بسم الله والحمد لله والصلاة والسلام على رسول الله وعلى آله وصحبه ومن والاه وأشهد أن لا إله إلا الله وحده لا شريك له وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته كما صليت على آل إبراهيم إنك حميد مجيد. أما بعد.
في حاجات حلوة للأطفال. نوزع ولا ما نوزعش؟ طب اللي بيقول ما نوزعش يرفع إيده. طيب. الأطفال من سن سنة لسنتين. ماشي من الأطفال من أول اللي بيمشي لغاية 11 سنة ييجي. لو اتبقى بقى نوزع للي أكبر شوية. اتفضل يا حبيبي. اثنين بس؟ طفلين؟ ها؟ طب ما تقوم تعال. ها؟ مين تاني؟ مش عاوز صوت. مش عاوزين صوت. إحنا إحنا في مسجد. ده العيال مش عاملة صوت. أهلاً أهلاً. خد يا حبيبي. خد يا حبيبي. أهلاً يا حبيبي. خد يا حبيبي. زعلان ليه؟ اتفضل. خد خد خد خد أهو أهو. اللي وراك اللي وراك. ده أنت أنت المفروض تتجوز أنت 11 سنة. أنت اللي ورا أهو أهو. اتفضل يا حبيبي. ازيك. أهلاً أهلاً. خلاص. كله خلاص كده. العيال كترت كده النهاردة فين. وعليكم السلام. وعليكم. كله خد كده. طب.
12 سنة. 12 سنة يطلعوا بره. مفيش عيال صغيرة تقعدوا معانا في المسجد يلا. 12. مين أنت كام سنة. مين 12 مفيش 12. خلاص بقى. خدي خدي خدي. خلاص كده الباقي هناخده احنا بقى البيت. احنا. مين بيغرق؟ أنت. الصوت الصوت. الصوت بقى نبتدي الدرس. انبسطتوا وخلاص؟ نجلد؟ مش عاوزين صوت بقى خلاص. خد يا حبيبي. مش عاوزين بقى حركة، مش عاوزين حركة خالص في المسجد يلا، يلا كله يقعد، كله يقعد عشان نبتدي الدرس. كله يقعد. تقعد؟ يلا وصل، ادي ادي ورا للبنوته دي، حد يوصل للبنوته. ماشي كمان واحد للولد يلا يلا. خد يليك أنت اللي كنت. كله يقعد مش عاوزين صوت، مش عاوزين صوت، مش عاوزين صوت. شباب شباب. الصوت.
الانتحار كبيرة من أكبر الكبائر. وأظن احنا سمعنا أحاديث كثيرة في إيه عظم هذا الذنب. طبعًا يا جماعة عشان بس نفهم مسألة العقوبة في الإسلام؛ الله عز وجل قد يشرع العقوبة على فعل معين لأن هذا الفعل مقتضى الشهوة، فـهذه العقوبة تعينك على إيه مواجهة الشهوة ومحاربة الشهوة. فمن ذلك مثلاً عقوبة الزنا، الزنا النفس تشتهيه، فمن الأساليب التي يقنن الله أو تقنن أو تحجم مسألة الشهوة إن يكون في عقوبة على صرف هذه الشهوة في غير إيه ما أراد الله عز وجل أن تصرف فيه، فيبقى في حاجة اسمها عقوبة زنا.
طيب قتل النفس، واحد يقتل نفسه، في شهوة في ده؟ يعني إيه؟ عندنا شهوة إن احنا نقتل أنفسنا يعني؟ ما فيش شهوة في كده، مش كده؟ فمن العقوبات، عقوبات تكون على أشياء فيها افتئات على الله عز وجل، فيها افتئات على الله عز وجل. يعني إيه؟ يعني افتئات الأول؟ يعني إنك بتتعدى على ما اختص الله عز وجل به لنفسه، فالروح الله عز وجل هو الذي يأمر بها فتنفق وهو سبحانه وتعالى الذي يقبضها، فهذا الإنسان الذي يذهب يقتل نفسه يكون قد تعدى حدود العبودية.
طيب، طبعًا هذا في الظاهر، يعني إيه في ودي مسألة مهمة، يعني إيه في الظاهر يا جماعة؟ يعني هو بذلك يفتأت على الله عز وجل ظاهرًا، وإلا فهو أجله. يعني هو اللي قتل نفسه ده إيه مات قبل ميعاده، قبل أجله يعني؟ ما ماتش قبل أجله ولا حاجة، لكن في الظاهر افتأت على الله عز وجل، ولذلك جاء في الحديث: «بادرني عبدي بنفسه حرمت عليه الجنة». وهذا الحديث في الصحيح.
أن رجلًا إيه يعني ممن كان قبلنا إيه إيه قتل نفسه، فقال الله عز وجل ذلك: «بادرني عبدي بنفسه حرمت عليه الجنة». شوف شوف اللفظ صعب إزاي؟ وكذلك مما ورد في إيه الوعيد لهذه الفعلة. إيه والحديث طبعًا تكرر كثيرًا إيه الحقبة أو يعني الكم يوم اللي فاتوا أن النبي صلى الله عليه وسلم قال: «من قتل نفسه بحديدة فحديدة في يده يتوجأ بها في بطنه في نار جهنم خالدًا مخلدًا فيها أبدًا. ومن شرب سمًا فقتل نفسه فهو يتحساه في نار جهنم خالدًا مخلدًا فيها أبدًا. ومن تردى من جبل فقتل نفسه فهو يتردى في نار جهنم خالدًا مخلدًا فيها أبدًا». وهذا الحديث متفق عليه، يعني في أعلى درجات الصحة.
ولذلك الانتحار أو قتل النفس من أكبر الكبائر. إحنا النهار ده عاوزين إيه نتكلم شوية حوالين المسألة دي، والجزء الأكبر من الدرس هيكون في مسألة الأحاديث الواردة أو الأذكار الواردة في دفع الهم والحزن. ونقدر نعتبر هذا الدرس هو تكملة لدرس سابق، حد يعرفه؟ ها؟ هو ما كانش هنا بس اللي بيسمع بقى درس مهم جدا يا جماعة يتسمع، درس إني عبدك، ماشي؟ درس إني عبدك. خلونا الأول بس نبتدي كده يا جماعة بكم يعني إيه؟ بقواعد.
القاعدة الأولى زي ما إحنا قلنا إن قتل النفس ما هياش شهوة. قتل النفس ما هياش شهوة. إيه طبعا هو الدرس ده درس شائق شوية لأن هيسمعه اللي عاوز ينتحر وهيسمعه المصاب بأمراض نفسية ممكن تؤدي إلى الانتحار فالدرس شوية شائق، فإحنا عاوزين بداية كده أكرر الكلمة اللي ابتديت بيها؛ قتل النفس الانتحار من أكبر الكبائر، واللي بيقدم على هذه الفعلة بيراهن على حاجة خطيرة جداً، لأنه ما جاش وعيد في حاجة زي كده. خلاص؟ دي مسألة.
المسألة الثانية إنه قاتل نفسه أو قاتل يعني الإنسان اللي بينتحر يعني في خطر ثاني؛ إنه أي كبيرة أو حتى الشرك في مهلة إن الإنسان يتوب، مش كده؟ يعني واحد فعل كبيرة، إلا بقى أن يقبض وقتها دي قصة ثانية يعني، إنما واحد فعل كبيرة ممكن يتوب بعديها، كبيرة قتل النفس هيتوب إمتى؟ فهو يفعل كبيرة مافيش مهلة ولا فسحة أن يتوب منها، إنه بيقبض على تلك الكبيرة، فالموضوع خطير جدًا.
لكن إحنا بقى عاوزين نتكلم شوية حوالين المسألة دي. أول مسألة إنه قتل النفس مافيش شهوة فيها، فيبقى إحنا لما نشوف إنسان بيقدم على هذه الفعلة نعرف يعني بلاش فكرة الإيه؟ التعالي. هو إزاي عمل كده؟ لإنه لا إحنا شيلنا شيلته ولا إحنا عارفين ظروفه، وهذا ليس مبررًا -أنا معلش يعني الدرس هيبقى فيه احترازات كتير علشان إيه ما نخلص الدرس الناس تنتحر- يعني هذا ليس مبررًا لأن يفعل ذلك، لإنه برضه خدوا قاعدة كده. خدوا قاعدة في كتاب ربنا: طالما إبتليت بشيء يبقى أنت قده. ده فين في كتاب ربنا؟ ﴿لَا يُكَلِّفُ اللُّهَ نَفْسًا إِلَّا وُسْعَهَا﴾ [البقرة: 286]. فطالما إبتليت بشيء فأنت قده، قاعدة. تقول لا أنا مش قده، كذبت وصدق الله. كذبت وصدق الله سبحانه وتعالى.
لكن الحمل ممكن يبقى تقيل؟ آه ممكن يبقى تقيل جدًا. طب أنا دلوقتي بقى قاعد أنظر يعني ببص من فوق كده؟ أبدًا، أبدًا، بل نطأطئ رؤوسنا علشان لا نبتلى، لا نبتلى، لأن إحنا دايمًا الناس بتنقسم لأقسام في مقابلة هذه الأمور؛ منه قسم اللي بيقعد ينظر على مخاليق ربنا. أنت لا تدري لو وضعت في هذا الموضع، لو كان عندك هذا الحمل، لو كان عندك هذا الهم، هذا الغم، هتعمل أنت ما تعرفش، هتعمل إيه؟ خصوصًا إنه زي ما نقول لكم كده، يعني إحنا أنتم عارفين يا جماعة مش بس قتل النفس ما فيهوش شهوة، لأ، ده حاجة عجيبة جدًا إنه الإنسان مجبول على عكس ده، إنه هو يضن بنفسه، ولذلك دي معضلة عند الملاحدة، واللي بيدرس إلحاد أو بيناقش الملاحدة عارف المعضلة دي كويس.
هي معضلة إيه؟ الملاحدة عندهم معضلة عجيبة شوية؛ أنت كمسلم أو حد بيؤمن بالميتافيزيقا اللي هو إيه ما وراء الموت يعني، الغيبيات، عنده مبرر إن الإنسان ما يقتلش نفسه مهما ضاقت عليه الدنيا حتى لو ما فيش بصيص أمل في الدنيا، عند المؤمن مبرر إنه ما يقتلش نفسه، ليه؟ إنه في عقاب شديد مستنيه. الملحد بقى لو ضاقت عليه الدنيا جدًا جدًا وما فيش أمل، إيه المبرر إنه ما يقتلش نفسه؟ ما فيش. فتلاقي إن الملاحدة بيقولوا ده ما بيحصلش. طبعًا الانتحار بيحصل في الملحد وفي المؤمن وفي بيحصل في كل الناس، أقصد أقول إيه؟ إنه الإقدام على الانتحار ما هوش بهذه القوة عند الملحد، طب ليه؟ فدي معضلة عند الملاحدة، ماشي؟ ويقعدوا بقى يتصوروا لها تصورات ويبنوا عليها فلسفات وكده.
طيب ليه بقى؟ إحنا السؤال ده ليه؟ لأني هو الإنسان مجبول على كده، على إنه يحب نفسه ويكره الموت، وهذا جاء في الحديث: «ما ترددت في شيء ترددي في قبض نفس عبد المؤمن يكره الموت وأنا أكره مساءته»، فإنسان بيكره الموت فلما نشوف حد كده بلاش نقعد ننظر عليه أو حد انتحر أو أقدم على هذه الفعلة.
المسألة الثانية أن المنتحر بالإجماع مسلم، لم يخرج من الملة. في قول كده يقول لك إيه مات كافر؟ لا، هو أتى كبيرة من أكبر الكبائر لكنه مسلم. طيب إيه معنى إنه مسلم؟ إنه في مشيئة الله عز وجل، إن شاء عذبه وإن شاء غفر له. وعندنا حديث في صحيح مسلم عجيب جداً؛ الطفيل بن عمرو الدوسي رضي الله عنه أتى مهاجراً إلى النبي عليه الصلاة والسلام ومعه رجل آخر، فاجتووا المدينة، يعني كرهوا جو المدينة وأصابهم هذا الجو بنوع من الأمراض يعني جسمهم ما تكيفش مع بيئة المدينة، فاجتووا المدينة. فهذا الرجل مرض فجزع، الرجل اللي مع الطفيل بن عمرو مرض فجزع، فأتى بمشاقص -يعني سهم له نصل عريض- وقطع براجمه اللي هي عقل الأصابع بتاعة إيديه، نزف لغاية ما مات، انتحر هذا الرجل.
فرآه الطفيل بن عمرو الدوسي في المنام فقال: ما فعل الله بك؟ وكان مخبي إيديه، يعني هذا الرجل لما رؤي في المنام كان مخبي إيديه كده. فقال: ما فعل الله بك؟ قال: غفر لي بهجرتي إلى رسول الله صلى الله عليه وسلم. فسألوه أنت ليه مخبي إيديك كده؟ قال: قال الله لي: لن نصلح شيئًا أفسدته. يعني الله عز وجل قد غفر له نعم، لكن ظلت يده على كيفيتها مقطوعة. قال الله لي: لن نصلح شيئًا أفسدته.
فالطفيل بن عمرو الدوسي ذهب إلى النبي صلى الله عليه وسلم وقص عليه تلك الرؤيا. فقال صلى الله عليه وسلم: «اللهم وليديه فاغفر». فـهو في مشيئة الله، هذا الذي قتل نفسه في مشيئة الله. نتشجع ونروح نقتل نفسنا؟ بتلعب قمار على نار. أنت كده بتراهن على إيه؟ على نار. وبعدين الوعيد مش بسيط؛ حرمت عليه الجنة، خالدًا مخلدًا فيها أبدًا، شايفين الوعيد عامل إزاي؟ وأنا مع المذهب اللي ما نفصصش في الكلام، يعني ما نقولش يعني إيه خالدًا ويقصد؟ ما هو النبي قال كده عليه الصلاة والسلام، أه يعني إيه؟ هو النبي قال كده عليه الصلاة والسلام، ما نتكلمش فيه، هو قالها كده صلى الله عليه وسلم، فتققال كما هي.
لكن هذا الخطاب لمن؟ مش للمنتحر أو اللي عنده أفكار انتحارية وهنيجي نتكلم على ده دلوقتي. إحنا بنتكلم على الناس الثانية اللي هي بتقعد إيه؟ مات كافر أو ده حرام عليه أو يتحرج أن يدعو له. يتحرج أن يدعو له، هو مسلم. فقلنا إيه معنى أنه مسلم؟ أولًا أنه في مشيئة الله، إن شاء عذبه وإن شاء غفر له، في مشيئته سبحانه وتعالى. فأنت لا تتألى على الله. شايفين احنا بنقول المنتحر كان عقوبته شديدة ليه؟ عشان إيه؟ بيفتأت على الله عز وجل، دخل في حتة مش بتاعته، مش بتاعتك تموت امتى؟ كذلك مش بتاعتك هذا الرجل يدخل الجنة ولا النار؟ مش بتاعتك.
تقول ما هو النبي قال كده عليه الصلاة والسلام؟ نقول هذه أحاديث الوعيد، لكن كلها بتدخل تحت مظلة عامة عند أهل السنة أنه في مشيئة الله عز وجل، إن الله يغفر الذنوب جميعًا. ماشي؟ والآية دي في الدنيا. الآية الثانية إيه؟ ﴿إِنَّ اللَّهَ لَا يَغْفِرُ أَن يُشْرَكَ بِهِ وَيَغْفِرُ دُونَ ذَٰلِكَ لِمَن يَشَاءُ﴾ [النساء: 48]. دي بقى في الآخرة. ماشي؟ فربنا اللي يموت مشرك اه، إنما واحد مات معاه التوحيد لكنه أتى بكبيرة من أكبر الكبائر، في مشيئة الله، مش بتاعتك.
ثاني حاجة، كونه مسلم يبقى هيتغسل ويدفن في مقابر المسلمين ويصلى عليه. ثالث حاجة، انه مسلم، ندعو له، بل هو أحوج لدعاء الرحمة والمغفرة؛ واحد ميت على كبيرة من أكبر الكبائر، هو أحوج لهذا الدعاء، فندعو له بالرحمة وندعو له بالمغفرة وندعو له أن يتجاوز الله عنه، خلاص ده اللي في ايدينا نعمله. خلاص.
لكن برضه ما يكونش خطابنا هو الخطاب المجرئ لغيره، لأنه برضه الناس احنا قلنا في ناس بييأس أو إيه ماشية تحكم على مخاليق ربنا ويدخلوا الناس النار، وفي ناس العكس بتهون من أمر هذه الجريمة وبتدي تتكلم انه أنت ما تعرف أصله مريض، أصله مش عارف. بصوا يا جماعة عشان برضه قاعدة عندنا متفق عليها: أن العقل مناط التكليف. يعني ايه العقل مناط التكليف؟ يعني طول ما أنت عندك عقل أنت مكلف.
خلاص طيب، أنا عندي عقل بس عندي اكتئاب مكلف. عندي عقل بس مثلًا متصنف بوردرلاين، أو اللي هي شخصية حدية. إيه مكلف. عندي عقل بس ثنائي القطب. دي كلها أمراض نفسية تؤدي إلى الـ ممكن تؤدي إلى إيه؟ أفكار انتحارية. مكلف. أنت مكلف. العقل مناط التكليف. بدليل هذا المريض بتجيله الأفكار الانتحارية فبيدفعها، يعرف يدفعها. أو الطبيب بيطلب منه إنه يعمل شوية حاجات لما تجيله الأفكار دي علشان ما يسترسلش فيها. ده كله خطاب لإيه؟ لعقلك. مش كده؟ أنت لو ما فيش عقل الطبيب هيقولك اعمل واحد اتنين تلاتة؟ مش هيقولك. فأنت عندك عقل. فأنت مكلف. وعليك واجب أن تفعله.
وطالما ابتليت بهذا، سواء بقى عشان برضه إحنا عندنا هنا برضه مدارس عاوزين ننتبه ليها يا شباب. عندنا مدرسة اللي هي قدام الحوادث دي. يلغي العلم خالص. يعني إيه؟ يقولك ما لو كان قريب من ربنا. ما لو طبعًا هو ده كله مطلوب وهنجيله دلوقتي. ده هو ده الدرس أصلًا. إنما ييجي الطب يقولك إيه؟ أيوه، هو كان راجل بوردرلاين، أو كان راجل مثلًا بايبولر، ولا كان راجل هو عنده حاجة بـ يعني بتجيله أفكار انتحارية في دماغه، فيقولك لا ما فيش الكلام ده. إحنا عندنا مشكلة كبيرة جدًا وعاوزين نرفع درجة الوعي فيها شوية.
أكثر تخصصين إيه، فيهم مشاكل الصراحة يعني، أو يعني الناس ما تحبش تروح لهم؛ الطب النفسي وأمراض الذكورة. ليه؟ علشان وصمة العار اللي بتلحق أي حد يروح هنا أو هنا. واحد عنده أمراض الذكورة يقولك إيه؟ ده مش راجل. وخلصنا من دي. اللي معانا بقى الطب النفسي، إما أول حاجة يقولك إيه؟ مجنون، ما هو هيقولك روح لدكتور نفسي، هو مجنون! خلاص، خد التيكت إنه مجنون. فتلاقي الواحد يبقى عنده فعلًا مشكلة ولا يلجأ للطبيب، ليه؟ هيقولوا عليا مجنون. أو الثقافة برضه التانية اللي عاوزين يعني نرفع فيها نسبة الوعي شوية، ثقافة خاطئة. اللي هي مسألة اللي يبتدي ياخد الأدوية بتاعة الدكاترة النفسيين، حالته بتتدتدهور زيادة، وحالته مش عارف إيه، واوعى اوعى تقرب للأدوية النفسية! ولأسف ممكن يقولها بعض أطباء التخصصات التانية، وفعلا في حالات هي محتاج الدواء.
إحنا عندنا في الأمراض النفسية، طبعا ده يعني أنا مش التخصص ده، لكن يعني إيه؟ قاري فيه شوية. عندنا علاج سلوكي وعلاج دوائي. وعادة الأطباء النفسيين يقولك العلاج السلوكي ده الأهم وهو الأساس وكل حاجة، بس في حالات لازم تاخد علاج دوائي لغاية ما يبتدي السلوك تتحسن والجلسات تجيب نتيجة وكده، وإلا الأفكار الانتحارية ممكن تسيطر عليه. فما فيش حاجة اسمها ما كده بإطلاق ما تجيش ناحية الأدوية النفسية دي. فهو الحقيقة يعني إيه مجال مظلوم شوية.
إيه، عندنا مدرسة تانية بقى العكس، اللي هي إيه؟ علم. ويقولك الدين ما يخشش في الحتة دي. يعني نيجي نقول له إحنا عندنا علاجات في الدين للهم والحزن والغم، يقولك لا لا، الدين ما يتكلمش في ده، إحنا في أدوية وفي جلسات سلوكية وكذا وكذا. وفي مدرسة وسط، وهي دي اللي إحنا إيه يعني عاوزينها تبقى يعني خلاص، ده الوعي اللي إحنا عاوزين ننشره في الناس. إن إحنا بنثبت هذا وذاك، ماشي؟
فده مهم جداً إن إحنا نتعامل إزاي نتعامل مع اللي عنده أفكار انتحارية. لأن يا جماعة ممكن يبقى الواحد عنده أفكار انتحارية قاعد معاك في البيت. وممكن يبقى عنده ما قبل الأفكار، أو يبقى عنده الأفكار وأنت ما تعرفش عنده أفكار. أنت تفاجئ إن فلان انتحر. هو مش هي مش مفاجأة، بس هو كان فيه شوية أعراض كان لازم أنت، واحد قاعد معاه في البيت، تنتبه ليها. اللي هي أعراض الاكتئاب. إحنا عندنا طبعا يعني سبعين بالمية -الرقم ده رقم من أطباء يعني مش مننا- سبعين بالمية من حالات الانتحار من الاكتئاب. والاكتئاب برضه مرض نفسي يعني زيه زي الأمراض اللي قلناها من شوية كده.
فالاكتئاب له أعراض. فيبقى إحنا عاوزين نعرف أعراض الاكتئاب، ودي سهلة؛ هتدخل على جوجل، اكتب أعراض الاكتئاب، هيطلعلك أعراض الاكتئاب، وتبتدي أنت، مش هتشخص، بس لو لقيت حد في الدايرة اللي حواليك عنده إيه يعني كثير من تلك الأعراض، انتبه إن ممكن يبقى عنده اكتئاب، وإحنا مش عارفين. والاكتئاب ده كثير في كثير من الأحيان بيصاحب بأفكار انتحارية. فيبقى نلحقه، خلاص؟
إيه الدرس بقى بتاع النهار ده؟ درسنا النهار ده إن إحنا عندنا في الدين بعض الأمور التي تقي من ذلك، تقي من ذلك. طبعا إحنا خلاص، الطب بقى نركنه على جنب لأهله، أنا دلوقتي مش في طب ولا يعني إيه؟ الطب يتكلم فيه بتوع الطب. إنما إحنا في الدين عندنا بعض الأمور التي تقي العبد أن يقع في مثل ذلك. فمن ذلك مثلًا، طبعًا، الحديث اللي إحنا قلناه المرة اللي فاتت في درس قبل كده، وأنا يعني أنصح بشدة أن يسمع، وهو درس مهم لكل الناس. يعني الدرس اللي قلناه المرة اللي فاتت ما كانش فيه انتحار ولا غيره، هو درس مهم جدًا وفيه معاني عالية جدًا.
قال صلى الله عليه وسلم: «ما أصاب أحدًا قط همٌ ولا حزن فقال: اللهم إني عبدك وابن عبدك وابن أمتك، ناصيتي بيدك، ماضٍ فيا حكمك، عدلٌ فيا قضاؤك، أسألك بكل اسم هو لك سميت به نفسك، أو أنزلته في كتابك، أو علمته أحدًا من خلقك، أو استأثرت به في علم الغيب عندك، أن تجعل القرآن العظيم ربيع قلبي، ونور صدري، وجلاء حزني، وذهاب همي». قال صلى الله عليه وسلم: «إلا أذهب الله همه وحزنه، وأبدله مكانه فرجًا». فـقيل يا رسول الله ألا نتعلمها؟ قال: بلى، ينبغي لمن سمعها أن يتعلمها.
وده هذا الحديث طبعًا إحنا قلنا إن هذا الحديث فيه بركة ألفاظ النبي عليه الصلاة والسلام التي أوحيت إليه وما ينطق عن الهوى. لكن في معنى آخر يا جماعة، إحنا لازم نتدبر ألفاظ تلك الأذكار، لأن هي بتغير عقلياتنا. هذا الحديث تدبرناه ومهم جدًا درس إني عبدك مهم يتسمع، خلاص؟
طيب. كذلك إيه من الأحاديث؛ أن النبي صلى الله عليه وسلم قال: إذا أصاب أحدكم غم أو كرب فليقل -ذكر جميل وصغير-: الله الله ربي، لا أشرك به شيئًا. ذكر عجيب! شوفوا يا جماعة، هنلاقي إيه؟ استحضار معنى الربوبية حاضر بقوة في أذكار الكرب. يعني هنا الله الله ربي، هنيجي لالله الله، بس هتلاقوا استحضار معنى الربوبية، الله الله ربي، حاضرًا، ستجدون ذلك حاضرًا بقوة في أذكار الكرب والغم والحزن. وليه؟
من معاني الربوبية يا شباب؛ الرب هو المربي، جل وعلا. الرب هو المربي. وتعرفون أن التربية قد تكون أحيانًا بالإيه؟ بالقوة. يعني أنت محتاج في الوقت ده إيه؟ يتشد عليك، ليه؟ عشان تتربى. صح ولا لأ يا شباب؟ فده أول معنى. يبقى معنى الله الله ربي، يعني هو مربيني. فلما تكون أنت في كرب، في حزن، في غم، ده أكيد لأن في حاجة غير ملائمة لك. يعني في أمر مش ملائم ليك، فوقعت في الكرب والهم والغم.
فتتذكر أول معنى، أن الله عز وجل هو ربك، هو مربيك. وكلنا كلنا عندنا في أذهاننا موقف واتنين وتلاتة وعشرة لآبائنا وأمهاتنا في مواقف عاقبونا فيها عقابًا غير ملائم متضايقين منه، وكان ذلك هو الإيه؟ هو المصلح لنا، وهنيجي لكلمة مصلح دي. ليه؟ تربية. تربية. والكلام ده بيحصل من إمتى؟ من وأنت لا تعقل. يفعل معك هذا وأنت لا تعقل. لسه عيل عندك سنتين بتوقوق، أمك تعمل إيه علشان تفطمك؟ تعمل لك حاجات غير ملائمة لك، وأنت تقعد تعيط وترزع وبتاع وعاوز إيه؟ عاوز تفضل ترضع. وهي بتعمل فيك إيه؟ بتربيك. هذا هو الأصلح لك.
طب تعال أنت بعد كده ما اعتدت الأكل وبتاع ومش عارف إيه، وبعدين يقول لك إيه؟ هترضع؟ تقول لا ما أرضعش. وأنت عيل طبعا صغير مش هتقول لا، بس هتقول إيه؟ تحس إن اللي كان ملائم ما بقاش ملائم. فالله مربي، رب، فهو مربيك. فتستحضر هذا المعنى أول ما تلاقي وضع أنت مضايقك؛ دنيا بقى ضيقة عليك، إيه؟ فقدت مال، فقدت حبيب، أي شيء. الله الله ربي، ربنا بيربيني. أصل هو جل وعلا شاف قلبي متعلق زيادة بالحاجة دي، فبيربيني.
قلبك متعلق بها؟ طب أهي راحت منك. ليه؟ تربية. أصل أنا ما ينفعش يبقى قلبي متعلق زيادة بالدنيا، ما ينفعش. خصوصًا لو أنا في بيني وبين ربنا صلة. أنتوا عارفين من الـ من الحكم التي ذكرها أهل العلم في قصة ذبح إبراهيم لولده؟ من الحكم الـ طبعًا الـ الولد ده مش ولد يعني يعني القصة دي قصة عجيبة، وإحنا لعلنا تدبرناها قبل كده ولعلنا نتدبرها قريبًا عشان الحج إن شاء الله، بس مش وقت نخش في ده. لكن من المعاني؛ أن إبراهيم عليه السلام وصل لمرتبة الخلة، إبراهيم خليل الرحمن، ودي أعلى درجات المحبة. فلما ولد لإبراهيم هذا الولد، تعلقت شعبة من شعاب قلب إبراهيم بالولد. فكأن حب الولد قد زاحم محبة الله في قلب إبراهيم، فكان الأمر بذبح هذا المزاحم. فلما امتثل إبراهيم، لم يبق للذبح فائدة. فهمتم الجملة دي؟ هذه من الحكم التي قيلت.
فربنا بيربيك. قلبك متعلق قوي بالشغلانة دي، راحت الشغلانة. بالصفقة دي، راحت الصفقة. بالشخص ده، راح الشخص. اتجوزت غيرك، اتجوز غيرك. تربية، ليه؟ خرج كل ده من قلبك. طب لما خرج ده كله من قلبي، إيه اللي هيبقى في قلبي؟ الله، جل وعلا. الله الله ربي. فلما ترى ما يقع عليك من أزمات ومن تضييقات ومن أي شيء غير ملائم لك، تراه من هذه الـ النظرة أو من هذه الـ الزاوية؛ تستريح شيئًا، يعني خلاص، بتربى.
من معنى الرب؛ المصلح. المصلح. يقال: رب فلان ضيعته، إذا أصلحها. الضيعة اللي هي الجنينة ولا البستان ولا كده. رب فلان ضيعته إذا أصلحها. وزي ما قلنا لكم من شوية، قلنا لكم هنيجي لكلمة مصلح دي. مش دائمًا المصلح لك هو الملائم لك، مش دائمًا. وإلا تعالوا كده، تعالوا نشوف أهو المثال اللي ضربوه عشان اللغة: رب فلان ضيعته أي أصلحها. هيصلح الضيعة إزاي؟ مش يا جماعة من إصلاح الضيعة إنه هيجي هيقعد يقطع في بعض العشب الضار اللي فيها؟ لو لو تخيلنا كده إن الضيعة كل جزء من الضيعة له إدراك، وهو داخل يقطع العشب، فالعشب يصرخ! واللي حوالين العشب، العشب بقى معاهم بقاله شهر واثنين وثلاثة وخلاص ألوفوه وألفوه، شايفين إيه؟ رب الضيعة ظالم! ما تسيب العشب في حاله، هو أذاك في إيه؟ وهذا من إصلاح الضيعة. مش كده؟
خلصنا تقطيع العشب، هيروح جايب الإيه؟ الجرار اللي بيقلب في الأرض ده عشان يقعد يقلب التربة. تخيلوا كده لو للتربة إدراك، عمالة تصوت وتصرخ: سيبني في حالي مجرم! وهو يصلحها، ولن يصلحها إلا ذلك. فأنت جزء من إصلاح نفسك تلك الابتلاءات، جزء من إصلاحك.
أقول لك حاجة أعجب؟ الملائم لك اللي أنت هتموت ويحصل ده أنت بتحرجم على خراب دنيتك وآخرتك. جاء في بعض الآثار، وهذا الأثر جميل؛ جاء في بعض الآثار أن الله عز وجل يقول: إن من عبادي من لا يصلحه إلا الغنى ولو أفقرته فسد حاله، وإن من عبادي من لا يصلحه إلا الفقر ولو أغنيته فسد حاله، وإن من عبادي من لا يصلحه إلا المرض ولو صححته فسد حاله، وإن من عبادي من لا يصلحه إلا العافية ولو أمرضته فسد حاله. فأنت أي وضع أنت فيه احمد ربنا. ليه؟ أصله الله الله ربي.
ومن معاني الرب الإيه؟ المصلح، المصلح. ولذلك نقول دائمًا إن الأبناء لازم يبقى في التربية عشان يطلع يعني يعني بقوانين الدنيا وإلا فـ يعني إيه؟ الملك متربي. قال إيه؟ أيوه احفظوا أي حاجة بقى حتى الأمثال يعني، ما مثل حلو برضه جميل يعني، الملك متربي قال ده من عند ربي. وعندنا يعني في السلف كثير اللي إيه؟ طلع يعني عالم وكده وهو يتيم ما لوش أب أصلًا.
إنما ليه دائمًا نقول لازم يبقى فيه أب وأم؟ لأن عاطفة الأم ممكن تغلب في أوقات، الولد لا يصلحه فيها إلا الشدة، والأم ما تقدرش تعمل ده. هنا لازم الأب يظهر، ويأخذ قرارات صارمة ويثبت عليها، حتى لو شاف الواد بيتقطع! الأم أول ما تلاقي دمعتين نزلوا يا تضعف وترجع للإيه؟ بسرعة للملائم، مش كده؟ للملائم للولد اللي هو عاوزه. الأب المفروض ما يبقاش كده، مش تحت الضغط يرجع للملائم، لا. الأب بياخد الولد إلى الإيه؟ إلى المصلح. فالرب بمعنيه المصلح: الله الله ربي مصلحي. فده من معاني الرب.
كذلك وأنت بتقول: الله الله ربي، لا أشرك به شيئًا. إذا قلنا أن الرب هو المربي، والرب هو المصلح، فكأنك تتلمح في لفظة الرب معنى الرحمة والشفقة حتى لو في حاجة شديدة، إنما يفعلها بك رحمةً بك. ولله المثل الأعلى. والمثال ده إحنا ضربناه قبل كده؛ إن أمك واخداك من إيديك ورايحة بيك للدكتور وأنت عيل صغير، سنتين تلاتة أربعة، ورايح إيه؟ بيديك الحقنة وأنت إيه عمال تصوت وترفص ومش عاوز حقنة، ويمكن تكون أمك نفسها واقفة عمالة تعيط على إيه؟ حالك اللي هو إنك بـ بـ مش عاوزة تؤلمك. ومع ذلك، لما ييجي ميعاد الحقنة الجاية،
هتاخدك من إيديك وغصب عنك وتوديك للدكتور، وتقعد هي قلبها بيتقطع وهي شايفاك بترفص وتعيط وبتاع. مش كده يا جماعة؟ بالذات لو مرض شديد عند الطفل. بنشوف ده بنشوف، تبقى الأم واقفة بتقطع بره الولد عنده سرطان ولا بتاع، وعمال يصوت جوه من الكيماوي ومش مستحمل، ولد صغير، والأم بره منهارة على صراخ الولد.
طب تعالى ميعاد الجلسة الجاية، الأم هتعمل إيه؟ هتاخد الولد وتروح، ولله المثل الأعلى. فأنت تتلمح حتى في تلك الحال الغير ملائمة لك، اللي أنت مش مستريح فيها، اللي أنت كنت تتمنى حالة غيرها، أنت تتلمح فيها معنى، تتلمح في هذه الأحوال معنى إيه؟ الرحمة. يا ابني دي رحمة بيك. أيوة ازاي دي رحمة؟ ما هو أنت ما تفهم، أنت مش فاهم أصلك، أصل أنت لو كانت الحالة غير كده، أنت كان زمانك في حتة تانية مش في المسجد. طب أنا أصلاً ما باجيش المسجد. فإيه اللي؟ طيب ما ربنا سبحانه وتعالى بيسوقك إليه جل وعلا، بيضيق عليك عشان تقول يا رب، افهم بقى.
يبقى الله الله ربي، ولذلك يا جماعة شوفوا الله عز وجل ماذا قال: ﴿وَلَا تَقْتُلُوا أَنفُسَكُمْ إِنَّ اللَّهَ كَانَ بِكُمْ رَحِيمًا﴾ [النساء: 29]. تقتلش نفسك. هنا طبعاً ولا تقتلوا أنفسكم الأصل إن هي ولا تقتلوا غيركم، يعني أنفسكم يعني غيركم. إنما المعنى موجود، ولا تقتل نفسك، ما تقتلش نفسك، إن الله كان بك رحيماً. هنا في معنى جميل جداً، أنتم عارفين كتير من اللي بيقتل نفسه يروح ينتحر بيكون سبب أساسي إنه مش لاقي دعم من أي حد، أو بيحس الإحساس دايماً يقول لك إيه؟ أنا لوحدي. لوحدي يا جماعة، ممكن يبقى قاعد وسط خمسين واحد بس هو حاسس إنه لوحده، فنقوله في ربنا، وربنا رحيم. يعني لو أنت حتى مش شايف إن معاك ناس، معاك ربنا، إن الله كان بكم رحيماً.
ناجي الرب سبحانه وتعالى، اختلي به، تعود الأنس به جل وعلا، وهذا من العلاج. الله الله ربي، لا أشرك به شيئاً. وهنا العلماء طبعاً تكلموا في تكرار لفظ الله، بس خلينا نعديها عشان يعني في أحاديث كتير أصلًا وأذكار كثيرة عاوزين نقف عليها. وبردو بالمناسبة عشان ما أنساش، أي حاجة فيها توحيد، ومما قيل في الله الله معنى التوحيد. وفي آخر حديث بقى أشرك به شيئاً بردو ففيه معنى التوحيد، فبردو أحيلكم إلى درس قلناه هنا بقى، كان أول درس لينا هنا، حد فاكره؟ أعظم آية. فيبقى إحنا عاوزين نسمع درس إني عبدك ده ضروري جداً لازم يتسمع، ودرس أعظم آية، علشان معنيين، معنيين المفروض نقولهم المرة دي بس الدرس مش هـ، معنى التوحيد، وده إحنا اتكلمنا فيه في أعظم آية، ومعنى تاني هييجي كمان شوية، ونقولكم بقى هتلاقوه بردو في أعظم آية إن شاء الله، ماشي؟
طيب. كذلك من الأحاديث، وتاني حاجة بقى عاوزين نحفظ الأذكار. يبقى إحنا قلنا لغاية دلوقتي قلنا إيه؟ ذكرين، ذكر بتاع إني عبدك، وذكر الله الله الله ربي لا أشرك به شيئاً، نحفظها، نقولها، لأن يا جماعة إحنا الآن في عصر يعني الاكتئاب موجود في كل عصر، إنما الاكتئاب بقى دلوقتي هو مرض العصر، مرض العصر، ليه؟ لطبيعة العصر. لطبيعة العصر، أنت لو قعدت تتأمل كده هتلاقي موضوع منصات التواصل الاجتماعي زودت بشكل كبير جداً مسألة الاكتئاب، جداً. ليه؟ أنت عمال تسكرول، فتلاقي أول واحد الفود بلوجر مثلاً وعمال يجيبلك في أكلات أنت مش عارف تحفظ اسمها، هه، مش عارف، يعني اسمها صعب، وهو هايص من المطعم ده للمطعم ده وبياكل ببلاش وتقول له كده، وبعدين تقلب، تلاقي الراجل بتاع العربيات اللي بيعمل ريفيوهات للعربيات، والعربية دي فيها إيه والعربية دي فيها إيه، والـ، تقلب، تلاقي الراجل بتاع السفر، وكل شوية في دولة وكل شوية في حتة وكل شوية في معلم سياحي، تقلب، تلاقي واحدة بتعرض اكسسوارات وموضة ومش عارف إيه وهكذا. تقفل الموبايل وتبص حواليك بقى لحياتك، فتصاب باكتئاب. كنا قبل كده اتكلمنا عن حاجة مهمة جداً اللي بيسموها تأثير التباين، تأثير التباين.
في مقطع صغير على اليوتيوب عندي على القناة يعني اسمه تأثير التباين، مقطعين يتسمعوا برضه، يبقى دول من الحاجات اللي تتسمع، لأنه بيعالجوا الحتة دي كويس جداً، خلاص؟ همم؟ يبقى اسمعوا دي بقى، مش هنيجي لـ فإحنا طبيعة العصر اللي إحنا فيه والتحديات اللي إحنا عايشينها هي تصيب بالاكتئاب، سواء من مسألة تأثير التباين ده، اللي هو غيري عامل إزاي، واللي غير ده غير بقى إحنا ده ما دخلناش فيه في الناس العادية الطبيعية، اللي هو إيه؟ اللي هو بنت خالتك وابن عمتك اللي على الـ دخلت لقيته على الفيسبوك مثلاً إيه؟ مسافر الحتة الفلانية، لقيتها على الفيسبوك اتجوزت الراجل الفلان اللي جاي من بره ومعاه فلوس ومش عارف إيه، فتصاب برضه باكتئاب مثلاً.
فده اسمعوا فيه تأثير التباين ده، مقطعين موجودين إن شاء الله. كذلك ضغطة الحياة بقى اللي إحنا عايشينها برضه تصيب بالاكتئاب، أنت ليل نهار في ساقية، علشان إيه؟ علشان تعرف تعيش. ماشي؟ طب إيه علاج الحتة دي؟ إحنا بنعالج اكتئاب شرعاً، مش يعني في علاج طبي وهذا مطلوب، لكن من الأسباب التي تؤدي بالناس إلى الاكتئاب الفكرة دي، إن أنت في طاحونة، ليل نهار شغل في شغل في شغل في مذاكرة عشان تطور نفسك للشغل، فأنت مش عارف تتنفس. طب ليه؟ أقول لك دائماً تسمع كده، ده يا دوب عشان أعرف أعيش. ندخل بقى في تفاصيل يا دوب عشان أعرف أعيش دي، تلاقي كتير منها حاجات كماليات ورفاهيات، وإن هي ممكن يستغنى عنها عادي جداً، وإن في ناس بتعيش من غيرها عادي جداً، لكن هي الخدعة النفسية إن الحاجات دي أساسية. مش هطول في ده، نسمع فيه إيه؟ إيه رأيكم؟ لا في حاجة أهم، قليلها يكفي، ماشي؟ في درس اسمه قليلها يكفي، فده برضه يتسمع. إحنا هنطلع النهار ده بكورس لعلاج الاكتئاب مش مش درس، هو المعاني دي كلها المفروض تتقال في الدرس النهار ده بس هو كل حاجة درس، يعني زي أنا بقول لكم إيه؟ يعني اسمعوا دي قليلها يكفي، ده درس ساعة مثلاً في دي. الدرس الثاني بقى ساعة في إني عبدك، وهكذا، فمش هينفع، فخلونا بس نقول المعاني المهمة دلوقتي.
طيب، من الأحاديث أو من الأذكار، قال صلى الله عليه وسلم دعوات المكروب. صلوا على النبي ها؟ الصلاة على النبي أصلاً من الـ، إذًا تكفى همك، مش كده؟ فهو أصلاً من الأذكار التي تذهب بالهموم الصلاة على النبي عليه الصلاة والسلام، وإحنا في يوم جمعة، فمن سننه الإكثار من الصلاة عليه صلى الله عليه وسلم، فبنقولها بالمرة أصل إحنا مش جايبين الصلاة على النبي في الدرس عشان عليه الصلاة والسلام، لأن إحنا جايبين الأذكار اللي عايزين نتدبرها يعني نطلع منها بمعاني تعيننا على مواجهة هذا، فيبقى إحنا عاوزين ورد كبير من الصلاة على النبي عليه الصلاة والسلام، يعني أنت يومياً كلنا، كلنا، لأن هي الحقيقة خلاص بقت كلها إكتئاب، فيومياً على الأقل خمس آلاف مرة، خمس آلاف مرة، خلص، لو بأقصر الصيغ: اللهم صلي على محمد، اللهم صلي على النبي، اللهم صلي على عبدك ونبيك محمد، يعني أي صيغة بسيطة كده، الخمس آلاف مرة مش هتاخد منك ساعة زمن، يا أكثر شوية، ماشي يا سيدي عشان نحمس الناس. فخلي لك ورد كده معاك على طول، السبحة في إيدك أو العداد الإلكتروني ده، وماشي بتصلي على النبي عليه الصلاة والسلام.
قال: دعوات المكروب: «اللهم رحمتك أرجو فلا تكلني إلى نفسي طرفة عين وأصلح لي شأني كله لا إله إلا أنت». الله! دي دعوات المكروب. اللهم رحمتك أرجو، يبقى أنت عندك كرب. اللهم رحمتك أرجو، المعنى القريب يا جماعة للذهن هنا إيه؟ اللهم رحمتك أرجو، إن هو تعمل إيه؟ ده دعاء بإيه؟ بالتفريج، مش كده؟ ده المعنى القريب. المعنى القريب اللهم رحمتك أرجو، يعني يا رب فرج عني برحمتك.
المعنى البعيد بقى اللي ممكن نستفيده من هنا، وهو معنى أسمى من حيث الإيمان، يعني، أن هذه الكلمة تذهل بها عن الكرب. يعني أنت في كرب، فكأنك بتقول يا رب أنا لا أريد الملائم، أنا أريد رحمتك، فالدنيا بقى تمشي ازاي؟ تمشي زي ما تمشي يا رب. اللهم أنا لا أرجو تغير الحال عشان يبقى ملائم لي، إنما أرجو رحمتك يا رب، فطالما أنا في محل الرحمة والعناية، الدنيا تمشي ازاي؟ مش مهم. حد فاهم المعنى ده يا جماعة؟ اللهم رحمتك أرجو. أنا ذاهل عن حالي، ذاهل عن تلك الحال.
ودي حالة سيدنا النبي عليه الصلاة والسلام، أنا كـ يعني تقريباً درس ودرس بقول، لو أوقفت أكثر واحد هنا في كرب وفي شدة وفي فقر، اللي هو شايف نفسه معدم، وعرضنا حاله على حال النبي والصحابة عليه الصلاة والسلام، أه، هيطلع من هنا فرحان والله، يعني يقول لك ده أنا إيه ده في نعم ما فيش بعد كده. يعني مين مين اللي موجود اللي وصل إنه يربط حجرين على بطنه من الجوع يعني؟ مين؟ مين اللي وصل إنه يقعد شهرين ما فيش في بيته غير تمر؟ شهرين! سيدنا النبي يدخل على عائشة صلى الله على النبي محمد ورضي الله عن عائشة: عندكم حاجة؟ شوية لبن أهداه لنا فلان أو فلان، مش بتاعنا. شوية لبن. وبعدين؟ على طول بقى عنده هدايا؟ أبدًا، يدخل مرة في أكل؟ ما فيش: «إني إذاً صائم». عادي، يدخل البيت ما فيش أكل. مين؟
النهارده تلاقي إيه؟ الراجل طلق الست وضربها وراحت تعمل له محضر عينيها مفقوعة، وأصله دخل ما لقاش أكل. ما لقاش أكل دي اللي هو إيه بقى؟ اللي هو لو فتح الثلاجة هيلاقي جبنة، ويمكن بدل النوع نوعين أو ثلاثة، وهيلاقي بيضة يسلقها، وصح يا جماعة ولا لأ؟ وطلق وضرب وكان هيقتل، ليه؟ أصله ما لقاش أكل! لأ، هو سيدنا النبي أما يقول عليه الصلاة والسلام في أكل فتقول لأ ما فيش أكل، فهو ما فيش أكل. يعني ما فيش أكل؟ ما فيش التمر، لأن التمر كان أكل، التمر ده كان أكل. سيدنا النبي عليه الصلاة والسلام لما خرج الحديث المعروف، خرج عشان ما فيش أكل في بيته، وبعدين لقى أبو بكر ولقى عمر، بقية الحديث حد عارفه؟ راحوا لمين؟ لأبو الهيثم التيهان صحابي، عشان يأكلوا. جاب لهم إيه يأكلوا؟ تمر. إيه رأيكم؟ يعني النبي، سيدنا النبي ده جاي لك بيتك عليه الصلاة والسلام، هتحط له إيه؟ هتحط له أحسن حاجة في بيتك. معنى كده إن أبو الهيثم هو ده اللي، ده أكله. فطيب، معنى إن النبي عليه الصلاة والسلام وأبو بكر وعمر راحوا أكلوا تمر، يبقى كان بيوتهم ما فيهاش الإيه؟ ما فيهاش التمر. خلي بالكم إحنا بنتكلم على بيوت فين؟ في المدينة، اللي هي أصلاً كلها إيه؟ كلها تمر، نخل، المدينة كانت كلها نخل، عليه الصلاة والسلام.
فأنت حالتك إيه بقى؟ أنت حضرتك اللي معيشك في الهم والغم اللي أنت فيه ده، إيه حالتك؟ فقد أحبة؟ شوف، النبي عليه الصلاة والسلام أكثر زوجة بيحبها في الدنيا تموت، مين أكثر زوجة بيحبها؟ مش عائشة، الناس فاكرة إن عائشة هي، لأ، هي عائشة أحب أحب نساء إليه في وقتها، إنما خديجة هي أحب النساء، ولذلك عائشة رضي الله عنها ما كانتش بتغير من حد غيرتها من مين؟ من خديجة، مع إن خديجة إيه؟ ماتت. وما كانتش بتغير من واحدة من اللي عايشين زي غيرتها من خديجة اللي ماتت، ماتت. عمه مات. ابنه مات.
فأنت إيه يعني أنت فقدت إيه ولا كم واحد ولا فقدت مين؟ فعلى كل الأصعدة لأ، إحنا ما شفناهاش حاجة من اللي شافها النبي عليه الصلاة والسلام، ومع ذلك كان أهنأ الناس وكان أسعد الناس. ليه؟ اللهم رحمتك أرجو. ما هو أنا مش شاغلني ده، آه شاغلني يعني بتأثر بيه وأبكي على موت ابني وكذا وكذا، لكن في الآخر: اللهم رحمتك أرجو، أنا مسافر، هأقطع الطريق ازاي؟ تتقطع ازاي ما تتقطع، مالي وللدنيا؟ إنما مثلي ومثلها كراكب قال تحت شجرة، استظل تحت شجرة، نام كده ساعة زمن القيلولة، ثم راح وتركها.
ولذلك سيدنا عمر كان ليه كلمة عجيبة جداً، كان يقول، كان يقول إيه بقى؟ تلخص مسألة اللهم رحمتك، وإحنا كلنا يا جماعة في إيه؟ في دعاء من أدعية أو ذكر من أذكار دفع الكرب: اللهم رحمتك أرجو. فقلنا المعنى القريب يعني يا رب ادفع عني برحمتك ما أنا فيه، ده المعنى القريب. المعنى الأبعد من ده: يا رب أنا لا أرجو حالاً ملائماً أو حالاً ملائمة، ولا أرجو عيشاً هنيئاً، إنما أرجو رحمتك يا رب، فلو أنا في محل الرحمة يا رب، فلتكن الدنيا كما تكن بقى، أو كما تكون، فلتكن الدنيا كما تكون، زي ما تمشي تمشي بقى، تمشي زي ما تمشي. سيدنا عمر كان بيقول إيه بقى؟ الغنى والفقر مطيتان، ركبتان، لا أبالي أيهما ركبت. حد فهم دي؟ سيدنا عمر بيقول إيه؟ بيقول والله غنى فقر هي ركوبة بتوصلني لربنا.
أغنى، أشكر؛ افتقر، أصبر، وفي الحالتين هي ركوبة بتوصلني لربنا سبحانه وتعالى، فلا أبالي. كنت غنياً، كنت فقيراً؛ غني يوم وفقير يوم، مش فارقة، هما مطية بتوصلني لربنا سبحانه وتعالى.
فدي أول كلمة: اللهم رحمتك أرجو، فيها يا جماعة برضه معنى مهم جدًا، مش لازم يا شباب اللي في عقلنا هو اللي يحصل. يعني فكرة إيه؟ اقتراحات العقول، وإن أنا عاوز كذا فلازم ييجي كذا، وبعضنا كمان يعني عنده بجاحة زيادة إنه عاوز كذا بالتفاصيل وإلا مش هرضى، دي بيسمونها إيه؟ اقتراحات العقول. ودي صوت نذبح فيها إن أنت كده بتنازع ربنا في الربوبية، إن ربنا سبحانه وتعالى هو مدبر الكون، فأنت بتنازعه في الربوبية دلوقتي.
لكن المعنى اللي عاوز أقوله بقى: اللهم رحمتك أرجو على المعنى الأول اللي هو القريب، اللي هو يعني خلي الحال ملائمة. مش لازم يا جماعة رحمة ربنا إن الحال تتبدل بإنها تكون ملائمة، ممكن يبقى رحمة ربنا إنه إيه؟ يرزقك الصبر. يعني بلاش يبقى أنت عندك اقتراح معين وهو اللاء.
حديث النبي عليه الصلاة والسلام مع المرأة التي كانت تصرع: إيه؟ هي كانت عاوزة حال ملائمة الأول، صح كده؟ يعني أنا مش عاوزة أصرع، الصرع حال غير ملائمة، فأنا عاوزة الحال الملازمة إني لا أصرع. قالها تمام: إن شئت دعوت لك، يبقى الحال هتتحول من حال غير ملائمة لحال ملائمة، وإن شئت صبرت ولك الجنة. طب هي صبرت دي؟ أي حد بيعرف يصبر؟ هي من الله جل وعلا؛ فممكن يبقى رحمة ربنا تظهر في إيه؟ في إنك تصبر، إنك في حالة غير ملائمة وصابر، واللي أعلى إنك في حال غير ملائمة وراضي، مش بس صابر، راضي.
في حالة أعلى من دي يا جماعة؟ اللي يعرف يقولها، غير شاكر، قولناها إحنا في كذا درس قبل كده، قولنا الحالة اللي أعلى أن تؤثر تلك الحال عن الحال الملائمة اللي أنت ظانها ملائمة. ليه تؤثرها؟ لأنها اختيار الله، دي حالة أعلى بقى دي بتاعت الأولياء، اللي هو ربنا سبحانه وتعالى قدر عليك كذا، وده شيء منغص عليك حياتك وغير ملائم وبتاع. لو اتسألت كده قالك إيه؟ ليك ربع ساعة أنت دبر حال نفسك واللي هتقوله هيحصل، ها؟ تختار إيه؟ تقول أختار اللي أنا فيه، عليه الصلاة والسلام، تقول أختار اللي أنا فيه. ليه؟ اختياره سبحانه وتعالى، ده اختياره. طيب ما يا عم دي مش ملائمة؟ لا ما هو أصل هو اللي أدرى، ألا يعلم من خلق؟ فهو أدرى بما يصلحني، وهو أعلم بما ينصلح به حالي، فأنا أختار اللي اختاره لي سبحانه وتعالى، دي درجة أعلى بقى كمان من الرضا.
قال: اللهم رحمتك أرجو. هذه دعوات المكروب. فلا تكلني إلى نفسي طرفة عين. آه، ليه بقى؟ هنتحر، طبعًا هو حاجات كتير بس منها دي اللي إحنا بقى الدرس ده، أشرب بس ونكمل الدرس. فلا تكلني إلى نفسي طرفة عين، أصل يا رب لو وكلتني لنفسي لضعف وخور وجهل وسوء وعوار، هي دي أنفسنا يا جماعة، أصلك يا رب لو وكلتني لنفسي طرفة عين هنتحر هموت نفسي يا رب، أنت اللي حافظني إني أقع في هذه الكبائر، أنت اللي حافظ عليا عقلي إني ما أتجننش من الضغوط اللي عليا، فلا تكلني إلى نفسي طرفة عين. فدي فيها إيه يا جماعة؟ فيها طرح رؤية النفس، وإن أنا بعقلي أقدر أعمل وإن أنا بنفسي أقدر أسوي، وأنت ما تعرفش تعمل حاجة يا ابني، ولو وكلت إلى نفسك ضعت، فإحنا كلنا كده عايشين بحفظ الله لنا سبحانه وتعالى.
فلا تكلني إلى نفسي طرفة عين، قال: وأصلح لي شأني كله. فبرضه فيها نفس المعنى، إنه لا صلاح إلا بالله، ليه؟ أصله رب، والرب هو المصلح، فيا رب أصلح لي شأني كله. طب صلاح الشأن ده بحدوث الملائم؟ لا والله يا جماعة ما والله أبداً، والله أبداً. كم واحد: هموت نفسي لو ما اتجوزتهاش، وهي دي ما فيش مش عارف إيه، اتجوزها يضرب نفسه بالرصاص، مش كده؟ عقد الجواز، تقول له بتقلب ليه؟ قال لها بشوف تاريخ الانتهاء يعني، الجوازة دي هتخلص إمتى؟ فبيحصل والعكس يعني عشان الستات ما زي ما هو الست برده هو يا ما فيش ومش وبعد الجواز ما مش طيقاه وعاوزة أطلق ما فيش طلاق طب خلع طب لا طب إيه؟ في حريقة، ما دي يا جماعة والله آيات نراها في الناس عشان نفهم. مين قال اللي أنت عمال تزن عليه ده ما يكونش هو خراب عشك؟ بتزن على خراب عشك، مين قال لك؟ فاهدأ، اهدأ الله يكرمك، واطمئن لقدر الله لك ولاختيار الله لك وارضى به.
قال: وأصلح لي شأني كله، لا إله إلا أنت. لا إله إلا أنت، اسمعوا بقى أعظم آية، ماشي؟ على فكرة ليها علاقة بالاكتئاب والحزن والهم، بس شرحناها هناك، خلاص؟ كذلك كان صلى الله عليه وسلم يقول عند الكرب: لا إله إلا الله العظيم الحليم، لا إله إلا الله رب العرش العظيم، لا إله إلا الله رب السماوات ورب الأرض ورب العرش الكريم. هذا مما كان يقوله صلى الله عليه وسلم عند الكرب، وهذا الدعاء جميل وعظيم وفيه معاني كتير بقى. فكان صلى الله عليه وسلم يقول: لا إله إلا الله العظيم الحليم. لا إله إلا الله، اسمعوا أعظم آية. العظيم الحليم، اسمان في غاية العجب يدفعان الكرب والله يا جماعة.
لا إله إلا الله العظيم، تعالوا كده نتدبر اسم العظيم في هذا الموطن، إنه يدفع الكرب إزاي؟ أول حاجة: كون إن الرب سبحانه وتعالى هو العظيم فلا يتعاظمه شيء، وكربك شيء وهمك شيء وتلك الحال غير الملائمة شيء. طيب، تتعاظمه يعني صعب إنه يبدل الحالة دي يعني ولا سهلة؟ هو العظيم جل وعلا لا يتعاظمه شيء، هو العظيم. فييبقى أول معنى: أنه سبحانه وتعالى عظيم فقادر إنه يبدل تلك الحال، لا يتعاظم حالك مهما كان؛ لفيت على الدكاترة وقالوا ميؤوس منه، لا إله إلا الله العظيم. الدكاترة تقول اللي تقوله مش بنحتقر الدكاترة، لكن هو ده ما عندهم من علم، خلاص علمهم وقف هنا، إنما ربنا سبحانه وتعالى، إنما أمره إذا أراد شيئاً أن يقول له كن فيكون؛ فلان خف يخف، انتهت. ولعلنا بنسمع عن حواديت زي كده: حالة ميؤوس منها ويطلع يمشي على رجله. لا إله إلا الله العظيم، فأنت يائس ليه؟ رايح تنهي حياتك ليه؟ لك رب عظيم، حالك تتغير في لحظة.
المعنى الثاني: إنه لا إله إلا الله العظيم، طيب ما هو عظيم لا يتعاظم شيء، ما غيرش ليه؟ يبقى له حكمة. ولذلك: لا إله إلا الله العظيم الحليم، هو صحيح عظيم، لكنه حليم لا يعجل بعجلة أحدنا، أنت عاوز الحال تتغير حالاً، هو سبحانه وتعالى حليم لا يعجل بعجلتك، ولذلك الحال باقية، ليه؟ لحكمة بقى أنت عرفتها ما عرفتهاش دي مش قضيتنا، إنما في حكمة وهو حليم سبحانه وتعالى. يبقى كون الحال ما تغيرتش مش لأنه مش عظيم، لا، هي ما تغيرتش لأنه حليم، فلا يعجل بعجلتك.
بيقولوا سيدنا أيوب، مرض أيوب كان مرض صعب، حتى دلوقتي يقولك إيه يا صبر أيوب، صبر صبراً شديداً، والمرض بتاعه كان صعب جداً إن جلده كان بيقع، سيدنا أيوب جلده كان بيقع من على جسمه والناس كانت تنفر منه ما تقربش ليه وكده، فكان مرض شديد وبلاء شديد. وبعدين قالوا له يعني إدعي ربنا، قالهم أنا قعدت كام سنة معافى؟ فقالوا له رقم يعني مش فاكر أوي 40 أو حاجة زي كده، طب وكام سنة مريض؟ قالوا له رقم أظن 18 أو يعني مش فاكر، 18، ماشي، فقالهم إني لأستحي، أنا مكسوف أدعي ربنا بعد 18 سنة مرض وهو يعني أنا معافى رقم أكبر من كده، ما أتكسف.
وحتى يا جماعة دعاء أيوب عجيب جداً، قال إيه؟ ﴿أَنِّي مَسَّيَ ضُّرُّ وَأَنتَ أَرْحَمُ الرَّاحِمِينَ﴾ [الأنبياء: 83]، ما طلبش حاجة يعني: إني مسني الضر وأنت أرحم الراحمين. يعني أرحم الراحمين يعني إيه؟ يعني إعمل بقى إيه اللي يعني حتى معايا ممكن يبقى المرض هو الرحمة، مش ممكن؟ ممكن. إني مسني الضر وأنت أرحم الراحمين.
طيب، فيبقى لا إله إلا الله العظيم الحليم. لا إله إلا الله يعني ممكن يتقال فيها كلام كتير بس عشان الوقت بقى، لا إله إلا الله رب العرش العظيم. طبعا عظم العرش دي بقى الحاجة التانية اللي هتسمعها في درس أعظم آية، ماشي عشان يعني عظم العرش ده حاجة عجيبة. فلما نقول رب العرش العظيم هي مش كلمة تعدي كده. العرش يا جماعة، يعني بسرعة كده وبعدين عقبال ما تسمعوا الدرس أنتم بقى: السماء الدنيا في السماء الثانية كحلقة في فلاة، يعني إيه؟ يعني السماء الدنيا دي مساحة السماء الدنيا اللي أنتم شايفينها دي بالنسبة لو لو نسبناها للسماء الثانية كحلقة مرمية في صحراء، نسبتها كم يعني؟ تؤول إلى الإيه؟ صفر، دي ولا حاجة. توهموا ده يا جماعة بس ها، توهموا ده، يعني حاولوا تتدبروا المعنى ده.
والثانية في الثالثة، الثانية دي اللي هي بالنسبة للأولى الصحراء، في الثالثة كحلقة في فلاة. والثالثة اللي هي بالنسبة للثانية صحراء، اللي هي أصلاً بالنسبة للأولى صحراء، والثالثة في الرابعة كحلقة في فلاة، إحنا إحنا إيه إيه أنتم أنتم يعني مش عارف أنتم، وكذلك إلى السابعة، وبعدين الكرسي كذلك وبعدين العرش، كل حاجة من دي كحلقة في فلاة كحلقة في فلاة كحلقة في فلاة. فأنتم فاهمين إحنا بنتكلم عن مخلوق عامل إزاي؟ استدعاء العرش هنا، إحنا في دعاء الكرب، استدعاء العرش هنا ليه؟ لا إله إلا الله رب العرش العظيم.
فاستدعاء العرش هنا ليه؟ من المعاني والله أعلم إن عظم هذا المخلوق دليل على عظمة الخالق. يعني أنت ممكن نقول لك إيه ربنا عظيم، فأه طبعاً وتمضمض شفايفك كده بس ما تبقاش منتبه قوي لفكرة إنه يعني عا يعني فمنقول لك طب تعال كده نكلمك عن مخلوق، إحنا يمكن دلوقتي برضه مش مـ يعني إيه مش لإن إحنا حلقة ممكن الناس ما تعرفش تنسب يعني م- مش كل العقول تعرف تعمل ده إنها تنسب وت- تعيش ال- الوهم ده. في مثال تاني لمخلوق برده وإحنا يمكن قلناه هنا قبل كده، اللي هو الإيه؟ أذن لي أن أحدث عن عن ملك من حملة العرش ما بين شحمة أذنه إلى عاتقه مسيرة 500 عام، اللي هو الحتة بين الودن والإيه؟ والرقبة، عفواً الودن والـ والكتف، مسيرة 500 سنة.
وساعتها قلنا لكم عشان نفهم دي: طريق مصر-إسكندرية أنت بتقطعه في ساعة ساعة وربع مثلاً، تقطعه في ساعة وربع، فبقول لك تخيل لو في مخلوق رقبته قد طريق مصر-إسكندرية، أنت فاهم المخلوق ده عامل إزاي؟ ده أنت اللي بتقطعه في إيه؟ ساعة ونصف، طب تخيل بقى 500 سنة، المخلوق عامل إزاي؟ ده إيه؟ ده ما بين شحمة ده مش ده مش المخلوق، ده ما بين شحمة أذنه إلى عاتقه مسيرة 500 عام. لما نقول لك ده المخلوق يبقى الخالق جل وعلا، بلاش يعني يعني يعني خلينا دلوقتي يا جماعة في المخلوق ده، خلينا في المخلوق ده، لو أن هذا المخلوق ده وليك يعني إيه؟ أنت في ح- أنت م- إنه بس موجود كده و- ده مش كفيل إنه إنك تذهل عن أي حالة، بس مجرد إنك تشوف مخلوق زي كده تنسى كل حاجة؟ ما يا جماعة دي هي دي حالة الوله اللي ممكن تحصل للناس، بعض الناس أو ال- الناس يعني إيه؟ تفقد عقولها في ليه؟ ما هو ده خلاص هو يعني إيه؟ عرف ما لم نعرفه وتلمح ما لم نتلمح. أنت مخلوق زي ده لو شفته، أنت هتقف قدامه ومش هتبقى دريان بحاجة في الدنيا حواليك أصلاً، مش هتبقى دريان ولا دريان بحاجة في جسمك، تعب ولا بتاع، خلاص هتذهل عن كل ده. فهذا استدعاء العرش هنا.
في的一个 معنی تاني هو حقارة الدنيا، أنت واخد بالك عمال يقول حلقة في فلاة، حلقة في فلاة، حلقة في إيه؟ أنت بقى قد إيه؟ يعني أنت في سماء الدنيا دي قد إيه؟ ولا حاجة، ما إحنا ما نساويش. حلقة في فلاة، اللي هي السماء الدنيا في التانية لغاية العرش، طب مش أنت بقى مشكلتك اللي هي أصلاً جزء منك؟ إيه بقى مشكلتك أنت يعني؟ وتساوي إيه في اللي إحنا عمالين نحكي فيه ده كله؟ أنت مكبر الدنيا ليه؟ أنت مكبر الدنيا ليه وكأنك أنت محور الكون، كل واحد فينا فاكر نفسه محور الكون. إيه يعني عندك مشكلة كبيرة، إيه يعني كبيرة؟ وأنا هنا مش بـ مش بتنطط ولا بحكم على حد، أنا بهون عليك الأمر، بأريك الأمر على ما هو عليه، ولا حاجة، مشكلتك دي ولا حاجة. ولا حاجة إذا قورنت بهذه المخلوقات اللي إحنا عمالين نتكلم فيها، ولا حاجة إذا قورنت بالله عز وجل وعظمته ورحمته سبحانه وتعالى. انتحار إيه اللي عمال تتكلم فيه؟ واكتئاب إيه اللي عمال تتكلم فيه؟
لا إله إلا الله رب العرش العظيم، لا إله إلا الله رب السماوات ورب الأرض. كذلك فيها نفس المعنى. شوفوا يا جماعة استدعاء معنى الربوبية تاني؛ المربي والمصلح، رب السماوات ورب الأرض. فأنت حل مشكلتك فين؟ في الأرض، هو رب الأرض. في السماء، هو رب السماء، ورب العرش الكريم.
شوف شوف يا جماعة استدعاء العرش مرتين في دعاء إزالة الكرب. اربط قلبك بالسماء، اربط قلبك بالعر- يعني طبعًا بالسماء والعرش المقصود الرب سبحانه وتعالى يعني. اربط قلبك بالحاجات دي. لما نيجي نقول إيه؟ العرش، العرش على طول في الذهن ينصرف إليه الملك، مش كده؟ في الدنيا حتى، ولذلك استدلوا على عظم مملكة إيه مملكة سبأ بعظم الإيه؟ العرش، ولها عرش عظيم.
فأن تربط نفسك بالمعاني دي، رب السماوات ورب الأرض ورب العرش، تاني العرش، ورب العرش الكريم. هنا في معنى جميل جدًا يا جماعة، إنه الأول وصف العرش بالعظم أو العظمة، ثم بعد كده وصف العرش بالكرم، كريم. يعني هو مخلوق كريم على الله عز وجل، وأنت إن كنت مؤمنًا أكرم على الله عز وجل من العرش. إيه رأيك بقى؟ فهذا قدرك إن ارتبطت بالله عز وجل.
لا إله إلا الله، عايزين نحفظه بقى. لا إله إلا الله العظيم الحليم، لا إله إلا الله رب العرش العظيم، لا إله إلا الله رب السماوات ورب الأرض ورب العرش الكريم. إيه مش عايزين نطول عليكم. إيه أدرس المذهب الحنبلي وكثيراً ما أمتنع من قراءات بعض المقالات الفقهية أو التفاسير خشية مخالفة معتمد المذهب. وبعدين قرأ لحد يعني امتناع أنه يذم امتناع كثير من الطلبة عن الانتفاع من باقي الكتب بدعوة التدرج.
مش فاهم قوي السؤال، يعني أنت لو تدرس المذهب فدراستك للمذهب لابد لها أنك تتدرج، لابد. بتمتنع بقى عن قراءة حاجات تانية ليه؟ خايف تتلخبط يعني؟ مش يعني ما يعني وسع مداركك، ما فيش مشكلة. مش فاهم قوي السؤال يعني.
قلت قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير