بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله.
اللهم صل على سيدنا محمد النبي، وأزواجه أمهات المؤمنين، وذرياته، وآل بيته، كما صليت على آل إبراهيم إنك حميد مجيد. أما بعد.
المجلس الثاني في مسألة غض البصر. المرة اللي فاتت اتكلمنا عن أن الله عز وجل قد وضع حمى للوقوع في الفاحشة، اللي هو غض البصر، واكتشفنا المرة اللي فاتت أن غض البصر نفسه له حمى. غض البصر نفسه له حمى، واتكلمنا عن هذا الحمى. إحنا المرة اللي فاتت ما اتكلمناش عن غض البصر، إحنا اتكلمنا عن حاجات حوالين غض البصر، حاجات بتعين على غض البصر.
وده ليه؟ لخطورة الأمر، فيبقى غض البصر نفسه محتاج له حمى، وقلنا المرة اللي فاتت ليه؟ علشان إطلاق البصر سهل، متكرر، وسهل إخفاؤه عن الناس. فعشان الحاجات دي كلها كان محتاج له حمى تاني يحميه، وتكلمنا عن مسألة ما يباح كشفه وما لا يباح، لكن في عجالة، والنهارده بقى إن شاء الله عاوزين نتكلم عن مسألة غض البصر من حيث غض البصر. عاوزين نبدأ بكلام للإمام الرازي رحمه الله، ونبتدي نفهم كلام الإمام الرازي.
ليه يا جماعة بس هنبدأ بكلام الرازي؟ إحنا عندنا دلوقتي ممكن واحد تبقى مشكلته في القوة العلمية، وواحد تبقى مشكلته في القوة العملية. يعني ايه؟ يعني واحد ما يعرفش أن كذا حرام، ما يعرفش، فلو عرف أنه حرام مش هيعمله، هي قضيته مش أن هو مش عارف يغض البصر، هو مش عارف، أقصد يعني ما عندوش القوة أنه يغض البصر، لا، هو جاهل بأن المسألة دي المفروض يغض فيها البصر. ما إحنا عندنا يا جماعة دلوقتي في مسائل واضحة ما فيهاش إشكالات، يعني واحد ينظر لامرأة بشهوة، دي ما فيهاش إشكال أنه لازم يغض البصر، كلنا عارفين دي، أو العكس، واحدة تنظر لرجل بشهوة، فكلنا عارفين أنها لازم تغض البصر، واحد بيتفرج على إباحية، واحدة بتفرج على إباحية.
إنما بيجي لنا أسئلة: هو مش عارف، معدتي في الجامعة، أنا في الجامعة فبتشرح لي معيدة، بتشرح لي دكتورة، ينفع أبص ولا ما ينفعش أبص؟ هو هنا عنده جهل في هذه المسألة، يعني أنا لازم أغض البصر ولا لا؟ ممكن أنظر دكتور، فينبفع أنظر إلى بدن المرأة ولا ما ينفعش؟ أو العكس، الست تقول: ينفع أروح لدكتور راجل ولا ما ينفعش؟ هنا المشكلة فين؟ مش في القوة العملية، هو في القوة العلمية، هو مش عارف أنا المفروض أعمل إيه، فمحتاجين نضبط الحته دي، وبعدين بقى ننطلق إلى القوة العملية، اللي هو الإشكال الكبير بقى بتاع الشباب، اللي هو إحنا: أنا مش عارف بقى إيه، مش عارف هو حرام ولا لا؟ أنا عارف أنه حرام ومش عارف أغض بصري، فازاي أغض بصري؟ ده إشكال في القوة العملية.
لكن عاوزين في عجالة، في دقائق بس، نضبط مسألة القوة العلمية دي، مسألة مسائل فقهية، عشان ننطلق بقى: كيف نغض البصر؟ يقول الرازي رحمه الله: واعلم أنّا ذكرنا أنه لا يجوز النظر إلى شيء من بدنها، يعني بدن المرأة الأجنبية، ويجوز النظر إلى وجهها وكفيها. وإحنا قلنا المرة اللي فاتت في كم قول؟ ثلاث أقوال، ده أخف قول يعني، ما الذي تبديه المرأة منها؟ أخف قول عند الفقهاء، إلا في أقوال أخرى طبعا، لكن ضعفها أهل العلم، هي أن تبدي الوجه والكفين، القول اللي فوقيه تبدي الوجه ولا تبدي الكفين، قول الحنابله لا تبدي شيئاً، المرأة كلها عورة. فهنا الرازي واخد بالقول إنها تبدي الوجه والكفين خلاص، متساهل الرازي.
قال: وفي كل واحد من القولين استثناء. أما قوله، وده بقى اللي يعنينا: يجوز النظر إلى وجهها وكفها، فاعلم أنه على ثلاثة أقسام. ركزوا يا شباب، كل الكلام اللي جاي في النظر للوجه والكفين، هنقعد بقى نفصص في الأحكام وفتنة ولا لا، وفي حاجة ولا لا. كل الكلام اللي جاي في الوجه والكفين خلاص.
يقول: فاعلم أنه على ثلاثة أقسام: إما ألا يكون فيه غرض ولا فيه فتنة. يعني إيه؟ يعني أول قسم أن يكون في غرض للنظر ولا فتنة. هنيجي دلوقتي للأمثلة بتاعتها. واما أن يكون فيه فتنة ولا غرض فيه، يعني لو نظرت فتنا، وما فيش غرض أصلاً يدعوني أني أنظر أصلاً، ما فيش حاجة تدعو للنظر. وأما أن يكون فيه فتنة وغرض، يعني في حاجة أن أنظر، لكن هفتن لو نظرت.
أما القسم الأول، إيه بقى القسم الأول؟ حد فاكر؟ فيه غرض ولا فتنة خلاص، يعني في حاجة أني أنظر وما فيش فتنة. مثال دلوقتي زي اللي أُلنا من شويه: المعيدة بتاعتي في الجامعات، والله هي بتشرح، وأنا لما بنظر أنا لا أخاف الفتنة ولا ما بشتهيش ولا حاجة، وست كبيرة أي حاجة، يعني إيه؟ المهم ما فيش شهوة تحصل، أو ما فيش خوف شهوة أو كذا. خلاص، إحنا بنتكلم نظر في النظر لإيه؟ للوجه. خلاص.
طيب، قال: أما القسم الأول فاعلم أنه لا يجوز أن يتعمد النظر إلى وجه الأجنبية لغير غرض. يعني واحد تعمد أنه ينظر للوجه لغير غرض، حرام. ماشي. طيب، بيقول: آه بس هو أنا، هو لغير غرض بس ما فيش فتنة، ما فيش شهوة؟ حرام، ما بنتكلمش على بدن، ما بنتكلمش على الشعر، ما بنتكلمش على، ما بتتكلمش على ده. النظر إلى وجه الأجنبية لغير غرض، ما فيش حاجة تدعو إلى النظر لوجهها، تعمد ذلك حرام.
خلاص، قال: وإن وقع بصره عليها بغتة، يغض بصره. واضح الكلام، لقوله تعالى: ﴿قُل لِّلْمُؤْمِنِينَ يَغُضُّوا مِنْ أَبْصَارِهِمْ﴾ [النور: 30]. وقيل يجوز مرة واحدة إذا لم تكن محل فتنة، وبه قال أبو حنيفة رحمه الله، قال: ولا يجوز أن يكرر النظر إليها. يعني لا يطول في النظرة ولا يكرر النظر. وقع نظره بغتة، فجأة، مش عارف أن في امرأة، فشاف وجه المرأة، يصرف بصره، وهذا قول النبي صلى الله عليه وسلم: «اصرف بصرك»، لما سئل عن نظر الفجأة قال: «اصرف بصرك». وكررت لكم، قلت لكم المرة اللي فاتت الكلام ده، قلت لكم هو اللي جه بيسال النبي عليه الصلاه والسلام عن نظر الفجأة ده، هو هيشوف إيه في عهد الصحابه؟ هيشوف إيه يعني؟ ومع ذلك قال له النبي صلى الله عليه وسلم: «اصرف بصرك». ما هو الصحابيات ماشيين إزاي؟ ولا اصرف بصرك؟
خلاص، قال: لقوله تعالى: ﴿إِنَّ السَّمْعَ وَالْبَصَرَ وَالْفُؤَادَ كُلُّ أُولَئِكَ كَانَ عَنْهُ مَسْئُولًا﴾ [الإسراء: 36]. يبقى لا يكرر النظر. ولقوله عليه السلام: «يا علي، لا تتبع النظرة النظرة، فإن لك الأولى وليست لك الآخرة». وعن جابر قال: سالت رسول الله صلى الله عليه وسلم عن نظر الفجأة، فامرني أن اصرف بصري.
أما القسم الثاني -فيبي خلاص يا جماعة يبقى لا غرض فيه ولا فتنة، ما فيش فتنة بس ما فيش غرض- هل يجوز أن ننظر؟ لا، ما يجوزش انك تنظر طالما ما فيش غرض. طب يا شيخ ده أنا ما فيش فتنة، يا شيخ ده ما فيش شهوة؟ لا، يجوز انك تنظر للمرأة الأجنبية لوجه المرأة الأجنبية طالما ما فيش غرض للنظر.
القسم الثاني: وهو أن يكون فيه غرض ولا فتنة فيه. عفواً، إحنا، أنا قلت مثال غلط من شويه، المثال هنا بقى كان لا غرض فيه ولا فتنة، فده مش المعيدة، المعيدة في غرض أن عاوز أبص للشرح، عاوز كذا، عاوز كذا، إذا كان في غرض يعنى. إنما المعيدة بقى تيجي هنا أن هو في غرض ولا فتنة.
قال: فيه غرض ولا فتنة فيه. فذلك أمور، أحدها: أن يريد نكاح امرأة، فينظر إلى وجهها وكفيها إذا أراد النكاح. وذكر أدلة ذلك، قال: فكل ذلك يدل على جواز النظر إلى وجهها وكفيها للشهوة إذا أراد أن يتزوجها. ثم ذكر مسألة أخرى، وهي عند المبايعة.
مثال آخر يا جماعة لما فيه غرض ولا فتنة فيه، قال: عند المبايعة. ركزوا يا جماعة، الإمام الرازي بيقول إيه؟ بيقول إنه في غرض وما فيش فتنة، انظر. مثال عند المبايعة: واحد بيشتري من واحدة، أو عفواً، واحدة دخلت تشتري من واحد، فغض البصر؟ لا، ما تغضش البصر، انظر إلى وجه المرأة، ليه؟ لأن المبايعة ما بتنتهيش عند خدوهات، ممكن شويه وترجع لك تقول لك: أنا لسه شارية منك الميكروويف، وهي لا اشترت ولا عملت، وأنت إيه؟ هي معتبرة أنك الآخ فلان اللي ما بيغض البصر، اللي ما بيبصش على النساء وبتاع.
أحد المشايخ، الشيخ معروف يعني، وأيه، مسجده أربعة أدوار، عامر بيبقى مليان وزمان يعني. وبعدين، ففي مكتبة إسلامية إيه فاتحة في وش المسجد، فدخلت واحدة منتقبة تقول له: أنا بنت الشيخ فلان، اللي هو بقى الشيخ إيه؟ وهو شيخ بيقول لك: عاوزين شويه حاجات كده وكذا وكذا. واخد الحاجات ومشت. الشيخ ده أصلاً ما عندوش بنات أصلاً يعني.
طيب، هي مسألة بيع وشراء وهيترتب عليها أمور، يعني ما هياش بيع وشراء، يعني الحاجات البسيطة اليومية دي. طب وهي منتقبة، وهي اللي هتشتري، وهي اللي ينفع آه تكشف وشها؟ طيب لو حاجة زي ما بنقول هيترتب عليها أمور بعد كده أو مبالغ كبيرة بتدفع أو كذا، هل البائع ممكن يصر أنه ينظر للوجه؟ آه، له ذلك، أنه يصر أنه ينظر لوجه المرأة، بل قالوا: يتامل وجهها. مش بس ينظر، يتامل! ده مش يعني يقعد يبص في، على، لا يتامل الوجه، يعني ينظر نظراً بحيث أنه لو يحتاج بعد كده يقول: هي دي اللي اشتريت أو لا، مش هي؟ يبقى عارف هي ولا لا. فهذه من المواطن التي، زي بعضه، هنخليكم إيه تبصوا لوجه المرأة، الوجه ماشي.
قال: عند المبايعة ينظر إلى وجهها، شوفوا الراجل بيقول إيه: متأملاً، علشان يبقى فاكر هي دي اللي اشترت مني، حتى يعرفها عند الحاجة إليه، ممكن ترجع رجع له إيه؟ بخيار عيب، في عيب في السلعة وعاوزه، وهي أصلاً ما اشترتش من هنا أصلاً. خلاص، دلوقتي بقى لو في زي الريسيت اللي هو بيبقى مع الحاجة ولا بتاع بيسهل الدنيا، بس مش كل، يعني مش كل البيع فيه ده، أو عقد أو شيء. ماشي الحال.
من هذه الصور: أن ينظر إليها عند تحمل الشهادة. يعني: تعالى يا فلان، اشهد أن فلانة بتشتري من فلان، أن فلانة بتعمل صفقة، أن فلانة بتعمل فتشهد. فالراجل المتدين عامل إيه؟ اللي فاهم دين، حاطط وشه فين؟ ده مش فاهم دين، ده كده مش فاهم دين، ما تشهدش.
خلاص، ليه بقى؟ هيجي بعد كده، هو الراجل فعلا عنده ديانه يعني، بس مش بس جاهل، هيجي بعد كده الراجل شفت فلان النصاب، تعال تعال بقى اشهد قدام المحكمة أنها إيه؟ هي اللي خدت مني المش عارف إيه. يجي القاضي يقول له إيه: هي دي؟ لو قال آه، يبقى إيه؟ كذاب، هو مش عارف شكلها. يبقى ضيع حق الراجل بإيه؟ بجهله.
لا، هنا ينظر الوجه، آه ينظر للوجه، ما فيش مشكلة، ينظر لوجهها علشان عند تحمل الشهادة، لأنه إذا طالب بأداء الشهادة هنحتاج أن هو كان لازم يبقى عارف هي دي ولا مش هي دي. خلاص.
أما القسم الثالث: وهو أن ينظر إليها للشهوة، قال: فذلك محظور. هنا بقى ما فصلش، يعني هتنظر لشهوة؟ في خوف شهوة، حرام. تنظر المرة اللي فاتت قلنا لك صور، يعني قلنا لك: طب أختي، حرام؟ قلنا ده المرة اللي فاتت، أمي، حرام؟ بنتي، حرام؟ نظر فيه شهوة أو يخاف منه الشهوة، حرام هذا النظر. وساعتها عدينا القول ده، معلش أنا بعيد تاني لأننا عايشين في مصايب، قلنا البنت أو الأخت أو الأم التي تشعر شيئاً من محرمها، تحتجب عنه.
خلاص، قال: أما الثالث وهو أن ينظر إليها للشهوة، فذلك محظور. قال صلى الله عليه وسلم: «العينان تزنيان». وعن جابر قال: سالت رسول الله صلى الله عليه وسلم عن نظر الفجأة، فامرني أن اصرف بصري. وقيل مكتوب في التوراة: النظرة تزرع في القلب الشهوة، ورب شهوة أورثت حزناً طويلاً. وده هنجي له إن شاء الله في علاج إطلاق البصر.
الكلام الثاني يبقى كأننا دلوقتي إحنا أحرزنا المسألة دي يا جماعة. طيب واضحة المسألة؟ ما أظنش محتاجين فيها تفصيل، لأن ده مش الدرس، إحنا ده بس عشان اللي عنده جهل بهذه المعلومات ادينا عرفناها، بس إحنا مش جايين نقعد عشان نعرف إيه ينفع أنظر لوجه، يعني معظم الناس مش جاي عشان كده، لا إحنا عندنا مشكلة في غض البصر، يا شيخ إحنا عاوزين نغض البصر، بس دي دي معلومات مهمة.
طيب، قال: أما الكلام الثاني، وهو أنه لا يجوز للأجنبي النظر إلى بدن الأجنبية، ودي واضحة، واستثنوا أموراً منها بقى: يجوز للطبيب الأمين أن ينظر إليها للمعالجة. وده سؤال بيجي لنا كتير: شيخ، أنا دكتور في الامتياز، دكتور خلصت، عاوز أتخصص التخصص...
الحكم يجوز، الفتوى لا تتخصص هذا التخصص، خلاص ليه هو حرام؟ ما قلتش حرام، لكن الحرام فيه قريب، فأنت الدنيا واسعة رايح تضيق الدنيا ليه على نفسك؟
السؤال ده بخلاف واحد جى بيقول لي أنا دكتور في المجال ده، خلاص أنا في التخصص ده، فأيه اللي أعمله وإيه اللي ما أعملوش؟ آه، ده بقى هنفصل له في الكلام يبقى يجوز تعمل، تعمل كذا وما يجوزش أنك تعمل كذا، هنقول الكلام ده بس خلونا في دي عشان بس نركز، أنا عاوز أتخصص يا شيخ فتخص التخصص الفلاني ده فيه كشف على النساء، ما تتخصصش التخصص ده، روح لحته تانية أوسع، ما تضيقش على نفسك، ما تبقاش عمال إيه كراع يرى حول الحمى يوشك أن يرتع فيه، ليه بتعمل كده؟ يعني حرام؟ أدينا جاوبنا مش ما قلتش حرام، ما قلتش حرام.
طيب السؤال اللي بيجيلنا، طب أنا ست وعاوز أروح لدكتور راجل أمراض نساء، يجوز ولا لا يجوز؟ الحكم يجوز، الفتوى بلاش، يعني حرام؟ ما قلتش حرام، بالشروط هنقولها كمان شوية، إنما لو في ست تسد مسد هذا الرجل روح لها، طب في ست مثلا روح للراجل برضو مش حرام يا جماعة عشان دي أحكام فقهية دي ما احنا مش بنوارب فيها، يعني في ست تسد مسد الرجل وفي رجل دكتور رجل أنا هروح للراجل، ده حرام؟ لا مش حرام، ده الحكم؟ لا مش حرام، ماشي، طيب إنما الفتوى بلاش، يعني ما تعمليش ده وروحي للست طالما في ست تسد مسد إيه الرجل.
اللي دايما بيتقال لنا ودي بقى يعني إيه دعوة للنساء الطبيبات أن كل شوية جي لنا أصل هو الستات مش شاطرة في التخصص ده وده بسمعه كتير ومن محافظات كتيرة يعني مش حتى محافظة واحدة، وفين وفين أما تلاقي واحدة شاطرة في التخصص ده فبيحوجن أن النساء تروح للرجال، فدي بقى دعوة أخرى للطبيبات أنت خلاص أنت نزلت وشغالة، ما تبقي شاطرة يعني، يعني ما خلاص أنت في هذا الثغر خليكي شاطرة اتعلمي كويس وركزي في شغلك واديه يعني الوقت اللي هو إيه المطلوب عشان خلاص يبقى يعني ترفعي الحرج عن النساء اللي مش عاوزة تكشف على الرجالة.
الطبيب بقى الراجل ده اللي هو هيكشف على المرأة، يكشف يبص لإيه؟ إلى ما تدعو الحاجة إلى النظر إليه ولا يتعدى ذلك الموضع، فلو الحاجة أنه ينظر لمكان بعينه ما ينفعش ينظر حوالين المكان ده، خلاص هو ينظر على هذا المكان فقط، لا يتعداه.
المسألة الثانية المهمة جداً رجالا ونساء بقى، النظر دي مسألة والخلوة مسألة تانية، يعني إيه؟ يعني خلاص الطبيب أمين ومش، وخلاص أنا هروح للراجل وعارفة أن ما ينفعش يختلي الدكتور بالمريضة، هذه الخلوة محرمة، وقول مثل ذلك في المدرس مع الطالبة والمدرسة مع الطالب، يعني الخلوة حرام.
فده بيحصل فين في العيادات؟ تلاقي الدكتور قاعد مع المريضة أو الدكتورة قاعدة مع المريض والباب مقفول، الباب ده ما فيش جن أزرق يعرف يفتحه مش هو مقفول بالمفتاح بس لازم يخبط والدكتور يقول له اتفضل، إيه اللي ناقص؟ خلوة، خلوة، طب يعني أعمل إيه؟ لو أنت طبيب يبقى دايما في معاك يا إما الست تروح بحد محرم من محارمها للطبيب ما فيش يبقى في ممرضة دايما متواجده، ما فيش حاجة اسمها أن الدكتور قاعد مع المريضة لوحدهم كده، في ممرضة دايمًا قاعدة معاهم خلاص.
فدي مسألة تانية، يبقى استثنوا أن الطبيب الأمين له أن ينظر إلى المعالجة صور تانية وقالوا وكذلك لو وقعت في غرق أو حرق، يعني حصل واحدة بتغرق، واحدة بتتحرق، واحدة بتقع مش عارف إيه، فيقول لك أنا هغض البصر، لا يجوز أن أروح إيه؟ نقول له لا، يعني لا هنا تدعو الحاجة إلى ذلك، أنقذ الست حتى لو إيه وقع نظرك عليها ما فيش مشكله، فدي من المواطن اللي استثنوها.
طالب مسألة نختم بها المسائل العلمية الفقهية عشان ندخل على درسنا لأن برضو ممكن تحدث كثيرا أو يعني منتشره، قال: لا يجوز للرجل أن يجلس عاريا في بيت خال، يعني دي مسألة تيجي كتير يقول لك إيه أنا وأنا قاعد لوحدي ببقى براحتي، ماشي مش شرط يبقى عاري بقى، ممكن ما يبقاش عاري بس العورة باينة، يعني لابس ثياب تظهر عورته، أو المرأة كذلك، ويقول لك أنا قاعد لوحدي فهل هذا جائز؟ قال: لا يجوز، لأنه روي أنه عليه الصلاة والسلام سئل عنه فقال: الله أحق أن يستحيا منه، قال: يا رسول الله رأيت إن كنت خاليا يعني أنا قاعد لوحدي، قال: الله أحق أن يستحي منه، قال وروي أنه عليه الصلاة والسلام قال: «إياكم والتعري فإن معكم من لا يفارقكم إلا عند الغائط وحين يفضي الرجل إلى أهله»، والله أعلم، وبهذا انتهى ما نحتاجه من كلام الرازي، طبعا الرازي شافعي.
طيب كده احنا خلصنا المسائل العلمية للي عنده إشكال فيها، العملي بقى، طب يا شيخ احنا خلاص عرفنا بس احنا دلوقتي احنا كل ده يعني مشكور جزاك الله خير بس أنا أنا ماشي بص يعني يمين وشمال وفوق وتحت ويعني فانا ما يعني الكلام ده ما يشغلنيش قوي وده حال يعني أو معظم الأسئلة كده بتجي بقى في الحته دي أصلا اللي هو القوة العملية رايحة في داهية كيف أغض بصري؟
قبل ما نطلع من الآية نشوف الآية ما هو الله عز وجل يا جماعة لما أمر الرجال بغض البصر والنساء بغض البصر ما سابهمش كده، احنا أمبارح يعني الدرس اللي فات عفوا اتكلمنا أن إيه ده احنا فوجئنا أن الايتين دول حواليهم قصة يعني في حاجات كتير قوي حواليهم علشان تعين على غض البصر وما دخلناش في الايتين، تعالوا بقى كده نشوف الايتين، قال الله عز وجل: ﴿قُل لِّلْمُؤْمِنِينَ يَغُضُّوا مِنْ أَبْصَارِهِمْ﴾ [النور: 30].
أول حاجة قل للمؤمنين، المره فاتت قلنا إيه في انتقال فجأة كده مش كده من يا أيها الذين آمنوا إلى قل للمؤمنين، نداء الله عز وجل في القرآن لأهل الإيمان يا أيها الذين آمنوا، هنا حصلت حاجة عجيبة مع أن في قبليها نداءات، قل للمؤمنين يغض من أبصارهم، وقلنا ساعتها بعض أهل الإيمان بيذهلوا أن إيه أن في رب وأن ده أمر من ربنا سبحانه وتعالى فاحتجنا إيه للتنبيه، هديكوا يعني عشان نفهم الحته دي يا جماعة ما فصلناش المره دي لأنه ده درسها بقى ده وقتها، لما يجي ملك من ملوك الدنيا ويقول لك إيه اعمل كذا وكذا، ماشي، أهيب في نفسك ولا وأنت قاعد قدامه قدام الملك ينبص يقول إيه قل له يفعل كذا وما يبصلكش أصلا الملك ما يبصلكش يبص لز يقول إيه قل له يفعل كذا، إيهما أهيب في نفسك؟ الثانية أهيب، بتعمل إيه بينك وبين الملك يعني حاجز أكبر يعني لو أنت ناسي أني ملك لا فانا ملك وأنا ماكلمكش أنا عشان أمرك بأمر هبلغ وزيري يقول لك اعمل دي، فهنا يا جماعة إيه قل للمؤمنين يغض من أبصارهم توقع الهيبة في قلبك من الله سبحانه وتعالى، دي بداية الآية كده ما جاتش يا أيها الذين آمنوا غضوا أبصاركم، ما جاتش كده، قل للمؤمنين يغضوا من أبصارهم.
يبقى أول العلاج وقوع الهيبة في قلبك أنك باطلاق البصر أنت تخالف الله جل جلاله، الله الذي لما أراد أن يامرك لم يامرك أمرا مباشرا وإنما قال لنبيه قل له قله يغض بصره، فتوقع في قلبك الهيبة منه جل وعلا قل للمؤمنين يغضوا من أبصارهم، وممكن بقى تسمعوا درس الخوف ماشي اللي هو احنا قلنا الخوف ثلاث في درس الخوف يعني ثلاث إيه كان هنا برض الخوف صح، آه، طب قولوا أنتو بقى طالما كان قلنا ثلاث مراتب أعلاها الخوف من الله لله، فاكرين الأسد والسبع والقصة الكبيرة دي؟ اسمعوها يعني لو مهمة جدا جدا هنا بس مش عايزين نعيدها يعني عشان نفهم يعني إيه المهابة تمنعك من إطلاق البصر.
قل للمؤمنين يغضوا من أبصارهم ويحفظوا فروجهم، هنا يا جماعة يغض من أبصارهم ويحفظوا فروجهم، فكان المعنى لن تحفظ فرجك إلا إن غضت بصرك، فكان الآية تشير إلى هذا المعنى يعني إيه؟ يعني أوعى تفتكر ي بتبص أنها نظرة وعدت، لا النظرة هتجيب نظرة والثانية هتجيب ثالثة والثالثة هتجيب إباحيات والاباحيات هتجيب عادة سرية والعادة السرية هتجيب زنا، وده كله مبدأه منين؟ من النظرة، النظرة لإيه؟ لوجه امرأة أجنبية لا تحل لك مفاجأة للوجه، أنت تبص ليه على وشها امرأة لا تحل لك ما تبصش على وشها أصلا، طبعا احنا فينا اللي إيه لا مثلا نساء محجبات وبتاعد والصبح هو يحس أنه إيه ولي ما ببصش غير على الوجه، يعني هو يحس أن النهارة الحمد لله إيه يوم خلصان بلا ذنوب، شيء عجيب ويا جماعة بلوة، احنا في بلوة بلوة حقيقية يعني أنا لو قلت لك أديك عرفتها القوة العملية إيه اللي حلال والحرام، لو قلت لك بقى لو احنا قلنا أن الحاجات دي حرام وما أعلاس طبعا واحدة في إعلان في الشارع، واحدة في مش عارف إيه على الفيسبوك، على التيك توك، على الانستغرام، فضلا عن الإباحية اللي بتتشاف أنت جاي النهارده عارف انك جاي درس غض البصر، احنا عارفين من الاسبوع اللي فات النهارده الجزء الثاني من غض البصر يعني النهارده درس غض البصر، لو قلت لك وأنت جاي في الطريق وقعت في كم مخالفة في هذا الأمر مصيبة ده وأنت جاي في طريق درس غض البصر.
طيب وقبل ما تنزل ساعة واحدة مش هقول لك طول اليوم ساعة واحدة يعني أنت نازل من بيتك الساعة واحدة أو اثنين مثلا اثنين، من واحدة لاثنين، أنا ليه بقول لك وأنت في بيتك؟ لأن احنا كنا زمان نقول إيه؟ البيت ده هو إيه المكان الواحد يعني يحفظ نفسه فيه، حتى دي ما بقتش، ليه حتى وأنت في البيت في إيديك الجهاز المشؤوم، فحتى بيتك ما بقاش مكان العصمة أو مكان الاحتراز عن الوقوع في المعاصي لا، فلو خدنا ساعة واحدة بس قبل ما تنزل من واحدة لاثنين وأنت عارف أن النهارده درس غض البصر، في الساعة دي وقعت في كام حرام من هذا الأمر وأنت عارف بقى من الدرس اللي فات كمان أن كل ذنب من دول محتاج إيه؟ توبة خاصة، توبة خاصة بهذا الذنب على قول بعض أهل علم، فإشكال كبير جدا قلؤمنين يغضوا من أبصارهم ويحفظوا فروجهم، لن تحفظ فرجك إلا إن غضت بصرك، ولو ما حفظتش فرجك هتروح في داهية، هتروح في داهية دنيا وأخرة إلا أن يشاء الله طبعا.
اللي المشاكل اللي بتجي لنا للشباب بعد الزواج مهينة مهينة، أولا الشاب بيبقى فاكر أن عادي الموضوع ده مالوش أي آثار وبعدين يكتشف بعد الزواج أنه أنه ما عندوش قدرة أنه يفعل شيئا مع امرأته، أنا ما بتكلمش في حالة واتنين، ده ظاهرة الآن خلاص بتجي لنا مشاكل كده أنه بعد الزواج بقى برضو يفضل العادة السرية، ودي لها أبعاد نفسية ويعني إيه فيها مش وقته، يعني احنا كنا أشرنا ليها قبل كده في درس الإباحية اللي عاوز يسمعه، ف يعني عدم حفظ فرج ليه مصايب وكوارث في الدنيا قبل الآخرة وفي الآخرة.
قل للمؤمنين يغضوا من أبصارهم ويحفظ فروجهم، ها ذلك أزكى لهم، يا ابني ده الأنظف، ذلك أزكى لهم، أنت ليه بتحب القذاره؟ ده المعنى بنقول لك اطلع من من القذارة اللي أنت فيها وأنت يأبى إلا أن تجلس في هذه القذارة، ذلك أزكى لهم، والذي يقول لك هذا هو الله جل جلاله الذي هو أعلم بك منك، ده أنظف ليك يا ابني، غض بصرك أنظف، ذلك أزكى لهم أو أزكى يعني أنمى، الزكاة تاتي بمعنى الطهارة وتاتي بمعنى النماء، أنمى لهم، يعني إيه أنمى؟ يعني هذا أنمى لقلبك وأنمى لدينك وأنمى لعقلك، اللي بيطلق بصره ده يعني حتى العقل على طول في تشتت، ما هو البصر لما بتطلق البصر هذه الصور تنطبع في قلبك ما بتروحش، بدليل الشباب يجوا يشتكوا وأنا بصلّي يطلع قدامي مناظر وحشة، المناظر جت منين؟ من المخزون اللي عنده جوه، طب المخزون ده جه منين؟ من عينه، يا جماعة العين أوسع المنافذ للقلب، أوسع منفذ لقلبك هو عينك، فلو أنت مش حارس المنفذ ده كويس هتضيع، ذلك أزكى لهم أزكى لقلبك، أنظف لقلبك، أنظف قلب حشيه صور، سواء صور يعني مش لازم يبقى إباحيات حتى لو صور مش إباحيات لكن حشيت قلبك بدهب الصور دي، ما احنا نيجي نقول إيه أن النظرة تؤثر في القلب فبيجي لنا لا يا شيخ لا الحمد لله النظرة ما تأثرش في قلبي، الحمد لله هو صادق آه صادق صادق، إنما تأثرش آه عفوا يعني هو مش صادق أن أنا ما تأثرش هو صادق في أنه لا يشعر إيه بالتاثير هو صادق في ده فعلا، ليه بقى؟
هديكم مثال تحبوا أنتو الأمثال قوي، لابس تيشرت بيضا نازل بيها لسه فاتحها من الكيس دلوقتي أو من ال نازل تيشرت بيضا أول لابسه خلاص بيضا خالص ما فيهاش أي حاجة، طيب وأنت نازل في عليها نقطة تراب كده هنا إيه جيت تمسحه لقيتها إيه فرشت معاك، إيه اللي هيحصل لك؟ هتتعكمل مش كده؟ تبقى طول الخروج خروجة.
متعكنن، طب نزلت بقى بالتيشيرت البيضا دي، فكانت الخروجة دي عبارة عن إيه؟ لعبت ماتش كورة واتزحلقت والنجيلة بقت خضراء، وطلعت بعديها على مش عارف إيه فكان في مطر، وقعدت أتزحلق في الطينة بقت سودا. المهم أنت راجع بهي هي التيشيرت في نفس اليوم، فوانت راجع وقعت على نقطة تراب، هتحس بالزعل اللي كان عندك.
هي دي قلوبنا. إحنا قلوبنا هي التيشيرت دي. وأنت راجع بقى طين سواد، سواد ده وصفي أنا؟ لا، مش وصفي، ده وصف النبي عليه الصلاة والسلام حتى تصير القلوب على قلبين؛ مش كدَا؟ قلب أسود مربادًّا كالكوز مجخيا لا يعرف معروفًا ولا ينكر منكرًا إلا ما أشرب من هواه. فوصف أن أنت راجع بقلب أسود، ده مش وصفي.
تعرض الفتن على القلوب كعرض الحصير عودًا عودًا، أو عودًا عودًا روايتين. وبعدين قلب هيشربها زي النقطة دي، على نقطة على نقطة، التيشيرت بقت خلاص كلها سودا. وقلب هينكرها؛ كل ما تقع نقطة يغسل على طول، يغسل، ترجع التيشيرت أبيض تاني.
إيه اللي هيحصل؟ القلب ده هيبقى قلب أسود، والقلب الثاني أبيض لسه زي ما هو. ما هو بينكر النقطة دي: لا أنا مش هكمل خروجة كده، أنا هروح على أقرب حنفية وأغسل، والتيشيرت ترجع بيضا تاني. فنيجي آخر اليوم نلاقي التيشيرت دي سودا ودي بيضا.
قلب أسود مربادًّا كالكوز مجخيا، يعني إيه مجخي؟ يعني مقلوب. إيه معنى كوز مقلوب؟ يعني النبي عليه الصلاة والسلام عاوز يقول لنا إيه؟ لا ينتفع به. الكوز يا جماعة عشان ننتفع بالكوز لازم تعمل إيه؟ هات كوز كده وأقلبه، وهات جردل مية مثلا وصب جردل المية على الكوز، هيدخل في الكوز نقطة؟ ما هو الكوز أصلا مخلوق عشان ينتفع بأنه إيه؟ يدخل فيه المية، يعني نحرس فيه الماء ونشرب منه وبتاع. ما نقول: ما هو عمره ما هيحصل، ليه؟ الكوز مجخي، أعدله هتنتفع بالكوز. هذا القلب يصير كالكوز مجخيا، يبقى كوز لا ينتفع به، يبقى القلب لا ينتفع به.
صح؟ طب لا ينتفع به في إيه؟ سيدنا النبي عليه الصلاة والسلام بين لك حاجة خطيرة جدا جدا من وظائف القلب في الحديث ده، اللي لو لقيتها فيك اعرف أن قلبك كالكوز مجخيا. قال: لا يعرف معروفًا ولا ينكر منكرًا إلا ما أشرب من هواه.
وأديت للشباب المتدين مثال على ده قبل كده؛ قلت لكم إيه؟ في المصيف، وأنت قاعد على الشط -بافتراض يعني أن حد راح يعني غصب عنه اتكتف وراح، أنا ما أعتقدش أن حد متدين يروح الحتت دي بيرضاها يعني متخيل أنه عشان يروح كانت تفوق وجابوا سكينة حطوها على رقبته قالوا له هتيجي معانا وهنقتلك، ده يعني ده التصور الوحيد لواحد متدين يروح الأماكن دي- فهنفترض يعني واحد عملوا معاهم كده وودوه الأماكن دي وقاعد على الشط.
وبعدين فشوية يلاقي إيه المثال اللي أديته لكم؟ أن واحد جاي ينزل مثلا البحر، فلابس تيشيرت من فوق وشورت طويل مثلا بنتاكور ولا بتاع لغاية، فتلاقيه يستهجن قوي المنظر ده كده، يقرأ فيه، يقول لك: إيه المنظر ده؟ وده مثلا مش كده. في ها، اللي هو مين؟ ما هو متكتف هو برضه جاي لابس تيشيرت. يقول لك: إيه اللي وداه هناك اللي لابس تيشيرت وبتاع الغطس؟ إيه اللي وداه هناك ده برضه جاي متكتف. ماشي، وبعدين يلاقي قلبه مفرفش كده للي لابس إيه المايوه بقى العادي مثلا ولا اللي يبدي شيئا من عورتها وكذا -ما أرورش النساء بقى عشان إيه مش ناقصة- طب هو ليه أنكر المنظر ده؟ ما أشرب من هواه.
والإلا لو احنا جبنا الاثنين دول في ميزان الشرع -بعيدا بقى عن لو افترضنا المكان بقى ما فيهوش حاجة وحشه ولا بتاع- لكن لو جبنا دول في ميزان الشرع لا هو ده يعني إيه أستر لعورته، أستر لعورته من هذا، يعني لو وزناهم بميزان الشرع الاثنين لا ده كفة الأول ده ترجح. طب أنت ليه استهجنت هذا المنظر؟ ما أشرب من هواه.
وقلبنا إحنا عايشين يا جماعة في حاجات كتير كده خلي بالكم يعني، أنا بدي مثال عشان ننتبه لده، عشان ممكن الواحد المتدين يقول لك: إيه لا أنا الحمد لله إيه يعني أعرف المعروف وأنكر المنكر وزي الفل. نقول له: في صور أنت ما بتنتبهش ليها، يبقى كل المؤمنين يغضوا من أبصارهم ويحفظوا فروجهم ذلك أزكى لهم، أنضف لقلبك، وإنما لقلبك، وإنما لدينك، وإنما لعقلك. الصور اللي عمال تحشيها في ذهنك ده مشتّتة لعقلك، تلاقي نفسك لا عارف تذاكر ولا عارف ولا عارف تركز في حفظ القرآن، غير معنى نزع البركة. أنا بتكلم حتى على المعنى الدنيوي العادي، اللي هو أنا عقلي فيه مية ألف حاجة فمشَتَّت. طب لو منعت تلك المدخلات نمى عقلي، ذلك أزكى لهم. فدي برضه معينة لك أنك تفكر فيها على غض البصر.
ثم يختم الله عز وجل الآية ختمًا عجيبًا: ﴿إِنَّ اللَّهَ عَلِيمٌ بِمَا يَصْعَنُونَ﴾، كده؟ ﴿إِنَّ اللَّهَ عَلِيمٌ بِمَا يَصْعَنُونَ﴾، كده خبير مش عليم. الله عز وجل في هذه الآية لم يقل العليم، قل يغضوا من أبصارهم ويحفظوا فروجهم ذلك أزكى لهم إن الله خبير بما يصنعون.
إيه الفرق بين الخبير والعليم بقى؟ قالوا: خبر الشيء أي علم، أي أحاط علمًا بجميع جوانبه حتى علم بواطنه. فهمتوها دي؟ يعني الله عز وجل مش بس عليم بما تصنعون، ده كمان خبير. خبر الشيء أحاط به علمًا حتى علم بواطنه، عشان كده يقول إيه: ده فلان ده خبير في المجال الفلاني، يعني إيه خبير بقى؟ يعني يعرف الشاردة والوردة، لما كلنا نياس اللي إحنا فاهمين في المجال يعني نروح له يقول لنا إيه المشكلة ليه؟ أصل ده الخبير بتاع المجال. ﴿إِنَّ اللَّهَ خَبِيرٌ بِمَا يَصْعَنُونَ﴾، ده بقى تهديد يعني، وعيد ولا يعني خوف ولا رجاء في الآية دي؟ تخوفنا ولا ترجينا؟ تخوفنا مش كده؟ إن الله خبير، الاثنين.
إن الله خبير بما يصنعون، الخوف طبعا واضح. إن الله خبير بما يصنعون يعني إيه؟ يعني مش بس عارف البلاوي اللي أنت بتعملها، لا ده أحاط بها علمًا حتى علم بواطنها، يعني عارف أن أنت بتخطط لها من بقالك شوية، مع أن التخطيط ده ما حدش يعرفه غيرك، يعني ما قلتش تعالي هنخطط لحاجة، لا، هو عارف أنك بتخطط، يعلم ذلك منك ليه؟ لأنه خبير. ويعلم خائنة الأعين؛ اللي ما فيش ولا واحد لقطها أن أنت جبتها كده وهي معدية من غير ما اللي حواليك ياخدوا بالهم، هو سبحانه خبير، فيعلم خائنة عينك، فخاف منه لأنه خبير.
خلاصة يا جماعة، عارفين أخطر مشكلة -احفظوا الجمله دي- أخطر مشكلة في الموضوع أن اللي هيحاسبك هو اللي كان شايفك. تاني، أخطر مشكلة أن اللي هيحاسبك هو اللي كان شايفك. مدير في شركة وجاب واحد موظف، قال له: أنت إزاي تتخانق مع فلان؟ قال له: والله يا باشا هو اللي عمل لي، وهو اللي جابني الأول، وهو اللي ضربني، وهو اللي حدف عليا اللي مش عارف إيه وبتاع، ويقعد يحكي حكاية. قال له: إيه؟ خلي بالك أنا راجعت الفيديو بتاع الكاميرات. يقوم عامل الراجل يحط وشه في الأرض ويسكت. كان الأول آه ممكن نقعد نحكي حدوته، قال له: أنا شفتك. فيحط وشه في الأرض ويسكت.
﴿إِنَّ اللَّهَ خَبِيرٌ بِمَا يَصْعَنُونَ﴾. هياتي يوم القيامة يقول لك عملت كذا، هتقول إيه؟ ربنا جل وعلا رآك. ولذلك كان يقولوا إيه: أعلم أن نظر الله إليك أسرع كده من نظري من نظريك للحرام، أو كما قالوا يعني. يعني وأنت جاي تنظر كده أن الله خبير، خبير، نظره إليك أسرع جل وعلا، أسبق. إن الله خبير بما يصنعون.
وفيها بشرى يا جماعة ﴿إِنَّ اللَّهَ خَبِيرٌ بِمَا يَصْعَنُونَ﴾ فيها بشرى، اللي هو إيه بقى؟ تطمئنك أنك لو تركت يراك، يعني لو تركت إطلاق البصر، إن الله خبير بما يصنعون. أنتم عارفين يا جماعة من المعاني الجميلة جدا في الحته دي إيه؟ أن البشر لا يرون منك إلا الفعل، البشر لا يرون منك إلا الفعل، الله يرى منك الفعل والترك.
يعني إيه؟ يعني دلوقتي إحنا ماشيين، ناس متدينة ماشيين مع بعض، خلاص، فواحدة عدت رحت أنت باصص، فتلقطت، اللي حواليك شافوك فسقطت من أعينهم، شفت مش عارف إيه بيعمل إيه وبص وبيعمل ومش عارف إيه وكده. وأنت النظرة دي كان قبليها مئة مرة تجاهد نفسك ألا تنظر، ونجحت في المئة مرة ووقعت في الواحدة بعد المئة خلاص. فوانت ماشي معاهم أنت جاهدت نفسك مئة مرة وأنت ماشي أنك ما تبصش، هما مش شايفين تلك المجاهدة اللي جواك، لأن ده من التروك، والتروك لا ترى؛ أنا ما بصيتش فانا ماشي زي ما أنا. الله جل جلاله رأى تركك، فابشر. والله عدل، زي ما هيحاسبك على أنك نظرت في المرة الواحدة بعد المئة، هيثيبك على أنك جاهدت نفسك وامتنعت في المئة مرة. ﴿إِنَّ اللَّهَ خَبِيرٌ بِمَا يَصْعَنُونَ﴾، فالآية دي اللي ما تجيبوش من ناحية الخوف تجيبه من ناحية الرجاء، اللي هو: هنظر يا رب، أنا هجاهد لأنك أنت تراني وأنا أجاهِد، ترى مجاهدتي يا رب، ترى امتناعي، ترى أن أنا عشان أجاهِد نفسي في الحته دي أنا تعبان جدا ومع ذلك هعمل ده يا رب. ابشر أن الله خبير، إن الله خبير بما يصنعون.
ومن الأمور التي تعينك كذلك على غض البصر، هو عاوزين نبتدي، كنت عاوز بس خلينا عشان لو الوقت أزف يعني هو كده فات قد إيه؟ أربعين؟ ماشي، ركزوا يا جماعة في الكلمتين دول واحفظوهم: قالوا لا يخرج الشهوة من القلب إلا خوف مزعج أو شوق مقلق.
الجزء ده من أخطر الأجزاء في المحاضرة: لا يخرج الشهوة من القلب إلا خوف مزعج أو شوق مقلق. يعني إيه؟ يعني أنا هديكم مثال دلوقتي، واحد جابك وقفك وراح حاطط المسدس على دماغك، وشد البتاعة اللي ورا دي اللي بتعمل صوت دي عشان زيادة في، وقال لك إيه: دلوقتي الباب اللي الناحية الشمال دي هيتفتح، وهيخرج منه ملكة جمال الكون، لو عينك رمشت الطلقة في نفوخك! مين هيرمش؟ مين هيحاول يبص؟ مستحيل. ليه يا حبيبي ده ملكة جمال الكون ما تبص؟ طب أنا هسأل سؤال تاني، مش مين هيبص، مين هيكون عنده الشهوة أنه ينظر، فيجاهد نفسه أنه ما يبصش؟ هو كل اللي واقف دماغه أن الصباع ده لو اتحرك حركة غلط أنا رحت. فما فيش أصلا شهوة موجودة، ما الذي أخرج الشهوة؟ خوف مزعج.
خوف مزعج. طب بلاش، واحد بعت لك أيام بقى زمان بقى الكمبيوتر، بلاش، أو ما أعرفش فيروس دلوقتي بيتبعت على التليفونات ولا لا، واحد بعت لك على الجهاز اللابتوب بتاعك ولا بتاع بيقول لك إيه: جت إيميل كده جالك ولا حتى لو من صاحبك تعرفه، وإيه أن الفيديو ده مش عارف فيه إيه، الصورة دي فيها مش عارف إيه، وأنت ما عندكش أي حاجة تمنعك أنك تنظر للحرام. فجيت تدوس على الفيديو وهو بيتحمل راح طالع لك رسالة تحذير من الأنتي فيروس بتاع الجهاز، إيه؟ أن في فيروس خطير على الملف ده! مين هيعاند ويفتح؟ ما حدش هيعاند. ليه؟ أنت مش دلوقتي مش خايف على نفسك طلقه هتودي حياتك، ده أنت خايف على الجهاز بتاعك بس. الخوف الخوف المزعج هذا خلاك لا، مش هفتح، مش هفتح الصورة، مش هفتح الفيديو، يغور! خوف مزعج. الخوف ده يعمل إيه؟ مش يخليك عندك الشهوة وبتجهدها، لا، الخوف ده يخرج الشهوة من القلب أصلا، زي المثال الأول اللي هو واضح جدا ده اللي هو بقول قلت لكم ما فيش حد هيشتهي أصلا.
هذا فيه مثال نبوي؛ لما أخبر النبي صلى الله عليه وسلم عائشة رضي الله عنها أن يحشر الناس يوم القيامة حفاة عراة غرلا، عراة، كل الناس عريانة. فقالت عائشة: وُسَوْتاه، ينظر بعضهم إلى بعض؟ بما أجاب النبي صلى الله عليه وسلم؟ قال: يا عائشة الأمر أشد من ذلك، عورة إيه وبتاع إيه؟ الله، ده الستات كلها أهي، ما تبص يلا يمين وشمال زي ما كنت بتعمل في الدنيا؟ ما فيش طيب. ما فيش يعني بجاهد نفسي؟ ما فيش، شهوة إيه دي اللي موجودة؟ خوف مزعج.
طيب، إحنا نوصل الخوف ده إزاي؟ نخاف من إيه أصلا؟ نقول لك بقى الخوف ده نوعين: خوف العوام، وخوف الخواص. فخوف العوام من العذاب والعقاب، وخوف الخواص من القطيعة والحجاب. مفهومة؟ العوام اللي هو زينا كده خوفه من إيه؟ العذاب والعقاب، أن يا حبيبي النظرة دي هتجر غيرها، وغيرها هيجر غيرها، والرابعة هتبقى مقطع إباحي، والخامسة هتبقى عادة سرية، والسنة الجاية هنجيبك بتزني. خوف العوام من العذاب والعقاب، أن يجيلك ملك الموت وأنت على الحالة دي. مش عارف قلنا لكم كده المره اللي فاتت ولا لا؟ قلنا لكم لو جردنا مسألة الموت دي من أي حسابات، يعني أنه أمر من الله عز وجل، قلنا لكم بالحسابات الرياضية، بالمعادلات، بقانون الاحتمالات، أنت راجل بتطلق بصرك معظم اليوم، يعني سبعين بالمئة من اليوم، ثمانين بالمئة من اليوم أنت مطلق بصرك، فضلا تكون بتتفرج على الإباحية، فضلا بقانون الاحتمالات أنت ثمانين بالمئة هتموت على ده! قانون الاحتمالات يعني، حد فاهم اللي بقوله؟ قانون الاحتمالات كده، يعني أنا ثمانين بالمئة من حياتي إباحيات، يبقى ثمانين بالمئة احتمال أنك هتموت على الإباحيات، ما هو هنجيب الاحتمالات منين ما هو من حياتك من يومك. واحد من الدعاة يحكي.
الحكاية حصلت له هو شخصياً، واحدة تعرف الداعية ده فكلمته منهاره بتعيط، تعالى. راح واخد اثنين معاه من الدعاة وراح لبيت الست دي، فتحت لهم الباب شافتهم أغمى عليها، قعدوا يفوقوا فيها، قالت لهم ابني فوق. تعالى فتح الباب على ابنها ميت وهو بيشاهد الإباحية. خوف مزعج. ولذلك يا جماعة في ناس تحكي يقول لك جيت أفتح الإباحية هجم عليا هاجم الموت، اللي هو أنت ممكن تموت اللحظة دي ما بقى خلي بالكم مش ما بقاش يعني مشتهي بس عارف يجاهد نفسه، ما بقاش مشتهي. الخوف غلب، أنت عارفين يا جماعة إحساس الغب يعني هو إحساس بيغلب على الإحساس زلزال.
أول زلزال كان 92 صح؟ أنا فاكر يعني. الزلزال ده الزلزال ده حظ طبعا كان جديد علينا يعني كان الجيل بتاعنا جديد عليه أن يحصل زلزال. يعني بعد كده بقت القلوب أهدى شوية، إنما الزلزال ده حصل فيه حاجة عجيبة جداً، والكبار هيبقوا عارفين الكلام ده يعني. لما حصل زلزال 92 كله جري من البيوت، فكله جري باللي عليه. الراجل نزل باللي عليه والست نزلت باللي عليها وما كانش حد بيبص لحد، يعني ما فيش حد إيه هو احنا الناس مش عارفة إيه اللي بيحصل؟ يعني كل واحد فاكر إن العمارة إيه ما حدش جه في دماغنا زلزال يعني ما كانش عندنا الثقافة دي، فكل واحد فاكر إن عمارته هي اللي بيحصل فيها كده وبتقع، فكله نازل جري، ما فيش حد بيبص لحد.
عوزين خوف مزعج. أمتى بقى يبتدوا يبصوا لما الدنيا تهدى وبتاع، عرفوا إن ما فيش، ما احنا والله يا جماعة احنا يعني احنا نستاهل ضرب اللي نزل ده مثلاً ولقى إن الحمد لله الليلة عدت على خير، ده بقى يطاطئ رأسه ويحمد الله عز وجل أنه ما ماتش في هذا الزلزال، مش كده؟ لا. أنا أبويا بقى عمل حاجة جميلة جداً، الناس كلها خايفة ونازلة تجري، أبويا نازل بالراحة عمال يقفل في البيبان، طبعا هو اللي نازل جري ما دعورش على مفتاح الشقة يعني، هو نازل إيه؟ وأبويا بقى إيه اللي جي في دماغه؟ حرامي، يطلع حرامي! مين اللي يطلع؟ الزلزال خلص، الناس مش عارفة تخش بيوتها بقى، ما حدش معاه مفاتيح.
فهو ما كانش عنده الخوف المزعج ده قوي يعني في في الزلزال. خوف، خوف مزعج، خوف العوام من العذاب والعقاب. فقعد بقى فكر في النار شكلها ايه، وفي أنك لو مت على بلاش يا جماعة بلاش النار ولو يعني فكروا في مشهد واحد أنك واقف بين يدي الله عز وجل يعاتبك، ما تفكرش في النار بس، أنك واقف بين يدي الله عز وجل يوم القيامة يعاتبك: فعلت كذا وكذا يوم كذا وكذا، قفلت عليك الباب وفتحت الإباحية وقعدت تتفرج على الإباحية وعملت عادة سرية وبتشات مع فلانة وأنت بتشاتي مع فلان وبتبعت لك صور. والله عز وجل يواجهك بهذا، يا لخجلتك! مصيبة! مصيبة! ده أنا مش عاوز أقول لكم عذاب وعقاب، ده بس لحظة أنه هينادى به: أذهبوا به إلى كذا. اللحظة دي بس أنت لسه ما يعني مش بقول لك النار نفسها، اللحظة دي كفيلة أنك تموت فيها، لولا أن الله عز وجل كتب أنه لا موت لمت في تلك اللحظة.
لذلك بعض السلف فقه هذه المسألة، قال: لو قيل لي يوم القيامة تحب أن تعرف مقعدك من الجنة أو النار أو أن تكون رماداً، لاخترت أن أكون رماداً. لحظة مرعبة. بصر إيه اللي تطلقه؟ وشهوة إيه اللي تبقى في قلوبنا لو عشنا المشاهد دي؟ خوف مزعج، خوف العوام من العذاب والعقاب، وخوف الخواص من القطيعة والحجاب. دي حاجة إيه؟ أفلام خيال علمي اللي هو إيه؟ الخواص يا جماعة خوفهم مش من العقاب والعذاب، خوفه أنه ما يلاقيش لذة المناجاة بالليل، أنه يحجب عن الله، فهو عمال يحرز نفسه كده بالنهار عشان أنا مش هعرف أعيش لو جيت بالليل ما لقيتش لذة مناجاة. مش متخيلها! الخواص دول مش متخيلين يعني هنعيش إزاي؟ ما هي دي اللي قال عليها ابن تيمية أنها إيه؟ جنة الدنيا، أن في الدنيا جنة من لم يدخلها لم يدخل جنة الآخرة.
فدي جنة الدنيا اللي عايشين عليها، ماذا يفعل أعدائي بي؟ أنا جنتي وبستاني في صدري، إن حبسوني فحبسي خلوة، وإن نفوني فنفي سياحة، وإن قتلوني فقتلي شهادة. هو عايش في نعيم كده لوحده، إنه لتمر على القلب أوقات يقول: لو أن أهل الجنة في مثل ما أنا فيه من النعيم إنهم لفي عيش طيب. جملة عجيبة. الخواص دول الأولياء دول بيعدي عليهم لحظات كده في حياتهم بيقولوا: لو الجنة نعيم أهل الجنة أنهم في الحالة أنا فيها دي، هو جميل جداً يعني أنا مش عاوز أكتر من كده أن أنا الحالة النفسية أنا عايشها دي، الحالة الإيمانية دي، الالتذاذ بمعية الله، أنا مش عاوز غير كده.
طيب، اللي يوصل للحالة دي يتخلى عنها بسهولة؟ هديكم يا جماعة مثال بسيط كلنا عشناه كلنا بلا استثناء، عشان بس نفهم الفكرة مش هو ده قوي بس يعني عشناه، اللي هي حلاوة البدايات. كلنا أما أول ما تدينا فاكرين الحته دي اللي هو ايه، والعين بقى الباكية ولو فاتك بس مش عارف تكبيرة الإحرام تبقى متضايق من نفسك إزاي؟ كلنا أظن أو معظمنا عاش الحقبة دي في حياته. هو ده خوف الخلاص، القطيعة والحجاب، أنا أحجب عن الله وبإيه؟ بنظرة! ليه تغور النظرة؟ تغور نساء الأرض كلهم ما حدش. فهدذا خوف الخواص.
لا يخرج الشهوة من القلب إلا خوف مزعج أو شوق مقلق. شايفين اللفظ مقلق ده يا جماعة اللي هو إيه؟ اللي هو جه في الآية: ﴿تَتَجَافَى جُنُوبُهُمْ عَنِ الْمَضَاجِعِ﴾ [السجدة: 16]، الأنين كده. طيب ليه تتجافى؟ الأنين ليه؟ يعني الجو حر؟ لا، أصل هم يبيتون لربهم سجداً وقياماً. فهو على المخدة وهو على السرير الآن راحته فين؟ في السجود والقيام. يبيتون لربهم سجداً وقياماً. على فكرة، معهم بعض أهل اللغة قالوا إن البيتوطة لفظ البيتوطة "يبيتون" ده قالوا إن البيتوطة ما تكونش إلا مع الطمأنينة من حيث اللغة خلاص. فدول يبيتون لطمأنينة؟ فين الطمأنينة؟ فين الراحة؟ أرحنا بها يا بلال. شوق مقلق، طب إيه هنشتاق ليه بقى؟ حاجتين برده قالوا: شوق العوام للحور والقصور، وشوق الخواص للشهود والحضور.
يبقى إيه الشوق المقلق اللي يخرج الشهوة؟ شوق العوام للحور والقصور، يعني يجي ده خلي بالكم بقى يا جماعة، الأول ما بصش ليه من الخوف المزعج: هموت وهبعث وفي نار، فده خلاه ما يشتهيش. الثاني مش كده، الثاني هو عايش في الجنة، عايش في الجنة خلي بالك، هو مش بيجاهد نفسه، هو فعلاً مش لاقي شهوة للدنيا دي، مش لاقي لها شهوة، هو عايش في الجنة، هو عايش في القصور والحور وكذا وكذا، فالحاجات دي خلته عارفين زي إيه بالضبط كده؟ لما يجي مثلاً إيه تشم ريحة مثلاً إيه قرص طعمية كده فريجك يجري، وبعدين يتحط قدامك قرص الطعمية، هتيجي تمد إيدك تاكله تلاقي إيه مراتك ولا والدك تخرج لك بإيه بكباب وكفته وبتاع، وتقوم تزهد في إيه (يعني معظم الناس يعني) تزهد في القرص ده خلاص. لو قال لك يا عم ده أنت كانت شهوتك دلوقتي في قرص الطعمية وريجك جري إيه؟ يقول لك يا عم إيه طعمية إيه دلوقتي؟ مش كده؟ طيب، هو أنت جاهدت نفسك عشان تترك الطعمية؟ ده أنت يا ابني ريجك كان بيجري عليها! أنا نسيت الطعمية، نسيتها! ما جهزتش نفسي مع أنها كانت شهوتي، ما جهزتش نفسي ليه؟ أصلك مع الكباب. هو بقى صاحبنا ده كده.
شوق العوام للحور والقصور. طب يا جماعة، إزاي هنشتاق لحاجة نجهلها؟ لو أنا اديت الميكروفون كده لواحد فيكم قلت لكم تعالى كلمني عن الجنة ربع ساعة. طب إزاي هنشتاق ما احنا مش عارفين؟ طب كلمني عن النار ربع ساعة، طب إزاي نخاف ما احنا مش عارفين؟ فاحنا محتاجين في دي يا جماعة، محتاجين ده، محتاجين نسمع في الجنة والنار. محتاجين ده يعني خلي نفسك ورد كده: سماع أوصاف الجنة، سماع أوصاف النار. شوفوا حد اتكلم في الحاجات دي يحسنها، يحسن عرضها، وأسماعوه كتير.
شوق العوام للحور والقصور وشوق الخواص للشهود والحضور، اللي هو عكس القطيعة والحجاب بقى أن هو دائماً في مشاهدة الرب عز وجل، في شهود الله عز وجل، في حضوره مع الله عز وجل، في أنسه بالله عز وجل، فهو شوق لده. خلي بالكم، الأول اللي حركه أنه خايف يفقد ده، الثاني اللي حركه اللي خلاه يمتنع عن إطلاق البصر هو أنه بيلتذ بده، يعني هو اللذة هي اللي في دماغه، الثاني القطيعة هي اللي في دماغه.
يبقى لا يخرج الشهوة من القلب إلا خوف مزعج أو شوق مقلق، وخوف العوام من العذاب والعقاب وخوف الخواص من القطيعة والحجاب، وشوق العوام للحور والقصور وشوق الخواص للشهود والحضور. إزاي أغض بصري تاني؟ أن تستعين بالله عز وجل، لا بحولك ولا بقوتك هتعمل حاجة، تبرأ منهما. «لا حول ولا قوة إلا كنوز الجنة». يا رب أنا حاولت كتير، يا رب أنا مش فالح، يا رب أنا من غيرك أضيع، يا رب يا رب أعني على غض البصر يا رب. استعن بالله، بعمل كده وما بيحصلش حاجة، كمل استعانة بالله، أنت ما أنت مش مسؤوليتك أمتى يفتح لك.
كن على الباب. من أدمن طرق الباب ولج. هتخبط كتير هيفتح لك، هتخبط خبطتين مش هيتفتح لك تسيب الباب وتمشي، في داهية! في داهية! أنت مستني حد يعني يجي يطبطب عليك يقول لك ارجع على الباب؟ في داهية! المرة اللي فاتت قلنا لكم: هؤلاء في النار، ها، ولا أبالي! فانت يا ابني مالكش غير أنك على الباب، مالكش غير كده. هتشوح بقى وتمشي وتسيبك من الباب، في داهية!
أحد العارفين آنس من قلبه ليلة قسوة، خرج كالمجونو في الطرقات ينادي: أين قلبي؟ أين قلبي؟ فبينما هو كذلك راى صبياً صغيراً يطرق باباً ويقول: أمي، أمي افتحي! ولا أحد يجيب. والصبي يبكي ويقول: افتحي لي يا أمي! ولا أحد يجيب. فمضى الصبي وجلس الرجل ينتظر يرى ما يفعل بهذا الصبي، حتى ساعة حتى ساعة متأخرة من الليل عاد الصبي وهو يبكي بكاءً شديداً، وطرق الباب مرة أخرى وقال: أمي، أمي افتحي لي، ذهبت لكل أحد فلم يفتح لي أحد! ففتحت الأم الباب وأخذت هذا الصبي والتزمته وبكت وقالت: أنت من حملني أن يفعل ذلك لعصيانك لي. فصاح الرجل: وجدت قلبي!
فهمتم؟ من أدمن طرق الباب ولج. أنت اقعد خبط، يا رب أنا ضايع، يا رب أنا من غير رب ولا حاجة، أنا جربت كل حاجة، جربت برامج التعافي من الإباحة يا رب وجربت، ما بقولش خد بكل الأسباب، يا رب أنا أضيع لو أنت ما سال الله عز وجل.
كذلك مما يعينك على غض البصر رجال ونساء أنك تقفل الباب ده تماماً. تقفل الباب ده تماماً، من حديث النبي عليه الصلاة والسلام قال للصحابه: «إياكم والجلوس على الطرقات». قالوا: ما لنا من مجالس بد. ركزوا يا جماعة، أنا مش مهم بقية الحديث، هو طبعا في الحديث بيقول إيه؟ غضوا البصر. يعني ركزوا في بداية الحديث. قال لهم: ما حدش يقف في الطريق. فلما قالوا له: ما فيش مفر دي مجالسنا، قال لهم: طالما ما فيش حل غير كده، يبقى أعطوا طريقه حقه كذا وكذا وكذا وكذا. كان يا جماعة أول العلاج: إياكم والذهاب للأماكن الفلانية، إياكم والجهاز اللي في إيديكم، إياكم وكذا، إياكم وكذا، إياكم والجلوس على الطرقات. ده أول الحل، ابعد عن مواطن الفتن. فاحنا مش جايين نطبطب، لو الجهاز الفاسد ده يا ابني هيوديك نار يولع الجهاز. أصل بقى الواتساب والإيميل والشغل، اتشقلب وأوجد البدائل، اتشقلب! أصل اللي أنت بتقوله ده كله يعني ما أعتقدش أنت شايفه ده ثمن للنار؟ يعني ما فيش مشكلة قشطه في الآخرة نار، بس الواتساب يا شيخ يعني أسيب الواتساب وأنت عارف إن الجهاز ده طول ما هو في إيديك موديك في داهية، إباحيات ومقاطع على التيك توك والمراسلات بين رجال ونساء وصور بتتبعت وقرف وتواعد على زنا، يا ابني ارجع عادي تليفون عادي بزراير بتاع زمان. أصل الواتساب يا أخي يولع الواتساب! واتساب إيه وبتاع إيه وأيميل إيه وشغل إيه، ارم الجهاز، بسيطة جداً.
إياكم والجلوس على الطرقات، ده أول الحل أصلاً. فلما بقى مجالسنا وما لنا بد منها، لما كانت كده قال لهم: أعطوا الطريق حقه. لكن احنا حد يقدر يقول صادق مع نفسه يقول: ما لي بد من هذا الجهاز؟ كلها يعني معظمها عفواً مش كلها، بس معظم احتياجاتنا من هذا الجهاز هيفات يمكن الاستغناء عنها معظمها. طب والحاجات اللي فعلاً مش عارف ممكن ايجاد بدائل، ممكن. طب ما لقيتش بقى بدائل ومش عارف إيه، خلاص أنا لساعة واحدة في اليوم بفتح الجهاز ده وبقية اليوم تليفون عادي جداً تليفون بزراير وشكرا على كده وما مش عايز حاجة تانية، أنا عاوز أدخل جنة، أنا عاوز أدخل جنة أنا مش عاوز أروح نار، أنا مش حمل النار.
فالبعد عن مواطن الفتن، فما تجيش تقول لي أنا يا شيخ مش عارف أغض بصر. طب يا حبيبي أنت امبارح الخميس بالليل كنت فين؟
أصل يا شيخ ده يوم الخروج بتاعنا أنا وأصحابي في الدفعة، غض بصر إيه اللي بتكلم عليه؟ ما تقعد في بيتك وليسعك بيتك. هقعد في البيت هعمل إيه؟ ما هو ما فيش حاجة تتعمل. وأبكي على خطيئتك، ده كلام النبي عليه الصلاة والسلام. اقعد يا ابني شوف كده ذنوب الأسبوع، مش ده نهاية الأسبوع؟ بتقول لي آه. اقعد بقى يوم الخميس كده في بيتك، وحط قدامك ذنوب الأسبوع، اقعد اعيط. اقعد عيط في بيتك يوم الخميس ده، وليسعك بيتك وأبكي على خطيئتك.
يعني ما قابلش أصحابي يا شيخ؟ يا عم قابل أصحابك بس مش في المكان الفلاني اللي أنت عارف إنك لما تروح هتطلق فيه البصر. ليه يعني جاءتك منيتك وأنت على ذلك فرحان؟ دلوقتي وأنا بقول لكم يا جماعة أهو كل واحد من الشباب اللي قاعدين عنده حكايته الخاصة لشاب يعرفه مات وهو قدوة. أنا بقول لكم كده يعني كل واحد قلب في دماغه، أه والله ده ابن عمي مات والله وهو مش عارف عنده كام ساعة، أه والله ده صاحبي مش عارف إيه، ما يمكن أنت قصة بكره، مش بكره، ما يمكن أنت قصة دلوقتي.
يعني إيه الأمان؟ ما يمكن ملك الموت معانا يا جماعة وفي واحد فينا مش هيخرج على رجله، يمكن أنا. فأيه الأمان اللي احنا فيه ده يعني؟ ليه تروح المكان اللي فيه إطلاق بصر ليه؟ وعارف إن فيه كذا وكذا وكذا. وقد يكون ده أصلاً موديك هناك بس هناك متدين، ما تعرفش تقول ده بقا ظاهره كدين يعني، ما تعرفش تقول ده بالسر رايح هناك عشان كدة.
اقعد في بيتك. طب وأصحابي؟ اقعدوا في أي بيت، اقعدوا في أي حاجة، روحوا اقفوا في الصحرا. إيه عايز أصحابك؟ روحوا الصحرا، اقعدوا في الصحرا، قضوا الخميس في الصحرا. يا شيخ بس إيه اللي بتقوله هي يا جماعة كدة؟ ما هي جنة ونار يا جماعة، أنا مش جاي أطبطب، هي جنة ونار. وجيم أور يعني جيم أور ما فيش رجوع يعني.
ما فيش إيه هعيد الليفل تاني؟ ما فيهاش دي، خلاص انتهت. عارفين لو فيها إعادة يعني ممكن نقول لك خلاص يعني جرب، ولو عديت عديت، ما عديتش ما في تحسين، ما فيش تحسين، فأنت بتغامر بإيه؟
فيبقى من علاج إطلاق البصر: اياكم والجلوس على الطرقات. إياك وأنك تروح المول الفلاني، إياك وأنك تروح السبوت الفلاني، إياكم وأنك... إياكم والجلوس على الطرقات، إياك والجهاز اللي في إيديك، أخلص أخلص. مش عارف تخلص خالص، يبقى تدير الموضوع ده زي ما قلت لكم كده ساعة في اليوم. وزمان أيام الكمبيوترات ما كنتش بقى الأجهزة بتاعت... كنا نعمل إيه؟ الكمبيوتر ما فيش حاجة اسمها الكمبيوتر مثلاً في الأوضة، لا، الكمبيوتر في الصالة وفي مكان واضح يعني مش... يعني يبقى الشاشة للصالة نفسها ماشي، فاعمل ده، اعمل ده لنفسك.
فيبقى إيه العلاج بسرعة؟ حد يقول بقى يلا. غض... غض البصر ده العلاج، احنا عايزين نغض البصر. ها، أول حاجة كانت إيه؟ ائخطب يلا فينا.
الاستعانه بالله، ماشي، وطبعا ده أول العلاج يا جماعة يعني احنا ممكن يكون أخرناه مش لأنه يعني مقامه التأخير طبعا، أول حاجة الاستعانه بالله عز وجل، والخوف... الآية المزعج والشوق المقلق، والابتعاد عن مواطن الفتن، إياكم الجلوس على الطرقات. حاجة تاني؟ ها والهيبه، الهيبه. ﴿قُل لِّلْمُؤْمِنِينَ يَغُضُّوا مِنْ أَبْصَارِهِمْ﴾ [النور: 30] مش كده؟ وأنك تعرف إنه أنضف ليك وإنما لقلبك.
آه الخوف، قلنا الخوف طيب. قل قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير