دخولتسجيل الدخول

عشر ذي الحجة

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم، إنك حميد مجيد. أما بعد:

في الصحيح من حديث ابن عباس رضي الله عنهما؛ أن النبي صلى الله عليه وسلم قال: «ما من أيام العمل الصالح فيها أحب إلى الله من هذه»، يعني العشر، عشر ذي الحجة. قالوا: ولا الجهاد في سبيل الله؟ قال: «ولا الجهاد، ولا الجهاد في سبيل الله إلا رجلا خرج بنفسه وماله ثم لم يرجع من ذلك بشيء».

هذا الحديث في فضل عشر ذي الحجة، واحنا داخلين على عشر ذي الحجة، فمحتاجين شوية نتكلم عن هذا الحديث. وأول الأمر، وأول المسائل المهمة التي نحرزها؛ أن فضل الجهاد كان مستقرا عند الصحابة رضوان الله عليهم. فلما أخبر النبي صلى الله عليه وسلم أن هذه العشر لا يعدل العمل الصالح فيها شيء، توجهت أنظاره مباشرة إلى الجهاد. قالوا: ولا الجهاد؟ قال: ولم يسألوا عن الصلاة ولا الحج ولا كذا ولا كذا، فكان أمر الجهاد وأن الجهاد ثوابه عظيم، كان هذا الأمر مستقرا عندهم. فاشكل عليهم أمر الجهاد، فقالوا: ولا الجهاد في سبيل الله؟ قال: «ولا الجهاد في سبيل الله إلا رجلا» إلى آخر الحديث.

وطبعا الجهاد فضله عظيم ومعروف، والجهاد ذروة سنام هذا الدين، والمجاهد والمرابط كالصائم القائم كما أخبر بذلك النبي صلى الله عليه وسلم إلى آخر الآيات والأحاديث التي وردت في فضل الجهاد. واحنا يمكن قرأنا هذا في الترغيب والترهيب، وموجود على التليجرام اللي عاوز يراجع هذه، أو يكتب بقى فضل الجهاد، فالجهاد فضله عظيم ومعروف.

وعندنا هنا أمور بقى؛ الأمر الأول: أنه من لم يغزو ولم يحدث نفسه بالغزو مات على شعبة من نفاق، أو كما قال صلى الله عليه وسلم. وكثير من الشباب يبقى متحمس لهذا الأمر، أمر الجهاد، وتمنى أن لو فتح الله له سبيل لذلك وكذا وكذا، وتأتي مثل هذه المواسم لتبين الصادق من الكاذب. يعني لو أن قلبك حقا يحترق على الجهاد في سبيل الله لثواب الجهاد وعظيم أجره، وأنه محبوب للرب عز وجل، فأتاه حديث النبي صلى الله عليه وسلم وهو في أعلى درجات الصحة؛ أن العمل في هذه الأيام أحب إلى الله عز وجل من كل عمل في سواها من الأيام. فلما سأل الصحابة عن الجهاد قال: «ولا الجهاد في سبيل الله» إلا نوعا واحدا من الجهاد، وهو أفضل الجهاد؛ من عقر جواده وأهريق دمه، كما قال صلى الله عليه وسلم: «أفضل الجهاد، إلا رجلا خرج بنفسه وماله ثم لم يرجع من ذلك بشيء». أما ما دون ذلك من أنواع الجهاد، فالعمل الصالح في هذه الأيام أفضل.

فأولا: من لم يحدث نفسه بالغزو أو بالجهاد، هذا أمر خطير ومؤذن بآفات قلبية شديدة. طيب، من حدث نفسه بالجهاد والغزو ثم أتت مثل هذه المواسم فكانت حاله كحاله؛ قبل العشرة زي بعد العشرة، زي في العشرة، زي كل حاجة، وبعدين يقول الجهاد وباب الجهاد ومش عارف إيه، نقول له: كذبت أو جهلت؛ يعني ما أنت يا جاهل يا كذاب! يا جاهل ما أنت ش عارف أن الأعمال في هذه العشر أفضل، أو عرفت فتكاسلت وقعدت ولم تجود عملا ولم تزدد طاعة، فنقول لك: طب ده إيه بقى؟ ما أنت لو عاوز جهاد علشان هو محبوب لله عز وجل ومرغوب له ومطلوب له سبحانه وتعالى، فهو هو الرب الذي أمر بذاك، وهو هو الرب سبحانه وتعالى الذي أجر على لسان نبيه صلى الله عليه وسلم أن العمل في هذه العشر أفضل من الجهاد، فانت عملت إيه في العشرة؟

هيجي بعد شوية -علشان احنا هنتكلم طبعا في تفاصيل الأعمال- لكن لما أقول لك: أنت عملت إيه في العشرة؟ وأنا هنا حديثي لمن يتحدث ليل نهار أو يحدث نفسه ليل نهار بالجهاد في سبيل الله، وبأن يفتح باب الجهاد في سبيل الله، وأن كذا وكذا، فما أجي أقول لك: عملت إيه في العشرة؟ ما تجيش بقى تقول لي: عملت زي ما الناس بتعمل؛ يعني اللي هو إيه: صمت النهار، وقمت شيء من الليل، ونقول: لا، ما الناس كلها بتعمل كده، أنت عملت إيه بقى؟

سعيد بن جبير يا جماعة، راوي هذا الحديث عن ابن عباس -الحديث ده في الصحيح عن ابن عباس، راوي الحديث عن ابن عباس سعيد بن جبير من التابعين- فكان سعيد بن جبير إذا دخلت العشر عبد الله عبادة لا يكاد يقدر عليها. فانت تسرح بقى بخيالك في عبادة سعيد بن جبير التي لا يكاد يقدر عليها. طب احنا بنقول لكل حد كده؟ لا، ما بنقولش لكل حد: اعبد ربنا عبادة لا يكاد يقدر عليها، طبعا جزاكم الله خيراً، إنما بنقول إيه؟ بنخاطب من تحدثه نفسه بالجهاد، ومش عاوز أقول إنه بيخلق المعاذير والشماعات وكذا وكذا، لأن احنا نعرف ناس من إخواننا كده، دايمًا هو يحدثك عن غير المتاح، دايمًا.

في ناس يا جماعة عقليتها كده، دايمًا يتحدثوا في غير المتاح. يعني تيجي تقول له: اطلب العلم، بيقول لك: الجهاد. طيب، أقنعناه أن يا عم المتاح دلوقتي يلا بقى اطلب العلم، يقول لك: ما هو ما فيش مش عارف إيه، يا ابني ما غيرك بيطلب، ما تدخل تنزل حاجات واسمعها مثلاً (بفترض أي شيء)، فيقوم المهم دايمًا يعمل لك مشاكل، دايمًا في حاجة ناقصة تخليه ما يعملش حاجة في الآخر، طب أنت في الآخر عملت إيه؟ فتلاقيه ما عملش حاجة، هو في نفس الحته اللي هو فيها. وبعض إخواننا نرى منهم تكاسلاً حتى في الفرائض وهو يحدثك عن غير المتاح، دايمًا بيتكلم في الحاجة اللي مش متاحة، وكان يعطي نفسه نوعًا من المسكنات: أن أنا كويس بس هي الدنيا اللي جاية علينا.

طب يا حبيبي، أخبار إيه مع الفرائض؟ واحنا هنتكلم إن شاء الله أن احنا من أول ما نصلح في هذه العشر فرائضنا، طب أنت فرائضك عاملة إيه؟ تقول: فرائضي، طبعا بصلي الفرض. أقول لك: فرض إيه اللي بتصليه؟ أنا بكلمك في صف أول، حريص عليه، في تكبيرة إحرام ما بتفوتكش، في مسابقة على الأذان، أنت اللي تأذن، فإن لم تكن كذلك فلا يؤذن المؤذن إلا وأنت في بيت الله سبحانه وتعالى. فانا بكلمك بقى في درجات عالية؛ بتحدث نفسك بالجهاد في سبيل الله عز وجل، وأنعم بها عبادة بل هي أفضل متطوع به، ثم النفقة فيه، ثم طلب العلم.

ولكن احنا بنتكلم دلوقتي فيما هو متاح لك؛ عملت فيه إيه؟ أولاً: معذرة إلى الله عز وجل أن يا رب المتاح أجتهد فيه أن أبلغ فيه الذروة، دي أول حاجة معذرة إلى الله عز وجل. ثانياً: تحصيلا للثواب؛ ما هو بدل ما أنت قاعد عمال تبكي على الأطلال وتبكي على غير الجهاد أو غيره، ما كانش في الجهاد كجهاد عقلية البني آدم اللي دايمًا هو مش شايف غير اللي ناقص، فتجي له بعد سنة تلاقي زميله اللي كان معاه مثلا ختم المصحف حفظا، أو أحرز من الثواب كذا وكذا لاهتمامه بالمتاح في يده من العبادات والطاعات، وهو زي ما هو قاعد، وكل ما تيجي تتكلم يقول لك: أصل ما مش عارف أعمل كذا، أصل ممنوع نعمل كذا، أصلي يا عم الحاج ما أنت عندك حد ضربك على إيديك؟ حد قال لك في مشكله لو جيت تصلي في بيت ربنا سبحانه وتعالى فرضك؟ وأنك تقعد بين المغرب والعشاء تفتح مصحفك في المسجد الثاني، وبذلك الاعتكاف ما فيش حاجة، لكن هو دايمًا في دماغه أنه غير المتاح نتكلم عنه.

فتأتي هذه مواسم لتفضحنا أمام أنفسنا؛ أهو أنت عاوز جهاد عشان إيه؟ عشان ثوابه أكيد يعني! لو ربنا سبحانه -هبة أن الله عز وجل يجعل في الجهاد ثوابا ولم يندب إليه، ما قالش جاهدوا- كنت هتجي تقول برده أنا عاوز أجاهد؟ لا، هو احنا بنجاهد عشان ربنا ندب إلى الجهاد ورتب عليه الثواب، مش كده؟ طيب، ما هو ربنا سبحانه وتعالى الذي أخبر نبيه وحيا صلى الله عليه وسلم أن يقول لنا: «ما من أيام العمل الصالح فيها أحب إلى الله من هذه العشر»، قال: ولا الجهاد؟ قال: «ولا الجهاد». هو نفس الرب جل وعلا.

فدخلت عليك العشرة، حالتك عاملة إزاي؟ كتير من إخواننا حتى الناس الدينة -العشر بتدخل زي ما دخلت زي ما خرجت، أو العشر بتدخل كل يصوم، وياكل له حظ من الليل شوية، وكويس ده كويس- لا، أنا لا انتقص ممن يفعل ذلك، لا دي درجة كويسة طبعا، لكن في درجات تانية أعلى؛ أن تتفنن في جميع العبادات زي ما هيجي، لأن سيدنا النبي عليه الصلاة والسلام ما قالش: ما من أيام الصوم فيها أفضل، ما قالش كده، ولا قال: ما من أيام قيام الليل، ما قالش كده. تلاقي الناس دايمًا حريصة على العبادتين دول بالذات، وأنعم بهما وأكرم، وثواب العبادتين عظيم، لكن في فنون أخر من العبادات وأشكال أخر من العبادات أنت لم تضرب فيها بسهم، مش بقول لك زي سعيد بن جبير أنك تعبد ربنا عبادة لا يقدر عليها.

فهذا أول الأمر؛ يبقى أن هذه المواسم فاضحة. والناس في مسألة الجهاد كالعادة طرفين ووسط؛ طرف ولا في دماغه حاجة، هو لم يغزو طبعا لأن مافيش دلوقتي كده، ولم يحدث نفسه (يعني ما نفسه لا تحدثه أن أنا أحب اعمل حاجة زي كده). وفي طرف تاني العكس؛ انه ربما يسلك سبلا غير مشروعه وتعود عليه -وياريت عليه لوحده، عليه وعلى من حوله- بمشاكل كبيرة جدا، ويظن بذلك أنه ينصر دين الله عز وجل. والوسط من الناس: الذين يحدثون أنفسهم بذلك، يبغون بذلك الثواب من الله عز وجل، وينشغلون بالمقدور؛ يعني المقدور عليهم أو المقدور لهم؛ إيه مثلا؟ الدعاء أن ربنا سبحانه وتعالى ييسر لنا سبيلا لذلك. ومش كفاية ده، لأن سيدنا النبي عليه الصلاة والسلام قال إيه؟ قال: «لا تتمنوا لقاء العدو». فانت لو هتدعي بقى ربنا إنه ييسر لك سبيل، ادعي ربنا إنه يثبتك، ما هو أنت لا تتمنوا لقاء العدو ليه يا جماعة؟ ليه؟ عشان فتنة، مش كده؟ وده كلام النبي عليه الصلاة والسلام: «لا تتمنوا لقاء العدو، وإذا لقيتموهم فاصبروا». فانت مزكي نفسك يعني؟ أنت الواد اللي لما يروح يقابل العدو مش هيفر من الحرب، ويبقى فعل واحدة من من أكبر الكبائر الفرار يوم الزحف من أكبر الكبائر، فانت خلاص يعني أنت اللي مزكي نفسك قوي؟ أقول لك: اللي مش هيفر يوم الزحف مين قال لك؟ فحتى هذا الدعاء بمجرده كده ممكن يبقى فيه نوع إشكال، أن فيه نوع تزكية نفس، أنت حتى لو بتسال ربنا سبحانه وتعالى فتسأل الله عز وجل الثبات، أو تسأله الشهادة في سبيله سبحانه وتعالى.

يبقى دي حاجة. الحاجة الثانية: أن تنشغل بما أمر الله عز وجل به إذا منع من الجهاد شرعا أو قدرا. وده احنا في درس أو خطبة مش فاكر اسمه "كفوا أيديكم"، اسمعوه بقى خطبة درس، ممكن ما تلاقوش على اليوتيوب، ممكن يبقى على التليجرام (يعني مش فاكر)، كنا قلنا فيه أنه الله عز وجل: ﴿أَلَمْ تَرَ إِلَى الَّذِينَ قِيلَ لَهُمْ كُفُّوْا أَيْدِيَكُمْ﴾ [النساء: 77]. وانشغلوا بشويه حاجات هنجيلها بقى (يعني اعملوا شويه حاجات كده). ساعتها قلنا: ﴿أَلَمْ تَرَ إِلَى الَّذِينَ قِيلَ لَهُمْ كُفُّوْا أَيْدِيَكُمْ﴾؛ قد يكون أمر الله عز وجل شرعيا، كما في هذه الآية: كفوا أيديكم شرعا (يعني ما حدش يمسك سلاح دلوقتي، ما حدش يروح يجاهد دلوقتي، أمر شرعي من الله عز وجل في فترة في حقبة الحقبة المكية). وقد يكون أمر الله عز وجل قدريا؛ يعني ايه قدريا؟ يعني الأمر القدري الآن إنه غير متاح، فكان الله عز وجل يقول لك: كف يدك قدرا لأنه مش متاح ليك. فانت تنشغل بايه بقى؟ باللي أمر ربنا بيه: ﴿أَلَمْ تَرَ إِلَى الَّذِينَ قِيلَ لَهُمْ كُفُّوْا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾ [النساء: 77] (يعني اصلحوا الحال بينكم وبين الله، واصلحوا الحال بينكم وبين العباد، أقيموا الصلاة وآتوا الزكاة).

والآية الثانية؛ ويتبوآن... الآية الثانية في موسى إيه؟ ﴿وَأَوْحَيْنَا إِلَى مُوسَى وَأَخِيهِ أَنْ تَبَوَّءَا لِقَوْمِكُمَا بِمِصْرَ بُيُوتًا﴾ [يونس: 87] في عز الصراع الدائر بينهم وبين فرعون، ربنا سبحانه وتعالى يأمر بحاجة عجيبة جداً: ﴿وَأَوْحَيْنَا إِلَى مُوسَى وَأَخِيهِ أَنْ تَبَوَّءَا لِقَوْمِكُمَا بِمِصْرَ بُيُوتًا وَاجْعَلُوا بُيُوتَكُمْ قِبْلَةً﴾ [يونس: 87] طب ونا عشان نعمل إيه يا رب؟ واجعلوا بيوتكم قبلة... ها: ﴿وَأَقِيمُوا الصَّلَاةَ﴾، ختام الآية: ﴿وَبَشِّرِ الْمُؤْمِنِينَ﴾ [يونس: 84]. فاحنا محتاجين تلك الصلة بيننا وبين الله عز وجل. فده مما ينبغي علينا أن نفعله في هذه المسألة.

طيب، الدرس بقى مش عن الجهاد (يعني جت كده إيه)، يبقى دي أول مسألة: أنه الجهاد في سبيل الله، العمل في هذه الأيام أفضل من كل نوع جهاد إلا نوع واحد استثنى النبي عليه الصلاة والسلام. خلاص.

المسألة الثانية: أن هذه الأيام في نفسها هي أفضل الأيام وأعظم الأيام، فأعظم أيام السنة بإطلاق أيام عشر ذي الحجة.

أفضل من أيام رمضان؟ آه، أفضل من أيام رمضان. وفي حديث آخر، يعني في رواية أخرى، احنا طبعا الرواية اللي معانا: «ما من العمل الصالح فيها أحب إلى الله». هنا بيتكلم عن العمل الصالح، لكن في حديث آخر قال صلى الله عليه وسلم: «أفضل أيام الدنيا أيام العشر».

يبقى أيام العشر اللي جايّة دي يا جماعة؛ عشر ذي الحجة، أفضل أيام الدنيا، أفضل من أيام رمضان! شوف بقى احتفاء الناس بأيام رمضان، فهذه الأيام أفضل. وقال كعب: اختار الله الزمان، فأحب الزمان إلى الله الشهر الحرام، يعني الأشهر الحرم كلها، وأحب الأشهر الحرم إلى الله ذو الحجة، وأحب ذي الحجة إلى الله العشر الأول.

يبقى أيام العشر أفضل أيام. طيب ليالي؟ انتم عارفين اليوم اللي هو بالنهار ده اليوم، فلما نقول أيام العشر أفضل من أيام رمضان، يعني نهار العشر أفضل من نهار رمضان. طيب، ليالي العشر أفضل ولا ليالي رمضان؟ خلاف بين العلماء! تخيلوا؟

يعني بعض العلماء يقول إن ليالي العشر (عشر ذي الحجة) أفضل من ليالي رمضان، وبعض العلماء يقول لك: لا، ليالي رمضان أفضل. بلاش الخناق! الخلاف داير فين يا جماعة؟ هي أفضل الليالي بإطلاق، ولا تجي بعد ليالي رمضان؟ إيه رايكم بقى؟ شايفين هذا الزمان الذي نفرط فيه؟

شايفين احتفاء الناس برمضان بيبقى عامل إزاي، وتدخل العشر تلاقي لا، تكاثر! وتلاقي دلع، وتلاقي تثاقل عن العبادة والحاجات بقى اللي هنتكلم فيها كمان شوية إن شاء الله. لكن المعنى ده مهم؛ أنها أفضل الأيام أيام الدنيا كلها ولياليها، أما أفضل الليالي بإطلاق أو تجي بعد ليالي رمضان، ماهياش الحال.

ولذلك أقسم الله بها، والله عز وجل لا يقسم إلا بشريف: ﴿وَٱلْفَجْرِ * وَلَيَالٍ عَشْرٍ﴾ [الفجر: 1-2]. جمهور المفسرين على أن دي ليالي عشر ذي الحجة. جمهور المفسرين على كده، وهذا الصحيح عن ابن عباس رضي الله عنهما. فالله عز وجل أقسم بتلك الليالي: ﴿وَٱلْفَجْرِ * وَلَيَالٍ عَشْرٍ * وَٱلشَّفْعِ وَٱلْوَتْرِ﴾ [الفجر: 1-3]. أقوال كثيرة، أشهرها أن الشفع يوم النحر، والوتر يوم عرفة. يوم عرفة يوم تسعة فردي، ويوم النحر يوم 10 زوجي، فربنا قال: ﴿وَٱلشَّفْعِ وَٱلْوَتْرِ﴾. الشفع اللي هو الزوجي؛ العدد الزوجي اللي هو يوم النحر يوم 10، والوتر اللي هو يوم عرفة يوم تسعة، اللي هي طبعا اليومين دول أيام عظيمة جداً يعني.

عرفه أفضل بقى، يعني احنا بنقول أفضل أيام الدنيا العشر، وأفضلها عرفة أو يوم النحر على قول العلماء، الأشهر أن يوم عرفة هو الأفضل، أفضل أيام الدنيا بإطلاق يوم عرفة. فأقسم الله عز وجل بالشفع والوتر (عرفه يوم النحر).

طيب، طبعا عرفة فضله كبير، والله عز وجل يباهي الملائكة بأهل الموقف، ومعروف الكلام ده. ويوم النحر يوم الحج الأكبر في معظم أعمال الحج؛ يوم 10 ده مش كده؟ فيه إيه؟ رمي الجمرة، جمرة العقبة، وفيه الحلق أو التقصير، وفيه الذبح، وفيه طواف الإفاضة، كل ده يوم 10، معظم أعمال الحج.

قال صلى الله عليه وسلم: «ما من أيام العمل الصالح فيها أحب إلى الله من هذه العشر». قالوا: ولا الجهاد في سبيل الله؟ قال: «ولا الجهاد في سبيل الله، إلا رجل خرج بنفسه وماله ثم لم يرجع من ذلك بشيء».

إيه بقى اللي نعمله في هذه الأيام؟ نعمل كل الطاعة، وما فيش حظر على أي طاعة. ركزوا يا شباب، ما فيش معنى إن النبي عليه الصلاة والسلام يقول: «ما من أيام العمل الصالح فيها أحب إلى الله من هذه العشر»، وبعدين يجي حد يبدع طاعة، لا، هو هذا نداعة.

فمثلاً هنقول من الطاعات: الصوم. الصوم من أجل الطاعات كمان، مش طاعة عادية، ليه؟ لان الصوم اختصه الله له سبحانه وتعالى: «كل عمل ابن آدم له، الحسنة بعشر أمثالها إلى الحسنات بعشر أمثالها إلى سبعمائة ضعف إلا الصوم، فانه لي وأنا أجزي به». فالصوم من أجل العبادات، فنصوم العشرة ولا لا؟ حرام لو صومنا العشره! حرام. صوم تسعة، يوم العاشر ده يوم العيد يحرم صومه، يبقى نصوم؟ طيب نستوعبها يعني بالصوم؟ نصوم التسعة كلهم، اللي يعمل كده ما فيش مشكلة، اللي يصوم ويفطر أيام يعني يصوم شوية ويفطر شوية برضو ما فيش مشكلة، هذا قال به بعض أهل العلم، وهذا قال به بعض أهل العلم. لكن في الآخر الصوم مشمول بقوله صلى الله عليه وسلم: «ما من أيام العمل الصالح فيها أحب إلى الله».

الخلاف بين العلماء فين؟ سيدنا النبي عليه الصلاة والسلام صامها ولا ما صامهاش؟ بس، ده الخلاف. حفصة أثبتت أنه صامه رضي الله عنه وصلى الله على النبي محمد. ماشي؟ بل أثبتت أمراً آخر: أنه لم يكن يدع صوم العشر. عائشة رضي الله عنها نفت أنه صام، فقالت أنها لم تر النبي صلى الله عليه وسلم صام العشر قط.

طب عندنا مشكله دلوقت؛ هو صام ولا ما صامش؟ قبل ما نعرف بقى صام ولا ما صامش، سيدنا النبي عليه الصلاة والسلام صام أو ما صامش، الصوم كدة كدة مشمول بالحديث. الكلام في أنه صام ولا ما صامش هو صلى الله عليه وسلّم. فجمعوا بعض العلماء، طبعا ابتدا يرجح بين الحديثين، وبعضهم ذهب أنه لا، احنا مش هنرجح حديث على الثاني غير لما يستحيل الجمع. فممن جمع؛ الإمام أحمد في رواية له أنه قال: والله عائشة رضي الله عنها نفت أن يكون قد استوعب العشر كلها بالصوم، وحفصة أثبتت له جنس الصوم في العشر، فيبقى يصام بعض الأيام ويفطر بعض الأيام، أو كان صلى الله عليه وسلم يفعل ذلك (يعني كان يصوم بعضاً ويفطر بعضاً صلى الله عليه وسلم).

وبعض العلماء ذهب أنه لا يرجح بين الحديثين، ودي رواية تانية عن أحمد أنه قال: حفصة وعائشة؛ واحدة أثبتت وواحدة نفت. عندنا قاعدة كده عند العلماء يقولوا إيه؟ إن المثبت يقدم على النافي، ليه؟ لأن معه زيادة علم.

أني لما يجي اتنين، والاتنين ثقات ودينين وعندهم أمانة، واحد يقول لك: محمود في المسجد، والتاني يقول لك: محمود مش في المسجد، أو بلاش في المسجد، واحد يقول لك: محمود جه، والتاني يقول لك: محمود ما جاش. فأكيد واحد صح وواحد غلط، أكيد، مش كده؟ (غلط دي مش يعني كذاب، ما ما عندوش العلم يعني). فالعلماء قالوا قاعدة كده عندهم، قالوا إن المثبت مقدم على النافي، لأن معاه زيادة علم؛ اللي قال محمود ما جاش ده يعني ما شافش محمود جه، واللي قال محمود جه ده واحد أمين ودين فمش هيقول كده غير وهو يكون شافه جه. مفهومة دي؟ فقالوا: خلاص، لو حفصة وعائشة اختلفتا؛ واحدة قالت النبي عليه الصلاة والسلام عمل حاجة والتانية قالت ما عملهاش، فنقدم المثبت على النافي لأن معاه زيادة علم.

طيب، على هذا، لو عملنا ده بقى، قالوا خلاص، يبقى تصوم التسعة كلهم، هنا هيرجحوا رواية حفصة وما مش هيعملوا برواية عائشة أصلاً رضي الله عنهم، فساعتها يقول لك: صوم التسعة كلهم. خلاص؟

فيبيبقى الصوم من جملة العبادات، وهنجي لله كمان (يعني خلاص بقى، يعني طالما قلنا صوم، خلاص)، بس احنا عاوزين يا جماعة نرجع كده خطوة لورا أو خطوتين بقى لورا، الشهر داخل علينا واحنا ادينا الدرس بعيد شوية عن العشرة اهو، ليه؟ علشان اللي هقوله ده، فاحنا عاوزين نخطط لعشرة ذي الحجة. يعني مش كل سنة بقى يضحك علينا، والعشرة تخش وتطلع وما نبقاش استثمرناها أحسن الاستثمار، وخرجنا منها بأكبر الفائدة. ما بقولش إن احنا ما عبدناش، لا، زودنا شوية عبادات وكل حاجة، بس لو جيت قلت لك: استثمرتها صح؟ يعني لو رجعت العشر دي -أو بلاش- لو كنت عارف أن العشر دي هي آخر عشرة وأنت هتموت يوم 11، كنت هتعمل اللي عملته ولا هتزود؟ لو كنت هتعود، أقول لك: يبقى أنت ما استثمرتش صح! ليه؟ كان كنت تقدر تجيب زيادة وما جبتش.

فبلاش التكاثل والتواني في سيرنا في الآخرة في طريق الله عز وجل، وخينا يا سيدي نتعامل مع طريق الآخرة كأنه دنيا، يعني أراضينا من أنفسنا بذلك. زي ما كذا مرة وصوتنا اتنبح قبل كده: أنك لو عرفت أن صفقة هتكسب فيها 100 ألف، وصفقة هتكسب فيها مليون، هتروح لأم مليون حتى لو هتتعب شوية زيادة، هتروح لأم مليون، مش هتسيب المليون وتاخد الـ 100 ألف. فاحنا عاوزين نبقى في طريقنا لربنا بنعمل كده. العشر ذي الحجة لو هنعرف نطلع منها بثواب قد كده، وطلعنا بثواب أصغر منه، نزعل وتنكد! ليه ده يحصل؟ ده هما في الآخر 10 أيام، يعني ما بقولكش عمرك كله، بقولك 10 أيام اجتهد فيهم اجتهاد زيادة.

طب اجتهاد زيادة يعني إيه؟ يعني والله اللي يعرف يجتهد اجتهاد سعيد بن جبير يجتهد، اجتهاد لا يكاد يقدر عليه، طب اللي مش هيقدر؟ ما بنقولش الناس كلها درجة واحدة، ما حدش يقدر يعمم هذا الخطاب طبعا ويقول الناس كلها العشر ما حدش يقدر يعمل كده، إنما خلاص، كل يأخذ بقدره.

أول الأمر أن احنا في هذه العشر... يبقى احنا أول حاجة عاوزين نخطط للعشرة، دي أول حاجة بقى تخطط لها: أن العشرة هتطلع منها والمعصية أو الكام معصية اللي أنت مش عارف تبطلهم، بطلتهم! ده أول تخطيط. إزاي بقى؟ على حسب المعصية؛ ما يعني كل واحد والمعصية اللي بعملها مختلفة، فانت هتحط خطة أن في العشرة هطلع منها وأنا المعصية الفلانية اللي أنا مش عارف أبطلها خلاص بطلتها. خلاص؟ آه، ده إزاي؟ كل واحد زي ما قلنا خطته على حسب معصيته.

مثلاً، واحد بمخدرات، بيشرب مخدرات، مش عارف يبطل المخدرات، فأيه الخطة؟ يبلغ عن نفسه، يدخل السجن في العشرة! مش هو مش هيشرب خلاص؟ (شربوا جوه ولا إيه؟ مش عارف). طيب، فيحط خطة، يعني هو فعلاً أنا يعني دلوقتي مش بهزار -اللي فات كان هزار- هو لو وصل للادمان، فيبدأ رحلة التعافي من النهاردة، إذا محتاج يدخل مصحة يبقى عنده الشجاعة أنه يروح ويعترف لأبيه، يعترف لأمه، لو هو راجل كبير يبقى عنده الشجاعة أنه يروح عادي جداً، ما يتكسفش من نظرة الناس ليه ولا لا؟ أولى إنك تتكسف من نفسك قدام ربنا سبحانه وتعالى، وتبدأ من النهاردة رحلتك في التعافي عشان تيجي العشرة وأنت جوه المصحة مثلاً لو أنت محتاج للمصحة يعني.

وخلاص ده اللي في إيديك تعمله. لو برفقة السوء بتسحبك للمعاصي، سواء سواء بقى مخدرات ولا غيرها، حفلات ما ما ينفعش نروحها، بنات زنا قرف، يبقى أقطع دول! الإجراءات شديدة شوية؟ آه، شديدة، بس هو لازِت تتعمل، ما هو احنا ما هو أنت سايب نفسك بقالك كام سنة، حصل لك إحنا؟ ولا حاجة، زي ما أنت، وعمال تقول أنا هقدر أعمل! أنت ما تقدرش تعمل حاجة، بالذات اللي بيشرب مخدرات يقول لك إيه: لا، أنا لو بكره أبطلها، لو عاوز. طب بطلها يا حبيبي ما يعرفش يبطل اهو، كلام بيقول وخلاص.

فييبقى أنا هقطع الشلة دي خالص قبل العشرة اللي بتجرني للمعاصي. بقى اتفرج على إباحية وبأعمل عادة سرية، يبقى أنا في العشرة... بقول لك في العشرة، عشان كنت الأول بقعد إيه أزوع وأقول: سيبه، نرمي الموبايل! فالشباب جوّالي قالوا لي: هو أنت مش مستوعب أنت بتكلم جيل؟ احنا طبعا جيلنا عادي، قضينا وقت من عمرنا ما كانش حتى التليفونات العادية اللي هي اللي بزراير ما كانتش موجودة! (يعني أنا أنا عاصرت ده، أن عادي ما كانش في، كان بس التليفون الأرضي اللي هو في البيت، وبعد شوية تليفونات اللي بزراير وكان اللي عنده تليفون بزراير في بيته يعني يعني عدة واحدة في البيت دول ولاد الذوات بجد! اللي عنده عدة واحدة، وكان إيه يحطها كده في جنبه باينة كده وهو ماشي، مش الموبايل في جيبه، لا، معلقها كده ومبين العدة كده هي عدة أصلاً يعني تبان من على بعد 2 كيلو).

ليه ابن ذوات؟ ده كانت الدقيقة بكام؟ بـ 5 جنيه 5 جنيه وقتها! يعني دلوقت ممكن تعدي الـ 100 جنيه 150 جنيه الدقيقة. فما كانش يتصل، كان يرن! يعني يقول: أرن لك، تنزل لي رنتين! (يعني يعني بيكلموا بعض بالايه؟ بالرنات ولا 5 جنيه).

فاحنا شفنا ده، فكان فانا عندي تصور أن عادي، يعني ما ممكن نعيش من غير تليفون، ما احنا عشنا من غير تليفون. الشباب بقى الصغير قال لك: أنت ما بتقول لنا ارمني التليفون، كأنك بتقول لي اقطع إيدك! بيع كليتك! أنت بتقول لي سيب حته من جسمك، هو أنا مش متخيل أن ده ممكن يحصل.

(ضحك)

في يعني حتى لو كده يعني أنا طبعا هقول لك معلش يعني سيب كليتك 10 أيام مش مهم، وارجع لكليتك بعد كده 10 أيام! أنا ده بكلم مين يا جماعة؟ مش كل واحد بقول له سيبت، لا، بقول له اللي مشكلته في التليفون، اللي تليفونه مضيعه ومخليه يعمل حاجات هو نفسه يبطلها ومش عارف يبطلها، فرصة أن العشر أيام دول اقفل تليفونك وأبعده خالص. طب هضبط مش عارف إيه؟ طب هاكنترول مش عارف إيه؟ يا حبيبي ما أنت جربت كل حاجة وما عرفتش، ففرصة أنها رقم قليل، 10 أيام يعني مش بقول لك اقعد شهر، 10 أيام. فمن الخطة من دلوقتي انك تستعد لده.

طب انا لو هسيب تليفوني، في واحد يقول لك: آه، أنا عادي، أنا يعني إيه مش مهم في المجتمع يعني، هو يعرفني اتنين تلاتة وقرفانين مني أصلاً.

فمن دلوقتي هتنزل تشتري تليفون عادي بزراير، عشان مسؤولياتك دي تعرف تديرها. يبقى ده معنى إنك بتستعد للعشر.

يا جماعة، هو لو أنا جيت قلت لك دلوقتي الجهاد هتروح ولا هتقعد تستعد؟ إيه بقى استعداد؟ استعداد إيمان، استعداد بدني، أتمرين شوية، استعداد مش عارف إيه، بتستعد. فبقول لك الأيام دي أفضل عند ربنا من الجهاد، فلازم لها برضه استعداد، لازم لها استعداد. فكل واحد يشوف بقى معصيته فين؛ اللي معصيته في عقوق الوالدين، نسمع ده للأسف كتير من الشباب والبنات كمان، فمن دلوقتي هنستعد إن العشرة بداية جديدة مع الأب والأم. ازاي؟ شوف بقى أحط خطة، ماشي. إيه، نعمل إيه عشان نبر؟ أو يعني ما نعقش الأب والأم؟ إيه، هنقتلهم من إيه، تطفش؟ وقتها نقتلهم، نقتلهم قبل العشر، فيجي العشر ما بنعقش بقى.

لا، إزاي؟ ما تقعدش في البيت، إحنا عايزين شوية نفسيتنا تتحمل. لأن طبعا برضه أنا عاوز أقول كلمة، ودي بقى للآباء والأمهات: بيجيلنا كتير مشاكل إن الأب والأم مش مساعدين الأبناء على البر. بيجيلنا مشاكل كتير وبيبقى في مشاكل حقيقية؛ أب ظالم ظلم شديد، أب عنيف عنف شديد، ويا ريت مع ولد، يعني ممكن تجي لي مشاكل من بنات صغيرة، حاجات زي كده بتحصل. أو غيرها بقى، ويعني إيه البيوت كلها يعني عارفين إحنا الأحوال. فرسالة للآباء والأمهات: يعني ساعدوا ولادكم إن هم يبروكم. ورسالة للأبناء: دي ما هياش شماعة، أنت في علاقة أقوى من كل علاقة، علاقتك بربنا سبحانه وتعالى. فأبوك شايفه إنه ظلمك، أمك شايف إنها جاية عليك شوية، فين ربنا في المعادلة؟ ادعي ربنا، فربنا يصرف، ما هو قلوب العباد بين أصبعين من أصابع الرحمن؛ فاللي النهارده بيشد عليك، بكره تلاقيه لين معاك. بس إحنا محتاجين يقين في الله عز وجل واحنا بندعي ربنا سبحانه وتعالى. ومحتاجين حاجة تانية؛ مبالغة في البر.

يعني إيه مبالغة في البر؟ ما ينفعش البر العادي ده، يعني مثلاً لو ثقافتكم في البيت مش متعودين، أنتوا إيه؟ عادي بتسلم على أبوك عادي، وبتسلم على أمك عادي. فلا، هبتدي أما أجي أسلم على أبويا أقبل إيده، أسلم على أمي وأقبل إيديها. فإحنا كده خدنا إيه؟ خطوة زيادة في البر عالية، ومش من ثقافتنا. يعني أنا بمجرد ما أسلم عليه، هو عادي بيفرح بكده ومش مستني حاجة تانية، لا، أنا هعمل حاجة أشد في بره وبرها، فيقوم قلوبهم تلين.

خلاص، يبقى دول حاجتين معاك أهم؛ أول حاجة: الدعاء الشديد إن ربنا سبحانه وتعالى، ده اللي حاسس إن إيه الأب والأم يعني محتاجين شوية تظبيط، فربنا تعالى يظبط كل الأحوال دي. وتاني حاجة: ندخل في البر مساحة أخرى هم مش مستنيينها مننا ولا متوقعينها، فيقوموا يلاحظوا التغيير الشديد ده فقلوبهم تلين بإذن الله سبحانه وتعالى.

خلاص، يبقى أول شيء في العشر يا شباب إن إحنا هنترك المعاصي اللي تعبانا طول السنة ومش عارفين نتركها. اللي عنده بقى معصية واحدة، اللي عنده تلاتة، اللي عنده خمسة، فرصة للعشرة دي وعد، يعني خلاص، ده عهد بينك وبين الله إن الـ 10 أيام دول مش هعملها ولا مرة المعصية دي، حتي لو كانوا 100 معصية. يا رب، عهد، الـ 100 معصية دول اللي تعبني مش هعملهم ولا مرة في العشر. أنا ما بقولكش 10 سنين، بقول لك 10 أيام. حتى لو كان عشان تعمل كده هتيجي تقعد في جامع تعتكف. ليه؟ أهم العشرة هطلع منهم أنا ما بعملش المعصية. يبقى ده أولاً.

الأمر الثاني هو أمر مهم لابد أن نحرزه في العشر، هو اصلاح الفرائض. لأن كتير برضه من الناس الدينة اللي بتسلك طريق الآخرة، مش بكلم بقى الناس اللي مش في دماغها الموضوع لا، اللي في دماغهم الموضوع هو بيتعامل مع العشرة أنها فرصة من الإكثار من النوافل، وده صح، لكن في مرتبة قبل ده وهو إصلاح الفرائض.

يعني تلاقيه مثلاً قيام الليل ما شاء الله، وبعدين نام فالفتجر فاته، يا عم أنت فيقول لك ما أنا بقى سهران طول الليل وقيام ليل وبكاء وخشوع. لا، ده شيطان اللي بيوسوس لك تقيم الليل، فانت لازم تبقى عارف مراتب العبادات أو مراتب الأعمال والأحوال عند الله عز وجل. في الحديث: «من عادى لي ولياً فقد آذنته بالحرب، وما تقرب إلي عبدي بشيء أحب إلي مما افترضته عليه». فأحب شيء ربنا يحب منك ما افترضه عليك، يبقى تراجع فرائضك عاملة إزاي؟

فالصلاة مثلاً، الشباب الرجالة، يعني قلنا لكم ثلاث أسباب تضبط لك صلاتك، حد فاكرهم؟ فين، وأمتى، وإزاي. ثلاث أسباب أسالهم، يضبطون الصلاة لك. بتصلي فين؟ فانت الراجل يصلي فين؟ في بيت ربنا. شوفوا الأثر إيه: ﴿وَلَقَدْ رَأَيْتُنَا يُؤْتَى بِالرَّجُلِ يُهَادَى بَيْنَ الرَّجُلَيْنِ حَتَّى يُقَامَ فِي الصَّفِّ﴾. الصحابه كانوا كده؛ الصحابة واحد مش قادر يمشي، اتنين يساندوه ورجله بتخطى، عارفين أما يحذف كده مش قادر يمشي، يهادى بين الرجلين حتى يقام في الصلاة، لغايه ما يقف في الصلاة. ولقد رأيتنا وما يتخلف عنها إلا منافق معلوم النفاق. أمال فين المؤمنين؟ في المسجد، الصلاة في المسجد.

اللي قاعد دلوقتي حاسس إيه، ده ثقيلة عليا. استعن بالله ولا تعجزه. في بداية التدين كنت أنا ساكن، كان عندي مشكلتين -بدايه التدين وابتدنا نسمع دروس وبتاع- كان عندي مشكلتين بقول مستحيل يا رب الصلاة في المسجد دي مستحيل. كنت أنا ساكن في المسجد اللي عيني بتشوفه بعدي له حوالي أربع خمس طرق سريعة، طرق سريعة فعلاً، مش طرق طرق سريعة، يعني لا هي بداية طريق سريع. فده المسجد اللي بتشوفه، طبعا أنا بعد كده عرفت إن إيه لما دخلت في الإسلام بقى إن في مساجد حواليه ما كنتش أعرف، ده المسجد اللي بشوفه، فيعني فاكتشفت لا، ده في زاوية مش عارف فين وزاوية فين، ويعني محاط بالمساجد.

وبعدين عرفت الصلاة في المسجد وثواب الصلاة في المسجد، وبعض العلماء يرى بوجوب الصلاة في المسجد، وكنت شايل هم معلم بيه لربنا، أنا خمس مرات هنزل أروح أصلي في الجامع ليه؟ وكنت شايل هم كبير جداً. بالدعاء والافتقار لله عز وجل وكده، مش أنا يعني، ناس بتدعي لي وكده، أنا ولا حاجة. تلاقي العكس يحصل لك، يبتدي قلبك تبقى مش قادر، يعني إيه؟ الصلاة الأذان يأذن أنت مش على بعضك. لدرجة بقى الواحد ممكن إيه، يبقى راكب مواصلة ومسافة طويلة، ولو نزل الأتوبيس ممكن ما يلاقيهوش تاني، ما يحصلهوش بسهولة وبتاع. بس خلاص، الأذان أذن، انزل، ادخل أي مسجد، حتى لو المواصله فاتتني، حتى لو هستانى ساعة، حتى اللي يحصل يحصل، بس هنزل أصلي في الجامع.

والحاجة التانية كانت الأغاني؛ إزاي ما اسمعش أغاني؟ يعني غذاء الروح، وكنت برضه حاسسها تبقى صعبة جداً، يعني ما اسمعش أغاني إزاي؟ ومن فتح الله عز وجل إن بعد فتره بقيت لو قاعد في مكان واشتغل فيه أغنية ولا حاجة، أبقى فعلاً من جوايا مبغض، يعني مش بجاهد نفسي، لا، قرفان، مش عاوز أسمع القرف ده. فكله بالله سبحانه وتعالى، كله بالله، ده لا الواحد يستاهله ولا عمل حاجة يستاهل بيها هو، إنما ربنا قال في القرآن: ﴿وَلَكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ﴾ [الحجرات: 7]. فربنا اللي بيحبب لنا الإيمان، وربنا اللي بيكره لنا الكفر والفسوق والعصيان، كله بالله يا جماعة، كله بالله.

فأنت بتصلي الفرض فين؟ هتضبط فرضك في هذه العشر؛ يعني إيه 10 أيام؟ 50 صلاة، ما فيش حاجة اسمها 49 صلاة في الجامع، صليت 49 صلاة في البيت، اطلع بره، أنا عارف أنا بقول إيه. استنى اللقطه اللي بعديها. الـ 50 صلاة كلهم، ما فيش حاجة اسمها 49 صلاة في الجامع، الـ 50 صلاة كلهم في المسجد، حلوة كده؟ ماشي. ليه؟ هي 10 أيام يا سيدي، ما بقولكش ما بقولكش إنك تعاهد نفسك إن بعد العشر... العشرة.

أعرف واحد كبير ممكن يبقى في السبعينات دلوقتي، ممكن، يعني ما أعرفش قوي عمره، بس هو يعني في الحته دي. فالراجل ده مش حريص على صلاه المسجد، حريص على تكبيرة الإحرام في المسجد. وبعدين، فكان أنا طبعا أنا... عزل، هو ساكن يعني، كنا ساكنين جنب بعض، وبعدين عزل. فأجي أسلم عليه بعد مدة، أول ما يسلم عليه يقول لي إيه: اليوم الـ 335. هو بيحبني جداً هو، ده لا يفصح به لأحد يعني، الكلام اللي بيقول لي ده هو بيقوله لي أنا. الأقي أرقام كده أنه ده اليوم رقم كذا اللي ما فاتنيش فيه ولا تكبيرة إحرام. يقول لي أرقام شبه كده؛ اليوم الـ 300 مش عارف، أقول له طب ليه؟ يعني إيه اللي حصل؟ لا، أصل أنا كنت تعبت ودخلت مستشفى، فهو ده اللي قطع العدد، اللي هو أصلاً إيه؟ يجري عليه عمله، لأنه هو كان بيوصل الأرقام أكتر من كده، يعني يقول لي اليوم الألف مش عارف، وكذا، اليوم ما تفوتوش تكبيرة إحرام. ده بقى من الإياسنية، اللي هو الناس اللي تشوفهم ماشيين في الشارع رجل عادي من العوام وعارفينهم دول ياسنية، هما دول بقى.

ويعني هذا الرجل لما بَعْرِف حد عليه بروح بعد ما أروح واخده على جنب كده: إيه ده؟ وليّ ده اللي أنت... ما يغركش، نحسبه كذلك يعني. المهم، فانت بتصلي فين؟ في المسجد. وفين دي بقى هتضبط لك بقوه سؤال تاني، وبقدر السؤال الثالث اللي هو بتصلي إمتى؟ ما هو انت في المسجد يعني أنت خلاص في أول الوقت، وأحب الأوقات إلى الله عز وجل؛ لأن بيصلي في المسجد في الجماعة، والصلاة في المسجد مش يعني تيجي بعد العصر ما صليت الظهر في المسجد تقول أنا الحمد لله صليت 50 صلاة في المسجد، لا، مش كده، في المسجد في الجماعة الأولى، خلاص. وأمتى؟ خلاص في الجماعة الأولى فظبطت لك أمتى دي قولا واحدا، وكيف تصلي. فبلا شك الصلاة في المسجد أحضر للقلب وتجعلك أخشع لله عز وجل. فلازم تضبط الثلاث أسئلة دول في الصلاة في العشر أيام، ماشي؟ كل صلاة فين وأمتى وإزاي؟

وعاوز تعلى درجة، أعلى درجة بقى براحتك، يعني تقول لا مش كفاية أن أصلي في المسجد، ده أنا مش هيفوتني تكبيرة إحرام في الـ 50 صلاة، الـ 10 أيام يا شباب أنا بتكلم في 10 أيام، 50 صلاة مش هتفوتني تكبيرة إحرام. 50 صلاة لن أرى قفا مصلي في المسجد، ليه؟ بصلي في الصف الأول، ففي 50 صلاة مش هشوف أفا مصلي، أنا في الصف الأول. واحد هيعلى زيادة يقول 50 صلاة، 50 أذان أردده في المسجد، 50 بس، يعني إيه؟ يعني المؤذن لن يؤذن المؤذن إلا وأنا في المسجد استعداداً للصلاة عشان الصلاة تقوم كده قلبي خاشع.

يبقى إصلاح الفرائض، الصلاة، الزكاة. في ناس يا شباب، مش الشباب، الرجالة الكبار شوية، ولا ما حدش بيزكي أصلاً الحمد لله، ما حدش معاه فلوس يزكي؟ آه، في ناس ما تعرفش الزكاة ولا إيه النصاب، ولا المفروض أطلع كام، ولا فلان ده اللي من قرايبي ينفع أديه ولا ما ينفعش، هو بيطلع وخلاص كده. لا، أصلح فرائضك. والزكاة والصلاة، يعني تلاقي دايما الصلاة تذكر في القرآن معاها الآية الزكاة. فالتعامل مع الزكاة بالطريقة دي غلط، اعرف النصاب وبيطلع ازاي وبيطلع إمتى وبيطلع لمين، ومين لو طلعه لا يجزئ؛ لأنك هتسال عنها يوم القيامة، ما انت لو طلعتها لواحد لا تجزئ له الزكاة ربنا هيسألك أنت الزكاة دي ما طلعتهاش ليه؟ أصل ما كنتش أعرف. ما تعلمتش ليه؟ وقل مثل ذلك في بقية الفرائض.

أصلح فرائضك في هذه العشر. ثم إذا أصلحت الفرائض، النوافل بقى، تكثر من النوافل؛ عندك صيام اتكلمنا عنه، وعندك قيام الليل. سعيد بن جبير اللي قلنا كان يعبد ربنا عبادة لا يقدر عليها، لا يكاد يقدر عليها، كان يقول: إذا دخلت العشر فلا تطفئوا سرجكم تعجبه العبادة. فلا تطفئوا سرجكم كناية إنه إيه؟ طول الليل صاحي. طيب، إحنا نقدر نعمل كده؟ اللي يقدر يعمل يعمل، يعني اللي يقدر يعمل يعمل؛ أقوم الليل كله يا سيدي؟ قوم الليل كله، تقدر تعمل ده؟ اعمل. طيب، كلنا؟ ده خطاب عام؟ لا، مش خطاب عام طبعا، ومش كل الناس تقدر تعمل ده طبعا، معروف يعني، إنما اجتهد، انوي خير.

يبقى معاك قيام ليل، معاك صيام نهار، معاك ذكر. هذه العشرة أصلاً وقت للذكر، مش كده؟ تكبير وتهليل وتحميد، قال صلى الله عليه وسلم: «فأكثروا فيها من التكبير والتهليل والتحميد». فيبقى تكثر من: الله أكبر، الله أكبر، لا إله إلا الله، والله أكبر، الله أكبر، ولله الحمد. تكبير يا شباب نوعين؛ تكبير مقيد، وده اللي الناس عارفاه، وفي تكبير مطلق، وده كتير من الناس مش عارفاه. التكبير المقيد اللي هو بعد الصلوات، اللي الناس كلها بتعمله في عيد الأضحى، وبالمناسبه إن في عيد الفطر ما فيش تكبير، ما فيش تكبير مقيد في عيد الفطر، إنما في عيد الأضحى نعمله من يوم عرفة، نبتدي بعد كل صلاة: الله أكبر، الله أكبر، لا...

إلا الله، ونقعد إيه نكبر في تكبير مطلق؛ يعني إيه مطلق؟ في بيتك بتكبر، في العربية بتكبر، في السوق بتكبر. فهذه العشر يكثر فيها من التكبير المطلق، وأنت ماشي بتكبر؛ كان ابن عمر وأبو هريرة يخرجان إلى السوق في هذه العشر يكبران فيكبر الناس بتكبيرهما، ما أخرجهما إلا ذلك؛ يعني ابن عمر مش عاوز يشتري حاجة وأبو هريرة ما لوش حاجة في السوق، يخرجوا يكبروا عشان الناس تكبر في العشر، ما أخرجهما إلا ذلك.

يا سيدي هيقول لك أنا يقال علي مجنون، بتكسف! في بيتك كبر، في بيتك ويتقال عليك مجنون عادي بقى، في بيتك كده بتتشتم يعني، فكبر في بيتك وأهل البيت يكبروا بتكبيرك، كبر في سيارتك.

فالإكثار من الذكر، وأعظم الذكر كتاب الله عز وجل، هات لك ختمة في العشرة، يبقى كل يوم ثلاثة أجزاء، واحد يقول لك لا مش كفايه هكتر، خلينا نتفق أقل حاجة نجيب ختمة، اتفقنا ثلاثة أجزاء، لو بتقرا الجزء في عشرين خمسة وعشرين دقيقة، إحنا بنتكلم في ساعة تقريباً، ساعة جبت الثلاثة أجزاء، فمش بنتكلم في رقم ضخم، بتقرا جزء في نص ساعة يا سيدي ساعة ونص جبت الثلاثة أجزاء، فما بنتكلمش في رقم ضخم يعني ساعة ونص في يومك هتجيب ختمة في عشر أيام، فده أقل شيء وده وعد خلاص بينا وبين كل حد يسمع الفيديو بقى، يقولوا يا ريتنا ما سمعنا الفيديو! اللي عاوز يزود، زود! هات عشرة أجزاء في اليوم معاك، هات اللي تجيبه يعني، ما زود.

فنكثر من النوافل، ما من أيام العمل الصالح فيها أحب إلى الله من هذه العشر، قال: ولا الجهاد في سبيل الله؟ قال: ولا الجهاد في سبيل الله إلا رجلاً خرج بنفسه وماله ثم لم يرجع من ذلك بشيء.

ابن رجب في لطائف المعارف يختم بقوله: إخوانكم في هذه الأيام قد عقدوا الإحرام، وقصدوا البيت الحرام، وملأوا الفضاء بالتلبية والتكبير والتهليل والتحميد والإعظام. لقد ساروا وقعدنا، وقربوا وبعدنا، فإن كان لنا معهم نصيب سعدنا. أتراكم في النقى والمنحنى أهل سلع تذكرون ذكرنا؟ انقطعنا ووصلتم فاعلموا، واشكروا المنعم يا أهل منى، قد خسرنا وربحتم فصلوا بفضول الربح من قد غبنا. ثار قلبي خلف أحمالكم غير أن العذر عاق البدنا، ما قطعتم وادياً إلا وقد جئته أسعى بأقدم المنى، أنا مذ غبتم على تذكاركم، أترى عندكم ما عندنا؟

يقول القاعد لعذر شريك السائر، وربما سبق السائر بقلبه السائرين بأبدانهم. رأى بعضهم في المنام عشية عرفة في الموقف كأن قائلاً يقول: أترى هذا الزحام على هذا الموقف؟ فانه لم يحج منهم أحد إلا رجل تخلف عن الموقف فحج بهم، فهوهب له أهل الموقف.

يا سائرين إلى البيت العتيق لقد سرتم جسوماً وسرنا نحن أرواحاً، أنا أقمنا على عذر وقد رحلوا، ومن أقام على عذر كمن راح. الغنيمة الغنيمة بانتهاز الفرصة في هذه الأيام العظيمة، فما منها عوض ولا لها قيمة؛ يعني لا تقوم، غالية جداً. المبادرة المبادرة بالعمل، والعجل العجل قبل هجوم الأجل، قبل أن يندم المفرط على ما فعل، قبل أن يسأل الرجعة ليصعمل صالحاً فلا يجاب إلى ما سأل، قبل أن يحول الموت بين المؤمل وبلوغ الأمل، قبل أن يصير المرء مرتهناً في حفرته بما قدم من عمل.

يا من طلع فجر شيبه بعد بلوغ الأربعين، يا من مضى عليه بعد ذلك ليالي عشر سنين حتى بلغ الخمسين، يا من هو في معترك المنايا ما بين الستين إلى السبعين، ما تنتظر بعد هذا الخبر إلا أن يأتيك اليقين؟ يا من ذنوبه بعدد الشفع والوتر، أما تستحي من الكرام الكاتبين؟ أم أنت ممن يكذب بالدين؟ يا من ظلمة قلبه كالليل إذا يسري، أما آن لقلبك أن تستنير أو يلين؟ تعرض لنفحات مولاك في هذه العشر، فإن لله فيها نفحات يصيب بها من يشاء، فمن أصابته سعد بها آخره الدهر.

أقول قولي هذا وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك. بسم الله والصلاة والسلام على رسول الله وعلى آله وصحبه ومن والاه.

واحد بيقول: السلام عليكم ورحمة الله وبركاته. وعليكم السلام ورحمة الله وبركاته.

يا شيخنا الفاضل والله إني أحبك في الله. السؤال: هل الصلاة في المسجد فريضة؟ إيه رايكم؟ في أقوال للعلماء؛ الصلاة في المسجد أو يعني نخليها صلاة الجماعة، ففي أقوال للعلماء، بعض العلماء يقولون صلاة الجماعة مستحبة، وبعض العلماء يجعلونها واجبة كالحنابله، صلاة الجماعة عندهم واجبة، وبعض العلماء يجعلونها شرط صحة وده أشد الأقوال وده قول ابن تيمية، فعنده أن صلاة الفذ باطله؛ اللي بيصلي لوحده يعني، فدي صلاة الجماعة، ماشي.

واحد البنت رفضته علشان ما بيطلبش علم، بيقول أنا في طب، وده مش خط في طب يعني بس ماشي، ولا هم الدكاترة خطهم وحش مش كده؟ بيكتبوا الروشتة ما بنفهمهاش. ماشي، حسن خطك وإنا نجوزك. هو بيقول يعني بيقول أنصح البنات إن هم ما يصعبوهاش على الشباب، هي مش تصعيب، هو كل حد بيبقى ليه متطلبات في شريك حياته، فلو هي حريصة على العلم، هو عاوز حد يعينها على ده، فده من حقها، من حقها أنها تطلب ده، زي ما في الدنيا من حقها تطلب حد في مستوها مثلاً الاجتماعي أو في مستوها المادي أو مستوها التعليمي، فمش هنقول ما بيصعبوهاش، صح؟ فكذلك في الدين هي بتبقى عاوزة حد في مستوى معين، فأنت اطلب العلم، وبعدين تبقى عالم كبير وتغظها بقى، ما تتجوزهاش هي بقى، فهي تقول يا ريتني كنت اتجوزته! طبعا أنت لو طلبت العلم بالنية السودة دي هتروح في داهية.

هل مشاهدة أشياء محرمة عن البزنس للتجنب؟ أهي شوف حاجات محرمة عن البزنس للتجنب، هل جائز أم حرام؟ وصلي على النبي يا ريس! بزنس، أنت شغال في موقف بزنس أسف مش هجاوبك بقى نرفزتني! مش عارف يعني إيه حاجات محرمة في البزنس؟ مش عارف إيه.

لو ممكن تقول لنا، محتاجين نعرف عن الأخوات اللي في الدرس للزواج؟ كنا عملنا قبل كده بس مش هنا، استماره. هو ده سؤال مهم الحقيقة، كنا عملنا استمارة قبل كده في مكان يعني، والصوت والمعلومات بتبقى سرية، وبيحاولوا هم إيه يعني يوفقوا، ممكن نفكر نعمل حاجة زي كده إن شاء الله. طبعا بيبقى في صعوبة، يعني هو بيبقى الولد عاوز بنت بمواصفات معينة، والبنت عاوزة ولد بمواصفات معينة، وفاكرين أن هيلاقوا المواصفات، فاكرين الناس متدينة وكده وبتاع. أنتوا زي الفل طبعا بس أنا ما بعرفش، لو ما جلَدتش ما بعرفش أعيش فاستحملوا. بحاول أطلع من الفقه على قد ما أقدر عشان بيبقى المسائل معظمه فيها خلاف.

ماشي، درس الفجر والعصر، ادعوا لي، يعني ربنا إن شاء الله يتوب عليا؛ لان هو ذنوبي موقفة الفقه والدرس، فادعوا لي ربنا يتوب عليا ويغفر لي ويسامحني، وترجع الدروس تاني إن شاء الله.

واحد بيقول: لو صليت قيام الليل بجزء مثلاً مش هقوم لصلاة الفجر، لكن لو صليت الوتر فقط ونمت هقوم للفجر، ماذا أعمل؟ صلي بجزء وصلي الفجر، إيه ده؟ يعني أنت ليه خليت القسمة ثنائة؟ هو بدماغك بمزاجك يعني؟ أنت بعت لي سؤال وعاوزني... لا، هتصلي بجزء وتقوم الفجر! تبعت لي ورقة المرة الجاية تقول أنا صليت بجزء الفجر.

في درسين للمحاسبة هينزلوا، الدرس الثاني مهم جداً، اللي بعت الورقة يسمع الحته، هينزلوا إن شاء الله بعد كده في الدرس الثاني وإحنا بنشرح قول الهروي: والجناية عليك حجة، يبقى اسمع شرح الحته دي مهم جداً.

السؤال: في العمل في وقت الراحة هل يجوز صلاة النافلة؟ كلها قبل الظهر، الست ركعات الصليبة قبل الظهر، طيب ليه وقت الصلاة مستثنى شرعاً من العقد؟ تاني، دلوقتي أنت بتمضي عقد مع الشركه اللي أنت شغال فيها أو المصنع أو كده بحبس الوقت؛ يعني أنا شغال عندكم مثلاً من تسعة لخمسه مثلاً، العقد ده يستثنى منه شرعاً وقت الصلاة، بالذكر، بالنافلة، ده مستثنى شرعاً، يعني أنت وقت الظهر هروح أصلي الظهر وهصلي سنة الظهر وهقول أذكار الصلاة فده مستثنى من العقد، ماشي.

لكن ما نبوظش بقى، يعني البزنس، يعني ما تبقاية أنت شغال في فرن وبعدين أنت محطة العيش جوه الفرن وتروح سايب العيش ورايح إيه مصلي العشاء! لا، ده حرام تعمل كدة، حرام تعمل كدة، بل اللي شغال في الشغلانات دي لو ما فيش يعني خلاص ما فيش بديل ليها ويترك الجماعات، والفقهاء يقولون يترك الجموعات كذلك.

والحمد لله رب العالمين، وصلى الله على نبينا محمد وآله وصحبه وسلم تسليماً كثيراً.