع به، هنا رآها وكنت بصره الذي يبصر بها.
يبقى إذا أحياناً كتير تنظر، لكن في نظرة إيمان؛ فنظر نظرة في النجوم. أحياناً كده تبص على خلق السماوات والأرض فيفتح الله عز وجل عليك. الإنسان محتاج يا جماعة زي ما بيحتاج يتدبر القرآن، محتاج يتدبر في الكون؛ كان خلق السماوات والأرض مبهر يوصل لليقين قطعاً، زي ما ربنا قال: نري إبراهيم ملكوت السماوات والأرض وليكون من الموقنين. يبقى رحلة الوصول لليقين لابد لها من التدبر في خلق السماوات والأرض. تقعد الأرض دي إيه؟ والشمس والقمر؟ ودي حاجة من مجموعة شمسية تسع عشر كواكب ومعهم في المجموعة كم مجموعة شمسية؟ مش عارف ميتين مليون مجموعة شمسية في وسط مجرة من وسط مش عارف كم مليار كم مليون ولا مليار مجرة، وكل ده في الكون المنظور، وازاي الكون بيتسع، وأن الكون كله طفل بينمو ونبتة بتنمو، الحيوان بينمو والكون بيكبر، كل ده بيلف وكل ده بيتحرك وكل ده محتاج لربنا في كل لحظة، وازاي الله عز وجل لو ترك السماوات والأرض ﴿إِنَّ اللَّهَ يُمْسِكُ السَّمَاوَاتِ وَالْأَرْضَ أَنْ تَزُولَا وَلَئِنْ زَالَتَا إِنْ أَمْسَكَهُمَا مِنْ أَحَدٍ مِنْ بَعْدِهِ﴾.
ازاي رب العالمين في أول كلمة الحمد لله رب العالمين، أي أن العالمين محتاجين يربو، العالم بيربو يربو يعني بينمو، فطول ما هو بيربو يحتاج إلى رب، يبقى مين اللي مع العالمين في كل لحظة نمو؟ الله عز وجل. هذا الكون يحتاج إلى الله في كل لحظة، كل لحظة نمو محتاج لربنا. نلاقي سيدنا إبراهيم أول حاجة قال: ما ينفعش الإله يسيبني ويمشي، أنا محتاج لربنا في كل لحظة؛ ﴿لَا أُحِبُّ الْآفِلِينَ﴾ هيسيبني ويمشي طب وأعيش حياتي ازاي من غير إله؟ هذه اللحظات التي يغيب عنها التي يغيب عني أعيش ازاي أنا من غير إله؟ إذا الكون ده لما تتدبر فيه من أكبر حاجة عظم متناهي ودقة متناهية.
تيجي تشوف الفيروسات، فيروس الإيدز شوف ازاي الله عز وجل ممكن يسلط حاجة لا ترى بالعين المجردة! سبحان الله! هذا الفيروس أنتم عارفين كان أحد الدكاترة وهو بيدرس لنا المرض ده، هذا الفيروس عشان يدخل جسم الإنسان خلايا الإنسان عاملة له مستقبلات تعرف تستقبله، لو ده مش موجود يعني لو المستقبل اللي موجود على الخلية بتاعتك مش موجود الفيروس ما يعرفش يخش لك؛ يعني ربنا مجهزك، عارف السلاح جاهز وجاهز على الضرب، أنت جاهز لاستقباله. شوف أنت ضعيف قد ايه، أنت ما تعرفش تغير ده في خليتك، ولو المستقبل ده مش موجود على خليتك يبقى أنت عندك أمراض كتير؛ يعني الخلية دي الخلية عليها مستقبل معين، المستقبل ده بييجي لفيروس الإيدز لو ما لقهوش ما يعرفش يخش، أول لما يلاقيه يقوم داخل الخلية. الفيروس ده موجود في خلايانا، ربنا خلقه منتظر الفيروس ده، متخيل! ربنا يعافينا، وما تعرفش تتخلص منه، هم عمالين يفكروا في علاج أن هم ازاي يقفلوا ده عشان ما يعرفش يدخل الخلية. شوف ازاي أنت ضعيف! أبسط حاجة أنت ضعيف.
تيجي تفكر في ملكوت السماوات والأرض: نقطة دم تتجلط في شريان من شرايين المخ، في أماكن في المخ الجراحات ما تعرفش توصل لها، جزء كبير من جسدك أنت ما تعرفش عن العلماء اللي هم أهل الأرض كلهم ما يعرفوش عنها حاجة، ما يعرفش يقول لك قانون ما نعرفش ملكوت السماوات والأرض ده جه كده. الحاجات دي جت كده؟ اليس لهذا الكون خالقاً عشان يقف يفكر جت ازاي؟ ينفع تبقى ماشي كده على شاطئ أو في أي مكان وتلاقي ترابيزة وأكل وحاجة سهلة وهي تقول آه ده البحر بس هي جت كده هي جت كده! آه ده هو اتظبط كده جت كده! طب ازاي جت كده؟ فالإنسان يقف بس ويسأل، ولما الإنسان بقى يسبح بحمد الله يبدأ يطمن يكون واسع؛ الله عز وجل يدبر هذا الكون زي ما قلنا: ﴿وَمَا تَسْقُطُ مِنْ وَرَقَةٍ إِلَّا يَعْلَمُهَا﴾ الإنسان بيطمن كل ما يتدبر في الكون أكتر كل ما يطمن. فعلا كثرة رؤية آيات الله في الكون يا تخليك تتجنن يا تخليك تسجد؛ زي ما أحد علماء الفلك قال: يا إما تتجنن يا إما تسجد لعظمة الله سبحانه وتعالى، حاجة فوق العقل، أرقام فوق العقل، فوق ضغط التحمل البشري العقلي؛ الأرقام بتاعة الفلك والحاجات ديت سواء الكبر المتناهية أو الصغر المتناهية بتاع حاجة فوق تصور العقل البشري أصلاً. عشان كده يقول لك لا لا لا هو أساس الإله والرب على دماغه، يقول لك لأ ما فيش إله يعرف يحيط بالارقام دي كلها، يبقى اكيد ما مش طب. سبحان الله! ما هو عشان أنت مش إله عشان هو الإله فوق البشر، ففعلاً رؤية ملكوت السماوات لازم تدي لنفسك مساحة أن تنظر في ملكوت السماوات والأرض حتى تصل إلى اليقين وليكون من الموقنين.
الفئة دي دي بقى إيه؟ كيف رأى ملكوت السماوات والأرض؟ ﴿فَلَمَّا جَنَّ عَلَيْهِ اللَّيْلُ رَأَى كَوْكَبًا قَالَ هَذَا رَبِّي﴾ أيًا بقى كان، احنا قلنا عشان نخرج هل قال كده عشان تنزلاً مع قومه؟ ولا قال كده بيسأل نفسه؟ ولا دي كانت المرحلة إن سيدنا إبراهيم بيقول لئن لم يهمني إيه؟ فهم قالوا ازاي بيقول هذا ربي وبيقول لئن لم يهدني ربي؟ فبعض الناس قال دي المرحلة التي كانت مثل النبي صلى الله عليه وسلم كده بيروح الغار، هو يعلم أن لهذا الكون إله، لكن هو ما يعرفش التفاصيل بتاعة الوحي، ودي بتبقى حاجة ضاغطة على صدر الإنسان، وذي أحد معاني قول الله عز وجل: ﴿وَوَضَعْنَا عَنكَ وِزْرَكَ﴾ وزرك الحمل الثقيل اللي هو إيه؟ أن النبي صلى الله عليه وسلم كان نفسه يفهم، كان نفسه يعرف من خلق هذا الكون؟ إيه صفاته؟ إيه أسماؤه؟ كان نفسه يعرف إيه مراد الله؟ فده حمل ضاغط على الصدر فربنا بيقول له احنا شلنا ده وعرفناه، فهي دي المرحلة اللي كان فيها سيدنا بعض الناس قال هي دي المرحلة اللي كان فيها سيدنا إبراهيم، هو عارف أن الإله هو مش هو قاله مرحلة لا شرك ولا إيمان، لكن هو ما يعرفش تفاصيل الإله، هو عارف أن الآلهة دي ما تنفعش، الأصنام دي ما تنفعش، لكن من الخالق؟ أين هو؟ ما هي صفاته؟ كيف خلق الحاجات دي؟ ما كانش يعرفها، وهذه لا تعرف قطعاً إلا بوحي، خلاص؟
فسيدنا إبراهيم ﴿هَذَا رَبِّي﴾ أيًا كان بقى لها تساؤلاً أو استنكاراً أو ده ينفع أو ده ما يعني ما ينفعش أو بيجاري قومه. فلما أول جملة قالها في رحلة الوصول لليقين عايزين نقف مع الجمل الثلاثة؛ أول جملة قال: ﴿لَا أُحِبُّ الْآفِلِينَ﴾ يعني إيه لا أحب الآفلين؟ الأفول قالوا مش بس الغروب، لأ ده حاجة كانت قريبة منك وراحت عنك، لذلك بيسموا ابن الناقة اللي هو اللي انفصل عنها وفُطم عنها بيسموه أفيل أيضاً، أنه أفُل عنها حد كان مرتبط بها وبعد عنها، ودي بتبقى حاجة شاقة على قلب الإنسان. الأم هنا لما الفصيل ده بيبعد عنها وبيغفل عنها تطلع أصوات بترغي رغاء كده فيها حنين وشوق إلى ابنها، هنا يقولوا ايه؟ آل الفصيل إلى أمه؛ الابن الصغير اشتاق إلى أمه شوقاً لم يعد يستطيع أن يتحمل، لو كسر المرحلة دي خلاص يبقى اتفطم بعدها.
فسيدنا إبراهيم لما بص بالكوكب، سواء بقى نفسه يبحث عن إله أو بيعرف قومه دول لا أنتم مرتبطين به أو هو باحث وبعدين سابه ومشي، طب أنت هتسيبني لمين؟ شعور الوحدة شعور قاتل، أنا مش عارف الملحد ده عايش ازاي! عايش ازاي وسط الصراعات الاقتصادية والامراض؟ عايش ازاي من غير إله؟ الأم الملحدة دي لما ابنها بتعب بتعمل ايه؟ بتعمل إيه به لما بيفقفوا في نص البحر والأمواج بتضارب؟ ده المشركين بيقولوا يا رب، هنا الفطرة تستيقظ، بيعمل إليه فعلاً؟ الحمد لله رب العالمين، الحمد لله أن لنا رب وهو رب العالمين، أصبحت وأصبح الملك لله والحمد لله، أن احنا عارفين أن الملك بتاع ربنا لوحده.
الحمد لله أنت لما شاف سيدنا إبراهيم وأفل قال لا أحب، خد بالك من كلمة أحب؛ العلاقة بين الإنسان والرب يا جماعة مش علاقة السيد والعبد، مش علاقة بين الأب والابن، مش علاقة بين الزوج والزوجة، مش العلاقة بين الأم وابنها، علاقة لا توصف، علاقة بين الرب والعبد، يعني الواحد لما بيقرا كلمة: ﴿فَتَلَقَّى آدَمُ مِنْ رَبِّهِ كَلِمَاتٍ فَتَابَ عَلَيْهِ﴾ آية رائعة. ربنا قال لسيدنا آدم: اسكن الجنة، وأكرمه وأسجد له الملائكة وقال له ما تقربش من الشجرة، وسيدنا آدم هو اللي بوظ العلاقة؛ عارف الواحد ربنا أحياناً يكرمه ويدخله المسجد ويعرفه ويخليه يصلي قيام ليل ويخليه يبكي، وبعدين أطلع بره رمضان هو اللي بوظ العلاقة بينه وبين ربنا، لما العلاقة بتوظ بيعيش الإنسان في حالة من التوتر لا توصف. الإنسان المؤمن لما علاطته بربنا تبوظ عايش مرحلة متوترة جداً، ربنا سماها في القرآن كلمة فتلقى، تلقى ده يعني قاعد عامل كده، مستني حاجة تنزل، مش عارف يعيش حياته هو بعيد عن ربنا، شيء لا يوصف، شيء فوق الاحتمال أن إنسان مؤمن يكون له علاقة بربنا ويبوظ العلاقة بربنا مع ربنا بذنب، ولما يبوظها بذنب تلاقيه قاعد متوتر، حياته مش عارفة تمشي، فتلاقيه قاعد في مرحلة المتلقي ينتظر نزول الرحمات، دي كانت حالة سيدنا آدم كلمة فتلقى. شوف الشوق نفسه في أي يقوم ربنا اعرفه العلاقة دي ترجع ازاي، العلاقة اللي أنت بوظتها أنا ها عرفك ترجع ازاي، أنا هادلك على كلمات ترجع بها العلاقة تاني: ﴿وَمَنْ يَغْفِرُ الذُّنُوبَ إِلَّا اللَّهُ﴾.
فالانسان لما أجمل حاجة أنه يكتشف طريق العودة، الإنسان المذنب أجمل لحظات حياته أنه يكتشف، هي دي بقى فتلقى آدم من ربه كلمات فتاب عليه. فلحظات البعد لحظات قاسية، فلما ساب النجم وأفل قال له: أنت رايح فين؟ مش هينفع أنا عايز إله أحبه ولا يتركني؛ ﴿لَا أُحِبُّ الْآفِلِينَ﴾ هتسيبني وتروح فين؟ لذلك أنت قبل ما بتنام من الأذكار اللي بتقولها قبل ما بتنام آية الكرسي: ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ﴾ أنت عايز إله لما أنت تنام وهو ما ينامش، أنت عايز إله كده، أنت محتاج لإله كده، أنت ضعفك وفطرتك تحتاج لرب، أنك أنت وأنت مسافر تقول له يا رب أنت الصاحب في السفر وفي نفس الوقت والخليفة في الأهل في نفس الوقت، أنت محتاج لإله هذه الصفات، ده بقى لا ينفع لا قمر ولا شمس، ده رب العالمين سبحانه وتعالى.
قال ﴿لَا أُحِبُّ الْآفِلِينَ﴾ ده ما ينفعش، اللي بيأفل ويسيبني، أنا إلهي يغيب عني لحظات؟ طب افرض اللحظات ديت الإنسان بيمور أنت ممكن ربنا يحفظنا على طريق سريع غفلت لحظة.
اللحظة دي لو ربنا ما كانش معك فيها أنت تضيع. لحظة دخول الميكروب جسمك، لحظة أنك اتزحلقت، لحظة وأنت بتعدي الشارع، لحظة الولادة، لحظة الحيوان المنوي وهو بيلقح البويضة. هذه اللحظات المليانة في حياة الإنسان أنت محتاج لربنا في كل لحظة. لذلك قالوا الأصل أن الإنسان عايش في خطر؛ له معقبات بين يديه ومن خلفه يحفظونه من أمر الله. الأصل أن أنت فيه حاجات عمالة تخبط فيك وربنا بيحميك، فلما ربنا يريد أن حاجة تخبطك يشيل الحاجز فتخبطك.
مش الأصل أن أنت ماشي محمي في أمان، فلما ربنا يريد بك حاجة فالحاجة دي ترسل عليك فتيجي فيك. لا، ده الأصل أن أنت محاط بالمهالك من كل جهة، ده الأصل. يعني أنت محاط بالمهالك من كل جهاتك وربنا بيحفظك: ﴿لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ﴾ [الرعد: 11]، خلاص لما ربنا يريد يرفع المعقبات فيجيء الإنسان يصلي.
أفرد بقى أنت لو هنا، لا أحب الآفلين، أفرد بقى الإله سابني وأنا في لحظة من اللحظات الحرجة في حياتي؟ لأ، أنا عايز إلهي ما يسبنيش، أنا أحتاج إلى إله لا يغفل لحظة. وإن زالتا إن أمسكهما من أحد من بعده، والأثر المشهور لما راحوا موجود في آية الكرسي وإن كان بعض العلماء ضعّفوه، وسألوا سيدنا موسى: قال هل ينام ربك؟ قال الله عز وجل لموسى: سألوك هل ينام ربك؟
قوم يا سيدنا موسى، قم يا موسى، قم وأمسك بإيه؟ قارورتين من الزجاج؛ أمسك إزازتين فغفل فضل ماسكهم سيدنا موسى فترة طويلة، فلما غفل اتخبطوا في بعض فاتكسروا، قال: كذلك السماوات والأرض بيد الله عز وجل سبحانه وتعالى. ولله المثل الأعلى، فعلا الكون كله محفوظ بيد الله عز وجل، لا يغفل لحظة عن الكون. لا أحب الآفلين.
طيب، يبقى أول مرحلة من مراحل التدبر أن كل حاجة تخرج من قلبك. إيه اللي بيقفل؟ الدنيا كلها بتقفل، والعربيات بتقفل، والفلوس بتقفل، وكل المناصب بتقفل والمراكز المعنوية والمادية، كل شيء بتقفل. يبقى أول خطوة من خطوات الوصول في الطريق إلى لقطات اليقين، رقم واحد: طلع كل شيء من قلبك، كل ما يأفل لا تريده، لا أريده، مش هتبط به. أنا هعتمد على أرقام معي في..
طيب ما أفرد التليفون ضاع أو كل الأرقام دي ماتت؟ كل أصحاب الأرقام دول ماتوا؟ خلاص، فانت ما ينفعش، ربنا بيقول: ﴿وَتَوَكَّلْ عَلَى الْحَيِّ﴾ [الفرقان: 58]، ربنا بيعلمك أن اللي تتوكل عليه لازم يبقى حي لا يموت. وأفرض توكلت على ميت، طب وبعدين؟ طب توكلت على حي واحتمال يموت؟ لا، ﴿وَتَوَكَّلْ عَلَى الْحَيِّ الَّذِي لَا يَمُوتُ﴾ [الفرقان: 58] سبحانه وتعالى. يبقى رقم واحد في الطريق إلى الله: لا أحب الآفلين، خرج الدنيا الداخلية الأول عشان بقى معرفة الله لما تدخل قلبك يبقى قلبك فاضي. إنما مشكلتنا أنك مش عارف تتوكل على الله، مش عارف.
رقم فلان اللي في ذهنك اللي أنت حافظه وفلان اللي أنت عارفه ومركز كذا وكذا، كل دي حاجات مانعاك من التوكل. لذلك أنت يوميا عشان تحاول تخرج بعلاقاتك دي بتقول: لا إله إلا الله وحده لا شريك له، له الملك وله الحمد وهو على كل شيء قدير، ميت مرة؛ قاعد بتعلم نفسك أن مافيش غير ربنا، مافيش غير ربنا، ميت مرة! تخيل، قاعد بتعلم نفسك هذه المعلومة البسيطة السهلة، بتقول ميت مرة لا إله إلا الله وحده. يبقى رقم واحد لازم في الطريق إلى الله: خرج كل الدنيا من قلبك، خرج كل الناس.
خلي عندك يأس فيما أيدي الناس، ما حدش ينفعك، واعلم أن الأمة لو اجتمعت على أن ينفعوك بشيء لن ينفعوك إلا بشيء قد كتبه الله لك، لا أحب الآفلين. رقم اتنين: ﴿فَلَمَّا رَأَى الْقَمَرَ بَازِغاً قَالَ هَذَا رَبِّي فَلَمَّا أَفَلَ قَالَ﴾ لأن لم يهدني ربي لأكونن من القوم الضالين، قمة الافتقار؛ ما عادش حاجة في قلبه، ما عادش متوكل على حاجة، ما عادش مستني حاجة من حد. لذلك من المعاني الجميلة، وأيضا حتى وأنت في طلب العلم تتذكر حديث وأنت رايح تطلب العلم عند الشيخ، تتذكر حديث: كلكم ضال إلا من هديت.
ربنا بيقول على الناس كلها، علماء ومتعلمين: كلكم ضال إلا من هديت. تخيل أنت رايح، ده قمة التوكل؛ أنت رايح تتعلم وعارف أن لن يعلمك: ﴿سُبْحَانَكَ لَا عِلْمَ لَنَا إِلَّا مَا عَلَّمْتَنَا﴾ [البقرة: 32]. ﴿وَلَوْلَا فَضْلُ اللَّهِ عَلَيْكُمْ وَرَحْمَتُهُ مَا زَكَىٰ مِنكُم مَّنْ أحَدٍ أَبَداً﴾ [النور: 21]. شوف الحاجات المنفية دي كلها، ربنا بس اللي.. ربنا اللي بيزكي، ربنا اللي يعلم، ربنا.. وفهمناها، ربنا اللي بيفهم. كل حاجة تخرج من قلبك.
لما تعرف تقول لا أحب الآفلين، هتعرف تقول لأن لم يهدني ربي صح. لكن طول ما أنت لسه بتحب جزء من الآفلين، طول ما أنت ما أنتاش عارف تقول لأن لم يهدني ربي صح. عمرك ما تحقق قمة الافتقار غير لما تستغني الأول عن الدنيا والناس والمناصب؛ قمة الافتقار يتحقق، دي مرحلة بعد مرحلة، هي دي بقى المدارج، دي الدرجات اللي أنت بتطلعها، لأنك الأول لا أحب الآفلين، أول لما تقول لا أحب الآفلين تبدأ.
ما لكش غير ربنا بقى. من المعاني الجميلة قوي في آيات سورة البقرة في قول الله عز وجل في آيات الصيام: ﴿وَإِذَا سَأَلَكَ عِبَادِي عَنِّي﴾ [البقرة: 186]. لما.. اشمعنى الآية دي جت في وسط آيات الصيام؟ لما ترك الدنيا، مرتبط بالقرآن، ﴿شَهْرُ رَمَضَانَ الَّذِي أُنزِلَ فِيهِ الْقُرْآنُ﴾ [البقرة: 185]. لما قرأ قرآنا وبعد عن الشهوات وما عادش شاغل نفسه بالأكل والشرب، بدأ يسأل عن ربنا؛ أمتى، أمتى؟ ﴿وَإِذَا سَأَلَكَ عِبَادِي عَنِّي﴾ مش عن أي حاجة تانية، مش حتى عن.. عن أحكام، لأ، عن ربنا مباشرة. أمتى؟ لما بعد عن الشهوات؛ الإنسان بيبتعد عن الشهوات يبدأ يركز، يبدأ ﴿وَإِذَا سَأَلَكَ عِبَادِي عَنِّي فَإِنِّي قَرِيبٌ﴾ [البقرة: 186]، يبدأ يسأل عن ربنا بقى، لأن الحاجات دي كانت حواجز؛ كل الآفلين دول كانوا حواجز يمنعوا الإنسان أنه يسأل عن ربنا.
أول لما يبعد عن الشهوات وخلاص يشيلها من قلبه ويشيلها من عقله وما عادش يفكر فيها، يبدأ يقول لك هو ربنا فين؟ أنا عايز أقرب من ربنا، طريق ربنا فين؟ يبقى وإذا سألك عبادي جت عني جت بعد آية الصيام، الإنسان يبدأ يسأل لما يبعد. لأن لم يهدني ربي جت بعد لا أحب الآفلين، معي؟ لأن لم يهدني ربي يبقى هنا كان عارف أن له رب.
لئن لم يهدني ربي لأكونن من القوم الضالين، ده هنا قلنا قمة الافتقار بعد.. جت بعد قمة التجرد من الدنيا؛ كل شيء في الدنيا. رقم تلاتة المرحلة التالتة الدرجة الثالثة: أنه بيرتقي في سلم اليقين. ﴿فَلَمَّا رَأَى الشَّمْسَ بَازِغَةً قَالَ هَذَا رَبِّي هَذَا أَكْبَرُ فَلَمَّا أَفَلَتْ قَالَ يَا قَوْمِ إِنِّي بَرِيءٌ مِّمَّا تُشْرِكُونَ * إِنِّي وَجَهْتُ وَجْهِي لِلَّذِي فَطَرَ السَّمَاوَاتِ وَالْأَرْضَ حَنِيفاً وَمَا أَنَا مِنَ الْمُشْرِكِينَ﴾ [الأنعام: 78-79]. توحيد الوجهة، الانطلاق بقى.
يبقى تخلي عن الدنيا، قمة الافتقار، قمة الانطلاق. فلما أفاق قال: سبحانك، شف نفس الترتيب بتاع سيدنا موسى. فلما أفاق قال: سبحانك؛ نزّه الله عن كل نقص، ما عادش بيذل في الآية نقص، تبت إليك، نفتقر لك يا رب، وهي قمة الانطلاق: وأنا أول المؤمنين. قال: فلما أفاق قال سبحانك تبت إليك وأنا أول المؤمنين. الإنسان لما ينصرف عن الدنيا ويفتقر إلى الله، خلاص، وجهته بتبقى واحدة، ما عادش بقى يلف ويدور.
إني وجهت وجهي؛ وجهة واحدة خلاص، أنا منطلق، لا عاد بقى بيلتفت ولا عاد بيسأل هو ده مباح ولا مستحب؟ ولا هو طالق إلى الله عز وجل لا يلتفت في الطريق، هو مهما قابل من صعاب هو منطلق لا يلتفت. ﴿إِنِّي وَجَهْتُ وَجْهِي لِلَّذِي..﴾ [الأنعام: 79].
السماوات والأرض حنيفا؛ أي مائلاً عن كل شيء، أي حاجة هتفتنني عن ربنا أنا مش عايزها، أنا بعيد عنها، أي حاجة هتبعدني عن ربنا أنا مش عايزها خلاص. النبي صلى الله عليه وسلم اللبس بس لما كان يصلي ويحس أن فيه ثوب بس ممكن يشغله لحظات في الصلاة يخلعه، مش عايزه. الخيل اللي ممكن تعطل سيدنا سليمان يدبحها، مش عايزها. أي حاجة تبعدني عن ربنا مش عايزها خلاص، أي شيء. يبقى أنا وجهتي واحدة: ﴿إِنِّي وَجَهْتُ وَجْهِي لِلَّذِي فَطَرَ السَّمَاوَاتِ﴾. خد بالك من كلمة فطر ديت؛ التلقي بقى مع الفطرة. فطرة إبراهيم التقت مع فطرة السماوات والأرض، الفطرة اللي جوه سيدنا إبراهيم اللي هم حاولوا يبدلوها وفشلوا؛ حاولوا يبدلوها سيدنا إبراهيم وفشل، اللي هم بدلوها لنفسهم: ﴿إِنِّي وَجَهْتُ وَجْهِي لِلَّذِي فَطَرَ السَّمَاوَاتِ وَالْأَرْضَ حَنِيفاً وَمَا أَنَا مِنَ الْمُشْرِكِينَ﴾ [الأنعام: 79].
يبقى إذاً دي المراحل التلاتة اللي بتنقل الإنسان من الجلوس.. الركود إلى الانطلاق. رقم واحد: لا أحب الآفلين، دي الحاجات اللي يساعدك عليها التدبر؛ أن كل الدنيا زائلة، أنك تشوف منظر الوردة وهي في قمة الجمال ومنظر الوردة وهي ورق متكسر مرمي على الأرض، لا أحب الآفلين. أنك تشوف.. الإنسان أو أجمل امرأة في العالم وتشوه وهي في القبر، شف أجمل عربية وبعدين شفها بعد كذا، شف الحياة، لا أحب الآفلين. صاحب أكبر منصب مش عارف فين وهو نايم في فراش المرض مشلول مش عارف يتحرك له، لا أحب الآفلين في التغيرات اللي عمالة تتم في الحياة ديت، لا أحب الآفلين. فين اللي قال.. هو ربهم الأعلى، فين اللي قال: أنا ربكم الأعلى؟ فين اللي قال: ﴿مَنْ أَشَدُّ مِنَّا قُوَّةً﴾ [فصلت: 15]؟ هل تحس منهم من أحد؟ هم فين؟ أو تسمع له ركزة، حتى صوت خفي؟ حتى سمع لهم أي صوت ولو وسوسة؟ حتى سمع لهم أي حاجة؟ هل تحس منهم من أحد أو تسمع لهم ركساً؟
فأول مرحلة في الانطلاق إلى الله هي مرحلة لا أحب الآفلين. رقم اتنين: قمة الافتقار، ليس لك في هذا الطريق إلا الله: لئن لم يهدني ربي لأكونن قوماً. رقم تلاتة بعد ما خلاص فيه تحرية.. وفيه تحرية، انطلق بقى، ما عادش تبقى متردد: ﴿إِنِّي وَجَهْتُ وَجْهِي لِلَّذِي فَطَرَ السَّمَاوَاتِ وَالْأَرْضَ حَنِيفاً وَمَا أَنَا مِنَ الْمُشْرِكِينَ﴾ [الأنعام: 79]. وحاجة قومه، اعرف انك لما تنطلق الناس مش هتسيبك.
اعرف أن الطريق ده مليء بالعقبات، ما تعتقدش أن معنى أنك وصلت أن الناس بقى تقول لك ألف مبروك، حمد لله على السلامة، تعالى.. لا، لا، لا، لازم في عقبات، ولازم ناس هتقف قصادك وناس هتحاول تصرفك عن هذا الطريق وعايزينك ترجع تاني في الركود بتاعهم، وهو معنى واحد ماشي في طريق الحق لأن ده أن الباقي كلهم غلط، وجود ناس متطهرين على ما أن الباقي.. ليس من المتطهرين. وجود واحد ما بياخدش رشوة علامة أن الباقي وحش، وجود واحد بيعمل خروج طيب معناه أن الباقي مش كويس. فلذلك: ﴿وَدُّوا لَوْ تَكْفُرُونَ كَمَا كَفَرُوا فَتَكُونُونَ سَوَاءً﴾ [النساء: 89]. هنا وحاجة قومه، قال: ﴿أَتُحَاجُونِّي فِي اللَّهِ وَقَدْ هَدَانِي﴾ [الأنعام: 80]. ولا أخاف.. وإزاي بقى بعد كده سيدنا ابراهيم أن المراحل التلاتة دول خلّاته يقول في الآخر: وكيف أخاف؟
كيف نزع هذا الخوف بعد تلت حاجات؟ احنا مشكلتنا عايزين نوصل لكيف أخاف من غير ما نجاهد المجاهدات دي، عايزين نحس بقمة اليقين والطمأنينة من غير ما نمر بالتلات مراحل بتاعة لا أحب الآفلين، ولئن لم يهدني، واني وجهت وجهي؛ عايز فجأة تقول وكيف أخاف؟ عايز تبقى في قمة إيه؟ مش ممكن، لازم جهاد سيدنا إبراهيم لآخر لحظة، بعد ما الآيات في سورة البقرة بعد ما بيحج النمرود بيقول: ﴿رَبِّ أَرِنِي كَيْفَ تُحْيِي الْمَوْتَىٰ﴾ [البقرة: 260]. لا يتوقف أبدا عن طلوع في درجات اليقين، أبدا لأخر لحظة، لا يمل أبدا إبراهيم عليه السلام.
شف بعد ما وقف في وش نمرود بيقول: طب ربي أرني كيف تحيي الموتى. طب أنت اللي قلت له ربي الذي يحيي ويميت، ولما قال لك أنا أحيي وأميت تقول إن الله يأتي بالشمس من المشرق فأت بها من المغرب، لكن لسه برضو عايز يترقى في درجات الإيمان: ﴿فَإِذَا فَرَغْتَ فَانصَبْ﴾ [الشرح: 7]. على طول الإنسان الإيمان الإنسان ما يشبعش منه أبدا، عايز يترقى في درجات الإيمان. النهاردة صلاة العشاء بكرة صلاة الفجر تبقى أفضل من صلاة العشاء، وصلاة العشاء بتاعة بكرة تبقى أفضل من صلاة النهاردة، والتراويح بتاعة السنة الجاية تبقى أفضل من التراويح السنة اللي فاتت، وقراءة القرآن لازم تبقى أفضل، أنت لازم تترقى في مدارج الإيمان. مجاهدة وبذل وتفكر وتدبر وتساؤلات، أسئلة كتير زي ما سيدنا إبراهيم بيسأل عشان توصل إلى هذه المرتبة.
أسأل الله عز وجل أن يستعملنا. نكتفي كده بهذا القدر. سبحانك اللهم وبحمدك، أشهد ألا إله إلا أنت، أستغفرك وأتوب إليك، وجزاكم الله خيراً.