بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وأهل بيته، كما صليت على آل إبراهيم إنك حميد مجيد. أما بعد.
دروس من الاعتكاف. النهار إن شاء الله نأخذ درس، الخطة أنها تكون سلسلة دروس إن شاء الله، مش لازم هنا يعني بس أنا فخلينا نبدأ النهارده إن شاء الله بأول درس خرجنا به من الاعتكاف. واللي اعتكف، وخلوني برضه عشان نبقى مركزين يعني احنا بنتكلم عن أي اعتكاف، مش اعتكاف مدينتي والرحاب، اعتكاف الناس الغلابة اللي زينا كده، ماشي؟
فالدرس الأول وهو الدرس من الدروس العظيمة، مش هنقول الأعظم، لكنه من الدروس العظيمة التي لابد أن نخرج بها من الاعتكاف: أن قليل الدنيا يكفي. قليل الدنيا يكفي، ده الدرس. طبعا اللي منا اعتكف الاعتكاف كما ينبغي أن يكون، فهو تقلل في الدنيا جدا في كل النواحي، يعني بقى ينام على الأرض، ونام في حتة سبعين سم في مترين يا دوبك على قده علشان الدنيا زحمة وجنبه ناس، فتقلل في منامه.
وبعدين يا دوبك هي شنطة هاند باج كده فيها هدمتين، واحدة لابسها والثانية بتتغسل، وليه مسمار على الحيطة ده لو ليه، فتقلل في ملبسه. وكمان الناس بتشخر وزحمة بقى على الحمامات وطابور، في اعتكافات كده يا جماعة ها يعني، فحتى في راحته تقلل. ومنا بعض الناس لما بتعتكف أو هي دي عادة عندها في رمضان، فتلاقيها بتأخر أكلها شويه، بتقلل أكلها شويه، في منا اللي ما بياكلش غير طقة واحدة بس على السحور، يا دوبك يكسر صيامه كده بتمرتين وخلاص على كده ويسيب أكله للسحور، فتقلل في مطعمه.
وأدينا كلنا عايشين وقاعدين مع بعض دلوقتي ومزقططين، وكفانا قليل الدنيا في هذه العشر. يعني جميع من اعتكف تقريبا الاعتكافات الطبيعية يعني، وإحنا معتكفين واحد قال أنا كنت بدخل الاعتكاف، كان بيعتكف في الرحاب بخرج تخنان، باكل أكل ما باكلوش في بيتي، فمش ده الاعتكاف اللي إحنا بنتكلم عنه، إحنا بنتكلم عن الاعتكاف اللي هو الاعتكاف الطبيعي، اللي هو المفروض يعني إيه كما ينبغي أن يكون، لأن يا جماعة، القبل كده اتكلمنا عن مسألة إن واحد من أهداف الاعتكاف إن إحنا بنكسر العادة.
بنكسر العادة، يعني أنت متعود نمط حياة معين، أنت بتكسر النمط ده، فدينا قللنا الدنيا شويه، أو منا اللي قلل الدنيا كتير، نمط حياته. وأدينا عايشين، كلنا موجودين أهو، ما حدش مات من الجوع، وما حدش مات من التعب، حتى اللي تعب شويه ولا مرض ولا عينه وجعته ولا أي حاجة، خفينا وطلعنا والحمد لله الدنيا ماشية يعني، مش كده؟ آه يعني الدنيا اختلت نوعا ما، منا اللي ممكن ما كانش مبسوط قوي، منا اللي اضطراب الحياة ده يعني أثر فيه شيئا، لكن في الآخر إيه اللي حصل؟ حد مات يعني؟ ما حدش مات. قليل الدنيا يكفي.
وده درس عظيم جدا جدا لابد أن نخرج به من الاعتكاف يا جماعة، ليه؟ لأن هذا هدي النبي صلى الله عليه وسلم وهدي أصحابه رضوان الله عليهم. وسيدنا النبي عليه الصلاة والسلام والصحابة هذا الجيل، ما كانش عندهم أي علاقة بين مستوى الدخل وبين نمط الحياة، الكلام ده احنا اتكلمنا فيه كذا مرة، يعني ما فيش الصحابي اللي لما دخله يزيد شوية يقوم نمط حياته يختلف، ما كانوش كده. فالدخل يزيد، يوصل إنه يبقى مليونير حتى، اه كان فيه صحابة كده، طب نمط حياتهم؟ عادي جدا، زيهم زي غيرهم.
فاحنا محتاجين نرجع لهذا الهدي، خصوصا إنه ما هوش هدي عملي فقط، وإنما هو أمر النبي صلى الله عليه وسلم ونهيه، كما جاء في الحديث كان صلى الله عليه وسلم ينهانا عن كثير من الإرفاه، الرفاهيات، فكان صلى الله عليه وسلم ينهى عن كثير من الإرفاه. أنتم عارفين العلماء يقسموا احتياجات الناس لثلاث حاجات: ضروريات، وحاجيات، وتحسينيات. فمعظم إنفاقنا بيكون في التحسينيات، تقول لا ده الأكل والشرب، لا ما هو الأكل والشرب فيه ضروريات وحاجيات وتحسينيات. الأكل والشرب نفسه، فاهمين؟ يعني الأكل والشرب نفسه ممكن تأكل عيش حاف، احنا ما بنقولش لحد يعمل كده بس بقول لكم يعني باديكم تصور يعني عن الأكل، وممكن واحد يأكل معيش ومعه شوية فول، وممكن واحد يأكل سوشي، وفي الآخر هو اسمه أكل، مش كده؟
فالأكل نفسه فيه ضروريات وحاجيات وتحسينيات، وقل مثل ذلك في الملبس، وقل مثل ذلك في المسكن، وهنيجي إن شاء الله لكلام العلماء في هذه القضايا الكبيرة التي تشغل الناس. وأنتم عارفين في علم الاقتصاد، علم الاقتصاد طبعا إحنا دلوقتي نحيا في عالم رأسمالي، إن شاء الله إحنا يعني في حلقة مؤجلة من حلقات التحرر، التحرر من الرأسمالية، ولما نتكلم فيها إن شاء الله نسأل الله عز وجل أنه يتمها على خير.
لما نتكلم فيها مش هنتكلم فيها عن الرأسمالية اللي هو النظام المالي فقط، وإنما العقلية الرأسمالية التي يخضع لها الجميع، وهنكتشف إن إحنا كلنا كده رأسماليين في نمط التفكير يا جماعة، وده إن شاء الله نخليه يعني في حلقة التحرر إن شاء الله. إنما النظام الاقتصادي الرأسمالي الذي نحيا فيه، اللي منكم درس اقتصاد هسأل سؤال، الاقتصاد الآن الهدف الأعظم اللي بيسموه الـ (Ultimate Goal) بتاع الاقتصاد إيه هو؟ حد يعرف؟ لأ. ده مبدأ الاقتصاد، إنما الهدف الأكبر يعني الاقتصاد كله بيسعى لحته، هي كلمة، ها؟
طيب هو فيه كلمة يسموها الويلفير، أو الرفاهية بالعربي، ماشي، ده اللي بيسموه الـ (Ultimate Goal) بتاع الاقتصاد، يعني الاقتصاديين يقعدوا يدرسوا ويعملوا ومش عارف إيه عشان يوصلوا الناس للرفاهية. ده مبدأ يصطدم مع النصوص عندنا، كان صلى الله عليه وسلم ينهى عن كثير من الإرفاه. طيب ليه؟ هنعرف كمان شوية. فإحنا محتاجين نربي نفسنا على ده، محتاجين أولا نغير عقليتنا واحنا بنفكر في حتة التحسينيات دي، في حتة الكماليات، في حتة الرفاهيات.
ليه يا جماعة؟ لأن الله عز وجل لما ذكر الترف في القرآن، ذكره مادحًا أو ذامًا؟ فالرفاهية إحنا محتاجين العقلية شويه تتغير واحنا نتعامل مع التحسينيات والكماليات والرفاهيات وننظر لها نظرة شرعية. الله عز وجل لما ذكر الترف في القرآن ذكره ذامًا له، يعني إحنا لو مسكنا الجذر اللغوي اللي هو الترف، هنلاقي كل الآيات اللي جه فيها الجذر اللغوي ده بيبقى أي مشتق من المشتقات يعني، أو بأي وزن من الأوزان، هنلاقيه مذموم، يعني جاء في معرض الذم.
فمثلًا قال الله عز وجل: ﴿وَقَالَ الْمَلَأُ مِن قَوْمِهِ الَّذِينَ كَفَرُوا وَكَذَّبُوا بِلِقَاءِ الْآخِرَةِ وَأَتْرَفْنَاهُمْ فِي الْحَيَاةِ الدُّنْيَا مَا هَٰذَا إِلَّا بَشَرٌ مِّثْلُكُمْ يَأْكُلُ مِمَّا تَأْكُلُونَ مِنْهُ وَيَشْرَبُ مِمَّا تَشْرَبُونَ﴾ [المؤمنون: 33]. وأترفناهم في الحياة الدنيا، دول مين؟ دول عاد، قوم هود. فالله عز وجل ذكر أن ترفهم في الدنيا، على قول بعض أهل العلم، لأن هنا وأترفناهم في الحياة الدنيا، العلماء اختلفوا في تفسيرها، اختلفوا في تفسير اللي إحنا محتاجينه: أن الترف يصرف الناس عن الدين.
وده الدرس الكبير أصلًا اللي إحنا عاوزين نتكلم فيه، أن الترف، الرفاهية، الدعة، الراحة، التعود على الكماليات والرفاهيات وهذه الأمور صارفة عن الدين، وهنعرف إزاي دلوقتي بتصرف عن الدين إن شاء الله كمان شوية. لكن ربنا هنا ذكر الترف ذامًا له: ﴿وَأَتْرَفْنَاهُمْ فِي الْحَيَاةِ الدُّنْيَا﴾. لما كانوا مترفين فسقوا وكفروا وكذبوا رسولهم، أترفناهم اللي هم عاد قوم هود دول، ترفهم كان عجيب جدا، قال الله عز وجل عنهم، وهود بقى بيكلمهم قال: ﴿أَتَبْنُونَ بِكُلِّ رِيعٍ آيَةً تَعْبَثُونَ * وَتَتَّخِذُونَ مَصَانِعَ لَعَلَّكُمْ تَخْلُدُونَ﴾ [الشعراء: 128-129].
شوف ابن كثير هنا يا جماعة في الحتة دي بيقول إيه؟ ﴿أَتَبْنُونَ بِكُلِّ رِيعٍ آيَةً تَعْبَثُونَ﴾ ابن كثير من الكلام اللي قاله، قال ولهذا أنكر عليهم نبيهم عليه السلام ذلك، لأنه تضييع للزمان. يعني فكرة إن أنت تبقى بتجري ورا الزخرفة المنزل وتكبير المنزل والكماليات الرفاهيات، حياتك كلها ضايعة في ده، فهنا ابن كثير، احنا قلنا ده بيضيع الدين إزاي؟ من تضييع الدين ده إنك بتصرف زمانك في تحصيل هذه الأمور، أو تحصيل المال اللي هتفعل به تلك الأمور.
فهنا ابن كثير بيقول: نهاهم أو أنكر عليهم نبيهم ذلك لأنه تضييع للزمان وإتعاب للأبدان في غير فائدة، واشتغال بما لا يجدي في الدنيا ولا في الآخرة، فهذا نوع من أنواع تضييع الدين. يبقى أنت عندك شوية موارد ربنا خلقك بها: عمرك، وصحتك، وقوتك النفسية، وذهنك، وفلوسك، موارد ربنا خلقك بها أو أعطاك إياها يعني. هذه الموارد، لو تكلمنا بمبدأ الاقتصاد، الموارد نادرة، هتنفقها هنا، يبقى مش هينفع يعني الوقت اللي هتروح تنفقه في الدنيا ما ينفعش هو هو نفس الوقت تنفقه في الآخرة، ما ينفعش، يعني الساعة دي اللي أنفقتها في الدنيا، هي هي نفس الساعة ينفع تبقى بتنفقها في الآخرة؟ ما تجيش. إلا طبعا لو دنيا بنية آخرة، ده ما دي قضية ثانية، ليه؟ لأن المورد نادر.
فده تضييع للزمان وإتعاب للأبدان، البدن من الموارد والزمن من الموارد كذلك. فيبقى دي أول آية فيها معنى الترف وجاءت على وجه الذم. قال الله عز وجل في آية أخرى: ﴿وَاتَّبَعَ الَّذِينَ ظَلَمُوا مَا أُتْرِفُوا فِيهِ﴾ [هود: 13]. برضه، واضح جدًا الاقتران بين مسألة الترف ومسألة الظلم، ظلموا أنفسهم بكفرهم وتكذيبهم نبيهم. واضح جدًا الاقتران بين مسألة الترف ومسألة الظلم: ﴿وَاتَّبَعَ الَّذِينَ ظَلَمُوا مَا أُتْرِفُوا فِيهِ﴾. هنا البغوي بيقول إيه؟ واتبع الذين ظلموا ما أترفوا فيه، قال: «عودوا من النعيم واللذات وإيثار الدنيا».
يعني هؤلاء المترفون، خلاص تعودوا، شوفوا كلمة تعودوا، قلنا لكم من شوية الاعتكاف من مقاصده إن أنت تكسر العادات، ما تتعودش، أنا عادي عندي سرير هنام، ما عندي سرير هنام على الأرض، حمام إفرنجي هدخل، ما فيش هدخل حمام بلدي، متعود الأكل يتحط على مزاجي، هيتحط لي أي أكل هأكله. خلاص، ولذلك احنا دائمًا كنا بننصح: ما تروحش تعتكف في المسجد اللي بيوفر لك نمط حياة شبيه بنمط حياتك بره، أنت كده فقدت معنى كبير من معاني الاعتكاف. يصح الاعتكاف؟ أنا ما بتكلمش على الصحة فقهًا، خلاص، أنت أطعت الله عز وجل اعتكفت، خلصنا، ده في الفقه. تحصيل مقاصد الاعتكاف دي مسألة ثانية، فمن مقاصد الاعتكاف دي إن دنيتنا تقل، إن العادات تنكسر، نخرج من الاعتكاف قد تحررنا من تلك العادات.
فهنا البغوي بيقول: «عودوا من النعيم واللذات وإيثار الدنيا». إيه كذلك من الآيات التي ذكر فيها الترف وبرضه في هي كل الآيات في موضع الذم، الترف في القرآن اللي هو احنا بنسعى له في هذه الدنيا وبنبذل له أعمارنا، ونسافر ونتغرب ونبات في الشغل ونطبق ورديتين ونشتغل شغلانتين وننزل الست تشتغل، ده كله ليه؟ لو فنطنا هنلاقي 80% من الحاجات اللي احنا بنسعى ليها هي في قسم التحسينيات، الرفاهيات، لا هي من الضروريات ولا الحاجيات.
فهذا الترف، هذه الرفاهية التي كان ينهى عنها النبي صلى الله عليه وسلم، كان ينهى عن كثير من الإرفاه وهيأتي معنا إن شاء الله، اللي الناس بتسعى لها وبتضيع أعمارها من أجلها وبتضيع كثير من دينها، اللي منا كان ممكن ممكن يحفظ له آيتين في المصحف، شوية يختم له سورة، شوية ربما ختم المصحف كله حفظًا، ما عملش ده، ليه؟ أصلي وقته مشغول، في إيه؟ في تحصيل دنيا، عشان مش لاقي ياكل ويشرب؟ لا أبدًا، عشان مش لاقي أربع حيطان يئوه؟ لا أبدًا. أمال إيه؟ مزيد من الرفاهية ومزيد من الراحة ومزيد من الدعة ومزيد من الترف.
ولذلك حذر القرآن عن مسألة الترف دي، وحذرها النبي صلى الله عليه وسلم. فمن الآيات كذلك التي جاءت في الترف، قال الله عز وجل: ﴿وَإِذَا أَرَدْنَا أَن نُهْلِكَ قَرْيَةً أَمَرْنَا مُتْرَفِيهَا﴾ [الإسراء: 16]. أمرنا مترفيها، أمرنا مترفيها، ثلاث قراءات. ﴿فَفَسَقُوا فِيهَا فَحَقَّ عَلَيْهَا الْقَوْلُ فَدَمَّرْنَاهَا تَدْمِيرًا﴾ [الإسراء: 16]. شوفوا هنا يا جماعة برضه الاقتران بين مسألة إن تدمير القرى وإهلاك القرى أتى على يد المترفين. ﴿وَإِذَا أَرَدْنَا أَن نُهْلِكَ قَرْيَةً أَمَرْنَا مُتْرَفِيهَا﴾ يا أمرناهم، إما يكون المعنى أمرناهم شرعًا بالطاعة ففسقوا، مَفْهُومَة دي؟ يعني الله عز وجل أمرهم أن يسلموا فكفروا، أمرهم أن يطيعوا فعصوا.
وإذا أردنا أن نهلك قرية أمرنا مترفيها، أمرناهم شرعًا بالطاعة ففسقوا فيها. فحق عليها القول فدمرناها تدميرًا. بإيه؟ بفسق من؟ أهل الترف. إشمعنى أهل الترف؟ علشان دول اللي ترفهم بيدعوهم إلى الفسق. وهيجي إن شاء الله كلام بعض المفسرين. أو وإذا أردنا أن نهلك قرية أمرنا مترفيها أمرا قدريا بالفسق ففسقوا. ففسقوا فيها فحق عليها القول فدمرناها تدميرا. وإذا أردنا أن نهلك قرية أمرنا مترفيها أكثرناهم.
يعني أهل الترف بقوا هما كتير. فإيه رأيكم يعني في المكان اللي إحنا فيه ده؟ لو قلنا نسبة المترفين كم في المية؟ أنا بأزعم 100% زعمي هذا. نسبة المترفين فينا 100% وإحنا كذا مرة أقول الكلمة دي. أقول لو جبنا أفقر واحد فينا دلوقتي، أفقر واحد في المجلس ده، وعرضناه على حياة النبي والصحابة عليه الصلاة والسلام لكان يعني من أثرياء المدينة. كنمط حياة مش كفلوس. كنمط حياة مش كفلوس. وده إحنا كررناه مرارا.
اللي منهم مليونير ده مش معناها إنه بياكل المحمر والمشمر وإنه قاعد في قصر 50 أوضة. ما كانوش كده الصحابة رضوان الله عليهم. أبو بكر كان تاجر وغني آه. وبعدين سيدنا النبي طالع عليه الصلاة والسلام ما عندوش أكل في البيت. طالع يشوف حاجة يأكلها. يلاقي مين معدي من قدامه؟ أبو بكر. إيه اللي خرجك؟ قال له الجوع. قال له أنا والله خرجني الجوع. أبو بكر كده. وبعدين القميص بتاعه، الجلابية، كان يقفلها بإيه؟ بخشبة. مقطوعة ومهترئة كده.
وما فيش زرار يزره بيه. يجيب خشبة حتة غصن كده صغير يروح عاملها بيها. وسيدنا أبو بكر. وقل مثل ذلك في غيره من الصحابة رضوان الله عليهم. فده النمط الطبيعي للحياة في المدينة. ده النمط الطبيعي. طب سيدنا النبي بقى عليه الصلاة والسلام؟ حاجة تانية مش كده؟ يربط على بطنه الحجرين من الجوع. شهرين يأكل تمر ويشرب مية. ينام على الحصير يؤثر في جنبه الشريف صلى الله عليه وسلم. وليس في حجرته ما يرد العين. فدي حياة النبي عليه الصلاة والسلام.
ولذلك أنا بقول دايماً لو جبنا أفقر واحد فينا، فهو بالنسبة لنمط حياة الصحابة رضوان الله عليهم في المدينة، هو من الأثرياء، من علية القوم كنمط حياة. سيدنا أبو هريرة كان يصرع، يغمى عليه من إيه؟ من الجوع. من الجوع. فحصلت لمين؟ سمعنا عن مين حصلت له؟ مش حصلت في مين؟ إنه صرع وأغمى عليه من الجوع مش لاقي حاجة يأكلها. طب إحنا بنقول يعني نروح لده؟ أنا ما بقولش نروح لده.
أنا بقول إحنا لازم يكون عندنا تلك العقلية اللي هي عقلية إيه عشان بس يبقى الدرس واضح يا جماعة. أنا مش بقول أخرج من المسجد النهاردة، بعد ما كنت عايش في مستوى فجأة تروح إيه هابد نفسك؟ مش هتستحمل، أو هابد من تعول زوجة أو أولاد، مش هيستحملوا وهينفروا. فده ما يصحش ولا ينفع. ولكن مع الزمان آه، يبقى عندنا فكرة إن إحنا ممكن نتقلل شوية. خلاص؟
يبقى عندنا وعي بفكرة إيه الضروري وإيه الحاجي وإيه الرفاهية؟ إيه التحسيني؟ اللي ممكن لا يستغنى عنه عادي جداً وممكن يستبدل عادي جداً. فأنا النهاردة في العيد نازل أشتري هدوم، فأنا متعود بقى بشتري من الحتة الفلانية، هنزل شوية وأشتري من حتة تانية. واللي كان بيشتري من الحتة التانية دي لإن مستواه أقل هينزل ويشتري من حتة تالتة. طب واللي بيشتري من حتة تالتة ينزل شوية ويشيل عادي جداً مفيش مشكلة. طب ده أنا معايا الفلوس اللي أجيب من الحتة الفلانية، مش شرط يبقى نمط حياتنا ماشي على دخلنا، مش شرط.
دي لعبة بيلعبها النظام الرأسمالي، بيلعبها كده والشيطان طبعاً مساعد، الشيطان يعدكم الفقر، تلاقي دايماً دخلك دايماً دايماً لو هو س، أنت عايش بـ س زائد. مفيش حد عايش بـ س. تلاقي دايماً أنت عاوز إيه؟ حتة زيادة على س، يعني إنفاقك زايد. خلاص، حتى لو زايد في إنك بتستثمره في شيء، بتحطه في حاجة. ليه؟ عشان تفضل في الدوامة دي على طول. وقل مثل ذلك بقى في الإيه؟ في المطعم وفي المشرب وفي المسكن وذالك.
يبقى وإذا أردنا أن نهلك قرية أمرنا مترفيها أكثرنا مترفيها. ففسقوا. شوفوا العلاقة عجيبة جداً بين الفسق وبين الترف. أمرنا مترفيها ففسقوا فيها فحق عليها القول فدمرناها تدميراً، وإذا أردنا أن نهلك قرية أمرنا مترفيها جعلناهم أمراء. لأنه أصعب شيء، أصعب شيء إنك تنال المال والسلطة معاً. دي بتحسسك بإيه، قوة مطلقة. فإنك تكون معاك مال مترف وفي نفس الوقت معاك سلطة، بتشعر بإحساس عجيب من القوة. فإذا صار المترف أميراً لا تسأل عن الفساد في الأرض. أمرنا مترفيها ففسقوا فيها، فحق عليها القول فدمرناها تدميراً.
هنا بيقول ابن الجوزي في تفسيره في زاد المسير في هذه الآية قال: فأما المترفون فهم المتنعمون الذين قد أبطلتهم النعمة وسعة العيش. والمفسرون يقولون هم الجبارون والمسلطون والملوك. وإنما خص المترفين بالذكر لأنهم الرؤساء ومن عداهم تبع لهم. هما الرؤساء وهم الأمراء وهم الناس بتبص عليهم وتقلدهم. هما المؤثرين في المجتمع فاللي بيعملوه الناس بترجع تقلدهم بلا وعي. يمسكوا الجهاز الفلاني فإحنا، هما ممكن يبقى الجهاز الفلاني اللي ماسكينه ده، التليفون الفلاني ده مثلاً، ده بالنسبة لهم ولا حاجة يعني، ما نقطة في بحر فلوسهم، تقوم أنت تنزل تعمل إيه؟ تستدين وتجيبه بالقسط. إيه ده؟ طب في الآخر ليه؟ يعني أنت عملت به إيه بقى أنت يعني؟ ولا حاجة. ولا حاجة.
خلي بالك إحنا مش بنتكلم في إن التليفون ضرورة ولا حاجة خالص. بنتكلم في هذا المستوى اللي هو لا يمثلك أصلًا يعني. ده إحنا بنقولك لو يمثلك تعالى على نفسك وانزل، ده لو يمثلك يعني، لو أنت تعرف تجيبه بسهولة. إحنا دلوقتي بنتكلم في مستوى تاني يا جماعة، إن آه، أنا أقدر أجيب، أقدر أجيب، لكن مش هجيب ليه؟ لمعاني كتير، واحدة منها هو ده، إنه كان ينهى عن كثير من الإرفاه صلى الله عليه وسلم.
سيدنا عمر يا جماعة لما ضرب ابنه، قال الكلمة الخالدة اللي هي إيه؟ أو كلما اشتهيت اشتريت؟ هنا ابنه ما راحش استلف عشان يجيب، هو ابنه كان جايب إيه؟ مش آيفون، مش عارف سفنتاين، مش عارف. لا ده الراجل راجع من السوق شاري حتة لحمة ياكلها. بس، ما كانش فيه ثلاجات وجايب الـ 5 كيلو ونشيل في الفريزر، ما كانش فيه، جايب حتة لحمة يروح ياكلها يطبخها. قال له إيه ده؟ قال له لحم اشتهيته فاشتريته. راح ضربه. وسيدنا عمر على طول كانت الدرة في إيديه على طول ما بيتف. وهو ابنه، قال له: أو كلما اشتهيت اشتريت؟ أنت كل ما تشتهي حاجة تروح تشتريها؟ صرت عبداً للشهوة، صرت عبداً لنفسك.
فده معنى ثاني، إن أنت تجاهد نفسك في المباحات، إحنا ما بنحرمش، يعني هو حرام يشتري لحمة؟ لا مش حرام يشتري لحمة. طب سيدنا عمر ضربه ليه؟ فقيه، سيدنا عمر فقيه ملهم. نفسك لما تيجي تقول لك اعمل المباح ده، حاضر. طب والمباح اللي جنبه؟ من عينيا. طب والمباح اللي هناك ده روح اعمله، حاضر. شوية هتكسر إن هي تدخلك فين؟ في المكروه ثم في الحرام. إنما لما تجاهد نفسك من البداية كده، اعمل مباح؟ لا مش عامل مباح، هتيجي تفكر نفسك إن في يوم من الأيام تقول لك روح ادخل في الحرام، فده معنى من المعاني إن إحنا بنجاهد نفسنا. جزاكم الله خيراً. في المباح علشان نفسنا ما تدعوناش للحرام.
وكذلك من المواطن التي جاء فيها الترف. قال سبحانه وتعالى: ﴿إِنَّهُمْ كَانُوا قَبْلَ ذَلِكَ مُتْرَفِينَ﴾ [الواقعة: 45]. جزاكم الله خيراً. ﴿إِنَّهُمْ كَانُوا قَبْلَ ذَلِكَ مُتْرَفِينَ﴾، كانوا قبل ذلك يعني في الدنيا. مترفين أي منعمين في ترك أمر الله. منعمين في ترك أمر الله. فشغلهم ترفهم عن الاعتبار. ده كلام ابن الجوزي في زاد المسير. شغلهم ترفهم عن الاعتبار. إنه يعتبر بآيات الله عز وجل، إنه يقعد يفكر في أفعال الله عز وجل، في أقدار الله عز وجل. لو قلت لك آخر مرة إمتى قعدت جلسة أو جلسة تفكر؟ مش ذكر، مش جلسة ذكر، قاعد بتذكر ربنا، لأ. بقك مقفول عادي، لسانك واقف. قاعد بتأمل في أفعال الله القدرية في الكون. سلط مين على مين؟ هزم مين ونصر مين؟ طب ليه؟ طب عشان إيه؟ قاعد كده ساعة، يعني أثر عن بعض السلف إنه تفكر ساعة خير من قيام ليلة. تقعد تتفكر ساعة واحدة خير لك من أن تقوم بين يدي الله عز وجل ليلة كاملة. إمتى آخر مرة عملت ده؟
إحنا ما عندناش وقت نعمل ده. طب ما عندناش وقت ليه؟ يعني وقتنا مشغول بالحاجات المهمة خالص. خالص. لأ يا شيخ أنا مشغول بالمهم، أنا على طول في الشغل. أيوة ما أنت شغلك ده اللي طفحان فيه الكوتة، عشان في الآخر بتعمل إيه؟ بتعمل إيه؟ يعني أنت دلوقتي عاوز نسيب الشغل؟ ما قلت سيبوا الشغل خالص. عشان بس الإيه؟ ما بقولش سيب شغلك، ما بقولش إيه؟ وبعدين أنا قبل كده في درس قلت إيه؟ قلت لو جيت قلت لك قلل رزقك أبقى واحد ما بيفهمش حاجة، لأن الرزق مكتوب. فأنا ما بقولكش قلل رزقك، بس بقولك غير نمط حياتك. غير نمط، يعني إيه غير يعني؟ انزل شوية. طب أنا معايا أعمل، انزل شوية. برضه حتى لو معاك. ليه؟ لأنه صلى الله عليه وسلم كان ينهى عن كثير من الإرفاه.
وهيجي معانا بعد شوية إنه كان يأمرنا أن نحتفي أحيانا، نمشي حافيين. الصحابة، نمشي حافيين يا جماعة مش يعني في البيت. وده برضه ما بقولكش أعمله، يعني لو ده خالف العرف والناس هتبص عليك تقول المجنون اهو ولا بتاع، خلاص، الناس مش فاهمة يعني إن دي، إنما عارفين يا جماعة الحديث ده اللي قاله كان أمير. ماشي، لو الأمير ماشي حافي، كان صحابي وبعدين أمير ماشي حافي، قالوا: تعالى أنت بتعمل، أنت الأمير ماشي حافي؟ قال: كان صلى الله عليه وسلم يأمرنا أن نحتفي أحياناً، إن إحنا نمشي حافيين.
فيوم ما الدنيا تميل بيك وما تلاقيش حذاء تلبسه، عادي أنا بعرف أمشي حافي. يوم ما الدنيا تميل بيك وما تلاقيش عربية تركبها، عادي أنا بعرف أنزل أركب مواصلات وأركب أتوبيس وأركب ميكروباص عادي جداً ما فيش مشكلة. يوم ما الدنيا تميل بيك وتلاقي مش عارف تشتري من المكان الفلاني هدوم، عادي جداً أنا بنزل أشتري من المكان الأقل عادي وعادي ما فيش مشكلة. أنا تعودت على ده. بعض الناس يا جماعة بتخش الاعتكاف بتفك الاعتكاف بعد ثاني ليلة، بعد ثالث ليلة، ليه؟ مش قادرة تتعود على اللي شايفاه ده. مش قادرة.
طيب إحنا لو اتحطينا في هذا الابتلاء حقيقةً بقى، يعني ضاقت الدنيا على الجميع، إحنا شايفين مثلاً في العالم كله مش بتكلم في مصر ولا في العالم كله، أسعار الوقود بتغلى. ليه؟ طبيعي. طبيعي الملاحة واقفة وطبيعي يعني إحنا أدينا شايفين ومصادر الطاقة بتضرب في المنطقة، وأنت ممكن قدام شوية تلاقي إنك أنت راجل غني وموسر ومعاك ملايين ومش عارف تحط بنزين لعربيتك. متصور يعني إن ده يحصل في وقت من الأوقات؟ أنا معايا الفلوس لكن ما فيش بنزين. في الوقت ده هتعمل إيه؟ لو واحد ما عودش نفسه من الأول إنه عادي يعرف يعمل كده ويعرف يعمل كده، هيتعب، نفسيته هتتعب، هو مش متعود على ده. الحل إيه؟ إن إحنا نعود أنفسنا على ذلك. ما نعيش نمط واحد من الحياة.
﴿إِنَّهُمْ كَانُوا قَبْلَ ذَلِكَ مُتْرَفِينَ﴾. الرازي ليه كلام خطير جدا جدا على الآية دي، عاوزين نقرأ كلام ممتع الحقيقة، فركزوا معايا بقى شوية كده، لإن ده من المواطن المهمة في الدرس اللي إحنا فيه. يقول الرازي في قوله تعالى: ﴿إِنَّهُمْ كَانُوا قَبْلَ ذَلِكَ مُتْرَفِينَ﴾ قال: ولو حمل نفسه على القناعة لكان أغنى الأغنياء. وكيف لا؟ والإنسان إذا نظر إلى حاله يجدها مفتقرة إلى مسكن يأوي إليه، ولباس الحر والبرد، وما يسد جوعه من المأكول والمشروب. هنا الرازي هيبتدي يفصلك، يفصص لك حته الضروريات والحاجيات والتحسينيات دي. الرازي بيقول إيه؟ بيقول والله القناعة دي هتخليك أغنى الناس.
وبعدين هيفصص ده شوية، يقول لك: أنت راجل محتاج إيه؟ مسكن ومأكل ومشرب وملبس، ده اللي أنت محتاجه. يقول: وغير هذا من الفضلات التي يحمل عليها شح النفس. غير ذلك من الفضلات، يعني أعلى من كده دي فضول، زيادة. طب إيه اللي بيخلينا نلهث وراء الزيادات؟ شح النفس. قال: ثم إن أحداً لا يغلب على تحصيل مسكن بإشتراء أو إكتراء. يعني بيقول: إني ما فيش حد دلوقتي ما هوش قادر يحصل المسكن بإكتراء، إيجار أو إشتراء، أو يشتري. على زمنه طبعاً. إيه. إن شاء الله يعني في دورة ولعلي إن شاء الله قريباً تبدأ يعني هي هي بيخطط لها من زمان.
لعلها تبدأ قريبًا دورة في الزواج والأسرة. نتكلم، نأخذ الجواز من أول من بدري خالص لغاية ما يعني إيه؟ لغاية ما تجيبوا عيال إن شاء الله. فمن الحاجات إحنا طبعًا دي هيبقى فيها رسائل لكل الفئات؛ منها الحكومات، ومنها رجال الأعمال، ومنها.
فمن الحاجات مثلًا يا جماعة؛ إنه إحنا فكرة إنك تعيش في استوديو -مش استوديو تصوير يعني، يعني إن الشاب مثلًا يبقى مجهز للشباب مسكن عبارة عن صالة صغيرة وأوضة وحمام ومطبخ، والشباب تعيش في ده-. ده مش موجود، يعني ده طبعًا إحنا لازم على مستويات كتير نتكلم في ده. إحنا ده موجود في عادي بره، ده موجود بره، أنا شفته، أنا شفته في ألمانيا في دريسدن في كده. تدخل عماير كتير جداً هي عبارة عن كده؛ استوديوهات صغيرة، الشاب يأخذ الاستوديو ده هو ده اللي مكفيه. طب عاوز بعد كده جاب عيال وعاوز يكبر؟ ما هي دي تجارة رائجة، يعني إيه؟ الاستوديوهات مطلوبة، في شاب تاني عاوز يأخذ الاستوديو بتاعك.
اللي عاوز أقوله يا جماعة؛ إن إحنا بنحط شوية قيود أو شوية متطلبات هي في الحقيقة ما هياش ضرورية ليك دلوقتي كشاب مثلًا. خلونا نتكلم فيه بعدين إن شاء الله في الدورة يعني بالتفصيل، إنما ده مشروع ممكن يتعمل؛ يعني ممكن واحد من رجال الأعمال، ممكن واحد من الشركات الكبيرة للمقاولات ولا لغيره، لو عملت مشروع زي ده للشباب وتم تسويقه صح، هيبقى مشروع ناجح وهيحل مشكلة كبيرة جداً. يبقى الشاب بدل ما هو مثلًا أقل شقة برقم بسين، هو هيلاقي نفسه يقدر يعيش ويشتري شقة برقم نص سين، ثلث سين؛ ليه؟ هي شقة صغيرة خالص، استوديو، بس هي مكفية ضرورياته وحاجياته، والدنيا ماشية وزي الفل مثلاً.
فإن أحدًا لا يغلب عن تحصيل مسكن بشراء أو اكتراء. فإن لم يكن، طب مش عارف بقى يجيب لا مسكن لا بشراء ولا باكتراء، فليس هو أعجز من الحشرات؛ لا تفقد مدخلاً ولا مغارة. يعني بيقول يعني، طب مش عارف أجيب مسكن لا بشراء ولا باكتراء؟ قالك الجبل فيه مغارات، يا عم روح اقعد في مغارة.
وهنا طبعًا هو بيبالغ في فكرة إن إيه؛ الضرورة تسد باحتياجات كتير، الضرورة مش لازم تسد بشقة ثلاث أوض منهم واحدة مستر. يعني مش لازم، الضرورة تسد بأقل من كده، يعني بنتكلم في الضرورة؛ أي أربع حيطان هيلمونا وخلاص ونسكن ونعيش، ماشي.
وأما اللباس، فلو اقتنع بما يدفع الضرورة، كان يكفيه في عمره لباس واحد في العمر كله؛ ده كلام الرازي. يقولك لو اقتنع من اللباس بالضرورة تكفيه في العمر كله؛ هدنة، إزاي؟ قال: لباس واحد، كلما تمزق منه موضع، يرقعه من أي شيء كان، تمشي مرقع بقى.
طبعًا يا جماعة أنا بكرر؛ اللي إحنا بنحكي فيه ده، إحنا مش بنقول للناس اخرجوا من هنا، خليكوا كده، مش بنقول ده، بس عاوزين نخرج بعقلية مختلفة؛ عقلية معاها تجيب وما بتجيبش. ليه؟ بخيل شحيح؟ لا. طب ليه؟ عشان ما حوش الفلوس عشان الدنيا بقى؟ لا، أمال ليه؟ علشان أكسر نفسي، علشان نفسي ما تبقاش هي اللي متحكمة ومسيطرة، ما بقاش عبد الدرهم، عبد الدينار.
يعني عبد الدرهم والدينار هنلاقي واحد معدي حاطط الدينار وعمال يسجد ويفعل له طقوس. إيه عبد الدينار؟ يعني أي حاجة يأمر بها الدينار بتمتثلها، أي طريقة هتجيب منه قرش بتجري وراه، طب حرام حلال؟ مش فارقة معاك. هدخل أصلي، بس الهدوم جديدة ولسه جايبها للعيد، ومش عارف إيه، البنطلون من الركب هيحصل له، ما تصليش، لما أبقى أروح وأغير البنطلون بتاع العيد وألبس حاجة تانية. عبد القطيفة والخميصة، عبد للهدوم.
طب نخرج من تلك العبودية إزاي؟ بكده؛ إن إحنا عادي جداً نمط حياتنا ينزل والدنيا ماشية وزي الفل. قال في اللباس: فلو اقتنع بما يدفع الضرورة كان يكفيه في عمره لباس واحد كلما تمزق منه موضع يرقعه من أي شيء كان.
قال: بقي أمر المأكول والمشروب. طب الأكل والشرب بقى؟ فإذا نظر الناظر يجد كل أحد في جميع الأحوال غير مغلوب عن كسرة خبز وشربة ماء. يعني هيجي عليك وقت مش هتعرف تجيب حتة عيش وبق ماية تشربه، حتة عيش تسد جوعك وبق ماية يسد عطشك؛ يعني مش هتلاقي كده.
قال: غير أن طلب الغنى يورث الفقر. ابتدى بقى يخش في الآفة اللي إحنا عايشين فيها. بيقول: المأكل والمشرب والملبس والمسكن أهو، لو اقتنعت بالضرورة هتقتنع بحاجات بسيطة، مش لازم اللي هو مش لازم مغارة ومش لازم الحياة دي، بس هتبتدي تقتنع بحاجات أنت كنت حاطط نفسك، يعني إيه؟ استاندرد إيه بالعربي؟ ها؟ أنت حد سمع اللي أنا بقوله؟ حد بيجاوب على اللي أنا بقوله ولا أنت إيه؟ يعني إيه بالعربي بقى؟ مستوى ولا أي حاجة، أنت حاطط حاجة لنفسك مش عاوز تنزل عنه، فلا، هبتدي أنزل، عادي جداً، مش لازم بقى المغارة يعني، أو روحوا المغارة يمكن تلاقوا الكنز، يعني برضه تطلع بقى تزقطط وتجيب قصور.
خلاص شربت ماية، غير أن طلب الغنى يورث الفقر، فيزيد الإنسان، فيريد الإنسان بيتاً مزخرفاً، ومأكولاً طيباً. يبقى إحنا، أه، الموضوع تعدى إن أنا عاوز أعيش، الموضوع دلوقتي أنا عاوز بيت بالشكل الفلاني، بالهيئة الفلانية، بالمستوى الفلاني، بالرفاهيات الفلانية، خلاص. طب هل ده ضرورة؟ مش ضرورة، كل ده في باب التحسينيات. طب حرام حلال؟ هنجي له كمان شوية، الحتة دي أجلوها، الحكم الشرعي إيه؟ هنجي لها كمان شوية إن شاء الله، بس عاوزين نفهم إن ده مش ضرورة. مش هنكتئب لما ما نلاقيش ده، مش هنكتئب؛ لأن دي ما هياش ضرورة أولاً، ثانياً إن إحنا اتعودنا إن إحنا نعيش من غير الحاجات دي فعادي.
قال: يريد الإنسان بيتاً مزخرفاً ومأكولاً طيباً وغير ذلك من أنواع الدواب والثياب العربية والهدوم، فيفتقر إلى أن يحمل المشاق، وطلب الغنى يورث فقره، وارتياد الارتفاع يحط قدره، وبالجملة شهوة بطنه وفرجه تكسر ظهره، على أننا نقول في قوله تعالى كانوا قبل ذلك مترفين.
واضح كلام الرازي ومتين جداً في حتة إن إحنا نعي فكرة الضرورة، ولا على ذكر قول الرازي يريد بيتاً مزخرفاً؛ إحنا عندنا سورة كاملة سماها ربنا سورة، أو يعني سميت بسورة الإيه؟ الزخرف، عشان بس ما ندخلش في الخلاف بتاع التسمية دي، يعني ما من النبي من الصحابة يعني في قصة هنا. المهم سورة كاملة بيسموها سورة الزخرف، والآية اللي جت فيها كلمة الزخرف آية عجيبة جداً؛ قال الله عز وجل: ﴿وَلَوْلَا أَن يَكُونَ النَّاسُ أُمَّةً وَاحِدَةً لَّجَعَلْنَا لِمَن يَكْفُرُ بِالرَّحْمَٰنِ لِبُيُوتِهِمْ سُقُفًا مِّن فِضَّةٍ وَمَعَارِجَ عَلَيْهَا يَظْهَرُونَ * وَلِبُيُوتِهِمْ أَبْوَابًا وَسُرُرًا عَلَيْهَا يَتَّكِئُونَ * وَزُخْرُفًا وَإِن كُلُّ ذَٰلِكَ لَمَّا مَتَاعُ الْحَيَاةِ الدُّنْيَا وَالْآخِرَةُ عِندَ رَبِّكَ لِلْمُتَّقِينَ﴾ [الزخرف: 33-35].
يعني لجعلنا لمن يكفر بالرحمن لبيوتهم سقفا من فضة وسلالم من فضة وأبواب من فضة وسرر من فضة وسقف من ذهب وسلالم من ذهب وأبواب من ذهب وسرر من ذهب. طب ليه ربنا سبحانه وتعالى ما عملش كده، ما ادتش للكفار الحاجات اللي هي تبهر إبهاراً شديداً؟ لأن المسلمين هيعملوا إيه؟ يكفروا؛ ولولا أن يكون الناس أمة واحدة لجعلنا ذلك. ففكرة يا جماعة الزخرفة الزائدة دي، دي ما هياش أولاً ما هياش شيء مطلوب شرعاً، ثانياً ما هياش علامة رضا ربنا عنك، وبرضه الحقيقة ما هياش علامة سخط ربنا عليك؛ يعني مش لاقي يعني يقولك طب اللي عايش مثلاً في فيلا كده ربنا سخطه، مش كده. ماشي، إنما ما هياش علامة رضا، مش عشان أنا ساكن في فيلا يبقى ربنا راضي عني، اللي ساكن في قصر يبقى ربنا راضي عنه أوي، اللي مش كده، خلاص.
كذلك الآيات التي جاءت فيها الطرف؛ وما أرسلنا في قرية من نذير إلا قال مترفوها إنا بما أرسلتم به كافرون، والآية الثانية: إلا قال مترفوها إنا وجدنا آباءنا على أمة. الطرف مذموم يعني في كل القرآن، الطرف يؤدي إلى الفسق، يؤدي إلى نسيان الرب، يؤدي إلى كفران النعم، يؤدي إلى الكفر بالأنبياء، يؤدي؛ آدي واضح جداً مسألة الطرف.
كذلك جاء في الحديث وهو حديث مهم جداً جداً في هذه المسألة؛ قال صلى الله عليه وسلم: «ما ذئبان جائعان أرسلا في غنم بأفسد لها من حرص المرء على المال والشرف لدينه». هنا في تقديم وتأخير عشان نفهم المسألة؛ ما ذئبان جائعان أرسلا في غنم بأفسد لها من دين المرء من حرصه على المال والشرف.
يعني إيه الكلام ده؟ دلوقتي حد عمره شاف فيديو لذئب داخل على حظيرة فيها غنم أو كده يعني؟ الذئب بيعمل حاجة عجيبة جداً يا جماعة؛ الأسد، الأسد لو فيه قطيع ماشي قدامه من أي حاجة غزلان من أي حاجة، الأسد بيعمل إيه؟ بيركز على فريسة واحدة ويوصل لغاية ما يجيبها، حتى ادخلوا شوفوا فيديوهات كده هتلاقوا الأسد مثلاً القطيع ده الأسد مركز على فريسة بيرروح يجيبها، حتى لو عدى تلاقيه، ودي حاجة عجيبة يعني الناس تبقى مش فاهمة يا عم ما أنت جنبك أهو غزالة تانية ما تاخد اللي جنبك؟ الأسد مش كده، الأسد بيركز على فريسة بعينها ويجري يجيبها، يروح يجيبها؛ ادخلوا على فيديوهات افتراس الأسد لأي حاجة هتلاقوه كده، مش مشوش يعني، مش وأنا بجري لقيت جنبي فخلاص إيه هأحود على الـ، الأسد ما بيعملش كده، يفضل يجري ورا الفريسة اللي مركز فيها. طيب جابها؟ مالوش دعوة بقية القطيع، خلاص دي وجبتي بتاعة النهارة فمالوش دعوة بالـ، الذئب مش كده.
الذئب لو دخل على حظيرة غنم يفرتك الغنم كله، يبهدل الغنم كله؛ مش مثلاً إيه غنمي هتكفيني، وخصوصاً في غياب الراعي، يعني هو آمن من وجود الراعي ولذلك في رواية ثانية: غاب عنها ربها، فالذئب في مأمن من إنه يجي رب الغنم صاحب الغنم ويؤذيه أو يضربه أو يقتله أو كده، يقوم الذئب يعمل إيه؟ ما ياخدش غنماية ويقولك خلاص استكفيت بيها، يدخل يبهدل الغنم كله، صاحب الغنم يرجع يلاقي الغنم كله ميت. طب الذئب فين؟ الذئب فين؟ فص ملح وداب. طب ما أكلش ليه؟ هو أكل. طب يا ابني ما قتلت ليه الباقيين طالما مش عاوزهم؟ هو ده الذئب، دي طبيعة الذئب؛ يفسد الحظيرة كلها.
طب لو كان أسد اللي زار الحظيرة دي؟ هيرجع رب الغنم يلاقي إيه؟ يلاقي الغنم ناقص غنماية بس، الغنم كله موجود، الأسد خد غنماية أكلها وشكراً على كده. فإفساد الذئب لقطيع الغنم إفساد صعب جداً.
إيه بقى اللي يفسد دينك أشد من إفساد الذئب للغنم؟ إيه اللي يفسد دينك؟ قال صلى الله عليه وسلم: «من حرص المرء على المال والشرف». حرصك على المال مفسد لدينك، وحرصك على الشرف، الرفعة والمكانة والمنزلة والرتبة، حرصك على الشرف مفسد لدينك إفساد شديد، أشد من إفساد الذئبين للغنم. إيه ده؟
واحدة عاوزة تتجوز وجالها خاطب كثير الكلام وقلة الأدب بدأت من الأول، يعني ابتدت تشتمه والجدال والقلق مرجحته ومذبذبة، إيه مرجحته دي؟ مرجعيته، بس العين حاء، مرجعيته مذبذبة. هي المهم الصفحة كلها شتيمة، في الآخر انصحني وجزاكم الله خيراً. يعني ممكن يبقى شوية تلاقي ابن كذا وابن كذا، انصحني بقى أعمل إيه؟ يعني مش، طبعاً ده سؤال واحدة مامتها قاعدة وهي مش عاوزة تتجوز الشخص ده.
وعاوزة مامتها تـ عارفين أنتم الحركات دي. هي مش قايلة كلمة عدلة في الورقة، يعني ما بس ابن حلال، ما يعني بس هو طيب، ما فيش حاجة، الورقة كلها شتيمة، انصحني.
اتزوجي.
يبقى حرصك على المال، حرصك على الشرف مفسد لدينك أي إفساد، إفساد عظيم جدا. طب إحنا يا جماعة، مين فينا بيحرص على المال للمال؟ يعني دي نسبة ضئيلة اللي هو بيحب الفلوس عشان الفلوس، مش عشان الفلوس مصدر لأشياء أخرى. حد فاهم أنا بقول إيه؟ يعني معظمنا اللي حريص منا على المال هو حريص على المال لأن المال هأعرف به أجيب الـ الحاجة الفلانية، هأعرف به أكبر الحاجة الفلانية، هأعرف به أسافر المكان الفلاني، معظم الناس كده. نوادر من الناس اللي هي بتحب الفلوس علشان هو عنده بخل شديد وشح شديد لدرجة أنه إيه؟ بيرتاح كده والفلوس تحت السرير. ده نادر من الناس.
فيبقى حرصك على المال هيكون ليه؟ نابع من إيه؟ من حرصك على الترف. ما هو أنت لو ما أنت شـ قلنا لكم قبل كده الله أعلم الحكاية صح ولا غلط، بس يعني رويت إنه الملك فيصل أيام حرب أكتوبر، بيقولوا إنه يعني بقى جاءه مبعوث من أمريكا على إنه يقطع البترول عن قصة كده، فبيحكوا يعني بيقولوا إنه الملك فيصل كان ساعتها كان إيه؟ كانت الحياة هناك بسيطة لسه ما يعني ما بقوش إيه زي دلوقتي، فبيقولوا الملك فيصل قال له إيه؟ قال له إحنا بدو. هناكل تمر ونشرب مية. يعني أنت بتهدده بإيه؟ يعني إيه هيعملوا عليه حظر مش عارف إيه وهيعملوا كده يعني. بيقولوا كده بيقولوا إيه؟ فيصل ساعتها رد عليه قال له إيه؟ إحنا بدو. هناكل تمر ونشرب مية. حد يعرف يقولها دي دلوقتي؟ خلاص ما حد مين لو قلت لك تعرف تعيش شهر تاكل تمر وتشرب مية؟ مش متصور ده يحصل أنت، مع إن غيرك ممكن يكون عاش حياته كده.
الحديث ده يا جماعة له قصة. حديث ما ذئبان جائعان أو ما ذئبان أرسلا في غنم بأفسد لها إلى آخره. له قصة عجيبة وهتدلك على المعنى اللي احنا عاوزينه. في رواية من حديث عاصم ابن عدي قال اشتريت مئة سهم من سهام خيبر. يعني النبي عليه الصلاة والسلام في خيبر غنم شيئًا، فراح اشترى مئة سهم من سهام خيبر. فبلغ ذلك النبي صلى الله عليه وسلم فقال: «ما ذئبان ضاريان في غنم أضاعها ربها بأفسد من طلب المسلم المال والشرف لدينه».
إيه رأيكم بقى في قصة الحديث؟ إن واحد صحابي راح اشترى مئة سهم من سهام خيبر. تعالوا يا جماعة كده نوصف المسألة فقهًا، إنه راح اشترى مئة سهم من سهام خيبر. حرام؟ غايتها عند يعني ممكن بعض الفقهاء يقولك إيه ده مكروه، انما محدش هيقول إنه حرام يعني. ومن الفقهاء اللي هيقولك لا فقها أنا كان في فقه، اللي هيقولك مباح عادي. مسألة بيع وشراء عادي جدا. هنا النبي عليه الصلاة والسلام مربي، وده يا جماعة اللي احنا دايما بنقوله، المسألة مش يعني مينفعش أقولك إيه يا ابني متعملش يقولك وأنت وحرام. هو مش بس حلال وحرام، هتتربى أنت.
هو كون يا جماعة ربنا جعل دائرة الحلال دائرة كبيرة، ده عشان نبرطع في الحلال؟ لا، ده علشان برحمته سبحانه وتعالى لم يرد أن يوقعنا في الإثم. فاهمين الحتة دي؟ برحمته سبحانه وتعالى لم يرد أن يوقعنا في الإثم، فجعل دائرة الحلال كبيرة. وبعدين يرجع هيرجع يقولك النصوص الشرعية لو جمعتها مع بعض هيرجع يقولك إيه؟ سيب شوية من الحلال. أديني اهو بنعترف ده حلال بس سيب شوية، بلاش. سيدنا عمر.
أهيحرم حلالا يعني حد يظن كده؟ في ديانة عمر رضي الله عنه. يحرم حلالا. ضرب ابنه. قاله أوكلما اشتهيت اشتريت؟ ابنه مردش عليه هو حرام يعني أن أشتري لحما مردش عليه كده الولد. مش الولد هذا رجل يعني، أقصد أقول إنه ابنه مردش عليه كده، خلاص فهم القضية. ربي نفسك، مش كل ما تشتهي تعمل اللي أنت اللي نفسك بتدعوه إليه بتدعوك إليه.
يقول ابن رجب طبعا، حديث ما جئ بذبين جائعين ابن رجب شرحه في رسالة، واحنا قرأنا الرسالة دي. احنا ده مش تعظيم احنا يعني أنا والناس يعني، فهتلاقوها على قناة التليجرام إن شاء الله. هتلاقوا ده مش تعظيم أنتوا يعني، أو تعظيم بقى يعني أنتوا طبعا ناس فخمة، فممكن تتسمع بقى، أظن في أربع مجالس أو حاجة موجودة على قناة التليجرام.
ابن رجب له كلام جميل جدًا في الموطن ده، قال: ولو لم يكن في الحرص على المال إلا تضييع العمر الشريف الذي لا قيمة له، يعني يعني لا يقوّم، لا قيمة له مش يعني ما له قيمة. لا. عمرك لا قيمة له يعني غالي جدًا لدرجة ما له ثمن. ده معنى لا قيمة له. فبيقول: ولو لم يكن في الحرص على المال إلا تضييع العمر، إلا تضييع العمر الشريف الذي لا قيمة له، وقد كان يمكن صاحبه، يمكن صاحبه اكتساب الدرجات العليا والنعيم المقيم، فضيعوه الحريص في طلب رزق مضمون مقسوم، لا يأتي منه إلا ما قدر وقسم، ثم لا ينتفع به، بل يتركه لغيره ويرتحل عنه، ويبقى حسابه عليه ونفعه لغيره، فيجمع لمن لا يحمده، ويقدم على من لا يعذره، جل وعلا. لكفى بذلك ذمًا للحرص. واضح كلام ابن رجب.
الحريص ده لو ما فيش في حرصك على المال، على الدنيا، على الترف، على الرفاهية، إلا أنك بتضيع عمرك، وعمرك ده لو دريت، فهو ثروة. ثروة ده يعني فعلًا ثروة يا جماعة، تكلمنا قبل كده على مسألة تكلفة الفرصة البديلة. يعني إيه تكلفة الفرصة البديلة؟ عشان لو احنا لو حسبنا عمرنا بالشكل ده هتفهم. أنت الدقيقة اللي بيقعد يسكرول بالعشر ساعات ده، عشر ساعات مش متصلة يعني بس في الأربع وعشرين ساعة تلاقيه بيسكرول عشر ساعات على الفيسبوك ولا على الانستجرام ولا تيك توك ولا كذا ولا كذا، الدقيقة ثمنها قد إيه؟
تكلمنا قبل كده في تكلفة الفرصة البديلة، نقولها بسرعة عشان مهمة إن إحنا نقوم عمرنا بالشكل ده. دلوقتي يا جماعة لو جيت قلت لك جيت قلت لي الجهاز ده بكم؟ قلت لك بألف جنيه. فالناس العادية الطيبة اللي زينا يقولوا ده ثمن الجهاز ألف جنيه. بتوع الاقتصاد بقى ما يقولوش كده، بتوع الاقتصاد ما عندهم نظرة أخرى شوية لثمن التليفون. إيه بقى؟ بتوع الاقتصاد يقولك إحنا والله عندنا حاجة اسمها تكلفة الفرصة البديلة. آه اللي هي إيه؟ هيقولك والله طب جيت أنت معاك الألف جنيه اشتريت التليفون، يقوم ييجي الاقتصادي عشان يقولك ثمن التليفون إيه؟ يقولك بقولك إيه؟ هو أنت الألف جنيه دي لو ما كنتش جبت التليفون كنت هتعمل بيها إيه؟ فتجوله والله أنا كنت محتار، الألف جنيه دي يا هجيب بيها التليفون، يا في كورس مثلًا هيفيدني في الحتة الفلانية كنت أروح آخده بالألف جنيه. فالاقتصادي يقولك ثمن التليفون الكورس. مش الألف جنيه. حد فاهم ده؟ دي الفرصة البديلة. اللي هو لو ما كنتش جبت التليفون كنت هتروح تاخد الكورس. فثمن التليفون هو الكورس، مش الألف جنيه اللي أنت دفعتها. خلاص؟
طيب. نعقد المسألة شوية. رحت تتفرج على حاجة. ماتش مثلًا في الاستاد ولا فالتذكرة مثلًا بـ ما أعرفش التذكرة بـ بـ 500 جنيه مثلًا يعني. فالاقتصادي هييجي يقولك تكلفة الفرصة البديلة هو اللي كنت هتعمله بالإيه؟ لأ. يقولك تكلفة الفرصة البديلة اللي كنت هتعمله بـ 500 جنيه واللي كنت هتعمله في وقت الماتش. يعني الماتش لو خد منك ساعة ونص وبقليها قاعد عشر ساعات في الاستاد عشان تلحق مكان فبنتكلم في حداشتاشر ساعة ونص، لو ما كنتش جيت الماتش كنت هتعمل إيه؟ فطبعًا كنت هعمل واحد اتنين ده كنت هروح الشغل، كنت هزور أرحامي، كنت هعمل كذا. فأنت ما عملتش ده كله لإنك جيت الماتش. فيقول لك ثمن الماتش اللي أنت كنت هتعمله في وقت الماتش زائد اللي كنت هتعمله بالـ500 جنيه دول. دي تكلفة الفرصة البديلة.
تعالوا كده بقى نرجع لوقتنا. فلما أجي أقول لك مش العشر ساعات اللي عملت فيهم سكرولينج على الـ لا، الدقيقة اللي أنت ضيعتها في كذا دي، لو كنت قلت فيها مثلًا سبحان الله وبحمده، كان هيحصل إيه؟ مش كدة؟ طب دي خدت منك قد إيه؟ عشر ثواني. سبحان الله وبحمده عشر ثواني. ففي الدقيقة هتقولها كام مرة؟ ست مرات. فليك كام نخلة؟ ست نخلات في الجنة.
فتكلفة الفرصة البديلة اللي عملته في الدقيقة دي، اللي رحت أنت عملته في الدقيقة دي تكلفته إنك ضيعت ست نخلات في الجنة. جلسة الشروق على الحديث اللي فيها، أجري إيه؟ حجة وعمرة تامة تامة تامة. فأنت طلعت نمت، طلعت عملت أي حاجة تانية. بقانون تكلفة الفرصة البديلة فنقول لك ثمن النومة دي أجر حجة وعمرة تامة تامة تامة.
فلو نظرنا لأوقاتنا، عشان كده يا جماعة السلف كانوا كده يقول لك إيه؟ عمرك لا قيمة له. تقول أنا يا ابني عمري. متشكر جدًا والله، لا هو مش عمري، إحنا عمرنا مالهوش لازمة اللي إحنا بنعمله ده. إنما لو فهمنا معنى العمر، فهمنا معنى الدقيقة والثانية، لو فهمنا ده هنعرف إنه فعلًا لا قيمة له. ده غالي جدًا.
طيب. فاتت قد إيه كده؟ ساعة ونصف. طيب، فاتت ساعة نبتدي الدرس بقى. خلونا إيه ناخد شوية مواطن كده من شرح منظومة الآداب للحجاوي. هنكلم عن مسألتين، مسألة اللباس الملبوسات يعني ومسألة الأكل والشرب. فخلونا ناخد كده يقول الحجاوي: اعلم أن كثرة الأكل شؤم. احنا دلوقتي يا جماعة عشان نبقى إيه قليل الدنيا يكفي. قليل الدنيا في إيه؟ أهم حاجة الأربع حاجات اللي احنا قلناهم، مسكن، ملبس، مأكل، مشرب. خلاص؟
فيقول اعلم أن كثرة الأكل شؤم، وأنه ينبغي النفرة عمن عرف بذلك. يعني اللي اتعرف عنه إنه بياكل كتير الناس المفروض تنفر عنه ما تقعدش معاه. مين بياكل كتير؟ طب هو إيه مقياس الكتير والقليل؟ قالوا إيه؟ الرجل يأكل الأكلة، فقال لهم طعام المتقين. قالوا له طيب الرجل يأكل أكلتين، قال طعام المؤمنين. قالوا الرجل يأكل ثلاثة ثلاث مرات، قال قولوا لأهله يبنوا له معلفًا. ده مش بني آدم، ده يقعد في المعلف. طبعًا احنا ثلاث مرات ونقنق في النص ونفتح الثلاجة ونشرب.
اعلم أن كثرة الأكل شؤم، وأنه ينبغي النفرة عمن عرف بذلك واشتهر به واتخذه عادة. احنا دلوقتي الناس بتفتخر، يقول لك فود بلوجر. داير يأكل هنا ويشرب هنا ويعمل هنا. حد فود بلوجر هنا عشان بس الناس أنا بحبهم وكل حاجة يعني و هيقطعوا لي بقى حتة وينزلوها ويقولك.
قال ولهذا روى أو ولهذا روى مسلم عن نافع قال: رأى ابن عمر مسكينا فجعل يضع بين يديه يعني عمال يحطله أكل يعني ويضع بين يديه زود، فجعل يأكل كثيرا فقال: لا يدخلن هذا علي، يعني عمله كمين وبعدين وقعه في كده راجل مسكين قاعد يحطله أكل فالتاني عمال يأكل بنهم يعني بشراهة فقال: لا يدخل هذا علي، ما يدخلش علي تاني، فإني سمعت رسول الله صلى الله عليه وسلم يقول: «المؤمن يأكل في معى واحد والكافر يأكل في سبعة أمعاء». وقال صلى الله عليه وسلم: «ما ملأ ابن آدم وعاء شرا من بطنه».
وذكر ابن عبد البر وغيره أن عمر رضي الله عنه خطب يوما فقال: إياكم والبطنة تملأ بطنك أكل، إياكم والبطنة فإنها مكسلة عن الصلاة مؤذية للجسم، وعليكم بالقصد في قوتكم، الاقتصاد يعني متوسط، فإنه أبعد من الأشر وأصح للبدن وأقوى على العبادة، وإن امرأ لن يهلك حتى يؤثر شهوته على دينه.
خذوها دي قاعدة بقى يعني ممكن ناخد كلمة عمر رضي الله عنه الأخيرة دي قاعدة وإن امرأ لن يهلك حتى يؤثر شهوته على دينه. خطيرة جدا الكلمة دي يا جماعة. إحنا ماشيين في حياتنا دايما المؤثر عندنا هو الشهوة، بلاش دايما عشان ما أبقاش يعني بس غالب الوقت بيبقى كده غالب الوقت. يعني في منا ناس هي علاقته بالدين حتى لو شكله متدين ولا شكلها متدينة، علاقته بالدين في اليوم الخمس صلوات. وده يعني ده كويس ده أحسن من اللي ما بيصليش طبعًا. بس هو ده دينك في اليوم الأربع وعشرين ساعة هم الخمس فرائض؟ طب بقية اليوم؟ شهوات، غفلات، إيثار للشهوة. وإن امرئًا لن يهلك حتى يؤثر شهوته على دينه. وقال الفضيل بن عياض: ثنتان تقسيان القلب، كثرة الكلام وكثرة الأكل.
وقلنا لكم قبل كده إني علماء السلوك والتربية بنوا مذهبهم على أربع كلمات. أربع حاجات بنقللهم. حد يعرفهم؟ هاه؟ بسرعة الناس المفروض تبقى عارفة بقى. قول. الأكل الطعام؟ هاه؟ الأكل الطعام والـ والـ إيه تاني؟ والفود.
يبقى قلة الكلام. قلة الطعام. قلة الأنام. قلة المنام. أربع حاجات أهم. ماشي؟ قلة الكلام. قلة الطعام.
قلة الأنام، يعني الخلوة؛ تقعد لوحدك، ما تختلطش بالناس كتير، وقلة المنام. على هذه الأربعة بنوا مذهبهم في التربية وتهذيب النفس. وطبعًا كل واحدة من دول لها أدلة من الشرع.
قال الفضيل: «ثنتان تقسيان القلب: كثرة الكلام وكثرة الأكل». يبقى اللي بيقول لك: مش عارف يا شيخ ورمضان دخل وخرج وصليت وكنت بورا حد صوته حلو، ألاقي الناس بتعيط وأنا ما بعيطش. مين المعاني؟ مين المعاني؟ إيه إيه إيه معاني قسوة القلب؟ هي كثرة الطعام، أنت داببها على الفطار يا ابني.
يقول لك إيه: أما شفت رؤية النهار ده في الركعة الثالثة. إنما تمام، يسجد ينام هو خلاص، أنت مش ليه داببها على الفطار؟ دابة الدم كله في المعدة ما فيش حاجة في المخ خلاص.
وقال لقمان لابنه: «يا بني، لا تأكل شيئا على شبع، فإنك لو تركته للكلب خير لك من أن تأكله»، يعني خلاص شبعت خلاص فسيب الأكل ده.
وقال الشيخ تقي الدين، يعني ابن تيمية -لأن يعني إحنا عاوزين نعدي بقى لنا الوقت-: قال ابن هبيرة: «لا ينبغي أن يتناول فوق حاجته؛ لأنه قوته وقوت غيره، فإذا أكل فوق حاجته فيكون قد ظلم غيره بمقدار التفاوت»، يعني كل اللي تقدر عليه.
طب حصل أزمة زي ما حصل أيام شفنا إحنا أيام الثورة ولا في وقت كورونا ولا أي أزمة كبيرة بيحصل فيها شوية إيه تضييق على الناس في الأقوات وكذا وكذا، تلاقي الناس يحصل لها حاجة شوية والظاهرة دي معروفة، يعني معروفة، إن هو إيه عاوز يحصل كمية كبيرة. طب يا عم خلاص أنت رزقك جاي لك جاي، يعني يعني البطاطساية دي ولا الطماطماية دي لو مكتوبة لك والله لو العالم كله وقف لك فيها ما هيأكلها غيرك. إهدأ شوية، إهدأ. طب ليه تهدأ؟ علشان أنت بتضيق على غيرك أقواتهم.
الحقيقة هو اتكلم في فصل مهم جداً على مسألة إنك تقلل الأكل قوي وإنك تزود الأكل قوي والحد المتوسط، وكان المفروض نقرأه. بس خلونا يعني إيه نتجاوزه.
إيه طبعاً إحنا شرح الحجاوي على على منظومة الآداب بفضل الله إحنا برضه خلصان كله موجود على التليجرام. فالكلام ده وغيره يعني هو طبعاً أبواب كتير من أبواب الأدب موجودة في هذا الكتاب العظيم هتلاقوها برضه على قناة التليجرام. خلاص؟
من المواطن في منظومة الآداب أن قال الناظم اللي هو ابن عبد القوي: وسر حافياً أو حاذياً وامشي واركبن تسدد وفي نسخ تمعدد تسدد واخشوشن ولا تتعودي. يبقى وسر حافياً أو حاذياً، يعني امشي حافي وامشي منتعلاً لابس حذاء. وسر حافياً أو حاذياً، قال الحجاوي: جملة ذلك أن خير خلال الإنسان التوسط؛ التوسط في الأمور، فلا تتنعم كل التنعم ولا تتقشف كل التقشف، فتمشي أحياناً حافياً وأحياناً منتعلاً.
وقيل لفضالة بن عبيد لما كان أميراً بمصر، قال له بعض أصحابه: لا أرى عليك حذاءً! أمير ماشي حافي؟ قال: كان صلى الله عليه وسلم يأمرنا أن نحتفي أحياناً. وروي هذا المعنى عن عمر، ويمشي أحياناً ويركب أحياناً.
يبقى هو بيقول إيه؟ وسر حافياً أو حاذياً وامشي واركبن. العربية تحت البيت مش هركبها، هنزل أمشي. ليه؟ أتعود بالذات لو مشوار قريب، قريب ده مش لازم يعني خطوتين، لا، همشي ساعة إلا ربع، إيه يعني؟ اتعود على كده إنك تعرف تعمل ده. تقوم العربية ما بقتش موجودة، العربية موجودة ومفيش بنزين في البنزينات، العربية موجودة وفي بنزين أنا اللي ما معيش فلوس أحط بنزين، أي حاجة، أنا عادي بمشي، بعرف أمشي، متعود أمشي، بعرف أركب مواصلات، متعود أركب مواصلات. ويسير حافياً أو حاذياً وأمشي وأركبن.
قال: ويمشي أحياناً ويركب أحياناً لفعله عليه السلام، يعني هكذا كان يفعل سيد الناس صلى الله عليه وسلم. أنت مين أنت بقى؟ أنا المدير الفلاني أمشي؟ اه تمشي، اه تمشي. أركب مواصلات؟ اه تركب. أنت مين يعني؟ سيد الناس صلى الله عليه وسلم كان يمشي عادي جداً.
سيدنا أبو هريرة برضه كان أمير في وقت. وبعدين الناس ماشية لقوه واحد، صوت إيه؟ افسح للأمير. قالوا: بس الحرس بقى وبتاع، وبيدوروا لقوا مين اللي بيقولهم افسح للأمير؟ أبو هريرة، وشايل إيه؟ شوال دقيق على كتفه، والشوال مخروم عمال ينزل عليه دقيق، فهو إيه ماشي بيقطر من الدقيق، هو عاوز يلحق يوصل البيت عشان إيه الدقيق ما يخلصش اللي عمال يقع ده، افسح للأمير، رضي الله عنه.
يعني عادي، ناس عادي خالص يبقى أمير وتكون دي حالته. فإحنا إحنا مين يعني؟ ولا حاجة.
قال وفي مسند أبي عوانة وغيره بإسناد صحيح عن عمر، قال: «وإياكم والتنعم وزي الأعاجم» إلى آخره.
وروى الطبراني في المعجم عن أبي حدرد الأسلمي مرفوعاً: «تمعددوا واخشوشنوا». تمعددوا طبعًا نسبة إلى معد بن عدنان أظن أو حاجة ودي يعني كانت معروفة في العرب إنهم كانوا أشداء وأقوياء وعندهم خشونة ويعني شظف العيش وكده. واخشوشنوا يعني خليكو خشنين شوية، مش كل حاجة منعمين مترفين، واخشوشنوا. طبعًا جاء في بعض الروايات: «فإن النعمة لا تدوم». فأنت لما تخشوشن، تقوم النعمة ما تبقاش موجودة عادي، أنا متعود على الخشونة ومتعود على هذا المستوى، عادي، ماشي.
وعن حذيفة مرفوعاً: «اقتدوا باللذين من بعدي أبو بكر وعمر -أو أبي بكر وعمر تمشي كده وتمشي كده- واهتدوا بهدي عمار وتمسكوا بعهد عبد الله بن مسعود». قلت: ما هدي عمار؟ قال: التقشف والتشمير. يبقى سيدنا النبي يقول إيه صلى الله عليه وسلم: «تمسكوا بهدي عمار». فقالوا: طب إيه هدي عمار؟ قال: التقشف. ده هدي عمار التقشف والتشمير. طبعًا التقشف هنا مش يعني الناحية التانية اللي هو يعني لا التوسط برضه.
طيب، قال الناظم: ومن يرتضي أدنى لباس تواضعاً سيكسى الثياب العبقريات في غدي. وإحنا جايبين الموطن ده يا جماعة من منظومة الأدب عشان المعنى اللي بنقوله: إنك معاك فلوس تعمل بيها اللي ما تعملش ومش هعمل اللي ما تعملش، هترتضي أدنى الثياب أو أدنى اللباس تواضعاً. قال: «ومن يرتضي أدنى اللباس تواضعاً سيكسى ثياب العبقريات في غدي».
قال الحجاوي: يسن التواضع في اللباس، لقول النبي صلى الله عليه وسلم: «من ترك أن يلبس صالح الثياب وهو يقدر عليه تواضعاً لله، دعاه الله على رؤوس الخلائق حتى يخيره من حلل الإيمان أيتهن شاء». اللفظ اللي إحنا عاوزين نقف عليه في الحديث: «وهو يقدر عليه». يبقى فكرة يا جماعة إن أنا أقدر أعمل ده مش معناها إني أعمل ده، أقدر أعمل ده ومش هعمل ده، أقدر آكل كويس ومش آكل كويس، أقدر ألبس أحسن من كده ومش هلبس أحسن من كده. خلاص؟ ليه؟ تواضعاً لله، تربيةً للنفس، تهذيباً للأخلاق، إخشوشاناً علشان لما الحال يميل أعرف أعيش، ما أكتئبش، في معاني كتير تخليني أعمل ده.
قال: «وعن رجل من أبناء أصحاب رسول الله صلى الله عليه وسلم عن أبيه قال: قال رسول الله صلى الله عليه وسلم: من ترك لبس ثوب جمال وهو يقدر عليه تواضعاً كساه الله حلة الكرامة». نفس المعنى.
قال الحجاوي: ولا بد في ذلك أن يكون لله لا لعجب ولا لشهرة. تقول: إيه ده؟ عجب وشهرة إزاي؟ نقول لك: آه، ما هو ممكن واحد يبقى معجب بنفسه لما يلبس البراند، واحد تاني يعجب بنفسه لما يلبس الثياب المتواضع فيتقال إيه: شفتوا الشيخ الفلاني الزاهد اللي ما لوش دعوة بالدنيا! فده ممكن برضه تمشي إيه عجب، ويبقى مشهور بأنه الشيخ الزاهد المتواضع اللي كذا. لا، لابد أن يكون ذلك لله.
قال الحسن: إن قوماً جعلوا خشوعهم في لباسهم، وكبرهم في صدورهم، وشهروا أنفسهم بلباس الصوف، حتى إن أحدهم بما يلبس من الصوف أعظم كبراً من صاحب المطرف بمطرفه. يعني واحد من اللي بيلبسوا ثياب متواضعة جداً متكبر كبر أعظم من اللي بيلبس البراندات، فلازم الإنسان يراعي هذه المسألة ويراقب قلبه في مثل هذا.
إيه، عندي سؤال: إزاي الصحابة كانوا يأكلون قليل من الطعام وكانوا أقوياء في الجسم وكثيرون العضلات؟ دلوقتي الواحد لو ما أكلش كتير مش هيعمل فورمة! مين اللي بعت السؤال؟
يعني تصور الصحابة إن كلهم كانوا مفتول العضلات وكده، ما هماش كلهم كانوا كده. من سيدنا ابن مسعود، إيه يعني جه في الحديث إنه كان إيه الساقين بتوعه رفيعين وبعدين تساوكتان، طلع الشجرة أو النخلة الريح جت هز كان هيطير، وبعدين ابتدى الصحابة يعني إيه يضحكوا من دقة ساقيه. فقال لي سيدنا النبي صلى الله عليه وسلم: «أتعجبون من دقة ساقيه؟ لهما في الميزان عند الله أثقل من أحد». الساقين دول هيجوا يوم القيامة يتحطوا في الميزان، حد شاف جبل أحد عامل إزاي؟ جبل أحد ده مش جبل يعني مش هو نازل كده، جبل أحد ده يعني يتمشى يعني مسافة ويتحط أحد، تلاقي الساقين دول أثقل من أحد بالإيمان، ده أول معنى.
المعنى الثاني: فكرة العضلات ما هياش مرتبطة قوي، أو يعني خلينا سيبكم من الفورمة من كلمة فورمة دي. إحنا نديكم بقى درس شوية في الجيم والوظيفة بتاعة العضلات، يعني مش مهم عشان الوقت، خلونا بس يعني إيه باختصار كده يا جماعة إن العضلات مش بنتكلم عن فورمة، بنتكلم عن قوة تحمل وإنك تعرف تؤدي المهام، ده ليه علاقة أكثر بنمط حياتك.
يعني إيه؟ لو رحت للبنا اللي بيشيل الطوب ويطلع بيه العشر أدوار على مثلاً على كتفه ولا كده، تلاقي عنده قوة تحمل قوية جداً يمكن أكثر من اللي في الجيم اللي هو عنده بقى عضلات ومجانص وبتاع وترابيسه، هو ده نمط حياته، هو عايش حياة كلها قسوة وكلها شدة وكلها، فعنده التحمل ده، ماشي؟
واحد صعيدي قابلني في مسجد في مصر الجديدة، فهو أول ما شافني فرح وجه: أنت الشيخ أمجد؟ قلت له: اه، فراح سلم علي عصر إيدي عصرة، يعني كنت عاوز أقول له أرجوك يعني هصوت، خلاص، هو ده سلامه العادي، يعني الراجل ما عملش حاجة، يعني هو ده سلامه الطبيعي، يعني.
فده برضه حياة الصحابة كانت فيها شدة وفيها قسوة، إحنا حياتنا مرفهة، إحنا متدلعين، تطلع بالأسنسير وتنزل بالأسنسير وتلاقي العربية تحت بيتك، ولا المواصلة حتى لو هتركب مواصلة من قدام الـ، وبعدين كل حياتنا كلها دلع، اللي هو أكثر واحد فينا شقيان لو رجعنا لأيام الصحابة حياته دلع.
قلنا لكم قبل كده، جيش طالع يحارب فالنبي عليه الصلاة والسلام بيديهم التعيين بتاعهم في طول الحرب، يطلع تعيين البني آدم إيه في الجيش؟ في اليوم تمرة، في اليوم تمرة. يعني هم لو هيقعدوا 30 يوم، كل واحد من الجيش كل عسكري ليه 30 تمرة. الصحابي يا عيني مش هيعمل إيه بالتمراية؟ يقعد يمص فيها، ما يرفع ياكلها خلاص خلصت، بقى يقعد يمص فيها طول اليوم ويأكلها في آخر اليوم تقويه على الـ، فهي حياتهم كانت صعبة، فجسمهم كان فيه شوية تحمل يعني، ماشي؟
وبعدين بقى: يا شيخ، أنا جوزي على طول بيقول: أنا عايز أتجوز، طول الوقت، هو بيهزر مش من قلبه. مين قال لك؟ طلعتي على قلبه؟ إحنا أسرة بسيطة وعندي ولد وبنت وعايشين ومبسوطين، إيه ده؟ مش فاهم السؤال، عايزة أرد على إيه؟ إنكم عايشين ولا إنكم مبسوطين؟
إيه رأيكم في السؤال اللي فات ده؟ نقول لها إيه؟ خليه يتجوز، خليه يتجوز، من حقه، هو قاعد طيب ما احنا هنتكلم وهو لو موجود ما ننصحه، بيننا وبينه، إنما..
ما العمل في هذا الجيل الذي لا يسمع ولا يعقل ويتبع هواه، وافتقارهم احتقارهم للبر وخاصةً الأم؟ الأم بتحتقر البر يعني؟ ما بتبرش أولادها؟ الابن هو اللي بيحتقر الأم؟ قلة أدب وسفالة! هو مين اللي مربيه؟ ها؟ الأم.
أنا ما بهزرش دلوقتي، الجيل اللي طالع دول أولادنا، أولادنا يعني الجيل بتاعنا إحنا، يعني أنا دلوقتي في الأربعينات واللي في الخمسينات، فالشباب اللي 18 و19 و20 و25 دول أولادنا، فلو هما مش متربيين يبقى إحنا اللي ما عرفناش نربي، كنا فين إحنا بقى؟ كنا فين؟ كنا في الدنيا، مش كده؟ يبقى من الحاجات اللي الدنيا شغلتنا عنها إن إحنا نربي عيالنا، فكنا محتاجين نسيب شوية من الدنيا عشان نقعد نعرف نربي الأولاد من وهما صغيرين.
فالأب اللي لما أجي أقوله: أنت كنت يعني إيه مدى أو إيه الوقت اللي بتقعده مع عيالك وهما صغيرين؟ ما غالبًا مش هتلاقي، أنا جاي تعبان، أنا مش عارف أنا 12 ساعة في الشغل، أنا يا دوبك هألحق أخلص وأنزل الشغل الثاني، أنا.. طب ابنك عاوزك، بنتك عاوزاك، هو في دماغه: وأنا بعمل ده كله لمين؟ وصدق، يعني ممكن الأب ده فعلاً فعلاً تلاقيه هو نفسه لا بيتمتع بقرش ولا بيجيب حاجة لنفسه ولا ممكن يبقى كده فعلاً، إنما هو أغفل عن جزء كبير.
فبعد عشر سنوات وخمس عشرة سنة وعشرين سنة طلع الجيل ده التعبان ده، اللي هو على الكلام يعني أنا مبسوط بيكم أنتم زي الفل، إنما هي بتقول يعني بتقول إنه إيه جيل مش متربي وقليل الأدب. فإحنا الظاهر إن إحنا اللي أخفقنا في التربية. يظهر هذا. ليه؟ لإن ما كانش عندنا أولويات، وما حدش نبهنا إن ده أهم من تحصيل المال اللي هو بيه بنعمل الرفاهيات.
يظهر كده، والنصيحة للشباب إنها تروحوا النار، هتروحوا في داهية. فارجعوا لربنا، ومش ومحدش يمسك بقى الشماعة ويقولك ما أنتم اللي مربتوش، الشيخ قال إن أنتم مربتوش، مفيش كده. هتجوا يوم القيامة أنتم مكلفين، أنتم مكلفين. فتمسك لسانك عن أمك، ربنا قال فلا تقل لهما إيه بقى؟ منك لله، ده أنت مفترية، ده أنت ظال- أبدًا. فلا تقل لهما أف. حرفين.
أ دي خطيرة جدا، فأمك ما تفتكرش إن عشان هي مثلًا واحدة ضعيفة ولا واحدة من شدة حبها ليك مش هت- شفتوا الفيديو اللي نزل من فترة؟ الولد اللي رافع السكينة على أمه ولا المطوة؟ وجارته مصورته وراحت قدمت بلاغ. أمه راحت رايحة متنازلة عن المحضر. ولد بلطجي بتاع مخدرات، وعاوز فلوس ورافع عليها السكينة في مدخل العمارة، فجارته راحت مصورة وراحت قدمت بلاغ، أمه راحت اتنازلت عن البلاغ، ابني يطلع ما يتسجنش.
فقلب الأم هنعمل فيه إيه؟ هو قلب الأم كده، مهما الابن يعمل بتحبه وما تقدرش تشوف فيه حاجة وحشة. تقوم أنت تستغل ده بقلة أدبك وعجرفتك وتشوح وتزعق وتبرطن. هتروح من ربنا فين بقى؟ فتاخدوا بالكم لأن ده من أكبر الكبائر، حقوق الوالدين.
حكم القزع حرام ولا مكروه؟ الإمام الشافعي بيقول مكروه، طب أنت عاوز إيه مني؟ هنا في مسألتين؛ إيه هو القزع؟ وحكم القزع. إيه هو القزع؟ القزع مش اللي الناس بتعمله دلوقتي اللي هو الشباب، يحلق مثلا بالمكنة على اثنين أو على ثلاثة في الجنب، وبعدين يسيب بقية شعره، ده مش قزع أصلا، ده مش قزع. خلاص كده؟
اللي يقول إن ده القزع لأ غلط، ده مش القزع. القزع هو حلق بعض الرأس وترك البعض، الحلق يعني بالموس. الاثنين والثلاثة ده تقصير مش حلق، فالحلق يعني بالموس. فييبقى اللي مشهور عند الشباب دلوقتي ده مش قزع أصلا، ماشي؟ فده يخرج أصلا عن كلامنا.
ممكن يدخل في مسألة أخرى، وهي إنه لو حلقة بعينها بقت شعار لفئة معينة من الفساق أو الفجار أو الكفار أو كده، قد ينهى عنها من هذا الوجه، إنما ما نقولش إن ده القزع. فييبقى ما تعملوش، مفهومة دي؟ يبقى ده مش القزع.
وبهذه المقدمة أظن إحنا مش محتاجين بقى نعرف حكم القزع. مين فينا بيحلق بالموس حته ويسيب كتير؟ لأ ما فيش ده. بالموس؟ معقولة؟ ده يبقى شكله إيه ده؟ غريبة جدا. ماشي، لو يعني ده بيحصل، تحلق بالموس وتسيب بقية الرأس، فجمهور وأهل العلم أن القزع مكروه وليس حراما.
يبقى نعمله مش كده؟ نعمل يعني حاجة ربنا بيكرهها؟ الأول يعني إيه مكروه يا جماعة؟ لو عملته لا تأثم، ما تاخدش ذنب، ولو تركته لله تثاب، ده معنى مكروه. طب أنت عرفت أن هذا الشيء يكرهه ربك جل وعلا، لكن رحمة بنا برضه خلى في دائرة اسمها دائرة المكروه، دي ما تاخدش ذنب لو عملتها، لكن بيشجعك أنك تتركها له جل وعلا لتثاب.
تقوم رايح عمله؟ لا ما تروحش عمله، طب لو عملته ما يجيش حد يقولك ده حرام عليك. وجمهور وأهل العلم على أن القزع مكروه وليس حراما. مش عارف الزيرو ده زي الموس ولا إيه مش عارف؟ سالب واحد إزاي يعني؟ هنشيل الجلد هنبين المخ! سالب واحد يعني؟
قولي هذا وأستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك. السلام عليكم ورحمة الله وبركاته.
الشيخ أمجد سمير