بسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته كما صليت على آل إbrahim إنك حميد مجيد. أما بعد؛
هذا لقاء استثنائي، نحاول فيه أن نستعرض بعض الهدايات التي تفيدنا في التعامل مع تلك الأحداث التي تجري، وفيما يبدو أن وتيرتها ستزداد يوماً بعد يوم والله أعلم. ندخل على طول من غير دباجات ولا مقدمات كعادتي.
أول حاجة يا جماعة، وهو المعنى الأساس الذي دائماً ندندن حوله -واللي معايا من سنين عارف كأنه متوقع أول معنى هنتكلم عنه إيه في درس النهارده أو في لقاء النهارده- وهو: لابد لأهل الإيمان أن يشهدوا فعل الرب عز وجل في كل ما جرى وما يجري. الصوت واضح يا جماعة؟ حد عنده صوت كويس؟ طيب، في ناس مش بيقطع. خلونا نتفق على حاجة، أول ما حد يتكلم عن الصوت، اللي عنده صوت كويس يكتب إنه صوت كويس؛ خلاص، يبقى كده مش من عندي يعني.
نرجع تاني، أول معنى أو أول الهدايات: أن نشهد فعل الرب عز وجل فيما جرى وما يجري وما سيجري في الكون إلى أن يرث الله الأرض ومن عليها. وده مهم جداً يا جماعة، لأن في خضم الأحداث ربما يذهل أهل الإيمان عن هذا المعنى؛ أنه لا يكون في كون الله عز وجل إلا ما أراده الله سبحانه وتعالى. ﴿وَلَوْ شَاءَ رَبُّكَ مَا فَعَلُوهُ﴾، وقال سبحانه وتعالى: ﴿وَلَوْ شَاءَ اللَّهُ لَسَلَّطَهُمْ عَلَيْكُمْ فَلَقَاتَلُوكُمْ﴾. يبقى الله عز وجل هو الذي يسلط العباد بعضهم على بعض ولو شاء سبحانه وتعالى ما فعل العباد ما يفعلون.
فكل ما يجري هو من فعله سبحانه وتعالى، وفعله سبحانه وتعالى هو أحكام الفعل وألطف الفعل وأجمل الفعل سبحانه وتعالى. الكلام ده يا جماعة مهم، ما هواش دباجات؛ لأننا نتكلم في أصل الاعتقاد، نتكلم في أصل الاعتقاد في التوحيد. لأنك في خضم الأحداث لو خالط قلبك أن ما يجري هو فعل البشر منفرداً عن فعل رب البشر سبحانه وتعالى، فيبقى في قلبك كده إن أمريكا هي اللي بتعمل، ولا إسرائيل هي اللي بتعمل، ولا الدول العظمى، ولا التحالف الفلاني، وذهل قلبك عن الله سبحانه وتعالى؛ فده معناه خلل في الاعتقاد وخلل في التوحيد.
بل نرى أن هذا الكيد وهذا المكر الذي يكون من العباد لا يخرج أبداً عن تقدير الله عز وجل، لا يخرج أبداً عن تقديره سبحانه وتعالى؛ هو الذي قدره، وهو الذي شاء، وهو الذي أراده، ولو لم يرده سبحانه وتعالى ما كان. ﴿وَاعْلَمْ أَنَّ لَوْ اجْتَمَعَتْ الأُمَّةُ عَلَى أَنْ يَنْفَعُوكَ لَنْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَ، وَلَوْ اجْتَمَعُوا عَلَى أَنْ يَضُرُّوكَ لَنْ يَضُرُّوكَ إِلَّا بِشَيْءٍ قَدْ كَتَبَهُ اللَّهُ عَلَيْكَ، رُفِعَتْ الأَقْلَامُ وَجَفَّتْ الصُّحُفُ﴾.
طيب، ده يفيدنا إيه؟ أول حاجة يفيدنا الاطمئنان لقدر الله عز وجل؛ لأننا كما قلنا الله عز وجل هو الحكيم، والحكيم لا يفعل شيئاً عبثاً سبحانه وتعالى. والحكيم لا يفعل شيئاً إن كان غيره أفضل؛ يعني يكون إنه جرى في الكون وكذا يبقى ده أحكم شيء، أحكم شيء. ده في هذا الموطن وفي غيره، احنا الكلام ده بنعيده ونزيده، احنا هننتقل من هذه النقطة لغيرها بس لابد أن نرسخها؛ لأن في ناس ما بتحضرش معانا من زمان، وحتى اللي بيحضروا معانا من زمان لابد أننا دايماً نمرر هذا الكلام على قلوبنا.
في ناس بتقلق من مقادير الله عز وجل، يعني كأن المعنى هو بيقول: لو أنا معايا مقاليد الكون، لا يكون الكون على غير ذلك، بالذات بقى يعني احنا يمكن دلوقتي الموضوع شوية بعيد عن أهل السنة هو إيه يعني كفر وروافض، لكن احنا هنيجي للكلام ده بعدين يعني بعد شويه إن شاء الله. إنما حتى يا جماعة، حتى إذا سلط الأعداء على أهل السنة، نحن نرى هذا الفعل في الكون هو الأحكم والاجمل؛ ليه؟ لأنه فعل الرب عز وجل، لأنه تقدير الله عز وجل. اه، ممكن يبقى شيء مؤلم لأهل السنة زي إخواننا ما حدث لإخواننا في غزة وفي غيرها من الأماكن، اه لما نبص كده نشوف الأمر مؤلم، لكن هذا لا يعني أنه لو كان حاجة تانية كانت تبقى أحسن.
وده يا جماعة اللي بيحصل، اللي هو احنا عاوزين نقترح على الله عز وجل. إياكم في أزمنة الفتن وأزمنة الحروب وأزمنة الأحداث العظام أن يتسرب هذا المعنى إلى قلوبكم، اللي هو: ليه يا رب ده يحصل؟ وكأن لو أنت -يعني لو ست مقاليد حكم الكون- زمانك عملت غير كده، وشايف إن غير كده أحكم. ده فين ده إن شاء الله؟! يبقى فعل الله عز وجل هو أحكم شيء، فعل الله عز وجل هو أحكم شيء.
يبقى اطمئن لما تجري به المقادير حتى لو ما أنتش عارف الحكمة، وهو ده الاشكال الكبير اللي بيحصل عند الناس المتدينة؛ أنه ما بيبقاش واخد باله من الحكم، إيه الحكمة في كذا؟ إيه الحكمة أن ده يحصل؟ ما بيبقاش عارف. مش لازم تعرف، لكن يستقر في قلبك أنه طالما حدث يبقى حدث لحكمة. وأنا كتبت منشور، قلت لكم دايماً مرروا في المنشور -يعني أول ما تلاقي لخبطة مرر على قلبك على طول-: أصل الشر في الكون إيه؟ أصل الشر في الكون اللي احنا عايشين عليه ده إيه رأيكم؟ إيه اصل الشر في كل الكون ده من لدن آدم إلى قيام الساعة؟ إبليس مش كده؟ الله عز وجل هو مين اللي خلق إبليس؟ الله. طيب مين اللي لما طلب إبليس أن ينظر أنظره الله جل وعلا؟
كأني دلوقتي لو قلت لواحد فيكم: لو وسد الأمر إليك، يعني إبليس قال إيه: يا رب أنظرني، فوسد الأمر إليك -يعني لو فلان قال: ينظر، ينظر- كنت هتنظره؟ عاوز الردود، كان حد فينا بعقله يقول: اه، ننظر إبليس؟ ها، إيه رأيكم؟ مستحيل أظن، مش كده؟ عقولنا قاصرة يا جماعة، عقولنا قاصرة. أنظره الله عز وجل، أنظره ومش بس كده؛ مش مهم، مش عايزين ندخل في إبليس بس المهم يبقى الخلق والإنذار جميعاً فعل الله عز وجل. ويجي في الآخر إبليس هو أصل الشر في الكون ده.
طيب، ليه؟ عشان في حكم من إنذاره. خدوا بقى الكلمة اللي جاية دي، خدوا بقى الكلمة اللي جاية كمان دي أخطر:ها، وإن كان في شر في إنذار إبليس فالخير في إنذاره أكبر. إيه ده؟ جبتها منين دي؟ جبناها أن الشر ليس لليه، والشر ليس إليك؛ فالله عز وجل لا يقدر الشر المحض. احفظوا يا جماعة الكلام ده، دي عقيدتنا، عشان ده اللي هيريح قلوبكم الفترة اللي جاية، احنا مش عارفين الأمور هتوصل لفين ولا عارفين، بل بالعكس أنا مني أنا كنت هقول لكم ولا عارفين الأمور هتمط ولا لا. هو أصلاً في مني في منكم، منكم دلوقتي ناس بتسمعني مش في مصر؛ يعني في ناس بتسمعني في دول الخليج، في ناس بتسمعني من سوريا، في ناس بتسمعني من الأردن، في ناس بتسمعني ففي ناس أصلاً طالها شيء من ذلك.
فلنطمئن لمقادير الله عز وجل خلاص، أنظره الله عز وجل، أنظر إبليس. فنقول: يبقى الإنذار ده في شيء كان أحكم منه، أنه لو لم ينظر إبليس ما كانش زمان فيه شر، ما كانش في زمان حروب، وما كان. فنقول: لا والله أبدا، والله أبدا، بل خلق إبليس وإنذاره هو الأحكم وهو الفعل الأجمل لأنه فعله سبحانه وتعالى. يبقى ربنا لا يقدر شرا محضا، ولا يقدر شيئا يربو شره على خيره. احفظوا بقى الكلام ده، يبقى ربنا لا يقدر الشر المحض، ولا يقدر شيئاً يربو شره على خيره. اه، ممكن يبقى في شر جزئي على إنسان بعينه أو على طائفة بعينها، لكن مجمل قدر الله عز وجل أن خيره يزيد على شره، ولذلك «والشر ليس إليك».
المشكلة فين؟ أن ممكن بعضنا ما يبقاش عارف الخير فين، ما يبقاش عارف أن ده فيه خير، مش عارف حكمة ربنا إيه من ده. كونك جاهل بحكمة الله عز وجل لا ينفي الحكمة. ماشي؟ يعني عدم العلم ليس علما للعدم؛ يعني أنت ما تعرفش أن في حكمة مش معناها أن ما فيش حكمة، لا، هو في حكمة بس أنت اللي مش عارفها. فده بنقوله ليه دلوقتي؟ علشان اللي طالوا شيء من الأذى منكم يطمئن لقدر الله عز وجل، واللي لسه ما طالوش شيء من الأذى فطاله في يعني قابل الأيام برده يبقى مطمئن لقدر الله عز وجل، وأن فعله سبحانه وتعالى كله جميل سبحانه وتعالى.
ماشي، احنا بس اللي بنستعجل. طب احنا دي اللي هو مين؟ اللي هو الناس الفسقة؟ لا، الناس المتدينة، نص، لا الأولياء. قد يستعجل الأولياء، ناس دينها قوي، ناس تربية النبي محمد صلى الله عليه وسلم ويستعجلون. مش كده حصل ولا ما حصلش يا جماعة؟ أن لما أتى إلى النبي عليه الصلاه والسلام وهو متوسد برداً له في ظل الكعبة: ألا تستنصر لنا؟ ألا تدعو لنا؟ أما ترى ما نحن فيه؟ بأي شيء أجابه صلى الله عليه وسلم في آخر حديث قال: «ولكنكم تستعجلون، ولكنكم تستعجلون».
فيتبقى الأولياء ممكن يجي عليها وقت تستعجل، بل يعني في في قراءة: ﴿حَتَّى إِذَا اسْتَيْأَسَ الرُّسُلُ وَظَنُّنَّ أَنَّهُمْ قَدْ كُذِبُوا﴾، وفي قراءة: ﴿قُدِّبُوا﴾ -يعني على بعض التأويلات بس هي مش عايزين بقى ندخل في الحته دي- المهم فده ممكن يقع في قلوب الأولياء، يحتاجوا لإيه بقى وقتها؟ يحتاجوا لمثبتات كالتي نحن نذكرها الآن. يبقى ده أول معنى يا جماعة، أن كل ما يحدث وما سيحدث الأيام اللي جايه كله فعل الله سبحانه وتعالى. أمريكا قالت، وإسرائيل عملت، والحلف مش عارف إيه عمل إيه، واتحدوا على ايه؛ كله فعله سبحانه وتعالى، ولو شاء سبحانه وتعالى لمنع عباده من أيدي هؤلاء لو كلهم اجتمعوا. لو الأمة كلها اجتمعت على أن يضروك بشيء والله أقسم بالله لن يحدث إلا أن يشاء الله عز وجل أن يصل إليك هذا الشر.
ماشي، يبقى ده أول معنى عاوزين ننتبه ليه. المعنى الثاني يا جماعة، وهو معنى مهم لكن مش هفصل فيه دلوقتي يعني أشير إليه سريعا، وإن شاء الله هيبقى في يعني لقاء هينزل، لقاء هو يعني لقاء هيبقى خاص لكن هينزل على اليوتيوب بعديها إن شاء الله؛ يعني ممكن الجمعة بالكتير ينزل إن شاء الله، فممكن نسحب في هذا الأمر، لكن عاوزين نشير إليه سريعا هنا لأنه هداية مهمة جدا في التعامل مع الأحداث يا شباب ويا نساء ويا رجال وكل الناس.
أرجوكوا افهموا ما يريده الشيطان منكم، منكم ده اللي هو مين؟ اللي هو احنا اللي لسه عندنا رفاهية أن احنا نقعد نكتب على الفيسبوك وعلى غيره من المواقع؛ لأن في إخواننا لنا إخوان ما عندهمش الرفاهية دي. طيب، لما يكون احنا عندنا تلك الرفاهية أن احنا لسه عندنا قدر من الأمن، وقدر من الصحة النفسية والطاقة أن احنا نقعد نكتب على الفيسبوك وغيره، نقوم نستخدم هذا فيما يريده الشيطان منا.
ماذا قال صلى الله عليه وسلم؟ ألم يخبر أن الشيطان قد أيس أن يعبد في جزيرة العرب؟ لكن، ولكن في إيه يا شباب؟ إيه الكلمه؟ إيه اللفظ النبوي؟ ولكن مستنيكم تقولوا لي أنا ببقى عاوز تفاعل عشان أعرف بس أن إن انتو سامعيني: «ولکن في التحريش». اه، نقوم نجي في أحداث عظام، في أحداث عظام، أنا دلوقتي ما بقولكش أنت بتخالف رافضيا، لا، ده المتدينون، أهل السنة، الناس المتدينة المحترمة داخلين يشتموا في بعض، ويزيدوا على دين بعض، على إيه؟ احنا لسه الحرب لم تبدا يا جماعة، الفتن اعظم والله الفتن أعظم من هذا، احنا الحرب لم تبدا ولم يعني يدخل فيها أطراف كثيرة، ده احنا لسه أول يوم حرب، وتلاقي أهل الديانة اللي اللي فاهمين كويس مراد الله عز وجل منهم في الاجتماع ونبذ الفرقة داخلين يشتموا في بعض، ويفسقوا بعض، ويبدعوا بعض، ويزيدوا على دين بعضهم، على إيه؟ على أمور محتمله، على أمور محتملة.
ما حدش يعلق من النساء خالص، وفسقة الرجال اللي بيدخلوا على الخاص عند النساء اللي بيتعلق حسابكم على الله ونحن في شهر رمضان، ماشي عشان واحدة باعتة أن في رجالة بتخش لها على الخاص دلوقتي فسقطوا الرجال اللي بيدخلوا للنساء على الخاص حسابكم على الله ولن ينجو واحد منكم بفعلته أمام الله عز وجل، ماشي.
طيب، أرا- دي أهوه دي احنا بنتكلم في إيه وبنقول الأحداث عظام والناس في الغفلة واللي داخل ما يشم حاجة غير شهوته، على غير شهوته، ولا غير أنه يفسق، ولا غير حاجة في منتهى القرف، حاجة في منتهى القرف. فنرجع تاني، يبقى يا جماعة يا أهل الديانة، يا أهل الصلاح، هذا مراد الشيطان منكم، مراد الشيطان منكم أن يبقى في بينكم هذا التحريش.
طيب، في إيه اللي حصل؟ مات هذا الرافضي الخبيث، بل رأس في الخبث والشر: خامنئي. ماشي، احنا عندنا إمام مشهد معقد، هذا المشهد مشهد معقد، أنا أنا مش جاي أحلل سياسة، أنا مش جاي أحلل سياسة، أنا جاي أحل إشكالات بين المتدينين.
لان الوضع ده مش هينفع في اللي جاي. الوضع اللي احنا فيه ده مش هينفع في اللي جاي، إن على كل صغيرة وكبيرة هيبقى شتيمة من أهل الدين وخناقات من أهل الدين وفرقة بين أهل الدين، مش هينفع. ديننا يحلق! قال صلى الله عليه وسلم: «هي الحَالِقة، لا أقول تحلق الرأس أو تحلق الشعر، ولكن تحلق الدين». هي إيه بقى؟ إيه اللي بتحلق الدين إيه؟ يلا يا جماعة، قولوا لي إيه اللي بتحلق الدين؟ ما إيه اللفظ النبوي؟
فساد، لا مش ده، فساد ذات البين، فساد ذات البين. فهذا الذي يحدث بيننا الآن بيننا، ده اللي هو مين؟ قلنا لكم الناس اللي فاكرة نفسها متدينة. طيب أنا هنا أفكك هذا المشهد فقط، إنما مش هينفع في كل مرة نقعد نذبح أصواتنا. ماشي، مات واحد، خامنئي مات. المشهد في غاية التعقيد والتركيب، ما هواش حاجة يعني واضحة علشان يجتمع عليها الناس، ليه بقى في غاية التعقيد والتركيب؟ لأن هذا الرجل كان رأسا في ويلات ذاقها إخواننا في سوريا وفي غيرها، سوريا ولبنان وغيرها، ويلات أنا مش هينفع أحكي عنها دلوقتي، لكن هي ويلات تفوق تصور أي حد.
الويلات اللي حصلت على يد الروافض أو هذا يعني هذا النظام وذاقها إخواننا في تلك البقاع تفوق التصور، يعني لما نسمع عنها بس، احنا كنا بنقعد بالأيام والليالي في حالة نفسية صعبة جدا، وده واحنا بنسمع مش شفنا، ما حصلش فينا ولا في إخواننا، يعني في منهم معرفة شخصية. طيب، فانت النهارده جاي عاوز حد مثلا من إخواننا في سوريا مثلا تلومه إذا فرح بموته؟ غريب جدا، يعني هذا غريب الحقيقة.
أما تيجي واحد في سوريا دلوقتي، وبعدين هو شاف بعينيه اللي حصل من هؤلاء وقاسى منه الأمرين، وبعدين ويمكن يعني تضرر في نفسه أو في إخوانه أو في أمه أو في بنته، فيفرح أن هلك هذا، تيجي أنت تلومه أو تيجي تقول له أنت موالي للصهاينه؟ فين ده؟ طب والناحية الثانية؟ الناحية الثانية واحد تلمح معنى الآخر، وهو أن خامنئي وهذا النظام مات في حرب، مات في حرب الرافضي فيها أقرب لأهل السنة من اليهودي بلا شك. ماشي؟ وهذا كلام العلماء، عشان بس ما حدش ييجي يزايد على دي يقول لك الاتنين عندنا واحد، ما فيش حاجة اسمها، يعني ما فيش ده لا، ده كلام العلماء، ومن كل يعني اللي قاعد معنا أشعري ولا صوفي هيلاقي العلماء الثقات بيقولوا كده، واللي قاعد معنا سلفي هيلاقي ابن تيمية بيقول كده، فده كلام العلماء، ده مش كلامي، ها؟ ده مش.
فممكن واحد يحزن، يحزن أن مات هذا على أيدي هؤلاء، يعني ده إيه؟ نظرة نظرة جابوا لكده، ماشي؟ أو أن جاء بعد مساندة من هذا النظام لإخواننا في غزة، وده حصل برضه، ما حدش يزايد على يقول لك ضرب ولا مش مسألة ضرب ولا ما ضربوش ولا دي. وأنا جاي النهارده يعني يعني إيه أواضح الواضحات، ليه ساعد؟ مش قضيتي. ليه ساعد؟ ولا أنا بقول لك أنا حزنت ولا فرحت، أنا ما بقولش أنا شعوري إيه أصلا، أنا بقول لك ما تتحولش لمسألة ولاء وبراء، ييجي واحد يحزن على كده يعني يحزن على موته، مش لانه بيحب الروافض، مش لانه بيحب الروافض، لا، لانه تلمح معنى أحزنه، فيقوم يرمى بإيه؟ بأنه موالي لمش عارف إيه، مميع لمش عارف إيه، تلك الأمور التي المعلبة اللي محفوظة.
فطيب، احنا نعمل إيه؟ احنا نعمل إيه؟ لا نكون طرفا في هذا، يعني إيه؟ يعني واحد فضفض بكلمتين، واحد من إخواننا في سوريا مثلا لما مات فرح ففضفض بكلمتين، راح واحد داخل شاتمه، لا يجاريه، يحذف تعليقه، يعمل له بلوك وخلصنا، وخلصنا ليه؟ لأنك عارف أن ده مراد الشيطان منك أن يحرش بين أهل الدين. طيب، واحد من إخواننا العكس بقى، واحد من إخواننا في غزة فلما مات خامنئي زعل، فراح كتب حاجة زي تدوينة زي كده ولا منشور على الفيسبوك أنه زعلان لموته، فدخلوا يشتموه، يمسح التعليق، يعمل بلوك وخلصنا، لا نجارى هؤلاء. طب لا نجاريهم وبعدين نعتقد فيهم إيه؟ نعتقد فيهم هم إخواننا برضه، إخوان اللي هو اللي هو دخل شتمك ده يعني هو أخوك برضه، أخوك، لكن هو غالب عليه الشعور الآخر.
ماشي؟ مين بيقول الشيعه أقرب للسنة؟ أقرب للسنة من اليهود والنصارى، يعني ده إجماع، يعني إيه مين بيقول إجماع؟ عاوزين كلام صريح، في ابن تيمية بيقول، والشطار بقى يجيبوا كلام ابن تيمية يحطوه أو غيره، يعني يجيبوا كلام ابن تيمية ويجيبوا كلام غيره، عادي، ماشي؟
طيب، أنا إيه اللي يعنيي دلوقتي يا جماعة؟ إيه اللي يعنيني يا شباب؟ اللي يعنيني أننا ما نبقاش ما احناش مدركين ما يراد ما يراد لنا وما يراد بنا، مع صريح ألقاب النبي عليه الصلاة والسلام في مثل هذا، ماشي؟ يعني إيه؟ مع صريح ألفاظ النبي عليه الصلاة والسلام في مثل هذا؟ يعني أنه ولكن في التحريش بينهم، يبقى هيقول إيه تاني النبي؟ يعني سيدنا النبي عليه الصلاة والسلام هيقول لنا إيه تاني؟ فعيب لما نلاقي المتدينين هم اللي بيعملوا ده، خلاص؟
طيب أنت يا سيدي شايف أن غيرك في حته مش فاهمها، بقلة الأدب هيفهمها ولا بأنك توضح له الأمر بطريقة النصح التي تقبل؟ ماشي؟ يبقى نوضح، يعني حتى لو أنت شايف أن في حته معينة أخوك مش فاهمها، أخوك ده اللي هو اللي هو السني، ماشي؟ من أهل السنة، ومش فاهمها، تقوم توضحها له ازاي؟ تدخل تشتم فيه وتطعن في نيته وتطعن في دينه وتطعن في ولائه وبرائه، ولا تبينها له بطريقة يقبل بها النصح؟ يبقى دي مسألة ثانية.
الهداية الأخرى التي نريد أن ننبه عليها هي أن الأمن نعمة عظيمة يا جماعة، الأمن نعمة عظيمة، وامتن الله عز وجل عليها بها على أقوام في القرآن: ﴿فَلْيَعْبُدُوا رَبَّ هَذَا الْبَيْتِ * الَّذِي أَطْعَمَهُم مِّن جُوعٍ وَآمَنَهُم مِّنْ خَوْفٍ﴾ [قريش: 3-4]، فالامن نعمة عظيمة. والاستهانة بالأمن خلل في الطبع وخلل في العقل وخلل في الشرع. ماشي، فاحنا نسال الله عز وجل دائما أن يحفظ علينا أمننا، أن يحفظ أو إخوانكم جابوا لكم كلام ابن تيمية في مسألة الروافض وغيرهم، أن يحفظ علينا أمننا.
ولا نستعجل البلاء، وهذا توجيه النبوي: «لا تتمنوا لقاء العدو». الحرب يا جماعة ما هياش أمر سهل. ماشي، طب احنا جايين نخذل؟ ما احناش جايين نخذل، احنا بنقول توجيه النبي عليه الصلاة والسلام: «ولا تتمنوا لقاء العدو، وإذا لقيتموهم فاصبروا»، يعني إذا كتب علينا القتال قاتلنا وصبرنا، وإذا كنا في فسحة من ذلك فلا نستعجل البلاء، لأن الحرب بلاء. وكثير أقول لكم إنه إذا كان الجهاد هو ذروة سنام هذا الدين، فالفرار يوم الزحف من أكبر الكبائر. ماشي؟
فانت مين قال لك بقى إنك هتكون الفارس المقدام في إذا كتبت عليك الحرب؟ ليه ما تكونش الآخر اللي هو هيتولى إذا التقى الجمعان؟ طيب نعمل إيه؟ ما نعملش أي حاجه، احنا نسال الله العافية أن يسلمنا من ذلك. طيب إذا كتب علينا ذلك صبرنا وقاتلنا ودافعنا وعن ديننا بكل ما نملك. ماشي، يبقى فاستعجال هذا الأمر ما هواش ده المنهج، خصوصا أننا لا نملك أمرنا أصلا، يعني احنا اللي هو أنا وأنتم، يعني يعني ما فيش حد هنا يملك قرار حرب أو قرار سلم، مش بتاعتنا، مش بتاعتنا، طب احنا إيه اللي نعتقده؟ إيه اللي ندعي ربنا بيه؟ ندعو الله عز وجل بالعافية والسلامة. العافية فين؟ مش بس في الدين، في الدين والدنيا، بل كان صلى الله عليه وسلم لا يدع هذه الكلمات حين يمسي وحين يصبح: «اللهم إني أسألك العفو والعافية». فين بقى يا جماعة؟ في ديني ودنياي وأهلي ومالي. فنحن نسال الله عز وجل العافية في الدين والدنيا والأهل والمال، ومش مرة ولا اثنين، كان لا يدع النبي صلى الله عليه وسلم، لا يدعو أن أن يدعو الله عز وجل بهذه الكلمات حين يمسي وحين يصبح، فنحن نسال الله عز وجل العافية والعفو في الدين والدنيا والأهل والمال.
طيب كتبت علينا الحرب وكتب علينا القتال، القتال الشرعي الذي نذب فيه عن ديننا، خلاص هذا نبذل فيه الغالي والنفيس، نبذل فيه المال والنفس، برضه ده بحوله وقوته سبحانه وتعالى، ما هواش احنا لا بجدعنتنا ولا بإرادتنا ولا بقوتنا ولا هنعمل أي حاجة. ماشي؟
فدي مسألة تانية، طبعا الأمن ياتي معه الطعام، دايما في القرآن تلاقوا الاتنين متصلين دايما، والحرب من تبيعات الحرب دايما أن الاتنين دول يحصل فيهما نوع خلل. يعني شوفوا الآية اللي احنا قلناها: ﴿فَلْيَعْبُدُوا رَبَّ هَذَا الْبَيْتِ * الَّذِي أَطْعَمَهُم مِّن جُوعٍ وَآمَنَهُم مِّنْ خَوْفٍ﴾ [قريش: 3-4]، فتلاقوا دايما الاتنين دول مع أوقات الحروب يحصل فيهم نوع خلل، يقل أو يكثر بقى، يعني ممكن دول مشتركة في الحرب مباشرة يحصل فيها خلل شديد في الأمن وخلل شديد في الأمن الغذائي، دول ما هياش في الحرب لكن تاثرت مثلا بالملاحة في قناة السويس أو بغيرها أو بغيرها، فيحصل لهم نوع خلل ما هواش صحيح زي الدول اللي شاركت في الحرب، لكن يحصل له خلل سواء في الأمن أو الغذاء.
طيب اللي عاوزين نقوله إن أول حاجه نرى ذلك نعمة، أول حاجه، وفي الحديث اللي كلكم هتلاقيكم عارفينه: «من أصبح معافى في بدنه، آمنا في سربه، عنده قوت يومه، فأنما حيزت له الدنيا». فشوفوا ازاي اللي أصبح عنده قوت اليوم وآمن، ده كأنما حيزت له الدنيا، خلاص، مش عاوزين حاجة تانية من الدنيا.
طيب هذا الأمن عندنا إشكال فيه شوية، هذا الأمن أو يعني تحصيل الغذاء عندنا في إشكال. أول الاشكال، أوله إشكال، احنا عندنا كذا إشكال الحقيقة، عندنا كذا إشكال، أول إشكال أن احنا عندنا خلل في الأولويات، عندنا خلل في الأول، يعني إيه خلل في الأول؟ يعني يا جماعة لازم يكون عندنا ديننا أغلى وأولى من أي شيء، وهذا أوله الاشكال، لأن كثير منا للاسف إذا أصيبت الدنيا بنوع خلل يبتدي يضطرب قلبه ويشتد اضطرابه وينزعج أشد الانزعاج، وممكن يكون دينه يسلب منه واحدة واحدة وهو مش دريان أو هو عادي مش فارقه معاه. ماشي؟
فده نذير شؤم، يعني دلوقتي الحرب دي دايرة، وزي ما بقول لكم أنا بيسمعني دلوقتي فئات كتير من بلاد كتير، ماشي؟ فانا عارف أن في منا من تأذى أصلا من ويلات الحرب، حتى لو مش دي ففي حروب قبلها في المنطقة كثيرة، ومنا من لم يصله شيء من ذلك، فكلامي بيحاول يغطي كل المساحات. فاللي منه مثلا إذا هو لا يابه إذا فاتته الصلاه أو خرج وقته أو فاتته الجماعة إن كان رجلا أو فاتته الأذكار أو فاته شيء من أمور دينه، فهو عادي، الموضوع عنده سهل، فإذا فاتته وجبته ناح وصاح، راى ذلك شيئا كبيرا، فلا يراجع نفسه، ربما كانت واحدة من حكم أن يبتلي الله عز وجل عباده بمثل هذه الأزمات أن نراجع أنفسنا يا جماعة، هو احنا إيه اللي أهم عندنا؟ دين ولا دنيا؟
فدي أول مسألة. المسألة الثانية أننا مهما شفنا، احنا لسه ما شفناش، وده برضه خلل، يعني في الحديث حديث عجيب جدا، قال صلى الله عليه وسلم: «يا أبا ذر، أرايت إن أصاب الناس جوع شديد لا تستطيع أن لا تستطيع أن تقوم من فراشك إلى مسجدك؟» يعني هذا الجوع ما أظنش أن معظم الناس ذاقوا منه شيئا، ممكن يكون بعض إخواننا هنا أو هناك رأوا شيئا من ذلك، سمعنا أن في غزة، نسال الله عز وجل أن يفرج عنهم وأن ينصرهم وأن يخذل عدوهم وأن يهلك عدوهم، فهو القادر على ذلك سبحانه وتعالى، سمعنا أن بعضهم رأى شيئا من ذلك، إنما معظم اللي بيسمعني دلوقتي يمكن ما يستوعبش أن في درجة كهذه من الجوع: «أرايت إن أصاب الناس جوع شديد لا تستطيع أن تقوم من فراشك إلى مسجدك؟ كيف تصنع؟» فقال: الله ورسوله أعلم. قال: تعفف، إلى آخر الحديث.
طبعا هو هنا الجوع الثانية: «يا أبا ذر، أرايت إن أصاب الناس موت شديد يكون البيت فيه بالعبد، البيت يعني القبر، بالعبد بالوصيف، كيف تصنع؟» قال: الله ورسوله أعلم. قال: اصبر. شوف هنا يا جماعة إيه الأمن والطعام؟ شوفوا حاضرين بقوة ازاي حتى في الاحاديث؟ جوع شديد، يعني ما فيش طعام، قتل شديد، يعني ما فيش أمن، فشوفوا ازاي الاتنين دول النبي عليه الصلاة والسلام يقرن بينهم، بل قرن بينهم الله عز وجل.
وده الخلل الثالث الواقع وهو الأهم في مسألة الأمن دي، ماشي؟ قال الله عز وجل: ﴿وَقَالُوا إِن نَّتَّبِعِ الْهُدَى مَعَكَ نُتَخَطَّفْ مِنْ أَرْضِنَا ۚ أَوَلَمْ نُمَكِّن لَّهُمْ حَرَمًا آمِنًا يُجْبَى إِلَيْهِ ثَمَرَاتُ كُلِّ شَيْءٍ رِّزْقًا مِّن لَّدُنَّا﴾ [القصص: 57]. تعالوا يا جماعة نتأمل هذه الآية، لأن ده من الخلل الواقع الحقيقة، وده أشد الخلل في مسألة الأمن، ماشي، أو أو نقص الغذاء، لأن احنا عاوزين هنرجع نقول لكم مش عاوزين اضطراب، مش عاوزين اضطراب قلوب إذا حدث نوع من ذلك، بلاش يبقى في جشع، بلاش يبقى فيه يعني كل واحد ما يفكرش غير في نفسه، وده هيزود الأزمات في بلادنا.
وعلى إخواننا المحتاجين، الذي هو أول الدرس، بقى أن نرى ذلك فعل الله عز وجل، فننتصرف مع هذه الأحوال بحكمة، وبإيمان، وببعقيدة. تعالوا كده نتأمل هذه الآية: ﴿وَقَالُوا إِن نَّتَّبِعِ الْهُدَى مَعَكَ نُتَخَطَّفْ مِنْ أَرْضِنَا﴾ [القصص: 57]. يعني لو سمعنا كلامك، كلام النبي عليه الصلاة والسلام، هنؤذى، هنتخطف من أرضنا.
ده اللي هو ممكن بنسمعه دلوقتي من بعض الأنظمة ومن بعض الحكومات أو كذا، اللي هو والله احنا إيه لازم نبقى تحت الهيمنة العالمية وإاحنا أي حيود يعني الهلاك ويعني الدمار ويعني كذا وكذا. طبعا احنا ما احناش دراويش يعني ما احناش جايين نقول إيه برده، لكن احنا في بُعد إيماني في هذه المسألة يا جماعة، في بُعد إيماني في هذه المسألة. فتعالوا لو سمحتوا أنا لو في جزء خطير في هذا الدرس بعد أول جزء، اللي هو أن نرى فعل الله عز وجل، فهو الجزء اللي جاي ده، فَعاوزين نركز فيه جدا جدا، ماشي؟
هنا بيقولوا: ﴿وَقَالُوا إِن نَّتَّبِعِ الْهُدَى مَعَكَ نُتَخَطَّفْ مِنْ أَرْضِنَا﴾ [القصص: 57]. هم بيقولوا كده، بيقولوا إن لو سمعنا كلام الدين، لو سمعنا كلام الشرع هنؤذى، وهيضيق علينا، وهتفرض علينا العقوبات، وهيحصل كذا وكذا. بأي شيء أجاب الله سبحانه وتعالى؟ ﴿أَوَلَمْ نُمَكِّن لَّهُمْ حَرَمًا آمِنًا يُجْبَى إِلَيْهِ ثَمَرَاتُ كُلِّ شَيْءٍ رِّزْقًا مِّن لَّدُنَّا﴾ [القصص: 57].
يعني إيه بقى الكلام ده يا جماعة؟ يعني ربنا بيقول لهم ده إنتوا كفرة! كفرة، كفَرة! مَكنا لكم حرما آمنا. شوفوا يا جماعة هنا برده الأمن، بصوا يا جماعة، الأمن والطعام. مَكنا لكم حرما آمنا، ادي الأمن؛ ﴿يُجْبَى إِلَيْهِ ثَمَرَاتُ كُلِّ شَيْءٍ﴾ [القصص: 57]، ادي الطعام؛ وده إنت كفر، رزقا. ها، كملوا كده: ﴿مِّن لَّدُنَّا﴾ [القصص: 57]. يعني ذلك الأمن الذي أنتم فيه هو رزق من لدنّا، وتلك الثمرات التي تُجبى إليكم هي رزق من لدنّا. يقوم لما تسمعوا كلام النبي عليه الصلاة والسلام، يقوم لما تطبقوا الشريعة، يقوم لما تبطلوا الأمور المخالفة للشرع هتتخطفوا من الأرض؟! عجب والله! إذا كانوا كفرة -يعني في الآية- يعني إذا كان وأنتم كفرة هذا فعله بكم سبحانه وتعالى، وأنتم تعبدون غيره، تعبدون الأصنام -وأنتم تعبدون الأصنام- يقوم لما تعبدوني هيبقى ده حالكم؟ ده يا جماعة ده احنا لو ظنينا كده بملك من ملوك الدنيا، نقول هنقول عليه ملك خسيس! مش كده؟ أن احنا لما نسمع كلامه يقوم يسلمنا لعدوه، وعدونا ده يبقى ملك خسيس!
طيب، هنا ييجي الأول قبل ما نقول الإشكال، قبل ما نقول الإشكال، تعالوا يا جماعة كده نتخيل، نتخيل الآتي. دلوقتي الكلام ده: بُعث النبي عليه الصلاة والسلام -أنا بقول لكم اهو ده أهم جزء في الدرس بعد أول الدرس، ماشي؟- نتخيل المشهد، المشهد أنه خرج رجل اسمه محمد بن عبد الله صلى الله عليه وسلم، يقول: أنا نبي عليه الصلاة والسلام. فابتتدى الناس كده إيه يشوفوه، أحواله وصدقه وبتاع. خلاص ده النبي عليه الصلاة والسلام، وكان في مكة، وبعدين ابتدت تحصل بقى بعض الإشكالات التي يعكر بها القوم على دعوته، فكان منها هي الإشكال ده، اللي هو: والله لو اتبعنا الهدى معك نتخطف من أرضنا، يعني لو اتبعناك على اللي أنت بتقوله ده هيحصل وهياحصل فينا.
طيب تخيلوا كده يا جماعة الآتي، تخيلوا المشهد ده أنه ما حدش يتبع النبي عليه الصلاة والسلام، يعني ما كانش فيه لا أبو بكر اتبع، ولا عمر اتبع، ولا عثمان اتبع، ولا علي اتبع، ولا الناس دي اتبعت خالص النبي عليه الصلاة والسلام، تتخيلوا؟ تتخيلوا الناس دي بعد مئة سنة من عدم اتباعهم كانوا هيبقوا أحرزوا إيه؟ أنا عاوز تفاعل معايا. يعني كانوا هيعيشوا ممكن كانوا يعيشوا في أمن جزئي؟ صحيح. وأمن غذائي جزئي؟ آه، ممكن كان ده يحصل لهم فعلا -أنا بقول تاني، ده أهم جزء في الدرس- لكن وبعدين؟ كانوا هيعيشوا ويموتوا أوباشا من أوباش العرب! دول يا جماعة كان لا يُؤبه لهم أصلا، يعني كان عندنا زمان حاجة اسمها الفرس، وحاجة اسمها الروم، والعرب دول شوية أوباش كده، آه، يقعدوا يتخانقوا مع بعض، ويفتخروا في الأشعار أن هم قبائل تغير على بعض، تغير، يعني تغير على بعض، هي دي أشعار العرب!
إنما العرب يروحوا مثلا يحاربوا فارس؟ ولا العرب يروحوا يحاربوا الروم؟ لا، احنا هنا شوية أوباش عمالين إيه، قبيلة تغير على قبيلة، ونطلع نقول شعر نفتخر فيه بالخمرة والنساء والقتل والحاجات دي، ماشي. إنما فارس والروم؟ لا، دول احنا بعيد عنهم، لدرجة أنتم عارفين لما في قصة كده، بعد الإسلام بقى، وبعدين راحوا مش فاكر فارس ولا الروم، وبعدين يعني بيقول لهم إيه القائد؟ يعني قائد هو فاكر العرب بقى زي زمان، راح جاب القائد بتاع الجيش، قال له: بقول لك إيه، هديك لكل واحد من الجيش ثوب، جلابية، ومش عارف مبلغ كام كده، وارجعوا! هو مش في دماغه، يعني مش في دماغه أن العرب تغيرت بهذا الدين، فهو بيعامل العرب اللي هو عارفهم: هديك ثوب لكل واحد من الجيش ومش عارف مبلغ كام كده، وأنت هديك ثوبين أنت، جلابيتين، قائد يعني.
فكان زمانهم فين؟ كان زماننا لا ده احنا بعد مئة سنة احنا كنا نملك العالم! أنتم فاهمين يا جماعه؟ احنا يا جماعه، احنا في سرد الأحداث التاريخية عشان نأخذ العبرة منها، علشان دي هتثبتنا يا جماعة، هتثبتنا! محتاجين ساعات أن احنا ما ندخلش لا نستغرق في التفاصيل، عاوزين نطلع كده لفوق نشوف إيه المشهد من فوق شوية يعني، نمرر السنين ونشوف إيه مشهد في أوله ومشهد في آخره. مشهد في أوله أنه شرذمة قليلة تخفي دينها، فعلا تؤذى -ودي هنجي لها كمان شوية- فعلا تؤذى، وفعلا منهم من يقتل، وفعلا منهم من يؤذى في عرضه، وفعلا ده حدث، أيوة حدث، وده هنجي لها كمان شوية إن شاء الله.
وبعد نط بقى -يعني نط من المشهد ده، وغيرهم من مشركي قريش يعبدون الأصنام في منتهى الأمن، ويُعلون عقيرتهم، ويصدعوا بكفرهم، والفئة المؤمنة مش قادرة تعمل ده- نط نط بقى كده أحداث كتير كتير وتفاصيل كتير مش وقتها ولا عاوزينها، ماشي؟ نط كده لإيه؟ خمسين، ستين، مئة سنة قدام، هتشوف مشهد عجيب جدا جدا، هتشوف تلك البقاع بعينها وهي يلبى فيها لله، ويعبد فيها الله، وليس فيها صنم واحد يعبد من دون الله! وهؤلاء الذين كانوا بالأمس هم اللي خايفين ومستضعفين وكذا ملكوا الأرض، ملكوا الأرض!
طب ده من غير ضريبة؟ أبى الله ذلك! أبى الله ذلك! يعني إيه من غير ضريبة؟ يعني ربنا سبحانه وتعالى، سنن الله عز وجل في كونه تأبى ذلك يا جماعة، تأبى أنه يعطي ذلك التمكين إلا ببذل، إلا بتضحية، ماشي. ولله دَر الشافعي لما قيل له: أيما أحب إليك أن يُمكّن للرجل أو يُبتلى؟ قال: لا يُمكن له حتى يُبتلى. فسنن الله عز وجل تأبى ذلك، خلاص.
طب تعالوا نرجع تاني لأيه بقى؟ ﴿وَقَالُوا إِن نَّتَّبِعِ الْهُدَى مَعَكَ نُتَخَطَّفْ مِنْ أَرْضِنَا﴾ [القصص: 57]. يبقى الله عز وجل رزقنا ونحن نعصيه سبحانه وتعالى، ورزقنا ونحن نبارزه بالمعاصي ونبارزه بالكبائر، حتى وإن هذا الكلام كلام للأفراد، وكلام حتى لو قدر الله عجل أنه يسمعني في الأيام مسؤول من المسؤولين، ما يكونش في صدورنا وقلوبنا هذا الظن بالله سبحانه وتعالى أبدا أبدا، أن واحنا بعيد عنه بيرزقنا ومآمننا، ولما نقرب منه هيسلمنا!
تقول: الله يا شيخ، طب ما احنا مش فاهمين، طب ما هو فعلا بيحدث شيء من ذلك؟ آه، نقول: لما يحدث شيء من ذلك ده مش إسلام، مش بيسلمنا لأعدائنا، لا، ده تمحيص لنا! فاهمين الفرق يا شباب؟ فاهمين الفرق؟ لان دي نقطة عاملة إشكال كبير عند الناس، ده ما هواش إسلام لنا، ده تمحيص لنا، ده تربية، ده إعداد، فنراه على ذلك الوجه، ماشي؟
وده برده طبعا كل مسألة من دول هي مسألة كبيرة ومحتاجة وقت، ولعلنا ممكن يعني لو الأحداث طالت أن نفرد -احنا طبعا أفردنا قبل كده في دروس ممكن تسمعوها تفيدكم في المسائل دي- ولعلنا إن شاء الله نسهب في كل مسألة من تلك المسائل فيما بعد إن شاء الله.
طيب، الأمر أو الهداية اللي بعد كده أنه ماذا يريد الله عز وجل منا في مثل هذه المواقف؟ هل يا جماعة ربنا سبحانه وتعالى في مثل هذه المواقف يريد مِنّا أننا ننكب على الأحداث بتفاصيلها، فنبقى قاعدين للسقطة واللقطة زي ما بيقولوا، كل صاروخ يُطلق أو يُقذف نبقى عندنا علم بيه؟ هذا والله والله ليس مراد الله عز وجل مِنّا، ده اللي هو مين؟ اللي هو أنا وأنتم يعني، ماشي؟ احنا لا احنا من صناع القرار، ولا احنا من اللي عندهم صواريخ يرموها، ولا أنا وأنتم ناس مساكين! هذا ليس مراد الله عز وجل مني، وأنا أقسمت على ذلك، أنك تبقى قاعد متابع عن كثب للأحداث، هذا ليس مراد الله عز وجل منك، بل هذا يصرفك عن مراد الله! بل أولا هذا يكرهه الله منك! كره الله لنا ثلاثا، فكان منها قيل وقال! الحق المنصة الفلانية بتقول أن حصل كذا، الحق القناة الإخبارية الفلانية بتقول أن حصل كذا، الحق قيل وقال.
طيب ليه ربنا كره منّا قيل وقال؟ لأنه يضيع الأعمار! يضيع الأعمار! فده ما هواش مراد ربنا منّا يا جماعة في هذه الأحداث، اتقوا الله في أعماركم! ما هواش مراد ربنا منا في هذه الأحداث أنك تبقى بسرعة تنشر شر الأخبار، ده ما هواش مراد ربنا منك، اتقوا الله عز وجل في كل كلمة تقال في مثل هذه الأوقات. قال الله عز وجل: ﴿وَإِذَا جَاءَهُمْ أَمْرٌ مِّنَ الْأَمْنِ أَوْ الْخَوْفِ أَذَاعُوا بِهِ﴾ [النساء: 83]. ده مش مراد ربنا منا، ماشي.
امال إيه مراد ربنا منا؟ مراد ربنا سبحانه وتعالى منا في هذه الأوقات أن نرجع إليه هو، إذا كان هو مصدر الأمن اللي أنا، فنرجع لمصدر أماننا. طب نرجع له بأيه؟ نرجع له بالعبادات؟ ده كلامي لا، ده كلام ربنا وكلام النبي عليه الصلاة والسلام في اوقات الفتن وفي اوقات الحروب وفي مثل هذه الأوقات احنا محتاجين لجوء لربنا، زائد: محتاجين لجوء لربنا: بادروا بالأعمال فتناً كقطع الليل المظلم. يبقى بادروا بالأعمال، ولعل من حكم الله عز وجل أن يحدث ذلك في رمضان، فانا لو قلت لك دلوقتي وظائف الوقت زادت أو قلت؟ المفروض المفروض احنا في رمضان لنا وظائف، وكل واحد منا بادئ رمضان بوظائف -ده لسه هاجي لكم كمان شوية المعنى- إني الوظائف وحدث ما حدث.
مع حدوث ذلك أول سؤال وعاوز جواب، عاوز نشاط، أنا وأنتم أنا بتكلم الناس المساكين اللي زينا، أنا وأنتم، اللي هو إيه؟ مع حدوث هذه الأزمات وهذه الحروب وكذا وكذا، المفروض وظائف هذه الوظائف تزيد ولا تقل مننا؟ إيه رايكم؟ ولا تفضل زي ما هي؟ يعني إيه رايكم عشان بس نشوف الدماغات اللي معانا يعني. عشان لو: تزيد! حد عنده كلام ثاني يا جماعه؟ أنا بجد بسأل بجد يعني، حد شايف أن مع هذه الأزمات وهذه الحروب وهذه الكذا وكذا وكذا المفروض أنا وأنتم تلك الوظائف تقل مننا أو تفضل زي ما هي؟ يعني أنا شايف كله بيقول تزيد، خلاص.
طيب لو احنا متفقين على كده، السؤال الثاني: معظم الناس اللي أنا وأنتم برده أنا وأنتم، معظم الناس مع بداية هذه الأحداث وظائفنا زادت ولا قلت؟ إيه رايكم؟ مع بداية الأحداث هتلاقوا أن معظم الناس وظائفها قلت! وظائفها قلت! يبقى أنت كنت بتجيب كم جزء في اليوم؟ قل. القرآن؟ قل. كنت بتصلي تهجد وتراويح؟ قلت الصلاة. كنت بتعمل كذا؟ قل. ليه؟ منشغل بالأخبار، بتفاصيل الأخبار! عشان في اختكم أو أخوكم -ما اخدتش بالي يعني بنت ولا ولد- بيقول: ما نبقاش منقطعين عن ال يكفيك أنك تعرف أمور كده من بعيد كده وخلاص، إنما متابعة التفاصيل عن كثب لا هتفيدك شيء وهتضرك! لا هتفيدك شيء وهتضرك!
يحضرني هنا موقف جميل، وننخرج منه بحكمة، ولعلها تكون الخاتمة اللي نختم بيها، والموقف ده إخواننا اللي حضروا معايا كتاب الماجريات عارفينهم كويس، موقف المسيري رحمه الله، موقف في غاية العجب. المسيري هو كاتب أكبر موسوعة تتكلم عن اليهودية والصهيونية. حدث موقف عجيب جدا جدا، وانا يعني أتعجب حقيقة لهذا الموقف. الحقيقة المسيري وهو في أثناء كتابته لتلك الموسوعة موسوعة اليهودية والصهيونية، حصلت الحرب بين مصر واليهود! حصلت الحرب بين مصر واليهود، وانا عاوزكم تتخيلوا هذا المشهد، يعني اللي منا حضر -مش هقول لكم بقى حرب- اللي حضر ثورة، ولا اللي حضر كورونا، ولا اللي حضر كان ازاي يعني إيه عاكف على الأخبار! تخيلوا بقى حرب، وطبعا من منا من إخواننا بقى اللي حاضرين معنا من سوريا ولا من غيرها من البلاد، والأردن، وغيره، وغيره، يعني منهم اللي شاف بقى حروب، فهو فاهم يعني إيه حرب كويس جدا، اللي بقاله تدخل حرب، فازاي بيكون الناس متعلقة جدا بأدق تفاصيل الحرب؟
المسيري عمل حاجة عجيبة جدا يا جماعة، المسيري قفل على نفسه المكتبة، وأمر القريبين منه أن ما حدش يكلمه عن الحرب خالص! مش عاوز يعرف حاجة عن الحرب، ورای أن إنشغاله بتفاصيل الحرب هتعطله عن مشروعه -احفظوا الكلمة اللي جاية دي عن مشروعه، كلمة مشروعه دي حطوها بين قوسين كده وحطوا تحتيها عشرة عشرين خط- لأن الإشغال بتفاصيل الحرب هتعطله عن.
المشروع اللي هو عايش عشانه، اللي هو إيه؟ كتابه تلك الموسوعة، موسوعة في اليهودية والصهيونية. أنا هنا بقول لكم ليه أنا بتعجب من فعل المسير يا جماعة؟ أولاً أنها حرب، وثانياً دولته بلده طرف في الحرب، ولغاية هنا ده عجيب، عجيب أن واحد ينقطع عن حرب بلده طرف فيها، اللي جاي أعجب بقى، اللي جاي أعجب، أنه مشروعه هو جزء من هذه الحرب، هو بيتكلم عن اليهودية والصهيونية، طب واحنا حربنا مع مين؟ مع اليهود والصهاينة. فكونه أنه ينعزل عن تفاصيل تلك الحرب ليه؟ علشان ينتهي من مشروعه، دي عجيبة جداً.
طيب، احنا ليه مش قادرين نعمل ده دلوقتي يا جماعة؟ وعشان كده قلت لكم: حطوا كلمة مشروع دي بين قوسين، أحسنت أهو يحيى جابها، احنا بلا مشاريع. أحسنت، يعني دي اللي هو زي ما بيقولوا إيه التيك هوم مسج بقى، يعني زي ما بيقولوا، اللي هو الحاجة اللي عاوزين نخرج بيها من الدرس. يعني احنا افتتحنا الدرس بأهم شيء هو أن ترى فعل الرب عز وجل في كل ذلك، وبنختم الدرس دلوقتي بإيه بقى؟ بأنك لازم يكون لك مشروع.
هو مشكلتنا فين؟ عشان كده أعمارنا بتضيع واحنا مش دريانين أننا بلا مشاريع. لو مسكت كل واحد وواحدة فيكم دلوقتي قلت له: تعال يا ابني، أنت مشروعك إيه يا ابني في حياتك؟ بلاش في حياتك يا جماعة، بلاش في حياتك عشان احنا، مش لازم يكون مشروعك مشروع كبير، خلونا دلوقتي احنا في رمضان، خلونا نمشيها إيه بالحته كده باليوم باليوم. فلو مثلاً أنت مشروعك في رمضان اللي داخل بيه رمضان مثلاً، أنك تختم عدد من الختمات، عادي، من اللي داخل يختم ختمة، ومن اللي داخل يختم 30 خاتمة، ومننا اللي داخل يختم 60 خاتمة، أياً كان بقى عدد الختمات اللي أنت داخل بيها بادئ رمضان بمشروع.
فاقول لك: تعال يا ابن الحلال، تعال يا بنت الحلال، هل مشروعك ده تضرر بمتابعتك للأخبار؟ يقيناً هتقول لي: اه، تضرر يا شيخ، يقيناً. ماشي، اه، أنا مشروعي فعلا، أنا كنت داخل أختم كذا، كنت داخل أصلي كذا، كنت داخل أعمل كذا، مشروعك تضرر بمتابعة الأحداث عن كسب كده؟ اه تضرر. ارجع يا ابني لمشروعك يا ابني، ارجع لمشروعك. طب أنا ما ليُش مشروع؟ حط لنفسك يا ابني مشروع. ليه؟ لأنك يوم القيامة يا مسكين، يا مسكين، لو جيت يوم القيامة وأنت تجهل تفاصيل الأحداث، ربنا مش هيسالك عن تفاصيل الأحداث! حد عنده مشكلة في دي يا جماعة؟ حد يرد عليا، هل حد عنده إشكال في ده؟ يعني حد عنده تصور كده أنه لو جه يوم القيامة وما يعرفش كم صاروخ اترمى يوم كذا، والصواريخ دي كل صاروخ نزل فين، ويا ده احنا، ده احنا وصلنا لمنطقة أبشع، اللي هو إيه؟ أنا عاوز اجيب نفس الخبر من كذا مصدر عشان أعرف الصاروخ نزل فين، والصاروخ ضرب الهدف ولا ما ضربوش، وعمل اللي حصل ده ولا ما حصلش؟ هل لو أتيت يوم القيامة وأنت تجهل تلك التفاصيل ستحاسب يعني أن أنت تجهل تلك التفاصيل؟ حد عنده إشكال في ده؟ ما أظن أن حد عنده إشكال في ده.
ماشي. إنما إنما لو لقيت ربك يوم القيامة بقى وقد قلت عبادتك، وقل يقينك، وقل إقبالك على ربك، وقل خشوعك في صلاتك، هنا بقى الإشكال، هنا الإشكال.
ماشي، طيب، يعني احنا نعمل إيه دلوقتي؟ أول حاجة بعد ما تقفل الدرس، أول حاجة حط لنفسك مشروع. المشروع ده مش لازم يبقى مشروع كبير زي مشروع المسير اللي بيعمل موسوعة تفيد الأمة، أنت ممكن يبقى مشروعك، ممكن يبقى مشروعك: أنا عاوز أختم المصحف يا جماعة، احنا داخلين على أحداث عظام، هل هي بداية أحداث النهاية؟ الله أعلم، أنا معرفش، أنا مش بقول ده، فالأحداث هتكر بعضها، وفي لحظة، في لحظة هتيجي تفتح المصحف مش هتلاقي قرآن، يرفع القرآن! في لحظة هيحصل كده، أخبر عن ذلك الصادق المصدوق صلى الله عليه وسلم. فانت ممكن تخلي مشروعك للي مش خاتم أنك تختم المصحف، هقفل، أنا هقفل البث من هنا، أنا مشروعي أختم أختم المصحف، أختمه يعني يعني حفظاً.
واللي حافظ وتفلت منه القرآن؟ أنا مشروعي أني أضبط حفظي، أتقن حفظي. ليه؟ لأن يوم القيامة مش هيقال لك كل صاروخ عرفت مكانه فين هترتقي به درجة في الجنة، مش هيقال لك كده، إنما هيقال لك إيه: اقرأ وارتق ورتل فإن منزلتك عند آخر آية كنت تقرأها. هتقرا من مصحف ولا من حفظك؟ هتقرا من حفظك! مش هيقال لك: تعال لو احنا في الحرب اللي بين إيران وأمريكا اترمى مثلاً 200 صاروخ، بيترمى 1000 صاروخ، كل صاروخ هتعرف قصته إيه هترتقي به درجة في الجنة؟ مش هيقال لك كده، مش هيقال لك كده، والله ما هيقال لك كده، إنما كل آية تقراها هترتقي بها درجة في الجنة، فأيهما الآن أهم لك؟
اللي أهم ليك يا ابني أنك تختم المصحف يا ابني، الأهم ليك يا بنتي أنك تختمي المصحف، أنك تضبط المصحف يا ابني. ماشي، خلي بقى عندك مشاريع من دي، عندك المصحف ده مشروع، عندك أورادك مشروع، عندك أنك تخرجي لنا جيل، ابنك وبنتك دول يخرجوا ناس فاهمين دين، يخرجوا ناس شايلين هم أمة، ده مشروع، اشتغلي عليه إزاي؟ ماعرفش، روحي شوفي هتعملي إزاي، هتربي عيالك إزاي أن الواد ما يبقاش خارج همه الشهادة، وهمه الأكل والشرب، وهمه المرتب، وهمه لا، عنده أمة، أمة، شايل هم أمة، روحي شوفي ده مشروعك، اقفلي بقى الفيسبوك اللي أنت قاعدة لي عليه ده، واقفي الانستغرام اللي أنت قاعدة لي عليه ده، واقفي التيك توك اللي قاعدة لي عليه، وسايبة عيالك مش عارفة ابنك قاعد على إيه ولا عارفة بنتك بتعمل إيه في أوضتها، مشروع، عيشي عليه.
هو الأئمة اللي طلعوا لنا دول مين اللي رباهم؟ أماتهم. أمهاتهم كان منهم أيتام، أحمد بن حنبل يتيم، الشافعي يتيم وغيرهم. مين اللي رباهم؟ أمهاتهم. يجي الواحد منهم مش لاقي ياكل، يروح عاوز يروح يشتغل عشان يصرف عليه وعلى أمه، تقوم أمه تقول له إيه؟ اقعد أنت للعلم وأنا أكفيك بمغزلي، أنا هشتغل أنا وأصرف عليك، اقعد أنت اتعلم، اتعلم العلم الشرعي، فخرج لنا هذا الجيل.
فاحنا إيه الرسالة اللي محتاجين نخرج بيها من الدرس؟ كل واحد فينا يقفل، يشوف له مشروع أو أكتر من مشروع، مشروع مش لازم مشروع يعني يفيد أمة، المشروع يفيده هو. إذا فعلنا ذلك ساعتها هنحس بقى، هنضن بالوقت، القيل والقال والحواديت اللي احنا دايرين في فلك في فلكها، ولسه الأحداث تتعاظم، ولا يعني أنا لا أتالى على الله، لكن يظهر ده ولا نريد ذلك، إنما لو حدث ده، اللي النهارده مستغرق في خمس ست ساعات، بكره هيبقى مستغرق في 18 ساعة و20 ساعة.
طيب، ده لا يا جماعة، ده ربنا يريده منا؟ احنا بنضيع أعمارنا على إيه؟ فاقفل عنك كل هذه الأبواب وكن صاحب مشروع تعيش من أجل ذلك المشروع. نقف هنا، وإن شاء الله ممكن بعد كده نبقى نزود يعني من هذه اللقاءات لو احتجنا لمثلها. قولي هذا وأستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.
الشيخ أمجد سمير