تفسير سورة الأنعام (13) | الآيات (79-87) | د. أحمد عبد المنعم

استكمل ما بدأناه في تفسير سورة الأنعام. توقفنا عند قول الله عز وجل، الآية ثمانين من سورة الأنعام: ﴿وَحَاجَّهُ قَوْمُهُ ۚ قَالَ أَتُحَاجُّونِي فِي اللَّهِ وَقَدْ هَدَانِي ۚ وَلَا أَخَافُ مَا تُشْرِكُونَ بِهِ إِلَّا أَن يَشَاءَ رَبِّي شَيْئًا ۗ وَسِعَ رَبِّي كُلَّ شَيْءٍ عِلْمًا أَفَلَا تَتَذَكَّرُونَ﴾ [الأنعام: 80].

كنا تكلمنا عن الآيات لس سيدنا إراهيم، وهل هذه الآيات كان سيدنا إبراهيم يناظر أو مناظر؟ وتكلمنا في المسألة وذكرنا فيها الكلام. الشاهد، أيّاً كان، سيدنا إبراهيم بعد آخر مرحلة، لما قال: ﴿إِنِّي وَجَهْتُ وَجْهِي للَّذِي فَطَرَ السَّمَاوَاتِ وَالْأَرْضَ حَنِيفًا وَمَا أَنَا مِنَ الْمُشْرِكِينَ﴾ [الأنعام: 79]. احنا قلنا سيدنا إبراهيم مر بثلاث مراحل أو ثلاث كلمات قالها، وكلمات الأنبياء زي ما قلنا هتدرس؛ لأنها تحمل معاني، إيمان، عزيمة، فرع الإنسان سنين في الطريق إلى الله عز وجل. فأول كلمة لما قال: ﴿لَا أُحِبُّ الْآفِلِينَ﴾ [الأنعام: 76]. الكلمة التانية: ﴿لَّئِن لَّمْ يَهْدِنِي رَبِّي لَأَكُونَنَّ مِنَ الْقَوْمِ الضَّالِّينَ﴾ [الأنعام: 77]. الكلمة التالتة: ﴿إِنِّي وَجَهْتُ وَجْهِي﴾ [الأنعام: 79].

أول لما سيدنا إبراهيم وصل للمرحلة التالتة قال: ﴿يَا قَوْمِ إِنِّي بَرِيءٌ مِّمَّا تُشْرِكُونَ﴾ [الأنعام: 78]. سواء قالها وهو كان ينظر إلى القوم، أو بعد ما سيدنا إبراهيم تدبر ووصل لهذه المرحلة، أوحى الله عز وجل إليه وبين له، فذهب إلى قومه ينذرهم: ﴿إِنِّي بَرِيءٌ مِّمَّا تُشْرِكُونَ﴾ [الأنعام: 78]. الشاهد أن معرفة الله عز وجل لما تسكن في قلب إنسان، لا يستطيع الكتمان. أول لما سيدنا إبراهيم بعد: ﴿لَّئِن لَّمْ يَهْدِنِي رَبِّي لَأَكُونَنَّ مِنَ الْقَوْمِ الضَّالِّينَ﴾ [الأنعام: 77]، فهداه الله عز وجل وبصره وبين له وعرفه، قال بعدها على طول: ﴿يَا قَوْمِ إِنِّي بَرِيءٌ مِّمَّا تُشْرِكُونَ﴾ [الأنعام: 78]، ﴿إِنِّي وَجَهْتُ وَجْهِي لِلَّذِي فَطَرَ السَّمَاوَاتِ وَالْأَرْضَ حَنِيفًا وَمَا أَنَا مِنَ الْمُشْرِكِينَ﴾ [الأنعام: 79]. توجه سيدنا إبراهيم مباشرة إلى دعوة قومه. القلب اللي بيمتلئ معرفة الله عز وجل لا يستطيع الكتمان، ما يقدرش يسكت.

القلب اللي بيحب ربنا ما يقدرش ما يتكلمش عن ربنا. لو قلت له ما تتكلمش عن ربنا توقف عن الدعوة إلى الله عز وجل، هو يكلف بالمستحيل، هو لو يكلف بما لا يطاق فبالتالي لن يستجيب ولن ينفذ. لذلك منع الداعية إنه يتكلم عن الله ده مستحيل، مستحيل إنه يحصل؛ سيظل يتكلم عن الله حتى في آخر لحظات حياته. الواحد وهو بيسمع قصة غلام الأخدود وهو في آخر لحظة ونفسه قبل ما يموت، يسمع كلمة: آمنا برب الغلام، ودفع ثمن إنه يسمع هذه الكلمة من الناس، إنه يدل الملك على طريقته؛ قال له: انك لست بقاتلي حتى تفعل ما آمرك به، خذ سهماً من كنانتي، ثم ضعه في كبد القوس، ثم قل: باسم الله رب الغلام.

عشان يخلي الملك ينطق بهذه الكلمة؛ كلمة باسم الله رب الغلام، عشان يخلي الملك ينطق بهذه الكلمة دفع روحه! ثمن إنه يسمع الكلمة دي من الملك، وأنه يخلي الناس ينطقوا بهذه الكلمة دفع روحه. الواحد وهو بيقرأ الحديث وبيسمع الحديث: لست بقاتلي حتى تفعل ما آمرك به، وقاعد بيعرفه طريقة قتله، قاعد بيعرفه آخر لحظات حياته هتحصل إزاي، كل ده عشان يسمع كلمة آمنا برب الغلام. الإنسان الداعية إلى الله عز وجل نفسه يسمع كلمة الإيمان من الناس. ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا﴾ [النصر: 1-2]. لما تيجي لحظة ﴿وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا﴾ [النصر: 2]، النبي صلى الله عليه وسلم عرف إن خلاص ده نعيه اقترب أجله؛ ليه؟ اللحظة اللي عايش عشانها إنه يرى بعينيه دخول الناس في دين الله أفواجاً هتحصل، فخلاص الحياة ما عادش لها قيمة بعد كده. ده الداعية؛ كل همه أن الناس تؤمن وتشهد أن لا إله إلا الله وأن محمداً رسول الله، كل همه أن كلمة الله تذكر في الأرض، أن يعلو اسم الله عز وجل في كل مكان.

لذلك سيدنا إبراهيم قال: يا قوم، ما قدرش يكتم ما بداخله: ﴿يَا قَوْمِ إِنِّي بَرِيءٌ مِّمَّا تُشْرِكُونَ * إِنِّي وَجَهْتُ وَجْهِي لِلَّذِي فَطَرَ السَّمَاوَاتِ وَالْأَرْضَ حَنِيفًا وَمَا أَنَا مِنَ الْمُشْرِكِينَ﴾ [الأنعام: 78-79]. خلاص، بقت وجهة واحدة، ما فيش إلتفات لا يمين ولا يسار. وزي ما قلنا، المرحلة دي دي مرحلة تالتة من المجاهدة؛ بعد ﴿لَا أُحِبُّ الْآفِلِينَ﴾ [الأنعام: 76] بعد ما الدنيا كلها طلعت من القلب، ما عادش بتلتفت لأي حاجة في الدنيا. قمة الافتقار: ﴿لَّئِن لَّمْ يَهْدِنِي رَبِّي﴾ [الأنعام: 77] من القوم الضالين. تيجي المرحلة التالتة: توحيد الوجه. فلذلك احنا لما نجي نتكلم عن: ﴿وَكَيْفَ أَخَافُ﴾ [الأنعام: 81] دي نتيجة للمجاهدة في الطريق إلى الله عز وجل.

و﴿حَاجَّهُ قَوْمُهُ﴾ [الأنعام: 80]. توقفنا هنا عند الآية دي: لازم يعرف الداعية إنه هيواجه بمشاكل. مش معنى إن هم قومك وأقرباؤك وأحبائك قبل الالتزام أو قبل الإسلام، إن هم هيبقوا لما إنت تيجي تكلمهم عن بعد التزامك تيجي تكلمهم عن دين ربنا، هم يفرحوا. لأ، ذكر ربنا بيقول: ﴿وَحَاجَّهُ قَوْمُهُ﴾ [الأنعام: 80] أقرب الناس لي مش قادرين يقبلوا هذه الكلمة. وأقرب الناس للنبي صلى الله عليه وسلم قال: أخرجيه؟ قومي اللي بيحبوني اللي أنا الصادق الأمين، هيخرجوني؟ اه هيخرجوك من أحب البلاد إلى الله ومن أحب البلاد إلي! لذلك شهواتهم أقوى. وهم قالوا له كده، قالوا له يا رسول الله يعني يا محمد صلى الله عليه وسلم لو كانت كلمة لقلناها. هم فاهمين إن المطلوب منهم مش مجرد كلمة، المطلوب إنه يتخلى عن شهواته، يتخلى عن الترتيبة الاقتصادية الموجودة في مكة، يتخلى عن أشياء كتير هو رافضها. فهم عشان يتخلوا عن معبوداتهم ويتخلوا عن آلهتهم، فقالوا لأ.

﴿وَحَاجَّهُ قَوْمُهُ﴾ [الأنعام: 80]. وبعض المفسرين اللي بيقول: وكانت المحاجة هنا معها تهديد، والدليل على كده قول سيدنا إبراهيم: ﴿وَلَا أَخَافُ مَا تُشْرِكُونَ بِهِ﴾ [الأنعام: 80] يعني مش بس قاعدين بيناظروه، لأ ده بيناظروه تحت السيوف، تحت التهديدات، قاعدين بيكلموه عشان يقنعوه عشان يترك الدين الحق وينتكس عن الفطرة الحق، وحاشاه صلى الله عليه وسلم، لكن هم كانوا بيضغطوا عليه بالتهديدات. يعني المحاجة هنا ما كانتش نقاش، ما كانش في برنامج وكان نقاش، لأ، ده كان فيه تهديد حتى يعود. ولذلك وقالوا إيه: فاتوا به على أعين الناس.

كلمة إيه: فاتوا به على أعين الناس؟ لما حبوا يلقوه في النار، يعني يجيبوا عين الناس اللي شايفينهم، يعني إيه كلمة فاتوا به على أعين الناس؟ يعني خلوا المشهد ده؛ مشهد الاتيان به وربطه والقائه في النار، مشهد ضاغط على أعين الناس، مستعلي على أعين الناس، يضغط على أعينهم عشان ما حدش يفكر يقول الكلمة اللي قالها، وما حدش يمشي في الطريق اللي هو ماشي فيه. فغرض، كان ممكن يقتلوه بالليل، كان ممكن يلقوه في النار في وقت ما حدش موجود فيه، لكن لأ قالوا الناس يشوفوه في وقت واحد: ﴿فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ﴾ [الأنبياء: 61]. عشان يتفرجوا ويشوفوا ده آخرة اللي هيمشي في الطريق ده. أسلوب التهديد والضغط اللي دايماً بيتبذله أهل الباطل لما تعجزهم الحجة؛ سيدنا إبراهيم بيحاجهم لكن هم مش قدّه، ما معهمش حجة، فبيستخدموا التهديد.

﴿وَحَاجَّهُ قَوْمُهُ قَالَ أَتُحَاجُّونِي فِي اللَّهِ وَقَدْ هَدَانِي﴾ [الأنعام: 80]. أنتم بتكلموني في ربنا؟ المؤمن لما بيتكلم عن ربنا يا جماعة ما بيتكلمش عما قرأ، ما بيتكلمش عن كلمات، اللي بيتكلم عن ربنا بيتكلم عما عاش وعما ذاق، هو بيحدثهم عن إله جرب معاملته، فبيقول لهم: أتحاجوني في الله وقد هداني؟ أنتم جايين تكلموني في ربنا اللي هداني وأطعمني وسقاني وطالما طلبت منه وأعطاني، وطالما توجهت إليه ولم يخذلني، أنتم تكلموني في ربنا؟

المؤمن لما بيكلم الناس عن ربنا بيكلمهم عن إله هو جرب معاملته، هو جرب يعني إيه يستغفر الله فيتوب عليه، جرب يعني إيه يسأل الله عز وجل فيعطيه، جرب يعني يلجأ إلى الله عز وجل فينقذه، جرب يعني إيه أمن يجيب المضطر؟ هو جربها مش قراها مش سمعها، هو عاشها وبدأها، فبيكلمهم عما رأى لا عما قرأ ولا عما سمع، ده الداعية الحق. فبيقول لهم: أنتم جايين تكلموني في ربنا اللي هداني بعد ما هداني واستنقذني من هذه الأوحال من السجود لهذه الآلهة، جايين تكلموني في ربنا إزاي تتخلى؟ وذكر أعلى نعمة، ما قلهمش اتحاجوني في الله وقد أطعمني وسقاني زي ما ذكرهم بهذه النعم في سورة الشعراء، ذكرهم بأعلى نعمة؛ النعمة اللي حرموا منها، نعمة الهداية: ﴿قَالَ أَتُحَاجُّونِي فِي اللَّهِ وَقَدْ هَدَانِي﴾ [الأنعام: 80]. لذلك المؤمن لازم يسعد بهذه الهداية، نعمة الإسلام ونعمة الالتزام هي أعلى نعمة، يعني لو الإنسان عذب فيها وقطع فيها يتمسك بها أبداً ولا يتركها.

زي الكلمة الرائعة بتاعة شيخ الإسلام: ما يفعل أعدائي بي؟ جنتي في صدري، القرآن في صدري، ومع أن الإيمان في صدري، هيعملوا فيَّ إيه؟ ﴿وَلَن يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلًا﴾ [النساء: 141]. قيل على قلوبهم، أحد المعاني خلاص هو لن يستطيع أن يغير قلبي، قلبي بيد ربي سبحانه وتعالى، هيعمل فيَّ إيه؟ سجنوني؟ والله كويس، الواحد فرصة إنه يقعد مع نفسه فترة، بقاله فترة ومش عارف يقعد مع نفسه ويذكر ربنا ويتفكر، من في سياحة قتل شهادة؟ هيعملوا فيها إيه؟ فكذلك سيدنا إبراهيم اللي بيعرف ربنا أعداؤه ما يعرفوش يعملوا معه حاجة. لذلك سيدنا إبراهيم بيقول لهم: أنا مش خايف، مش بيقول لهم ده في الأول، بيقول لهم: ﴿وَلَا أَخَافُ﴾ [الأنعام: 80] بعد كده بيقول لهم، هو الخوف ده بيجي إزاي؟ هو أصلاً طريقة الخوف وهو ما يعرفهاش، مش بس ما بخافش. وهنيجي مع الآيات الآن.

قال: ﴿أَتُحَاجُّونِي فِي اللَّهِ وَقَدْ هَدَانِي﴾ [الأنعام: 80]. ذكر أعلى صور الولاية، وقلنا أعلى صور ولاية الله عز وجل للعبد أن يهديه سواء السبيل: ﴿اللَّهُ وَلِيُّ الَّذِينَ آمَنُوا يُخْرِجُهُم مِّنَ الظُّلُمَاتِ إِلَى النُّورِ﴾ [البقرة: 257] أعلى صور الولاية تتجلى في إخراج الناس من الظلمات إلى النور، إن وليي الله الذي نزل الكتاب وهو يتولى الصالحين، أعلى صور ولاية هنا هو نزل الكتاب، أن هو هدانا بالقرآن. ﴿قَالَ أَتُحَاجُّونِي فِي اللَّهِ وَقَدْ هَدَانِي﴾ [الأنعام: 80]، ورد بقى على التهديد: ﴿وَلَا أَخَافُ مَا تُشْرِكُونَ بِهِ إِلَّا أَن يَشَاءَ رَبِّي شَيْئًا ۗ وَسِعَ رَبِّي كُلَّ شَيْءٍ عِلْمًا أَفَلَا تَتَذَكَّرُونَ﴾ [الأنعام: 80]. الكلمة دي بيقولوا بتدل على فقه سيدنا إبراهيم، لما قال: ﴿وَلَا أَخَافُ مَا تُشْرِكُونَ بِهِ﴾ [الأنعام: 80]، الأول نفى أن هو يخاف مما سوى الله عز وجل، واحنا دايماً بيبقى نفسنا نوصل للمعنى ده. الواحد بيزعل إنه ليه بيخاف من غير الله عز وجل؟ فيه خوف فطري، يعني واحد خايف من أسد، خايف من كلب، ده خوف فطري في الإنسان، لا يلام الإنسان.

لكن أن الإنسان الخوف اللي بيلام الإنسان عليه، أنه يظن ويعتقد أن من أمامه بيده الضر والنفع، بيده الرزق، بيده يقطع عنه الرزق، بيده إنه يوصل إليه الضر، ده الخوف المانع عنه، إنه يصحبه اعتقاد، فبالتالي يصحبه عمل إنه يتقرب، مش بس خوف وخلاص، لأ، يتقرب لآلهة الباطل، أو إن هو يتنازل عن جزء من دين لإرضاء أهل الباطل، مش تحت إكراه ولا حاجة، لأ، يشرح بالكفر صدراً، هو يعتقد أن غيره يضر وينفع. لذلك من الآيات العجيبة قوي في قول الله عز وجل في سورة البقرة: ﴿وَمِنَ النَّاسِ مَن يَتَّخِذُ مِن دُونِ اللَّهِ أَندَادًا يُحِبُّونَهُمْ كَحُبِّ اللَّهِ﴾ [البقرة: 165]. هو بيحبه ليه يعني غريب أن حد هنا الآلهة دي أو الأنداد، سواء بشر أو آلهة، هو بيحبه ليه؟ هو بيحبه معتقد أن هو بيرزقه، معتقد أن هو بينفعه، فهو بيحب سيده اللي بيأكله ويشربه، هو معتقد أن ده اللي في إيده الرزق، فبيحبه.

لكن الإنسان لما سيدنا إبراهيم شوف بقى المراحل عشان توصل لمرحلة لا أخاف ديت، لازم الأول ما يبقاش في قلبك الدنيا ولا الأسباب: ﴿لَا أُحِبُّ الْآفِلِينَ﴾ [الأنعام: 76]. رقم اتنين، إيه الذي في قلبك؟ قمة الافتقار لله: ﴿لَّئِن لَّمْ يَهْدِنِي رَبِّي﴾ [الأنعام: 77]. رقم تلاتة، تبقى اتحركت في الطريق، تبقى مشيت في الطريق ده. يا جماعة، الطريق ده اليقين فيه بيزداد كل ما بتمشي؛ يعني تلاقي الكتب دايماً وتبقى كتب قيمة مثلاً: رحلة البحث عن اليقين، الطريق إلى اليقين، ومثلاً التفكر هنا: ﴿وَلِيَكُونَ مِنَ الْمُوقِنِينَ﴾ [الأنعام: 75]. اليقين في الطريق بيزداد كل ما بتمشي في الطريق أكتر. من تقرب إلي شبراً تقربت إليه ذراعاً، كل ما بتسير في هذا الطريق كل ما بيزداد يقينك، كل ما بيزداد يقينك بهذا الطريق، كل ما تمشي في الطريق أكتر كل ما يقينك يزداد أكتر.

لكن إنت واقف، قل لي: طب أنا دلوقتي زي ما قلنا قبل كده، ربنا بيقول لك: خذ الشبر الأول، الشبر الأول عليك. وربطنا على قلوبهم إمتى؟ إذ قاموا فقالوا. هم قاموا الأول وربنا ربط على قلوبهم. ﴿وَلَوْ أَنَّ أَهْلَ الْقُرَى آمَنُوا وَاتَّقَوْا لَفَتَحْنَا عَلَيْهِم بَرَكَاتٍ مِّنَ السَّمَاءِ وَالْأَرْضِ﴾ [الأعراف: 96]. هم يؤمنوا ويتقوا الأول وربنا يفتح عليهم. احنا نقول: ربنا لأ، اربط على قلبي وأنا أقوم وأقول كلمة الحق، نزل لنا بركات من السماء واحنا نؤمن. لأ، المعاملة مع ربنا مش كده. المعاملة مع ربنا أنك إنت تمشي في الطريق فتجد معاملة من الله عز وجل فتزداد يقين، فتمشي في الطريق أكتر فتجد معاملة من الله عز وجل أكتر، فتمشي في الطريق أكتر، فييجي واحد بعد ما إنت قطعت أشواط في الطريق يقول لك على فكرة.

الطريق الذي أنت ماشي فيه باطل. يجي حد ملحد مثلاً أو حد نصراني يرمي لك شبهات، يقول لك: يا طارق، الطريق الذي أنت ماشي فيه باطل. فتضحك عليه: باطل! تحاجني في الله وقد هدمت؟ أنت بتكلمني عن طريق أنا عايشه‌ سنين، ذقته؟ أنت بتكلمني عن إله أنا عملته؟ أنت بتكلمني عن يقين، مش بتكلمني عن معلومات أنا سمعتها. لذلك، كل ما الإنسان يزداد في الطريق أكثر، كل ما قعد يسمع الشبهات، ما تأثرش فيه. بس هو ماشي في الطريق، مش هو قاعد ما بيعملش طاعات ولا حاجة؛ لأ، هو اشتغل في الدعوة ونزل أعمال خير ونشر دين ربنا سبحانه وتعالى وأطعم مساكين وبحافض على الصلاة في المسجد. هو ماشي في الطريق، كل ما يمشي في الطريق أكثر، كل ما يزداد يقیناً أكثر، لكن طول ما هو قاعد ما بيمشيش في الطريق، طول ما يقينه هيفضل مهزوز.

وأي كلمة ييجي واحد يقول لك: الحق ده أنا دخلت منتدى شفت ودخلت مش عارف غرفة صوتية وسمعت شبهة، ودخلت على صفحة مش عارف على الفيس لقيت فيها كذا. طب ما طبيعي! لأن أنت أساساً ما ذقتش، ما مشيتش في الطريق ده، ما جاهدت في هذا الطريق. عملت أنت إيه عشان هذا الدين؟ وعملت إيه عشان دينك أنت شخصياً؟ فطبيعي، لذلك سيدنا إبراهيم بيقول له: ﴿أَتُحَاجُّونِي فِي اللَّهِ وَقَدْ هَدَانِي﴾ [البقرة: 150]. هنا بيقول: ﴿وَلَا أَخَافُ مَا تُشْرِكُونَ بِهِ﴾ [الأنعام: 80].

الحكمة بقى والفقه بتاع سيدنا إبراهيم الكلمة ديت: ﴿إِلَّا أَن يَشَاءَ رَبِّي شَيْئًا﴾ [الأنعام: 80]. الكلمة دي المفسرين وقفوا عندها واستغربوا، قالوا: يعني إيه أنا مش خاف إلا أن يشاء ربي شيئاً؟ أياً كان، بعيداً عن التفسير اللفظي وما قاله، ده اسمه استثناء منقطع، يعني أنا مش خاف من آلهتكم، ولكن أخاف أن يشاء ربي شيئاً في عقابي، فأنا لست أخاف حقيقة من آلهتكم ولكن أخاف من الله. إلا دي بيسموها استثناء منقطع بمعنى ولكن. خلاص؟ دي معلومة بقى كده بس في جنب، يعني إيه برضه إلا أن يشاء ربي شيئاً؟

فقه وحكمة سيدنا إبراهيم التي يعلمهم إياها حتى لا يحصل شيء فيفتنوا. افرض سيدنا إبراهيم قدر الله عز وجل عليه شيء في الموقف ده، فينسبوه لآلهتهم؛ فعشان ما يقعش ويبقى الموقف ده فتنة لهم، كقول قوم موسى: ﴿رَبَّنَا لَا تَجْعَلْنَا فِتْنَةً لِّلْقَوْمِ الظَّالِمِينَ﴾ [يونس: 85]. وغيرها بتاعة سورة الممتحنة: ﴿رَبَّنَا لَا تَجْعَلْنَا فِتْنَةً لِّلَّذِينَ كَفَرُوا﴾ [الممتحنة: 5]. يعني إيه أن أنا أبقى فتنة للكفار؟ قيل من المعاني: يا رب لا تسلطهم علينا فيعذبونا وينتقموا منا فيفتنوا بهذا التعذيب. تخيل أهل الإيمان مشغولين وهم بيتضربوا من أهل الكفر، مشغول أن الكافر الذي يضربه ما يفتنش بالضرب ده. يعني شف، شف أهل الإيمان حريصين إزاي على إيمان الناس، مش مثلاً: يا رب ولع فيهم، ربنا وهو بيعذبني: يا رب ما تسلطوش عليّ عشان التسليط ده هيعتقد أنه هو على الحق؛ لأن دايماً أهل الباطل بيحسبوها بالمقاييس المادية، الذي معه العصا هو الكسبان. فربنا لا تجعلنا فتنة للذين ظلموا.

فسيدنا إبراهيم بيقول لهم: ولو قدر شيء فاعلموا أنه بتقدير من الله عز وجل. وسع ربي في الذي هداني وأطعمني وسقاني ورباني بنعمه. وسع ربي كل شيء علماً، لا يخرج شيء عن علمه، أي حاجة بتحصل هي بتقدير من الله عز وجل. ما فيش حاجة اسمها صدفة، ما فيش حاجة اسمها طلقة طايشة، ما فيش حاجة اسمها حاجة جت كده؛ لأ، كل شيء بتقدير، ﴿وَجِئْتَ عَلَىٰ قَدَرٍ يَا مُوسَىٰ﴾ [طه: 40]. كل شيء بقدر، ﴿وَمَا تَسْقُطُ مِنْ وَرَقَةٍ﴾ [الأنعام: 59] التي في نفس السورة قلناها ﴿إِلَّا يَعْلَمُهَا﴾ [الأنعام: 59]. إذاً قالوا: ده فقه عالم سيدنا إبراهيم. وهنا وقفوا وقفة: هل الإنسان له أنه وهو يناظر قوم يدعي أنه... هل الإنسان له ذلك؟ يعني هل ينفع أنك أنت قدام قوم تقول لهم والله ما تعرفوا تعملوا فيا حاجة؟

أحياناً غالب الكلام والكلام يحتاج طبعا إلى جلسة أخرى وتفصيل، لكن غالب الكلام أن الإنسان ما يتجرأش كده، ولازم الإنسان يضيف هذه الزيادة، كلمة: ﴿إِلَّا أَن يَشَاءَ رَبِّي شَيْئًا﴾ [الأنعام: 80]. لذلك أحياناً مما يفتن الناس أن واحد يقول إيه: نصرك الذي وعدت يا رب، نصرك يا رب، وبعدين فممكن يتهزموا، فالناس تقول إيه ده؟ نصرك الذي وعدت، وعد من وعد! آه، الله عز وجل وعد طائفة المؤمنين عامة، لكن أنت ما جالکش وعد مخصوص. وزي ما قلنا قبل كده، التدخل في تخصيص وعد الله عز وجل لطائفة معينة أو لزمان معين أو في مكان معين ممكن يفتن الناس، طالما ربنا سبحانه وتعالى ما حددش أنه يعصمك أنت من الناس، أنه يعصم أحمد مثلاً نعم، قطعا الدعوة تحفظ الإنسان، الدعوة إلى العزلة تحفظ الإنسان. فأكثر من آية في القرآن: الدعوة إلى الله ﴿فَوَقَاهُ اللَّهُ سَيِّئَاتِ مَا مَكَرُوا﴾ [غافر: 45]. مؤمن آل فرعون، ﴿يَا أَيُّهَا الرَّسُولُ بَلِّغْ مَا أُنزِلَ إِلَيْكَ مِن رَّبِّكَ ۖ وَإِن لَّمْ تَفْعَلْ فَمَا بَلَّغْتَ رِسَالَتَهُ ۚ وَاللَّهُ يَعْصِمُكَ﴾ [المائدة: 67].

العصمة جت مع ناس، ﴿إِلَّا بَلَاغًا مِّنَ اللَّهِ وَرِسَالَاتِهِ ۚ وَمَن يَعْصِ اللَّهَ وَرَسُولَهُ فَإِنَّ لَهُ نَارَ جَهَنَّمَ خَالِدِينَ فِيهَا أَبَدًا﴾ [الجن: 23]. لن أجد من دونه ملتحداً إلا بلاغاً من الله ورسالاته، سورة الجن. لن يعصمني من أي شيء من الأضرار إلا أن أنا أبلغ دين ربنا سبحانه وتعالى. نعم، لكن قد لله عز وجل تقدير على شخص معين في مكان معين بقدر من الله عز وجل، ﴿لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ﴾ [الرعد: 11]. لكن أحياناً الله عز وجل يرفع هذه المعقبات ويأتي ما قدره الله عز وجل عليه، قد يكون طائعاً أوذي النبي صلى الله عليه وسلم، القي عليه سلا الجزور وأصيل في أحد صلى الله عليه وسلم. يبقى إذا قتل كثير من الصحابة شهداء في المعارك، يبقى مش معنى أن الإنسان إنه مؤمن أو إنه بيبلغ أن هو يبقى معصوم عصمة مطلقة؛ لأ، قد يحدث شيء، هذا الشيء بتقدير من الله عز وجل.

فلذلك سيدنا إبراهيم قال له إن الحكمة أنه قال: ﴿إِلَّا أَن يَشَاءَ رَبِّي شَيْئًا﴾ [الأنعام: 80]. لذلك بعض العلماء قال إن سيدنا هود لما ما قالش: إلا أن يشاء ربي شيئاً، لما قال: ﴿فَكِيدُونِي جَمِيعًا ثُمَّ لَا تُنظِرُونِ﴾ [هود: 55]. وقف قدام قومه أكثر الناس بطشاً عاد، وقال لهم: مش هتعرفوا تعملوا في حاجة. قالوا: دي كانت معجزة، ده مش موقف عادي، دي معجزة سيدنا هود؛ لأنهم قالوا له إيه؟ ﴿مَا جِئْتَنَا بِبَيِّنَةٍ وَمَا نَحْنُ بِتَارِكِي آلِهَتِنَا عَن قَوْلِكَ﴾ [هود: 53]. قالوا له: أنت ما جتلناش ببينة، ما جتناش بآية. فكانت البينة بتاعت سيدنا هود أنه وقف أمام قومه وقال لهم: مش هتعرفوا تعملوا فيا حاجة، ﴿فَكِيدُونِي جَمِيعًا ثُمَّ لَا تُنظِرُونِ﴾ [هود: 55].

يبقى إذاً، خلينا نمشي مع الأصل بتاع سيدنا إبراهيم، الأصل أنك تقول دايماً: إلا أن يشاء ربي شيئاً، أن الله عز وجل ينصرنا إن شاء الله إلا أن يشاء ربي شيئاً. لكن في الدعاء تلح، ما تقولش: يا رب انصرني إن شئت، زي ما النبي نهانا؛ لأ، أنت تدعو وتلح في الدعاء. لكن لما تجي تناظر حد، ما تقولش: أنا على الحق وأنت على الباطل، والله ستنزل عليك صاعقة من السماء؛ ما تدعيش، ما تتدخلش في ده عشان ما تبقاش فتنة له. فالحكمة والعقل الكامل بتاع سيدنا إبراهيم أنه قال: ﴿إِلَّا أَن يَشَاءَ رَبِّي شَيْئًا﴾ [الأنعام: 80] في موقف المناظرة على الإيذاء، هم بيخوفوه، قال لهم: أنا مش خاف، لكن ﴿إِلَّا أَن يَشَاءَ رَبِّي شَيْئًا﴾ [الأنعام: 80].

لذلك سيدنا خبيب لما صلبوه، مات سيدنا خبيب مع أنهم هم انبطحوا على الأرض افتكروا أنها تنزل صاعقة ومش هموت، لكن مات سيدنا خبيب وقتلوه. لما يقولوا: أتحب أن تكون في أهلك وولك آمناً ورسول الله صلى الله عليه وسلم مكانك؟ قال: والله ما أحب أن أكون آمناً في أهلي ومالي ورسول الله صلى الله عليه وسلم يصاب بشوكة أو يشاك في شوكة، فصلبوه، فدعا عليهم هم من دعوته افتكروا أن هم هيؤذوا، ومات سيدنا خبيب. الذي يقرأ القصة في أولها يعتقد أنه لا يمكن هموت، لكن مات سيدنا خبيب، قدر الله عز وجل أن يموت، فممكن واحد لو معتقد دائماً أن لازم ييجي سيف النجاة وينجو سيدنا إبراهيم، يفتن! يقول إيه ده؟ هو ربنا ما نجاهوش ليه؟ أو أهل الباطل لو أُذي: شفتم بقى؟ آه هو قال إن لو كان قال يعني إن أنتم لا يمكن تعرفوا تعملوا في حاجة واحنا عملناه يبقى هو على الدين الباطل، وده مقياس فاسد دائماً عند أهل الباطل أن طالما أنا ضربتك طالما انتصرت عليك طالما أنا كسبتك يبقى أنا الحق وأنت على الباطل، لكن الله عز وجل بيده الملك يفعل ما يشاء سبحانه وتعالى.

وهرقل فاهم لما سأل أبو سفيان، فاهم أن دي من سنن ربنا، قال له: أنتم بتكسبوا ولا... قالوا: الحرب بين أبي سفيان؟ قال له: الحرب بيننا سجال. هرقل لما سمع الكلمة دي ما قالش لا لا لا يبقى ده أكيد... أكيد مش نبي، مع أن هرقل سمع أن الحرب سجال، يعني هم ممكن يكسبوا مرة وهو يكسب مرة، ما قالش لا مش نبي، إيقن أنه نبي، يعني ما خلا دي آية أنه ما يبقاش نبي، لأ عادي. احنا قلنا معركة التبيين زي ما قلنا، وقلنا في درس مرحلة الفرقان: معركة التبيين ينتصر فيها الدين دائماً، معركة التطبيق: الحرب بيننا وبينهم سجال ونؤتى من قبل ذنوبنا.

الشاهد: ﴿وَلَا أَخَافُ مَا تُشْرِكُونَ بِهِ إِلَّا أَن يَشَاءَ رَبِّي شَيْئًا ۗ وَسِعَ رَبِّي كُلَّ شَيْءٍ عِلْمًا ۗ أَفَلَا تَتَذَكَّرُونَ﴾ [الأنعام: 80]. وكيف أخاف؟ كلمة جميلة قوي، كلمة عجيبة يعني! ما اكتفاش سيدنا إبراهيم أنه يقول لهم أنا مش خاف، ويقول لهم: وأخاف إزاي وخاف ليه؟ المعاملة لما الإنسان يعامل ربنا المعاملة دي ويصل إلى هذه العلاقة هو حاسس خلاص أتيقن أنه في تناسق مع الكون كله، تناسق مع الشمس والقمر والمطر والأرض، كل ده جنود لربنا. زي الراجل الذي استلف الألف دينار أو المائة دينار وقال: ائتني بشهيد. قال: كفى بالله شهيداً. قال: ائتني بكفيل. قال: كف بالله كفيلاً. المهم القصة المشهورة في البخاري، وجي في وقت عشان يردوا له الفلوس، جي يركب السفينة ما لقas سفينة يركبها، فألقاها في البحر! هو إزاي يرميها في البحر؟ هو موقن أن البحر بحره سبحانه وتعالى، والهواء هواؤه والسماء سماؤه، وأنا ارتضيت به شهيداً وهو ارتضى به كفيلاً، فرماها في البحر.

شوف الإنسان لما بيوصل لهذه العلاقة الحميمية مع الكون... مش دايماً الإنسان الغربي حاسس أنه في صراع مع الطبيعة، المؤمن حاسس أنه في علاقة حميمية مع الكون، فسيدنا إبراهيم بيقول لهم: أخاف إزاي؟ بتخاف إزاي؟ الله عز وجل يملك كل شيء وبيده نواصي الخلق، ولو أي حاجة حصلت، حصلت فهو ربي، ﴿قُل لَّن يُصِيبَنَا إِلَّا مَا كَتَبَ اللَّهُ لَنَا﴾ [التوبة: 51]. لنا، ده مصيبة؟ لكن بيقول لا، أنا يعني دي حاجة كويسة لي، لا، من الخير والملكية دي لا، أنا يعني حتى الإيذاء لكن ده ده فيه فائدة لي. زي ما النبي صلى الله عليه وسلم قال الحديث الذي هو الحديث القدسي: قال الله عز وجل في آخر حديث: من تقرب إلي شبراً... ولأن سألني لأعطينه، ولئن استعاذني لأعيذنه، وما ترددت في شيء أنا ترددي في قبض روح عبد المؤمن، يكره الموت وأنا أكره مساءته ولكن لا بد له منه.

إحساس المؤمن أن أي مصيبة بتحصل له أن ربنا يكرهها لكن لابد لك منها. أي مصيبة بتحصل لك، الله للمؤمن، وما ذلك لأحد إلا المؤمن. ولكن لابد لك منه، لابد لك منها، لابد لك من الموت حتى ترى الله. الحديث الجميل: واعلموا أنكم لن تروا ربكم حتى تموتوا. الحديث ده يحببك في الموت لما تسمع: واعلموا أنكم لن تروا ربكم حتى تموتوا. الحديث ده يحببك في الموت، يعني السبيل الوحيد أن أنا أشوف ربنا أنا أموت، خلاص أنا عايز أموت.

لما قال له التمرات: أرأيت إن قتلت فأين أنا؟ قال: في الجنة. فألقى تمرات، أكن الذي بيني وبين الجنة أن أنا أموت؟ أكل التمرات ورمى التمرات فوق، تمرات كانت في يده، فقاتل حتى قتل.

لذلك الإنسان لما يبقاش في هذه العلاقة مع الله ما يخافش، حاسس زي ما قلنا كلمة شيخ الإسلام كده: إيه اللي هيحصل؟ يعني إيه اللي هيحصل؟ أنا بحب ربنا سبحانه وتعالى ولو مت ألقى الله، ولو أذيت في سبيل الله. ﴿وَلَا تَتَمَنَّوْا لِقَاءَ الْعَدُوِّ﴾ [البقرة: 104]. اسألوا الله العافية ولا تَتمنوا لقاء العدو، ولكن إذا لقيتموه، فثبتوا واذكروا الله كثيراً، بقى آية الأنفال، تثبت وتذكر الله عز وجل كثيراً.

فسيدنا إبراهيم بيقول لهم سؤال استفهامي استنكاري تعجبي: كيف أخاف؟ أخاف إزاي؟ أخاف إزاي وأنا كل خير في حياتي منه؟ أخاف إزاي؟ أخاف إزاي وأنا طول عمري ربنا حافظني؟ أخاف إزاي؟ أخاف إزاي وهو حافظني من يوم كنت نطفة، من قبل ما أبقى موجود أصلاً وقدر أن أنا أجي وحافظني لغاية لما كبرت، أخاف إزاي كل حاجة حواليا خطر وهو حافظني؟ أخاف إزاي؟ أخاف إزاي وهو بيطعمني ويسقيني، وإذا مرضت فهو يشفيني، ولما باحتاج حاجة بألجأ له، أخاف إزاي؟

وليه المثل الأعلى؟ تخيل لو أنت رحت مثلاً لابن أغنى واحد في العالم قلت له: إيه الحق؟ قال لك: في إيه؟ قلت له: الحق البطاطس غليت، فهو: بطاطس مين يا ابني؟ ده احنا عندنا مزرعة تحت في البيت! الحق الزيت غلى، زيت إيه يا ابني أنا بابي هو اللي بيجيب لكم الزيت ده أصلاً. الحق، فهو الولد ابن الراجل الغني ده نفسه يعيش معاناة الشعب بس هو مش عارف.

فهو بيقول له: أخاف إزاي؟ يعني أنا نفسي أعيش في هذه المعاناة زيكم، ونفسي أبقى بفكر في رزقي زيكم بس أنا مش عارف، هو بيحط إيده في جيبه بيلاقي. فالمؤمن مش كده، المؤمن بيقف في قيام الليل يرفع إيده بالليل بيلاقي المشكلة اتكلحت، فهو مش عارف يخاف، فبيقول لهم: أخاف إزاي وربي ملك السماوات والأرض؟ فبيْبُص على يجي واحد يخوفني من ضيق الرزق مثلاً.

فأنت تبص على السماوات والأرض كده؟ أخاف إزاي يا ابني؟ يعني اللي بيطعم البشر وغير البشر من يوم خلق السماوات والأرض، تيجي تقول لي: أخاف إنه يضيق؟ يا إما أنا مش عارف ربنا، يا إما أنا مش موقن أن الله رزاق. بعدين يقول لي: خاف مثلاً من هَيأذوك، فتبص على اللي حفظ السماوات باتساعها من استراق السمع، ﴿وَالسَّمَاءِ وَالطَّارِقِ * وَمَا أَدْرَاكَ مَا الطَّارِقُ * النَّجْمُ الثَّاقِبُ * إِنْ كُلُّ نَفْسٍ لَمَّا عَلَيْهَا حَافِظٌ﴾ [الطارق: 1-4]، يعني اللي حفظ السماء يحفظ النفس.

ويحفظ القرآن في آخر السورة: ﴿إِنَّهُ لَقَوْلٌ فَصْلٌ﴾ [الطارق: 13] سورة الحفظ سورة الطارق، فأنت لما تيجي واحد يخوفك فانت بتنظر للسماء، يعني اللي حفظ هذه السماء وحفظني من وأنا نطفة وحفظني وأنا طفل، وحفظ كل يعني إزاي أخاف؟ فاللي بيتدبر في صفات الله زي الآيات بتاعة التدبر بتاعة سيدنا إبراهيم ديت توصل لنتيجة طبيعية: أخاف إزاي؟ هذا اللي له علاقة ربنا.

اللي بيبص لطلعة أن صببنا الماء صبا ثم شققنا الأرض شقا، ما قالش ربنا ما قالش إن الماية نزلت فالبذرة طلعت، ﴿أَنَّا صَبَبْنَا الْمَاءَ صَبًّا * ثُمَّ شَقَقْنَا الْأَرْضَ شَقًّا * فَأَنْبَتْنَا فِيهَا حَبًّا﴾ [عبس: 25-27]، ربنا اللي عمل هذه العملية. فلما تبص لهذه العملية قدامك أنت موقن أن الله، قل هو الذي فعلها، فأنت اللي عمل كده ما يطعمنيش ويسقيني؟ اللي ما فيش ورقة في الأرض تسقط إلا ويعلمها، ما يحفظنيش؟ اللي بيطعم كل البشر وغير البشر، ما يحفظنيش؟ اللي بيمسك السماوات والأرض أن تزول ما يحفظنيش إزاي؟

ولو حصل شيء فلأنه بقدره، ﴿وَسِعَ رَبُّ كل شَيْءٍ عِلْمًا﴾ [طه: 98]. ما فيش حاجة حصلت حاشاه سبحانه وتعالى، ما فيش حاجة حصلت غصب عنه ولا لا يعلمها أبدا حاشاه سبحانه وتعالى، ﴿لَا تَأْخُذُهُ سِنَةٌ وَلَا نَوْمٌ﴾ [البقرة: 255]. وزي ما قلنا ده اللي خلى سيدنا إبراهيم يقول: ﴿لَا أُحِبُّ الْآفِلِينَ﴾ [الأنعام: 76]، أنا مش عايز إله يأفل ويسيبني، أنا عايز إله معي في كل لحظات حياتي.

فسيدنا إبراهيم بيقول لهم وكيف، فكلمة كيف أخاف دي عشان تقولها عايزة مجاهدة، عايزة معرفة الله، عايزة طول تدبر في الكون، طول تدبر في أسماء الله وصفاته ليك تلقائي يا جماعة، دي كلمة بتطلع تلقائية، دي كلمة مش بتحفظ، دي كلمة مش إيه، وكيف أخاف وكيف أخاف وكيف أخاف! خلص يا باشا، ما هي ما بتتحفظش، هي ما بتتحفظش، دي بتبقى موجودة زي ما قلنا خشوع في الصلاة، الخشوع في الصلاة دي حالة إيمانية ما بتجيش مش عضلات، ما بتجيش وأنت واقف في الصلاة أنا هخشع، أنا لازم أخشع، هي ما بتجيش كده.

هي لو حالتك الإيمانية لو أنت غضيت بصرك وداخل وصليت السنة متطهر في بيتك وقلت الأذكار وقعدت دعيت له بين الأذان والإقامة هتلاقيك بتخشع في الصلاة، وعارف معاني القرآن وبتحاول طول السنة تجاهد في فهم آيات القرآن هتلاقيك واقف في التراويح خاشع. ده رد فعل تلقائي زي ما قلنا، ربنا قال: ﴿وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ﴾ [الحجر: 97].

أعمل إيه؟ ضيق الصدر، أعمل إيه أنا لا أملك صدري، أنا لا أملك قلبي، أنا لا أملك أي شيء في حياتي، فربنا قال لي: أنت صدرك بيضيق ما قليش وسعه، ما هو أنا ما أقدرش، أعمل إيه؟ ﴿فَسَبِّحْ بِحَمْدِ رَبِّكَ وَكُنْ مِنَ السَّاجِدِينَ﴾ [الحجر: 98]. أنت سبح وأنا أشرخ لك صدرك، زي آخر طه: ﴿لَعَلَّكَ تَرْضَى﴾ [طه: 130]. فسبح من آناء الليل وأطراف النهار فسبح لعلك ترضى، أنت عشان ترضى، عشان تعيش في حالة من الرضا عشان ما تعش في حالة من الشقاء زي اللي في أول طه: ﴿مَا أَنْزَلْنَا عَلَيْكَ الْقُرْآنَ لِتَشْقَى﴾ [طه: 2]، عشان ما تعش في حالة من الضيق زي اللي في آخر الحجر.

ولقد نعلم أنك يضيق صدرك بما يقولون، سبح، نزه الله، كل ما تنزه الله عن النقص، كل ما تعتقد في الله الكمال، كل ما معرفة ربنا تزيد عندك، كل ما يبقاش عندك مشاكل، يبقى كل ما تتدبر في خلق الله، كل ما تنزه الله عن النقص، كل ما تقرب من ربنا أكتر، كل ما صدرك يبقى منشرح، فتقول: وكيف أخاف!

النبي صلى الله عليه وسلم قاعد مع سيدنا أبو بكر، الموضوع مش محتاج تكلف، بيقول: يا رسول الله، لو نظر أحدهم تحت قدميه لرآنا، قال: «ما ظنك باثنين الله ثالثهما؟». هيشوفونا بقى، مش هيشوفونا، هيبصوا مش ما قالوش لأ، أصل هو لما هيجي يبص هو أنا ما أعرفش إيه الحل؟ لكن اللي أنا أعرفه أن احنا في معية الله، بنهاجم ننصر دين ربنا، يبقى احنا في معية الله، ده اللي أنا أعرفه بقى، اتمسكنا بقى، اتاخدنا، أودينا، ﴿اللَّهُ ثَالِثُهُمَا﴾. ده اللي أنا أعرفه.

قال: «ما ظنك باثنين الله ثالثهما؟» خلاص، يبقى تظن كل خير. لذلك يا جماعة من الحاجات كان أحد الإخوة دايماً يسألني يقول لي: إيه مش ربنا بيقول في الحديث القدسي: «أنا عند ظن عبدي بي، أو أنا عند حسن ظن عبدي بي، إن خيراً فخير وإن شرا فشر»، بيقول لي: طب ما أنا أحسن الظن بربنا، وريني! مش هتعرف، حسن الظن بالله مش حاجة سهلة، ده برضو نتيجة زي الخشوع، أنت لو إيمانك عالي هتلاقيه غصب عنك تحسن الظن بربنا غصب عنك، لكن لو أنت إيمانك منحدر وبعيد عن ربنا وما فيش قيام وما فيش تدبر هتلاقيك غصب عنك: ليه يا رب كده؟ كل موقف يحصل لك تسيء الظن، يا نهار أبيض! وما فيش فايدة، وما فيش أمل، وتلاقيك في هلع.

لذلك ربنا ربط الهلع بعدم الصلاة: ﴿إِنَّ الْإِنْسَانَ خُلِقَ هَلُوعًا * إِذَا مَسَّهُ الشَّرُّ جَزُوعًا * وَإِذَا مَسَّهُ الْخَيْرُ مَنُوعًا * إِلَّا الْمُصَلِّينَ﴾ [المعارج: 19-22]. الصلاة بتمنع عنك هذا الهلع، ما فيش صلاة، ما فيش ارتباط بالله، ما فيش قرب من الله عز وجل، هتفضل هالع، هيفضل فيه خوف، مش هتعرف تقول: وكيف أخاف، مش هتعرف تحسن ظنك بالله، مش هتعرف، دي مش بعضلات، دي مش خناقة، ده معنى إيماني بيجي في القلب لما أنت تسبح الله عز وجل.

لذلك الطلب اللي طلبه سيدنا موسى، الطلب الوحيد اللي طلبه سيدنا موسى، أو النتيجة اللي طلب عشانها الطلبات، سيدنا موسى: كي نسبحك كثيراً، قال له: ﴿اذْهَبْ إِلَى فِرْعَوْنَ إِنَّهُ طَغَى﴾ [طه: 24]. الروح لطاغية ممكن يقتلك، هو طاغية وهو جبار وهو متكبر، اذهب إلى فرعون إنه طغى، طلب إيه؟ ﴿رَبِّ اشْرَحْ لِي صَدْرِي * وَيَسِّرْ لِي أَمْرِي * وَاحْلُلْ عُقْدَةً مِنْ لِسَانِي * يَفْقَهُوا قَوْلِي * وَاجْعَلْ لِي وَزِيرًا مِنْ أَهْلِي * هَارُونَ أَخِي﴾ [طه: 25-30]، يا أخي ليه كل الطلبات دي؟ كي نسبحك كثيراً.

طب وايه يعني لما يسبح ربنا كتير؟ يسبح ربنا كتير تاني بقى المعادلة: يسبح ربنا كتير، يعني هينزه ربنا عن كل نقص، يعني هيعتقد في الله الكمال، يعني هيرتبط بالله، هيشعر أن كل شيء ما عدش يخاف، هيوصل لمرحلة كيف أخاف! التسبيح الكتير يصرف عنك ضيق الصدر. ليه يصرف؟ إيه علاقة التسبيح بأنه يصرف ضيق الصدر؟ إيه علاقة التسبيح بالرضا؟ لعلك ترضى في آخر طه الحجر، إيه علاقة التسبيح بده؟ التسبيح أنك أنت طول ما أنت قاعد بيجي لك خواطر سيئة عن ربنا، أن ربنا هيسيبك، أن ربنا هيخذلك، أن ربنا مش هيحفظك، أن ربنا مش معك، أن ربنا ما دي خواطر سيئة، التسبيح يصرف ده.

سبحان الله، أنزه الله أن يصير في ملكه شيء بغير إذنه، أنزه الله أن يصيبني شيء إلا قد قدره الله، أنزه الله أن فلان بايده نفع أو ضر، أنت هي دي معاني سبحان الله، فانت طول ما أنت قاعد تقول: سبحان الله وبحمده، أنت صدرك إيه ده حقائق، الله يملك كل شيء، الله يملك النواصي، الله وحده سبحانه بيده النفع والضر، الله وحده بيده الرزق، أمال أنا خايف ليه صحيح؟

ما تبقى عامل مع الفارق بقى زي ابن أغنى رجل في العالم لما جم يخوفوه فبيقول لهم أخاف إزاي! فلذلك سيدنا إبراهيم بيقول: وكيف أخاف! اللي احنا عايزين نخرج به أن العلاقة دي مجاهدة، العلاقة دي طريق، العلاقة دي مش أن أنت تبقى قاعد أنا خدت قرار أن أنا ما عدتش هخاف من حد غير ربنا، يا سلام! ما كانش حد غيره، طب يلا يا جماعة ناخد القرار مع بعض! لذلك أنا بتعجب من واحنا قاعدين تبنا إلى الله وعزمنا ألا نعود واحنا ما قلناش هنخاف من حد غير ربنا، لأ، ده عمل قلب يأتي بالمجاهدة، التوكل على الله عز وجل حسن الظن بالله اليقين، ده عمل قلب يأتي بالمجاهدة، فجأة قلبك يتصلح.

﴿يَا أَيُّهَا الَّذِينَ آمَنُوا اسْتَجِيبُوا لِلَّهِ وَلِلرَّسُولِ إِذَا دَعَاكُمْ لِمَا يُحْيِيكُمْ وَاعْلَمُوا أَنَّ اللَّهَ يَحُولُ بَيْنَ الْمَرْءِ وَقَلْبِهِ﴾ [الأنفال: 24]. يبقى إذا عدم الاستجابة قلبك يفلت منك، قلبك ما يبقاش خلاص، واعلموا أن الله ما يبقاش بتاعك، واعلموا أن الله يحول بين المرء وقبه، ما عدش يبقى فيه استجابة لأوامر ربنا، وكان الأمر ده جهاد على أحد الأقوال: استجيبوا لله ورسوله إذا دعاكم لما يحييكم، لو ما استجبتوش هتخاف! تخيل العكس اللي الواحد متوقع يعني، طب أنا مش هجاهد، هبقى قاعد مطمن، لأ، هتفضل عايش خايف، هتفضل عايش في هلع، هتفضل عايش في جزع.

لذلك في قول الله عز وجل في سورة النساء، آيات سورة النساء، فربنا سبحانه وتعالى بيقول في آخرها: ﴿فَلْيُقَاتِلْ فِي سَبِيلِ اللَّهِ الَّذِينَ يَشْرُونَ الْحَيَّةَ الدُّنْيَا﴾ [النساء: 74]، آخر بعض المفسرين قال: فليقاتل ده المقصود به المنافق اللي خايف من القتال، وأن ما فيش حل لإزالة النفاق والخوف من قلبه إلا أن هو يقاتل، ما لوش حل لإزالة النفاق والخوف والهلع إلا أنه يرمي نفسه في القتال، زي بالضبط اللي خايف من السباحة الحل أنه يرمي نفسه، هل أن حد يزقه يخوض التجربة؟ اللي خايف يجرب السواقة، اللي خايف يعمل حاجة، فالحل أن هو يخوض التجربة.

ربنا بيقول: فليقاتل في سبيل الله الذين يشربون الحياة الدنيا بالآخرة، قيل من معاني الذين يشربون الحياة الدنيا والآخرة؟ يعني اللي بيحب الدنيا قوي وما بيفكرش في الآخرة حل يقاتل عشان يرجع لآخر الطاعة جم عنده والدنيا تحت قرآن، حل يقاتل، أحد المعاني في هذه الآية. يبقى إذا لابد من مجاهدة من سِير في الطريق عشان توصل لمرحلة وكيف أخاف ﴿وَلَا تَخَافُونَ أَنَّكُمْ أَشْرَكْتُم بِاللَّهِ مَا لَمْ يُنَزِّلْ بِهِ عَلَيْكُمْ سُلْطَانًا﴾ [الأنعام: 81].

عجيب أوي سيدنا إبراهيم فعلاً، المؤمن الدنيا كلها شايفة الحاجة بمقاييس وهو شايف الدنيا مقاييس تاني خالص، فبيقول لهم: فأي الفريقين أحق بالأمن؟ مشهد عجيب يعني، عايز تتخيل مثلاً واحد بيحارب الكفار وبعدين وقع أسير مثلاً، وهم واخدينهم وماشيين به مثلاً للقتل، أو واحد معدي بيقاتل ومعدي على لغم أو كمين أو أي حاجة وهو هيتحط مثلاً تحت ضغط، سواء بقى هيتقتل، هيعذب، فهو رايح بيكلمهم بيقول لهم: وكيف أخاف ما أشركتم، وهو بيقول لهم على فكرة أنتم المفروض تبقوا أنتم اللي خايفين الوقتي! يا ابني، احنا اللي هنقتلك، احنا اللي معانا السلاح، أنت لوحدك، أنت ما معكش حد بيلوم، فأي الفريقين؟ فريق مين؟ أنت لوحدك؟ لأ، هو مش لوحده، الكون كله مع وما يعلم جنود ربك إلا هو، هو مش لوحده، حسبي الله ونعم الوكيل، قال يا إبراهيم في الهواء، هو مش لوحده.

فبيقول لهم: فأي الفريقين أحق بالأمن إن كنتم تعلمون؟ أنا اللي آمن، الواحد لما بيجي يقرأ قصة الحجاج مع سعيد بن جبير بيتعجب من ثبات سعيد بن جبير، قاعد مبتسم، بيقول له: أنت شقي ابن كسير، بيعكس له اسمه بدل سعيد بن جبير، يقول له: أمي أعلم باسمي منك! إيه ده؟ إيه الثبات؟ ويضحك، يقول له: علام تضحك؟ الحجاج: أنا بموتك! وبيضحك، قال: أتعجب من حلم الله عليك ومن جرأتك! ده بيتدبر، الراجل رايح يموت وبيتدبر! شوف الثبات، يوجهونه إلى القبلة، حولوه عن قبلة، ﴿فَأَيْنَمَا تُوَلُّوا فَثَمَّ وَجْهُ اللَّهِ﴾ [البقرة: 115].

لآخر اللحظات وسعيد بن جبير الثابت، حتى بالرغم أن هو قتل إلا أن هو اللي كان الأمن، وبالفعل عاش الحجاج بعده خائفاً، لما دعا لسعيد بن جبير: اللهم لا تسلطه على أحد بعدي، عاش اللي عاش خائفاً الحجاج ومات سعيد غير مطمئن، فالمفروض أنت لما تيجي تعرض ضغط أنت شوف أنت لو على الحق أنت اللي المفروض ما تبقاش خايف، هو المفروض يبقى خايف: ﴿وَكَيْفَ أَخَافُ مَا أَشْرَكْتُمْ وَلَا تَخَافُونَ أَنَّكُمْ أَشْرَكْتُم بِاللَّهِ مَا لَمْ يُنَزِّلْ بِهِ عَلَيْكُمْ سُلْطَانًا﴾ [الأنعام: 81]. دائماً منهج سيدنا إبراهيم بيعلمهم.

دايما زي ما بقول لسيدنا إبراهيم، دايما بيسأل قومه، بيخليهم يسألوا نفسهم، خليهم يفكروا: ﴿أَتَعْبُدُونَ مَا تَنْحِتُونَ﴾؟ كيف أخاف أن تحاجوني في الله وقد هداني؟ دايما سيدنا إبراهيم بيعلمهم، وحتى لما جم يؤذوه، خايف أن لا يكون الأذى ده يحصل بقدر من الله فيفتنوا، فيقول: ﴿إِلَّا أَن يَشَاءَ رَبِّي شَيْئًا﴾. دايما سيدنا إبراهيم حريص على هداية قومه.

فهنا بيقول لهم: ﴿مَا لَمْ يُنَزِّلْ بِهِ عَلَيْكُمْ سُلْطَانًا﴾. بيقول لهم أنتم موقفكم ده جايبينه منين؟ زي في أول سورة الأحقاف: ﴿قُلْ أَرَأَيْتُم مَّا تَدْعُونَ مِن دُونِ اللَّهِ أَرُونِي مَاذَا خَلَقُوا مِنَ الْأَرْضِ﴾، وريني كده عملوا حاجة في الأرض؟ ﴿أَمْ لَهُمْ شِرْكٌ فِي السَّمَاوَاتِ﴾؟ ﴿ائْتُونِي بِكِتَابٍ مِّن قَبْلِ هَٰذَا أَوْ أَثَارَةٍ مِّنْ عِلْمٍ إِن كُنتُمْ صَادِقِينَ﴾. موقف الشرك ده بانينه على أساس إيه؟

المؤمن لما ييجي يناظر يقول له: أنا معي كتاب. أنت بتقول إنه باطل، أنت بتقول إن أنا ديني باطل، أنا معي كتاب وفيه إعجاب وبتحدى به، وبتحدى أنك تأتي بمثله ولو بسورة من مثله؛ ده موقفي. أنت بقى موقفك ده جايبه منين؟ الملحد المشرك، الموقف ده أنت جايبه منين؟ فبيقول له: أنت مش خايف؟ طب أنت مش خايف ليه؟ ما فكرتش؟ بيقول له: ﴿أَوَلَا تَخَافُونَ أَنَّكُمْ أَشْرَكْتُم بِاللَّهِ﴾ ﴿مَا لَمْ يُنَزِّلْ بِهِ عَلَيْكُمْ سُلْطَانًا﴾.

بيقول لهم أنتم إزاي مش خايفين؟ بيفوقهم، خليهم يشكوا في قضيتهم. أنتم إزاي ما انتوش خايفين؟ أنتم معكم دليل؟ الآلهة دي عملت لكم إيه؟ طب أنا معي وحي، أنتم معكم؟ لذلك المؤمن دايما بيهاجم؛ المؤمن معه وحي معه قرآن، فلما ييجي يرد على المناهج الباطلة يهاجمهم. يقول لهم: أنتم معكم إيه؟ وريني كده، أنت معك شوية أفكار لناس ماتت، الأهواء اللي أنتم عايشين فيها دي شوية أفكار لناس ماتت، وأفكار بتثبت كل يوم الواقع بيثبت كل يوم إنها غلط، لكن أنا معي وحي محفوظ من التبديل والتغيير، كل يوم بيثبت إنه حق: ﴿سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ حَتَّىٰ يَتَبَيَّنَ لَهُمْ أَنَّهُ الْحَقُّ﴾.

المؤمن لازم يبقى على يقين مما معه من الحق، لازم تبقى عندك يقين في منهجك. ﴿مَا لَمْ يُنَزِّلْ بِهِ عَلَيْكُمْ سُلْطَانًا﴾، ﴿فَأَيُّ الْفَرِيقَيْنِ أَحَقُّ بِالْأَمْنِ إِن كُنتُمْ تَعْلَمُونَ﴾. متخيل مجموعة كاملة، قبيلة كاملة رايحة لسيدنا إبراهيم واقف لوحده بيقول لهم: ﴿فَأَيُّ الْفَرِيقَيْنِ أَحَقُّ بِالْأَمْنِ إِن كُنتُمْ تَعْلَمُونَ﴾؟ الموقف ده أصلا يهزهم، ثبات أهل الحق يهز أهل الباطل.

﴿الَّذِينَ آمَنُوا وَلَمْ يَلْبِسُوا إِيمَانَهُم بِظُلْمٍ أُولَٰئِكَ لَهُمُ الْأَمْنُ وَهُم مُّهْتَدُونَ﴾. سواء بقى الكلمة دي قيل إن ده من كلام سيدنا إبراهيم أو من كلام الله، وفي الغالب إن شاء الله من كلام سيدنا إبراهيم. ﴿الَّذِينَ آمَنُوا وَلَمْ يَلْبِسُوا إِيمَانَهُم بِظُلْمٍ﴾ أي بشرك، ﴿أُولَٰئِكَ لَهُمُ الْأَمْنُ وَهُم مُّهْتَدُونَ﴾. وإن كان معنى الآية أن لم يلبسوا إيمانهم بظلم أي بشرك كما فسرها النبي ﷺ، إلا أن العلماء قالوا كمال مطلق الأمن مع مطلق الإيمان؛ كل ما الإيمان بيقل كل ما الأمن بيقل، لغاية لما ينفى الأمن مطلقا ينفى الإيمان مطلقا.

فيقوم فالأمن مطلقاً يبقى الكفاية على قدر -زي ما قال شيخ الإسلام ابن تيمية- الكفاية على قدر الاتباع، والناقصة بالناقص. فهنا الأمن على قدر الإيمان، والناقصة بالنقص. ﴿الَّذِينَ آمَنُوا وَلَمْ يَلْبِسُوا إِيمَانَهُم بِظُلْمٍ أُولَٰئِكَ لَهُمُ الْأَمْنُ﴾، يبقى الأمن على قدر الإيمان. كل ما هتخلط في الإيمان بتاعك كل ما الأمن اللي في صدرك هيقل، كل ما الإيمان بتاعك يبقى ثابت وكامل وصافي كل ما تحس بقمة الأمن والطمأنينة.

لما يحصل هزة جواك في الأمن، اعرف إن في مشكلة في الإيمان. لما تحس بعدم الأمن، تحس بهلع وفزع وخوف على الرزق وخوف على الحياة، لما تلاقي ده حصل جواك اعرف إن فيه مشكلة في الإيمان، اعرف إن قصادها على طول حصل نقص في الإيمان. فحلها إنك تعلي الإيمان، ما تقعدش تلف في حلول كتير.

أول ما تعلي الإيمان؛ كان أحد الإخوة ده برضو كان عنده مشكلة في الرزق وبتاع، قلت له بس تعال كلمني أحد الإخوة جزاه الله خيراً، جه صلى ركعتين، صلى به في الإسراء والكهف ومريم وطه والأنبياء، الأخ بعد الصلاة إيه الأخبار؟ طبعاً هي رجله وجعته جداً فنسي المشكلة الأساسية، لكن هو بيقول لي جزاه الله خيراً: بيقول الآيات اللي سمعها في رزق الله لمريم، وحفظ الله لأهل الكهف، في سواء في سورة طه في سورة الأنبياء، فعلاً أنا كشفت إن أنا كنت غبي. فأحياناً أنت مش الحل إنك تقعد تتناقش كتير في مشاكل تبحث عن حلها تاخد بالأسباب، لكن أنا بكلمك على اللي جوه هنا، مش بكلمك على المشكلة، بكلمك على اللي جوه ده عشان يبقى مستقر.

﴿وَلَقَدْ نَعْلَمُ أَنَّكَ يَضِيقُ صَدْرُكَ﴾، اللي جوه ده الذي لا تملكه قلبك، ﴿وَاعْلَمُوا أَنَّ اللَّهَ يَحُولُ بَيْنَ الْمَرْءِ وَقَلْبِهِ﴾، ده حله إيه؟ حله إنك تزود إيمانك، حلو إنك ترجع تاني لأصل المشكلة وتعالجها. ﴿فَالَّذِينَ آمَنُوا وَلَمْ يَلْبِسُوا إِيمَانَهُم بِظُلْمٍ أُولَٰئِكَ لَهُمُ الْأَمْنُ وَهُم مُّهْتَدُونَ﴾. خد بالك دي المرة الثالثة ييجي معها لفظ اللبس في السورة: ﴿وَلَا لَبَسَ عَلَيْهِم مَّا يَلْبِسُونَ﴾ أو ﴿وَلَمْ يَلْبِسُوكُمْ شِيَعًا﴾ و﴿وَلَمْ يَلْبِسُوا إِيمَانَهُم بِظُلْمٍ﴾. هنا اوعى تبوظ إيمانك بعد ما ربنا أداه لك، اوعى بعد ما ربنا يديك الإيمان تخلطه وتحط عليه بقى إيه؟ شبهات ومشاكل وشهوات. اوعى بعد ما ربنا يديك فطرة نقية وقلب صافي وقلب يحب الله تدنسوا، اوعى تبوظ حياتك عليك لأن أنت كل ما بتفسد بالمعاصي والشبهات، اوعى تلجأ لغير الله، الجأ إلى الله عز وجل، امشي في الطريق الصح. ﴿الَّذِينَ آمَنُوا وَلَمْ يَلْبِسُوا إِيمَانَهُم بِظُلْمٍ أُولَٰئِكَ لَهُمُ الْأَمْنُ وَهُم مُّهْتَدُونَ﴾.

﴿وَتِلْكَ حُجَّتُنَا آتَيْنَاهَا إِبْرَاهِيمَ عَلَىٰ قَوْمِهِ﴾. قيل تلك الحجة اللي قال إن سيدنا إبراهيم كان مناظر قال من أول الآيات، من أول ﴿وَإِذْ قَالَ إِبْرَاهِيمُ﴾، دي الحجة. واللي قال إن سيدنا إبراهيم كان مناظر قال الحجة من أول ﴿إِنِّي بَرِيءٌ مِّمَّا تُشْرِكُونَ﴾ واللي أنا لما قال لهم ﴿وَلَا أَخَافُ مَا تُشْرِكُونَ بِهِ﴾، وكيف أخاف؟ دي كانت هي الحجة بتاعة سيدنا إبراهيم. ﴿وَتِلْكَ حُجَّتُنَا آتَيْنَاهَا إِبْرَاهِيمَ عَلَىٰ قَوْمِهِ﴾.

الله عز وجل الإنسان الداعية الصادق اللي يريد هداية قومه، الله عز وجل يؤتيه الحجة على قومه. الإنسان الصادق زي ما قلنا معركة التبيين لا يهزم فيها المؤمن الصادق أبداً. المؤمن الفاهم لدينه، العالم بدينه، ما يهزمش في هذه المعركة أبداً. معركة المناظرة على الدين لا يهزم فيها أبداً، معركة التطبيق هي اللي فيها سجال، سواء جهاد أو التطبيق أو بزنوبنا، لكن معركة التبيين دي محفوظة، القرآن محفوظ.

إلى أن تقوم الساعة، ﴿إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُون﴾ [الحجر: 9]. أمر منتهي، دي معركة منتهية، فالمؤمن الصادق اللي يريد هداية قومه يؤتيه الله عز وجل الحجة، وتلك حجتنا نسبها الله عز وجل إلى نفسه. ﴿وَتِلْكَ حُجَّتُنَا آتَيْنَاهَا إِبْرَاهِيمَ عَلَى قَوْمِهِ نَرْفَعُ دَرَجَاتٍ مَّن نَّشَاء﴾ [الأنعام: 83]. اصطفى الله عز وجل إبراهيم من بين قومه كلهم، نسأل الله عز وجل أن يصطفينا وأن يستعملنا لنصرة دينه. نرفع درجات من نشاء، الرفعة بيد الله عز وجل.

لما واحد يلاقي شيخ ربنا فتح عليه بيقول لك آه اصل ظروفه هي اللي سمحت له، أنا لو ظروفي زي ظروفي كان زماني بقيت لا لا، نرفع درجات من نشاء. اوعى تتعلق بالأسباب المحيطة، الله عز وجل يرفع من يشاء ويخفض من يشاء سبحانه وتعالى. لازم دائماً تبقى زي ما قلت لك وأنت رايح تطلب العلم عند الشيخ دائماً تفتكر: كلكم ضالون إلا من هديته، حتى الشيخ بتاعك محتاج إلى أن يفتقر الله.

أوعى تتعلق بحد غير ربنا، تروح للشيخ وتعظم العلماء والعلم، لكن لازم قلبك يبقى متعلق بالله، مش متعلق بأي شخص ولا بأي سبب. اللي قلبه بيتعلق بالاشخاص يرجع يفتن، أو الشخص ده اتغير، أو حصل له حاجة، أو مات، أو فتن أعوذ بالله من ذلك، يرجع هو يفتن تاني. أنت قلبك الأول متعلق بالله سبحانه وتعالى، نرفع درجات من نشاء سبحانه وتعالى، إن ربك حكيم عليم، فيه حكمة في من يختاره الله، علم من يستحق ذلك الاختيار والاصطفاء.

إن ربك حكيم عليم، الله عز وجل حكيم لمن يستحق هذا الاصطفاء، الله عز وجل عليم بمن يستحق هذا الاصطفاء، أسأل الله عز وجل أن يستعملنا. ﴿نَرْفَعُ دَرَجَاتٍ مَّن نَّشَاء إِنَّ رَبَّكَ حَكِيمٌ عَلِيمٌ﴾ [الأنعام: 83]. ولما ترك إبراهيم قومه أبدله الله عز وجل ووهبنا له إسحاق ويعقوب. لما ساب قومه وهجر قومه رزق الله عز وجل الآيات دائماً بتجيب السياق ده، وكأن الله زي برضو سياق سورة مريم وغيرها من السور والأنبياء أن الله عز وجل أخلفه لما ترك قومه.

﴿وَوَهَبْنَا لَهُ إِسْحَاقَ وَيَعْقُوبَ كُلاًّ هَدَيْنَا وَنُوحًا هَدَيْنَا مِن قَبْلُ﴾ [الأنعام: 84]. وبعدين من أول بقى إسحاق ويعقوب سبعة عشر نبياً ذكروا في هذا الموضع من سورة الأنعام متتالين، رحلة الهداية. وأن هداية الله لسيدنا إبراهيم واصطفاء الله لإبراهيم ده أمر على مدار الزمان، وأن النبي صلى الله عليه وسلم ليس بدعة من الرسل، والنبي صلى الله عليه وسلم هو واحد من الموكب الطويل من الرسل والأنبياء.

رحلة الهداية في الأرض، رحلة الأنبياء. ﴿كَانَ النَّاسُ أُمَّةً وَاحِدَةً فَبَعَثَ اللَّهُ النَّبِيِّينَ مُبَشِّرِينَ وَمُنذِرِينَ﴾ [البقرة: 213]. قيل أي على الكفر فبعث الله الرسل مبشرين ومنذرين، في رحلة طويلة. فأنت لما بتجي ماشي في طريق الدعوة اعرف أن في حتى لو أنت لوحدك في بلد اعرف أن الطريق طويل، غيرك مشي فيه، يعني عشرات الأنبياء والرسل مشيوا في هذا الطريق، ومئات الناس مشيوا في هذا الطريق، وألوف مؤلفة من الدعاة مشوا في هذا الطريق، اعرف انك ماشي على طريق ممتد طويل من لدن نوح.

﴿وَنُوحًا هَدَيْنَا مِن قَبْلُ﴾ [الأنعام: 84] تثبيت للنبي صلى الله عليه وسلم أنه يحاج قومه كما حاج إبراهيم قومه، وأن النبي صلى الله عليه وسلم يأخذ هذه الآيات وياخد سورة الأنعام زي ما قلنا اللي فيها أكتر من أربعين مرة كلمة قل، وياخدها حجة ويحاج بها قومه، زي ما سيدنا إبراهيم حج قومه في المحجة دي.

﴿وَمِن ذُرِّيَّتِهِ دَاوُودَ وَسُلَيْمَانَ وَأَيُّوبَ وَيُوسُفَ وَمُوسَى وَهَارُونَ وَكَذَلِكَ نَجْزِي الْمُحْسِنِينَ * وَزَكَرِيَّا وَيَحْيَى وَعِيسَى وَإِلْيَاسَ كُلٌّ مِّنَ الصَّالِحِينَ * وَإِسْمَاعِيلَ وَالْيَسَعَ وَيُونسَ وَلُوطًا وَكُلاًّ فَضَّلْنَا عَلَى الْعَالَمِينَ﴾ [الأنعام: 84-86]. احنا كده بقى لنا ساعة لسه عشر دقايق. طيب عشان ما نطولش النهاردة ترتيب الآيات دي حقيقة توقف يعني بعض العلماء حاول حتى يعني بعض التفاسير بيقولوا حاولنا نتدبر ليه الترتيب ده فلم يفتح علينا، وده بيبقى من كمال إنصافه أن هو ما رضاش يتكلف.

غيرهم حاول وحاولت يعني في كثير من التفاسير أبحث ايه سبب الترتيب ده بالأنبياء؟ يعني ليه الترتيب ده؟ ليه جه داوود ليه مع إسحاق ويعقوب جه داوود وسليمان وأيوب ويوسف وموسى وهارون؟ ليه الثنائيات دي؟ وبعدين ليه الآية الأولانية ختمت؟ كذلك نجزي المحسنين. وبعدين زكريا ويحيى وعيسى وإلياس كله من الصالحين. واسماعيل واليسع ويونس خوتمت وكلا فضل على العالمين. يعني ده مش التدريب ده مش الترتيب التاريخي بتاع الأنبياء، ده مش الترتيب التاريخي بتاع الأنبياء، فبعضهم حاول من اللي ناس حاولوا يبحثوا عن الترتيب ده ابن عاشور والبقاعي ورشيد رضا، دول اللي لقيتهم حاولوا، حتى الألوسي قال بعد ما ضوي الكتاب لم يتبين لي السر.

بأن الألوسي من المتأخرين المفروض إنه طلع ألف ومائتين هجرية، المفروض طلع أن كتير من التفاسير قال لم يتبين له سر، زي ما بيقولوا كتير اعترف بالعجز، وستبقى يعني ايه في حاجات كده يفتحها الله عز وجل على من يشاء من عباده. أغلب اللي حاول يربطها ربطها بالعلاقة بالملك والدنيا، وقال إن سيدنا داوود وسليمان كانوا ملكين، وأيوب ويوسف برضو رزقوا مال كثير وملك، بعضهم قال إن سيدنا أيوب رزق مال كثير وحتى بعض الروايات قالت إن هو كان ملك، وموسى وهارون مارسوا القتال.

قال يعني أن الست أنبياء دول ابتلوا بالسراء والضراء، فدول كملت لهم مرتبة الإحسان، فجاب معهم وكذلك نجزي المحسنين. هي طبعا زي ما بنقول ايه؟ دي بعض المحاولات ليه استكشاف ليه الترتيب ده؟ وبعدين قال زكريا ويحيى وعيسى وإلياس قالوا دول كانوا من الزاهدين في الدنيا تماماً وابتلوا كثيراً من قومهم وأوذوا، وكلهم تعرضوا لمحاولات قتل فختمت وكلا من الصالحين، أهل الصلاح اللي زاهدوا في الدنيا وأختاروا الدنيا.

وإسماعيل واليسع ويونس ولوط، دول قالوا دول يعني برضو ما فيش جامع معين لهم، لا لا هم ابتلوا بالسراء والضراء ولا اللي كانوا مزهدين في الدنيا، كانوا المتوسط، فربنا قال وكلا حتى لا يظن بهم أحد النقص، فربنا قال وكلا فضلنا على العالمين. دي كانت رشيد رضا وسبقه الإمام البقاعي فيها سبعمائة هجرية سبقه الإمام البقاعي فيها، وابن عاشور حاول زي ما نقول اللي عايز يراجع هم طبعا كتبوا تفصيل أكثر من كده، اللي عايز يراجع الثلاث تفاسير دول أنا لقيت فيهم محاولة لترتيب الأنبياء جه بهذه الطريقة.

الشاهد رحلة الهداية بتاعة هذه الأنبياء هو بس اللي فيه خلاف قول الله عز وجل: ﴿وَنُوحًا هَدَيْنَا مِن قَبْلُ وَمِن ذُرِّيَّتِهِ﴾ [الأنعام: 84] عشان برضو نبقى ذكرنا الهاء دي عايدة على سيدنا إبراهيم ولا عايدة على سيدنا نوح؟ أغلب المفسرين يعيد على سيدنا إبراهيم. اللي خلى بعض المفسرين يقول عايد على سيدنا نوح, مثل الإمام الطبري وغيره، قال إن لوط مش من ذرية إبراهيم، يعني كل الأنبياء اللي موجودين سبعة عشر نبياً من ذرية طبعا لو شلنا نوح يبقوا ست عشرة، الستة عشر نبياً من ذرية إبراهيم ما عدا لوط.

فردوا عليهم اللي قالوا لأ إن الضمير عايد على سيدنا إبراهيم لأن الآيات كلها في سيدنا إبراهيم والآيات دي كلها في كرم سيدنا إبراهيم، وأزاي سيدنا إبراهيم ربنا أخرج من نسله كل هؤلاء المهتدين بعد أن فرد، دي برضو من معاني الآية أن سيدنا إبراهيم كان واقف في أول الآيات الصفحة اللي قصاده كان واقف لوحدهم، الصفحة اللي بعدها ربنا بيقول لك سبعتاشر ست عشرة نبي من الناس سيدنا إبراهيم بينشروا الهداية في الأرض.

فمش معنى أن ما حدش استجاب لك في مرحلة أنك تعتقد أن دي آخر الحالة، ممكن يجعل الله عز وجل من نسلك ومن ذريتك أو من اللي يؤمن بك، واحد تموت أنت وما فيش غير واحد، يعني الناس قالوا آمنا برب الغلام بعد ما مات الغلام لما قال الملك بسم الله رب الغلام ورمى السهم فمات الغلام، فقالوا آمنا برب الغلام، الغلام مات قبل ما يسمعها، يعني تخيل الغلام مات وما سمعش حد قالها، فلما مات ربنا سبحانه وتعالى خلى دول كلهم يقولوا.

فمش معنى أنك ما شفتش بعينك أن ده مش هيحصل خلاص، بعضهم قال لا أن سيدنا لوط هو ابن أخو سيدنا إبراهيم وهذا يعتبر من نسله، أياً كان ده اللي عشان نبقى ذكرنا المباحث اللي في الآية: ﴿وَمِنْ آبَائِهِمْ وَذُرِّيَّاتِهِمْ وَإِخْوَانِهِمْ وَاجْتَبَيْنَاهُمْ وَهَدَيْنَاهُمْ﴾ [الأنعام: 87]. الآيات بعد كده اللي جاية عايزة نتكلم فيها المرة الجاية إن شاء الله هي مليئة بكلمة الهدى والاجتباء والاصطفاء، يعني كلمة الهدى ذكرت في ثلاث أربع آيات كتير جداً، ايه الدلالة على كده؟ نتكلم فيها المرة القادمة بإذن الله عشان نكتفي بهذا القدر، سبحانك اللهم وبحمدك أشهد أن لا إله إلا أنت استغفرك وأتوب إليك، جزاكم الله خيراً.