بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته، كما صليت على آل إبراهيم إنك حميد مجيد. أما بعد:
النهارده كنت محضر درس، وبعدين -طبعا- بستخير قبل ما بروح أي درس يعني، وانقبضت، فهندي درس ثاني ماشي؛ فـ يعني مع بعضنا بقى كده يعني. إن شاء الله هحاول أخلّي فيه وقت في الآخر للأصوات، فلو حد عنده سؤال يكتبه في ورقة أو يبعته، وإن شاء الله هجاوب على اللي أقدر عليه يعني.
هذا الدين مداره على ثلاثة أحاديث، كما قال ذلك أحمد وغيره؛ حديث النعمان بن بشير: «أن الحلال بين وأن الحرام بين»، وحديث عمر: «إنما الأعمال بالنيات»، وحديث عائشة: «من عمل عملا ليس عليه أمرنا فهو رد». وبعضهم يزيد شيئا، بعضهم يزيد شيئا من الأحاديث يضيفها إلى تلك الأحاديث، لكن على كل حال الثلاث أحاديث دول أحاديث مهمة جدا جدا في دين الإسلام. منها حديث النعمان الذي ذكرناه، وهو حديث في صحيح مسلم، أن النبي صلى الله عليه وسلم قال: «إن الحلال بين وأن الحرام بين، وبينهما أمور مشتبهات لا يعلمهن كثير من الناس؛ فمن اتقى الشبهات فقد استبرأ لدينه وعرضه، ومن وقع في الشبهات وقع في الحرام، كالراعي يرعى حول الحمى يوشك أن يرتع فيه. ألا لكل ملك حمى، ألا وإن حمى الله محارمه. ألا وإن في الجسد مضغة، إذا صلحت صلح الجسد كله، إذا فسدت فسد الجسد كله، ألا وهي القلب». الحديث ده فيه فوائد كثيرة جدا، وحسبنا أن نقف مع بعض فوائد هذا الحديث.
عاوژين نبتدي كده؛ قال صلى الله عليه وسلم: «إن الحلال بين وأن الحرام بين وبينهما أمور مشتبهة». الأول يا جماعة، الثلاث أحاديث دول ليه عليهم مدار الدين؟ العلماء قالوا -يعني- أشمعنى الإمام أحمد قال إن الثلاث أحاديث دول عليهم مدار الدين؟ وطبعا النووي لما صنف -أو يعني- جمع الأربعين له، حط الثلاثة في الأربعين النووية. وزي ما قلت لكم بعضكم زاد شيئا من ذلك، وبعضهم نظم ذلك فقال: عمدة الدين عندنا كلمات أربع قالهن خير البرية: اتق الشبهات، وازهد ودع ما ليس يعنيك، واعمل بنية.
فأيضا أدخل حديث النعمان في هذه الأربعة: اتق الشبهات. أشمعنا الثلاثة دول؟ قالوا: إن الدين هو الحلال والحرام، الأحكام الشرعية هو ده الدين. وهذا يؤخذ من حديث النعمان أن الحلال بين وأن الحرام بين، وكل عمل شرعي لابد له من ميزانين: ميزان ظاهر وميزان باطن. الميزان الظاهر اللي هو إيه؟ المتابعة، إتباع السنة، مش كده؟ وهذا يؤخذ من حديث عائشة: «من عمل عملا ليس عليه أمرنا فهو رد». وميزان باطن اللي هو الإلاص، وهذا يؤخذ من حديث عمر: «إنما الأعمال بالنيات» إلى آخر الحديث. فلذلك الأحاديث الثلاثة دول كان عليهم مدار هذا الدين.
طيب، حديث النعمان: «أن الحلال بين وأن الحرام بين وبينهما أمور مشتبهات». الأحكام الشرعية يا شباب فيها حلال بين واضح، وفيها حرام بين واضح. لما أجي أقول لك حكم الصلاة؛ ما فيش اثنين هيختلفوا في أن الصلاة واجبة، لازم الناس تصلي، مش كده؟ حكم شرب الخمر؛ ما فيش اثنين هيختلفوا أن الخمر حرام. فدي أمور بينة واضحة، أن الحلال بين وأن الحرام بين. هل كل الدين كده؟ يعني هل كل الدين كل ما أسالك عن مسألة تبقى كل الناس تقول دي حلال ودي حرام؟ لا، مش كده. هتلاقي بين الحلال والحرام، كما قال صلى الله عليه وسلم: «أمور مشتبهات». ركزوا بقى معايا من أول هنا؛ عشان الفوائد مهمة جدا.
يبقى ربنا لما شرع الدين وأنزل الأحكام، ما أنزلهاش كلها في مرتبة واحدة من الثبوت، ولا من الظهور. يعني إيه؟ يعني ربنا سبحانه وتعالى كان قادر أن يبقى كل أدلة الأحكام قطعية الثبوت قطعية الدلالة، يعني ما فيش حديث نختلف فيه، ده صحيح ولا حسن ولا ضعيف. مش كده؟ ربنا كان قادر أن ده يحصل، مش كده؟ ولما نجي نقرا آية بتتكلم عن حكم معين، أو حديث بيتكلم عن حكم معين، ربنا كان قادر سبحانه وتعالى أن تبقى هذه النصوص نصوص محكمة. يعني إيه محكمة؟ يعني لو قراها مية واحد المية يفهموا نفس الكلام. ربنا كان قادر يعمل ده ولا لا؟ قادر سبحانه وتعالى، لكنه ما عملش ده. دي أول مسألة عاوژين نقف معاها شوية.
يبقى قبل ما ندخل نشوف إيه هي المشتبهات دي، وإزاي نتعامل مع تلك الأحكام التي هي مشتبه علينا؛ الأول نفهم أن ذلك فعل الله عز وجل، فعله الجميل سبحانه وتعالى. طيب، ليه ربنا سبحانه وتعالى -ممكن بعض الناس يقول لك إيه- طيب ليه اللخبطة؟ مكان يبقى الحلال واضح والحرام واضح وما يحصلش اختلاف. نقول لك: عشان ده سعة في هذا الدين. دي مش حاجة وحشة، دي حاجة كويسة؛ أن العلماء يختلفوا، ولما العلماء يختلفوا فواحد يقول ده حلال، وواحد يقول ده حرام، يبقى فيه سعة في الشريعة، وأن في وقت ممكن يؤخذ بقول هذا العالم، وفي وقت ممكن يؤخذ بقول العالم الآخر؛ لأنه أصلح لأحوال الرعية، أو حتى في خصوص أحد بعينه. يبقى دي من سعة الشريعة، دي أول مسألة عاوژين نفهمها.
وأنا -كثيرا ما- أعيد نشر منشور مهم جدا، تعالوا نقراه سوا؛ ده تجميع إزاي يا جماعه العلماء كانوا بيشوفوا الاختلاف الواقع في الشرع. دي أول مسألة عاوژين نفهمها كويس. إسحاق بن بهلول هذا تلميذ من تلاميذ أحمد، أحمد بن حنبل رحمه الله معروف يعني، صنف كتابا إسحاق بن بهلول وسماه كتاب الاختلاف. فقال أحمد: سمه كتاب السعة. إسحاق بن بهلول صنف كتاب وجمع فيه اختلاف العلماء، فسماه كتاب الاختلاف. فقال أحمد: سمه كتاب السعة. كان أحمد يرى أن اختلاف العلماء سعة.
وكان عمر بن عبد العزيز -شوفوا يا جماعة فقه عمر بن عبد العزيز- يقول: ما يسرني أن أصحاب رسول الله صلى الله عليه وسلم لم يختلفوا. ما انبسطش لو كان كل الصحابه اجمعوا وماتوا، وقد انعقد الإجماع في كل مسألة على قول واحد، يقول: ده ما يعجبنيش، ده ما يسرني ذلك، اللي هو ممكن بعض عقول الناس دلوقتي يقولوا: ما ده أحسن، أو بعض العقول الحالمة وهنجيلها دلوقتي. الدرس ده يا شباب هو درس شوية يعني إيه؛ هنحاول نراعي فيه كل المستويات، فممكن يبقى في حتة صعبة على ناس، معلش استحملونا الحتة اللي بعد دي تبقى سهلة إن شاء الله، لكنه في قواعد مهمة جدا جدا للجميع.
ففي بعض العقول الحالمة التي تحلو الآن أن هي ترفع الاختلاف، وعاوزه تجمع الأمة كلها على قول واحد. وده هنجيله كمان شوية إن شاء الله، ونشوف المشكلة اللي فيه. فالمهم عمر بن عبد العزيز بقى رحمه الله كان يقول: ما يسرني أن أصحاب رسول الله صلى الله عليه وسلم لم يختلفوا؛ لأنهم إذا اجتمعوا على قول فخالفهم رجل كان ضالاً، يبقى خالف الإجماع. وإذا اختلفوا فأخذ رجل بقول هذا، ورجل بقول هذا، كان في الأمر سعة. واضح الكلام؟
وكان طلحة بن مصرف إذا ذكر عنده الاختلاف قال: لا تقولوا الاختلاف، ولكن قولوا السعة. وقال ابن قدامة صاحب المغني في مقدمته بقى، في مقدمة المغني، قال: وجعل في سلف هذه الأمة أئمة من الأعلام، اتفاقهم حجة قاطعة، واختلافهم رحمة واسعة. وده اللي الناس حتى العادية تقول لك: اختلاف العلماء إيه؟ رحمة. مش كده؟ وهذا قوله صدق، اختلاف العلماء رحمة، اختلافهم رحمة واسعة.
وقال مرعي الحنبلي لسعيد الباني، قال له: أن اختلاف المذاهب في هذه الملة رحمة كبيرة، وفضيلة عظيمة، وله سر لطيف أدركه العالمون، وعمي عنه الجاهلون. فاختلاف المذاهب خصيصة لهذه الأمة، وتوسيع في هذه الشريعة السمحة السهلة.
وقال ابن تيمية رحمه الله: والنزاع في الأحكام قد يكون رحمة إذا لم يفضي إلى شر عظيم. ثم قال: والحق في نفس الأمر واحد، وقد يكون من رحمة الله ببعض الناس خفاؤه، يعني خفاء ذلك الحق؛ لما في ظهوره من الشدة عليه. إلى غير ذلك من الأقوال.
يبقى أول مسألة عاوژين نفهمها وتترسخ داخلنا: أن اختلاف الأئمة هو اختلاف رحمة. اختلافهم في الفروع -يعني في الفروع، يعني في الفقه، في الأحكام الفقهية- اختلاف رحمة. يبقى لماذا؟ نرجع تاني للسؤال: ليه ربنا سبحانه وتعالى لم يجعل جميع الأحكام أو جميع الأدلة التي يؤخذ منها الأحكام لم يجعلها قطعية الثبوت قطعية الدلالة، وخلاص يرتفع الاختلاف بين الناس؟ هنقع في حرج شديد وضيق. فمن رحمة الله عز وجل بنا أن أخفى الحق في بعض المسائل، لا في معظم مسائل الدين.
مسائل الإجماع في هذا الدين قليلة ولا كثيرة؟ قليلة. مسائل الإجماع في الدين هي أقل القليل، ومعظم أحكام الشريعة وقع فيها الاختلاف بين الأئمة الأعلام. فدي أول قضية؛ يبقى: «أن الحلال بين وأن الحرام بين وبينهما أمور مشتبهات».
طيب، كيف يتعاطى الناس مع هذه المشتبهات؟ أولا يا شباب، عندنا في المدارس -مدارس يعني كالعادة- عندنا طرفان ووسط، كالعادة في أي شيء يعنی. فعندنا طرف يتعامل مع تلك الأحكام المتشابهة، الأحكام التي لم يقع فيها الإجماع بين الأئمة، بعض المدارس يتوسع جدا في التعامل مع هذه الأحكام، يتوسع فيها توسعا يفضي إلى شر عظيم، وإلى انحلال في ديانات الناس. فبعض المدارس يذهب يبحث عن الرخصة عند كل عالم، ويجمع الرخص كلها. طيب اللي بيعمل كده هيبقى له دين؟ يعني إيه رخص الأول؟ يعني العالم الفلاني عنده الحتة دي قوله فيها أخف الأقوال، ياخده؛ ويروح لعالم ثاني فيلاقي قوله في مسألة ثانية خالص أخف الأقوال، ياخده؛ ويروح لعالم ثالث يلاقي قوله في المسألة الثالثة أخف، ياخده؛ ويعمل بتلك الأقوال. فأي دين هذا؟ أي دين يبقى لهذا الرجل؟ ولذلك قالوا قديما: من تتبع رخص العلماء تزندق أو كاد. اللي يتتبع رخص العلماء أما صار زنديقا، أو خلاص شوية وهيبقى زنديق. تزندق أو كاد، كاد أن يتزندق.
وكذلك في هذا الجانب أيضا بعض الناس يسوي بين مراتب الخلاف كلها. وده برضه مش صح. يعني إيه يا جماعة؟ يعني العلماء ذكروا أن الخلاف مراتب، مش كل الخلاف في الفقه مرتبة واحدة؛ ففي خلاف قوي وكل قول له حظ من دليل أو نظر، وفي خلاف العلماء يذكرون أنه خلاف ضعيف، يعني المخالف فيه خلافه ضعيف وربما كان خلافا شاذا لا ينظر له. فيجي واحد يقول إيه: أي مسألة وقع فيها الخلاف نروح لأي قول، حتى لو كان بقى القول ده قول ضعيف قول شاذ، وايه وكمان مش عاوز يعمل به في خاصة نفسه، عاوز ينشره بين الناس. وهذا أيضا لا ينبغي أن يكون.
دي مدارس -أو يعني- ناحية. في ناحية أخرى العكس شطت، لكن الناحية الثانية؛ إزay؟ قالوا: لا، احنا عاوزين بقى نرفع الخلاف ده من الأمة، حتى لو ما قالوش ده بالسنتهم لكن فعالهم تدل على ذلك. طيب إزاي؟ قال لك: احنا هننظر في الدليل رأسا، ونخرج بقول من الدليل، وبعدين ما يشغلناش بقى العلماء قالوا إيه بعد كده، وهنسمي نفسنا متبعون للدليل. وهذا أيضا خطأ وضلال؛ فإننا نهدر أقوال العلماء ونهجم رأسا على الأدلة لنستنبط منها الأحكام، رامين أقوال العلماء، وما تشغلناش أقوال العلماء. وفي بعضهم ممكن يغالي كمان زيادة أنه يقول مثلا إيه: ده هذا القول هو الموافق للدليل! طب ده المذاهب الأربعة ما بتقولش بكلامك ده! يقول لك: لا، ما هو لا دليل لهم!
إيه رايكم في الكلام ده؟ إيه «لا دليل لهم» ده؟ يعني- يعني- أمال جابوا الحكم ده منين؟ يعني ده كفر، مش هيعملوا كده! ما هو «لا دليل لهم» ده يعني إيه؟ يعني قعدوا يالفوا فقه مثلا من غير أدلة كده! عجيب جدا، كلام عجيب! أو يخص فئة معينة، يعني يقول لك: الشافعية لا دليل لهم، الأحناف لا! إيه، إيه «لا دليل» ده؟! لو- ما هو اللي يعمل ده، ده واحد عاوز يهدم الدين. يعني التصور إيه؟ قلناه قلناه قبل كده، قلنا إيه؟ يعني التصور بتاع «لا دليل له» ده أن الحنابلة دول، ولا الشافعية، ولا المالكية، ولا الأحناف، لما هذا الحكم اتكتب في كتبهم وتداوله العلماء جيل بعد جيل -ما هو لما نقول ده ده مثلا قول الحنابلة يبقى ده مش قول بني آدم، ده قول أئمة كبار، وتناقلوا ذلك الحكم ورضيه الدول عن دول عن دول لغايه ما خلاص استقر بقى ده المذهب بتاع الحنابلة، أو ده مذهب الشافعية أو الأحناف أو غيره- فتصورك إيه لما تقول كلمة زي دي: إن الحنابلة لا دليل لهم، إنهم قاعدين بيشيشوا ويكتبوا فقه؟! إيه تصورك، يعني إيه التصور؟ يعني أنهم ما لهمش دليل وكاتبين هذا حلال وهذا حرام بلا دليل؟! ده إسقاط لرموز الأمة. إسقاط لرموز الأمة، يطلع بقى الطالب أو الشاب متجرئ، متجرئ على هؤلاء الرموز، ومتجرئ على دين رب العالمين، ما هو شايف الدين خلاص كلك مباح، أي حد يدخل يقول اللي يقوله، ويهدم أقوال الأئمة المتقدمين. ومش بس يهدم، يهدم الأقوال، يقول لك: لا ده ما لهمش دليل.
الله، طب ما هو اختلفوا الأولين دول، اختلفوا ليه اختلفوا؟ اختلفوا- بصوا يا شباب، احنا أنا عارف الدرس ممكن يبقى مستواه عالي شوية والناس جاية فاكرة
يبقى في رقائق بس، هي دي قواعد يعني هتنقذكم من مشاكل كتير، فحاولوا تركزوا فيها شوي. العلماء اختلفوا، ليه اختلف العلماء يا جماعة؟ أسباب كتير جدا، خلينا بس عشان نفهم كده يعني إيه، ناخد بعض الأسباب منها مثلاً: إن ممكن دليل يثبت عند عالم وما يثبتش عند عالم تاني.
يعني إيه؟ يعني والله عالم شايف الحديث ده صحيح، والثاني قال لك لا، الحديث ده ما هو ثابت فمش هاخد به. ماشي، دي ما اسمهاش إن ما عندوش دليل، فاهمين؟ يعني مثلاً العالم الفلاني بيخد كذا عشان الدليل الحديث الفلاني، طيب أنت راجل مجتهد في الحديث مثلاً مجتهد في علم الحديث، فرحت حققت هذا الحديث فلقيته ضعيف، لقيته ضعيف.
هل معناه إن العالم ده لا دليل له؟ مش معناه كده خالص، معناها إن الدليل الذي يعتمد عليه ضعيف ها؟ عندك، مش ضعيف، ضعيف عندك، ماشي؟ فكده يبقى ده الأدب بقى مع العلماء، يعني هذا الحديث أنا أرى ضعفه أنا - مش أنا أمجد، يعني أنا من وصل رتبة الاجتهاد في هذا العلم - أرى ضعفه، خلاص العملية هادية خالص، طب غيرك ما يراه، لا يرى ضعفه، إيه القضية؟
هو أحمد بن حنبل ده يعني فقيه بس ولا محدث؟ محدث عادي كده يعني، كان يحفظ قد إيه يا أحمد؟ مليون حديث، ألف ألف حديث طبعا، ألف ألف دي مش يعني هم كان عندهم الطرق، كل طريق ده حديث، ويقولوا المرفوع والموقوف والمقطوع، كل واحد يسموه حديث. فكان أحمد يحفظه ألف ألف حديث وأبو زرعة يحفظ ألف ألف حديث، الناس دي ما كانتش، يعني هات لي أي موسوعة حديثية دلوقتي كم حديث يعني؟ وهو له المسند ثلاثون ألف حديث أو يزيد، الإمام أحمد، ومثل ذلك على الشافعي، والشافعي له مسند كذلك، أصغر طبعا، لكن له مسند في الحديث، ومالك له الموطأ، يعني أقصد الأئمة دول يا جماعة، وهو أصلاً الفقيه عشان يبقى مجتهد لابد أن يكون أصلاً عالم في الحديث أصلاً، فهي المسألة بسيطة؛ هو ضعيف عندك وصحيح عند الأمة خلاص يعني.
يعني الموضوع سهل، يعني إيه ده بغض النظر كمان عن ولا بلاش عشان ما نفتحش بقى في حتت إيه؟ فدي مسألة يعني ثبت عنده الدليل ولم يثبت عندك، ماشي؟ أو فهم الدليل بشكل مختلف. يا جماعة، نفس الجملة عالم يفهمها بشكل وعالم يفهمها بشكل، مش بس عالم، في جيل الصحابة واقعة حدثت في الصحابة نفسهم، ومش واحد فهم وواحد فهم، لا، دي فئتين، فئة فهمت نفس الجملة بشكل، وفئة تانية فهمت نفس الجملة بشكل وفي حكم شرعي. ﴿مَن كَانَ يُؤْمِنُ بِاللَّهِ وَالْيَوْمِ الْآخِرِ فَلَا يُصَلِّيَنَّ الْعَصْرَ إِلَّا﴾ في بني قريظة، مش كده؟ نفس الجملة أهو.
تقوم فئة تقول إيه؟ خلاص وقت العصر هيخرج، فراحت فئة قالت لا، ده النبي عليه الصلاة والسلام لما قال كده كان بيحثنا على إيه؟ إن إحنا نسير بسرعة وبتاع ونعمل كده يعني ما، فلا، إحنا هنصلي، مش هنخرج الآية مش هنخرج الصلاة. فئة تانية قالت لا، سيدنا النبي قال عليه الصلاة والسلام: «من كان يؤمن بالله واليوم الآخر فلا يصلينا العصر إلا في بني قريظة»، فإحنا مش هنصلي غير لما نوصل، نفس الجملة، فتختلف فيها أهام العلماء ده أهو صحابة، هم أعلم العلماء، ومش واحد قدام واحد، فئة قدام فئة، فدي حاجة تانية تخلي العلماء.
هديكم مثلاً مثال عشان تفهموا برضه يعني إيه، بعد ما ترفع من الركوع، تقبض يعني تقف تحط إيدك اليمين على الشمال، ولا ترسل تحط إيدك في جنبك؟ مش وقته ده، مسألة مختلف مختلف فيها العلماء. طب دول إيه دليلهم ودول إيه دليلهم؟ الدليل واحد، دليلهم هو نفس الدليل، النبي عليه الصلاة والسلام قال: «فإذا رفع فليستقم رافعاً أو قائماً حتى يرجع كل عظم إلى موضعه»، فدول يقولوا إلى موضعه قبل الآية قبل الركوع، يبقى تحط إيدك اليمين على الشمال، والتانيين يقولوا إلى موضعه الطبيعي فييبقى إيدك جنبك. نفس الجملة، نفس الحديث، فده سبب تاني يخلي العلماء تختلف.
سبب تالت ممكن يخلي العلماء تختلف، العلماء يتفقوا يقولك لا، ده الحديث صحيح عندك وصحيح عندنا كمان والمقصود بيه كذا والمقصود بيه عندنا كمان كذا، لكن الواقعة دي مش بتاعت الحديث ده، يعني حديث لا سبق إلا في ثلاث نتفق عليه كلنا ومش عارف وبعدين الصورة دي تسمى سبق يختلفوا حادثة بعينها، فتلاقي العالم يقول على الحادثة دي تجوز وواحد تاني يقول على الحادثة دي لا تجوز، ففي أسباب كتير تخلي العلماء تختلف.
طبعا من الكتب المشهوره المصنفة في هذا كتاب، حد يعرف؟ رفع الملام، آه، رفع الملام كتاب مهم اللي عاوز يقراه ويفهم يعني هذه الحيثية ممكن يقراه. فإحنا بنعمل إيه دلوقتي؟ بنعتذر للعلماء عن اختلافهم هذا، يعني مش بنعتذر، بنفهم إحنا، يعني إحنا أقوالنا نعتذر لهم يعني على على شيء، فعلى كل حال وقع الاختلاف.
ما تجيش أنت تهجم على الدليل وتريد بذلك أن تجمع الأمة على قول، غيرك ما عملش ده وأكبر منك وأجل وما عملش ده. الإمام مالك، سيدنا الإمام مالك رحمه الله، لما طلب منه ذلك أنه يضع كتاباً ويجمع عليه الناس، يبقى كل الناس خلاص هو ليهم كلمة مالك بتقول كذا، أبى ذلك، قال لا، ما أعملش كده.
تاني حاجة عاوزين نقولها هنا يا شباب، يعني اعرفوا قدر هؤلاء الأئمة، مش في الفقه، في العلم، في الديانة، دول يا جماعة كانوا أولياء نحسبهم كذلك، ولما نقرا عن عبادة هؤلاء وديانة هؤلاء وورع هؤلاء وأحوال هؤلاء مع رب العالمين سبحانه وتعالى، فهؤلاء أجل من أن يتقولوا على الله عز وجل بغير علم. عشان الجرأة اللي عند بعض الشباب الصغير اللي عادي كده يقال له ده قول فلان وفلان وفلان، يقول لك إيه: ارمي في الزبالة، معانا الدليل.
الدليل إيه اللي معاك اللي ما يعرفوش؟ وبعدين تقول طب هات دليلك، فتلاقيه مثلاً حديث في الصحيحين، يعني يعني الإمام أحمد ما يعرفش الحديث اللي يعني أنت يعني الحديث المتفق عليه ده أحمد بن حنبل ما يعرفش الحديث المتفق عليه وأنت اللي عرفته؟ فانت لو داخل العلم بهذه النفسية لن تنال شيئاً خالص، بل تدخل بنفسية المنكسر المعترف بجهله أمام هؤلاء الأئمة الأعلام، وتقعد تسمع قالوا إيه وفهموا الدليل إزاي وناقشوه إزاي.
وإحنا بنقول كده يا جماعة، بنقول إن الأئمة نفسهم الأئمة الكبار بيردوا على بعض عادي يعني، عادي، بس مش بطريقتنا بتاعة دلوقتي اللي هي بتاعة الفيسبوك وتويتر والتيك توك، لا، لا ما فيش كده. فاختلف العلماء في هذه الأمور.
طيب، «إن الحلال بين وإن الحرام بين وبينهما أمور مشتبهات لا يعلمونه»، يبقى يعلمونه قليل من الناس، اللي هم مين؟ العلماء. طيب، يعني إيه يعلمون؟ يعني العالم ده لما بيقول كذا حلال، يحلف بالله إن كذا حلال؟ لا، ما يحلفش بالله ولا حاجة، قولي خطأ قولي صواب يحتمل الخطأ، الشافعي كان بيقول إيه؟ قولي صواب يحتمل الخطأ، وقول غيري خطأ يحتمل الصواب، إنما مش هيجي الشافعي يقول إيه ده كده والله العظيم هو اللي مش عارف إيه، وقالوا الشافعي لما صنفها وبعدين كتب الوضوء كتب بقى باب الوضوء فكتب في نهاية باب الوضوء: هذا أكمل الوضوء إن شاء الله تعالى، إحنا بنتكلم في الوضوء، هذا أكمل الوضوء إن شاء الله تعالى. شايفين أدب العلماء يا جماعة؟
لكن إحنا عشان ما عندناش علم عارفين اللي هو العلم ثلاثة أشبار، عارفين الكلام ده؟ من أخذ شبراً الأول تكبر، ومن أخذ شبراً الثاني تواضع، ومن أخذ شبراً الثالث علم أنه لم يعلم شيئاً. فلا تكن أبا شبر، فطول ما إحنا بشبر واحد كده ماشيين في العلم بشبر واحد وبعدين بالذراع واللي صوته أعلى واللي الفولورز بتوعه أكتر مش هنصل لشيء وهيفوتنا العلم الحقيقي.
عشان كده سيدنا الإمام الشافعي برضه كان يقول إيه: ما نظرت عالماً قط إلا وغلبته، وما ناظرني جاهل قط إلا وغلبني، اللي هو زينا كده على الفيسبوك كده لو الشافعي عايش وله أكونت على الفيسبوك كان زماننا كلنا كسبناه ونطلع فرحانين بقى، وأصل الجاهل ده الشافعي هيقعد يكلمه في حاجات يقول له إيه: ما لا، ماليش دعوة باللي بتقوله، والدليل بيقول، طب يا حبيبي تعالى نتكلم في الدليل، ما يعرفش هو يتكلم في الدليل ولا يفهم دليل ولا ولا تخريج مناط ولا تحقيق مناط ولا ولا ما يعرفش حاجة، بالذراع بالصوت.
فإحنا لو عاوزين يا جماعة نبقى من دول ولا من دول؟ لا من الناس اللي بتتسهل تساهلاً شديداً يميعوا الدين ويخرجوا مسخاً، واحد ما لوش كده ملامح في دين ربنا سبحانه وتعالى، ولا الناحية التانية نتشدد تشدداً يفقد الشريعة سماحتها التي أرادها الله لها. إحنا لسه بنقول لكم إيه؟ بدايه الكلام؛ مين اللي خلى في أمور مشتبهات؟ ربنا سبحانه وتعالى، هو الذي جعل الشريعة على هذا النحو ومن أول يوم، من أول يوم إن في نصور مش كل النصوص قطعية الدلالة، سيبكم من قطعي الثبوت، من أول يوم ده يعني سيدنا النبي عايش بينا عليه الصلاة والسلام، فاللي هيفوله قطعي الثبوت خلاص أنا سامعه بودني من النبي عليه الصلاة والسلام ما فيش بعد كده، ولا النبي ممكن يقول حديث ضعيف؟ ممكن فيش؟
واحد بيدي درس مرة في مسجد، واحد طيب يعني وبعدين بيقول حديث فواحد من إخواننا قاعد يقول له الحديث ده ضعيف، بص له قال له ضعيف يا ابني؟ النبي عمره ما يقول حديث ضعيف أبداً. فخلاص هو قطعي الثبوت أنا سامعه بودني وشايف النبي عليه الصلاة والسلام بيقول الحديث، إنما مش قطعي الدلالة.
طب النبي عليه الصلاة والسلام يعني يعجزه إنه يبقى كل ألفاظه قطعية الدلالة، ولا هو الفصيح البليغ صلى الله عليه وسلم؟ لا يعجزه، مش كده؟ لو أراد صلى الله عليه وسلم أن تكون كل ألفاظه قطعية الدلالة لو سمعها ألف واحد كلهم يفهموا نفس المعنى، لفعل صلى الله عليه وسلم. ولو أراد الله أن يجري على لسانه الشريف صلى الله عليه وسلم ألفاظاً قطعية الدلالة لفعل سبحانه وتعالى، لكن الشريعة ما جاتش كده، فما يجيش إحنا بقى إيه نحجر واسعاً.
ماشي، كان الشيخ بكر أبو زيد رحمه الله له كلمة في ده كان بيقول: من يدعو إلى جمع الناس على رأي واحد أو مذهب واحد في كل ما جاز فيه الخلاف فقد رام الشطط، ونفخ في غير ضرم، وتحجر وتحجر رحمة الله وهي أوسع، يعني هي أوسع مما رامه ذلك أو قصده.
يبقى إن الحلال بين وإن الحرام بين وبينهما أمور مشتبهات لا يعلمونه كثير من الناس، يبقى يعلمها قليل من الناس اللي هم العلماء. طيب، إحنا بقى الناس الطيبة المساكين اللي زينا نعمل إيه؟ نعمل إيه في المشتبهات دي؟ نعمل إيه في تلك المسائل التي تشتبه علينا؟ طريق الورع وطريق السلامة، أن نجتنب تلك المشتبهات اتقاء الخلاف، ده طريق الورع والسلامة، وهذا الذي أرشد إليه النبي عليه الصلاة والسلام، فمن فقال: «إن الحلال بين والحرام بين وبينهما أمور مشتبهات، فمن»، ها؟ «فمن اتقى الشبهات فقد استبرأ لدينه وعرضه».
فمسألة العلماء اختلفوا فيها حلال ولا حرام؟ نقول لك والله لو تركتها لله وخرجت من الخلاف كان ذلك أحمد لك، وهذا قاله كثير من الأئمة كابن تيمية، كشيخ الإسلام ابن تيمية كان يقول: الخروج من الخلاف أحمد من الوقوع فيه، أحمد من الوقوع فيه.
طيب هل معنى كده إن ده يبقى منهج عام؟ ما نقدرش نعمل كده يا شباب، ما نقدرش نعمل كده، لأن لو طبقنا ده هنضيق على الناس معيشتهم، إن في كل خلاف نقول الناس تطلع من الخلاف، ما نقدرش نعمل ده، طب أنا عاوز أعمله في خاصة نفسي؟ أصبت وكنت في درجة عالية من الورع، لكن ننقل ذلك الورع للناس ويبقى ده منهج عام؟ ما ينفعش نعمل ده، ما ينفعش نعمل ده، لأن في بعض الأحوال هنيجي نقول لك اخرج من الخلاف سيسبب ذلك ضيقاً شديداً في حياة هذا الشخص، والمسألة خلاص خلاف وفيها سعة، فلو سأل عالم وأفتاه على العين والراس، الموضوع انتهى خلاص. قول معتبر له حظ من النظر وأفتاه به عالم وأخذ به، خلاص أدى ما عليه، إنسان مقلد سال عالم، أفتاه العالم، خد بالفتوى وعمل بيها، خلاص، مواضيع بسيطة جداً جداً.
طيب، واحد قال لك لا، أنا هخرج من الخلاف، هخرج من الأمور المشتبهات دي واستبرئ لإيه بقى؟ أولاً استبرئ لديني، ودي واضحة وتكلمنا فيها، وكذلك يستبرئ لعرضه، سيدنا النبي ما قالش فقد استبرأ لدينه، قال: «فقد استبرأ لدينه وعرضه». ليه وعرضه يا شباب؟ علشان المسألة المختلف فيها دي غيرك شايفها حرام، أنت شايفها حلال وغيرك شايفها حرام، طبعا لو هو عالم أو واحد فاهم دين وشافك بتعملها هيبقى عنده الموضوع برضه في أريحية وسعة وفاهم يعني ما فيش مشاكل.
في طبقات الحنابلة القصة دي أنا بتعجبني جداً، كان في واحد في عهد الإمام أحمد رجل حنفي المذهب، والأحناف عندهم جواز النبيذ خلافا للجمهور، وبعدين أحمد خبط عليه الباب وكان قدامه إزازة نبيذ، فالخادم جه جري يشيل الآية؟ الإزازة، ما هو مين اللي داخل؟ الإمام أحمد، يعني ما فيش هزار دي، فقال هذا الرجل: مه، أنت بتعمل إيه؟ ائتني بثانية.
هاتلي كمان إزازة، حطلي إزازتين قدامي. فدخل أحمد فتكلم معه ساعة وانصرف، ولم ينكر عليه ذلك النبيذ، وكان أحمد يجل ذلك الإمام جدا. وكان إماماً ديناً، لكن هو خلاص يرى يرى ذلك.
ماشي، إنما معظم الناس مش بتفهم أن المسألة فيها خلاف. فما تضيقش على الناس، أو أو ما حتى لا يعني لا يقع في قلبي شيء من التنقيص لذلك الشخص إذا رأيته يفعل كذا، أو يقترف كذا، أو متلبس بكذا؛ مش كل الناس كده.
طيب، أنت ليه تحط نفسك في موطن شبهة؟ فقد استبرأ لدينه وايه؟ وعرضه. الأوزاعي كان بيقول: كنا نضحك ونمازح، أما وقد صرنا يقتدى بنا فلا وراء يسعنا التبسم، لأننا في موطن اقتداء. طب يعني هو الضحك حرام؟ هو لو زي ما قالش حرام، بيقول: احنا كنا بنضحك وبنهزر عادي جدا، لكن خلاص صرنا يقتدى بنا فكل شيء بحساب.
ومن قبل ذلك سيدنا النبي عليه الصلاة والسلام عارفين الحديث لما قام من المسجد مع صفية رضي الله عنها يرجعها إلى البيت، وبعدين بالليل فمش باين مين اللي مع النبي عليه الصلاة والسلام، واثنين صحابه ماشيين مدوا شوية، قال: على رسلكما إنها صفية. فقالا: سبحان الله يا رسول الله، يعني يعني أن نظن بك شيئا؟ لكن النبي عليه الصلاة والسلام قال: على رسلك دي صفية، أخبرهما بالأمر.
فده مهم يا شباب، والإمام علي له كلمة في هذا الأمر كان يقول: إياك وما يسبق إلى القلوب انكاره، حتى وإن كان عندك اعتذاره، فرب سامع نكرا، لا تستطيع أن تبلغه عذرا. الشباب اللي فاتحها سداح مداح في الفيسبوك في التعليقات مع بنات وبنات مع شباب، هنتكلم في مين في المفروض يعني هم متدينين أو غلاة أو تجاوزات شديدة في هزار وضحك وبتاع، أو الحاجات اللي شبه كده اللي أنتم عارفينها كلها.
ما تجيش تقول لي بعد كده هو ده وأنا بعمل حاجة حرام؟ بغض النظر ممكن يبقى في حاجات حرام في اللي أنا يعني بس نفترض أن كله، بس أنت حاطط نفسك في موطن شبهة جديدة. طيب ليه بتعمل كده؟ ليه بتعمل كده؟ إياك وما يسبق إلى القلوب إنكاره. ليه بتعمل حاجة الناس أول ما تشوفها تنكرها؟ طب عملت ولقيت ناس ابتدت تنكر وابتدت خلاص، احذف اللي أنت عملته. هو ممكن الواحد يعمل ومش يعني ايه مش حاطط في ذهنه أن دي ممكن تفهم خطأ؟ ممكن. بتحصل ساعات.
وبعدين لقيت لا تعليق واثنين وثلاثة وأربعة فاهمين الكلام غلط، خلاص احذف الكلام. فمن اتقى الشبهات فقد استبرأ لدينه وعرضه، ومن وقع في الشبهات وقع في الحرام، كالراعي يرعى حول الحمى يوشك أن يرتع فيه. يعني ايه الكلام ده بقى؟ طبعا العلماء ليه كذا تفسير في من وقع في الشبهات وقع في الحرام، لكن عاوزين تفسير واحد بس، وده اللي يعنينا دلوقتي. من وقع في الشبهات وقع في الحرام، يعني ايه يا شباب؟ يعني اللي هيقع في الشبهة وهو يعلم أنها شبهة، قليلا ويجسر على الحرام الذي يعلم أنه حرام.
فهمتوا دي؟ يعني واحد عارف أن دي شبهة، كان الأول يتورع يقول الشبهة خلاص ما ما اعملهاش. بعد كده شوية لا الشبهة اعملها والتانية اعملها والتالتة اعملها والرابعة اعملها وبقت ده حق ده ده ديدنه خلاص. شوية ويتجرأ أنه يقع في الحرام اللي هو عارف أنه حرام صرف. هي دركات، كلما نزلت دركة هتجرك للي بعدها مش هقف.
من رحمة ربنا بينا يا شباب، افهموا ده برده، أن خلانا الدين ما قاش على يعني قدر واحد من في الأحكام الشرعية. لا، احنا عندنا دايرة يعني لو نتخيل كده هي دواير جوة بعض لو تخيلنا كده يعني. فعندنا دايرة كبيرة جدا اسمها المباحات، بعدين دايرة تانية صغيرة جواها هنسميها خلاف الأولى. ودائرة هي دواير كلها جوة بعض كده يعني تخيلوا الرسمة كده دائرة جوة دائرة، خلاف الأولى هنسميها المكروه. ودائرة جوة المكروه أصغر هنسميها الصغائر. ودائرة جوة الصغائر أصغر خالص هنسميها الكبائر. مفهوم كده؟
فربنا مديك مساحة المباح، ما تجيش أنت تقعد إيه تقرب من خط الفاصل بين المباح وخلاف الأولى ده، شوية تدخل في خلاف الأولى يعني حرام اللي مش حرام لسه، وده من رحمة ربنا أنه خلى لك في إيه حواجز عشان ما تقتحمشي مرة واحدة تلاقي نفسك في الكبيرة. ماشي، بقيت الحديث إيه كالراعي يرعى حول الحمى يوشك أن يرتع فيه؟ يعني ايه الجملة دي؟ يعني ايه الجملة دي؟ الجملة دي هتفهمنا المعنى اللي بقوله ده.
بصوا يا شباب، زمان كان الملك أي ملك يبقى عنده حمى يا أما خاص به ليه هو، يا أما خاص بالخزانة الدولة، إيه الحمى ده؟ هو الملك عنده مثلا أحصنة بتاعته وعنده بهائم بتاعته هو ملكه الخاص. يقوم يجي ياخد حتة أرض كده بهائمه والحصنة بتاعته ترعى فيها، تتصورون أن الملك لما يجي ياخد حتة أرض للبهائم بتاعته، ياخد حتة أرض جدبة ولا خصبة؟ ولا مش عارفين يعني ايه جدبة؟ قلت جدبة محدش، جدبة يعني ايه؟ يعني ايه؟ آه يعني مفيهاش آه يعني مفيهاش. طبعا الملك مش هيعمل كده، هيروح جاي واخد أرض خصبة، أخصب أرض تبقى بتاعت الملك، ودي يبقى اسمها حمى الملك دي بتاعت الملك.
طيب هو الأرض الخصبة دي يا شباب في خط فاصل كده هنا خصب وبعديه جدب، ولا الخصوبة بتتقل شوية بشوية؟ بتتقل شوية بشوية، يعني أرض خصبة خصوبة شديدة تلاقي الخصوبة بتتقل مع المسافة كده لغاية ما يبقى بعد كده إيه جدب. حمى الملك في الحتة الخصبة خصوبة شديدة دي، يقوم يجي الرعاة يعملوا إيه؟ يجيوا يرعوا جنب حمى الملك عشان ياخدوا شوية خصوبة من اللي بره الحمى، مش من اللي جوة الحمى. كالراعي يرعى إيه؟ حول الحمى.
طب الراعي ده لو غفل عن الغنم، الغنم هيعمل إيه؟ هيخش جوة الحمى يوشك أن يرتع فيه. طب لو دخل جوة الحمى، تتقطع رقبته. هو ده الحديث: كالراعي يرعى حول الحمى يوشك أن يرتع فيه. واحنا قلوبنا كلها غنمات، غنم اسمها حب النساء، وغنم اسمها حب المال، وغنم اسمها حب الشهرة، وغنم اسمها حب الرئاسة، وغنم اسمها حب الظهور، وغنم اسمها الانتصار للنفس. وأنت عمال واقف على الحمى، مش هتعرف تمسك الغنم ده كله، مع أقل شيء يستفز الغنم جوة الحمى، هتقخش جوة الحمى، يوشك أن يرتع فيه.
ألا وإن لكل ملك حمى، ألا وإن حمى الله محارمه، الدايرة بقى اللي هي الصغيرة. فاكرين نرجع بقى للمثال بتاعنا، عندنا دايرة اسمها صغائر ودايرة جواها أصغر اسمها الكبائر. وربنا من رحمته بينا يا جماعة، عشان أسألك إيه هو ليه ما في حاجة اسمها مكروه في الدين وحبوا دين ربنا، حبوا الشريعة دي رحمة، عشان لو أنت فهمت الحكمة من وجود المكروه مش هتدخل في الحرام.
يا جماعة مش ربنا كان قادر جل وعلا أنه يخلي دايرة المكروه دي حرام؟ مش معنى أنه مكروه أن ربنا يكرهه برضه ولا لا؟ يكرهه. فخلاص ما هو الحرام ربنا يكرهه والمكروه ربنا يكرهه لكن بدرجة أقل. كان ممكن يبقى الدايرة الكبيرة شوية دي كلها حرام، وأي حد هيخش وقع في الحرام ويأثم. ربنا كده رحمة بنا.
طب ما يشيل الدايرة المكروه دي وخلاص ما يبقاش في حاجة اسمها مكروه؟ هتلاقي نفسك فين؟ على خط الحرام. فهمتوا دي؟ فدي رحمة من ربنا بينا أن في دايرة المكروه. كالراعي يرعى حول الحمى يوشك أن يرتع فيه.
يبقى اللي هيقع في الشبهات وتجرأ على ذلك قليلا، وقع في الحرام. في حديث جميل للنبي عليه الصلاة والسلام، قال صلى الله عليه وسلم: «لعن الله السارق؛ يسرق البيضة فتقطع يده، ويسرق الحبل فتقطع يده». ايه معنى الحديث ده؟ برده اختلفوا في معناه، لكن عاوزين معنى من المعاني اللي قالها العلماء. الأول يا شباب، أنتم عارفين مش أي حد يسرق حاجة تتقطع إيده، لازم يبلغ نصاب القطع.
يعني مش أي واحد هيدي يسرق حاجة حقيرة، ياخد مثلا سواك من الأرض يسرقه ويجري نقول له تعالى أنت في حد عليك أن تقطع يدك يدك؟ لا، مش كده. لازم يبلغ نصاب معين لو بلغه، يعني الحاجة المسروقة دي ليها قيمة معينة. لو بلغت القيمة دي تتقطع إيدك، فهمنا دي؟ طيب، البيضة لا تبلغ تلك القيمة، البيضة أحقر من أن تبلغ قيمة القطع نصاب القطع، وكذلك الحبل لا يبلغ قيمة الـ. فسيدنا النبي بيقول حاجة عجيبة جدا عليه الصلاة والسلام، بيقول: لعن الله السارق يسرق البيضة فتقطع يده، ايه ده؟ إزاي؟ ما هو البيضة لا تقطع فيها اليد لأن قيمتها حقيرة، ويسرق الحبل فتقطع يده، طب إزاي ده الحبل حقير لم يبلغ قيمة القطع.
العلماء قالوا: لا، هو مش كده. هو ده الأول ما كانش يحلم إنه يسرق حاجة كبيرة، مش في دماغه يبقى حرامي. لكن وهو في تالتة إعدادي كده كان يسرق سندوتش من شنطة زميله، يسرق المسطرة اللي مع مش عارف إيه. الموضوع كبر شوية في تانية ثانوي وبقى ياخد حاجات أكبر شوية، لكن برده لسه حاجات قيمتها قليلة. خلص الجامعة بقى إيه رئيس عصابة، اتقفش اتقطعت إيده. بدايته كانت إنه سرق بيضة أو حبل، هو ما اتقطعتش ما اتقطعتش إيده في البيضة والحبل. لعن الله السارق سرق بيضة فما زال يتجاسر على سرقة ما هو أعظم وأكبر من البيضة، حتى سرق شيئا ذا قيمة فقطعت فيه يده.
طب ليه ده حصل؟ عشان النفس يا جماعة ما بتقفش على حد معين، النفس ما بتقفش. هتسيب الزمام لنفسك، اعرف أن هتاخدك لحته أسوأ. لازم مش مش هتقف، مش هتقف في حته. وكل واحد هنا لو جاتله الفرصة إنه يمسك المايك ويتكلم عنده قصته الشخصية لذنب معين، كان يقول: أنا مستحيل أعمل ده، النهارده بيقول: إزاي أبطل كذا.
طب البداية كانت إيه؟ مش ده على طول الذنب اللي هو كان بيقول في يوم من الأيام أنا مستحيل أوصل للحته دي. هو وصل لها، يعني نام ما بيعملش حاجة، صحي بيعمل الذنب لا. هو نام وهو واخد خطوة ناحية الذنب صغيرة، وكان ضميره بيأنبه لغاية ما خلاص اعتاد الخطوة دي. بعد شهر، اتنين، سنة، اتنين راح واخد خطوة تانية، وكان ضميره بيأنبه ويمكن يصحى يعيط ويعمل، شهر، اتنين، سنة، اتنين اعتاد، خد الخطوة التالتة لغاية ما وصل للحاجة اللي من 10 سنين ولا أقل ولا أكثر كان بيقول مستحيل أعملها. صح يا شباب؟
فييبقى من اتقى الشبهات فقد استبرأ لدينه وعرضه، ومن وقع في الشبهات وقع في الحرام، كالراعي يرعى حول الحمى، ولذلك قال الله عز وجل في في كتابه برده إيه عاوزين نفهمها، قال ذلك بما عصوا وكانوا يعتدون، إيه بداية الآية؟ لعن الذين كفروا من بني إسرائيل على إيه لا؟ ها؟ آية البقرة إيه؟ ها؟ ذلك بأنهم كانوا يحسنون ذلك، ذلك بأنهم كانوا يكفرون بآيات الله ويقتلون النبيين بغير الحق، ذلك بما عصوا وكانوا يعتدون.
بعض المفسرين ذهب إلى أن قول الله عز وجل ذلك الثانية تعود إلى الكفر وقتل الأنبياء. تعالوا بقى نفهم الآية: ذلك بأنهم كانوا يكفرون بآيات الله ويقتلون النبيين بغير الحق، ذلك بما عصوا وكانوا يعتدون. يعني هما في البداية ما جاْش في دماغهم أنهم يكفروا ويقتلوا الأنبياء، ما جاْش في دماغهم ده أصلا، لكن كانوا عادي يستمرئون المعصية والاعتداء، فعصوا واعتدوا. فالمعصية الصغيرة تاخدك لمعصية كبيرة، والكبيرة تاخدك لأكبر إلى أن كفروا بالله وقتلوا أنبياء الله. فهمتوا دي؟ ولذلك قيل المعصية بريد الكفر، المعصية بريد الكفر، فأنت ما تضمنش.
كالراعي يرعى حول الحمى يوشك أن يرتع فيه. ثم ختام الحديث، ودي قاعدة كبيرة جدا في من قواعد السلوك إلى الله. يعني اللي أنا هقوله دلوقتي ده دي قاعدة من قواعد السير إلى الله تعالى: «ألا وإن في الجسد مضغة إذا صلحت صلح الجسد كله، وإذا فسدت فسد الجسد كله، ألا وهي القلب». دي قاعدة من قواعد السير إلى الله. إيه علاقة آخر الحديث بأول الحديث؟ من أول هنا بقى الكلام مهم لينا كلنا خلاص. الكلام اللي اللي قبل كده كان ممكن يبقى عالي شوية على الناس، أو بعض الفئات مش مهتم قوي باللي أنا قولته، من أول هنا بقى مهم لينا كلنا.
إيه علاقة آخر الحديث بأول الحديث يا جماعة؟ ليه سيدنا النبي عليه الصلاة والسلام يختم ذلك الحديث بتلك الجملة الشريفة؟ أن الحلال بين والحرام بين وبينهما أمور مشتبهات، فمن اتقى ومن وقع. إيه اللي هيخليك تعمل ده أو ده؟ قلبك، قلبك، فاهتم بقلبك.
يعني ايه يا شباب؟ يعني اللي عاوز ما يقعش في الحرام مش بس كفاية أنه يعرف الحلال والحرام، مش كفاية. يا جماعة فرعون كان يعرف ولا ما كانش يعرف؟ إيه رايكم؟ أنتم ايه شاكين؟ يعرف ربنا اللي قال كده مش أنا: ﴿وَجَحَدُوا بِهَا وَاسْتَيْقَنَتْهَا أَنفُسُهُمْ ظُلْمًا وَعُلُوًّا﴾ [النمل: 14]. عايد على إيه ظُلماً وعلواً؟ جحدوا، يعني استيقنتها أنفسهم وجحدوا بها ظلما وعلوا.
يبقى فرعون كان إيه؟ مستيقن. وموسى قال له إيه؟ ﴿لَقَدْ عَلِمْتَ مَا أَنزَلَ هَٰؤُلَاءِ إِلَّا رَبُّ السَّمَاوَاتِ وَالْأَرْضِ بَصَائِرَ﴾ [الإسراء: 102]. علمت، اهو. ففرعون يعلم، فمش كفاية أنك تعرف. ليه مش كفاية أنك تعرف؟ عشان احنا عندنا قوتين: قوة علمية وقوة عملنية. أي خلل في قوة من القوتين تضيع، ولذلك كان في الدعاء: أرنا الحق حقا. بس.
لأنك ممكن ترى الحق حقا ولا تتبعه، وترى الباطل باطلا وتبعه. مش كده؟ المشكلة فين؟ قلبك، قلبك شكله ايه؟ قلبك شكله ايه؟ السؤال الآن: من منا يهتم بقلبه؟ خليني أديكم مثال. دلوقتي لو جاي لك حد يزورك في بيتك، حد كريم عندك وله قدر. وله قدر دي مش يعني لا، يعني مثلا ملك من ملوك الدنيا، منصب كبير جدا في الدولة، وجاي يزورك في بيتك، هتعمل ايه قبل ما يجي؟ ها؟ هتعملوا ايه؟ مش هتعملوا حاجة؟ تقولوا كده أروق وعلينا كده بأي كلام. هتروق وتنظف وتجيب مش عارف إيه تحطه هنا، وت... مش كده؟ ليه؟ لأن ده محل نظر ذلك الملك. أوضة نومك هتعمل فيها حاجة؟ أنت ممكن تدخل كل الكراكيب اللي بره في أوضة النوم، المهم محل نظر الملك يبقى كويس، مش كده؟
يجي... جاي زيارة، يقوموا عاملين ايه؟ دهنين الرصيف اللي هيعدي عليه بس. طب جوه؟ خرابه. ليه؟ وده احنا هنعمله، يعني احنا لو احنا في بيتنا هنعمله، هو هيجي يبص على الحتة دي، فأن هروق له الحتة دي. ولله المثل الأعلى، نظر الرب إلى قلبك، نظر الرب إلى قلبك: ﴿إِنَّ اللَّهَ لَا يَنظُرُ إِلَى صُوَرِكُمْ وَلَا أَمْوَالِكُمْ وَلَكِن يَنظُرُ إِلَى قُلُوبِكُمْ وَأَعْمَالِكُمْ﴾. فنظر الرب إلى قلبك، وده أخطر ما في القلب. أخطر ما في القلب أنه محل نظر الرب سبحانه وتعالى.
فأنا لو سألتك دلوقتي، خلاص عرفت إنه محل نظر ربك سبحانه وتعالى، أنت خطتك إيه لتنظيف قلبك؟ المفروض لو عشوائي قفشت أي واحد كده وقلت له: خد بقى قول لنا عندك خطة. ما هو لو ما عندهوش خطة، زي بالظبط كده، مش بالظبط طبعا ده أعظم وأجل، اللي هو عارف إن بكره جاي له الرئيس أو الملك أو الوزير أو مش عارف إيه، ويقول له: هتعمل إيه في البيت؟ يقول له: مش عارف والله. الراجل خلاص ربع ساعة وداخل عليك ما مش عارف والله! وده الراجل تحت، طب مش عارف والله! فانت لو ما فيش خطة أنك بتنظف بها قلبك الذي هو محل نظر ربك سبحانه وتعالى، أنت في مشكلة كبيرة، أنت في مصيبة كبيرة. طب بجد؟
«ألا وإن في الجسد مضغة إذا صلحت صلح الجسد كله، وإذا فسدت فسد الجسد كله، ألا وهي القلب». فإذا صلح ذلك القلب صلح الجوارح، وأتيت الحلال واجتنبت الحرام. في قول لأهمية القلب: أول حاجة إنه محل نظر الرب، ثاني حاجة... وعارفين يا جماعة، عشان كده احنا عاوزين تطهير القلب ده يبقى أولا نطهر، ثانيا نزينه بالفضائل. زي كده الراجل اللي جاي لك البيت ده، أول حاجة هتشيل... هتكنس، تشيل التراب ومش عارف إيه وبتاع، وبعدين تبتدي تجيب الفازة تحط هنا فازة، تحط هنا شوية ورد، ترش معطر، مش كده؟ أه، يبقى أنت نظفت البيت من الحاجات، من القذارة، وبعدين جملت البيت.
كذلك نريد ذلك في القلب. القلب مهم أولا لأنه محل نظر الرب سبحانه وتعالى فنطهره، أول حاجة ننظفه من الأدران، ثم نجمله. يبقى لازم أول حاجه تعرف إيه مشاكل قلبك، وازاي تنظف المشاكل دي. فنقول لك إن مثلا من المشاكل الرياء، فلو سألتك دلوقتي: ازاي تعرف أن عندك رياء، وازاي تعالج الرياء لو عندك رياء؟ لازم عندك رد. من المشاكل الحسد، فأقول لك: ازاي تعرف أن عندك حسد، وازاي تعالج ده لو طلع عندك؟ تعالجه ازاي؟ خلي بالك، ده المفروض لما أقول لك كده، لما أسألك السؤال ده، تكون أنت ماشي في خطة العلاج أصلا. ففكرة أن أنت ما أنتاش عارف: ازاي أعرف أن عندي ده؟ وازاي أعالج دي؟ مصيبة كبيرة جدا.
خلصنا، نظفناه، نقعد بقى نجمله ونحط الفازة والورد والحاجات دي. يبقى نكلمك في التوكل، ونكلمك في الخوف والرجاء، ونكلمك في الإخبات؛ المعاني التي يجب أن تجمل بها قلبك. فازاي تعرف الحاجات دي؟ وازاي تعرف تتدرب عليها؟ طيب، اللي مش عارف الكلام ده يعمل ايه؟ عندكم ربع المهلكات، دي أبسط حاجة ممكن تاخدوها؛ ربع المهلكات في مختصر منهاج القاصدين، وربع المنجيات، تسمعوا شرح لده وشرح لده.
خلاص لأي حد، طبعا أنا الحمد لله شارحين الاتنين، على هتلاقيه على التليجرام وعلى بقية الحاجات. وربع المهلكات هيبتدي ينزل له كمان شرح مصور على القناة العلمية في اليوتيوب إن شاء الله، وهو كده كده خلصان على التليجرام بس الشرح اللي هينزل أوسع شوية. فده مهم؛ كون الإيمان في مزيد، وصفاء القلب ذات جديد، بكثرة الصلاة والطاعات، وترك ما للنفس من شهوات؛ فشهوة النفس مع الذنوب موجبتان قسوة القلوب، وإن أبعد قلوب الناس من ربنا الرحيم قلب قاسي. فلازم تعرف ازاي تنظف قلبك ده.
ثاني حاجة تجعل للقلب أهمية، أن الطريق إلى الله تقطع بالقلوب لا بالأبدان. الطريق إلى الله تقطع بالقلوب لا بالأبدان. يعني إيه تقطع بالقلوب؟ يعني عمل قليل لكن مع قلب نظيف تصل به مراتب عليا. يطلع عليكم رجل من أهل الجنة، عارفين الحديث كلنا صح؟ يطلع واحد تاني يوم سيدنا النبي يقول نفس الكلمه عليه الصلاة والسلام، يطلع نفس الراجل، تالت يوم نفس الراجل. عبد الله بن عمر قال: لا، ده في قصة، عاوزين نعرف الراجل ده بيعمل إيه، يعني ليه من أهل الجنة؟ بيقيم بقى الليل كله، ما بينامش، كل يوم صوم، بيصوم كل يوم، بيعمل إيه؟ عاوزين نعرف. راح قعد معاه في البيت تلات أيام، لقاه زيّه زي الصحابة عادي جدا، يعني عبادته زي عبادة الصحابة، العادي ده بالنسبة لنا، يعني... يعني زيّهم، يعني ما فيش. قال له: لا بقى، أنا عاوز أعرف في إيه ده! أنت حصل قصة كده، النبي عليه الصلاة والسلام قال عليك تلات مرات: يطلع عليكم رجل من أهل الجنة. أنت بتعمل إيه؟ قال له: والله ما رايت، ما عملتش حاجة غير كده، لكن في حاجة بس بنزودها، إيه هي؟ عمري ما أنام وفي قلبي غل على حد من المسلمين، أو حسد، أو أجد في قلبي شيئا على أحد من المسلمين. بس، ما عنديش حاجة زيادة عن اللي أنت شوفته، غير أن قلبي مختلف شوية. فكان من أهل الجنة هذا الرجل.
إن بالمدينَة أقواما ما سرتم مسيرا ولا قطعتم واديا إلا شاركوكم الأجر. طب بايه؟ بالنية التي محلها القلب. فالطريق إلى الله تقطع بالقلوب، فلازم نهتم بقلوبنا يا شباب، نهتم بقلوبنا تخلية وتحلية. ولو أنت في حياتك ما حطيتش خطة غير لده، كفى بها. أنت اللي تحتاجه واحد مسلم صالح، يعني مش حد طالب علم، اللي محتاجه من العلم الشرعي قليل جدا ويتلم في مدة وجيزة، اللي محتاجه... اللي هو ما لا يسع المسلم جهله. وبعدين نقول لك بقى ده طريقك بعد كده: تصفي قلبك، وتجمل قلبك. على طول في قراءات، في سماعات، في عبادات، في أوراد تاخد قلبك من حتة لحته، طالما أنت ما أنتاش طالب علم، خلاص.
والحمد لله رب العالمين، خلينا ناخد كم سؤال كده. بيقول: ما رأي فضيلتكم أن المرأة لا ينبغي أن تتزوج بمن هو أقل منها دينا، حتى ولو كان صالحا أو ملتزما، أو أن الرجل لا ينبغي أن تتزوج بمن هي أعلى منه؟ ما هي نفس الكلام، يعني بتلف السؤال ليه؟ أنا رأي أن المرأة لا تتزوج والرجل لا يتزوج! مش عارف أنا إيه أقل وأعلى؟ عندنا مسطرة بنقيس عليها يعني ولا إيه؟
أصل هي ممكن، أنا دايما الأسئلة اللي شبه كده بخاف أرد عليها، ليه؟ بيبقى أنا ممكن عندي تصور ذهني والسائل... يعني أنا ممكن يبقى عندي تصور ذهني، مثلا، مثلا: أن هي بتقيم الليل إحدى عشرة ركعة وهو يقيم الليل مثلا تسع ركعات، فهو أقل منها دينا فجاوب على الأساس ده. أنا ما بقولوش بقى، وهي مثلا لا متقدم لها واحد بيشرب خمرة وحرامي وده الأقل دينا فتقول الشيخ عادي اتجوزوا الأقل دينا! فانا مش عارف إيه اللي عندنا مسطرة بتقول يعني ده أقل دينا وده أعلى. إنما لو هو... الحديث النبي بقى واضح، عليه الصلاة والسلام: «إذا جاءكم من ترضون دينه وخلقه فزوجوه». فإذا أنت مرتضى دينه، حتى لو أقل منك بشوية، بس دينه مرتضى... مرتضى لك، اتجوزيه خلاص، إيه المشكلة؟ ماشي، بس الدين والخلق، مش بس الدين، يبقى الحاجتين. والناحية التانية: «فاظفر بذات الدين تربت يداك». ماشي، يبقى يبقى هنا المقياس إيه؟ أن أنت راضية دينه. هو بقى أقل شوية منك، نقول لك: يبقى أنت عندك كبر وعجب ورؤية نفس، روحي تعاجلي! هو أنت إيه؟ المفروض احنا نشوف كل الناس أحسن مننا، مش بهزار على فكرة. يعني أنا... أنا أمجد أهو لما أجي أشوف حد ماشي في الشارع أقول: ده أحسن مني. طب ده جاهل؟ هو أحسن مني، أنا اتعلمت وما عملتش باللي أنا اتعلمته، عرفت الحرام واقتحمته، وعرفت الواجب وتركته، ده أحسن مني. يبقى نشوف كل الناس أحسن مننا، فانت جاية بقى شايفة نفسك علينا؟ لا، احنا عندنا طلاب علم جامدين هنا، خلي بالك، يعني ما... هحكي حكاية بس بلاش بقى عشان...
إيه حكم الدعاء بشيء معين أو شخص معين كالدعاء بالزواج من فلانة بعينها؟ وهل هو تجاوز على الله في الدعاء؟ ما أنت ما تعرفش فلانة دي هي الخير ليك ولا لا. يعني حتى سيبك من الدين حتى، العقل يقول إيه؟ يقول أنك تسأل ربنا الخير، العقل يقول كده، يعني بعيد حتى لو مش دين، العقل يقول أنك تسأل ربنا الخير. مش لازم عشان قلبك مال لواحد تبقى هي الملائمة لك في الحياة، مش لازم. هو أنتم عارفين آخر إحصائية في مصر عندنا؟ حالة طلاق كل دقيقتين ونصف، دي آخر إحصائية. أنا بقول لكم معظم تلك الحالات لناس عاشوا قصص حب قبل الجواز، لأن هو ده المتعارف عليه هنا، احنا مش بنتكلم في حلال وحرام دلوقتي، بنتكلم في واقع، في واقع!
معظم الزيجات الحاصلة في البلد: زيجات صالونات، ولا حب وغرام ولاڤ لاڤ في الجامعة والمعظم كده، مش كده؟ كل واحد حب واحدة وعاش معها قصة حب وراحوا اتجوزوا، كان متخيل إنه هيطلق؟ ما كانش متخيل إنه... أنت عرفت منين أنت؟ عندك كم سنة يا كتكوت؟ سمعت... لا، سمعت، عارف منين ده إنه لا...؟ فما كانش متخيل إنه هيطلق. فأنت بقى... يعني اللي أجدع من كل دول يعني اللي طلقوا دول؟ أنت أجدع منهم؟ كل واحد فيهم بيقول إيه؟ أنا عمري ما أطلق، وأنا أفديك بدمي وأفديك بروحي ومش كده. فانت ما تعرفش الخير فين، فاسأل الله الخير لك، وأنت اسألي الله الخير لك، وترضى بقى بقضاء ربنا سبحانه وتعالى.
ماشي. أهلي مصممين أطلع معهم المصيف، إيه الحل؟ السؤال ده مهم، وكثير من الشباب بيبقى يعني مش عارف يعمل ايه. يعمل إيه بقى؟ أول حاجة تلجأ إلى الله، دي أول حاجة، أنك... تشوف أن الحل مع ربنا مش مع أهلك. يعني ما تقعدش سايب ربنا خالص وعمال تعافر مع أهلك، لا، هي قلوب العباد بين أصبعين من أصابع الرحمن، مش كده؟ فتلاقي المصيف اتلغى! ممكن. جت تسونامي وغرق الشط، وأي حاجة تحصل يعني، قلب أبوك أو قلب أمك ينصرف عن ده خالص، وبدل ما كانوا متحمسين للمصيف ينقبضوا ما يروحوش المصيف، أو تأتي فرجة أن إيه؟ بعد ما كانوا ماسكين فيك بإيديهم وأسنانهم تلاقي الموضوع خف: ولا خلاص يا أبني، أنا عاوز تفضل خليك.
يبقى لازم يكون لك حال مع ربنا سبحانه وتعالى، أن ترى تسليط الأب عليك بأنك لازم تطلع المصيف، تراه فعل الله مش فعل أب. ﴿وَلَوْ شَاءَ رَبُّكَ﴾... ولو شاء الله لسلطهم عليكم. فترى تسليط الأب عليك والأم ده فعل ربنا سبحانه وتعالى. طب ليه يا رب؟ ليه بتسلطهم عليا؟ فتشوف حاجات أنت مقصر فيها؛ تبقى بتشوف أباحيات؟ أنت مش عاوز تطلع المصيف ليه؟ يقول لك: عشان المتبرجات وبتاع. طب أنت ممكن تكون بتشوف أباحيات، أو لا تتورع عن الفرجة على الأفلام والمسلسلات اللي بيبقى فيها مناظر أشد من المصيف، فتترى الله عز وجل الصدق منك، تقول: لا يا رب، وأعاهدك من الآن ما فيش أباحيات، ما فيش تساهل في النظر للمتبرجات، عشان ربنا يصرف عنك هذا الحرام الذي هو من جنس ما تقع فيه أصلا وتتزرد عليه إذا خلوت بربك سبحانه وتعالى.
فيطقى... يبقى ليك حال مع ربنا سبحانه وتعالى، وترى أن الكون لا يكون شيء فيه إلا بتصريفه سبحانه وتعالى، دي حاجة. الحاجة التانية: خلاص، ليك حال مع ربنا سبحانه وتعالى، وممكن بقى إيه؟ تستعين بحد في الدنيا من أسباب الدنيا، يعني... يعني تشوف عمك لو متدين شوية، خالتك متدينة شوية، يفهموا الكلام ده، فيعني تقول لهم: تعالوا إيه ساعدوني في أن إيه يمنعوني من أن أنا أطلع معاهم أو كده، وإن شاء الله ربنا يصرف عنك ذلك.
كنت مرة في مكان عام يعني، وبعدين ست كبيرة سبعين سنة كده ولا حاجة شافتني ملتحي، فقالت لي: تعالى اقعد معايا شوية عاوزة أتكلم معاك. رحت لها قعدت معها. قالت لي... قعدت أتكلم معها شوية، فايه الظاهر عجبها طريقتي كلامي أو حاجة، ما أعرفش يعني ربنا بقى يعني شرح صدرها، ما أعرفش يعني إيه اللي حصل، قالت: أنت يعني حد كده سهل، يعني ملتحي يعني... ما أنا أصل أنا ابني زيك كده بس شديد قوي، بنقول له...
يا ابني روح مع بنات خالتك على البحر. ما يرضاش، يرضيك؟ تسألنا أنا بقى. طبعا أنا إيه سهل، فقلت لها يرضيه. لا طبعا ما قلتش.
فطبعا أنا أرد أقول إيه؟ قلت لها: إزاي يرد عليكي بالطريقة دي؟ هو أنا ما أعرفش هو رد إزاي، أنا مش عاوز أرد على السؤال. قلت لها: إزاي يكلمك بالطريقة دي؟ لا ما ينفعش طبعا، لازم يكلمك بأدب، ويمكن يكون بيتكلم باحترام برضه، أنا ما أعرفش، بس أنا في الآخر بقى قلت لها: بس يعني ينفع؟ طب هو ولد وشاب عنده شهوة ويشوف بنات قاعدين. فقالت: والله عندك حق يا ابني، صح. فالأمهات ساعات بتبقى عاوزة إيه يعني برضه داخله كده، وربنا إن شاء الله.
سألت عالمين، واحد قال برأيه والثاني قال برأيه بخلافه، أعمل أنا دلوقتي؟ أنت بتنرفز ليه؟ ما تخلينيش أتنفز، أول إن شاء الله ما عملت هرمي الورق في وشك. لا، أنت لو ذهبت فسألت من تثق في علمه ودينه فافتاك، لا تسأل ثانٍ خلاص. يعني رحت لواحد بتثق في علمه ودينه واستفتيته فافتاك، ما تسألش حد بعده خلاص، خد بفتواه واعمل بيها. حاك في صدرك شيء، مش هوى، يعني شاكك كده، فسألت ثانياً، الثاني ده له حال من اثنين: يا إيه يفتيك بنفس فتوى الأول، ما تروحش بقى تسأل واحد ثالث؛ يفتيك بخلاف ما أفتى به الأول، فلك أن تسأل ثالثاً، ولو وافق بقى الأول تأخذ بالفتوى دي، وافق الثاني تأخذ بالفتوى دي. إنما ما تقعدش تتنطط بين الناس في نفس السؤال خلاص.
لو في رأي منهم أحب إلي، ده يعني أن الآخر هو الأقرب للحق غالباً؟ آه. يعصي هواك؟ يعصي هواك غالباً، آه، مش بقول دائماً، بس غالباً، آه. ماشي.
واحد بيسأل عن الوسوسة. إحنا كده خلاص. طب خلاص بقى كفاية كده. أقول قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير