أما بعد؛ فالحقيقة من الأسئلة التي تتكرر ويسأل عنها الجميع، سواء أحد متدين أو أحد لسه داخل في طريق التدين، يعني دايما شاغل دماغ الشباب وهو كيفية الجمع بين الدين والدنيا؛ ازاي نجمع بين الدين والدنيا؟ أو إيه هي الطريقة المثلى للجمع بين الدين والدنيا؟ سؤال بيتكرر كتير بألفاظ مختلفة.
والحقيقة من السور التي أجابت على هذا السؤال إجابة شافية سورة الحديد. سورة الحديد يا جماعة سورة مكية ولا مدنية؟ سورة الحديد مدنية في قول جمهور أهل العلم، سورة الحديد مدنية خلاص السورة رقم 94 على حسب ترتيب النزول، فهي نزلت في المدينة؛ يبقى إذن إحنا بنتكلم عن نفسية إيه؟ نفسية الفئة المؤمنة خلاص استقرت وبتقيم دولة وهبتدي إشكالات أخرى تظهر؛ إحنا عارفين الإشكالات اللي كانت بتظهر في الفترة المكية فترة الاستضعاف هي إشكالات في حته إيه؛ اللي هو لو يعني تسلطوا علينا هيقتلونا، مش الواحد مش عارف يظهر إيمانه، الواحد مش عارف يدعو إلى الله، الواحد مش عارف يقيم دينه، نفسية المستضعفين.
في المدينة ابتدت توجد الدولة، ويوجد نوع استقرار، ومش بس كده ده حصل بعد كده فتح كمان، فحصل نوع أمان، فهبتدي إشكالات أخرى تظهر من أخطر تلك الإشكالات، ومن أهم تلك الإشكالات هو إشكال التعامل مع الدنيا. مكة ما كانش فيه الدنيا، الدنيا ما كانتش موجودة عشان نتعامل معاها، إنما لا، دلوقتي ده حصل تمكين، وحصل فتح، وحصل أموال بنغنمها، وحصل أخطاء في ده، يعني أول ما الدنيا اتفتحت علينا عن الفئة المؤمنة الصحابة لا حصل الأخطاء، سواء في غزوة بدر ﴿يَسْأَلُونَكَ عَنِ الْأَنفَالِ﴾ أو في غزوة أحد، في المرتين حصل إيه؟ أخطاء في التعامل مع الدنيا لما تتفتّح، فيبقى ده أكبر إشكال.
ففي إشكالات من نوع آخر تظهر إذا لاحت الدنيا لأهل الإيمان؛ من أهم الإشكالات دي بقا إزاي نجمع بين الدنيا والدين؟ وإيه هو الحد المسموح به في الجمع بين الدنيا والدين؟ ولا إحنا المفروض نرفض الدنيا رفضاً تاما؟ ولا المفروض ندخل في الدين دخولاً شديداً عنيفاً يعني تستهلك فيه مواردنا؟ الحته دي محتاجة فك شوية. فكانت سورة الحديد السورة المدنية التي إن شئت فقل ممكن يكون من أولها لآخرها هي بتتكلم عن القصة دي؛ قصة إقامة الدولة والتعامل مع الموارد عشان نقيم تلك الدولة، وإزاي الموارد دي هنوزعها على الدين والدنيا، هي دي باختصار مقاصد سورة الحديد.
الأول يا جماعة قبل ما نخش في بعض التأملات في سورة الحديد في هذا من هذه الحيثية؛ يعني من هذه النظرة التعامل مع الدنيا أو الدنيا والدين، إحنا بننقسم لفرق؛ أول فرقة وهي يعني الفريق المحمود في هذا الذي جمع بين الدين والدنيا جمعاً يرضاه الله عز وجل، خد من الدنيا وخدم تلك الدنيا على الدين، وده الجمع الذي يرضاه الله عز وجل، وده إحنا أجّله شوية. وفي فريق لا؛ انهمك في الدنيا ونسي الدين ونسي الآخرة، ولما نقول انهمك في الدنيا يا جماعة يعني انشغل بتحصيل الدنيا؛ بتحصيل مال، بتحصيل جاه، بتحصيل منصب، بتحصيل شهادة، وفي مقابل ذلك نسي الدين ونسي الآخرة. وفريق انشغل بالآخرة شغلاً يضر بالدنيا، بضروريات الدنيا، بحيث إنه يضيع نفسه ويضيع من يعول ليه؟ لانغماسه في مهمات الدين. في القسمة العقلية فيه أي فريق رابع ولا كده خلصنا؟ إيه رايكم؟
فيه فريق رابع؛ اللي هو لا بتاع دين ولا بتاع دنيا، اللي هو عادي جداً سبع ساعات بيسكرول على الفيسبوك عادي، بيقلب في التيك توك، في الإنستغرام، بيشات على الواتساب، قاعد على القهوة، واقف على الناصية؛ منه حصل دنيا يعني منه خد شهادة ولا منه جاب فلوس ولا منه خد منصب، ولا منه حصل دين حفظ المصحف جاب له ختمة صام صلى؛ لا منه عمل ده ولا منه عمل ده، اللي هو في الشرع اسمه إيه بقا؟ سبهللا. ده اللفظ الشرعي، مين اللي قاله؟ سيدنا عمر: إني لأكره أن أرى الرجل سبهللا؛ لا في أمر دين ولا في أمر دنيا. أنا ليه بس بحط القسمة دي قدام عينينا؟ علشان لما نجي نقول جمع بين دين ودنيا ما تفتكرقوش إن إحنا نقصد الفريق الرابع ده أصلاً مش معانا، يعني إحنا من نقول جمع بين دين ودنيا أو واحد شغلات دنيا إحنا ما نقصدش اللي بيسكرول على الفيسبوك وعلى الإنستغرام وما نقصدش اللي بيسكرول، لا ده ولا ده.
أه إحنا نقصد مين بقا؟ اللي شغلته الدنيا، ده ده اللي بيجيب فلوس، واللي بيذاكر عشان ياخد الدكتوراه، واللي بيجتهد عشان يبقى رئيس الشركة، فلما نجي نقول واحد شغلته الدنيا عن الدين إحنا نقصد الناس دي، الناس اللي هي لما بتتشاف في الدنيا بيتشاور عليها ويتقال فلان ناجح، بمقاييس الدنيا هو فعلا ناجح بمقاييس الدنيا، ما نقصدش اللي قاعد على الفيسبوك واللي قاعد على الإنستغرام واللي قاعد على التيك توك، مش دول خالص.
ماشي، طيب، نرجع بقى تاني، يبقى القسم الرابع ده إحنا مش هنتكلم عنه أصلاً النهارده، والقسم الرابع ده إحنا اتكلمنا عنه كتير وده اللي بيُندرج تحت كلمة إيه في الشرع غير سبهلا؟ الغفلة. أحسنت، تحت كلمة الغفلة، يبقى عاوزين نقرا عن القسم الرابع ده بقا، ده القسم الغافل اللي هو إيه مش في حاجة كده، هو برنس يعني ما بيعملش حاجة. ماشي، طبعا الغفلة تشمل وتشمل غيره، لكن هو مشمول في الغفلة يعني.
طيب، يبقى إحنا بنتكلم على دلوقتي قدامنا أقسام ثلاثة؛ قسم ممدوح وهو القسم الذي جمع بين الدين والدنيا جمعاً يرضاه الله عز وجل، وقسمين مذمومين؛ وهو القسم الذي انشغل بالدنيا فأضر الدين وأضر دينه يعني وآخرته، والقسم الذي انشغل بالدين فأضر دنياه ضرراً مذموماً شرعاً. أنا بحط قيود عشان بنحترزها لأن بعض برده الشباب عنده كده في دماغه إن الدنيا لازم تبقى مية فل و14، وده برضه مش في الدين، يعني لا ما هو إانت في الآخر إنت على بعضك شوية موارد، يعني إنت على بعضك إيه؟ شوية أنفاس، وشوية فلوس، وشوية صحة، وشوية ذهن، وشوية قوى نفسية موارد بنسخرها، فطبيعي جداً جداً إنك لما تاخد من شوية الموارد بتوعك دول عشان تسخرهم في الدين ده هيأتي على الدنيا ولا مش هيأتي على الدنيا؟ طبيعي، فما تجيش تقول إيه بقا؟ ده أتى على الدنيا والشيخ قال، لا أنا ما قلتش كده، أنا ما قلتش الدنيا لازم تبقى مية فل و14، وبعدين نروح بقى ندور نعطي ديننا فضل الأوقات وفضل الأموال وفضل الأذهان وفضل القوى النفسية، ما قلتش كده خالص.
إنما لو وصلت إن الواحد ينهمك في الدين انهماكاً شديداً لدرجة أنه يضيع نفسه ويضيع من يعول من يقوت، وبعد شوية بدنه يتلف فلا يقدر يكبل في طريق الله عز وجل، النماذج دي ممكن تكون إحنا ما بنشوفهاش كتير بس كانت موجودة، حتى كانت موجودة في السلف بل النبي صلى الله عليه وسلم أنكر نوع ذلك؛ مش كده لما لقى الحبل في المسجد مربوط قال: «لمن هذا؟» فقالوا يعني لبعض أزواجه وكانت تقف تصلي تتعب تروح سنده على الحبل عشان ما تقعش ما تقعدش، فقال: «حلوه! ليصلي أحدكم نشاطه، فإذا فتر فليرقد». فأنكر ذلك الإيغال الشديد في الدين بما يضر الإنسان في دنياه ضرراً بليغاً بحيث إن حتى ضروريات الحياة ما تبقاش عنده.
هنلاقي بقى سورة الحديد عجيبة جداً يا جماعة جداً، أولاً سورة الحديد ذكرت الصنفين؛ ذكرت الصنفين جميعاً؛ الصنف اللي هو تبتل وترهبن وانقطع عن الدنيا، والصنف الذي انغمس في الدنيا لما طال عليه الأمد حتى قسا قلبه، الصنفين اللي إحنا بنتكلم عليهم مذكورين في سورة الحديد وبينهم جت آية الحديد التي ذكر فيها لفظ الحديد، والأية دي برضه آية عجيبة ما نجي لها دلوقتي هنفهم الآية دي هي بقا الخلاصة، الآية اللي فيها الحديد هي الخلاصة.
فقال الله عز وجل -نبتدي بأية- قال الله عز وجل: ﴿أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَوُا قُلُوبُهُمْ﴾ [الحديد: 16]، وهنيجي لختم الآية كمان شوية، يعني سيبوا ختم الآية دي كمان شوية هنرجع له إن شاء الله. يبقى دي واضح جداً أنهي فئة؟ الفئة اللي انغمست في اللي انغمست في الدنيا فنسيت الآخرة فطال عليهم الأمد فقست قلوبهم.
وبعدين تمر آيات سورة الحديد وياتي قول الله عز وجل في الفئة الأخرى بقا؛ قال سبحانه وتعالى: ﴿وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاءَ رِضْوَانِ اللَّهِ﴾ [الحديد: 27]، فهنا ذكر الله عز وجل الرهبانية المبتدعة، والرهبانية هي الانقطاع عن الدنيا بالكلية والانقطاع لعبادة الله عز وجل، فواضح جداً أن دي أنهي فئة؟ الفئة الأخرى التي انشغلت بالدين انشغالاً يضر بالدنيا.
وبعدين ختام الآية برضه عجيب جداً هننجي له كمان شوية، الأيتين دول ختامهم لسه ما قلناش الآية أتقفلت إزاي، لكن تعالوا كده يا جماعة نشوف؛ يبقى إحنا لو عندنا طريق، وهذا الطريق هو الطريق المرضي لله عز وجل، وهو الجمع بين الدين والدنيا على وجه يحبه الله سبحانه وتعالى، وبعدين جت فئة انشغلت انشغالاً زائداً بالدنيا، يبقى كده عملت إيه عن الطريق ده؟ حادت أو انحرفت، خرجت مش كده؟ ضلت الطريق، المهم الألفاظ دي كلها ماشي، خلينا بقى نستقر على لفظ واحد هنا وهو خرجت عن هذا الطريق خرجت عنه، متفقين عن ده على ده.
الفئة الثانية العكس؛ ترهبنت انقطعت للعبادة انقطاعاً يضر بالدنيا ضرراً بليغاً وياتي قريبا على البدن وعلى العيال وعلى الزوجة وكذا وكذا، الفئة دي عملت إيه عن الطريق؟ خرجت مش كده؟ تعالوا نرجع بقى للأيتين وختام الأيتين؛ في الآية الأولى قال الله عز وجل: ﴿فَطَالَ عَلَيْهِمُ الْأَمَدُ فَقَسَوُا قُلُوبُهُمْ وَكَثِيرٌ مِّنْهُمْ فَاسِقُونَ﴾ [الحديد: 16]، مش كده؟ طيب، الآية الثانية: ﴿وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاءَ رِضْوَانِ اللَّهِ فَمَا رَعَوْهَا حَقَّ رِعَايَتِهَا فَآتَيْنَا الَّذِينَ آمَنُوا مِنْهُمْ أَجْرَهُمْ وَكَثِيرٌ مِّنْهُمْ فَاسِقُونَ﴾ [الحديد: 27]. تلاقي الأيتين اتخموا نفس الختم، نفس الختم؛ الفسق في اللغة إيه هو؟ الخروج، الفسق في اللغة الخروج، وهذا معنى الفسق في اللغة، ويقال: فسقت الفأرة عن جحرها أو من جحرها؛ أي خرجت من الجحر، فدول فاسقون ودول فاسقون، دول خارجون ودول خارجون، خارجون عن إيه بقا؟ عن ذلك الطريق الذي يحبه الله عز وجل.
وتيجي بقى آية الحديد بين الأيتين دول، يعني الآية الأولى قبل آية الحديد، والآية الثانية بعد آية الحديد، وآية الحديد في النص، تلك الآية العجيبة التي فيها حل الإشكال، ماذا قال الله عز وجل في آية الحديد؟ قال الله عز وجل: ﴿لَقَدْ أَرْسَلْنَا رُسُلَنَا بِالْبَيِّنَاتِ وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسُ بِالْقِسْطِ وَأَنزَلْنَا الْحَدِيدَ فِيهِ بَأْسٌ شَدِيدٌ وَمَنَافِعُ لِلنَّاسِ وَلِيَعْلَمَ اللَّهُ مَن يَنصُرُهُ وَرُسُلَهُ بِالْغَيْبِ إِنَّ اللَّهَ قَوِيٌّ عَزِيزٌ﴾ [الحديد: 25]؛ يبقى عز وجل أنزل شيئين؛ أنزل الآيات، وأنزل الحديد، وذكر الله الأمرين في آية واحدة؛ أنزل الآيات وأرسل الرسل وكذا وكذا، ده واضح جداً أن هو إقامة الدين، وبعدين أنزل الحديد لمعنيين؛ المعنى الأول الجهاد: ﴿وَأَنزَلْنَا الْحَدِيدَ فِيهِ بَأْسٌ شَدِيدٌ﴾ الجهاد، ومش بس كده، ﴿وَمَنَافِعُ لِلنَّاسِ﴾ منافع الناس دي اللي هي الإيه بقا؟ آلات الحرث، آلات الزرع، ده اللي في كتب التفسير، إن شئت فقل كل شيء بقى بعد كده ما فيش آلة ما بيدخلهاش الحديد، وكان من مقاصد الشارع سبحانه وتعالى في إنزال الحديد إقامة الدنيا، ﴿وَأَنزَلْنَا الْحَدِيدَ فِيهِ بَأْسٌ شَدِيدٌ وَمَنَافِعُ لِلنَّاسِ﴾ بس.
يبقى الآية دي هي اللي بتضبط الموضوع؛ يعني يا رب ماذا تريد منا؟ أريد منكم أن تقوموا بالايات التي أنزلناها، وأن تقوموا بالحديد الذي أنزلناه، فبذلك تستقيم الدنيا ويستقيم الدين جميعاً.
إحنا هنا بنحل قوي الإشكال؛ اللي هو أنا أنقطع بالكلية؟ نقول لك: لا ما تنقطعش، وبعدين الانقطاع ده ممكن يبقى انقطاع جزئي، دي يعني هقول حاجة عشان بنسال كثيراً عنها؛ بيجي الشاب مثلاً خلص الجامعة أو في السنين الأخيرة ولا كده يقول لك: أنا عاوز انقطع لطلب العلم؛ يعني إيه؟ يعني أقعد خمس سنين كده ماليش دعوة بالآية ماليش دعوة بأي حاجة بس انشغل بطلب العلم. طيب ده حلو ولا وحش؟ الحقيقة يا جماعة كنا زمان وإحنا شباب، يعني فيجي ناس تسال مشايخنا السؤال ده، فكانوا يقولوا لهم: لا ما تعملوش كده، وإحنا بقا كشباب وثورة الشباب وعندنا بقا هم الدين وبتاع ونقول إيه؟ ازاي يقولوا كده والدين هيضيع ومين هيشيل هم الدين؟ وكانوا هُم أبصر منا الحقيقة.
ليه بقى يا جماعة؟ أول حاجة أن طبعا إحنا لما يجي شيخ بيقول لا ما تعملش ده أو لا اعمل ده هو ممكن واحد فعلا يكون يصلحه ذلك، ماشي، وممكن بعد كده يقبل باقل الدنيا يعيش عيش بيها، وممكن على حسب أحوال الناس، إنما
في ناس كتير مش كده، يعني في ناس كتير يقول لك: أنا هنقطع خمس سنين، طب يرجع بعد الخمس سنين فقد الملكات. يعني إيه فقد الملكات يا جماعة؟ أنتم عارفين اللي مثلا متخرج لسه من الكلية، هو المفروض عاوز يحصل شوية مهارات وعنده شوية ملكات لازم يستثمر فيها، علشان لما يعطل كل تلك الملكات وكل تلك المهارات ويرجع بعد خمس سنين عاوز يلاقيها، مش هيلاقيها. فيقول: يلا اشتغل دلوقتي. ممكن ما يلاقيش شغل دلوقتي. طيب يقول: خلاص، اشتغل أي حاجة. ما يستحملش يشتغل أي حاجة.
فيبقى وده اللي أنا بقى أقوله ده بقى شفناه بعد سنين من لما مشايخنا كانوا يقولوا: لا ما تعملش كده، اشتغلوا، ومع الشغل وفر وقت لطلب العلم وكذا. شفنا ده بقى حصل مع ناس. هل معنى كده كل واحد عاوز ينقطع يقول: لا ما تنقطعش؟ لا، على حسب أحواله وهيستحمل قد إيه ومش هيستحمل إيه، وهيعرف يعمل ده ولا مش هيعرف، وعنده أساساً ملكات الطلب ولا ما عندوش، يعني تفاصيل كتير.
لكن لازم تبقى واعي لفكرة أن الملكات دي يعني بتضمحل، بتضمر مع الوقت. أنتم عارفين تخيلوا كده واحد مثلاً -وده ده بيحصل يعني مثال هأقول لكم ده بيحصل كتير- واحد موظف هيوصل خلاص لسن المعاش ولا كبر ولا يقول لك: طب أنا هفتح مشروع. تلاقيه ممكن معظم الناس حتى يغلب أنه ياخد أول خطوة أنه يفتح المشروع ده. ليه؟ ما عندوش الملكات دي، ملكات التجارة مش عنده. يعني من أهم ملكات التجارة أو المهارات بتاع التجارة أنك عادي جداً ممكن أجازف بالمال. وهو أصلاً قالوا كده، قالوا: الربح في مقابل الإيه؟ المجازفة دي. الموظف ما عندوش دي قوي، يعني ما عندوش فكرة المجازفة دي، لا، هو أنا يوم مش عارف كام و20 في الشهر بينزل لي المرتب، لو تأخر يومين أبتدي أتوتر. ففكرة المجازفة مش عند الموظف. ده حاجة وحشة؟ ما بقولش وحشة وحلوة يعني، الوظيفة بتدي له مهارات تانية مش عند التاجر. تعال أنت تعرف كده تاجر مثلاً تقول له إيه: كل يوم تقوم 7 الصبح وترروح تقعد في حتة كده ثمان ساعات على مكتب؟ يقول لك: ده أنت لو ذبحتني، لو ذبحتني أنا الساعة 12 أقوم بمزاجي وأشرب كوباية الشاي بلبن بتاعتي والشيشة وبعدين إيه أبتدي ألوم، 7 الصبح إيه اللي أصحيها دي؟
كان في وقت العود بادي درس، درس خاص لمجموعة شباب. الشباب دول كلهم كانوا تجار، كلهم يعني حوالي سبعة تمانية كلهم تجار. وبعدين فكان الدرس بعد الفجر. فنتفق يا جماعة، فجر الأحد إن شاء الله الدرس. أروح، ماليش ولا واحد! وبعدين أضايق جداً. وبعدين مرة التانية لقيتهم هم كمان متضايقين. طب أنتم متضايقين ليه؟ إحنا بنيجي أنت ما بنلاقيكش. أقول لهم: إزاي؟ إزاي يا جماعة؟ أنا جيت فجر لحد ما... كلهم متفقين أنهم جم ما لقونيش. تري هم إيه؟ هم بيسهروا. يعني إحنا عندنا فجر الأحد اللي هو الأحد جاي الأحد بادئ. لا، هم مش كده، هو فجر الأحد بالنسبة لهم يعني هم مشفتين يوم لأن هم بيسهروا للفجر. فهو بالنسبة لهم فجر الأحد ده آخر فرض في اليوم، هو بيومهم بيبتدي من الظهر فده أول فرض، وبعدين لغايه الفجر بقى فده آخر فرد في يومي. ففجر الأحد ده مش اللي أنا صابح الأحد، لا، اللي هو فجر الاتنين بتاعنا إحنا بتاع المسلمين العاديين هو فجر الاتنين. فكل يعني كل شغلانة بتدي للي بيشتغلها مهارات وملكات وهكذا.
فجاءت إيه الحديث بقى في في الموطن ده أن في آيات نزلت، قال سبحانه وتعالى: ﴿وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسُ بِالْقِسْطِ﴾ [الحديد: 25]. يبقى في كتاب نزل. ﴿وَأَنزَلْنَا الْحَدِيدَ فِيهِ بَأْسٌ شَدِيدٌ وَمَنَافِعُ لِلنَّاسِ﴾ [الحديد: 25]. يبقى بنحل أول إشكال اللي هو: أيوه، إحنا بنقول أنك هتاخد من الدين ومن الدنيا. يبقى ده أول إشكال بيظهر للمتدينين: أنا هسيب الدنيا بالكلية؟ نقول لك: لا، مش هسيب الدنيا بالكلية، هتاخد حظك من الدنيا ﴿وَلَا تَنسَ نَصِيبَكَ مِنَ الدُّنْيَا﴾ [القصص: 77].
خلاص، طيب لو لو تاملنا في سورة الحديد هنلاقي برض شيء عجيب جداً يا جماعة، إحنا قلنا السورة كلها بتدور في هذا الفلك، فلك إيه؟ فلك أن في دولة بتقوم، والتعامل مع المشكلات التحديات التي تظهر مع إقامة الدولة، واللي أعظمها على الإطلاق تحدي مواجهة الدنيا. ما إحنا برضه إحنا مش بنقول لك هتجمع بين دين ودنيا يعني تحب الدنيا وتذوب في الدنيا. فده إشكال كبير أن بقول لك: خد حظك من الدنيا وما تحبهاش وما تركنش إليها، وكل الألفاظ دي ألفاظ شرعية. ما تركنش إليها، ما تعظمهاش، ما تتمناش الزيادة وما تزعلش على النقص. أنتم فاهمين إحنا بنقول إيه يا جماعة؟ بنقول: خد حظك من الدنيا، لكن كل المعاني اللي أنا بقولها دي تبقى تبقى موجودة. خلي بالك، المعاني دي كلها علاجها في سورة في سورة الحديد، كلها هنا.
الإمام أحمد بن حنبل لما سألوه: الرجل معه ألف دينار يكون زاهداً؟ الألف الأول الدينار ده ها، أربعة وربع جرام كده، أربعة وربع جرام ذهب. فالألف دينار حوالي أربعة وربع كيلو ذهب، فده رقم كبير يعني. فبيقولوا له: الراجل معاه ألف دينار يكون زاهداً؟ قال: أجل، شريطة، شريطة ألا يفرح إذا زادت وألا يحزن إذا قلت. ده يبقى زاهد! الكلمه دي ممكن تبقى سهلة معانا، اللي هو لو صبحت الصبح لقيت الألف دينار دول مش معاك، الأربعة وربع كيلو ذهب دول اتسرقوا، عادي جداً مش زعلان. طب صبحت الصبح لقيتهم بقوا عشرة آلاف دينار، مش فرحان. لو لو قلنا اللي كده يرفع إيده، ما أعرف أنه إيه؟ ما يعرفش إيه دينار ذهب أصلاً. فين ده؟ مين يعمل دي؟ مين يعمل دي؟ صعبة جداً جداً.
وهنلاقي المعدى ده موجود في سورة الحديد. فتبقى سورة الحديد بتتكلم عن ده، تلاقي بقى السورة يا جماعة ابتدت بإيه؟ بدأت السورة في حوالي نص صفحة تزيد شوية عن كده، التعريف بالله سبحانه وتعالى. وكان أول العلاج أن تتعرف على الله بأسمائه وصفاته. أنت خلاص في دولة، في تمكين، في أموال، في غنائم، في وفيكم تكاليف هتطلب منكم علشان الدولة دي تستقر، وهيجي معانا في في الآيات أول حاجة ربنا سبحانه وتعالى أن تحيا بالله.
فتلاقي أنا هأقرا الآيات النهارده، مش هنفسر ولا اسم من اسماء الله عز وجل في هذه الآيات، بس ربنا سبحانه وتعالى ذكر نفسه بحوالي 10 أسماء وصفات. قال الله عز وجل بدايه السورة بقى: ﴿سَبَّحَ لِلَّهِ مَا فِي السَّمَاوَاتِ وَالْأَرْضِ وَهُوَ الْعَزِيزُ الْحَكِيمُ * لَهُ مُلْكُ السَّمَاوَاتِ وَالْأَرْضِ يُحْيِي وَيُمِيتُ وَهُوَ عَلَىٰ كُلِّ شَيْءٍ قَدِيرٌ * هُوَ الْأَوَّلُ وَالْآخِرُ وَالظَّاهِرُ وَبَاطِنُ ۖ وَهُوَ بِكُلِّ شَيْءٍ عَلِيمٌ * هُوَ الَّذِي خَلَقَ السَّمَاوَاتِ وَالْأَرْضَ فِي سِتَّةِ أَيَّامٍ ثُمَّ اسْتَوَىٰ عَلَى الْعَرْشِ ۚ يَعْلَمُ مَا يَلِجُ فِي الْأَرْضِ وَمَا يَخْرُجُ مِنْهَا وَمَا يَنزِلُ مِنَ السَّمَاءِ وَمَا يَعْرُجُ فِيهَا ۖ وَهُوَ مَعَكُمْ أَيْنَ مَنتُمْ ۚ وَاللَّهُ بِمَا تَعْمَلُونَ بَصِيرٌ * لَهُ مُلْكُ السَّمَاوَاتِ وَالْأَرْضِ ۚ وَإِلَى اللَّهِ تُرْجَعُ الْأُمُورُ * يُولِجُ اللَّيْلَ فِي النَّهَارِ وَيُولِجُ النَّهَارَ فِي اللَّيْلِ ۚ وَهُوَ عَلِيمٌ بِذَاتِ الصُّدُورِ﴾ [الحديد: 1-6].
إحنا لسه جاي، بس أنا عاوز أقول حاجة بس أن في صفات هنا متكررة، يعني صفة العلم جاءت باكتبر بس أنا بعدها كده لو يعني فلترنا الصفات تلك الأسماء والصفات هنلاقيه حوالي 10 11 12 بالكتير، وإلى هنا ينتهي الكلام عن الله بأسمائه وصفاته. إحنا أول حاجة محتاجين نعيش مع تلك الآيات، أول حاجة وده مش هنعمله في الدرس بتاع النهارده بس ده جزء مهم جدا جدا في مواجهة الدنيا، أن تحيا بأسماء الله عز وجل وصفاته. ويمكن إحنا عملنا حاجات شبه كده، ويمكن كان مره منها هنا لما اتكلمنا عن آية الكرسي. ويعني أنا لو أحيل عشان بس نفهم يعني إيه يا جماعة نعيش باسماء ربنا، نفهم المعنى بس هأحيل إلى ثلاث دروس يتسمعوا الأسبوع ده إن شاء الله: درس آية الكرسي، ودرس آية "أني أحبها"، ودرس سوره البروج. مش فاكر كان اسمه إيه بقى؟ اسمه إيه؟ ما أجهلك! يبقى درس ما أجهلك، ودرس أني أحبها، ودرس آية الكرسي -ما أعرفش كان اسمه آية الكرسي ولا لا برضه يعني- أعظم آية! ماشي، يبقى ثلاث دروس أهم خلاص، اسمعوهم ضروري جداً جداً عشان تفهموا يعني إيه يعني إيه علاج حب الدنيا يبدا من هنا: أن تحيا بالله سبحانه وتعالى، أن تحيا باسمائه وصفاته سبحانه وتعالى. فلا تبقى قلقان على الدنيا أنها تروح ولا حريص عليها أنها تيجي، كل ده هينتفي من قلبك.
ثم نلاقي حاجة عجيبة بقى، الله عز وجل يحض المؤمنين على الإنفاق، والانفاق هنا يأتي في عدة مواطن في السورة مش بس في آية ولا اثنين، ده هيتكرر حوالي سبع مرات فكرة الإنفاق. فيقول الله عز وجل: ﴿آمِنُوا بِاللَّهِ وَرَسُولِهِ وَأَنفِقُوا مِمَّا جَعَلَكُم مُّسْتَخْلَفِينَ فِيهِ ۖ فَالَّذِينَ آمَنُوا مِنكُمْ وَأَنفَقُوا لَهُمْ أَجْرٌ كَبِيرٌ﴾ [الحديد: 7]. ثم يقول الله عز وجل بعد ذلك: ﴿وَمَا لَكُمْ أَلَّا تُنفِقُوا فِي سَبِيلِ اللَّهِ وَلِلَّهِ مِيرَاثُ السَّمَاوَاتِ وَالْأَرْضِ ۚ لَا يَسْتَوِي مَنكُم مَّنْ أَنفَقَ مِن قَبْلِ الْفَتْحِ وَقَاتَلَ ۚ أُولَٰئِكَ أَعْظَمُ دَرَجَةً مِّنَ الَّذِينَ أَنفَقُوا مِن بَعْدُ وَقَاتَلُوا ۚ وَكُلًّا وَعَدَ اللَّهُ الْحُسْنَىٰ ۚ وَاللَّهُ بِمَا تَعْمَلُونَ خَبِيرٌ * مَّن ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ وَلَهُ أَجْرٌ كَرِيمٌ﴾ [الحديد: 10-11]. ثم: ﴿إِنَّ الْمُصَّدِّقِينَ وَالْمُصَّدِّقَاتِ وَأَقْرَضُوا اللَّهَ قَرْضًا حَسَنًا يُضَاعَفُ لَهُمْ وَلَهُمْ أَجْرٌ كَرِيمٌ﴾ [الحديد: 18]. ثم بعد ذلك: ﴿الَّذِينَ يَبْخَلُونَ وَيَأْمُرُونَ النَّاسَ بِالْبُخْلِ ۗ وَمَن يَتَوَلَّ فَإِنَّ اللَّهَ هُوَ الْغَنِيُّ الْحَمِيدُ﴾ [الحديد: 24]. في غيره من الآيات في سورة الحديد كلها تدعو إلى الإنفاق في سبيل الله عز وجل.
هنا يا جماعة إحنا في بوصلة، في بوصلة دلوقتي بترتسم قدامنا للي بتدور على دين ودنيا. في بوصلة بترتسم، تحصيلك للدنيا يعني أن تأخذ ما يكفيك، وتعمل إيه في الباقي بقى هنا؟ في بوصلة بترتسم لك، إزاي كيفية التعاطي مع هذه الدنيا؟ عشان يا جماعة اللي بيتكرر كتير وأنا إحنا واعدين كذا مره أن إحنا هندي درس عن الدنيا، درس خاص بقى بالدنيا كده وإزاي نتعامل مع الدنيا، لكن من الشبهات اللي دايما بتتكرر يقول لك: إن مش عارف ستة من العشرين بالجنة كانوا مليونيرات. مش كده؟ طيب.
إحنا هنا عشان بس نفك الإشكال ده وهو له علاقة باللي إحنا بنتكلم فيه في سورة الحديد يا جماعة، فرق بين أنك عندك المال وبين نمط حياتك عامل إزاي. أنتم عارفين لما يجي يقول لك إيه: أن الدنيا تبقى في إيدك ما تبقاش في... عارفين الكلام الحلو ده اللي كلنا حافظينه هو ده. يعني أنت هتنام تصبح الدنيا في إيدك مش في قلبك ولا في تدريب لده؟ واحد من التدريبات دي أنك أصلاً لو عندك مليار جنيه فانت دنيتك ماشية مش محتاجة الفلوس دي، انما لو أنت معتمد دايماً على نمط حياة محتاج مزيد من المال مش هتنام وتصحى تلاقي نفسك عادي الفلوس تروح ما تروح. لا، أصل الفلوس اللي تروح دي يعني هتنزل عن مركوبك الذي اعتدت عليه، وهتنزل عن شقتك أو أياً كان بقى المستوى اللي أنت عايش بيه، وهتنزل عن كذا وهتنزل عن كذا.
لكن إحنا لو يا جماعة لو خدنا واحد بس من العشرين من الجنة -وأنا قلنا برده ده إحنا واعدين بيه أن إحنا عاوزين نعمل بحث عن نمط حياة الستة اللي بيقولوا عليهم، نعمل بحث كده نشوف كانوا عايشين ازاي دول- فلو خدنا واحد بس، أبو بكر أولهم وأعظمهم وأفضلهم. أبو بكر كان تاجر؟ أه، كان تاجر. معاه فلوس؟ أه، معاه فلوس. حياته كانت ازاي بقى؟
عندنا قصة في السيرة عجيبة جداً: سيدنا النبي عليه الصلاة والسلام خارج من بيته ما فيش أكل في البيت. فخارج بيدور على حد يستضيفه عشان ياكل، فيلاقي مين ماشي؟ أبو بكر. إيه اللي خرجك من بيتك؟ قال له: الجوع. إيه رايكم؟ أهو ده أول واحد في العشرة، أول واحد في الستة اللي بيقولوا عليهم مليونيرات، وأول واحد في الستة أهو خارج من بيته جعان مش لاقي حاجة ياكلها في البيت. فدي ما تعديش كده.
تاني حاجة، قاعد قدام النبي عليه الصلاة والسلام أبو بكر كما جاء يعني في السير، قاعد قدامه بالقميص مخالل. القميص بإيه؟ يعني القميص بتاعه مفتوح فقفله بإيه؟ لا مخيطه ولا بزرار، بإيه؟ بخشبة! جايب حتة خشبة وعاملها فين؟ عاملها في القميص كده عشان ما يتفتحش.
أبو ذر الغفاري لما جه والنبي عليه الصلاة والسلام أمر حد إنه يضيفه وكان أبو ذر ماكلش بقاله مدة، وكان قاعد ده كان في مكة وكان عايش على مية إيه عارفين القصة؟ مية زمزم. فمين اللي ضيفه؟ أبو بكر! سيدنا أبو بكر. وعاوزكم تقفوا هنا لحظة كده: دلوقتي واحد جاي ضيف، ضيف مين؟ ضيف النبي عليه الصلاة والسلام. وبعدين النبي عليه الصلاة والسلام قال: حد يضيفه. فراح واحد من الجلوس، واحد من تخيلوا إحنا كده قام قال: أنا اللي هأضيفه! هياخده يعمل معاك إيه؟ أحسن حاجة إيه؟ الكلمة كده غلط، أحسن حاجة يقدر عليها، مش كده؟ ده ضيف النبي عليه الصلاة والسلام. عارفين أبو بكر يا جماعة أدى لأبي ذر الغفاري إيه؟ زبيب، من زبيب اليمن! شوية زبيب! ده الأكل! لما حب يضيف ضيف النبي صلى الله عليه وسلم أداله شوية زبيب. فإحنا محتاجين بقى نفهم ده، هنا سورة الحديد بتورينا ده، بتورينا أول حاجة أول معنى أهو في التعامل مع الدنيا يا شباب: أن الفاضل من الدنيا استثمره في الآخرة.
يبقى هنخدها بألفاظ اقتصادية شوية: اللي فاضل من الدنيا استثمره في الآخرة، حاول ما تتعودش توسع على نفسك في يعني كل ما يجي؛ لأن هو ده اللي بيحصل يا جماعة، ده اللي بيحصل مع الشباب، مع غالب الناس كده؛ اللي هو إيه: كل ما الراتب يزيد التجارة تفتح معه زيادة، مش على طول مباشرة، وبقى ده الطبيعي أن الحياة بتفتح، وكل ما المال يزيد الحياة تفتح زيادة.
ده.. طب هل هو ده الوجه المرضي لله عز وجل؟ حرام! عشان بس نقفل الحتة دي، ما بتكلمش في حرام وحلال خالص يعني إيه؟ يعني ممكن يبقى الوجه ده ما هواش حرام، يعني ماهوش حرام، يعني مش هتيجي يوم القيامة تأثم على أنك.. لا خالص، مش بنقول كده، بس احنا بنكلم ناس همها الدين، همها ولذلك همها درجات العلى من الجنة. ما هو الجنة يا جماعة فيها اللي هيبقى في النار وبعدين يخرج من النار وبعدين يخش الجنة، وفيها اللي في الفردوس الأعلى، فيها ده وفيها ده.
من رحمة الله عز وجل بنا أن الجنة مش درجة واحدة، خلي بالكم! ولما كانت الجنة مش درجة واحدة، بقى التفاوت ده مقبول شرعاً، مقبول يعني إيه؟ يعني ممكن واحد يوسع نفسه في الدنيا وأهل الجنة برده عادي جداً، وواحد تاني قال: لا، مش هوسع على نفسي وهفضل حياتي هي، والزائد كله أنا هستثمره في الآخرة، فيبقى في درجة أعلى؛ ربنا سبحانه وتعالى كان.. ولا يسأل عما يفعل وهم يسألون.
كان ممكن يبقى الشرع إيه؟ أنت لو جالك مليار هتاكل لقمتك وتلبس هدمتك والباقي لله، مش كان ممكن يبقى كده؟ الشرع كان.. كان حد هيعتذر؟ كان يبقى الشرع كده: الباقي لله إيه؟ وجوباً! يعني أقصد على وجه الوجوب. لكن ربنا ما عملش كده سبحانه وتعالى، خلى الواجب بس من مالك كله إيه؟ من كل 100 جنيه 2 جنيه ونص، ده الواجب، إذا بلغ المال النصاب طبعا، من كل 100 جنيه 2 جنيه ونص.
طب المندوب قد إيه؟ مالوش بقى آخر، ده ليه؟ علشان ده بقى السوق الذي نتنافس فيه، وكلمة ومعنى التنافس والتسابق هتيجي معانا في سورة الحديد برده. فشوفوا كم موطن في السورة الله عز وجل بعد المقدمة أنك عرفت الله جل وعلا فكان قلبك اطمأن، الدنيا من ناحية الدنيا خلاص، في رب، وكأنك لما عرفت ربنا برده يا جماعة هيحصل حاجة تانية، اللي هو: طب يا رب بقى الدنيا دي عندك أنت عاملة إيه؟ يعني ما هو أنت بتجري على الدنيا دي ليه؟ عشان أنت بتقيمها بتقييمك أنت، فشايفها حاجة كبيرة، فلما تلاقي ربنا اللي أنت عرفته في أول السورة هي لا تعدل عنده جناح بعوضة، فانت بتجري ورا إيه؟ يا جماعة أنتم فاهمين المعنى؟ يعني عمرك مثلاً لقيت اتنين واقفين بيتخانقوا مقطعين بعض؟ إيه يا جماعة؟ فيقول لك: أنا لقيت جناح بعوضة وهو جه عاوزه يخدوه مني، وأنا مش هسيبه له، ده على جثتي! هتقول: عبط الجوز! وهتمشي وتسيبهم، مش كده؟
ما هو ده الدنيا، لا تعدل عند الله جناح.. يا ريتها تساوي جناح البعوضة، ده هي لا تعدل عند الله جناح بعوضة! طب الاتنين واقفين بيتخانقوا برة دول؟ بيتخانقوا على الدنيا، ده على ولا حاجة من الدنيا، يعني هتلاقيهم بيتخانقوا على إيه دول؟ ولا حاجة يعني، الحاجة اللي اتخانقوا عليها دي لو قستها بالنسبة للدنيا ما تساويش حاجة، اللي هي أصلاً الدنيا ما تساويش.. مش جناح بعوضة! ما تساويش جناح بعوضة! دي لو كانت تساوي.. لو كانت تساوي عند ربنا جناح بعوضة، ما سقى منها كافراً شربة ماء.
فلما عرفت ربنا أحلت الأمر برمته إليه جل وعلا: يا رب، الدنيا دي عندك إيه؟ فعرفت أنها تساوي عنده جناح بعوضة، خلاص. وبعدين يجي بقى ألفاظ الإنفاق، شوفوا كم مرة، حوالي سبع مرات أو أكثر، والتنويه على معنى البخل: ﴿الَّذِينَ يَبْخَلُونَ وَيَأْمُرُونَ النَّاسَ بِالْبُخْلِ﴾. يبقى كأنك بتبذل من مالك. وبعدين يشير الله عز وجل إلى مسألة الجهاد، اللي هو بذل الروح في أكثر من آية، منها آية الحديد نفسها: ﴿فِيهِ بَأْسٌ شَدِيدٌ﴾ [الحديد: 25]، وهو إشارة إلى الجهاد في سبيل الله. فكأن السورة بتقول: بذل المال وبذل النفس.
تعالوا كده نقلبها اقتصاد: احنا بنقيم دولة؟ أه، احنا محتاجين موارد. فاكرين احنا قلنا سورة الحديد بتتكلم على النفسية، نفسية إقامة الدولة، فإقامة الدولة في تحديات في مشاكل هتواجهك كفرد، وعليك واجبات. من المشاكل اللي هتواجهك: التعامل مع الدنيا، هتعامل إزاي مع الدنيا؟ الجمع بين الدين والدنيا إزاي هجمع؟
يا جماعة، المشكلة دي مش بسيطة، أنا قلت لكم من شويه: المشكلة دي وقع فيها الأولياء الصحابة رضوان الله عليهم في غزوة بدر، حصل لهم الإشكال ده، إشكال الدولة، إشكال الانتصار، نفسية المستضعف حاجة بمشاكله، ونفسية المنتصر حاجة بمشاكله، نفسية تانية خالص بمشاكل من نوعية تانية خالص، فأول مرة يشوفوها كده ويشموا نفسهم في غزوة إيه؟ بدر، حصل بينهم إليه؟ اتخانقوا! الصحابة؟ أه، الصحابة اتخانقوا! لثلاث فرق، التلاتة بيزعقوا في بعض.
بيزعقوا ليه؟ كل فرقة بتقول: احنا أولى بالغنيمة! موقف صعب. عارفين القصة ولا نقولها بسرعة؟ لما.. خلصت الغزوة، غزوة بدر، طبعا السورة عن غزوة بدر يا جماعة، سورة إيه؟ سورة الأنفال. وأنا لو قلت لأي واحد: خد المايك وتعal كلمني عن غزوة بدر أو غيرها من الغزوات، هبتدي بترتيب شكله إيه؟ الأسباب، الأحداث، النتائج، صح كده؟ حد عنده ترتيب تاني يعني ترتيب عقلي مختلف؟ أسباب غزوة بدر كذا وكذا وكذا، وقائع غزوة بدر كذا وكذا وكذا، نتائج غزوة بدر كذا وكذا وكذا. طيب كويس، لو أنا قلت لك: حط لي الأنفال في واحدة من الثلاثة دول، هتبقى فين؟ الأنفال اللي هي الغنيمة، هتبقى في الأسباب ولا في.. ولا في الأحداث ولا في النتائج؟ في النتائج! إيه السورة بقى اللي بتتكلم عن غزوة بدر؟ إيه أول آية فيها؟ ﴿يَسْأَلُونَكَ عَنِ الْأَنْفَالِ ۖ قُلِ الْأَنْفَالُ لِلَّهِ وَالرَّسُولِ﴾ [الأنفال: 1]، اللي هي إيه؟ في النتائج! وكم آية بتتكلم عن القصة دي؟ وبعدين بقى هنبتدي بقى نحكي لكم الغزوة بقى: ﴿كَمَا أَخْرَجَكَ رَبُّكَ مِنْ بَيْتِكَ بِالْحَقِّ وَإِنَّ فَرِيقًا مِنَ الْمُؤْمِنِينَ لَكَارِهُونَ * يُجَادِلُونَكَ فِي الْحَقِّ﴾ [الأنفال: 5-6] إلى آخر الآية، هنبتدي بقى من الأول بقى: أسباب، وقائع، نتائج. إيه ده؟ إيه.. إيه الصدمة دي؟ ﴿يَسْأَلُونَكَ عَنِ الْأَنْفَالِ قُلِ الْأَنْفَالُ لِلَّهِ وَالرَّسُولِ﴾.
قصتها إيه بقى؟ خلصنا غزوة بدر، جمعنا الأنفال، المسلمين انقسموا ثلاث فرق: فرقة أحاطت بالنبي عليه الصلاة والسلام عشان ما يجيش واحد من المشركين ينقله بشيء، وفرقة طلعت جري في أثر الكفار عشان ما يرجعوش تاني، وفرقة ابتدت تجمع الغنايم. رجعوا والدنيا هادية والأمن استتب، الفرق اللي جمعت الغنايم قالوا: هي لنا، الغنايم دي بتاعتنا احنا! ليه؟ نحن جمعناها، احنا جمعنا بتاعتنا مش بتاعة حد تاني. فقالت الفرقة الأخرى: والله ما أنتم بأحق بها منا، نحن أحطنا بالنبي لا يصيب العدو منه غرة، ليه اشمعنى أنتم يعني؟ وقالت الفرقة الثالثة: والله ما أنتم بأحق بها منا، نحن خرجنا في طلب العدو.
حتى ساءت فيها أخلاقهم، وده لفظ الراوي مش لفظي أنا. الراوي بيقول كده: فينا معشر الأنصار نزل.. نزلت سورة الأنفال حين اختلفنا في النفل وساءت فيه أخلاقنا، فنزعها الله من أيدينا وجعلها إلى رسوله صلى الله عليه وسلم.
أه، يبقى هنا بقى.. هنا الكلام يا جماعة في تعنيف للصصحابة، ﴿يَسْأَلُونَكَ عَنِ الْأَنْفَالِ﴾ ده ما كانش سؤال استفسار، ده سؤال خناقة حاصلة: مين بقى فينا اللي هياخدها؟ ده السؤال: ﴿يَسْأَلُونَكَ عَنِ الْأَنْفَالِ قُلِ الْأَنْفَالُ لِلَّهِ وَالرَّسُولِ﴾. مالكوش دعوة بالنفل خالص! طب أمال احنا نعمل إيه يا رب؟ ﴿قُلِ الْأَنْفَالُ لِلَّهِ وَالرَّسُولِ فَاتَّقُوا اللَّهَ وَأَصْلِحُوا ذَاتَ بَيْنِكُمْ﴾ [الأنفال: 1]. مالكوش دعوة بالنفل، سيبوا الفلوس، روحوا أصلحوا ذات بينكم.
وتمر الأيام والشهور، وتيجي غزوة أحد ويقعوا تاني في نفس المشكلة، مشكلة إيه؟ الدنيا. أنا إيه يا جماعة بقول الكلام ده؟ طبعا ربنا سبحانه وتعالى بيربي أصحابه، يعني ما فيش حد يقع في قلبي دلوقتي انتقاص الصحابة، لا، ربنا بيربيهم، لكن عاوز أقول المشاكل اللي احنا بنقولها دي مشاكل مع وجود الدولة، مع وجود التمكين، مع وجود الاستخلاف، مشاكل.. يعني الصحابة.. الصحابة دول رضوان الله عليهم اللي صبروا على المشاكل بتاعه الاستضعاف، ويعني.. ويعني نقدر نقول نجحوا في امتحان الاستضعاف، أدينا شايفينهم بيحصل إيه فيهم في امتحان التمكين وامتحان الاستخلاف؟ لا، محتاجين تربية زيادة هنا. تيجي غزوة أحد ويحصل نفس الكلام، وعارفين القصة: الرماة، ما حدش ينزل، لو بنموت ما حدش يلحقنا، لو بنغنم ما حدش يشاركنا. 50، يخالف منهم 40، أول ما يشوفوا.. إيه؟ الدنيا! وينزل قول الله عز وجل.. قول الله عز وجل في سورة آل عمران: ﴿مِنْكُمْ مَنْ يُرِيدُ الدُّنْيَا﴾ [آل عمران: 152].
لا، دي صعبة جداً؛ لأنها نازلة على قلوب الصحابة. كان ابن مسعود يقسم، يقول: أقسم بالله ما كنت أظن أن أحداً من أصحاب رسول الله يريد الدنيا. وكنت دائماً لما أقول الحتة دي أسال سؤال، أقول لكم: طب ذلك الولي من الصحابة، كان يعرف من نفسه أصلاً إرادة الدنيا؟ يعني هو قاعد كده عارف إنه بتاع دنيا وسايب نفسه ولا لا؟ هو ما كانش يظن في نفسه ذلك، إنما الفتنة كاشفة! عشان كده يا جماعة احنا لا نتمنى البلاء ولا نتمنى.. لا تتمنى لقاء العدو، ليه؟ أنت ممكن تبقى فاكر نفسك وبعدين تفر.
نرجع تاني بس عشان ما نروحش.. يعني بعيد، مهم. فيبقى الإنفاق والجهاد، اللي هو إيه بقى؟ لو هنتكلم بلغة الاقتصاد: الموارد، مش كده؟ احنا بنبني دولة، فالدولة دي محتاجه بذل، محتاجه مال يضخ، ومن أهم موارد المالية في الدولة الإسلامية: الزكاة، والنفقات، والصدقات؛ محتاجه رجال يبذلوا، فاحنا جايبين لك بقى السقف أنك هتبذل نفسك، روحك، فما دون ذلك أولى أنك تبذل. بذلك تقوم الدولة، بذلك يتم الاستخلاف والتمكين مع الإيمان؛ لأن خلي بالكم يا جماعة هنا الآيات ما جتش تقول إيه: فلوس فلوس فلوس، ما فيش كده، قال الله عز وجل.. يعني بعد خلاص ما اتكلمنا عن صفات الله عز وجل، أول آية بعديها: آمنوا بالله ورسوله وأنفقوا. ليحصل التمكين، ليحصل الاستخلاف، محتاجين الاثنين: محتاجين ناس مؤمنة، وناس منفق.
طيب، السؤال الآن عشان نقول: سورة الحديد بترسم لنا الخريطة، الإنفاق جه في السورة زي ما انتم شفتوا مبثوث في الصورة كده أكثر من مرة، الإنفاق ده يحمل في طياته إيه؟ العمل! أحسنت، هو أنا بقول لك: أنفق، طب أنت مفلس، هتنفق إيه؟ فكان الأمر بالإنفاق هنا يحمل في طياته تحصيل المال الذي ينفق، مفهموة دي؟ وقول مثل ذلك على فكرة في أي آية في القرآن فيها الإنفاق.
يبقى هنا سورة الحديد بترسم لنا الخريطة: أهو لا، اشتغل وحصل المال، بس وأنت بتحصل المال خلي بالك أن الصورة المثلى.. أنا بكرر والألفاظ.. معلش هنا دقيقة جداً دي مش الصورة الوحيدة ولا حاجة، دي الصورة المثلى في التعامل مع المال، مع قضية.. القضية الكبيرة دي اللي شاغلة الناس. الصورة المثلى يا ابني وأنت رايح تشتغل عشان تحصل مال، أنك بتحصل ضروريات حياتك وحاجياتك، وما فاض من هذا المال فلله، هتنفق لله، دي الصورة المثلى.
واحد قال: لا، أنا مش هعمل كده، أنا هفضل فلوسي معايا وهطلع الزكاة بتاعتي، تقول له حرام؟ تقدر تقول له حرام؟ خالص، طلع الزكاة. طيب، واحد مع.. ده مع إنه خلى الفلوس معاه وطلع الزكاة، ابتدى يوسع على نفسه جداً في الدنيا. خلي بالكم هنا، أنا مش عايز أقول حرف تقول لي..؛ لأن هنا في بعض العلماء ممكن يخرجوا، لو خرج إلى حد السرف، فالسرف مختلف فيه بين أهل العلم، منهم من يراه مكروه، منهم من يراه السرف صرف حراماً، ده لو خرجنا إلى حد السرف. إنما لو قلنا ما خرجناش لحد السرف، فخلاص بإجماع العلماء ده مش حرام، خلي بالكم مش حرام، يعني ممكن يكون مكروه؟ أه، ممكن، بس مش هاجي أقول لك: أنت بتعمل حاجة حرام، مش هقول لك كده.
لكن دي الصورة المثلى.. لا، عليت صوتي أهو عشان.. لا، دي مش الصورة المثلى، اللي هي إيه بقى؟ للاسف اللي في.. كل الناس دلوقتي.. يعني أنا لو قلت دلوقتي من من الجمع ده كم واحد في دماغه صورة غير دي لحياته اللي قدام؟ هتلاقي كم واحد أهو، واحد رفع إيديه قال لك: أنا عاوز.. أحسن، طلع الزكاة، (ضحك). فدي مش صورة المسلم، خلاص. فيأتي الأمر أو.. أو الحض على الإنفاق في أكثر من آية.
المشاهد برده في سورة الحديد أن في لفظ تكرر كتير في سورة الحديد وهو لفظ عجيب شوية، لفظ النور. النور تقريباً تكرر في سورة الحديد حوالي ست مرات، في سورة النور سبع مرات. فإن لفظ النور يتكرر في سورة الحديد عدد المرات دي برده محتاجة برده نقف معاها شوية، يعني ماشي من المواطن.. مش هنقول بقى كل المواطن، منها: ﴿يَوْمَ تَرَى الْمُؤْمِنِينَ وَالْمُؤْمِنَاتِ يَسْعَى نُورُهُمْ بَيْنَ أَيْدِيهِمْ وَبِأَيْمَانِهِمْ بُشْرَاكُمُ الْيَوْمَ جَنَّاتٌ﴾ [الحديد: 12] إلى آخر بقى تلك الباطن.. هتلاقوا ست.. ست آيات.. ست مواطن في لفظ النور.
عايزين نقعد بقى مع موطن واحد يا جماعة لفظ النور، وهو الموطن الأخير في السورة: قال الله عز وجل: ﴿يَا أَيُّهَا الَّذِينَ آمَنُوا اتَّقُوا اللَّهَ وَآمِنُوا بِرَسُولِهِ يُؤْتِكُمْ كِفْلَيْنِ مِنْ رَحْمَتِهِ وَيَجْعَلْ لَكُمْ نُورًا تَمْشُونَ بِهِ وَيَغْفِرْ لَكُمْ وَاللَّهُ غَفُورٌ رَحِيمٌ﴾ [الحديد: 28].
الموطن ده جه بعد قول الله عز وجل: ﴿وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاءَ رِضْوَانِ اللَّهِ فَمَا رَعَوْهَا حَقَّ رِعَايَتِهَا فَآتَيْنَا الَّذِينَ آمَنُوا مِنْهُمْ أَجْرَهُمْ وَكَثِيرٌ مِنْهُمْ فَاسِقُونَ﴾ [الحديد: 27]، ثم قال: ﴿يَا أَيُّهَا الَّذِينَ آمَنُوا اتَّقُوا اللَّهَ وَآمِنُوا بِرَسُولِهِ يُؤْتِيكُمْ كِفْلَيْنِ مِنْ رَحْمَتِهِ وَيَجْعَل لَّكُمْ نُورًا تَمْشُونَ بِهِ وَيَغْفِر لَكُمْ﴾ [الحديد: 28].
كان المعنى والله أعلم في ذكر النور في هذا الموطن، أن السورة بتختم خلاص، وعرفنا إن في فئة متكلبة على الدنيا وقست قلوبهم، وفي فئة ترهبنت وتركت الدنيا، وجاءت آية الحديد قالت لنا أنتم لازم تاخذوا بالكتاب والحديد جميعا، فتهتموا بأمور الدنيا التي تصلح الدنيا. وهنا يا جماعة لما نجي نقول تصلح الدنيا برده معلش قبل ما نجي للفظ النور ده، لما يجي يقول تصلح الدنيا يا جماعة، يعني دنيا المسلمين برده ما تبقاش تفكيرك محدود في دنياك أنت. فاحنا بنقول مثلا إن في فروض كفايات لازم تتحقق في المسلمين، ودي واحدة من الحاجات اللي الشباب برده بيسالوا عنها.
أنه لما تيجي تقول أنا هدخل الكلية دي ولا الكلية دي، مجموعة الجاية بالكليات كلها، فهادخل دي ولا دي؟ شوف أنفع للمسلمين، ودي واحدة من الحيثيات التي يختار عليها المسلم طريقه. كان الشيخ أسامة حامد حفظه الله حدثنا أن كانت دي طريقه تفكير الشيخ أسامة عبد العظيم رحمه الله، يعني لما يجي يسال واحد هيبتدي صنايعي ما حوش شهادة، طب أبقى بتاع ألوميتال ولا أبقى نجار؟ كان الشيخ عبد العظيم ينظر هذا النظر: أيهما أنفع للمسلمين؟
أمال يا جماعة احنا عاوزين نسيم، يقول لك إيه: أصل أنا عاوز أخد ثواب، وبالنية تتظبط مش عارف إيه، ما هو إزاي تتظبط بكده؟ أدیت مثال قبل كده لإخوانكم في مكان ثاني، قلنا الشيبس اللي هي بتتحط في أي حاجة دلوقتي، مش الشيبسي، الشيبسي دي اللي هي إيه بالعربي؟ رقائق إيه؟ شرائح إيه طيب الإلكترونية، أيوه، شرائح الإلكترونية. ما كل ده برده ممكن يجي في دماغهم: إيه اللي جعان رقائق وشرائح؟ الرقائق الإلكترونية بالعربي، ماشي، حاجة كده قد عقلة الصباع كده، ما فيش حاجة في الدنيا، ما فيش أي جهاز حديث غير يمشي لازم بالتشيبس دي، والمهم، التكنولوجيا بتاعة الشيبس دي ولا بتاعة الرقائق الإلكترونية دي فين في أمة الإسلام؟ ما تلاقيهاش.
يعني كم سنة فاتوا كان سواء الشيبس دي ولا البروسيسورز اللي هي بتاعة الكمبيوتر ولا أياً كانت يعني، محتكرة على شركة أو ما أعرفش دلوقتي لأن ده مش مجالي الصراحة، بس لغاية كم سنة فاتوا كانت هي شركة أو اثنين اللي في العالم كله اللي عندهم الصناعة دي أصلاً، مش بقول لك دولة ولا اثنين، شركة، شركة أو اثنين. طب أنت النهارده الحرب لو قامت، تقوم من غير الحاجات دي؟ مستحيل، أنت الصواريخ بها، الطيارات بها، الدبابات، كل حاجة دلوقتي في الحرب لازم يبقى في التشيبس دي موجودة، ولازم يبقى في، طيب مين بقى من المسلمين يعرف يتقن مثل ذا؟ ما تلاقيش حد خالص، ب، احنا نسمع شيبسي نفكر شيبسي يعني، بص احنا أصلاً فين؟ احنا بعيد قوي.
فده هو ده علم اهو، الطب قل مثل ذلك في الطب، عندنا فرض كفاية أن يبقى عندنا الأطباء، ومثل ذلك بقى في أي صناعة، مش لازم بقى طب وهندسة، لا، السباك، تتضرر حياة المسلمين بشكل بالغ لو عدموا السباكين، ما فيش سباكين، النجار وهكذا يعني، المهم، فده اللي هي أي تحديد.
طب تعال بقى لأخر موطن ذكر فيه النور في السورة، كأني خلاص احنا بنختم يا جماعة، الآية اللي احنا بنقولها بتاعة النور دي هي الآية قبل الأخيرة في السورة، كأننا خلاص عرفنا في ناس قست قلوبهم، في ناس ترهبنوا، وعرفنا الوسط: أنزلنا الكتاب وأنزلنا الحديد. طيب، فانت هتعمل إيه؟ هتبقى محتاج تمشي في الدنيا بقى عشان تحصل المال اللي هتنفقه، وادي جه معانا الإنفاق، وعشان تكون وسطا كما فهمت من الآية من السورة، هيحصل إيه وأنت ماشي في الدنيا؟ هيلتبس عليك أمور، مش كده، يعني دي حلال ولا حرام؟ طب اعمل دي ولا ما اعملهاش؟ طب اتصرف ازاي في الموضوع ده؟ مش لازم حلال وحرام، ممكن ده الاحسن لديني ولا مش الاحسن؟ ممكن يبقى حلال بس هو مش الاحسن لدينك. طب السفرية دي أسافرها ولا ديني هيروح؟ العقد ده أوافق عليه ولا ما أوافقش؟ أسيب الشركة وأروح الشركة الثانية اللي هتتديني مرتب احسن ولا ما روحش؟ أنت هنا محتاج إيه؟ محتاج نور.
خلاص، كأنك خلاص السورة بتختم وأنت رايح تنطلق في الدنيا، خلاص عرفت أن لازم دين ولازم دنيا، وأن الدنيا نطوعها لخدمات الدين، وأن أنا بقول الصورة المثلى ها عشان ما حدش يقول يعني الصورة المثلى أهي، وأني ما زاد عن ما فضل وزاد عن الحاجة فهو لله ما هواش لي، وهنطلق بالنفسية دي يا رب، فأنَا في طريقي محتاج نور، محتاج نور. طب النور ده كيف أحصله؟ السورة بتتختم، فيأتي قول الله عز وجل: ﴿يَا أَيُّهَا الَّذِينَ آمَنُوا اتَّقُوا اللَّهَ وَآمِنُوا بِرَسُولِهِ يُؤْتِيكُمْ كِفْلَيْنِ مِنْ رَحْمَتِهِ وَيَجْعَل لَّكُمْ نُورًا تَمْشُونَ بِهِ﴾ [الحديد: 28].
شوف اللفظ: ﴿تَمْشُونَ بِهِ﴾، ﴿تَمْشُونَ بِهِ﴾ تبقى ماشي في حياتك معاك النور، معاك التوفيق. الآية الثانية بتاعت فرقانا من، ها: ﴿إِن تَتَّقُوا اللَّهَ يَجْعَل لَّكُمْ فُرْقَانًا﴾ [الأنفال: 29]، تفرقون به بين الحق والباطل، هو هذا النور، أنت عاوز نور تمشي به، وأنت في الدنيا دي وأنت بتحصل الدنيا دي ﴿تَمْشُونَ بِهِ﴾. وممكن وأنت ماشي بقى تقع، تيجي اللي بعديه على طول، وايه؟ ﴿وَيَغْفِر لَكُمْ﴾ [الحديد: 28]، يعني طالما أنت ماشي لله سبحانه وتعالى، محتاج النور اللي هتحصله بالتقوى، احنا بنرجع لورا، ماشي، ﴿اتَّقُوا اللَّهَ وَآمِنُوا بِرَسُولِهِ﴾ [الحديد: 28] محتاج تقوى، فالتقوى تبصرك تنور لك طريقك، تبقى ماشي معاك نور، وممكن في وقت تزل تقع، ما تقلقش، ربنا غفور، ﴿وَيَغْفِر لَكُمْ وَاللَّهُ غَفُورٌ رَّحِيمٌ﴾ [الحديد: 28].
زهقت ولا الناس بتمشي؟ هو كده فات قد ايه؟ ساعة صح؟ ماشي، احنا كروتنا الدرس كده، طيب نختم بقى يعني إن شاء الله في ساعة كده وعشان، أنتم فاكرين صعبتم عليَّ.
طيب، في سورة الحديد بقى يا جماعة اللي جاية ترسم لنا، أنا بعيد الألفاظ تاني، اللي بترسم لنا خريطة التعامل في اوقات التمكين لاستخلاف وقت الدولة، هنلاقي الإشكال الكبير اللي هو بتاع الدين والدنيا ده هو أصلاً ناشئ عن إشكال ثاني هو الأكبر، اللي هو أن الدنيا إيه في قلوبنا؟ حجمها إيه؟ كبير جداً مش كده؟ فتلاقي في سورة الحديد بقى علاج لده كله.
قال الله عز وجل: ﴿اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ وَزِينَةٌ وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ * سَابِقُوا إِلَىٰ﴾ [الحديد: 20-21]، فاكرين لما قلنا السباق جه في سورة الحديد؟ ﴿سَابِقُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ ۚ ذَٰلِكَ فَضْلُ اللَّهِ يُؤْتِيهِ مَن يَشَاءُ ۚ وَاللَّهُ ذُو الْفَضْلِ الْعَظِيمِ * مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا ۚ إِنَّ ذَلِكَ عَلَى اللَّهِ يَسِيرٌ * لِكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتاكُمْ ۗ وَاللَّهُ لَا يُحِبُّ كُلَّ مُخْتَالٍ فَخُورٍ﴾ [الحديد: 21-23].
هذه الآيات حلت الإشكال كله، أنت يا اللي عمال تسال عن الدين والدنيا، مشكلتك فين؟ مشكلتك أنك معظم لدنيا، ويمكن بعض الشباب دلوقتي وهو بيسمعني مستتقل الصورة المثلى اللي أنا بقولها دي، وكان يتمنى يلاقي خطاب أو الخطاب السائد بيقول لهم يعني الدنيا حلوة، وخذوا من الدنيا، والدنيا لطيفة، والدنيا جميلة، وهي الدنيا لا جميلة ولا لطيفة ولا حلوة، الدنيا ملعونه، ده كلام مين؟ ده كلام النبي عليه الصلاة والسلام: «الدنيا ملعونة»، ماشي، «ملعون ما فيها إلا ذكر الله وما والاه وعالماً أو متعلماً».
طيب اللفظ الآخر بقى اللي كله بس عشان مؤدبين مش عايزين يقول، قال إيه؟ أن الدنيا أن الدنيا حلوة خضرة، اه، حلوة يعني إيه حلوة؟ يعني حاجة حلوة؟ لا، هي مش هي حلوة يعني، «زخرفت لكم لتكون فتنة»، بس كده، ده بقية الحديث، «وإن الله مستخلفكم فيها فناظر كيف تعملون»، ماشي، فدي الدنيا ببساطه.
هل سورة زي سورة الحديد ممكن لو احنا قلنا أن ده نظام السورة مقاصد السورة تعدي كده من غير ما تتكلم على الدنيا؟ مستحيل، مستحيل، ده هو ده حل الإشكالات كلها، فيبدأ الله عز وجل تلك الآيات بقى بهذه الآية، الكلام عن الدنيا: ﴿اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ﴾ [الحديد: 20]. وبعد ده جه بعد إيه؟ بعد الأمر بالإنفاق كذا مرة، ها، الآيات اللي احنا قلناها بتاعة الإنفاق، يجي يجي بقى الآيات دي، وبعدين تختم بذكر البخل الآية اللي أنا قلتها دلوقتي، بعد الأمر بالإنفاق كذا مرة في السورة، وتختم: ﴿الَّذِينَ يَبْخَلُونَ وَيَأْمُرُونَ النَّاسَ بِالْبُخْلِ﴾ [الحديد: 24]، لأن خلاص ما فيش معنى بعد كده للبخل بعد ما عرفتوا كل اللي احنا هنعرفه كمان شوية.
قال سبحانه وتعالى: ﴿اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ وَزِينَةٌ وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ كَمَثَلِ غَيْثٍ أَعْجَبَ الْكُفَّارَ نَبَاتُهُ﴾ [الحديد: 20]. الكفار اللي هم مين؟ الزراع، ليه تسموا كفار؟ زراع كفار يعني ولا عشان؟ آه، عشان إيه؟ الكفر إيه هو الأول؟ التغطية، كفر كفر كفر، إيه الكفر؟ الكفر اللي هو الغطاء، مش الغطاء، بيقولوا إنه جاي من كفر، كفر يعني غطى، ولذلك الزراع اتسموا كفار ليه؟ عشان بيحطوا البذرة في الأرض ويدفنوها جوه الأرض، فتسموا كفار عشان كده، ماشي.
طب الكفار ليه بقى تسموا كفار؟ غطوا الحق، مش كده، اللي هو التوحيد، كفروا به. طيب، الدنيا دي بقى زي إيه يا جماعة؟ ربنا شبهها قال: ﴿كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا﴾ [الحديد: 20]. هي دي الدنيا، يبقى أول حاجة الدنيا دي شوية إيه؟ تسارع بينا كده، وتكاثر ومنافسات وكده، وكلها زائلة: ﴿كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ ثُمَّ تَرَاهُ مُصْفَرًّا، ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا﴾ [الحديد: 20].
الآية الثانية في سورة الكهف اللي بتقول لنا نفس الكلام ده، إيه عجيبة جداً بقى، ماذا قال الله عز وجل فيها؟ ﴿وَاضْرِبْ لَهُم مَّثَلَ الْحَيَاةِ الدُّنْيَا كَمَاءٍ أَنزَلْنَاهُ مِنَ السَّمَاءِ فَاخْتَلَطَ بِهِ نَبَاتُ الْأَرْضِ﴾ [الكهف: 45]. ثواني بس، ﴿فَاخْتَلَطَ بِهِ نَبَاتُ الْأَرْضِ﴾، يبقى مية نزلت من السماء اختلط بها النبات، يلا، كله يقول بقى دي فترة إيه؟ المية نزلت اختلطت بالنبات، احنا مستنيين ربنا يكلمنا عن إيه دلوقتي؟ عن الزرع والثمر والزهر، مش كده؟ الآية عجيبة جداً: ﴿وَاضْرِبْ لَهُم مَّثَلَ الْحَيَاةِ الدُّنْيَا كَمَاءٍ أَنزَلْنَاهُ مِنَ السَّمَاءِ فَاخْتَلَطَ بِهِ نَبَاتُ الْأَرْضِ فَأَصْبَحَ هَشِيمًا﴾ [الكهف: 45]، كمن، ﴿فَأَصْبَحَ هَشِيمًا تَذْرُوهُ الرِّيَاحُ﴾ [الكهف: 45].
فهمتوا؟ وكان فترة الإنبات والإظهار والإثمار ولا حاجة، مش موجودة، ومش بس مش موجودة، ده بسرعة: ﴿فَأَصْبَحَ هَشِيمًا تَذْرُوهُ الرِّيَاحُ﴾ [الكهف: 45]. تخيلوا، أهي دي الدنيا اللي احنا بنجري وراها.
وبعدين عارفين في إيه يا جماعة؟ لو هي دي الدنيا اللي بنجري وراها وهنموت وخلاص أهي، صفحة واتفقفلت، كنا ماشي، يبقى العقل يقول: أجري، إنما المشكله عارفين إيه؟ أن في إيه؟ في آخرة، ولذلك شوفوا بقى ترتيب الآية: ﴿ثُمَّ يَكُونُ حُطَامًا ۖ وَفِي الْآخِرَةِ﴾ [الحديد: 20]. قبل إيه؟ ده هو في آخرة، هو احنا مشغولين بالدنيا دي وهو في آخرة؟ طب أنت هتقعد قد إيه في الدنيا؟ كام سنة يعني؟ كام؟ ولا حاجة، ولا حاجة، وقلنا لكم قبل كده بحسبة رياضية بسيطة، لو هتقعد في الدنيا مليار سنة، مش 100 سنة بقى، مليار سنة يا سيدي، نسبتها إلى الآخرة كام؟ اللي منكم فاهم رياضة: صفر. لأن احنا عندنا في الرياضة ببساطة: حط في البسط أي رقم طالما المقام ما لا نهاية، الناتج صفر. دي معروفة في الرياضة، دي اللي منكم دارس في رياضة ويعني واعي فاهم اللي أنا بقوله ده كويس، حط في البسط الرقم اللي تحطه فانت هتعيش قد إيه؟ 100 سنة، ده البسط، نسبته للآخرة؟ الآخرة ما لا نهاية، حطها في المقام، صفر. دي اللي أنت بتجري وراها.
وبعدين في آخرة، الآخرة بقى ما لا نهاية: ﴿وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ﴾ [الحديد: 20]. يبقى في آخرة، والآخرة فيها عذاب شديد، وإذا قعدت بقى تتأامل عذاب الآخرة من أول ما تموت، سؤال الملكين وضغطة القبر، والقيامة، يعني القيام للحساب، ودنو الشمس والعرق، والوقوف بين يدي الله عز وجل، ويسالك عن ذنوبك، عن ذنب ذنب، وبعدين أن يؤمر بك، أنت قاعد بقى مستني جنة ولا نار، الصراط، أهوال يا جماعة احنا ده كله ما قلناش حد دخل نار، ما قلناش حد دخل نار لسه، ما بنتكلمش عن النار، أهوال، وفي الآخرة عذاب شديد ومغفره من الله ورضوان.
وما الحياة الدنيا إلا متاع الغرور، متاع زائل يغتر به المغرورون. طيب عرفت يا ابني الدنيا قد إيه والآخرة قد إيه؟ إيه المطلوب منك دلوقتي؟ سابقوا، الآية اللي بعدها على طول: ﴿سَابِقُوا﴾. شوفوا ختام الآية اللي فوق إيه؟ قال: ﴿وَفِي الْآخِرَةِ عَذَابٌ شَدِيدٌ وَمَغْفِرَةٌ﴾ مش كده ﴿وَمَغْفِرَةٌ مِّنَ اللَّهِ وَرِضْوَانٌ﴾ [الحديد: 20]. طب نسابق لايه بقى؟ للمغفره دي، للجنه، للرضوان: ﴿سَابِقُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ﴾ [الحديد: 21]. طب الطول؟ أنتم عارفين العرض بيبقى أصغر ولا الطول؟ العرض، ربنا هنا قال: ﴿عَرْضُهَا كَعَرْضِ السَّمَاءِ وَالْأَرْضِ﴾ ما قالش طول الجنة. وبعدين ابن عباس أظن قال إيه؟ عرض الجنة انك تجيب السماوات.
وتحطها جنب بعض تلحمها في بعض، والأرضين تلحمهم في بعض، عرضهم ده عرض الجنة. السماوات بقى أما أقول الكلمة دي، احنا كنا هنا أدينا آية الكرسي، فأنتم فاهمين هنتكلم في إيه دلوقتي؟ يعني أنتم فاهمين احنا هنتكلم في إيه؟ ده إيه بقى؟ ده العرض، يبقى الطول إيه؟ شوف بقى احنا مضيعين إيه عشان إيه؟ احنا مضيعين جنة، ربنا بيقول لنا: سابقوا. يا جماعة لفظ السباق، عشان بس نفهم برضه، يقول لك: لا يا شيخ هو احنا مضيعين إيه بس؟ لا لا ده أنا الحمد لله ما فيش فرض بيفوتني، والحمد لله، وده الحمد لله برضه يعني أنا ما بقولش ده، بس هو ده مش السباق، ده مش السباق.
يعني لو سباق دنيا، فأكيد مش هيجي واحد يقول لك: إيه لا أنا بمد اهو. يا ابني بتمد إيه؟ دي التانية راكب عربية، أنت بتمد إيه وتقول لي ما أنا بسابق؟ أنت بتهزر، ده مش السباق. طب يعني أنا كده رايح النار؟ ما بقولش رايح النار، بس بقول لك ده مش السباق، يعني أنت لو بتسابق، لا. ففي ناس بقى، في ناس بتعمل، في ناس بتعمل، وبعدين أنت يوم القيامة هتحشر مع جيلك، عشان بس دايما الشباب بيقول لك كده، يقول لك: ده أنا أحسن واحد في أصحابي. هو في البلاعة! أنت أنت في البلاعة، أنت بس لو خرجت بره هتلاقي ناس مستحمية، أنت ما تعرفش إن في حاجة اسمها مية؟ فأنتم بتقارن نفسك بايه؟
هو بيبقى كده فعلا، يعني تيجي تلاقيه إيه، أصل قاعد مع ناس بتسب الدين وبتشرب مخدرات وبتسرق من أبوها، فهو بالنسبة له مثلا إنه بس إيه يعني ما هو ما بيصليش، يعني اللي بيقول لك أنا أحسن واحد ده هو بيصلي، ما بيركحهاش، ما يعرفش أصلا يصلي، بس مثلا آخره إيه سيجارة بانجو مثلا ما زودش عن كده، فهو هو المحترم، هو بيقول لك يقول لك: ده أنا المحترم اللي فيهم! أيوه، طب أنا مالي أنا؟ أنت راجل قاعد في المستنقع، لا حضرتك هو في ناس في المساجد. فاحنا في سبب يا جماعة، في سبب: ﴿سَابِقُوا إِلَى مَغْفِرَةٍ مِّن رَّبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ ذَلِكَ فَضْلُ اللَّهِ يُؤْتِيهِ مَن يَشَاءُ وَاللَّهُ ذُو الْفَضْلِ الْعَظِيمِ﴾ [الحديد: 21].
وبعدين الآيات بقى تحل لنا مشكلة تانية، قال الله عز وجل: ﴿مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا إِنَّ ذَلِكَ عَلَى اللَّهِ يَسِيرٌ * لِكَيْلَا تَأْسَوْا عَلَى ما فَاتَكُمْ وَلَا تَفْرَحُوا بِمَا آتاكُمْ﴾ [الحديد: 22-23]. مش دي يا جماعة مشكلة بتواجهنا في الدنيا؟ اللي بيزعل على دنيا فاتته لدرجة أن يجي له ضغط، ويجي له السكر، ومنا اللي بيجي له جلطة، ومنا اللي بيموت بسكتة قلبية، صح ولا غلط؟ بيجي له اكتئاب ويتعالج لدنيا فاتته. حط بقى كلمة دنيا دي: فلوس، ما جابش النتيجة اللي كان مؤملها في الثانوية، فاته المنصب الفلاني اللي كان بيحارب علشانه بقاله سنين، زوجته ماتت، تجي له كتاب. ولا دي حاجة حلوة؟ عيب، حاجة حلوة طبعا، تصور وهيتشاف وحاجة جميلة. لا حاجة وحشة، يعني حاجة وحشة جدا. لا لا والله أقول كده فعلا، مونتاج بقى.
ما أصاب من مصيبة في الأرض ولا في أنفسكم إلا في كتاب من قبل أن نبراها إن ذلك على الله يسير، فاهدوا، اهدوا، امشوا في شوفوا يا لما جه لفظ الدنيا، فامشوا فيه، امشي. الآخرة بقى سابقه، سارعوا، وفي ذلك فليتنافس المتنافسون. طب في الدنيا؟ امشوا، امشوا في مناكبها، ما تجريش، ليه؟ أصل كله مكتوب، فما تشغلش دماغك، طب فاتك الفلوس؟ ما والله ما كانت بتاعتك، والله. زعلان ليه؟ نرجع بقى للأول يا متدين، مش أنت اللي كنت بتقول الزهد أن تكون الدنيا في مش عارف يدك ولا تكون في قلبك؟ زعلان ليه؟ ما هي الدنيا لو مش في قلبك هتزعل، ما تولع الدنيا!
جت لك الدنيا؟ شوفوا بقى الآية يا جماعة حاجة عجيبة جدا، قال سبحانه وتعالى: ﴿لِكَيْلَا تَأْسَوْا عَلَى مَا فَاتَكُمْ وَلَا تَفْرَحُوا بِمَا آتَاكُمْ﴾. لا زعلان على دنيا فاتت، ولا فرحان بدنيا جت. إيه رايكم بقى؟ ودي بيقولوا دي أعلى الدرجات أصلا، عارفين إيه أعلى الدرجات يا جماعة؟ يعني أعلى الدرجات أنك ليه لا تزعل على اللي فات ولا تفرح باللي جاي؟ لأنك مش شايفها أصلا، ففاتتك لا زعلان ولا فرحان، جت لك لا زعلان ولا فرحان.
هرجع تاني للمثال اللي هيوضح لنا الصورة قوي، اللي هو وأنت ماشي لقيت جناح بعوضة، هتزعل؟ هتفرح؟ ولا شاغل الجناح البعوضة؟ طيب، وأنت ماشي راح واحد صاحبك قال لك: أنا لقيت جناح بعوضة، وأنت لا، هتزعل؟ هتفرح؟ ولا شغلك؟ دي أعلى درجة، اللي هي مش شاغلاني أصلا، جت راحت، لا زعلان ولا فرحان، ليه؟ مش شغلاني، مش شايفها.
﴿لِكَيْلَا تَأْسَوْا عَلَى مَا فَاتَكُمْ وَلَا تَفْرَحُوا بِمَا آتَاكُمْ وَاللَّهُ لَا يُحِبُّ كُلَّ مُخْتَالٍ فَخُورٍ * الَّذِينَ يَبْخَلُونَ وَيَأْمُرُونَ النَّاسَ بِالْبُخْلِ وَمَن يَتَوَلَّ فَإِنَّ اللَّهَ هُوَ الْغَنِيُّ الْحَمِيدُ﴾ [الحديد: 23-24]. أقول قولي هذا، واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.
الشيخ أمجد سمير