دخولتسجيل الدخول

٢- هدايات في التعامل مع الأحداث الجاريات

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذرياته وآل بيته كما صليت على آل إبراهيم إنك حميد مجيد.

أما بعد؛ فهذا هو المجلس الثاني من مجالس هدايات في التعامل مع الأحداث الجاريات. كنا المجلس اللي فات اتكلمنا عن نعمتي الأمن والطعام، وأن الله عز وجل كثيراً ما قرن بينهما في القرآن، وكذلك قرن بينهما النبي صلى الله عليه وسلم في السنة. وذكرنا بعض الآيات وذكرنا بعض الأحاديث التي قرنت بين الأمن والطعام، وأنهما من أعظم نعم الله عز وجل على الناس.

في هذه الأحداث التي نمر بها يظهر من تصاعد وتيرتها وسرعة جريان الأحداث أنه قد يحدث قريبا نوع خلل في هاتين النعمتين، في نعمة الأمن ونعمة الغذاء أو الطعام. فلا بد من هدايات في التعامل مع مثل هذه الأحداث ومع مثل هذه الفتن. طبعا أنا أكرر؛ أنا حديثي ليس لبلد بعينها أو لمنطقة بعينها، بيسمعني ناس من كل العالم تقريبا؛ فما أقوله أو أحذر منه هنا مثلاً أو أنبه على التعامل معه على أنه جاي، ممكن يكون خلاص ناس أصلاً ذاقوا ذلك، مر بهم ذلك، هم فيه الآن خلاص، سواء من اختلال الأمن أو من نقص الثمرات، فممكن يبقى في بلاد خلاص هي في اللي احنا بنتكلم فيه هي فيه خلاص دلوقتي.

فخلونا ننبه على مسألتين؛ المسألة الأولى: أنه مع حدوث ذلك يختل دين الناس. دي المسألة الأولى واللي هنبدأ بها. ومع حدوث ذلك تختل دنيا الناس ودي مسألة هنرجئ الحديث عنها، يعني هنتكلم عنها بس بعدين. ليه؟ لأن ديننا هو الأهم يا جماعة؛ أن تلقى الله عز وجل وأنت على توحيدك، لم تشك فيه سبحانه وتعالى، ولم تشك في قدرته، ولم تشك أن جريان الأمور بكن، وأن كل ما يحدث في كونه فمنه سبحانه وتعالى. هو ده اللي احنا عاوزينه الفترة الجاية، مهما ضاقت أحوالنا واضطربت تلك الأحوال، لا تؤثر على الدين، لا تؤثر على التوحيد، لا تؤثر على الاعتقاد.

فدي أول مسألة؛ عاوزين نكون مطمئنين أن الله عز وجل هو الرزاق. طبعا احنا عندنا دلوقتي حاجتين؛ أول حاجة: اختلال الأمن -احنا هنشرح إيه سبب ده إن شاء الله بعد شوية- ثاني حاجة: نقص الثمرات. لما بيحدث هذا، ببتدي الناس تضطرب قلوبهم. ومن الناس مثلاً اللي بتروح تجري.. طبعا بيظهر وقتها الفردانية بشدة؛ يعني كل واحد بيقول يلا نفسي، وكل واحد بيفكر في نفسه وفي من يعول، ويبتدي ينشغل بهذا الشأن ومالوش دعوة بغيره، وهيبتدي يجري يحصل أمنه الغذائي بأي شكل. وسامحوني في درس النهارده ممكن يكون كلام يعني لا أستطيع أن أفصح أكثر مما اقول لكن من اللي عاش ده وشاف أخلاق الناس بتتبدل إزاي في هذا الوقت..

فاحنا عاوزين في هذا الوقت -وأنا أكرر كلامي لكل البلاد عشان بس ماجيش أتكلم فناس تقول مصر بخير ومصر بأمان- لأن لا أظن بلاد المسلمين تظل في أمان وفي خير وفي رغد وكذا، لكن لله عز وجل قدر، وقدره نافذ، وسنراه شئنا هذا أم أبينا. وإن كنا نتمنى شيئاً وقدر الله عز وجل غير ذلك، فهوانا مع قضائه وقدره، فهوانا مع قضائه وقدره. فإذا جرى علينا من المقادير ما تكرهها طباعنا فنحن نحبها؛ لأنها مقاديره جل وعلا، لأنها قدره جل في علاه.

فإذا أنا أنبه على شيء فاعذروني، بل منكم لو بيسمعني ناس من برة مصر من بعض الدول هيقول: احنا أصلاً في ده؛ اللي أنت بتكلم فيه هو احنا فيه أصلاً. فحينها تظهر تلك الأخلاق، أخلاق الشح، أخلاق الاهتمام بالنفس، إن شئت فقل الفردانية؛ كل واحد بيدور على نفسه ومش همه غيره. فعاوزين يا جماعة أول حاجة ألا نصاب في ديننا حتى لو اختلت دنيانا، حتى لو جوعنا، والجوع ممكن يبقى جوع محتمل وممكن يبقى جوع غير محتمل. وجاء معنا في الحديث الذي ذكرناه وصية النبي صلى الله عليه وسلم لأبي ذر: إذا أصاب الناس جوع لا يستطيع الرجل أن يقوم من فراشه إلى مصلاه. فربما رأى بعضنا ذلك في بعض البقاع في الفترة القادمة، فنريد ألا نسيء الظن بربنا جل وعلا، وأن نرى فعله فينا هو الفعل الجميل سبحانه وتعالى، وإن كان ذلك على خلاف الهوى وخلاف الطبع الذي جبلنا هو عليه، سبحانه وتعالى هو الذي جبلنا على أن نحب الدنيا وأن نحب السعة في الدنيا، هو الذي جبلنا على ذلك سبحانه وتعالى، ثم هو يبتلينا تارة بما نحب فيوسع علينا في الدنيا ابتلاءً، وتاره يبتلينا بما نكره فيضيق علينا الدنيا ابتلاءً. فافهموا حكمة الله عز وجل، هو الذي طبعنا على ذلك، ولو شاء لطبعنا على غير ذلك، لكنه جل وعلا خلقنا وطبعنا على ذلك، ثم يفتننا ويبتلينا وفق ما طبعنا عليه سبحانه وتعالى.

فإذا فتحت علينا الدنيا فإنما تفتح لنرى الله عز وجل من أنفسنا خيراً في التعامل معها، إذن هي الفتنة. وإذا ضاقت علينا الدنيا فإنما هو فعل الرب عز وجل بنا ليرى صبرنا على ذلك الضيق.

فعاوزين لو ده حصل مع تصاعد الأحداث ممكن جدا تتقفل الملاحة المائية، ممكن جدا، ومع كذلك الشحن الجوي ممكن يقف، وهو أصلاً الاعتماد الكلي على معظم الاعتماد في الشحن على البحر؛ فده هيبقى له تبعات خطيرة. ومن هذه التبعات ما نقول؛ فاحنا عاوزين أول حاجة نخرج من تلك الفتنة وقد سلم لنا ديننا، وقد سلم لنا ديننا.

طيب هيسلم لنا دينا إزاي؟ أول حاجة: أن نحسن الظن بالله عز وجل، وإن اشتدت الأمور جداً، وهذا حدث في التاريخ، عادي، تشتد الأمور شدة لا تصور، وهذا حدث حتى للنبي عليه الصلاة والسلام، وتحبس في الشعب صلى الله عليه وسلم، وتعرفون ما حدث، بل كانت حياته المشرفة على نحو من ذلك حتى إنه يربط الحجرين على بطنه، حتى اللي أنتم عارفين ده كله. احنا مش جايين ندي درس وعظي، احنا جايين نقول بعض الهدايات التي تفيدنا إن شاء الله.

طيب؛ يبقى دي أول حاجة يسلم بها الدين. ثاني حاجة: أن ننكب على العبادة، ونسيبنا من الأخبار. الأخبار، وتيرة الأخبار لم تتسارع، اللي أنتم شايفينه ده كله احنا لسه مافيش، احنا لسه على البر، فإذا احتوتنا الأخبار وصرنا محتجزين في تلك الأخبار من دلوقتي.. أنا هتكلم، يعني إن شاء الله هحاول أفصل في هذا المجلس تفصيلاً، هذا المجلس خطير جداً؛ فعاوزين بس نركز فيه.

من دلوقتي الأخبار ابتدت تحتوينا، فالجاي وتيرته تكون أسرع، ده.. أنا لا أرجمه بالغيب إنما قانون الحرب؛ الحرب ببتدي تبتدي خفيفة، ونتمنى من الله أن كل شيء ينتهي في يوم وليلة، نتمنى من الله ذلك. طيب ما حصلش والحرب كملت، فقانون الحرب كده أن أول الحرب أخف من وسط الحرب، ده قانون الحرب، فالجاي هتكون وتيرته أسرع لو الدنيا كملت في نفس الاتجاه اللي هي ماشية فيه، ده معناه إيه؟ معناه اخبار متسارعة من هنا وهناك، لو احتوتنا تلك الأخبار ضاع ديننا. ﴿فَلَوْلَا إِذْ جَاءَهُم بَأْسُنَا﴾ [الأنعام: 43] زي ما أخوكم كتب تضرعوا.

فاحنا نريد الفترة دي والفترة الجاية مزيداً.. أول حاجة يا شباب ويا بنات ويا نساء ويا رجال، أول حاجة: التوبه والاستغفار، ونوقف أي عك بنعمله. أي عك بيتعمل يقف فوراً؛ البنت اللي مش محجبة.. أحجبي، أي كلام فوراً، فوراً تتوب لربنا سبحانه وتعالى وتخرج من هذا الدرس وقد تحجبت حجاباً شرعياً يرضي الله عز وجل. اللي منا مرابي، اللي منا بيزني، اللي منا بيواعد نساء، اللي منا مصاحب، أي حاجة، نتوب لله عز وجل فوراً منها ونقلع، ونعاهد ربنا سبحانه وتعالى ألا نعود إلى ذلك أبداً. فده أول شيء نستقبل به تلك الفتن وتلك الأحداث، اللي بيسال نعمل إيه؟ يبقى دي أول حاجة، توبة نصوح.

ثم بعد أن نخلص تلك التوبة لله عز وجل حتى من الأشياء الكبيرة اللي احنا كانت مقيدين ومش عارفين نعملها.. واحد شغلانته حرام وهو عارف أنها حرام، ده وقت أنك تترك خلاص. أي حاجة بقى.. المهم يعني مش عاوز أعدد لأن احنا زي ما قلنا درس ما هواش درس وعظي.

طيب؛ يبقى دي أول حاجة محتاجين نعملها. تاني حاجة محتاجين أن احنا لا نفتن بالقادم من الأحداث. الدرس اللي فات -ركزوا يا شباب بالله عليكم، ركزوا في كل كلمة- الدرس اللي فات أنا قلت كلمة، قلت: بعضنا يمكن فرح بموت خامنئي؛ علشان هو شايف أن هو مات في حرب، هم الأقرب إلينا من غيرهم فيها. أنا لما قلت كده ما بقولش إن الشيعة الروافض ولاد حلال، ما بقولش كده، أنا بقول هو يرى ذلك ففرح.. فحزن لموت خامنئي.

أنا ليه بقول الكلام ده؟ الروافض عقائدهم.. عندهم جملة من العقائد الكفرية، طب ليه بقول كده؟ علشان الفترة الجاية قد يفتن البعض بالروافض، فاحنا عاوزين نبقى منتبهين لهذا الشرك، إذا نصب هذا الشرك وابتدي يسوق له فلا تفتن بهذا. إياك أن تظن أن في الروافض خيراً، أو تفتن فتنتقل قلبك إلى مذهبهم الخبيث، ماشي؟ ليه؟ علشان هم اللي بيحاربوا وهم اللي واقفين في وش مش عارف مين، أوصى أن تقع في هذا ومن وقع في ذلك يوشك أن يخرج من الملة. وهنا مش وقت تفصيل في ده؛ فإذا كان هنديكم واجب فتروحوا تسمعوا في عقيدة الروافض. من فتن بذلك انتقل إلى مذهبهم، طب وده هيحصل؟ هيحصل، هيحصل من بعض الناس فقد خرج من دين الله عز وجل ولقي الله عز وجل كافراً. فمهم جداً في الأحداث اللي جاية أن احنا نبقى فاهمين كويس هذه القضية. طب اللي مش فاهم ده؟ يروح يسمع ده، ماشي، مش وقت أن احنا نعمل سلاسل عن روافض ولا غيره خالص، ده مش.. خلاص يا جماعه يعني مش وقته، اللي ذاكر ذاكر، احنا هنا بنشير إشارات سريعة عشان نلحق ديانة الناس، عشان نلحق ديانة الناس، اللي عاوز بقى يسمع يروح يسمع هو.

يبقى دي مسألة ثانية مهمة جداً عشان نحافظ على ديننا الفترة الجاية. كذلك من المهم جداً عشان نحافظ على ديانتنا أن احنا نكثر بقى من العبادات؛ «ويل للعرب من شر قد اقترب». طيب إيه وصية النبي عليه الصلاة والسلام في هذا؟ «ويل للعرب من شر قد اقترب، من يوقظ صواحب الحجرات كي يصلين». يبقى محتاجين كثيراً من الصلاة. الروافض اللي هم شيعة، شيعة فرق منها الروافض، وهم.. يعني إيران رافضية، حزب الله.. كل دول روافض، ماشي.

ليه؟ مش هتكلم عن الدنيا، عندي درس إن شاء الله يوم الخميس عن الدنيا وهيذاع على اليوتيوب، وده هيبقى درس مهم جداً جداً، فمهم تسمعوه برده، واحنا النص الثاني من درس النهارده هنشير إلى الدنيا، لكن الدرس المفصل عن الدنيا هيبقى يوم الخميس، ومهم يتسمع لما ينزل إن شاء الله.

نرجع تاني؛ يبقى محتاجين كثيراً من الصلاة، الصلاة تثبتنا، كثيراً من قيام الليل، كثيراً من الأوراد؛ زي ما قلت لكم: القرآن، اللي تفلت منه القرآن يرجع يضبط قرانه مرة أخرى، لا ندري متى يرفع هذا القرآن، لا ندري! والفتن إذا تلاحقت مش هيبقى عندك وقت ولا عندك دماغ تفتح المصحف عشان تضبط قرانك؛ فمحتاجين الرجوع لكتاب الله عز وجل قراءة وفهماً وتدبراً وحفظاً، واللي تفلت منه الحفظ يضبط حفظه، ده كله إن شاء الله يكون أماناً من الفتن.

تاني حاجة.. الحاجه اللي بعد كده عشان نحفظ دينا أن محتاجين نفهم عقيدة صح، ونربط قلوبنا بالله عز وجل، فنرى تقلب الأحوال نراها سنته في الكون سبحانه وتعالى، هو الذي يجري الأمر على ذلك، لا كيد كائد ولا مكر مكار ولا هيمنة دول ولا هيمنة أنظمه ولا كل ذلك، بل كل يسعى في مراده جل وعلا، وكل من يسعى في مراده جل وعلا يخيل إليه أنه من يدير الكون. فاحنا مش عاوزين نكون من هؤلاء، احنا نرى كل ذلك فعله سبحانه وتعالى، ونرى تدبير المدبرين نراه تدبيره جل وعلا، ونرى مكر الماكرين نراه مكره بهم سبحانه وتعالى؛ فدي عقيدتنا التي لا يمكن أن نتنازل عنها ولا أن تختل، ولا أن يختل شيء منها أبداً أبداً. فإن ضيق علينا الحال صبرنا، صبرنا به جل وعلا، مش هنصبر بقوتنا ولا بحولنا ولا بتدبيرنا -هنتكلم عن التدبير في الجزء الثاني إن شاء الله من درس النهارده، هنتكلم عن التدبير، ندبر لا باس، لكن هل هنصبر بتدبرنا؟ أبداً والله، بل نسأله سبحانه وتعالى أن يلهمنا الصبر جل وعلا، الصبر به جل وعلا والنجاة من تلك الفتن المدلهمه به جل وعلا- لا بذكائك ولا بقراءتك للمشهد ولا بتحليلك للأحداث، بل هذا عين الخذلان.

ثاني؛ إذا اعتمدت على ذلك، أو رأيت ذكاءً من نفسك في ذلك، هذا عين الخذلان! قد سلب منك دينك، قد سلب منك دينك! فما عندناش أمل في النجاة غير هو سبحانه وتعالى.

يبقى مهم جداً نصلح هذه العقائد. كذلك من المهم أن احنا نبتدي نعرف شوية أحكام في دينا خاصة -يعني لو مصطلح حديث شوية- بالأزمات، ده مصطلح حديث ماشي، خاصة بفقه الضرورات؛ تبقى فاهم يعني ايه تيمم وإزاي التيمم؟ تبقى فاهم إيه هي فرائض الوضوء؟ علشان إذا شحَّ فنقتصر على الفرائض دون السنة، سنن في الوضوء. تبقى فاهم يعني إيه صلاة خوف؟ تبقى فاهم أحوال الجمع في الصلاة؟ تبقى فاهم أحكام دفع الصائل؟

كل هذه الكلمات -إديها إيه- موجودة وهتتسجيل وهتنزل لكم إن شاء الله، راجعوها ثاني وابحثوا عنها ماشي، تبقى نبقى فاهمين الحاجات دي متعلمينها ماشي. طيب فمحتاجين نتعلم شوية في دينا يا جماعة؛ يبقى عندنا هذه الأحكام قبل أن نتعرض لها.

وهنا أنا بكرر ثاني؛ أنا بكلم ناس من كل العالم، فانا -يعني- مش مش شرط إن أنا بقول ده يبقى بقول إن البلد الفلانية، مش شرط خالص خالص، ماشي، ولا أتمنى أن هذا يحدث، لكن وما يغني عنا ما نتمناه، هو قدره جل وعلا ماضٍ فينا، حكمه عدل فينا قضاؤه جل وعلا، ماشي.

فده كله محتاجينه علشان نحفظ دينا الفترة اللي جاية دي، أن نثق في موعود الله، أن نثق في الله أولاً قبل أن نثق في موعوده سبحانه وتعالى، وأن نتعبد لله عز وجل بأسمائه وصفاته؛ هو الرزاق سبحانه وتعالى.

ومهم جداً يا جماعة -ودي نختم بها الجزء الأول من الدرس بس- أنك تعرف أن رزقك اللي مقسوم لك جايلك جايلك. بلاش بلاش تتوتر؛ مع نقص الثمرات، مع نقص الأمن الغذائي، بلاش تتوتر، ليه؟ رزقك هيجيلك، أقسم بالله العلي العظيم أن رزقك لن يذهب لغيرك، فكن على ثقة من ذلك.

آه، دبر وخذ بالأسباب، لكن قلبك مطمئن، مطمئن تمام الطمأنينة بالله عز وجل أنه اللي فاتك ده ما كانش بتاعك، ما كانش بتاعك، وبتاع والحاجة اللي بتاعتك هتجيلك هتجيلك بلا حيلة منك وبلا تدخل، هتجيلك جاية لك؛ فاطمئن وثق في موعود الله عز وجل، وثق في مقدوره سبحانه وتعالى، في قدرته سبحانه وتعالى.

وسبحان الله يا جماعة؛ قال الله عز وجل: ﴿إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ﴾ [الذاريات: 58]. شوفوا الكلمة اللي بعديها: ذو القوة. أنت عارف ممكن واحد يبقى سخي وكريم، بس ما عندوش القوة اللي يوصل بيها كرمه ده، أو لو عارضه عارض ما عندوش القوة اللي يدفع بها العارض لإيصال هذا الخير؟

الله رزاق ذو القوة، رزاق ذو قوة؛ فهو الرزاق وهو ذو القوة، ماشي. يعني أنا أرجو منكم -أنا ممكن أقفل التعليقات، لكن أنا أرجو منكم- الأمر جلل، الأمر جلل؛ فده لا وقت مناوشات ولا وقت ردود على بعض، وكل ينأى بنفسه عن ذلك، ماشي.

احنا في مجلس دين، في مجلس دين، فإذا احنا كنا بهذه الأخلاق هنا، هنبقى في الشارع عاملين إزاي؟ ماشي. طيب، كده الجزء الأول من الدرس، وهو الحفاظ على الدين، وهو الجزء الأهم يا جماعة؛ الجزء الأهم أن نخرج من تلك الفتن رابحين رابحين دينا.

طيب خسرنا دنيا؟ تولع الدنيا في داهية! الدنيا في داهية! ماشي، تأتينا منيتنا ونلقى الله عز وجل ونحن عاضين على ذلك الدين، ماشي.

طيب، عاوزين نشرح شوي، عاوزين نشرح شوي نفهم -يعني- مع بعض ما يتوقع أن تؤول إليه الأمور، ولا نريد ولا نامل ذلك ولا نريد ذلك ولا أبدا، لكن بالحسابات -يعني دلوقتي يا جماعة- عاوزين نفهم شوية الدولة الحديثة قائمة على إيه؟ علشان نفهم اللي جاي هيبقى شكله إيه، يعني -يعني إن قدر الله عز وجل ذلك-.

الدولة الحديثة قامت على المركزية؛ المركزية في كل شيء، حتى صار المواطن أو الفرد في تلك -أي دولة، أي دولة، يعني ده ده مفهوم الدولة الحديثة- صار عالة على الدولة في أمور، فلو سبته فجاه يصير كالطفل اللي مش عارف يتصرف، عارفين كده طفل مدلل بتجي له لقمته لغاية بقه وشربته لغاية بقه كل يوم، وفجاه أبوه اللي مدلعه ده مات، الطفل ده هيقعد فترة بيتخبط، مش عارف يجيب لا لقمته ولا شربته، ماشي.

هو ده اللي الدولة الحديثة قائمة عليه، يعني إيه الكلام ده؟ احنا عندنا ملفين: ملف الأمن، وملف الغذاء، اللي كنا بنتكلم عليه. يعني إيه بس الأول عشان نفهم -يعني- يا جماعة؟

دلوقتي زمان كان اللي عاوز يشرب بيعمل إيه؟ والله كل شوية مع بعض كده يروح رايحين حافرين بئر؛ عشان البير ده هيشربوا منه. واللي عاوز يشرب من الأسرة يروح رايح شايل الجردل وطالع لغاية البير علشان يجيب منه، لما يلاقوا البير ده بينضب يقوموا هم المسؤولين عن ده، هم المسؤولين عن كده، يقوموا يحفروا بئر ثاني؛ خلاص، البير ده بينضب. فكان عندهم الملكات دي؛ ملكات إن هم يوفروا لنفسهم شربة الماء.

طيب الغذاء؟ قل مثل ذلك في الغذاء، يعني إيه؟ يعني تلاقي زمان الست في البيت تعرف تعمل العملية كاملة من أول ما يبقى في إيديها شوية قمح لغاية ما يطلع لك رغيف عيش، هي عندها الملكة، ماشي.

مع الوقت تطور، حتى في الأمن، حتى في ملف الأمن؛ فكان زمان عادي جداً تلاقي كل واحد مع السيف بتاعه ولا الخنجر بتاعه اللي عادي جداً بيمشي بيه في الشارع، و-يعني- يدفع عن نفسه وكذا، خلاص، ده عادي، ده كان زمان عادي.

قامت الدولة الحديثة، والدولة الحديثة بقت لا، في سلطة في إيديها كل شيء؛ احنا مش جايين نقيم ده خالص، احنا ما عندناش رفاهية لده أصلاً، احنا بس بنفهم عشان نفهم لما الأحداث دي ممكن تعمل إيه فنعرف نبقى مستعدين لده شوية. احنا هنا مش جايين ننابذ الحكام ولا جايين نخرج على خالص، مش بنقول كده، بنقول اللي الدول اللي الأنظمه صارت فيها عاجزة عن هذا اللي احنا هنشرحه كمان شويه، فاحنا إزاي نتعامل في ظل هذه الظروف، بس كده، ماشي، ده كل الكلام يعني.

طب عاجزة دي ليه؟ لأن هو -يعني- متصور أن العالم يحصل فيه -يعني زي ما سموه إيه- لوك داون، أو معرفش بقى -يعني- هيبقى كامل أو جزئي أو غيره، لكن متصور، متصور، فأنما دي ماهياش دعوة لا منابذة حكام ولا ولا خالص، دي يعني مش دعوتنا أصلاً، لكن بنقول نتصرف إزاي، فبنفهم الفلسفة.

فكانت الدولة عشان تريح المواطن عملت إيه؟ قالت له: لا، لا، أنت مالكش دعوة بالمية خالص، أنت هيبقى عندك حاجة اسمها حنفية في البيت هتفتحها هتنزل لك مية. وهيبقى في حاجة عندنا اسمها أفران آلية مركزية، فانت هتروح المول -طبعا كل دولة بقى على حسب- يعني هتروح المول أو هتروح سوبر ماركت فهتلاقي كيس عيش هتاخده وتمشي، خلاص.

طيب مين المتحكم في ده؟ يا الدولة، يا الدولة بتنيب من يتحكم، سواء بقى الوزارة طبعا تبع الدولة أو لا، قطاع رأسمالي مثلاً أو قطاع استثماري هو اللي يتحكم، على كل حال هي شيء مركزي.

يعني إيه شيء مركزي؟ يعني أنا كمواطن أنا ماعرفش، ماعرفش أخبز لنفسي رغيف عيش. أنا كمواطن ماعرفش أتضرف لو فتحت حنفية المية فما لقيتش مية، ماعرفش أتضرف. ليه؟ نرجع تاني لمسألة الطفل المدلل؛ اللي هو بيصحى الصبح يلاقي أبوه محضر له أكلته وشربته، ماشي.

فهذا الطفل -بعد عمر طويل من إنه متعود على ده- فجاه لقى نفسه صحي ما لقاش لا الأكلة ولا الشربة، فنقول له: يلا، تعالى بقى روح انت حضر أكلتك وحضر شربتك. يقول لك: هو الأكلة دي بتتحضر إزاي؟ هي الشربة دي بتتحجاب منين؟ هو ما يعرفش! الطفل ده ما يعرفش.

أهو، احنا كأفراد في الدولة احنا كده. طيب، ده عيب ولا مش عيب ولا مش قضيتنا دلوقتي ولا قضيتنا ده خالص، ماشي؟ ليه مزايا وليه عيوب، من عيوبه من عيوبه بقى أن احنا بنسميه المركزية، ده اللي بنسميه المركزية؛ من عيوبه: عند فقد تلك المركزية يحصل اضطراب.

يعني إيه عند فقد تلك المركزية؟ تعالوا بقى نتخيل الآتي: احنا هنا يا جماعة مش بنقول نظرة سوداوية أو متشائمة، احنا بنقول أن منا -أنا بكلم كل العالم- فمنا اللي ممكن يشوف ده الفترة الجاية، أنا بقول لكم منا اللي شاف ده خلاص -يعني أنا بحكي عن واقع بعض إخواننا عايشينه، يعني أنا لو بيسمعني الناس دلوقتي من سوريا ولا ناس من غزة ولا ناس من السودان ولا ناس من اليمن، أنا بحكي واقع هم عايشينه خلاص، يعني مش بحكي واقع احنا هنشوفه، ماشي-.

طيب، مصر الحمد لله الدنيا الأمان فيها موجود، الأمن الغذائي موجود، نتمنى أن ده يفضل، نتمنى من الله عز وجل، ولا -يعني- لا نريد أن نرى شيئاً مما نتكلم عنه. حصل اختلال في ذلك، فَعاوزين نفهم، نفهم الدنيا ماشية إزاي علشان نعرف نتصرف، ماشي.

لما بنفقد السلطة المركزية دي على الحاجات الأساسية -اللي هم الملفين الكبار اللي ربنا سبحانه وتعالى أمتن علينا بهما؛ اللي هو الأمن والغذاء- ببتدي يحصل توتر شديد واضطراب؛ الناس مش عارفة تعمل إيه! الناس مش عارفة تعمل إيه لا في ملف الأمن ولا في ملف الغذاء، خلاص.

طيب، خلونا ملف الأمن هنخلصه في كلمتين علشان أنا مش الملف ده -يعني في ناس أكبر مني يتكلموا فيه- لكن عند اختلال الأمن -زي ما قلنا يعني ايه الأول الأمن المركزي؟ يكون الأمن ده شيء مركزي في الدولة، أن الدولة بتقول للناس: لا، ما فيش حاجة- في دول بتسمح بوجود السلاح مع الناس، لا، بس معظم دول العالم لا، ما فيش كده، ما عندناش حاجة اسمها كده، أنت منزوع السلاح واحنا كدولة مسؤولين عن أمانك، ماشي، وده نظام ماشي، يعني ما فيهوش إشكال، خلاص، أنتم مسؤولين عن أمن الناس كدولة والناس ما عليهاش أن هو -يعني إيه- يحافظ على نفسه، فتلاقي الناس خلاص كله ماشي في أمان، أمان الدولة.

إذا حدث اختلال واضطراب في ده، فالأمن بيحدث له اختلال واضطراب، طب احنا نعمل إيه في ده؟ أنا مش هدخل في الملف ده خالص -يعني لا يعنيني وأنا مانيش جدير إني أتكلم في ده- لكني هقول نصيحة نبوية واحدة في هذا الملف وهتجاوزه تماماً.

دلوقتي يا جماعة في فتن، في الفتن؛ عاوزين نفرق بين أمور: الفتن فيها فتن هيبتدى دي المسلمين يقتلوا بعض فيها، طب دي هتحصل؟ الله أعلم، أنا ماعرفش إيه اللي هيحصل، لكن في الفتن في فتن أخبر عنها النبي عليه الصلاة والسلام: سيقتل المسلمون بعضهم بعضاً، ماشي.

فاذا أصابنا شيء من تلك الفتن، فالنصيحة هنا -عشان نبقى قفلنا ملف الأمن بالنصيحة النبوية، أنا أنا مش راجل بتاع أمن ولا يعني أعرف أقول إيه اللي يحصل في الأمن ولا هذا الملف خالص-: أن تكف يدك، أن تكف يدك في تلك الفتن.

احنا مش بنتكلم يا جماعة عن واحد حرامي جاي بيثبتك ولا جاي ولا قاطع طريق، لا، مش كده، ولا صائل مش كده، دي كلها ملفات واضحة وفيها أحكام دفع الصائل. فتنة عامة، يعني إيه عامة؟ يقتل الرجل أخاه، ويقتل جاره، ويقتل ابن عمه، ويقتل ذاك ذا قرابته، فتنة عظيمة، المسلمين هيقتلوا الناس ديت بعضها، كله بيقتل في كله.

طيب لو ده حدث احنا نعمل إيه؟ نكف أيدينا، نكف أيدينا. يعني إيه؟ طب ده دخل عليَّ؟ آه، سيبه يقتلك! سيبه يقتلك! طيب أنا خفت لما أشوف السلاح اللي في إيده أقوم أدفع عن نفسي؟ حط الملاية على وشك وسيبه يقتلك! مالكش، لا تشارك في تلك الفتن، كن كخيري ابني آدم، كن عبد الله المقتول! دي كلها ألفاظ نبوية، كن عبد الله المقتول ولا تكن عبد الله القاتل، ماشي. فلا تشارك في تلك الفتنة لو كانت الفتنة بين مسلمين ومسلمين، ماشي.

طيب، ده الملف بتاع الأمن وما عنديش أكثر من كده أقوله فيه يعني. الملف بقى بتاع الغذاء، زي ما بقول لكم كده؛ إذا ارتفعت السلطة المركزية في هذا الملف ممكن يحدث نوع اضطراب، فاحنا نكون مستعدين لهذا، مستعدين.

طبعاً احنا خلاص، الزاد الإيماني حصلناه علشان قلوبنا؛ احنا يا جماعة لا عاوزين قلوب تضطرب ولا عاوزين -يعني مش وقت علامات تعجب وأسيبه يقتلني وكده- يعني يعني خد الكلمتين اللي بقولهم وروح دور عليهم، ماشي. احنا لا عاوزين قلوب تضطرب من هذا الكلام، وخالص خالص، بصوا يا جماعة، من الآخر كده: احنا لينا عدد أنفاس هناخدها هناخدها، والله لو مين عاوز يقلل عدد أنفاسك، نفس ما هيقدر، أنفاسك واخدها واخدها، ماشي. عاوزين بس تاتينا منيتنا ونحن نؤمن بالله عز وجل، بس.

طيب، اللي بيحصل ده كله لو مكتوب لك تموت على سريرك هتموت على سريرك. خالد بن الوليد سيف الله المسلول مات في أنهي معركة شهيد؟ حد يقول لي كده؟ حد شاطر يعرف يقول لي خالد بن الوليد سيف الله المسلول مات شهيد في أنهي معركة؟ ها؟ مات على الفراش.

مات على سريره يا جماعة، خالد لا مات في معركة ولا مات شهيد ولا مات على فراشه، وقال كلمته بقى الآية المشهورة: إدي جسمي اهو، ما فيهوش موطن إلا وفي يا أما ضربة بسيف، يا أما رمية برمح، يا أما مش عارف.

طعنه أو رميه بسهم أو طعنه برمح، وها أنا ذا أموت على فراشي! فلا نمت أعين الجبناء. فاحنا عاوزين نطمئن غاية الاطمئنان، ماشي يا جماعة؟ ونهدى تماماً تماماً. أنفاسك معدودة، ده رزقك معروف ولا دي هتنقص ولا ده هينقص، ماشي وده خلصنا منه في النص الأول. احنا بنشوف الأسباب اللي ناخد بيها واحنا مطمئنين واحنا ما فيش توتر واحنا ما فيش خوف.

طيب احنا نعمل إيه بقى من دلوقتي عشان نستعد لهذا؟ أول حاجة نحاول نرجع الملكات دي يا جماعة، يعني إيه نحاول نرجع الملكات دي؟ يعني من دلوقتي تعرفوا إزاي نعمل الحاجات اللي ما كناش بنعرف نعملها. يعني لو أنا جبت دلوقتي واحدة بنت عندها ٢٠ سنة، ولا واحدة عندها ٣٠ سنة، ولا واحدة متجوزة عندها ٤٠ سنة، قلت لها: تعالي تعالي، لو اديتك شوية قمح قلت لك: طلعي لي رغيف، تعرفي تعملي ده؟ اعريفي اعملي ده مش هتخسري حاجة، اعرفي اعملي ده.

ماشي؟ يبقى ده معنى مهم أن احنا نحاول نرجع الملكات دي، أن احنا نحاول نفهم أن كل حاجة حوالينا ده مورد ممكن نستغله بشكل أو باخر. طبعا كان عندنا فيديوهات، هي فيديوهات الداي اللي هو (دي آي واي)، بنتفرج عليها واحنا مبسوطين كده، وايه بنفنفن أن حاجة لطيفة ظريفة، لا ده وقت بقى أن احنا نتعلم الحاجات دي، نتعلم أن كل حاجة حواليا ده مورد ممكن استغله في وقت من الأوقات بشكل يعني يحل لي أزمة.

والأعظم من هذه الفيديوهات فيديوهات بقى الداي دي اللي هي (دوت يور سلف)، فيديوهات إخواننا بتوع غزة. والله احنا شفنا بركة مية كده من بعد المطر، بركة مية كلها تراب وقرف وطين، يطلع لك منها إزازة مية نضيفة! إزاي عمل ده؟ موجودة فيديوهات لإخواننا في غزة بيعملوا، ويمكن إخواننا دلوقتي اللي في اليمن، ولا إخواننا اللي في السودان، ولا إخواننا اللي في سوريا، بقى عندهم شوية ملكات من دي. ليه؟ هم خلاص اتحطوا في ده، اتحطوا في ده. طيب اللي ما تحطش في ده يتعلم، يتعلم من دلوقتي شوية الملكات اللي بيها يعرف يعمل ده، ماشي؟

كذلك من الحاجات اللي برضه تفيدنا الفترة اللي جاية، أن نفهم أن يكفي من الدنيا القليل، ونبتدي من دلوقتي نتعود على أقل القليل في الدنيا، ماشي؟ هو صدقوني أنا ما عنديش وقت، ما فيش رفاهية وقت أبداً أن احنا نشرح هذه الأمور، يعني أنا عارف أن في بعض الأمور تشكل عليكم، يعني إزاي اللي جاي يقتلني سيبه يقتلني؟ إزاي ما عارف أن دي فيها مشاكل؟ روح دور عليها، روحوا دوروا عليها يا جماعة، روحوا دوروا عليها، ماشي؟ ما عنديش ما فيش وقت، يعني ما فيش وقت أن أقعد أشرح في كل تفصيلة اللي أنا بقولها دي، ماشي؟

طيب نرجع تاني، كنت بقول إيه بقى؟ آه، أن من الحاجات يا جماعة ركزوا في الكلمة دي مهمة جداً الأيام اللي جايين دول، من الحاجات اللي بتوقعنا في وقت الأزمات، خلي بالكوا أنا من أول الدرس لآخره أنا يهمني الدين بس، النبي عليه الصلاة والسلام كان بيسال العافية في الدنيا وأن الدنيا لو اختلت ممكن دين ناس يضطرب برضه، فاحنا بنحاول نهيئ الدنيا بالشكل اللي بيه دنا نحافظ عليه بس.

فمن الحاجات، آه يعني من الحاجات اللي كنت عاوز أقولها اختكم فكرتني بيها دلوقتي، أن يعني شوفوا كده أهل الريف مثلاً عندنا في مصر، عندهم كتير من الملكات دي، آه يعني عندهم ملكات من الملكات اللي احنا بنقول ضاعت في أوسطنا، أهل الريف تلاقي عندهم كتير من الملكات دي.

طيب نرجع تاني بقى، آه من الحاجات اللي بتضيع لنا في وقت الأزمات أن احنا لم نحسن التعامل مع الموارد وقت الرخاء، وده احنا هنتكلم فيه في درس يوم الخميس إن شاء الله، درس يعني خاص لكن هينزل على اليوتيوب إن شاء الله، هو درس مهم جداً ممكن مفصل فيه يوم الخميس. لكن عاوزين نقول إيه هنا بس؟ أن احنا دلوقتي اهو في بعضنا، يعني بعضنا مش كلنا، احنا من الناس اللي بتسمعني خلاص هي خلاص وقعت في الأزمة أصلاً، هم في الأزمة دلوقتي، لكن بعضنا في نوع رخاء، ابتدي من دلوقتي اتعلم إزاي تعيش باقل من اللي أنت عايش بيه.

يعني إيه أقل؟ أقل في الفلوس؟ لا مش أقل في فلوس وكده يعني، أقل في الغذاء، يعني مش الفلوس يعني أنا مش بتكلم في الشوبنج ومش عارف إيه، لا خالص، في الغذاء، يعني لو أنت متعود تاكل، أنا مش عاوز بقى أتكلم لأن في يعني الناس مستويات، لكن متعود تاكل رز ومعاه خضار، لا أنا ممكن أكل شوية رز وخلاص ودي وجبتي عادي جداً ما فيش مشكلة، ولو مرتين في الأسبوع عادي جداً، أفطر على تمر وعادي جداً ما فيش مشكلة، وأقعد كده لغاية السحور عادي ما فيش مشكلة خالص. اتعلم، اتعلم ده، يوم لما تيجي الأزمة أكون أنا متدرب على ده، متدرب إني بعيش بأقل القليل. طب ليه؟ لاني لو جت الأزمة الكثير مش هيكون موجود، الكثير مش هيكون موجود.

دي مسألة مسألة تانية برضه عشان نعرف نتعامل في الأزمات، أنه متوقع أن الوقود يقل، ده متوقع. طيب عشان ما نقعش في الأزمة دي، يبقى احنا عاوزين بدائل، يعني إيه بدائل؟ يبقى أنت ما عندكش ثقافة أني بمشي على، طبعا وقود يعني ما فيش، حتى لو معاك أفخم العربيات ممكن ما تيجي تروح البنزينة ما فيش ما فيش بنزين، ماشي؟

طب نعمل إيه؟ يبقى أنت عندك ثقافة أن أنا بعرف أمشي، آه بعرف أمشي على رجلي عادي جداً، ممكن تستبدل ده بعجلة عادي جداً، عندك الثقافة دي، ماشي؟ فيقوم ده برضه يخفف شوية من حدة الأزمة التي لا نتمناها ولا نريدها، لكنه قدر الله، هو خلاص قدر الله نافذ، إذا قدر ذلك كان، وإذا لم يقدر خلاص وكنا في عافيه وشكرنا الله عز وجل على تلك العافية ما عندناش يعني ما عندناش مشكلة خالص.

فييبقى آه ممكن تستبدل ده بعجلة، تعرف يبقى عندك عجلة في البيت ولا أكتر من عجلة؟ ليه؟ لأن الوقود غالباً غالباً هيبقى هيشح الفترة اللي جاية فين؟ في العالم كله، غالباً والله أعلم، ماشي؟ فدي برضه مسألة ممكن شوية تقلل من حدة الأحداث عليك.

مش عاوز أسب في الحاجات دي لأن ده ما هواش دوري، يعني أنا رجل كما قال ابن تيمية: أنا رجل ملة ولست رجل دولة، لكن لو في حد، يعني أنا ما أععرفش الله أعلم، كحديث ده بيوصل لحد من المسؤولين ولا ما بيوصلش في أي حته في العالم فهو، هو ممكن يبقى الوزارات المختلفة تعمل توعيات للناس على ده، يعني وزارة ما أعرفش هيسموها يبقى وزارة الكهرباء مثلاً، طب إيه البدائل لو حصل أن، ما هو زي ما بقول لكم كده السنترلايزيشن دي مخليها أو المركزية مخليها أن دلوقتي في محطات كهرباء كبيرة للدولة، طب المحطة دي اتضربت؟

ماشي، ده أنا ما بتكلمش عليه في مصر يعني، مصر الحمد لله في أمان، لكن في بعض الدول ده حصل خلاص، يعني احنا بنتكلم في واقع الناس عايشاه، فتلاقي المحطة اتضربت، تعالي يا مواطن بقى تعرف توفر لنفسك؟ تلاقيه عمال يخبط يمين مش عارف يعمل إييه، مش عارف، طب هو اللي قبلنا عاشوا إزاي يا جماعة؟ يعني اللي قبلنا عاشوا إزاي؟ ما قبلنا عاشوا وماتوا من غير كهربا!

فتلاقيه مش ما عندوش ثقافة أنه إزاي مثلاً يعرف يحفظ الطعام من غير ثلاجة؟ ما عندناش الثقافات دي، ما عندناش الملكات دي، مفهوم؟ محتاجين نبقى عندنا الثقافة دي، إزاي نعرف نحفظ الأكل من غير ثلاجة مثلاً؟ إزاي إيه أنواع الأكل التي ممكن تستخدم في هذا الوقت، ماشي؟ إيه الإضاءة؟ إزاي نعرف ننور لنفسنا؟ إزاي المية تسخن؟ وهكذا، ماشي؟

فمحتاجين يبقى عندنا تلك الملكات، ونقبل عادي جداً احنا، يعني ننزل لتلك الأمور، وعادي جداً ما فيش مشكلة، ما فيش مشكلة خالص. إيه يعني الدنيا تختل؟ تختل الدنيا. الدنيا تبوظ؟ تبوظ الدنيا. المهم دنا يبقى سليم، نموت ونقابل ربنا سبحانه وتعالى واحنا دنا محافظين عليه يا جماعة. أنا عارف، يعني هو اختكم اهي بتقول وغير، يعني احنا لو فتحنا المجال لأن احنا نسمع حكاوي الناس هتلاقي كده، بتقول لكم: احنا أصلاً بنعمل كده خلاص، احنا في الحرب وبنعمل كده، ماشي؟

فمحتاجين نفكر في هذه البدائل، محتاجين نوجد حلول مسبقة علشان يبقى عندنا يعني شيء من الحكمة والرشد في التعامل مع مثل هذه الأحداث. أختم بأن أنا أقول كلمة قلتها في النص: هذه ليست دعوة لمنابذة الحكام ولا منابذة الأنظمة، وإنما هي دعوة للتعامل في واقع تعجز عنه الحكومات في توفير هذه الأمور المركزية.

فساعتها هنعمل إيه لو ما، لو ما احناش مستعدين؟ هنبقى عبء على تلك الأنظمة وعبء على تلك الحكومات، عبء زائد، وتخرج الأمور عن السيطرة بسرعة. ولو مستعدين يبقى الدنيا هتمر بسلام وأمن، يعني وهذا ما نرجوه ونؤمله، وكل ما يأتي به الله عز وجل خير، سواء أتى بهذا أتى بذاك كله خير، ونحن لا نملك لأنفسنا شيئاً، إنما هو الله يصرفنا كيف شاء سبحانه وتعالى، ونحن عباده وإن كنا من أهله الذين يعبدونه والذين يمتثلون أمره ويجتنبون نهيه، فحاشاه سبحانه وتعالى أن يسلمنا وحاشاه سبحانه وتعالى أن يخذلنا، بل حسن رجاؤنا فيه سبحانه وتعالى أن نحن امتثلنا أمرنا واجتنبنا نهينا أن نلقاه ونحن على دينه ونحن على الحال التي يرضاها منا سبحانه وتعالى.

طب الدنيا راحت؟ تروح الدنيا، ولا تشغلنا ولا تعنينا خالص، والحمد لله عشنا سنوات في أمن وعشنا سنوات في دعة وفي رخاء. عادي جداً لما يجي وقت الامتحان والابتلاء في ذلك الأمن أو في ذلك الرخاء وتلك السعة، إيه هنكفر ولا إيه؟ ولا نرضى عن ربنا سبحانه وتعالى؟ أذاقنا السراء وأذاقنا الآمنة مدة وأتى وقت الامتحان التاني، إيه هنكفر بقى بالله؟ احنا عاوزين إله متفصل علينا ولا إيه؟ لا، مش هنكفر، هنرضى عن الله عز وجل، نرضى عنه في كل قضائه ونرضى عنه في كل قدره، ونراه أحكم القدر وأحكم القضاء منه سبحانه وتعالى.

أقول قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.