د. أحمد عبد المنعموقل هو القادر على أن يبعث عليكم عذابا من فوقكم أو من تحت أرجلكم أو يلبسكم شيعا ويذيق بعضكم بأس بعض وشرحنا الآية دي بتفصيل المرة الماضية. يعني المحاضرة اللي فاتت كلها كانت في قول الله عز وجل أو يلبسكم شيعا ويذيق بعضكم بأس بعض، نكمل بقى وقلنا ده كان هيبقى بس خروج عن السياق القرآني مسألة الاختلاف بين المسلمين ومما يؤدي هذا الاختلاف أن احنا بأسنا بيوجه لبعض بدل ما بيوجه للكفار المحاربين، انظر كيف نصرف الآيات لعلهم يفقهون.
نكمل بقى سياق القرآن في خطاب النبي صلى الله عليه وسلم لهؤلاء المشركين الذين يرفضون الآيات ومهما طرح عليهم من آيات قرآنية من أول السورة وربنا سبحانه وتعالى في أول السورة قال إن فيه نور وفي ظلمات وأن الناس بتختار الظلمات وبتترك النور بالرغم من وضوح الآيات، وبيتعنتوا في طلب الآيات وقلنا في أصناف؛ صنف بيتعنت آيات، وصنف عايز ملائكة تنزل من السماء، وصنف بيمسل إنه بيسمع القرآن، وصنوف عمالة تيجي لنا في التعامل مع الآيات ربنا سبحانه وتعالى.
فيقول الله عز وجل استكمالا للخطاب عنهم يخاطب النبي صلى الله عليه وسلم ويقول الله عز وجل الآية ستة وستين سورة الأنعام: ﴿وَكَذَبَ بِهِ قَوْمُكَ وَهُوَ الْحَقُّ ۚ قُل لَّسْتُ عَلَيْكُم بِوَكِيلٍ * لِّكُلِّ نَبَإٍ مُّسْتَقَرٌّ ۚ وَسَوْفَ تَعْلَمُونَ﴾ [الأنعام: 66-67]. وكذب به قومك، كذبوا بأيه؟ الهاء دي عايدة على إيه؟
آه العجيب بالرغم من أن أغلب الناس كتير من المفسرين المتأخرين قالوا القرآن، إلا أن المتقدمين قال: وكذب به أي بالعذاب اللي مذكور في قول الله عز وجل قل هو القادر على أن يبعث عليكم عذابا، العذاب ده من فوق، من تحت، يلبسكم شيعا ويذيق بعضكم بأس بعض. أنواع العذاب ديت هدد الله عز وجل بها المعارضين عن الآيات، فربنا بيقول للنبي صلى الله عليه وسلم هم مش متأثرين بالتخويف بالعذاب لأنهم يكذبون بالعذاب.
ورجحوا القول ده بدليل الآية اللي بعدها لكل نبأ مستقر، يعني كل وعد وكل خبر الوقت هيحصل فيه، فكل وعد من الوعود اللي أنت قلتها يا رسول الله لهم هيجي وقت يحصل فيه، قد يكون في الدنيا وقد يكون في الآخرة. وإن كان بعض المفسرين زي ما قلنا قال وكذب بها أي بالقرآن، فما تنشغلش بهم، فمن كذب بالقرآن فلن ينفعه شيء بعد القرآن، ونقلب كما سيأتينا في الأنعام ونقلب أفئدتهم وأبصارهم كما لم يؤمنوا به أول مرة.
يعني اللي مش يؤمن بالقرآن أول مرة هيظل قلبه متقلب لا يستقر على شيء أبدا، وكذب به أي بالعذاب. واحنا قلنا سياق سورة الأنعام بيجيب العذاب ليه؟ بيضغط على الفطرة الإنسانية عشان تستجيب لربنا، قلنا إقحام ده مثلا أما تيجي تكلم الشباب، تنزل تكلم الناس في الشارع، أو تكلم واحد صاحبك عايز تضغط عليه بتذكره بلحظات ضعفه، تقول له تذكر لما تبقى نايم على فراش المرض، لحظة الموت، تذكر كذا، تذكر لو أنت وقعت في مصيبة، لو وقعت في أزمة.
اللحظات دي الإنسان يتذكر فيها الله عز وجل فطرة، زي ما كانوا كده لما يبقوا في نص البحر يتذكرون الله عز وجل بدون مذكر، بدون ما يبقى معهم لا نبي ولا رسول ولا قرآن، أول ما يبقى في نص البحر يقول آمنت. فانت دورك أنك تذكره بهذه اللحظات وتصور له أنه واقع في هذه اللحظات ماشي، لكن الإشكالية لو هيظل يكذب بالعذاب أنه يحصل، يقول لك لا ده لا يمكن يحصل، وده دايما الوهم اللي بيعيشه الطغاة، دايما يقولوا: ما أظن أن تبيد هذه أبدا.
دايما الطغاة عايشين في مرحلة الوهم، عايش إنه محتمي بخيوط العنكبوت يظن أنها تحميه خلاص وكذب به قومك وهو الحق، هو نفس الخلاف اللي في هو موجود في الهاء بتاعة به، ففي ناس قالت وهو الحق هو ده بقى إما العذاب الحق أي سوف يأتي لو استمروا على الإعراض، أو وهو الحق والقرآن حق مهما كذبوا به. قل لست عليكم بوكيل، أنا كلمتكم ووضحت لكم وحاورتكم بكل أنواع المحاورات وأنتم رافضين، أنا مش مسيطر عليكم ولست عليكم بوكيل ولست عليكم بحفيظ.
ولكن لكل نبأ مستقر، القاعدة دي مهمة قوي، كل خبر عظيم سيستقر، سيستقر يعني يا أما هيخلص لو خدنا الآية كمثال دارج، أو لكل نبأ مستقر كل وعد له وقت هيحصل فيه، يعني لما نزل قول الله عز وجل سيهزم الجمع ويولون الدبر، الآية دي نزلت في مكة، ده نبأ عظيم كان نزل على المسلمين فرحوا به أن الجمع يهزم ويولى دبر. متى مستقر هذا النبأ؟ كان إمتى في بدر بعدها بكذا سنة كان في بدر.
فربنا بيقول للنبي صلى الله عليه وسلم قل لهم كل وعد له وقت هيحصل فيه، مش لازم يحصل بكرة لأ هيجي له وقت، لما يجي التهديدات للطغاة أن كل طاغية يهلك مش لازم يحصل وأنت عايش، لذلك أغلب المراحل اللي المسلمين بيعيشوها هي مرحلة الابتلاء مش مرحلة النصر، يعني ثلتين القرآن هو مكي يعني في وقت الاستضعاف، فكأن الغالب على أحوال المسلمين هو الاستضعاف، لذلك فترات التاريخ لما تيجي تبص على التاريخ كده فترات التمكين في التاريخ قليلة جدا.
يعني بيطول فترات مثلا تسلط للشيعة أو تسلط للتتار أو تسلط للصليبيين تقعد مثلا قرون، هتقعد أزمات طويلة عقود ثم يجي نصر، النصر ده يستمر يدوبك خمسين سنة ما يكملش يقوم يحصل هزيمة أخرى، وده بعض الناس تتكلم فيه: إيه الحكمة اللي بيطول فيها فترات الاستضعاف وبيقل فيها فترات التمكين؟ الدكتور راغب السرجاني كلما قال قيمة في المجال ده لفترات الاستضعاف بتطول وفترات التمكين بقل.
الشاهد أن لكل نبأ مستقر، مش لازم تشوفه بعينك، وربنا قال للنبي صلى الله عليه وسلم وهو من هو إن قد لا ترى أنت بعينك النصر دائما، إما نريَنَّك الذي نعدهم أو نتوفينَّك، فإما نريَنَّك بعض الذين نعدهم أو نتوفَّيَنَّك. ربِّ فإن تريني ما يوعدون ربِّ فلا تجعلني في القوم الظالمين. يبقى كل الآيات دي وغيرها أن ربنا بيقول للنبي صلى الله عليه وسلم قد لا ترى اللي هم وعدوا به، واللي وعدوا به قد لا يكون في الدنيا، قد يكون تحقيقه في الآخرة.
لكن أنت لازم تبقى موقن أن لكل نبأ مستقر، كل وعد ذكر في القرآن هيحصل هيحصل، أما في الدنيا واما في الآخرة، قد تراه أو قد لا تراه ماشي، أو لكل نبأ مستقر، كل قصة وهيصة بتحصل غير الحق شوية وبتتهدا، كل أزمة، لذلك أنا الأزمة اللي احنا بنعيشها دي يعني كنت رحت لأحد المشايخ بكلمه بقول له الوضع صعب وفتن وابتلاءات وآه ما عادتش عارفة تنطلق في الدين والأخوات مضطهدين و.. قال لي لكل نبأ مستقر، شوية والهيصة دي بتروح.
ياما على مدار التاريخ زي كده حصل وبتبقى هيصة ونقول خلاص لن تقوم قومة للسنة ولن يقوم قومة للدين، وشوية والموضوع بيخلص وخلاص، فكل نبأ له مستقر، مستقر نبأ الدين هو التحقيق والتمكين، مستقر كل أفعال أهل الباطل هي الذوبان والذهاب والاضمحلال، جاء الحق وزهق الباطل إن الباطل كان زهوقا. فالاية دي تطمنك مهما حصل من ابتلاءات ومهما حصل من ضغط واستضعاف اعرف أن العاقبة للمتقين.
يعني اللي يعيش أيام فرعون سنين من العذاب والاستضعاف والبهدلة لدرجة أن كانوا يجيبوا المرأة الحامل ويعذبوها يحطوها على أمواس تقف على المواس في رجليها تتقطع وتتشرح فيسقط الجنين، يحصل انقباضات في الرحم يسقط الجنين منها فتتقي جنين يعني تدوس عليه، ومن كتر ما هي بتتقطع مش قادرة، داروا رواه الطبري وغيره في الوسائل اللي كان فرعون يعذب بها بني إسرائيل، فلذلك لما طال عليهم أمد العذاب يعني تباعدوا النصر، استبعدوا أن ممكن يحصل نصر.
فسيدنا موسى قال لهم عسى ربكم أن يهلك عدوكم ويستخلفكم في الأرض، جايز وهم قالوا له أوذينا من قبل أن تأتينا ومن بعد ما جئتنا، مش متخيلين أن ممكن يجي نصر، لكن وقد جاء النصر وأغرق الله عز وجل فرعون، فمهما طال البلاء اعرف أن لكل نبأ مستقر، قل جاء الحق وما يبدئ الباطل وما يعيد، مستقر نبأ الدين هو التحقيق والتمكين في الدنيا قبل الآخرة.
إنّا لننصر رسلنا والذين آمنوا في الحياة الدنيا ويوم يقوم الأشهاد، ومستقر نبأ أهل الباطل الاضمحلال والزهوق كأنه بيزهق، لكل نبأ مستقر وسوف تعلمون، لازم المؤمن يتكلم باليقين ده، يعني ممكن واحد وهو بيموت مستضعف يقول الآية دي يقول لكل نبأ مستقر، طب إزاي ده أنت بتموت أهو! ما هو مش لازم أنا اللي أشوفه، لكل نبأ مستقر لازم الإنسان يبقى على يقين من هذا الدين، لا يشك في موعود الله عز وجل.
مراحل الطغاة أقولها لكم بسرعة، مراحل الطغاة ثلاثة، بيمر بثلاث مراحل: المرحلة الأولى زي ما قلنا مرحلة الوهم، أن الطاغية عايش في الوهم وظنوا أنهم مانعتهم حصونهم من الله، يقول لك لا يمكن الحصن ده يقع، ما أظن أن تبيد هذه أبدا. فرعون: ألست لي ملك مصر؟ عاد: من أشد منا قوة؟ النمرود: أنا أحيي وأميت. دي مرحلة كلهم بيعيشوها، أن ما فيش حد هيقدر عليه، وأن ما حدش ياخد منه الملك بتاعه، وأن هيظل التوريث الملكي إلى أمد الآماد، دي مرحلة كله بيعيشها مرحلة الوهم.
المرحلة الثانية طول البلاء، احنا متوقعين أن المرحلة الثانية على طول أول لما يقول أنا محيي وأميت ينزل العذاب، أول لما يقول ألست لي ملك مصر ينزل العذاب، أول ما يقولوا من أشد منا قوة ينزل، لأ في مرحلة ما بين مرحلة الوهم ديت ومرحلة التمكين ونزول العذاب، مرحلة طول البلاء اللي بيحصل فيها نقول إيه: متى نصر الله؟ اللي بيحصل بعض المستضعفين حتى إذا استيأس الرسل وظنوا أنهم قد كذبوا جاءهم نصر الله.
بيطول البلاء في المرحلة دي، أغلب المسلمين موت في هذه المرحلة، اللي ماتت فيها هذه المرحلة اللي ماتت فيها أمنا خديجة، واللي ماتت فيها سمية، واللي مات فيها مصعب، مرحلة ما قبل التمكين، قبل أن يروا النصر بأعينهم، قبل ما يشوفوا ورأيت الناس يدخلون في دين الله أفواجا. المرحلة الثالثة بقى إهلاك هؤلاء، اللي قال أنا أحيي وأميت مات ببعوضة، اللي قال ألست لي ملك مصر مات غرقا، اللي قال من أشد منا قوة شوية هوا ضيعوه بريح، دي بقى مرحلة سقوط الأقنعة أنه يكتشف أن كانت مجرد خيوط عنكبوت.
وظنوا أن ما ظننتم أن يخرجوا، وظنوا أنهم مانعتهم حصونهم من الله فأتاهم الله من حيث لم يحتسبوا وقذف في قلوبهم الرعب. يبقى إذن دي مراحل ثلاثة، الأمة أطول مرحلة بتعيشها هي المرحلة التانية دي دايما على مدار التاريخ يستبطئ النصر، لكن لازم تبقى موقن أن لكل نبأ مستقر، كل وعد سوف يتحقق، لذلك من أكتر الآيات المهمة أن احنا نسمعها في المرحلة الحالة ديت آيات اللي زي قول الله عز وجل: فلا تحسبن الله مخلف وعده رسله.
ليه ربنا يقول للنبي صلى الله عليه وسلم وللمسلمين والخطاب المقصود به المسلمين؟ فلا تحسبن الله مخلفا وعده رسله، إن ممكن بعض المسلمين يظن هل الله عز وجل يخلف وعده؟ هو إيه اللي يخليه يسأل سؤال زي ده؟ الضغط اللي هو فيه، الضرب اللي هو فيه، الأذى اللي هو فيه. لذلك الآية ديت جت فين؟ جت في أشد الصور اللي فيها بلاءات، سورة إبراهيم، اشتد عليهم الإيذاء: أخرجناكم من أرضنا أو لتعدون في ملتنا، يعني اشتد عليهم البلاء في سورة إبراهيم ومدوا أيديهم في أفواههم، الاقوام حطوا أيديهم على أفواه رؤوسهم نقول لهم خلاص ما عدناش عايزين نسمع منكم حاجة.
اشتد عليهم البلاء فربنا يقول: فلا تحسبن الله يخلف وعده رسله. فالشاهد لكل نبأ مستقر وسوف تعلمون. وإذا رأيت الذين يخوضون في آياتنا، لما بيطول بقى البلاء ولسه الوعد ما تحققش، الفترة دي يستغلها أهل الباطل جدا ويستهزئوا من أهل الدين ويسخروا منه، ويقعدوا يقولوا لهم بقى إيه: هو فين، فين الدين بتاعكم؟ عمل لكم إيه الدين بتاعكم ده؟ زي ما فرعون قال: ذروني أقتل موسى، خلينا نشوف بقى ربنا يعمل ربه ده هيعمله، وليدعو ربه أني أخاف أن يبدل دينكم أو أن يظهر في الأرض الفساد.
فربنا بيقول في صنف هنا لأول مرة يذكر معنا في السورة، في أصناف ذكرت في السورة: صنف المعرضين عن الآيات، صنف المتعنتين في طلب الآيات، صنف اللي بيمثل إنه بيستمع للقرآن، ومنهم من يستمع إليك، ده صنف جديد بقى: الذين يخوضون في آياتنا. دول ناس متمرسة أن هي تستهزئ وتسخر من أهل الدين ومن آيات الله عز وجل. وإذا رأيت الذين يخوضون في آياتنا، الخوض أصلا في اللغة هو المشي في غمرات الماء، أنك ماشي في الماية مش شايفها، ماشي بصعوبة، فتلاقيك خبط وأنت ماشي ما أنت شايف إيه اللي بيحصل تحت.
التخوض في شيء إما المشي فيه بتكلف وصعوبة، أو المشي دون أن ترى، معي؟ فدائما الخوض في الأغلب في أغلب الاستعمال القرآني أن اللي بيتكلم بدون علم بيتكلم في أشياء لا يفقه فيها شيء في الغالب. فإذا رأيت الذين يخوضون في آياتنا كل غرض.
أن يثبت أن آيات الله ليست بآيات لأن طول السورة هم عايزين آية: ﴿لَوْلَا نُزِّلَ عَلَيْهِ آيَةٌ مِّن رَّبِّهِ﴾، طب أنزل لنا ملكاً، طب أنزل لنا آية؛ فربنا يوضح آيات في القرآن فيقوموا يعملوا إيه؟ يخوض في الآيات حتى يثبتوا أنها ليست بآية. معي في المعنى ده؟ زي إيه؟ زي قول الله عز وجل: ﴿وَالَّذِينَ سَعَوْا فِي آيَاتِنَا مُعَاجِزِينَ﴾، سعوا في آياتنا معجزين أن يريدوا أن يثبتوا عجز الآيات. سعوا في آياتنا معاجزين. أنت تجيب له آية من القرآن يقول لك الآية دي عاجزة عن التطبيق في الوقت المعاصر، القرآن لا يصلح للتطبيق المعاصر، أنت كل ما تجيب له آية عايز يثبت أنها مش آية. إذاً لهم مكر في آياتنا، خد بالك سعوا في آياتنا معاجزين، إذاً لهم مكر في يخوضون في آياتنا لأن الآيات واضحة. هم عايزين يصرفوا الناس عن اتباع إيه؟ عن اتباع الآيات.
و﴿إِذَا رَأَيْتَ الَّذِينَ يَخُوضُونَ فِي آيَاتِهِ﴾ ده كأن مجلس الصحابة يا جماعة كانوا معايشين في مكة، كان قول تقريباً مثلاً ربع أو ثلت المجتمع مسلم، لكنه مجتمع مختلط مش عارفين يعني مش زي المدينة فيه مجتمع مسلم ومجتمع مشرك والمسلمين فيه بجانبهم قبيلة من اليهود، لا ده هنا إيه اللي حصل إيه؟ أن المجتمع كله كافر، وبعدين ابني ده أسلم ومولى ده والأمة وأبو فلان أسلم لكن أبنه لأ، وابنه فلان أسلم لكن اه لكن أبوه لا، فكانت المجالس الأسرية أصلاً تحوي مجموعة من المشركين والمؤمنين، فكان طبيعي يحصل جلسات فيها مسلمين ومشركين، طبيعي طبيعي كشيء اجتماعي طبيعي. وكان بيحصل بطبيعة الدعوة أن النبي صلى الله عليه وسلم المسلمين يروحوا يقعدوا مع جلسات المشركين يكلموهم في الدين. ففي نوعين من الجلسات كان بيحصل في مكة، إما النبي صلى الله عليه وسلم متعمداً أو الصحابة متعمداً يروحوا مجلس يروحوا النادي بتاعته: ﴿فَلْيَدْعُ نَادِيَهُ﴾، كان النادي بتاعي يروحوا المجتمع بتاعهم، يروح للجلسات بتاعتهم. النبي صلى الله عليه وسلم كان بيغشاهم في مجالسهم سواء في مكة أو في المدينة ويرروحوا يكلمهم عن الدين. فأحياناً النبي صلى الله عليه وسلم وهو بيككلمهم عن الدين أو الصحابة وابراهيم يكلمهم عن الدين يقعدوا يتريقوا في الدين ويخوضوا في الآيات، أو مجالس اجتماعية عادية طبيعية بتجمع ما بين الأقارب والأرحام هم أصلاً مضطرين على الاجتماع فيحصل أن هو يستهزأ بالآيات.
ربنا هنا قال لما يحصل تبقى قاعد في مجلس سواء للدعوة أو جمع كبير الأقدار والاجتماعيات اللي أنت مضطر بها ويحدث خوض في آيات الله واستهزاء: قم، إذا رأيت الذين يخوضون في آيات الله في آياتنا فاعرض عنهم، أعرضي عينك تقوم وتمشي. يبقى الحكم أما تبقى في مكان سواء جمع أي تك بي أقدار ربنا سبحانه وتعالى، العلاقات الاجتماعية بتبقى موجودة للدعوة أنت اللي رايح متعمد أياً كان، إذا رأيت الذين يخوضون في آياتنا لو حصل خوض في الآيات استهزاء بايات الدين قم فاعرض عنه حتى يخوضوا في حديث غيره. خد بالك من كلمة برضه حتى يخوضوا في حديث، كأن غالب كلام كل كلام أهل الشرك كله خوض، لكن خوض عن خوض يعني بيخوض في أشياء غير الآيات، أنت ممكن تجلس هنا معه سواء بالطابع الاجتماعي العام أو أن أنت بتدعوه إلى الله عز وجل حتى يخوضوا في حديث غيره. ﴿وَمَا يُنسِيَنَّكَ الشَّيْطَانُ فَلَا تَقْعُدْ بَعْدَ الذِّكْرَىٰ مَعَ الْقَوْمِ الظَّالِمِينَ﴾.
الآية دي مع الآية اللي بعدها فيها كثير من التفصيلات وخاصة أن ده ممكن الإنسان يحصل حاجة زي كده أنه يقعد مع ناس ويحصل استهزاء بالدين. بعض العلماء قال الآية دي خاصة بالنبي صلى الله عليه وسلم وجوباً وإلزاماً، خاصة بالنبي صلى الله عليه وسلم واستحباباً لبقية المسلمين، لأن لما النبي صلى الله عليه وسلم يقوم من المجلس هم أصلاً بيستهزؤوا عشان هو موجود، فلما بيقوم لما بيقوم النبي صلى الله عليه وسلم يكف عن الاستهزاء معي؟ فكان قيام النبي صلى الله عليه وسلم أكثر رادعاً لهم. طب الآيات اللي هتيجي لنا آية ثمانية وستين وتسعة وستين وسبعين واحد وسبعين الأربع آيات دول كأنهم بيتكلموا أن في أربع أصناف خوف من المجتمع موجودين، مين هم؟ عشان نركز بس النبي صلى الله عليه وسلم موجود ومعه المؤمنين الاقوياء، موجود مؤمنين ضعفاء ممكن يلبس عليهم أمر الدين، موجود كفار من اللي بيخوضوا في الآيات اللي هم السادة المتبوعون، موجود مشركين من الاتباع السذج اللي بيسمعوا كلام أي حد. دول أربع أصناف من الناس موجودين في المجتمع، تاني كده النبي صلى الله عليه وسلم والمؤمنين الأقوياء يعني عندنا صنفين من المؤمنين وصنفين المشركين، كل صنف فيه الأقوياء والضعفاء. واضح كده التقسيمة دي؟ لأن الأربع آيات هتتكلم عن الأربع أصناف دول تقول لك إيه اللي يحصل؟
اللي بيحصل أن المشركين السادة المتبوعون بيستغلوا وجود المؤمنين الضعفاء والمشركين الضعفاء في عقولهم ويقوم يستغل وجود النبي صلى الله عليه وسلم وهو يقول ويبدأ يهزأ من الدين، هو عارف أن النبي صلى الله عليه وسلم أو المؤمن مش هيتأسروا، هو قصده أنه يخدع مين؟ الاتنين دول، أن يزيد المشرك ثباتاً على ضلاله لأنه أصلاً تابع، احنا قلنا الصورة من الأول بتتكلم على النوعين دول ونويفتن المؤمنين اللي ايه اللي ممكن عندهم ضعف في الإيمان. هو عارف من الأول أن ده. فالنبي صلى الله عليه وسلم هنا أمر أنه ما يفضلش قاعد في المجلس ده لأن وجوده في المجلس إقرار للكلام ده، فحتى لو أنت مش ستفتن أنت هتفتن الصنفين دول من الناس. إذاً أول حكم من الآية لازم الداعية يفهم تبعات جلوسه مع شخص معين على الناس، بمعنى إسقاط الكلام ده على الواقع إيه؟ أنا عايزك تخيل النبي صلى الله عليه وسلم مثلاً بعث سيدنا خالد في غزوة من الغزوات فسيدنا خالد بن الوليد رضي الله عنه أخطأ راح لقوم يغزوهم فالقوم دول قالوا إيه؟ صبأنا صبأنا، يريدون أن يقولوا أسلمنا أسلمنا، عايزين يقولوا أسلمنا بس مش عارفين يقولوا فقالوا إيه؟ يعني أسلمنا، فخالد بن الوليد رضي الله عنه قتلهم اعتقد أنهم إيه بيكفروا واختلف مع بعض الصحابة وحصل الخلافات وأسر منهم ناس فرجع، فالنبي صلى الله عليه وسلم غضب وقال: «اللهم إني أبرأ إليك مما فعل خالد» ودفع دية الناس اللي إيه؟ لأنهم بقوا مسلمين، دفعت ديّة الناس اللي إيه؟ اللي قتلوا.
خطأ من أخطاء المجاهدين زي ممكن زيه خطأ من أخطاء الدعاة، خطأ من أخطاء العاملين للدين وارد، والخطأ هنا مش زي أي خطأ ده خطأ قتل. خلاص النبي صلى الله عليه وسلم عمل حاجتين: تبرأ من الفعلة، مش معنى أن هو معي أن أنا أنسبها للدين لأ، تبرأ من الفعلة وتحمل أخطاءها. في نفس الوقت مش هتبرأ من الشخص. المهم الشاهد تخيل بقى مسجد الضرار، تخيل معي لما بني جت دعوة للنبي صلى الله عليه وسلم أنه يدي محاضرة في مسجد الضرار عن أخطاء المجاهدين بعد موقف سيدنا خالد. هو كدة كدة النبي صلى الله عليه وسلم لازم يتكلم عن أخطاء الموجودين، إنما يتكلم عنه فين؟ نتكلم عنه في مسجد الضرار؟ أنت لما بتتكلم عنه في مسجد الضرار أصلاً، مسجد الضرار أصلاً ينكر الجهاد في سبيل الله، وجودك هناك وكلامك عن أخطاء الجهاد ده يقر إنكارك للجهاد. ساعتها تاني مثال، تاني واحد شيعي استضافك في البرنامج بتاعه عشان عشان تتكلم أن الداعية الفلاني الفلاني اللي بيجيب أحياناً أحاديث ضعيفة، فانت طلعت مع الشيعي تنتقد في الداعية اللي بيجيب إيه؟ أحاديث ضعيفة، أنت طالع مع منكر للسنة اللي واردة عندك عشان تنتقد خطأ للتعامل مع أنتم فاهمين الإشكالية. فأحياناً ظهورك مع شخص أو جلوسك في مجلس شفت الناس حتى لو أنت اللي مش هيتأسر، يبقى لو هنا الخطاب للنبي صلى الله عليه وسلم ربنا يحذر النبي صلى الله عليه وسلم أنه يبقى متواجد في مجلس حتى لو النبي صلى الله عليه وسلم يريد دعوتهم طالما بدأوا يخوضوا في الآيات ويستهزأوا ويتريقوا لازم النبي صلى الله عليه وسلم يقوم، أنه حتى لو مش هيفتن وحتى لو يريد دعوتهم جلوسه هيفتن الصنفين اللي احنا قلنا عليهم. وضحت كده؟
ولن.. طيب ده المعنى الآية أو الحكم المهم من الآية: أن لما يحصل استهزاء تقوم. طب واحد يقول لي ايه؟ طب وأقوم ليه؟ طب ما أنا في اقتراح تاني، لأ ده اقتراح تالت أن أنا أفضل أذكر ربنا حتى لو أنا مش قادر أرد، أفضل بقى أنكر بقلبي. الاقتراح ده كان مسموح به للمضطر في مكة فقط على قول بعض أهل العلم، ثم نسخ في المدينة في قول الله عز وجل وقد نزل عليكم في الكتاب لآية الأنعام: ﴿وَإِذَا رَأَيْتَ الَّذِينَ يَخُوضُونَ فِي آيَاتِنَا فَأَعْرِضْ عَنْهُمْ حَتَّىٰ يَخُوضُوا فِي حَدِيثٍ غَيْرِهِ﴾ [الأنعام: 68]، إنكم إذاً مثله. خلاص بعضهم قال كده، والدليل على القول ده أن بعضهم قال: ﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ﴾ [الأنعام: 69] يعني اللي هو متقي من جوه من حسابهم من شيء مش هينالوا الإثم، ولكن ذكرى دوره أن هو بس يذكره لعلهم يتقون لو مش قادر يسيب المجلس. لكن الأصل إيه؟ أنه يقوم، لو أنت في مكان لذلك المنكر: إما أن تغيره أو تذهب عنه، أما أن تغيره وعشان تحفزه، أما أن تغيره أو تغور عنه. يعني إيه؟ يا تغيره يا تسيبه.
شيء عجيب جداً، النبي صلى الله عليه وسلم يقول: «من رأى منكم منكراً فليغيره بيده، فإن لم يستطع فبلسانه، فإن لم يستطع» يعني إيه يغير المنكر بقلبه؟ أيوه لأن أنت خطورة أن يحصل منكر كلمة يغيره بقلبه يعني هيحصل جواك تغيير، لازم تعرف أن أول لما بتشوف منكر في تغيير من اتنين بيحصلوا، حاجة من اتنين بتحصل جواك: يا بتترضى فينكت في قلبك نكتة سوداء مباشرة، يا بتعتصر وبتبقى مقفول وبتضايق فينكت في قلبك نقطة بيضاء مباشرة، حتى تصير القلوب على تصير القلوب على قلبين: أبيض مثل الصفا لا تضره فتنة، والتاني بقى إيه؟ أسود مرباداً كالكوز مجخياً معي؟ لذلك كثرة رؤية المنكرات حتى لو ما بيطبقهاش كثرة رؤية المنكرات بدون الإنكار القلبي وذلك أضعف الإيمان، بيعمل نقط سودا كتير يخليه بعد كده يعمل هو المنكرات لأن النبي صلى الله عليه وسلم قال السلسلة اللي بتصل إيه؟ تعرض الفتن على القلوب، أيما قلب أشربها نكت في قلبي نكتة سوداء. تقوم النكتة السوداء تعمل نكت كتير سوداء تانية فلا يعرف معروفاً ولا ينكر منكراً إلا ما أوشب من هو هو وصل للمرحلة دي أنه كان بيشوف وبيسكت معي؟
يبقى أول لما تشوف منكر فلذلك مجلس فيه استهزاء بالدين أنت لازم تغير باليد ما تستطعش باللسان، الأصل أنك أنت هنا تبعد، مش قادر خلاص يبقى بقلبك أنت إيه بتعتصر وده أضعف الإيمان. معي؟ طيب. فيه حل تالت، واحنا قلنا الحل ده مش مطروح إلا في وقت الاستضعاف فقط: أنك تفضل، ولذلك قالوا مجالسة الملحدين أو أهل اللغو أو الفساق لما بيخوضوا في الآيات بيستهزأوا ويحصل استهزاء أو معاصي، الأصل أنك تقوم وما بتمكثش إلا لو أنت زي مثلاً ايه أنت على راكب أتوبيس وشغل أفلام فيها استهزاء بالآيات وفيها معاصي وأنت على طريق صحراوي وقعدت تقول للراجل يا عم يهديك يرضيك اقفل مش راضي ما فيش فايدة، فانت هنا مضطر خايف تنزل تهلك فانت بتنكر أنكرت باللسان وبتفضل قاعد تذكر الله عز وجل، لكن مش ناوي تتفرج بقى وتجيب بقى حاجة ساقعة وتقعد بقى تقول بقى سلي طالما أنا عامل أنا إيه بقى ما أنا عملت اللي علي معي رخصة بقا. ما خلاص. لا مش ده الآية (يعني الميتة ما ينفعش تحط عليها كاتشب) يعني ما ينفعش الحاجة تقدر بقضية الضرورة تقدر بقدرها خلاص؟
فالشاهد هنا طب الاختيار التاني إيه؟ الاختيار التاني يبقى قلنا الأصل أنك تقوم؟ واحد يقول لي إيه؟ طب ما أنا ممكن ارد عليه، هو عمال يخوض في الآيات طب ما أنا ما أقومش وعمال يستهزأ وأرد عليه. اللي بيخوض في الآيات لا يصلح معه الرد الباحث عن الحق، لذلك ربنا سبحانه وتعالى بيقول إيه: ﴿وَلَمَّا ضُرِبَ ابْنَ مَرْيَمَ مَثَلًا إِذَا قَوْمُكَ مِنْهُ يَصِدُّونَ﴾ [الزخرف: 57] ما ضربوه لك إلا جدلاً، بل هم قوم خصمون. ﴿إِنْ هُوَ إِلَّا عَبْدٌ أَنْعَمْنَا عَلَيْهِ وَجَعَلْنَاهُ مَثَلًا لَبَنِي إِسْرَائِيلَ﴾ [الزخرف: 59].
ولما ضرب ابن مريم مثلاً، اللي ضرب المثل أحد المشركين رايحين للنبي صلى الله عليه وسلم يعني يقولوا له إيه زي ما احنا زي ما النصارى بيعبدوا وزي ما هو جه من غيره، أياً كان المثل. لذلك العجيب في الآية لو ربنا قال مين اللي ضرب المثل ولا إيه هو المثل ولا إيه الغرض؟ لأن كل الكلام هم مش مهم. ربنا قال: ﴿مَا ضَرَبُوهُ لَكَ إِلَّا جَدَلًا﴾ [الزخرف: 58]. ﴿وَلَمَّا ضُرِبَ ابْنَ مَرْيَمَ مَثَلًا إِذَا قَوْمُكَ مِنْهُ يَصِدُّونَ﴾، يصدون هنا يعني إيه؟ مش بقراءة كسر الصاد، مش يصدون هنا قالوا معناها مش يصدون الناس، لأ يَصِدُّونَ من من التصدية أنه يسقف ويعمل جلبة، فهو عايز يضرب لك مثل تيجي تبدأ ترد يقول لك إيه وأعمل ومش عارف ويقعد يلغوش ويطلع نطلع فاصل إعلاني وبعدين اتصال، طب هرد عليك طب مش طب خلاص معلش بقى الحلقة الجاية ولغوش لأن هو مش غرضه أصلاً بحث عن الحق، وغرضه أنه يعمل إيه؟
هيصة كده وجلبة وصياح وصوت. هو عامل المسرح عشان يجادل ويعمل الهيصة دي ويطلعك مغلوب. مش الحل انك أنت ترد على المسرح؛ لذلك الرد -رربنا لما ما ردش على المسرح- جاب نقطتين عن سيدنا عيسى غير اللي ضربوها خالص. قال إن هو إيه؟ الذي أنعمنا عليه وجعلناه مثلا لبني إسرائيل. وقال: وانه لساعة. فقال لهم: لو أنتم عايزين تتكلموا عن سيدنا عيسى، أنا مش هاجي مجلس فيه سيدنا عيسى غير الكلام في حاجتين؛ يا أما هنتكلم على كفاية لبني إسرائيل من أنهم يتحولوا من اليهود إلى اتباع دين المسيح عليه السلام لما كان هو الدين الحق، أو بالنسبة لكم أنتم هو علم على الساعة، وأنتم المفروض تخافوا من الدار الآخرة إن ينزل في آخر الزمان أو أيا كان.
فأنا اللي هحدد، مش أنت اللي هتقودني. هو دايما إيه؟ يجيب لك شبهة، تيجي ترد عليه فيفتح شبهة تانية. ده واحد بيستهزأ، بيخوض في الآيات، هو مش غرضه البحث عن الحق، هو غرضه فتنة الناس. حتى لو أنت عالم مش هتفتن، أحذر أن تجلس في هذا المجلس؛ لأن وجودك في المجلس ده هيفتن الناس. إيه تاني؟ لذلك فاعرض عنه حتى يبقى يتكلم في كلام تاني، أو أنت جلسة اجتماعية تانية، أو شيء أنت مضطر له تاني حتى يخوض في حديث غيره، خلاص؟
يبقى أحيانا الداعية يؤتى من عدم فهمه للأجواء المحيطة للجلسة. حمادة عياش، قناة تطلبه للقاء معين هيتكلم في الدين، لازم يعرف القناة دي زي مسجد ضرار كده، يعني مبنية عشان أرصادا لمن حرم الله ورسوله وتفريقا بين المؤمنين. القناة دي مالكها نصراني بيصرف عليها، بيصد عن الدين، تسعين في المية منها صد عن الدين، يبقى أنا فاهم توجه القناة، أنا مش لازم أبقى رايح، لازم أبقى رايح فاهم الأجواء اللي أنا هتكلم فيها. سم يسأل: إيه الموضوع؟ موضوع الكلام إيه؟ يعني أما تيجي قناة زي دي ويجي يقول لي: موضوع الكلام أخطاء بعض الدعاة، لأ ما أروحش، ده حق يريد به باطل. مش هتكلم على خطأ بعض الدعاة هناك، هو أصلا عايز يهدم الدعاة وجايبني عشان يهدم به، أنا لازم أبقى فاهم الأجواء المحيطة.
ده اللي كان فيه كلمة جميلة للشيخ الطريفي، مقطع كده ضوابط ظهور العلماء في قنوات السوء: لازم فيه ضوابط، مش مش تعالى اتكلم عن الأخلاق طب هو أصلا قبل فيلم وبعد فيلم هو جاي يكلمني عن الأخلاق؟ طب يعني كده أنا بأقر باللي بيحصل. فإما تنكر، هتروح تنكر أصل ما قامت عليه القناة، أو ما تديهمش الغرض اللي هما عايزينه منك. أيا كان، الضوابط لازم الإنسان يبقى حذر، يعني قد يفتن الناس بعمله حتى لو أثناء الدعوة إلى الله، لكن هو المجريات: ليه ربنا يقول للنبي صلى الله عليه وسلم اهدم المسجد ده، مسجد ضرار ده مسجد. أومال لما تبقى قناة أصلا! ده مسجد لكن أرادوا النبي صلى الله عليه وسلم يصلي فيه لأغراض خبيثة؛ فأحيانا يبقى برنامج ديني وسؤال ديني لكن لغرض خبيث، والقرائن واضحة، القرائن مش محتاجة يعني، يعني برنامج معمول بقى له عشر سنين ما فيش ولا حلقة دين، فجأة عايزين يستضيفوا الشيخ عشان يتكلم على أخطاء العاملين للدين فجأة تابوا إلى الله!
يعني خلاص هو دلوقتي قرر، طب أما يبدأوا ينشروا الدين يبدأ بالأخطاء؟ يعني هو تاب إلى الله عز وجل، أنا ما استدركش، يعني أنا ما ينفعش استدرج وأروح اللقاء ويفضل يتكلم عن الأخطاء. هو هو هنا بيفرق بين المؤمنين، ما ينفعش أنا استدرج، لذلك إلا لو أنا عايز أوضح خطأ أقول له: ماشي، فلان فيه كبر، هو أخطأ، لكن تعال نشوف أنت عملت ايه بقى؟ حضرتك بقالك عشر سنين بتعمل إيه؟ صد عن سبيل الله ووقوف به والمسجد الحرام وأخرجه. أنت بقالك عشر سنين شككت في السنة وشككت في المسلمين وشككت أن الإسلام هو الدين الحق وعملت كذا يوم كذا وعملت كذا في حلقة كذا، فهو أخطأ، ماشي، يبقى أنت بتطرح الموضوع على بعضه. أخطر شيء يصرف الناس عن الدين الطرح الجزئي للدين، ماشي؟
وإذا رأيت الذين يخوضون في آياتنا فاعرض عنهم حتى يخوضوا في حديث غيره واما ينسينك الشيطان فلا تقعد بعد الذكرى مع القوم الظالمين. إيه اللي يخلي داعية ينسى في مجلس وهم يخوضون في آيات الله؟ ده رقم واحد. إيه أسباب النسيان التي ممكن تحصل؟ رقم اتنين: إشمعنى الشيطان عايز ينسيه هنا؟ يعني لما لما ربنا بيقول في قصة موسى والخضر وما أنسنيه إلا الشيطان، ليه الشيطان كان حريص أن يوشع بن نون ينسى المكان اللي سيدنا موسى قال له عليه، المسألة حوت، حاجة واضحة يعني يعني قرائن الحوت أنه ينط، الحوت يموت وينط في البحر ويمشي، ﴿فَاتَّخَذَ سَبِيلَهُ فِي الْبَحْرِ سَرَبًا﴾ [الكهف: 61]، ﴿وَاتَّخَذَ سَبِيلَهُ فِي الْبَحْرِ عَجَبًا﴾ [الكهف: 63]، ازاي يوشع ينسى علامة زي كده؟ الشيطان كان مركز أنه ينسيه اللقطة دي، ليه؟ لأن عارف أن لقاء موسى مع الخضر فيه طلب للعلم معين، وأن الإنسان كلما يزداد طلبا من العلم كلما يزداد قربى من الله عز وجل. فالشيطان لما ينسيك حاجة معينة هو عارف أن الحاجة دي بتقربك من ربنا.
طب ليه الشيطان حريص أنه ينسي الداعية الأحوال المحيطة؟ المجلس الواحد فيه أن هم يخوضوا في آيات الله، ليه ناسي يقوم؟ عشان بتخدم مصالح الشيطان. يبقى داعية قاعد في مكان دعوة، والشيطان ينسيني أقوم؛ عشان بقاؤه فتنة، فتنة لإيه؟ لضعفاء المؤمنين أو للمقلدة من المشركين. إذن يا جماعة، لازم الداعية يبقى حذر.
النقطة التانية: إحنا قلنا ليه الشيطان؟ لأن دي حاجة تخدم أغراض الشيطان. طب ليه الداعية ينسى؟ أما أنه ينكسف يقوم خايف على مظهره الشخصي، أو هيهدد لو قال، يعني كده أنت بتاخد موقف غير موقفنا، طب احنا هنضغط عليك أمنيا، أو من شدة حرصه على الدعوة -ودي اللي اتكلمنا فيها-: وما أرسلناك من قبلك من رسول ولا نبي إلا إذا تمنى ألقى الشيطان في أمنيته، شدة حرصه مش قادر يقوم خايف عليهم. لكن الموقف الصحيح في كل ده أنه يقوم، أيا كان الإنسان، أو شهوة الجدال: عايز يكسبهم، وأنت هنا مش الحل أنك أنت تكسبه؛ لأن مش الاستفادة أنك تكسبه هنا واحد صفر، هي أصلا كله خوض، يعني أنتم لو طلعتم النتيجة أنت كسبان تلاتة اتنين، النتيجة الحقيقية أن الناس فتنت في الدين أصلا، يعني لو أنت لو جاب لك تلات شبهات وأنت رديت على اتنين وهو كده، الناس فتنت؛ لأن هو مش باحث عن الحق، معي؟
﴿وَإِمَّا يُنسِيَنَّكَ الشَّيْطَانُ فَلَا تَقْعُدْ بَعْدَ الذِّكْرَى مَعَ الْقَوْمِ الظَّالِمِينَ﴾ [الأنعام: 68]. يبقى هنا في فارق لما نجي نقول بقى إيه مثلا عشان التمس عذر مثلا لداعية جلس في مجلس فيه خوض في آيات الله، نفرق بين المرة العابرة اللي ما كانش عارف فيها الأحوال واتضحك عليه -والمؤمن قد يخدع- وبين واحد بيطلع في سلسلة حلقات مع شخص معين. إحنا لازم نفرق بين شخص غُر به وطلب لبرنامج معين هو ما يعرفش بإمكانه هيبقى مقصر برضه، ما يعرفش مثلا توجه القناة وما يعرفش مقدم البرنامج وهو ما كانش يعرف، هو مقصر في ذلك؛ يعني لازم الداعية يبقى حذر، ماشي، اتضحك عليه مرة وحصل خوض في الآيات وما عرفش يرد، إنما أن هو متكرر معه لأ، لذلك ربنا قال له: ﴿فَلَا تَقْعُدْ بَعْدَ الذِّكْرَى﴾، يعني ممكن مرة تغلط، إنما مش هينفع كل مرة، ﴿فَلَا تَقْعُدْ بَعْدَ الذِّكْرَى مَعَ الْقَوْمِ الظَّالِمِينَ﴾.
طيب، ﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ وَلَكِن ذِكْرَى لَعَلَّهُمْ يَتَّقُونَ﴾ [الأنعام: 69]. الآية دي لها أكثر من توجيه. التوجيه الأول: أن معنى الآية زي ما إحنا قلنا أن تبقى الآية الأولانية خاصة بالنبي صلى الله عليه وسلم، والنبي صلى الله عليه وسلم مش مستثنى من العذر، مش معذور حتى لو فيه اضطرار، حتى لو فيه إكراه، حتى لو فيه استضعاف، النبي صلى الله عليه وسلم مطالب أنه يقوم، والباقي: ﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ﴾. لذلك الآية الأولانية جت بالمفرد: ﴿وَإِذَا رَأَيْتَ﴾ أنت مفرد ﴿الَّذِينَ يَخُوضُونَ فِي آيَاتِنَا فَأَعْرِضْ﴾ أنت بس أنت ﴿فَلَا تَقْعُدْ﴾ كلها مفرد. الآية اللي بعد كده جت بإيه؟ ﴿وَمَا عَلَى الَّذِينَ يَتَّقُونَ﴾ بقية المؤمنين بقى لو كانوا مضطرين للجلوس، مش قادر يقوم للاضطرار أو الاستضعاف أو للإكراه لأسباب برضه شرعية، مش لأسباب هوائية يعني تبعا لهواه، لأسباب شرعية مش قادر يقوم، فهو طالما متقي ربنا سبحانه وتعالى وذكرهم مرة قبل كده خلاص، ﴿وَلَكِن ذِكْرَى لَعَلَّهُمْ يَتَّقُونَ﴾. وقالوا الأمر ده بالنسبة لبقية المؤمنين نسخ بعد التمكين، وبيعود على حسب الاستضعاف وعلى حسب التمكين. يبقى إذن بعض المؤمنين قد يُعذر، لكن رؤوس الإيمان ما يُعذروش، رؤوس الدعاة إلى الله اللي هم مثلا زي الإمام أحمد بن حنبل، ده ما هيعذر أنه يجلس في مجلس زي ده؛ لأن ده فتنته فتنة الأمة، ده فتنته فتنة الأمة كاملة، فلازم يقوم هنا من المجلس ده، فاعرض عنهم حتى يخوضوا في حديث غيره.
في معنى تاني: ﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ﴾ يعني مش عليهم، ومع الذين يتقون ليس على المؤمنين أنهم يروحوا يحاسبوا المشركين ويخلوهم يتوقفوا عن الخوض ده بالقوة، لسه ما معناش القوة، ولكن اللي علينا وأن واحنا قايمين نذكرهم، أي ولكن عليهم ذكرى، يبقى ﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ وَلَكِن ذِكْرَى﴾ أي ولكن عليهم إيه؟ ذكرى لعلهم يتقون.
في بقى معنى جميل جدا ذكره الإمام القاسمي في الآية بيقول إيه؟ وما على الذين يتقون من حسابهم من شيء يعني هم بيقوموا، المتقين لما قاموا مش قاموا عشان المشركين، ولكن قاموا أيوه لكن ذكرى للمستضعفين المؤمنين اللي لو شافوهم قاعدين في المجلس هيفتنوا. يبقى معنا تاني كده الآية: ﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ﴾ أي ما على الذين يتقون من حساب المشركين من شيء، ولكن ذكرى لمين؟ لأهل الإيمان المستضعفين. يعني هو قام من المجلس ده عشان إيه؟ عشان يذكر مين؟ المستضعفين اللي قاعدين في المجلس عشان ما يتضحكش عليهم. يعني هو مش هيتضحك عليه، هو مش هيشيل ذنب، ولكن مجرد أنه قام عشان إيه؟ ذكرى لأهل الإيمان المستضعفين. معلش يا حامد، ماشي؟ ولكن ذكرى لعلهم يتقون. يبقى تاني كده في تلات أقوال في كلمة ولكن ذكرى، ذكرى لمين؟ قول الأول: ذكرى لأهل الشرك، أن أنت عليك أنك أنت إيه تذكروا. القول التاني: ولكن ذكرى لمين؟ للمؤمنين والمستضعفين، ماشي؟ لذلك من الجميل قوي في سياق الآيات أن ربنا ييجي يقول بعد كده إيه: ﴿قُلْ أَنَدْعُو مِن دُونِ اللَّهِ مَا لَا يَنفَعُنَا وَلَا يَضُرُنَا وَنُرَدُّ عَلَى أَعْقَابِنَا بَعْدَ إِذْ هَدَانَا اللَّهُ كَالَّذِي اسْتَهْوَتْهُ الشَّيَاطِينُ﴾ [الأنعام: 71]. ده هنا في محاولة للإيقاع في الضلال، هنجي لها الآية دي، في محاولة أنهم الشياطين سواء الإنس والجن عايزين يوقعوا واحد في الضلال. وفي ناس تانيين بيقولوا له إيه؟ ﴿ائْتِنَا إِلَى الْهُدَى﴾ [الأنعام: 71].
ده تصوير اللي بيحصل في مجالس الذين يخوضون في آياتنا، معي يا جماعة ولا توهتوا؟ تاني، يبقى إذن إحنا قلنا المجلس فيه أربع أركان: ركن بيخوضوا في الآيات، ركن رؤساء المشركين اللي عمالين يخوضوا في الآيات، ركن المؤمنين الأقوياء اللي مش هيتأثروا بالشبهات لكن وجوده ممكن يبقى فتنة، ركن المستضعفين المشركين اللي كل همه في حياته أن هو يبقى تابع ويبقى دنيوي وخلاص، ودول اللي ربنا هيقول عنهم: ﴿وَذَرِ الَّذِينَ اتَّخَذُوا دِينَهُمْ لَعِبًا وَلَهْوًا وَغَرَّتْهُمُ الْحَيَاةُ الدُّنْيَا﴾ [الأنعام: 70]. يعني أما تيجي تقوم مش تذكيرك لهم مش هيفرق، قم وسبهم حتى لو فتنوا برضه قوموا؛ لأن هو أصلا من الأول بيحث عن اللعب ولهو، إنما وأنت بتقوم عليك أنك تذكر مين؟ المؤمنين الضعفاء. يبقى السورة الأربع آيات دول بيتكلموا عن أربع طوائف.
المشهد ده ممكن يحصل في أي مجلس: ناس بتقول عندها القدرة على الشبهات وبتخوض في آيات الله، ومؤمنين أقوياء، وأتباع للمشركين، وضعفاء من الإيمان ما عندهمش علم. أنت تقوم عشان ما تفتنش المؤمنين، عشان ما تقر إقرار للمشركين، خلاص؟ ﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ وَلَكِن ذِكْرَى﴾ أي ولكن ذكرى، يعني عليك ذكرى لمين؟ مش باقية للمشركين، هنا عليك ذكرى أنك تروح للمؤمنين تفهمهم، تقول لهم: ما تجلسوش إلى هؤلاء، أنت لسه ما عندكش العلم والقدرة أنك ترد على الشبهات دول، ما تقعدش معهم، ما تخخش معهم في مناظرات، ما تناقشهمش، ده دور أهل العلم في المرحلة دي؛ لأن الإنسان قد يفتن. وياما شباب تنصحهم ما فيش فايدة، يدخل على منتديات للنصارى وللشيعة ويرجع عنده شبهة قالبة له دماغه، وجودك في المنتديات دي بدون إنكار فتنة له أنه يتجرأ. أنت تفهمه، يقول لأ: أنا داخل لأن في ناس ممكن يبقى في مكان أنت ما ينفعش تبقى فيه، هو لازم يصرح أن ده شيء خاص به هو، ويفهمه أن في شروط للوجود في التواجد في المكان ده عشان ما يفتنش الناس، واضح؟
﴿وَمَا عَلَى الَّذِينَ يَتَّقُونَ مِنْ حِسَابِهِم مِّن شَيْءٍ وَلَكِن ذِكْرَى لَعَلَّهُمْ يَتَّقُونَ﴾ [الأنعام: 69]. القول التالت: ولكن ذكرى أي ولكن إذا ذكرت أنت فقم.
النبي صلى الله عليه وسلم طالب أن هو يقوم حتى لو بقي، حتى لو في عذر للمؤمنين الضعفاء بقى أن هم يفضلوا، احنا قلنا ما فيش عذر النبي صلى الله عليه وسلم أنه كان يفطر. واسقاطا بقى على واقعنا ما فيش عذر لأئمة الدعوة والعلماء أن هم إيه؟ يفضلوا في الأماكن دي، أنه قد يفتي للناس. إذا يا جماعة؛
تاني كأسقاط على واقعة؛ برنامج مشهور بالطعن في السنة أو الطعن في الدين أو الانتقاص من أهل الدين على مدار سنين، ثم دعي أحد للكلام في نقطة معينة في أخطاء، ده ماينفعش أنه يروح. أن مراحه بيقر للشخص ده، والمصيبة أنه ممكن يروح ثم يثني عليه. احنا قلنا إن التدليس اللي بيحصل زي ما النبي صلى الله عليه وسلم منع منه قال إيه؟ لا تقول المنافق سيدنا، أوعى حد يقول للمنافق قدام الناس سيدنا، ولا حتى يعني من غير بس قدام الناس فتنة، اكسر ليه؟ فإنه إن يكن سيدكم فقد أخطأتم الله ورسوله؛ ماينفعش تقوله سيدنا لأنك أنت بتفتي الناس، مراحك والثناء عليه أمام الناس إقرار أنه على حق.
عايز تقر موهبة عنده موجودة مع بيان ما فيها من باطل، وارد. كان أحيانا شيخ الإسلام ابن تيمية يشوف شعر كفري مثلاً، فيقول الشعر ده في صنعة شعرية قوية لأهل الشعر، ولكن مليء بالكفر والضلال، في نفس السطر ده برضو من باب الإنصاف، أنت تبقى منصف حتى مع العدو، معي؟ ومع الذين يتقون من حسابهم من شيء ولكن ذِكْرى لعلهم يتقون. الصنف بقى اللي قاعد بيدور على أي حاجة يهيص فيها وخلاص، يعني أي حد بيخوض في الآيات بيجيب له مسلسلات، يجيب له أفلام عن الإلحاد ما فيش مشكلة، أفلام عن الشهوات ما فيش مشكلة، أفلام عن حاجات إباحية ما فيش مشكلة، دول الذين اتخذوا دينهم إيه؟ لعباً ولهواً. فربنا بيقول له: سبه.
ما أنت ممكن تقول إيه؛ طيب أنا مش هقوم، مش بس عشان اللي بيخوضوا في آيات الله، لأ، أنا مش هقوم عشان الغلابة دول المشركين الضعفاء العقول دول؟ لأ، أنا خليني قاعد عشانهم. لأ برضه سبهم؛ لأن دول من الأول مش هيستجيبوا في الوضع ده، ده تخوفه في مكان تاني: ﴿وَذَكِّرْ بِهِ أَن تُبْسَلَ نَفْسٌ بِمَا كَسَبَتْ﴾. ده تاخده برة المجلس وتخوفه بالعذاب، ده محتاج يخوف بالعذاب، وهنتكلم يعني إيه تبسل نفس بما كسبت. معي يا جماعة؟
يبقى الداعية لازم يبقى فقيه؛ إمتى يتكلم بالدعوة؟ إمتى يعرض ويسكت؟ إمتى يقوم من المجلس؟ حتى لو واحد يقول له أنت اتغلبت وأنت مش عارف ترد؛ المجلس له صوته، هتلتزم به؟ ولا أقوم في جو صحي للبحث عن الحق؟ الجو، إذا اللي هو يصدون الجلَبَة والهيصة دي، ده مش جو بحث عن الحق، فانت خسران خسران. في لعبة كده أنت بتلعبها مع أهل الباطل، أنت لو كسبت أنت خسران ولو خسرت أنت خسران زي الديموقراطية كده يعني؛ هي في لعبة كده معينة هو هو اللي معاه القواعد، أدوات اللعبة كلها هو اللي حاططها، فهو حاطط السيستم ده كده أنت كسبت خسران، قال لك مش هتكسب إلا بالتنازل عن اصولك، وأنت خسارتك هي التنازل عن اصولك، خسرت مش هتعرف تطبق اصولك، يعني أنت خسرت خسران، كسبت خسران. ففي برامج كده عرفت ترد خسران، ما عرفتش ترد خسران.
فلازم الداعية يبقى فقيه؛ إمتى يروح هنا وإمتى ما يروحش؛ لأنه بيفتن الناس، هو ممكن خارج معتقد أنه عِرف يرد، لكن في ثنايا الكلام كمية الشبهات اللي طرحت لا تساوي شيء في الشيء اللي قاله أصلاً. ودايماً أسلوب المناظرات مع أهل الباطل؛ أهل الباطل طريقته أنه بيعمل إيه؟ أنه أما يجي يطرح ما بيطرحش وحدة، يطرح عشر شبهات مرة واحدة، عارف اللي بيدخل صفحة نت ويبقى فاتح عشر صفحات مرة واحدة؟ خمسين حلقة. بس ده بقى؛ أيوه هو مثلاً فاتح عشر شبهات، محتاج منك سلسلة، أنت محتاج منك مثلاً سنة مثلاً ترد على الشبهات دي، وكل ما تيجي ترد يقوم فاتح لك شبهة تانية، تيجي ترد على التانية يقوم فاتح شبهة تالتة، تيجي ترجع للتاني يقول لك أنت بتهرب من الإجابة على السؤال، طب ما أنا برد على الشبهة وشوية زي يقول لك ياخد اتصال، يبقى واحد طبعا متفق معاه يشتم فيك، تيجي ترد على اللي بتصل تحس انك أنت كنت قاعد ما استفدتش أي حاجة، وأنت القضية هو ما بيجبش أي حد يبحث، وممكن يبقى بيجيب حد عارف أنه هيغضب مثلاً مش هيعرف يرد، حد ضعيف أو يجيب حد علم وما يخلوش يفرد فيفتن الناس.
فلازم الداعية يبقى فاهم؛ يعني كلمة ﴿لَا تَقُمْ فِيهِ أَبَدًا﴾ دي كلمة مهمة قوي. ازاي ربنا يقول للنبي صلى الله عليه وسلم ما تقومش في مسجد؟ لازم نفهم إذا كان في مانع في القرآن من إجابة على بعض تساؤلات المشركين أو استجابة لطلبات المنافقين في إقامة في مسجد، يبقى أكيد في حاجات زي كده بتحدث في واقعنا، وأاحنا لا نستجيب لهذه، لا نستجيب لهذه إيه؟ الطلبات.
وذر الذين اتخذوا دينهم لعباً ولهواً. يعني إيه اتخذوا دينهم لعباً ولهواً؟ غريبة قوي كلمة اتخذوا، يعني ممكن اتخذوا إيه حياتهم لعباً ولهواً، إنما يعني إيه دينه بقى لعباً ولهواً؟ يعني إيه؟ يعني حتى الآية مش بتقول إيه؟ جعلوا حياتهم لعباً ولهواً، لأ، ده هو بيحسس نفسه أنه عايش في الدين. إيه الدين اللي بيعمله بقى؟ كان أول المشركين قبل إسقاطه على الواقع. المشركين إيه الدين اللي بيعمله؟ أنه بيروح عند الأصنام، أنه بيسقفوا ويسفروا ﴿وَمَا كَانَ صَلَاتُهُمْ عِندَ الْبَيْتِ إِلَّا مُكَاءً وَتَصْدِيَةً﴾ [الأنفال: 35]، شوية حركات كده بحيث إنه يرضي نفسياً أن هو كده بيعمل دي بعض الشعائر كده تحسسه أنه بيعمل دين، وهي أصلاً ظاهرها اللعب، أن هو يروح الحسين ويتمسح مش عارف إيه، وبعد ما يخلص يطلع بقى يشيش على البتاع، اللي هو إيه؛ هو رايح أديله لعب ولهو. الطقوس حتى اللي بيعملها نفسها شوية إيه؟ شوية موالد، شوية لعب ولهو.
إيه اللي يخليه كده؟ غرتهم الحياة الدنيا، فاتخذوا دينهم، خلى دينه مجموعة من اللعب واللهو، ثم تدين باللعب. شوف المصيبة بقى! لذلك لما التطور اللي ربنا قاله في سورة الأعراف؛ إذا فعلوا فاحشة قالوا: ﴿هَٰذَا مَا وَجَدْنَا عَلَيْهِ آبَاءَنَا﴾ [الأعراف: 28]، أول حاجة يقول على الفاحشة: أنت هتنكر التقاليد بتاعتنا ولا إيه؟ دي تقاليد وطنية، طول عمرنا كده بقى لها خمس آلاف سنة كده، فانت مش عارف تيجي تقول له طب ده حرام الرقص الفن؛ أنت بتتكلم على الفن اللي بنتوارثه جيلاً عن جيل؟ تتكلم على الأصنام والتماثيل؟ أنت عايز حضارة بقى لها مش عارف إيه؟ فيزنقك بمسألة التقاليد: ما وجدنا عليه آباءنا. تيجي ترد على مسألة الآباء يقول لك إيه؟ ﴿وَاللَّهُ أَمَرَنَا بِهَا﴾ [الأعراف: 28]، والله أمرنا بها دي اللي هي إيه؟ ده بقت دين، يعني تحول الفاحشة كانت فاحشة الأول بعدين بقت تقاليد بعدين بقت إيه؟ بقت دين.
أخطر مرحلة تحويل الفاحشة إلى دين؛ أن يقول: الله أمرنا به. أن تيجي مثلاً على الربا مثلاً يقول لك إيه: أحب الأعمال إلى الله سرور تدخله على قلب مسلم مثلاً. دين بقى وخلاص، أن الربا مثلاً ده استثمار لاقتصاد البلد وأن احنا كده ننعش الاقتصاد، وده يجب أن علينا أن احنا نعمل كده، يبقى التحولات دي خطيرة جداً تصد الناس عن سبيل الله. احنا بقالنا قد إيه كده؟ خمس دقائق بس.
طيب ﴿وَذَرْ الَّذِينَ اتَّخَذُوا دِينَهُمْ لَعِبًا وَلَهْوًا﴾، السبب كده؛ غرتهم الحياة الدنيا، الدنيا غرتهم، لذلك كلامك في وسط الأجواء دي مش هتاثر فيه، ده لازم بعيد عن الواقع ده. ﴿وَذَكِّرْ بِهِ﴾ أي بالقرآن ﴿أَن تُبْسَلَ نَفْسٌ بِمَا كَسَبَتْ﴾، أنت هتاخده كده وتخوفه من العذاب. تبسل أي تحبس، تقول له الناس دي مش هتفيدك، أنت هتتحبس في جهنم لوحدك، هتتحبس في جهنم. ﴿وَذَكِّرْ بِهِ أَن تُبْسَلَ نَفْسٌ بِمَا كَسَبَتْ﴾؛ بسبب الكسب بتاع اللعب واللهو ده والحياة الدنيا دي هتتحبس في جهنم. الانطلاق اللي أنت كنت منطلق فيه في الدنيا ده هينتهي إلى حبس في السجن في جهنم والعياذ بالله. يعني تبسل نفس بما كسبت.
﴿لَيْسَ لَهُم مِّن دُونِ اللَّهِ وَلِيٌّ وَلَا شَفِيعٌ﴾، هينفعوك اللي انت اللي بيخوضوا في الآيات دول مش هينفعوك ساعتها، ولا حد هعبرك، ﴿لَيْسَ لَهُم مِّن دُونِ اللَّهِ وَلِيٌّ وَلَا شَفِيعٌ وَإِن تَعْدِلْ كُلَّ عَدْلٍ﴾، كانت كل حياته دنيا، يقول لك طيب يوم القيامة خد فلوس أبني تعدل كل عدل يعني تدفع فكاك رقبتها يعني. عدل هنا مش مش تعدل كل عدل يعني تقول العدل، لأ، تعدل كل عدل أي تدفع ما يعدل رقبتك، عدل رقبة بيقول لك ده كفارته كذا، فدية، عايز يدفع عدل لنفسه كذا. ﴿وَإِن تَعْدِلْ كُلَّ عَدْلٍ لَّا يُؤْخَذْ مِنْهَا﴾، أولئك الذين أُبْسِلوا بما كسبوا، لهم شراب؛ أولئك الذين أرْسِلوا -أولئك الذين غرتهم الحياة الدنيا- لهم شراب من حميم. التمتع بقى راح، وعذاب أليم بما كانوا يكفرون.
قل: ﴿أَنَدْعُو مِن دُونِ اللَّهِ مَا لَا يَنفَعُنَا وَلَا يَضُرُنَا﴾، ده بقى مين اللي بيقول الكلام ده هنا بقى الخطاب ده على السياق اللي احنا قلناه والتصور اللي احنا قلناه، مين هنا اللي يقول الكلمة دي بقى؟ مين من المؤمنين؟
لا مش الأقوية، اللي كانوا رايحين يفتنوهم فوقف بقى يقول له: لأ، لن أفتن الشبهات اللي انت عايز تشتتني بها لن تؤثر في. ﴿أَنَدْعُو مِن دُونِ اللَّهِ مَا لَا يَنفَعُنَا وَلَا يَضُرُنَا وَنُرَدُّ عَلَى أَعْقَابِنَا بَعْدَ إِذْ هَدَانَا اللَّهُ﴾ [الأنفال: 71]، لا يمكن يحصل أبداً. وفيه ناس بتسقط، بترتد. القرآن شبهها كالذي استهوته الشياطين. قالوا: ده تشبيه للمرتد. يبقى في ناس وقعت فعلاً ضعاف المؤمنين -أنا قصدي هنا ضعاف يعني اللي ما عندوش العلم الكامل زي الأقوية وزي العلماء- لكن هو بيتبع الدين، لما بيتحط في فتنة بيهرب ويلجأ إلى الله عز وجل، فلما اتحط في الفتنة قالوا: لأ لن أسقط في الفتنة، ﴿أَنَدْعُو مِن دُونِ اللَّهِ مَا لَا يَنفَعُنَا وَلَا يَضُرُنَا وَنُرَدُّ عَلَى أَعْقَابِنَا بَعْدَ إِذْ هَدَانَا اللَّهُ كَالَّذِي اسْتَهْوَتْهُ الشَّيَاطِينُ﴾ [الأنفال: 71].
الذي ده، إن في نصر، صحابه وقعوا في الفتنة، ﴿كَالَّذِي اسْتَهْوَتْهُ الشَّيَاطِينُ فِي الْأَرْضِ﴾ [الأنفال: 71]. المشهد ده استهوته الشياطين في الأرض، كان بيحصل أحياناً عند العرب أن واحد يتجنن، كانوا يقولوا إن الجن خدت عقله، هيروح يعيش في الصحراء، فيقول لك استهوته الشياطين، الجن أوقعته في الهاوية. استهوته أي أوقعته في الهاوية أو جعلته يفعل كل ما يهوى، الشيطان يعني أو يهواه هو، أياً كان، كل التصرفات دي اتقالت في استهوته الشياطين.
الشاهد أن ده مشهد منتزع من العرب كان بيحصل، أن ممكن واحد من القبيلة ويبقى سيد في القبيلة وفجأة تلاقيه يتجنن ويسيب القبيلة ويهيم على وجهه ويعيش في الصحراء وفي الغابات، يتوحش، يقولوا عليه عايش مع الوحوش يعني ويسيب الناس. شوف ربنا شبه اللي بيبقى على طريق الحق ويضل باللي فقد عقله، باللي مشي ما بيسمعش كلام حد، عامل زي المجنون لا يفقه شيء ولا يسمع شيء، اللي بينتكس كده والعياذ بالله.
كان لازم وبعدين أصبح حيران؛ كلمة حيران ده تشخيص رائع من القرآن للي بيسمع للشبهات فعلاً، يقول لك: أنا ما عدتش عارف الحق مع مين، أنا ما عدتش عارف أسمع مين ولا مين، أشوف البرامج دي أصدق دول، أرجع أشوف دي أصدق دول. يا عم أنا لا هصدق دول ولا ده، يا عم أنا مش همشي مع أي حد. تقول له: طب وده؟ ربنا بيقول لك: أنا ما عدتش عارف القرآن ده مين بقى مين اللي هيفسر صح؟ ده النبي. أنا ما عدتش عارف إيه موضوع الأحاديث الصحيحة والضعيفة ده؟ هو خلاص بقى عنده شك في كل شيء، فأصبح حيران والعياذ بالله، ﴿حَيْرَانَ فِي الْأَرْضِ لَهُ أَصْحَابٌ﴾ [الأنفال: 71].
صحابه بقى المؤمنين مش عايزين يسيبوه، له أصحاب يدعونه إلى الهدى: ائتنا. طب الراجح أن اللي بيدعوه هنا الأصحاب دول مؤمنين. بعض المفسرين قال: له أصحاب مصممين، أصحاب شياطين تانيين بقى مصممين أنه ما يفضلش في مرحلة الحيران دي كمان؛ لأن هو يقول لك: لو فضل في مرحلة الحيران ممكن يرجع، لأ، أنا عايزه يوقن أن الباطل هو الصح، عايز أخذه معي تماماً، ويقعدوا يقولوا له إيه؟ مش أنت حيران؟ ده الهدى معنا، تعالي.
أصحاب يدعونه، يبقى كلمة ﴿لَهُ أَصْحَابٌ يَدْعُونَهُ إِلَى الْهُدَى ائْتِنَا﴾ تحتمل الاتنين: أما أن له أصحاب مؤمنون حقاً يدعونه إلى الهدى ائتنا ودعك من هذه الحيرة، وأن هدى الله هو الهدى. وطبعا يجي يقول لك: إيه الهدى بقى؟ تقوم أنت تقول له الأساسيات. اللي يجي لك حيران ما تكلموش في الفروع، خد بالك دي نقطة مهمة جداً في الدعوة.
اللي يجي لك حيران يقول لك: أنا ما أعرفش الجماعة الفلانية صح ولا غلط؟ قل له: سيبك من ده كله، تعال نرجع للأصول، أمرنا لنُسلم لرب العالمين وأن أقيموا الصلاة واتقوه وهو الذي إليه تحشرون. كلمه في الأساسية: هو الذي خلق السماوات والأرض بالحق، كلمه عن الله، عن توحيد الله، عن البعث، عن اليوم الآخر، عن الصلاة، عن التقوى، كلمه في الأصول ما تكلموش في الفروع، معي؟
ما تجاوبش على شبهة فرعية الأصل بتاعه مش متأصل عنده، أنت بتعمل إيه معي؟ يعني ما تجيش واحد أصلاً مش فاهم إيه فكرة السنة وإزاي وصلت لنا؟ وعمال يقول لك: أنا مش مصدق البخاري. فهمه أصلاً يعني إيه سنة.
عنده إشكالية في أحاديث أبو هريرة؛ إزاي أبو هريرة بيروي أحاديث كتير؟ قبل ما تردوا له وفهمه، يعني إيه السنة؟ وإزاي الله حفظ الدين؟ وإزاي إن القرآن نفسه ده اللي محفوظ من غير السنة كده هيفقد قيمته للناس والكلام العملي بتاعه؟ اشرح.
ده الأصول دي معي؛ ﴿قُلْ إِنَّ هُدَى اللَّهِ هُوَ الْهُدَى﴾ [البقرة: 120] أو ﴿لَهُ أَصْحَابٌ يَدْعُونَهُ إِلَى الْهُدَى﴾ [الأنعام: 71]. الثانية؛ قلنا يا إما تحتمل أن أهل الإيمان خايفين على صاحبهم اللي ضاعوا ومش عايزين يسيبوه، وعندهم فقه في الدعوة؛ لما راحوا يكلموه كلموه في إيه؟ الأصول. أو المعنى الثاني إن الحيران ده أهل الباطل مش هيسيبوه حيران، هيفضلوا وراه لغاية لما -والعياذ بالله- ينقلوه إنه يبقى مستقر في الباطل.
له أصحاب يدعونه ائتنا، ﴿قُلْ إِنَّ هُدَى اللَّهِ هُوَ الْهُدَى﴾ [الأنعام: 71]، وأمرنا لنسلم. المربعين نكمل بإذن الله عز وجل، نكتفي بهذا القدر، نكمل المرة القادمة. أنا بس إن شاء الله المرة القادمة واللي بعدها هيبقى ملغي إن شاء الله عشان احتمال أسافر العمرة بإذن الله عز وجل.
ادعوا لي كده بالتوفيق. فنتوقف الخميس القادم والخميس اللي بعده؛ هنتوقف أسبوعين إجازة نص السنة يعني، هناخد إجازة نص السنة ونكمل إن شاء الله. يعني الخميس اللي جاي ما فيش، الخميس اللي بعده ما فيش، الخميس اللي بعده بإذن الله عز وجل. نسأل الله عز وجل أن يتقبل منا وأن يوفقنا لفعل ما يحبه. جزاکم الله خيرا، سبحانك اللهم وبحمدك أشهد أن لا إله إلا أنت أستغفرك وأتوب إليك.