د. أحمد عبد المنعمإن الحمد لله نحمده ونستعينه ونستغفره، ونعوذ بالله من شرور أنفسنا وسيئات أعمالنا، من يهده الله فلا مضل له ومن يضلل فلا هادي له، وأشهد أن لا إله إلا الله وحده لا شريك له، وأشهد أن محمدا عبده ورسوله صلى الله عليه وسلم، بلغ الرسالة وأدى الأمانة ونصح للأمة، فما ترك خيرا إلا ودلنا عليه، وما ترك شرا إلا وحذرنا منه، فصلاة وسلاما دائمين من رب العالمين على أشرف المرسلين محمد صلى الله عليه وسلم.
يا أيها الذين آمنوا اتقوا الله حق تقاته ولا تموتن إلا وأنتم مسلمون.
أما بعد؛ أحبتي في الله، من رحمة الله عز وجل بالخلق كما نكرر دائما وأبدا أن الله عز وجل لم يتركهم سدى، بل أرسل إليهم الرسل وأنزل إليهم الكتب، هذا من رحمته ولطفه وكرمه ومنه سبحانه وتعالى أنه لم يتركنا سدى ولم يتركنا هملا، ولكن عرفنا الطريق وبين لنا حتى لا يكون لأحد بعد الرسل وبعد الكتب لا يكون لأحد حجة على الله عز وجل، الله عز وجل بين لنا الطريق ووضح لنا وهدانا النجدين، فالانسان يرى ويختار على بينة، كما قال ربنا سبحانه وتعالى: ﴿وَمَا كَانَ اللَّهُ لِيُضِلَّ قَوْمًا بَعْدَ إِذْ هَدَاهُمْ حَتَّىٰ يُبَيِّنَ لَهُم مَّا يَتَّقُونَ﴾ [التوبة: 115]، أي هو يهديهم أولا ثم يبين لهم طريق الضلال ثانيا، ويحذرهم ويعلمهم كيف يتقون طريق الضلال، ثم هم يختارون طريق الضلال والعياذ بالله.
فمن رحمة الله عز وجل، لابد أن يفرح الإنسان بالقرآن، إن هذا القرآن محفوظ، أن الله عز وجل حفظ هذا القرآن من التغيير، وأن الله عز وجل قيض رجالا لحفظ سنة النبي صلى الله عليه وسلم، نكرر دائما هذا المعنى حتى يكون المؤمن على فرح دائما من هذه النعمة العظيمة.
معنا اليوم سورة من كتاب الله عز وجل هي سورة قصيرة، آياتها ثلاث آيات، لكن احتوت على المعاني العظيمة، هذه سورة كما قال الإام الشافعي لو تدبر فيها المسلمون لفتتهم، سورة العصر.
يقول الله عز وجل: بسم الله الرحمن الرحيم، ﴿وَالْعَصْرِ * إِنَّ الْإِنسَانَ لَفِي خُسْرٍ * إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾ [العصر: 1-3].
هذه السورة أول لما تفتتح أول آية في السورة تفاجأ أن الله عز وجل يقسم، والملك سبحانه وتعالى لا يحتاج إلى قسم، فإذا أقسم فإنه يقسم بعظيم أو يقسم بشيء يغفل عنه الناس فحتى ينبهنا الله عز وجل إليه، أول لما تفتح السورة تفاجأ بقسم من الملك سبحانه وتعالى، هو يقول: ﴿وَالْعَصْرِ﴾، ﴿إِنَّ الْإِنسَانَ لَفِي خُسْرٍ﴾.
ما معنى كلمة العصر؟ يعني إيه كلمة العصر؟ وقفوا عند هذه الكلمه وقفات طويلة، أن عشان نفهم كلمة العصر نفهم إيه سبب خسارة الإنسان وكيف ينجو الإنسان، ثم النظر في السورة التي قبلها والسورة التي بعدها يتضح لنا أهم أسباب الخسارة وكيف ينجو الإنسان من هذه الخسارة.
العصر قيل: اللي هو العصر توقيت العصر آخر وقت اليوم، اليوم بيخلص المغرب والليل يبدأ، آخر وقت اليوم اللي هو العصر، وقيل: العصر كل الأزمنة وكل الدهور من يوم خلق الله عز وجل الزمان إلى أن تقوم الساعة، كل ده عصر، وخاصة آخر التوقيت، تخيل كأن ربنا سبحانه وتعالى أنت بتفتح كده السورة لقيت اليوم بيخلص، لقيت الشمس خلاص بتغرب، لقيت الزمان خلاص بينتهي، خلاص قاربنا على النهاية، كأنك داخل صالة الامتحان في آخر عشر دقائق وكل الطلبة قاعدين منهمكين وكله قاعد بيحل، فتفاجأ أن ربنا سبحانه وتعالى يقسم أن في آخر التوقيت ولم يبق إلا لحظات وينتهي الابتلاء وينتهي الامتحان، ثم يخبرنا الله عز وجل بنتيجة حتمية قطعية لهذا الامتحان، أن أغلب الناس خسروا، أغلب الناس رسبوا، إن الإنسان استغراق أو جنس الإنسان أغلب الناس خسرت في الامتحان، كأن النتيجة أنت قاعد مستني خلاص فاضل لحظات والامتحان يخلص.
لذلك قيل أن العصر من معانيه أنك بتعصر حاجة، العصير يتسمى عصير لأنك بتعصر الفاكهة فتنزل اللي فيها، عصر الثياب أنك تضغط على الثياب فتنزل ما فيها، فكأن الزمان لابد أن تعصر أنت الزمان أو يعصرك الزمان، أما أن تعصر أنت الزمان فتخرج كل طاعة في كل لحظة، أو يقطعك الزمان ويعصر الزمان ويمر بك وانت لا تشعر.
لذلك تفهم حديث النبي صلى الله عليه وسلم: «من حلف على يمين كاذبة بعد العصر ليقتطع بها مال امرئ مسلم لقي الله وهو عليه غضبان»، فالعلماء بيقولوا طب ما أي يمين كاذبة سواء بعد العصر أو عصر جريمة ذنب عظيم، لكن بعد العصر المفروض ده التوقيت اللي في آخر اليوم اللي بتنشغل فيه، ده آخر وقت الامتحان، أنت مشغول بالطاعات، مشغول بالذكر، أنت قاعد المفروض الآن مشغول بنهاية الامتحان بنهاية اليوم، أنت هتسلم ورقة اليوم خلاص، ورقة اليوم هتترفع، تقوم تحلف كذب.
لذلك ابن حجر بيقول لأن الأعمال بالخواتيم، وانشغل في الخواتيم بالكذب وبالدنيا بدل ما ينشغل، تخيل أنت داخل واحد في صالة الامتحان وفاضل عشر دقائق وما حلش في الورقة وقاعد بيلعب، ده مستهزئ، ده بدل ما في آخر اللحظات يبكي ويتضرع على الله عز وجل أن يعفو عنه.
لذلك ساعة الإجابة يوم الجمعة آخر ساعة بعد العصر قبل المغرب، آخر ساعة في اليوم ليه؟ المفروض المؤمن في اللحظة دي يصل إلى قمة التضرع، خلاص هيسلم ورقة يوم الجمعة، هيسلم الأسبوع كله هيترفع خلاص ويبدأ الأسبوع الجديد فيدعو ويتضرع فربنا يستجيب له هنا عشان يغفر له بقية الأسبوع.
يبقى العصر أنك لازم تعصر الزمان، الزمان بيعدي، كان بعض السلف يقول: لم أفهم هذه السورة إلا حينما رايت بائع ثلج واحد معه ثلج بيبيعه يسير ويقول: أيها الناس ارحموا من يذوب رأس ماله اشتروا مني بسرعة الثلج لو سيح خلاص ارحموا من يذوب رأس ماله، فلما سمعتها تذكرت العصر، خلاص العصر بيخلص، الوقت بيخلص، الزمان بينتهي، فيقول: فتحسرت على نفسي، عرفت أن الزمان بيخلص الوقت بيمر.
تخيل أول لما اتولدت واتحطت جنبك ساعة بتعد عليك اللحظات، أنا أتعجب كيف يحتفل الناس بمرور سنة على عمرهم، ده المفروض يقعد بعد السنة دي يبحث اقتربت من القبر، الوقت بيمر.
العجيب أن ربنا بيقول ﴿وَالْعَصْرِ﴾ أي بعد مرور كل هذه الأزمنة أول العصر على مر الدهور، أول عصر بعد أن قارب وقت انتهاء الامتحان يقول الله: لم ينجح أحد، ﴿إِنَّ الْإِنسَانَ لَفِي خُسْرٍ﴾، والعجيب أنه يفرح عادي أن مرت عليه السنة لا يحاسب نفسه، يقسم الله أن على مدار الأزمنة على مدار الدهور والوقت بينتهي أن أغلب الناس في خسارة، ﴿إِنَّ الْإِنسَانَ لَفِي خُسْرٍ﴾.
خطورة الزمان، لذلك كان شعار بعض السلف لما يجي حد يقول له: اريد أن أسالك عايز أتكلم معاك، يقول له: اوقف الشمس، ما هو الزمان بيمر، اوقف الشمس عشان أعرف أتكلم معاك، فإن لم توقفها انطلقت، كانوا يحرصون على الوقت، ورؤي أن كان الصحابه كانوا يتواصون بعد ما يخلصوا مجلسهم وهم ماشيين يوصوا بعض بسورة العصر، بيذكروا بعض بقيمه الزمان، هتعمل ايه بعد ما هتمشي من المجلس؟ هتعصر، خرج ما فيه من أعمال.
ذلك اللي بينجو في السورة: ﴿إِلَّا الَّذِينَ آمَنُوا وَعَمِلُوا الصَّالِحَاتِ﴾ مش وعملوا صالحا، عملوا كل الصالحات اللي يقدر عليها، لذلك ابن عباس بيقول في تفسير قول الله عز وجل: ﴿إِنَّمَا نَعُدُّ لَهُمْ عَدًّا﴾ [مريم: 84]، عمرك بيتعدى بايه؟ قال: بالنفس، عمرك محسوب بعدد الأنفاس، فتاخد شهيق يبقى انت خلصت، ما تعرفش تطلع الزفير تموت، العمر مش محسوب حتى بالسنين ولا بالأيام، لا بمجرد النفس يعد، ﴿إِنَّمَا نَعُدُّ لَهُمْ عَدًّا﴾، كل واحد معدود له عدد الأنفاس اللي هياخدها من الهواء إلى أن يموت أمر محسوب.
﴿إِنَّ الْإِنسَانَ لَفِي خُسْرٍ﴾ يؤكد الله عز وجل بالتأكيد أن ون، ﴿إِنَّ الْإِنسَانَ لَفِي خُسْرٍ﴾، ما قالش إن الإنسان خسران، قال: إن الإنسان في خسر، الخسارة بتحيط به من جميع الجوانب، كأن انسان وقع في برميل خسر، كده ﴿إِنَّ الْإِنسَانَ لَفِي خُسْرٍ﴾ خسارة بتحيط بيك، بمعنى كل اللي حواليك بيساعدك انك تخسر، أغلب اللي حواليك بل أقرب الناس ليك للأسف قد يكون له دور في خسارتك، إن الإنسان لفيه محاط بالخسارة.
لذلك لما تشوف السورة التي قبل سورة العصر: ﴿أَلْهَاكُمُ التَّكَاثُرُ * حَتَّىٰ زُرْتُمُ الْمَقَابِرَ﴾ [التكاثر: 1-2]، والسورة التي بعد سورة العصر: ﴿وَيْلٌ لِّكُلِّ هُمَزَةٍ لُّمَزَةٍ * الَّذِي جَمَع مالًا وَعَدَّدَهُ * يَحْسَبُ أَنَّ مَالَهُ أَخْلَدَهُ﴾ [الهمزة: 1-3]، تجد خاصيتين في السورتين، فهي سورة بين سورتين، السورتين اللي قبل سورة العصر وبعد سورة العصر تعرفك أهم أسباب الخسارة، وذكر سببين:
السبب الأول: الانشغال بالناس، ما هو ﴿أَلْهَاكُمُ التَّكَاثُرُ﴾ التكاثر يعني عايز يكاسر الناس، التكاثر ما بين الاثنين يعني عايز يقول للي قدامه أنا أكثر منك مالا وأعز نفرا، ده كل هدفه في الحياة هو كل اللي شاغله، مشغول عايز يبقى أحسن من ده وأفضل من ده، ومعاه عربية أحسن من ده وتليفون أفضل من ده، هو عايز يبقى أكثر من الناس مالا وولدا، كتير من الناس يبقى راضي أول لما جاره أو صديقه أو قريبه يبقى معاه أكثر منه يتضايق، طب ما انت كنت راضي، فيكثر ﴿أَلْهَاكُمُ التَّكَاثُرُ﴾.
وسورة الهمزة مشغول بناس بيستهزئ بهم، قاعد بيتريق على الناس ويستهزئ بالناس، فانشغل الأول مكثرا، وانشغل الثاني مستهزئا، انشغل الأول مكثرا عايز يبقى أكثر منهم، وانشغل الثاني مستهزئا مستهزئا، ده أول سبب للخسارة أنك قاعد مشغول بالناس.
ثاني سبب: جمع الدنيا ﴿أَلْهَاكُمُ التَّكَاثُرُ﴾ قاعد بيجمع، والثاني ﴿الَّذِي جَمَع مالًا وَعَدَّدَهُ﴾، أهم سببين للخسارة: مشغول بالناس وجمع الدنيا ولا يشبع لدرجة أنه وصل في مرحلة في سورة الهمزة ﴿يَحْسَبُ أَنَّ مَالَهُ أَخْلَدَهُ﴾، معتقد أن الفلوس هتخليه يخلد، معتقد أن الدنيا هتخليه مش هيموت، فيجمع أكثر عشان يعيش أكثر، وكل ما يجمع مال أكثر يظن أنه يعيش أكثر.
سورة التكاثر قالت له: لتسألن يومئذ عن النعيم، سورة الهمزة قالت له: بعد ما هتتسلم هتترمى في الحطمة ﴿لَيُنبَذَنَّ فِي الْحُطَمَةِ﴾ [الهمزة: 4]، الحطمة اللي هتكسر، هتحطم.
لذلك قيل همزة الهمزة همزة لمزة يعني بيستهزا على الناس، وبالتالي عليهم كان بيكسر نفسيتهم، كان بيكسر يعني مشاعرهم، كان يجرحهم فيتكسر في جهنم والعياذ بالله، زي ما كان يحطم الناس ويستهزئ بهم يلقى في الحطمة والعياذ بالله.
ما بين السورتين ربنا بيقول لك في نموذج مشغول بالناس أيضا ولكن ينجو، طب ازاي؟ ازاي ما أنا كده كده مرتبط بالناس؟ قال لك: انشغل بالناس تنصح لهم ﴿وَتَوَاصَوْا بِالْحَقِّ وَتَوَاصَوْا بِالصَّبْرِ﴾، أنت كده كده عايش وسط الناس، مش هينفع تتركهم وتمشي، ده ربنا بيقول لك: ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ﴾ [التغابن: 14]، يعني قد يكون سبب خسارتك زوجتك وأولادك إن لم تبدأ لهم بالنصيحة بدأوا هم معك بالخسارة، كذلك الناس لو انت ما كنتش المغير هم اللي هيغيروك.
﴿وَالْعَصْرِ﴾ لابد أن تعصر الزمان، الوقت بينتهي، أصلا وقت العصر يقال إنه يتسمى العصر لأن خلاص اليوم بيتعصر ما عادش فيه غير آخر شوية، فاخر وقت موجود في اليوم ده خلاص، ده عصارة اليوم بعد ما اليوم خلاص بيخلص آخر ما فيه.
فاستشعر قرب النهاية، استشعار خلاص انتهاء وقت الامتحان ﴿إِنَّ الْإِنسَانَ لَفِي خُسْرٍ﴾ لم ينجح أحد، إلا الذين امنوا، دايما لما يجي الاستثناء ده تعرف أن العدد قليل، يعني لو الفصل فيه مائة واحد مدرسة فيها مائة طالب فكله مستني نتيجة فيطلع المدير يقول الننتيجة: لم ينجح أحد، فالكل يبكي فيقول إلا، المدير يقول إلا متوقع مش هينفع يقول إن لم ينجح أحد إلا تسعين واحد، لا كان هيقول كله نجح إلا عشرة، فدائما المستثنى قليل ينجو من كل الألف واحد ويسقط تسعمائة وتسعة وتسعون في جهنم، نسبة مرعبة، تخيل لما ربنا يقول إن الإنسان لفي خسارة، الكل يبكي، إلا، إلا مين يا رب عشان أنجو؟ ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾.
تعال نشوف أسباب النجاة في السورة، أسباب النجاة من الصور اللي قبلها: ألا تنشغل بالناس مستكثرا ولا مستهزئا، لا تنشغل أنك تكثر الناس ولا تنشغل أنك تستهزئ بالناس، ودايما السبب الأولاني بيؤدي للتاني، اللي بينشغل بالناس عايز يبقى أكثر منه، بعد ما يبقى أكثر منه يروح يستهزئ بيه، خلاص ما هو بقي معه قوة عليه فيستهزئ به.
لذلك من أول المعاصي اللي وقعت في بني آدم: ﴿وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا فُتُقُبِلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ قَالَ لَأَقْتُلَنَّكَ﴾ [المائدة: 27]، كان مشغول بأخيه، بعض الروايات زي ما ذكر الإمام الطبري قال: تسير بين الناس يقولون تقبل منك ولم يتقبل مني والله لأقتلنك، أنت عايز الناس تقول عليا إيه أنا أقتلك عشان ما يبقاش في حد كويس زيك، اخرجواهم من قرية انهم، عشان ما يبقاش الناس بتعيرنا أن في ناس نظيفة موجودة فانا أقتلك، زي ﴿اقْتُلُوا يُوسُفَ أَوِ اطْرَحوهُ أَرْضًا﴾ [يوسف: 9] مش قادرين يعملوا اللي بيعمله يوسف من البر، خلاص ﴿اقْتُلُوا يُوسُفَ أَوِ اطْرَحوهُ أَرْضًا يَخْلُ لَكُمْ وَجْهُ أَبِيكُمْ﴾، لانشغال بالناس قد يؤدي إلى قتله، عايز يكاسر الناس، الغل والحسد لما بيسيطر على إنسان لا يرى شيء في الدنيا إلا أن يكاسر هذا الشخص، عايز يبقى أكثر منه، وبعد ما يبقى أكثر منه يهمز به ويلمس به الهمزة اللمزة، خلاص ويجمع المال ويظن أن هذا المال يخلده في الدنيا.
دي الأسباب الانشغال بالناس مكاثر أو مستهزئا سورة التكاثر وسورة الهمزة، أو جمع الدنيا دي أسباب الخسارة.
أسباب النجاة داخل السورة، طبعا من أول لحظة والعصر استغلال كل لحظة في حياتك، قال النبي صلى الله عليه وسلم صلوا عليه صلى الله عليه وسلم: «نعمتان مغبون فيهما كثير من الناس».
يعني إيه مغبون الأول؟ يعني واحد غبننا في حاجة. الغبن غير الخسارة، الغبن أفحش من الخسارة. يعني لو واحد معاه عربية مثلاً بـ 200 ألف وباعها بـ 170 ألف، ده نقول خسر فيها. إنما لما يُبيع عربية بـ 200 ألف ويبيعها بـ 10 آلاف، نقول ده غبن في العربية. الغبن الخسارة الفاحشة. لذلك في حاجة في الفقه اسمها خيار الغبن؛ أن البائع لو بيبيع وما عندوش خبرة وضحك عليه وخسر خسارة فاحشة، نرجع له السلعة بتاعته لأنه بيبقى سفيه المفروض يحجر عليه أصلاً. اللي يبيع حاجة بغبن ده المفروض يكون سفيه ما يبيعش.
لذلك لما بعض الصحابة أُصيب في غزوة من الغزوات في رأسه، مُنقذ بن حُبَان، وأصابته لوثة، يعني كان أصابه شيء في عقله، وكان يحب البيع، فكان يروح يبيع فالناس تضحك عليه. فأهله حجروا عليه، منعوه من البيع. فراح اشتكى للنبي صلى الله عليه وسلم، يحب البيع لكن ما بيعرفش يبيع. فقال النبي صلى الله عليه وسلم قال له: اشترط أثناء البيع، قال: قُل لا خِلابَة وليَ الخِيَارَة ثلاثة. لا خلابة يعني ما حدش يضحك عليا، أنا واخد إذن من النبي صلى الله عليه وسلم، واللي هيضحك عليا قدامي 3 أيام أراجع أهلي عشان أرجع البيع. الشاهد أن اللي يبيع بغبن ده سفيه يُحجر عليه.
النبي صلى الله عليه وسلم يقول في كثير من الناس معاها نعم، بتبيعها بالغبن، ما هي يا رسول الله؟ قال: الصحة والفراغ. الوقت والاستطاعة. الليل جه، الساعة جت 11، 12، 10 بالليل لغاية الفجر، أنت عندك وقت وتقدر تقوم تصلي قيام ليل وما تصليش قيام ليل، أنت كده غبنت، كده المفروض يحجر عليك. كده الإنسان الأوقات اللي بتضيع بدون ذكر ده مغبون، وقت واستطاعة، ممكن يذكر ربنا، ممكن يخدم الناس، ممكن يعمل أعمال صالحة، ممكن يصلي، ممكن ينفع العالمين، أي شيء.
لذلك عمر بن الخطاب يقول: لا أحب أن يجلس الرجل سَبَهْلَلاً؛ لا في أمر دين ولا في أمر دنيا. وكان عمر بن الخطاب يعجبه الرجل، يشوف واحد كده يحس أنه راجل فيتبعه، فإذا علم أنه لا في أمر دين ولا في أمر دنيا وقع من عينه، خلاص ده ما عادش ينفع، مش هستعمله. لازم الإنسان، لذلك يقول الله عز وجل حتى للنبي صلى الله عليه وسلم: ﴿فَإِذَا فَرَغْتَ فَانصَبْ * وَإِلَىٰ رَبِّكَ فَرَرْغَب﴾ [الشرح: 7-8]. أول لما توصل لمرحلة الفراغ، أياً كان الفراغ بعد جهاد، بعد صلاة، بعد طاعة، بعد عمل دنيوي، بعد الدعوة إلى الله، ما ينفعش المسلم يمكث في الفترة دي طويلاً، فترة الفراغ دي.
لذلك قال له: فَإِذَا فَرَغْتَ، ما قالوش ثم انصب، فَإِذَا فَرَغْتَ فَانصَبْ مباشرة. ومش فَإِذَا فَرَغْتَ فَسَمِّ الله بقى وابدأ فكر في عمل جديد، انصب اجتهد على طول، اخرج من عمل إلى عمل، ما تنتظر هتعمل إيه. ذلك أحد التلامذة اللي كان بيطلع الأوائل في الكليات، طالب الجامعات، كان بيطلع الأول على الدفعة، فقام دكتور في الجامعه عايز يعرف الناس إيه سبب أن ده بيطلع الأول، وما كانش متفق معه ولا حاجة، لكن هو فاهم؛ لأن الدكتور ده كابد وعارف إيه سبب أنه يطلع الأول.
فوقف الطالب قدام الناس، قال له: قول لي يا أبني أنت يوم الثلاثاء بعد العصر عندك إيه؟ قال له: عندي كذا وكذا. قال له: يوم الخميس بعد المغرب؟ قال له: عندي كذا. قال له: الجمعة بعد العشاء؟ قال له: عندي كذا. قال لهم: هو عشان كده بيطلع الأول؛ عشان ما فيش حاجة اسمها وقت فراغ، كل وقت عارف هو بيعمل إيه، هو بيحدد هعمل إيه. كذلك الأوائل يوم القيامة عارفين هم بيعملوا إيه، ما عندهمش وقت ضايع، ما عندهمش وقت فراغ. فَإِذَا فَرَغْتَ فَانصَبْ، خلي هذا النصب طلب لرضا الله، حتى لو عمل دنيوي أحسن فيه وأتقن فيه وتقرب به إلى الله. فَإِذَا فَرَغْتَ فَانصَبْ وَإِلَىٰ رَبِّكَ فَرَرْغَبْ، خلي كل رغبتك الداخلية إلى الله عز وجل، كل مشاعرك بتتوجه لرضا الله عز وجل، وَإِلَىٰ رَبِّكَ فَرَرْغَبْ.
المؤمن لا يمكث في هذه الفترة طويلاً، لو أُصيب بها على طول يفزع؛ إزاي قاعد ما وراش حاجة؟ أنا مغبون، مغبون! أنا عايزك تتخيل مشهد اللي معاه عربية بـ 200 ألف وبيبيع بـ 5 آلاف، هو ده! الناس اللي معاها وقت وصحة وما بتعملش بها حاجة، نازل يضيع وقت، ده بالضبط هو المخبون، ده اللي المفروض يحجر عليه؛ أنه بينفث هذه الأثمان الغالية اللي يوم القيامة هيتحسر، هيتحسر على اللحظة.
ده من عجيب فقه الأئمة؛ قرأت الإمام ابن المبارك سُئل سؤال فقهي، مسألة فيها خلاف، لو المأموم دخل على الإمام والإمام في السجود، هل ينتظر ولا ما ينتظر؟ المسألة فيها حديث ضعيف: أن اللي يدخل يدرك الإمام أياً كان، وده الراجح أنه يدرك الإمام. الشاهد، ابن المبارك بيسألوه، بيقوله: لو واحد دخل على الإمام ولقاه ساجد، يستنى لما يرفع من السجود ويقف للركعة ولا ينزل يسجد؟ ما هو كده كده الإمام هيطلع فاستنى وخلاص، وكده كده الركعة راحت عليا. ولا أنزل أسجد؟
قال: فليسجد، وما يدري لعلها أن يُغفر له بسبب هذه السجدة. وما يدري دي ممكن تبقى آخر سجدة، وممكن يُغفر له بسببها! قال: فليسجد، يلحق بسرعة السجده. كل طاعة بتعدي، لما كانت الجنازة تعدي كان يبكي ابن عمر يقول: كم فرطنا من قراريط! قاعد يضرب الحصى في الأرض ندمان، كل جنازة عدت حس أنه ضيعها، كان عايز يسير وراها. ده كان شعور الصحابة وشعور السلف بمرور الأوقات، هو بيعتذر أن الوقت بيعدي. ابن الجوزي بيقول: تمنيت أن كل نفس لي خزانة أضع فيها الحسنات. مش عايز، مش عايز يعمل حسنات في الساعة، عايز يعمل حسنات بعدد الأنفاس! كل نفس يبقى خزانة يضع فيه الحسنات.
بعض العلماء المعاصرين مقسم اليوم بتاعه، كل ثلث ساعة بيعمل حاجة، وأنا رأيت ذلك بعيني، تروح له ثلث ساعة تلاقيه يجلس مجلس علمي، الثلث ساعة اللي بعدها مجلس آخر، الثلث ساعة اللي بعدها. أنت ممكن تقعد 3 ساعات وتلاقي إيه اللي حصل؟ إحنا صلينا العصر وبعدين لقينا المغرب أذن، مغرب إيه ده! إحنا النهارده الجمعة، بنحس أن بكره الخميس، أن الأسبوع بيمر ولا نشعر.
لكن اللي بيعصر الوقت عصراً يعرف قيمة كل لحظة؛ يراقب الشمس قاربت على الغروب، ده معاد الأذكار، ده معاد القيام، ده معاد الصلاة، ده معاد الذكر، ده معاد صلة الرحم، ده معاد خدمة الناس وإطعام المساكين، ده معاد العمل أنه يعمل وياكل من عمل يده. ده المؤمن ما عندوش حاجة اسمها وقت فراغ، ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾ [العصر: 3]. نفصل فيهم بعد جلسة الاستراחה.
أقول قولي هذا وأستغفر الله لي ولكم.
الحمد لله وحده، والصلاة والسلام على من لا نبي بعده، محمد صلى الله عليه وسلم. ﴿وَالْعَصْرِ * إِنَّ الْإِنسَانَ لَفِي خُسْرٍ﴾ [العصر: 1-2]. أقسم الله عز وجل حتى لا يشك أحد ولا يرتاب أحد ولا يجادل أحد على قيمة الزمان اللي بيمر وينتهي الوقت، أن أغلب الناس خسران، إلا مين يا رب؟ ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾ [العصر: 3].
العجيب أن ربنا ما قالش أن الإنسان لفي خسر إلا الذي آمن وعمل صالحاً ووصى بالحق ووصى بالصبر. ربنا ما قالش كده مع أن كان السياق يحتمل كده، أن هو إن الإنسان لفي خسر إلا الذي آمن. قال إلا إيه؟ ﴿الَّذِينَ﴾، أول سبب النجاة: الاجتماع البيئة الصالحة، أهل المساجد، أهل الدين، الصُحبة الصالحة، أول سبب النجاة. وكأن ربنا بيقول لنا: الأصل أن الإنسان مش هيجلوحده، أنت في طلب الهداية بتقول: ﴿اهْدِنَا الصِّرَاطَ الْمُسْتَقِيمَ﴾ [الفاتحة: 6].
يبقى أهم أسباب الخسارة: البعد عن بيئة الإيمان، البعد عن الصحبة الصالحة. النصيحة الوحيدة اللي أعطاها العالم إلى القاتل، العالم إلى قاتل المائة، قال له: اترك أرضك فإنها أرض سوء، وانطلق إلى أرض كذا وكذا فإن بها أناساً يعبدون الله فاعبد الله معهم. عايز ينقله من الخسارة للنجاح قبل ما يقوله آمنوا وعملوا الصالحات وتواصوا بالحق وتواصوا بالصبر، هو لسه في الأول، قال له: ﴿الَّذِينَ﴾، قال له: خليك مع الذين دول، وأنت بعد كده هتمشي لوحدك.
وقاتل المائة فرقت معه شبر! يعني لو كان تأخر، شوف بقى قيمة العصر، قيمة الوقت، لو كان تأخر وهو ماشي ده، الشبر ده تقريباً الخطوة بتاعة الرجل، تقريباً ثلاث أشبار، يعني لو كان تأخر ثلث خطوة كان دخل النار! شبر واحد فرق معه وهو ماشي في نص الطريق مات، فربنا نزّل الملائكة تقيس ما بين مكان الموت ومكان الأرض الصالحة ومكان الموت ومكان الأرض الفاسدة، وجدوه أقرب إلى الصالحة بشبر.
زي ما بيقولك ابن المبارك، بيقولك: الحق ولو جدة، أدرك ولو تسبيحة، ما فيش حاجة اسمها الموضوع خلص. عندنا قضاء حاجة، اللي تفوتك، كان النبي صلى الله عليه وسلم إذا فاته حزبه أو نام عنه حزبه من الليل قضاه بالنهار، قيام الليل. شوف ولو شبر! إياك انك أنت تأخر، إياك انك تأخر، اللي سمع الأذان ينزل حتى لو بعد كده الإقامة، ينزل، ولو بعد الصلاة يصلي في المسجد، يعود نفسه على ذلك.
كثير من الناس مقاييسها مختلفة، اللي هيمشي مع تقييمات الناس هيضيع. يقول أحد السلف: فاتتني تكبيرة الإحرام فعزاني واحد، ولو مات لي ولد لعزاني مئة! الرجل بيستنكر، إزاي تفوتني تكبيرة الإحرام واللي يعزيني واحد بس؟ إزاي، مع أن أنا مشهور، أنا لو ابني مات 100 ألف واحد هيعزيني. شوف أن الناس ممكن تغير طريقة تفكيرك في الحياة، فأنت لازم تروح لبيئة صالحة تساعدك انك تبحث عما ينفعك، ما تضيعش وقتك.
يبقى رقم واحد عشان ما تخسرش في الصورة: استغلال كل لحظة في حياتك. رقم اثنين: اللحاق بالبيئة الصالحة، وبالتالي البعد عن البيئة الفاسدة. طول ما أنت بتحاول وأنت في البيئة الفاسدة، أنت عامل زي اللي بيغتسل وهو في المستنقع، كل ما يتطهر كل ما ثيابه يصيبها النجس. لازم تترك أول كلمة قال له: اترك. الكلمه اللي إح1نا مش عايزين نسمعها، الكلمة اللي ثقيلة على قلوبنا: كلمة اترك. لكن دي سبب النجاة الأول: اترك أرضك فإنها أرض سوء، فإنها أرض سوء.
﴿إِلَّا الَّذِينَ آمَنُوا وَعَمِلُوا الصَّالِحَاتِ﴾. الإيمان، حتى لا أطيل، الإيمان اللي هيغير نظرتك عن الوقت. الإيمان هو اللي هيخليك تعرف قيمة الجنازة اللي معدية، هتتخيل الإيمان هيخليك تتخيل منظر الجنازة ماشية، جبل أحد حسنات ماشي. الإيمان هيخليك تتخيل مشهد المريض أنه جنة بتتمشي فيها وأنت رايح تزوره. الإيمان هيخليك تتخيل الأذى اللي بتشيله من الطريق أنك بتترقى في سلم الإيمان.
الإيمان هيغير نظرتك عن أفعالك، عن أوقاتك. الإيمان هيخليك تغير جدول مواعيدك، ما عداش بتقول للناس الساعة 3 و4 و5 و5 إلا ربع، لا، هتقول للناس المغرب بعد العصر بعد الفجر، كلامك ومواعيدك ومصطلحاتك ومفاهيمك هتتغير، ده الإيمان. انك ترجع تاني تتعامل بما يريد الله عز وجل، كأنك أنت خلاص بتمسح طريقة التفكير القديمة وبتنزل طريقة التفكير الجديدة تماماً. ﴿الَّذِينَ آمَنُوا﴾، أول لما الإيمان جه، انطلق في الأعمال، ﴿وَعَمِلُوا الصَّالِحَاتِ﴾.
كان مشهد واحد كان نايم في البيت والبيت بيولع، أول حاجه عملها أنه صحي، هي دي آمنوا عملوا صالحات. الصالحات من الإصلاح، أنه أصلح الإفساد، أنه قاعد يجري يحاول.
رقم ثلاثة: لازم يصحي الناس. كما أن الله عز وجل منّ عليك باليقظة فأيقظ الناس. أوْعى تسيب الناس! من أهم أسباب النجاة أنك تصحي الناس، أوْعى تنشغل بالناس أنك تكاثرهم في الدنيا زي سورة التكاثر، أوْعى تنشغل بالناس أنك تستهزئ بهم زي سورة الهُمَزة، خلي انشغالك بالناس أنك تنقذهم. سُئل ابن سيرين: ما القلب السليم؟ قال: أنصح الناس للخلق. ده اللي قلبه سليم، اللي بيحب الناس جداً ونفسه ينصحهم ونفسه الناس كلها تبقى كويسة، ده اللي قلبه أنصح الناس للخلق، هو ده اللي قلبه سليم.
﴿وَتَوَاصَوْا بِالْحَقِّ﴾. يصحي الناس، اعرف أن دي مهمة صعبة، فربنا بيقول لك: أصبر. أصبر، النجاه من الخسارة مش سهلة، اللي حواليك عايزينك تخسر، حتى لو غصب عنهم، ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ﴾ [التغابن: 14]. التكاثر اللي في الدنيا اللي حواليك هيفتكروا، وممكن تبقى من اللي عملوا الصالحات ومن اللي تواصوا بالحق، لكن ما تعرفش تصبر، فالثلاثة يقعوا منك!
دائماً خط البداية زحمة، لكن خط النهاية اللي بيوصل في آخر السباق قليل. لو إحنا أتكلمنا عن أهمية حفظ القرآن وقلنا خطبة، وجبنا أحد المشايخ قال لنا خطبة، كلنا قعدنا نبكي عن أهمية حفظ القرآن، وقلنا مين هيحفظ القرآن؟ الاستمارات، حفظ القرآن، هتلاقي المسجد كله بيقدم طلبات حفظ القرآن. لكن السنة اللي بعدها مين كمل حفظ القرآن؟ تجد بعد ما كان عندنا 5000 طلب مثلاً، اللي كمل ثلاثة أربعة، وده الصبر! مين اللي بيكمل للاخر؟
سهل جداً انك تاخد قرار النهارده: أنا هحافظ على الصلوات في المسجد، وتستعين بالله. لكن مين اللي هيصبر؟ لذلك ربنا قال: ﴿وَتَوَاصَوْا﴾، ما قالش ووصي. يعني إيه وتواصوا؟ يعني أنت النهارده بتوصي، بكره في واحد بيوصي، وتواصوا يعني الناس بتوصي بعض. لا أحد، لذلك بيقولون: لا أحد أكبر من أن يُوصى، ولا أحد أقل من أن يوصي، ده معنى وتواصوا. لا أحد أكبر من أن يُوصي، ما فيش حد كبير على النصيحة، ولا أحد أقل من أن يوصي، أوْعى قال لنفسك تقول: هو أنا مين عشان أنصح؟ لا أنصح، ده من أسباب النجاة، الأمر بالمعروف والنهي عن المنكر.
يعني اللي هيصلي ويقيم الليل ويذكر ربنا وما يأمرش بمعروف وينهى عن المنكر خسران برضه. اللي مش هيصلح أحوال الناس أيضاً خسران، اللي مش هينشغل بإصلاح بيته وزوجه وأولاده وأقاربه أيضاً في خسارة.
وتواصوا بالحق وتواصوا؛ أنت النهارده نشيط، بكره أنت ضعيف، أقول لك أنت محتاج بقية الإيمان. أنا النهارده بوعظ، بكره محتاج حد يوعظني، أنت النهارده بتقول النصيحة، بكره محتاج حد يقولها لك. أنت النهارده شفت واحد غضبان، قلت له: اذكر الله واستعذ بالله من الشيطان الرجيم. بكره أنت هتبقى غضبان، وهو يقول لك: استعيذ بالله من الشيطان الرجيم. هو ده الناس، الإنسان دايما متقلب، لذلك محتاج إنه لما يسقط، يبقى في بيئة إيمانية تلحقه، مش لما يسقط ناس تبقى فرحانة إنه وقع وخلاص، رجع تاني زيه زينا، ورجع خلاص ما عادش حد ينصحنا ولا يوجع دماغنا.
لا؛ لازم تكون في بيئة إيمان. إذاً أحبتي في الله، حتى لا أطيل عليكم، هذه السورة القصيرة الثلاث آيات، أول لما تفتحها تحس إن الوقت بيخلص، إن اليوم بيخلص، إن الزمن بيخلص، وإن القيامة اقتربت، ويقسم الله بآخر لحظات الامتحان: ﴿وَالْعَصْرِ﴾ [العصر: 1]. إيه النتيجة يا رب؟ لم ينجح أحد، ﴿إِنَّ الْإِنسَانَ لَفِي خُسْرٍ﴾ [العصر: 2]. أبداً يا رب؟ لا، عدد قليل ينجح، مين هم؟ اللي حافظوا على الأربع حاجات: ﴿إِلَّا الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ﴾ [العصر: 3]. ولم يكونوا من المتكاثر، ولم يكونوا من الهمّازين اللمّازين، السورة اللي قبلها والسورة اللي بعدها كذلك ينجو الإنسان.
أسأل الله عز وجل أن ينجينا من الفتن. اللهم بارك لنا في أوقاتنا واملأها بطاعتك يا رب العالمين. اللهم بارك لنا في أعمارنا واملأها بطاعتك يا رب العالمين. اللهم هب لنا من أزواجنا وذرياتنا قرة أعين واجعلنا للمتقين إماماً. اللهم اجعلنا لك ذكارين شكارين صوامين قوامين، عليك متوكلين، إليك منيبين، أوَّاهين مخبتين يا رب العالمين. اللهم أعنا على ذكرك وشكرك وحسن عبادتك. اللهم أعنا على ذكرك وشكرك وحسن عبادتك، وبارك لنا في أعمالنا يا رب العالمين. اللهم استعملنا ولا تستبدلنا، اللهم اهدنا واهد بنا واجعلنا سبباً لمن اهتدى.
اللهم قيِّض لهذا البلد أمر رشد يعز فيه أهل طاعتك، يؤمر فيه بالمعروف وينهى فيه عن المنكر. اللهم حكِّم فينا كتابك، اللهم ولِّ علينا خيارنا ولا تولِّ علينا شرارنا. اللهم اصرف عن مصر الفتن وعن سائر بلاد المسلمين يا رب العالمين. اللهم ربنا آتنا في الدنيا حسنة وفي الآخرة حسنة وقنا عذاب النار. أقول قولي هذا واستغفر الله لي ولكم، سبحانك اللهم وبحمدك، أشهد أن لا إله إلا أنت، أستغفرك وأتوب إليك، وأقم الصلاة.