دخولتسجيل الدخول

أسرى المسرى | فقه التعامل مع الأحداث الجارية

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذرياته وآل بيته، كما صليت على آل إبراهيم إنك حميد مجيد. أما بعد.

عاوِزين أولاً الأطفال من سن أربع سنين كده، عشرة، إحدى عشرة، يِجوا ياخدوا العَدّايَة، يلا. وعقبال ما يِجوا بقى، كل سنة وأنت طيب، كل سنة وأنت طيب. عقبال ما يِجوا مش عاوِزين صوت، مش عاوِزين صوت، يِجوا ياخدوا من غير صوتك يا حبيبي.

طيب أهلاً. أهلاً. أزيك؟ أهلاً. أزيك؟ أزيك يا حبيبي؟ عامل إيه؟ أنت جايب على الفلوس، سلِّم عليّ الأول طب يعني جامِلْني حتى. يا إبراهيم، أنت سلِّمْت ومشيت ما خدتش! خد يا حبيبي يلا يا حبيبي، امسك العَدّايَة. طيب ماشي.

أزيك يا شيخ؟ أهلاً، أنت كم سنة؟ اثنا عشر. أزيك؟ إحنا قلنا أحد عشر، مش كده؟ حبيبي. مين تاني؟ حبيبي أزيك؟ حبيبي عامل إيه؟ أزيك؟ يلا خد. السلام عليكم. خد أنت، ما شِفتش بتسلِّم والناس! لا ما فيش صور، يلا يلا هنقفل خلاص. خدي يا حبيبتي. يا حبيبي. حبيبي كم سنة؟ أنت خدته، خده. طيب، أنت نجيب لك عروسة مش هدية.

في حد تاني؟ مين؟ كم سنة؟ عاوِزين صغَنطُطين، كم سنة؟ يلا خد. أنتُم تَشتغِلُوا؟ أنتُم تِدُونَا عَدايَة أنتُم؟

طيب، الدرس اللي فات ما كانش هنا يعني، بس جالي سؤالين، وبعدين ناس زعلت يعني من الرد اللي رديته كالعادة. واحدة بتسال مخطوحة لحد يعني في شوية مواصفات كده: أتَجَوَّزُه ولا ما أتَجَوَّزُهُوش؟ فأنا هَزَرْتُ يعني في السؤال، وحسيته سؤال يعني إيه مِفَخَّخ، فطبعاً ما أقصدش خالص أي إهانة، أنا ما أعرفش بقى مين هي، فتبقى تتفرج على الفيديو ده لو ما كانتش بقى خَصَمَتْنَا وقالت: مش هبص عليه تاني، وأنا هسمع له درس تاني ولا حاجة. فما أقصدش يعني، ما أقصدش إن أنا طبعا أستخِفُّ بحد ولا خالص يعني. السؤال حسيته مش منطقي شوية يعني.

وسؤال تاني كان عن التعدد، فأنا برضه هَزَرْتُ وما جاوبْتُش، ولأن مسألة التعدد مسألة شائكة، لابد أنها تُؤخَذ على بعض كده، يعني ما ينفعش حد بيسأل سؤال فيه سَوَاءٌ من ناحية الست أو من ناحية الراجل، فأجيب جواباً مُقْتَصِراً على سؤال. المسألة دي بالذات هي لازم تتقال كده على بعض، باحترازاتها، بمشاكلها، بحلولها، بكل حاجة. فعشان كده برضه يعني ده ما فيش حد زعل منه، انما يعني ما جاوبْتُش، هَزَرْتُ وما جاوبْتُش بس عشان كده يعني.

النهارده المفروض إن شاء الله كان هيبقى الدرس الثاني من سلسلة دروس من الاعتكاف، ولكن بدا لي أن يكون درساً استثنائياً بخصوص الأسرى الفلسطينيين اللي الكنيسة تصوت على إعدامهم. وهو درس ارتجالي، أنا مش مُحضِّر حاجة، فهيكون الدرس درس ارتجالي، وحسب بقى ما يفتح ربنا علينا يعني. دلوقتي يا جماعه هذه القضية كغيرها من القضايا -الدرس طبعا ممكن يكون فيه أشياء اللي متابع من زمان ممكن تكون فيه أشياء مكررة بعض الشيء، لكن لا لن نعدم فائدة إن شاء الله- هذه القضية كغيرها من القضايا الكبرى في الأمة، دائماً بنلاقي الناس تجاه تلك القضايا تنقسم فِرَقاً أو أصنافاً.

الفرقة الأولى: فرقة مش في دماغها حاجة، يعني فلسطين تتدك ما تتدكش، هو ما بيقولش ما تتدكش، بس عادي حياته مكملة عادي. يعني ايه حياته مكملة عادي؟ يعني معاصيه هي هي، وغفلته هي هي، وتقصيره هو، وانغماسه في الدنيا هو هو. عادي مش فارق له يعني. طب في أسرى هيعدموا؟ عادي، أو يعني إيه يتأزم؟ مش مَصْمَصَ شفايفه، بس الدنيا ماشية.

فدي أول فرقة، وأدعي أن دي الفرقة الأكبر في الأمة. يعني إحنا تجاوزنا الاثنين مليار، أدعي أن الفرقة الأكبر في أمة الإسلام هي الفرقة دي، اللي هي حياتها ماشية عادي جداً، يعني النهارده زي أمبارح، وبكره هيبقى زي النهارده، ما فيش حاجة اتغيرت يعني. هذا الخبر أو ذاك ما غيرش حاجة فينا، وإن أثر فتأثيره ضعيف، يا دوبك إيه زعلنا شوية، توترنا شوية، نزلنا بوست ناري، غيرنا صورة البروفايل، وشكرا على كده. طيب على أرض الواقع؟ إحنا زي ما إحنا، ما فيش حاجة اتغيرت خالص خالص. دي فرقة، وهي الفرقة الأكبر.

في فرقة تانية: أن هي بتأثر تأثراً شديداً جداً، لدرجة أن هي تُصَاب باليأس والإحباط، وربما اكتئاب، وربما تقعد عن العمل. يعني من كتر الياس اللي هي فيه، وشايفة ضربة ورا ضربة ورا ضربة في الأمة -إحنا دايما بنقول إيه: بتحتويه المشكلة؟ تحتويه المشكلة، ودايما نقول للشباب: إحنا عاوِزين نحاول نطلع بره المشكلة، نبقى إحنا اللي بنحتوي المشكلة، شايفين المشكلة من جوانبها، ما نبقاش جوه المشكلة غرقانين فيها، تبقى هي اللي بتحتوينا، وفي مقطع مهم اسمه: الاستغراق في اللحظة الحاضرة، ده مهم يتسمع، يعني موجود على قناة التليجرام-.

هذه آفة تصيب أهل الإيمان، الفئة الأولى دي واضح جداً أنها فئة إيمانها ضعيف، الفئة الثانية دي هي فئة إيمانها قوي. الإشكال مش في الإيمان، الإشكال في القوة النفسية التي تتحمل هذه الصدمات، فده ممكن يصيب الأولياء؟ آه. خدوا الأعجب: هذا أصاب النبي صلى الله عليه وسلم، والله عز وجل ذكر ذلك في القرآن في مواطن، منه موطن في سورة بنقراها كل جمعة: سورة الكهف، مش كده؟ في صدر السورة: ﴿الْحَمْدُ لِلَّهِ الَّذِي أَنزَلَ عَلَىٰ عَبْدِهِ الْكِتَابَ وَلَمْ يَجْعَل لَّهُ عِوَجَا ۜ * قَيِّماً لِّيُنذِرَ بَأْساً شَدِيداً مِّن لَّدُنْهُ وَيُبَشِّرَ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْراً حَسَناً * مَّاكِثِينَ فِيهِ أَبَداً * وَيُنذِرَ الَّذِينَ قَالُوا اتَّخَذَ اللَّهُ وَلَداً﴾ [الكهف: 1-4].

إيه؟ آه عاوِزين بقى الآية بتاع بَاعِع: ﴿فَلَعَلَّكَ بَاخِعٌ نَّفْسَكَ عَلَىٰ آثَارِهِمْ إِن لَّمْ يُؤْمِنُوا بِهَذَا الْحَدِيثِ أَسَفاً﴾ [الكهف: 6]. بهذا الحديث -عفواً- فلعلك باخع نفسك، فلعلك قاتل نفسك على آثارهم إن لم يؤمنوا بهذا الحديث أسفاً؛ يعني شدة الحزن اللي النبي عليه الصلاه والسلام بيكون فيها، حزن شديد جداً لدرجة أن ممكن يصل إلى مرحلة إيه؟ أنه يؤثر على نفسه صلى الله عليه وسلم. وهتلاقوا بقى المعنى ده متكرر في القرآن في تربية النبي عليه الصلاه والسلام في هذه الحيثية، من كتر خوفه على أمته ربما يصاب بشيء من ذلك.

حتى في بداية الدعوة: ﴿يَا أَيُّهَا الْمُدَّثِّرُ * قُمْ فَأَنذِرْ﴾ [المُدَّثِّر: 1-2]، مما قيل -القشيري قال إنه النبي عليه الصلاه والسلام أو يعني هذه القصة معروفة- وقال غير القشيري له يعني تأويل حلو في الآية دي أو إشارة لطيفة يعني، أن النبي عليه الصلاه والسلام ليه دخل وتدَّثر؟ علشان قومه كذبوه، وابتدوا يقولوا عليه مجنون ويقولوا شاعر ويقولوا كذا وكذا، فلم يتحمل ذلك، فدخل وتدثر. وفي إحدى الروايات يعني -طبعاً في تأويلات كتير أو في أسباب نزول كتير- أنه دخل وراح إيه مغطي وجهه صلى الله عليه وسلم، مش متحمل اللي قومه بيجولوه.

فجاء الأمر الإلهي: ﴿يَا أَيُّهَا الْمُدَّثِّرُ * قُمْ فَأَنذِرْ﴾ [المُدَّثِّر: 1-2]، ما لا تتدثر، وما تخليش اللي بيحصل حواليك يصيبك بشيء من اليأس أو الانزواء أو القعود عن العمل، لا ﴿يَا أَيُّهَا الْمُدَّثِّرُ * قُمْ فَأَنذِرْ﴾. فدي فئة من في الأمة، فئة قليلة اللي بتبقى كده الحقيقة، اللي هي يخرج بها التاثر إلى أنه يقعد، أنه يياس، أنه حياته بقى تضطرب. هنا إحنا قلنا الأولاني ده إيه؟ حياته أمبارح زي النهارده وبكره زي النهارده وزي بكره، وكمان سنة هتلاقيه زي، عادي جداً. الفئة الثانية دي لا، ده بيدخل في دور اكتئاب، ومش قادر أنزل الشغل، ومش قادر أروح الجامعة.

في فئة كده؟ آه موجودة، لكنها قليلة. طيب مين الصح في دول؟ لا دول ولا دول، وخير الأمور الوسط، وهو أن تتاثر بما يحدث للمسلمين، وأن يصيبك شيء من الحزن والغم بما يحصل لهم، لكن يكون لك وقوداً يدفعك إلى مزيد من العمل، إلى مزيد من تحقيق الإخلاص، إلى مزيد من التوبة والاستغفار، إلى مزيد من الدعوة إلى الله، إلى مزيد من أمور هنعرفها بقى كمان شوية، اللي هو واجبنا إيه أصلاً تجاه تلك الأحداث؟ هتيجي كمان شوية إن شاء الله.

يبقى إحنا آه نتاثر؟ إيوه، لكن هذا التأثر ليس تأثراً مقعداً مصيباً لنا بالإحباط والاكتئاب. فدي أول مسألة، الفئة اللي بتتاثر دي بقى خلاص، يبقى إحنا هنركن الفئتين الأولين دول على جنب خالص. هنركنهم مش لأن إحنا مش كده، لا إحنا أنا بقول يعني أدعي أن إحنا طالما بنقول إن معظم الأمة كده فطبيعي أن إحنا طالما إحنا شريحة من الأمة فهتلاقي معظم اللي هنا كده، طبيعي يعني لأننا شريحة من الأمة، اللي هو إه اللي هو تأثرنا آه، بس تأثر ضعيف جداً جداً لم يُثْمِر عملاً، لم يُثْمِر تغيُّراً.

فعاوز تعرف أنت أني واحد، أني شريحة من الثلاثة؟ بص للاحوال، ما تبصش لصفحتك على الفيسبوك، ما تبصش لصورة البروفايل اتغيرت ولا ما اتغيرتش، ما تبصش نزلت فعل الهاشتاج مش عارف الأسرى مش عارف إيه -هنجيلها كمان شويه، مش ده خالص- بص لأحوالك أنت، النهارده زي أمبارح؟ لو جوابك آه، أنت من الفئة الأولى، يعني أنت عرفت إنه حدث كذا وكذا -ده هنجيله برضه كمان شوية إن شاء الله- فتأثرت، أنا ما بقولش إن مش بكذبك، آه تأثرت فعلاً تأثرت، هو فعلاً بتكون تأثرت، لكن تأثر ضعيف ولا قوي ولا إيه بالضبط؟

شوف أحوالك، عرفت إن ده حصل الليلة دي، عملت إيه؟ يعني أنت عرفت إن ده حصل الليلة دي، قمت الليل بعد ما كنتش بتقوم؟ ليه؟ ما اصل أنا لازم أتغير، هقوم الليل عشان دي ربنا لهؤلاء. طب تاني يوم عملت إيه؟ طب المعاصي اللي أنت بتبارز ربنا بيها تغيرت؟ عاهدت الله عز وجل أنك هتتركها؟ أحوالك إيه؟ هو ده الميزان اللي نِزِنْ عليه أنفسنا تجاه تلك الأحداث العظيمة.

طيب، الفئة اللي في النص، اللي هي بقى لو هنسيب الطرفين ونمسك بقى الفئة اللي في النص اللي هي تأثرت تأثراً يدفع إلى العمل، الحقيقة برده الفئة دي يا جماعة ممكن نقسمها تقسم تاني، والتقسيم ده إحنا كنا قلناه قبل كده ماشي، عندنا فئة في المسلمين، أو ده في الجنس البشري، عندنا فئة دايما دايما هي بتلقي اللوم على غيرها. يعني إيه؟ يعني حصل حاجة في الأمة: أين علماء المسلمين؟ تلاقيه نزل لك بوست على الفيسبوك: أخزاكم الله يا مش عارف علماء السلطان. طب بالنسبة لحضرتك؟ هو ما بيفكرش في نفسه، هو في مشكلة المشكلة من غيري. أين حكام العرب؟ طب وأنت؟ أنت إيه؟ أنت بتعمل إيه؟ أين أنت؟

العقلية دي دي موجودة، يعني معروفة حتى في علم النفس، بيسموها إيه؟ الاكسترنال لوكاس أوف كنترول، دي عقلية دايما دايما هي متبرمجه كده، أي حاجة تبقى في غيري طالما في مشكلة مش عندي. العقلية دي ممكن توصل لفين؟ ربنا ذكر العقلية دي في القرآن يا جماعة على فكرة. فين؟ حد شاطر؟ الكفار لما جم، أنتُو ازاي تكفروا؟ قالوا إيه؟ لو شاء إيه؟ المشكلة مش فينا، المشكلة في ربنا -حاشاه وتعالى وتقدس جل وعلا- لو ربنا شاء ما كناش عبدنا غيره، دي الاكسترنال لوكاس أوف كنترول، المشكلة ديماً، المشكلة مش دي.

وفي واحد لا، هو دايما هو بقى إيه بيتبرمج كده: مشكلة، أنا أعمل إيه؟ ما مش عاوِز كلام كتير، أنا أعمل إيه؟ قول لي حاجة أعملها. لا بقى حكام عرب ولا علماء مسلمين ولا أنا، في الآخر، قلنا لكم الكلام ده قبل كده، هتموت وهتبعث، هَتُسْأَل عن فعل حكام العرب وعلماء المسلمين؟ والله ما هتسأل عنهم، فانت هتسأل عن نفسك، أنت كان المفروض تعمل إيه وما عملتوش؟ أو كان المفروض تترك إيه وما تركتوش؟

يوم القيامة هتلاقي أصغر ذنب أنت عملته أعظم عليك من أكبر ذنب عمله وغيرك؛ يعني كفر فرعون أعظم، ولا معصية صغيرة عملتها قبل ما تيجي المسجد؟ معصية صغيرة عملتها تيجي المسجد أعظم عليك يوم القيامة من كفر فرعون. ليه؟ كفر فرعون مين هيحاسب عليه؟ فرعون، مش أنت. معصيتك بقى اللي أنت قبل ما تيجي المسجد عملتها دي أنت اللي هتحاسب عليها. فما تشغلش دماغك بقى لا بايه؟ لا بفلان ولا بعلان ولا بالفئة الفلانية ولا الفئة العلانية، لأن يوم القيامة كل واحد هيتحاسب على فعله.

فاللي أنا بقى التقسيم اللي بقوله ده تقسيم، كل في كل حدث جلل التقسيم ده هتلاقوه موجود. التقسيم ده هتلاقوه موجود. طيب، إيه اللي بيحدث الخلل؟ يعني إيه اللي بيخلي ناس تتاثر -طبعا قبل ما قبل ما نرجع للتقسيم ده تاني- الفئة اللي في النص دي برض إحنا عندنا شوية مشاكل في العقليات برض في طريقة في نمط التفكير الحقيقة، وده برض كنا أديناه قبل كده بشكل مفصل في درس اسمه: عقل سليم، أظن، منها العقلية اللي دايما بتبص للنتيجة، العقلية اللي دايما بتبص للنتيجة. يعني إيه؟ يعني لو النتيجة اللي في دماغه ما حصلتش، يبقى هو كده هيحكم على التجربة بالفشل، وده غلط، ولازم نخرج من تلك العقلية، لازم ليه؟ لازم لأن فيها مشكلتين:

أول مشكلة: أن الشرع لم يعتبر هذا النمط من التفكير، بل أهدره -هنشرحها كمان شوية-.

الممشكلة الثانية: أن فيها تَأَلِّيًا على الله عز وجل. اللي بيفكر بعقلية النتيجة، يعني إيه عقلية النتيجة؟ أنا عمال الأمة عمالة تدعي مش عارف إيه، والدنيا زي ما هي، لا ده الدنيا بتسوأ أكتر، لا ده غزة اتبهدلت على الآخر، لا ده اتدكت على الأرض، لا ده مش عارف إيه.

كل اللي في دماغه النتيجة فين؟ ده كل اللي في دماغه. أولاً، هل اعتبر الشرع ذلك؟ قال الله عز وجل لنبيه: ﴿لَيْسَ عَلَيْكَ هُدَاهُمْ﴾ [البقرة: 272]. الهداية نتيجة، مش بتاعتك. أمال عليك إيه؟ عليك البلاغ، هذا فعلك، النتيجة نتيجة فعل الرب عز وجل. فأنا هادعو إلى الله عز وجل، طب كلهم كفروا، وقلنا لكم مش فاكر هنا ولا في مكان تاني، تأملنا كده لفظ معين حديث النبي عليه الصلاة والسلام: «يأتي النبي يوم القيامة ومعه الرهط، ويأتي النبي ومعه الرجلان، وياتي النبي ومعه الرجل، ويأتي النبي وليس معه أحد». وساعتها أثرنا سؤالاً لو تفتكروا: قلنا ذلك النبي الذي أتى قومه فدعاهم فلم يجب واحد، ألم يكن الرب عز وجل يعلم ذلك أن ما فيش ولا واحد هيجيب؟ صح يا جماعة ولا لا؟ ومع ذلك أرسل الله رسوله ليدعو الناس، مع أن ما فيش واحد هيجيب. من المعاني اللي نخرج بيها غير إقامة الحجة على العباد، يعني هو المعنى الأسمى طبعاً في هذا الموطن من المعاني أن إحنا نتربى على هذا.

أهو ربنا يعلم النتيجة مقدماً أهو، ومع ذلك أخفاها على ذلك النبي، النبي الزمان ما كانش يعرف، ما يعرفش أن أنا هفضل أدعو قومي طول العمر وفي الآخر ما حدش، ما عرفش، وكل يوم من صباحه ربنا ذلك النبي يخرج من بيته شايل هم الدعوة، صح؟ إنه يدعو قومه، ولعله ما يرجعش بيته غير آخر الليل عشان دوبك ينام له حاجة بسيطة عشان يطلع تاني يوم شايل هم الدعوة أنه يدعو قومه، وقد كتب عند الله عز وجل أن قومه لن يؤمن منهم واحد. إيه رأيكم؟ عشان إحنا نتربى على المعنى ده: النتيجة مش بتاعتك. يبقى الشرع أهدر ذلك.

الحديث اللي كلنا حافظينه: «إذا قامت القيامة وفي يد أحدكم فسيلة فليغرسها». بقانون النتائج، غرسك للفسيلة ده يعني إيه؟ القيامة بتقوم، فأنت غرسك للفسيلة يعني إيه بقانون النتائج؟ عبث، صح؟ أنت بتعمل ولا حاجة. الشرع ما قالش كده، قال لك القيامة بتقوم وفي إيديك فسيلة اغرسها، عمل صالح. طب دي هتعمل إيه؟ دي مش بتاعتك، تعمل إيه؟ هو أنت حد قال لك دبر لي الكون؟ يعني حد جالك كده قال لك ربنا سبحانه وتعالى يعني بيديك تفويض في الحته دي كده دبرها لنا لغاية ما؟ ما حدش قال لك ده. فدع النتائج له جل وعلا، مش بتاعتك.

فلازم العقلية دي نخرج منها، حته أن أنا دايماً بفكر في النتيجة ليه؟ أولاً: الشرع أهدر ذلك النمط من التفكير. المسألة الثانية: أن فيها تلياً على الله. يعني إي فيها تلياً على الله؟ دلوقتي لما أنت بتحكم على الشيء بنتيجته، أنهي نتيجة؟ النتيجة اللي اقترحها عقلك، صح يا جماعة؟ يعني أنت دلوقتي هتحكم على الشيء على الأمر ده هو نجح أو فشل بايه؟ بنتيجته. النتيجة دي يعني إي؟ أوحي إليك بها فهتقيس عليها؟ ولا النتيجة دي أنت قعدت كده وقعدت أنت إيه بقى تشوف النتيجة المضبوطة، فطلعت إيه؟ بالنتيجة المضبوطة اللي المفروض بص بقى اللي المفروض تحصل.

الكلام ده قد تصل إلى الكفر، أنا ما بقولش بيقول ده كافر، بس الكلمه دي لو قعدت، قعدت تمشي: تعال يا حبيبي بس اقعد كده، يعني إي المفروض تحصل؟ يعني إي المفروض؟ المفروض ده على مين؟ يعني مين اللي المفروض يعملها؟ ده معنى لوازم الكلمة خطير، تلك الكلمة خطيرة، ففيها تلي على الله، اللي هو اقتراح العقول هي النتيجة دي هو ده اللي المفروض يحصل. ما هو يا جماعة مش كل حاجه تحبها تبقى حلوة ولا كل حاجة تكرهها تبقى وحشة، وربنا قال ده في القرآن، مش كده؟ ﴿وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ﴾ [البقرة: 216]. فمش كل حاجه تكرهها وحشة ولا كل حاجة تحبها حلوة.

غزوة بدر مثلاً، الصحابة كانوا عاوزين أنهي نتيجة؟ العير، مش كده؟ هما خارجين ياخدوا العير، ولو العير انفلتت هيبقى فيه نفير، هيبقى فيه حرب. فهما خارجين نفسهم في الإيه؟ في العير، وربنا جاب النفير، وربنا قال لنا في القرآن مش كده؟ قال إي: ﴿وَتَوَدُّونَ أَنَّ غَيْرَ ذَاتِ الشَّوْكَةِ تَكُونُ لَكُمْ وَيُرِيدُ اللَّهُ أَن يُحِقَّ الْحَقَّ بِكَلِمَاتِهِ وَيَقْطَعَ دَابِرَ الْكَافِرِينَ﴾ [الأنفال: 7]. كنا عملنا درس أو خطبة اسمها إي؟ تودون ويريد الله. خطبة ودرس مش فاكر، هتلاقوه برده على التليجرام، مهمة جداً: تودون ويريد الله. إحنا نود أشياء والله يريد أشياء تانية، فشيل فكرة أن النتيجة اللي اقترحها عقلي دي أحسن نتيجة، شيلها من دماغك خالص، واشغل دماغك بسؤال واحد مالوش تاني: اعمل إيه؟ ده السؤال اللي تشغل بيه دماغك: اعمل إيه؟

الله عز وجل في وقت النبي عليه الصلاة والسلام إذا أراد أن يحدث شيئاً أنزل قرآناً أو أرسل وحياً، مات النبي عليه الصلاة والسلام وانقطع الوحي، فإذا أراد الله عز وجل شيئاً خاطبنا بايه بقى؟ بسننه القدرية، ما بقاش وحي خلاص. طيب الله عز وجل يريد منا الآن توبة عامة مثلاً، لو كان النبي عايش عليه الصلاة والسلام كان هينزل وحي: قل لهم يتوبوا. دلوقتي ما فيش، ما فيش خلاص، ما فيش وحي. طب الله عز وجل يريد أن ينبهنا على هذا المعنى، يعمل إي سبحانه وتعالى؟ الآيات القدرية بقى، دي اللي لازم نحسن قراءتها لأنها خطاب الله لنا، ده ما فيش حاجة في الكون عبث، فهي خطاب الله لنا ولا بد أن نحسن القراءة؛ قراءة تلك الآيات القدرية التي تحدث في الكون.

فعاوزين نشيل حته عقلية النتيجة دي خالص بقى، إحنا نعمل إي؟ عملنا. طب النتيجة إي؟ مش بتاعتنا، والله مش بتاعتنا. وساعتها لما قعدنا يعني نثور هذا الحديث: يأتي النبي وليس معه أحد، سالنا سؤال: ترى هذا النبي الذي يأتي يوم القيامة وليس معه أحد قصر في دعوته؟ طب كان مرائي في دعوته؟ يعني هيجي النبي ده يُلام على أنه ليس معه أحد لأنك مقصر؟ أنت كنت مرائي، ما كنتش عاوز وجه الله؟ مستحيل! فعل كل ما يمكن فعله، بس النتيجة خلاص مش بتاعة حد.

طيب، إحنا ليه بقى التأثر بيكون مختلف يا جماعة؟ لأن أو خلينا بقى في الفئة اللي هي السواد الأعظم من الأمة الآن تأثرها طبعاً، في ناس لا تأثر أصلاً يعني مش فارق بنكلا، وفي ناس زي ما قلنا تأثرها ضعيف، وده معظم الأمة. ليه التأثر ضعيف؟ لأن قضايا الدين ما هيش القضايا العظمى التي تربي، إحنا ما تربيناش كده، أن الدين رقم واحد في حياتنا، إحنا مش متربيين كده للأسف. فلما تيجي حاجة تصيب الدين، ثلمة في كيان الأمة الإسلامية، مش بنشوفها حاجة ضخمة، مش بنشوفها حاجة كبيرة، لأننا ما تربيناش على ده.

يعني ممكن نفس الفئة دي اللي هي تأثرها تأثر ضعيف لو هو، لو فريق كورة بينتمي له انتماء شديد وخسر في ماتش مهم، ممكن يصاب باكتئاب، ممكن يقوم يكسر التلفزيون، ممكن يجي له سكتة قلبية ويموت. الكلام اللي أنا بقوله ده بنشوفه ولا خيال؟ إحنا بنشوفه، بنشوف ناس بيحصل لها كده، ممكن الجمهور يمسك في بعضه وناس تتقتل. فالمسألة أولاً مسألة أولويات، أنت عندك إي قبل إي؟ أنت الدين فين في حياتك؟ أنت هذا الكيان، لأن يا جماعة ما فيش بني آدم يعرف يعيش كده إي بطوله كده يعني، لا، لابد شيء دعامة يجتمع مع فئة تانية من الناس حولها. الإنسان كده، الإنسان اجتماعي مدني بطبعه يعني ما هواش متوحش. متوحش مش بياكل، يعني يتوحش عن الناس كده وتلاقيه في الصحرا عايش لوحده؟ ده أنتوا عارفين الحيوانات المتوحشة كده، هي تحيش لوحده كده في الصحرا، ولما تجوع تروح تاكل فريسة وترجع، هي كفها كده، تتوحش يعني إي؟ متوحشة من العمران، ما تعيشش في الحتت دي. الإنسان مش كده، الإنسان أينما كان الإنسان ينشئ العمران وينشئ المدنية، ويحب يبقى فيه اجتماع.

اجتماع على إي بقى؟ لازم عمود كده نجتمع حواليه. فانت بقى شوف إي هي تلك الإيه؟ العمدان اللي انت بتجتمع حواليها، هو لو ما كانش الدين هتلاقيه بقى حاجات تانية بغض النظر بقى مش عايزين نتكلم في التفاصيل دي. ثاني حاجة: الأخوة، الأخوة الإيمانية ضايعة مننا خالص. يعني أنا هسألك سؤال دلوقتي: الأسرى الفلسطينيين دول عددهم طبعاً بالألُوفات، إحنا هندخل نتامل دلوقتي إن شاء الله في قصة الأسرى نفسهم، إنما لو كان جالك خبر النهارده أن أخوك أو ابنك اتسجن، فالليلة دي هتقضيها إي؟ ده السؤال. يعني لو جالك الخبر أن ابن حد عزيز عليك بتحبه اتسجن، وهو الموضوع بقى مش اتسجن ده هو إي؟ ده خد إعدام، خد إعدام، وخلاص إحنا منتظرين يطبق الحكم، حكم الإعدام، فالليلة دي هتقضيها إي؟ المفروض أن تلك المشاعر تكون حاصلة في القضية اللي احنا بنحكي عليها دلوقتي. ﴿إِنَّمَا الْمُؤْمِنُونَ إِخْوَةٌ﴾ [الحجرات: 10]، و«المؤمن للمؤمن كالبنيان يشد بعضه بعضاً، وشبك بين أصابعه» صلى الله عليه وسلم، «ومثل المؤمنين في توادهم وتراحمهم وتعاطفهم كمثل الجسد إذا اشتكى منه عضو تداعى له سائر الجسد بالسهر والحُمَّى».

هل إحنا كده يا جماعة؟ هل تداعينا لذلك الألم الذي حل بجسد الأمة بالسهر والحمى؟ أنت لو درسك، درسك ده اللي هو حته قد كده ولا تساوي شيء في جسمك، نقح عليك نقح شديد، هل أنت بتنام ودرسك بيفضل صاحي؟ ولا أنت كلك على بعضك بتفضل صاحي؟ كلك على بعضك بتفضل صاحي، مش قادر تنام من وجع الدرس اللي هو قد كده. هو ده معنى أنه تداعى له سائر الجسد بالسهر والحمى، شوية جسمك كله يسخن، مش الدرس اللي بيسخن، صح ولا لا؟ عشان درس!

فإحنا المفروض نبقى هكذا، المفروض أمة الإسلام تبقى كده، المفروض تبقى كده. فإحنا عندنا إشكال كبير في قضية الأخوة الإيمانية، لا تربينا عليها ولا مستشعرينها. فمحتاجين نقرا في الحته دي كتير، نسمع الحته دي كتير، إنما أخوة هتلاقوه درس بقى من دروس الحجرات بس مش فاكر اسم الدرس إي يعني، يعني ممكن نسمع ده أو نسمع وفي الأخوة في ربع العادات من مختصر منهاج القاصدين، ممكن يبقوا ثلاث أو أربع دروس، هتلاقوهم برده على قناة التليجرام ممكن نسمعهم، حقوق الأخوة أو غيرها، أي حد، أي حد من الدعاة تكلم في الأخوة الإيمانية نسمع في الأخوة الإيمانية.

فدي برده قضية كبيرة محتاجين نؤصلها على فكرة، إحنا بس عشان إحنا إحنا درس النهارده: نعمل إي؟ فإحنا بنقول نعمل، ماشي. فانت لازم تحط نفسك في خانة، أولاً من الخانة: أنا هو أنا مين في دول؟ فلو لقيت نفسك في خانة غير الخانة اللي في النص عندك مشكلة ولازم تصلحها. طب أنا في الخانة اللي في النص، لكن لما جينا نقسم لقيت نفسي آه، أنا دايماً برمي، برمي اللوم على غيري، فبرده لازم تصلح دي، ارجع شوف نفسك أنت عليك إي تعمله.

طيب، خليني أقول حته بقى قبل ما أنسى هنا، أنت عليك إي تعمله دي لازم تبقى إجابة السؤال ده واضحة قدامك، ليه؟ علشان ما يحصلش اللي بنشوفه دايما، اللي هو إي؟ اللي هو زي مثلاً القضايا اللي احنا عايشين فيها اليومين دول: الأسرى الفلسطينيين. فتلاقي نزل على الفيسبوك وعلى بقية، ما أعرفش أنا ما عندي فيسبوك، ما أعرفش بقية المواقع، بينزل هاشتاج إي؟ انقذوا الأسرى، بقى دلوقتي مكتوب إي؟ مهما حصل، اعمل اللي عليك. اللفظ ده بالنسبة لي مستهجن الحقيقة، هو ده اللي عليا؟

فانت تحس أنك لو دخلت، أنا بنزل منشور، أنا مثلاً بنزل منشور، بلاقي مثلاً واحد جزاه الله خيراً، هو فتلاقيه يروح حاطط لك الإيه؟ التعليق ده مثلاً 15 مرة: اعمل اللي عليك وفعل هاشتاج، هو ده اللي عليك. فهو بيظن أن لما يعمل كده هو ده كده عمل اللي إي؟ اللي عليه. هو ده اللي عليك؟ تفعل هاشتاج؟ إي؟ هاشتاج إي اللي عملته؟ ما فعلت هاشتاج! ده اللي عليك؟

خلينا نظبط السؤال: هو ده كل اللي عليك؟ يعني أصل هو كلمة اللي عليك: اعمل اللي عليك. فيجي في ذهنك: خلاص، ده اللي عليا عملته. أنا الحقيقة مش عارف يعني تفعيل هاشتاج ده مش عارف يعمل ايه، يعني لو بتعرف الناس بالقضية مثلاً ولا مش عارف ولا مستني حد يشوفها فياخد يعني تصرف، فيبقى عندك شرك خفي ربويّ. يعني إحنا إحنا شايفين أن الكون ده كله ربنا سبحانه وتعالى هو اللي بيصرفه، فقلوبنا لا بتتعلق بحد ولا بتتعلق بحاجة خالص، خالص!

قلوبنا مش متعلقه لا بحد ولا بحاجة يا جماعة، لا في دفع ضر ولا في جلب نفع. واللي يلقى قلبه في حته صغننة متعلقة بحد يروح يعالج قلبه. واعلم أن الأمة، مش الصهاينة، مش أمريكا، مش الاتحاد الأوروبي، واعلم أن الأمة لو اجتمعت على أن ينفعوك لن ينفعوك إلا بشيء قد كتبه الله لك، ولو اجتمعت على أن يضروك لن يضروك إلا بشيء قد كتبه الله عليك، رفعت الأقلام وجفت الصحف.

فإحنا مش شاغلنا، لا شاغلنا أمريكا، ولا شاغلنا أوروبا، ولا شاغلنا الصهاينة، ولا شاغلنا دول خالص، هو الله جل وعلا يحرك هؤلاء وأولئك. طيب أمال طالما هو ربنا سبحانه وتعالى، وبلا شك المسلمين هم الأقرب لله عز وجل مش الكفرة المجرمين دول، طب ليه الوضع كده؟ هو ده السؤال: أن إحنا لا نحسن قراءة القدر، لا نحسن قراءة القدر. فمثلاً عندنا آية صريحة في القرآن: ﴿وَلَيَنصُرَنَّ اللَّهُ مَنْ يَنصُرُهُ﴾ [الحجرات: 40] -مش الآية كده؟- الله، إحنا أمال هينصر مين يعني؟ هينصر الكافرين؟ ربنا ما قالش كده في القرآن يا جماعة، ما قالش: ولينصرن الله المسلمين.

ما جَتْش دي؟ ﴿وَلَيَنصُرَنَّ اللَّهُ مَن يَنصُرُهُ إِنَّ اللَّهَ لَقَوِيٌّ عَزِيزٌ﴾ [الحج: 40]. اللي هما مين بقى؟ ﴿الَّذِينَ إِن مَّكَّنَّهُمْ فِي الْأَرْضِ أَقَامُوا الصَّلَاةَ وَآتَوُا الزَّكَاةَ وَأَمَرُوا بِالْمَعْرُوفِ وَنَهَوْا عَنِ الْمُنكَرِ﴾ [الحج: 41]. تعالوا نعيد قراءة الآية تاني: الذين إن مكنهم في الأرض صلحوا في أنفسهم وأصلحوا غيرهم. أقاموا الصلاة وآتوا الزكاة، دول إيه؟ صلحوا في أنفسهم.

وأصلحوا غيرهم: أَمَرُوا بِالْمَعْرُوفِ وَنَهَوْا عَنِ الْمُنكَرِ، يعني الذين، تعالوا نعيد قراءة الآية: الذين إذا مكنهم في الأرض صاروا صالحين مصلحين. ده احنا على بلاطة كده، ده الوصف ده إحنا، تقول ما إحنا ماتمكناش! أنت مين قال ماتمكنش ليك؟ ده أنت مش متمكن إيه؟ ده يعني دولة قائمة على الشريعة وتطبق الحدود، أنت تعال بس يا حبيبي، أنت من له سلطان عليك في بيتك؟ أنت ممكن في بيتك، صح ولا لا؟ يعني لو قمت الليل كله في بيتك حد هيمنعك؟ لو قسمت الليل ثلاث تلاثات، عليك أنت ومراتك وابنك بحيث يبقى بيت قائم للليل طول الليل قائم، وهذا كان بعض السلف يفعله، حد هيمنعك؟ لو سردت الصوم حد هيمنعك؟ لو ختمت المصحف كل ليلة حد هيمنعك؟ أنت مُمكّن لك! بلاش تاني عقلية الشماعه، عقلية إن غيري دايماً في مشكلة عند حد تاني غير نفسي. ليه مش عاوز أشتغل؟ أنا مش عاوز أشتغل، فنيجي نقول لك: لما يبقى يمكن بقى والشريعة ما تطبق! يا أبني الشريعة في بيتك يا أبني، أنت حد ما طبقش الشريعة؟ روح طبق شريعة في بيتك!

هو أنت حد جبرك تخش وتقفل الأوضة عشان تتفرج على إباحية؟ وتعمل عادة سرية؟ وبعد ما تخلص تطلع بقى إيه على الفيسبوك: الشريعة الإسلامية والحدود ومش عارف إيه! وأنت فين؟ أنت بتعمل إيه؟ ولا قاعد تشات مع واحدة، ولا الواحدة قاعدة تشات مع واحد! أنت مُمكّن لك في بيتك، مُمكّن لك على زوجتك، مُمكّن لك على أولادك؛ ربيتهم على إيه؟ دخلتهم مدرسة شكلها إيه؟ أولادك حافظين قد إيه دلوقتي من المصحف؟ صلاتهم عاملة إزاي؟ حجاب بنتك عامل إزاي؟ كل الحاجات دي حد ضربك على إيدك فيها؟ ﴿الَّذِينَ إِن مَّكَّنَّهُمْ فِي الْأَرْضِ صَارُوا صَالِحِينَ مُصْلِحِينَ﴾، إحنا ده كله إحنا لسه في إيه؟ في صالحين، ده كله لسه في صالحين: ﴿أَقَامُوا الصَّلَاةَ وَآتَوُا الزَّكَاةَ﴾، مصلحين: ﴿وَأَمَرُوا بِالْمَعْرُوفِ وَنَهَوْا عَنِ الْمُنكَرِ﴾. فين دورك في ده بقى؟ ما هم دول اللي هينتصروا، ﴿وَلَيَنصُرَنَّ اللَّهُ مَن يَنصُرُهُ إِنَّ اللَّهَ لَقَوِيٌّ عَزِيزٌ * الَّذِينَ إِن مَّكَّنَّهُمْ فِي الْأَرْضِ أَقَامُوا الصَّلَاةَ وَآتَوُا الزَّكَاةَ وَأَمَرُوا بِالْمَعْرُوفِ وَنَهَوْا عَنِ الْمُنكَرِ﴾ [الحج: 40-41]. فيقول لك إيه: ما إحنا لو عملنا كده بقى أمريكا هتعمل وإسرائيل هتعمل ومش عارف إيه! ختام الآية إيه؟ ﴿وَلِلَّهِ عَاقِبَةُ الْأُمُورِ﴾ [الحج: 41]، لا أمريكا ولا للصهاينة ولا لغيرهم. أنت اعمل ده وما لكش دعوة: أقاموا الصلاة وآتوا الزكاة وأمروا بالمعروف ونهوا عن المنكر، وما تخافش من حد، ليه؟ أصل لله عاقبة الأمور، مش لحد غيره سبحانه وتعالى وجل.

فإحنا كنا بنقول إيه بقى؟ إيه اللي دخلنا في الحته دي؟ فإحنا يبقى أول حاجة عاوزين نحل قضية الأخوة الإيمانية دي. المسألة الثانية أو دي تاني حاجة يعني. المسألة الثالثة بقى، لو تاملنا مسألة الأسرى بقى بالذات، كل الكلام ده كلام عام، الكلام اللي احنا قلناه اللي فات ده كله كلام عام في كل قضية. إنما لو تكلمنا في مسألة الأسرى بخصوصها، الحقيقة يعني يعني فيها كذا معنى. أول معنى يا شباب؛ الحكم الذي صدر من الكنيست، هذا الحكم هو حكم منبه لنا على موضع خلل فينا، اللي هو موضع الخلل أن احنا كنا ناسيين إخواننا أصلاً. هو يا جماعة الكنيست يطلع حكم أو تصوت على حكم أن احنا ننزل نقبض على الناس في الشوارع ونقتلها، ولا طلع حكم الأسرى اللي هما أصلاً عندنا هنعدمهم؟ يعني أصلاً في أسرى مش كده؟ طيب مين في المكان كله ما يعرفش أن في أسر عند إسرائيل؟ كلنا عارفين، يعني ده ألف باء أن في أسر، مين في المكان كله كان شايل هم ده؟ شايل هم إخوانه في السجون هناك؟ فيظهر ذلك في دعائه، يعني في ورد كده في الدعاء لهؤلاء الأسرى. ده موطن خلل فينا قبل ما يكون فيكم، احنا كنا ولا في دماغنا أن في أسرى هناك في السجون، ليه؟ لأن احنا موجهين يا جماعة، يعني إيه موجهين؟ يعني اللي بيتعرض هو ده اللي بنتاثر به، إنما الأسرى دول ما حدش ما حدش بيقول لنا كل خلي بالكم في أسر، خلي بالكم في أسر، خلي بالكم في أسر، فناسيينهم. فالحكم ده الحكم ده حكم الكنيست يعني منبه لنا على موضع خلل فينا، احنا كنا ناسيين إخواننا، فجاء الحكم كأيه؟ كصاعقة، كأن حد بيديك على وشك؛ فوق بقى، عندك إخوانك في الأسر، دورك فين؟ فده أول معنى يعني جاء في ذهني.

المعنى الثاني؛ أن هذا الحكم بعدما صدر تم تجميده فترة، ليه بقى مش قضية دلوقتي؟ لأن بعض الناس بيقولوا إيه: هو تم تجميده كده منه نفسه؟ وفي ناس بيقولوا: لا ده في منظمة حقوقية قالت لا إحنا مش موافقين وعاوزين نعيد البحث في الموضوع فجمدوا الحكم. كيف قرأنا ذلك القدر؟ ما هو إحنا لو قرينا القدر ده أن الفاعل فيه الجمعية الحقوقية، فروح عيد توحيدك تاني، روح راجع توحيدك. لا ده هو الكنيست لما نطق أنطقهم الله، ويحاسبون يوم القيامة على ظلمهم وفجرهم، لكن أنطقهم الله، ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112]، قضية محسومة، ﴿وَلَوْ شَاءَ رَبُّكَ مَا فَعَلُوهُ﴾. ولما قامت المنظمة الحقوقية، أقامها الله جل وعلا، كان المعنى: تنبيه للأمة على موضع خلل، لعل هذا التجميد ببركة دعاء رجل صالح في بيته في جوف الليل ما حدش يعرفه، ما حدش يعرف، يعني التجميد اللي حصل فترة ده بايه؟ مش بمنظمة حقوقية خالص، هو فعل الله عز وجل. طب بايه؟ قد يكون قد يكون بدعاء ولي في الأمة دعا الله بصدق فحدث ذلك، قد يكون فعل الله عز وجل ليه؟ علشان يبقى اختبار لينا بقى، هتجمد فترة، الفترة دي إحنا المفروض نعمل فيها إفيها؟ أنتم فاهمين يا جماعة؟ أنتم فاهمين المعنى؟ معنى أن في قرار بكم ألف واحد من إخواننا بجرة قلم هيعدموا. وعشان تستشعر ده؛ تخيل أن فيهم عشرة خمسة عشر واحد من أحبائك، تخيل ده فعلاً، يعني كل واحد فينا كده يقعد يتخيل أكتر عشرة خمسة عشر واحد بيحبهم، وبالمناسبة فيهم نساء، فلو عاوز تحط في عشرة خمسة عشر نساء حط؛ حط أمك، حط أختك، حط بنتك، حط، وطلع قرار بإعدامهم كلهم. وفجأة طلع قرار بتجميد هذا الإعدام لأجل بقى قد يقصر أو يطول؛ ممكن بكره، ممكن بعده، ممكن سنة، الله أعلم أنت أحوالك إيه في الفترة دي.

فده اختبار لينا، ده اختبار لينا هتعملوا إيه بقى؟ ادينا طلعنا الحكم، الله جل وعلا طلعنا لكم الحكم بالإعدام فنبهنا نبهناكم على موضع خلل فيكم؛ كنتم ناسيين إخوانكم ذكرناكم بيهم أهو، ثم جمدنا ذلك القرار عشان يرى الله عز وجل منا إيه؟ هو ده السؤال المهم. يبقى نعمل إيه يا رب؟ نعمل إيه؟ طبعا نعمل إيه دي بقى دي قضية اتكلمنا فيها كتير، أنا أنا يمكن ده السؤال الأهم نعمل، هتلاقوا في كذا درس نعمل إيه دي؟ عندك في درس إيه؟ مين يقول؟ في درس كفوا أيديكم وأقيموا الصلاه، درس اسمه كده كفوا أيديكم وأقيموا الصلاة، ممكن نقولها دلوقتي دي وفي درس التهجير وفي درس الغربله. احفظوا الأسماء دي ويا جماعة روحوا اسمعوا الدروس دي، سمعوها لعيالكم، سمعوها لزوجتكم. درس الغربله الدروس دي مهمة جداً، قعدنا ندندن فيها وبحّت الأصوات في نعمل إيه دي، والدرسين مش فاكر درس ولا درسين بتوع الصخره يا درس يا درسين مش فاكر، لا ده دي الخطبة دي، إنما هو إحنا قلناها في درس في درس واحد، درس الصخرة. الدروس دي مهمة جداً جداً تتسمع عشان نعمل إيه.

تعالوا ناخد مثال واحد؛ فكرة يا جماعة الناس اللي عمالة تقول إيه: الجهاد الجهاد وافتحوا باب الجهاد، وده وده شيء طيب، وده شيء طيب، والجهاد ذروة سنام الإسلام وأفضل متطوع به؛ الجهاد ثم النفقه فيه ثم العلم ثم الصلاة. فالجهاد حاجة عظيمة جداً، لكن الجهاد كما أن ثواب الجهاد عظيم وكبير جداً عندنا برضه يعني حاجة خطيرة، اللي هي أنه من أكبر الكبائر الفرار يوم الزحف، مش كده؟ طيب أنت عمال تستعجل حاجة عمال تستعجل حاجة والحاجة دي مقفولة عليك قدراً، يعني هي شرعاً مأمور بها، لكن قدراً مقفولة عليك قدراً. هنا الحكمة أن إحنا نعمل إيه؟ ما هو أنت لو قعدت من هنا لبكره ما تقول الجهاد الجهاد إيه اللي هيحصل يعني؟ ولا حاجة، ولا حاجة لو خلّيت لك وِرد (يعني كل يوم أنك تقول الجهاد مثلاً مئتي مرة) هيحصل إيه؟ طب أنت الآن مصروف عن الحاجة اللي تقدر تعملها، اللي في إيديك؛ اللي في إيديك تعملها في حاجات كتير في إيديك تعملها، منها ما أشار إليه القرآن بقى.

الأول قبل ما نشوف اللي أشار إليه القرآن؛ فكرة يا جماعة، فكرة أنه الله جل وعلا ممكن يمنع أموراً شرعاً وممكن يأمر بها شرعاً ويمنعها قدراً. حد فاكر الكلام ده اتكلمنا فيه فين في درس قبل كده؟ أصحاب السبت. أحسنت، أصحاب السبت والمعنى ده بقى فصلناه في الدرس ده كتير؛ أن ربنا سبحانه وتعالى أباح لهم الصيد طول الأسبوع ما عدا يوم السبت، يبقى شرعاً مباح لهم الصيد ست أيام في الأسبوع، قدراً محرم عليهم الصيد، محرم قدراً مش شرعاً. هو في حاجة اسمها محرم قدراً؟ أه، ﴿وَحَرَامٌ عَلَىٰ قَرْيَةٍ أَهْلَكْنَاهَا﴾ [الأنبياء: 95] هذا تحريم إيه؟ قدري، أنهم إليها لا يرجعون، ما فيش ما فيش رجوع خلاص. فقدرًا أنت ممنوع من الصيد، يوم السبت شرعاً أنت ممنوع من الصيد، قدراً تقدر تصطاد، صح؟ افهموا بقى الحته دي كويس جداً، القضية دي كويسة ليه؟ علشان الآيات اللي هنقولها دلوقتي هي آيات فيها أحكام شرعية منع الله عز وجل منها شرعاً وقد قلنا خلاص الشرع انتهى بموت النبي عليه الصلاة والسلام، الوحي انتهى، فالله عز وجل قد يحرم شيئاً قدراً، ساعتها نجري نشوف إيه الحكم بقى دلوقتي.

قال الله عز وجل: ﴿أَلَمْ تَرَ إِلَى الَّذِينَ قِيلَ لَهُمْ كُفُّوَا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾ [النساء: 77]. الله عز وجل بيكلمنا عن أناس، الفئة دي فئة من المهاجرين، من الصحابة المهاجرين استعجلوا الجهاد وهم في مكة، مكة عاوزين نجهد، عاوزين ما هو شايفين مظلومين فعاوزين يفشوا إيه؟ الغضب ده في عاوزين نجاهد. فأتى الأمر: كفوا أيديكم، ما فيش جهاد، طب نعمل إيه؟ أقيموا الصلاة وآتوا الزكاة. اللي بيسال أنا أعمل إيه؟ أهو: أقيم الصلاة وآت الزكاة، أهو ده اللي تعمله. يعني إيه؟ يعني تقيم الصلاة، مش يعني تصلي، مش يعني تصلي يعني من إقامة الصلاة إتمام الصلاة، إتمام الصلاة. أنت لو راجل مش أنت لو را، لا يعني لو أنت رجل يعني فعلا مش لو أنت، لو راجل تبقى بتصلي في الجامع، في المسجد حيث ينادى بهن كما جاء في الأثر، وبعدين تبتدي تنافس في الصف الأول، وتنافس أن ما يفوتكش تكبيرة الإحرام، وتنافس في أنك تقعد تقول الأذكار وأنت في مجلسك، وتنافس أنك تبقى موجود في المسجد أطول مدة، وتنافس في السنن الرواتب القبلية والبعدية، ثم تجتهد في الخشوع وفي تدبر القرآن اللي بتقراه. إحنا ده كله بنتكلم في بند واحد اللي هو صلاة الفرض، ما دخلناش في قيام ليل.

أقيموا الصلاة وآتوا الزكاة، هو كان في زكاة في مكة يا جماعة؟ ما كانش في زكاة في مكة، الزكاة فرضت في السنة الثانية من الهجرة. فالمعنى هنا مش مش آتوا الزكاة التي هي ذات نصاب اللي هو الزكاة اللي احنا عارفينها دلوقتي، لا؛ يعني آسوا الفقراء والمساكين، لأن الآية دي بتكلمنا عن الناس في الحقبة المكية: ﴿أَلَمْ تَرَ إِلَى الَّذِينَ قِيلَ لَهُمْ كُفُّوَا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾، اعملوا الحاجتين دول. السؤال بقى اللي يتبادر للذهن: إشمعنى الحاجتين دول؟ إشمعنى دول؟ لأن هم دول دول باب الثبات في الجهاد، الحاجتين دول. لما استعجلوا ففرض الله عليهم الجهاد، هو ربنا قال لهم إيه؟ كفوا أيديكم، ما حدش يقاتل دلوقتي. طب نعمل إيه يا رب؟ حاجتين: أقيموا الصلاة وآتوا الزكاة، هنرجع لهم كمان شوية. إشمعنى هم استعجلوا ففرض الله عليهم الجهاد، حصل إيه بقى؟ الآية بتفاجئنا يا جماعة؛ إحنا بنتكلم عن صحابة: ﴿أَلَمْ تَرَ إِلَى الَّذِينَ قِيلَ لَهُمْ كُفُّوَا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مَّنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا أَخَّرْتَنَا إِلَىٰ أَجَلٍ قَرِيبٍ﴾ [النساء: 77] مما قيل فيها: لولا آخرتنا إلى أجل قريب إلى الموت يعني الموت عادي موته طبيعية، أموت على سريري، أموت مش في جهاد: ﴿لَوْلَا أَخَّرْتَنَا إِلَىٰ أَجَلٍ قَرِيبٍ﴾.

اقفوا هنا بقى، تعالوا كده نتامل السؤال ده: ﴿وَقَالُوا رَبَّنَا لِمَ كَتَبْتَ عَلَيْنَا الْقِتَالَ﴾، فسيجيب الله عز وجل، المتصور في إجابة السؤال ده إيه؟ ليه ما كتبت علينا القتال؟ والله كتبت عليكم القتال عشان واحد اتنين تلاتة أربعة، ده إجابة السؤال المنطقية، مش كده؟ ليه ما كتبت؟ لما أقول لك إيه: أنت ليه عملت كذا؟ تقول لي إيه؟ والله للأسباب دي واحد اتنين تلاتة أربعة. ربنا ما جاوبش كده: ﴿وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا﴾.

أخرتنا إلى أجل قريب قل متاع الدنيا قليل. ربنا عمل إيه؟ فضح قلوبهم. لولا أن الدنيا في قلوبكم لما سألتم هذا السؤال. قل متاع الدنيا قليل، والآخرة خير لمن اتقى ولا تظلمون فتيلا، أينما تكونوا يدرككم الموت. فالإجابة جت بعيد عن السؤال خالص، أنتوا ما سألتوش السؤال ده أصلا غير لأن الدنيا لسه في قلوبكم.

طب إيه اللي هيخرج الدنيا من قلوبنا؟ حاجتين. إيه هما؟ صلاة وإنفاق، صلاة وإنفاق. الصلاة صلة بينك وبين الله عز وجل، أنهي صلاة؟ بتاعتنا؟ لا مش بتاعتنا. يقول: طب ما أنا بصلي أهو بقالي عشرين سنة، ما هو أنت يعني اللي هي صلاة إيه؟ اللي هو التحدي بقا الآية اللي في كل درس، لو سالتك أنت قريت إيه من القرآن في الركعة الثانية في العصر؟ أنت نفسك مش فاكر صلاة من ساعة، أنت مش فاكر قريت إيه، أنت يعني بقك ده اتحرك، مش بقول لك إيمان بيصلي، أنت اللي بقك اتحرك وقريت، وممكن تبقى مش فاكر قريت إيه.

لو سألتك دعيت بإيه في السجود، ولا فاكر. فما تجيش تقول إيه: ما أنا بصلي. ما صدق الله وكذبنا. ماذا قال الله؟ قال سبحانه وتعالى: استعينوا بالصبر والصلاة. نستعين؟ لما أجي أقول لك: استعين بكذا، تقول لي: طب إيه استعين على إيه؟ يعني أنا صح كان الجملة هنا محتاجة إيه؟ إلا الذي يستعان عليه بالصبر والصلاة. ربنا حذف المستعان عليه ليه؟ لأنك هتستعين بالصبر والصلاة على أي حاجة.

أي حاجة في الدنيا عاوز تستعين عليها، استعين بالصبر والصلاة. مما قيل فيها طبعا، فيها تأويلات كتير، بس مما قيل فيها: استعينوا بالصبر والصلاة، استعينوا بالصلاة والصبر على الصلاة. كأن الآية فيها إيه؟ تقديم وتاخير: استعينوا بالصبر والصلاة، ده تأويل من التأويلات: استعينوا بالصلاة والصبر على الصلاة. فاحنا محتاجين نظبط صلاتنا، نظبط إقامة الصلاة. طب دي هتؤثر؟ هتؤثر يقينا.

صلاح الدين الأيوبي يروون عنه أنه كان في معاركه مع الصالبين كان يمشي وسط الجنود بالليل وسط الخيام، وبعدين يكشف الخيام كده فيلاقي واحد بيصلي، يققيم الليل من الجنود. فيقول: من هنا يأتي النصر. درويش صلاح الدين؟ صح، درويش ولا فاهم؟ فاهم، معاه السلاح ومعاه القوة ومدرب جنوده كويس، يعني واخد بالأسباب الدنيوية، لكن راجل فاهم سنن الله عز وجل، فاهم سنن ربنا، سنن ربنا مش بده كله.

إيه رايكم بقا خالص؟ ويوم حنين إذ أعجبتكم كثرتكم فلم تغني عنكم شيئا. هربوا كلهم، كانوا كام واحد في حنين؟ اثنا عشر ألف صحابي. اثنا عشر ألف، رقم ما شافوهوش قبل، جيش اثنا عشر ألف، ما هو أنت عشان تقيس مثلا بدر: ثلاث مائة وأربعة عشر، أحد: كم؟ ألف، بس ده انشق كمان منهم الناس، فالأرقام اثنا عشر ألف بقا ولا تغني شيء، ولا تغني شيء.

وعشان كده ربنا إيه: وما النصر إلا من عند الله. الآية دي يا جماعة جت بعد إيه؟ وما النصر إلا من عند الله جت بعد إيه؟ بعد تنزل الملائكة: إذ تستغيثون ربكم فاستجاب لكم أني ممدكم بألف من الملائكة مردفين مردفين قراءتين. يبقى خلاص هننتصر بقا، الملائكة هتنصرنا؟ قال لك لا، وما جعله الله إلا بشرى ولتطمئن به قلوبكم. نزول الملائكة ده مش عشان النصر أصلا خالص، تنزل الملائكة لحاجتين: بشرى ونطمنكم. إيه ده يعني مش عشان النصر؟ لا، أصل مش عشان النصر، ليه يا رب؟ أصل النصر من عند، مش الملائكة.

هو ربنا يا جماعة محتاج ينزل ملايكة يعني؟ هو لو كان الله عز وجل أراد النصر، كن فيكون، خلاص انتصر، انتصرنا. أقيموا الصلاة، يبقى الصلاة تضبط لك حياتك كلها. صلاح الدين يقول إيه: من هنا يأتي النصر. وبعدين يمر على الخيم فيلاقي واحد نايم، يقول: أخشى أن نؤتى من قبلك. صلاح الدين بيقول إيه؟ أنا خايف الجيش ده كله يهزم بسببك أنت يا نايم. لو احنا بقا طبعا هيعدي يلاقي سكرلنج بقا بالليل على الفيسبوك وعلى الإنستغرام، يعني يا ريت حتى نايمين، نوم الظالم عباده، لا، احنا ظالمين، يعني مصرين نفضل ظالمين لآخر وقت.

فادي الصلاة يا جماعة. بيحكوا عن عز الدين القسام، والله أعلم صحة الرواية، عز الدين القسام، عارفين ولا مش عارفين؟ فين ولا طيب؟ بيقول يعني بيقولوا عنه، رووا عنه -ما أعرفش بقى صحتها ولا لا- أنه بيقول: إن فضلت أنا قعدت عشرين سنة بدرس عقيدة، هو يعني بدرس عقيدة للناس، وأول ما اشتدت الحروب عندنا وبتاع في فلسطين، يعني لقيت نفسي قلقان وخايف، وبيقول: اعتزلت الناس كلها، ورحت بقا أقيم الليل مدة يعني ليالي كثيرة، قال: فثبت قلبي. فالصلاة مؤثره بلا شك.

أقيموا الصلاة وآتوا الزكاة، يعني أنفقوا. فلما تبتدي تخرج من الدنيا اللي معاك دي، تتعود على البذل. لأن يا جماعة خدوا بقى القاعدة دي، الزيتونة يعني في حياتنا: احنا في امتحان فاينال، قبل امتحان الفاينال في امتحانات صغار، في امتحان شهر، وامتحان ميد ترم، وامتحان ترم، وامتحان ميد ترم تاني، وكل شهر امتحان، وكل أسبوع مش عارف إيه امتحان مفاجئ، ولا امتحان صغير ولا بتاع عشان امتحان الفاينال.

ما تقنعنيش أنك عاوز تنط من أول يوم في السنة تروح تمتحن فاينال، يا حبيبي طب ما خد المنهج فصل فصل، مالكش دعوة، بس امتحن في الكتاب كله، مالكش دعوة؟ مش هتعرف، امشيها واحدة واحدة، أقم الصلاة الأول، وتنفق من مالك، لأن شوية هنقول لك أنفق روحك. أنت راجل ما تعودتش تطلع فلوس من جيبك وتديها لحد لو أنت محتاجها، ما تعودتش على ده، هنيجي نقول لك أنفق روحك. ولذلك ماذا قال النبي عليه الصلاة والسلام عن الصدقة؟ قال: والصدقة برهان. برهان إيه؟ الإيمان.

اتعود على الانفاق، اتعود على البذل. فلما اتعود على البذل، أول حاجة اتعودت على البذل كمعنى: بذلتني حاجة، اتعودت أنك بتعمل حاجة لغيرك. ما هو فكرة الأنانية اللي احنا عايشين فيها ده أو الفردانية اللي احنا عايشين فيها: هو أنا هستفيد أما أدخل أقاتل وأموت بقوانين الدنيا يعني مش في الآخرة، بقوانين الدنيا هستفيد إيه؟ أنت مش متعود تبذل لغيرك أصلا.

أقيموا الصلاة. ولذلك يا جماعة إقامة الصلاة دي خطيرة جدا، هتلاقوها في أي مواطن، في مواطن التوتر في القران، الصلاة موجودة، التوتر العسكري، التوتر العسكري في القران هتلاقي دايما الصلاة موجودة في الحتت دي، ماشي. زي إيه مثلا؟ موسى مثلا عليه السلام في عز التوتر والمواجهات بينه وبين فرعون وجنود فرعون والقصة اللي أنتم عارفينها دي كلها، ربنا يوحي إلى موسى إيه؟ وأوحينا إلى موسى وأخيه أن تبوّءا لقومكما بمصر بيوتا.

وتعلموا السلاح والضرب والطّعن عشان تقابلوا فرعون؟ ربنا أمر بكده؟ طب ده مأمور بيه ولا لا؟ مأمور بيه: وأعدوا لهم ما استطعتم من قوة، لكن في الموطن ده ربنا ما أمرش بكده. وأوحينا إلى موسى وأخيه أن تبوّءا لقومكما بمصر بيوتا واجعلوا بيوتكم قبلة، واقيموا الصلاة. ختام الآية: وبشر المؤمنين. إيه رأيكم؟ الصلاة موجودة.

والزكاة الإنفاق. يبقى دول حاجات من اللي علينا نعملهم: أن احنا نقيم الصلاة، نظبط صلواتنا. يا جماعة يا شباب يا شباب، الصلاة دي آخر وصية للنبي عليه الصلاة والسلام، ها؟ اللي أنا بقول ده: آخر وصية الصلاة الصلاة وما ملكت أيمانكم. آخر ابتسامه أثرت عن النبي عليه الصلاة والسلام كانت ليه؟ الصلاة، الصلاة آخر ابتسامة. رفع ستر البيت وهو في مرض الموت، لقى أبو بكر بيصلي بالناس فابتسم صلى الله عليه وسلم. آخر ابتسامة أثرت عنه كانت للصلاة. الصلاة اللي فين؟ اللي في المسجد يا شباب.

فأنت ما تجيش تبقى مكسل تنزل المسجد، ومكسل نشوفك في الفجر في المسجد، ومكسل تقعد للشروق، ومكسل تبقى في الصف الأول، ومكسل تلحق تكبيرة الإحرام، وبص على الفيسبوك: الجهاد وصليل الصوارم والحـ... مين قال لك إنك مش هَتفر؟ مين قال لك يا جماعة؟ الصحابة مما قيل في الآية دي بتاعت: ألم تر إلى الذين قيل لهم كفوا أيديكم وأقيموا الصلاة وآتوا الزكاة فلما كتب عليهم القتال إذا فريق منهم يخشون الناس كخشية الله أو أشد خشية.

أن ده عبد الرحمن بن عوف في نفر من أصحابه جو مستعجلوا، فرباهم الله عز وجل، قالوا: قالتهم تلك. أنتوا عارفين وما تسقطوش الكلام ده على عبد الرحمن بن عوف، عشان بس إيه؟ في كذا تأويل، أنا بحاول أجمع التأويلات بس أو التفسيرات اللي في الآية. مما قيل في الآية دي أنه أصل أصل العلماء استشكلوا كلمة: إذا فريق منهم يخشون الناس كخشية الله أو أشد خشية، قال: هو في مؤمن يعمل كده؟ وقالوا: ربنا لما كتبت علينا القتال لولا أخرتنا إلى أجل قريب، اعتراض على ربنا واقتراح عليه، تحس كده الآية برضه يعني إيه هم مين اللي عملوا كده؟ العلماء اختلفوا على ثلاث أقوال من العلماء، قالوا إن المؤمنين عملوا كده، ومن العلماء اللي قالوا دول فئة، دول فئة من المنافقين هم اللي قالوا كده ولم يتصوروا أن يقولها مسلم. القول الثالث مرعب: مما قيل إن الذي فعل على ذلك وقال ذلك فئة من المؤمنين نافقوا بقالتهم تلك، فئه من المؤمنين صاروا منافقين بتلك المقالة. إيه رأيكم؟

يبقى أنت بتستعجل حاجة، نرجع بقا لأول الكلام، بتستعجل حاجة مقفولة عنك قدراً مش شرعاً، هنا بقا قدراً مقفولة عليك، وبتعمل عمال تستعجلها بايه يعني؟ بتستعجلها بحاجة هي هتعجلها؟ لا برضه، منشور على الفيسبوك ها؟ فأنت عملت إيه يعني كده؟ ولا حاجة.

طب نقول لك يا ابني أنت دلوقتي في ذلك الموطن، إيه أمر ربنا فيك في ذلك الموطن؟ والله يا جماعة في ناس ما تعرف ترد على السؤال ده، هو عمال يفش غضبه وخلاص على الفيسبوك وخلاص. طب يا ابن الحلال، أنت يعني أنت يعني أنت معقول أنت أنت مش مكلف يعني أنت في القضية الكبرى دي، أنت ما فيش حاجة عليك لغاية بقى ما يتفتح لك باب جهاد، أنت ما فيش حاجة تعملها طرزان؟ ما يعرفش يرد.

فادي أهو: أقيموا الصلاة وآتوا الزكاة. فكرة التولي دي ربنا ذكرها مرتين لناس عمالة تستعجل وأول ما يجي الجهاد تفر، فخافوا يعني هو أنت جاي تخذلنا؟ لا، مش جاي أخذل، بس بوريك بوريك الصورة كاملة، الصورة كاملة أهى قدامك أهى أهو فئة من الصحابة، وبنو إسرائيل ربنا قال إيه عنهم في سورة البقرة؟ ها؟ مش سامع حاجة، في سورة البقرة قال إيه؟ إيه بداية الآية؟ إيه بداية الآية؟ ألم تر إلى الذين كده؟ لا، ألم تر إلى الملأ من بني إسرائيل إذ قالوا لنبي لهم ابعث لنا ملكا نقاتل في سبيل الله قال هل عسيتم إن كتب عليكم القتال ألا تقاتلوا قالوا وما لنا ألا نقاتل في سبيل الله وقد أخرجنا من ديارنا وأبنائنا فلما كتب عليهم القتال تولوا إلا قليلا. إيه رأيكم؟ فده موجود في بني إسرائيل حدث، وفي بعض الصحابة حدث نوع منها.

فخاف على نفسك، واعمل بقا اللي ربنا أمرك بيه دلوقتي، ممكن يبقى الإغلاق القدري ده علشان احنا نجتهد في الأوامر الشرعية الأخرى، أن احنا نكون صالحين مصلحين، صالحين في أنفسنا ونكون مصلحين لغيرنا: أقاموا الصلاة وآتوا الزكاة وأمروا بالمعروف ونهوا عن المنكر. إمتى يتفتح المعبر؟ إمتى يتفتح الباب الجهاد؟ إمتى ينادى يا خيل الله اركبي ولله عاقبة؟ مش بتاعتك، ولله عاقبة الأمور مش بتاعتك، ما تشغلش نفسك بيها.

كده فات إيه؟ ربع ساعة ولا دقائق؟ أنت مش طايقني. ساعة وعشر دقائق، قاعد إيه بالدقيقه؟ ماشي، خلاص نقف هنا، ما طولش عليكم. قولوا قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب.