دخولتسجيل الدخول

سؤال المعنى! | تدبر صدر سورة الإنسان

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم، إنك حميد مجيد. أما بعد:

الحقيقة، الصور والآيات التي تتكرر في اليوم والليلة أو على مدار الأسبوع لابد أن تحظى باهتمام زائد؛ لأن ثم معنى في كل سورة أو كل آية ندب الشرع إلى تكرارها. يعني يا جماعة، الله عز وجل إذا ندب إلى مثلاً قراءة سورة الكهف يوم الجمعة، لمجرد تحصيل الثواب، علشان كل حرف بحسنه، والحسنه بعشر أمثالها، وما لا أقول ألم إلى آخر الحديث، ولا في معاني في سورة الكهف لابد من إحرازها ولابد من فهمها جيدا، ولذلك كانت سورة الكهف.

قل مثل ذلك في كل آية أو عدة آيات أو سورة أو عدة سور ندب الشرع إلى تكرارها، سواء في اليوم والليلة أو في الأسبوع. من هذه الصور التي ندب الشرع إلى أن تتكرر، سورة الإنسان. سورة الإنسان بنقراها امتى؟ فجر الجمعة، مش كده؟ في الركعة الثانية يقرا الإمام سورة الإنسان، تتكرر كل جمعة تسمع سورة إنسان.

طبعا احنا كنا تدبرنا سورة الكهف كده، وسنعيد إن شاء الله هذا التدبر مرة أخرى كاملة. احنا خلصنا سورة الكهف كاملة، يمكن ما عدا جزء صغير جدا منها، يعني في حوالي خمس أو ست محاضرات، وهتعاد تاني قريب إن شاء الله بتوسع، يعني إن شاء الله.

إنما سورة الإنسان، سورة الحقيقة عجيبة جدا جدا؛ ليه؟ لأن مطلع سورة الإنسان يجيب عن سؤال، وإن شئت فقل عدة أسئله مهمة. وهذه الأسئله تضل... يعني عدم... مش عاوز بقى حركات حواليا خالص، لا حركة ولا صوت ولا... يعني كله بقى ايه عشان نركز في الدرس. نتكلم عن إيه بقى؟ مطلع سورة الإنسان يجيب عن أسئله مهمة جدا؛ عندنا حاجة يسموها سؤال المعنى، سؤال المعنى الذي هو: ما معنى الحياة؟ وسؤال المعنى ده ماهوش مختص بالمسلمين، لا، هذا السؤال يتكلم عنه الفلاسفة، ويتكلم عنه حتى اللاديني يتكلم عن سؤال المعنى. جميع الأديان، سواء أديان سماوية أو أديان أرضية وضعها البشر، كل حد يهمه إجابة السؤال ده: ما معنى الحياة؟ ده بيسموه سؤال المعنى.

وهذا السؤال يتفرع عنه ثلاث أسئله، بعضهم يسموها يعني تجوزا أسئله المعنى، بعضهم يسموها كده، إنما في الأصل هو سؤال المعنى، سؤال واحد: ما معنى الحياة؟ يتفرع منه ثلاث أسئله كنا أشرنا إليهم قبل كده، اللي هم... حد يعرف؟ ها، حد يعرف أسئله المعنى؟ من أين وإلى أين ولماذا؟ دي أسئله المعنى. احنا جايين منين، ورايحين فين، وبنعمل إيه هنا؟ من أين وإلى أين ولماذا؟ الأسئله الثلاثة دي حيرت كثيرا من البشر. بعضهم خرج من الدين إلى اللادين بسبب هذه الأسئله أصلا.

إجابات هذه الأسئله واضحة جدا في القرآن، لكن العجيب أن سورة الإنسان تجاوب عن الأسئله الثلاثة في أول كم آية: ﴿هَلْ أَتَىٰ عَلَى الْإِنسَانِ حِينٌ مِّنَ الدَّهْرِ لَمْ يَكُن شَيْئًا مَّذْكُورًا * إِنَّا خَلَقْنَا الْإِنسَانَ مِنْ نُطْفَةٍ﴾ [الإنسان: 1-2]، ها، ده من أين، احنا جايين منين؟ ممكن نفسر الآيات، أو خلينا واحنا ماشيين: هل أتى على الإنسان حين من الدهر لم يكن شيئا مذكورا؟ إما يكون آدم عليه السلام، المقصود به آدم، أنه لما خلقه الله عز وجل تركه 40 سنة لم ينفخ فيه الروح. هنا يا جماعة، ﴿هَلْ أَتَىٰ عَلَى الْإِنسَانِ حِينٌ مِّنَ الدَّهْرِ لَمْ يَكُن شَيْئًا مَّذْكُورًا﴾، يعني كان شيئا، لكنه لم يكن مذكورا. حد فاهم حاجة؟ يعني قد أتى على الإنسان... هل هنا بمعنى قد، قد أتى على الإنسان حين من الدهر كان شيئا غير مذكور، لم يكن شيئا مذكورا، مش لم يكن شيئا يعني ما كانش حاجة، لا هو كان حاجة، لكنه ما كانش مذكور، لم يكن شيئا مذكورا. نقول إيه: هذا شيء مذكور، وهذا شيء غير مذكور. يبقى هو شيء ولا مش شيء؟ شيء لم يكن شيئا مذكورا.

امتى؟ قيل المعنى آدم، أن ربنا خلقه، سواه من طين وإلى آخره ولم ينفخ فيه الروح، وتركه 40 سنة، فكان شيئا غير مذكور. لم يصر آدم آدم إلا بعد أن إيه؟ نفخت فيه الروح، فصار أب البشر، وإلى آخره بقى إيه؟ أو يكون المعنى: قد أتى على الإنسان حين من الدهر لم يكن شيئا مذكورا، يعني وهو في الرحم. كنت شيئا غير مذكور، يعني كل واحد فينا لما كان في وقت من الأوقات نطفة في رحم أمه، أنت مين؟ ما حدش... غير مذكور، مش كده؟ وربما وما غير، حتى أمك نفسها لا تشعر بوجودك أصلا في رحمها، فكنت شيئا غير مذكور. ﴿إِنَّا خَلَقْنَا الْإِنسَانَ مِنْ نُّطْفَةٍ﴾.

يبقى من أين؟ خلقك الله عز وجل. هنا بتحل إشكال، أو بتجيب على هذا السؤال: من أين؟ من عند الله عز وجل خلقت. وهذه الآية مش بس بتقول لك أنت منين، لا، دي تثبت وجود الخالق جل وعلا وتثبت مسألة الخلق. لكن احنا النهارده الدرس مش جايين نتكلم في ده خالص، مش جايين نرد على ملحدة ولا... وبعدين؟

طيب، جينا ليه؟ ﴿إِنَّا خَلَقْنَا الْإِنسَانَ مِنْ نُّطْفَةٍ أَمْشَاجٍ نَّبْتَلِيهِ فَجَعَلْنَاهُ سَمِيعًا بَصِيرًا﴾. في تقديم وتأخير في الآية: ﴿فَجَعَلْنَاهُ سَمِيعًا بَصِيرًا نَّبْتَلِيهِ﴾، يعني أنا خلقنا الإنسان من نطفة أمشاج، فجعلناه سميعا بصيرا، ده كله من أين. وبعدين: نبتليه، يعني لماذا نحن في هذه الدنيا؟ لماذا نحن هنا؟ سؤال سهل أهو، مش كده؟ نبتليه.

يبقى ما معنى الحياة؟ سؤال المعنى: ما معنى حياة؟ الحياة ابتلاء. وهذه الدنيا لم توجد إلا لهذا... الأول خلونا هنرجع... ده سؤال النهارده، ده درس النهارده، اللي هو لماذا. يبقى ﴿إِنَّا خَلَقْنَا الْإِنسَانَ مِنْ نُّطْفَةٍ أَمْشَاجٍ نَّبْتَلِيهِ فَجَعَلْنَاهُ سَمِيعًا بَصِيرًا * إِنَّا هَدَيْنَاهُ السَّبِيلَ إِمَّا شَاكِرًا وَإِمَّا كَفُورًا﴾ [الإنسان: 2-3]. ده كله في لماذا. وبعدين إلى أين بقى؟ ﴿إِنَّا أَعْتَدْنَا لِلْكَافِرِينَ سَلَاسِلَ وَأَغْلَالًا وَسَعِيرًا * إِنَّ الْأَبْرَارَ يَشْرَبُونَ مِنْ كَأْسٍ كَانَ مِزَاجُهَا كَافُورًا﴾ [الإنسان: 4-5]. فمطلع سورة الإنسان أصلا بتجاوب على أسئلة المعنى: من أين، إلى أين، ولماذا.

العجيبة يا جماعة أن سورة الإنسان تقرا في فجر الجمعة، والثلاث أسئلة دول أو جوابات تلك الأسئلة مختصة بيوم الجمعة. يعني احنا هنا يا جماعة الإسلام مش بس أجابك جوابا إجماليا في الأسئلة دي، اللي هي ممكن الناس بعيدا عن الدين، بعيدا عن الوحي، تضل طول عمرها متاحة، حيرة، مش عارفة تجاوب على سؤال واحد. يا جماعة، الأسئلة دي صعبة،ها، الأسئلة اللي احنا بنجتازها بسهولة كده لأن لأن عندنا عندنا وحي وعندنا دين، الأسئلة دي مش سهلة، يعني لو تركت لعقلك هتتجنن، وفي ناس انتحرت.

فأجابها الله عز وجل ثلاث أربع آيات بتقراهم كل يوم جمعة. إيش معنى الجمعة؟ اصل هو يوم الجمعة مختص بهذه الأمور. تعالى: من أين؟ متى خلق الله آدم؟ يوم الجمعة. وإلى أين؟ متى يكون يوم القيامة؟ يوم الجمعة، هكذا أخبر النبي عليه الصلاة والسلام. ولماذا؟ في الآية الأخرى. احنا عندنا دلوقتي فلسفتين، أو أو عندنا حاجتين يا جماعة: ما معنى الحياة؟ وما معنى حياتك؟ أو ما المعنى المختص بك في الحياة؟

ما معنى الحياة؟ خلقها الله عز وجل ابتلاء، وده هنرجع له تاني. وأنت بقى معنى حياتك إيه؟ ﴿وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ﴾ [الذاريات: 56]. كل ده هنرجع له تاني، بس عاوزين نفهم إيش معنى الجمعة. فتلاقي يوم الجمعة هو يوم العبادة. يوم الجمعة... يبقى تاني: من أين؟ يوم الجمعة. إلى أين؟ يوم الجمعة. لماذا؟ يوم الجمعة. نحتفي بمسالة ﴿إِلَّا لِيَعْبُدُونِ﴾ دي، يوم الجمعة هو يوم العبادة.

بداية، احنا مش عاوزين نتكلم في العبادة اللي يوم الجمعة بيساوي فيها بقية الأيام، يعني مش هقول لك إيه: بتصلي الفجر، لا خالص، أنت كل يوم بتصلي الفجر، إنما هتلاقي يوم الجمعة عجيب شوية؛ هتلاقي أولا في خطبة، والخطبة دي مش موجودة في بقية الأيام. تاني حاجة، وده معنى عجيب، هتلاقي صلاة نهارية جهرية، وده غريب في الشرع، غريب! يعني عندنا في الشرع الصلوات النهارية سرية والصلوات الليلية جهرية؛ مغرب وعشاء وفجر دول صلوات جهرية، الشمس طلعت الصلوات سرية؛ ظهر وعصر. يوم الجمعة مش كده، يوم الجمعة صلاة النهار جهرية، كأن في معنى أنك هتقف تسمع القرآن من الإمام، دي عبادة زائدة يوم الجمعة.

وبعدين ده كله احنا بنتكلم في اختصاص يوم الجمعة. يوم الجمعة احنا لو اديته حقه، هتلاقي اليوم، اليوم ده اللي هو من الفجر لغاية المغرب، أنت تقريبا مش مشغول بحاجة غير بربنا، عبادة صرف. فالفجر صليته، هتفاجأ أن في حديث يندبك أنك تبكر إلى المسجد في الساعة الأولى؛ بعض العلماء قال هم سبع ساعات، أقسمهم النبي عليه الصلاه والسلام، راح في الساعات الأولى فكانما قرب كذا كذا، سبع إيه؟ ساعات. قالوا تقسم من الفجر للجمعة، يعني أنت ممكن تبكر إلى المسجد امتى؟ الفجر.

فلو واحد أعطى الجمعة حقه، الراجل ده هيصلي الفجر في المسجد اللي هصلي فيه الجمعة، ليكون مبكرا، ليكون أتى في الساعات الأولى، ويفضل قاعد لصلاه الجمعة. يبقى في عبادة تانية ظهرت لنا، وهي الاعتكاف وانتظار الصلاة. وبعدين... بعدين خلصت الجمعة، أنت من الفجر للجمعة أنت قاعد في الجامع أهو، هنرجع نقول لك بعد العصر هترجع تقعد في الجامع تاني لامتى؟ للمغرب. ليه؟ اصل دي ساعة إجابة. احنا كنا بنتكلم في لسه في في الاعتكاف في لزوم المسجد، خش بقى في تفاصيل هذا اللزوم، فتلاقي هنقول لك لا، يوم الجمعة هتقرا فيه سورة الكهف، يوم الجمعة هتكثر فيه من الصلاة على النبي عليه الصلاه والسلام، وتكثر دي مالهاش حد، مالهاش حد يعني هتجيب 30000 صلاة، هات 50000 صلاة، هات تكثر فيه من الصلاة على النبي عليه الصلاه والسلام. وبعدين يوم الجمعة هتكثر فيه من الدعاء، دعاء غير... يعني غير معتاد بقية الأسبوع، ليه؟ اصل في ساعة إجابة. طب هي امتى؟ ما نعرفش والله، العلماء يختلفوا فيها وربنا أخفاها. أرجى الأقوال أن هي اللي قبل المغرب، الوقت اللي قبل المغرب.

لكن ده أرجى الأقوال، لكن في أقوال تانية؟ آه، وبعض أهل العلم ذهب أنها مخفية في اليوم كله، فأقعد بقى إيه تحرى الدعاء في كل يوم الجمعة. ودايما يا جماعة، الحاجة المخفية بيبقى في حكمة في الشرع أن ربنا سبحانه وتعالى... ﴿مَّا يَفْعَلُ اللَّهُ بِعَذَابِكُمْ﴾ [النساء: 147]، يعني ربنا لا يريد أنه يعذبك أو ييرهقك، لا، فكون الرب سبحانه وتعالى يخفي شيئا، أن ده معناه إيه؟ أنه يريد منك مزيد إيه؟ مزيد عمل، مزيد عبادة، زي ما أخفى كده إيه؟ ليلة القدر، مش كده؟ ليه أخفيت ليلة القدر وليه كانت متنقلة في قول أكثر أهل العلم؟ تتنقل في العشر. خلي بالكم، ده في أقوال تانية كتير، ده يعني ليلة القدر امتى؟ تقريبا ابن حجر في الفتح 40 قول أو 41 قول. لكن خلينا في القول الأشهر اللي الناس كلها عارفاه، أنها بتنتقل في الايه؟ في العشر الأواخر.

طب ليه؟ علشان يبقى في منك مزيد عمل في هذه الليالي المباركة. قل مثل ذلك في يوم الجمعة؛ ليه ربنا يخفي ساعة الإجابة؟ مش عشان المتدين الحريص على الآخرة وسلوك طريق الله عز وجل هتلاقيه بيعمل إيه؟ بيتحرى الشوية اللي قبل المغرب، وده طيب، شيء جميل. لكن هو برده لم يلتفت لحكمة الإخفاء، ما كان ممكن يبقى في نص صريح في أن هي هذه الساعة وما فيش نصوص تانية تعارض هذه المساله، والعلماء يجمعوا وتبقى الدنيا زي الفل. ما جتش كده ليه؟ علشان أهل الديana... جوه جوه المتدينين نفسهم يبقى في منازل ومراتب. مش الناس اللي مكبرة دماغها، بتكلم عن الناس المتدينة، فتلاقي جواها مراتب؛ فتلاقي واحد حريص جدا أنه يكون قاعد في المسجد قبل المغرب، جميل. واحد تاني يقول لك لا، أنا هبقى مركز جدا أن من ساعة ما الإمام يطلع على المنبر إلى أن ينزل، في أي دعاء أؤمن وبقلب وكذا وكذا عشان دي ساعة الإجابة. واحد هيقول لك لا، بعض العلماء قال هي بتنتقل في اليوم كله، أنا الجمعة كله مش هيقدر يفضل قاعد طبعا رافع إيديه، إنما كل شوية يجلس وإيه؟ ويدعي، لعلها تكون الساعة دي.

الشاهد يا جماعة، مش عايزين نسيب في الحتة دي: يوم الجمعة هو يوم العبادة، يوم الجمعة يوم العبادة. وكان كده يوم الجمعة مختص بالثلاث أسئله: أسئله المعنى تجوزا، لو سميناها أسئله المعنى. سؤال المعنى هو ما معنى الحياة، ماشي؟ فتلاقيه يوم الجمعة بقى هو من أين وإلى أين ولماذا. نحتفي يوم الجمعة بايه؟ بكثره العبادة لله عز وجل، زي ما قلنا لكم.

السؤال المعنى في سؤالين: الأجانب يقولوا إيه؟ What the meaning of life، يعني ما معنى الحياة؟ وبعدين: What the meaning in life، إيه معنى وجودك في الحياة؟ ماشي، وده انتقال يعني ليه برده إيه بعد فلسفي شوية عندهم، بس احنا مش عاوزين ندخل حتة بس. السؤالين أجاب عنهم القرآن.

نرجع بقى تاني: لماذا نحن؟ هو ده درس النهارده، لماذا نحن هنا؟ بنعمل إيه؟ فقال الله عز وجل: ﴿إِنَّا خَلَقْنَا الْإِنسَانَ مِنْ نُّطْفَةٍ أَمْشَاجٍ نَّبْتَلِيهِ فَجَعَلْنَاهُ سَمِيعًا بَصِيرًا * إِنَّا هَدَيْنَاهُ السَّبِيلَ إِمَّا شَاكِرًا وَإِمَّا كَفُورًا﴾ [الإنسان: 2-3]. يبقى نبتليه، يا حبيب قلبي، هذه الدنيا دار بلاء، وايه أضح من دي؟ والعجيب أنها في سورة من السور المتكررة: سورة الملك.

سورة الملك بتكررها كل أية، ده كل ليلة بتقرأ سورة الملك، بدايتها إيه؟ ﴿الَّذِي خَلَقَ الْمَوْتَ وَالْحَيَاةَ لِيَبْلُوَكُمْ﴾ [الملك: 2]. الحياة خلقت لتبتلى، ده معنى الحياة. طب يعني إيه أبتلى؟ سيدنا النبي عليه الصلاة والسلام أشار إلى معنى من معاني الابتلاء في سنته بقى: أن «الدنيا خضرة حلوة، وإن الله مستخلفكم فيها فناظر كيف تعملون، فناظر كيف تعملون».

ده معنى البلاء الابتلاء بالدنيا، أن الدنيا حلوة، خلقها الله هكذا، خلقها فيها شهوات تحبها. خلي بالك الدنيا حلوة دي، هي حلوة نسبياً يعني أنت شايفها حلوة، إنما في حقيقتها هي لا حلوة ولا حاجة، يعني هي بس أنت عشان إيه حببت إليك. حببت، شايفين اللفظ ده؟ ﴿زُيِّنَ لِلنَّاسِ حُبُّ الشَّهَوَاتِ مِنَ النِّسَاءِ وَالْبَنِينَ﴾ [آل عمران: 14]. فهي زينت لك، حببت لك بس، إنما حقيقة الدنيا أنها ولا حاجة، في الآخرة ولا حاجة فعلا.

فالدنيا دار بلاء: «إن الدنيا حلوة خضرة، وإن الله مستخلفكم فيها فناظر كيف تعملون، فاتقوا الدنيا» اللي هي إيه؟ حلوة خضرة. اللي هي إيه؟ زينت لكم. اللي هي إيه؟ حببت لكم. فاتقوا الدنيا، سهلة ولا صعبة؟ صعبة، ما هي حببت، ما هي زينت، ما هي حلوة خضرة، ومع ذلك يأتيك الأمر: فاتقوا الدنيا، خلي بالك من الدنيا. ده معنى البلاء المجمل في الآية، ففعلناه سميعاً بصيراً نبتليه، فده تفصيل البلاء. ولذلك يا جماعة في الحديث: «حفت النار بالشهوات» اللي هي الدنيا. يبقى حببت وزينت وما الدنيا إلا الشهوات، الفلوس والنساء والعقار والدابة والمنصب والشهرة، شوية شهوات هي دي الدنيا. هذه الشهوات اقتحامها يعني اقتحام النار، «وحفت الجنة بالمكاره».

يبقى ما معنى الحياة؟ ابتلاء. أين ذلك في كتاب الله عز وجل؟ في سورة بتقراها كل أسبوع: ﴿إِنَّا خَلَقْنَا الْإِنسَانَ مِن نُّطْفَةٍ أَمْشَاجٍ نَّبْتَلِيهِ﴾ [الإنسان: 2]. في سورة بتقراها كل ليلة: ﴿الَّذِي خَلَقَ الْمَوْتَ وَالْحَيَاةَ لِيَبْلُوَكُمْ﴾ [الملك: 2]. وما معنى وجودك أنت في الحياة؟ ما معنى وجودك أنت في هذه الحياة؟ أنت بقى موجود ليه؟ برضه ربنا ما سابكش كده، ربنا أتى بلفظ صريح: ﴿وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ﴾ [الذاريات: 56] إلا ليعبدون، إلا ليوحدون. فانت لم توجد في هذه الدنيا إلا لمعنى واحد: أن توحد الله عز وجل، أن توحد الله عز وجل عبادةً، وأن توحد الله عز وجل قصدًا وطلبا واستنادا، وأن توحد الله عز وجل إيجادًا، يعني هو الموجد لكل شيء سبحانه وتعالى، هو الخالق لكل شيء، وهو الفاعل لكل شيء. أنت ما خلقت إلا لهذا.

وما وإلا من أقوى أساليب الحصر. يعني إيه يا جماعة عشان نفهم؟ إحنا عاوزين نفهم لغة: لما أجي أقول لك: محمد في المسجد، يبقى محمود في المسجد ولا برة المسجد؟ ما نعرفش، ممكن أحمد يبقى جوه، ممكن ما يبقاش جوه مش كده؟ إنما لما أجي أقول لك: ما في المسجد إلا محمد، أقول لك: محمود فين؟ برة، ليه؟ أصل أنت قلت ما في المسجد إلا محمد. إيه الفرق؟ أسلوب النفي والاستثناء يفيد الحصر، يعني ما فيش في الجامع غير محمد، خلاص واضحة. فالآية جاءت على هذا النسق، ربنا ما قالش: خلقت الانس والجن ليعبد، فساعتها ممكن يبقى أنت مخلوق للعبادة وحاجات تانية جنب العبادة، ربنا ما قالش الآية كده، قال: ﴿وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ﴾ [الذاريات: 56]. فانت مش مخلوق غير للعبادة، غير للتوحيد، أنت مش مخلوق غير لكده أصلا.

وعلى هذا المطلب الإلهي، لأن يا جماعة ببساطة ببساطة كده، هذه الإجابات يسلم بعضها بعضًا. يعني إحنا لو سلمنا خلاص أن في خالق وفي مخلوق فجاوبنا على حته من أين. طيب لماذا؟ ببساطة هتلاقي نفسك تقول لك إيه: ما نرجع بقى نشوف اللي خلقنا خلقنا يعني، لماذا دي بقى مش عندنا دلوقتي، ها مفهومة دي؟ نرجع نشوف الخالق ده، هذا الإله العظيم، أصل ده ممكن يعني إيه يعني حد يفهم منها معنى غير مراد، يعني هذا الخالق خلقنا ليه؟ لما تيجي تلاقي آلة كبيرة كده معمولة، وبعدين أقول لك: عاوز أعرف بقى الآلة دي مصنوعة ليه؟ أو يعني موجودة ليه هنا؟ هروح أكلم الآلة، أقول لها: أنت موجودة هنا ليه؟ هأسأل اللي عملها: هو أنت عملت الآلة دي تعمل إيه؟ يعني إيه الغرض من أنك صنعت تلك الآلة؟ اللي عملها هو اللي هيقول.

طيب، فيبقى نسأل الخالق: يا رب، إحنا بنعمل إيه هنا؟ وإلى أين؟ الاثنين بقى أسأل الخالق برضه: إلى أين؟ وطبيعي جداً في عقول البشر أن إلى أين دي ليها تعلق بلماذا، يعني أنت هنا في حاجة مطلوبة منك، فعقول البشر يستقيم في ذهن كل أحد أن على حسب اللي هتعمله هنا فأكيد مصيرك له تعلق باللي أنت عملته ده. في أذهان كل البشر كده، يعني حتى في الدنيا، حتى في أمور الدنيا، في إدارة شركة ولا إدارة مصنع ولا امتحان: هتذاكر هتنجح وهتنتقل، مش هتذاكر هتسقط وهتفضل مشرف في السنة اللي أنت فيها. فالإالى أين لها تعلق بإيه؟ أنت بتعمل إيه دلوقتي؟ لماذا أنت قاعد في الفصل؟ لماذا أنت في السنة الدراسية دي؟ لماذا أنت في الشركة؟ لأن ما قلك له تعلق بهذا المراد منك، وإلى أي مدى حققت ذلك المراد قد.

فنرجع للخالق نسأله: يا رب، إحنا هنا بنعمل إيه؟ فتجد الجواب. ويا جماعة، خلي بالكم، هذه الأسئله الصعبة جداً، أنا بقى أكرر الأسئلة اللي هي سهلة، إحنا عمالين نعديها بسهولة دي، لأن لمجرد أننا مؤمنين بوحي من عند إله، غيرنا ضايع فيها، ضايع. وهي أسئلة فعلاً بعيدة عن وجود الوحي أولاً، أسئلة مصيرية كبيرة في حياة كل واحد المفروض يعني. ثانياً، هتجاوبها منين؟ هتجاوبها منين دي؟ تجيبها منين؟ ما فيهاش، لو ما فيش وحي فما فيهاش خلاص.

أنتم عارفين يا شباب أنا هقول حاجة مهمة موجودة في الغرب يعني ولها إحصائيات، لكن الخطوره أنها ابتدت تتسرب لينا كمسلمين. كلمة لاديني، كلمة لاديني. المعنى المتبادل لذهني في كلمة لاديني، اللي هو إنسان ملحد، أو يعني غاياته إيه؟ مؤمن بوجود رب لكن إيه؟ ما هواش مؤمن ولا دين. في مصطلح جوه اللاديني ده، والمصطلح ده خطير جداً، اللي هو بيسميه إيه؟ لامبالي. يعني إيه لامبالي؟ يعني تقول له: هو في رب؟ يقول لك: أنا مش في دماغي أدور. طب الدين كذا ولا كذا؟ يقول لك: مش عارفين. زي إيه بالضبط؟ أما أجي أقول لك إيه مثلاً، أقول لك: هو مثلاً القنبلة الذرية أقوى ولا القنبلة النووية مثلاً يعني؟ فتقول لي: ولا في دماغي ولا يعنيني، يعني السؤال ده لا سألته لنفسي ولا عاوز ولا هسأله ولا عاوز أعرف جواب ليه. لامبالي، أنا مش فارق معايا تطلع دي ولا دي، مش فارقة.

فهذا المصطلح موجود في الغرب بقوة، هديكم إحصائية مرعبه. إحصائية اتعملت في أمريكا أن نسبة اللادينيين اثنان وثلاثون في المئة. بالمناسبة، قبل ما أقول لكم الإحصائية، بيقولوا إن ثمانية وأربعين في المئة من دول العالم، يعني تقريبا نص دول العالم، الجماعة الثانية الأكثر ظهوراً وجوداً يعني في هذه الدول هي الجماعة اللادينية. مش عددهم كبير في العالم، لا، يعني لو جيت مثلاً في دولة تلاقي مثلاً مثلاً الجماعة الأولى فيها المسيحية من حيث العدد، يعني الجماعة الثانية فيها اللادينية، بعد المسيحية وبعدين ممكن يجي الإسلام، ممكن يجي البوذية، يجي زي ما يجي بقا، بس المهم طيب، كون بقا أن اللادينية دي هي الجماعة التانية، هي ما وصلتش تبقى الجماعة الأولى بالتالي والله أعلم يعني في أي دولة، إنما هي الجماعة التانية في كم دولة؟ في ثمانية وأربعين في المئة من دول العالم.

ده مش ده الخطير، يعني الغا ما في داهية يعني، إنما الخطير في اللي جاية بقى: أمريكا عملوا عملوا إحصائية هناك، لقوا اثنان وثلاثون في المئة من من العينة، يعني الشريحه اللي تم الإحصائية عليها، دينيين. كم في المئة ملحدين؟ أربعة في المئة. في قرب تسعة وعشرون في المئة، أو ثمانية وعشرون في المئة من أصل اثنان وثلاثون في المئة لامبالين. لامبالين. يعني إيه الدين؟ يقول لك: ولا في دماغي، طب ما مش في دماغي؟ لامبالي. أهو اللامبالاة دي بقى، اللامبالي ده نموذج ابتدى يظهر في دول الإسلام، الشخص اللامبالي. هو مسلم عشان هو اتولد مسلم، فاسمه محمد ومكتوب في البطاقة مسلم، إنما هو لامبالي، مش في دماغه الدين أصلاً، مش في دماغه لا في دماغه أصول الدين ولا ثوابت الدين ولا هجوم على دين ولا دفاع عن دين ولا دينه يصح بكذا ولا ما يصحش، لامبالي. واللامبالاة دركات، يعني مش كلها دركة واحدة، لا يعني ممكن الواحد يبقى مبالي بقدر، لكن هو مثلاً تسعون في المئة لامبالي، عشرة في المئة مبالي، وتزيد وتقل. لامبالي، مش فارق معاه. ليه مش فارق معاه؟ لأن أولوياته في الحياة مختلفة، مختلة. ما هو لما أجي أقول لك دلوقتي: ﴿وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ﴾ [الذاريات: 56]. وأنت خلاص أنا وأنت مقرين أن في خالق، فالخالق بيقول لك: أنت هنا مش لتوحد بس. فإذا أردت أن تعرف أنت فين، أو تقيس أنت فين من سبب وجودك، من معنى حياتك، أهو: مئة في المئة توحيد وعبادة يعني مئة أدیت اللي عليك مئة في المئة، ثمانون في المئة توحيد وعبادة يعني أدیت اللي عليك ثمانون في المئة، عشرة في المئة توحيد وعبادة وأنت سيء مجرى، أنت عملت إيه؟ أنت ساقط، أنت ساقط. ليه؟ ما هو أنت مش هنا عشان تبقي سي أو إل مجرد، أنت هنا لتوحد، لتعبد الله عز وجل.

سألت سؤال قبل كده، سؤال تهكمي، علشان اللي دايما بنسمعه وبيصدر لنا للأسف للأسف كخطاب ديني شرعي، ويقول لك: إن الإنسان وجد لعمارة الأرض. ويصدر هذا الخطاب أن عمارة الأرض اللي احنا شايفينه بيحصل دلوقتي، فانا سألت سؤال تهكمي يعني كنت بقول إيه؟ بقول: يعني أنت يوم القيامة ربنا سبحانه وتعالى هيبعثك ويقف يسالنا، بنيتوا ولاد قد ايه ونطحات سحاب قد ايه، والواجهات الإزاز كانت شكلها إيه، والمداخل الرخام عامله ازاي؟ هي دي أسئلة ربنا يوم القيامة ليه؟ هو دي عمارة الأرض اللي احنا مخلوقين عشانها؟ يعني ده تصورنا عن يوم القيامة؟ دي الأسئلة هتقف تتسألها؟ لأن يقول لك عمارة الأرض، ويجي في دماغ الناس هي دي عمارة خلقنا الله لهذا!

تخيلوا بقا أن الشرع بتتبع نصوصه ينهى عن مثل ذلك! بتتبع نصوص الشرع، الشرع ينهى عن ذلك! أه والله. الزخارف في البنيان والتطاول في البنيان، و وزم الله عز وجل أقواماً إيه إيه تعبثون إيه بداية الآية؟ ﴿أَتَبْنُونَ بِكُلِّ رِيعٍ آيَةً تَعْبَثُونَ * وَتَتَّخِذُونَ مَصَانِعَ لَعَلَّكُمْ تَخْلُدُونَ﴾ [الشعراء: 128-129]. فمجرد هذه الحاجة بمجردها، بمجردها الشرع ما ما يحضش عليها أصلا. بلاش، بيوت الله عز وجل الأصل في المساجد أنها تزخرف أنها تتكسي مش عارف إيه؟ لا يا جماعة، لا. وهذه من البدع التي انتشرت، ونص الفقهاء في كتبهم على كراهة ذلك.

وأنا نفسي أفهم سيدنا عمر كده لما قال للراجل: لا تحمر ولا تصفر. أنتم متخيلين يعني كان الراجل ناوي يعمل إيه يعني؟ ناوي يعمل إيه في الحيطة؟ فسيدنا عمر نهاه قال له: لا تحمر ولا تصفر. بالنسبة لمساجدنا دلوقتي، ولا يبقى ده منهي عنه خلاص! زخرفة المساجد منهى عنها أصلاً. ومسجد سيدنا النبي عليه الصلاة والسلام كان عامل ازاي؟ المسجد كان إيه؟ كان شوية بتاع نخل وفوق جريد وشكرا. تمطر المطرة تعدي فتنزل على أرض المسجد اللي هي أصلاً رمله، فتتحول طين: «أراني أسجد صبيحتها في ماء وطين» اللي هي إيه؟ ليلة القدر. سيدنا النبي هيسجد فين؟ في الماء والطين في المسجد عليه الصلاة والسلام، ماء وطين. ثم كان ما ترون!

العجيب أنك تيجي واحد يقول لك: أما أدخل المسجد الفلاني برتاح نفسياً كده وأحس الصلاة فيها خشوع. إحنا محتاجين نراجع أنفسنا أصلاً في هذه المعاني، يعني كيف أن شيء منهي عنه شرعاً ويبقي ده المعنى اللي أريح للقلب والمعنى، تقول إيه؟ ببقى أخشع في العبادة. يظهر كده أن لا، هو في تلوث بالمعاني الدنيوية، أنا أحب أكون في المكان الفخم، مش أحب أقبل بقلبي على الله سبحانه وتعالى.

بيوت النبي عليه الصلاة والسلام كانت عاملة ازاي؟ كان السقف تناله الأيدي. الحجرات أولاً كانت حجرات أولاً، يعني إحنا إحنا تدبرنا هذا المعنى في سورة الحجرات في بتالي أول درس أو تاني درس: السقف تناله الأيدي، وحجرات يعني أبسط ما تكون. فهي دي عمارة الأرض، ما هو لو دي عمارة الأرض التي أنزل الله الإنسان من أجلها يبقى يبقى سيدنا النبي مقصر، وحاشاه صلى الله عليه وسلم! ليه؟ ما هو ما عملش كده، صح ولا أنا غلطان؟ هو عمل كده ولا سعى كده حتى؟ مع وجود الأسباب في السعي في مثل ذلك، ما عملش ده. يبقى إحنا مفهومنا بقا عن عمارة الأرض وأن هي دي عمارة الأرض وأن لا محتاج يتغير.

عشان كده يا جماعة بقول لكم السؤال ده أولاً أننا نجيب عليه ده سهله الله علينا، يبقى أسقاطاته على واقعنا نحن فين من هذه الإجابات؟ يعني لما نقول: لماذا؟ فعرفت خلاص: ﴿إِلَّا لِيَعْبُدُونِ﴾ [الذاريات: 56] إلا ليوحدون. فانت بقا لو قست حياتك يومك كده، يومك أربعة وعشرون ساعة، هنقيس بقا عشان نشوف أنا فين من ال ما أنا هنا عشان أعبد، عشان أوحد. فعندي أربعة وعشرون ساعة في اليوم: قد إيه بقى عبادة؟ وقد إيه توحيد؟ وقد إيه توكل؟ وقد إيه إنابة؟ وقد إيه إخبات؟ وقد إيه وقد إيه في الأربعة وعشرون ساعة؟ عشان أدل نفسي درجة. حتى على الأعمال الظاهرة، سيبكم بقى من الباطن دلوقتي الذي يعني ايه نعرفه يوم القيامة، حتى على الأعمال الظاهرة.

حسبنا لكم الحسبة قبل كده، قلنا: ثلث يومك نايم، مش بنحسب العمر ده، ما جبناش العمر، بنحسب يوم؛ عشان اليوم ده هو ورقة في صحيفتك يوم القيامة. ما هو انت صحيفتك دي هتلاقي فيها إيه؟ هتلاقي يومك النهاردة وبكرة وبعده؛ فأنت خد اليوم الطبيعي المتكرر كثيراً في حياتك، يعني بلاش اليوم المميز أو اليوم الواقع، خلينا في الحتة اللي هي إيه متكررة كثيراً، اليوم الوسط يعني.

خلينا في اليوم الوسط؛ اللي هو معظم حياتك، هو اليوم ده بيتكرر. فهتلاقي نفسك بتنام متوسط ثمان ساعات؛ اللي هو ثلث اليوم، 24 ساعة على 3، ثمان ساعات نوم. بتروح شغلك أو بتروح مدرستك أو بتروح جامعتك ثمان ساعات كمان، هو أكتر من كده، يعني انت الشغل بس عشان تختم دخول وخروج أو تمضي أو تبصم أو كده، أقل حاجة دول تسع ساعات، خد بقى ساعة قبليها مروح، وساعة بعديها مروح للشغل، وساعة بعديها مجي من الشغل، مشيها ثمان ساعات. الجامعة والمدرسة زي كده، وفي دروس، مشيها ثمان ساعات، ادي كمان للثالث.

احنا دلوقتي بنتكلم واحد إيه بني آدم طبيعي، يعني إيه بني آدم طبيعي؟ يعني ما بيحطش نوايا، يعني وهو بينام هو بينام عشان يصحى الصبح يلحق شغله. طب هو رايح الشغل، هو رايح الشغل عشان عنده طموح في الشغل، يبقى المش عارف إيه؟ اللي هو البني آدم، البني آدم اللي احنا بنسميه طبيعي، هو ده مش طبيعي المفروض، خلي بالكم! ده مش طبيعي، بس احنا لو جبنا البني آدم ده هو ده البني آدم الطبيعي دلوقتي.

أنا ليه بقول كده؟ لأنك لو وضعت نية صالحة، أصل هترجع تقول لي إيه، يعني ما أمش آروح الشغل؟ أقول لك: لا، أنا ما بقولش كده، بس انت ممكن تنام وتثاب في نومك، ممكن تروح الشغل وتثاب في عملك؛ وهو نفس نومك هو هو، نفس عملك. وخص ما يُباح باستواء الفعل والترك على السواء، لكن إذا نوى بأكله القوة لطاعة الله، له ما قد نوى، إنما الأعمال بالنيات، وإنما لكل امرئ ما نوى، فأنت إذا نويت في المباح الخير، وثبت على هذا المباح بالأصل؛ يعني هو في أصله مباح، لكن لما نويت الخير فيه أثبت، صار المباح في حقك عبادة.

إني لأحتسب نومتي كما أحتسب قومتي. يعني إيه؟ يعني وأنا داخل أنام، أنا نايم، ونيتي النية الباعثة للنوم إني عشان أقوم أقيم الليل، ولو أتخرت في النوم أنا دلوقتي هيفوتني قيام الليل فتثاب على النوم. طيب، السؤال يجي بعده: طب ما تنامش خالص، قيم الليل؟ هننجي لها بقى بعد شويه، افتكروها دلوقتي، افتكروها هننجلها بعد شوية إن شاء الله.

فادي كمان ثلث راح، يبقى ثلثين يومك؛ اللي هو ورقة من كتابك يوم القيامة، راحوا. مش بقول لك في معاصي، مش بقول في معاصي، بس راحوا، يعني إيه راحوا؟ يعني لو أنت خلقت للعبادة والتوحيد، ففي ثلثين راحوا من غير عبادة وتوحيد. ماشي، أو من غير عبادة يعني التوحيد معنى في القلب، برضه عاوزين ندخل فيه شوية بس ممكن النهاردة ما نلحقش.

يتبقى ثمان ساعات، الثمان ساعات دول بقى فيهم أكلُك وشربُك، وأسكرولك على الفيسبوك، وضحكك على الريلز والشورتس والإنستغرام والواتساب، وصلاة كده في ال... ما هو هي الصلاة كده؛ يعني أنت الصلاة الخمس فروض بتجيبهم في قد إيه؟ في ال... وورد القرآن اللي بتقراه يوم وتفوته 10 لو قريته، وسنن الرواتب اللي بتصليها يوم وتفوتها 10 لو صليتها، ده كله في إيه في يومك؟ لأن ثلثين رايحين، وده اليوم المتكرر في حياتك؛ اللي هو معظم كتابك يوم القيامة هتلاقيه كده.

فاحنا دلوقتي واخدين بالنا بقى، احنا بنقيس على إيه؟ على تلك الغاية التي خلقت من أجلها، ونَصَّ الله عليها: ﴿وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ﴾ [الذاريات: 56]. الشغل ده يا جماعة، الشغل اللي بلا نية ده، اللي لما تلاقي واحد سنيور الشركة الأو دي بتاع مش عارف إيه، مش عارف الحاجات دي بس ما بيتركعهاش، فتلاقيه هذا النموذج يُصدر على أنه نموذج ناجح، ليه؟ خليكم بقى كده، يعني ده راجل مسؤول، ده راجل جِد، الراجل ما بيهزرش، بيعيش أو يتعب؛ عشان كده وصل. مش دي الألفاظ اللي بنسمعها؟ صح؟

تعرفوا إن القرآن حكم عليه بعكس المصطلحات دي؟ ربنا سمى ده راجل بيلعب! ربنا سمى... مش أنا، ربنا سمى ده راجل بيلعب، بيهرج! فين؟ قال سبحانه وتعالى: ﴿أَفَأَمِنَ أَهْلُ الْقُرَىٰ أَن يَأْتِيَهُم بَأْسُنَا بَيَاتًا وَهُمْ نَائِمُونَ * أَوَأَمِنَ أَهْلُ الْقُرَىٰ أَن يَأْتِيَهُم بَأْسُنَا ضُحًى وَهُمْ يَلْعَبُونَ﴾ [الأعراف: 97-98]. إيه وقت الضحى ده؟ بعد الشروق بربع ساعة، ثلث ساعة، لغاية قبل الظهر، يعني من الساعة 6:30 أو 7 لغاية الساعة 12:30، ده وقت الذروة في إيه؟ في الشغل في الدنيا، مش كده؟ أَوَأَمِنَ أَهْلُ الْقُرَىٰ أَن يَأْتِيَهُم بَأْسُنَا ضُحًى وَهُمْ يَلْعَبُونَ. ربنا سبحانه وتعالى قال: ضحى وهم يلعبون. حبيبي، أنت بتلعب!

خلاص بقى، أسب المدرسة وأسب الكلية وأسب شغل؟ ما قلتلكش كده، أنا ما قلتلكش كده، بس لابد من نيات صالحة؛ عشان ما يبقاش ثلثي عمرك، ثلثي يومك، اللي هو ورقة من كتابك، رايحين كده، وبعدين الثلث الباقي بقى تعال نشوفه كمان عامل إزاي.

إذن، لماذا نحن هنا ليه؟ أولاً: الدنيا معنى الحياة ابتلاء، واضحة جداً في المصحف، واضحة جداً، ومعنى وجودك في الحياة عشان تجتاز هذا الابتلاء. طب يا رب، إزاي أجتاز هذا الابتلاء؟ ﴿إِلَّا لِيَعْبُدُونِ﴾ [الذاريات: 56]. اجتيازك للابتلاء الدنيوي يعني ألا تنشغل بزخارف الدنيا، إن الدنيا حلوة خضرة، وألا تقتحم الشهوات في الدنيا، حُفَّت النار بالشهوات، وأن تجتهد أن تكون من هؤلاء الذين قال الله عز وجل فيهم: ﴿إِلَّا لِيَعْبُدُونِ﴾ [الذاريات: 56]. فالمعنى طيب.

يتبقى أن ربنا سبحانه وتعالى ما هو خالق فينا الشهوات دي، يعني الشهوات دي مالهاش أي لازمة؟ نقول: لا، الشهوة دي لها لازمة، ولذلك خلقها الله عز وجل فيك غير معنى الابتلاء. يعني أنت مبتلى بالشهوات التي خلقت فيك، خلي بالك، بس هل يعني مالهاش لازمة بالكلية غير معنى الابتلاء؟ يعني هي الشهوة دي حاجة وحشة على طول الخط؟ نقول لك: لا، الشهوة مش حاجة وحشة على طول الخط. ولو لم تخلق فيك كالشهوة، كان زمان... ما كانش زمان قاعدين بنتكلم دلوقتي، ليه؟ ما كنتش أنا... لا أنا هبقى موجود ولا أنتم موجودين أصلاً! ما هو لو ما اتخلقتش في البني آدم مثلاً شهوة الجماع، انقطع النسل خلاص، مش كده؟ فما كانش زمان كل اللي في المسجد دول موجودين أصلاً، ولا كان زمان في حياة.

لو انقطعت عنك شهوة الطعام والشراب، هتموت. كل شهوة كده يا جماعة، حتى الغضب! حتى الغضب ليه لازمه؟ آه، ليه لازمه، هو النبي عليه الصلاة والسلام... السيدة عائشة قالت: لم يغضب قط، كده ولا فيك ماله؟ النبي عليه الصلاة والسلام ما كانش يغضب ولا كان يضرب بيده قط إلا أن تنتهك محارم الله. يبقى حتى الغضب، وإلا ما كانش زمان في حاجة اسمها جهاد، ما أنت لو مش... أنت إيه الحافز ليك انك تروح تجاهد وممكن تموت موت وممكن... إلا أن الغير والغضب على دين الله عز وجل، مش هو ده المحرك؟ فكل حاجة ليها معنى.

طب نتعامل معاها إزاي؟ خلاص ما احنا عرفنا دلوقتي إن احنا عشان نعبد ربنا، وإن هو ده... هو ده ابتلائنا، ده ابتلائنا، إن في شهوات حلوة مزينة محببة، وابتلاؤك أنك تعرف تجتاز من تلك الشهوات المزينة المحببة. وده ابتلاء مش سهل. في جاء في بعض الآثار يا جماعة، عشان تعرفوا الابتلاء مش سهل، إنه لما خلق الله عز وجل الجنة أو بلاش نقول يعني الأثر كله، خلينا في الحتة اللي عاوزينها، لما خلق الله النار قال لجبريل: اذهب فانظر إليها. فذهب ورجع وقال: وعزتك وجلالك، لا يسمع بها أحد فيدخلها! يعني أي حد هيسمع أوصاف النار وعاملة إزاي مستحيل يدخلها. فلما حُفَّت بالشهوات، قال الله لجبريل: اذهب فانظر إليها. فذهب ورجع وقال: وعزتك وجلالك، لقد خفت ألا يخرج منها أحد!

ليه الامتحان صعب يا جماعة؟ ولن نجتاز الامتحان إلا بالله عز وجل، وده معنى لا حول ولا قوة إلا بالله، لكن ده درس ثاني مش عايزين ندخل فيه دلوقتي. خلينا: احنا هنا ليه؟ ما معنى الحياة وما معنى وجودك في الحياة؟ طبعا احنا قلنا الفلسفة الغربية انتقلت من ذا مينين أوف لايف (The meaning of life) لذا مينين إن لايف (The meaning in life) أو يعني بقى عدة مصطلحات، هو ده مش عشان اللي أنا بقوله، إن احنا عاوزين نعرف معنى الحياة الكلي وبعدين لا، هم انتقلوا لده عشان معنى آخر بنسميه الفردانية؛ بقى كل واحد مشغول بنفسه، أنا في الآخر أنا عاوز اعمل إليه في الشوية اللي أنا قاعدهم عشان إيه دي مصلحتي، فهو مش شغال في سياق عام، يعني مش... مش في معنى عام مهيمن على هذا الكون، على الدنيا وأنا شغال في السياق ده، حد فاهم؟ لا، أنا ما يعنينيش الحياة مخلوقة ليه ولا لا، أنا يعنيني أنا هنا بعمل إيه عشان هعمله وخلاص. طب يا ابني، أنت كده ماشي عكس طبيعة... الطبيعة التي خلقت من أجلها؟ مش فارقة! ده الغرب.

خلينا احنا بقى في الآية، عندنا في ديننا هندي مثال يوضح لنا بقى معنى الشهوة ومعنى... والمثال ده كنا... كان انتشر قبل كده، بس كان في حاجة خاصة، فخلينا نقوله بقى دلوقتي بشكل عام عشان نفهمه. يعني دلوقتي يا جماعة هنتخيل الآتي: أن عندنا طلاب في الجامعة، وبعدين راحوا الجامعة أول يوم. فالطلاب دول، طالب دخل كان عارف كويس جداً أن هو هدف... الهدف، المعنى من وجوده هنا في الجامعة أنه يبقى في المدرج بيحضر المحاضرات علشان بعد كده يمتحن فينجح أو يعدي بتفوق أو غيره، هننجي له دلوقتي.

فالطالب ده أول ما دخل الجامعة، له فطران ولا شارب الشاي بتاعه على القهوة لو متعود أو أي حاجة، ودخل على المحاضرات من 7 الصبح عشان المحاضرات تخلص 7 بالليل ولا زي ما تخلص، ده أول طالب. طالب تاني دخل الجامعة، سال: هو فين الكافيتيريا اللي هنا؟ قالوا: الكافيتيريا اهي في المكان الفلاني. دخل على الكافيتيريا، هو قال: والله أنا محتاج عشان أقعد من 7 الصبح لـ7 بالليل، أنا مش محتاج غير إيه؟ مثلاً سندوتشين وكوباية القهوة، دول كفاية عليا، مش عاوز أكتر من كده. راح داخل على الكافتيريا شاري الاثنين دول، وراح رايح في... قاعد فين؟ في المدرج من 7 الصبح لـ7 بالليل بالحاجات اللي هتعينه على فهم المحاضرة وانه يكمل في المحاضرة إلى آخر المحاضرة.

واحد تالت دخل طالب الجامعة، قال لك: فين الكافيتيريا؟ قالوا له: هناك اهي. فراح الكافيتيريا، نسي المحاضرة ونسي الجامعة، واتهبل بالكافيتيريا، الحاجات اللي على الرفوف، والحاجات اللي في الثلاجات، والحاجات اللي قاعدة على الكراسي، وبعدين... ونسي خالص هو إيه جاي الجامعة ليه! نسي جاي الجامعة ليه! فبقى كل يوم يروح الجامعة يقعد في الكافيتيريا لغاية ما يجي الامتحان.

الاول... أصحابنا اللي الاثنين دخلوا في الأول دول، الأول... الاولاني ده شوية وهيعحصل له إيه؟ هيتعب وهياقع من طوله، وهيفقر في المحاضرات ومش مركز في المحاضرات. الثاني ده هيكمل المحاضرات للاخر وهو مركز، وهو ليه؟ لأنه فهم أنه هو وجوده في الجامعة للمعنى الفلاني، لكن أنا عشان يستقيم لي المعنى ده هو، لابد من وقود، فانا يا دوبك خدت اللي إيه اللي محتاجه علشان المعنى الذي أنا هنا من أجله.

هو ده خلاصة يا جماعة حياتنا احنا كبشر، احنا عندنا واحد مُفرِط، وده أكثر الناس؛ اللي هو صاحبنا الثالث ده اللي دخل فضل قاعد في الكافيتيريا: يا حبيبي، أنت مش جاي الجامعة تقعد في الكافيتيريا! وحد يسيب ده كله ويروح المحاضرة؟ سيبني في الكافيتيريا! يا حبيبي، في امتحان، يا حبيبي، هتسقط! ولا في دماغه، هو مبهور بالكافيتيريا، مبهور.

وعندنا واحد مُغالٍ، واحد مُغالٍ هو حريص جداً على المعنى الذي وجد من أجله في الجامعة صحيح، لكن هنقول له: يا حبيبي، إن لبدنك عليك حقاً، وده لفظ نبوي! فلا، ما فيش الكلام ده، أنا 24 ساعة بذاكر! هياقع! فإن المنبتَ لا أرضاً قطع ولا ظهراً أبقى! فاهمينها دي؟ عارفين اللي يمشي بجمل أو دبة في الصحراء عشان يجتاز المسافة في سفر، فيفضل يضرب في الدبة، وهي هتبقى محتاجة تريح، محتاجة تريح فيفضل يضرب في الدبة لغاية ما الجمل هيحصل له إيه؟ هياقع منه، هيموت منه، لا منه قطع المسافة، ولا منه أبقى الظهر عشان يقطع عليها المسافة، فإن المنبت لا أرضاً قطع ولا ظهراً أبقى. طب هتوصل إزاي؟ الدبة هنا اللي هي إيه؟ بدنك، جسمك. فإن لبدنك عليك حقاً. ودي مش محتاجين أتكلم فيها؛ لأن ما فيش حد كده خالص، يعني مين اللي إيه منقطع للعباده وقافل على نفسه لغاية ما يقع من... ما فيش! ده كام في المية ده؟ يعني ده ما نلاقيهوش خالص.

وعندنا الوسط بقى؛ اللي هو صاحبنا الثاني ده، اللي هو فهم معنى وجوده في الجامعة، وفهم عشان المعنى ده يتمه على أكمل وجه، لابد من وقود لهذا البدن علشان يتم المعنى الذي هو من أجله في الجامعة، فراح راح الكافيتيريا؛ اللي هي شهوات الدنيا، ياخد منها اللي هيعينه على وظيفته في الجامعة بس.

ده بقى أحاديث عندنا، في درس اسمه (قليلها يكفي) يتسمع عشان تتفهم الحتة دي، بس هقول لكم معنى واحد بس في الشهوات، شهوة الطعام؛ النبي عليه الصلاة والسلام بوضوح: ما ملأ

أقيم صلبه؟ اللي هو إيه؟ اللي هو كفاية عليك اللقمتين اللي هيخلوك تكمل محاضراتك للآخر. دي النصيحه النبوية، كنا دايماً نوقع الناس في الفخ، نقول لهم إيه السنة؟ يقول لك ثلث، لا ده الغا ده اللي هو إيه «فإن كان لا محالة». ده لو يعني مافيش فايدة فيك، آخرك الثلث. إنما النصيحة النبوية إيه؟ روح الكافتيريا خد الساندوتشين، لو الثالث زياده ما تاخدوش. مش الساندوتشين كفاية قعدوك من سبعة لسبعة؟ ما تاخدش غيرهم ليه؟ أي حاجة زياده يعني انشغال في الكافتيريا عن المعنى اللي أنت موجود فيه من أجله في الجامعة. أنت كده قعدت في الكافتيريا وقت زيادة ما كانش مناسب إنك تقعد، حرام؟ مش كل ده. بص من رحمة ربنا بينا ما جعلش دايماً الزيادة حرام، بس هي الجنة درجات. طب الناس هتتفاوت إزاي في الجنة؟ سيبكم دلوقتي مش بنقول بقى الناس اللي هتخش النار حتى، ناس هتخش الجنة هيتفاوتوا في إيه؟ في ده، في فهم معنى الدنيا والتعامل والتعاطي مع هذا الفهم.

فاحنا كده عرفنا الغاية من خلق هذه الدنيا والغاية من وجودك فيها، وأدينا لكم مثال الجامعة اللي يوضح هذا المفهوم. أنت بقى قيس نفسك على الكلام ده. ليه يا شباب، آخر حاجة يعني عشان ما أطولش عليكم، أن بعضنا للأسف بيغيب عنه هذا المفهوم، وتلاقوا حاجات عجيبة جداً. يعني مثلاً تلاقي ينكر على اللي بيروح المحاضرة، ينكر يعني هو اللي قاعد في الكافتيريا ده؟ مش كفاية إنه قاعد في الكافتيريا؟ هو طبعاً احنا قلناهم أدينا مثال بأن واحد، لكن احنا لو دخلنا في فيهم كنموذج أو كنوع يعني هنلاقي أن رقم ثلاثة هو الأكثر، إنه مش واحد، هي القسمة مش واحد واحد خالص، هي القسمة أن مثلاً ده عدد كبير جداً ضخم ده الأكثر أصلاً قاعدين في الكافتيريا، ومن كل كم واحد بيروح واحد المحاضرة، ده في مثال الدنيا يعني، أقصد الدنيا.

العجيب أن تلاقيك اللي قاعدين في الكافتيريا مش بس قاعدين في الكافتيريا، ابتدوا ينكروا على اللي بيروح المحاضرة. مثال: دلوقتي حضرتك في شغلك أو في طالب في ثانوية فبيأخد الدرس، الأذان أذن، فالطالب ده عاوز يقوم عشان يصلي في المسجد، أو اللي في الشغل ده هيقوم عشان يروح يصلي في المسجد، فتلاقي الناس حواليه بينكروا عليه، اللي عمل عبادة وأنت قاعد هنا بتعمل؟ الدرس هيفوت يا حبيبي! أنت في الكافتيريا؟ ما تنساش إنك قاعد في الكافتيريا خلاص. وقل مثل ذلك بقى زي ما قلنا لكم المرة اللي فاتت الأب اللي ابنه عنده امتحان، ولا الأم اللي ابنها عنده امتحان الصبح فما يصح، وهو حتى لو معتاد يصحى لصلاة الفجر، فايه والواد نايم متاخر عشان الامتحان، فيقول لك قلنا لكم إيه حرام، سيبه. نقول لك لا، ده حرام، صحيه! احنا مش جايين هنا عشان نقعد في الكافتيريا، هو صحيان صلاة الفجر هو كده دخل المحاضرة، هو هنا في الدنيا عشان يصلي الفجر في ميعادها.

فأنت دايماً قيس نفسك على هذا: أنا هنا بعمل إيه؟ هو أنا اللي بعمله ده زيادة في العبادة ولا بيقلل عبادتي؟ بيقربني لربنا ولا بيبعدني عن ربنا؟ الموضوع ده محتاج توفيق أولاً ومحتاج علم قوي، لأن في كل يعني مثلاً التفصيلات اللي احنا بنقولها دي ممكن فيها تفصيله في وقت آه، الشرع سامح لك إنك تسيب الصلاة في الوقت ده، ممكن يبقى في حاجة زي كده وهو في مش ممكن يعني بتخيل فيه كده طب أنا أعرف منين بقى إن دلوقتي أسيب الصلاة ولا أسيب الجماعة ولا ما أسيبش الجماعة؟ لازم علم.

مرة وأنا بحضر الماجستير الدراسات العليا في دار علوم، وبعدين يعني احنا بنحضر دراسات عليا في الدراسات الإسلامية. أنا بقول لكم المثال ده عشان تشوفوا يا جماعة بس مقاييسنا فين، فانا تأخرت أول كم أسبوع من المحاضرات كنت بتمرن مش فاكر يعني، المهم ما جيتش وجيت المحاضرات كانت بتبقى متأخرة بعد الجامعة ما تخلص في جامعة القاهرة، فالدكتور كان بيدينا مادة العقيدة، محاضرته وقت صلاة المغرب. فانا داخل، فجبت واحد قبل المحاضرة عشان أعرف نظام الدكتور إيه؟ مش في إن هصلي ولا لا، يعني ده مش معنى مش في دماغي أصلاً. أنا بقول له الدكتور يحب إني في وقت المحاضرة أرفع إيدي عشان أخرج لصلاة المغرب ولا من غير ما أرفع إيدي يعني خلاص؟ عارف قال: لا، ما بنخرجش في محاضرة الدكتور لصلاة المغرب. فانا الأول بسال مين؟ بسال واحد كان معايا في هندسه، فاحنا كنا في هندسة، طبعاً لبش يعني، المحاضرة جوه نخرج. فانا يعني أنا مش في مش في دماغي الرد ده خالص نهائي، يعني ما نخرجش ليه؟ ما نخرجش ده احنا دراسات عليا، دراسات إسلامية! يعني يعني مين هيخرج بقى لصلاة المغرب يعني لو يعني؟

فانا رحت لواحد كان معايا في هندسة أصلاً، وكنا في هندسة كنا بنعمل كده يعني، كنا بنروح للدكتور وأنا أحب هذا يا شباب، احنا مش جايين نحرج الدكتور، لا بعد إذنك يا دكتور أنا هقعد على البنش جنب الباب بس وقت هفتح الباب من غير ما حد يحس وأنزل، أنت مش جاي تعلم على الدكتور في المحاضرة، يعني في دكاتره أنت بتحطهم في يعني إيه هو احنا أنت اللي مسلم واحنا كفار ويبتدي يحصل جدال ما لوش لازمه؟ أنت هدفك تصلي في المسجد، اعملها بذكاء. فكان يعني الدكاتره عدائي لمثلا مثلاً كان يسمح، هو في الآخر إيه أنت مش هتعمل لي فيها بقى بطل في المحاضرة؟ فبقول له يعني إيه ما قال ما بنصليش، ده الراجل ده كاريزما وتخاف تسأله. تخاف أسأل إيه وبتاع أنا هصلي في المسجد.

فالمهم يعني بقيت الحاجات طبعا رحت للدكتور قبليها لقيت الدكتور أصلاً ولا ثنى الكلمة، بقول له حضرتك؟ قال لي: آه طبعا أخرج. هما خايفين منه وهو فعلا كاريزما وهو حد علمه ثقيل جداً وعنده فعلا كاريزما وحضور ويهاب حقيقة وأنا أدعو لها لأنه علمني كتير، بس هما حطوا إيه حواجز هي مش موجودة. ده ما يعنينيش دلوقتي، ده ممكن يبقى درس تاني، إنما اللي يعنيني فكرة هو أنا هنا ليه؟ يعني إيه احنا ما نصليش في المسجد يعني احنا أمال مين اللي هيصلي في الجامع؟ وأنا هنا بقى ما بتكلمش في الوجوب والاستحباب خالص، حملة الدين حملة الدين يصلوا فين؟ فاحنا محتاجين نعيد ترتيب الاولويات على هذا، مش عاوز أطول عليكم، أقول قولي هذا واستغفر الله العظيم لي ولكم.

خلونا بس نقرا الآé الاسئله أو بعض الأسئلة بقى عشان الوقت.

واحد بيقول: هل يحق لي أن أُقاطع والدي بيسب الدين وبيعاملي معاملة سيئة أنا وأسرتي؟

الوالد اللي بيسب الدين نعمل معاه ايه؟ نبوس إيده ورجله وندعي له كتير، ونعيط قدامه نبكي خوفاً عليه، يرى ذلك منك، يرى شحتفة وعياط إنك إشفاقاً عليه وخوفاً على آخرته، ومع الدعاء والالحاح في الدعاء أن ربنا يهديه ويشرح صدره للخير، يقوم ده دي الأسباب اللي تخليه يرجع عن أنه يسب الدين. أما بقى أنه بيعاملك وحش أنت وأسرتك، فانت تستاهل، فانت تتوب لربنا ربنا مسلطه عليك بذنوبك ماشي.

طيب نذكر الإخوة بصيام العشر من ذي الحجة. صيام العشر من ذي الحجة حرام، واللي هيصوم العشر يأثم، تسعة، تصوموا تسعة، العاشر ده يوم العيد، فما حدش يصوم، صوموا تسعة أيام، وده احنا أدينا درس عن ذي الحجة المرة اللي فاتت.

إيه هي كفارة الحلف في الكذب؟ تعرف كذب ليه؟ تقصد حلف الكذب اللي هو أنك بتحلف على حاجة وأنت عارف انك كذاب؟ لو تقصد كده يعني والله العظيم ما عملت وأنت عارف انك عملت، فده اليمين الغموس الذي يغمس صاحبه في النار، وده من الذنوب الكبار، كفارته أن تتوب إلى الله، مالوش كفارة ثانية غير كده، تتوب، ولا بتحلف حلف على حاجة وفاكرها كده وما طلعتش كده، يعني تقول والله العظيم محمود جه ومحمود ما يطلعش بس أنت وأنت بتحلف فاكره أنه جه، فدي ما فيش فيها حاجة يعني لا هي حرام ولا عليك حاجة برضه ما فيش كفارة، ففي الحالتين ما فيش كفارة يعني، بس تتوب يعني، لو هو الأول تتوب. اللي فيه الكفارة أن تحلف أنك هتعمل حاجة وبعدين ما تعملهاش، أو تحلف مش هتعمل حاجة وبعدين تعملها، دي اللي فيها الكفارة، بس مش سؤالك أنت بتقول بحلف على حاجة كذب فده مش سؤالك.

أنا أشعر أن الدراسة الأكاديمية والجامعية الهندسة بتبعدني عن الله عز وجل. أنت من البنائين ولا كان سؤال في عمومه بقى؟ طب هو لو كده أنا يعني أنوي إيه؟ ما أنا بدرس دلوقتي، أسيب الدراسة ولا أعمل إيه؟

هتنوي بالدراسة أموراً، أول حاجة بر الوالدين، أول شيء، أبوك وأمك لو سبت الدراسة هيروحوا فيها وهيطبقوا ساكتين، فانت وجودك وجودك في الدراسة واكمالك للدراسة وحتى لو تتفوق في الدراسة فكل ده بر للوالدين، وأن نويت ذلك، وجيرت الشيخ أسامة عبد العظيم رحمه الله، طبعا احنا أي حد على الساحه هتلاقوه بيتكلم في الدين ولا حاجة غالباً لو هو مخل يعني ما هواش أصله دراسة شرعية، فغالباً بتلاقيه إيه مخلص الأول وبعدين دخل إيه حاجة شرعية، يعني خلص التجارة، خلص الهندسة، خلص الطب، وبعدين دخل حاجة شرعية. أسامة عبد العظيم مش كده، أسامة عبد العظيم خلص الشرع الأول وبعدين دخل هندسة. المعلومة دي مش كتير يعرفها، طب ليه دخل هندسة؟ عشان أمه كانت نفسها بس يعني نفسها تشوفه مهندس، حاضر دخل هندسة عشان برًّا بأمه. طبعا التفصيله مش قوي كده هو كان الأول في هندسة وبعدين نقل دراسة شرعية أتمها وبعدين رجع لإيه لهندسة تاني فأتم هندسة برًّا بأمه. فدي أول نية تحطها في الدراسة.

النية الثانية اللي تحطها في الدراسة أنه الغالب يعني، غالب الظن أن الشهادة دي هي دي اللي هتبق إيه سبب في الرزق كسبب، فانت عاوز إيه؟ تطلع تشحت؟ هتعمل إيه؟ هتاكل وتشرب منين؟ ففي الغالب ده سبب فيبقى أنك هتكف يدك عن الناس، مش هتقعد بقى تشحت ولا هتقعد تقيل بقى تجيب من ده وتجيب من ده وتستلف من ده، ولا لما تتجوز وتخلف تضيع من تعول، هتاكلهم وتشربهم منين؟ الغالب يعني اللي احنا شايفينه في الدنيا، الغالب أن بشهادتك بتشتغل تنوي هذا دي نية ثانية في دراستك ودي ثابتة في كل إيه أي دراسة بقى بتدرسها يعني.

النية الثالثة أنه تنوي فيها أن يبقى شكل الناس اللي هما فاكرينهم يعني زينا فاكرنا متدينين، الناس فاكرانا كده، فما يبقاش بأحوالنا بنصد الناس عن الدين، صح؟ يعني الناس يبقى فاكراني متدين فيجي يقول لك يا أمجد أنت إيه؟ طب أقول له الحمد لله طالع من ثانية هندسة، هو عشان الولد بيقول هندسة يعني؟ فبتدري الناس ساعتها هتعمل إيه يعني هتقول أهوه يبقى الدين شفته بيعمل إيه في الناس مثلاً، فدي برضو تنوي بها الخير، دي نية تُثاب عليها أن دي تبقى دعوة إلى الله. وبعدين خلي من وجودك في الجامعة برضه سبيل للدعوة، يبقى أنا مش رايح الجامعة بس عشان المحاضرات، لا، هدعو غيري للصلاه، هدعو غيري لمقرأة مثلاً بنقرا فيها قرآن، هدعو أدي لغيري درس يسمعه، فالجامعة أرض خصبة للدعوة إلى الله، فدي كلها نوايا، وفي غيرها يعني لو قعدنا بقى نحسب النوايا اللي ممكن نثاب عليها في الدراسة، نوايا كتير.

ما فيش وقت أقرأ، خط وحش جودوا خطوطكم. سؤال الحب بيجي لي كتير، واحد بيحب واحدة، واحدة بتحب واحد، وأنا أجبته بس في درس ما نزلش ومش هينزل دلوقت، فبرده خليني أجيب جواب عام.

الحب بلاء، وأن احنا يعني نحكم على من يحب يعني إيه من فوق كده خطأ الحقيقة، يعني في رسائل أو رسالة للي ما حبش فنقول له حافظ على قلبك، لأن الحب بلاء شديد ما هواش ما هواش حاجة سهلة، فحافظ على قلبك بأيه؟ بأنك ما تختلطش، بأنك ما تتسهلش في التعامل مع النساء، والبنت كذلك يعني حافظي على قلبك لأن الحب بلاء شديد وقعه صعب على النفس، فدي رسالة للي ما حبش لسه يعني اللي ما وقعش في سن الشباب وما وقعش في الحب.

طيب اللي وقع في الحب؟ ما أقدرش أقول له ما تحبش، ده تكليف بما لا يستطيعه هو قلبه ده مش ملكه حب واحدة ما ينفعش أقول له ما ينفعش تحب. وهو الحب ينفع ولا ما ينفعش حلال ولا حرام؟ هو الحب مش حرام، الحب في نفسه يعني واحد وقع في لو هو عمل حاجات حرام في الأول أنه اختلط أنه تساهل فييبقى ده اللي حرام، حب الحب نفسه لا يوصف بالحرمة. طب بعد ما حب ابتدى يعمل حاجات ثانية حرام من تواصل أو غيره ده برضه حرام، فاهمين كده؟ إنما الحب نفسه اللي وقع في قلبه ده هنقول له إيه فيه؟ والله لو ينفع تتجوزها روح اتجوزها، وده أحسن علاج للحب أنه يتجوز هيملكها وخلاص، فده أحسن علاج للحب الحقيقه الجواز.

فلو ينفع تتجوزها روح اتجوزها، طيب ما ينفعش تتجوزها أنت لسه صغير، هي لسه صغيرة، هي اتخطبت بعد كده، فخلاص ما بقاش ينفع ما فيش مجال أنك تتجوزها، فنقول لك إقطع فوراً أي سبيل يوصلك ليها واستعن على ذلك بالله أولاً، الموضوع صعب.

استعن على ذلك بالله أولاً ثم بحد ثقة تثق فيه، يعينك على ذلك، كل ما تبقى خلاص مش قادر ونفسي أتكلمها، نفسي أتواصل، تروح رايح تقعد مع الشخص ده تفضفض معاه وتحكي له، يشد من أزرك وكذا.

فدي الرسالة ليك أيها البلاء من ابتلي بهذا الداء؛ داء العشق أو داء الحب. رسالة للأولياء أن حنانيكم بأولادكم، يعني ما يجيش ابنك يبقى واقع في هذا البلاء ويلاقي منك قسوة وشدة، وممكن أنه يرى منك شيئاً من ذلك في الأمور الحرام أنه ما ينفعش تتواصل حرام يا ابني مش عارف إيه، لكن برضه يرى منك الشفقة عليه وأنك حاسس بالبلاء اللي هو يحياه، بالذات لو الولد طيب، معدنه طيب، يعني مش ولد متجرئ على الحرام، هو مأذي أنه بيعمل الحرام لكنه مش قادر يبطل ده، فهو برضه محتاج يرى منك الشفقة عليه والحنان عليه وأنك تاخذ بإيديه.

ومن شوية بقول: الولد أو البنت يروح يشوف حد ثقة أو حد، إنه يكون أبوه أولى، أو واحدة أنها تكون أمها، أنه يأمن لأبيه أنه يحكي له وعارف أن أبوه حد عاقل وحد هيوازن تلك الأمور ونفسيته تتحمل كل هذه المشاعر، فمحتاجين ده.

ماشي، إنما هو البلاء شديد الحقيقة على الشباب بحكم الدنيا اللي إحنا عايشين فيها دي مع الاختلاط في كل مكان، التعامل في كل مكان، ولذلك منكم حافظوا على قلوبكم ماشي عشان ما يحصلش البلاء ده وبعدين ترجع تقول مش عارف أبطل مش عارف.

ماشي، ما إحنا بيجي لنا نوعين من الأسئلة: ناس بتحب قبل الجواز وناس عايز أطلق بعد الجواز، ما دول اللي كانوا في يوم من الأيام بيسألونا أن هم بيحبوا قبل، هم برضه.

ماشي، نققيم الصلاة بقى. أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.