د. أحمد عبد المنعميا بني إسرائيل ركزوا معايا هنا نداء مختلف ومفاجئ، يعني دايماً يا جماعة استحضار كأنك تقرأ السورة لأول مرة. احنا قلنا القرآن في الأول اتكلم أنه لا ريب فيه، ثم المقبيلين على القرآن لهم صفات، والمعرضين، ثم المترددين، ثم نداء للناس عامة، وده مفهوم يا أيها الناس، وكان قبلها ذكر الأمثلة، وبعد كده ذكر المثال -أعتذر معلش- ذكر المثال ﴿إِنَّ اللَّهَ لَا يَسْتَحْيِي أن يَضْرِبَ مَثَلًا مَّا بَعُوضَةً فَمَا فَوْقَهَا﴾ [البقرة: 26]. وبعد كده السياق والاستخلاف، فجأة يا بني إسرائيل نداء، طب النداء هنا يوجه لمين؟ هل يا أيها الناس؟ هل يا أيها الذين آمنوا؟ هل يا بني آدم؟ النداءات الأربعة اللي في سورة البقرة، لا يا بني إسرائيل. فجأة حصل توجه موجه كده معين خطاب لفئة معينة، هنتكلم هنا إيه مقاصد أو المعاني اللي ممكن تستنبط من هذا النداء.
وإن كان ده بيخلي مثلاً زي الإمام الطبري بيقول: هو أصلا الخطاب كان موجه ليهود بني إسرائيل، وإن كانت قصة سيدنا آدم مع إبليس لها إشارات لهم، فالآن أصبح الخطاب موجه بصورة مباشرة. لكن احنا هنحاول ربنا يمن علينا كده وإزاي بنقرأها في التفاسير في بعض الإشارات من الالتفات مباشرة والخطاب المباشر يا بني إسرائيل. هتجد هنا الصفحة دي، أنا مش هطول عن يعني مش هناخد كتير، أنا لما بقول الصفحة يا جماعة عشان في ناس بعتت لي زعلانه، الناس اللي بتحفظ من طبعة الشمرلي أنا أقصد الطبعة السعودية، فأنا قصدي الصفحة أنا ماشي مع الطبعة اللي هي السعودي، أو خلينا نقول إن مجموعة الآيات ديت الشوط ده أنا مش هاخد كتير النهارده إن شاء الله من الآيات.
لكن مجموعة مكثفة جداً من الخطاب لبني إسرائيل، يعني ما يقرب من تقريبا ١٣ أو ١٢ أمر متتالي، أوامر متتالية ورا بعض ورا بعض ورا بعض. يا بني إسرائيل اذكروا نعمة الله، وأوفوا بعهدي أوف بعهدكم، يا فارهبون، آمنوا بما أنزلت، ولا تكونوا أول كافر به، ولا تشتروا بآياتي ثمناً قليلاً وإياي فاتقون، ولا تلبسوا الحق بالباطل وتكتموا الحق وأنتم تعلمون، وأقيموا الصلاة وآتوا الزكاة واركعوا مع الراكعين. أتأمرون الناس بالبر وتنسون أنفسكم وأنتم تتلون الكتاب أفلا تعقلون؟ واستعينوا بالصبر والصلاة. المتتالية دي ليه؟ ثم تفصيل طويل لقصه بني إسرائيل.
طب ليه الأوامر والنواهي المتتالية ورا بعضها قبل تفصيل القصة؟ والله أعلى وأعلم وفي أكتر من حد أشار للمعنى ده أظن المنار ورشيد رضا وغيره، أن المنظومة المتتالية دي هي أصلاً اللي من خلالها تفهم سر فساد بني إسرائيل بل كل جرايم بني إسرائيل مجموعة بصورة يعني مركزة جداً جداً جداً في الصفحة دي أو في مجموعة الآيات دي. وممكن تستطيع أنت بالتأمل والتدبر أن كل جريمة من الجرائم اللي موجودة في السورة ترجعها، تقول: آه هنا لأنهم نقضوا العهد، وهنا لأنهم كانوا بيلبسوا الحق بالباطل، وهنا إنهم ما رضوش يركعوا مع الراكعين. المجموعة من الأوامر دي أشبه -عارف أنت لما يكون معاك حاجة مركزه جداً جداً، حمض مركز أو شيء، مادة مركزة تعرف بقى تخففها- أهو ده المجموعة المركزة من الصفات التي خالفها اليهود، يعني كل الصفات هنا الأوامر والنواهي هم عملوا عكسها في بقية السورة.
وده سبب الاستبدال، يعني هذه الأوامر المتتالية الإعراض عنها يؤدي إلى الاستبدال والعياذ بالله، نسأل الله السلامة. لذلك ناخد بالنا أن الأوامر دي مهمة، عشان كده هنحاول قدر المستطاع نقف مع أمر أمر فيها، مش هنعمل صعب النهارده. ولأن دي بتبقى عايزة واحد برده عايش مع السورة، ربنا يرزقني وإياكم معايشة سورة البقرة، أن كل أمر أقول لك أهو دي هتلاقي في آية ١٧٢ مثلاً، ودي هتلاقي في آية ١٥٥ التطبيق بتاعها، يعني مثلاً لما نجي نقول: ولا تلبسوا الحق بالباطل، التطبيق بتاعهم فين؟ ممكن تلاقيه في آية كذا.
كان في خطبة والله كنت خطبتها من زمان، كنت بشرح فيها أظن فكرة الانتقاء، اللي هو أن هو تامرون ببعض الكتاب وتكفرون ببعض، شرح الآية دي زمان، وبرده كنت بدات الخطبة بمقدمة: إزاي أن الآيات دي جمعت مجموعة من المعاصي، وهم إزاي ده التطبيق العملي بتاعها. طيب. نقف الأول مع نداء، قبل ما نقول أول أمر أنا عايزكم بقى تركزوا معايا، أول أمر هنا: اذكروا نعمتي التي أنعمت عليكم، ده رقم واحد، احنا هنعد كده مع بعض.
طيب الأول، يا بني إسرائيل، ليه بني إسرائيل فجأة كده يا بني إسرائيل؟ أول حاجة أنا عايزكم بس تفكروا معايا كده، ودي حاجة كانت شاغلاني قوي. احنا دايماً بنقول: القرآن الرسالة الخاتمة لأهل الأرض، والقران إلى آخر الزمان. لذلك القرآن بيجمع بين حاجتين مهمين قوي، أنه كان خطاب مباشر للي كانوا موجودين معاصرين لعهد النبي صلى الله عليه وسلم، وفي نفس الوقت بنستفيد منه على مدار الزمان. يعني ما ينفعش تكون الإجابة فقط -مش مش ما ينفعش تماماً- ما ينفعش تبقى فقط هي دي الإجابة اللي أنا هقولها دي: أن واحد يقول يا بني إسرائيل خطاب موجه ليهم لأن دول اللي كانوا جنبهم في المدينة، لو أي قوم تاني كانوا جنبهم كان قال يا بني إسرائيل؟ لا، مش بس كده.
أيوه صح، ولما راحوا اليهود وسورة البقرة من أوائل ما نزل في المدينة ودول الأقوام اللي كانوا معاهم، بس هنا سر معين، لان هؤلاء -ودركز معايا بقى- ستستمر العلاقة والصراع وهذه العلاقة التي بيننا، سواء صراع أو دعوة أو مشاكل، إلى يوم القيامة ﴿لَا تَقُومُ السَّاعَةُ حَتَّى يُقَاتِلَ الْمُسْلِمُونَ الْيَهُودَ﴾. إيه ده؟ فبنكون على وعي أن هنا بتفهم فيما يسمى بفقه التاريخ، كيف نقرا التاريخ. ناس يا جماعة لما بتيجي تقرا التاريخ بتقراه قراءة اقتصادية فقط، في ناس لما بتيجي تقرا التاريخ بتقراه قراءة جغرافية فقط، لا، هنا مهم جداً استحضار العامل الديني في الصراع بين الأمم على مدار التاريخ. لذلك من الكتب الجميلة: التفسير الإسلامي للتاريخ بتاع عماد الدين خليل، وأي كتب اللي حاولت تنزع فكرة أن يا جماعه زي يجي يقول لك إيه صراع الحضارات ونهاية العالم، وأن في آخر الزمان كل اللي مش عارف إيه الحضارات هتسقط وتبقى الحضارة الغربية، وطبعاً كلام فارغ كله. لكن النداء يا بني إسرائيل ده نداء محوري، سيظل لهذه النقاشات والمعارك مستمرة إلى يوم القيامة، عشان تبقوا عارفين بس.
طيب يبقى احنا لما نقول يا بني إسرائيل، ما هي علاقتنا؟ علاقتنا بهم؟ لماذا كثر الكلام عنهم في القرآن؟ ليه الكلام كتير قوي عن بني إسرائيل في القرآن؟ لماذا هذا الاتجاه المباشر في الخطاب يا بني إسرائيل بعد الخطاب سيدنا آدم؟ يعني بعد إني جاعل في الأرض خليفة الانتقال على طول لبني إسرائيل. طيب أول حاجة، هذا يدل على أهمية فهمهم وقراءة تاريخهم وأن المعاصرين امتداد للآبا، ودي نقطة مهمة جداً جداً جداً، بيدعى إلى عكسها الآن من بعض الإسلاميين أيضاً. أن يقول لك لا لا لا، وخصوصاً المشكلة اللي كانت حصلت قريب غزة واليهود، يقول لك لا بلاش تتعامل مع اليهود الموجودين دلوقتي أنهم امتداد اليهود، ودول مش بني إسرائيل وأصل في مشكلة في الأعراق وال الحمض بتاع الاختبارات بتقول أن هو الدي إن إي مش هو بتاع.
يا جماعة، هو انت متخيل عايزك تخيل كده معايا اللي بيتبنى الفكرة دي، أن ما ينفعش، اللي بيقول ما ينفعش نتعامل معاهم دلوقتي على أنهم يهود، لا دول مجرد حاجة صهيونية ما لهمش علاقة ببني إسرائيل واليهود، عايزك تخيل العكس عشان تفهم بس الفكرة. تخيل لو مجموعة من اليهود قاعدين مع بعض ويفكروا: ماذا سنفعل مع الإسلام؟ وهم خايفين من الإسلام. تخيل مثلاً فيطلع واحد من اليهود يقول: يا جماعة ده أنا ليا مسلمين كتير صحابي بيقولوا: احنا ما عدناش أمة مسلمة، ده احنا دول قومية متفرقة، ما عدتوش تتعاملوا مع الإسلام كان هو فكرة الإسلام، وأن هو دين شامل، وأنه دين غير رافض -رافض قصدي للعلمنة- لا لا، ده الإسلام ما عادش في فكرة الإسلام دي، ده هم دول قومية، كل دولة ليها اختياراتها وليها بتتبنى حاجات، فبلاش فكرة اليهود ضد الإسلام. تخيل قاعد مع اليهود كده هيقولوا له إيه؟ يعني ده ده نوع من السذاجة، مش معنى أن بعض المسلمين بيقولوا لك كده أن ده الإسلام، لا لسه في ناس متمسكة بالإسلام. فكذلك مش معنى أن في ناس بتقول كده من اليهود أصل تيجي ترد عليهم يقول لك لا ده أهو شفت المقطع ده للي مش عارف للحاخام اليهودي، وشفت مش عارف مين وهما بيقولوا، لا ستظل سيظل الصراع بين الإسلام موجود مع كل الأديان إلى يوم القيامة، سيظل ذلك. وهنشوف دلوقتي يعني ما فيش نقطة التقاء، لا في نقطة التقاء وهنتكلم عنها في مسألة الدعوة وآمنوا، وهنشوف إزاي القرآن بيتعامل دلوقتي مع نقطة الالتقاء.
يبقى أهمية فهم هؤلاء والدراسة المتأنية وفهم فقه تاريخ هؤلاء، وده مهم مش بس مع بني إسرائيل مع المخالفين، إزاي القرآن نوع من التفصيص للتفاصيل اللي حصلت لهم، ما ينفعش وأنت بتتعامل مع المخالف مش فاهم تفاصيل المخالف. شوف هنا القرآن اتكلم مع تفاصيل أحداثهم وتاريخهم. أهمية القراءة التاريخية لأنفسنا وأيضاً لغيرنا، إذا كان القرآن اتكلم عن تاريخ بني إسرائيل، احنا أصلاً مش عارفين تاريخنا، احنا احنا لما بننشأ ما لناش انتماء تاريخي لأمة الإسلام، لا، ده بيحصل أن كل دولة عايزة انتماءها بتزرع في في أبناء وطنها انتماءهم الوطني فقط، وبتزرع لهم انتماءهم الخاص، دول الحضارة دي كذا ودي الحضارة كذا، وبيحصل نوع من التشتيت ما فيش الانتماء لأمة الإسلام. يا بني إسرائيل، يبقى أهمية فهمهم وقراءة تاريخهم وأنهم المعاصرون الآن امتداد لآبائهم. خلاص.
النقطة التانية، حصل هنا -ودي اتكلمت فيها- كيفية قراءة التاريخ قراءة صحيحة غير مقتصرة على مسألة العوامل الجغرافية الاقتصادية فقط، واستحضار الدين عامل مهم في القراءة في قراءة التاريخ. ودي نقطة يا جماعة مش معنى أن -ركزوا- مش معنى أن هناك عوامل أخرى تتدخل أنها تكون هي العوامل الوحيدة فقط، يعني مش معنى أن في عامل اقتصادي أنا لا أنكر وجود العوامل الأخرى، لكن قراءة التاريخ بمنأى تام عن الدين قراءة خاطئة. تاني قراءة التاريخ واللي بيحدث في الماضي والحاضر والتنبؤ بالمستقبل بمنأى تام عن الدين ده قراءة خاطئة، بدليل أن القرآن لما نزل على فكرة كان في حضارات وكان في صراعات موجودة، القرآن أصر على قضية الدين فيما يحدث حتى بين فارس والروم، وهنا قال: إن المؤمنون سيفرح المؤمنون بنصر الله. قضية الإيمان وأن هذا ليس بمنأى عن قدرة الله سبحانه وتعالى. فبلاش علمنة التاريخ، بلاش علمنة التاريخ.
الانتقال لحديث عن بني إسرائيل فيبقى هو انتقال من الكلام عن استخلاف آدم لاستخلاف بني إسرائيل. كان في استخلاف لآدم وكان هنا استخلاف لبني إسرائيل. خد بالك هنا انتقال من الكلام عن الفرد للانتقال عن الأمة ودي هتكلم عنها دلوقتي: كيف تحدث القرآن عن بني إسرائيل؟ يعني الكلام كان مع فرض إني جاعل في الأرض خليفة، دلوقتي في أمة مستخلفة. يبقى كان في استخلاف فرد، هنا في استخلاف أمة. كان استخلاف آدم، كان استخلاف بني إسرائيل. الانتقال من سياق التوبة وتلقي الكلمات إلى سياق العناد وتبديل الكلمات. الانتقال من آدم إلى بني إسرائيل هنا هيحصل عندك مقارنة بين التوبة وتلقي الكلمات إلى سياق العناد، والمعنى ده من المعاني اللي التقطها فريد الأنصاري في شخصية اليهود: مسألة العناد والتمرد، قال إن الجزء الأول.
من سورة البقرة تشخيص لمسألة العناد والتمرد عند بني إسرائيل. والكتب التي كتبت في محاولة استخلاص شخصية بني إسرائيل من القرآن كتب كثيرة، قد تقبل منها وترفض لكن هي شخصية جديرة بالتحليل من خلال القرآن. صلاح الخالدي والبهي الخولي أكثر من كتب محاولة تحليل الشخصية اليهودية من خلال القرآن.يبقى الانتقال من آدم إلى بني إسرائيل، الفرد إلى الأمة، التوبة وتلقي الكلمات والعناد وتبديل الكلمات.
هنا الانتقال خد بالك أن نداءات في القرآن يا أيها الناس، يا بني إسرائيل، يا أيها الذين آمنوا. إيه ده؟ يا أيها الذين آمنوا لما جت فين خالص؟ بعد السحر: لا تقولوا راعنا. أول نداء يا أيها الذين آمنوا ربنا ينصرهم وينصر الله بالسلام إن شاء الله، ما قالش يا بني إسماعيل، خد بالك. هنا كان يا بني إسرائيل هنا بقى لا؛ لأن الإسلام مختلف، الإسلام دعوة عامة، دعوة عالمية، يا أيها الذين آمنوا المظلة العامة التي يدخل الكل تحتها، خلاص.
برضه كلمة يا بني إسرائيل هتلاحظ اللي جاي مختلف عن القرآن المكي. دلوقتي كأنك بتقرا سورة البقرة أول قرآن مدني، دعوة اليهود والنصارى أهل الكتاب غير دعوة المشركين؛ لذلك حديث معاذ المشهور لما النبي صلى الله عليه وسلم أرسله لليمن وقال: «إنك تأتي قوماً أهل كتاب» فابن حجر بيقول: أعلمه أي النبي صلى الله عليه وسلم أعلم معاذ، أعلمه بحالهم من أجل أن يستعد لهم وينزلهم منزلتهم؛ لأنهم إذا كانوا أهل كتاب صار عنده من الجدل بما عنده من العلم ما ليس عند غيرهم. يبقى هنا مهم، وده اللي يخلي ابن عاشور يلتقط معني جميل قوي معلش أنا أسبق وأقوله، بيقول إن المعلومات اللي اتفالت في الجزء الأول من سورة البقرة كان لا يعرفها إلا الأحبار والرهبان والعلماء اليهود، القرآن عمل نوع من تعميم التعليم، القرآن عمل تعميم التعليم، نشر التعليم أن في معلومات لابد أن يعلمها الجميع، لا تكون دعوة نخبوية، ودي كانت مشكلة عند بني إسرائيل على فكرة، أن دعوتهم كانت دعوة نخبوية مغلقة، وده خطأ يقع فيه بعض الجماعات أن تكون دعوتهم دعوة نخبوية مغلقة، فيكون يعني كان في حاجز لكي تدخل إليهم وبصعوبة ومش بسهولة. لا، دعوة الإسلام دعوة مفتوحة، ودي برضه من الأفكار الرئيسية عند فريد الأنصاري اللي كان بيقدمها عليه رحمة الله.
برضه آخر حاجة في نداء بني إسرائيل، دي النقطة الرابعة: أن القرآن بيعيشك في الوضع العالمي اللي كان موجود بالرغم من وجود قوى عظمى زي فارس والروم، لكن القرآن اهتم بخطاب بني إسرائيل وذكر تاريخهم بصورة أقرب إلى التفصيل.
طيب القرآن اتكلم عن بني إسرائيل ازاي؟ قارئ القرآن المكي سيجد أن غالب القرآن المكي يثني على بني إسرائيل على صبرهم وعلى يعني إيمانهم وعلى ما فعلوه أمام فرعون، إلا في موطنين تقريبا: موطن في طه وموطن في الأعراف، وكنت أظن ذكرت ده في سورة الأعراف، وليه ليه تحديدا في طه والأعراف حصل نوع من الذم؟ لكن غالب القرآن طبعا -إشارات موجودة في آل حم وغيرهم- أنهم غيروا وبدلوا، لكن غالب القرآن بيتكلم على أنهم صبروا، ليه؟ لأن القرآن المكي بيتكلم على مرحلة الاستضعاف، ماشي؟
هو الأول نسأل سؤال: ليه أكثر أمة ذكرت في القرآن أمة بني إسرائيل؟ لأن إحنا يا جماعة -وده أنا ذكرته أظن في أول في الدرس كان هو درس واحد عن سورة الإسراء- كل الأمم التي ذكرت في القرآن أن الله سبحانه وتعالى أهلكهم، القرآن ما بيذكرش لنا ماذا حدث بعد هلاكهم، يعني دلوقتي في نبي جاء لقوم فأعرض أكثرهم، فنزل العذاب أخذ أكثرهم العذاب، خلاص فبقي النبي صلى الله عليه وسلم -أي نبي من الأنبياء- ومعاه مجموعة من المؤمنين، عملوا إيه؟ إيه الشريعة اللي أقاموها؟ ما بيذكرناش القرآن. الأمة الوحيدة اللي القرآن أخبرنا أنهم عاشوا مرحلة استضعاف ثم جاء عذاب للمخالف اللي هو فرعون اللي هو الإغراق، ثم حصل انتقال لمرحلة أخرى إحنا ممكن نسميها مرحلة التمكين، ثم نزل لهم كتاب بعد إغراق فرعون نزل الكتاب: ﴿وَآتَيْنَا مُوسَى الْكِتَابَ﴾ تماماً على الذي أححسن. هنا دي مرحلة تانية، فأمة الاسلام هي أمة مكتملة أيضا لها دور حضاري مكتمل، تمر بدورة بمرحلة الاستضعاف ومرحلة التمكين، فتحتاج لأمة تتأسى بها أو تبتعد عن أخطائها، تحتاج لأمة سابقة تتأسى بها مثلا في صبرها في الاستضعاف وبتعد عن أخطائها في التمكين؛ فأمة بني إسرائيل نجحت نوعا ما في استضعافها ولم تنجح في تمكينها. خلاص، أول ما حصل التمكين وتمت كلمة ربك الحسنى على بني إسرائيل بما صبروا ودمرنا بعدها وجاوزنا ببني إسرائيل البحر فأتوا على قوم يعكفون على أصنام: ﴿اجْعَل لَّنَا إِلَٰهًا كَمَا لَهُمْ آلِهَةً﴾ [الأعراف: 138] على طول سورة الأعراف أول بمجرد المرور وقعوا: اجعل لنا إلها، وسلسلة التحريف والتبديل والانتقائية والجرائم اللي هنذكرها دلوقتي إن شاء الله. فأمة الإسلام هي أيضا أمة مكملة لها كتاب ولها تشريعات، فكانت أمة بني إسرائيل هي الأمة المقابلة لنا اللي إحنا ممكن نستفيد منها في هذه القضية.
طولت أنا عليكم في النقطة دي، المهم أنا يهمني جدا استحضار كيف طرح القرآن التعامل مع بني إسرائيل، إمتى يكونوا موطن تأسي وإمتى يكونوا موطن نقد، كيف نتعامل معهم؟ ما هي النصائح التي تقدم لهم؟ ده دلوقتي اللي جاي. طيب يبقى في فارق بين القرآن المكي والقران المدني في التناول مع بني إسرائيل.
أول أمر ليهم: ﴿اذْكُرُوا نِعْمَتِيَ الَّتِي أَنْعَمْتُ عَلَيْكُمْ﴾ [البقرة: 40]. طب ليه ده أول أمر؟ في بعض النظرات. أنا برضه آخر حاجة معلش لقيتها المنار كان بيقول: اختصاص بني إسرائيل بالخطاب؛ لأنهم أقدم الشعوب الحاملة للكتب، وكانوا أشد الناس عنادا ولو آمنوا لآمن النصارى. هو بيقول كده يعني شايف أنهم كانوا أكثر عنادا، فلو نجحنا في معركتنا مع اليهود هنكسب معركتنا مع نصارى؛ أيا كان دي تحليلات زي ما قلت لكم، لابد أن يسأل الإنسان ليه في كلام عن بني إسرائيل كتير في القرآن؟ والغريبة يعني أن اللي يفتح المصحف -يعني أنا بستغرب بتقعد التطبيع والكلام الغريب اللي بيت الابراهيمي والكلام اليهود الدعوات اللي بدأت تنتشر الفترة الأخيرة- شيء عجيب لما تفتح المصحف كده بس في الأول يعني -حتى اللي مكسر يكمل بيت المصحف- ويلاقي من الأول يا بني إسرائيل ثم هذا الذم المتتالي لهم ورايح يقول لك أخواتنا، هو يعني الأ يفقه هذا؟ وهنتكلم دلوقتي كيف تعامل القرآن.
طيب اذكروا نعمتي ليه؟ أنا كاتب أربع حاجات. اذكروا نعمتي أول حاجة ذكرها ابن عاشور قال: دعوة قبل ما نطلب منهم إيه المطلوب؟ قبل ما ربنا يقول لهم آمنوا، هو إيه المانع من أن هم يتقال لهم آمنوا؟ ابن عاشور بيقول: أهم مشكلة عندهم هي الحسد، دي كانت المشكلة عند مين برضه يا جماعة؟ دي كانت أهم مشكلة عند مين؟ ها، الصورة اللي في الدرس اللي فات عند إبليس. فهي نفس المشكلة عندهم. طيب كيف ساعد القرآن في إزالة هذا الحسد من قلوبهم؟ قال لهم: طب هتحسدوهم ليه؟ طب ما أنتم كنتم عندكم نعم، اذكروا نعمة الله عليكم، أنتم عليكم عندكم نعم برضه، بتحسدوهم ليه؟ لذلك ابن عاشور بيقول -حلو حته حلوة قوي- بيقول: دعوتهم للتفكر في النعم لينصرفوا بذلك عن حسد غيرهم، وقال دي طريقة بتعملها مع أي واحد يحسد الناس أن تذكره، أن تذكر الحسود بما عنده من نعم، لما بتقعد واحد يكثر من الحسد تفكره أن أنت كمان عندك نعم؛ لأن الإنسان بيقول: إن طبيعة الإنسان ينشغل بحواسه، فهو مش حاسس بالنعم اللي عنده، دايما مشغول بالاخر، فأنت دورك أنك تغير له زاوية النظر: ده أنتم آتاكم لم يؤتي أحدا من العالمين، ده أنتم عندكم كم أنبياء ما لم يؤتي أحدا من العالمين! فدي أول حاجة: تذكروا نعمتي لمسألة زوال الحسد تهيأة لقبول الأوامر اللي جاية. وأنا لما لقيت الحته دي عجبتني قوي لابن عاشور سبحان الله، ثم فوجئت اللي قالوا قبلها على طول ابن عجيب قال نفس المعنى تقريبا.
اثنين: اذكروا نعمتي التي عليكم أن الله لم يظلمكم؛ يعني لما هيجي بقى سلسلة الجرايم -شوف الفقه القراني قبل ما القرآن يكلمهم على الجرايم قال لهم: أنتم أنتم- وكلمهم برضه عن ربنا ما ظلمكمش، ده أنتم ربنا أداكم كم مهول من النعم، أنتم اللي أعرضتم، أعطاكم كثيرا من النعم ولكن الله سبحانه وتعالى لا يحابي أحدا، فليس بين الله وبين أحد بين من خلقه نسب سبحانه وتعالى.
النقطة الثالثة: أن النعم ليست استحقاقا ذاتيا لا ينفك عنكم، هذه النعم كان ينبغي أن تفهموا أن لها تبعات، فكل تشريف في القرآن يعقبه تكليف. كل تشريف بيعقبه تكليف، أنتم لما آتاكم النعم كان مطلوب منكم طلبات، أنتم لما غيرتم هذه الأوامر والنواهي وبدلتم استبدلتم، وده تحذير لينا لما ربنا يستعملنا جميعا يا رب، لما الإنسان يجد نفسه مصبوغا بنعم الله سبحانه وتعالى الدينية والدنيوية فليحذر، لأن ربنا يسترنا جميعا يا رب، الإنسان أحيانا يغتر -ما غرك بربك الكريم؟ لا، بنفسه، ربنا يستعملنا يا رب- لا بنفسه في العلم أو في الدعوة أو في الدين أو أو، بيغتر، بيظن ده استحقاق ذاتي فيبدا يقصر في العبادات ويقصر في القيام ويقصر في النوافل ويقصر في الدعوة والدنيا ماشية معاه الدنيا والدين، فيظن لا لا رب يقول لك إيه وكأن جواة كده بتعبير بعض العوام: ربنا عمره ما يعاملني ليه؟ ما هذا الغرور؟ أنت إيه؟ ما فيش نسب. فهم مع طول وفي النعم وتواود الأنبياء ويقتل نبي ثم لا يعجلون بالعقوبة، فيظن أن ده استحقاق ذاتي، وده اللي عندهم: نحن بني إسرائيل نحن أبناء الله وأحباؤه، فيظن النعم لا لا لا لا، ده مش استحقاق ذاتي، فلما بدلتم فبدل الله سبحانه وتعالى معاملته معكم.
آخر حاجة في اذكروا نعمتي: اذكروا دايما من مشاكل بني إسرائيل وغيرهم قضية النسيان، فطال عليهم الأمد فقست قلوبهم، بل اللي لو رجعنا للقصة اللي قبلها على طول أن القرآن أشار إلى المعنى الرئيسي في قصة آدم في سورة طه قال: ﴿وَلَمْ نَجِدْ لَهُ عَزْمًا﴾ [طه: 115]، بل نفس قضية النسيان السورة حذرت الآيات -إن شاء الله لما نوصلها النهارده- وتنسون أنفسكم، فقضية التذكر قضية مهمة جدا، دي اتكلمنا عنها بني إسرائيل واتكلمنا عن اذكروا نعمتي التي أنعمت عليكم.
بعد كده ربنا سبحانه وتعالى بيقول: ﴿وَأَوْفُوا بِعَهْدِي أُوفِ بِعَهْدِكُمْ﴾ [البقرة: 40]. أيوه في نعم تشريف يبقى في تكليف على طول، ربنا بيقول لهم سياق الخطاب القراني: اذكروا نعمتي التي أنا أديتكم نعم كثير كان ينبغي من النعم دي أن أنتم توفوا بالعهد والعهد اللي بيني وبينكم أن لما يأتي عهود كثير أن تطبقوا شرع الله، وأن لما يأتيكم نبي الذي أخبرتكم به لمحمد صلى الله عليه وسلم تطيعونه. ﴿وَإِيَّايَ فَارْهَبُونِ﴾ [البقرة: 40] المانع إيه؟ وهنتكلم في إياي فارهبون. وبعدين: ﴿وَآمِنُوا بِمَا أَنزلتُ﴾ [البقرة: 41]. ربنا بيطلب منك إيه؟ ربنا ما بيطلبش منك حاجة، ده ربنا أداك حاجة تؤمن بها وقال لك كمل الإيمان مصدقا لما معكم وما تبدلش وما تحرفش وما تلبس الحق بالباطل، هنشوف ازاي الأوامر بتوصل بعضها البعض، فربنا يقول لهم: أوفوا بعهدي أوف بعهدكم. وهي دي ترجع لـ﴿يَنقُضُونَ عَهْدَ اللَّهِ مِن بَعْدِ مِيثَاقِهِ﴾ [البقرة: 27] و﴿يَقْطَعُونَ مَا أَمَرَ اللَّهُ بِهِ أَن يُوصَلَ﴾ [البقرة: 27]، الفاسقين اللي ربنا أشار لهم قبل آية: ﴿إِنِّي جَاعِلٌ فِي الأَرْضِ خَلِيفَةً﴾ [البقرة: 30] قبل آية الاستخلاف بعد آية المثل، خلاص مسألة أن هم رافضين يكون بينهم عهود بينهم وبين الله سبحانه وتعالى دائما ينقضون هذه العهود، فربنا سبحانه وتعالى يقول لهم: أنا نسيتوا العهد. وخد بالك نسيت النعمة، قبل ما ربنا يفكرهم بالعهد يقول نسيتوا النعم؟ طب ما أنتم فاكرين النعم، لماذا تذكرون النعم وتنسون عهد الله سبحانه وتعالى؟ ونسيتم عهد الله، أوفوا بعهدي أوف بعهدكم.
ودايما ربنا بيقول دائما في القرآن لما ربنا بيطلب منك أمر أنت شايف أنه أمر صعب، ربنا يقول لك: أنا مش هضيعك، أوفوا بعهدي أوف بعهدكم، بلاش تتخيل أن لما ربنا سبحانه وتعالى بيطلب منك أمر أوفوا بعهدي، زي بالضبط كده ربنا لما قال أمر عظيم في سورة التوبة: ﴿إِنَّ اللَّهَ اشْتَرَى مِنَ الْمُؤْمِنِينَ أَنفُسَهُمْ وَأَمْوَالَهُم بِأَنَّ لَهُمُ الْجَنَّةَ ۚ يُقاتِلُونَ فِي سَبِيلِ اللَّهِ فَيَقْتُلُونَ وَيُقْتَلُونَ﴾ [التوبة: 111] فلما ربنا قال: ﴿وَعْدًا عَلَيْهِ حَقًّا فِي التَّوْرَاةِ وَالإِنجِيلِ وَالْقُرْآنِ ۚ وَمَنْ أَوْفَى بِعَهْدِهِ مِنَ اللَّهِ﴾ [التوبة: 111]. هو أنتم متخيلين يا بني إسرائيل أنت لما تضحي عشان دين ربنا ربنا مش هوفي بعهده معاكم سبحانه وتعالى؟ أتعاملون الله كما تعاملون أنفسكم؟ مش معنى أن أنت بتغدر أنك تعامل مع الله سبحانه وتعالى هكذا. ودي كانت مشكلة عند اليهود أن كان بيعمل نوع من الإسقاط على صفات الله سبحانه وتعالى حاشاه بما فيه من صفاتهم والعياذ بالله.
طيب، أوفوا بعهدي أوف بعهدكم، بعد كده ربنا قال إيه؟ وإياي فارهبون. يعني إيه واياي فارهبون؟ وليه هنا مسألة الرهبة تحديدا؟ الرهبة قالوا: شدة الخوف. وفي خلاف بين المفسرين، ربنا هنا قال: ﴿وَإِيَّايَ فَارْهَبُونِ﴾ [البقرة: 40] واللي بعدها الآية اللي بعدها: ﴿وَإِيَّايَ فَاتَّقُونِ﴾ [البقرة: 41] ودي بتلخبط أحيانا في الحفظ. بعض المفسرين قال: الرهب أقوى من التقوى؛ لأن الرهب هو خوف زائد، معايا جناحك من الرعب أن أنت لما تكون خايف قوي. الأصفهاني قال لا العكس، الأصفهاني في تفسيره قال: التقوى أعظم من الرهب؛ لذلك وإياي فارهبون خطاب للعوام، وإياي فاتقون خطاب للعلماء، وهنشوف دلوقتي بعض الناس قالوا: واياي فارهبون خطاب لعوام بني إسرائيل لأن يا بني إسرائيل أما وإياي فاتقون اللي كان.
ليه مع بني إسرائيل جت: ﴿وَإِيَّايَ فَارْهَبُونِ﴾ [البقرة: 40]؟ خد بالك احنا قراءتنا فارهبوني يعني هي في ياء أصلا هنا، ودي هتفيدنا الياء دي دلوقتي. احنا عايزين نتكلم على تركيبة الجملة، ومعنى ارهبون؛ معنى الرهب، ليه ربنا قال لبني إسرائيل ارهبوني؟ يبقى دلوقتي احنا هنتكلم عليه، إحنا اتكلمنا على النداء: يا بني إسرائيل، واتكلمنا على: اذكروا نعمتي، واتكلمنا على العهد. نقطة رقم 4 في درس النهارده: ﴿وَإِيَّايَ فَارْهَبُونِ﴾ [البقرة: 40]. هنتكلم في النقطة دي في نقطتين: تركيبة ﴿وَإِيَّايَ فَارْهَبُونِ﴾ نفسها، وليه لبني إسرائيل أتَى معها قضية الرهب؟
التركيبة؛ العلماء وخصوصًا ابن عاشور وغيره ابدعوا في قضية أن التركيب ده يعني مليء بالمبالغة. مليء بالمبالغة يعني في تكرار، للي دارس بقâ نحو مسألة: ﴿وَإِيَّايَ فَارْهَبُونِ﴾ [البقرة: 40]، أن المفعول موجود أصلاً، فازاي في مفعول به متقدم اللي هو إياي؟ فده بيسموه حاجة الاشتغال، يعني كأن الآية ارهبوني ارهبوني، ثم التقديم إياي ده يفيد اختصاص ارهبوني أنا فقط، وموجود الفاء اللي في النص ديت، كان معنى الآية: مهما يكن من شيء فارهبوني، يعني أي حاجة تحصل لك قدم خوف ربنا. اللي بقى مدرس نحو وبلاغه يرجع للكتب دي اللي حللت الآية، يعني الاكتناز في الجملة دي يعني عظيم جدا بمعاني للاختصاص والمبالغة، وازاي أن هنا بيطلب منهم ربنا سبحانه وتعالى ففي طلب عظيم، لا تخافوا إلا الله سبحانه وتعالى.
ده التركيب؛ طب ليه الرهب معاهم؟ هذكر لكم بقى أكثر من واحد قال إيه؛ أول حاجه يعني أنا بفضل قراءات أكثر من حاجة وسمعت أكثر من حد: ليه مع بني إسرائيل تحديداً فارهبون؟ بعضهم قال، وده ابن عاشور بيقول إيه: إن المتوقع منكم وأنتم رأيتم من هم منكم يعني ينضموا لكم، اللي هم السحرة، من وقفوا في وجه الملوك الظلمة وقالوا: ﴿لَن نُؤْثِرَكَ عَلَىٰ مَا جَاءَنَا مِنَ الْبَيِّنَاتِ وَالَّذِي فَطَرَنَا﴾ [طه: 72]، فكانوا يخافون الله سبحانه وتعالى أشَد من خوفهم من فرعون فوقفوا أمامه. وأنتم ده الخطاب لو على أنه، خد بالك، ده الخطاب على أنه للعوام، فأنتم أيضاً يا بني إسرائيل أن تقفوا في وجه علمائكم وأحباركم، وأن تخالفوهم، وأن تقولوا لهم: لن نؤثركم على ما جاءنا من البينات. ولكن، خد بالك، دي حتة بقى تعقيب مني على المسألة دي: قد تكون، ودي بنقع فيها كتير للأسف، قد تكون مخالفة الملك الظالم الذي يؤذيك أسهل عليك من مخالفة شيخك وجماعتك.
تاني، وذلك ابن عاشور قال إنهم نجحوا في الوقوف أمام فرعون ولم ينجحوا في الوقوف أمام أحبارهم ورهبانهم، اتخذوهم أرباباً. الملك الظالم اللي كان بيعذبهم ويؤذيهم قد يستثير بداخلك الحمية، إنما أن تترك الأحبار والرهبان والعلماء للحق بعد ما تبيَّن -مش بتكلم عن المقلد اللي مش فاهم- بعد ما تبين له الحق، بيكون في صعوبة أنه يخرج من هذه التبعية. وهنا بقى الكتاب المفيد جداً، كتاب الاتباع والمدبوعون بتاع صلاح الخالدي، هو مش قادر يخرج من هذه التبعية. أحياناً قد تجد طالب علم وعارف أن شيخه أخطأ ومش قادر، مش قادر يخالفه، ومش قادر، أو منتمي لمؤسسة أو مش قادر يخالفها. طب يقول لك: ده كبير، ما هو هذا من ابتلاء بالحق، نسأل الله السلامة والعافيه. فالبلاء بيكون صعب أنك تخالف من تحب، فقالوا هنا أنت محتاج في هذه اللحظة إلى الرهب الشديد من الله سبحانه وتعالى.
نعمان خان كان أشار لمعنى قال: طلبوا بالرهب لأن هذا عكس طبيعة اليهود من شدة الحب في الدنيا، فطلبوا في المقابل من شدة الخوف من الله سبحانه وتعالى، لأن في طبيعة اليهود مسألة شدة حب الدنيا. واللي أشار لقريب من المعنى ده أظن كان حميد الفراهي، متأخرين وتفسيره تفسير عظيم لكنه يكتمل نظام القرآن، كان بيقول إيه: أصلاً مسألة اليهود هم فيهم مشكلة، حتى نص كلامه بيقول: والأمر بالرهبة تذكير لما جعله الله رأس شريعتهم وملاك أمرهم، فإن شريعة يهود بنيت على الترهيب، وذلك لقساوة قلوبهم وقله خضوعهم. وبيكلم بقى بعد كده أن شريعة النصارى بنيت على العكس، وأن الإسلام جمع بين التوازن بين الاثنين. فالاثنين أشاروا لمسألة في طبيعة اليهود، لذلك في خواتيم سورة الفتح لما ربنا اتكلم على أوصاف المؤمنين في التوراة غير أوصاف المؤمنين في الإنجيل؛ أوصاف المؤمنين في التوراة قضية الإخبات والزهد والخشوع وظهور أثر ذلك عليهم، قضية النصارى التماسك، وده إشارة -ودا أنا ذكرتها بالتفصيل في خواتيم سورة الفتح- عكس أوصافهم.
يبقَى اتكلمنا ليه فارهبون؟ قلنا المعنى اللي قاله ابن عاشور مسألة مخالفة الأحبار والرهبان، ومعنى طبيعة اليهود من حب الدنيا وطبيعة قسوة القلوب اللي قالها الفراهي. رابع معنى ابن عطية بيقول: ارهبون تهديد، واليهود لا يأتون إلا بالتهديد، يعني عايز يقول، هو قال تهديد لهم، فكان المعنى ابن عاشور أنهم دايمًا كده إذا طُبّق الجبل فوقهم كأنهم ظُلّة، اليهود ما بيجيش غير لما يتهدد ويخاف.
في معنى، وإن كان زي ما قلت لكم أغلب الأصفهاني وغيره قال إن الخطاب هنا لعوام بني إسرائيل، بعضهم قال: لا يا فرعون، ده خطاب للأحبار. طب والأحبار والرهبان يعني محتاجين يُقال لهم خافوا من ربنا أكتر من خوفكم من مين، ومخايفين من مين؟ يعني فكره أنهم خايفين على دنيتهم دي لسه هتيجي: ﴿وَلَا تَشْتَرُوا بِآيَاتِي ثَمَنًا قَلِيلًا﴾ [البقرة: 41]، إنما خايفين من مين؟ أيضاً ممكن يكونوا خايفين من الأتباع؛ يا جماعة ما هي علاقة جدلية، الإثنين يستمتع بعضنا ببعض. هو أحياناً الرؤساء والأحبار والرهبان يخاف يتنازل عن منصبه، يقولوا له، لما اسمه إيه ملك الروم لما جمعهم وقال لهم: أنا اتعرض عليّ الإسلام وبدأت أقتنع، فبدأوا كانوا هياكلوه! فقال لهم: لا لا لا، ده أنا كنت بختبركم، أنتم صدقتوني ولا إيه يا جماعة، وأنا كل ما أقول لكم حاجة تصدقوني ولا إيه؟ فرجع تاني في كلامه، خاف، خاف على ملكه، فهو يعني هم ما على هذا تبعناك؛ آه يعني أنت مش هتيجي فجاه تتنازل. لو بعض الآثار -وإن كان فيها ضعف- لما تنازل الحسن بن علي رضي الله عنهما عن الخلافة في عام الجماعة 41 هجرية لسيدنا معاويه، كان بعض اللي كانوا متعصبين له كانوا يعني، مش بعض الروايات، كانوا يفسقوننا في وجهه ويسود وجوه المؤمنين، ما كانوا مصدقين، احنا كان في حمية بدأت تحصل. فبرده في حمية يهود، أنتم دلوقتي هتيجوا تتنازلوا تبقوا مسلمين؟ أمال فين بقى المبنى العظيم اللي احنا كنا متخيلين بقى أن احنا هنبقى كذا، وأن احنا هنبقى أُمّة وعد؟ وهي دي زي ما قلت لكم مشكلة التكتلات اللي بتتبنى على عصبية ما، وبعدين يظهر خطأ بعض الرؤساء والقاده، فهنا بيحصل نوع من الاضطراب؛ ده خايف يعترف بخطئه، وده خايف يسيب، وبيحصل أن الاثنين خايفين من بعض. هنا لابد أن يكون الخوف من الله سبحانه وتعالى هو المحرك: ﴿وَإِيَّايَ فَارْهَبُونِ﴾ [البقرة: 40].
طيب بعد كده ربنا سبحانه وتعالى قال، يبقى احنا قلنا في الآية الأولى نداء، وبعد كده ثلاث أوامر: ﴿اذْكُرُوا نِعْمَتِي﴾ [البقرة: 40]، ﴿أَوْفُوا بِعَهْدِي﴾ [البقرة: 40]، ﴿وَإِيَّايَ فَارْهَبُونِ﴾ [البقرة: 40]. خلصنا ثلاث أوامر، نجي للامر الرابع، قال الله سبحانه وتعالى: ﴿وَآمِنُوا﴾ [البقرة: 41]. يبقى قبل ما ربنا يقول لهم آمنوا، وده كان المتصور أن ده الخطاب الأولاني: يا بني إسرائيل آمنوا، وهو ده المطلوب، يعني زي ما بعض المفسرين بيقول هو ده أصلاً الأمر المقصود، ولكن قُدِّم له بتوطئة، وفكرة التوطئة دي فكرة موجودة كتير أوي في القرآن، لسه في دراسة نازلة حلوة أوي عن دراسة مسألة الآيات الموطِّئة في القرآن عند ابن عاشور. ده توطئة قبل ما ربنا يقول لهم آمنوا، قال لهم افتكروا النعم، افتكروا العهد، خافوا ربنا سبحانه وتعالى عشان تعرف تطبق الإيمان. وده مهم يا جماعة نستعمله في الدعوة قبل ما تطلب طلب؛ يعني قبل ما ربنا سبحانه وتعالى يقول: ﴿سَابِقُوا﴾ [الحديد: 21] في سورة الحديد إلى جنة عرضها السماوات والأرض كعرض السماء والأرض، قالوا: ﴿اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ﴾ [الحديد: 20]. يعني قبل سابِقوا، اعلموا؛ لن تستطيع أن تسابق إلى الجنات إلا إذا علمت وأيقنت أنها لعب ولهو أي الحياة، مش هتعرف. ففي حاجات تُقدَّم لك قبل أن يُطلب منك الطلب، فعشان يُقال لهم آمنوا، وده صعب عليهم، كان لابد من هذه المقدمة: آمنوا بما أنزلت مصدقاً لما معكم.
فهنا زي ابن عاشور ما بيقول: هذا شروع في دعوة بني إسرائيل، لأن يا جماعة هنا الإسلام دعوة عالمية، وهنا نقطة مهمة أوي. آمنوا بما أنزلت إيه؟ خد بالك القرآن كان ممكن يقول: آمنوا بمحمد صلى الله عليه وسلم أو آمنوا بالقران، لا خد بالك طريقت القرآن: آمنوا بما أنزلت، يعني ده من عند ربنا مش، دي القضية مش قضية محمد يعني، أنتم حاسدين محمد ليه؟ وزعلانين من محمد صلى الله عليه وسلم ليه؟ أو من جبريل يعني درجة جبريل هو اللي نزل على النبي صلى الله عليه وسلم خلاص هنتخذه عدو، يعني أي حد له علاقه بنزول القرآن بعرضه فربنا بيقول لهم: ربنا اللي نزله. حينما تعاندون الوحي أنتم تعاندون الله وتكفرون بالله سبحانه وتعالى. آمنوا بما أنزلت ربنا سبحانه وتعالى.
وبعدين أنت مش عايز تؤمن ليه؟ هو مصدقاً لما معكم؛ يعني لو أنت كنت قضية الإيمان بالنسبة لك عبودية وليست تحقيق لأغراضك، لأغراضك الشخصية، هتكمل في الإيمان لأنه مصدق. أنت لما تبص في التوراة الحقيقية التي هي غير المبدلة وتبص في القرآن هو نفس الامتداد، لأن التوراة المحرفة نُزع منها ذكر الدار الآخرة، نُزع منها ذكر البشارات بالنبي صلى الله عليه وسلم مع بقايا خفية، لكن مصدقاً لما معكم، وأنتم تعلمون أن القرآن مصدق لما معكم. يعني هنا إيه يا جماعة اللي أنا عايز أقوله؟ هنا واضح أن في مشتركات بين التوراة والقران. إيه، في مشتركات؟ أيوه طبعا في مشتركات، الأنبياء كأنهم أولاد علات.
أيوه في مشتركات، لكن أنظروا بقى الفارق ما بين طريقة القرآن في استغلال المشتركات بين الأديان لدعوتهم للإسلام، وبين البحث عن المشتركات بين الأديان لصناعة البيت الإبراهيمي المتوهم اللي بيتكلموا عنه دلوقتي تاني! فارق بين طريقة القرآن في البحث عن المشتركات والبحث عن قضية سواء بيننا وبينهم ننطلق منها؛ أنا ببحث عن نقطة مشتركة دي اللي هنطلق منها لدعوته للإسلام، مش ببحث عن النقطة المشتركة اللي عندها يكون التوقف، ده مش سقف طموحاتي أن أنا أبحث عن المشتركات ثم أتوقف هنا، لا لا لا. الإسلام يبدأ من المشتركات لدعوتهم للإسلام، الإسلام دعوة عالمية، الإسلام هو الدين الحق الأوحد الآن على وجه الأرض، دي الرسالة الخاتمة، دي قضية عقدية لابد أن يعتقدها كل مسلم، لا، يعني لا يجادل فيها أصلاً. فهو الآية، وغريب أوي لما يقول لك الإسلام عادي ممكن يعني، كل الأديان حاجة واحدة الإسلام أو اليهودية أو النصرانية، طب طب والاسلام كان بيدعوهم ليه؟ يعني لما هو عادي الآيات اللي موجودة في القرآن لدعوتهم دي: يا أهل الكتاب يا أهل الكتاب يا أهل الكتاب يا بني اسرائيل، أمال بيناديهم وبيدعوهم ليه لما هو عادي أي حد يبقى يهودي أو نصراني أو مسلم عادي؟ لا، يعني ده ده من البديهيات للأسف من كثر التشويش اللي حصل في الفترات الأخيرة أصبح بعض، ده يعني بعض المسلمين في عنده تلبيس في هذه القضية وفهم هذه القضية. آمنوا بما أنزلتم مصدقاً، يبقى المشتركات بين الأديان نقطة انطلاق للدعوة إلى الدين الحق وليست نقطة الوقوف والنهاية وصناعة مشتركات متوهمة، خلاص؟ وده اللي احنا بنشوفه دلوقتي.
آمنوا بما أنزلتم مصدقاً لما معكم، يبقى هنا ده المطلوب، الإسلام دعوة عالمية، دعوة صريحة واضحة للإيمان بدون مواربة. عايزين منهم إيه؟ آمنوا. بايه؟ بالوحي. وهو مصدق لما معكم: ﴿وَلَا تَكُونُوا أَوَّلَ كَافِرٍ بِهِ﴾ [البقرة: 41]. التعبيرات القرآنية تعبيرات جميلة أوي، يعني كان ممكن آمنوا بالقران ولا تكفروا به، خلاص نفس المعنى، لكن شوف حينما يأتي بالقران بالمعنى المطلوب ومعه معانٍ أُخر جديدة؛ تكلمنا في سورة أنزلت أن أنت لما بتكفر بالقران أنت بتحارب الله، مش قضية محمد صلى الله عليه وسلم أو جبريل عليه السلام، لا لا، أنت بتحارب الله. والقران دائماً بيستعمل الطريقة دي يا جماعة؛ نقل المعركة بين المسلمين وبين الكفار إلى معركة بين الكفار وبين الله، القران دائماً بيعمل دي، بيشيل المسلمين من القضية وبيحط، بيفهم الكفار: أنتم تحاربون الله. لما السحرة تجمّعوا أمام سيدنا موسى، سيدنا موسى رجع لهم الفكرة، قال لهم: ﴿وَيْلَكُمْ لَا تَفْتَرُوا عَلَى اللَّهِ كَذِبًا فَيُسْحِتَكُم بِعَذَابٍ﴾ [طه: 61]، هم بيفتروا على سيدنا موسى، بيقول لهم: ويلكم لا تفتروا على الله كذباً، هم اتهموا موسى بأنه ساحر، قال لهم: لا، أنتم الآن تفترون على الله. نقل المعركة دائماً مع الله سبحانه وتعالى، ده يعطي المسلم عزة ويخوف الكافر.
آمنوا بما أنزلت وهو مش غريب، مصدقاً لما معكم: ﴿وَلَا تَكُونُوا أَوَّلَ كَافِرٍ بِهِ﴾ [البقرة: 41]. يعني إيه لا تكونوا أول كافر؟ العلماء هنا، يعني إيه أول كافر؟ وقفوا كتير أوي، ومفسرين كتير وحتى ابن عاشور طول أوي في الحتة دي، حاولت اجمع لكم، اجمع لكم معظم ما قيل؛ لأنهم طبعاً اللي وقفوا عندها ليه؟ عشان حاجة أولاً هم مش أول كافر بالنبي صلى الله عليه وسلم، المشركين قبل كده في قريش كفروا. تاني حاجة، هو هل المقصود به المعنى الحرفي؟ وأن هنا في مفهوم مخالَفَة يعني، يعني لا تكن أول كافر لكن ينفع تبقى تاني كافر مثلاً أو ثالث كافر؟ لا طبعا. طب ليه، لماذا جاء القرآن بهذا التعبير؟ فبدؤوا يفكروا، ما دلالة هذا التعبير العربي؟ ما معنى أن أنا أقول لك: لا تكن...
أول ظالم، أو لا تكن أول في حد سبقك في هذا الأمر. قيل: أي لا تسبقوا إلى الكفر. يعني عيب، لا تسبقوا إلى الكفر وده أشار إليه ابن عطية وقال: حذروا البدار إلى الكفر به.
طب ليه حذروا من البدار؟ ليه ليه ما تسبقوش؟ لأنه سيكون عليكم إثم المقتدي بكم. يبقى أول حاجة هذا تحذير من المبادرة إلى الكفر. تاني، مش أول ما يعرض عليك الدين ترفضه طب فكر. يعني ادي لنفسك فرصة بس انك تفكر.
رقم اتنين، قيل هذا لا يليق بكم، كان ينبغي أن تكونوا أول من آمن. يعني انت المفروض تكون انت أول مؤمن لأنكم مصدقين لما معكم، كان ينبغي أن تكونوا أول من آمن. فكان معنى الآية: كونوا أول المؤمنين به ولا تتباطؤوا كعادتكم انتوا دايما بتتباطؤوا زي قصة البقرة. لا تتباطؤوا ولكن كونوا أول من آمن.
وقيل لا، ان هم لا تكونوا أول كافر كفر نوعي. النوع بتاع الكفر بتاعكم أعظم من كفر المشركين لأن انتم كفركم عن علم وعن تبين، لذلك انتم المغضوب عليكم والعياذ بالله أنكم تتبينون الحق ثم تعرضون. أفتطمعون أن يؤمنوا؟ لما ربنا قال في بعد كده، أو بعد أول حزب، هو انت متخيل ده كانوا يسمعون كلام الله ثم يحرفونه، وزي ما هنذكر الخلاف هناك إن شاء الله اختيار الطبري: يسمعون كلام الله حقيقة، انت متخيل؟ ثم يحرفونه من بعد ما عقلوه. ده فريق منهم، وقد كان فريق منهم يسمعون كلام الله ثم يحرفونه من بعد ما عقلوه.
يبقى أن هنا كفر نوعي، أول كافر من نوعه غير كفر العرب المشركين. وقيل -وده هنا يعني معنى ده أشبه باللي أنا قلته دلوقتي وده قالوه الاصفهاني-: لا تكونوا أول كافر منزلة في الكفر. وده كلام الاصفهاني في التفسير، أن انتم كفركم هيكون كان معنى كلامه كفركم هيكون أوحش كفر. لا تكونوا أول كافر، يعني أنت كده هتكسر الكفار كلهم، أنت مبروك أنت لو كفرت بمحمد صلى الله عليه وسلم -أنتم يهود- هتكونوا أعلى رتبة في الكفر. لا تكونوا أول كافر، كأنها أعلى رتبه في الكفر؛ لأن زي ما قلنا: كفر عن علم وعن بينة، ومعاكم الآيات ومعاكم البينات ومعاكم الدلائل، ثم تكفرون.
وقيل، والفراهي هنا كان قال كلمة حلوة قوي، بيقول: القاعدة هنا بيقول إن كلمة أول -ليس طبعا بيوضح حاجة واضحة- ليس المراد أن يباح لكم أن تكونوا الثاني كافر. يعني والقاعدة أن النهي اللي هي لا تكونوا أول كافر ربما يتضمن التشنيع لما عليه المخاطب، فيتعلق النهي بأصل الفعل.
هشرح، وذكر القيد وذكر القيد اللي هو أول كافر يشير إلى أنكم بلغتم النهاية في ارتكاب الشناعة، كقوله تعالى: ﴿وَلَا تَأْكُلُوا الرِّبَا أَضْعَافًا مُّضَاعَفَةً﴾ [آل عمران: 130]. هل معنى كده أن يجوز أكل الربا مش أضعافا مضاعفة؟ لا، لا. ذكر القيد اللي هو أول كافر أو أضعافا مضاعفة معناه أنتم ارتكبتم أشنع كفر وأشنع ربا. فهنا لما بيذكر القيد مش بدل ما ربنا يقول ولا تكفروا قال ولا تكونوا أول كافر، لأن نفس الفكرة، كلهم بيحوموا حوالين الفكرة أن كفركم شنيع، مختلف، عيب، كان لا ينبغي بكم أن تفعلوا ذلك.
وبعضهم أشار إلى معنى ثاني، قال: وكان كفر السابقين لا يعتبر كفرا بجوار كفرهم، فكانكم أول كافر؛ لأن كفركم مختلف والناس هتقتدي بكم. معايا؟ وقيل غير ذلك، الماتريدي دي برضه يعني قيل أن جمعت معظم بس مش ده إيه؟ ده معظم اللي قيل.
يبقى ﴿وَلَا تَكُونُوا أَوَّلَ كَافِرٍ بِهِ وَلَا تَشْتَرُوا بِآيَاتِي ثَمَنًا قَلِيلًا وَإيَّايَ فَاتَّقُونِ﴾ [البقرة: 41]. إيه اللي يمنعكم؟ الآيات موجودة عندكم والبينات وكل حاجة موجودة، والكتاب مصدق لما معكم، ما بقولكش ده أنا مش بقول لك غير دينك وهتؤمن بدين في تفاصيل وكليات مختلفة، يعني مش مثلا دين بيامرك بالتوحيد هتروح لدين بيامرك بالتثليث مثلا. وده شيء غريب أن واحد بيتنصر هو بيغير كليات.
فهنا أنت أصلًا مصدق لما معكم، طب إيه المانع؟ آه، الخوف. طب ﴿وَإيَّايَ فَاتَّقُونِ﴾ حل الخوف اللي عندك أن ترهب من الله سبحانه وتعالى، أن تخاف من الله سبحانه وتعالى. آه، ده في مشكلة دنيوية، أممم المشكلة مش قضية بس الخوف من البشر ده أنتم عندكم مشكلة في مانع، يعني كانت مشكلة حسد ﴿وَاذْكُرُوا نِعْمَتِي﴾، مشكلة خوف من الناس ﴿وَإيَّايَ فَاتَّقُونِ﴾، مشكلة دنيوية هنا، وكان القرآن يشير إلى مفاصل التي منعتهم والمركزيات التي منعتهم من الإيمان: الحسد، الخوف من الناس، المسألة الدنيوية ﴿وَلَا تَشْتَرُوا بِآيَاتِي ثَمَنًا قَلِيلًا وَإيَّايَ فَاتَّقُونِ﴾. أنتم المانع الخوف على المناصب، أنا عارف لما واحد نروح له مثلا، خلينا نجيبها مثال لواحد عاصي مثلا، واحد أصبح قضية مثلا الإعلام الفاسد والأفلام الفاسدة والبطل للأفلام الفاسدة والمسلسلات الفاسدة حياته بقت قائمة على سيستم فاسد وبيجي له مناصب وبيجي له مصدر رزقه ده، وبيجي مفتي بيفتي بالمال الفاسد، يعني وبيفتي فتاوى فاسدة عن طريق أنه ياخد فلوس، فحياته والسيستم بتاع بقى نظام دنيوي متكامل، أنت لما بتطالبه، أنت مش بتطالبه أنه معصية وبيبصيبها، ده هيهد السيستم ده، ده هيترك هذا النظام كاملا، حياته كاملا ستتغير، هو ده اللي بيطالب بيه اليهود وده كان أمر صعب.
يعني ترتيبه اليهود دعوة نخبوية وأحبار ورهبان والدنيا متظبطة وفتاوى وبيفتي بفلوس، والشريف بيعامل بمعاملة والوضيع بيعامل بمعاملة، الدنيا مستقرة. عارف لما تروح لواحد في نظام ديني معين وفي مفتي وفي كذا وفي كذا، وده بياخد فلوس حرام مثلا مثلا يعني كذا، وأنت بتقول له كل ده المبنى ده يتهد وهتكون واحد وسط الناس، ﴿وَارْكَعُوا مَعَ الرَّاكِعِينَ﴾ [البقرة: 43]. فالعلماء والأحبار والرهبان مش متخيلين ده، أنا أعمل ده؟ فربنا بيقول لهم: انتم اللي بيجي لكم من وراء ده إيه؟ الخوف من الناس، إيه الحسد؟ ﴿وَاذْكُرُوا نِعْمَتِي﴾. الدنيا ﴿وَلَا تَشْتَرُوا بِآيَاتِي﴾، أنت أنت بتبيع آيات ربنا.
خد بالك الباء بتيجي مع المتروك. ولا تشتروا، بتخيل ربنا بيقول لهم: أنت رايح تاخد شوية دنيا اللي هي المناصب وتدفع هتدفع آيات ربنا اللي بيدفع فتوى حرام، لذلك عاشور بيقول معنى، بيقول: والخطاب وإن كان لبني إسرائيل غير أن خطابات القرآن المتعلقة بالأمم الأخرى يقصد بها الاعتبار. فنحن المسلمين محذرون من مثل ما وقعوا فيه بطريق الأولى. طب ليه؟ الحتة بديعة قوي، ليه احنا أي تحذير حذر به اليهود نحن محذرون به بطريق الأولى؟ ليه؟ قال: لأننا أولى بالكمالات النفسية والإيمانية، إذا كان اليهود طولبوا بده أنت مش عايز تطالب بده؟ لا، أنت مطالب أكتر، لا تشتري. فالمسلم اللي بيبيع عشان يعني يعني هياخد بشماله المال، بيقدم دين، بيحرف الدين، بيبيع الآيات، بيبيع دينه، دينه يبيع دينه بعرض من الدنيا قليل. يعني أنت متخيل إيه اللي بيقدم؟ نسأل الله السلامة والعافية، أنك تبيع دينك، أنت تبيع أي حاجة إلا الدين؛ يكون الثمن اللي بتدفعه عشان تاخد الدنيا أي شيء أهون من أنك أنت تقدم الدين.
فهنا القرآن بيصور لهم الصورة بطريقة غريبة قوي: ولا تشتروا بآيات، أنت بتدفع، بتمحو حكم زي ما محو حكم الرجم من من التوراة، بتمسح. مصيبة قوي لما تسمع واحد طالع في مؤتمرات وبتاع وقاعد يحرف في الدين عشان يرضي الملوك أو يرضي أو عشان ياخد منصب دنيوي، عشان ياخد مال، ده ده أحقر شيء يفعل، أحقر وظيفة. تجعلون رزقكم فلوس أنك بتكذب، أنكم على أحد معاني الآيات أنكم تكذبون مصدر رزقك الافتراء على الدين. بئس هذا المال والعياذ بالله، أحقر مال يأخذه الإنسان مقابل أن أن يوقع عن الله زورا. ده ابن القيم بيتكلم إعلام الموقعين: أن توقِع زورا عن الله. لا، لا روح تكسب الدنيا أحسن، روح روح اشتغل في الطبل والمزمار أهون من أنك أنت تبيع دينك وأن تفتي بالظلم لتأكل المال الحرام. ولا ولا تشتروا باياتي، أي دنيا هتخش لك ولو كانت الدنيا بما فيها فهي قليل. ودي نفس فكرة ثمنا قليلا القيد للتشنيع، مش معنى كده أن في ثمن كثير، أي ثمن مقابل الدين فهو سيظل قليل، لذلك حتى النبي صلى الله عليه وسلم قال: «يبيع دينه بعرض من الدنيا قليل».
برضه من بدائع هذه الآيات، خد بالك احنا قلنا الباء بتيجي مع الآية على المتروك؛ يعني هو بيدفع ثمن دينه وياخد فلوس، القرآن حط الباء مع الآيات وسمى الثاني اللي هياخده ثمن. ولا تشتروا باياتي إيه؟ ثمناً. إيه ده؟ مش الثمن ده المفروض هو اللي بيدفع؟ ليه القرآن سمى اللي هياخده ثمن مع أن الثمن ده الثمن ده هو اللي بيدفع؟ قيل أكثر من حاجة، قيل أما معناها أن كله الدين هان عليه، هم بيدفعوا فلوس عشان يتغير الدين، ودول بيبيعوا الدين، فكان الدين في الحالتين متروك والعياذ بالله. يعني القرآن بيشير أن كمان الأتباع غلطانين، مش معنى أن ده أن اللي رايح يدفع فلوس لواحد عشان يغير له فتوى، ما هو الاثنين حرامية، الاثنين ظلمه، اللي يدفع عشان يغير له فتوى معينة اللي دفع ظالم واللي بدل ظالم. فقيل أن الدين هان عليهم هم الاثنين.
وقيل أيضا وكان كان هذا المال هو الذي ينبغي أن يدفع ثمن للحفاظ عن الدين. أنت ثمنا ده ده كان المال ده كان هو اللي المفروض ينفق للحفاظ على الدين مش العكس، مش انك تبيع المال تبيع الدين عشان تاخد المال. وأيضا قيل إن الله سبحانه وتعالى عظم الآيات بشيئين بجمعها آيات وباضافتها إلى الله آياتي، وحقر الدنيا بشيئين لأنها نكرة ثمنا نكرا ثم أيضا بوصفها قليلا ﴿وَلَا تَشْتَرُوا بِآيَاتِي﴾ آيات الله ﴿ثَمَنًا قَلِيلًا﴾.
فايه عظيمة وآاية يعني بصراحة يعني نسأل الله السلامة مرعبة. يعني يعني مسألة انسان يبيع دينه بصراحة يعني كان فريد الأنصاري قال فيها كلام جميل، قال: إن الاتجار بالدين من اعظم المصائب في هذا الدين، وقد يكون بالاحوال كما قد يكون بالاقوال وفصل راجعوه بقى. اتكلم أن مش عايزين دايما لما نجي نشرح الآيات، وده بقى إن شاء الله طول الجزء ده دماغك ما تقعدش تروح على اليهود بس، لا أسقط الكلام ده على نفسك. هل احنا بنتاجر بالدين؟ هل احنا بنشتري بايات الله ثمنا قليلا؟ هل أنا الواحد السؤال أنا بسال نفسي: هل أنت بتقعد تعمل الدروس وحركات عشان تاخد فلوس؟ نيتك الأساسية أنت قاعد بتبيع وتحرف في الدين وتشوف ما يطلبه المستمعون عشان تبسطهم عشان تاخد فلوس؟ يعني هل احنا الدين عندنا بقى هو الثمن؟ يعني بدفع الدين بحرف وأبدل وأغير فيه.
ده قضية تانية يا جماعة غير مسألة وأظن أشرت إلى كده مش فاكر مسألة أخذ المال على أعمال القربى، دي قضية فقهية بتناقش بعيدا عن هذه عن العواطف، مسألة حكم أخذ الأجر على الأذان على الإمامة على الإفتاء على التعليم، ده ده قصة تانية قصة تانية عشان أنا مش بحرم شيء أحله الله سبحانه وتعالى، ده تناقش في في مسائل، لكن أنا بتكلم على من يغير ويلعب ويبدل في حركة ويغير في شكل الدين عشان ويقعد قاعد يفكر ازاي يجيب فلوس أكتر لو لو غيرنا كذا وبدلنا وطرحنا الدين بصورة كذا عشان يجيب فلوس، لا خطر. فيشوف كل واحد هل يتاجر؟ هل بالاحوال؟ تاجر اللي قاعد ماسك السبحة عشان يبيع أكتر وسبحان الله وتيجي دي بكام يقول لك استنى بس لما أخلص الأذكار الأول، سبحان الله. أعرف أحد التجار بعض الناس كان يقول لي كنت بتصل بيه ما يردش عليا، وبعد الصلاة بعد شوية كده يتصل بيا يقول لي: معلش يا اخي أنا كنت بس بصلي، فأقول له آه حذر احذر يعني احترس يعني وطلعنا الصاب.
فبس طبعا يعني لا نذهب إلى التعميم، أقصد بس أن الإنسان أخطر الجرائم أن يتاجر بدين الله سبحانه وتعالى، تاجر بأي حاجة تانية، ابعد ابعد عن دين ربنا، ده عذابه أليم ﴿وَلَا تَشْتَرُوا بِآيَاتِي ثَمَنًا قَلِيلًا﴾. ربنا يعافينا يا رب.
﴿وَإيَّايَ فَاتَّقُونِ﴾ نفس برضه إياي فارهبون هنا، إياي فاتقون التقدير والفاء: إياي أي مهما يكن من شيء فاتقوا الله وخافوا منه وحده سبحانه وتعالى ولا تخافوا إلا الله سبحانه وتعالى.
طيب، بعد كده ربنا بيقول ولا عدوا بقى نسينا ده الأمر لكام: ﴿وَلَا تَلْبِسُوا الْحَقَّ بِالْبَاطِلِ وَتَكْتُمُوا الْحَقَّ وَأَنتُمْ تَعْلَمُونَ﴾ [البقرة: 42]. يبقى هم هنا الآية دي فاضحة. ربنا قال لهم: اذكروا نعمتي واوفوا بعهدي واياي فارهبون وامنوا بما انزلت ولا تكونوا اول كافر ولا تشتروا باياتي ثمنا قليلا. يبقى واضح أن في نعم هم عارفينها، وربنا نزل من ضمن النعم التي أنزلت عليهم التوراة، ومن ضمن التوراة في آيات تدل على بعثة النبي صلى الله عليه وسلم.
فهم عملوا إيه؟ قاعدين بيدوروا على الحاجات اللي الآيات اللي خايفين تزيلهم من منصبهم، فقعدوا يغيروها فربنا قال لهم الطريقة، شوف الفضح بقى! ربنا قال لهم: انتم بتستعملوا طريقتين عشان تغيروا الآيات، انتم بتستعملوا طريقتين عشان تمنعوا الناس من وصول الحق، طريقة التلبس وطريقة الكتم. بتستعملوا طريقتين ﴿وَلَا تَلْبِسُوا الْحَقَّ بِالْبَاطِلِ وَتَكْتُمُوا الْحَقَّ﴾ أيا كان الخلاف في الواو الطويلة دي واو المعية، يعني هل ربنا بيقول لهم ما تعملوش الاثنين مع بعض؟ ولا ربنا ولا دي واو عطف؟ ولا معنى الآية ولا تلبسوا الحق بالباطل ولا تكتموا الحق، واللام دي محذوفه والواو هو عطف. أيا كان معنى الآية، سواء كان معناها ما تعملوش الاثنين مع بعض، لا تجمعوا بين التلبس والكتم، ده معنى عشان فتبقى هنا تكتموا هتبقى منصوبة، ولا تكتموا مجزومة فهيبقى معناها لا.
تلبسوا الحق بالباطل؛ ده أمر لوحده ولا تكتموا الحق ده أمر تاني لوحده؟ أيا كان الاتنين مقبولين، لأن طبعا مش معنى إن أنا بقول له ما تجمعش من الاتنين إن أنا أبيح له أن يفعل هذه أو هذه؛ لا، أنت منهي عن الاتنين برضه، لكن من قُبح أفعالكم أنكم جمعتم بين الاثنين، وقد يستلزم فعل الجمع من الاتنين إنه يعني قد يستلزم إنه يجمع بين أن يفعل هذه وهذه.
وكان القرآن هنا أشار إلى طريقتهم في إخفاء الآيات؛ بيعمل حاجة من اتنين: أما إن هو يلبس الآيات مع الباطل مع الحق، أو إنه يكتم الحق، وكان هناك نوع من الحق لا يستطيعون مهما فعلوا بالتلبيس مع الباطل أن يلبسوه، سيظل حقاً واضحاً. ده يعملوا فيه إيه؟ ده يكتموه. يعني مثال؛ تجد بعض المفسدين في الدين في آيات ما يققدرش يجيب سيرتها، آيات واضحة مثلاً في التوحيد وأحاديث واضحة: «والذي نفسي بيده، لا يسمع بمسلم لا يسمع به يهودي ولا نصراني ثم لا يؤمن به إلا كان من أهل النار» حديث واضح للنبي صلى الله عليه وسلم.
هو يحاول إيه؟ يكتمه، مش موجود، يوضع حديث موضوع أيا كان، حديث صحيح مسلم ده ويجي لآيات تانية يلبس فيها بين الحق والباطل. فهو وكان التفرقة بين تلبيس بين الحق والباطل وكتمان الحق على حسب هذه الآيات، على حسب الحق؛ يصلح إن إحنا نلبسه بالباطل ماشي، مش عارفين نكتمه. وكانوا هم أغلبهم كانوا أميين، ومنهم أميون لا، إذا هنيجي إن شاء الله لو لو وصلنا هناك لأربع أصناف؛ ففي صنف قادة وفيهم منافقين، وفي أميون، ومنهم أميون لا يعلمون الكتاب إلا أماني، عشان كده بعدها على طول إنهم كانوا يكتبون الكتاب بأيديهم، هو الثاني ما يعرفش حاجة في الدين هو أمي.
العاقل العالم الفاسد يطلع ويفسد على الناس دينهم لما يكونوا مش عارفين الدين، لكن لما يكونوا قاعدين متعلمين الدين، بمجرد ما يفسد يقول: أنت فاسد.
قال: ﴿وَلَا تَلْبِسُوا الْحَقَّ بِالْبَاطِلِ﴾، تلبس الحق؟ قالوا بيعملوا إيه يعني؟ تخيل لما ربنا قال لهم: ﴿وَلَا تَشْتَرُوا بِآيَاتِي ثَمَنًا قَلِيلًا﴾ قالوا خلاص، طيب ماشي، إحنا إحنا مش هنخبي الآيات بس هنقول... إن قيل إنهم كانوا بيقولوا إيه؟ أظن مروءة عن مجاهد قال: لا تخلطوا اليهودية والنصرانية بالإاسلام، يعني إيه؟ هم كانوا بيقولوا أحد الاقوال إنهم كانوا يقولون للناس: آمنوا بمحمد. فالناس استغربت؛ إيه ده؟ اليهود بيقولوا آمنوا بمحمد؟ ويروحوا يسألوهم: هل هو نبي من عند الله؟ طبعا هو نبي من عند الله بجد، ما شاء الله لا قوة إلا بالله، يعني محمد نبي؟ تقول لليهود يقول لك: آه نبي، ولكنه نبي للعربي فقط وليس لنا. فيجيب حته حق وحته باطل ويلمسها مع بعض.
زي بالضبط هنجيلنا في نفس الصورة وبرده هناك سبحان الله آية فيها تلبيس بين الحق والباطل وبعدها آية فيها كتمان، بس التلبيس هناك ما كانش اللي عمله اليهود، كان عمله المشركين: ﴿إِنَّ الصَّفَا وَالْمَرْوَةَ مِن شَعَائِرِ اللَّهِ فَمَنْ حَجَّ الْبَيْتَ أَوِ اعْتَمَرَ فَلَا جُنَاحَ عَلَيْهِ أَن يَطَّوَّفَ بِهِمَا﴾ [البقرة: 158]. هو إيه اللي حصل هناك؟ اللي حصل إنهم جابوا إساف، ده صنم باطل، حطوه فوق الصفا، وجابوا نائلة وحطوها فوق المروة، وكان هدايت خلاص، فأصبح الصفا عبارة عن إيه؟ عن جبل شعيرة من الشعائر وفوقيه صنم من الأصنام، فحصل تلبيس بين الحق والباطل، والمروة عبارة عن إيه؟ جبل شعيرة من الشعائر وفوقها نائلة صنم، فأصبح هنا دور العالم –خد بالك، وده اللي عمله القرآن بالضبط- بعض الناس لما يلاقي ملبس بالباطل يقول لك: نتركهما حتى لا نتلبس بالباطل، لا هنطوف بين الصفا ولا عند المروة، خلينا إيه نطوف حوالين الكعبة بس، مش لازم نعمل السعي؛ لأن لو عملنا السعي هذا يستلزم إقرار الباطل الموجود.
في ناس قالت لا، إحنا نسعى ونتمسح بالاثنين، إيه المشكلة؟ أصلا ما فيش تمسح أصلا بس أنا بقول لك يعني كان نعظم الاثنين، ما خلاص هو حصل تلبيس من الحق والباطل، فالدين رفض هذا ورفض هذا، أمال الدين قال إيه؟ وكان في الآية إشارة أن الصفا والمروة فقط مش عائل، لا، دور العالم إنه يفصل بين الحق والباطل وخصوصا في مسائل التلبيس بين الحق، مسائل صعبة. يعني إن هو يجيب الباطل المحض سهل أن يرفض، لكن هو يجيب لك الباطل ومعاه حتة حق، تقبله يبقى أنت قبلت الباطل، ترفضه يبقى أنت رفضت حق، هي دي المشكلة، حينما يلبس الحق مع الباطل إذا قبلته فقد قبلت الباطل، وإذا رفضته فقد رفضت حقاً، فدور العالم المدقق المحقق هنا إنه يفصل بين الحق والباطل، ويقبل الحق ويرد الباطل.
وهم كانوا اليهود أساتذة في كده، في أن وتلامذتهم بقى الموجودين دلوقتي يلبس على الناس بين الحق والباطل، ولا تلبسوا الحق، وده جريمة شنيعة، تلبيس بين الحق والباطل.
الحاجات التانية، الطريقة التانية إنه يكتموا الحق، وأنتم أنت عارف في حق تكتمه وأنت تعلم، ﴿وَتَكْتُمُونَ الْحَقَّ وَأَنتُمْ تَعْلَمُونَ﴾ [البقرة: 42]، يبقى في أسلوب يجعل الإنسان يقف لا يستطيع أن يميز بين الحق والباطل يا عوام الناس، يقف كده، يتعرض عليه مقدمات شرعية صحيحة ثم استنباط خاطئ وحكم خاطئ، فيحصل له نوع من البلبلة؛ عايز المفتي، عايز حد، عايز مثلا إيه؟ يحلل للناس قضية معينة أو عايز يحرم الناس أيا كان، يقدم مقدمات من الحق ثم يلبس الباطل، فهنا يقع الإنسان، لا يستطيع أن يميز العامي، لا يستطيع أن يميز، يأتي العالم ليفصل بين التلبس بين الحق والباطل.
أو أسلوب الكتمان؛ إن يطلع واحد ويقول لك: عادي، اليهودية أو النصرانية والإسلام كلها أديان، الآن بيتكلم عن الآن، كلها أديان يحبها الله ويرضيها الله ومش عارف إيه، وكان هناك مساواة بين هذه الأديان الآن! ده إيه ده؟ ده طعن في أصول الدين، ويجي آيات يكتمها وأحاديث يكتمها، ويستدل بايات يعني فيها نوع من المتشابهات.
طيب، يبقى: ﴿وَلَا تَلْبِسُوا الْحَقَّ بِالْبَاطِلِ وَتَكْتُمُوا الْحَقَّ وَأَنتُمْ تَعْلَمُونَ﴾، ثم قال الختام بقى قبل ما يديهم قبل ما يستنكر عليهم ويقول لهم طب إيه المطلوب بقى بعد ده؟ ده الاعتقاد، نجي للأعمال: ﴿وَأَقِيمُوا الصَّلَاةَ وَآتُوا الزَّكَاةَ وَارْكَعُوا مَعَ الرَّاكِعِينَ﴾ [البقرة: 43]، أول حاجة جت خالص في السورة: إقامة الصلاة والإنفاق. هنا برضه في علاقاتك بالله؛ يعني هو بيقول لهم: أنتم محتاجين تدخلوا في الدين كافة، خد بالك أنت بتتكلم مع اليهود وبتطلب منه للنهاية، يعني أنت مش داخل مع اليهودي هنا متحاسس وتقول له: طب بص، أقول لك على حاجة، سيب حتة بس من الأحبار وإحنا هنديك، طب إيه البديل؟ يعني أنت رايح تقول له يترك الرئاسة والأحبار والرهبان، إيه البديل؟ ما فيش بديل؛ اركعوا مع الراكعين، لكم الجنة، لو أنت آمنت لكم الجنة!
شوف الطرح القراني القوي اللي داخل عليهم الأول، بيكلمهم واتقوا يوما، شوف آخر الآيات، يعني خطاب قراني واضح للتعامل معهم: ﴿وَأَقِيمُوا الصَّلَاةَ﴾، يعني مش بس بيقول له إيه: طب تنازل عن الاعتقادات بتاعتك ومش مهم بقى بقية الدين، لا، أو أنت كبير، أنت أنت مش إحنا اللي هنقول لك صلي بقى، أنت كبير على لا، ﴿وَأَقِيمُوا الصَّلَاةَ وَآتُوا الزَّكَاةَ﴾ وكن في صفوف في الخاضعين من المسلمين، تكون في جند المؤمنين، أن تكون من جنود المؤمنين، أنت متخيل؟ تخيل الطلب اللي بيطلب من أحبار بني إسرائيل أن ينزل في جنود المؤمنين، يعني قضية دار آخرة: ﴿وَاتَّقُوا يَوْمًا﴾؛ أنت إيه يعني يا جماعة القرآن بيعظم قضية الدار الآخرة، والكتب الحالية الموجودة المحرفة منزوعه الدسم، منزوعة الحديث عن الدار الآخرة، فبالتالي ما عندهمش المقومات التي تدفعهم لهذا التنازل.
﴿وَأَقِيمُوا الصَّلَاةَ وَآتُوا الزَّكَاةَ وَارْكَعُوا مَعَ الرَّاكِعِينَ﴾؛ ادخلوا في زمرة المسلمين في علاقتك بالله وبالمؤمنين، كن واحدا منهم، لا تبحث عن المزايا. بعض الناس بيعبد الله على شرط، وعلى فكرة هي دي نفس مشكلة إبليس يا جماعة، اللي أنا عايز أقوله، دي هتجيلنا دلوقتي برضه، وده أمر مرعب؛ إبليس واليهود وبني آدم، الثلاثة كانت مناصب دينية. يعني إبليس كان منصبه اللي أدالُه الغرور وكان رافض يتنازل عنه، منصب ديني، على الأقوال بقى في الإسرائيليات إن هو سواء إن هو كان في منزلة عالية من السماء أو كان خازن الجنة، أو هو قتل اللي كانوا موجودين قبل كده، واليهود كانوا أحبار ورهبان، وده تقرب قربانا فتقبل من كلها قضايا دينية.
وهنا حصل نزاع فيها؛ النبي صلى الله عليه وسلم يقول: «ما ذئبان جائعان أرسلا في غنم بأفسد لها» تخيل، أنت متخيل أن النبي صلى الله عليه وسلم بيقول إن الدين الدين، لما كيف يفسد الدين؟ هذا الدين كان في غنمين أرسلا على هذا الدين يفسدان هذا الدين، إيه هم يا رسول الله؟ إيه هم الذئبان الجائعان اللي هيفسدوا الدين؟ من الحرص على الدنيا والشرف بأفسد لها في الآخر الحديث لدينه، أي: ما ذئبان جائعان أرسلا في غنم بأفسد لدين المرء، ده معنى بس في تقديم وتأخير، بأفسد لدين المرء من الحرص على الدنيا والشرف.
وهنا الرسالة اللي دايما أنصح بتكرارها: رسالة الإام ابن رجب عليه رحمة الله في شرح هذا الحديث، وتكلم أن الحرص على الشرف الديني قد يكون أفسد وأعظم بكثير، أعظم إفساداً لدين الإنسان، حرصه على الشرف الديني من حرصه على الدنيا! دي مصيبة التناطح والتنازع وشرف ديني ويرفض، بل يكذب ويزور ويأكل الحرام ويرفض أن يتنازل عن منصبه الديني شرف.
إن يا جماعة طبيعة، خدوا بالكم، طبيعة وفطرة الناس بتعظم الدين أصلا، فهو هو في منصب ديني؛ إبليس رفض، فهو بيعبد الله على شرط. زي اسمه إيه؟ أبو عامر، اللي كان قبل ذلك يسمى أبو عامر الراهب وأصبح أبو عامر الفاسق؛ كان يتعبد ويتحنث حتى يكون هو النبي، فلما بعث محمد صلى الله عليه وسلم قال لك: لا، أنا عايز أقى أنا النبي، طب ربنا اختار النبي اصطفى النبي صلى الله عليه وسلم؟ قال لك: لا، فكفر، كان يعبد الله على شرط.
فهنا يعني ربنا سبحانه وتعالى قال لهم: اركعوا مع الراكعين، وقضية البحث أن تشترط على ربنا شيء معين ومزية معينة في الدين؛ لا، أنت يا ربنا سبحانه وتعالى، الله أعلم حيث يجعل رسالته سبحانه وتعالى، يعني أتعلمون الله بدينكم؟ الله سبحانه وتعالى هو الخبير اللطيف سبحانه وتعالى.
ثم قال الله سبحانه وتعالى: ﴿وَأَقِيمُوا الصَّلَاةَ وَآتُوا الزَّكَاةَ وَارْكَعُوا مَعَ الرَّاكِعِينَ﴾، قال بعدها سبحانه وتعالى: ﴿أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ وَأَنتُمْ تَتْلُونَ الْكِتَابَ﴾ [البقرة: 44]. يعني هو أنتم تقولوا للناس، أنتم بقى لا، حد أنت وظيفتك وظيفة دينية، لا، أنت وظيفتك وظيفة الدعوة إلى الدين والدعوة إلى الطاعة. هنا مع الأحبار والرهبان، ليه يا جماعة؟ لأن زي ما النبي صلى الله عليه وسلم قال: «لو آمن بي عشرة من يهود، آمنت بي يهود». يعني لو آمن عشرة بس، والمقصد يعني معين في في اللي هو في الزمن ده، قبائل بعينهم، دول لو كانوا دول دول المؤثرين، مش أي عشرة. وده موجود في بعض الروايات الأخرى؛ لو العشرة معينين دول آمنوا، الباقي كله هيؤمن. ففي ناس معينة، ودي دائما في التكتلات والتجمعات في ناس معينة لما هي بتخضع، الباقي كله يخضع، فهي دي كانت مشكلة اليهود، هي زي ما قلت لكم دعوة نخبوية، في أحبار ورهبان وفي أميين، فدول لو آمنوا، الباقي هيؤمن.
فربنا بيقول له: أنتم أصلا اللي كنتوا تقولوا الناس، بتتكلموا عن الدين، أنتم بتوع الدين: ﴿أَتَأْمُرُونَ النَّاسَ بِالْبِرِّ﴾، وقيل: أَتَأْمُرُونَ النَّاسَ بِالْبِرِّ أي بعموم الدين، وقيل: أَتَأْمُرُونَ النَّاسَ بِالْبِرِّ أي بإيمانهم بمحمد. الناس كانت تيجي تقول لهم: نؤمن بمحمد؟ يقولوا لهم: وماله، آمنوا بمحمد بس هو نبي العرب بس، زي ما قلنا: لا تلبسوا الحق بالباطل.
ومن المعاني الغريبة اللي سمعتها –وده يعني ما وجدتهوش يعني في كثير من التفاسير-: تأمرون الناس بالبر، البر اللي هو الطاعة، بيجي بمعنى الطاعة كبر الوالدين، فكأنه بيطلب من الناس أن يطيعوه هو، أتامرون الناس أن يطيعوكم، وبعدين أنت أنت تكفر بربنا؟ يعني أنت أصلا واخد مركزك عشان أنت المفروض إنك بتقربهم من ربنا، تقوم تأمرهم إنهم يطيعوكم ما يطيعوش ربنا، ﴿وَتَنسَوْنَ أَنفُسَكُمْ وَأَنتُمْ تَتْلُونَ الْكِتَابَ﴾.
طيب هنا المشكلة يا جماعة إيه اللي بيحصل؟ إحنا عايزين نستفيد بقى الكلام ده علينا إحنا؛ أن أحيانا كثرة ممارسة العمل الديني، كثرة ممارسة العمل الديني بدون زي ما ربنا قال في نفس هؤلاء في سورة الحديد: ﴿وَلَا تَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَت قلوبهم﴾ [الحديد: 16] طال عليهم الأمد بعيدا عن مواعظ الكتاب، كما قيل في التفسير. فهنا أن أحيانا بعض اللي بيمارس العمل الديني بعيدا عن الوعظ والعبادة والخلوة والذكر والصحبة الصالحة، بعيدا عن هذه الأمور اللي بتعطيه الزاد، يتحول هذا العمل الديني إلى وظيفة إلى صنعة، وخصوصا في الأعمال المؤسسية.
سعة الإسلام وانتشار الإسلام أحيانا بتتوجب علينا أن الأعمال تبقى أعمال مؤسسية مش أعمال فردية، وده مهم وده مفيد، أنا مش بستنكر الأعمال المؤسسية، ما حدش يفهم غلط، بالعكس، لكن الأعمال المؤسسية زي ما ليها مزايا، ليها عيوب، فإحنا هنا نكون على حذر بس من عيوبها. يعني أحيانا العمل إن أما بتكون فرض بيطلب منك، ويطلب منك وظائف، فاحيانا بتقوم بالوظائف دي، بتبقى أشبه بالصنايعي. لذلك حتى كان الزمخشري ورشيد رضا وابن عاشور كلهم أشاروا للمعنى ده، قالوا: والغرض من هذا هو أن ده على كمال خسارهم ومبلغ سوء حالهم الذي صاروا إليه حتى.
صاروا يركز بقى في الحتة دي، حتى صاروا يقومون بالوعظ والتعليم كما يقوم الصانع بصناعته والتاجر بتجارته. لا يقصدون إلا إيفاء الوظائف ليستحقوا العوض. هو ده اللي أحياناً بيحصل، والصانع لما يكون -وده مش حرام- بيأخذ أجر على شغله وده مش حرام زي ما فصلنا من الفترة اللي فاتت، ال... من شوية لما كنا بنقول تشتروا باياتي. الفارق من أخذ المال على أعمال القُرَب، وده أمر واسع والنقاشات فيه مفتوحة وواسع جداً، وفي أعمال كثيرة من القُرَب يجوز أخذ فيها الأجر على ذلك. ولا حرج في ذلك ولا نحجر واسعاً. وفي، بل بالعكس أحياناً الإنسان يضطر لذلك وده مهم.
وبين إنه بيحرف في الدين ليأكل المال، هنا بيتكلم إن أحياناً بقا كثرة ده -وهنا ده- ممكن يكون الأمر ده بيعمله حالياً، بيتحول إلى صنعة. طب إزاي بردو معشر الزمخشري وعلق رشيد رضا: لبئس ما كانوا يصنعون. هو تحول إلى صنيع، هو وظيفة، فينسى. لذلك كلمة السر في الآية إيه يا جماعة؟ وتنسون. أتأمرون، يعني هو بعض الناس يقول لك إيه ده؟ هو معنى الآية إن أنا لو عاصي ما أمرش الناس بالبر؟ لا، ده مش معنى الآية. المشكلة في الجامع بين الاثنين؛ أن تستمر في الأمر بالبر وأنت عاصي وترفض. أنت معاند. مش مثلاً تقع غصب عنك وبتحاول تتوب، لا لا. أنت عندك حالة من اللامبالاة واستمرار الأمر. لذلك كلمة السر في الآية: وتنسون أنفسكم.
شوف الكلمة، كلمة بديعة قوي. أتأمرون الناس بالبر ومش وتعرضون أو لا تزكون أنفسكم، لا. في ناس يا جماعة ربنا يحفظنا يا رب، وده الواحد بيشوفه فوق في العمل الديني، في العمل الديني بينسى نفسه. عارف زي مثلاً لما تسأل أحمد عبد المنعم: هو فين ده؟ اهتمامك بأحمد عبد المنعم؟ فين اهتمامك بنفسك؟ لو افترضنا مثلاً إنك بتروح تشتغل في الدنيا وأسرة وبتحاول تعمل للدين أو بتقرا وتعلم، أيوه فين؟ أنت أحياناً ممكن تنسى نفسك. تنسى إن أنت محتاج عبادات، أنت محتاج وعظ، أنت محتاج صحبة صالحة، أنت محتاج خلوة، أنت محتاج ذكر، أنت محتاج تضرع، محتاج أن تلجأ إلى الله سبحانه وتعالى. فكرة إنك تتحول وتظن إن أنت شمعة تحترق، ما حدش قال لك تكون شمعة تحترق! ما حدش طلب منك الطلب ده، ما تتوهمش ده.
فإياك إنك توصل أن تنسى نفسك، تنسى وتنسون أنفسكم. عارف واحد بعد فترة فوق ده منهمك في العمل الديني والعمل الخيري والعمل الدعوي، هو نسي نفسه. نسي، عارف يعني ايه نسي؟ يعني ما افتكرش إن هو محتاج يتعلم، هو كان بيذاكر عشان يقول بس. هو كان محتاج يتفقه، هو كان محتاج يصلي، محتاج يقيم الليل. يعجبني قوي مقطع أثر فيا جداً، أحد الإخوة ربنا يجزيه خير بعث لي مقطع لسه النهارده الشيخ حسن البخاري بيتكلم بدرس بيدل طلبة العلم بيقول يعني جت آية بيشرح أحاديث، آه، النهي عن ال... إن في أوقات النهي عن الصلاة، معلش استطراد سريع كده. بيشرح باب أحاديث النهي عن الصلاة، إن في أوقات في اليوم زي ما أنتم عارفين لحظة شروق الشمس وانتصاف الشمس وغروب الشمس، الأوقات سواء الخسة أو الثلاثة، الأوقات المشهورة اللي في نهي عن الصلاة خلاص، وقبل المغرب وبعد العصر. فبيقول حينما يأتي للمسلم، بيقول أنتم طلبة علم، أنا هكلمكم دلوقتي أنتم كطلبة علم يعني، بيقول: المسلم لما يأتي أحاديث النهي عن الصلاة كأنه هو أصلاً طول الوقت قاعد ببحث عن أوقات إنه يتنفل فبيجي له وقت يقول له توقف.
فبيقول: هل نحن ممن يكثر التنفل أصلاً؟ بيقول: إمتى آخر مرة قمت لتتنفل كده مع نفسك؟ قال: أنا ما بتكلمش على الفروض ولا الرواتب ولا الوتر ولا قيام الليل، مش بتكلم عن، أنا بتكلم عن التنفل المطلق اللي هو أنت كمسلم بتدور عليه فيتقال لك في وقت من الأوقات لا لا لا لا، بلاش تنفل مطلق في الأوقات دي. خلي النفل المطلق بالليل، خلي النفل المطلق من الظهر والعصر، خلي النفل المطلق من المغرب والعشاء. آخر مرة -كان بيقول أنتم طلبة علم اهو- آخر مرة عملتوها إمتى؟ كان سؤال يعني أنا بالنسبة لي السؤال ده الواحد أصلاً مقصر في الأساسيات. فعلاً الواحد بتنسى نفسك، جاي يومك مشغول في إيه؟ يومك أيوه مشغول، راجع أو رتب أولوياتك، إياك إنك تنسى نفسك. عارف تقول لواحد أنت نسيت نفسك؟ أيوه، احنا أحياناً بننسى نفسنا، بتنسى إنك عبد، بتنسى إنك مسلم، بتنسى إنك عايز الجنة. أحياناً تتشغل وتقرا وتعمل وتخش سوشيال ميديا وتتخانق ومعارك المفروض إن هي في الدين يعني ومعارك وي... وبعدين أنت بتعمل إيه؟ إيه ال... المعارك اللي أنت بتخدها والمشاكل والتشويش ده ليه؟ فمحتاج تقف كده وتفكر أين أنت من الوضع ده، وتنسون أنفسكم.
فهنا دي مصيبة. وبعدين مصيبة ليه معاهم؟ لأن الحاجات شوف المصيبة ربنا يسترنا يا رب، الحاجات التي ينبغي أن تذكره هو يقوم بها. يعني أنت، أنت إيه اللي يفكرك؟ إيه اللي يفكرك؟ انك تقرا الكتاب وأنك انت تطبق، تأمر أو يعني تذكر غيرك فانت لما تذكر غيرك أنت ممكن تتذكر، ده هم يامرون الناس بالبر ويتلون الكتاب. طب إيه تاني هيفكرك؟ يعني إذا كانت تلاوة الكتاب والدعوة إلى الله وأمر الناس بالبر هذه الأمور لم تذكرك فما الذي سينفع معك؟ عشان كده ربنا يعني أنتم عملتوا أهم حاجتين بتساعد الإنسان إنه يفتكر إن أنا لما أروح أكلم واحد أو إن أنا أقرا في القرآن: وتتلون الكتاب أتأمرون الناس بالبر وتنسون أنفسكم وأنتم تتلون الكتاب أفلا تعقلون؟
هنا أفلا تعقلون بمعنى يعني هل انتم ما عندكوش عقل؟ ولا أفلا تعقلون هنا ده فعل يعني زي ما كان ابن عطية قال الكلمة بس أنا هجيبها لكم: أفلا تعقلون أنفسكم، يعني العقل يعني يربط. يعني هنا فعلاً هي متعدي، يعني ما فيش حاجة توقفك. إيه اللي هيوقفك؟ الدعوة مش بتوقفك، ويعني نسال الله السلامة والعافية في واحد بيستمر الوضع والقراءة، إيه اللي يوقفك؟ أفلا تعقلون أنفسكم تربطونها؟ يعني حاجة تفوقك، نسال الله السلامة والعافية. أتأمرون الناس بالبر وتنسون أنفسكم وأنتم تتلون الكتاب أفلا...
قال بعض أهل العلم: ودواء هذا النسيان هو محاسبة النفس. انك انت بقى توقف تقعد تحاسب نفسك وتراجع نفسك، ودواء هذا النسيان هو محاسبة النفس. ثم قال الله سبحانه وتعالى.
طيب، كأن الأوامر والنواهي الأساسية خلصت؛ انتم مطلوب منكم بكل بساطة تذكروا النعمة، وتوفوا بالعهد توفوا بالعهد، وإياي ترهبون، وتامنوا بما أنزلت ولا تكونوا أول كافر به، وإياي فاتقون، ولا تشتروا به ثمناً قليلاً وأقيموا الصلاة. هنا ربنا سبحانه وتعالى من لطفه بهم أعطاهم الزاد الذي يعينهم على هذه الأوامر. يعني ربنا قال في الاول توطئة: اذكروا نعمتي. وقال في الاخر الزاد، وكان دي طريقة الخطبة الممتلئة الأركان، بدايه بالكلام بالتوطئة تذكير النعم، وبعدين تحط المطلوب، وتحط الختام بالعوامل المساعدة على تطبيق ده. إيه العوامل المساعدة؟ استعينوا على ما أمرتكم به من التنازل عن مناصب الدنيا والتخلي عن زخارفها والتخلي عن هذا المال الحرام والمناصب والاموال التي طالما تمتعتم بها بالحرام، تخلوا عن كل هذا، لابد أن تتخلوا عن كل هذا.
طيب، أستعين إزاي؟ قال: واستعينوا به. أستعين بأيه؟ قال: بالصبر والصلاة. بعض الناس -أنا كنت برضه لما أقرأ الآية دي أنا مش فاهم- يعني إيه استعين بالصبر والصلاة؟ يعني كيف استعين؟ يعني أنا لو واحد مثلاً شغال في شغلانة حرام وبيكسْب منها فلوس كتير، ويتقال له سيب الشغلانة الحرام دي، فيقول لك إزاي؟ قل له: استعين بالصبر والصلاة. يعني إيه استعين بالصبر والصلاة لما يطلب طلب عظيم؟ يا جماعة احنا مش متخيلين واقع الكلام ده على أحبار اليهود. يعني تخيل كده عبد الله بن سلام لما النبي صلى الله عليه وسلم خده وسأله قالوا: هذا سيدنا وابن سيدنا، أنت متخيل ده يسيب المكانة دي؟ يعني ده اللي بيبقى كابتن فريق ما بيسيبوش بسهولة، يعني اللي بيمسك أي منصب تافه ما بيعرفش يسيبه. تخيل سيدنا، وبعد كده لما خالفوا قالوا: هذا سفيهنا وابن سفيهنا، صعبة على النفس، غير الاستفادات المادية. يعني واحد حياته مستقرة مادياً ومعنوياً، وهيغير كل ده عشان ربنا. زي بالضبط اللي بيسلم كده في وسط بيئة بتحاربه، فيتقال له: واستعينوا بالصبر والصلاة.
يعني إيه استعينوا بالصبر والصلاة؟ مسألة الصبر أصبحت شيء على رأي الدكتور أحمد سيف كان لسه بيقول لي يعني كتير من الناس بقا رافض كلمة اصبر، مش عايز يسمعها، عايز يسمع أي حل آخر غير كلمة الصبر، لأن الصبر مؤلم. فكان ربنا بيقول لنا: تعلموا هذا، تعلم أن يكون في آلام في حياتك وأنت متحمل. ليه أي آلام في حياتي أفزع وأجزع وحالة من الهلع ليه؟ أنا يعني خلينا يعني نتكلم ماشي على الأحبار وأنهم مطالبين أن يتحملوا، لكن احنا عايزين برضه نستفيد من ده في حياتنا. أنا متفهم أن الحياة مليئة بالصعوبات، وأصلاً لا تتمنى لقاء العدو ودائماً نسأل الله العافية، لكن لن تخلو الحياة من كبد. ليه دلوقتي أصبح أن أي ضغط والآلام أي حاجة أفزع وأجزع وهلع وأصبح فكرة الانتحار للاسف فكرة بقت يعني في متناول الأيدي، بعد ما فكرة بعيدة أصبح تكرارها وانتشارها وتسليط الإعلام عليها أصبح بيخليها سهلاً؟ يعني لا، احنا محتاجين نتعلم الصبر. الصبر في نوع من إمساك النفس، تستحمل شوية، مش أي حاجة، مش أي مؤثر يخليك تفزع. استعين بالصبر.
أنت متخيل يعني لو أنت تخيل قاعد مكان الأحبار واليهود قاعد بتسمع بتسمع بتسمع بتسمع طب ماشي وبعدين؟ ما أنا عايز بديل. لا، اركعوا مع الراكعين. يعني كمان الوظيفة مش بتقولي طب خليك، سيب الوظيفة دي وأنا هجيب لك وظيفة عندي في الإسلام، لا، مع الراكعين. زي بالضبط كده: وَمَنْ أَحْسَنُ قَوْلًا مِمَّنْ دَعَا إِلَى اللَّهِ. أنت متخيل واحد يعني احسن بيقول احسن حاجة وفي الاخر بيقول ايه: إنني من المسلمين. إيه ده؟ يعني الدعوة مش لازم تخليني متميز عن الناس، لا بالعكس، أنت المفروض عادي واحد من الناس. فهنا اركعوا مع الراكعين. طب ما فيش مناصب؟ طب ماشي، طب ما أنا عايز حاجة استعين بيها، الصبر أول حاجة.
يعني إيه الصبر؟ يعني استحمل. يعني إيه استحمل؟ يعني هيقابلك -وخدوا بالكم، هيقابلك، ركز معايا فيها- هيقابلك مشاكل في حياتك مالهاش حل غير الصبر. يعني ما مالهاش حل، هي حلال على الوقت اللي ابتلي، مش عارف باب واللي ابتلي بمكان واللي ابتلي بوظيفه واللي ابتلي ببلاء معين مالهاش حل يعني. في بعض الناس يقول لك ايه: أصل ده خنوع. يا عم أنا مش بكلمك على القضايا اللي لها حل، أنا مش بكلمك على التواكل وعدم الأخذ بالأسباب، مش بكلمك على ده خالص، أنا بكلمك على في قضايا أمراض ليس لها أدوية هتعمل إيه؟ هتعمل إيه؟ ماشي، هترقي نفسك، أفترض أن ربنا سبحانه وتعالى -النبي صلى الله عليه وسلم خيرها حتى المرأة التي كانت تصاب بالصرع خيرها: إن شئت صبرت ولك الجنة، وإن شئت دعوت الله فشفاك. قالت: أصبر، ولكن ادع الله لي ألا أتکشف، فدعا لها-. في حاجة في الدين اسمها الصبر محتاجين نتعلمها، محتاجين نتعلم أن في آلام، في مشاكل في بيتك وأنت بمارس دينك، مش أول ما بيحصل لك أي مشكلة دينية أو دنيوية أو اجتماعية أو أمنية تقوم موقف الدين ليه؟ ما تصبر شوية. يعني اتعود أن عجلة الدين بتلف لا تتوقف، حتى ولو بصورة بطيئة، وتصبر. أن عجلة الدين في حياتك وهي عشان تمشي أنت ستشعر بألام، إيه المشكلة لما تصبر عشان ربنا سبحانه وتعالى؟ الناس بتصبر عشان شهادات وبتصبر عشان أمنيات، إيه المشكلة أما احنا نصبر عشان ديننا؟
أنا عارف -أسأل الله سبحانه وتعالى أن يخفف عنا جميعاً- الواقع مؤلم، ولا أطلب منك أن تتحمل فوق طاقتك، لَا يُكَلِّفُ اللَّهُ نَفْسًا إِلَّا وُسْعَهَا، لكن حاول أن تصبر، حاول أن تتصبر: ﴿اصْبِرُوا وَصَابِرُوا وَرَابِطُوا وَاتَّقُوا اللَّهَ لَعَلَّكُمْ تُفْلِحُونَ﴾ [آل عمران: 200]. الوصية الخاتمة للصورة اللي بعد كده سورة آل عمران. سورة آل عمران كم مهول من السهام تلقى على المؤمنين، سواء سهام الشبهات من النصارى أو سهام القوة المادية من المشركين. في الآخر: اصبروا وصابروا. الصبر والتقوى مليان في سورة آل عمران، مالهاش حل، في حاجات مالهاش حل. فاستعينوا بالصبر، أن تتحمل التضحيات وتبذل، يعني ربنا بيطلب منهم تضحية هي بالنسبة لهم تضحية كبيرة، لن يستطيع أن يقدمها بدون صبر وبدون.
الزاد البديل الذي يملا الجوف: الصلاة. يعني أنا محتاج لما أقدم تضحية كبيرة حاجتين: أتجرع مرارة الألم وأصبر، ثم أعوض هذا الصبر الذي يصبغ وهذا الصبر بطعم آخر، وهي الصلاة. هذه الصلاة التي تأتي على هذا الصبر لتنقلني إلى عالم الغيب. نظرة في عالم الغيب عن طريق رحلة الصلاة تهون عليك مرارة الصبر. يعني أنا قدمت مقدمة طويلة عن الصبر ثم أختم أن الصلاة تهون هذا الأمر. الصلاة، كثرة الصلاة، النبي صلى الله عليه وسلم صلى غزوة بدر في الأحزاب، كان إذا حزبه أمر صلى صلى الله عليه وسلم. أي مشكلة على طول تيجي على الصلاة، استعين.
عايزين نتعود يا جماعة أن في مشاكلنا فكر وخطط خذ بالأسباب وشاور وتحرك، لكن في حاجين مهمين في حياتنا الصبر والصلاة، هذا التي الصلاة التي تسد الجوف الجائع، التي تعيد ضبط حياتك وتفكيرك وطريقتك وتملا جوفك وتسد فاقتك، تطلب من خلالها الرزق وتصحح علاقتك بالله سبحانه وتعالى، فمن وجد الله فماذا فقد؟
لذلك قال الله سبحانه وتعالى عن هذا الأمر: ﴿وَإِنَّهَا لَكَكَبِيرَةٌ إِلَّا عَلَى الْخَاشِعِينَ﴾ [البقرة: 45]. الأمر ده كبير، هذه الموعظة، سواء الصبر والصلاة -لو الهاء دي بتعود على الاثنين، الصبر والصلاة على هذه الموعظة أو على الصلاة- أمر شديد على الخاشعين، لأن فعلا، كما قال حتى قال إنها لوصية شاقة وثقيلة، أن يطلب منهم أن يتركوا الدنيا بما فيها، ولكن لن يستطيع فعل ذلك إلا الذين يظنون أنهم ملاقو ربهم وأنهم إليه راجعون.
هيصبر نفسه بيوم القيامة، وأن يححسن الظن بالله أنه سيعود إليه، ويقول: يا رب، فعلت هذا من أجلك. سبحان الله، نسيت الصحابي الذي تمنى، قال قبل غزوة أحد: أتمنى -عبد الله بن جحش قال- أتمنى أن ألقى رجلا صنديدا مشركا، يبقر بطني، ويجدع أنفي، ويقطع أذني، فألقاك يا رب فتقول: عبدي، لم فعل فيك هكذا؟ تخيل واحد رايح متشرّح، مش بيضحي بشوية مناصب، متشرّح! ربنا يقول له، وهو يعلم سبحانه وتعالى: لم فعلت فيك كده؟ فيقول: فيك يا رب.
إحساس الآلام اللي أنت تألمتها بيهون حينما تشعر حينما تلقى الله وتقول: فيك يا رب. لذلك، من أهم وسائل الصبر والصلاة أن تتذكر أنك ستلقى الله سبحانه وتعالى، استعداد لهذا اليوم: ﴿الَّذِينَ يَظُنُّونَ أَنَّهُم مُّلَاقُو رَبِّهِمْ﴾ [البقرة: 46]. لذلك، كثير من العلماء هنا أن الظن هنا بمعنى اليقين، وإن كان مسلكهم مختلف؛ بعضهم قال هو أصلا لفظ مشترك يستعمل بين الاعتقاد الجازم والاعتقاد الراجح؛ لو جازم يبقى يقين، لو راجح يبقى ظن، وده ابن عاشور. وبعضهم قال الظن هو رجحان اعتقاد مع بقاء منازع، يعني في حاجة جوه كده لسه بتنازعك فانت محتاج تتغلب عليها، وده الإمام الحرالي اللي بينقل عنه البقاعي.
وبعضهم قال زي ابن عطية، قال، وده برضه ابن عطية ولقيت الفراهي وضحها أكتر؛ الفراهي بيقول: الذي يرى المرء من غير مشاهدة، يعني الظن اعتقاد بس أنت لسه ما شفتش. وابن عطية قال: لا يوقعه فيما خرج إلى الحس؛ يعني طول ما أنت مقتنع بحاجة، حتى لو اعتقاد جازم بس لسه ما وصلتش للحس يتقال عليه ظن، لو وصلت للحواس ما ينفعش تقول عليها ظن.
وبرضه الفراهي فصل، وبرضه من الناس اللي فصلوا فيها وعجبني بصراحة يعني عليه رحمة الله، هو دائما يبدع في مسائل الأمور: الإمام الأصفهاني فصل فيها واتكلم؛ مسألة أمتى شك وأمتى يقين والأدوات اللي بتستعمل معاها، لما بتيجي (أن) الثقيلة زي: ﴿يَظُنُّونَ أَنَّهُمْ﴾ [البقرة: 46] بتكون أقرب إلى اليقين، لكن المخففة بتكون أقرب إلى الظن. المهم يعني أن مسألة ﴿الَّذِينَ يَظُنُّونَ أَنَّهُم مُّلَاقُو رَبِّهِمْ وَأَنَّهُمْ إِلَيْهِ رَاجِعُونَ﴾ [البقرة: 46]. لذلك بعضهم قال: حتى لو سبناها على الظن اللي هو مش اليقين، فكأنها إشارة أن الذي عنده ظن بس أنه يقابل ربنا، عنده ظن مش يقين، هذا يكفيه، فما بالكم وأنتم موقنون بلقاء الله سبحانه وتعالى!
ثم في الآخر الختام، تكرار مرة أخرى: ﴿يَا بَنِي إِسْرَائِيلَ اذْكُرُوا نِعْمَتِيَ الَّتِي أَنْعَمْتُ عَلَيْكُمْ وَأَنِّي فَضَّلْتُكُمْ عَلَى الْعَالَمِينَ﴾ [البقرة: 47]. تذكروا نعمة الله عليكم، وأنكم فضلتم على عالم زمانكم أو فضلتم على العالم كله أجمع بكثرة الأنبياء، يعني سواء بني اسرائيل عندهم نعم -إحنا ما خدناش إن كان عندهم أنبيياء أكثر من اللي قلنا- أو على عالم زمانهم، فكان ينبغي أن تكونوا أكثر بذلا وتضحية.
ثم قال الله سبحانه وتعالى: ﴿وَاتَّقُوا يَوْماً لَّا تَجْزِي نَفْسٌ عَن نَّفْسٍ شَيْئاً وَلَا يُقْبَلُ مِنْهَا شَفَاعَةٌ وَلَا يُؤْخَذُ مِنْهَا عَدْلٌ وَلَا هُمْ يُنصَرُونَ﴾ [البقرة: 48]. دائما بني إسرائيل تفكيرهم تفكير دنيوي، ازاي يخلص من الورطة؛ يعني يجيب واسطة، يدفع رشوة، يجيب فلوس. فربنا قال لهم: كل هذه الأمور لن تنفع يوم القيامة، تفكير أنكم أبناء الله وأحباؤه لن ينفعكم يوم القيامة، لن ينفعكم في الآخرة.
فقال الله: ﴿وَاتَّقُوا يَوْماً لَّا تَجْزِي نَفْسٌ عَن نَّفْسٍ شَيْئاً﴾؛ ما حدش هيشيل عنك. ﴿وَلَا يُقْبَلُ مِنْهَا شَفَاعَةٌ﴾؛ طب أجيب شفيع؟ ﴿وَلَا يُؤْخَذُ مِنْهَا عَدْلٌ﴾؛ زي أو عدل ذلك صيام يعني يدفع مقابل. وفي الآخر: ﴿وَلَا هُمْ يُنصَرُونَ﴾. كل ده لن ينفعكم. يعني كان منشأ الغرور عندهم أنهم بيظنوا أن ده زي ما قلت لكم كده، ده تفضيل ذاتي؛ عشان كده بيعتقدوا أنهم عرق مختلف عن بقية الجنس، مختلف عن بقية العالم، هم مختلفين. اليهود بيظنوا كده، فربنا بيقول لهم: لا، يعني ما فيش حاجة اسمها أبناء الله وأحباؤه. لذلك ربنا ذكرهم بالنعم ثم ذكرهم بعذابه ونقمه عليهم.
لذلك برضه لخص الجرائم بتاعتهم فريد الأنصاري، قال: هذا المجلس تتلخص يعني أمورهم أو جرائمهم في أربعة أمور؛ الخيانة: لأنهم خانوا العهد -أوفوا بعهده-، التلبيس: كتمان الحق، والتناقض: وهو تأمرون الناس بالبر وتنسون أنفسكم.
آخر حاجة نختم بها: لما ربنا يوما بني إسرائيل أهل كتاب وعندهم علم، ما تتصورش، دائما النقاشات نقاشات تكون علمية جدلية فقط، ربنا كلمهم بالوعظ؛ يعني ما تجيش أحيانا في النقاشات العلمية وتذكر اللي أمامك أن يخاف الله سبحانه وتعالى، ما ينفعش حد يقول لك: إيه ده؟ إيه ده؟ لو سمحت، ما تدخلش الوعظ في العلم. لا، من قال؟ بل هذا من العلم، لأن العلم الحقيقي هو الذي يؤدي إلى العمل.
فانظر كيف الله سبحانه وتعالى ذكرهم وخوفهم بهذا اليوم، يوم القيامة، وأنهم لن يستطيعوا، بل ربنا أشار أنهم لن يستطيعوا أن يطبقوا هذا العلم إلا إذا كانوا يظنون أنهم ملاقو الله. الإنسان ليس عقلا فقط، وليس عبارة عن مجموعة من المعلومات، لكن هو انسان متكامل، يؤثر فيه الوعظ ويؤثر فيه الخوف، لذلك: ﴿وَإِيَّايَ فَارْهَبُونِ﴾ [البقرة: 40]، ﴿وَإِيَّايَ فَاتَّقُونِ﴾ [البقرة: 41]، ﴿الَّذِينَ يَظُنُّونَ أَنَّهُم مُّلَاقُو رَبِّهِمْ وَاتَّقُوا يَوْماً﴾. يعني تخيل مجموعة من الأوامر والنواهي لأهل الكتاب اللي هم بيدعوا أنهم عندهم العلم والمعلومات وأهل جدل وأهل نقاش، ثم ندخل معهم الوعظ.
ودي هي من مشاكل التوراة الآن، أنها منزوعه -زي ما قلت وأشار لده أكثر من واحد من المتخصصين- إنه نزع منها ذكر الدار الآخرة. فاحنا دورنا إرجاع مركزية الدار الآخرة في الدعوة مرة أخرى. ودعوة تخلو من ذكر الدار الآخرة هي دعوة متهودة أو متنصرة، هي دعوة تقترب من الكتب المحرفة، فتحريف في الدعوة أن ينزع منها ذكر الدار الآخرة، بل هي دعوة معلمنة؛ أن هو بينزع ذكر الدار الآخرة، فقال الله سبحانه وتعالى: ﴿وَاتَّقُوا يَوْماً لَّا تَجْزِي نَفْسٌ عَن نَّفْسٍ شَيْئاً وَلَا يُقْبَلُ مِنْهَا شَفَاعَةٌ وَلَا يُؤْخَذُ مِنْهَا عَدْلٌ وَلَا هُمْ يُنصَرُونَ﴾ [البقرة: 48].
يعني كل مرة كنت ناوي أن أنا ما أطولش، لكن ده بقى نصيبكم. أسأل الله سبحانه وتعالى أن يفتح لي ولكم في فهم كتابه، أسأل الله سبحانه وتعالى أن يوفقنا للعمل بهذه بكتاب الله سبحانه وتعالى وأن نتعلم وأن نعمل بدين الله سبحانه وتعالى.
يعني لا تتوقفوا عند هذا الدرس، اقرأوا، يعني في فرصة طويلة بين الدروس، ارجعوا اقرأوا في التفاسير، احفظوا الآيات، صلوا بها، صلوا، يعني ارجع راجع الآيات من أولها لغاية كل مرة بناخد صفحة أو صفحتين، راجع الآيات على بعضها وصلي بها، صلي بها النوافل، صلي بها قيام الليل. أسأل الله سبحانه وتعالى أن يفتح لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك، والسلام عليكم ورحمة الله وبركاته.