دخولتسجيل الدخول

دروس من الحج

أمجد سميرالشيخ أمجد سمير
  • مدة الدرس:
  • قراءة

ربنا ظلمنا أنفسنا وإن لم تغفر لنا وترحمنا لنكونن من الخاسرين، بعديه سيدنا إبراهيم والذي أطمع أن يغفر لي خطيئتي يوم الدين. شوفوا يا جماعة الأنبياء بيعملوا إيه، عمالين يسألوا ربنا المغفرة، سيدنا نوح: رَبِّ اغْفِرْ لِي وَلِوَالِدَيَّ وَلِمَنْ دَخَلَ بَيْتِيَ مُؤْمِناً وَلِلْمُؤْمِنِينَ وَالْمُؤْمِنَاتِ. سيدنا موسى: رب اغفر لي ولأخي. سيدنا سليمان: رب اغفر لي وهب لي ملكاً لا ينبغي لأحد من بعدي. سيدنا داوود: فاستغفر ربه وخر راكعاً وأناب. سيدنا محمد عليه الصلاة والسلام: فاعلم أنه لا إله إلا الله، الآية صعبة مش كدة، واستغفر لذنبك. لا حول ولا قوة إلا بالله.

فيعني حول المغفرة يدندن الأنبياء والمرسلون. وفي كل موسم عظيم، كان نصوص الشرع تكسر داخلك ذلك الإعجاب وتكسر داخلك تلك الرؤية لهذه النفس وهذا العمل، فتجتهد وتتعب وتصوم وتقوم وتوفق لليلة القدر ويتقال لك في الآخر هنغفر لك، وتدفع فلوس وبعضهم بيدفع أكثر، كسر المليون في الحد، وتتعب وففارق الأوطان وترروح تمشي مسافات قد كدة وفي الشمس وفي الحر وتنخلع عن العادات وتخلع الثياب اللي متعود تلبسها وتسيب المنامات اللي متعود تنام فيها وتسيب الأكل اللي متعود تأكله، وكل ده وفي الآخر يتقال لك هنغفر لك: أشهدكم يا ملائكتي أني قد غفرت لهم. فلم يبق داخلك رؤية للنفس ولا رؤية للعمل ولا رؤية لحال ولا رؤية لمقال ولا رؤية لأي شيء تسأل به شيئاً مما يسأله الناس، بل تقف على تلك الحال التي ذكرها الرب عز وجل: أتوني شعثاً غبراً ضاحين.

ثم في ختام ذلك اليوم العظيم ومع غروب الشمس، تجد نفسك لا تسأل شيئاً إلا العفو إلا المغفرة، لأنك تعلم أن تلك هي الجائزة الكبرى في ذلك اليوم. أتوني شعثاً غبراً ضاحين، الراجل الشعث يعني إيه شعثاً، منعكشين، يعني شعره منعكش، غبراً مطربين، ده معناها إيه، أنه إنسان لا يهتم لمظهره مش كدة يعني واحد مش مهتم قوي شكله إيه وعامل إزاي منعكش ومطرب. طيب ليه مش مهتم بالمنظر، كأنه هذا الذي تلك حاله وهذا وصفه الشعث الغبر ده واحد قد أهمه أمر جلل، أنت عارف لما تكون في البيت مثلاً ويجي لك مكالمة الحق ابنك خبطته عربية وبينزل دم وتنقل المستشفى، هتوصل المستشفى عامل إزاي، ممكن تلاقي نفسك بعد ما وصلت لابس فردة شبشب نازل بفردة وفردة نازل بالفانيلا الحمالات، ممكن ده يحصل مش كدة ليه أتاك أمر جلل قد شغلك عن أن تهتم بنفسك.

هتدخل بقى تتسرح وتلبس أحسن حاجة وكويس مش عارف القميص ده حسن مكرمش مش هينفع أنزل كدة مش هتعمل ده ليه، قد أظلك أمر قد يعني شغلك وصرفك عن عن الاهتمام بظاهرك. ده معنى أتوني شعثاً غبراً، يعني ناس جاية مش مهتمة لا بمظهر ولا بمنظر ولا بشكله عامل إزاي قدام الناس، ليه، لأنه قد شغله شاغل. واحد جاي الموقف واحد جاي عرفة وقد شغله ذنبه، قد عرف أنه انصرف من ذلك الموقف ولم يغفر ذنبه فقد خاب وخسر، وأنها فرصة ربما لا تتكرر، فمشغول مشغول بذنبه وبحاله، فلا مهتم بقى شكله إيه ولا متصرح ولا مش متصرح ولا مطرب ولا مش مطرب، مش فاضي للحاجات دي.

وكذلك قد عرف أن أهل الموقف منهم من يلبي فيقول لبيك اللهم لبيك فيجاب لبيك وسعديك، ومنهم من يلبي فيقول لبيك اللهم لبيك فيجاب لا لبيك ولا سعديك، قد تيقن ذلك وشاك أيجاب بالأولى أم بالثانية. يعني كلنا على يقين أن من اهل الموقف من يجاب بهذه ومنهم من يجاب بتلك، وشاكين، كل واحد في الموقف شاكك هو أنا لما بقول لبيك اللهم لبيك بيتقال لي إيه، يرحب بي ويرد علي ذلك الرد الجميل أو هي الأخرى، ولو التفت كل منا إلى ذنبه لراى نفسه من أهل تلك الأخرى، يعني مين منا يستاهل أن يتقال له لبيك وسعده، مين منا يستاهل ده، ما حدش يستاهل. ومن رد عليه ذلك الرد لبيك وسعديك فبرحمته وبعه وبعفوه وبمغفرته وبمنه وكرمه، مش منا ولا حاجة مش ليس منا يعني.

فأن هذا المعنى الأول، أن العبادات العظمى في دين الله عز وجل والمواسم مواسم الخيرات والنفحات، نجد هذا المعنى حاضراً بقوة، أن أنت بس عاوز تطلع من هذا الموسم مغفور لك، طب الفردوس الأعلى طب مرافقة النبيين، طب احنا عاوزين بس يغفر لنا بس. هذا هو المعنى الأول الذي يعني نجده في الحج.

المعنى الثاني الحقيقة والذي يعني استحضرته بقوة، أن ثم عبادة في الحج تتكرر ما لا يتكرر غيرها، عبادة الرجم. الطواف بالبيت شرفه كبير وفضله عظيم وهو عبادة مستقلة، يعني أنت طول ما أنت قاعد في مكة طوف وتثاب مش كدة، إنما واحد قاعد في مكة في أي وقت غير الحد يعني يروح يرجم وهنقول له تثاب بل بالعكس ممكن تأثم إن دخل في البدعة، إنما الطواف هو عبادة مستقلة كدة يعني أنا قاعد دلوقتي عاوز أنزل أطوف، طب خلاص طواف، عاوز أطوف واحد تاني طوف تاني طوف عاشر طوف مية، وتثاب على كل طواف. ونجد أن الطواف في الحج هو طواف واحد فقط، الحج هو طواف الإفاضة بس، ماشي بعد كده بقى في طواف وضع لكن ده خارج الحج يعني ده ما هواش من مناسك الحج، إنما طواف الإفاضة هو طواف واحد، وتجدون السعي كذلك سعياً واحداً بس، والوقوف بعرفه وقوف واحد لا يتكرر، يعني هو يوم عرفة وخلاص مش هنجيبك تاني يوم 10 ولا هنجيبك يوم 12، هو وقوف واحد وهو أعظم أركان الحج، الحج عرفة، ومع ذلك كان وقوع وقوفاً واحداً فقط.

ثم العجيب أنك تجد عبادة الرجم متكررة، أولاً بترمي 70 حصاة، عدد كبير، حصى سبعة في يوم الحج الأكبر اللي هم العقبة، وبعدين ثلاث أيام التشريق كل يوم 21 حصاة يبقوا 63 وسبعة في الأول 70 حصاة بنرمي 70 حصاة، والعجيب أن الـ 70 حصاة مش بترميهم مرة واحدة، لا، ده أنت هتيجي يوم 10 هترروح ترجم، وبعدين تروح تنام وتصحى عشان تروح ترجم، والرجم يعني هترمي وبعدين تمشي شوية، وبعدين ترمي وبعدين تمشي شوية، وبعدين ترمي الصغرى الوسطى الكبرى، وبعدين ترجع تنام عشان تصحى تروح ترجم فترمي وبعدين تمشي، وبعدين ترمي وبعدين بعدين تمشي وبعدين ترمي وتروح تنام وتصحى عشان ترجم على نفس الصفة. وأيام التشريق ما فيهاش عبادة مختصة بالحج غير الرجم، يعني الحج كل الحديدج يبتون في منى عشان بس الرجم، ما فيش حاجة تانية بيعملوها مختصة بالحج يعني بمناسك الحج الرجم بس.

فكان المعنى الذي نستحضره من تلك العبادة وتكرار تلك العبادة، سواء في اليوم الواحد أو حتى في الأيام المتتالية، أن معركتك مع الشيطان هي معركة متجددة، وأن الشيطان لن يتركك، فأنت بتروح تعلن العداوة له وبعدين تنام وتصحى لتعلن العداوة له، وتنام وتصحى لتعلن العداوة له، وتنام وتصحى لتعلن العداوة له، معركة متجددة بتجدد الأيام، وكان المعنى أن معركتك مع الشيطان لن تنتهي إلا بانتهاء أجلك، هتنام وتصحى هتلاقي المعركة شغالة، وهيقال لك انتبه للمعركة وخد سلاحك، الشيطان ما بيقس ولا بيغفل عنك، أنت بتغفل عنه آه، إنما هو ما بيغفلش عنك.

كلنا عارفين قصة الرجم مش كدة، كما جاء في بعض الآثار يعني أن الشيطان عرض لأم الذبيح قال لها أين يأخذ إبراهيم ولده، قالت لا أدري، قال يأخذه ليذبحه، قالت ولما يذبحه، قال يزعم أن ربه أمره بذلك، قالت إن كان أمره فليفعل. فلما آيس منها جاء الولد قال إلى أين يأخذك أبوك، قال لا أدري، قال يأخذه ليذبحك، قال ولما يذبحني، قال يزعم أن ربه أمره بذلك، قال إن كان أمره فليفعل. ثم عرض لإبراهيم فرجمه، فلم يياس الشيطان، وده المعنى يا جماعة، فعرض له ثانية فرجمه فلم يياس الشيطان، فعرض له ثالثة فرجمه، ده الشيطان. يبقى وأنت ترجم تلك أو يعني رمزية ذلك الرجم أنك ترجع، أو حتى اللي ما راحش لما يرى ذلك ويعلم أن تلك الأيام عبادتها الرجم فقط، وأن هذه العبادة هي العبادة الحابسة للحجيج، معنى عجيب جداً يا جماعة والله يعني الحج دلوقتي يا جماعة الترتيب السنة إيه، خلاص وقفنا في عرفة رحنا بيتنا في مزدلفة، يوم الحج الأكبر يوم 10 هنروح نرمي العقبة جمرة العقبة الكبرى ونحلق ونطوف الإفاضة، مش كدة، إيه اللي بيحبس الحاج، يعني ليه الحاج ما يسافرش يوم 10، محبوس على عبادة الرجم، دي العبادة الحابسة للحج، أنتوا هنا ومش هتمشوا غير بعد ما ترموا الجمرات، عبادة حابسة.

وهي ختام الحج، خلاص أنت خلصت كل حاجة الحج كله خلص وبقي أن ترجع إلى بلدك بذلك المعنى الختامي. أنتم عارفين الناس اللي بتدرس أو اللي بتدي بتقف تدرب الناس أو بتدي محاضرات أو حاجات زي كدة، بيبقى عندهم عناصر مهمة منها قفلة المحاضرة، ماشي، قفلة المحاضرة دي مهمة ليه، بيقولوا في حاجه كده بيسموها إيه التيك هوم مسيدج، يعني إيه، يعني الرسالة اللي الناس اللي قدامك هتمشي بيها تروح بيها بقى، فدايما دايما يقول لك أن لو عاوز تقول حاجة مهمة قوي، ممكن تقولها في كذا مكان، بس من الاماكن اللي ممكن تقولها فيها ختام المحاضرة، بيسموها التيك هوم مسيدج، لأن الكلمة الأخيرة اللي هيسمعها اللي قاعد قدامك ده هي دي الكلمة اللي هتعلق في ذهنه وهيروح بيها بقى يشتغل بيها.

فكانت تلك العبادة الخاتمة لعبادات تلك المشاعر يعني هي دي الرسالة اللي هتروح بيها لبيتك، أن عداوة الشيطان باقية وبعدين باقية بمرور الأيام أنت بتنام وتصحى تروح تلاقي فيه عداوة، وبعدين ما بتتوقفش، بدليل أنك بترجم وبعدين تمشي شوية في الدنيا فتلاقي نفسك محتاج ترجم تاني، وبعدين تمشي شوية في الدنيا، وده اللي حدث لإبراهيم، فتلاقي نفسك محتاج ترجم ثالث، ويا ريت أنت بتحاربه على شيء فالمعركة الجزئية دي بتخلص وبنبتدي معركة أخرى أبدا، ما بيقس يعني على نفس الجزئية، تلاقي بترجم مرة واثنين وثلاثة، يعني يا جماعة الشيطان لما عرض لإبراهيم عرض له أول مرة عشان يثنيه عن مسألة الذبح مش كدة، تاني مرة عشان برده يثنيه عن الذبح، طب ثالث مرة برده مش معركة وخلصت فنروح نشوف غيرها، لا، ممكن في نفس المعركة في نفس الجزئية في نفس المعصية اللي أنت بتجاهد نفسك فيها تلاقي نفسك المعركة مستمرة، هتحاربه مرة مش هيس وهيجي لك تاني في نفس الجزئية، هتضطر تحاربه تاني مش هيس وهيجي لك ثالث في نفس الجزئية، إن غفلت فغير مغفول عنك، أنت أغفل براحتك بقى ونام الشيطان صحيلك.

أفتتخذونه وذريته أولياء من دونه وهم لكم عدو، عجيب جداً فين الآية دي، ما قريتوش الكهف ولا إيه النهارده في سورة بنقراها كل أسبوع، لأن المعنى عجيب يا يا جماعة ربنا سبحانه وتعالى بيقول تتخذونه والذرية أولياء من دوني وهم لكم عدو، إيه ده إزاي يعني بئس للظالمين بدلاً، يعني هو عدو ليك ورحت أنت رايح اتخذته ولياً من دون الله حطيت إيدك في إيده تحاربون الله جل وعلا، طيب وهو عدو خفي يعني عدو ليك ومخبي العداوة وبيظهر الصداقة، لا ربنا لما

وصفه بالعداوة ووصفوا أنه عدو بين، ظاهر العداوة. ما بيتجملش بيقول لك أنا عدوك. بيقولها لك أمتى؟ من أول لحظة ليك في الدنيا. سيدنا النبي عليه الصلاة والسلام أخبر أنه ما من مولود يولد إلا وينزغ الشيطان، ولذلك يستهل صارخا إلا عيسى بن مريم. الولد أو الطفل أول ما يتولد الشيطان يروح جاي ينغزه كده في جنبه، فيصرخ. من أول لحظة ليك الشيطان بيقول لك أنا عدو، وعداء بغل. عداء بغل، أنت عارف لما يكون عدوك عدوك، لكنه يضعف وقوته تنهار، ويبقى لا حول له ولا قوة، تلاقي نفسك إيه ترق؟ خلاص بقى سيبه، مش كده؟ مع أنه عدوك يعني ممكن تكون بتكرهه من جوه لكن خلاص سيبه، بقى إيه لغاية ما إيه يجي له أجله كده على جنب، وخلاص خلاص ضعيف لا حول له ولا قوة. فقل لي بربك إيه الغل اللي يخلي عدو وأنت لسه حتة لحمة حمراء، لا ليك يد طبطش ولا سن يقطع، حتة لحمة حمراء لا قوة لك. إيه الغل اللي يخليه يبارزك العداوة دي؟ وأنت حتة لحمة؟ لا غل شديد.

فأول ما تكبر وتعقل، مع أنه عداوته مبينة وأخبر الله عنها، تقوم حاطط إيدك في إيده! بتحارب مين؟ بتحارب ربك سبحانه وتعالى. وتلاقي سورة الكهف كل جمعة تنبهك على هذا المعنى: ﴿أَفَتَتَّخِذُونَهُ وَذُرِّيَّتَهُ أَوْلِيَاءَ مِن دُونِي وَهُمْ لَكُمْ عَدُوٌّ ۚ بِئْسَ لِلظَّالِمِينَ بَدَلًا﴾ [الكهف: 50]. عجيبة جداً بئس للظالمين بدلاً. فده تاني معنى في الحج: أن تنتبه لتلك المعركة، معركتك مع الشيطان مش هتنتهي غير لما روحك تطلع. طب وأنت في سكرات الموت المعركة شغالة!

يحكوا عن الإمام أحمد. الإمام أحمد بن حنبل يحكوا عنه أن هو كان في السكرات يلقنونه الشهادة، فكان يقول: ليس بعد! اترعبوا إمام أهل السنة، اللي هو يعني عاش منافحا عن السنة، ما ينطقش الشهادة ويقول: ليس بعد؟ ثم أفاق من سكرته، فقالوا له: يعني كنا بنقول لك كذا ترد كذا؟ قال: لم أكن أجيبكم، وإنما عرض للشيطان فقال: الآن تفوتني يا أحمد، فكنت أقول: ليس بعد. لا، يعني الشيطان جاي إيه الأول يطمنه وهو في السكرات: خلاص أنت فتتني خلاص. ليه؟ عشان لما يطمن يقوم جايله وفاتنه! فكان يقول له: خلاص فتني، فاحمد كان بيرد عليه يقول له: ليس بعد. طول ما في نفس خارج وداخل المعركة شغالة، ومش هيرحمك ومش هيوقف بحالك أنك في سكرات موت، مش هيوقف. كان وقف بحالك وأنت عيل صغير؟ مش هيرف. لو قدر في آخر في آخر لحظة يجعلك تكفر بالله لتخلده في النار هيعمل، مش هيرف مش هيرحم. فانتبهوا لتلك المعركة المستمرة.

فده درس أيضاً من دروس الحج. من دروس الحج، أنا ما جاش أسئلة خالص عشان هخلص وهمشي عشان بس. من دروس الحج كذلك هو ذلك المعنى الكبير، وهو أن الحج هو القصد. وأنت تقصد ببدنك وتقصد رب البيت بقلبك سبحانه وتعالى، ولذلك كان الحج شعاره التوحيد: «لبيك اللهم لبيك، لبيك لا شريك لك لبيك، إن الحمد والنعمة لك والملك، لا شريك لك». فكان شعاره التوحيد هو شعار الحج: لبيك.

يققال أَبَّ الرجلُ الرجل بالمكان يعني أقام فيه؛ يعني أنا مقيم على طاعتك يا رب، أو لبيك يعني إجابة بعد إجابة. لبيك اللهم لبيك، لبيك لا شريك لك لبيك. وانظروا إلى لفظ لبيك كيف يتكرر في شعار الحج. المعنى يا جماعة اللي عاوزين نقف معاه -وأنت يعني كثيراً، أظن الناس كلها بتسمع عن التوحيد وكده- لكن في معنى ربما نحتاج أن نشير إليه وكثيراً ما ندندن حوله في دروسنا، هو معنى أن الملك لله.

وهذا المعنى تجدونه في شعار الحج: إن الحمد والنعمة لك والملك. وتجدونه في أفضل ذكر يققال في يوم عرفة: «لا إله إلا الله وحده لا شريك له، له الملك». أفضل الدعاء دعاء يوم عرفة، وأفضل ما قلت أنا والنبيون من قبلي هذا الدعاء: له الملك. فالإلحاح على معنى أن الملك لله سبحانه وتعالى، ده معنى ينبغي أن نخرج من موسم الحج -سواء حجيت أو ما حجيتش- ينبغي أن تخرج من موسم الحج وقد استقر في قلبك أن الملك لله.

إيه بقى معنى استقرار أن الملك لله في قلبك وإيه إسقاطاته عليك؟ أنك لا ترجو غيره؛ ما هو الملك ملكه! ولا تخاف سواه؛ ما الملك ملكه! أنت ليه قلبك متعلق بغيره في تحصيل وظيفة، ولا في إتمام زواج، ولا في تحصيل مال؟ قلبك متعلق بغيره ليه والملك ملكه جل وعلا؟ وأدينا لكم مثاله قبل كده، قلنا لكم مثال من يعني يجد في قلبه رجاء لغير الله -وده يعني قليل من الناس اللي ما بيلاقيش ده- لما تلاقي قلبك مايل كده للشخص الفلاني اللي في المنصب الفلاني، لأن هو اللي الواسطة اللي هتجيب لي الوظيفة، أو الفلانية الفلانية لأن هي اللي هتتملي الجوازة من اللي أنا عاوز أجوزه، أو إلى غير ذلك بقى من الأمور، أنت لم تتحقق بقولك في التلبيه إن كنت حاجاً: إن الحمد والنعمة لك والملك، ما تحققتش بده. ولو لم تكن حاجا فقد أكثرت في يوم عرفة: لا إله إلا الله وحده لا شريك له، له الملك.

قلنا لكم مثال قبل كده، قلنا لكم مثال هذا كرجل دخل على ملك من الملوك يسأله شيئاً من المال، من العطاء. فأخرج الملك يعني رقعة وقلم، وابتدى يكتب لك ورقة هتاخدها عشان تروح تصرف بيها فلوس من إيه، من الخزنة. فبدأ يتعلق قلبك بالقلم والورقة! أن القلم والورقة دول هم السبب في إيه، في إني هاخد الفلوس؟ فذهلت عن الملك وتعلق قلبك بالقلم والورقة! سرحت خالص أن في ملك بيكتب، وقلبك دلوقتي متعلق بالأيه بالقلم والورقة! لو حد حصل له موقف زي ده يتقال عليه إيه ده؟ وراى أن القلم والورقة هم دول اللي هيجبوا له الفلوس؟ يا ابني في ملك بيكتب! في ملك بيكتب! والمثال ده مذكور في الكتب، والمثال ده يمكن الناس شوية إيه يعني، طبعاً الناس العالية شوية في مقام التوحيد، آه، شايفين الناس زي القلم والورقة. شايفين الناس كده يعني إيه زي القلم والورقة، لا حول لهم ولا قوة ولا بيعملوا حاجة ولا بيهشوا ولا بينشوا، بالضبط زي القلم والورقة.

اللفظ اللي نكرره في الدروس نقول إيه؟ ترى الناس كأشباحاً، يعني إيه؟ لا وجود لهم أصلاً. خيالات كده ماشية مالهاش لازمه. فكنا نضرب مثال تاني مع ده، المثال اللي في الكتب، لو الشنطة دي محطوطه على مصاحف شيلوها. فنضرب مثال تاني عشان الناس تنتبه بقى للمعنى، لأن طبعاً ما مين دلوقتي شايف البني آدم اللي قدامه زيه زي الجماد؟ إحنا عاوزين نوصل لده على فكرة ها. يعني أنت شايف البني آدم ده مهما كانت سطوته وجبروته ومركزه زيه زي العمود ده كده. ما هو إيه يا جماعة صفات البني آدم التي جاءت في النصوص الشرعية؟ أنه لا يملك لنفسه ضرا ولا نفعا، ولا موتا ولا حياة ولا نشورا. زيه زي العمود كده بالضبط، ده لا يملك لنفسه فضلاً أنه يملك لغيره.

وعندنا مثل في الصعيد جميل قوي، الصعايدة برده أمثالهم كده أمثال رجالة كده، يقول لك إيه: ما يشيلش الراس من على الرقبة إلا اللي حاططها. يعني تقعد تهدد من هنا لبكرة، ما يشيلش الراس من على الرقبة غير اللي حاططها. اللي حط الراس على الرقبة هو اللي يشيلها، ما حدش تاني هيعرف يشيل راسك من على رقبتك. وعندكم قصة غلام الأخدود، مش كده؟ دولة كاملة، ملك بالجيوش، دولة. وما يعرفوش لا ياخدوا حق ولا باطل، عارفين القصة.

فنئجي بقى مثال تاني عشان يعني نركز في أنك دخلت على الملك تريد شيئاً، نوالاً مالاً، فراح الملك منادي الحاجب، قال له: خد فلان وروح للخازن اللي ماسك الخزنة، قول له يصرف له كذا. فراح الحاجب واخدك وماشي. فطول الطريق وأنت قلبك متعلق متعلق بالحاجب والخازن! فعمال تشكر في الحاجب، وتروح للخازن تبوس أيده ورجله: وأنا متشكر لكم جداً، وأنت لولاكم ما كناش مش عارف إيه! وذهلت عن الملك. يا ابني، لولا الملك لما تحرك الحاجب ولما فتح الخازن الخزنة ولما أخذت ما رجوت. كل ده بكلمة مين؟ من له الملك؟ ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82]. بيكون. بقى أنه يجريه على أيدي البشر، بيكون بأنه يجريه من غير تدخل البشر، هو هيكون هيكون. له الملك، هو ده التوحيد يا جماعة!

ده التوحيد، التوحيد مش الخناقات اللي أنتم اللي طلاب العلم بيدخلوا فيها، هذا هو هذا أصل التوحيد: له الملك سبحانه وتعالى. فكل ما ترجوه في يده. يبقى رحت الحج ورجعت وأنت صوتك اتنبح وراح -لأن من السنة أنك إيه تعلي صوتك بالتلبيه، مش كده؟- صوتك اتنبح: «إن الحمد والنعمة لك والملك»، طب أنت وغيرك، «لا شريك لك». الملك بتاعك لوحدك سبحانه وتعالى. طب وأنت راجع من الحج ده لسه ما دخلناش البلد، معتمد بقى على مين؟ صاحبك الضابط اللي في البتاع هيخلص لك الجوازات ولا مش عارف مين اللي هيجيب لك الشنط؟ يا ابني له الملك يا ابني.

ولذلك أشار الله عز وجل إلى هذا المعنى: ﴿وَتَوَكَّلْ عَلَى الْحَيِّ الَّذِي لا يَمُوتُ﴾ [الفرقان: 58]، عشان لو نفسك راحت كده، توكلت على غيره ولا اعتمدت على غيره، اعرف أنه هيموت، الغير ده هيموت. ترجع تلاقي صاحبك اللي مات، ويلا بقى روح شوف مين هيسهل لك المواضيع، ولا مين هيجيب لك المش عارف إيه، ولا مين، روح شوف بقى اتنقل! تعب اليوم ده وما نزلش تليفونه وقع في الماية وباظ، مش عارف توصل له. ولذلك: ﴿وَتَوَكَّلْ عَلَى الْحَيِّ﴾ مش بس ﴿الَّذِي لَا يَمُوتُ﴾، لا يَمُوت. هذا فيما ترجو، وأيضاً فيما تخاف.

خايف من غيره ليه؟ خايف من غيره ليه؟ ده أنت في يوم عرفة كررت الذكر ده كام مرة؟ كم مرة؟ «لا إله إلا الله وحده لا شريك له، له الملك». مش الملك له. الملك اختصاص، خص الملك له، لا لغيره، لا لغيره! خايف من غيره ليه؟ أصل منصبه؟ مالوش حاجة، ده له الملك سبحانه وتعالى.

كلمات علمها النبي غلاماً، طفل صغير. المعاني يا جماعة لازم نربي، نربي ولادنا عليها. طفل صغير: «واعلم أن الأمة لو اجتمعت على أن ينفعوك بشيء لن ينفعوك إلا بشيء قد كتبه الله لك، ولو اجتمعت على أن يضروك بشيء لن يضروك إلا بشيء قد كتبه الله عليك، رفعت الأقلام وجفت الصحف». وتخيلوا المشهد ده. واعلم، الكلام ده كان النبي بيقول لمين عليه الصلاة والسلام؟ أن سيدنا ابن عباس غلام صغير، طفل. بس تخيلوا المشهد: «واعلم أن الأمة»، الأمة دي بقى يدخل فيها مين؟ يدخل فيها صاحب السلطان، مش واحد. كل صاحب سلطان من لدن آدم إلى قيام الساعة، مهما كان جبروته وسطوته وبطشه وملكه الممتد. كل الأمة بقى يعني أنتم أنتم متخيلين؟ أنت دلوقت بتبقى خايف من بني آدم؟ لا ما احنا بنقول لك الأمة كلها لو اجتمعت على أنها تضرك مش هتضرك. طب لو ضرتك يبقى ضرتك بشيء هو أصلاً مكتوب عليك. فهذه المعاني العالية من التوحيد تورث قلبك قوة، لا راجي حد ولا خايف من حد، خالص.

سيدنا النبي عليه الصلاة والسلام يفتح عينيه وهو نايم، يلاقي الراجل الكافر واقف على راسه بالسيف: من يمنعك مني؟ قال: الله. الكلمة بسيطة واحنا قاعدين كده، إنما أنت لو بتفتح عينك لقيت واحد واقف إيه مثبتك برشاش والبتاع، فمن يمنعك مني؟ أنت أصلاً ساكت قلبها قبل ما يضرب الطلقة هتكون خلاص. قال: الله! فسقط السيف، فأخذه النبي عليه الصلاة والسلام قال: وأنت من يمنعك مني؟ قال: كن خير آخذ. فعفى عنه صلى الله عليه وسلم.

الشاهد يا جماعة عاوزين بقى هذا القلب اللي هو في وقت المحن وفي وقت الأزمات لا يرجو غيره ولا يخاف سواه سبحانه وتعالى. طب دي تيجي إزاي؟ أن احنا ندرب نفسنا على تلك المعاني. ما هو الذكر يا جماعة، هو سيدنا النبي عليه الصلاة والسلام لما يقول: «أفضل ما قلت أنا والنبيون من قبلي» أنتم فاهمين معنى الجملة؟ يعني أنا عاوزكم كده تستريحوا شوية بخيالكم، النبي عليه الصلاة والسلام كم أوراده وتنوعها شكله إيه؟ وقول مثل ذلك على كل نبي أتى. تنوع الأوراد والأذكار التي تخرج من تلك الأفواه الطاهرة: «أفضل ما قلت أنا والنبيون من قبلي: لا إله إلا الله، وحده لا شريك له، له الملك».

إحنا كله ماسكين في إيه؟ في كلمة من دروس الحج عاوزين نخرج بيها: له الملك. فهذا من دروس الحج، أن الله له الملك، وأنت من جملة ذلك الملك! ولا أنت خارج عن الملك يعني؟ ربنا له الملك بس أنت خارج الملك يعني؟ ما أنت من جملة الملك، مش كده؟ فأيه اللي تعبك في حياتك؟ المعصية الفلانية مش عارف تبطلها؟ أنت من جملة ملكه، فسأله سبحانه وتعالى ما هو له الملك وهو المتصرف في الملك فهو المتصرف فيك سبحانه وتعالى. فقد خرجت من الحج إن كنت حاجا، أو خرجت من ذلك الموسم إن لم تكن حاجا، وقد عرفت أنه سبحانه وتعالى له الملك، وأنت من جملة الملك، وأنه سبحانه وتعالى لا يتعاظمه شيء في ذلك الملك. فأولاً لا يتعاظمه أن المعصية اللي أنت ما أنتش عارف تبطلها دي يخليك تبطلها، مش كده؟

وكذلك لا يتعاظمُ إن علم منك الصدق أن يغفر لك، يعني بطلت خير وبركة ما بطلتش أديَك بتتوب، وأنت من جملة الملك ولا يتعاظمه شيء في ملكه سبحانه وتعالى، فيغفر لك ذنبك ده اللي أنت ما أنتش عارف تبطله.

فهذا أيضاً من المعاني التي تخرج بها من ذلك الموسم، الحقيقة من المعاني برضو الكبيرة في الحج أن الحج كل الحج في مشاعر مختلطة، يعني ماهوش شعور واحد كده، لا تلاقي نفسك طول ما أنت في الحج جواك معنى الرجاء وجواك معنى الخوف الشديد الحقيقة.

أولاً، أنت ترى أن وجودك في هذا المكان باصطفاء واجتباء وبحوله وقوته لا بحولك وقوتك ولا بفلوسك، كم واحد معا بي فلوس ما بيروحش، وكم واحد معهوش فلوس وتجي له ما يبقاش عارف جت له منين، وكل ده بنشوفه هناك؛ فلا بحولك ولا بقوتك ولا بفلوسك ولا بتاشيرتك ولا بمعارفك ولا بأي حاجة من الحاجات دي، فتراك محمولاً إلى هذا البيت مصطفى لتلك الزيارة، ده معنى.

طب المعنى ده يورثك رجاءً ولا خوفاً؟ الاثنين، الاثنين؛ أن ترى ذلك الاجتباء والاصطفاء فتتلمح معنى ابن الجوزي وحق لمن تلمح هذا الإنعام أن يرجو التمام، يعني أنه ما حملنا إلى ذلك المكان ولا أذن لنا بزيارة بيته إلا وقد أراد أن يغفر لنا سبحانه وتعالى.

لكن برضو تبص الناحية الثانية تلاقي نفسك خايف، أنتم عارفين لما يبقى ملك من ملوك الدنيا ويأذن لك في زيارة بيته قصره بقى مش بيته، ففي العادة أنه طالما أذن لك أنك تزوره في قصره أنه يريد إكرامك، مش كده؟ لكن لما دخلت القصر وجدك مشغولاً بغيره، وبعدين كل الرعية اللي برة دي هي عاوزه تخخش القصر، تريد ذلك الفضل والشرف الذي أنت فيه الآن.

فاصطفاك من جملة المصطفين أنك تكون من جملة من يدخل القصر وبقية الرعية واقفة برة ما دخلتش، ثم يلتفت إليك ذلك الملك يلاقيك قاعد في القصر مشغول بغيره، مشغول بقى بالمنامة في المخيم، بالتكييف العطلان، بالجو الحر، بالأكل اللي هتاكله، بالشرب اللي هتشربه، بخمس نجوم ده ولا اقتصادي، بالأتوبيس مش عارف، مشغول بكل حاجة إلا هو.

طب الملك اللي فتح لك قصره ده ودخلك ذلك الدخول هينتهي بايه بقى؟ بطرد وابعاد، ولذلك كان من جملة الحجيج اللي هيتقال لهم: لا لبيك ولا سعديك، فايضا يورث الخوف.

وقل مثل ذلك في كل مشهد من مشاهد الحج، وكل شعيرة من شعائر الحج بانتهائها ينتابك الشعوران؛ شعور الرجاء أن ربنا هيتمملك على خير، وشعور الخوف أن بتقصيرك في تلك الشعيرة ربما حرمت الشعيرة التي تليها.

يعني مش معنى أنك وصلت المطار ولبست إحرامك وتجردت من الثياب أنك هتوصل ليوم التروية، مش معناها كده خالص.

طب الحمد لله وصلنا للتروية وكنا حريصين على السنة فروحنا منى وبيتنا في منى، مش معنى كده أنك بكرة صابح في عرفة، يتقفل عليك الطريق وما تروحش، يتقفل الطريق على الحجاج كلهم، هو ربنا في حاجة للحديد؟

طب بايه؟ بتقصيرك يوم التروية، ولا أنت شايف أنك أما رحت منى في التروية فانت كده مصيب السنة بقى حامل لواء السنة يعني؟ لا والله، حملت إليها حملاً، أنت هنا بفضله ورحمته غيرك لم يصب السنة مش عشان أنت جدع ولا عشان أنت حامل لواء السنة أبدا، أنت حملت إلى هذا ولم يحمل غيرك.

وخلصت، طب حملت إلى هذا تشريفا ولا تكليفا؟ ده أنت مكلف يا ابني، لما كنت هنا لما صبحت في منى وغيرك لم يصب تلك السنة، يبقى من شكر النعمة أن ربنا ينظر إليك في تلك الليلة وفي ذلك اليوم يلاقيك عامل إزاي بقى بتشكر تلك النعمة أنك اصبت السنة ولا قاعد برضه على الموبايل ولا قاعد عمال تناكف في الناس اللي معاك ولا قاعد متفشخر كده أن أنا بتاع السنة وغيري ما جاش في التروية؟

ما دي كلها آفات القلوب اللي احنا بنشوفها، طب لما تكون كده قد تحرم غداً عرفة، إما أنك تحرم عرفة ما تدخلوش ما تعرفش توصل عرفة أو توصل عرفة، لكن تصل عرفة محجوبا عن الله عز وجل، محجوب.

ونرى ذلك، والله والله سمعت بأذني من يسب الدين في أيام منى، والله أنا مش بحكي حاجة حكيت لي، سمعت بأذن من يسب دين الله وهو في منى، فده بايه وأنت مش بعيد عن ده، واللي بيسب دين ربنا علناً ده أنت ممكن يكون جواك من الآفات والبلاوي أشياء كبيرة جداً وأنت ما أنتش محجوب عن ربنا سبحانه وتعالى، فدايماً مطاطئين الرؤوس.

خلصنا عرفة وصلنا مزدلفة وعملنا السنة ونمنا وصحينا لغاية الفجر وبه سبحانه وتعالى، لو ما تلمحناش هذا تتقفل منى ويتقفل الحرم، وهذا حدث، أنا مش بقول حدث مع الفوج اللي أنا فيه.

بعد ما وفقنا للسنة في التروية ووفقنا للسنة في مزدلفة وكان منى والحرم اتقفلوا قدامنا مش عارفين ندخل لا منى ولا الحرم، آية من آيات الله عز وجل، والله العظيم آية من آيات الله عز وجل بدون بقى دخول في تفاصيل ده يحصل، بس أنا أرجع لنفسي ما ليش دعوة، أرجع لنفسي يمكن بذنب أنا، بذنب أمجد، حرم هذا الفوج دخول منى إكمال السنة، لأن خلاص احنا جايين إيه بقى من إيه سنة التروية اللي غيرنا لو عملها بيقعد للساعة اتناشر بالليل، لا احنا قاعدين للشروق.

مزدلفة اللي بيقعد بيقعد لغاية بعد نص الليل، لا ده احنا قاعدين للفجر، إيه أصابني العجب مثلاً أنا بقى بتاع السنة؟ طب مافيش سنة ولا فرض وتتقفل قدامنا منى ويتقفل قدامنا الحرم، لا عارفين ندخل منى ولا حتى عارفين نروح نطوف إفاضة، اتقفل كل حاجة.

وأمتى؟ تفتح منى بعد ما المغرب يأذن، مش تفتح منى، تفتح منى للفوج اللي معايا، غيرنا دخل وخلص ورمى وحلق وراح طاف، والفوج اللي معايا تتقفل منى قدامه وما تتفتحش غير المغرب، مين قفل ومين فتح لغيرنا؟ ملك يتصرف في ملكه كيف شاء، ملك له الملك، يعني ايه له الملك؟ دول يدخلوا ودول ما يدخلوش، دول هيدخلوا ودول مش هيدخلوا، ملك.

طب ما هي منى مفتوحة لغيرك، هقفلها لك مش هخش، طب ما الحرم الناس بتطوف، هقفله عليك مش هتوصل، ملك له الملك سبحانه وتعالى.

فلا أنت راضي غيره ولا أنت خايف من غيره ولا أنت معجب بنفسك وشايف عملك وشايف تطبيقك للسنة وخالص، شفت ده؟ طب اترمي بقى، اترمي برة، أعد لف كده في الأتوبيس، أعد سبع ساعات في الأتوبيس، هذا ما حدث، أعد سبعة سبع ساعات في الأتوبيس، لا هتخش هنا ولا هنا، أيها المعجب بعمل وأنت معجب وراعي لنفسك، أتلقح في الأتوبيس، ولن تفتح لك منى إلا بعد أن يؤذن للمغرب.

كيف لشهد ملكه سبحانه وتعالى في هذه المواقف؟ كيف له الملك سبحانه وتعالى؟ طيب، نقف هنا، أنت ما صدقت ولا إيه؟

قولي هذا وأستغفر الله العظيم لي ولكم، احنا يعني الأسئلة الفقهية بنحاول ننحيها لأن بيبقى أسئلة بتخص فرض.

هل حضرتك تنصح بالزواج المبكر؟ لو السؤال صعب شوية، الزواج المبكر يعني إيه ٣٥ سنة مثلاً؟ هو إيه المبكر دلوقتي يعني هذا؟

يعني في معنيين هنا؛ المعنى الأول انك لو طبعا الشباب كلهم في فتن والفتن زايدة فلو خايف على نفسك الحرام فيجب عليك الزواج، ويجب على الأب أن يزوج ولده إن كانت الحال هذه.

لكن بيجي لنا من ناحية ثانية أن سن النضوج دلوقتي بقى سن متأخر، فتلاقي يعني لو الولد جوزناه إذا بلغ نصوص الفقهاء بتقول كده في الكتب أنه إذا بلغ زوجه والده، فدلوقتي الولد بيبلغ ١٤ سنة ١٣ سنة، طب ده عنده العقل والنفسية والنضوج اللي يفتح بيه بيت؟ وبعدين هيتجوز وكل مقوماته أنه بالغ يجيب لنا عيال وهو لسه عيل!

ما هو زمان يا جماعة يعني احنا كان في قائد جيش يبقى عنده ١٦ سنة، قائد جيش! مش كده قائد جيش، في ناس كبيرة يعني مش جيش من العيال اللي هم بيحاربوا بسيوف الخشب في الحارة، لا قائد جيش رايح يفتح بلدان عنده ١٦ سنة.

النهارده ١٦ سنة ده بيعمل على نفسه، فبرده ده معنى آخر عشان ما نضيعش بنات الناس ونضيع الذرية من بعد كده، فإذا في واحد مربي عياله على أنه راجل وبيتحمل المسؤولية فوصل ١٣ ١٤ سنة هو رجل ويعرف يفتح بيت، وده موجود في ب يمكن مش في القاهره أوي لكن بنلاقي عادي في بعض البلدان المحافظات النائية ممكن الطفل من هو عنده سبع سنين ثمان سنين شغال صبي ميكانيكي واللي شغال مش عارف بيفلح في الأرض واللي شغال وهو عنده لسه ثمان سنين فيوصل ١٣ ١٤ سنة هو بي راجل، ممكن عن ١٣ ١٤ سنة هو اللي بيصرف على بيته اللي في أمه وأخواته البنات، وهو ١٣ ١٤ سنة، ده احنا مش متصورينه قوي في المدينة.

إنما في القرى في بعض النجوع في بعض الأماكن حتى في مصر مش برة مصر بنلاقي ده ممكن يكون موجود، وممكن يطلع نماذج من دول يعرف يفتح بيت.

فهو المسألة الحقيقة يعني إيه شوية ماهياش بالبساطة دي، الزواج المبكر ماهياش بالبساطة دي، ليه؟ لأن مآلاته صعبة، الطلاق كتير جدا في مصر، بيقولوا الإحصائية عدد الطلاق إنه تقريبا كل دقيقتين بيحصل حالة طلاق، فطب الطلاق ده وراه إيه بقى؟ وراه أطفال ووراء امرأة هتبقى مطلقة، نظرة المجتمع ليَّها عاملة إزاي؟ فرصها في الزواج بعد كده عاملة إزاي؟

فهو السؤال صعب، ماهواش سؤال ممكن يبقى الراجل اللي بعت السؤال فاكر إن جوابه سهل، يعني آه أو لا. اللي جمع المواصفات اللي بنقولها دي يتجوز، تقول إيه للآباء اللي بيقولوا ما فيش جواز إلا بعد التخرج لهذا المعنى الذي نقوله؟

الأب اللي بيقول ما فيش جواز غير بعد التخرج لهذا المعنى هو شايف ابنه لسه مش شايل مسؤولية فيضيع بنات الناس ليه؟ فلهذا، ها، فلهذا المعنى بيقول كده، ماشي.

إنما لو الابن شايل مسؤولية ومتجوز ومتجوز هو في بيشتغل وهو في الكلية، ماشي.

واحد خاطب واحدة في علاج طبيعي عندها مشكلة عاوزه تشتغل، مختلفين هو بيقول ما بقاش في اختلاط وهي بتقول أنا عاوز أساعد الناس مش مهم الفلوس. الأصل في المرأة أنها تمكث في البيت، ده الأصل في.

طيب، احنا محتاجين دلوقتي تخصصات فيها نساء، محتاجين ده وإلا هنقع في حرج، يعني مثلاً تخصص العلاج الطبيعي، لو ما فيش نساء، طب واحدة حصل لها حاجه إنزلاق ولا كسر، ولا هتروح تتعالج فين؟ عند راجل بقى يقعد يمسك لي؟ يبقى عاوزين نساء في هذا التخصص.

فإذا كانت نيتها أن هي تسد هذا الثغر وترفع الحرج عن الأمة في هذا تُثاب على ذلك، ويبقى أن هي ما تبقاش محل فتنه بقى، هي نفسها تروح تتعامل مع رجالة، والرجالة بقى سواء دكاترة زمايلها ويقعدوا في مكان واحد ويهزروا قلة أدب، للاسف بيجي لنا ده كتير من في الحته حته الطب وكده، بيجي لنا أن الهزار بيبقى فيه جرأة شديدة وحاجات زي كده، الله أعلم يعني ده صح ولا لا، بس بيجي كتير شكاوى من كده في الطب والتمريض والحته دي.

يبق هي ما تبقاش فتنة، يبق هي قاعدة مع النساء وبكتشف على نساء أو أطفال، وما تضيعش بيتها وزوجها وأولادها تُثاب على ذلك، يبقى ما نمنعهاش من ده لو بهذه الشروط، ماشي.

واحد بيقول: إن حبب إلي صغر الإخراج والأغاني، ما شاء الله إيه صغر الأغاني ده بقى يعني إيه؟ ده صغر إزاي ده بقى مش عارف، يعني عاوز يخرج حاجات كويسة وهادفة، شوف اللي سبقوك بيعملوا إي.

واحد بيقول: أنا بار بأهلي بشهادتهم لكن لحيتي عامله لي مشاكل معاهم، خلاصة الكلام، وأن أبوه يعني شغال في منصب حساس أو حاجة زي كده، يعني ده خلاصة الكلام.

فما حكم استعمال برامج السوفت وير التي لها كراك؟ ده وعمال يحكي لي في اللحيه وأبويا، والله ده سؤال تاني ده ولا؟ أنا ملتحي وأبويا في منصب حساس وأم أمي زعلانية من اللحية، إيه بقى حكم استخدام البرامج اللي فيها كراك؟ موضوع اللحية ده مزعل الآباء كتير، ماشي.

أول حاجه عشان السؤال ده برده بيتسئل كتير، أول حاجه أنك تعرف أن الله عز وجل له الملك ومن جملة ملكه قلب أبيك وقلب أمك، ولا قلب أبوك ده بره ملك ربنا؟ قلب أبوك في ملكه سبحانه وتعالى، فاللي النهارده بيكرهوا قلب أبوك بكرة يحبه، يعني إذا قال سبحانه وتعالى لقلب أبيك أحب السنة وأحب اللحية، وهيحب ولا مش هيحب؟ هيحب.

ومش دايماً بيكون الأب يبغض السنة، يعني مش مش دايماً المعنى ده، هو بيبقى في معنى خوف على الولد من حاجات معينة، ماشي، فيبقى خوف على الولد، وكان لي أنا واحد صديقي ملتحي وكان أبوه ملتحي ولحيته الله يرحمه يعني كانت لحيته كبيرة كده، فكان يقول له: يا ابني لولا عارف أنه حرام كنت قليت أدبي عليك.

قال له يقول له: يا ابني لو أنا عارف أنه حرام كنت قلت لك يحلق لحيتك، بأن الأب نفسه ملتحي. فبتبقى ساعات خوف على الولد عن طريق طب احنا.

نعمل إيه لما نعرف إن ده من جملة ملك الله عز وجل؟ سيبك من أبوك وأمك وخليك مع ربنا. ادعي ربنا وتوب لربنا، ما هو ربنا بيسلط عليك أبوك وأمك ليه؟ عشان إنت عندك مشاكل مع ربنا. فحل مشاكلك مع ربنا سبحانه وتعالى، تلاقي قلب أبيك وقلب أمك لان وكده.

وأحكي لكم قصتي أنا بقا مع اللحية عشان هي تلخص الموضوع ده؛ أنا برده لما التحيّت زيي زي غيري من الشباب برده قابلني مشاكل كبيرة في البيت ووصلت إني طردت من البيت. وامي مرة صحيت من النوم وهي ماسكة دقني، صاحي من ساعتي مفزوع! فيه إيه؟ قلت: هتذبحني ولا بتعملي كده؟ الله يرحمها! قالت لي: والله لو في يوم تصحى تلاقيني حارقة دقنك.

وبعدين كان لينا بقا -دي بركة الشيوخ المربين- كانوا يوجهونا بقا نتعامل إزاي مع المواقف دي، وإنهم محتاجين كثيراً من الدعاء واللين في التعامل مع الأب والأم؛ إنه إذا كان عندهم مخاوف معينة، إنت تبدد تلك المخاوف، يعني فاكرينك هتبقى مثلاً عندك تفكير معين، فلما يلاقيك بقيت مبالغ في البر، يوم الوالد والوالدة تتبدد عندهم المخاوف: هو الواد ده بيفكر إزاي؟ هو الواد ده قاعد مين؟ هو كده! بعد ما كان إيه بيقول لك: الواد كان ابن مش... وبعدين خلاص ربى دقنه بقا راجل محترم وبيعاملنا كويس وبيبر وبيطيع، فيحبوا السنة.

ومحتاجة حال مع ربنا سبحانه وتعالى، ماشي؛ فده إن شاء الله سواء بقا لحية عند الولاد، نقاب عند البنات، المشاكل دي يعني حل المشكلة مش مع الأب والأم أصلاً، دي الخلاصة، حل المشكلة مع ربنا سبحانه وتعالى. إحنا عمالين نقول: ترى الناس كالأشباح مش موجودين كده هوا، أمال إيه؟ هو بيسلطه عليك، ﴿وَلَوْ شَاءَ اللَّهُ لَسَلَّطَهُمْ عَلَيْكُمْ﴾. فإنت بيسلط عليك أبوك، تسلط عليك أمك، وتمر الأيام والسنين، وبعدين جه وقت الجيش فكنت مضطر أحلق اللحية عشان أروح الجيش، فأنا نازل وأنا نازل أحلق أمي بكت!

فشوفوا الحال اتغير إزاي، عيطت إني نازل أحلق لحيتي وكأني في البيت جنازة، إن أنا نازل أحلق وأبويا واقف متازم، وأبويا برده كان منصبه متازم أزمة شديدة يعني مش عاوز ده يحصل. فأنا المشهدين دول قدام عينيا ما بيروحوش؛ مشهد البداية اللي كله مش عاوز يحصل وبيحارب، ومشهد النهاية إن كله متضايق من العكس. فده كله بالله سبحانه وتعالى، فخليكو دايماً مع ربنا سبحانه وتعالى والدنيا هتسلك يعني، ماشي.

واحد برده سؤال متكرر دلوقتي كتير بيجي لنا؛ ناس شباب بتلحد وشباب بتلقي شبهات، نتعامل معاها إزاي؟ ده باع بقى النخول كده؛ تدعي له كتير، وتحيله على ناس بتفهم في الحاجات دي، وإنت ما تقعدش معاه ولا تسمع منه حاجة عشان الشبهة ما تدخلش على قلبك إنت، فيبقى في عليك واجبان؛ الواجب الأول إنك تدعي له كتير، الواجب الثاني إنك تحيله على حد يعرف يفند تلك الشبهات، أما إنت فلا تجلس معه تكلمه في الشبهة.

كل حاجة بيعملها النبي عليه الصلاة والسلام سنة وواجب علينا إننا نعملها، حتى لو كان وحتى وإن لم يأمر بذلك؛ زي طريقة المشي والأكل والجلوس والتحدث. لو بتحبه هتعمل كده عليه الصلاة والسلام، لو بتحبه مش هتلألأ السؤال ده، لو تم حبك له مش هتلألأ السؤال ده. اللي بيحب مغني ولا ممثل بيستنى يشوف الحلقة الجديدة اللي هيحلقها والبلوفر الجديد اللي هيلبسه ومش كده عشان ينزل يقلده؟ فلو تم حبك لسيدنا النبي عليه الصلاة والسلام مش هنسأل الأسئلة اللي شبه كده ولا هنبقى محتاجين جواب عليها.

واحد شغله فيه غش كتير -هو جايب السؤال مطبوع يعني جاهز الظاهر- في الأسلاك الكهربائية والناس عاوزه، فهو مش عارف يعيش في وسط هذا السوق. يظهر إن برده في جزء إن إنت محتاج مكسب أكتر مما يغنيك، يغنيك مش يبقى تبقى غني لا يغنيك يعني يعفك ويخليك ما تمدش إيدك. أظن لو ده هدفك في هذه الحياة فهتلاقي هذا بالحلال، أظن هذا يعني.

فلو ما كانش ده حاصل بقا -يعني المكسب اللي داخل لك بيخليك تمد إيدك وتشحت وتستلف لضروريات الحياة- شوف مجال تاني، إنما لو كانت المشكلة فينا إحنا إن إحنا عاوزين نكبر ونتوسع في الدنيا فنيجي نتوسع نلاقي بنصدم بايه بقى؟ بالغش وبالاحتيال وبالربا وبكده، يبقى المشكلة فينا أصلاً، إحنا مش محتاجين نتوسع في الدنيا، توسعة الدنيا من فضل ربنا علينا ماشي الحال، ما جتش ما نروحش نطلبها بالحرام بقا، ماشي.

لو أنا منتظم في مقراة والصلاة والصوم والإيمان عامة، وبرده شوية بقع في ذنب وأرجع تاني لذنب معين وبعد كده أرجع تاني للإيمان والتوبة وأعود تاني وأكون عاصي، هل كده أنا منافق؟ يبقى كلنا منافقين! مين هنا دي مش حالة؟ كلنا كده، لا مش منافق.

تشهد في ذلك ضعفك وقوته سبحانه وتعالى، وتشهد في ذلك أن العصمة إن تخلفت سقطت، يبقى ما أنتَ اللي بتقعد في المقراة ولا أنتَ اللي بتصوم وتصلي وتقوم، فيبقى معنى كده إنك خلاص عديت يعني؛ لا، أول ما تترفع عنك العصمة ويرفع عنك التوفيق هتسقط، مش كده؟ يبقى هذا الذي تشهده في وقوعك وفي معصيتك.

وتشهد في ذلك أنه سبحانه وتعالى يحب المغفرة، فلذلك تقع إنت وغيرك في العصيان. لو لم تذنبوا -مستنيين بقا سيدنا النبي يقول إيه عليه الصلاة والسلام؟- لو لم تذنبوا ربنا هيحبكم بقا ويطول في أعماركم وكده؟ فقال إيه: «لو لم تذنبوا لذهب الله بكم ولا بقوم آخرين يذنبون فيستغفرون الله فيغفر الله لهم». يا جماعة، ربنا مش خلق جنساً من المخلوقات لا يعصي، صح؟ الملائكة؛ ربنا خلق الملائكة لا تعصي أصلاً، ألم يكن قادراً سبحانه وتعالى أنه يخلق جنس البشر لا يعصي؟ مش كان قادر يعمل كده؟ لكنه ما عملش كده، ربنا سبحانه وتعالى خلق جنس البشر يعصون، ليه؟ لأنه له حكمة في ذلك.

لو لم تذنبوا لذهب الله بكم ولأتَى بقوم آخرين يذنبون، طب ليه يا رب؟ فيستغفرون فيغفر الله لهم. يبقى حكمته أن يظهر أثر اسمه الغفور سبحانه وتعالى؛ ربنا غفور، طب لو كل المخلوقات لا تذنب هيغفر لمين؟ لن يظهر أثر اسمه الغفور، وهو يحب أن يظهر أثر ذلك الاسم، فخلق من جملة المخلوقات جنساً سماه البشر، من طبيعتهم إنهم بيذنبوا، فيستغفرون فيغفر الله لهم.

فيبقى إنت اللي عليك تعمله إيه؟ كلما وقعت في الذنب تبت إلى الله عز وجل، دي حاجة؛ تاني حاجة: كلما كنت في الطاعة تنكسر لربنا وتفتكر ذنبك فتعرف إنك في الطاعة بتوفيقه، وإنك محال بينك وبين الذنب أيضاً بتوفيقه سبحانه وتعالى. إنما أول ما تعجب بنفسك: «وأنا بتاع المقراة وأنا بتاع الصوم وأنا بتاع الصلاة وأنا بتاع القيام»، تقوم تاخد على دماغك عشان تفوق، إنك ولا حاجة، إنت ما تسواش حاجة يا ابني، إنت لولا العصمة كان زمانك في وحل الذنب.

سؤال تاني نفس الكلام يعني ماشي، أول مرة يحضر وعاوز يسال سؤال في التوبه وكده، نفس الكلام اللي قلناه. بفكر حضراتكم بموضوع الأخوات عاوزين يتجوزوا؛ الأخوات عايزين نتجوز يا.. آه ده راجل اللي باعت! بفكر موضوع الأخوات عايزين نتجوز يا مولانا، مش عايزين ناخد بنات متبرجة، بحبك يا مولانا، إن شاء الله يكون الراجل اللي بعده، إنت بتهددني؟ مش عايزين ناخد بنات متبرجة، ما تروح تاخد بنات.. يعني طب إنت بتفكر حضرتك بموضوع الأخوات، أنا أعمل إيه بقا؟ أنا مش فاهم يعني إنت بتفكر ح.. أعمل إيه موضوع الأخوات؟ نعمل مبادرة للجواز يعني في حد يستاهل يتجوز هنا؟ ده إيه؟ طب هنشوف هنعمل إيه في حاجة كده في السكة ممكن إن شاء الله نشوف، حاضر.

فات إيه خمس دقاق على الأذان ولا.. نصيحه لواحد لسه بادئ وعايز يتربى: حافظ على الدروس، واسمع ربع المهلكات؛ ابتدي بربع المهلكات من مختصر منهاج القاصدين، هتلاقيه موجود على قناة التليجرام وقريب هنبتدي ننزله فيديو إن شاء الله، ابتدي بيه، ماشي.

السؤال متكرر كتير اللي هو ماشي في الععبادات وعمال يقع في الذنوب، يعني جاوبنا عليه جواب يعني نرجو إن هو يكون إيه ما هواش مخل.

إزاي تدخل في.. لما تدخل في غفلة وفتور عن العبادة تحاول تتعالج منه وترجع بسرعة؟ اسمع عوامل الثبات بعد رمضان، درس اسمه عوامل الثبات بعد رمضان، مهم جداً جداً في تحرير معنى الثبات الأول، ده نص الدرس تقريباً، وبعدين النص التاني في إزاي نثبت، الدرس ده هنا.

واحد بعت لي شعر ليا يعني هقرا بقا بعد ما أخلص، جزاكم الله خيراً يعني. كلمة للشباب؛ الشباب اللي على وشك التخرج من الجامعة تطمنهم أن هذه المرحلة يسيرة من ناحية الزواج أكذب يعني، والعثور على الزوجه المناسبة ومن ناحية القدرة المادية على ذلك، أطمنكم أنه من أراد أنه يتزوج يريد بذلك أن يحصن نفسه وأن يقيم بيتاً على شرع الله عز وجل، فحق على الله أن يعين ذلك، ودي كفاية أن أطمنكم بها، فثلاثة حق على الله أن يعينهم، فكان واحد من الثلاثة دول اللي عاوز يتجوز عشان يعف نفسه فده حق على الله أن يعينه.

فإذا كان عون الله معك يسر أمرك إلا أن تصعبه إنت على نفسك. إحنا عندنا المشكلة دلوقتي إن إحنا اللي بنصعب الجواز على أنفسنا، سواء الشباب أو البنات أو الأولياء، فدي خلاص إنت بايدك اللي بتصعب الجواز على نفسك، إنما الجواز الزواج ميسر بتيسير الله عز وجل وباعانة الله عز وجل، ماشي؟

فدي أول حاجة، تاني حاجة: من الأساليب اللي تساعدك انك تتعفف؛ يبقى ما تجيش تبقى إنت مشاهد للإباحية ومدمن عادة سرية من اللي بيفجر عياذاً بالله ومقضيها زنا وقرف، وبعدين تقول بقا إيه أنا ليه ما بتجوزش؟ ربنا قال إيه في القرآن؟ ﴿وَلْيَسْتَعْفِفِ الَّذِينَ لَا يَجِدُونَ نِكَاحًا حَتَّىٰ يُغْنِيَهُمُ اللَّهُ مِن فَضْلِهِ﴾ [النور: 33]. وقلنا لكم في سورة النور لما تدبرنا سورة النور قلنا لكم: حتى دي هي غائية ولا تعليلية؟ سيبكم من الكلام ده من أقوال العلماء أنها تعليلية؛ يعني إيه؟ أما أجي أقول لك إيه أقول لك مثلاً: اعمل الواجب حتى أكرمك، يعني اعمل الواجب اللي عليك اللي أنا اديته لك عشان أكرمك، فاهمين؟ ده هنا حتى دي إيه؟ تعليلية.

يلا نقرا الآية تاني: ﴿وَلْيَسْتَعْفِفِ الَّذِينَ لَا يَجِدُونَ نِكَاحًا﴾ عشان ربنا يكرمك من فضله، فهمتوا؟ ﴿حَتَّىٰ يُغْنِيَهُمُ اللَّهُ مِن فَضْلِهِ﴾. فلو عاوز ربنا يغنيك من فضله: استعفف، اقفل بقا كل المواقع الإباحية دي، بطل عادة سرية، بطل ما هو أكبر من ذلك إن كنت تفعله، ربنا سبحانه وتعالى يغنيك.

ماشي، فات قد إيه على الأذان كده؟ كم؟ 24. عايز أتجوز، بس كده. لخص الوز يا حبيبي ولا يهمك لو بتستاذني ما عنديش مشكلة ما عنديش مانع.

الإسبال اتكلمنا عليه قبل كده، أسئلة كتير جاية على الذنب وبذنب وأرجع وحاجات دي خلاص خلصناها. حاولوا اللي بيبعت أسئلة يراعي أن في حد هيقرا السؤال، أنا ما أعرفش إنتوا ابعتين السؤال وفاهمين ده؟ يعني اللي باعت وخدته نكش فراخ أنا.. دي حاجة، تاني حاجة اللي باعت كاتب بالحبر السري يعني أنا هقعد بقى أمقق عيني؟ بس يعني أنا مش عاوز أفوّت ولا سؤال الحقيقة، بس كله عاوز يتجوز، بكره تندموا بعدين تندموا ما تجوزتوش بدري يعني ما كل عايز يجوز ما تجوزتوش.

طيب، ما نصيحتك لي زواجي بعدها بشهر؟ بعد الأولى يعني ولا إيه؟ بعدها دي ولا بعد النصيحة؟ بعد النصيحة يعني لو أنا ما نصحتش النهارده.. يعني إنت محدد جوازك بعد النصيحة في شهر، فكرني بقا كمان سنتين كده ولا حاجة أنصحك.

أذهب إلى الذنب بنفسي وأهيئ له الأمر وأجد في نفسي كسلاً وغير ذلك، أجد في قلبي كرهاً لأبي ولا إيه مش عارف؟ لأبي والنقطة تحت ولا إيه؟ واحد يعني بيحب يقعد لوحده، مش حابب أبوه، مش حابب أسرته، مش بحب الزحمة، ما بحبش الناس؛ يعني ممكن يبقى في اكتئاب مثلاً والله أعلم، شوف كده طبيب نفسي، لو في اكتئاب حاول تشوف إذا كان ليه علاج ولا لا، وإذا كانت وحشة المعصية بقا هي اللي عامله فيك كده فتوب لربنا واسأله أنه يعفو عنك. اللي عاوز يتجوز وخط وحش ده يروح يتعلم الأول يكتب وبعدين يجي يتجوز، ده خط واحد اتجوز!

الشباب اللي بتعمل حفلات تخرج وحفلات مش عارف إيه فانداي؛ هو ده شكر نعمة ربنا عليكم؟ يعني ربنا وفقكم وأمد في أعماركم لغاية ما خلصتوا الكلية، فكان شكر النعمة أن تتشافوا في الأماكن دي وفي المواقف دي؟ عيب، عيب تتعاملوا كده مع ربنا. والشباب المتدين في الجامعات يبوظوا اليوم ده؛ زي يوم الحفلة بتاعتنا في هندسة رحت عامل رحلة للإسماعيلية، يوم كامل بقا لعب كورة وأكل وغداء وعشاء وبوظنا الحفلة بتاعتنا، جمعنا بين أتوبيسين ثلاثة أتوبيسات ثلاثة حاجة زي كده في دفعتنا بس خليكو أذكياء كده، فما حدش راح الحفلة، خلاص.

آخر سؤالين؛ ماشي، الأسئلة الخاصة مش هقراها يعني. طيب جاي لكم بقا رسالة أخيرة مسك الختام من عند الستات: رسالة من مسجد النساء للرجال: التزموا واتقوا الله فينا وإحنا هنتجوزكم.

قولي هذا واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.