تفسير سورة الأنعام (5) | الآيات (32-39) | د. أحمد عبد المنعم

قد نعلم أنه ليحزنك الذي يقولون فإنهم لا يكذبونك ولكن الظالمين بآيات الله يجحدون. ولقد كذبت رسل من قبلك فصبروا على ما كذبوا وأوذوا حتى أتاهم نصرنا ولا مبدل لكلمات الله ولقد جاءك من نبأ المرسلين.

الآيات هنا بدأت بقول الله عز وجل: ﴿قَدْ نَعْلَمُ إِنَّهُ لَيَحْزُنُكَ الَّذِي يَقُولُونَ﴾ [الأنعام: 33]. بدأت الآية بحرف التوكيد الذي هو قد، لتؤكد أن الله عز وجل يعلم ما يدور في صدر النبي صلى الله عليه وسلم. ودي نقطة مهمة للدعاة؛ أن الداعية لما يستشعر أن الله عز وجل يعلم ما يدور في صدره علم معية، دائما العلم بيجي في القرآن، يعني إن الله كان بما تعملون بصيرا، علم عشان يديك ثقة وطمأنينة أن الله معك، إنني معكما أسمع وأرى، أو علم تهديد، واعلموا أن الله يعلم ما في أنفسكم فاحذروه. يبقى العلم أن ربنا سبحانه وتعالى يعلم ما في صدرك. فهنا ربنا بيطمئن النبي صلى الله عليه وسلم أنه يعلم ما يدور في صدره، ولقد آتينا إبراهيم رشدا من قبل وكنا به عالمين. الله عز وجل يعلم ما يدور في صدر النبي صلى الله عليه وسلم وأن هو بيحزن على هذا الكلام، فحرف التوكيد ده بيزود الطمأنينة.

النبي صلى الله عليه وسلم كان يحتاج أن يسمع هذه الكلمات يا جماعة. إحنا قلنا الآيات من أول بعد مقدمة الأنعام وبعد الآية الرابعة ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ إِلَّا كَانُواْ عَنْهَا مُعْرِضِينَ﴾ [الأنعام: 4]، فقلنا بتكلم قمة الإعراض عن آيات الله عز وجل. وماشي معنا السياق أن ناس بيطرح عليهم آيات فيعرضوا، وقلنا فيه صنفين: صنف في الأول طلب نزول آيات، وصنف تاني تظاهر بسماع الآيات؛ فصنف قال: أنا عايز آية حسية مش عاجبني آية القرآن، وصنف قال: ماشي أنا هشوف آية القرآن دي وأقيمها بنفسي، وتظاهر بأنه بيستمع للآيات. قلنا في الغالب لو قسمناهم التقسيمة ديت، إن الصنف اللي بيتظاهر بسماع الآيات دول مين؟ دول المتبوعين، دول الرؤساء، دول القادة اللي بيتظاهر بسماع الآية، إنما اللي بيطلب آيات حسية دول المتبوعين، دول الاتباع الضعفاء يعني. فهنا قمة الإعراض، فربنا بيقول للنبي صلى الله عليه وسلم: إني أعلم ما يحزنك وأعلم ما يدور في صدرك.

النبي صلى الله عليه وسلم بشر، والرسالة لم تخرجه عن البشرية، فاحتاج النبي صلى الله عليه وسلم إلى هذه الكلمات يسمعها من الله عز وجل. يعني النبي صلى الله عليه وسلم كان بيحتاج أن يسمع القرآن، فكل الآيات اللي في القرآن اللي نزلت على صدر النبي صلى الله عليه وسلم، ﴿وَإِنَّهُ لَتَنزِيلُ رَبِّ الْعَالَمِينَ * نَزَلَ بِهِ الرُّوحُ الْأَمِينُ * عَلَىٰ قَلْبِكَ لِتَكُونَ مِنَ الْمُنذِرِينَ﴾ [الشعراء: 192-194]. مش هيستطيع أنه يتحول من المنذرين إلا بنزول القرآن على قلبه، فنزول القرآن على قلب النبي صلى الله عليه وسلم كان بيعطيه قوة وثبات. ﴿وَقَالَ الَّذِينَ كَفَرُوا لَوْلَا نُزِّلَ عَلَيْهِ الْقُرْآنُ جُمْلَةً وَاحِدَةً ۚ كَذَلِكَ لِنُثَبِّتَ بِهِ فُؤَادَكَ﴾ [الفرقان: 32]. إذاً فؤاد النبي صلى الله عليه وسلم كان يحتاج إلى تثبيت من القرآن. طب النبي صلى الله عليه وسلم أتقى الخلق وأطهر الخلق صلى الله عليه وسلم وأقوى الخلق صلى الله عليه وسلم يحتاج إلى تثبيت من القرآن، أمَالَ إحنا بقى؟

الداعية اللي هيخوض معركة الإنذار للناس ويواجه إعراض الناس دون قرآن أكيد هيغلط؛ لأن القرآن بيجعل الإنسان عنده اتزان نفسي، الآيات ديت لما تنزل على صدر الداعية بتخليه إنسان عنده اتزان نفسي فيعرف يتصرف التصرف الصح. الإنسان لما يفقد الاتزان النفسي بتاعه يبدأ يضبش بقى، يخبط، يعمل أي حركة، ياخد قرارات خاطئة تحت الضغوطات، يوافق على اقتراحات تضيع له دينه، ممكن تحت الأذى والتعذيب تخليه ينطق مثلاً بعقائد ضالة. الاتزان النفسي اللي بيثبته القرآن بينزل للداعية بيعمل له اتزان نفسي، هذا الاتزان النفسي بيخلي الإنسان يحافظ على الشريعة الصافية كما هي. إذاً النبي صلى الله عليه وسلم في ظل قمة الإعراض ده كان بيحتاج أنه يسمع هذه الكلمات، فربنا بيقول له: قد نعلم أنه ليحزنك الذي يقولون.

إيه الذي يقولون ده؟ إيه الذي يقولون؟ إحنا معانا سياق السورة، نرجع نشوف هما قالوا إيه. لما تيجي تجيب من أول السورة لغاية كدة، لغاية الآية ديت، هتلاقي ثلاث أقوال للمشركين. لما تيجي تجمع من أول السورة، المشركين قالوا إيه؟ قالوا في الأول: وقالوا لولا أنزل عليه ملك، طلبوا آية، قلنا ده فريق مين؟ الاتباع الضعفاء. فريق المستكبرين قال حاجتين؛ الجملة الأولى اللي قالها ﴿وَمِنْهُم مَّن يَسْتَمِعُ إِلَيْكَ وَجَعَلْنَا عَلَىٰ قُلُوبِهِمْ أَكِنَّةً أَن يَفْقَهُوهُ وَفِي آذَانِهِمْ وَقْرًا وَإِن يَرَوْا كُلَّ آيَةٍ لَّا يُؤْمِنُوا بِهَا حَتَّىٰ إِذَا جَاءُوكَ يُجَادِلُونَكَ يَقُولُ الَّذِينَ كَفَرُوا إِنْ هَٰذَا إِلَّا أَسَاطِيرُ الْأَوَّلِينَ﴾ [الأنعام: 25]. يبقى القول الأول للضعفاء طلب الآيات الحسية، القول التاني للمتبوعين الرؤساء قالوا على القرآن أساطير الأولين. والقول التالت على احتمالية وقالوا ﴿وَإِنَّ هَٰذَا إِلَّا حَيَاتُنَا الدُّنْيَا وَمَا نَحْنُ بِمَبْعُوثِينَ﴾ [الأنعام: 29]. قلنا إن دي معطوفة على هيقولوا أساطير الأولين، وهيقولوا إن هي إلا حياتنا الدنيا. وقالوا: ﴿وَلَوْ رُدُّوا لَعَادُوا لِمَا نُهُوا عَنْهُ وَإِنَّهُمْ لَكَاذِبُونَ﴾ [الأنعام: 28]. القول التالت أنهم أنكروا البعث. دي الاقوال التي أحزنت النبي صلى الله عليه وسلم، حاصلها التكذيب به والتكذيب بالقرآن.

حاصل الأقوال دي أنهم مش مصدقين النبي صلى الله عليه وسلم، بيكذبوه؛ لأنهم قالوا له: إحنا مش مصدقينك. قال الذين كفروا: لولا أنزل عليه ملك في الأول، خليه ملك ينزل معك، أول تكذيب بالقرآن قالوا على القرآن: إن هذا إلا أساطير الأولين. الأقوال دي كانت تحزن النبي صلى الله عليه وسلم، ليه كانت تحزنه؟ إيه اللي يحزن؟ عشان نعرف دلوقتي الداعية يحزن على إيه؟ إيه اللي بيسبب حزن للداعية؟ هل في الأقوال ديت دلوقتي انتقاص من قدر النبي صلى الله عليه وسلم في الدنيا مثلاً؟ يبقى إذا الداعية لازم معايير حزنه تبقى منضبطة صح على معايير القرآن، ما يبقاش بيحزن لأشياء هي أصلاً المفروض ما تمثلهوش شيء. يقولوا يا سيدي اللي يقولوه، بيقولوا عليك كذا، بيقولوا عليك كذا، ما يعيرش لده اهتمام، إنما الداعية يهتم لتكذيب قومه، دي حاجة تحزنه، دي حاجة تأثر عليه، دي حاجة تخليه يتحرك، الداعية يحزن أنهم رافضين القرآن، دي حاجة مضايقاه.

بعضهم قال: الحزن هنا سببه افتراؤهم على الله عز وجل، هم بينتقصون من حق الله؛ من شدة تعظيم النبي صلى الله عليه وسلم لقدر الله عز وجل مش قادر يسمع انتقاصاً في حق الله، فيغضب ويحزن أنه يُنتقص من قدر الله. وبعضهم قال: يحزن النبي صلى الله عليه وسلم أن الأقوال دي اللي بيقولوها هيهلكوا، فيخاف عليهم، قد نعلم أنه ليحزنك الذي يقولون. النبي صلى الله عليه وسلم يعلم مآل هذه الأقوال ويعلم عاقبة هذه الأقوال، فيخاف أن إنتم لو استمررتم على القول ده هتضيعوا نفسكم، فحزين عليهم النبي صلى الله عليه وسلم. إذاً الداعية ما بيحزنش على انتقاص منه من كلام فيه في شخصه، في دنيته؛ لأ، هو يحزن على الناس.

والآيات اللي جاية ديت من أول هنا: ﴿وَإِن كَانَ كَبُرَ عَلَيْكَ إِعْرَاضُهُمْ فَإِنِ اسْتَطَعْتَ أَن تَبْتَغِي نَفَقًا فِي الْأَرْضِ أَوْ سُلَّمًا فِي السَّمَاءِ فَتَأْتِيَهُم بآيَةٍ﴾ [الأنعام: 35]، مدى حرص النبي صلى الله عليه وسلم على إسلام قومه صلى الله عليه وسلم. فعلا حريص عليكم، يعني النبي صلى الله عليه وسلم حريص لدرجة لو قدر أنه يطلع السما أو ينزل أرض عشان الناس تؤمن كان عملها. ﴿وَلَوْ أَنَّي لَوْ زِدْتُهُمْ عَلَى السَّبْعِينَ اسْتِغْفَارًا لَزِدْتُ﴾ المنافقين هزود لهم عن السبعين، النبي صلى الله عليه وسلم كان عنده استعداد يعمل أي شيء في حدود الشرع عشان قومه يؤمنوا، دي أهم صفة من صفات الداعية، شدة الحرص على الناس. الحرص ده لما يفقد وتبقى مجرد نقل معلومات للناس، مش هتتحمل أذاهم، مش هتعرف، لو مجرد أن أنت مقتنع بحاجة بتحبها وخلاص، ما عندكش الحرص ده على الناس، الحرص ده مش عريق فيك، حرص رهيب على الناس، ده لو مش متأصل فيك،هتبقى المعلومات اللي عندك عن الوحي مش كافية أنك أنت تعرف تواجه أذى الناس، مش هتستحمل، هتيجي تكلم الناس مع أول كلمتين دول قوم سايبهم: ماشي يا عم بلا وجع دماغ!

بيبقى عامل زي اللي دخل حريق ينقذ ناس عشان ما يولعوش فيها، وأنت بتشيله من شقة مثلاً محروقة، وأنت بتشيله فقعد يخبط يرفس فيه كدة وأنت بتشيله، قلت له: تصدق أنا غلطان أصلاً! أولع بقا خليك! أنا جاي أشيلك تقوم تخبط فيّ! فالطبيعي أغلب اللي هتيجي تنقذهم من النار، زي النبي ما بيقول: «وأنا آخذ بحجزكم عن النار»، أغلب اللي بيتهاوى على النار ده أما تيجي تشيله مش هيجي معك بسلاسة، هو بيتهاوى على نار زي الفراش كدة ما بيقذف نفسه على النور، وأعني أنك هتقابل بأذى، دي سنة زي ما ربنا قال للنبي صلى الله عليه وسلم: مش أنت الوحيد اللي كذبت، ومش أنت الوحيد اللي أذيت، دي سنة ماضية، قد نعلم أنه ليحزنك الذي يقولون فإنهم لا يكذبونك ولكن الظالمين بآيات الله يجحدون.

معنى الآية ديت يعني إيه؟ بعضهم قال؛ لأن ربنا بيقول للنبي صلى الله عليه وسلم المشكلة اللي بينهم مش المشكلة اللي بينهم وبينك مش معك، أمال المشكلة دي مع مين؟ المشكلة ديت مع آيات الله، فانهم لا يكذبونك ولكن الظالمين بآيات الله، يعني أنت لو تخليت عن آيات الله هترجع تاني الصادق الأمين. اللي خلاك وصفك يتغير عندهم من الصادق الأمين أن يقولوا عليك ساحر وشاعر ومجنون هي إي؟ أنك أنت تلبست بآيات الله وبقيت تدعو بآيات الله، فتغير وصفهم لك. فربنا بيقول للنبي صلى الله عليه وسلم: ما تحزنش هما مش بيقولوا عليك، هما عارفين أنك أنت ما بتكذبش، بدليل لحد آخر لحظة وهما رايحين يقتلوا النبي صلى الله عليه وسلم أو بيجتمعوا عشان يقتلوه، الهجرة يوم الهجرة كانوا سايبين الأمانات عند النبي صلى الله عليه وسلم، حاجة عجيبة جداً، يعني رايحين يقتلوه والأمانات بتاعتنا عندهم، يعني بيستفيدوا منه ورايحين إيه؟ فتجد أن أنه يعني لآخر لحظة هما مش مكذبينك، هي المشكلة مع إيه؟

وده خطر، أحياناً أنت تقوم أنت تعمل إيه بقا؟ تقوم على قدر ابتعادك عن آيات الله على قدر ما أنت بتقرب منهم، قول الله عز وجل: ﴿وَلَن تَرْضَىٰ عَنكَ الْيَهُودُ وَلَا النَّصَارَىٰ حَتَّىٰ تَتَّبِعَ مِلَّتَهُمْ﴾ [البقرة: 120]. يبقى الرضا بتاعهم، ولم ترضى، يعني كمال الرضا، هو بيفضل يرضى عنك على قدر ما أنت بتقرب، وده قول الله عز وجل: ﴿وَإِذًا لَّاتَّخَذُوكَ خَلِيلًا﴾ [الإسراء: 73]، هترجع هتصاحبهم، فلما يرضوا عنك ويتخذوك خليل اعرف أن أنت غيرت فين؟ في المنهج؛ لأن هما ما غيروش في المنهج، ما واحد فيكم غير، إنما فجأة بقيتوا أصحاب وقاعدين جنب بعض في حاجة غلط! يعني هو يقول الله عز وجل: ﴿وَلَتَجَدَنَّهُمْ أَحْرَصَ النَّاسِ عَلَىٰ حَيَاةٍ﴾ [البقرة: 96]، هو عنده منهج حرصه على الحياة ورفض التحاكم إلى الشرع، ده منهج عنده؛ لأن هو لو أنت لو وافق بالشرع يبقى هو كده بدأ يسلم خلاص، فطالما هو ثابت وأنت ثابت لا يمكن هتلتقي.

فأعرض عن من تولى عن ذكرنا سورة النجم ولم يرد إلا الحياة الدنيا، فالعلماء بيقولوا: ليه أعرض عنه؟ لأنه يستحيل أن تلتقي. ﴿وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا﴾ [الكهف: 28]. فهو صاحب منهج ثابت عليه، إرادة الحياة الدنيا هو ثابت، واضح، ثابت على ده ما بيغيروش، معنى أنه يرضى عنك ويتخذك خليل ويوافق على اللي أنت موافق عليه، يعني اللي أنت موافق عليه وهو موافق عليه، آه، يبقى هنا فيه إيه؟ أكيد فيه إشكالية! طبعاً أنتم فاهمين، أنا طبعاً أنتم فاهمين أنا قصدي على إيه، يعني أن هو يقول نعم للي أنت موافق عليه، لا يبقى إيه؟ يبقى أكيد فيه إشكالية.

المهم، نكتفي بهذا القدر، ولقد كذبت، فإنهم المعنى التاني اللي قالوه؛ المعنى الأولاني قالوا مشكلتهم -عشان ما نتلخبطش- المعنى أن مشكلتهم مش معك، مشكلتهم مع آيات الله. المعنى التاني قالوا: ليه ربنا بيقول له: فإنهم لا يكذبونك؟ ما تحزنش أن أنت بقى ما عدتش تتعب نفسك في طلب الآيات؛ لأن قضيتهم أن هو

يعلم أنها آيات الله، وهو مش بيقول عليه كذاب، وهو عارف إنك مش كذاب، وأنت بتتحدث عن الدار الآخرة. هو يعلم أنك لست بكذاب، ولكنه مجرد جاحد، فتبقى الآية دي شبيهة بآية النمل: ﴿وَجَحَدُوا بِهَا وَاسْتَيْقَنَتْهَا أَنْفُسُهُمْ ظُلْمًا وَعُلُوًّا﴾ [النمل: 14].

يبقى المعنى؛ إما الرسالة هنا اللي بتوصل للنبي صلى الله عليه وسلم، إما أن اللي خلاهم يغيروا رأيهم فيك آيات الله، فاحذر واوعى تسيبها، ده معنى. المعنى التاني أن مشكلتهم مش التكذيب أو عدم الاقتناع، دي مش مشكلتهم، فمش الحل أنك تزود لهم في الآيات الحسية، مش ده مش حل. لأن هو حقيقة يعلم أن آيات الله ولكنه إيه؟ يجحد. عشان كده ما قالش ولكن الظالمين بآياتي لا يكذبون، قال: ولكن الظالمين بآيات الله يجحدون. اللي بيجحد ده يعلم أنه حق ثم يجحد به تاني، وضحت؟

يبقى فيه معنيين بيوصلوا لنا من قول الله عز وجل: ﴿فَإِنَّهُمْ لَا يُكَذِّبُونَكَ وَلَكِنَّ الظَّالِمِينَ بِآيَاتِ اللَّهِ يَجْحَدُونَ﴾ [الأنعام: 33]. طيب بما أن أنا تعبت ووصلت لهم الآيات ورفضوا وأعرضوا عنها، وتريقوا واستهزأوا وسخروا، ومنهم صنف قال لي أنا عايز آية حسية، والصنف التاني عمل نفسه عمل نفسه بيسمع القرآن وفي الآخر قال لي: أساطير الأولين. فأنا حزنت على ده، أعمل إيه؟ أعمل إيه؟ فانا قدامي اختيار من اتنين، ما قداميش كداعية مع الناس اللي هتعمل معي كدا غير اختيارين؛ أما أن أنا اختصر الطريق اختصاراً وأقفز مراحل كثيرة جداً وأقول خلاص يا جماعة أنتم عايزين إيه؟ عايزين إيه؟ يقولوا له عايزين آية حسية. طيب أنا هجيب لكم آية حسية، بس لو ما آمنْتوش بها ينزل العذاب. كده أنا اختصرت مراحل كثيرة جداً جداً جداً، وتعجلت هلاك الأمة.

الحل التاني أن أنا أعمل إيه؟ أصبر، هعمل إيه؟ هفضل ثابت على المنهج، هفضل أدعو لغاية ما الكثرة هتقابلني بالتكذيب، شوية شوية ناس هتؤمن منهم، الشوية اللي هيؤمنوا دول هيبقوا عماد الدعوة ونصرة الدين، يبدأوا ينتشروا في الأرض وينشروا الدين لغاية لما الدين ينتشر. بس دي قصة طويلة قوي، يعني أنا قدامي اختيار من اتنين؛ اختيار سهل ومريح وسلس بس ممكن تبقى عاقبته هلاك ملايين مليانة من الناس، واختيار صعب وطويل وشاق على النفس ولكن ممكن عاقبته ألوف مؤلفة من الناس تدخل في دين الله أفواجاً.

يبقى أنا كداعية أحياناً كجبلة بشرية جوايا ببقى مايل تجاه الاختيار الإيه؟ اللي هو السريع ده. طب ما خلاص آية تنزل، لسه بقى هقول لهم ويعرضوا ونقعد تسعمائة وخمسين سنة ندعو إلى الله ويقابلونا بالتكذيب وقلة، لسه هنمشي؟ طب ما خلاص آية! أحياناً بعيداً بقى عن سياق الخطاب النبي صلى الله عليه وسلم لنا احنا كدعاة، أو مش احنا يعني الخطاب موجه للدعاة، قصدي أن أحياناً الداعية يتعجل نفسية إنه يزهق، يقول لو آية تحصل بقى وخلاص والناس تضطر الناس للإيمان، لكن ده تعجل عن السنة.

أمال إيه السنة؟ السنة يعني السنن الكونية الثابتة. إيه السنة؟ يقول الله عز وجل بيقر سنة للنبي صلى الله عليه وسلم وللدعاة: ﴿وَلَقَدْ كُذِّبَتْ رُسُلٌ مِنْ قَبْلِكَ﴾ [الأنعام: 34]. أنت مش يعني طبيعي أن أنت تكذب عشان الإنسان ما يجيش يقول إيه ده! ده أنا رحت كلمتهم فكذبوني، قل له طب إيه؟ طب ما أنا عارف دي، مش ده متوقع؟ ده السنة، الأصل أنهم أول ما يقابلوك يقابلوك بالتكذيب، ده الأصل في دعوة الرسل، وما آمن معه إلا قليل، ده الأصل من أول سيدنا نوح.

يبقى: ﴿وَلَقَدْ كُذِّبَتْ رُسُلٌ مِنْ قَبْلِكَ﴾ [الأنعام: 34]، دي بتعرفني كده أن مش معنى أنهم هيكذبوني أن أنا أبطّل دعوة، لأن أنا عارف من الأول أنا نازل وواخد العدة والعتاد وعارف أن أول ما سألقاه هو التكذيب، ثم السخرية ثم الإيذاء. أنا عارف ده، يعني أنا متوقع ده وعارفه. ﴿وَلَقَدْ كُذِّبَتْ رُسُلٌ مِنْ قَبْلِكَ فَصَبَرُوا عَلَى مَا كُذِّبُوا وَأُوذُوا﴾ [الأنعام: 34]. عملوا إيه؟ اختاروا الحل الإيه؟ الطويل، اختاروا الحل اللي فيه مجاهدة وفي صبر وتحمل أذى حتى يؤمن قومه، أو يؤمن إيه؟ من كتب الله عز وجل له الهداية من قومه.

اغفر لقومي فإنهم لا يعلمون، عل الله ده اختيار بقى النبي صلى الله عليه وسلم. عل الله إيه؟ أن يخرج من أصلابهم من يعبد الله عز وجل. يبقى النبي صلى الله عليه وسلم هنا في المواقف اللي زي دي، وجات له فرصة زيها، فرصة إيه؟ لما نزل ملك الجبال: «ولا شئت أطبق عليهم الأخشبين»، النبي صلى الله عليه وسلم ما اختارش الحل السريع، اختار الحل الإيه؟ اللي فيه صبر وتحمل مشقة وأذى.

﴿وَلَقَدْ كُذِّبَتْ رُسُلٌ مِنْ قَبْلِكَ فَصَبَرُوا عَلَى مَا كُذِّبُوا وَأُوذُوا﴾ [الأنعام: 34]. فصبروا على حاجتين: على ما كذبوا وأوذوا، يعني في ممكن تقول فصبروا على ما كذبوا يبقى كذبوا دي متعلقة الصبر ووجوده دي استئنافية وأوذُوا، حتى أتو نصرنا. أو صبروا على حاجتين حتى، يبقى حتى دي تبع صبره مش تبع أوذوا، يبقى معنى الآية فصبروا على التكذيب والإيذاء وظلوا صابرين متمسكين حتى أتاهم النصر. يبقى يا جماعة قبل الصبر على الإيذاء فيه حاجة اسمها الصبر على التكذيب، بل دي أشد على الداعية الحق. التكذيب أشد على نفسية الداعية، وهنا قدمت على الإيذاء أشد على نفسية، وإن كانت هي المرحلة الأولى تكذيب ثم إيذاء كزمنية بيحصل الأول يكذب وبعدين يؤذيك، لكن أشد على الداعية.

يعني لو هيؤذيك ويؤمن قد يكون أحب إلى الداعية. يعني لو هيؤذيك بس يؤمن، مش مشكلة، أنت ممكن تصبر، ولذلك غفر أحمد بن حنبل للمعتصم السياط اللي كان بيضربها له عشان قول الخلق بالقرآن، غفر له حقه بفتح ومعتصماه، لما راح فتح فغفر له أحمد بن حنبل دي طالما عمل خير، فقال أنا بتنازل وإن كان أصرّ طبعاً على قول الحق، ما قالش إن المعتصم كلامه حق في مسألة خلق القرآن. أنت أحياناً قد تصبر على الإيذاء ولكن لا تصبر على التكذيب. فصبروا على ما كذبوا وأوذوا، ما قدامكش حل إلا الصبر، أن أنت تختار هذا الطريق، دي سنة رسل قبلك.

قرأ تفيد التكثير رسل كتير، لا أنت لا أول ولا آخر واحد تكذب. فآية دي زي ما فيها تسلية للنبي صلى الله عليه وسلم، فيها برضو أن ما لكش عذراً أن أنت تتوقف أن أنت ماشي في طريق لست بدعا من الرسل. لا أنت لا أول ولا آخر واحد يكذب. يبقى أنت لما تروح تكلم ناس وتكذب، دي مش حاجة تخليك تتوقف، ده المتوقع. ﴿وَلَقَدْ كُذِّبَتْ﴾ وبردو بالتأكيد والتأكيد فيها أشد هنا أشد من قد نعلم، جت معها لام القسم لام وقد، ﴿وَلَقَدْ كُذِّبَتْ رُسُلٌ مِنْ قَبْلِكَ فَصَبَرُوا عَلَى مَا كُذِّبُوا وَأُوذُوا حَتَّى أَتَاهُمْ نَصْرُنَا﴾ [الأنعام: 34].

يبقى الداعية ما قداموش حل أنه يتعجل سنة ربنا. حتى إيه؟ أتاه نصرنا. النصر هو اللي جه، بمعنى الله عز وجل هو الذي يحدد موعد النصر، الله وحده سبحانه وتعالى لا يتدخل في ذلك لا نبي مرسل ولا ملك مقرب. الله عز وجل حتى النبي صلى الله عليه وسلم أكرم الخلق على الله ربنا بيقول له: ما قدامكش حل إلا أنك تصبر حتى يأتي موعد النصر. إمتى؟ دي بتاعة ربنا.

ازاي؟ لما كان لما راح النبي صلى الله عليه وسلم راح لأبي بكر عشان الهجرة قال له إيه؟ أو أُذن لك؟ هو عارف أن النبي صلى الله عليه وسلم يتحرك بالإيه؟ بالإذن. نقلة الهجرة دي عايزة إذن، الإذن جه أن احنا ننقل لمسألة الدولة، أن احنا ننتقل من المجموعة المؤمنة لإقامة الدولة المسلمة، الإذن جه وأعلم أن النبي صلى الله عليه وسلم يتحرك بإذن. فمواعيد النصر يحددها الله عز وجل مهما تعجلها المتعجلون.

وكنا اتكلمنا قبل كده من زمان من أول درسك تقريباً بعد رمضان في مسألة الخطر في التعامل مع وعود الله عز وجل، آه في ناس بتتعجل الوعود وتقعد تقول نصرك الذي وعدت، نصرك الذي وعدت، فيهزم فيشك في موعود الله. لكن هو تدخل، قلنا التدخل في وعود الله في الزمان وفي المكان وفي الكيفية يؤدي إلى سوء ظن بالله. كنا قاعدة خرجنا بها من الدرس ده: التدخل في وعود الله، سواء الزمان إمتى ينزل، أو المكان، أو الكيفية، ده ممكن يؤدي لو مش من واحد بقى عنده بصيرة جداً جداً وفقه واطلاع يعني، ممكن يؤدي إلى إيه؟ والأسلم ترك ذلك.

وقلنا المثل بتاع سيدنا أبو بكر لما ربنا قال: ﴿غُلِبَتِ الرُّومُ * فِي أَدْنَى الْأَرْضِ وَهُمْ مِنْ بَعْدِ غَلَبِهِمْ سَيَغْلِبُونَ * فِي بِضْعِ سِنِينَ﴾ [الروم: 2-4]. ربنا قال بضع، سيدنا أبو بكر قال ست سنين، تدخل في تحديد زمان. فلما عدوا الست سنين بعض المسلمين أساء الظن، قال لها إيه ده؟ إنما البضع من ثلاثة لتسعة، فانت ما تتدخلش لما ربنا يقول بضع سبها بضع، ما تتدخلش فيها.

حتى ربنا بيقول للنبي صلى الله عليه وسلم: ﴿وَلَا مُبَدِّلَ لِكَلِمَاتِ اللَّهِ﴾ [الأنعام: 34]. بعد السنة دي لازم تعرف أن لا مبدل لكلمات الله. يعني إيه لا مبدل لكلمات الله؟ لها معنى للمشركين ومعنى للدعاة. بالنسبة للمشركين: مهما فعلتم وبذلتم من مجهود لإيذاء الرسل وتقتيل المؤمنين وصد الناس عن سبيل الله، كلمات الله ستتم. قالوا هنا كلمات الله أي وعود الله، وعود الله بالنصر تأتي مهما كان ظواهر الأمر مختلفة عن الموعود.

بمعنى قول الله عز وجل المثل المشهور: ﴿سَيُهْزَمُ الْجَمَعُ وَيُوَلُّونَ الدُّبُرَ﴾ [القمر: 45]. سيدنا عمر بن الخطاب استغرب، جمع إيه ويولوا الدبر إيه وأنا عمالين نتضرب في مكة مستضعفين؟ فمهما كانت ظواهر الأحداث غير وعد الله اعرف أن وعد الله هو اللي هيأتي، فلا مبدل لكلمات الله بتزيد أهل الإيمان قوة وطمأنينة وتضعف شوكة المشركين وبتوصل لهم رسالة هاتوا آخركم.

﴿وَقُلْ لِلَّذِينَ لَا يُؤْمِنُونَ﴾ أخي هود: ﴿وَقُلْ لِلَّذِينَ لَا يُؤْمِنُونَ اعْمَلُوا عَلَى مَكَانَتِكُمْ إِنَّا عَامِلُونَ * وَانْتَظِرُوا إِنَّا مُنْتَظِرُونَ﴾ [هود: 121-122]. ﴿وَلِلَّهِ غَيْبُ السَّمَاوَاتِ وَالأَرْضِ وَإِلَيْهِ يُرْجَعُ الْأَمْرُ كُلُّهُ﴾ [هود: 123]. ربنا اللي عنده الأمر كله يحدد ويدبر بحكمته ولطفه سبحانه وتعالى متى ينزل الأمر. لأن طول سورة هود: حتى إذا جاء أمرنا، جاء أمرنا، جاء أمرنا، جاء أمرنا، طول السورة الأمر عمال يأتي، الأمر عمال يأتي؛ سواء الأمر بإهلاك قوم نوح، والامر بإهلاك قوم صالح، والامر طول السورة فيه إهلاك أمر يأتي.

في آخر السورة بقى المسلمين منتظرين الأمر بقى بتاعهم هييجي إمتى؟ إيه اللي هيحصل لقريش؟ وربنا بيقول: ﴿وَلِلَّهِ غَيْبُ السَّمَاوَاتِ وَالأَرْضِ﴾ [هود: 123] هو اللي يعلم له الغيب وده غيب، ﴿وَإِلَيْهِ يُرْجَعُ الْأَمْرُ كُلُّهُ﴾ [هود: 123]. طب أعمل إيه؟ ﴿فَاعْبُدْهُ وَتَوَكَّلْ عَلَيْهِ﴾ [هود: 123]. واوعى تفتكر أن في المرحلة دي ربنا غافل عنك، و... ﴿فَاعْبُدْهُ وَتَوَكَّلْ عَلَيْهِ وَمَا رَبُّكَ بِغَافِلٍ عَمَّا تَعْمَلُونَ﴾ [هود: 123].

أوعى تعتقد زي: ﴿وَلَقَدْ آتَيْنَا إِبْرَاهِيمَ رُشْدَهُ مِنْ قَبْلُ وَكُنَّا بِهِ عَالِمِينَ﴾ [الأنبياء: 51]، زي هنا: قد نعلم أنه ليحزنك الذي يقولون، خلاص؟

معنى الأول: لا مبدل لكلمات الله؛ مهما فعل أهل الباطل من إيذاء وتقتيل وتشريد وتعذيب لن يغيروا كلمات الله. لأن اللي غير كلمة واحد يبقى واحد أقوى منه، ما هو لو واحد خد قرار بقتل فلان أو بإعدام فلان أو بإسقاط فلان، هو خد قرار وقال كلمته وأعلن، عشان ييجي واحد تاني يغير كلمته ويبدلها لازم يبقى إيه؟ أقوى منه، يكسره عشان يغير كلمته، يا إما يكسر كلمته بالقوة، يا إما يجبره على تغيير كلمته.

لكن الملك سبحانه وتعالى هو العزيز لا يُغالب، أي لن يستطيع أحد أن يبدل كلمات الله. مسألة تبديل لا تبديل لكلمات الله، ﴿وَلَا مُبَدِّلَ لِكَلِمَاتِ اللَّهِ﴾ [الأنعام: 34] ﴿وَلَا تَجِدُ لِسُنَّةِ اللَّهِ تَبْدِيلًا﴾ [الأحزاب: 62] ﴿وَلَا تَجِدُ لِسُنَّةِ اللَّهِ تَحْوِيلًا﴾ [فاطر: 43]. دي ممكن إن شاء الله نكون برضو اتكلمنا عنها في مسألة الوعود، درس الوعود، وممكن يفرد لها مسألة سنن ربنا سبحانه وتعالى.

وكان العلماء اتكلموا في مسألة الفارق ما بين تبديل الكلمات وتحويل الكلمات، كمثل سريع يقول لك: تبديل كلمات الله أن ربنا لما يقول كلمة العذاب على قوم، دي كلمة، إنه يبدلها أن تتحول كلمة العذاب إلى كلمة نعيم، يعني اللي ربنا هينزل عليهم العذاب ما حدش يقدر يخلي العذاب ده إيه؟ نعيم. التحويل: أنه يحول هذا العذاب من هؤلاء إلى قوم آخرين، يعني لو ربنا قضى بالشقاء على بلد والعياذ بالله أنزل سخطه على بلد، لن يستطيع أحد كائناً ما كان أن يبدل هذه الكلمة ويحولها من سخط إلى نعيم. ولو اتبرعوا لها من كل الدنيا جابوا لها فلوس مش هتجيب نعيم برضه، أن القضية مش قضية فلوس.

أو التحويل: لا يستطيع أحد أن يحول هذه الكلمة، كلمة سخط دي يوديها بعيد، ما حدش يقدر يعمل كده إلا الله عز وجل. لذلك النبي صلى الله عليه وسلم لما كان في وباء في المدينة فدعا ربنا سبحانه وتعالى أنه يرفع الوباء من المدينة وينقله إلى الجحفة قريبة من المدينة، تحول الوباء من المدينة للجحفة، ده تحويل سنن ربنا لا تبدل ولا تحول ماشي؟ لا مبدل لكلماته.

والدليل على كده: ﴿وَلَقَدْ جَاءَكَ مِنْ نَبَإِ الْمُرْسَلِينَ﴾ [الأنعام: 34]. الدليل على إيه نبأ المرسلين ده؟ دليل على إيه؟ ده دليل على المنظومة كلها، دليل أن فلوسه الجو من قبلك وكذبوا وأوذوا وفي الآخر كان في النصر، ومهما عملوا ما غيروش النصر، وأن الرسل فضل. كل ده دليل على إيه؟ ﴿وَلَقَدْ جَاءَكَ مِنْ نَبَإِ الْمُرْسَلِينَ﴾ [الأنعام: 34].

احنا نسينا نقول حتة، احنا قلنا لا مبدل لكلمات الله بتحمل معنى للمشركين ومعنى للدعاة. بالنسبة للدعاة المعنى يعني إيه لا مبدل لكلمات الله؟ يعني لو أنت حاولت تختار الطريق القصير، أنت كده بتبدل كلمة الله في الأمة الخاتمة.

تاني الطريق القصير كان معناه إيه؟ معناه إن آية حسية ضخمة ما تأمنش يومين زي العذاب الاستئصالي. قضى الله عز وجل بكلمته: ﴿وَلَوْلَا كَلِمَةٌ سَبَقَتْ مِنْ رَبِّكَ لَقُضِيَ بَيْنَهُمْ﴾ [يونس: 19]. المعنى ده اتكرر كتير، ودايماً بييجي من بعد سيدنا موسى: ولولا كلمة سبقت من ربي لكان لزاماً وأجل مسمى، كتير بقى في يونس وفي آخر هود، والفطرة كتير جداً وفي حميم تلات أربع عمارات أو مرتين.

مسألة ولولا كلمة سبقت، كلمة الله اقتضت إن ما فيش عذاب استئصالي من بعد نزول التوراة؛ فلا مبدل لكلماته. يعني مهما تعجل الدعاة ما قدامهمش غير: ﴿وَصَبَرُوا عَلَى مَا كَذَبُوا وَأُوذُوا حَتَّى أَتَاهُمْ نَصْرُنَا﴾ [الأنعام: 34]. ما قدامهمش يعني أصبح الاختيارين اللي قدامك قال إيه؟ الاختيار واحد، لذلك بعد مقدمة: ﴿قَدْ نَعْلَمُ إِنَّهُ لَيَحْزُنُكَ الَّذِي يَقُولُونَ فَإِنَّهُمْ لَا يُكَذِّبُونَكَ وَلَكِنَّ الظَّالِمِينَ بِآيَاتِ اللَّهِ يَجْهَدُونَ﴾ [الأنعام: 33]، والآية اللي بعدها: ﴿وَلَقَدْ كُذِّبَتْ رُسُلٌ مِّن قَبْلِكَ﴾ [الأنعام: 34] اللي هي بتبين السنة. طب افرض أنت ما اقتنعتدش بده؟

عشان كده جت -وحاشاه صلى الله عليه وسلم إنه يعمل كده- عشان كده جت: وإن كان، إن دي شرطية بتفيد تقليل حدوث الفعل. يعني لما أَبْقَى أنا مثلاً مستني محمد إنه يجي، لو أنا واثق إن محمد جاي أقول إيه؟ إذا محمد جه قل له كذا. ولو أنا بنسبة تسعين في المية عارف إنه مش هيجي هقول لك إيه؟ إن جه يبقى قل له كذا.

يبقى بفرق ما بين أداة شرط إيه؟ ذواقيين، إذا لتكثير وإن للتقليل أو التشكك. فهنا جت مع النبي صلى الله عليه وسلم إيه؟ وإن كان كبر، لأن لأ مش هيحصل معاي كده. فعشان كده جت معاي بإيه؟ بإيه؟ ما قالش، وإذا كان كبر، قال له إيه؟ وإن، لو أنت ما اخترتش الحل الأولاني، ما قدامكش اختيار غير بقى إنك أنت إيه؟ تكسر السنن. هات لهم أنت آية بقى، ربنا مش هيغير السنة، ربنا مش هيغير سنته، اكسر أنت السنة، اتصرف أنت. وبما إن أنت مش هتعرف تكسر السنن، فما قدامكش حل تاني غير الآية؟ غير الصبر، لذلك اللي هيحاول يكسر السنن هيكون من الجاهلين، أي الجاهلين بسنة الله، عشان كده بيقولوا بعض المفسرين فلا تكونن من الجاهلين بسنة الله في عذاب قومك.

دي يا سونا: ﴿وَإِنْ كَانَ كَبُرَ عَلَيْكَ إِعْرَاضُهُمْ﴾ [الأنعام: 35]. اللي مش هيتفهم الآيتين: قد نعلم، ولقد كذبت، آية تلاتة وتلاتين وأربعة وتلاتين هيبقى كبر عليه أعراض قومه. معاي يا جماعة وصلت؟ اللي مش هيتشرف بمعاني الآيتين دول هيجي يدعو قومه هيقابلوه بالتكذيب، اللي مش المعاني دي مش مستقرة في صدره وفي عقله وفي كيانه وفي شعوره، هيجي يدخل لمسألة الإنذار هيفاجأ بتكذيب، هيقول لك إيه ده! أنا كبر علي أعراض قومي؟ كبر علي إيه؟ شق عليّ، مش قادر أكمل كده، مش هعرف أكمل بسنة: وصبروا على ما كذبوا وأوذوا حتى أتاهم نصرنا، مش هقدر أمشي في السكة دي، لا أنا كبر عليّ.

طب بما إن كابر عليك الإعراض هتعمل إيه يعني؟ هيبقى قدامك إنك تسيبهم وتمشي، فيتقال عليك: ﴿إِذْ أَبَقَ إِلَى الْفُلْكِ الْمَشْحُونِ﴾ [الصافات: 140] زي سيدنا يونس، أو إنك أنت تدعو بآية تنزل عليهم، ولو نزلت عليهم آية فعلاً يبقى أنت كده بتستعجل هلاكهم، أنت عارف إن هم معاندين أصلاً، لسه معاي؟ ﴿وَإِنْ كَانَ كَبُرَ عَلَيْكَ إِعْرَاضُهُمْ فَإِنِ اسْتَطَعْتَ أَنْ تَبْتَغِيَ نَفَقًا فِي الْأَرْضِ أَوْ سُلَّمًا فِي السَّمَاءِ فَتَاتِيَهُم بِآيَةٍ﴾ [الأنعام: 35] وتكملة البتاع: أيوه، لن تستطيع أو فافعل. وإن استطعت يعني تكملة جواب الشرط: وإن استطعت أن تبتغي نفقاً في الأرض أو سلماً في السماء فتأتيهم بآية، ولكنك لن تستطع.

زي ما ربنا بيقول: ﴿وَلَوْ شَاءَ اللَّهُ لَجَمَعَهُمْ عَلَى الْهُدَى فَلَا تَكُونَنَّ مِنَ الْجَاهِلِينَ﴾ [الأنعام: 35]. إن الله لو شاء لجمعهم على الهدى، فلا تكونن من الجاهلين إن فيه سنة اللي هي: رسل من قبلك كذبوا فصبروا على ما كذبوا وأوذوا حتى أتُوا النصر. اللي هيجهل الآيتين دول هيقع في اللي بعدها، دي قاعدة يا جماعة، لذلك اللي ما يبقاش عنده المعاني دي مترسخة قوي، وفي نفس الوقت حريص على إيمان قومه، أصلاً الآية دي بيقولوا دي من أكتر الآيات اللي بتبيّن مدى حرص النبي صلى الله عليه وسلم على قومه، أن لو كان في مقدوره وكلف شرعاً أن يأتي بسلم يطلع سلم في السماء أو نفق في الأرض عشان الهداية تنفعل.

أشوف شدة حرص النبي صلى الله عليه وسلم معقومه، وقلنا دي من مقومات الداعية، هي لو غابت منه هيفقد أهم ركن من أركان الداعية: الحرص على إيمان قومه، أهم ركن من أهم الأركان الدعوة: شدة الحرص على إيمان قومه. يبقى إذاً ربنا سبحانه وتعالى بيعرفك إن مشكلة الناس دي مش عدم اقتناع، لما أنت قرأت عليهم القرآن وعمل نفسه إنه بيستمع وقال: ﴿إِنْ هَذَا إِلَّا أَسَاطِيرُ الْأَوَّلِينَ﴾ [الأنعام: 25] طلعت مشكلته الحقيقية مش الاقتناع، وهو عمال يقول لك أنا مش مقتنع أنا عايز آية.

لو الداعية صدقوه هتعلاقي الدعاة دلوقتي مشغولين بنفق الأرض وسلم السماء، ودي مصيبة بقى، ماذا لو انشغل الدعاة إلى الله بنفق الأرض أو سلم السماء؟ تخيل لو الدعاة مركزين إن هم يعملوا حركات للناس عشان إيه؟ عشان يؤمنوا، إيه اللي هيحصل؟ هتلاقي الدعاة ملين يبعدوا عن آيات القرآن ويزودوا في الحركات، كل ما يزود في الحركات كل ما الناس ما تؤمنش، يقوم يعتقد إن المشكلة إن في الحركة اللي عملها ما كانتش كويسة، يقوم يزود.

قوم غصب عنه طول ما هو بيزود أعمال إيه؟ عمال يبتعد عن آيات القرآن، اللي هم ما أمنوش بها من الأول، ما هو ربنا قال له: ونقلب نفس السورة نقلب أفئدتهم وأبصارهم كما لم يؤمنوا به أول مرة. طالما ما آمنش بالقرآن أول مرة لو عملت له أي حاجة ربنا هيقلب له بصره في قلبه مش هيقبلها خلاص، ما عادش هيقبلها. فلو الداعية انشغل بنفق الأرض إنه يعمل حركات ويجيب آيات للناس، ويحاول يتفلسف ويحاول ويحاول يعمل لهم حركات زيادة بعيداً عن آيات، أنا مش بقول الجهد، جهد توصيل آيات القرآن وتبسيط آيات القرآن للناس ده مطلوب، يعني الوسائل الموضحة لآيات القرآن ده مطلوب، وأن احنا نجيب آخرنا فيه ده مطلوب، وعلى قد ما نعرف نبسط واستعمال كل الوسائل اللي بيكتشفها الإنسان لتبسيط الدين للناس ده مهم جداً.

لكن أنا بتكلم على الدعوة بعيداً عن آيات القرآن، ودي أحد معاني قول الله عز وجل في سورة الحج: ﴿وَمَا أَرْسَلْنَا مِنْ قَبْلِكَ مِنْ رَسُولٍ وَلَا نَبِيٍّ إِلَّا إِذَا تَمَنَّى أَلْقَى الشَّيطَانُ فِي أُمْنِيَّتِهِ﴾ [الحج: 52]. قيل: تمنى أي تمنى إيمان قومه. لما بيشتد إيمان قومه قوي قوي قوي ويحرص عليهم جداً جداً جداً، الشيطان يستغل الحتة دي يقول له إيه؟ آه، طب ما عشان إيمان قومك بلاش الآية دي تقيلة عليهم عشان يسمعوا كلامك، فتقول له آه فعلا بلاش الآية دي، امسح الآية، امسح إيه؟ الآية دي، شوية امسح امسح رقم مش عارف كام، امسح دي حاضر، امسح دي، امسح دي، امسح دي. أنت خد بالك أنت ما عملتش كده طلبا لدنيا، أنا مش بتكلم الوقتي عاللي عايز دنيا، ده ربنا بيقول: ﴿وَمَا أَرْسَلْنَا مِنْ قَبْلِكَ مِنْ رَسُولٍ وَلَا نَبِيٍّ﴾ [الحج: 52]. الشيطان دي بالنسبة له زي ما تكون بير واسع، الققى الشيطان في أمنيته، خد بالك من كلمة ألقى دي، يعني لقى حاجة واسعة يعرف يتدخل فيها.

أنا بكلمك على إنسان من شدة حرصه على قومه قد يغير في الشريعة، أيوه نعم، لذلك القرآن بيعمل توازن نفسي عند الداعية، بيعمل تربية نفسية عند الداعية: مسألة الإيمان هي بيد الله، ﴿إِنَّكَ لَا تَهْدِي مَنْ أَحْبَبْتَ﴾ [القصص: 56]. يعني ممكن آيات بقى كتير زي: ولو شاء الله لجمعنا وهدى، وما كان لنفس أن تؤمن إلا بإذن الله، أخّ يونس لكن واضحة في القصص أنك لا تهدي من أحببت، حتى أقرب الناس لك واللي دفاع عنك ما تقدرش، ولكن الله يهدي من يشاء. ده لما بترسخ في قلب الإنسان، عشان كده بعد الشوط بتاع وإن كان كبر، وإنما يستجيب الذين يسمعون، ربنا بعد كده تيجي لنا المرة الجاية إن شاء الله في قول الله عز وجل في آية ثمانية وأرربعين: ﴿وَمَا نُرْسِلُ الْمُرْسَلِينَ إِلَّا﴾ [الأنعام: 48] إيه وظيفة المرسلين؟ مبشرين ومنذرين، بس خلاص.

ثمانية وأربعين: وما نرسل المرسلين إلا إيه؟ دي وظيفتك، لو وظيفتك نفق في الأرض ولا سلم في السماء؟ وحتى بيقول لهم لما ييجي بعد كده وبعد ما بعد ما ربنا قال له: وما نرسل المرسلين إلا، قل وقل لهم كمان: أنا لا عندي خزائن الله ولا أعلم الغيب ولا أنا ملك ولا ولا، وأنا أول ما تسمعوا كلامي فجأة الحياة هتتقلب دهب، لا لا لأ، ولا في ميت يوم هحول لكم حياتكم كلها لنعيم ولا الكلام ده، أنا مرسل من الله عز وجل، مبشر ومنذر، لو عملتوا كذا الله هيديكم كذا، لو عملتم كذا الله هيعاقبكم بكذا، مش أنا. عشان كده جت هنا المرة دي بصيغة الحصر والقصر: ﴿وَمَا نُرْسِلُ الْمُرْسَلِينَ إِلَّا مُبَشِّرِينَ وَمُنْذِرِينَ﴾ [الأنعام: 48]. فيه بقى فمن آمن، وفيه بقى الكافر، خلاص؟

﴿وَإِنْ كَانَ كَبُرَ عَلَيْكَ إِعْرَاضُهُمْ فَإِنِ اسْتَطَعْتَ أَنْ تَبْتَغِيَ نَفَقًا فِي الْأَرْضِ أَوْ سُلَّمًا فِي السَّمَاءِ فَتَاتِيَهُم بِآيَةٍ وَلَوْ شَاءَ اللَّهُ لَجَمَعَهُمْ عَلَى الْهُدَى فَلَا تَكُونَنَّ مِنَ الْجَاهِلِينَ﴾ [الأنعام: 35]. بعضهم قال، أغلب العلماء، إن الجاهلين هنا اللي هو الجهل اللي ضد العلم. عندنا الجهل بيحمل معنى من اتنين: إما جهل ضد علم أو الجهل اللي ضد... لأ، ما هو ده اللي ضد العلم، حلو. الحلم الجهل اللي ضد الحلم يقول له تجاهلت القدر، قعدت تفور وتغلي، تحلمت يعني مهما اتولى عليها ما بتتهزش. ففي جهل ضد الحلم وفي جهل ضد العلم.

أغلب المفسرين قال: فلا تكونن من الجاهلين اللي ضد العلم، يعني أوعى تكون من أوعى، وده ما فيش فيه تنقيص من لأن النبي صلى الله عليه وسلم كان يعلم ذلك، والآية بدأت بإيه؟ وإن كان. فربنا بيقول للي هيمشي في الطريق ده أنت كده جاهل، وبما إن النبي صلى الله عليه وسلم ما مشاش في الطريق ده واختار طريق الصبر اللي هو الطريق الطويل، اختاره فالنبي صلى الله عليه وسلم ما خطبش بهذه الآية. خلاص، عدم فهم سنن ربنا في الإيمان والكفر من والاستجابة للآيات دي جت مرتين إن ربنا خاطب النبي صلى الله عليه وسلم هنا وسيدنا هناك: ﴿إِنِّي أَعِظُكَ أَنْ تَكُونَ﴾ [هود: 46] وهنا: ﴿فَلَا تَكُونَنَّ مِنَ الْجَاهِلِينَ﴾ [الأنعام: 35]. هناك كان معتقد أن ابنه من أهله، بأنه ليس من أهلك بمعنى من أهله اللي كتب لهم النجاة، مش مجرد إنه ابنه لكنه ينجو لأ. وهنا مش مجرد أن الآيات الحسية تخليهم يؤمنوا لأ، فدي نقطة خطيرة لازم الإنسان يفهم.

أو الجهل يبقى معدوم قال: الجهل ضد العين أو الجهل ضد الحلم، أي فلا تكونن من الجاهلين، يعني ما تخليش أعراضهم يكبر عليك، بداية الآية: ﴿وَإِنْ كَانَ كَبُرَ﴾، فأنت من الأول ما تخليش الموضوع تقيل على صدرك عشان ما توصلش للمرحلة دي، يعني أحلم عليهم واصبر عليهم، فلا تكونن من... القاعدة بقى: عشان بدل ما تطلع السما وتنزل الأرض وتتعب وتطلع تعمل وتجيب آيات في القرآن، ما تتحملش إعجاز علمي على حد التعبير المعاصر، وتلبسها اكتشاف معاصر عشان تخليها يؤمن وتغير في الآيات وتجيب حديث منكر موضوع بس عشان فيه حتة حلوة تعجبهم، تقول له أنت عمال تتنطط عشان بس هو من شدة حرصك على الناس.

لذلك لو شبّهنا الدين مثلاً كأنه قصر له أبواب، المثل ده من أكتر الأمثلة اللي سمعتها في يعني في بداية التزامي وفرقت معي في فهم مسألة أن في ناس بتتشدد وفي ناس بتتساهل، والدين الحق وسط. لو قلنا الدين ده عامل زي القصر، واحنا وفيه ناس برة ونفسنا ندخلهم القصر ده، عايزين ندخلهم الدين. فالقصر ده له أبواب، سيد القصر أمر إن فيه أبواب تظل مفتوحة، وأمر إن فيه أبواب تظل مغلقة سيد هذا القاصر. فانا من شدة حرصي على ناس إن هم يخشوا: افتح، افتح، افتح. فواحد قال له: لأ الباب ده مقفول، تقول له يا عم إيه افتح بس وخش وبعدين مش مهم. أو فيه واحد تاني: اقفل، اقفل، اقفل. ليه يا عم؟ ما هو اصل كده الناس كلها هتخش، مش أي حد يخش.

ففي ناس بتزود في مسألة سد الذرائع قوي وتتشدد وتقفل أبواب لم يأمر الله عز وجل بإغلاقه، هي من المباح. تيجي واحد جاب وسيلة لنشر دين معين يقول لك لأ، ليه يا عم الوسيلة مباحة؟ لأ اصل دي ممكن كذا وكذا وكذا. طيب ما هو ما فيش دليل شرعي أن دي فعلاً هتبقى ذريعة، ماشي، احنا عندنا حاجة اسمها سد الذرائع، بس دي مش ذريعة لكذب، لأ اقفل وخلاص. يعني بيتعامل أن الوسائل الدعوية توقيفية، توقيفية يعني لازم لأ، الوسائل مش توقيفية. الوسائل لازم تبقى شرعية، بس مش لازم تبقى اتعملت، يعني أنا لو عايز اعمل عرض مثلاً باوربوينت كويس وأعرضه للناس ما فيش مشكلة، أنا عايز اعمل وسيلة جديدة لنشر للدعوة مثلاً على رأي واحد، نعمل مطويات مثلاً للبنات المتبرجات، بس مطوية تبقى مفخخة تفتح تنفجر فيها مثلاً. فدي وسيلة إيه؟ دعوية مثلاً ولا إيه رأيكم؟ فايه فايه مش عايزين نتشدد ونقفل الأبواب لم يأمر الله عز وجل بإغلاقها، ومش عايزين نتساهل ونفتح أبواب.

أمر الله عز وجل بإغراقه، فانت من الأول لازم تبقى وسط. فربنا بيديك القاعدة بقى عشان ما تكونش من الجاهلين: ﴿إِنَّمَا يَسْتَجِيبُ الَّذِينَ يَسْمَعُونَ﴾ [الأنعام: 36]. اعرف بقى ملخص الموضوع كله؛ انك انت هتقعد تكلمهم كده كده مش هيسمع لك، مش هيؤمن بك إلا اللي هيسمع بجد مش اللي بيمثل، لأن ربنا قال: ﴿وَمِنْهُم مَّن يَسْتَمِعُ إِلَيْكَ﴾ [الأنعام: 25]. لكن ربنا قال: ﴿وَجَعَلْنَا عَلَى قُلُوبِهِمْ أَكِنَّةً أَن يَفْقَهُوهُ وَفِي آذَانِهِمْ وَقْرًا وَإِن يَرَوْا كُلَّ آيَةٍ لَّا يُؤْمِنُوا بِهَا حَتَّىٰ إِذَا جَاءُوكَ يُجَادِلُونَ﴾ [الأنعام: 25]. قلنا ده كان جاي يجادل، مش جاي يسمع بجد؛ لكن ده ﴿إِنَّمَا يَسْتَجِيبُ الَّذِينَ يَسْمَعُونَ﴾. الباحثون عن الحق يوفقهم الله عز وجل للحق. المعنى ده مطرد في القرآن بكثرة.

يعني ايه؟ ﴿يَسْأَلُونَكَ عَنِ السَّاعَةِ أَيَّانَ مُرْسَاهَا * فِيمَ أَنتَ مِن ذِكْرَاهَا * إِلَىٰ رَبِّكَ مُنتَهَاهَا * إِنَّمَا أَنتَ مُنذِرُ مَن يَخْشَاهَا﴾ [النازعات: 42-45]. سيذكر من يخشى. دي كتير جدا انك أنت بتنذر اللي بيخاف. هنا في نفس السورة: انذر به، أي بالقرآن، مين؟ ﴿الَّذِينَ يَخَافُونَ أَن يُحْشَرُوا إِلَىٰ رَبِّهِمْ﴾ [الأنعام: 51]. يعني طول ما هي ماشية في القرآن: والذين يؤمنون بالآخرة يؤمنون به وهم على صلاتهم يحافظون، برضو معانا في السورة. يبقى الذين لا يؤمنون بالآخرة هو اللي مش هو اللي مش هيؤمن أصلاً. في مسألة الخوف من الدار الآخرة فيؤدي إلى إنصات عشان ينجو، ده اللي ده اللي ايه؟ هيصل إلى الحق. ﴿إِنَّمَا يَسْتَجِيبُ الَّذِينَ يَسْمَعُونَ﴾.

طب اللي مش هيسمع؟ اللي مش هيبحث عن الحق ده، ربنا سماله ايه؟ ميت. ده كأنك يعني تخيل لو انت جبت سلم في السماء ونفق في الأرض وبتوريه لواحد ايه؟ خلاص مش هيستفاد منه، مش هيستفاد. لو انت عملت له ايه مش هيستفاد، هو ميت أصلاً. مهما وريته هو ميت، ميت يعني المستقبلات الحسية بتاعته ماتت فما عادتش بتأثر فيه. يعني لما تبقى المستقبلات الحسية بتاعت الأيد ماتت تحط عليها حاجة سخنة ما بتحسش، تحط عليها حاجة ساقعة ما بتحسش. مهما غيرت في الآية اللي بتحطها على قلبه ما عدش بيحس. المستقبلات الحسية بتاعت قلبه، كلا لما قال: إذا تتلى عليه آياتنا قال ليه؟ قال ده الآيات دي تهز جبل، ليه الآيات لما بتنزل على قلبه ما بتهزش؟ ﴿وَإِذَا تُتْلَىٰ عَلَيْهِ آيَاتُنَا قَالَ أَسَاطِيرُ الْأَوَّلِينَ * كَلَّا ۖ بَلْ﴾ [المطففين: 13-14]. ران. المستقبلات ماتت، بقى في جدار عازل كده. ﴿كَلَّا ۖ بَلْ رَانَ عَلَىٰ قُلُوبِهِم مَّا كَانُوا يَكْسِبُونَ﴾ [المطففين: 14]. اللي كانوا بيكسبوه من الشهوات والمعاصي عمل جدار فلاشي. آيات القرآن تنزل ما تأثرش فيه.

فأصبح ميت، والموتى عكس الذين يسمعون. احنا قلنا أول جريمة إنه ما بيسمعش. ﴿وَقَالُوا لَوْ كُنَّا نَسْمَعُ أَوْ نَعْقِلُ مَا كُنَّا فِي أَصْحَابِ السَّعِيرِ﴾ [الملك: 10]. ﴿إِنَّمَا يَسْتَجِيبُ الَّذِينَ يَسْمَعُونَ وَالْمَوْتَىٰ يَبْعَثُهُمُ اللَّهُ ثُمَّ إِلَيْهِ يُرْجَعُونَ﴾ [الأنعام: 36]. الآية دي بقى الجمال اللي فيها إن هي مسابة تحتمل كذا معنى. هل المعنى: إنما يستجيب الذين يسمعون، والموتى اللي يعني ما قبلوش الشرع فأصبحوا ميتين، يبعثهم الله؟ أن الله قادر على هدايتهم، وأن هدايتهم عاملة زي البعث. واضح ده معنى؟ يعني كأن ربنا بيقول للنبي صلى الله عليه وسلم: الناس اللي ما أثرش فيها القرآن دي ميتة، والحل معهم البعث، والبعث لا يكون إلا بيد الله مش معك، فمش حل دول عندك. لذلك أحد معاني قول الله عز وجل في سورة الرعد: ﴿وَيَقُولُ الَّذِينَ كَفَرُوا لَوْلَا أُنزِلَ عَلَيْهِ آيَةٌ مِّن رَّبِّهِ ۗ إِنَّمَا أَنتَ مُنذِرٌ وَلِكُلِّ قَوْمٍ هَادٍ﴾ [الرعد: 7]. قل هو الله، أي أنت منذر، ولكن الله هو الذي يهدي من يشاء، زي ما هيجيلنا دلوقتي إذا كملنا يعني: ﴿مَن يَشِئِ اللَّهُ يُضْلِلْهُ وَمَن يَشَأْ يَجْعَلْهُ عَلَىٰ صِرَاطٍ مُّسْتَقِيمٍ﴾ [الأنعام: 39]، دي بتاعت ربنا.

يبقى: ﴿وَالْمَوْتَىٰ يَبْعَثُهُمُ اللَّهُ﴾، قيل: الموتى أي الذين لا يسمعون القرآن. يبعثهم الله: الله قادر على هدايتهم، وبعد ما يهديهم يرجعوا له بقى. وقيل: الموتى يبعثهم الله، يعني الموتى اللي ما رضوش يسمعوا القرآن هيظلوا موتى إلى أن يموتوا ومش هيفوقوا غير بالبعث. كده واضح؟ يعني المعنى التاني معناه إن فيه ناس هيظل مختوم على قلوبهم إلى الموت، يبقى معنى الآية التاني: والموتى أي والذين لا يسمعون القرآن هم كالموتى، وهؤلاء سيظلون سيظلون موتى لا يتأثرون بالقرآن إلى أن يموتوا، ثم يبعثهم الله فيقنوا أنه الحق. هيفضل مكذب لغاية لما يبعث، معي؟ ﴿وَالْمَوْتَىٰ يَبْعَثُهُمُ اللَّهُ ثُمَّ إِلَيْهِ يُرْجَعُونَ﴾ [الأنعام: 36]. احنا كده بقى لنا كم دقيقة؟ خمسين. نكمل. نكمل يا شباب نكمل. الساعة طب ما تيجي ساعة طيب، والموتى يبعثهم الله ثم إليه يرجعون، ﴿وَقَالُوا لَوْلَا نُزِّلَ عَلَيْهِ آيَةٌ مِّن رَّبِّهِ﴾ [الأنعام: 37]. تاني بعد كل ده، أنا بقرا الآية دي موقعها عجيب جدا، يعني أنا حاسس إن بعد كلمة وقول الواو دي، وبعد كل هذا يقولون: ﴿لَوْلَا نُزِّلَ عَلَيْهِ آيَةٌ مِّن رَّبِّهِ﴾. انتم ما بتفهموش؟ من أول السورة.

مع أن أول مع أن أول آية بعد المقدمة بعد تلات آيات: ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ إِلَّا كَانُوا عَنْهَا مُعْرِضِينَ﴾ [الأنعام: 4]. وقالوا عايزين آية، قلنا لهم روحوا شوفوا الآيات الحسية؛ الناس اللي ماتت: ﴿أَلَمْ يَرَوْا كَمْ أَهْلَكْنَا قَبْلُم مِّن قَرْنٍ مَّكَّنَّاهُمْ فِي الْأَرْضِ مَا لَمْ نُمَكِّن لَّكُمْ وَأَرْسَلْنَا السَّمَاءَ عَلَيْهِم مِّدْرَارًا وَجَعَلْنَا الْأَنْهَارَ تَجْرِي مِن تَحْتِهِمْ فَأَهْلَكْنَاهُم بِذُنُوبِهِمْ﴾ [الأنعام: 6]. ما فيش فايدة، عايزين كتاب: ﴿وَلَوْ نَزَلْنَا عَلَيْكَ كِتَابًا فِي قِرْطَاسٍ فَلَمَسُوهُ بِأَيْدِيهِمْ لَقَالَ الَّذِينَ كَفَرُوا إِنْ هَٰذَا إِلَّا سِحْرٌ مُّبِينٌ﴾ [الأنعام: 7]. طب ملك؟ الملك مش هينفع، ليه مش هينفع؟ لأن لو جعلناه ملكا، لأن لو نزلنا ملك زي ما هو وسبناه زي ما هو لقضي الأمر ثم لا ينظرون. ولو خلينا الملك بشر وجعلناه ملكا لجعلناه بشرا ولبسنا عليهم ما يلبسون. مش هتصدقوه ما انتم ما صدقتوش البشر، هتصدقوا الملك اللي في صورة بشر؟ بعد ده كله طلبوا آية، فموقع الآية دي عجيب، لذلك العلماء وقفوا عند: هل ده شوط جديد؟ يعني هل ده نقاش مع ناس تانيين؟ ولا...

كده بقى عندنا صنفين؛ صنف بيقول: ماشي أنا مصدق القرآن، وهو الآية، فيروح يستمع للقرآن فيقول عليه: أساطير الأولين. وهو من الأول لا بيطلب آية ولا حاجة، هو عايز يطلع أن القرآن أساطير الأولين. ليه؟ لأنه يعلم أن القرآن حق. وصنف هو أساسا معرض، لا سمع قرآن ولا حاجة، فهو مش عارف لا القرآن حق ولا حاجة، هو أهم حاجة مش عايز يغير الأوضاع اللي هو فيها. فاحنا عندنا كده صنفين من الناس؛ صنف السادة المتبوعون القادة، دول بيفكروا وفاهمين زي أبو جهل، دول فاهمين عارفين أن القرآن حق، وعارفين أن النبي صلى الله عليه وسلم صادق. عشان كده بعض المفسرين قال في قول الله عز وجل: ﴿فَإِنَّهُمْ لَا يُكَذِّبُونَكَ وَلَٰكِنَّ الظَّالِمِينَ بِآيَاتِ اللَّهِ يَجْحَدُونَ﴾ [الأنعام: 33]. قال دول القادة المتبوعون، دول مش الأتباع، الأتباع مش بيجحدوا بايات الله، الأتباع ما بيسمعوش آيات الله أصلاً، معرضين. أنما القادة كان بيروح ويسمع، الوليد بن المغيرة وأبو جهل كانوا بيسمعوا وعارفين، فده كان جاحدا.

لذلك لما نجيء اللي قال كده برضه بيقول ايه؟ أما تيجي تسقط الآيات دي على الواقع، مش كل الغرب الآن الكافر يعلم أن ده حق وبيشهد؟ لا، منهم المعرض الشهواني أصلاً، ومنهم اللي عارف وبينكر، معي كده؟ طيب، فبعض الناس قالوا: ﴿وَقَالُوا لَوْلَا نُزِّلَ عَلَيْهِ آيَةٌ مِّن رَّبِّهِ﴾. حاجة من اتنين، أما أن الشبهة دي كانوا كل شويه يكرروها، فالرد كان بتنوع عليهم، لما قالوا: لولا انزل عليه ملك؟ كان فيه شوط من الردود لغاية: ﴿قُلْ أَيُّ شَيْءٍ أَكْبَرُ شَهَادَةً ۖ قُلِ اللَّهُ ۖ شَهِيدٌ بَيْنِي وَبَيْنَكُمْ ۚ وَأُوحِيَ إِلَيَّ هَٰذَا الْقُرْآنُ لِأُنذِرَكُم بِه﴾ [الأنعام: 19]. لو عايزين آية بقى أنا ما معييش غير القرآن. وبعضهم قال: لا، ده هناك حددوا الآية؛ كتاب في قرطاس أو ملك، هنا قالوا ايه؟ طب يا عم بص، احنا هنتساهل معك، هات لنا بقى أي آية وخلاص. ﴿وَقَالُوا لَوْلَا نُزِّلَ عَلَيْهِ آيَةٌ مِّن رَّبِّهِ﴾، ده ايه؟ كأنه يعني بيتناقش بقى نقاش موضوعي: خلاص أنا يا عم أنا لا عايز كتاب في قرطاس ولا عايز ملك، هات لنا أي آية.

هنا الرد كان مختلف عن الرد اللي ايه؟ اللي اللي فات. ناقشناهم في الآية المعينة اللي طلبوها؛ هناك طلبوا آية معينة وهي أن ينزل ملك، فناقشناهم في فكرة نزول الملك، وقلنا: نزول الملك ده حاجة من اتنين، يا ينزل زي ما هو يا ينزل يبقى، فناقشنا مقالات كل اختيار من دول. هنا طلب آية، فردينا كرد عمومي: ﴿قُلْ إِنَّ اللَّهَ قَادِرٌ عَلَىٰ أَن يُنَزِّلَ آيَةً وَلَٰكِنَّ أَكْثَرَهُمْ لَا يَعْلَمُونَ﴾ [الأنعام: 37]. أي آية ربنا قادر ينزلها ولكن أكثرهم لا يعلمون. ولو عايزين مجرد آية؛ الحيوانات من حواليكم كلها آية، والطيور كل آية، كل حاجة حواليك آية: ﴿وَمَا من دَابَّةٍ فِي الْأَرْضِ وَلَا طَائِرٍ يَطِيرُ بِجَنَاحَيْهِ إِلَّا أُمَمٌ أَمْثَالُكُم ۚ مَّا فَرَّطْنَا فِي الْكِتَابِ مِن شَيْءٍ﴾ [الأنعام: 38]. وفي أنفسكم أفلا تبصرون؟ كل اللي حواليك آيات، عايز آية على ايه؟ آية على البعث؟ هو اللي خلق كل ده مش قادر أنه يخلق مثلهم ويبعث مرة أخرى؟

ولو قلنا السياق كده إن هو طب هات لنا أي آية، فقال لهم الرد بتاع أوامر من ذهب آية 38 ردت بحاجتين: عندكم الآيات الكونية مغرقة الدنيا: ﴿وَمَا مِن دَابَّةٍ فِي الْأَرْضِ وَلَا طَائِرٍ يَطِيرُ بِجَنَاحَيْهِ إِلَّا أُمَمٌ أَمْثَالُكُم ۚ مَّا فَرَّطْنَا فِي الْكِتَابِ مِن شَيْءٍ﴾. المفسرين اختلفوا؛ أما الكتاب هنا القرآن، أو الكتاب معناه اللوح المحفوظ. اللي قال: كتاب القرآن، قال: يبقى كده آية 38 ردت الرد المفحم إن أنتم عندكم آيتين كبار؛ كتاب الله المنظور، وكتاب الله آيات الله الكونية وآيات الله التشريعية. عندكم الكون من حواليكم، وعندكم القرآن؛ تتدبروا في الكون وتتدبروا في القرآن هتجدوا ملايين وما لا يحصى من الآيات. مش انت عايز آية واحدة؟ انت لو بصيت في أي طير فوقك وفي أي دابة وفي أي حاجة حواليك فيها آيات، ولو بصيت في القرآن: ﴿مَّا فَرَّطْنَا فِي الْكِتَابِ مِن شَيْءٍ﴾ أي ما فرطنا في الكتاب من شيء أن يدل على الهداية.

فهنا مش شايف لما واحد يقول ايه: ما فرطنا في الكتاب، الكتاب المقصود به القرآن، يقوم يستدل بالآية دي أن القرآن فيه كل حاجة، يقوم واحد يقول له ايه طب يعني مثلاً الفروع الفقهية فين؟ في القرآن؟ طب الحاجات الدنيوية فين؟ طب تفاصيل المسائل طب علوم الحسابات والرياضة فين؟ بعضهم قال: موجودة كإشارات من أين نأتي بها؟ يعني زي ما ربنا قال: ﴿فَاسْأَلُوا أَهْلَ الذِّكْرِ إِن كُنتُمْ لَا تَعْلَمُونَ﴾ [النحل: 43]. ده يعرفك أن أي حاجة تاخدها من ايه؟ من أهل الذكر، فأهل الحسابات وأهل الرياضة دول بتاخدها، وفيها أطيعوا الله وأطيعوا الرسول وفيها اتباع السنة، فكل الفروع الفقهية اللي موجودة في السنة، القرآن فيه الأصول العامة في بعض الفروع. وجمع قال: لأ، ﴿مَّا فَرَّطْنَا فِي الْكِتَابِ مِن شَيْءٍ﴾ دي آية واحدة بتكلم إن الكون من حوالينا كله مليان آيات، وكل هذه الآيات سطرها الله عز وجل في اللوح المحفوظ، فكل حاجة هتكتشفوها وهتعرفوها هي أصلاً مسطرة في الايه؟ في اللوح المحفوظ، يعلمها الله عز وجل: ﴿وَمَا تَسْقُطُ مِن وَرَقَةٍ إِلَّا يَعْلَمُهَا وَلَا حَبَّةٍ فِي ظُلُمَاتِ الْأَرْضِ وَلَا رَطْبٍ وَلَا يَابِسٍ إِلَّا فِي كِتَابٍ مُّبِينٍ﴾ [الأنعام: 59].

يبقى اللي قاله معنى: ﴿وَقَالُوا لَوْلَا نُزِّلَ عَلَيْهِ آيَةٌ مِّن رَّبِّهِ﴾ هات لنا أي آية، فربنا قال لهم: لو على مسألة الآية الحسية ربنا قادر على أنه ينزل آية حسية، بس انتم اللي جهلة، وانتم جهلة ليه؟ لأن انتم ما بتتدبروش في الكون من حواليكم، ولم تتدبروا في القرآن، معي؟

العجيب هنا وده حاجة أنا لسه عايزة تأمل أن لما المرة الأولانية لما قالوا: لولا انزل عليه، لولا أنزل عليه ملك، هنا: ﴿لَوْلَا نُزِّلَ عَلَيْهِ آيَةٌ مِّن رَّبِّهِ﴾ دول بيجي بعدهم نقاش، يعني هيحصل الوقتي نقاش طويل: ﴿قُلْ أَرَأَيْتَكُمْ إِن أَتَاكُمْ عَذَابُ اللَّهِ﴾ [الأنعام: 40]، وقل أرأيتكم والذين كذبوا، هيحصل نقاش، وهناك حصل نقاش طويل. أنما لما جم عند آية: ﴿وَمِنْهُم مَّن يَسْتَمِعُ إِلَيْكَ وَجَعَلْنَا عَلَىٰ قُلُوبِهِمْ أَكِنَّةً أَن يَفْقَهُوهُ وَفِي آذَانِهِمْ وَقْرًا وَإِن يَرَوْا كُلَّ آيَةٍ لَّا يُؤْمِنُوا بِهَا حَتَّىٰ إِذَا جَاءُوكَ يُجَادِلُونَكَ يَقُولُ الَّذِينَ كَفَرُوا إِنْ هَٰذَا إِلَّا أَسَاطِيرُ الْأَوَّلِينَ * وَهُمْ يَنْهَوْنَ عَنْهُ وَيَنْأَوْنَ عَنْهُ﴾ [الأنعام: 25-26]. بعدها على طول ايه؟ ﴿وَلَوْ تَرَىٰ إِذْ وُقِفُوا﴾، وقفوا على ما فيش نقاش على طول تخويف بالعذاب. كنا احنا ذكرنا قبل كده أحد القواعد انك أنت بتفرق بين اللي بيسأل هل هو من القادة السادة المتبوعون اللي فاهمين وبيجحد فده على طول بتخوفه بالعذاب، ولا هو من الأتباع الضعفاء السذج اللي ما بيسمعوش فده بتناقشه وبتفهمه.

وقلنا أشهر مثالين جايين بسرعة واضحة سورة ايه؟ لأ مش الحجر، الحج في سورة الحج لما قلنا: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَلَا هُدًى وَلَا كِتَابٍ مُّنِيرٍ * ثَانِيَ عِطْفِهِ لِيُضِلَّ عَن سَبِيلِ اللَّهِ ۖ لَهُ فِي الدُّنْيَا خِزْيٌ ۖ وَنُذِيقُهُ يَوْمَ الْقِيَامَةِ عَذَابَ الْحَرِيقِ﴾ [الحج: 8-9]. ده بيتبع كل شيطان مريد، ده تابع لأي حد ناقشناه: ﴿أَفَلَمْ يَنظُرُوا إِلَى السَّمَاءِ فَوْقَهُمْ كَيْف بَنَيْنَاهَا﴾ [ق: 6]. أو في سورة الحج: ﴿إِن كُنتُمْ فِي رَيْبٍ مِّنَ الْبَعْثِ فَإِنَّا خَلَقْنَاكُم مِّن تراب﴾ [الحج: 5]. والتاني: ﴿وَمِنَ النَّاسِ مَن يُجَادِلُ فِي اللَّهِ بِغَيْرِ عِلْمٍ وَلَا هُدًى وَلَا كِتَابٍ مُّنِيرٍ﴾، ثاني عطفه ليضل عن سبيل الله، له في الدنيا خزي، يوم القيامة عذاب الحريق، ذلك بما قدمت يداك، بتخوفه على طول.

فهنا لما رجعوا برضه كأن برضه النقاش رجع تاني مع مين؟ مع الأتباع مع الضعفاء، فالقرآن بيعطي اهتمام كبير لهؤلاء، دول اللي فيهم أمل، التاني جاحذ محتاج تخويف، التاني يعلم أنه الحق، لذلك بعضهم قال كلمة جميلة قوي في آية 39: ﴿وَالَّذِينَ كَذَّبُوا بِآيَاتِنَا﴾.

صم وبكم في الظلمات. قال لك صم ده الفريق الأول، اللي هو المعرض اللي مش عايز يسمع أصلاً، ده اللي هم الضعفاء السذج اللي أصلاً هم ما تأتيه من آيات من آيات ربهم إلا كانوا عنها معرضين، وده ترتيب السورة، بدأت باللي كانوا معرضين. بكم، اللي يعلم الحق ومش عايز يقوله، الذين آتيناهم الكتاب يعلمونه، الذين آتيناهم الكتاب يعرفونه كما يعرفون أبناءهم عندنا في السور. فالاتنين في الظلمات، الفريق الأول الصم اللي مش عايز يسمع الحق، مش عايز يسمع أصلاً، معرض عن أي آية، والفريق التاني اللي يعلم وهو إيه مش عايز يتكلم بالحق.

ممكن نكتفي كده بهذا القدر ونكمل إن شاء الله بإذن الله تكملة، إزاي بقى القرآن ناقش دول، وايه الآيات الكونية اللي جابها لهم؟ ووضعهم داخل آيات كونية معينة عشان اضطرهم إلى الإيمان بالله سبحانه وتعالى.

أقول قولي هذا واستغفر الله لي ولكم. سبحانك اللهم وبحمدك، أشهد أن لا إله إلا أنت أستغفرك وأتوب إليك، وجزاكم الله خيراً.