دخولتسجيل الدخول

ما بعد أُُحد | حمراء الأسد والرجيع وبئر معونة

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم إنك حميد مجيد. أما بعد.

غزوة أحد كانت في شهر شوال من السنة الثالثة من الهجرة. بعد غزوة أحد حصل ثلاث أحداث ربما كثير من الناس لا ينتبهون لها؛ الحدث الأول هو غزوة حمراء الأسد، والحدث الثاني هو موقعة الرجيع، والحدث الثالث هو موقعة بئر معونة. دول ثلاث أحداث في السيرة كثير من الناس ممكن ما يعرفوهمش، وما يعرفوش حتى الأسماء بتاعتها، وهي أحداث مهمة جداً جداً، ولازم نقف معاها عشان نستخلص منها بعض العبر بالذات في هذه الأزمان. المفروض عشان نعمل ده فمحتاجين حوالي درسين أو ثلاثة. وراكم حاجة؟ يعني نسهر شوية ونخلص ولا إيه؟ طيب خلينا نحاول نختصر، مش هنحكي الحدوثة يعني، هنختصر القصة ونأخذ بعض مواطن العبر اللي عاوزين نخرج بها.

حمراء الأسد دلوقتي يا جماعة غزوة أحد خلصت، وبعدين هزم في نهاية الغزوة؛ يعني هزم المسلمون وانتصر المشركون. وبعد ما انتصر المشركون رجعوا لمكة، وهم في الطريق وقفوا كده، كان أبو سفيان قائد الجيش حينها وكان كافرًا. وقفوا وقالوا إحنا عملنا إيه؟ يعني إحنا عملنا اللي عملناه ده كله وفي الآخر المدينة كانت قدامنا ما دخلناش المدينة. طيب، كان العرب عندهم عادة زمان كده لو في جيش انتصر ما يمشيش على طول، يقعد في مكان الغزو أو في مكان المعركة ثلاثة أيام، يأكل ويشرب ويهيص وبتاع، قال يعني إيه ما فيش حد قادر عليه يعني. برضه ما عملوش ده، يعني هم يا دوبك حصل اللي حصل، وبعد ما كانوا فارين هاربين لاقوا الموضوع بقى الرماة وأنتم عارفين القصة دي. المهم انتصروا ورجعوا على طول إيه جري على مكة، ففي وسط الطريق أبو سفيان قال لا ما ينفعش الكلام ده، والجيش وقف يفكر نعمل إيه؟ قال لهم خلاص نرجع نخش المدينة. أبو سفيان تردد شوية وبعدين قال طب يلا نرجع نخش المدينة.

فعلم النبي صلى الله عليه وسلم إنهم راجعين داخلين المدينة، فندب الصحابة للخروج وقال كلمة عجيبة جداً، وده أول درس هنقف معاه. قال صلى الله عليه وسلم: «لا يخرج معنا إلا من شهد أحداً». الكلمة دي عجيبة جداً وعاوزين نقف معاها، وده أول درس وهنطول فيه شوية. دلوقتي يا جماعة عشان نفهم بس القصة؛ الكفار كانوا كام واحد في أحد؟ ثلاثة آلاف. المسلمين كانوا كام وقت الحرب؟ سبعمائة. ثلاثة آلاف قدام سبعمائة. كان في في المدينة ناس؟ آه كان في في المدينة ناس تانية. راح جه النبي عليه الصلاة والسلام... الأول كام واحد مات من المسلمين في أحد؟ سبعون. فدلوقتي اللي هيخرج كم؟ سُمُّوا بستمائة وثلاثين، عشان يقابلوا كم؟ ثلاثة آلاف مات منهم حاجة وثلثون واحد. جزاكم الله خيرا، مات منهم حاجة وثلثون واحد، زي الفل، جزاكم الله خيرا.

فإحنا بنتكلم في ستمائة وثلاثين واحد من المسلمين مطلوب منهم يطلعوا يحاربوا، حوالي ثلاثة آلاف إلا ثلاثين يعني. طيب، الستمائة وثلاثون واحد دول إيه ظروفهم يعني؟ أقوياء وفي صحتهم ولا إيه اللي حصل؟ دول في جراحاتهم وتعبانين، يعني أحد كانت يوم السبت، والنبي عليه الصلاة والسلام ندبهم للقتال يوم الأحد ثاني يوم على طول. فستمائة وثلاثون واحد وصفهم القرآن: ﴿الَّذِينَ اسْتَجَابُوا لِلَّهِ وَالرَّسُولِ مِن بَعْدِ مَا أَصَابَهُمُ الْقَرْحُ﴾ [آل عمران: 172]. فناس تعبانة، ناس منهكة، ناس في جراحاتها؛ لدرجة أن روي أن كان في منهم اللي مش قادر يمشي من الجراح، فكان أخوه اللي هو برضه في جراح لكن قادر يمشي شوية يشيله، يشيله شوية وبعدين ينزله يمشي شوية وبعدين يشيله، دول اللي رايحين يحاربوا في غزوة سميت بحمراء الأسد.

ليه النبي يعمل كده عليه الصلاة والسلام؟ يعني ليه يقول لا يخرج إلا من شهد أحدا؟ ما تحشد الناس، ليه تعمل كده؟ من أهم الدروس المستفادة هنا، وعشان نفهم الدرس ده محتاجين نرجع شوية في غزوة أحد. النبي عليه الصلاة والسلام يا جماعة لما خرج في أحد، خرج في كام مقاتل؟ ألف. تقول الله، أنت بتقول سبعمائة! لا، النبي كان خارج في ألف مقاتل، راح جاي رأس النفاق عبد الله بن أبي بن سلول انشق بثلاثمائة، فاتبقى مع النبي صلى الله عليه وسلم سبعمائة. طيب، قد يكون كان في بعض الرجال المتخلفين في المدينة لأعذار أو لغيره.

النبي عليه الصلاة والسلام هنا عاوز يعمل حاجة؛ عاوز يمايز الصف، ده أعظم درس مستفاد في غزوة حمراء الأسد أو من أعظم الدروس. أراد صلى الله عليه وسلم أن يمايز الصف، مش عاوزين منافقين معانا، إحنا عاوزين اللي يطلع مؤمنون خلص. طيب، النبي عليه الصلاة والسلام مش بس نبي -صلوا على النبي- ده قائد، فلو سمى أناسًا بأعينهم فلان ما يطلعش، فلان ما يطلعش، فلان ما يطلعش؛ هيحصل تأليب، وهم أصلًا بيعملوا ده، يعني بيقلبوا الناس عليه صلى الله عليه وسلم، مش ساكتين. قبل كده كنت في درس من الدروس قلت إحنا محتاجين حد يعني واحد عنده ملكة البحث ويعمل لنا بحث في كيف عامل النبي المنافقين عليه الصلاة والسلام، ده بحث مهم جداً. فإحنا هنا النبي عليه الصلاة والسلام إزاي يتعامل مع الموقف ده؟ مش عاوز منافقين، وما ينفعش يسمي وإلا هيحصل شقاق كبير جداً وهيبتدي يقلبوا الناس عليه، يعمل إيه صلى الله عليه وسلم؟ يقول خلاص ما يخرجش معايا غير اللي خرج في أحد.

الموقف ده هو هو عمله النبي عليه الصلاة والسلام في وقت ثاني، حد يعرف إمتى؟ في خيبر. خيبر كان قبلها صلح الحديبية، فالنبي عليه الصلاة والسلام وهو رايح لخيبر قال نفس الكلمة: «ألا يخرج معي إلا من شهد الحديبية». خيبر حصن منيع، اليهود عشرة آلاف مقاتل، واللي شهد الحديبية ألف وأربعمائة. يبقى هو رايح هيحاصر حصنًا خارج المدينة، مستني جوه الحصن عشرة آلاف مقاتل، يقوم يقف يقول: لا يخرج معي إلا من شهد الحديبية، ما حدش يجي معي غير اللي شهد الحديبية، ليه؟ ليميز الصف. برضه بطريقة من غير ما يسمي المنافقين.

طب إيش معنى الحديبية؟ لأن من شهد الحديبية شهد الله له بالإيمان، بل شهد الله عز وجل له بأمر زائد على الإيمان، إن ربنا رضي عنه، مش كده؟ ﴿لَّقَدْ رَضِيَ اللَّهُ عَنِ الْمُؤْمِنِينَ إِذْ يُبَايِعُونَكَ تَحْتَ الشَّجَرَةِ فَعَلِمَ مَا فِي قُلُوبِهِمْ﴾ [الفتح: 18]. فشهد لأهل الحديبية بالإيمان، وشهد لهم برضاه عنهم جل وعلا، وقد وعد الله عز وجل أهل الحديبية وأثابهم فتحًا قريبًا، فربنا كان وعدهم الفتح، فقالها النبي صلى الله عليه وسلم: لا يخرج معي إلا من شهد الحديبية، ليه مرة ثانية أهو؟ ليميز الصف.

طيب ليميز الصف؟ ما هو إحنا بالعقل أنت رايح على عشرة آلاف مقاتل، في حمراء الأسد طالع على ثلاثة آلاف مقاتل، وفي حمراء الأسد كل الجيش اللي معك فيهم الجراح والتعب، ما تلم ناس، لم عدد! وهذه عقلية بعض المؤمنين الآن؛ لم، عايزين عدد وخلاص. النبي عليه الصلاة والسلام لم يفكر بهذه الطريقة، طيب ليه؟ لعدة معاني، أهم المعاني دي أول حاجة: عارف لو خروج العدد ده لا منه نفع ولا ضرر كنا قلنا ماشي، إنما خروج أهل النفاق ضرر. مين اللي قال ده؟ أنا؟ ده القرآن اللي قال ده: ﴿لَوْ خَرَجُوا فِيكُم مَّا زَادُوكُمْ إِلَّا خَبَالًا وَلَأَوْضَعُوا خِلَالَكُمْ يَبْغُونَكُمُ الْفِتْنَةَ وَفِيكُمْ سَمَّاعُونَ لَهُمْ﴾ [التوبة: 47]. يبقى لو خرجوا هيزودوا الضعف والوهن، وهيحثوا السير ويجدوا في إحداث الفتن والقلاقل في الصفوف، وفيكم سماعون لهم. فخروج المنافقين المرجفين هيضعف الجيش مش العكس.

وده حصل في أحد؟ آه حصل في أحد، لما عبد الله بن أبي بن سلول انشق بالثلاثمائة، كاد فريق من المؤمنين أن يتبعه، وقال ذلك الله عز وجل في كتابه: ﴿إِذْ هَمَّت طَّائِفَتَانِ مِنكُمْ أَن تَفْشَلَا بَنُو سَلَمَةَ وَبَنُو حَارِثَةَ﴾ [آل عمران: 122]. دول ناس مؤمنين، لما عبد الله بن أبي بن سلول انشق بثلاثمائة -على فكرة يا جماعة ثلاثمائة ده رقم كبير جداً من ألف، احنا بنتكلم في ثلث الجيش، ثلث القوة انشقت- وبعدين الانشقاق في نص المعركة أو قبل المعركة، يعني لو هم ماشيين، أنت فاهم يعني إيه ثلث الجيش بينشق؟ طبعاً اللي واقف بيبص مش هيقعد يعد كام واحد، هو فجأة بيلاقي كتلة بتلف وترجع، فده يحدث إرجافاً وضعفاً ووهناً في تفشل، لفظ الفشل ده يعني الجبن. إذ همت طائفتان منكم أن تفشلا، أن تجبنا، ولولا أن الله عز وجل ثبت بني سلمة وبني حارثة لانشقوا ورجعوا مع المنافق. شايفين يا جماعة خطورة وجود المنافق في الصف، شايفين خطورة عدم تمييز الصف، عدم التمحيص؟ يبقى احنا ما بنفرحش بعدد ولا ده مطلوب في النصر أصلاً.

وده المعنى الثاني، احنا قلنا في عدة معاني تخلينا ما نهتمش قوي بموضوع العدد ده على قد ما نهتم مين اللي طالع. المعنى الثاني المهم: أن ربما بشؤم هؤلاء يتخلف النصر، ما هو النصر ما ينزلش على دول، النصر ينزل على الفئة المؤمنة، فييبقى ممكن وجود هؤلاء في الصف يمنع تنزل النصر، يمنع تنزل الرحمات، فما بنفرحش بعدد خالص، ولا نرى العدد سبيل النصر أصلاً، إيه رأيكم؟ بالعكس، ده لو مالت قلوبنا إلى ذلك فسمى الخذلان. حصل فين؟ ويوم حنين: ﴿إِذْ أَعْجَبَتْكُمْ كَثْرَتُكُمْ فَلَم تُغْنِ عَنكُمْ شَيْئًا وَضَاقَتْ عَلَيْكُمُ الْأَرْضُ بِمَا رَحُبَتْ ثُمَّ وَلَّيْتُم مُّدْبِرِينَ﴾ [التوبة: 25]. القرآن ما جاش إيه؟ إذ أعجبتكم كثرتكم فأغنت عنكم قليلاً مثلاً؟ الكثرة أغنت بس حاجة صغيرة؟ ربنا قال: فلم تغن عنكم شيئاً خالص. اثنا عشر ألف مقاتل في غزوة حنين، اثنا عشر ألف مسلم، عدد ما اتشافش قبل كده؛ إنتوا شايفين إحنا بنتكلم على كام؟ بدر ثلاثمائة وأربعة عشر، أحد سبعمائة، شايفين إحنا بنتكلم في أرقام شبه شكلها إيه؟ حنين اثنا عشر ألف مسلم، فروا كلهم، ااتبقى عشرات بس.

ويوم حنين إذ أعجبتكم كثرتكم، قال أبو سفيان لن... وكان قد أسلم من مسلمة الفتح، قال: لن نهزم اليوم من قلة. كلمة قالت، القلوب أعجبت بالكثرة: ﴿فَلَم تُغْنِ عَنكُمْ شَيْئًا﴾. فالكثرة لا تغني عنها شيئاً، ولو القلوب مالت للكثرة ضعنا وخذلنا. اللي في دماغه إن إحنا عايزين نحشد وخلاص يبقى الصف مليان، سواء بقى في جهاد أو في غير الجهاد، في الدعوة إلى الله، في العلم، في أي شيء؛ لا، تمايز الصف ده مهم جداً، والمخذل مش شرط يبقى منافق. يعني إنت لو جماعة من طلاب العلم وراح جاي واحد في وسطهم مخذل كسلان يقعد يزن في ودن ده ويزن في ودن ده ويزن في ودن ده: وإحنا يعني هنوصل لإيه وإحنا هنعمل إيه؟ يقوم يعمل إيه؟ يكسل الناس المجتهدة، مش كده؟

حدث شيء من ذلك -مش بنقول إن هو مخذل طبعًا- لكن حدث شيء من ذلك مع مين؟ مع ابن عباس رضي الله عنهما. ابن عباس كان مات النبي عليه الصلاة والسلام وابن عباس غلام صغير، وكان ليه واحد صاحبه، فابن عباس انكب على العلم، يروح للعلماء من الصحابة ويقعد تحت رجليهم، وصاحبه يقول له إيه: عجبًا لك يا ابن عباس، أنت بتعمل إيه؟ أنت فاكر إن الناس هتسيب الصحابة الكبار دول وهيجوا لك في يوم من الأيام؟ فابن عباس لم يلتفت وأقبل على شأنه. وتمر السنين، ويجلس ابن عباس ويجلس الناس له، فيقول صاحبه: هذا الغلام كان أعقل مني. فمهم جداً هذا الموضوع.

فحمراء الأسد خرج النبي عليه الصلاة والسلام وقال هذه المقالة، وأول ما عرف إن أبو سفيان راجع تاني وهو في حمراء الأسد، لقي معبد بن أبي معبد الخزاعي، وكان خزاعة بينها وبين المسلمين ميثاق وعهد وهدنة وكده، فقال له: عاوز مني حاجة؟ قال له: خذل عنا -وكان كافرًا-. فراح رايح لمين؟ لأبي سفيان. أبو سفيان كان جاي، فقال له: أنا، ده جمع لك ناس كثيرة جداً وأكثر من اللي كانوا في أحد، وجاي عليك، مش مستنيك، جاي عليك. فأبو سفيان قال له: يعني أنت متأكد؟ قال له: ده وإحنا وإحنا بنتكلم كده ممكن تلاقي الخيل جت. طبعًا والنبي عليه الصلاة والسلام ما اتحرك، هو في حمراء الأسد، قال له إيه؟ قال له يعني إحنا مش بنتكلم دلوقتي في هو جاي ولا مش جاي، ده وإحنا بنتكلم ممكن تلاقي الخيل ابتدت تظهر وإحنا... فأبو سفيان راح عامل إيه؟ راجع على مكة على طول.

طبعًا حمراء الأسد مليانة بفوائد، لكن تعالوا بقى نتجاوز علشان إحنا مش هينفع لسحب في هذا الأمر. اللي حصل بقى بعد كده حادثة الرجيع وحادثة بئر معونة؛ غزوة أحد يا جماعة كانت في شوال من السنة الثالثة من الهجرة، شوال ده اللي هو الشهر الكام في السنة؟ شوال الشهر العاشر، وبعدين بعد شوال ذو القعدة وبعدين ذو الحجة وتخلص السنة وتبتدي السنة الجديدة بالمحرم وبعدين صفر. فكانت أحد في شوال من السنة الثالثة، وفي أواخر السنة الثالثة حدثت حادثة الرجيع، وفي أول صفر من السنة الرابعة حدثت حادثة بئر معونة. ركزوا بقى كده في التوقيتات دي؛ يبقى إحنا بنتكلم في تقريبًا بعد أحد بشهرين تحصل حادثة الرجيع دي. إيه حادثة الرجيع؟ إن النبي عليه الصلاة والسلام يرسل رهطًا عينة، يعني هيطلع عشرة من الصحابة عين يروحوا يستكشفوا حاجة معينة، فينتبه لهذا الرهط، والعشرة هيتقتلوا كلهم، وبعدين...

تتحصل حادثة بئر معونة بعديها بشهرين، في أول صفر. يبقى بينها وبين أحد أربع شهور تقريبًا، ماشي؟ أو ثلاث شهور تقريبًا؛ يعني ذو القعدة وذو الحجة والمحرم ثلاث شهور وفي أول صفر هيحصل حادثة بئر معونة. إيه حادثة بئر معونة؟ إنه هييجي واحد للنبي عليه الصلاة والسلام، اللي هو أبو براء، وكان اسمه عامر بن مالك.

النبي هيعرض عليه الإسلام عليه الصلاة والسلام. فلن يسلم، لكنه لن يبعد؛ يعني ما أسلمش لكنه إيه؟ يعني ما نفرش. وبعدين هو كان سيد في قومه في بني عامر، ودول كانوا في نجد، والنبي في المدينة عليه الصلاة والسلام. فهيعقول له: طب أرسل معايا ناس تدعو قومي إلى الإسلام. فسيدنا النبي عليه الصلاة والسلام هيقول له: أنا خايف عليهم من أهل نجد. هيقول له: أنا جار لهم، يعني ما تخافش هم في جواري، وعامر بن مالك سيد في قومه، يعني مثله لا يخفر الجوار. فسيدنا النبي هيبعت معاه كام واحد عليه الصلاة والسلام؟ سبعون من القراء، سبعون عالم. هيبعتهم معاه، هيحصل قصة ممكن نتعرض لبعضها الآن.

في الآخر السبعون هيتقتلوا، كلهم. هيتقتلوا ما عدا واحد، هيظل في جراحاته وبعدين هيشفى منها وبعد كده هيستشهد في الخندق. المهم السبعون كلهم هيتقتلوا. إيه اللي هيحصل؟ هييجي واحد اسمه عامر بن الطفيل، وده يبقى ابن أخو عامر بن مالك. هيطلع عليهم وفيهم حرام بن ملحان رضي الله عنه. هيروح له بكتاب النبي عليه الصلاة والسلام، مش هيقرأه عامر بن الطفيل، وهيأمر واحد إنه يرمي حرام بن ملحان بالحربة من ظهره، هتطلع من صدره.

أول ما هيلاقي الدم، هيروح واخد الدم ورامي وشه بيه ويقول: فزت ورب الكعبة. الله أكبر. فزت ورب الكعبة. احفظوا الكلمة دي، علشان هتبقى سبب في إسلام واحد؛ اللي رماه. هنقولها دلوقتي، اسمه جبار. كان سبب إسلامه الكلمة اللي قالها حرام بن ملحان. إيه فزت ورب الكعبة؟ ده أنا بقتله! فابتدى يسأل، فاز بإيه؟ قالوا: لا، إحنا عندنا حاجة اسمها الشهادة، وعندنا آخرة وجنة ونار. فأسلم، وكان سبب إسلامه الكلمة التي قالها حرام بن ملحان، ومات حرام بن ملحان رضي الله عنه.

وبعدين عامر بن الطفيل راح لقبيلة عامر بن مالك، قالهم: يلا تعالوا نقتل السبعون. قالولهم: لا. هم في جوار عامر بن مالك. راح رايح لقبائل تانية؛ رعل وذكوان وعصية. فوافقوا، وخرجوا معاه وقتلوا السبعون. فالسبعون اتقتلوا.

ويوصل الخبر للنبي عليه الصلاة والسلام بتاع السبعون وبتاع العشرة بتوع الرجيع في نفس اليوم. يعني النبي عليه الصلاة والسلام ما عرفش بمقتل العشرة غير بعد تقريبًا شهرين. أنتوا عارفين زمان ما فيش إيه؟ ما فيش واتساب وما فيش إيميل وما فيش تليفونات، فعادي ممكن ناس رايحة لحاجة تتأخر، عادي جداً. فالنبي عليه الصلاة والسلام ما عرفش إن العشرة دول اتقتلوا. وييجي له خبر العشرة والسبعون في نفس اليوم. ولم يحزن النبي صلى الله عليه وسلم حزنًا كما حزن في هذا اليوم، وظل صلى الله عليه وسلم يقنت شهرًا يدعو على هؤلاء، على رعل وذكوان وعصية عصت الله ورسوله، يدعو عليهم في صلاته شهر كامل. إلى أن نزل قرآن يبلغ عن هؤلاء السبعون الذين قتلوا: أن بلغوا قومنا أن قد لقينا ربنا فرضي عنا ورضينا عنه.

سورة إيه دي؟ مش قلنا قرآن؟ هذا مما نسخ لفظه، هذا مما نسخ لفظه. عندنا النسخ، يعني إيه نسخ الأول؟ يعني الإزالة. فعندنا النسخ في القرآن على أحوال، ممكن قرآن ينسخ حكمًا ويبقى لفظًا؛ يعني نقرأ الآية لغاية دلوقتي موجودة لكن حكمها خلاص نسخ، نسخ بإيه؟ بحكم تاني. ﴿مَا نَنسَخْ مِنْ آيَةٍ أَوْ نُسِهِهَا نَأْتِ بِخَيْرٍ مِّنْهَا أَوْ مِثْلِهَا﴾ [البقرة: 106]. يعني لو في آية فيها حكم كان نازل في وقت من الأوقات تخفيفًا على المسلمين، وبعدين تنزل بقى تدريج في الأحكام، وتفضل الآية تقرأ عادي جدًا. ده نسخ حكمًا وبقي لفظًا.

وفي أنواع النسخ أنواع كثيرة، مش هندخل بقى في علوم القرآن أو في أصول الفقه. المهم، في نوع من أنواع النسخ أن ينسخ اللفظ، اللفظ نفسه كان بيقرأ وبعدين خلاص ما بقاش يقرأ، منه الآية دي. خلاص؟ فترك النبي صلى الله عليه وسلم القنوت.

عاوزين نتأمل شوية يا جماعة في الحدثين دول عشان هنخرج بدروس كبيرة برضه. أول حاجة النبي عليه الصلاة والسلام اتقتل عشرة هنا واتقتل سبعون هنا، هل حشد الجيوش؟ يعني لما اتقتل السبعون قال: ما ينفعش نسكت، يلا بينا نروح للناس دي؟ ما عملش كده النبي عليه الصلاة والسلام. ليه ما عملش كده النبي عليه الصلاة والسلام؟ يعني دماء القراء دي دماء رخيصة؟ لا، مش رخيصة ولا حاجة، دول علماء. أمال ليه ما عملش كده النبي عليه الصلاة والسلام؟ مراعاةً لموازين القوى.

خلي بالكم يا جماعة، إحنا هنا مش بنتكلم عن العصر المكي، ده مهم جداً إن احنا نفهمه ونستوعبه، لأن بعض الناس لما بنيجي نتكلم على موازين القوى واعتبار موازين القوى، يقولك: لا، أنت ده في العصر المكي، وآيات العصر المكي خلاص نسخت بآيات الجهاد اللي في العصر المدني. إحنا الآن بنتكلم عن حقبة زمنية نزلت آيات الجهاد وجاهد النبي صلى الله عليه وسلم، يعني كان في غزوة بدر خلصت وغزوة... كان خلاص ابتدينا جهاد، خلاص وحمراء الأسد كذلك خرج فيها صلى الله عليه وسلم.

لكن لما حصل كده، النبي عليه الصلاة والسلام أول حاجة إنه لم يحشد الجيش علشان يروح يقاتل. أول حاجة طبعاً الفرق بين المدينة ونجد مسافة كبيرة جداً، دي أول حاجة. تاني حاجة، ودي المهمة، هو لسه خارج منين؟ خارج من أحد، اللي حصل فيها اللي حصل. الناس تعبانة، الناس في جراحاتها. تقول الله طب ما هو خرج حمراء الأسد؟ آه، ده كان ضروري يخرج في حمراء الأسد، ليه؟ لو ما كانش خرج كان أبو سفيان هييجي بالجيش ويهاجمهم جوه المدينة، فده كان لازم يخرج بهؤلاء. فدي كانت أحوالهم، ناس العدد قليل وفي جراحاتهم، هيمشوا المسافة دي كلها إزاي؟ وخلي بالكم لما خرجوا في حمراء الأسد ما كانش معاهم حتى ظهر، لدرجة بقولكم الناس بتشيل بعض، الناس بتشيل بعض. فلو كان معاهم ظهر كافي، يعني دابة، يعني كل واحد معاه دابة يركبها، هيشيلوا بعض ليه؟ فما معهمش حتى الظهور قليلة، فهنا القائد لابد له من نظر في المصلحة والمفسدة، فما عملش كده النبي عليه الصلاة والسلام. دي أول مسألة؛ لم يحشد جيشًا وما راحش أخذ بثأر هؤلاء، ليه؟ مراعاةً لموازين القوى.

طيب، السؤال الثاني؛ النبي عليه الصلاة والسلام عمل إيه؟ ها؟ دعا. ركزوا يا شباب، النبي عليه الصلاة والسلام عمل إيه؟ دعا. ليه بقول الكلام ده يا جماعة؟ لأن بعض الناس لما بنيجي نقولهم سبب مهم جدًا، أو مما عليك أن تفعله في بلاءات الأمة، أن تكثف الدعاء، فيبتدي يحتقر الدعاء، ممكن يحتقره في قلبه وممكن بعض الناس بتتلفظ بده، يقولك: يعني هو هيعمل إيه الدعاء؟ لا، هو الدعاء يعمل كتير، الدعاء يعمل كتير. وسيدنا النبي عليه الصلاة والسلام لما قتل هؤلاء ما صنع شيئًا غير الدعاء، صلى الله عليه وسلم. وهنا ما صنع شيئًا غير الدعاء يعني شيئًا زائدًا، وإلا فهو صلى الله عليه وسلم هو طول عمره في جهاد وإعداد جيش، وده مطلوب؟ آه، مطلوب. لكن مطلوب على مين؟ مش على أحد الناس، مش اللي قاعدين قدامي دلوقتي. طب إحنا دلوقتي مقفول علينا، مش قادرين نعمل، هنعمل إيه بقى؟ هنقعد على أرزنة؟ ادعي، ادعي ربنا سبحانه وتعالى.

نعمل إيه تاني؟ فيه بقى دروس كتير إحنا اتكلمنا فيها، بس إحنا دلوقتي مش جايين نقول نعمل إيه، مش ده درسنا. الدرس اللي فات إحنا اتكلمنا، اللي شافه منكم، وقلنا فيه أسماء دروس تتشاف، نعيدهم تاني؛ الدرس اللي فات اسمه إيه؟ أسرى المسرى، يتسمع. ودرس إيه تاني؟ إيه، كفوا أيديكم وأقيموا الصلاة، كده صح؟ درس كفوا أيديكم وأقيموا الصلاة يتسمع لو عاوز تعرف نعمل إيه. عشان إحنا دلوقتي مش بنتكلم نعمل إيه، هو فيه حاجات كتير تتعمل، بنتكلم في مسألة الدعاء وعدم احتقار الدعاء.

وإيه تاني؟ الغربلة والصخرة. حاجة تانية ولا كفاية؟ كفاية، أنا مش فاكر. إحنا فيه ملف كبير اسمه ملف غزة، حوالي مائة درس، قراءة كتب وسلاسل ودروس، ممكن يتسمعوا كلهم يعني لو فاضيين. تمام، ابتدوا بالأربعة دول عشان تعرفوا نعمل إيه، إيه اللي في إيدنا نعمله دلوقتي. إيه اللي في إيدنا نعمله لمن؟ مش بس لغزة يا جماعة، ليه؟ ده برضه خلل آخر واقع في الأمة. إيه هو الخلل؟ إن اللي بيتسلط عليه الضوء تهتز له الأمة وتزعل، واللي بره الأضواء مش في دماغنا. إحنا عندنا السودان متبهدلة، مش كده؟ وعندنا فين تاني؟ فيه لبش بين أفغانستان وباكستان، وعندنا يعني عندنا فيه حتت كتير متبهدلة، مش بس غزة ولا فلسطين. كل دول محتاجين أوراد من الدعاء، محتاجين.

فبلاش نحتقر الدعاء، لأن يا جماعة احتقار الدعاء ده مسألة خطيرة، ليه بقى؟ لأني إذا وجدت من نفسك إن أنت شايف الدعاء ده حاجة قليلة، فلازم ذلك وحاشاك أن تكون كذلك، إن أنت مش حاطط ربنا في المعادلة، أنت زيك زي الكافر اللي هو بيحسبها واحد زائد واحد يساوي اثنين، هي موازين قوى. المسلم مش كده، المسلم مش كده. المسلم عنده حاجة اسمها رب يدعوه ويفتقر إليه حتى لو ما معهوش أي حاجة. ربنا سبحانه وتعالى أمرنا بإيه يا جماعة؟ ﴿وَأَعِدُّوهُم مَّا اسْتَطَعْتُم﴾ [الأنفال: 60]. طب أعددنا ما استطعنا وطلع حاجة قليلة جداً، خلاص، أنت عملت اللي عليك، أعددت ما استطعت. طب النصر؟ مش من عندك. أمال ربنا ينزل لك إيه تنصرك من السماء؟ ها؟ ينزل إيه؟ زي بدر وأحد، نزل لهم إيه؟ ملائكة تنصرهم؟ صح؟ غلط! ربنا ما نزلش ملائكة تنصر، ربنا نزل الملائكة عشان حاجتين قلناهما الدرس اللي فات: بشرى ولتطمئن به قلوبكم، بس. وبقية الآية: ﴿وَمَا النَّصْرُ إِلَّا مِنْ عِندِ اللَّهِ﴾ [آل عمران: 126]. فنزول الملائكة مش عشان النصر. يا جماعة، هو ربنا سبحانه وتعالى في حاجة إنه ينزل ملائكة عشان ينصر؟ ﴿وَمَا أَنزَلْنَا عَلَى قَوْمِهِ مِن بَعْدِهِ مِن جُندٍ مِّنَ السَّمَاءِ وَمَا كُنَّا مُنزِلِينَ﴾ [يس: 28]. مش محتاجين ننزل ملائكة إحنا عشان ننصر عبادنا، وما النصر إلا من عند الله. أمال الملائكة نزلت ليه؟ تبشير للمؤمنين وتطمين للقلوب، بس.

شايف بقى الدعاء اللي أنت مستقله ده؟ سيدنا النبي عليه الصلاة والسلام في بدر، بدر ثلاثمائة وأربعة عشر واحد، الكفار كم واحد؟ بين التسعمائة والألف. بدر المسلمين طلعوا مش عشان يحاربوا أصلاً، فمعهمش السلاح، سلاح الحرب، لا، معهمش السلاح الخفيف، ولا معهمش سلاح الحرب ولا كده، لأنهم كانوا طالعين ياخدوا... قصة طويلة كده، ياخدوا العير وما كانش فيه حرب، يعني ما كانواش ناويين الحرب. الكفار طلعوا للحرب. في بدر المسلمين يتناوبون على البعير الواحد، معهمش ظهر كفاية. الكفار جايين كل واحد معه الدبابة بتاعته. المسلمين يتقاسمون التمرات، تمرة! بيأكلوا تمر. الكفار كل يوم يذبحوا... يوم يذبحوا تسعة جمال، اليوم اللي بعده عشرة جمال. ما فيش موازين قوى خالص.

انتبه النبي للمعنى ده عليه الصلاة والسلام. يعمل إيه بقى النبي عليه الصلاة والسلام؟ يدعي. يدعي. دخل العريش بتاعه ورفع يديه وبالغ في رفع يديه حتى سقط البرد اللي على كتفه من كثر ما هو رافع يديه، يبتهل إلى الله عز وجل: اللهم إن تهلك هذه العصابة لن تعبد في الأرض بعد اليوم. اللهم نصرك الذي وعدت. اللهم نصرك الذي وعدت. اللهم نصرك الذي وعدت. ويبكي صلى الله عليه وسلم. يبص يلاقي جبريل نازل عليه لابس عمة الحرب.

يبقى الدعوة اللي حضرتك مستقلها دي وأنت ساجد تغير الكون كله، تغير الكون كله، لأنها خطوات شيطان: الدعاء يعمل إيه؟ ما هو مش هيعمل حاجة. فتسأل: فتععمل إيه؟ فما تدعيش! طب عملت إيه؟ ولا حاجة برضه، ولا حاجة. طب أنت قاعد مستني إيه؟ أما يتفتح باب المشكلة؟ طب يا عم لغاية ما يتفتح، أنت بتعمل إيه؟ أنت قاعد بتعمل إيه؟ ولا حاجة. زي ما قلنا الدرس اللي فات، إمبارح زي النهارة، والنهارة زي بكرة، والسنة الجاية هتبقى زي السنة دي. ما تعمل أنت حاجة!

الشاهد، ماذا فعل النبي عليه الصلاة والسلام؟ دعا. مش دلوقتي، مش هنقدر نجاهد، ليه؟ الناس طالعة من أحد تعبانة، مرهقة، الجراح، مش عارف إيه. فهنقعد بقى لغاية ما يبقى نقدر نجاهد؟ لأ، دعا، يقنت شهرًا على رعل وذكوان وعصية: اللهم العن رعلاً وذكوان وعصية عصت الله ورسوله. فمش عاوزين نحتقر الدعاء، أتهزأ بالدعاء وتزدريه وما تدري ما صنع الدعاء؟ سهام الليل لا تخطئ ولكن لها أمد وللأمد انقضاء.

يبقى عاوزين نتحرى في الدعاء بقى؛ أوقات الإجابة وأماكن الإجابة. يبقى لما أجي أقولك الدعاء، ويبقى ليه في ورد لإخوانك المسلمين من دعائك، فآخر ساعة في نهار الجمعة أنت فين؟ أنت فين؟ في الجامع. ليه؟ ما دي ساعة الإجابة. وعشان يجاب، إحنا هنا عندنا وقت ومكان، إحنا قلنا لكم إيه؟ نتخير أوقات الإجابة وأماكن الإجابة. يعني ساعة الإجابة دي لو دعيت بيها في بيتك، والله الحديث ما جاش كده، جه: «لا يوافقها عبد مسلم يصلي يدعو الله إلا استجيب دعاؤه»، كما قال صلى الله عليه وسلم.

أو إلا أجابه الله. طب يعني إيه يصلي؟ يعني تكون في المسجد تنتظر الصلاة، فإنك من انتظرت الصلاة فأنت في صلاة؛ لأن ده وقت كراهة ما فيهوش صلاة أصلاً، قبل المغرب ما فيش صلاة. مفهومة دي؟

فأنت في المسجد، يعني إيه في المسجد؟ يعني إحنا عاوزين إيه دلوقتي؟ يعني لو صلاة الجمعة في المسجد، المسجد متقفل، عاوزين نيجي نشوف قبل المغرب، لأ، المسجد متقفل برضه. وإلا ما تجيش تكلمني تقول لي أنا قلبي محروق على إخواننا، محروق انزل روح المسجد، دي ساعة إجابة، ده وقت إجابة، أنت فين؟ الثلث الأخير من الليل، أنت فين؟ أنت فين؟ أنت قاعد بتسكرول على الفيسبوك وعلى الإنستجرام والتيك توك ومش عارف إيه لغاية الساعة اثنتي عشرة أو الواحدة بالليل عشان تنام، عشان في أحسن أحوالك هتصحى تصلي الفجر في وقته.

ما تجيش بقى تصحى تاني يوم تقول إيه؟ باب الجهاد! يا حبيبي كان فيه باب تاني مفتوح، كان فيه باب تاني ليك مفتوح تنصر به إخوانك، وأنت تركت ذلك الباب. باب أخبر الرب عنه أنه ينزل فيه إلى السماء الدنيا، فيقول: هل من داعٍ فأستجيب له؟ ها؟ كنت أنت فين؟

طب اللي بيقيم الليل، دعاؤك قد إيه لإخوانك؟ الدعاء يا جماعة! الدعاء! تاني، هكرر: لو لقيت نفسك بتغفل عن الدعاء مع فعلاً حرقة قلبك على إخوانك، هنا فيه خلل مش في الأخوة الإيمانية، الأخوة موجودة، تقول أنا فعلاً متضايق، متضايق لهم بجد، أنا هنا مش بتكلم في اللي بيمثل، لأ، واحد بجد متضايق. لو غفلت عن الدعاء، أنت عندك خلل في حتة ثانية، عارفين إيه؟ التوحيد. خللك في التوحيد.

أنت مش شايف ربنا، أنت عمال تحسبها؛ سلاح وعدد وكده، دبابات وطيارات، طب يعني إحنا دراويش هنسيب ده؟ ما بنقولكش نسيب ده، ما بنقولش نسيب ده، إنما أنت إيه اللي في إيديك؟ الدعاء. طب الدعاء ده؟ أنت كده بتفوض الأمر لمن؟ لله سبحانه وتعالى. يعني يا جماعة عشان بس نفهم فكرة الدعاء دي، تخيل كده في نفس الوضع اللي أنت عمال تقول بقى إيه: قلبي بيحترق في باب الجهاد ومش عارف إيه، ماشي، كان ليك باب مفتوح مثلاً لمين؟ إيه؟ لأي حد بقى يعني ترامب مثلاً، إنك تروح تكلمه، أو لرئيس الأمم المتحدة، أي حد كده، ماشي؟ فعلاً ليك سكة إنك تروح تكلم ده وهيسمعك، وبابه مفتوح ليك، هيقعد يسمعك فعلاً، وخذ بقى الكبيرة: وعدك إن اللي هتسأله إياه هيفعلهولك.

كنت وأنت فعلاً عندك الحرقة جواك، يعني أنت فعلاً متضايق من اللي بيحصل، هتفضل قاعد تقول باب الجهاد ولا هتعمل إيه؟ هتجري على مين؟ عليه، الهي وقف يا عم اللي بتعملوه. صح يا جماعة ولا لأ؟ أنت لك باب مفتوح مع الله جل وعلا، سكة مفتوحة، وقد وعدك إن إذا سألته استجاب لك.

استجاب دي يعني لازم دلوقتي؟ مش بتاعتك. طب كمان سنة؟ مش بتاعتك. طب نموت وييجي جيل تاني؟ مش بتاعتك، مش بتاعتك؛ ﴿فَإِمَّا نُرِيَنَّكَ بَعْضَ الَّذِي وَعَدْنَاهُمْ أَوْ نَتَوَفَّيَنَّكَ فَإِنَّمَا عَلَيْكَ الْبَلَاغُ وَعَلَيْنَا الْحِسَابُ﴾ [الرعد: 40]. يعني إيه الآية دي؟ يعني ربنا بيقول للنبي عليه الصلاة والسلام: لو فضلت عايش لغاية ما تشوف بعض ما أخبرنا به عن الكفار هنهلكهم وهنعذبهم وكده ممكن ده يحصل، أو نتوفينك أو تموت وما تشوفش. طيب أنا أعمل إيه؟ فإنما عليك البلاغ، أنت عليك تعمل كذا أعمله، النتيجة إمتى؟ مش بتاعتك. وإلا خد مفاتيح الكون ودوره أنت بقى، دور أنت الكون طالما أنت مش عاجبك إدارة الرب سبحانه أو مش عاجبك تدبير الرب سبحانه وتعالى للكون، خد مفاتيحه ودوره أنت.

شوفوا يا جماعة تلك المفارقة، إحنا بنقولك مش بتاعتك في الموقف اللي معانا: إن النبي عليه الصلاة والسلام ظل يقنت شهراً يدعو على رعل وذكوان وعصية. في آية في القرآن اختلف المفسرون في سبب نزولها على ثلاثة أقوال، من الأقوال دي إنها نزلت في الموطن ده، إن هو النبي عليه الصلاة والسلام ظل يقنت يدعو على رعل وذكوان وعصية. إيه الآية دي؟ قول الله عز وجل: ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ أَوْ يُعَذِّبَهُمْ فَإِنَّهُمْ ظَالِمُونَ﴾ [آل عمران: 128]. هو بيدعو على رعل وذكوان وعصية: اللهم العن رعلًا وذكوانًا وعصية، عصت الله ورسوله. فينزِل قوله تعالى: ليس لك من الأمر شيء أو يتوب عليهم، يمكن يتوبوا. طبعاً الآية دي اختلف في نزولها أو في سبب نزولها، وهذا السبب هو الأبعد، لكن ابن حجر في الفتح وجّه إنه ممكن يكون؛ لأن طبعاً الآية دي نزلت في أحد، ورعل وذكوان وعصية بعد أحد بقد إيه؟ أربعة شهور. فابن حجر في الفتح وجه قولاً إنه قال له: والله ممكن يكون إن نزول الآية تأخر عن أحد لغاية ما حصل ده ونزلت في كل الأسباب دي من الأسباب، وهو الأقرب في نزول تلك الآية.

لما حصل اللي حصل في أحد وانقلبت الكفة ورجع الكفار وكاد يقتل النبي صلى الله عليه وسلم وخلص إليه وشج وجهه الشريف وكسرت رباعيته إلى آخر ما حدث، فقال: كيف يفلح قوم شجوا وجه نبيهم صلى الله عليه وسلم؟ وقنت، وكان بيدعو على نفر بأسمائهم، ماشي، فنزل قول الله عز وجل: ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ﴾ [آل عمران: 128]. كل اللي كان بيدعو عليهم بأسمائهم تابوا وأسلموا. إيه رأيكم؟ فمش بتاعتك، إيه اللي يحصل في الكون مش بتاعتك.

طب اللي النبي دعا عليهم عليه الصلاة والسلام، ما نزلتش صاعقة خدتهم ليه من السما؟ ده سيدنا النبي اللي بيدعي عليه الصلاة والسلام! يا ريت بس كده، ده ينزل في القرآن: ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ﴾ [آل عمران: 128].

تعالوا يا جماعة كده نتأمل حاجة: غزوة أحد، مين قائد الجيش؟ جيش الكفار أبو سفيان، إيه اللي حصل له؟ أسلم. مين صاحب انتصار الكفار؟ خالد بن الوليد، إيه اللي حصل له؟ أسلم، مش بس أسلم، ده بقى سيف من سيوف الله، كان سبب عدة انتصارات للمسلمين.

تعالوا كده نعيش نفسية الصحابة وقتها، بلاش، عشان إحنا بنحب خالد دلوقتي، تعالوا دلوقتي لما نلاقي فجأة كده مثلاً نتنياهو أسلم، إيه شعورك؟ يا جماعة هو ده اللي حصل، سبب هزيمة المسلمين في أحد أسلم، ده اللي حصل. فكأنه ممكن كان في القلوب وقتها إيه؟ يعني بلاش ده، يعني أي حد غيره. وده من حرارة الإيمان يعني مش حاجة، ما هو وقتها إحنا مش عارفين الغيب، لأ، ده يحسن إسلامه ويصير سيفاً من سيوف الله رضي الله عنه، ودلوقتي بنترضى عن خالد رضي الله عنه.

فمش بتاعتك، الكون يمشي إزاي؟ مش قضيتنا. النبي عليه الصلاة والسلام دعا عليهم، نزل: ليس لك من الأمر شيء، النتائج مش بتاعت حد.

بدر، عشان تراه يا جماعة إن هو الكون ربنا اللي بيدبره، طب وأما ربنا يدبر؟ سمعنا وأطعنا يا رب، سمعنا وأطعنا ده في الأوامر الشرعية والأوامر القدرية، خلاص، خضعنا لك وخضعنا لقدرك، ورأيناه أحكم القدر. لسة قايلين لكم غزوة بدر، الصحابة وعدهم الله عز وجل إحدى الطائفتين، إما العير وإما النفير. يعني إيه إما العير؟ يعني القصة بدر بسرعة في دقيقة، خرجت لقريش المسلمين عرفوا بها بضاعة وكده يعني، قالوا خلاص نروح بعض حقنا إحنا سايبين في مكة حاجات كتير، فخرجوا عاوزين ياخدوا العير، وكان ربنا وعدهم إن في هذه الحادثة إما هترجعوا بالعير وإما هيكون حرب، يعني مش يا إما ترجعوا بالعير يا إما هتفلت العير وخلاص خلصنا، لأ، إما هترجعوا بالعير هتكسبوا الفلوس دي وترجعوا بها وإما هيكون في حرب.

فالمسلمون بطبيعة الحال أرادوا العير، ربنا قال كده في القرآن: ﴿وَتَوَدُّونَ أَنَّ غَيْرَ ذَاتِ الشَّوْكَةِ تَكُونُ لَكُمْ﴾ [الأنفال: 7]. ربنا وعدهم إحدى الطائفتين، ﴿وَتَوَدُّونَ أَنَّ غَيْرَ ذَاتِ الشَّوْكَةِ تَكُونُ لَكُمْ وَيُرِيدُ اللَّهُ أَنْ يُحِقَّ الْحَقَّ بِكَلِمَاتِهِ وَيَقْطَعَ دَابِرَ الْكَافِرِينَ﴾ [الأنفال: 7]. أنتم تودون ذلك، تودون أن غير ذات الشوكة تكون لكم، الله عز وجل يريد أمراً آخر، حرب ودماء وقتل، آه. ليه؟ أصل ربنا يريد أمراً آخر، ﴿وَيُرِيدُ اللَّهُ أَنْ يُحِقَّ الْحَقَّ بِكَلِمَاتِهِ وَيَقْطَعَ دَابِرَ الْكَافِرِينَ﴾ [الأنفال: 7].

كان في خطبة أظن اسمها: وتودون ويريد الله، برضه اسمعوها دي، يعني حطوها في سلسلة اللي هيسمع: وتريدون وتودون ويريد الله. فشوفوا يا جماعة النتيجة مش بتاعتنا.

وفي درس اسمه درس التهجير برضه. حفظت؟ مين يقول بقى كل الدروس نديله شوكولاتة؟ بجد هنديله شوكولاتة، بس هندي للباقيين برضه، ما في شوكولاتة هتتوزع بس. اسمعوا بقى الدرس وهتلاقوا فيه الأسماء إن شاء الله.

طيب، فيبقى النبي عليه الصلاة والسلام أول درس في مسألة بئر معونة والرجيع إنه راعى موازين القوى، راعى ذلك النبي عليه الصلاة والسلام. وثاني درس إنه لم يهمل الدعاء صلى الله عليه وسلم بل دعا شهراً كاملاً يقنت ويدعو على هؤلاء.

من الدروس برضه المستفادة في حادثة بئر معونة إن هؤلاء القراء يا جماعة يعني علماء، كانوا يحتطبون بالنهار ويتدارسون القرآن ليلاً، هي دي حياتهم، حياتهم بسيطة جداً، وهبوا أنفسهم للقرآن، وهبوا أنفسهم للعلم.

لكن الرواية بتحدثنا عن أمر عجيب جداً، إنه لما خفرت بعض القبائل جوار أبي البراء اللي هو عامر بن مالك، وابتدوا هؤلاء القراء يقولوا لهم: يا جماعة احنا مش جايين لكم، احنا جايين بس بـ يعني هنعدي الطريق ده ورايحين للناس التانية مش جايين لكم، قالوا: لا هنقتلكم. فالرواية بتقول إن هم أشهروا سيوفهم وحاربوهم، يعني هؤلاء القراء هؤلاء العلماء برضه لهم في الحرب والجهاد، وده اللي كان في الصحابة، يعني ده جيل الصحابة وجيل التابعين وكده، آه في واحد هو العلم غالب، لكن في باب الجهاد هو برضه فارس مجاهد، فبهذه أيضاً من جملة الفوائد.

ماشي؟ فأنت دلوقتي تقول إيه؟ مش عارف أنا أعمل إيه؟ ما الحاجات اللي تعملها يا عم يعني مش عارف أقول نزل كرشك يعني خليك حتى اعمل أي يعني روح اعمل رياضة، اعمل رياضة! إنما أنت بتطلع السلم بتنهج، أنت ممكن توصل بيتك لقيت الكهربا قاطعة، هتستنى لغاية ما الكهربا تشتغل عشان تطلع في الأسانسير، وجاي تقول جهاد وجاي يا عم الحاج طب روح يعني إيه؟ بس اجري مئة متر من غير ما تنهج، اعمل ده.

إحنا يا جماعة بنتكلم على سيدنا النبي عليه الصلاة والسلام، عمره قد إيه في الوقت ده؟ النبي عليه الصلاة والسلام كان عنده كام سنة لما جاتله الدعوة؟ أربعون. قعد كام سنة في مكة؟ ثلاثة عشر، يعني هاجر وعنده ثلاث وخمسون سنة. غزوة أحد السنة الثالثة، يعني عنده كام سنة؟ ست وخمسون سنة، قائد جيش! الشباب بقى اللي عشرون سنة دلوقتي يقوموا كده يقفوا بس، اعمل سبرنت مئة متر بس، اعمل سبرنت مئة متر وريني نفسك كده على آخر لو وصلت لـ، وريني نفسك نفسك عامل إزاي، ما تجيش تقول لي باب الجهاد مقفول وتضحك على مين؟

وهذا تثاب عليه، بعيداً حتى عن الجهاد ولا غيره، تثاب عليه. ما أنت جسمك ده هو ده اللي هتعيش به تعبد الرب عز وجل به، وتفعل به الطاعات، وتمشي في حوائج المساكين والفقراء والأرامل، جسمك! حافظ على جسمك، انت رايح تححافظ على جسمك ولا إيه؟ سخنت بدري.

فانا كيف فتحت دي؟ روح.

طيب خلاص نوقف كده عشان التسعة وعشرة. ماشي، أقول قولي هذا واستغفر، أنا اصل أول ما حد يتحرك أنا بتشتت، أقول قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك.