بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله.
اللهم صل على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم إنك حميد مجيد.
أما بعد:
الليلة ليلة مباركة، ونستقبل يوماً مباركاً. الليلة ليلة سبع عشرة من رمضان على رؤية بعض بلاد المسلمين، وهي ليلة كان صبيحتها غزوة بدر، وغدا هو يوم الفرقان كما أسماه الله عز وجل في كتابه. فنريد أن نجتهد جداً في هذه الليلة، نخلص الدرس ونطلع على الصلاة، ما حدش ينام الليلة دي خالص. هذه الليلة، في قول بعض أهل العلم، بل في قول بعض الصحابة، إن ليلة القدر تطلب في هذه الليلة، فهي ليلة مباركة من هذه الحيثية، فمش عاوزين حد يضيع الليلة دي خالص، نخلص الدرس ونطلع على طول نحيي تلك الليلة، وغدا كذلك؛ لأن الليلة دي سبع عشرة في بلاد وبكرة سبع عشرة عندنا. فمن أراد أن يحرز ليلة القدر بيقين، يحيي هذه الليالي المباركة، بخلاف بقى العشر الأواخر طبعاً، يعني طبعاً قول جمهور أهل العلم خلاص إن هي في العشر الأواخر، لكن احنا بنتمسح في أي قول يكون له وجه وله قوة لنعمل به. خلاص، فهذا من الأقوال التي لها قوة.
طبعاً العلماء اختلفوا في ليلة القدر على كم قول؟ ستة وأربعون قولاً. فاضيين نقولهم ولا نبتدي الدرس؟ ابن رجب ذكر ستة وأربعين قولاً لأهل العلم في ليلة القدر، فنحن نتلمس الأقوال القوية في تحديد ليلة القدر، ونطلب تلك الليلة في مظانها، الليلة وغدا من مظان ليلة القدر.
هذه واحدة. ثانية: إن احنا الدنيا أحوالها مش مستقرة زي ما احنا شايفين، والأحداث تتسارع بالسين يعني بسرعة، ماشية بسرعة، وهذا وقت الإخبات، ووقت الابتهال، ووقت التوبة، ووقت الاستغفار، ووقت القيام بين ييدي الله عز وجل، وكان صلى الله عليه وسلم إذا حزبه أمر فزع إلى الصلاة. فهذه حيثية أخرى تجعلنا لا نفرط في تلك الليلة، ولا نضيع ولو جزءاً يسيراً منها. النهاردة وبكرة -طبعاً اللي هيتفرج بقى على الفيديو مش عارف هينزل إمتى، أنا بتكلم النهاردة اللي هو احنا صابحين الجمعة يعني، ودي حاجة تثبت إن احنا صابحين سبع عشرة وجمعة- اللي هو بالضبط مطابق لإيه؟ إيه غزوة بدر؟ غزوة بدر كانت يوم سبع عشرة رمضان وكانت يوم جمعة، فهذه الليلة لا يفرط فيها.
طيب، وما نتخانقش مع حد الليلة دي، يعني هنقول احنا بنقيم الليلة دي ونهتم بيها ومش هننام ونطلب فيها ليلة القدر، هيطلع يقول لك بدعة وأنتوا ناس ضلالية ومش فاهمين دين، نقول لهم إيه؟ ولا نقول أي حاجة، لا تمام، ولا أنتوا صح، ولا نعمل أي حاجة، نروح نصلي لربنا وندعي ربنا يهدينا كلنا، احنا وهم كلنا نهدى يعني. احنا كلنا محتاجين الهداية، فمش عاوزين أي خناقات تحصل لا في دي ولا في غيرها، احنا ده هيجي بقى في الدرس بتاعنا إن شاء الله.
درسنا النهارده يوم الفرقان، وهو تاملات في سورة الأنفال، غزوة بدر زي ما قلنا وهي يوم الفرقان، كانت يوم سبع عشرة رمضان، يوم جمعة. وغزوة بدر زيها زي أي غزوة، زيها زي أي حدث في الدنيا بيكون له أسباب ووقائع ونتائج، أي حدث في الدنيا كده: سبب الحدث إيه؟ طب الواقعة نفسها، يلا أحكيها لي. طب إيه نتائج الواقعة دي؟ يلا قولها لي. لو أنا اديت المايك لأي واحد من اللي قاعدين دلوقتي قلت له أحكي لنا غزوة بدر أو أي حدث، هل هيتطرق لذهنه أنه يحكيه بخلاف هذا الترتيب؟
ها يا جماعة، الترتيب الطبيعي أي واحد عاوز يحكي غزوة بدر يقول لك إيه: والله أسباب الغزوة واحد، اتنين، تلاتة، أربعة، وبعدين وقائع الغزوة واحد، اتنين، تلاتة، أربعة، وبعدين نتائج الغزوة واحد، اتنين، تلاتة، أربعة. ده الترتيب الطبيعي أي بني آدم يفكر فيه.
الأنفال، اللي هي الغنائم، لو هنسكنها في واحدة من الثلاثة دول، تبقى فين؟ في النتائج، صح؟ يعني الغزوة خلصت، في أنفال. بقى نفاجأ أن السورة اللي بتتكلم عن غزوة بدر، وهي سورة الأنفال، أول آية فيها بتتكلم عن الأنفال: ﴿يَسْأَلُونَكَ عَنِ الْأَنْفَالِ قُلِ الْأَنْفَالُ لِلَّهِ وَالرَّسُولِ فَاتَّقُوا اللَّهَ وَأَصْلِحُوا ذَاتَ بَيْنِكُمْ وَأَطِيعُوا اللَّهَ وَرَسُولَهُ إِنْ كُنْتُمْ مُؤْمِنِينَ﴾ [الأنفال: 1]. وبعدين شوية آيات فيها صفات المؤمنين، وبعدين نبتدي نتكلم عن أسباب الغزوة ووقائع الغزوة: ﴿كَمَا أَخْرَجَكَ رَبُّكَ مِنْ بَيْتِكَ بِالْحَقِّ وَإِنَّ فَرِيقًا مِنَ الْمُؤْمِنِينَ لَكَارِهُونَ * يُجَادِلُونَكَ فِي الْحَقِّ بَعْدَمَا تَبَيَّنَ كَأَنَّمَا يُسَاقُونَ إِلَى الْمَوْتِ وَهُمْ يَنْظُرُونَ﴾ [الأنفال: 5-6] إلى آخر الآيات. وده شيء عجيب جداً.
يعني السورة ما ابتدتش بأسباب الغزوة، وقائع الغزوة، نتائج الغزوة، ونلاقي الأنفال ذكرها في آخر السورة؟ لا، السورة فاجأتنا بذكر الأنفال ليه؟ لأن الدرس أو الدرسين، أعظم درسين هنطلع بيهم من غزوة بدر ومن سورة الأنفال، هم في الآية دي. فأعظم درسين في سورة في غزوة بدر هنخرج بيهم هم في الآية دي: يسالونك عن الأنفال قل الأنفال لله والرسول. إيه يا جماعة أعظم درسين؟
أول درس، وهو أعظم درس، والدرس الثاني منبثق منه، هو أن الدنيا إذا دخلت على الأولياء أفسدت دينهم. خلوا بالكم، أنا مركز قوي في الألفاظ، ما بقولش الدنيا بتخش على الفسقة ولا على المؤمنين النص كم اللي زينا كده، لا، الدنيا ممكن تدخل على الأولياء، الدنيا تدخل على الصحابه، وإذا دخلت أفسدت الدين.
طيب، إيه ده؟ فين ده في الآية؟ ما احنا عاوزين بقى نفهم قصة الآية دي: يسألونك عن الأنفال. هو السؤال ده كان إيه؟ يعني جاي بيقولوا له إيه؟ يعني سؤال استفهام هنعمل إيه في الأنفال دي؟ لا، ما كانش كده. الرواية: عبادة بن الصامت يقول: فينا أهل بدر نزلت الأنفال حين اختلفنا في النفل وساءت فيه أخلاقنا، فنزعها الله من أيدينا وجعلها إلى رسول الله صلى الله عليه وسلم. شوفوا لفظ الراوي: حين اختلفنا في النفل وساءت فيه أخلاقنا، فنزعها الله من أيدينا وجعلها إلى رسول الله.
إيه القصة؟ القصة يا جماعة لما خلصت غزوة بدر وانتصر المسلمون، انقسم الجيش لثلاث فرق، تقسيم طبيعي جداً: فرقة أحاطت بالنبي عليه الصلاه والسلام علشان العدو لا ينال من النبي صلى الله عليه وسلم غرة، وفرقة تانية جريت ورا العدو علشان ما يرجعش، وفرقة تالته راحت للانفال تحوز الغنائم ورجعت بيها. رجعوا ثلاث فرق.
فالفرقة اللي حازت -أولاً يا جماعة عاوزين نعيش شوية نفسية الصحابة، الصحابة دول المهاجرون خرجوا من بيوتهم معاهم الأموال بقى والنوق والدنيا بتاعتهم، ولا سابوا الدنيا؟ سابوا الدنيا، خرجوا سايبين كل حاجة وراهم، ورايحين للانصار. الأنصاري فجاه لقى المهاجري داخل عليه وبأمره إنه يعمل إيه؟ يقسم معاه دنيته، وفعل الأنصاري.
فاحنا بنتكلم في ناس الدنيا مزنقة جامد، بنتكلم في ناس الدنيا مزنقة عليهم جامد، وفجاه ولاول مرة يلاقوا إيه؟ غنائم. دي أول الغزوات، هي غزوة إيه؟ بدر. هنسالكم شوية آخر غزوة إيه؟ بس أول غزوة هي غزوة بدر. فلقوا غنائم، فابتدي -شوفوا بقى الدنيا دخلت- كله عاوز الدنيا. الفرقة اللي حازت الغنائم قالوا: هي لنا، ليس لكم فيها، نحن أحرزناها، نحن حزناها، احنا اللي مجمعين الغنائم دي، بتاعتنا. فقالت الفرقة الأخرى: والله ما أنتم بأحق بها منا، نحن أحطنا بالنبي لا يصيب العدو منه غرة صلى الله عليه وسلم. وقالت الثالثة: والله ما أنتم بأحق بها منا، نحن خرجنا في طلب العدو أو في أثر العدو. فاختلفوا وارتفعت أصواتهم، فجاؤوا إلى النبي يسألونه صلى الله عليه وسلم، فنزل قوله تعالى: ﴿يَسْأَلُونَكَ عَنِ الْأَنْفَالِ قُلِ الْأَنْفَالِ لِلَّهِ وَالرَّسُولِ﴾، عشان كده بعديها إيه؟ ﴿فَاتَّقُوا اللَّهَ وَأَصْلِحُوا ذَاتَ بَيْنِكُمْ وَأَطِيعُوا اللَّهَ وَرَسُولَهُ إِنْ كُنْتُمْ مُؤْمِنِينَ﴾ [الأنفال: 1].
فالدنيا لما بتخش على الأولياء بتدمرهم، وبتدمر دينهم. طب هنا الصحابة رضوان الله عليهم يعني ننتقصهم في قلوبنا كده إن دخلت؟ أبداً، الصحابة بشر، وبيتربوا على إيد النبي عليه الصلاة والسلام، ومع الوقت التربية بتنفع؟ آه بتنفع، لكن بتظل النفس تنازعها شهواتها مع الدين، وهيظل -ركزوا بقى في اللي هقوله ده- هيظل هذا الأمر إلى آخر الحياة.
يعني إيه؟ أول غزوة غزوة بدر، آخر غزوة غزوة تبوك. ربنا ذكر أحداث تبوك فين؟ في سورة التوبة، اللي هي فين في المصحف؟ بعد سورة إيه؟ بعد سورة الأنفال. وما فيش فيها بسم الله الرحمن الرحيم، طبعاً القول المشهور اللي احنا عارفين إن ما فيش بسم الله الرحمن الرحيم عشان بتتكلم عن المنافقين وعذاب المنافقين، فلا يناسب الافتتاح بالرحمة. وفي قول آخر إن الأنفال والتوبة سورة واحدة، سورة واحدة جايبة لك أول غزوة وأخر غزوة.
مشكلة الصحابة إيه في أول غزوة؟ الدنيا. مشكلة الصحابة إيه في آخر غزوة؟ الدنيا. فسورة التوبة هتلاقي فيها: ﴿يَا أَيُّهَا الَّذِينَ آمَنُوا مَا لَكُمْ إِذَا قِيلَ لَكُمُ انْفِرُوا فِي سَبِيلِ اللَّهِ اثَّاقَلْتُمْ إِلَى الْأَرْضِ أَرَضِيتُمْ بِالْحَيَاةِ الدُّنْيَا مِنَ الْآخِرَةِ﴾ [التوبة: 38]، ده في آخر غزوة، دنيا.
وهتلاقي في سورة التوبة: ﴿قُلْ إِنْ كَانَ آبَاؤُكُمْ وَأَبْنَاؤُكُمْ وَإِزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُموهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُمْ مِنَ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُوا حَتَّى يَأْتِيَ اللَّهُ بِأَمْرِهِ وَاللَّهُ لَا يَهْدِي الْقَوْمَ الْفَاسِقِينَ﴾ [التوبة: 24].
في سورة التوبة، دنيا. دي حيثيات الدنيا اللي الناس بتحبها: آباء، أبناء، أزواج، عشائر، تجارة، أموال. لو الحاجات دي بتحبوها أكتر من ربنا ومن النبي صلى الله عليه وسلم ومن الجهاد، هتعطلكم عن الدين. قال آخر الآية إيه اللي قلناها؟ ﴿فَتَرَبَّصُوا حَتَّى يَأْتِيَ اللَّهُ بِأَمْرِهِ وَاللَّهُ لَا يَهْدِي الْقَوْمَ الْفَاسِقِينَ﴾ [التوبة: 24]، دي هتلاقيها فين؟ في غزوة تبوك.
وكلنا عارفين القصة اللي حصلت للثلاثة الذين خلفوا. خلفوا يعني خلفوا في الحكم، مش تخلفوا. إنما الثلاثة خلفوا دول ليه -وهْم أولياء، احنا ما بنتكلمش عن المنافقين دلوقتي، هما كانوا في زمره المنافقين آه اللي قاعدين يبصوا حواليهم ما يلاقوش غير واحد من أصحاب الأعذار أو منافق مغموس في النفاق- لكن احنا دلوقتي بنتكلم عن ثلاثة من السادة، من الأولياء، كعب وصاحبيه رضوان الله عليهم، تخلفوا ليه؟ تخلفوا، دنيا. المشقة والطريق بعيد والسفر والنبي عليه الصلاة والسلام أي غزوة يواري يواري بها إلا الغزوة دي، قال لهم احنا رايحين المكان الفلاني عشان ياخدوا أهبتهم. طيب، الثلاثة دول ليه تخلفوا؟ طابت الثمار، طب يعني بكره، طب بعده، طب بعد بعده، شوفوا التسويف اللي بنقع فيه، إلى أن انفرط الأمر، دنيا.
الدرس الأعظم في غزوة بدر: الدنيا إذا دخلت على الأولياء أفسدت الدين. فربنا سبحانه وتعالى يعمل إيه بقى؟ يفتتاح السورة بهذا الدرس. شوية بقى وهنقول لكم الأسباب والوقائع والنتائج وهنحكي، إنما أول آية: ﴿يَسْأَلُونَكَ عَنِ الْأَنْفَالِ قُلِ الْأَنْفَالِ لِلَّهِ وَالرَّسُولِ فَاتَّقُوا اللَّهَ وَأَصْلِحُوا ذَاتَ بَيْنِكُمْ وَأَطِيعُوا اللَّهَ وَرَسُولَهُ إِنْ كُنْتُمْ مُؤْمِنِينَ﴾ [الأنفال: 1].
طيب، نتعلم الدرس؟ آه، نتعلم الدرس، بس مش كلنا بنتعلم، يعني الأولياء الصحابة رضوان الله عليهم، وتمر غزوة بدر. غزوة بدر كانت سنة كام؟ اتنين في رمضان. وتيجي غزوة أحد سنة كام؟ تلاتة في شوال. ومين ينتصر؟ المسلمين ينتصروا في أحد، والجيش الكفار يفر. وبعدين خمساد واحد النبي عليه الصلاة والسلام وقفهم على جبل، جبل الرماة، وقال لهم أمر صريح: كسبنا مالكوش دعوة، ما تشاركوناش في الغنائم؛ خسرنا والطير نزل ياكلنا، ما تدفعوش عنا، انتوا مالكوش دعوة بينا، انتوا الخمسين واقفين هنا، ما حدش يتعتع من هنا. أمر صريح.
ويكسب المسلمون، ويفر الكفار، ويبدأ المسلمون يلموا الغنائم، ومين واقف بيتفرج؟ الخمسين. وتدخل الدنيا تاني بعد ما نبهوا عليها فين؟ في بدر. بس لما نبهوا عليها في بدر ما جتش عقوبة إلهية، يعني إيه؟ يعني كان ممكن وهما واقفين بيتخانقوا في بدر، الثلاث فرق واقفين بيتخانقوا، يحصل إيه؟ يجي الكفار يطوقوهم ويخلصوا. ربنا ما عملش كده، أول مرة نبهنا أهو، نبهنا على المشكلة: الدنيا هتضيعكم، حبكم للدنيا هيضيعكم، هيضيع دينكم.
وتيجي غزوة أحد ويحصل نفس الكلام، وعلى نفس الدنيا: الغنائم. ويختلف الرماة، أربعون واحد يقولوا خلاص المعركة خلصت وننزل، وبعدين القائد يفكرهم بكلام النبي عليه الصلاة والسلام، ما يمتثلوش، وينزل أربعون ويثبت عشرة. مين يشوف اللقطة دي؟ خالد بن الوليد، يقوم لافف، قاتل كم واحد من العشرة؟ العشرة كلهم. قتل الصحابة كلهم. وتنقّلب الكفة ويكسب الكفار.
وينزل في السورة اللي اتكلمت عن غزوة أحد برض إنذار على مسألة الدنيا دي، سورة إيه بتتكلم في غزوة أحد؟ آل عمران. فتلاقي في غزوة أحد في، عفواً، في آل عمران، ربنا يقول إيه بقى سبحانه وتعالى: ﴿وَلَقَدْ صَدَقَكُمُ اللَّهُ وَعْدَهُ إِذْ تَحُسُّونَهُمْ بِإِذْنِهِ حَتَّى إِذَا فَشِلْتُمْ وَتَنَازَعْتُمْ فِي الْأَمْرِ وَعَصَيْتُمْ مِنْ بَعْدِ مَا أَرَاكُمْ مَا تُحِبُّونَ﴾ [آل عمران: 152]. حصل ثلاث حاجات أهم: حتى إذا فشلتم، وتنازعتم في الأمر، وعصيتم من بعد ما أراكم ما تحبون. قبل ما تشوفوا ما تحبون ما فيش الثلاثة دول، وهنتكلم عنهم كمان شوية إن شاء الله.
وبدين يفاجئنا الله عز وجل، بل يفاجئ الصحابة بالكلمتين اللي جايين دول: ﴿مِنْكُمْ مَنْ يُرِيدُ الدُّنْيَا وَمِنْكُمْ مَنْ يُرِيدُ الْآخِرَةَ﴾ [آل عمران: 152]. كان ابن مسعود يقسم بالله ما كان يظن أن أحد من صحابة رسول الله يريد الدنيا، ما كان يظن هذا ابن مسعود، إلى أن نزل قوله تعالى: ﴿مِنْكُمْ مَنْ يُرِيدُ الدُّنْيَا﴾ [آل عمران: 152].
وأنا عندي سؤالين هنا، السؤالين دول مهمين جداً لينا يا جماعة: هذا الولي من الصحابة،
هذا الولي الذي أخبر الله عز وجل عنه أنه يريد الدنيا؛ ترى ذلك الولي كان يعرف من نفسه إرادة الدنيا؟ يعني يا جماعة، هو عارف إنه مريد للدنيا ولسه؟ ولا هو ما هو لو كان يعرف كان زمانه جاهد نفسه في الحتة دي، ولا كان غالب الظن أنه كان جاهلاً بتلك النفس؟ هو ما كان يظن أنه مريد الدنيا.
أنا ليه بقول الكلام ده؟ لأن واحنا قاعدين دلوقتي، ممكن واحد منا يجي له الظن ده؛ إنه إيه؟ أنا لا، الحمد لله، مش بتوع دنيا. مين قال لك يا ابني؟ مين وايه التزكية دي؟ فَلا تُزَكُّوا أَنْفُسَكُمْ هُوَ أَعْلَمُ بِمَنْ اتَّقَى. مين قال لك أنك مش بتاع دنيا؟ مين قال لك؟ ومين قال لك لو الدنيا ضاقت عليك هتخرج لإيه؟ لأنهي أخلاق؟
الدنيا ضاقت دي يا جماعة؛ احنا لسه ما شفناهاش الدنيا اللي بتضيق، احنا لسه ما نعرفش حاجة عن ضيق الدنيا. أفقر واحد فينا كده، أكثر واحد شاف شدة في اللي قاعدين دول وفي اللي هيسمعوني بعد كده، ما يعرفوش حاجة عن ضيق الدنيا. إيه رأيكم؟
لا، في أول الدعوة كان صلى الله عليه وسلم يربط الحجرين على بطنه من الجوع. أتحدى واحد في اللي قاعدين أو في اللي هيسمعني وصل للمرحلة دي! احنا ما نعرفش حاجة عن ضيق الدنيا. يجهز جيش صلى الله عليه وسلم في غزوة، فيبقى التعيين بتاع كل فرد من الجيش في اليوم تمرة. احنا مش بنهزر دلوقتي، ده جيش رايح، يعني لو ضعفت قوته هيتهزم، يعني لو عند النبي صلى الله عليه وسلم أكت هيجي!
طالعين، فمثلاً الحساب أنهم يقعدوا شهر، فكل واحد في الجيش ليه ٣٠ تمرة. فالصحابة يرووا، يقولوا إيه: كنا هنعمل بيها التمرة دي؟ ما ينفعش ناكلها في أول اليوم، يقعدوا يمصوا فيها طول اليوم، ما هي التمرة خلصت، انتهى تعيين اليوم. طب الجيش اللي طالع ده، كل واحد ليه تمرة؟ متوقعين بقى أن البيوت في المدينة في رفاهية؟ يعني مثلاً بيوتنا في المدينة كل يوم المحمر والمشمر، والجيش اللي طالع طالع كل واحد بتمراية في اليوم، ولا دي هو ده اللي معانا؟ يعني غالب الظن أن المدينة حالها أسوء، هو ده اللي في المدينة خدوه، انتوا طالعين تحاربوا؟
فاحنا شفنا إيه؟ احنا بنضيق الدنيا عشان نقول احنا مش بتوع دنيا. هو اللي مش بتاع دنيا ده يعرف امتى؟ لما تضيق عليه الأحوال ويلاقي نفسه راضي وصابر ومحتسب، ولا شق، أو آخر الزمان. يا أبا ذر! كيف أنت وجوع أصاب الناس، لا يستطيع الرجل أن يقوم من فراشه إلى مصلاه؟ احنا يا جماعة ممكن نبقى قريبين لده أصلاً، الله أعلم، ندخل في جوع، أنت مش قادر تقوم تصلي من الجوع! قال: كيف أصنع بأبي أنت وأمي يا رسول الله؟ قال: تصبر.
تصبر على إيه يعني؟ مش هت.. هو جعان طب هو هيصبر على الجوع ولا في حاجة تانية؟ يعني في حاجة تانية الناس التانية هتبقى بتعملها فأنت أوعى تعمل زيي. آه، هيبقى في حاجات تانية الناس بتعملها يا جماعة، عارفين إيه الهرج؟ قال: وما الهرج؟ قال: القتل. يكثر القتل. قالوا: أنا نقتل من المشركين كذا، ما احنا كل سنة عادي بنقتل المشركين. قال: ليس ذاك، يقتل بعضكم بعضاً، حتى يقتل الرجل جاره وابن عمه وذا قرابته.
ده يحصل إزاي؟ يحصل مع اللي بنحكيه ده؛ جوع شديد، فتصل لفتنة ما حدش عارف يسيطر عليها خلاص، كله بيقتل في بعضه. ما وصية النبي حينها صلى الله عليه وسلم؟ أولاً وصية النبي لا بيظهر اهو إيه: اصبر، ما تعملش زي دول. طيب هصبر حاضر، واحد كسر علي البيت ودخل، أقوم بقى اقتله؟ لا، هيقتلني. يقتلك؟ طيب ده أنا يعني هيقتلني كدة، هشوف السيف أكيد هخاف من السيف وهقوم أدفاع، أعمل إيه؟ قال: فان خفت أن يبهرك شعاع السيف، فالق وجهك على وجهك.
فاحنا ما شفناش ده، أنا ليه بقول كده يا جماعة؟ وده هنعيش له بعد شويه إن شاء الله في الدرس الثالث من المستفاد، المستفاد من غزوة بدر، هنتكلم عنه بالتفصيل، هو ده.. دي المواقف اللي تبين بقى أنت راجل بتاع دنيا ولا لا، إنما لما تجي تقول لي: الحمد لله مش بتاع دنيا، وأنت ثلاجاتك.. مهما كنت يعني، مهما احنا كان واحد فقير فينا دلوقتي وأنت ثلاجتك فيها أكل، وأنت قاعد في أربع حيطان لامينك، وأنا بجيب الإيه اللي هو.. يعني ممكن أفقر شيء في أكل دي، اللي هو شوية فول وعندك حتة عيش ناشفة، ده كان أمله عند الصحابة في وقت أمله.
فاحنا لسه ما دخلناش اختبارات، ما دخلناش اختبارات. فالصحابي.. ذلك الولي الذي قال الله فيه: مِنكُمْ مَنْ يُرِيدُ الدُّنْيَا، دي تنفي عنا رؤية النفس بالكلية، تنفي عنا تزكية النفس، ما نعرفش احنا إيه.
ثاني ذلك الصحابي الولي الذي خالف الأمر للدنيا، خالف أمر النبي عليه الصلاه والسلام، قال لك: آه سيدنا النبي قال كده عليه الصلاه والسلام وأنا هعمل اللي أنا عاوزه. يعني الـ ٤٠ دول يا جماعة هم نازلين وبيقول لهم ده النبي قال كده عليه الصلاه والسلام، قالوا: آه ما احنا عارفين قال كده، وبمزاجنا هنعمل العكس كدة. هل الولي يفعل ذلك؟ أمّال عملوا إيه في كلمة كدة؟ تأويل.
تأويل يعني إيه؟ النص اهو صريح، نؤول النص، يعني إيه نؤول النص؟ لا ما اصل النبي يقصد كذا صلى الله عليه وسلم، ما قالوش إيه: آه، النبي قال كده واحنا هنخالف، ما يعملش كده الولي. لا، هو سيدنا النبي عليه الصلاه والسلام لما قال كده هو يقصد كذا، بس خلاص، الحرب خلصت، فاهمين يا جماعة؟ فيبتدوا يخالفوا النص بالعقل، وده الدرس الثالث المستفاد اللي هنأجله كمان شوية، فمش هنتكلم عنه هنا بس هنستدعي الكلام ده كمان شوية إن شاء الله، فأنتم شايفين يا جماعة الدنيا ازاي حاضرة بقوة في نقص دين الأولياء في بدر، حاضرة بعديها بسنة في أحد، حاضرة وتمر سنين والصحابة بيتربوا، وتيجي غزوة تبوك السنة التاسعة من الهجرة، برضو حاضرة!
مَا لَكُمْ إِذَا قِيلَ لَكُمُ انْفِرُوا فِي سَبِيلِ اللَّهِ اثَّاقَلْتُمْ إِلَى الأَرْضِ. لما عرض النبي عليه الصلاه والسلام القتال على القبائل، بعض القبائل اثاقلت إلى الأرض مش عاوزين يخرجوا لتبوك، أَرَضِيتُمْ بِالْحَيَاةِ الدُّنْيَا مِنَ الآخِرَةِ؟ وهنا يا جماعة الكلام مش للكفار ولا المنافقين، خلي بالكم الآية دي مش المنافقين اللي قعدوا، لا، هم دول بعد كده خرجوا، اللي اثاقلوا إلى الأرض دول خرجوا بعد كده، بس اثاقلوا إلى الأرض في الأول، لأن الآية افتتحت بايه؟ يَا أَيُّهَا الَّذِينَ آمَنُوا مَا لَكُمْ إِذَا قِيلَ لَكُمُ انْفِرُوا فِي سَبِيلِ اللَّهِ اثَّاقَلْتُمْ إِلَى الأَرْضِ أَرَضِيتُمْ بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلا قَلِيلٌ.
هذا أوله العلاج. أنا دلوقتي خايف الدنيا تبقى في قلبي، وخايف لما الدنيا تضيق أخرج إلى ما لا يرضي الله عز وجل، فكر نفسك بالعلاجات دي: أَرَضِيتُمْ بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلا قَلِيلٌ. فكر، إيه اللي مستنيك إن أنت صبرت ورضيت؟ طب لو ما صبرتش ورضيت، يعني هيجي لك رزق ثاني؟ ولا هيجي لك؟ يبقى لا أنت طلت دنيا ولا طولت آخرة.
وأنت لو قعدت تزمزق وتقول: لا بقى وما ينفعش، هتفتح الشنطة هتلاقي فلوس جت؟ كدة كدة رزقك يا ابني هو اللي مكتوب لك هو اللي هيجي لك كدة. طب لو احتلت ورحت للحرام، هتاخد أكثر من رزقك؟ أقسم بالله ما هيحصل، أنت لو مكتوب لك في عمرك كله تاخد الرقم س، لو اتشقلبت ما تاخد جنيه زياده، رحت استعجلت بقى جزء من س ده بالحرام، اهو من س، هو كدة من س. طب لو كنت صبرت؟ كان أقسم بالله كان هيجيلك، ده رزقك. فأنت مش هتاخد أكثر من س، زي ما أنت كدة ليك عدد أنفاس مش أكثر منها، ليك رزق..
ثاني حاجة، فَمَا مَتَاعُ الْحَيَاةِ الدُّنْيَا فِي الآخِرَةِ إِلا قَلِيلٌ، أنت بتاخد إيه؟ بتاخد إيه عشان تسيب إيه؟ يعني هتروح تستعجل بالحرام عشان تسيب إيه بقى؟ جنة عرضها السماوات والأرض، إيه ده؟
وبعدين: إِلا تَنْفِرُوا يُعَذِّبْكُمْ عَذَابًا أَلِيمًا. لو سبت قوي من ربنا سبحانه وتعالى، أنت فاكر نفسك يعني عزيز عليه؟ ما في داهية! لا ما فيش حد عزيز عليه سبحانه وتعالى، ما فيش حد، ده اللي هو مين؟ مش اللي هو أنا وانت، ده اللي هو أزواج النبي عليه الصلاه والسلام، وفي بعد كده بقى: يَا نِسَاءَ النَّبِيِّ مَنْ يَأْتِ مِنْكُنَّ بِفَاحِشَةٍ مُبَيِّنَةٍ يُضَاعَفْ لَهَا الْعَذَابُ ضِعْفَيْنِ. ختام الآية مرعب: وَكَانَ ذَلِكَ عَلَى اللَّهِ يَسِيرًا. هذا وهم أزواج النبي عليه الصلاه والسلام.
فأكبر درس عشان ما نطولش عليكم، درس أصلي يعني كبير، يعني ممكن نتكلم فيه كتير، خصوصاً زي ما نقول إن احنا ممكن نلاقي شيئاً من ذلك، نلاقي شيئاً من تضييق المعيشة، نلاقي شيئاً من الجوع نقص الثمرات، ممكن نلاقي ده في القريب، وحينها ستظهر معادن الناس؛ الناس مستورون في عافية، فإذا وقعت الفتنة صار كل واحد إلى.. مالها، وكما قال ظن ابن مسعود، فإحنا امتى الناس تتفضح؟ في الفتنة.
فده أكبر درس في غزوة بدر. الدنيا نحاول.. طب نعمل إيه دلوقتي؟ نعمل إيه؟ أول حاجة ندعي ربنا يا جماعة، يعني عشان بقى حلول، أنا دلوقتي مش عاوز تبقى الدنيا في قلبي؛ أول حاجة افتقار لربنا ولجوء إليه لأن المسالة مش سهلة ومش بسيطة، أن الدنيا تخرج من قلوبنا دي مش حاجة سهلة، فدعاء ولجوء لربنا سبحانه وتعالى شديد في هذه المسالة.
ثاني حاجة، صوتنا اتنبح، بقى لنا سنين ننزل في نمط عشنا واحدة واحدة واحدة. يا سيدي أنت دخلك ١٠ مليون، ربنا يزيد ويبارك، مش هتعيش بالـ ١٠ مليون. أنت داخلك ١٠٠٠ جنيه، ربنا يزيد ويبارك، ما تعيشش بالـ ١٠٠٠ جنيه، نحاول ننزل في نمط حياتنا عن دخلنا. ليه يا جماعة؟ احنا جزء كبير مما يخرج الناس.. اه ننزل في نمط عيشنا شوية، وده بقى لنا سنين بنقوله، فكان المفروض النهارده نَبقى قاعدين قدام ناس عملت ده. ليه؟ جزء كبير، كنا بنقوله بقى، مما يخرج الناس إلى التسخط عند ضيق الحياة هو سوء تصرفنا في مواردنا والحياة مرحرحة.
فأنت دلوقتي واحد متعود عايش بالنمط الفلاني، لايف ستايل يعني، عشان أنا مش فاهم يعني إيه النمط، لايف ستايل معين، خلاص، وفجأة بنقول له: لا، ده هيتقص ٩٠% منه، إنما هو لو واحدة واحدة بإرادته هو، ابتدى كل شوية ينزل شوية في مأكله، في مشربه، في مركوبه، في ملبوسه، في في كل شيء يعني؛ هو متعود يلبس من الأماكن الفلانية، لا، أنا المرة الجاية أنا هنزل اشتري من الأماكن الإعلانية أقل، المرة اللي بعديه لا، مش هشتري أصلاً، أنا عندي الحمد لله لما يبقى يدوب اللي عندي، أنا متعود أكل صنفين وثلاثة، لا هنزل، وهيبقى في يومين في الاسبوع باكل أقل، وشويه أزود، أزود.. مش أزود، أزود في الأيام اللي بنزل فيها، وهكذا.
وقلنا لكم قبل كده ١٠٠ مرة: في فرق بين دخلك ونمط حياتك. وبلاش التلبيس في دين الله عز وجل، بلاش حد يجي يقول: ستة من العشرة المبشرين كانوا مليونيرات. بصوا لحياتهم المليونات دول، ده دخل رزق، ده ماليس فيه حيلة، ما أقدرش أقول لك يعني أنا دلوقتي لو جيت قلت إيه: قلل الرزق، أبقى سفيه! أبقى سفيه ليه؟ أنا لسه قائل لك: أنت لو ليك س، هتاخده. والله لو الدنيا كلها وقفت عشان س دي ما توصلكش، هتوصل لك. ده سفه أن أنا أقول لك: قلل رزقك، ده سفه. لو قعدت في بيتك، س هتجيلك.
بيروا أثر كده عن مين؟ كان من أغنى صحابي؟ ها؟ مش سامع. عبد الرحمن؟ عبد الرحمن هو عثمان طبعا، عبد الرحمن بن عوف، بيروا عنه أثر أن عائشة رضي الله عنه.. طبعا عبد الرحمن بن عوف من العشرة المبشرين، فعائشة رضي الله عنها بتقول له إيه: يعني أنت آخر واحد من عشرة هخش الجنة. فقعد يعيط. مش آخر واحد أمة محمد في العشرة؟ قعد يعيط. ليه؟ طب أنا آخر واحد في العشرة؟ قالت له: يعني أنت غني قوي، وهتسأل عن كل إيه؟ درهم ودينار عندك. فرد عليها الله، قال لها: وما أصنع يا أمي، إن كنت أنفق مالي كله أول النهار فيأبي الله إلا أن يضاعفه علي أضعافاً مضاعفة قبل أن أنام؟ أنا أعمل إيه؟
هو ده اللي لسه بقوله لكم، الرزق ده ما أقدرش وأنا قاعد كده أقول لك إيه: قلل رزقك، أنت افتح الباب وامشي. أنا ما ينفعش حد يسمع لي، لا بتاعي ولا بتاعك، ده بتاع ربنا سبحانه وتعالى. إنما أقدر أقول لك إيه: قلل معيشتك. مش عشان أنت بيدخل لك مليون جنيه هعيش بالمليون، ولو زادوا ٢ مليون فهعيش بالـ ٢ مليون، ولو بقوا ١٠ مليون هعيش بالـ ١٠ مليون. والغريب بقى دايماً الشيطان يديك حتة زيادة، يعني ما تلاقيش واحد ألم ١٠ مليون ده ولا دخله ١٠ مليون هو عايش بـ ١٠ مليون وحتة، وبيستلف عشان الحتة دي، سواء بقى حاططها في أصول في فيلا فين قصر فين، إنما هو دايماً تلاقي كل الناس كدة، واللي معاه ١٠٠٠ هو عايش بالـ ١٠٠٠ وحتة، شيطان شيطان عمال يوسوس، يعني يا ريته عايش بالـ ١٠ مليون، لا ده ١٠ مليون وحتة، وتلاقيه يجي يسألك بعد كده فتاوى، يسألك بقى يقول لك: أصل الكريديت..
كارت بتتكسر يا عم، طب ليه بتتكسر عليه؟ يعني هو كده. لا، انزل في نمط حياتك، ليه بقى يا جماعة؟ كنا بنقول ده وصوتنا اتبح في ده؛ لأن بصوا يا جماعة، طول ما الدنيا معانا ومغموسين فيها بالطريقة دي فانسوا إن احنا ما نحبهاش، انسوا، ده كلامي لا، كلام السلف؛ لأنكم عمرتم الدنيا وخربتم الآخرة، ولا يحب الإنسان أن ينتقل من العمار إلى الخراب.
لما قالوا له: احنا ليه بنحب الدنيا وبنكره الموت؟ قال لهم: ما انتم معمرين الدنيا ومخربين الآخرة. فواحد بيقول لك: يلا هاخدك من العمار للخراب، تحب تروح معاه؟ مستحيل. فهي دي دنيانا، السامع المتكلم، كلنا. طيب، وادينا شفنا إن جيل النصر وجيل التمكين ما ينفعش يكون بالاحوال دي، شفنا من الآيات أهو، جيل النصر وجيل التمكين ما ينفعش يكون بأحوالنا دي؛ ففي حل من اثنين، لو أردنا أن نكون من جيل النصر أو أراد الله بنا ذلك، حاجة من اثنين: أما إن احنا نقلل من دنيانا بايدينا بإرادتنا، وأما هنلاقي فجأة ربنا سبحانه وتعالى عمل إيه؟ قص الدنيا خالص.
إن أراد بنا خيراً يقص الدنيا بقى خالص، وطبعا دي هتبقى فتنة رهيبة، رهيبة، هيتميز فيها الناس، يعني في أحداث آخر الزمان الناس هتتقسم لفسطاطين؛ إيمان لا كفر فيه، وكفر لا إيمان فيه، ما فيش الميوعة بتاعة دلوقتي دي، بتاعتنا مش موجودة، قبليها أحداث عظام، الناس هتقتل بعض في الشوارع، في البيوت، هيدخل على الناس في بيوتها، طب مين هيصبر على ده؟ ومين تقول مين فينا هيبقى مقتول ومين قاتل؟ ما هو ده هيحصل امتى؟
هيحصل لما يحصل جوع شديد وقلة موارد وناس هبتدي تدور على تلك الموارد، الطعام والشراب وكذا وكذا، فمين قال لحضرتك إنك هتكون أنت عبد الله المقتول ومش هتكون عبد الله القاتل؟ مين يضمنها؟ فاحنا في مقدمات؛ المقدمة الأولى الافتقار لله عز وجل، المقدمة الثانية وأنا آسف إني أسقطتها الزيادة من التعبد، اللي لما بنبتدي نقول الكلام ده يقول لك: ده إيه شغل دراويش؟ والله هذا كلام ربي وكلام نبيه صلى الله عليه وسلم: «بادروا بالأعمال فتناً كقطع الليل المظلم».
شوفوا، شوفوا اللفظ المرعب: «يصبح الرجل مؤمناً ويمسي كافراً». انتوا فاهمين يا جماعة الألفاظ دي؟ الألفاظ النبوية دي؟ واحد صابح الصبح مؤمن، ما ينامش غير وهو كافر، «ويمسي مؤمناً ويصبح كافراً». طب ليه؟ يبيع دينه بعرض من الدنيا، هيبيع دينه يعني إيه؟ من صور ده إنك تروح تقتل واحد، ما هو «لا يزال المرء في فسحة من دينه ما لم يصيب دماً حراماً»، تروح تقتل واحد ليه؟ عشان دنيا، تترك دينك وتروح لملة تانية.
ممكن يحصل؟ آه، ممكن يحصل، ازاي ممكن يحصل؟ فتن، فتن رهيبة، مثلاً يعني في أحداث آخر الزمان، احنا عندنا مهدي ولا ما عندناش مهدي؟ والشيعه عندهم مهدي ولا ما عندناش مهدي؟ يطلع مهدي الشيعة، مين قال لحضرتك مش هتتابعه؟ خصوصاً بقى لو الشيعة كانت إيه بتتلمع مثلاً؟ مذهب الروافض، مذهب الروافض في مسائل كثيرة جداً كفرية؛ من قولهم بتحريف القرآن، من قولهم من اتهامهم لعائشة رضي الله عنها بما براها الله عز وجل منه من فوق سبع سماوات، تكفيرهم لبعض الصحابة بل لأعيان الصحابة، أقوال كفرية.
طيب، يدخلوا علينا بالفتنة بقى الحاصلة من إن إيه؟ هم اللي بيحاربوا، فتلاقي الناس كانت معلقة صور حسن نصر الله في المحلات وعلى التوك توك وعلى ومش عارف إيه، طب ده كله دي ولا حاجة، دي مش فتنة؟ مش فتنة تخيل كده بقى مثلاً تنام تصحى يقول لك: المهدي بتاعنا ظهر، تنام تصحى تلاقي كده المهدي ظهر، وعندهم عقيدة الرجعة فالمهدي يظهر فجأة تلاقي حسن نصر الله صحي، مين هيثبت في فتن شبه كده؟ أنا بتخيل أنا ما أعرفش، بتخيل إن ده حصل مثلاً، مين بقى يثبت؟
هو طبعا مش هيبقى صحي، هيبقى مسرحية وهو كان اصلا إيه ما ماتش مثلاً، نفترض يعني سيناريو يحصل، مين بقى يثبت؟ طب نعمل إيه؟ بادروا بالأعمال، الحقوا صلوا والحقوا صوموا، اسردوا الصوم مش في رمضان بقى، رمضان يخلص، اسردوا الصوم، أوراد قرآن، أي عمل. لا إله إلا الله، «ويل للعرب من شر قد اقترب»، من يوقظ صواحب الحجرات؟ ليه؟ عشان يخرجوا يتفرجوا على الويل اللي اقترب ويصوروه قبل الخيابة اللي احنا فيها، ولا لما يحصل شيء من تلك الأمور العظام نجري نصلي كي نصلي؟
طيب ليه؟ عشان الدنيا ما تولع، الدنيا، فرب كاسية في الدنيا عارية يوم القيامة، القضية مش في الدنيا خالص، رب كاسٍ في الدنيا وبطنه مليانة في الدنيا وبيته مفروش أحسن فرش في الدنيا وكل حياته مية فل و1 عشرة في الدنيا، عارٍ يوم القيامة. طب احنا مش عاوزين نبقى عراة يوم القيامة، مش عاوزين يعني ذلك المشهد كي نصلي، صلاة إذا حزبه أمر فزع إلى الصلاة.
﴿وَأَوْحَيْنَا إِلَى مُوسَى وَأَخِيهِ أَنْ تَبَوَّءُوا لِقَوْمِكُمَا بِمِصْرَ بُيُوتًا﴾ [يونس: 87]، ده في عز الاضطهاد وفي عز ما فرعون خانقهم وبيجري وراهم، طب نعمل إيه بقى؟ نقعد بقى نتمرن على السلاح ونتمرن؟ قطعا هنعمل ده وقطعا هيعملوا ده، لكن الرب عز وجل يشير إلى المعنى الأعلى، الأعلى في إيه؟ في الثبات والنصر، في اللي عايز نصر، هو النصر مش هيجي غير بكده: ﴿وَاجْعَلُوا بُيُوتَكُمْ قِبْلَةً﴾ [يونس: 87] ها، ﴿وَأَقِيمُوا الصَّلَاةَ﴾ [يونس: 87]، ختام الآية: ﴿وَبَشِّرِ الْمُؤْمِنِينَ﴾ [يونس: 87].
وحينا إلى موسى وأخيه أن تبوؤا لقومكما بمصر بيوتاً واجعلوا بيوتكم قبلة وأقيموا الصلاة وبشر المؤمنين، هم دول اللي بينزل عليهم النصر، هم دول، فاحنا فين حظنا من ده كله؟ ماشي في الآية، احنا بقينا زي ما يعني بعض إخواننا بيقول: علمانيين بلحة، حساباتنا كلها دنيوية، واحد زائد واحد بيساوي اثنين، في حرب رب، إيه بقى الأسلحة؟ وإيه نوع الذخائر؟ وإيه نوع مش عارف إيه؟ يا عم اعمل ده واعلم، وشوف اللفظ القراني: ﴿وَأَعِدُّوا لَهُمْ مَّا اسْتَطَعْتُم مِّن قُوَّةٍ﴾ [الأنفال: 60]، اللي في إيديك اعملوه، ليه؟ اصل هو النصر مش بده، وده درس في غزوة بدر.
الصحابة في غزوة بدر قليلين، ما هو 314 واحد، التانيين 1000، دول خارجين مش لحرب أصلاً، في غزوة بدر الصحابة ما كانوا همش خارجين لحرب، كانوا خارجين يحرزوا العير ويرجعوا فمعهمش أسلحة أصلاً، التانيين جايين للحرب، دول ما معهمش أكل، التانيين بيذبحوا تسع جمال، يوم تسع جمال، يوم 10 جمال، فشايفين بكافة بحسابات الدنيا احنا ضايعين، ثلاث أضعاف، ضايعين.
فيحصل إيه بقى عشان يا جماعه نفهم، نفهم سنن الله عز وجل؟ النبي عليه الصلاه والسلام أول ما يلاقي كده، خلاص ده اللي في إيدين، يقوم يعمل إيه؟ يدخل يدعي ويرفع إيديه، ويقع البرد برده من على كتفيه، يدخل عليه أبو بكر يقول له: أين بعض مناد ربك فإن الله منجز لك ما وعدك، يبتسم النبي عليه الصلاه والسلام، في إيه؟ قال: هذا جبريل نزل وعليه لامة الحرب. جبريل نزل ليه الأول؟ هو نزل لوحده؟ أمال في كام؟ عدد كام؟ 1000 ولا أكثر؟ ماشي، المهم عدد كبير، مش مهم بقى عشان في خلافات في الحتة دي، عدد كبير من الملائكة.
الملائكة دي نزلت ليه؟ عشان ينصروا المؤمنين؟ لا، الملائكة نزلت لسببين: والله نفى عنهم النصر، بشرى ولتطمئن به القلوب، وفي نفس الآية: ﴿وَمَا النَّصْرُ إِلَّا مِنْ عِندِ اللَّهِ إِنَّ اللَّهَ عَزِيزٌ حَكِيمٌ﴾ [الأنفال: 10]. هو الله عز وجل في حاجة إنه نزل جبريل عشان نكسب؟ لا طبعا، كن فيكون، انتهت. ﴿إِذْ تَسْتَغِيثُونَ رَبَّكُمْ فَاسْتَجَابَ لَكُمْ﴾ [الأنفال: 9]، خدوا ملائكة، عايزين ملائكة؟ خدوا ملائكة: ﴿أَنِّي مُمِدُّكُم بِأَلْفٍ مِّنَ الْمَلَائِكَةِ مُرْدِفِينَ﴾ [الأنفال: 9]، مردفين ورا بعض، مردفين يعني في وراهم نازل وراهم تاني بقراءتين.
﴿وَمَا جَعَلَهُ اللَّهُ إِلَّا بُشْرَى وَلِتَطْمَئِنَّ بِهِ قُلُوبُكُمْ وَمَا النَّصْرُ إِلَّا مِنْ عِندِ اللَّهِ إِنَّ اللَّهَ عَزِيزٌ حَكِيمٌ﴾ [الأنفال: 10]، احنا بس عملنا لكم ده عشان تستريحوا، استغثتونا، عايزين ملائكة؟ خدوا ملائكة، بس الملائكة مش هي اللي هتكسبكم، وما النصر إلا من عند الله إن الله عزيز حكيم، وآيات وتيجي بعديها: ﴿يَا أَيُّهَا الَّذِينَ آمَنُوا إِذَا لَقِيتُمْ فِئَةً فَاثْبُتُوا وَاذْكُرُوا اللَّهَ كَثِيرًا لَّعَلَّكُمْ تُفْلِحُونَ﴾ [الأنفال: 45].
يبقى هنا ليه واذكروا الله؟ لأن النصر من عنده سبحانه وتعالى، فمحتاجين عبادات ومحتاجين أوراد ومحتاجين أذكار ومحتاجين صلوات ومحتاجين دعاء ومحتاجين ابتهال وافتقار وتوبة واستغفار، ده واجب الوقت يا جماعة، ما فيش رفاهية خلاص، ده واجب الوقت، ده واجب الوقت ليه؟ علشان ننجو، إن كانت تلك الفتن ننجو منها: «بادروا بالأعمال فتناً كقطع الليل المظلم»، ما فيش حد شايف حاجة ولا حد عارف يحدد مين صح ومين غلط، قطع الليل المظلم، من لنا في هذه الفتن؟ الله، فلنبادر بتلك الأعمال.
الدرس الثاني الكبير هو عدم التنازع، هو أصلاً القصة اتخانقوا وسعت أخلاقهم فنزعها الله من أيديهم، ونزلت سكينة على قلوبهم، أطيعوا الله ورسولَه، فاتقوا الله وأصلحوا ذات بينكم، ده الدرس الثاني الكبير ليه؟ لأن التنازع والشقاق وفساد ذات بين هي الحالقة، تحلق الدين، قالها النبي محمد صلى الله عليه وسلم.
فيا شباب، دعكم من الخلافات، وهذا يسيء جداً اللي فاكر إنه ممكن يدخل في خلاف عشاني ولا عشان بداف، هذا يسيء، دعكم من الخلافات، احنا مش جايين نتخانق، وبعدين الخلاف يبقى بين أهل الدين، أهل التدين، الناس المتدينة بيتخانقوا مع بعض وبيشتموا بعض ويدعوا على بعض وبيفسقوا بعض وبيتهموا نيات بعض، عاوزين ننتصر بمين إن شاء الله؟ ننتصر بمين؟ سيبكم الانتصار، احنا أصلاً بعيد أصلاً عن الانتصار، بس دي أخلاق حد ينجو من فتن، يعني فكر في نفسك، احنا بنفكر بقى دلوقتي لا في نصر أمة ولا أنا بفكر أنجو بنفسي دلوقتي، عليك بنفسك دي أخلاق واحد ينجو من فتن؟ لا والله.
الدرس ده درس كبير جداً، ولذلك ربنا يكرره في سورة الأنفال، يعني هنا إيه: ﴿فَاتَّقُوا اللَّهَ وَأَصْلِحُوا ذَاتَ بَيْنِكُمْ﴾ [الأنفال: 1]، وبعدين نبتدي بقى نحكي القصة ونحكي البشريات والملائكة تنزل والنعاس اللي هيصيبكم والمطر اللي هيجي كل ده أنتو إيه مش وقته يعني بس موجود كله، وبعدين تيجي إيه عجيبة جداً بقى اللي احنا قلناها من شويه: ﴿يَا أَيُّهَا الَّذِينَ آمَنُوا إِذَا لَقِيتُمْ فِئَةً فَاثْبُتُوا وَاذْكُرُوا اللَّهَ كَثِيرًا لَّعَلَّكُمْ تُفْلِحُونَ﴾ [الأنفال: 45] ها، ﴿وَلَا تَنَازَعُوا فَتَفْشَلُوا وَتَذْهَبَ رِيحُكُمْ وَاصْبِرُوا﴾ [الأنفال: 46].
فاكرين لما قلنا لكم في غزوة أحد افتكروا الثلاث ألفاظ دول؟ هنرجع لهم هنا في غزوة بدر: ولا تنازعوا فتفشلوا وتذهب ريحكم، وده مش سهل، ﴿وَاصْبِرُوا﴾ [الأنفال: 46]، مش سهل أن تلاقي واحد بينازعك في شيء فانت تتعالى أو تترفع عن تلك المنازعة، ده مش سهل، تاني نكرر الثلاث ألفاظ: ولا تنازعوا فتفشلوا يعني تجبنوا وتذهب ريحكم هتضيعوا خلاص ما فيش قوة.
وعشان الحاجات دي صعبة: ﴿وَاصْبِرُوا﴾ [الأنفال: 46]، يبقى دول الثلاث ألفاظ أهم، نرجع تاني للألفاظ بتاعة غزوة أحد في سورة آل عمران بعد الألفاظ دي بسنة: ﴿وَلَقَدْ صَدَقَكُمُ اللَّهُ وَعْدَهُ إِذْ تَحُسُّونَهُم بِإِذْنِهِ حَتَّى إِذَا فَشِلْتُمْ وَتَنَازَعْتُمْ فِي الْأَمْرِ وَعَصَيْتُم مِّن بَعْدِ مَا أَرَاكُم مَّا تُحِبُّونَ﴾ [آل عمران: 152]. نرجع بقى الألفاظ دي تاني ها، قال: ﴿لَعَلَّكُمْ تُفْلِحُونَ﴾ [الأنفال: 45]، ﴿وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ﴾ [الأنفال: 46] مش كده؟ يبقى الثلاث ألفاظ هم هم، الثلاث ألفاظ هم هم.
يبقى في هنا قصة كبيرة، ده كله بيحصل بايه؟ بالنزاع، بالتنازع، بالخلاف، بالخصام، هتتنازع هتجبن وهتذهب ريحك، فاحنا ده الدرس الثاني الكبير اللي هو إيه؟ إن احنا نسيبنا من النزاعات، لا على فيسبوك بقى ولا على الإنستغرام ولا على ولا على أي حاجة ولا في مجالسنا، ولا لقيت في نزاع لقيت في شقاق قوم واترك ذلك كله، ما تكونش طرف ولا حتى إنك زي ما الشباب قالوا: أنت صح، ولا هقول أنت صح، أنا أنا ده اللي عندي ده ديني اللي أنا أعرفه وشكرا على كده وقوم، طب أنت لا أنا عاوز أحعلم فعلاً، آه قاعد تعلم، تعلم، قاعد تجادل؟ قوم، اللي قدامك قاعد يتعلم؟ علمه، التعلم قلب لأنه بيجادل؟ قوم، ده منهج السلف.
طيب، الدرس الثالث الكبير والذي فيه أيضا في نفس الآية إشارة ليه: ﴿وَأَطِيعُوا اللَّهَ وَرَسُولَهُ إِن كُنتُم مُّؤْمِنِينَ﴾ [الأنفال: 1]، إنما ده مش الدرس بقى اللي احنا عاوزين نخرج بيه، ودي الآية الأولى تخلص خلاص، يعني احنا كنا بنتدبر في آية واحدة في الآية، آه، قبل ما نسيب الآية اللي قلناها من شوي دي: وأطيعوا الله ورسوله ولا تنازعوا فتفشلوا وتذهب ريحكم واصبروا إن الله واصبروا إن الله مع الصابرين، وتعدي برضه شوية كلام عن الغزوة، ويختم الله عز وجل ذكرى الغزوة بنعمة من بها على النبي صلى الله عليه وسلم والصحابه، فماذا يقول الله عز وجل؟ قال: ﴿وَأَلَّفَ بَيْنَ قُلُوبِهِمْ لَوْ أَنفَقْتَ مَا فِي الْأَرْضِ جَمِيعًا مَّا أَلَّفْتَ بَيْنَ قُلُوبِهِمْ وَلَكِنَّ اللَّهَ أَلَّفَ بَيْنَهُمْ﴾ [الأنفال: 63].
شوفوا مع الإلحاح على نعمة التأليف القلوب دي موجود ازاي مبثوث في سورة الأنفال، فاحنا عاوزين نركز ده الدرس الثاني. بصوا يا جماعة، احنا كل الدروس بتاعت النهارده دي خلاص ما بقاش في رفاهية إن احنا بنسمعه ما بنطبقش، يعني ده المفروض نطبقه امبارح، السنة اللي فاتت، فاحنا يعني داخلين على أحداث عظام، وده يعني يراها كل بصير دلوقتي، خلاص ما في يعني إيه الدنيا داخله على أحداث كبيرة، فاحنا ما فيش وقت، احنا اللي بنسمعه نطلع نطبق على طول.
الدرس الثالث والخطير جداً، ربنا سبحانه وتعالى لما ذكر أحداث بقى وأسباب الغزوة لسه احنا في البداية بيقول إيه: ﴿كَمَا أَخْرَجَكَ رَبُّكَ مِنْ بَيْتِكَ بِالْحَقِّ وَإِنَّ فَرِيقًا مِنَ الْمُؤْمِنِينَ لَكَارِهُونَ * يُجَادِلُونَكَ فِي الْحَقِّ بَعْدَمَا تَبَيَّنَ كَأَنَّمَا يُسَاقُونَ إِلَى الْمَوْتِ وَهُمْ يَنْظُرُونَ﴾ [الأنفال: 5-6]، شايفين اللفظ ده؟ كانهم يساقون إلى الموت، إيه القصة باختصار؟ القصة باختصار: النبي عليه الصلاه والسلام عرف إن في عير لقريش معدي وعليه أبو سفيان، فقال إيه: طب خلاص ده جزء من حقنا، اطلعوا شوية كده.
من الذي طلعوا؟ خذوا العير، ده ما فيش حرب ولا بتاع، مع كم واحد بسيف وبتاع، إيه الدنيا هتخلص بسرعة من غير نوش، ناخد الفلوس ونرجع.
وكان قبل الموقف ده ربنا سبحانه وتعالى وعد المؤمنين إحدى الطائفتين: إما العير وإما النفير، يعني يا إما هترجعوا بالعير، يا إما هيكون في حرب. وما فيش يعني لغايه هنا هم مش عارفين إليه اللي هيحصل، فهم وهم خارجين نفسهم في إيه؟ في العير، والله يريد النفير سبحانه وتعالى.
طيب أبو سفيان عرف اتخذ سيف البحر، غير طريقه يعني وهرب، وبعت لقريش أن إيه المؤمنين المسلمين طلعوا يحاربوني، بعتوا لي جيش، طلع جيش الكفار. فكده أيقنوا أن هو إيه؟ النفير. ابتدوا يجادلوا النبي عليه الصلاة والسلام في الأمر ده، وهم بيجادلوه بيقولوا له إيه: طب نرجع؟ طب نجيب مدد من المدينة؟ قال لهم: مدد إيه؟ ما احنا هم في المدينة طلعوا!
المهم دار نقاش في الحته دي، لكن الشاهد اللفظ القراني: ﴿يُجَادِلُونَكَ فِي الْحَقِّ بَعْدَمَا تَبَيَّنَ﴾ [الأنفال: 6]، بعد ما عرفوا أن هو النفير الحرب، ﴿كَأَنَّمَا يُسَاقُونَ إِلَى الْمَوْتِ وَهُمْ يَنظُرُونَ﴾ [الأنفال: 6]. ودي أصلح الأحوال أنك رايح لموتك وأنت شايف أنك رايح تذبح، وأنك رايح تتشنق، دي حالة صعبة جداً. وبعدين من أول الآية دي بقى تبتدي البشريات: ﴿إِذْ تَسْتَغِيثُونَ﴾ إلى آخر الآية، البشارات اللي احنا قلناها دي.
وبعدين ربنا يقول آية عجيبة جداً: ﴿يَا أَيُّهَا الَّذِينَ آمَنُوا اسْتَجِيبُوا لِلَّهِ وَلِلرَّسُولِ إِذَا دَعَاكُمْ لِمَا يُحْيِيكُمْ﴾ [الأنفال: 24]. شوف المقابلة بين اللفظين: ﴿كَأَنَّمَا يُسَاقُونَ إِلَى الْمَوْتِ﴾، ﴿اسْتَجِيبُوا لِلَّهِ وَلِلرَّسُولِ إِذَا دَعَاكُمْ لِمَا يُحْيِيكُمْ﴾.
يعني أستفيد إيه من أن أمر الله هو الحياة؟ أنت فاهم مش فاهم ده موضوعك، مش لازم تفهم ولا لازم تعرف الحكمة، بس اللي لازم تبتيقن منه أن أمر الله هو الحياة. طب العقل كده؟ الغي العقل! لو العقل موديك لناحية أنك تخالف الأمر، اشطب على عقلك! لفظ صريح وواضح اهو، ما فيهوش مجاملات ولا إيه ولا بنطبطب وننداوي، عقلك استعمله تفهم الحكمة ماشي، ما فهمتش ألغه تماماً ونفذ الأمر، ما بقاش في رفاهية أننا ننداوي في المسألة دي ليه؟
هضرب لكم مثال مثلاً أحداث آخر الزمان. لسه قايلين لكم: دخل عليك بيتك، سيبه يقتلك. العقل يقول ده هل عقل واحد فينا يقول ده مستحيل؟ ده احنا بعد ما نعرف الحكم ده من النبي عليه الصلاة والسلام فينا اللي هيقوم يقاتل! وسيدنا النبي بيقول لك إيه: إن خفت أن يبهرك شعاع السيف، ألقِ ثوبك على وجهك، غمض عينك، ارمي حاجة على وشك لغاية ما يقتلك ويمشي. هنا احنا قدام نزاع رهيب: بالنص وعقل، هتعمل ايه؟
وأنت لو ما تدربتش على ده في الحياة العادية، أنت متخيل هيجي لك فجأة؟ بلاش، زي لسه من شويه بقول لكم اهو إنه فتنة المهدي، المهدي الشيعي ويخرج عندنا نصوص كتيرة بتقول: المهدي بتاعنا هيجي لمكه وهو كاره أصلاً أنه يبايع والناس غصب عنه يبايعوه بين الركن والمقام، أحاديث كتير في المهدي. فمهدينا معروف هيخرج منين ومعروف شكله إيه ومعروف، والثاني بتاعهم لا ده خارج من فارس، من بلاد فارس. ومع ذلك الناس هتفتن!
طب يا جماعه النصوص ده؟ هم اللي بيحاربوا اليهود؟ ده هم اللي ذلوهم؟ ده هم اللي دمروا إسرائيل؟ عقل! هيضيع الناس، فتنة عظيمة. يا جماعة عندنا شرع، عندنا دين، عندنا نصوص، اركن على جنب، أنت مين أنت؟ أنت عملت ايه؟ أنتوا عملتوا إيه؟ بتوع السنة اهو!
بلاش، المسيح الدجال يخرج ومعه جنة ونار، ومعاه نهرين، نهر مية ونهر نار، ولك الخيار. سيدنا النبي بيقول لك عليه الصلاة والسلام: «ماؤه نار وناره ماء»، غمض عينك وروح للنار وانزل اشرب. جماعة، احنا واحنا قاعدين في الأوضة كلام لطيف، وقت الفتنة أنت بيتقال لك: الغي ده! الغيه! وامشي ورا نص، روح للنار وانزل. والله أعلم والله أعلم غالب الظن أن اللي بينزل في والله أعلم أنا ما أعرفش يعني بس اللي بينزل ما بيطلعش هنا وهنا يعني هو أنت باختيار، لأن لو بيطلع خلاص هتبان، يعني أنا لما انا هشوف ده طلع من النار وشارب ومزقطط والثاني اتحرق خلاص ما بقتش فتنة، أو هيحصل الله أعلم بس هي فتنة لكل واحد يعني، ما أعرفش بقى يعني ما أعرفش هتحصل إزاي بس هتحصل.
وهيطلب منك أنك نص قدام عقل واختار، فاحنا داخلين على حقبة أو مش داخلين أنا يعني بقول يعني حقبة آخر الزمان كده هي كلها فتن، نجاتها في اتباع النص، وكل أو جل الأحداث النصوص فيها مخالفة لمقتضى العقل. فحضرتك اللي ما دربتش نفسك على كده أنت حر، اللي كل شوية تعمل لي فزلكة فيها وكل نص عاوز تخالفه أنت حر. دي عاقبة مصادمة النصوص بالعقول، قول اهو.
في غزوة بدر حصل موقف عجيب جداً في نفس القضية دي، الحباب بن المنذر يجي للنبي عليه الصلاة والسلام في أول الغزوة خالص، فيقول له يا رسول الله -الأول النبي عليه الصلاة والسلام نزل في منزل، نزل أصحابه في منزل- فقال له الحباب قال له يعني هذا المنزل منزل أنزلكه الله، فليس لنا أن نتقدم أو أن نتاخر؟ أو هي الحرب والرأي والمشورة؟ قال: «بل هي الحرب والرأي والمشورة». قال: فإن هذا ليس بمنزل. ماشي دي دي فايدة تانية بس مش وقتها يعني.
قال له إيه: غلط المكان اللي احنا فيه ده غلط، أنا لي رأي تاني: نغور الآبار ونروح لأول بير يبقى احنا بنشرب ما يشربوش، قصة طويلة كده. فالنبي عليه الصلاة والسلام استجاب لأمر الحباب ولقى أن أمره صح وراح عمل ده، مش قضيتنا دي.
قضيتنا في أول جملة دلوقتي، وهو جاي عقله بيقول له إيه: احنا مكان غلط. عقله بيقول كده، يقوم يبدأ الكلام ازاي؟ وحي فهنسلم وهلغي ده؟ «هذا منزل أنزلكه الله، فليس لنا أن نتقدم أو أن نتاخر ولا ناخد وندي مع بعض؟» قال: «لا، ناخد وندي مع بعض». قال: ده مش منزل! شايفين القاعدة دي مستقرة إزاي؟ هو جاي مش مقتنع بالمنزل، بس قبل ما يتكلم وحي: سمعنا وأطعنا. طب عقلك؟ هلغيه! هلغيه! هو ده المنزل خلاص، هلغي عقلي.
فاحنا محتاجين مع نصوص الوحي- اه، نعمل العقل في فهم النص طبعا، نعمل العقل في معرفة الحكمة طبعا، نعمل العقل في- هدم النص؟ ده اللي عمله مين؟ الأربعين ولي اللي كانوا واقفين على الجبل، اعملوا العقل في هدم النص! أنا أنا بكرر أربعين ولي، احنا ما بنتكلمش عن عن ناس فسقة ووقعوا في ذلك، فكانت العقوبة: ﴿أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّىٰ هَٰذَا قُلْ هُوَ مِنْ عِندِ أَنْفُسِكُمْ﴾ [آل عمران: 165].
في بدر كان المسلمين قتلوا سبعين وأسروا سبعين، في أحد الكفار قتلوا من المسلمين سبعين، فربنا نزل في سورة آل عمران: ﴿أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا﴾ اتقتل منكم سبعين، ﴿قُلْتُمْ أَنَّىٰ هَٰذَا﴾ قتلتم سبعين وأسرتم سبعين في بدر، ﴿قُلْ هُوَ مِنْ عِندِ أَنْفُسِكُمْ﴾ أنت اللي عملتوا كده نفسكم بإيه؟ بمخالفة فئة صغيرة لأمر واحد.
هنا بقى ربنا لم يحابي، ليه؟ ما احنا في بدر كسبناكم، بس قلنا لكم خدوا بالكم من الدنيا، خدوا بالكم من الغنائم، بس كسبناكم، وعشان الدرس ده ما يتوهش فتحنا السورة به خلاص. جيت أحد وقعتوا تاني، لا بقى هتذوقوا العقوبة ليه؟ تربية وعقوبة شديدة، ده يعني كاد يخلص إلى النبي وكاد أن يقتل، خلص إليه وكاد أن يقتل صلى الله عليه وسلم وكسرت رباعيته وشج وجهه، يعني عقوبة شديدة وأشيع أنه قد مات.
فمحتاجين يا جماعة نشتغل، نعمل يعني خلاص وقت السماع، وإن شاء الله بكره بعده التسويف اللي هو زي إيه بتاع غزوة تبوك كده خلاص ضاع. احنا كده فات قد ايه؟ ساعة؟ طيب نقف هنا عشان كمان إيه نلحق بقى نصلي، الليل ما حدش نايم النهارده خالص. قول قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير