دخولتسجيل الدخول

رمضان التعافي | الدرس الخامس من سلسلة الاستعداد لرمضان ١٤٤٧

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله.

اللهم صل على سيدنا محمد النبي، وأزواجه أمهات المؤمنين، وذرياته وآل بيته، كما صليت على آل إبراهيم، إنك حميد مجيد. أما بعد؛

درس النهاردة بعنوان "رمضان التعافي" في درسين عن رمضان؛ درس "رمضان الجوع" وفي درس "رمضان التعافي". رمضان الجوع بنتكلم عن مسألة الجوع وربط الجوع بالصوم. ودرس اليوم إن شاء الله "رمضان التعافي" وهو خاص بالتعافي من إدمان الإباحية، ومحاولة استغلال هذا الشهر في التخلص من هذه الآفة.

خلينا نبدأ بشويه مقدمات؛ المقدمة الأولى: أن احنا لما بنتكلم عن إدمان الإباحية فاحنا هنكلم عن الإدمان لا نتكلم عن الإباحية، نتكلم عن إدمان الإباحية؛ سواء مشاهدة الإباحية أو ممارسة العادة، فنحن نتكلم عن إدمان هذا الامر، وليس الكلام عن مجرد من يفعله المرة بعد المرة، لا، ده مش بنهون -يعني- بس بنقول: احنا عندنا دركتين -بالكاف بقى- دركة هي أن الواحد يشاهد هذه الإباحيات أو يفعل العادة، لكن لا يدمن، لا يدمن هذا في دركة أسوأ منها وأسفل منها وهي أن يدمن ذلك.

إيه الفرق؟ الإدمان طبعا الإباحية خلاص صنفت إن هي إدمان، إدمان سلوكي، وقالوا إن الإدمان أن إنسان يفعل هذا السلوك أو هذا الشيء المدمن -يعني- قهراً، يعني ما يقدرش إيه نقول له: بطل، يقول لك: ما أعرفش أبطل. ماشي؟ وبعضهم -بعض يعني ده كلام الأطباء ده مش كلام يعني- بعضهم يزود أنه إيه: وكمان مع الزيادة في الجرعة -يعني- أو في المدة أو كذا، فده معنى الإدمان؛ اللي هو تعال نقول لك يا ابني بطل، تقول: مش عارف أبطل، يوم وأرجع أسبوع وأرجع شهر وأرجع مش عارف أبطل.

طب ليه بدأت بالمقدمة دي؟ علشان نقول للشاب أو للبنت -لأن دي المقدمة الثانية البنات معانا في الحديث زيهم زي الشباب- لكن خلي المقدمة الأولى لما نجي نقول للشاب أو للبنت اللي يفعل ذلك ولا يجد إلحاحاً أو لا يجد أو يجد يعني الأمر لسه سهل أنه يبطل، فبنقول لك: يا ابني الحق نفسك ووقف؛ لأنك هتوصل لحته هتصير مدمناً، فيتقال لك بطل، يتقال لك دي مش لازم من حد، يعني أنت نفسك ما تفتكرش إنك هتقول إيه: أنا قادر، أنا وقت ما هعوز أبطل لا، مش هيحصل، إلا طبعا أن يشاء الله عز وجل شيئاً، بس احنا بنتكلم في فكرة الإدمان فكرة كفكرة يعني عند الأطباء مش بالسهولة اللي أنتم متخيلينها، الواحد صار مدمناً لشيء إنه يبطله.

احنا يا جماعة أشياء أقل من ده بكثير، ولو قلنا لك بطل ما بتعرفش تبطل، وفي كل درس أنا بقول لك: طيب حاول تقنن استخدام الهاتف، ولو سالت دلوقتي كم في المية اللي بيجنجح أنه يعمل ده؟ هتلاقي نسبة ضعيفة جداً، لأن برضه الهاتف إدمان سلوكي بالمناسبة، فمش بمكان في الحرام، مش في الإباحيات يعني، مجرد بس أنك تقدر تعرف تعيش من غير الأبس أو وسائل مواقع التواصل الاجتماعي، تعرف تعيش من غيرها مدة قد ايه وتلاقي نفسك لا، لازم نفسك تلح عليك أنك ترجع لها تاني وهكذا، فالموضوع صعب.

فأول مقدمة دي بس عاوزين نخرج منها بأنك لو لسه على البر ما تغرسش، الحق نفسك ووقف فوراً، لأن بعد شوية الموضوع هيكون مرهق جداً. المقدمة الثانية: أن الكلام أو الحديث للشباب وللبنات أو للرجال والنساء معاً، لأن هذا الامر للأسف منتشر في الوسطين رجالاً ونساءً، وبيجي لنا أسئلة كتير جداً عن الموضوع ده، فالخطاب ماهوش للشباب بس للجنسين جميعاً.

المقدمة الثالثة المهمة قبل ما نبدأ: أن كتير من الشباب بيظن أن احنا لو بنتكلم دلوقتي عن إدمان الإباحية وأن أنا مش عارف أبطل، فكتير من الشباب بيبقى رابط المسألة دي بمسألة الزواج، يعني إيه؟ يقول: لا، أنا بس مجرد ما هتجوز الدنيا هتبقى تظبط وتبقى تمام، فده ما بيحصلش، فلو أنت من الشباب دول اللي قاعد عمال فاكر بيوهم نفسه أن أنا بس أول ما أتجوز الدنيا هتبقى مية فل وארبعتاشر، غلط، بل بالعكس هتفاجأ بأمور صعبة جداً جداً، أقلها -احنا بنتكلم في وسط ناس متدينة- أنك ما بتقدرش تمارس العملية طبيعياً، الكلام ده مئات الرسائل اللي بتوصل خلاص، والأطباء بيتكلموا في ده -بعيد عني كمان أنا، يعني غيري أنا خالص- هتلاقوا الأطباء بيتكلموا في ده؛ وأن الشباب بيفضل تلك الحالة من مشاهدة الإباحيات وممارسة العادة عن أنه يمارس الحياة الطبيعية مع امراته.

وده ليه بعد نفسي في الحته دي بس مش عاوزين ندخل فيه دلوقتي عشان احنا درسين "رمضان التعافي" فاحنا مش عاوزين ندخل في الحته دي، الدرس ده بالمناسبة قبل ما أنسى، الدرس ده هو درس بالمقام الأول درس عملي، مش مش يعني هنحاول إن شاء الله يعني يعني إيه نشحذ الهمم نحو التعافي، لكن هو في المقام الأول درس عملي، يعني إيه درس عملي؟ يعني هتخرج منه بخطوات عملي تعملها، بحاجات هتسمعها علشان تخرج من رمضان وقد تعافيت بإذن الله.

فيلا يعني خدوا أول حاجه بقى؛ احنا عندنا درس على اليوتيوب واللي معاه ورقة وقلم يكتب (الحاجات دي مهمة جداً وتبقى خطة، وإن شاء الله الدرس هينزل)؛ عندنا درس اسمه "الإباحية" على اليوتيوب أو آدم حاجة، اكتبوا الإباحية بس على القناة بتاعتي، هيطلع لكم الدرس، فده هيتسمع مع درسين غض البصر واحد وثنين على قناة اليوتيوب برضه، يبقى دول ثلاث دروس لغاية احنا هنطلع ممكن بحوالي خمسين درساً، احنا معانا من النهارده إحنا في أول شعبان اهو، معانا لآخر رمضان هندي حاجات تتسمع، فاحنا معانا وقت، فدول أول ثلاث دروس: غض البصر واحد وثنين، وإدمان الإباحية ثلاثة أو حاجة شبكية -مش فاكر اسم الدرس إيه يعني- فدول ثلاث دروس إن شاء الله البداية معانا كدة.

فلا، الجواز ماهوش الغاية، بل بالعكس هو الجواز بيفشل وبتيجي شكاوي وبيحصل انفصال بسبب الموضوع ده، أنا بتكلم في وسط الناس المتدينة، الناس اللي مش متدينة ساعات علشان يحفز نفسه في أثناء العملية يتفرج على حاجات وحاجات مقرفه زي كده برضه بتوصل أسئلة شبه كده، فما تفتكرش لو أنت قاعد دلوقتي ومطمن وحاطط في بطنك بطيخة صيفي أن الموضوع بسيط وسهل، بس هو بس دقيقتها أتجوز، فده غلط، سواء رجل أو امرأة.

طيب، احنا داخلين على رمضان، ورمضان نفحة من نفحات الخير، وممكن أن رمضان تكون نقطة انطلاق إن شاء الله لرحلة تعافي للشباب، وطبعا دي يعني هذا الأمر مما عمت به البلوه، حتى الأطباء دلوقتي بيقولوا أو المهتمين بهذا الملف يعني بيقولوا: السؤال الآن ليس هل شاهدت الإباحية أم لم تشاهد؟ إنما السؤال: متى شاهدت الإباحية؟ يعني بيقولوا أن دلوقتي في العالم كله بنتكلم حتى من الأطفال الصغيرين من سن باكر يعني يعني هم بيقولوا السؤال ده: إحنا دلوقتي مش السؤال أنت شاهدت ولا ما شاهدتش؟ إحنا مش بن الإدمان، بنتكلم حتى في مجرد أنك إيه مرت عينك على شيء، السؤال ما بقاش كده دلوقتي في العالم، هو السؤال: متى شاهدت الإباحية؟ خلاص إحنا متاكدين بنسبة كبيرة جداً أن كل قدامنا شاهد الإباحيات ماشي، السؤال بقى: إمتى شاهدتها؟ يعني ابتديت من سن كام تشاهد الإباحية؟ فهذا مما عملت به البلوى الحقيقة.

يبقى عاوزين رمضان ده يبقى بدايه سلسلة التعافي. طيب، خلينا ندخل في الموضوع: رمضان والتعافي، إحنا يا جماعة رمضان زي ما قلنا هو نفحة من نفحات الخير وفيه عبادات كبيرة جليلة، ولو تاملنا عبادات رمضان هنجد أن كل عبادة منهم تصلح بمفردها أن تكون بداية للتعافي.

لكن قبل ما نخش في أننا بقى نتامل عبادات رمضان ونربط تلك العبادات بمسألة التعافي من إدمان الإباحيات، بعض الشباب يمكن يقول لك: والله طب أنا يعني أنا أبطل أنا أصلاً يعني إيه يعني أنا مبسوط، فأنت أبطل ليه؟ فنقول: أنت تبطل لأنك لازم تبطل؛ لأن أنت في حرام، والحرام ده ماهوش حرام بسيط وتبعاته ماهيش تبعات بسيطة في الدنيا والاخرة، تبعاته ماهيش تبعات بسيطة لا في الدنيا ولا في الآخرة.

في الدنيا طبعا في درس الإباحية هتلاقوا في يعني كلام كبير عن أو كتير في الحته دي، لكن كلنا يعني إيه عارفين: في الدنيا هتلاقي في اكتئاب، وهتلاقي في رهاب اجتماعي، وهتلاقي في فشل في الحياة، وهتلاقي الحاجات دي كلها إيه من التابعات، وكسل، وبعد ما كان بيروح مش عارف الجيم بطل يروح جيم، وبعد ما كان مش عارف... طبعا الحاجة دي مش لازم تبقى كلها موجودة في الشخص، يعني مش لازم، ممكن يبقى في حاجة أو اتنين موجودين، فده في الدنيا: فشل في العلاقة الزوجية وده بنسبة كبيرة جداً، ما عنديش رقم وأنا ما بحبش أتكلم غير بإيه يعني بداتا، فما عنديش رقم كام النسبة كام؟ ما أعرفش، لكن الفشل في الحياة الزوجية في نسبة كبيرة بتفشل الحياة الزوجية بسبب هذا خلاص، والشاب بيبقى لسه صغير لسه عشرينات وعنده ضعف في انتصاب وعنده سرعة قذف وعنده مشاكل ضخمة جداً، وده كله ليه؟ لأنه مدمن للإباحية، فالدنيا ما بتستقمش مع هذا الإدمان.

وكذلك أمر أمر الآخرة، أنت على خطر، وهنا مسألة الإباحية ماهيش مسألة العادة في نفسها، العادة يعني العادة السرية، وإنما الأمر أكبر من ذلك؛ لأن الأمر في امور تحف به بدايه من مشاهدة، وهذا حرام منفصل، سواء مارست أو لم تمارس العادة فالمشاهده حرام، وده أنا طبعا الدرس مش هينفع يبقى يعني هيبقى خمس ست ساعات لو فصلت في كل حاجه، بس إن شاء الله كل درس بقوله مديه لكم تسمعوه هتلاقوا فيها تفاصيل يعني، غض البصر واحد وثنين فيها تفصيل بقى الحته دي إيه اللي ينظر ليه وإيه اللي ما ينظرش، والحته دي كلها في غض البصر، فدي حاجة بتاع تحف بالعادة ممارسة العادة، ثم هي تدعو إلى ما هو أكبر منها وأعظم، يعني ده ما يحف بها حال الممارسة.

طيب، والموضوع هيقف على كده؟ لا، هتلاقي نفسك تتوق مدة إلى ما هو أعظم، وربما وقع الإنسان في الزنا عياذاً بالله، دي برضه مسألة تانية خطيرة، وحتى بعد الزواج، تقول: الله، أنت بتقول لنا ما الجواز، ما انت أروح الواحد يروح يزني ليه؟ برضه ليها شق نفسي شوية، وهو أن المدمن لمشاهده هذه الأمور بيبقى شايف قدامه يعني إيه تنوع في هذا الأمر، فتتوق نفسه لهذا وذاك، فالموضوع نفسي، وطبعا إيه يعني اعذروني الكلام بيبقى إيه متغطي برضه شوية مش هينفع نفصل في المسائل.

فالامر يعني كمعصية كأي معصية ما ما بتقفش عندها، كما قال ابن القيم: إذا فعل العبد السيئة نادت أخرى إلى جوارها: تعالى فافعلني، وهلم جرا، وك زيها زي أي معصية برضه في الدنيا ما بتجركش لمثلها، بتجرك لمثلها وإلى ما هو أعظم منها.

قال الله عز وجل: ﴿ذَلِكَ بِأَنَّهُمْ كَانُواْ يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ ذَلِكَ بِمَا عَصَوا وَكَانُواْ يَعْتَدُونَ﴾ [البقرة: 61]، يعني إيه؟ قالوا: إن هم كانوا في البداية بيعصوا، بس ما اخطرش على بالهم لا يكفروا ولا يقتلوا الأنبياء، فربنا قال: ﴿ذَلِكَ بِأَنَّهُمْ كَانُواْ يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ﴾، ذلك الثانية اللي اللي هو الكفر وقتل النبيين بغير الحق، ﴿بِمَا عَصَوا وَكَانُواْ يَعْتَدُونَ﴾، يعني هم في الأول عصوا وكانوا يعتدون، ما جاش في دماغهم أن هم يقتلوا ولا يكفروا، لما عصوا واعتدوا جرهم الاعتداء وجرتهم المعصية إلى أن كفروا بالله عز وجل وقتلوا الأنبياء.

فالمعصية يا جماعه بتجر الأكبر منها لغاية ما تقع في الكبيرة، وبعد شوية تستمرق الكبيرة، وبدل ما هي كانت مرة عابرة بقت عادي، بقت نمط حياة، وانتشار الزنا الآن في أوساط الشباب كبير جداً، شباب وبنات طبعا يعني مش محتاجة ما هو فكبير جداً، وفي سن مبكرة جداً دلوقتي بقت المشاكل بتظهر في الزنا وبتيجي أسئلة في الاعدادي، من أول اعدادي ده بيحصل، فطب ده احنا ده يكبر يبقى إيه لما هو من إعدادي ولا ثانوي بيعمل البلاوي دي؟ يكبر يبقى إيه إن شاء الله؟

طب هتقف على الكبيرة؟ مش هتقف على الكبيرة، ممكن تجر إلى الكفر، ممكن تجر إلى الكفر عياذاً بالله وتجر إلى الإلحاد، وإيمانك يذبذب، ﴿وَيَعْفُو عَن كَثِيرٍ﴾ [الشورى: 30]. فزي ده كله زيها زي أي معصية يعني هي ماهياش يعني، إنما فكرة إدمانها والله يا جماعه بيجي لنا رسائل اللي ممكن واحد يفعل ذلك في اليوم مرات بالخمس مرات وست مرات، وبيجي لنا رسائل أن واحد بيقول: لغاية جاية ما بقع من طولي، فالإدمان واصل مع بعض الناس لمراحل صعبة جداً.

فطيب، العملية دي بقى بهذا العدد المتكرر من المرات استغرق قد ايه من يومك؟ واستغرق قد ايه من صحتك؟ واستغرق من علاقتك بربنا سبحانه وتعالى وجميل ستره عليك؟ ده برصيدك عنده، يعني فجاه يفضح الإنسان فجاه، وبعد ما كان مستور خلاص فجاه يفضح. حكيت لكم الحكاية: الست اللي اتصلت بالشيخ: تعالى الحقنا! راح لقى إيه؟ فتحت له الأوضة على ابنها ميت، ميت وهو بيشاهد إباحية وبيمارس العادة، ودي مش حالة فردية يعني ولا بدغدغ عواطفكم، ولا لسه جاي لي رسالة كده بنت بتبعت لي على مش فاكر على صارحني أو حاجة: أخوها نفس الموضوع مات لسه من كام يوم.

مات وهو بيشاهد الإباحية وبيمارس العادة، وهي البنت بقى متضمرة نفسياً جداً، وساين هي بس اللي شافت، أو هي أو حد مش فاكر قوي الرسالة يعني، وإيه داره على الموضوع وما قالوش لحد وكده. فبيحصل، وإيه اللي يمنع يعني، حتى يعني عقلاً إيه اللي يمنع يعني؟ يعني هو ملك الموت لو جالك هيلاقيك كده هيقف يستناك مثلاً شوية لغايه ما تخلص وتستحمى؟ وخلاص أنت ليك كم نفس في الدنيا؟ 2 مليون و435 ألف و35 نفس مثلاً، ما مش هتاخد 436.

فـ435 ده بقى، النفس ده كان في قراءة مصحف؟ كان في ورد؟ كان في ذكر؟ كان في صلاة؟ أو كان في إباحية؟ وكان في إطلاق نظر؟ وكان في تشويحة لأمك؟ وكان في شتيمة لصاحبك؟ مش هتاخد النفس 436. فاحنا لازم لازم نتوب، ولازم نقلع للدنيا والآخرة.

المسألة الثانية هي مسألة أنك ما تقنطش من رحمة ربنا. العكس بقى دلوقتي، احنا بنخوفك أنك لازم تتوب، وفي نفس الوقت -لأن برده من الرسائل اللي بتيجي ناس بتوصل لحته القنوط: أنا مافيش، أنا مش نافع، أنا مافيش فايدة فيا-. دلوقتي يا شباب، الرجل قاتل المئة نفس، النفس رقم مئة التي قتلت، ليه قتلت؟ لأنه قنط. هو جاي يتوب، قتل 99 نفس، قال هي توبة؟ لا، مالیش توبة. قنط فقتله؛ فالقنوط من رحمة الله عز وجل يخليك تعمل إيه؟ خربانة! عارفين عارفين ده؟ خربانة خربانة، زي ما تكون كده في وقت المذاكرة والوقت دق عليكم، بكره الامتحان، تقول إيه؟ خربانة خربانة. تروح عامل إيه؟ نازل واقف على الناصية، نازل تقول إيه؟ خربانة خربانة، خلاص عور على عينه. الأمثله دي أمثال حقيقية يعني، أمثال بتجسد نفسيات.

فاحنا برده مش عاوزين نقنط من رحمة الله عز وجل. هديكم حاجة بسيطة ومتكررة عندي في الدروس، لكن هي مهمة دلوقتي يا جماعه: الناس ترى منك الفعل، الله يرى منك الفعل والترك، فأبشر. يعني أنت اللي بيعمل هذا الأمر، بيجاهد نفسه عشر مرات ويقع في المرة الحادية عشرة، لو أبوك دخل عليك وأنت في المرة دي ولقاك على الحالة دي، ولا أمك ولا حد ولا بتاع، تسقط من عينه فوراً. الله كما رأى منك ذلك الفعل، رأى منك أن في عشر مرات أنت جاهدت نفسك وما عملتش. زي ما شايف ده، شايف ده والله! فزي ما هيحاسبك على الفعل فتأثم عليه، هيحاسبك على الترك فتثاب عليه، فأبشر، ربنا شايف ده وشايف ده، وربنا كريم سبحانه وتعالى.

في الحته دي هنسمع درسين دول مهمين جداً، ممكن نبتدي بيهم أصلاً يعني قبل الدروس الثلاثة، هنسمع درس الخوف ودرس الرجاء، خلاص برده على اليوتيوب، كل ده على اليوتيوب عشان في حاجات مش هتبقى لسه يعني مش متصوره فهناخدها من حته ثانية. يبقى دلوقتي خمس دروس: درس الخوف، ودرس الرجاء، ودرسان غض البصر، ودرس الإباحية، دول هيتسمعوا.

طيب، رمضان التعافي: عندنا عبادات كبيرة في رمضان وعاوزين نربطها، خلاص كأننا يعني شحذت الهمم وانبعثت نحو التعافي، وأظن هي كذلك يعني لمن وقع في هذه البلية. فأول عبادات كبيرة في رمضان هي عبادة الصوم، وهي العبادة المختصة بشهر رمضان الذي هو شهر الصوم. عبادة الصوم النهارده مش جاي نتكلم عن العبادة، إحنا جينا نتكلم عن ربط كل العبادات بالتعافي.

خلاص، الصوم له خصيصة في هذه المسالة، قالها النبي صلى الله عليه وسلم قال: «يا معشر الشباب، من استطاع منكم الباءة فليتزوج؛ فإنه أغض للبصر وأحصن للفرج، ومن لم يستطع فعليه بالصوم؛ فإنه له وجاء». حماية وقاية. تقول بصراحه: يعني أنا بصوم ما بيحصلش حاجة! نقول: صدق رسول الله وكذب فرجك. أمال الإشكال فين؟ ما هو أنا فعلاً ده بيحصل، الإشكال أن أنت ما بتصومش. الإشكال أنت لو صمت هيحصل ده. تقول: والله بصوم! نقول لك: أيوه، إحنا عارفينك بصوم يعني بتمسك من طلوع الشمس لغروب الشمس، عارفينك بتعمل كده، بل بل بس هل هذا هو الصوم المطلوب منك أيها الشاب لتحصن فرجك؟ الجواب: لا.

مش بس ده الصوم، أمال إيه المطلوب؟ إحنا مطلوب معنى زائد في الصوم، لأن الصوم في الحديث ده: «فإنه له وجاء». وخلينا طب نخلص الحديث. إيه الصوم المطلوب يا جماعه؟ لازم أن نحصل في الصوم معنى آخر، ومعنى الجوع، هو ده بقى درس رمضان الجوع. خلاص، فهنسمع درس رمضان الجوع، لكن خلينا برده ندي نبذة عن المسألة دي. إحنا يا جماعة عندنا حاجة اسمها صوم، وعندنا حاجة اسمها جوع، دي غير دي، غير دي. ممكن واحد يصوم ما يجوعش؟ آه. ممكن واحد يجوع وما يصومش؟ آه. ممكن واحد يصوم ويجوع؟ الاثنين. إحنا عاوزين نصوم وننجوع.

طيب، يعني أعمل إيه؟ طبعا درس رمضان الجوع ده ده ساعة وشويه، إن شاء الله ممكن ينزل بكره إن شاء الله، خلاص على اليوتيوب ينزل بكره إن شاء الله. فده برده هيتسمع، ده مهم جداً جداً، إصلاح حتى لكل الناس بقى، يعني سواء إباحية ولا مش إباحية ولا كل وكبير وصغير يسمع رمضان الجوع، لأن إحنا عاوزين نطلع من رمضان ده بفكر مختلف شوية. فإحنا عاوزين نجوع في رمضان ده، أيوه يعني إيه نجوع؟ يعني حديث النبي عليه الصلاة والسلام نطبق في رمضان: «ما ملأ ابن آدم وعاءً شراًّ من بطنه، بحسب ابن آدم لقيمات يقمن صلبه، فإن كان لا محالة فثلث لطعامه وثلث لشرابه وثلث لنفسه».

فإحنا الشباب بقى، أنا بتكلم بقى الشباب دلوقتي وفي مسألة العفة: الجوع هو ده اللي هيتكسر شهوتك. مش مجرد، خلوا بالكم، الصوم فيه معنى آخر وهو معنى البركة في الصوم، وده هنيجي نتكلم عنه كمان شوية إن شاء الله، إنما إحنا عاوزين معنى زائد في الصوم، وهو معنى أن تجوع؛ لأن يا جماعة الشبع اللي إحنا إحنا بنهزر، إحنا بنهزر، إحنا بندخل رمضان بنطلع تخنانين، ده ما ينفعش.

فلازم أكلنا يقل في رمضان لدرجة أن إحنا دايما نبقى شاعرين بالجوع نهار وليل. ما فيش حاجة اسمها بالنهار أنا نايم طول النهار، وبالليل ما ورايش حاجة غير باكل من المغرب للفجر. ما تجيش تشتكي وتقول الشهوة زي ما هي، وبالعكس بتوقى في رمضان! ما هي لازم تقوى في رمضان! ما هو باللي بنعمله ده شهوة إيه اللي تتكسر؟

فإحنا عاوزين نعمل إيه؟ هناكل الأكل اللي بيه يا دوبك نعرف نعيش حياتنا، اللي هو دايما الكلمة بقولها إيه؟ أن ما فيش كالوري زيادة في آخر اليوم ينفق، ما فيش. هو ده معنى كلام النبي عليه الصلاة والسلام: «بحسب ابن آدم لقيمات يقمن صلبه»، يقمن صلبه؛ اللي هو يا دوبك حاجة أكل وشرب اللي بيهم يا دوبك بعرف أعمل مهمات الحياتية، إذا كنت أنا طالب فبذاكر وبروح الكلية ولا المدرسة، إذا كنت موظف فبروح شغلي وأموري الشرعية، اللي هي صلاتي وذكري وعباداتي وكذا وكذا. غير كده أي فضل من الأكل مش عايزينه، أي فضل من الأكل مش عايزينه. فلما نعمل ده، ساعتها بقى يبقى الصوم لك وجاء، «فعليه بالصوم فإنه له وجاء». والحديث الثاني في الصوم أو في الجوع بقى، أن إيه؟ قال صلى الله عليه وسلم: «إن الشيطان يجري من ابن آدم مجرى الدم، فضيقوا عليه مجاريه». ما قالش بالصوم، قال: بالجوع والعطش. فيبقى أول معنى في الصوم عاوزين نطلع بيه، هو أن علاقة الصوم بالتعافي بالتعافي من إدمان الإباحية هو أن إحنا نحقق صوماً فيه جوع. ودي هنسمع فيها رمضان الجوع إن شاء الله. كده معانا كام درس؟ ست دروس، يبقى رمضان الجوع يسمع مهم جداً.

عندنا حديثان في الصوم وعلاقته بالحته بتاعة الشهوة، الصوم جنة، مش كده؟ الصوم جنة، يعني وقاية وحمايه، فالصوم جنة.

العبادة الثانية في رمضان: الصلاة. صحيح رمضان يختص بصلاة القيام اللي هي التراويح، لكن هي تحت مظلة الصلاة عموماً. والصلاة برده يا شباب لها تعلق بالإباحية، قال سبحانه وتعالى: ﴿إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنكَرِ﴾ [العنكبوت: 45]. ومما روي: "من لم تنهه صلاته عن الفحشاء والمنكر، لم يزدد من الله إلا بعداً". فالصلاة تنهى عن الفحشاء والمنكر. تقول لي: أيوه بس أنا بصلي وما فيش! أقول: صدق الله وكذب فرجك. تقول: أيوه بس ده اللي بيحصل! أقول لك: يبقى أنت ما بتصليش الصلاة اللي المفروض تصليها، يبقى ده نفس الكلام، يبقى إحنا صلاتنا محتاجة محتاجة تبقى صلاة أصلاً، صلاتنا تحتاج إلى صلاة الصلاة. وللأسف، وده شيء غريب جداً على الحقيقة يعني على المتدينين يعني، أنك تبقى متدين وإلى الآن 20 سنة، 30 سنة، 40 سنة، 60 سنة ولم يخطر ببالك أن تجود صلاتك، يعني تقعد كده تقول: أنا معسكر كده مغلق تحسين الصلاة، أنا صلاتي دي اللي بصليها دي مش نافعة، أنا عاوز أجود الصلاة، أستشعر الخشوع في الصلاة؛ لأن هذه هي الصلاة التي تنهى عن الفحشاء والمنكر.

بلاش، يا شباب، مش كل واحد فينا دلوقتي عنده قصته لصلاة معينة كده صلاها وكانت مختلفة ووجد تأثيرها دائم لمدة بعديها، تقل بقى أو تكثر يعني المدة دي، إنما كل واحد فينا عنده القصة دي: آه ده أنا مرة صليت صلاة وأثرت فيها جداً، وفعلاً حال استقام بعديها مدة، صح؟ ما فيش أي حاجة، صح مش كده؟ طب جملوني حتى.

ماشي، فهو إحنا ده اللي إحنا عاوزينه، عاوزين الصلاة التي تؤثر فينا فيستمر تأثيرها. من رحمه الله، والله هي رحمة بنا أن وزعت الصلاة على اليوم، والله يا جماعة دي رحمة! يعني ممكن الواحد يفتكر إيه؟ ما تبقى في أي يوم كده الخمس فروض وخلاص ونخلص، ويفتكر أن ده الأحسن، ولم يدري المسكين أن الشرع أتى بمصلحته، أتى بمصلحته! أنت تروح للدكتور يقول لك: هتاخد معلقة ثلاث مرات يومياً من الإزازة، تروح أنت طالع من عنده مبلبع الإزازة كلها، تقول لي: أنا لسه هنتظر عاوز أخف بسرعة! تؤثر؟ لا تؤثر، بل بالعكس ممكن تضر. الصلاة دواء، دواء: ﴿إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنكَرِ﴾ [العنكبوت: 45]. فليه بقى متوزعة من الحكمة كده؟ من أن أصلي الفجر، فأتأثر بصلاة الفجر، وبعدين إلى الظهر، فالتاثير يكون قل ولا ابتدى يروح، تروح مصلي الظهر. وهكذا، فيبقى التأثير على مدار اليوم، يبقى ده من رحمة ربنا بينا، نوزع الصلوات ما خلاش تجمعها في أي وقت في اليوم وخلاص.

فإحنا محتاجين إيه في الصلاة علشان الصلاة تنهى عن الفحشاء والمنكر؟ وروي ذلك في حديث الشاب الذي كان يصلي الفرائض، لكنه إيه؟ لا يترك شيئاً من المنكرات إلا فعلها، فلما رفع الأمر للنبي عليه الصلاه والسلام قال: «ستنهاه صلاته» رؤيا ذلك «ستنهاه صلاته قريباً»، واستقام ذلك الشاب وترك ما كان يفعل.

طيب، فإحنا إيه المطلوب مننا؟ أول حاجة مطلوبة مننا، مش القيام، برده دي معنى كده مغلوط عند الناس اللي هو إيه؟ يضبط القيام. يا حبيبي، أضبط فرضك، أضبط فرضك! يبقى أول معنى عاوزين نضبطه في الصلاة: الفرض، نجود الفرض، نحصل الخشوع في الفرض. خلاص، وقلنا في ثلاث أسئلة يضبطوا لك الدنيا اللي هو إيه: أمتى؟ وفين؟ وأزاي؟ الثلاث أسئلة دول يضبطوا لك الصلاة: بتصلي أمتى؟ تستنى آخر الوقت عشان تنقر الصلاة ولا في أول الوقت؟ وفين بتصلي فين؟ بالذات لو إيه؟ لو رجل، يبقى أنا بصلي في المسجد، وفين في المسجد؟ يبقى أنا حريص الحق الصف الأول. ولو امرأة برده بتصلي فين؟ بتصلي في البيت في أكثر مكان فيه مشغلات، بحب أصلي في حـ في مكان إستراتيجي كده عشان أبقى شايف البيت كله، أنت تشوف البيت كله ليه؟ لا يعني، يبقى فين؟ يبقى أمتى وفين وأزاي. إزاي بتصلي؟ إزاي صلاتك شكلها إيه؟ خشوعك عامل إيه؟

فمحتاجين ده، طب نسمع إيه في ده؟ أسرار الصلاة لابن القيم، ده هتلاقوه بقى على التليجرام، هتلاقوه على الساوند كلاود، هتلاقوه طبعا على الموقع. كتاب أسرار الصلاة، أظن ده 13 درس، الكتاب هتنزله بي دي إف، هتشتريه، المعرض اهو فاتح، تشتريه وتسمع الدروس إن شاء الله مع الكتاب.

يبقى الصلاة إحنا قلنا هنديكم يعني إيه حاجات تقعدوا فيها شعبان ورمضان، نقابلكم رمضان الجاي إن شاء الله تكونوا خلصتوا. يبقى هتسمع، هي بتبقى مدتها بسيطة، نص ساعة الدرس، يعني ممكن تضربه في اثنين كمان بقى، ربع ساعة على الأقل، يشغلنا على الإباحيات.

فيقى نسمع أسرار الصلاة عشان نضبط صلاة الفرض. خلاص، يبقى أن الصلاة تنهى عن الفحشاء والمنكر. العجيب بقى يا جماعة أن الصوم والصلاة أصلاً فيهم إيه؟ لكنها إيه عامة، مش بس مش مختصة بقى بالـ. قال سبحانه وتعالى: ﴿وَاسْتَعِينُوا بِالصَّبْرِ وَالصَّلَاةِ﴾ [البقرة: 45]. الصبر: الصوم في قول بعض أهل العلم، يبقى واستعينوا بالصبر والصلاة. آه، نستعين على إيه؟ محذوف، المستعان عليه محذوف من الآية، ليه محذوف؟ عشان هتستعين بالصبر والصلاة على كل شيء في حياتك.

فتيجي تقول: أنا متضايق، استعين بالصبر والصلاة. أنا مراتي معاك، استعين بالصبر والصلاة. طب أنا جوزي اللي عامل، استعيني بالصبر والصلاة. كل حاجة في الدنيا، الحياة قافلة، دي استعين بالصبر والصلاة. هذا كلام ربي، ﴿وَاسْتَعِينُوا بِالصَّبْرِ وَالصَّلَاةِ﴾ [البقرة: 45]. فلنستعن بالصبر والصلاة، الصبر: الصوم، والصلاة: الصلاة. مما قيل فيها: "استعينوا بالصبر والصلاة" عن الصوم والصلاة؛ فإن الصوم يزهد في الدنيا، والصلاة ترغب في الآخرة. هذا ورد عن بعض السلف.

أنهي صوم بقى اللي يزهد في الدنيا؟ صوم الجوع اللي لسه قايلينه. وأنهي صلاة اللي ترغب في الآخرة؟ صلاة الخشوع اللي لسه قايلينها. فإحنا محتاجين نضبط الصوم الذي يكون لك وجاء، الذي يكون لك جنة.

ونظبط الصلاة اللي هتنهاك عن الفحشاء والمنكر، فيبقى دول أعظم عبادتين أصلاً في رمضان. طيب إيه تاني عندنا عبادات غير الصوم والصلاة؟ القرآن، مش كده؟ القرآن من أعظم العبادات، والقرآن نزل في رمضان، والناس بيكون لها اهتمام خاص بالمصحف في رمضان.

طيب القرآن هل له علاقة بالتعافي؟ طبعا له علاقة بالتعافي. أول حاجة نفس الآية إن الصلاة تنهى عن الفحشاء والمنكر. لا، في أن الصلاة قالوا إن القرآن، في بعض المفسرين قالوا الصلاة هنا القرآن، ومن، وهل القرآن يسمى صلاة؟ أيوه، ومنه قول الله عز وجل: ولا تجهر بصلاتك، قيل بقراءتك. فالقرآن يسمى صلاة، فبعض أهل العلم قال إن الصلاة تنهى عن الفحشاء والمنكر يعني أن القرآن ينهى عن الفحشاء والمنكر.

وعندنا حديث يبين التأثر بالقرآن وله تعلق برمضان برضه، سيدنا النبي عليه الصلاة والسلام كما جاء في الحديث كان أجود الناس، وكان أجود ما يكون فيه في رمضان، أمتى؟ حين يلقاه جبريل فيدارسه القرآن، فكان، كان النبي صلى الله عليه وسلم وهو الجواد بطبعه صلى الله عليه وسلم يزداد جوداً في رمضان انفعالاً لتلك الآيات التي تقرأ وتتلى عليه، وكان أجود ما يكون في رمضان حين يلقاه جبريل فيدارسه القرآن.

شوفوا يا جماعة التعلق بين فكرة مدارسة القرآن -وهنا يا جماعة مش بس مجرد قراءة القرآن على عظيم ما فيه، خلي بالكم يا جماعة احنا هنا عمالين نتكلم في العبادات، كل العبادات دي فيها بركة، يعني إيه؟ يعني لو جيت قلت طب أنا صمت وما فيش جوع برده ليها الصوم نفسه له بركة- لكن احنا وصلنا لحالة أن احنا محتاجين إيه؟ غرفة عناية مركزة، فمحتاجين أدوية كتير ومحاليل، فعاوزين كل ده، فمحتاجين بركة الصوم، ومحتاجين الجوع اللي في الصوم، ومحتاجين بركة الصلاة، ومحتاجين الخشوع اللي في الصلاة.

يعني الصلاة لوحدها فيها بركة، لكن احنا محتاجين الخشوع في الصلاة الذي يؤثر ده، اللي هو لما حصل لك في صلاة من في حياتك أثر معاك وقعد معاك يومين وثلاثة وأربعة، فمحتاجين كل ده، محتاجين بركة القرآن، ومحتاجين المدارسة التي في القرآن حين يلقاه جبريل فيدارسه القرآن.

فاحنا محتاجين زي ما لنا ورد قراءة قرآن، محتاجين يبقى فيه ورد فهم للقرآن، تدبر للقرآن. الآن ده يثبت، تقول طب هو يعني أختم كتير ولا أختم بالتدبر؟ الخناقة بتاعت إيه كل سنة دي دلوقتي؟ يا جماعة احنا مش بنكلم واحد سليم معافى عشان نخش في الخناقة، يعني إيه؟ يعني دلوقتي مثلا واحد جه بيقول لي إيه شاب 20 سنة مثلا ولا حاجة وصحة تمام وبتاع يقول لي عايز أروح الجيم، أقول له آه روح الجيم والعب مش عارف إيه وارفع كام واعمل إيه وبتاع، صح؟ طيب واحد تاني جاي لي متخرشم طالع من حادثة، ده لو اديته الجيم هيموت، مش كده؟ ده نقول له تعال يا حبيبي أنا هحرك لك إيدك بس لغااية ما إيه تبتدي العملية وكده يعني، ده واحد مريض ما ينفعوش، اللي ينفع للأيه أو ما ينفعوش عفواً ما هواش يعني أفضل شيء ليه أن ندي له الحتة بتاعت السليم.

السليم نقول له إيه عاوز تدوس في عدد ختمات ماشي، عاوز تتدبر يعني ختمة واحدة بتركيز ماشي. الإنسان المريض ده اللي محتاج يتعافى محتاج الحتة دي، محتاج أنه يتدبر شوية القرآن، محتاج ده، محتاج يسمع في القرآن، محتاج يتاثر بالقران.

خلاص، فيبقى معانا القرآن عبادة من عبادات رمضان، وكذلك لها تعلق بالتعافي أن الصلاة تنهى، أن القرآن ينهى عن الفحشاء والمنكر. طيب إيه تاني معانا من العبادات؟ الذكر، مش كده؟ يبقى عبادة كمان أهي من عبادات رمضان الذكر.

الذكر من العبادات الجليلة والتي أيضاً لها تعلق بمسألة التعافي. عندنا حديث جميل جداً، أتَى رجل للنبي يوماً صلى الله عليه وسلم وقال: إن شرائع الإسلام تكاثرت عليَّ، فدلني على شيء أتشبث به، كده وكده ممكن ما أعرفش بقى ضَبْط الرواية إيه، بس في اللغة تيجي كده وتيجي كده.

طيب هنا يا جماعة معنى دلني على شيء أتشبث به، يعني الشرائع الأول، الشرائع دي اللي هي إيه؟ الحلال والحرام، مش كده؟ هي دي الشرائع، كثرت عليَّ، كثرت عليَّ، مش قادر ألمها من هنا، تضرب من هنا، أجيبها من هنا، تروح من هنا، شرائع الإسلام تكاثرت عليَّ، فدلني على شيء أتشبث به.

هل المعنى دلني على شيء أتشبث به وأدع الشرائع الأول؟ عشان بس بعض العلماء قال كده بس ما قالوا المقصود أنه إيه يترك ما زاد من النوافل، معنى قيل عشان ما نقولش لا ويبقى ده معنى موجود، لكن في معنى تاني أعظم وقيل وهو الأولى والله أعلم، أن شرائع الإسلام تكاثرت عليه، فدلني على شيء أتشبث به، فإن تشبثت به أعانني على الشرائع.

يعني الشرائع تكاثرت عليَّ، فقول لي حاجة أعملها، لما أعملها تعينني على تلك الشرائع، ما أحسهاش كتيرة، والتي من جملتها الأيه؟ ترك الحرام، ده من جملة الشرائع، فماذا قال صلى الله عليه وسلم؟ «لا يزال لسانك رطباً من ذكر الله تعالى».

يبقى احنا عاوزين لما نقول الذكر في رمضان التعافي، لو عاوزين يعني أنا بقول إن الشباب ترفع هذا الشعار، والله يا جماعة في رمضان التعافي، يعني رمضان اللي جاي ده هو رمضان التعافي، نخرج كلنا من رمضان بإذن الله قد تعافينا من تلك البلوى. فيبقى عاوزين في رمضان ده معلش يا شباب نستحمل، 30 يوم، 30 يوم ممكن يبقى فيهم سعادة، سعادة الدنيا والآخرة، فما فيش مشكله خالص، يبقى عاوزين لسانك، نريد لساناً رطباً من ذكر الله عز وجل.

يعني إيه بقى لسان رطب؟ يعني طول ما أنت ماشي بتذكر ربنا سبحانه وتعالى، طول ما أنت ماشي، يبقى من عدة رمضان اللي هنخش بيها سبحة أو عداد إلكتروني، هات كذا واحد يبقى معاك في البيت عشان لو واحد باظ لسانك ما يقفش ماشي، وحط لنفسك أوراد.

من أجل الأوراد ومن أعظمها الصلاة على النبي عليه الصلاة والسلام. ماشي، ده عشان التعافي، أنا بتكلم للتعافي، من أعظم الأوراد الصلاة على النبي عليه الصلاة والسلام تكفى همك، تكفى همك بتلك الصلاة.

فإذا كان ده هم جواك أنك عاوز تتعافى، أكثر من الصلاة عليه صلى الله عليه وسلم، آه يعني كم مرة؟ لا مفتوحة، عاوز تجيب 1000، عاوز تجيب 10000، عاوز تجيب، هات اللي تجيبه، مفتوحة معاك، لكن حط نفسك ورد يتجاب من الصلاة.

كذلك من الأوراد المهمة الحوقلة: لا حول ولا قوة إلا بالله. أولاً كنز من كنوز الجنة، ثانياً فيها معنى التبرؤ من الحول والقوة، كأنك بتقول له يا رب إيه، كأنك بتسلمه الأمر، يا رب أنا ما، أنا مش فالح، أنا حاربت كل حاجة، ولا حول ولا قوة في دفع هذا البلاء عني، فيا رب الأمر بين يديك.

يبقى وأنت بتقول لا حول ولا قوة إلا بالله، وجعلته ورداً لك في رمضان، وأنت بتقولها مستشعر هذا المعنى؛ الانكسار والافتقار والاحتياج لله عز وجل أن يدفع عنك هذا البلاء، لا حول ولا قوة إلا بالله. فده برضه ورد معاك في رمضان التعافي اللي جاي.

ومن الأوراد الاستغفار. فإذا كان الذنب بيدعو إلى ذنب فاحنا محتاجين ننظف صحيفتنا علشان نعان على اللي جاي، دي أول حاجة، ثانياً عشان لما نقع، وقعنا نستغفر بقى، ما نسيبش اللي وقعنا فيه مكتوب. فعندكم ثلاث أوراد أهو غير أورادكم بقى لو إيه حد عاوز يزود.

يبقى معانا الذكر أول حاجة، الذكر يعين على الشرائع والتي من جملتها ترك الحرام، والذي من جملته الاباحية، إدمان الإباحية. المعنى الثاني يا جماعة اللي في الذكر هو مهم جداً جداً وركزوا فيه، لأن ده لوحده علاج، يعني الحديث اللي جاي ده لوحده علاج للإدمان، فركزوا فيه.

قال صلى الله عليه وسلم فيما يرويه عن رب العزة... ها؟ إيه؟ شيطان رجيم، ما فيش فايدة. قال فيما يرويه عن رب العزة... ها؟ شفت؟ إيه بداية الحديث بقى؟ آه لا غلط، أنت بص عطلتنا على الفاضي، حديث «ولا يزال يتقرب إليه بالنفل حتى أحبه» إيه البداية؟ «من عاد لي ولياً فقد آذنته بالحرب».

شكلك ولي كده، عشان كده راح الحديث: «من عاد لي ولياً فقد آذنته بالحرب، وما تقرب إلي عبدي بشيء أحب إلي مما افترضت عليه، ولا يزال عبدي يتقرب إلي بالنوافل حتى أحبه». ركزوا بقى في الكلمة اللي جاية دي يا جماعة: «فإذا أحببته كنت سمعه الذي يسمع به، وبصره الذي يبصر به، ويده التي يبطش بها، ورجله التي يمشي بها».

يعني إيه؟ مما قيل إن في هنا مضاف محذوف، كنت حافظ سمعه، وكنت حافظ بصره، وكنت حافظ يده، أو يده وكنت حافظ رجله. يعني الله جل وعلا يحفظ لك بصرك، فتلاقي لما ربنا بقى هو الذي يتكفل بحفظ بصرك، هتشوف حاجة حرام؟ مش هتشوف حاجة حرام. طيب بايه يا رب تحفظوا البصر وتحفظوا السمع وتحفظوا كذا وكذا؟ بالأكثار من النوافل بعد الاتيان بالفرائض، الأكثار من النوافل.

يبقى عاوزين يا شباب نكثر من النوافل بتلك النية. طب أسهل نافلة بقى ممكن تعملها طول ما أنت ماشي؟ الذكر. احنا ده كله لسه بندور في فلك أن الذكر له تعلق بالتعافي. إذا كان أسهل جارحة تتحرك فيك لسانك، فلنكثر من الذكر بهذه النية؛ نية أن هي دي النوافل التي سيحفظ الله عز وجل علي بها جوارحي، فيحفظ لي سمعي وبصري إلى آخر الجوارح.

خلاص، فيبقى الذكر كمان مهم في مسألة التعافي، زائد طبعا يا شباب أنك إذا انشغل لسانك بالذكر استحيت. يبقى أنت ماشي عمال تذكر ربنا، هتقوم معدية واحدة قدامك لابسة الحجاب الشرعي كله، وشها باين، هتبص على وشها ده حرام؟ مش هتبص، هتقول حرام يعني أنا بذكر ربنا وبتاع مش هبص.

ماشي، فستحيي، يبقى الذكر هيمنعك من ذلك، يبقى دي عبادة كمان معانا في التعافي. عاوزين ندي فيها حاجة ولا إيه؟ خدوا الوابل الصيب، ماشي، اسمعوا الدروس بتاعه، برضه نزلوا الكتاب أو اشتروه من المعرض واسمعوا الدروس بتاعة الوابل الصيب، فيه فوائد الذكر كلها بقى خلاص. دي هتلاقوها برضه على التليجرام أو يعني هتلاقوها صوتية، مش موجودة على اليوتيوب، على الموقع، ماشي، على التليجرام، على الساوند كلاود، على القنوات الصوتية بتاعة التليجرام، كل ده هتلاقوا عليها إن شاء الله، يبقى الوابل الصيب أيضاً يُسمع.

يبقى ده الذكر، كذلك من العبادات المهمة جداً في رمضان عبادة الاعتكاف. عبادة الاعتكاف، والاعتكاف فيه معنى مهم جداً برضه هنديكم حتة سمع فيها فمش هنتكلم فيه كتير إن شاء الله، إنما عاوزين نتكلم بس عن معنى واحد في الاعتكاف، مسألة أن الاعتكاف بيساعدك أنك تغير من عوائدك.

هو فكرة أصلاً، كويس أن افتكرت، فكرة رمضان يا جماعة أن هو رمضان بيجي يكسر كل العادات اللي أنت متعود عليها أصلاً، وده معنى مهم جداً لكي تتحرر، ولذلك كان الصوم عبادة الأحرار. فالقيام بحق رمضان يحررك، وده في درس فلسفة الصوم، لكن أظن احنا اديناها قبل كده في الاستعداد لرمضان وأظن الناس سمعته، اللي ما سمعوش يسمعه يعني فلسفة الصوم، وده بوبكاست هتلاقوه موجود على فاهم، مهم جداً برضه في استقبال رمضان أصلاً، فلسفة الصوم مهم في استقبال رمضان.

المعنى اللي عاوزينه بقى في الاعتكاف، أن الاعتكاف بيساعدك أنك تكسر العوائد، ولذلك يا شباب ركزوا في الحتة دي، احنا كتير مننا أو معظمنا لما بيجي يروح هيقول لك أنا هعتكف السنة دي، طب جميل، يقوم يروح يشوف الاعتكاف الألْيَم لنمط حياته.

يعني إيه؟ يعني لو أنا متعود مثلاً باكل أكل معين فهشوف الاعتكاف اللي فيه الأكل المعين ده، لو متعود وهكذا، نقول لك لا، أنت روح للاعتكاف اللي ما هواش أقْم لنمط حياتك، لأن واحدة من فوائد الاعتكاف أنك تكسر تلك العادات. دي واحدة من فوائد الاعتكاف، يعني إيه؟ أنا متعود بنام، لا، هتنام بالليل، لا، هتنام بالنهار، آه، بس أصل النور، لا، ده أنت هتنام في الشمس عادي جداً.

ومتعود يبقى الدنيا هادية، لا، ده اللي جنبك هيشخر، واللي الناحية التانية هيبقى ناسي تليفونه فهيرن وأنت نايم، والثالث أصلاً عامل أربع منبهات، وهتنام. هو كده، أصل المرتبة لازم تكون مش عارف منين ومن الناحية دي سوسته ومن الناحية دي مش عارف، هتنام على الأرض، والحمام دلوقتي بقى في الأوضة، مش جوة الأوضة، هتقف طابور عشان تخش، ما في اعتكاف بيبقى بالألف واحد، فهتقف طابور على الحمام، عقبال بقى ما توصل الحمام الله أعلم تكون محتاجه ولا لا، وبعدين هتخش الحمام هتلاقي أصلاً منظر يعني ماشي.

ده كله ليه؟ عشان تكسر، ما أنا مش عبد العادة ولا عبد المنامة ولا عبد الأكل ولا، ولذلك مشايخنا، كان في بعض مشايخنا كان يشدد جداً: ما فيش حاجة اسمها أكل يجي من بره، ما فيش حاجة اسمها كده، يعني كل واحد يطلب بقى الإيه اللي على مزاجه، ما فيش كده، الأكل بتاع الاعتكاف اللي هيتاكل.

فده مطلوب عشان تكسر العادات اللي أنت متعود عليها، وأصلاً من الوقوع في فخ الإباحية أصلاً، أن أنت دايماً بتدور في فلك العادة ده أصلاً، حتى هم سمو العادة السرية، فاحنا عاوزين نكسر تلك العادات. المعنى الثاني اللي في الاعتكاف مهم جداً هو معنى الخلوة.

بالله عز وجل. قالوا: ما هي حقيقة الاعتكاف؟ ابن رجب الحنبلي قال: حقيقة الاعتكاف إيه؟ لا، ده أنا كل رمضان أقول قطع العلائق عن الخلائق، وبس، بتقعد فاضي، والاتصال بخدمة الخالق. احفظوا بقى دي: حقيقة الاعتكاف قطع العلائق عن الخلائق والاتصال بخدمة الخالق. فدي حقيقة الاعتكاف. طب هنعرف نعمل ده واحنا أونلاين 24 ساعة؟ فين فين قطع العلائق؟ ما هي دي بلوة، ما بقناش عارفين نختلي بالله عز وجل، مش عارفين نعملها. ماشي، التليفون ده هنجيله في آخر الدرس إن شاء الله، بس فكرة الاعتكاف نحن عاوزين نعمل ده. طيب، فعشان الاعتكاف نسمع إيه؟ حاجتين هتتسماع مهمين جداً. أول حاجة في رسالة الشيخ أسامة عبد العظيم رحمه الله: الاعتكاف ومعالم التغيير، دول درسين بس، هتلاقوا برضه درسين بنقرا الرسالة دي، فهتاخدوا الرسالة وتسمعوا الدرسين إن شاء الله.

والحاجة الثانية: العزلة، كتاب العزلة للخطابي، ده كم درس؟ 16 درس، ماشي. كتاب العزلة برضه نص ساعة هيخلصوا على طول إن شاء الله، ما تقلقوش، ماشي. ابقوا قبلوني لو لقيتوا وقت للإباحية! يبقى 16 درس كتاب العزلة للخطابي، مهم جداً برضه يتسمع. ده كله احنا يعني 16 درسين عشان نظبط اعتكافنا بس. خلاص، يبقى ده الاعتكاف، العبادة الأخيرة، وهي العبادة اللي كان حقها إنها تقدم، لكن أنا آخرتها عشان تبقى إيه زي ما سموها التيك هوم مسيدج، يعني إيه الحاجة اللي هتعلى بقى في ذهننا واحنا ماشيين؟ عبادة الدعاء.

عبادة الدعاء، وهي والدعاء مخ العبادة أصلاً. طب ليه عبادة الدعاء دي حقها إنها تقدم؟ لأن فيها أهم معنى، وهو معنى الافتقار لله عز وجل؛ إن يا رب، معنى اللي قلناه في نص الدرس، أنا من غيرك ما أساويش، وأنا من غيرك مش هعمل حاجة يا رب، وياما اعتمدت على حولي وقوتي، واعتمدت على خطة تعافي، واعتمدت على، وبرجع يا رب، فأنا من غيرك ولا حاجة. ده يظهر فين؟ في دعائك وتبتلك وابتهالك، وأنك تمرغ وشك في وأنت ساجد لربنا، وتبكي تتضرع بين يديه إنه ينشلك من المستنقع اللي أنت فيه ده، ولد أو بنت. الدعاء؛ فبالله سبحانه وتعالى يتم لك الأمر.

طيب، أنا مش عاوز أتكلم على الدعاء بس، عاوز أتكلم على مواطن الإجابة، هتلاقوها عجيبة جداً بقى في العبادات اللي احنا بنقولها. يعني عندك الصوم، هل له تعلق بالدعاء؟ إيه! للصائم دعوة عند فطره لا ترد، مش كدة؟ وسبحان الله، لو لاحظت آيات الصوم هتلاقي حاجة عجيبة جداً في ترتيب آيات الصوم. ربنا سبحانه وتعالى ابتدى في الصوم بيتكلم عن الحاجات اللي بتكون في النهار، قال سبحانه وتعالى: ﴿كُتِبَ عَلَيْكُمُ الصِّيَامُ﴾، وبعدين شوية أحكام كلها متعلقة بالنهار. وبعدين نبتدي نتكلم عن الليل، حاجات متعلقة بالليل في رمضان اللي هي بتبتدي من إيه؟ ها؟ ﴿أُحِلَّ لَكُمْ لَيْلَةَ الصِّيَامِ الرَّفَثُ إِلَى نِسَائِكُمْ﴾ [البقرة: 187]، ده بالليل. وتلاقي من الآيات دي والآيات دي في آية كدة جت في النص: ﴿وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ﴾ [البقرة: 186]. الآية دي وقعت بين آيات تتحدث عما يكون في النهار، وآيات عما يكون في الليل. وكان المعنى أن في هذا الموطن إجابة الدعاء بين النهار والليل، اللي هو وقت هذا المغرب، اللي هو وقت الفطار. يبقى يا شباب ويا بنات، رمضان 30 يوم في 30 دعوة بأن ربنا ينشلنا من إدمان الإباحية، و30 دعوة بجد، مش بدعي وريقي بيجري عشان الحق آكل، لا. وأنا أنصحكم نصيحة: ما تستناش الأذان يأذن عشان تقعد تدعي، عشان هيبقى ذهنك في الأكل، إنما ادعي قبل؛ يعني الأذان ناقص له 5 دقائق، 10 دقائق، ادخل في أوضة لوحدك، ارفع إيدك واقعد أدعي. أنت كدة يا إسمك إيه هتقوم تاكل يعني أنت لسه فادعي وزي ما أقول لكم كدة 30 يوم رمضان يعني 30 دعوة أو 30 إلحاح، مش دعوة، يعني دعوة ممكن تدعي بيها 10 مرات في اليوم أو في الموطن ده، وده من مواطن الإجابة، فازاي تغفله؟

ادي الصوم. الصلاة: أقرب ما يكون العبد من ربه، فأكثروا فيه من الدعاء. يبقى عندك الصلاة اللي احنا قلنا عليها هتظبطها من الحاجات اللي هتعمدها فيها أنك تكثر في دعائك أن تسأل الله عز وجل المعونة أن تبطل القرف اللي بتعمله. يبقى ادي الصلاة. القرآن: عارفين إن من القرآن عند الختم من مواطن استحباب الدعاء واستجابة الدعاء، وكان السلف يجمعوا بعض ويدعوا عند الختم، وكان أنس يجمع أولاده ويقعدوا يدعوا بعد الختم. فيبقى عند ختم القرآن عندك دعوة برضه مهمة جداً اللي هي دعوة بأن ربنا يحصن فرجك. الشيخ أسامة مرة بيحكي لنا، مرة واحد بقانت يعني قانت بالتاء مش بالطاء، فبيحكي لنا الشيخ بيقول لنا واقف بيدعي بيقول إيه؟ اللهم نسالك فرجاً في الرزق، وفرجاً في مش عارف في العمر، وفرجاً في الذرية، وفر اللهم نسالك فروجاً كثيرة! اه، فالدعاء المهم تسالوا ربنا بقى أن ربنا يحصن فروجنا. يبق ادي القرآن ماشي.

آخر الحاجة وده أنا أجلتها بقى يعني بعد ما خلصنا العبادات هي الجهاز المشؤوم اللي في إيديك. احنا قلنا في رمضان هنبقى محضرين عدة: أول حاجة قلناها سبحة أو عداد إلكتروني، الحاجة الثانية اللي معه فلوس ينزل يشتري تليفون قديم بزراير. اللي عاوز يتعافى يعمل اللي بقول عليه، اللي مش عاوز أنت حر، بس ما ينفعش يبقى الجهاز ده في إيديك والحرام قريب منك قوي فيه، وتقول أنا عاوز أتعافى! عاوز تتعافى؟ لقح الزفت اللي في إيديك ده وارميه في رمضان، مش عاوزينه خالص، في داهية، مش عاوزينه. طيب، شغلِّي عليه؟ طب مش هتقعد تقول لي حجج من هنا لبكرة؟ مش عايزينه. آخرك افتحه بقى ساعة في اليوم وفي وقت تكون بالنهار صايم، ما تفتحوش بالليل، افتحه بالنهار تخلص الحاجة اللي أنت عاوزها وأقفله تاني وخلصنا، ماشي. يبقى هتجيب تليفون بزراير تشتغل بيه في رمضان اللي جاي وترمي التليفون ده ماشي.

المعنى بقى اللي برضه عاوزين نختم به، وهو عشان عمالين ندوس ندوس، بس أبشروا يا شباب إن بمعنى موجود في رمضان واحنا بنستشعره، رجعت في كلامك، وهو إن فكرة أن أنت وأنت في نهار رمضان ويجي لك وساوس أنك تعمل الحاجة دي ولا تتفرج ولا فتصرف، تصرفها عن نفسك وما تعملش ده، أبشر أنت في أعلى مقامات الدين! ده مش كلامي، أعلى مقامات الدين الآية: الاحسان، اللي هو إيه؟ تعبد الله كأنك تراه، فإن لم تكن تراه، فإنه يعني فلتعلَّم أنه يراك. هو ده اللي احنا بنعمله، اللي هو ما فيش حد شايفك، ما فيش حد مطلع عليك، وأنت لرهبة الوقت، وعشان تتم صومك مش هتتفرج على حاجة، مش همارس العادة السرية في نهار رمضان، فانت تقدر تعمل ده بعون الله وقوته وتوفيقه لك، تقدر تعمل. فلتكن تلك هي الانطلاقة، وليكن شعارنا في رمضان المقبل: رمضان التعافي.

قولي هذا وأستغفر الله العظيم لي ولكم. سبحانك وبحمدك، نشهد أن لا إله إلا أنت، نستغفرك ونتوب إليك.