دخولتسجيل الدخول

كربلاء | نظرات في مقتل الحسين رضيّ الله عنه

أمجد سميرالشيخ أمجد سمير
  • مدة الدرس:
  • قراءة

الحمد لله والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته، كما صليت على آل إبراهيم إنك حميد مجيد. أما بعد؛ ففي يوم عاشوراء قُتل أشر الناس وخير الناس. أما أشر الناس ففرعون عليه لعنة الله، وأاما خير الناس فالحسين رضي الله عنه. وكان خير أهل الأرض حينها هو ابن بنت رسول الله صلى الله عليه وسلم، قتله المجرمون يوم عاشوراء، وكان يوم جمعة سنة إحدى وستين هجرياً.

عازوين نبدأ القصة من الأول، وهنختصر القصة علشان عاوزين نطلع بشوية فوائد مهمة جداً من مقتل الحسين رضوان الله عليه. القصة بدأت لما قُتل عثمان رضي الله عنه صابراً في داره، فطالب معاوية رضي الله عنه بدم عثمان، ومعاوية وعثمان ولاد عم، وهذه المسألة عند العرب مسألة كبيرة يعني ابن عمه، دي مسألة كبيرة يعني. وتولى بعد عثمان مين؟ سيدنا علي رضي الله عنه واجتمع عليه الناس، حتى معاوية رضي الله عنه إشكال معاوية مع علي ما كانش في منازعته الخلافة، لا، كان في أولويات فقط.

معاوية كان يرى أن إحنا نثأر لعثمان أولاً قبل المبايعة، أو سلّمني قتلة عثمان وأنا أتعامل معاهم. طبعا معاوية ما كانش راجل عادي، ده كان ماسك الشام، فهو له أيضاً شوكة ومنعة وجيش وكده يعني؛ فهي ده الإشكال بين معاوية وعلي رضي الله عنهما. ماشي، وكان علي يرى شيئاً آخر؛ سيدنا علي كان شايف أن ثأر عثمان ده مش واحد ولا اثنين، ده عدد ضخم، والعدد الضخم ده كل واحد له عشيرته وله قبيلته؛ ففكرة أن إحنا دلوقتي نجمع دول كلهم عشان نطالب بدم عثمان ونثأر لدم عثمان بأن إحنا يستشري القتل في كل هؤلاء، ده ما هواش مناسب.

وكان الحق في تلك المسألة مع علي رضي الله عنه، بدليل أن بعد كده سيدنا معاوية لما هيالي الحكم مش هيعرف يعمل اللي هو كان بيطالب به علياً رضي الله عنه. خلاص، هيبدأ صحيح أنه يثأر لكن أو ياخد حق بحق عثمان، لكن مش هيعرف يعمل أنه يجيب كل الناس دي، ولا هيبتدي يعني يمكر بهم شيئاً فشيئاً وياخد واحد بعد الثاني، وهيفضل كده ثأر عثمان هيفضل شغال لغاية عبد الملك. فسيدنا معاوية رضي الله عنه اللي كان بيطلب به ما عرفش يعمله لما ولي الخلافة هو، وجرى ما جرى بين علي وبين معاوية رضوان الله عليهم اجمعين.

ونحن نسكت عما جرى بين الصحابة رضوان الله عليهم، ونقول هذه دماء عصم الله أيدينا منها فلا نطلق فيها ألسنتنا. دَع ما جرى بين الصحابة في الوغى بسيوفهم يوم التقى الجمعان؛ فقتيلهم منهم وقاتلهم لهم، وكلاهما في الحشر مرحومان، القتيل صحابي والقاتل صحابي؛ فإحنا نحط ألسنتنا في بقنا ونسكت، ونحب جميعهم ونترضى عن جميعهم، وما جرى بين الصحابة نسكت عنه وأجر الاجتهاد نثبت. نسكت عما شجر بينهم ونثبت الاجتهاد لجميعهم، نقول سيدنا علي اجتهد وسيدنا معاوية اجتهد، أحدهما أصاب والآخر أخطأ، فأحدهما له أجران والآخر له أجر.

وأحنا مش مسألتنا هذه الحقبة دلوقتي؛ فمات علي رضي الله عنه، وتولى بعد علي الحسن رضي الله عن الحسن، وظل الإشكال قائم بين معاوية وبين مين؟ الحسن، أن إحنا عاوزين ناخد بدم عثمان. راح الحسن رضوان الله عليه عمل حاجة جميلة جداً، وقد أخبر بها النبي صلى الله عليه وسلم، تنازل عن الخلافة لمعاويه رضوان الله عليه في عام الجماعة سنة إحدى أربعين هجرياً، تنازل عن الخلافة لمعاوية وتوحد الصف وهدأت الفتنة بين المسلمين. وكان سيدنا النبي عليه الصلاة والسلام قال: «إن ابني هذا سيد، ولعل الله أن يصلح به بين فئتين من المسلمين»، وقد وقع ما أخبر به النبي صلى الله عليه وسلم.

سيدنا الحسن يا جماعة رجل حليم رزين، دي شخصيته؛ سيدنا الحسين رجل قوي في الحق، دي شخصيته. فإحنا قدام نمطين مختلفين من الشخصيات؛ سيدنا الحسن وهو الأسن الأكبر، الحسن أكبر من الحسين، ومفتاح شخصيته كده أن هو راجل حكيم رزين، عنده حكمه، عنده حلم، عنده دي شخصية الحسن. سيدنا الحسين رجل قوي في الحق؛ هديكم مثال بسيط كده عشان تفهموا الفرق بين الشخصيتين اللي إحنا قدامهم. لما معاوية رضي الله عنه تولى الخلافة كان يكرم الحسن والحسين جداً ويجلهما، وكل سنة يأتوه في قصر الخلافة فيجزل لهم العطاء.

ففي مرة أجزل لهم العطاء جداً، أداهم رقم ضخم حوالي مئتي ألف لكل واحد، وده رقم كبير، فراح قايل إيه سيدنا معاوية وهو بيديهم هذا العطاء: خذاها مني وأنا ابن هند، والله لا يعطيكم أحد هذا العطاء بعدي، يعني مش هتلاقوا حد غيري يديكم العطاء الجزيل ده. ومين قاعد؟ الحسن والحسين. الحسن سكت، الحسين ما يسكتش، يقول له: بل والله لا تعطي أحداً خيراً منا ذلك العطاء، يعني لا، ده إحنا آل البيت، إحنا أحفاد النبي عليه الصلاة والسلام، فمش أنت اللي تقول لنا أنا ما فيش حد هيديكم عطاء بعدي زي ده، ده إحنا اللي نقول لك إحنا أحسن ناس في كل اللي هتديهم عطاء.

فده دي شخصية وده شخصية ثانية، قدام شخصيتين غير بعض. على كل حال، ليه بقول كده؟ لأن الحسن لما أراد أن يفعل ذلك، أنه يتنازل عن الخلافة لمعاوية، الحسين وقف له، ما كانش عاجبني أن ده يحصل رضي الله عن الجميع. وراح الحسن قال له: أُحبسك لغاية ما أخلص اللي أنا عاوز أعمله، هو عارف أخوه بقى يعني مش هتيجي بالنقاش، يعني هو ده راجل عنده حكمة وحلم، وده راجل عنده قوة في الحق ماشي، وكلها اجتهادات؛ هو ده شايف أن ده الأصلح دلوقتي، والتاني لا، شايف أن إحنا... وسيدنا النبي عليه الصلاة والسلام رجح كفة مين في الموقف ده؟ الحسن، ده كلام النبي عليه الصلاة والسلام.

فالحسين سكت في هذا الموقف، وتولى معاوية رضي الله عنه الخلافة، وكان حسن السيرة رضوان الله عليه، ويكفينا في معاوية رضي الله عنه أن مين اللي ولاه الشام أصلاً؟ سيدنا عمر، عشان الناس اللي بتطعن في معاوية رضوان الله عليه؛ هو مين ولى معاوية الشام؟ سيدنا عمر، وكان حسن السيرة، وكانت تحبه الرعية ويدعو لهم ويدعون له، وهذا خير الأئمة بنص حديث النبي عليه الصلاة والسلام: «خير أئمتكم الذين تحبونهم ويحبونكم، وتصلون عليهم ويصلون عليكم»، يعني تدعوا لهم ويدعوا لكم؛ ده كان سيدنا معاوية رضي الله عنه.

وظل عاملاً لعمر ثم عثمان، ثم أيضاً في زمان علي ظل على الشام، وما فيش أي مشكلة جاية منه رضوان الله عليه. تولى معاوية رضي الله عنه الخلافة، ثم حمل الناس على أن يبايعوا ليزيد ابنه يزيد بن معاويه في حال حياته، هو لسه عايش معاوية رضي الله عنه؛ وهنا العلماء تكلموا في هذه الفعلة من معاوية رضي الله عنهم، منهم من اعتذر لمعاوية وقال إنه رآه أفضل من يتولى ذلك الأمر، ومنهم من قال: اجتهد معاوية رضي الله عنه فأخطأ، وعادي، إحنا لا ندعي العصمة لأحد، ممكن إنسان يخطئ في قرار، ممكن جداً يعني.

على كل حال، حمل الناس أو يعني أمر الناس أنهم يبايعوا ليزيد، فبايع الناس إلا فئام من الناس، لا، رفض أن ده يحصل، وكان منهم عبد الرحمن بن أبي بكر، أبناء صحابة بقى، وعبد الله بن الزبير، وعبد الله بن عمر، وعبد الله بن عباس، والحسين، وكل دول كانوا في المدينه. ففي ناس رفضت تبايع ليزيد ولسه معاوية عايش رضي الله عنه. وبعدين مات معاوية رضوان الله عليه، وتولى يزيد. عبد الرحمن بن أبي بكر كان مات بقى خلاص، عبد الله بن عمر وعبد الله بن عباس بايعا ليزيد، وفضل عبد الله بن الزبير والحسين لم يبايع ليزيد، وطلعوا من المدينة لمكة في قصة كده.

والي المدينة طبعا، خلي بالك، إحنا ما بنتعاملش مع ناس عادية؛ والي المدينة ده والي يزيد بن معاويه صحيح، لكن لما هو مثلاً يديله أوامر تخص الحسين، فهو بيديله أوامر تخص ابن بنت رسول الله صلى الله عليه وسلم، فالموضوع ما بيتعسبش كده يعني. لما يجي الحسين بقى يقول له: طيب سيبني مثلاً لبكرة، هيسيبه لبكرة عادي. فراى يزيد أنه يعني تخاذل والي المدينة، فراح عزله ومسكه لعمرو بن سعيد بن العاص، وكان هو والي مكة، فمعاه مكة والمدينه.

المهم خرجوا لمكة، الحسين رضي الله عنه -إحنا يا جماعة بنحل الحكاية بسرعة عشان نطلع بفوايد- الحسين رضي الله عنه ابتدى يجي له جوابات كتير جداً من الكوفة، أن إحنا ما فيش في أعناقنا بيعة ليزيد بن معاوية، ومستنيينك تيجي عشان نبايعك. ركزوا في التفصيلة دي لأنها مهمة جداً؛ يبقى هما ما بايعوش لسه يزيد، أو هكذا قالوا للحسين، هذا الذي وصل للحسين أن هما ما فيش بيعة في أعناقهم لحد، ومستنيك تيجي تبايعنا. طيب يعني مئة، مئتان؟ لا، آلاف الرسائل وصلت له بكده.

الحسين كان رجلاً ذا عقل وذا رأي، فما تسرعش، راح باعت ابن عقيل ابن عمه: روح شوف لي القصة دي، هل فعلاً الناس دي صادقة؟ راح مسلم بن عقيل للكوفة، استقبلوه الناس، وفعلاً لأن أعداد ضخمة فعلاً أرسلت هذه الرسائل فاستبشر بذلك جداً، وأرسل للحسين. طبعا أرسل دي مش واتساب ولا ماسنجر ها، أرسل دي يعني واحد هياخد الرسالة ويطلع بيها ويقعد في الصحراء مش عارف قد إيه، فأرسل إلى الحسين أن الأمر أيوه زي ما اتحكى لك، ويلا تعالى، الناس مستنياك تبايعك.

في الوقت ده كان النعمان بن بشير رضوان الله عليه صحابي جليل، هو كان والي الكوفة، فكان نعمان بن بشير رضوان الله عليه عارف باللي بيحصل، وبيقول، هو بيقول كده: إحنا ما لناش دعوة باللي بيحصل طول ما ما حدش عمل حاجة معانا فإحنا ما لناش دعوة باللي بيحصل خلاص؛ وهو فاهم كويس هو بيتكلم عن مين برده. فده برده ما عجبش يزيد بن معاويه، فعزل النعمان وولى الكوفة والي البصرة، اللي هو مين بقى؟ عبيد الله بن زياد. احفظوا بقى كم اسم كده: عبيد الله بن زياد بقى معه الكوفة والبصرة، خلاص.

عبيد الله بن زياد كان جريئاً، ما عندوش بقى يعني إيه حته أن يعني، أو عنده تعظيم آل البيت بس مش زي الثانيين دول ماشي، وهنعرف بقى كمان شوية مين المجرم الكبير في الموضوع. فتولى الكوفة، طيب عمل إيه بقى؟ أنتوا عاوزين إيه؟ رايكم ناخد الفوايد وإحنا ماشيين ولا نحكي القصة وعايزين ناخد الفوايد؟ نحكي القصة على بعض عشان بس ما تهتوش، ماشي. فتولى الكوفة، بقى معه الكوفة والبصرة، ابتدى يرسل جواسيسه ومش عارف إيه، وعرف بقى فين مسلم بن عقيل، عرف القصة كلها أولها من آخرها وكده.

مسلم بن عقيل يا جماعة كان معه كم واحد؟ أربعة آلاف واحد مستعدين يحاربوا ومستنيين الحسين يصل. عبيد الله بن زياد جمع الأمراء وخلاهم يطلعوا فوق القصر ويخطبوا الناس، كل أمير يخاطب الفئة بتاعتة، وسرح الأمراء برده في وسط الناس أن هم يخذلوا الناس ويهددوهم. وبقت الأمهات تزن على الأبناء، والأمراء يزنوا على الرجالة اللي تبعهم، لغاية ما مسلم بيسلم من صلاة المغرب ما لقاش معه ولا واحد من الأربعة آلاف. قعدوا طبعا يقلوا واحدة واحدة لغاية ما بقى معه حوالي ثلاثين واحد صلوا معه المغرب، بيسلم ما لقاش ولا واحد لوحده من الأربعة آلاف.

وابتدى يستخبى لأنه الطلب بقى خلاص، عبيد الله بن زياد طلبه، لغاية ما قُبض عليه وقُتل قتلة شديدة، وأحدث في الإسلام حدثاً، هو قال له كده، قال له: أقتلك قتلة ما فيش حد اتقتلتها في الإسلام قبل كده، قال له: أنت حري بأن تُحدث في دين، يعني أنت إيه؟ أنت أهل للإحداث. وطلع به فوق القصر ذبحه، رمى رأسه، وبعدين رمى جسمه ورأسة من فوق القصر، وقتل اللي كان آويه في بيته. المهم أحدث، قبل ما يموت مسلم بكى، قالوا له: لا، مثلك لا يبكي بقى، أنت جاي بتطلب الخلافة للحسين! لا، اللي بيطلب أمراً كبيراً كذلك لا يبكي في هذا الموقف. قال له: وأنا ما ببكيش على نفسي ولا حاجة، أنا كل اللي قال إن الحسين خرج وجاي في السكة، ده اللي شاغله، مش مشغول بنفسه.

وقبل ما يتقتل قال له: أنا عاوز أوصي ليزيد، عفواً لعبيد الله، قال له: عاوز أوصي. قعد يبص في اللي حاضرين كده، عمرو بن سعيد العاص راح واخدة على جنب كده قال له: إن بيننا قرابة وكذا وكذا، ابعت للحسين. قال له ثلاث حاجات يعني، قال له: أنا عليا سبعمائة درهم في المدينه سُدهم عني، وابعت للحسين، وده كان أهم طلب يعني من الطلبات اللي طلبها يعني. المهم، وكان المفروض هو أسر بهذه الأمور له، راح راجع قايلها لعبيد الله بن زياد: أعمل ده ولا لا؟ قال له: أعمل ده. عشان كده بقول لكم عبيد الله بن زياد أصلاً في الأول برده كان عاوز يتحاشى لقاء الحسين، قال له: أعمل ده، هو لو ما جاش خلاص كفيناه. فأرسل للحسين، ولقي الحسين الحسين بقى يا جماعة رضي الله عنه تلقاه كذا حد، ودي فايدة هنجيلها، ودي فايدة كبيرة جداً جداً في درس النهارده، واتقال له خلي بالك كذا، كان منهم الشاعر الفرزدق، لقي الحسين الفرزدق في طريقه، قال له: إيه أخبار أهل الكوفه؟

قال له: قلوبهم معك وسيوفهم مع بني أمية. بيحبوك كل حاجة بس هتوصل هيقتلوك. قلوبهم معك وسيوفهم مع بني أمية. فاستمر في طريقه الحسين، وحسين يا جماعة لما خرج، خرج وخد معاه الزوجات والأبناء وأخواته البنات، وواخد معاه رجالة من آل البيت.

وهو ما كانش خارج للقتال، يعني هو كل اللي معاه كان سبعين واحد، هو مش خارج يقاتل، هو خارج على وضع اتحكى له: تعالى هنا في الوفات الرسائل جت له. فهو خارج على الوضع ده إن أنا هروح، هو متخيل كده هروح ألاقي الوضع مهيأ خلاص. ابن عمر حذره، ابن عباس حذره، سعيد بن جبير حذره، كذا حد، وهنقرا لأن ده موضع مهم جدا جدا، فهنقرا كلامهم إن شاء الله، وهو استمر في طريقه، وشكر لهم نصيحتهم واستمر في طريقه.

وصل لمكان، نزل في المكان ده، وقيل إنه رأى رؤيا يعني أغفى إغفاءةً ثم استيقظ قال: لا حول ولا قوة إلا بالله، جاله حد كالفارس وقال له كلام فهم منه إن هما هيتقتلوا، وقيل إنه أغفى إغفاءةً ثانية فرأى النبي صلى الله عليه وسلم في المنام وأخبره أنه مقتول.

سأل: إيه المكان ده، اسمه إيه؟ قالوا له: كربلاء. فقال: كرب وبلاء. يعني كأنه تطير بهذا الاسم. عبيد الله بن زياد أرسل له أولاً طليعة جيش بقيادة الحر، رجل يسمى الحر. الحر ده محب ومعظم لأهل البيت جداً وما كانش عاوز أي قتال يحصل، وعمال يتحايل على الحسين: ارجع. والحسين مصر. وده كله في دماغه التصور اللي احنا بنقوله وبنحكيه دلوقتي، إن هما ما فيش بيعة في أعناقهم، وأن هما الوفات معاه، وده كله ما يعرفش لسه بقى بمقتل مسلم، ما يعرفش أي حاجة.

شوية الأربعة آلاف دول اتبعت لهم أربعة آلاف، فبقى جيش خمسة آلاف وهو معاه سبعين واحد سيدنا الحسين رضي الله عنه. فاتبعت الجيش الثاني أربعة آلاف واحد، بقى الجيش خمسة آلاف.

طبعا أول ما شاف الحسين هذا المنظر، وبعدين عرف بقى الأخبار إن مسلم بن عقيل اتقتل، وأن هو كان أرسل رسولاً -الحسين يعني في وسط الطريق- الطريق اتقتل، عرف الكلام ده كله، وعرف إن ما فيش حد معاه. فقال للحر: خلاص، ثلاث حاجات اختار منهم حاجة، يا إما أخرج من هنا على يزيد بن معاوية. شوفوا يا جماعة، الحسين يبقى الحسين! الحسين لم يخرج على يزيد، هو الحسين لم يبايع أصلاً ليزيد وراح لأناس لم يبايعوا، هو كان في دماغه ده، فاهم كده إن الناس دي ما بايعتش لسه ليزيد، فهو لم يستتب الأمر ليزيد، فهذا عذر الحسين في ذلك. فلما عرف إن لا، الأمر مستتب ليزيد -وده ابن عباس قاله له أصلاً، وهنيجي لكلام ابن عباس رضي الله عنه لأن ده درس مهم كبير النهارده- فقال: خلاص طالما الأمر كده، ثلاث حاجة من ثلاثة: يروح ليزيد، أو يرجع من حيث جئت -سيبني أرجع بقى أنا لمكة أو المدينة- أو أذهب لثغر من ثغور المسلمين أحارب الترك، اختار واحدة من ثلاثة.

طبعا الحر مش هيعرف يدي قرار، بعت لمين؟ لعبيد الله بن زياد: الراجل بيقول كذا كذا. فعبيد الله وافق، هو ده كله عبيد الله برده مش عاوز يصطدم بالحسين، مع أن لو احنا بنتكلم في معركة في قانون المعارك دول ولا حاجة في ساعة زمن الدنيا هتخلص، سبعين واحد وبعتلهم خمسة آلاف، فوافق.

كان مين بقى جنبه؟ رأس الشر شمر بن ذي الجوشن، قال له: لا، لا يروح ليزيد ولا يرجع ولا يروح لثغر، لازم ينزل على رأيك أنت؛ هيتحدث الناس أنه وصل لغاية الكوفة اللي أنت الوالي بتاعها وبعدين مشي كده من غير ما ينزل على رأيك أنت اللي تحكم فيه، مع أن يزيد هو الخليفة. ففضل يزن على دماغ عبيد الله إلى أن أرسل إلى الحر أنه: أيوه، ينزل على رأيي أنا.

طبعاً الحسين احنا عرفنا مفتاح شخصيته، يعني لو كان الحسن كان ممكن الحسن يعمل ده ويحقن الدماء، الحسين قوي في الحق، لا، أنا مين عبيد الله بن زياد ده أصلاً! فأبى. فابتتدى الحر اللي هو قائد الجيش واقع في أزمة كبيرة دلوقتي، يعني عمال يتحايل على الحسين والحسين أبى، فانشق الحر ومعاه ثلاثين واحد تانيين ودخلوا في جيش مين أو مع مين؟ مع الحسين. فالناس قالوا له -وكان في قائد تاني بقى اللي مسك الجيش- قال له: أنت بتعمل إيه وبتاع؟ قال له: إنما هي جنة ونار، احنا هنلعب! أنا هروح أقتل ابن بنت رسول الله صلى الله عليه وسلم؟ إنما هي جنة ونار فاختر لنفسك. وصار في صف الحسين رضوان الله عليه.

ومن الجميل أو يعني من العجيب في هذه الحقبة أن الحسين رضي الله عنه كان كله بيسمع كلامه، حتى الجيش اللي خارج -يقول لهم: سيبوني النهارده- يسيبوه النهارده، وبعدين الظهر أذن، طلع الحسين لابس الإزار والرداء وراح رايح للحر -وكان لسه هو قائد الجيش يعني لسه ما قالش: اصلي بقومي وتصلي بجيشك- قال: لا. قال: لا يا أبا عبد الله، بل نصطف خلفك. ووقف الحسين صلى بهم جميعاً، فكان الحسين يؤمهم كلهم في الصلاة، حتى الجيش اللي خارج ليمنع الحسين رضي الله عنه.

ثم كانت المعركة، احنا مش هندخل بقى في تفاصيلها لأن ما فيش فايدة منها يعني وبتوجع القلب الحقيقه كان مكان واتقتل كل اللي حوالين الحسين في هذه المعركة، اتقتل سبعة عشر واحد من آل البيت، وطبعاً أبقوا على الذراري والنساء طبعاً، وهنا الذراري -يعني في أطفال اتقتلت؟ أه، في أطفال اتقتلت، أطفال صغيرة؟ أه، أطفال صغيرة- بس اللي كان بيجي ناحية المعركة، منهم ابن سيدنا الحسين اتقتل وهو في حضنه، طفل صغير جري على أبوه وأبوه قاعد خده في حضنه، واحد رماه بسهم قتله. اتقتل سبعة عشر واحد من أهل البيت في هذه المعركة.

وخلاص ما فيش غير الحسين رضي الله عنه، فاجتمع حواليه فئة، وطبعاً في وسطهم شمر بن ذي الجوشن، وفضلوا طول النهار ما حدش عاوز يقدم على الحسين اللي يقتله طول النهار، وشمر عمال يشجعهم لغاية ما واحد قال له: إيه، افعلها أنت! هو راجل لوحده الحسين دلوقتي لوحده خالص، ما فيش حد حواليه كله اتقتل، وكلهم يتحاشون مين ده اللي مين اللي هيبوء بهذا الإثم! وشمر عمل لهم يسخنهم: أقدموا اقتلوه! فواحد قال له: ما تعملها أنت، ما هو لوحده روح اقتله! طبعاً ما عملهاش برده، في يعني بعض الناس بيقول إن شمر هو من قتله، ابن كثير في بداية والنهاية قال لا، اللي قتل واحد اسمه سنان بن انس رماه برמח بعد أن ضربه آخر قبل أن سنان يرميه بالرمح، ضربه على كتفه على عاتقه الأيسر وكان قبل كده راح يشرب من النهر فواحد رماه بسهم في فمه وبعدين أخرج السهم ففار الدم وأخذه في كفيه ورماه إلى السماء ودعا عليهم.

لكن من قتله هو ذلك أشقى القوم سنان بن انس، رماه بالحربة ثم نزل فاجتز رأسه ذبحه ثم أرسله برأسه إلى عبيد الله بن زياد في طست محطوطه كده زي في طبق ولا حاجة رأس الحسين رضوان الله عليه وكان في يده قضيب فأخذ يقلب الراس وينكت فيها بقضيبه ويقول: ما أجمل هذا الثغر! وكان الحسين كان جميلا، وكان الحسن كان أشبه الناس برسول الله في وجهه صلى الله عليه وسلم، وكان الحسين أشبه الناس برسول الله في بدنه صلى الله عليه وسلم ورضي الله عن الحسن والحسين.

فأخذ ينكت الراس بقضيبه ويقول: ما أجمل هذا الثغر! وكان في القوم أنس بن مالك رضي الله عنه فقام وقال: والله لأسوءك، رأيت رسول الله صلى الله عليه وسلم يقبل هذا الثغر، نح قضيبك عنه! فقتل الحسين رضي الله عنه في هذه المعركة، وكان فيها يعني تفاصيل زي ما بقول لكم يعني إيه توجع القلب لكن ما هياش غايتنا الآن.

طيب، هذه الحكاية باختصار، عاوزين نقف مع قصة مقتل الحسين رضي الله عنه ونستخرج منها بعض الفوائد. أول تلك الفوائد أن حب آل البيت وتعظيم آل البيت، وهذا قل من يتكلم فيه للأسف الشديد، ومن تكلم فيه ربما اتهم باتهامات عجيبة. حب آل البيت دين، وبالذات الحسن والحسين، سيدنا النبي قال إيه عنهم عليه الصلاة والسلام: «من أحبهما فقد أحبني، ومن أبغضهما فقد أبغضني»، بالذات الحسن والحسين. فحب آل البيت دين ندين الله عز وجل به، ونعظمهم ونكرمهم، الميت منهم والحي يكرمون.

طيب، مخالفك في حاجات، بقي معه الإسلام، يكرم لأجله. طب كافر بالله عز وجل، تود أن يسلم مسلماً وتكون في قلبك شفقة ورحمة له، مش كده؟ عارفين موقف سيدنا أبو بكر لما جه ابنه يسلم وقعد يعيط؟ وبعدين بيعيط ليه؟ قال له: لأن تكون هذه يد عمك أحب إلي من أن تكون يد ابني. بيعيط سيدنا أبو بكر إنه يتمنى أن الإيد اللي بتتمدى عشان تسلم دي كانت تبقى إيد عم النبي عليه الصلاة والسلام، ده لو كافر! فلو كان مسلم وأنت مخالفه في شوية حاجات ولا وعرفت أنه من آل البيت النبي عليه الصلاة والسلام من نسل فاطمة رضوان الله عليها، يبقى تحبه وتعظمه وتجله وتتعطيه منزلته.

فهذه أول المسائل، يبقى احنا نحب آل البيت، والنبي عليه الصلاة والسلام في وصيته من وصاياه الأخيرة أنه وصى بآله: «أذكركم الله في أهل بيته»، يقولها ثلاثاً. فهذه أول مسألة، يبقى احنا نعظم ونجل آل البيت رضوان الله عليهم.

المسألة الثانية، وهي مسألة مهمة جداً يا جماعة، مسألة إنه الإنسان لا يعتمد على عقله ورايه ويسمع للناس مهما كان عقلك ومهما كان رأيك. فلما تسمع لغيرك تنال بركة المشورة، وكان أمر الله قدراً مقدوراً يعني، هو في الآخر ما وقع هو قدر الله عز وجل، عشان احنا نقعد النهارده وندرس ما وقع وناخد منه العبر والعظات.

إنما سيدنا الحسين رضي الله عنه أولاً قلنا لكم إنه كان ذا رأي، بدليل جت له الرسائل ما تسرعش، قال: أبعت الأول واحد أثق فيه وأشوف الدنيا. طبعاً مسلم اتقتل هناك يوم عرفة سنة ستين، وسيدنا الحسين خرج إلى الكوفة يوم التروية، حتى إن بعض الناس: طب اقعد حج، يعني خلص الحج وهتشوف الوفود اللي جاية من البلدان وهنبتدي نطقص. تحلل بعمرة وخرج إلى الكوفة يوم التروية. وبعدين مات مسلم، وما عرفش أنه مات بقى زي ما قلنا لكم ما فيش رسائل سريعة يعني تقول إن مسلم مات ارجع، ما فيش الكلام ده خالص.

لكن الناس كثيرة حذروه، فتعالوا بقى لأن دي مهمة جداً يا جماعة، فكرة إن الإنسان ما يبقاش ماشي بدماغه كده، وهذا لا نقول عن الحسين حاشاه، احنا بنقول لنا احنا يعني، ماشي الحسين رجل له رأي وله حكمة وله كذا وله كذا وكان أمر الله قدراً مقدوراً، ألسنتنا لا نطلقها في صحابه رسول الله ولا في آل البيت، لكن احنا بنتعلم لينا احنا يعني، لما أقول أي ألفاظ دلوقتي بقصد بيها احنا أنا وأنتم يعني ماشي.

فمن ذلك قالوا إنه لقيه عبد الله بن عمر وعبد الله بن عياش بالأبواء، وكانوا منصرفين من العمرة، فقال عبد الله بن عمر: أناشدك الله إلا رجعت -طبعاً هو كان بالتثنية لأنه كان بيكلمه هو وعبد الله بن الزبير، فخلينا نقولها- إلا رجعتماد فدخلتم في صالح ما يدخل فيه الناس، وتنزلا، اعملوا زي الناس ادخلوا زي الناس في البيعة وشوفوا، فإن اجتمع الناس عليه فلم تشذوا، وإن افترقوا عليه كان الذي تريدان. يبقى دي نصيحة ابن عمر للحسين: ما تعملوش كده، ارجعوا. طبعاً ده هما كمان خارجين لمكة يعني، كان لسه الحسين ما خرجش، بعد كده سيدنا ابن عمر هيخرج للحسين بعد كده.

ماشي، قال وقال له في مرة بقى لما خرج له بعد كده: لا تخرج، فإن رسول الله صلى الله عليه وسلم خيره الله بين الدنيا والآخرة فاختار الآخرة، وأنك بضعة منه ولا تنالها. والله يا جماعة هذا الاستنباط من ابن عمر عجيب! ابن عمر فقيه بيقول له إيه؟ أوauعى تروح. طب ليه؟ قال له: أصل سيدنا النبي عليه الصلاة والسلام خير بين الدنيا والآخرة فاختار الآخرة، فيبقى سيدنا النبي مش هينال الدنيا -مفهومة دي؟- وأنت بضعة منه، أنت حتة من النبي عليه الصلاة والسلام، فمش هتاخدها؛ لأن النبي اختار الآخرة فمش هتاخدها، مش هتجيلك، فارجع.

قال واعتنقه وبكى وودعه. طبعاً هي القصة هنا مختصره إن ابن عمر لما قعد يعني يتحايل على الحسين الحسين أبى، فراح حضنه وقال له: أستودعك الله من قتيل! وبكى، خلاص هتموت! يا جماعة كل الناس قالوا إنك هتموت أصلاً، أستودعك الله من قتيل.

قال له ابن عباس، وابن عباس طبعا يبقى ابن عم النبي عليه الصلاة والسلام، والحسين يبقى ابن بنت النبي عليه الصلاة والسلام عشان دي ليها يعني إيه حيثية دلوقتي، قال له: أين تريد يا ابن فاطمة؟ قال: العراق وشيعتي. فقال: إني لكاره لوجهك هذا، تخرج إلى قوم قتلوا أباك وطعنوا أخاك حتى تركهم سخطه وملالة لهم؟ ودي كانت قصة بقى حصلت إن هما قتلوا علي وقال إن قومي قد كرهوني، كرهتُهم وكرهوني، ملوني ومللتهم، وخرج عنهم سيدنا علي وطعنوا الحسن وأخرجوه. فبرده يا جماعة التفكير العقلي يقول إيه؟ لا، مش كده. وابن عباس بيجلي له المشهد اهو، احنا يا جماعة احنا كله عاوزين ناخد إيه، ناخد نطلع.

اسمع لغيرك، بالذات لو غيرك ده حد بيحبك، بيخاف على مصلحتك، حد له رأي وحكمة. اسمع لغيرك، ما تمشيش بدماغك؛ احنا عندنا مشكلة كبيرة في الأجيال اللي طالعة دلوقتي، كل واحد ماشي بدماغه، ما حدش ليه كبير للأسف، ولا حتى الآباء، يعني ولا الآباء بقوا كبار للأبناء، لا، كل واحد ماشي بدماغه، وكل واحد معجب برأيه. وهذا الذي أخبر عنه النبي عليه الصلاة والسلام: «إعجاب كل ذي رأي برأيه».

إيه طب يا بني أنت خبرتك إيه في الحياة يا بني؟ ده أنت لسه يا دوبك مخلص ثانوية عامة عشان تبقى ماشي بدماغه، يعني ده أنت يا دوبك لسه مخلص الجامعة، شفت أنت إيه في حياتك عشان تبني عليه قرارات مستقبلية؟ اسمع للكبار، اللي أنت جاي هتاخد فيه رأي الآن، غيرك ده يمكن عدى بيه عشرات المرات ومئات وآلاف المرات، مش هو شخصياً، لا، اتسأل وشاف تجارب قدامه واسمع.

فقال: تخرج لقوم قتلوا أباك وطعنوا أخاك حتى تركهم سخطه وملاله لهم، لا تغرر بنفسك، بلاش تعمل كده. أبو سعيد الخدري قال: غلبني الحسين على الخروج. طبعا في رواية ثانية ابن عباس، ما أعرفش هتيجي هنا ولا لا، يعني لو ما جتش يبقى نبقى قلناها، أن ابن عباس قال له: لولا أن الناس تعيرنا أنا كنت مسكت في راسك وما سبتكش، هيقولوا إيه بقى؟ ابن عم النبي وابن بنت النبي عليه الصلاة والسلام ماسكين في بعض! بيقول: لولا أن الناس تعيرنا أنا كنت مسكت في راسك وما سبتكش، ولو أعرف أن لو عملت كده همنعك هعمل كده، والناس تعير زي ما تعير، فكان ابن عباس عارف شخصية مين؟ الحسين، أنا مهما عملت معاك أنت اللي في دماغك هتعمله. فبيقول له: لو أعرف أنك هترجع عن رأيك لو أنا عملت كده همسكك من راسك، طب الناس تعير؟ تعير بقى مش مهم، المصلحة أن أمنعك أولى، لكن أنا عارف مهما أعمل معاك مش هتغير اللي في دماغك.

قال أبو سعيد الخدري: غلبني الحسين على الخروج، وقلت له: اتق الله في نفسك والزم بيتك ولا تخرج على إمامك. وقال أبو واقد الليثي: بلغني خروج الحسين بن علي فادركته، فناشدته الله ألا يخرج، فانه يخرج في غير وجه خروج، وإنما خرج يقتل نفسه، فقال: لا أرجع أنا رايح.

قال جابر بن عبد الله: كلمت. لما أنا يا جماعة بقول هذه الآثار مهمة ليه؟ أول حاجة المعنى اللي قلناه في معاني مهمة جداً، وهو المعنى الثالث بقى وهو الدرس، يعني من أكبر الدروس بتاعة النهارده هو مسألة الخروج على ذي السلطان، فازاي كان مستقر عند الصحابة وعند التابعين هذه المسألة؟ فيجي الإشكال، يبقى الحسين خرج، جاوبنا ذلك الإشكال، قلنا الحسين كل اللي في دماغه أنه لم يستتب الأمر بعد ليزيد بن معاوية، ولما وصل وعرف أن لا الأمر مستتر.

خلي بالكم ابن عباس برضه مما قال، عشان لو ما جتش معانا أنا مش عارف هتيجي معانا ولا لا، فيكويس أن أقولها برضه دلوقتي، أن ابن عباس ابتدى يفکك له المسألة، قال له: الناس اللي بعتوا لك رسائل دول يعني خلاص ما عندهمش وائل في الكوفة ولا جباية، يعني جباية الزكاه والأموال وكده خلاص متعطله ما بتروحش ليزيد ومستنيينك، لو كده ماشي، إنما لو في والي للكوفة وبيلم منهم الزكاة وهو اللي قائم بأمورهم وبيقولوا لك تعالی، إنما يدعونك لفتنة، أنت رايح تعمل إيه؟ ما هو لو في والي هناك والامر مستتب لوالي الخليفة اللي هو يزيد، يبقى دول بيدعوك بيدعونا لفتنة. لكن الحسين كان شايف غير كده، بيقول: كل الآفاق في الكوفة مستنياني، وبيقولوا إن احنا ما بايعناش خلاص، فما فيش بيعة في عنوقهم لأحد، وأنا ما بايعتش حد، فالامر لم يستتب بعد ليزيد، ده كان تصور الحسين رضي الله عنه.

فاحنا عمالين نقرا هذه الآثار عشان نفهم المسألة كانوا شايفينها إزاي. قال جابر بن عبد الله: كلمت حسينا فقلت: اتق الله ولا تضرب الناس بعضهم ببعض، فوالله ما حمدتم ما صنعتم، فعصاني. وقال سعيد بن المسيب: لو أن حسينا لم يخرج لكان خيراً له. وقال أبو سلمة بن عبد الرحمن: قد كان ينبغي لحسين أن يعرف أهل العراق ولا يخرج إليهم، ولكن شجعه على ذلك ابن الزبير.

هنا يا جماعة في وقفة مهمة جداً، وده درس تاني ما كانش في دماغي دلوقتي بس نقوله بقى، أن تعرف طبائع الناس، أن تعرف طبائع الناس، قلنا لكم من شوية إنه مسلم بن عقيل خرج في أربعة آلاف واحد لقصر عبيد الله بن زياد، في مسألة كده مش مهم دلوقتي بس كان معاه أربعة آلاف واحد، لم يأت عليه المغرب إلا وحيداً. يا جماعة ما ينفعش تسوس ناس وأنت ما تعرفش طبائع الناس، وما تعرفش أن في من الناس اللي هيميلوا للدنيا يعني بالعطاء ومش عارف إيه، وفي ناس لو ما مالوش للدنيا بالتهديد هيجوا، وأنت تبقى مالي إيديك إيه؟ يقول لك إيه اللي متغطي بالناس عريانة أو مش حاجة زي كده، وده حقيقي، فلابد أن تعرف طبائع الناس.

هنا بقى مسألة أخص، قال له: طباع أهل العراق، أنت نسيت ولا إيه؟ نسيت عملوا إيه في علي؟ نسيت عملوا إيه في الحسن؟ فأنت رايح فين؟ قال: كان ينبغي لحسين أن يعرف أهل العراق ولا يخرج إليهم، ولكن شجعه على ذلك ابن الزبير. طبعا دي قصة طويلة ابن الزبير يعني قال له إيه، مش عاوز أدخل فيها دلوقتي. وكتب إليه المسور بن مخرمة، احنا عاملين كلام عن صحابة يا جماعة ها: إياك أن تغتر بكتب أهل العراق، وبقول ابن الزبير: الحق بهم فإنهم ناصروك. إياك تبرح الحرم، فإنهم إن كانت بهم إليك حاجة فسيضربون إليك آباط الإبل حتى يوافوك، فتخرج في قوة وعدة، أو وعد عفواً وعدة، يعني لو هم عاوزينك هيجوك واخرج بقى في جيش. فجزاه خيراً يعني، الحسين قال له: جزاك الله خيراً وقال: استخير الله في ذلك.

قال: وكتبت إليه عمرة بنت عبد الرحمن تعظم عليه ما يريد أن يصنع، وتامره بالطاعة ولزوم الجماعة، وتخبره أنه إن لم يفعل إنما يساق إلى مصرعه، وتقول: أشهد لسمعت عائشة تقول انها سمعت رسول الله صلى الله عليه وسلم يقول: الحسين بأرض بابل. فلما قرأ كتابها قال: فلا بد لي إذاً من مصرعي ومضى. هو خلاص هو رجل عارف وجهته خلاص، يعني ممكن يقتل في أرض بابل ما تروحش دلوقتي وتقتل بعدين في بابل برضه، يعني ما قال خلاص ما هو هيقتل في بابل، هروح بقى وأقتل في بابل.

قال: واتاه أبو بكر بن عبد الرحمن بن الحارث بن هشام فقال له: يا ابن عم، قد رايت ما صنع أهل العراق بابيك واخيك، وانت تريد ان تسير اليهم وهم عبيد الدنيا؟ خلي بالكم يا جماعة في ناس منهم أه عبيد دنيا، وفي ناس منهم حاول معاهم عبيد الله بن زياد بالدنيا ما جوش، هددهم زي عمرو بن سعيد ده ابن صحابي وكان والياً، هدده بالدنيا ما فرقش معاه، قال له: هعزلك وأقتلك. عمل اللي أمر بيه، وكان في الجيش الذي قتل حسين. طباع الناس يا جماعة كده، هي دي طباع الناس.

قال: وأنت تريد أن تسير إليهم وهم عبيد الدنيا، فيقاتلك من قد وعدك أن ينصرك، اللي أنت رايح لهم دول يقول لك تعالى وما تخافش مش هتلاقيهم، طب مش هيم يعني هيبقوا محيدين؟ لا، زي ما الفرزدق بعد كده قال له: قلوبهم معك وسيوفهم عليك. قال: ويخdumps لك من أنت أحب إليه ممن ينصره. سبحان الملك! هيبقى بيحبك وهياجي يقتلك، ليه؟ عشان لُعاعة من الدنيا، أو خايف على منصبه، أو خايف يتسجن، أو خايف يتقتل.

قال: فناشدتك الله في نفسك، فقال: جزاك الله يا ابن عم خيراً، مهما يقضي الله من أمر يكن. فقال أبو بكر: إنا لله وإنا إليه راجعون، نحتسب أبا عبد الله عند الله، هيموت. وكتب إليه عبد الله بن جعفر كتاباً يحذره أهل الكوفة ويناشده الله أن يشخص إليهم، بلاش تروح. فكتب إليه الحسين: إني رايت رؤيا، ورايت رسول الله صلى الله عليه وسلم أمرني بأمر، وأنا ماض له ولست بمخبر بها أحداً حتى ألاقي عملي.

يعني كلام كتير طبعا لناس كتير أن يزيد بن معاوية كتب لابن عباس، يعني الموضوع إيه وأنت كبير الحسين وكذا، فابن عباس رد عليه بكتاب، قال: كتب إليه ابن عباس: إني لأرجو ألا يكون خروج الحسين لأمر تكرهه، ولست أدع النصيحة له في كل ما تجتمع به الألفة وتطفأ به الثائرة. ودخل ابن عباس على الحسين فكلمه طويلاً، وقال له: ناشدتك الله أن تهلك غداً بحال مضيعة، لا تأتي العراق، وإن كنت لابد فاعلاً فأقم حتى ينقضي الموسم وتلقى الناس وتعلم ما يصدرون، يعني تشوف بقى الناس اللي جاية من الكوفه واللي جاية من البصرة واسألهم. الناس في الحج، أنت النهارده التروية بكره عرفة، روح عرفة بكره قابل الناس، تعرف الوضع عامل إزاي هناك.

قال: وذلك في عشر ذي الحجة، فأبى الحسين إلا أن يمضي إلى العراق. فقال له ابن عباس: والله إني لأظنك ستقتل غداً بين نسائك وبناتك كما قتل عثمان بين نسائه وبناته، والله إني لأخاف أن تكون أنت الذي يقاد به عثمان، فإنا لله وإنا إليه راجعون. فقال له الحسين: أبا العباس انك شيخ قد كبرت أو كبرت، كبرت بقى كده صح؟ كبر. فقال له ابن عباس: لولا أن يزري ذلك بي وبك لنا، يعني قلنا بقى الكلام ده مش عايزينه نعيده تاني، قلنا لكم القصة دي.

فنستفيد إيه من ده كله؟ أن شوف يا جماعة كمية التحذيرات التي أتت للحسين وهو ماض إلى وجهته. فاحنا الدرس أو من الدروس الكبيرة اللي نخرج بها من مقتل الحسين أن احنا نسمع لغيرنا، وبلاش ننتصر لآرائنا احنا، دول مش بنتكلم عن الحسين خالص ها، يعني احنا ارجعوا بقى هنا تاني، وبلاش نشوف أن احنا عقولنا احسن عقول وأن آرائنا أحسن آراء، هذا مضيعة، مضيعة لدينك ومضيعة لدنياك.

المسالة الثالثة وهي مسألة مهمة، إذا لم تكن الأهم، الخروج على السلطان على ذي الشوكة والمنعة، هذا الأمر في غاية الخطورة. والحسين رضي الله عنه وإن كان متأولاً، وقلنا إنه ما كان يريد الخروج، لكن أنظروا إلى ما آلى إليه الأمر أنه يقتل خيار الناس، 17 واحد من آل بيت رسول الله صلى الله عليه وسلم! وأنظروا إلى أن الأمر كيف كان مستقراً عند غيره، كم واحد يروح يقول له: ما تشذش، خليك مع الجماعة. هذه الألفاظ احنا قرأناها عشان كده، كان الأمر مستقراً عندهم، يعني دول كانوا راضيين بأن يزيد يتولى؟ مش شرط، مش شرط كانوا راضيين بولاية يزيد، مش شرط خالص، لكنه الدين، الدين اللي يأمرنا بكده. فهذه المسالة لا هي بالعواطف ولا هي بالحماسات، بل مغبتها شديده وخطيرة، أن تنازع الأمر أهله رجل له سلطان وله شوكة ومنعة وجيش وشرطة وكذا وكذا، وتيجي أنت بايه؟ بتعمل إيه؟ بايه بتعمل إيه؟ هتضيع دين الناس ودنيا الناس.

الإمام أحمد يا جماعة، إمام أهل السنة، فتنة الإمام أحمد كانت في إيه؟ خلق القرآن. الإمام أحمد كان يرى أن القول بخلق القرآن إيه؟ بدعة، يعني فسق، ولا كان يراه إيه؟ كفر، مش كده؟ أحمد بن حنبل كان يرى القول بخلق القرآن كفر. طب مين كان متولي كبر هذه المسالة؟ الخليفة نفسه، صح؟ وبعدين ياتيه بقى الفقهاء يشاورونه في الآيه في الخروج على الخليفة، فيقول: لا أرى ذلك ولا آمر به، الدماء الدماء، راجعوا النصوص دي، الدماء الدماء. وبعدين يقول لهم: أنها هتبقى فتنة، فيقول: طب ما احنا دلوقتي في فتنة برضه، ما العلماء بيتعذبوا وبيتقتلوا، في علماء اتقتلوا في هذه الفتنة، قال: وإن كان، إنما الفتنة الآن في الخاصة، يعني حتى لو في فتنة دلوقتي فالفتنة في الخاصة، يعني بس في إيه؟ في مجموعة العلماء، فإذا وقع السيف عمت الفتنة، لا أرى ذلك ولا آمر به. دين!

طب ده من أكثر الناس اللي تضررت أصلاً في الفتنة هو أحمد نفسه، لكنه دين. فهذه المسألة لابد أنه يبقى فيها: أولاً اعتبار مصالح ومفاسد، ثانياً الانطلاق من الدين، من دين الله عز وجل، ما هياش حماسة، ما هياش شجاعة، ما خالص. خصوصاً إذا كان الأمر يتعدى إلى غيرك، المسألة مش مسألة جدعنة أنه إيه تقول كلمتين حماسيتين وبتاع، لو الإيذاء لنفسك، إنما الإيذاء ممكن يتعدى، يتعدى لغيرك من أهل ولا من أصدقاء ولا من كذا ولا من كذا. من يقول ذلك؟ أي عقل يقول كده؟

قولي هذا واستغفر الله العظيم لي ولكم. ناخد بقى أسئلة النهارده عشان جايلكم رايق شوي.

آخد رأي والدي ووالدتي في الأمور الكبيرة زي جوادي وأنا رأيي مخالف ليه، وهم بيلحوا وأنا شايف أن الوقت الحالي، أن نظرتهم قاصرة بعض الشيء. يعني هتروح تتجوز غصب عن أبوك وأمك ولا هتعمل إيه يعني؟ هتيجي إزاي مش فاهم، عايز يتجوز. أنت عارف ده يعني ولا يعني تدعي ربنا أن ربنا يوفق ويشرح الصدور للأمر للصواب وللخير، أنت ما تعرفش الخير فين.

بكدب على أهلي عشان أحضر دروس، هل ده يجوز؟

احنا عاوزين نعمل درس مهم جداً عن تعامل الآباء مع الأبناء، بيجي لنا شكاوى أن الآباء يمنعوا الولد أنه يطلق اللحية، ويمنعوا البنت تلبس خمار ولا.

عباية ولا نقاب، والوقتي بيمنعوا العيال من الدروس الشرعية، وبعد شوية يجي الأب هو ده يشتكي إن ابنه شرب مخدرات، وإن ابنه بيزني، وإن ابنه ضرب أمه، وإنه سرق فلوس من البيت. طب إنت عاوز إيه؟ إنت عاوز إيه؟ ده الأب، الابن بقى نهزقه برده احنا!

أول حاجة، في معاني للولد السؤال ده أنا عارف إنه بيهم شباب كتير؛ بيقول: أنا بكذب عشان أحضر الدروس. فأول حاجة، ترى إنه منعك الدروس، ترى ذلك فعل الله بك مش فعل أبيك. خلاص، إحنا هزقنا الأب، خلاص نرجع للواد، ترى منعك من الدرس تراه فعل الله بك مش فعل أبيك. ولو شاء ربك ما فعلوه، مش كده؟ فلو ربنا أراد لك حضور الدرس هيهيئ لك الظروف اللي تحضر بيها الدرس، فيبقى إنت لازم لك حال مع ربنا، تصلح حالك مع ربنا سبحانه وتعالى.

طيب، إزاي أصلح حالي؟ غالباً بيكون مشكلتك مع ربنا من نفس جنس الحاجة اللي إنت بتشتكي منها. يعني إيه؟ يعني أنا عاوز أحضر والأب مانعني، غالباً إن إنت في حق آخر كاد لله وكان ميسر ليك ومنعته، وربنا ما تتعاملش معاه كده. لا، يعني مثلاً مثلاً إنه كان في صلاة فجر وأبوك مش منعك من صلاة الفجر في الجامع ولا حاجة، وكسلت وصليت في البيت وما نزلتش الجامع، مثلاً، فتُقوم تعاقب بإيه بقى؟ إن عاوز أروح الدرس، لا ما فيش درس. لا ما فيش درس، دي التي خرجت من فم أبيك هي حكم الله فيك. فاهمين حاجة؟ الكلمة التي خرجت من فم أبيك هي حكم الله فيك، ماضٍ في حكمك، مش حكم غيره. ما هو يا جماعة مش كلنا عارفين؛ واعلم أن الأمة لو اجتمعت على أن يضروك بشيء لن يضروك بشيء إلا قد كتبه الله عليك، مش كده؟ ليه؟ أصل رفعت الأقلام وجفت الصحف. فحرمانك من مجالس العلم، حرمانك من بيت الله، حرمانك من صحبة الأخيار، تراها حكم الله فيك، فتُقوم ما تنشغلش بابك خالص، وترى أن القضية مش مع أبوك، هي القضية مع ربك سبحانه وتعالى، فتُقوم تصلح أحوالك مع ربنا سبحانه وتعالى، يوم ربنا يطلق لسان أبيك بغير ما أطلق به أولاً، تنام وتصحى تلاقي أبوك بيقول لك: إيه يا حبيبي، مش هتروح الدرس؟ هو اللي بيقول لك كده، فما تنشغلوش قوي بالناس، انشغلوا برب الناس سبحانه وتعالى، دي المسألة الأولى.

المسألة الثانية، لو كان الدرس اللي إنت بتحضره، السؤال الإجابة المباشرة، لو كان الدرس اللي إنت بتحضره فرض عين عليك أن تتعلمه، يبقى حينها آه، ممكن أولاً نحاول نعرض بالكلام، يعني رايح فين؟ رايح أعد مع أصحابي. إنت مع أصحابي، إنت مش طيب، يعني فين؟ في بيت، ما إنت في بيت ربنا طبعاً. أوْعى توري أبوك الدرس ده بقى عشان هييجي بعد كده يبقى عارف. يبقى نعرض بالكلام، وفي المعاريض مندوحة عن الكذب، يعني ما نكذبش كذب صريح يعني. ماشي، طيب، لا أبويا ذكي وراجل بيجيبها وهي طايرة وفهلاوي وبتاع وهيقفشني وكده، يبقى ممكن أكذب كذب صريح لو هو علم شرعي زي ما بيقول لك كده فرض عين عليك إنك تتعلمه، وما فيش سبيل آخر إنك تتعلمه إلا بده، ولو مراس المسجد مش هتعرف تتعلمه، حينها ممكن أن نبيح الكذب، والحالة دي طبعا ضيقة جداً يعني. طب غير كده، فيبقى تطيع أباك وتصلح حالك مع ربك سبحانه وتعالى.

بقعد في البيت بشورت فوق الركبة معظم الصيف، أحياناً أقرأ القرآن في هذه الصورة، عندي أولاد صغار، هل في إثم في كشف جزء من الفخذ أمام الزوجة؟ لا، أمام الزوجة ما هياش عورة دي، الأطفال الصغيرين دول قد إيه؟ ما أعرفش، ومبادئ الفخذ على كل حال، ولا بلاش دي، تتجرأوا وتعملوا!

ماشي، يجوز الخطوبة أربع سنوات؟ يعني من حيث الجواز يجوز، إنما ما ننصح بذلك. قللوا فترة الخطوبة يا شباب، وفترة العقد تبقى أقل كمان، الفترة دي هي أسوأ فترة هتعدي عليكم في حياتكم، أسوأ فترة من حيث، طبعا بنكلم الناس الدينة اللي هي ما بتتباعش، من حيث إن إنت لا اسمك متجوز، ولا اسمك ما فيش حد معاك، فالفترة اللي في النص دي فترة صعبة على الشاب، فحاولوا تقللوها على قد ما تقدروا، خلاص، فانت ما تروحش لحد إلا وإنت خلاص يعني عندك الملاءة وعندك القدرة إنك تتجوز دلوقتي، وإنت لو أبو بنت ما تقبلش بحل إلا وهو كده، طب البنت هتروح مني؟ لا، هي لو نصيبك مش هتروح منك ولا حاجة.

اللي كان ناوي يصوم تاسوعاء وعاشوراء هو النهارده 11، صح؟ خلاص، فاتك 11 ملوش لازمة، نجاوب على السؤال بقى.

الأفضل أن أحفظ القرآن مع تعلم شأن من العلوم الأخرى ولا أركز في حفظ كتاب الله ثم أتقل إلى السنة والعلوم الأخرى؟ يعني إنت وقتك مشغول 24 ساعة مشغول بالعلم والقران ولا إنت مفضي ربع ساعة مثلاً، تقول الربع ساعة دي أخليها للقران، ولا سبع دقايق ونص قرآن وسبع دقائق يعني؟ أصل غالب اللي بيسال الأسئلة دي ما بيبقاش يعني مكرس وقتاً كبيراً من حياته لربنا، فنقول لك زود وقتك وربنا يبارك.

التعامل مع أبليكيشن التقسيط بعد التأكد من عدم وجود فوائد أو أرباح وتقسط بسعرها، أمّال أبليكيشن كسبان إيه كده؟ مش فاهم. يعني يظهر إنه مش فاهم إيه. أيوه، هو كسب إيه كده؟ مش مش متخيل الصورة دي، مش بقول مش موجودة، بس هو كسب إيه كده؟ ولا بيكسب من التاجر بقى ولا إيه؟ يعني هو لو كده، يعني إنت بتلاقي السلعة بنفس سعرها وهو بس وسيط يعني بيوصلك للتاجر وبتروح تشتري من التاجر، هو الابليكيشن بيشتري، طب أنا مش عارف عشان بس كل واحد هيبتدي يقول: تصور أنا ما أعرفش، إنت ممكن واحد يتكلم في أبليكيشن وإنت بتكلم على أبليكيشن تاني، ما أعرفش، لكن على كل حال لو هو عقد ثلاثي، يعني في بائع ومشتري وممول، يعني حد بيمول، يبقى ده عقد ربوي، ده ما تعملوش.

إيه يعني؟ يعني السلعة مثلاً بـ 100 ألف، فإنت يوم يجي، هتمسيه بقى أبليكيشن، هتمسيه وسيط، أياً كان الاسم إيه، يقوم يجي هو يدفع، إنت المفروض رحت لو هي هتشتريها إنت على طول من التاجر، هتروح تتاجر بـ 100 ألف وتاخد السلعة وتمشي، ما فيهاش مشكلة دي، أو هتقول للتاجر: بكام؟ يقول لك: بـ 100 ألف قسط، فتقول له: تمام زي الفل، هاخدها بالقسط، برده ما فيش مشكلة، كل ده ما فيهوش مشاكل.

إنما يجي واحد ثالث في النص، فيبقى في واحد بيبيع السلعة، وأنا بشتري السلعة، وفي واحد ممول، الممول ده بيعمل إيه؟ يقوم هو مكّش للتاجر، ماشي، هنا مكّش، مش بيكّش بقى للتاجر، هو مش مش بيشتري سلعة، هو يعني مش بيقبض سلعة ويبيعها لك بقى، هو ما بيعملش كده، هو مجرد بيكون ممول. ممول يعني إيه؟ يعني السلعة دي بـ 100 ألف، طب خلاص أنا هديك الـ 100 ألف اللي هتشتري وبعدين هاخدها منك 150 قسط، لو كده ده حرام، لو هو بيسموه عقد ثلاثي معروفة يعني. ممكن يبقى الأبليكيشن عاملها بشكل تاني، إن بيقول للتاجر: يا تاجر السلعة دي بـ 100 ألف كاش، جميل جميل، طيب أنا لو جبت لك حد ياخدها قسط عشان بقى في علاقات بينا كتير وبجيب لك زباين كتير فاحنا نعتبرها لو كاش بـ 90 ألف، إنت ما تبقاش عارف ده خالص، إنت ما تبقاش مدرك أن ممكن الأبليكيشن يبقى ليه تصرفات تانية مع التجار، فإنت شايف إن باسطها بنفس الفلوس وهي مش كده. إنما أنا مش متخيل الأبليكيشن يعني هيكسب إيه هو كده، فأنا مش عارف بقى إنت تقصد إيه، مش مهم خلاص يعني طالما هو واحد ناسي دخل كم علاقة محرمة وعايز يتوب، يعمل إيه؟ هتتوب توبة عامة وكل ما تتذكر علاقة تتوب منها في ساعتها. ماشي، هنا بيقول العلاقة المحرمة دي اللي هي ارتباط يعني مش علاقة ظاهري ما هواش زنا أو كده، هو ارتباط يعني ظاهر صحوبية أو كده يعني.

واحد تدين بعد الخطوبة، وده سؤال بيجي كتير سواء من الرجال أو النساء، فطبعا كان هو لما خطب خطب على معايير معينة، ابتدى يتديّن، فالمعايير دلوقتي ما بقتش إيه مناسب، يعني أنا أتخيل هو مش قايل كده، يعني هو اتخيل مثلاً هو إيه قال إيه؟ كان الأول لما خطب خد واحدة مثلاً مش محجبة وبتلبس ضيق وحاجات زي كده مثلاً، وبعدين تدين فقال: أنا عاوز مراتي تبقى محجبة أو لبسها واسع، فدي مش هتنفع تبقى مراتي خلاص، يعني مش هينفع تبقى مراتي، فهو بيقول: أعمل إيه؟ وهي مش عاوزة تاخد خطوة في التدين يعني، أو إن هي تبقى مغامرة شديدة إنك تتجوز وعلى تلك الحال دي، مغامرة شديدة، فيبقى ما تتجوزش طول ما الحالة كده يعني.

أعمل إيه؟ عاوز تطول بقى فترة الخطوبة لغاية ما هي البنت تتدين تدين حقيقي مش عشان خاطرك ماشي. عاوز تفسخ والخطوبة إحنا لسه على البر، مهما كان ماشي. إنما هتتجوز وإنت لا ترتضي دينها أو العكس، هتتجوزيه وإنت لا ترتضين دينه، دي مشكلة كبيرة، يا إما هترجع تاني وتنتكس إنت، يا إما هيقابلكم مشاكل وهتطلقوا بعد كده، فليه ما تعملش ده؟

هل في أي جزء من سيدنا الحسين مدفون في مصر؟ والله المسألة دي يعني واقع فيها الخلاف، أن رأس الحسين رضي الله عنه فين موجود؟ بعضهم قال في الشام، وبعضهم قال في مصر، وبعضهم قال: لا، دي نقلت إلى المدينة ودفنت في البقيع، وما فيش حد يعني عنده حاجة تقوي قوله، أو أو يعني تجزم، تجزم بأن هذا القول هو، فمش عارف.

واحد بيقول: فكرت في ترك الدعوة إلى الله مخافة سؤال الله هل عملت فيما بلغت؟ لا، ده غلط، ده باب شيطان ووسوسة، يبقى إنت كده الدعوة إلى الله دي يا جماعة اللي هي إيه؟ أمر ونهي، أمر بمعروف نهي عن منكر، هي دي الدعوة، مش كده؟ إنتو أنتم بتدعو إلى الله بتقولوا للناس إيه؟ يا جماعة اعملوا واحد اتنين تلاتة، وما تعملوش واحد اتنين تلاتة، فإنت تأمر بالمعروف وتنهى عن المنكر، حكم الأمر والنهي إيه؟ الوجوب، هو مش بالمزاج، يعني إنت لو عندك العلم اللي تدعو به إلى الله والكفاية غير متحق, طبعا الكفاية ما هياش متحققة، فيبقى ساعتها لازم تدعو إلى الله، فإنت بتركك للدعوة إلى الله عز وجل فانت وقعت في إثم آخر، فنعمل إيه؟ ندعو إلى الله، وأحنا بنخاطب الناس يبقى بنخاطب أنفسنا، يعني أنا بقول لكم يا جماعة ما ينفعش كده، ما تعملوش كذا، ببقى بخاطب نفسي، يعني بقول أنا كمان المفروض ما عملش كذا لو أنا ممن يفعل ذلك الشيء الذي أنهى عنه، وببركة دعوات الناس إلى الله ربنا يفتح عليك الأبواب، والحاجة اللي كانت صعبة تبقى سهلة.

واحد معاه مبلغ صغير وما لسه ما شطبش الشقة، يعمل عمرة ولا يشطب؟ لو إنت الجواز ملح عليك، والفتن مش عارف تصبر عليها، وبتوقع في الحرام، عادة سرية ولا مشاهدة إباحية ولا كذا ولا، يبقى لا الجواز بقى فرض عليك، يبقى تتجوز. لو إنت مش فارقة معاك، والجواز مش في دماغك قوي، والفتن مش فارقة معاك وكده، يبقى الأمر سهل.

الإخلاص والرياء والحاجات دي، إحنا مدين فيها دروس كتير، وإخواننا مدين فيها دروس كتير.

يا شيخ أمجد، السلام عليكم، أستأذن حضرتك بلاش الرجالة يقفوا على ناصية الشارع بتاع خروج النساء، واللي منتظر زوجته أو بنته ينتظرها في العربية أو الشارع الواسع، لكن نخرج نجد الإخوة واقفين على ناصية وبتعدي بصعوبة، شكرا لحضرتك.

والرجالة بتعمل كده ليه؟ ما تسيبوا الستات في حالها! إنتو عارفينهم في البيت وقارينهم هنا كده وكده يعني هم. سيبوا الستات في حالها بقى يا جماعة أرجوكم. وبعدين ما حدش يقف تاني في يعني بعدوا عن الشارع بتاع السيدات عشان تدي لهم مساحتهم ويخرجوا. يعني كان نفسي أقرأ رسالتك بس مش فاهم منها حاجة.

كلما رأيت فتاة أشعر أن إيماني فسد وذهب. مش فاهم، شيطان يعني؟ شفت شيطان؟ تغلطوا ليه في السن؟ زُيّن للناس حب الشهوات، فإنت مزين لك حب الشهوة، فافهم طبيعتك البشرية كده أنه قد زين الله لك حب الشهوة، فعليك أن تجاهد تلك الشهوة. طب اللي هيجاهد الشهوة هينجح 100%؟ ما فيش حد هينجح 100%، هتنجح مرة وتقع مرة، بعد شوية بالمجاهده تبقى بتنجح مرتين وتقع مرة، بعد شوية بالمجاهده 10 مرات ومرة، إلى ممكن ربنا سبحانه وتعالى يمن عليك والباب ده يغلق عليك ويبقى في باب تاني بتقع فيه، إنما لا هتوصل للعصمة أبداً في حياتك ولا هتوصل أن، ما إلا بقى لو واحد ما عندوش شهوة، يعني أه ما عندوش شهوة في الحتة دي بقى، إنما زُيّن للناس حب الشهوات من النساء.

من الصحابه؟ الصحابي اللي كان يتبعه نظرة لامرأة في الموسم في الحج، وقدام النبي عليه الصلاة والسلام والنبي عمال إيه؟ يصرف وجهه. فافهموا طبيعتكم، أنا ليه بقول الكلام ده؟ مش بقول لكم اطلعوا تجرأوا بصوا على الستات، بس يظهر بين صاحب السؤال إنه خلاص شوية وهيقنط من رحمة الله ويائس من نفسه، فده الخطاب المناسب ليه، طبعا ده مش خطابي أصلاً، بس ده الخطاب المناسب لهذه الحالة يعني. ماشي، في أسئلة تبقى مشكلة أن الواحد يقرأها، اللي بيسال عن التركيز في الصلاة، الخشوع في الصلاة، الطمأنينة في الصلاة، اسمعوا.

كتاب أسرار الصلاة لابن القيم هتلاقوه على التليجرام. واحد خد فلوس من الناس كانت معتكفة عشان يدفعها لإدارة المسجد اللي صرفوا عليهم وإدارة المسجد رفضت تاخد فلوس ومش عارف يوصل للناس، لو فعلا مش عارف توصل للناس خلاص تصدق بهذا المال.

واحد بيقول لي احنا اتنين شباب لسه متفرخين، أنت الأول تتعلم الكتابة قبل ما تروح تعمل البودكاست، عندنا قبول ما شاء الله والناس حابة فكرة أن إحنا نعمل بودكاست على قدنا نتكلم مع الشباب، في مشكلة في التصدر المبكر بحبك يا مولانا، عشان أجاوبه إيه ما فيش مشكلة يا حبيبي، عارفين الحركات دي، آه طبعا في مشكلة، من تصدر قبل أوانه فقد تصدى لهوانه، فدي من الآفات المنتشرة الآن أن الكاميرات بقت في إيد كل حد وسهل أنه يفتح البتاع ويتكلم.

أولا ما أنت ما أعرفش أنت محصل بس أنت اللي بتقول تصدر مبكر يعني أنت اللي بتقول ده مش أنا، فأنا برد على السؤال، فأقل شيء أنك هتحرم العلم وهتحرم الخير، أول ما هتبقى رأس والناس بتتبعك، أولا مش هتيجي الدرس ده تاني هتقول بقى أمجد مين ده عنده كام فولور يطلع أمجد ده يعني أنا عندي أكتر منه، فهتحرم الخير، فلا ما تتصدرش قبل الأوان.

السلام عليكم، نرجو منكم الدعاء لأختنا جنة الرحمن بالمغفرة وأن يربط على قلب والديها، وأن تقول رسالة لوالديه. طبعا يعني أن يبتلى الوالد أو الوالدة بموت الولد دي من أصعب الأمور على القلب، فاصبر واحتسب، ولعل الله عز وجل فعل ذلك لأنه يريد بكم الخير، ما حدش عارف فين الخير وفين الشر، وقدر الله كله جميل، لو إحنا وثقنا أن ربنا سبحانه وتعالى دائما يختار لعباده الخير، وبالذات لو أنتم أهل دين وأهل صلاح وبيت فيه التقوى، فربما ما يفعل الله بعذابكم.

ولكن إحنا ما بنبقاش عارفين الحاجة دي حصلت ليه وهنلاقي يوم القيامة إيه مستنينا ما بنبقاش عارفين، طب البنت دي يا إما ميتة على طاعة يا إما ميتة على معصية يعني مالهاش حل ثالث، يعني هي ميتة على طاعة يعني كان أحوالها معظم أحوالها الطاعة، أو ميتة على معصية يعني معظم أحوالها المعصية، فلو كانت ميتة على طاعة نرجو لها الخير، ولو كانت ميتة على معصية فرحمة ربنا واسعة سبحانه وتعالى.

إحنا درسنا عن الانتحار لو تفتكروا، وقلنا لكم الأثر في صحيح مسلم مش كده، وفي بعد الانتحار يعني حد ما ساعتها الناس كلها بتقول لك المنتحر كافر ومش عارف إيه وبتاع، ما فيش بعد الانتحار يعني، وبعدين لقينا الأثر في صحيح مسلم أن الرجل دخل الجنة اللي انتحر، وده الحديث ده في صحيح مسلم لما اتوجع وما قدرش وراح قطع إيديه أو حاجة أو قطع صوابعه ومات انتحر، وبعدين رؤي بعد كده في الجنة ومخبى إيديه كده، وبعدين بيسألوه أنت ليه مخبي إيديك قال له القطعة ربنا عاقبني قال لي القطعة اللي أنت قطعتها لنفسك دي مش هرجعها لك تاني، فراح حكى للنبي عليه الصلاه والسلام قال أنا شفت فلان في الجنة وعامل إيديه وبتاع، ماذا قال النبي؟ اللهم وليديه فاغفر.

فنرجو لها المسامحة لو كانت هي ميتة على معصية، ونرجو لها الجنة وأن ربنا يعمل في كل الأحوال، يعني إحنا هنخش الجنة بالرحمة كده لا بأعمالنا هنخش جنة ولا ماشي، والوالدين بقى ربنا يصبركم على فراقها ندعي لها: اللهم اغفر لها وارحمها وعافها واعف عنها ووسع مدخلها وأمن روعتها، اللهم اغسلها بالماء والثلج والبرد ونقها من الذنوب والخطايا كما ينقى الثوب الأبيض من الدنس، اللهم إن كانت محسنة فزد في إحسانها وإن كانت مسيئة فتجاوز عن سيئاتها، اللهم وسع مدخلها وأمن روعتها ويمن كتابها ويسر حسابها واجعل قبرها روضة من رياض الجنة ولا تجعله حفرة من حفر النار، واغفر لها وارحمها برحمتك يا عزيز ويا غفار، ربنا آتنا في الدنيا حسنة وفي الآخرة حسنة وقنا عذاب النار.