بسم الله الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على محمد النبي، وأزواجه أمهات المؤمنين، وذرياته وآل بيته، كما صليت على آل إبراهيم إنك حميد مجيد. أما بعد:
فمما قالوه: إن القلب في سيره إلى الله عز وجل كالطائر يطير بجناحين، رجاء وخوف؛ فلا بد من الجناحين جميعاً كي يستقيم للطائر طيره. أنتم عارفين، لو طائر بيطير يعني لو بجناح واحد ما يعرفش يطير، ولو في جناح كان أقوى من جناح، هيحدف مش كده، يحدف يمين أو ما برده يعني إيه طيره لن يستقيم، فلا بد من أن يكون للطائر جناحان.
كذلك العبد؛ قلبك وهو في طريقه لربنا سبحانه وتعالى لا بد له من رجاء وخوف، وهذه معلومة أظن ما فيش حد مش عارفها. النهارده عاوزين نتكلم عن الرجاء، لكن مش جايين نرجوكم، احنا جايين نتكلم عن الرجاء، ماشي؟ أنتم عارفين ما بعرفش، عشان أنا ماليش في السكة دي. عندنا شوية إشكالات بتصل؛ وأولى هذه الإشكالات يعني: أمثلة نتكلم عن الرجاء وأمثلة نتكلم عن الخوف؟ ده أول إشكال بيحصل عند الناس. تعالوا نقرا كلام ابن الجوزي، الحقيقة كلام جميل جدا ونعلق عليه.
يقول ابن الجوزي وهو يتكلم عن الرجاء: قال: اعلم، خليكوا معايا أنا ما لوش دعوة بحد غيري. يقول ابن الجوزي رحمه الله: اعلم أن هذا الدواء -يعني الرجاء- يحتاج إليه رجلان: أما رجل غلب عليه الياس فترك العبادة، وأما رجل غلب عليه الخوف وأسرف في المواظبة على العبادة حتى أضر بنفسه وأهله. ثاني، ابن الجوزي بيقول: إن الرجاء ده دواء، والدواء ده محتاجه واحد من اثنين: أول واحد رجل غلب عليه الياس فترك العبادة، واحد قنط من رحمة ربنا سبحانه وتعالى فسأب العبادة، ويمكن مش بس كمان ساب العبادة، ده أفرط في المعاصي، زي مين كده يا جماعة؟ قاتل الآية؟ لا، قاتل التسعة وتسعين، لأنه هو لما قتل المائة بعد كده رجع فتاب وحسنت توبته. خلونا هنتكلم عنه كمان شوية إن شاء الله، لكن لما قتل هذا الرجل، لما كان بيقتل واحد ورا التاني ورا التالت لغاية تسعة وتسعين، ده واحد قانت من رحمة ربنا سبحانه وتعالى، ولذلك لما راح: دلوني على أعلم أهل الأرض، دلّوه على راهب، فقال له: ألي توبة؟ قال: لا، فقتله. طيب، ليه قتله؟ هو أصلاً يائس خلاص من رحمة ربنا فقتله فأكمل به المائة. فالواحد ممكن من ياسه يترك العبادة، وربما من ياسه يخرج إلى المعاصي والفواحش والموبقات.
واحد زي ده محتاج يسمع إيه؟ رجاء ولا خوف؟ يعني خاطر تسعة وتسعين نفس ده يا جماعة -دي برضه حتة يعني معلش عشان برضه اللي منكم بتصدر لدعوة أو كده- هو واحد جايلك مستوي وعمال يعيط: أنا عملت يا عم الشيخ، وفجرت وزنيت وشربت وما صليتش سنين! تقوم تقعدوا تكلموا عن النار وعن اللقاء بالموت وعن.. يا عم، هو جايلك أصلاً وهو مستوي، ده مش عاوز يسمع تاني في الخوف خلاص، ده واحد عاوز ترشده، وربما كان يريد أن ترشده إلى الطريق بس يعني، هو جاي هو مستعد يعمل بس مش عارف يعمل إيه. مهم يا جماعة جداً نفهم نفسيات الناس عشان تخاطب كل واحد بنفسيته.
من الحاجات اللي أذكرها ومن المواقف التي تعلمت منها كثيراً: واحد صديقي رحمه الله ابتلي بالسرطان وبقى هيكل عظمي وخلاص بيموت، هو عارف خلاص إنه يعني أجله اقترب. وبعدين كان بكلمني، اتصل بيا، قال لي: كلمني شوية وكده يعني. فابتديت أكلمه في الرضا بقضاء الله، ظننت أن ده المناسب للمقام؛ إنه أكلمه عن الرضا بقضاء الله عز وجل والاحتساب وكذا وكذا. فابتديت، أول ما ابتديت الكلام، قطعني! قال لي: أنا مش صابر، أنا راضي، أنا ولا ما يشغلكش الكلام ده خالص! هذا الرجل بيقول لي كده يعني، بيقول لي: أنا مش بس صابر، أنا راضي، وما فيش في قلبي خالص، أنا عاوز أعرف.. هو بقى كان بيكلمني ليه؟ بيقول لي: أنا عاوز أعرف أطيب شيء أعمله دلوقتي؟ إيه الحاجة اللي أنشغل بها في هذه الفترة؟ خلاص، أنا هموت خلال ساعات، خلال أيام. وهو فعلاً، وقد كان؛ هو مات بعديه على طول بعد هذه المكالمة. فبيقول لي: ما تكلمنيش عن الرضا والصبر والحاجات دي، ده كله موجود وحاسه.. فمهم تبقى عارف اللي قدامك محتاج إيه دلوقتي.
المهم، واحد قانط يائس من رحمة الله عز وجل، ده يسمع في الرجاء. والآخر.. وأما رجل غلب عليه الخوف وأسرف في المواظبة على العبادة حتى أضر بنفسه وأهله. خلوا بالكم، يبقى الأولاني قعد عن العبادة، الثاني أسرف في العبادة حتى أضر بنفسه وأهله. يعني إيه أضر بنفسه وأهله؟ يبقى ما بقاش عنده لا وقت ولا صحة يسعى على حاجة في الدنيا ولا حاجة من يعول، فضيع دنياه ودنيا من يعول لشدة خوفه مما أزعجه وجعله يسرف في العبادة. والنبي عليه الصلاة والسلام نهى عن هذا اللون، لما لقى حبل مربوط في المسجد، قال: لمن هذا الحبل؟ ده ليه؟ فأخبروه أن إحدى زوجاته ربطته في المسجد تصلي طول الليل، فلما تتعب تسند على الحبل عشان ما تريحش يعني، فقال: «حلّوه. ليصلي أحدكم نشاطه، فاذا فتر فليرقد». وعارفين قصة الثلاثة نفر الذين أتوا إلى بعض أزواجه وسألوا عن عبادته صلى الله عليه وسلم، فكانهم تقالوها، فقال أحدهم: لله علي أن أصوص فلا أفطر، وقال الآخر: لله علي أن أقوم فلا أرقد، وقال الثالث: لله علي ألا أتزوج النساء. فغضب النبي صلى الله عليه وسلم لذلك وقال: «أما أنا فأصوم وأفطر، وأقوم وأرقد، وأتزوج النساء؛ فمن رغب عن سنتي فليس مني». الخوف الشديد الذي يخرجنا إلى الإفراط في عباده الله عز وجل إفراطاً يضر بالدنيا أيضاً مذموم.
فلو واحد من الاثنين دول محتاج رجاء، قال: وهذان رجلان مائلان عن الاعتدال إلى طرفي الإفراط والتفريط، فيحتاجان إلى علاج يردهما إلى الاعتدال. فاما العاصي المغرور المتمني على الله مع الاعراض عن العبادة واقتحام المعاصي فادوية الرجاء تنقلب في حقه سموما مهلكه. مفاجأة صح؟ آه، تاني بقى، نعيد الجمله دي تاني! يبقى عندنا اثنين محتاجين رجاء يا جماعة، اسمعوا رجاء. طيب، وفي صنف ثالث ابن الجوزي بيقول: ده ما ينفعش يسمع في الرجاء، ده لو سمع في الرجاء هينقلب في حقه الرجاء، ينقلب سمّاً مميتاً مهلكاً. قال: أما العاصي المغرور.. أنا بسكت عشان يعني نشوف الألفاظ دي.. العاصي المغرور المتمني على الله مع الإعراض عن العبادة واقتحام المعاصي، فأنوية الرجاء تنقلب في حقه سموماً مهلكة. يبقى احنا نتكلم عن الرجاء ولا ما نتكلمش؟ ما نتكلمش عن الرجاء، مش كده؟ ده كلام ابن الجوزي، خلاص! يبقى هو عنده المفرط، المنهمك في المعاصي وفي الغفلة وفي الشهوة، تيجي تكلمه عن الرجاء يقوم يتجرأ زيادة ويقول إيه: خلاص بقى، ربنا غفور رحيم! فينقلب الرجاء في حقه سماً مهلكاً، وتتنزّل منزلة العسل الذي هو شفاء لمن غلب عليه البرد وهو مهلك لمن غلبت عليه الحرارة. يعني إيه؟ عارف كده لما تيجي واحد ضغطه عالي فتدي له دواء بيعلي الضغط؟ هيموت! هو كده بيقول: العاصي الغافل المنهمك في الشهوات والملذات البعيد عن رب الأرض والسماء، هتيجي تكثر معه في الكلام عن الرجاء؟ أنت بتدمره، بتضيعه!
خلاص، طيب، هيتبقى إشكال، يعني ده كده كأننا خلاص أنا عرفت لو واحد يائس هكلمه في الرجاء، واحد خايف خوف شديد فمزود في العبادة أو قفل على نفسه بقى البيت ومش نازل ومش.. هكلمه في الرجاء، واحد شايفه معاصي وبتاع ومش عارف إيه.. خلاص هكلمه في الخوف. الإشكال فين دلوقتي؟ لو دعوة عامة، قاعدين كده في مكان ومش عارف بقى يعني الناس دي إيه، هنتكلم في إيه دلوقتي؟ يقول ابن الجوزي: وهذا الزمان.. زمان مين؟ ابن الجوزي، مش زماننا، زماننا جميل.. وهذا الزمان زمان لا ينبغي أن يستعمل فيه مع الخلق أسباب الرجاء. ابن الجوزي بيقول: الزمان بتاعنا ده ما ينفعش أصلاً نتكلم في الرجاء، قال: بل المبالغة في التخويف، لأن ذكر أسباب الرجاء يرديهم بالكلية، هيأدمّرهم! ده أيام مين؟ ابن الجوزي. وإنما يذكر الواعظ للعصاة أسباب الرجاء إذا كان مقصوده استمالة القلوب إليه لإصلاح المرضى. والله الواعظ الداعي لو عاوز يتكلم في الرجاء عشان الناس تحبه، فبعدين، أما تحبه بقى يروح إيه؟ يجلد براحته، ماشي. إنما ما يبقاش أكثر خطابه الرجاء، ده غلط. ليه غلط؟ لأنه تعالوا يا جماعة بإنصاف بقى، ماشي؟
دلوقتي لو احنا قلنا اللي قاعدين باللي واقفين، كله كام في المائة كام في المائة نتوقع كده؟ هو أحد الرجلين الأولين، يعني كام فينا هو واحد يائس ياس شديد جداً لدرجة إنه ساب العبادة وخرج إلى المعاصي وكذا وكذا، أو خايف خوف شديد لدرجة إنه منهمك في العبادة انهماكاً أضر بدنياه؟ غالباً ممكن نسبة تؤول للصفر، يعني ما تلاقيش غالباً، يعني لو قلنا نصف في المائة، واحد في المائة، ده يبقى احنا كرمنا.. طيب، كام في الرجل الثالث؟ الغافل، العاصي، المقصر، المذنب؟ مائة وثلاثون في المائة! مش كده؟ فبقى أن الخطاب يكون أكثره طبطبة ورجاء ومش عارف إيه، ده مضر، هذا الخطاب خطاب مضر.
لا نتكلم في الرجاء؟ لا، طبعا، نتكلم في الرجاء، لأن واحدة من فوائد الرجاء أن الناس بتحب ربنا؛ ما احنا هنتكلم في الرجاء، هنتكلم عن إيه؟ عن رحمته وعفوه ومغفرته واحسانه وبره سبحانه وتعالى، فيزداد حبك لله عز وجل، فده واحدة من فوائد الكلام عن الرجاء. لكن ينبغي أن احنا نبقى منتبهين، أنا ليه بقول الكلام ده؟ أولاً للدعاة، يعني اللي هيسمعني أو اللي قاعد دلوقتي وله إيه خطاب دعوي، يبقى فاهم نسبة خطابه كام لكام، يبقى فاهم واعي لده. الناس محتاجة أكثر الناس.. هل معنى أكثر الناس يعني كل الناس؟ لا مش مش كل الناس، والتعميم غلط. التعميم غلط، يعني أنا من الكلمات التي تنرفزني: يقول لك كل اللي.. ما فيش حاجة اسمها كل دي، ده حتى في الشرع في نصوص الشرع قالوا إن كل عموم مخصوص، ما فيش عموم.. يعني قعدوا يدوروا يمين وشمال عشان يجيبوا عموم واحد في الشرع ما يكونش مخصوص، فوقفوا على إيه؟ آية كده قالوا: هي دي ممكن تكون ما هياش إيه باقيه على عمومها، إنما قالوا: كل عموم مخصوص. قالوا: حتى القاعدة بتاعتنا.. ما هي كل عموم دي عموم، مش كده؟ قالوا: حتى القاعدة دي كل عموم مخصوص! مخصوصة برده بالإيه بقى اللي لاقوها، يعني قالوا ما في.. يعني ما تلاقيش عموم في الدنيا على عمومه كده، يعني مش موجودة.
اللي بقى بحس أن الخطاب ده الشدة والخوف والمش عارف إيه بيقنطه، بيئسه، بيخرجه حالة وحشة، يعمل إيه؟ ما يسمعش، ما يسمعش دي ما فيهاش كسوف دي، يعني دي مش عيب لا فيه ولا عيب في الداعي، هو خلاص الخط ده مش مناسب لي. وأذكر أنا من حوالي عشرين سنة كده كنت بدرس لمجموعة خاصة، فدائماً حتى الدروس الخاصة لازم يبقى فيها جزء وعظي، أو يعني حتى يعني بندي علم شرعي، أياً كان بقى فقه، عقيدة، مصطلح، أصول، أي حاجة، ما ينفعش الدرس يخلص غير بجزء آداب أو رقائق أو.. فكنا الكتاب اللي مختارينه في الوقت ده: قصر الأمل لابن أبي الدنيا. فكان واحد من الحضور أول ما أجي الفقرة بتاعت قصر الأمل يقوم واخد بعضه وماشي، وهو الحضور قليل، يعني كان درس خاص مش درس عام، فيعني باين قوي وما يرفع إيده ويروح قايم ماشي. فانا الأول يعني ظنيته إنه ما بيحبش الإيه.. مش عاوز يفوق يعني. فمرة التانية التالته جبته، قلت له: لا، تعال لي بقى، أنت في إيه؟ يعني لازم نسمع الوعظ، وده ده أهم من.. وأنا عمال إيه بقى خطبة عصماء، أنا في ظني إنه مش حابب يفوق يعني. قال لي: لا، ده أنا اليوم اللي بسمع أنا.. قال لي: أنا أصلاً قصر الأمل عندي واصل لحته يعني صعبة جداً لوحدي، فموسوس فيه، يعني بقول طول ما أنا قاعد أنا هموت النهارده، هموت. بيقول لي: أنا بسمع منك الدرس ده بطلع ما بنزلش من البيت. فده خطاب مضر لي.
طيب، قال: وإنما يذكر الواعظ للعصاة أسباب الرجاء إن كان مقصوده استمالة القلوب إليه لإصلاح المرضى، وقد قال علي رضي الله عنه: إنما العالم الذي لا يقنط الناس من رحمة الله، ولا يؤمنهم مكر الله. يبقى احنا عاوزين نوصل للحته الوسط، الناس لا تأمن مكر الله، وفي نفس الوقت لا تقنط من رحمة الله عز وجل. تقول: طب يا شيخ، ما هو أنت لو الخطاب بقى كبير قوي في الخوف بتاعها نقنط؟ نقول: لا، لأننا أصلاً الغالب علينا الإغفلة، فلو زودنا الخطاب شوية ما فيهاش مشكلة.
ازاي نحصل بقى الرجاء؟ احنا عندنا دلوقتي مسالتين كبار: ازاي نحصل الرجاء؟ وايه معنى الرجاء؟ ازاي نحصل الرجاء يا جماعة؟ أعظم طريق لتحصيل الرجاء حاجتين، الحِاجة اللي كلنا عارفينها أننا نتدبر نصوص الرجاء. أجلها شوية، في حاجة تانية مهمة جداً جداً عشان تحصل الرجاء، ألا وهي الاعتبار. يعني إيه الاعتبار بقى؟ ازاي أرجو ربنا سبحانه وتعالى؟ أن تعتبر بفعله فيك سبحانه وتعالى في الدنيا، ثم تقول: إن إله الدنيا والآخرة واحد.
فطالما عاملني كده في الدنيا فانا أرجو أن يعاملني بهذه المعاملة في الآخرة. مش فاهمين، هديكم مثال بسيط جدا نبتدي نتدبره وننطلق منه. الله عز وجل كيف لما خلقك أوجد لك ضرورياتك؟ يعني أنت دلوقتي ما تعرفش تعيش من غير هواء، من غير أكل، من غير شرب، الحاجات الضرورية ليك في حياتك أوجدها لك. بس كده؟ لا، في حاجة هنا عجيبة جدا جدا. احنا هنتجاوز دي، يعني لو تاملنا دي هنفهم برضو المعنى بس أنا عاوز أجاوزها لأني مش ده الدرس، يعني احنا عاوزين ده جزء من الدرس. الله عز وجل مش بس أوجد لك الضروريات، لا، ده لما خلقك خلق أشياء هي لا هي ضرورية ولا حاجية، وإنما ممكن تبقى على سبيل بس الجمال أو تحسين الخلقة.
مثال: إنه لما خلقك مثلا خلق الحواجب بالشكل ده، بقت سبعة لفوق ولا ثمانية لتحت، خلقها بالشكل ده. هل لو كانت اتخلقت ثمانية أو سبعة كانت هتعطل حاجة من ضروريات حياتك؟ يعني بس كشكل ما هواش أجمل شكل، فإذا به جل وعلا يخلقك على تلك الهيئة. شفايفك اللي لونها يذهب إلى الحمار ده لو كانت سودا كحل، هل دي ستؤثر في شيء في ضرورياتك؟ يعني مش هتعرف تأكل ولا تشرب ولا لا، خالص، الدنيا ماشية. لكن سبحانه وتعالى لما خلقها، خلقها على هذا الشكل الجميل. خلاص، بعض الناس تلمح معنى، يقول لك ما هو في ناس سودا عندهم، قال لك عشان لو كان كله كده مش فاكرين درس الشكر، لو اشتركنا في النعمة مش هنشوف النعمة. فده برده من حكمته سبحانه وتعالى أنه يخلق زي ما بيخلق، سبحانه وتعالى الصحيح هو المريض، فالصحيح يفهم نعمة الصحة لما يشوف المريض، ولو كان كل الناس أصحاء مش هنشوف نعمة الصحة، كذلك كل مثل ذلك بقى في الشكل وكذا وكذا.
اقعد بقى تامل هذا مع الله عز وجل، كان ممكن يخلقنا بنمشي على إيدينا ورجلين، وفي حيوانات كتير بتمشي على إيديها ورجلها يعني والدنيا ماشية يعني ما فيش. طب لو كنا بنمشي على إيدينا ورجلين ما كانش يعني كانت الدنيا هتمشي بردو، لكن ما هياش أجمل هيئة. كان ممكن أخلاقك بتنط مثلا، ما تمشيش بتنط، تامل ده، وفي فعلا في ده موجود يا جماعة، هو موجود ليه؟ يعني ليه ربنا سبحانه وتعالى ما خلقش كل المخلوقات بتمشي على رجلين؟ ما تامل عشان لما تشوف اللي بينط وترجع تشوف مشيتك فتلاقيها هي الأكمل، تقوم تتامل ده أن ربنا سبحانه وتعالى عاملك برحمته ولطفه جل وعلا. وده المعنى العظيم نفهمه بقى الاعتبار، أن هذا الرب الجميل الجليل الرحيم الودود لما خلقك حتى في خلقك عاملك معاملة البر الودود الرحيم جل وعلا، فيقوم يطمئن قلبك لأن إله الدنيا والآخرة واحد، هو اللي لما خلقك خلقك في أحسن تقويم وامتن علينا بهذه النعمة في القرآن، مش كده؟ قال إيه؟
ها، لا، في أحسن تقويم إيه؟ ﴿لَقَدْ خَلَقْنَا الْإِنسَانَ فِي أَحْسَنِ تَقْوِيمٍ﴾ [التين: 4]. مش كده؟ عمرك قعدت تتدبر هذه اللفظة من هذه الحيثية، أن كل اللي احنا عمالين نتكلم فيه ده وغيره كتير ما هواش لا من ضروريات حياتك ولا من حاجيات حياتك، ده حاجة كده يعني إيه يعني كويس تبقى موجودة، طب لو ما كانتش موجودة وكان موجود غيرها الدنيا ماشية يعني ما وقفتش الدنيا، يعني مثلا مش مش هتعرف تتنفس، مش هتعرف تأكل وتشرب فهتموت، ما فيش كده ومع ذلك أبى الله عز وجل برحمته بنا وبلطفه بنا.
الأنف الثاني الذي نحصل به الرجاء هو أن تتدبر نصوص الرجاء، يعني مثلا قول الله عز وجل: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا﴾ [الزمر: 53]. واقعد كده تدبر أول حاجة كده تدبر، قبل ما نقول بقى الذنوب جميعا، تدبر قول الله عز وجل: قل يا عبادي باثبات الياء، قل يا عبادي. واسرح بخيالك كيف يعامل الرب عز وجل عباده الذين نسبهم له: يا عبادي. قل يا عبادي، أنت عارف عبادي دي الياء دي ممكن تبقى يعني تيجي مكتوبة وممكن ما تجيش، مش كده؟ ﴿وَبَشِّرْ عِبَادِ﴾ [الزمر: 17] هي دي وبشر عبادي بكسر الدال، مش كده؟ هنا لا وابشر عباد، هناك في المؤمنين لما جه بقى في العصاة قال إيه؟ يا عبادي باثبات الياء.
تقوم تطمئن أنك عبده فلن يضيعك. يا جماعة، رحمة ربنا عز وجل رحمة واسعة جدا. الأول مسألة الاعتبار دي في كلمة لابن الجوزي جميلة جدا، ابن الجوزي في صيد الخاطر قعد تامل شويه حاجات كده وراح قايل كلمة بديعة الحقيقة، تامل شويه حاجات في حياته حصلت له، قال: وحق لمن تلمح هذا الإنعام أن يرجو التمام. وحق لمن تلمح هذا الإنعام أن يرجو التمام. يعني إذا جلست فتلمحت أنعام الله عز وجل عليك زي ما قلنا، وبعدين بقى الاعتبار بايه كمان؟ احنا هنا اعتبرنا بحاجة واحدة بس في خلقتك، اقعدوا اعتبروا يا جماعة، اقعدوا كده تاملوا في أفعال الرب بنا. والله دي لوحدها كفيلة جلسة زي دي بـ١٠٠ درس، ازاي بعصيه كل ليلة ويستر جل وعلا ولو شاء لفضح؟ يقوم دي تجيب جواك إيه معاني كتير مش عاوزين نتكلم فيها، بس منها الرجاء، منها الرجاء أنه سبحانه وتعالى بحلمه سترك فتخاطب نفسك: تراه سترني في الدنيا ليفضحني في الآخرة؟
تقوم تتكسف على دمك، مش تقول إيه: لا، طالما هو سترني في الدنيا بقى إيه ساترني دنيا وأخرة؟ لا مش كده، تقول: تراه سترني في الدنيا ليفضحني في الآخرة؟ حاشاه، إله الدنيا والأخرة. قول دايماً، فكر نفسك: إله الدنيا والآخرة واحد. مش بس واحد بقى، رحمة ربنا عز وجل كم جزء قالوا؟ أو الرحمة التي هي لله ١٠٠ جزء، أنزل منها جزءاً في بها يتراحم المخلوقات، حتى إن الدبة بترفع حافرها عن الوليد لما يتولد، وده شيء عجيب لو تاملناه بس مش وقته. فكرة أن الدبة بترفع رجليها يعني دي بردو قصة بس مش وقته أن احنا نتدبر النصوص كلها بقى. وبعدين في الآخرة يرد الجزء ده إلى ٩٩. أنت واخدين بالكم أن الرحمة اللي كلنا بنتراحم بها من لدن آدم إلى قائم الساعة، كل المخلوقات مش البشر بس، ده جزء من ١٠٠ جزء رحمة.
فرحمة الآخرة دي عاملة إزاي؟ عارفين عاملة إزاي رحمة الآخرة؟ إبليس هيتطاول، يظن أن الرحمة تشمله. يعني في الآخرة إبليس من الرحمة اللي هيشوفها بتحصل هيبتدي يشب كده، اللي هو إيه يعني بيوري نفسه، يظن أن الرحمة تشمله من عظيم رحمته جل وعلا. فتقعد بقى تتامل: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ﴾ [الزمر: 53]، مش عمل معصية ولا اتنين ولا ثلاثة، أسرفوا على أنفسهم، لا تقنطوا من رحمة الله إن الله يغفر الذنوب جميعا. واسرح بخيالك في جميعا، بلاش نسرح، تعالوا للمثال اللي لسه قايلينه: واحد قتل ١٠٠ نفس. أنا عاوزك بس تتامل مسألة كده قبل ما نجي لنهاية الحديث بتاعه: واحد قتل ١٠٠ نفس. اللي قتل ١٠٠ نفس ده يعني قتل ١٠٠ نفس وما عملش حاجة تانية؟ يعني هو بيقوم الصبح يأكل ويشرب ويقتل؟ ولا اللي بيقتل ده فيه شوية سلطات جنب القتل؟ يعني في زنا وفي بلطجة وفي إتاوات؟ ما هو اللي بيقتل ده أكيد يعني ١٠٠، عارفين بني إسرائيل ده قتل ١٠٠، واحد منهم واحد قتله عشان قال له تب، قال له لا، فده أكيد مش قتل بس، هو جاي بيذكر المصيبة الكبيرة اللي في حياته، يعني أكيد وأنا مغمض ده مش واحد بيقوم حياته على الصراط المستقيم بس أنا عندي مشكلة صغيرة كده يا عم الشيخ أنا بقتل، ما فيش كده.
فده بقى قول زي ما تقول، واحد قاتل ١٠٠ نفس، ده حط جنب القتل كل حاجة تيجي في دماغك، كيف عامله الله جل في علاه؟ الله عز وجل غير له نواميس الكون. أيه والله يا جماعة، كيف لا نرجو هذا الرب؟ راح للعالم، قال: نعم، ومن يحجب عنك باب التوبة؟ اذهب إلى أرض كذا وكذا، فإن فيها أناسا صالحين يعبدون الله فاعبد الله معهم ودع أرضك فإنها أرض سوء. رايح للأرض التانية، يقبض في الطريق مات، كان أقرب لإنو أرض؟ لا، كان أقرب لأرض السوء. جم ملائكة الرحمة وملائكة العذاب يتخاصموا: ده بتاعنا، ده بتاعنا. فجى ملك حكم بينهم: قيسوا اللي بينه وبين الأرض دي واللي بينه وبين الأرض دي، والله لو أقرب للأرض الأولى يبقى من أهلها في النار، لو أقرب للأرض التانية يبقى في من أهلها في الجنة.
الرواية بتقول إيه بقى؟ فأوحى الله إلى هذه أن تباعدي، وإلى هذه أن تقاربي. عجيب يا جماعة، هو الله جل وعلا ألم يكن قادراً أن هذا الرجل -إحنا ممكن نتامل في بدائل كتير بس بديل واحد هنقوله دلوقتي- إنه من الأول يبقى أقرب للأرض التانية؟ لكن أبى الله عز وجل إلا أن تكون تلك الآية وتحكى لنا، ليه؟ عشان تعرف قدرك عند ربنا إذا أنت رجعت وإذا أنت تبت، وكيف أن الله عز وجل يقبلك على كل ما كان منك. أنت عملت إيه في حياتك؟ هذا الرجل قتل ١٠٠ نفس، فأنت عملت إيه؟ مهما كنت عملت، ارجع تب تجده تواباً رحيماً غفوراً. بس لا، يفرح بتوبتك وهو مش محتاج لك وأنت اللي محتاج له، ومع ذلك يفرح بتوبتك. شيء عجيب، والله شيء عجيب.
والحديث الحديث اللي فيه المعنى ده حديث عجيب، وتعالوا نتامل لفظة واحدة في الحديث: لله أفرح بتوبة أحدكم أو بتوبة عبده من رجل كان على دابته في أرض فلاة صحراء، وبعدين الراجل نام شوية، صحي ما لقاش الدابة. فاهم يا محمود ولا مش فاهم؟ صحوه اللي نايم ده، ابعد عن العمود، قرب قرب قرب، ابعد ابعد، ما تسندش، ابعد يا ولد، حد يقعد مكانه بدل؟ أيوه تعال لي كده بقى، أيوه، مزوغ من القرآن ويجي ينام يقول لك كنت في بحضر الدرس! يبقى لا حضر درس ولا حضر القرآن ويرروح لأبوه يقول له كنت في القرآن والدرس وهو اللي كان.
كنا بنقول إيه بقى؟ آه، كان على دابته في أرض فلاة، وبعدين نام الدابة راحت منه، طلبها يئس، ما لقاهاش، ارجع أنام في المكان اللي كنت فيه حتى أموت، وبعدين يين. الأول قبل ما نقول بقى اللفظة، أنا افتكرت يعني قصة كنت لما أقرا الحديث ده زمان وأنا صغير، ما أرجع ما تمشي؟ يعني بيجي في دماغي كده، يعني لو أنا كنت أقول كده لنفسي: لو أنا همشي يعني امشي يمين، امشي شمال، المهم يعني أرجع عشان أموت يعني، أرجع لغايه ما أموت، ما كنتش مستوعب يعني المعنى قوي، يعني بقول العقل ما يقولش كده، يعني كده ميت، امشي يمكن تلاقي حاجة.
وقدر الله عز وجل أن أنا مرة تهت في الصحراء ولقيت نفسي فضلت واقف، فما أعرفش حد حصل له كده ولا لا، بس أنت وأنت في الصحراء وبتتبص يمين وشمال ورا وقدام، بتلاقي كله رمل، ما أنتَش عارف تروح فين ولا تجي منين ولا بتلاقي الاختيار اللي جواك أنك تفضل في مكانك، وده عجيب، أنا فعلاً أنا فضلت واقف قلت بقى مش عارف أعمل إيه وأنا مش عارف أمشي إزاي يعني، أمشي ما يمكن ببعد يعني أنا لغايه دلوقتي أنا المهم في مكان يعني، إنما مشيت كده بعدت مش عارف، ففضلت واقف.
المهم هذا الرجل نام، صحي لقى الدابة، فأخذ بخطامها وقال من شدة الفرح: اللهم أنت عبدي وأنا ربك! أخطأ من شدة الفرح. عاوزين نتامل لفظة واحدة يا جماعة: لله أفرح بتوبة أحدكم من هذا العبد. هنا في المثال، العبد العاصي شبه مين في المثال ده؟ الدابة، مش كده؟ الدابة اللي ضلت دي وبعدت مش كده؟ وبعدين لما رجعت فرح بها هذا الرجل، ففرح الله عز وجل أشد من فرح هذا بدابته. مفهومة دي؟ فيبقى العبد العاصي شبه مين في المثال ده؟ الدابة.
السؤال بقى، ركزوا يا شباب، هذه الدابة حياتها ونجاتها في الهروب ولا في كونها مع سيدها؟ يعني هذه الدابة لما هربت هي تظن أن هي رايحة للحرية مش كده؟ ورايحة للنجاة ورايحة وما تعرفش المسكينة أن بعد يوم يومين بكثير هتموت حتى لو على ظهرها أطنان الأكل هتموت، بعدها عن سيدها يعني هلاكها، دمارها، موتها، وهي فاكرة أن في حريتها. أهو ده احنا بالضبط، احنا بالضبط، بتبقى أنت فاكر أن بعدك عن ربنا هو الحرية، وأن قربك منه جل وعلا تقييد وحبسة وحلال وحرام وأعمل وما تعملش، فذلك العبد بعده عن سيده يعني الدمار ويعني الهلاك، قربه من سيده حتى لو شايف أن في حمل زيادة عليا شوية زي الدابة، ما الدابة ما هي جريت أصل هو بيحملني زيادة، كذلك يعني تكليفات الشرع اه ممكن تبقى حمل زيادة اه، إنما حياتك مع مين؟ مع سيدك، أنت مش عارف مصلحتك.
فنتدبر نصوص الشرع: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ﴾ [الزمر: 53]، مهما عملت لا تقنطوا من رحمة الله إن الله يغفر الذنوب جميعاً، أي ذنب تعمله ربنا يغفره، حتى لو أشركت؟ إزاي؟ ربنا في الآية التانية بيقول إيه؟ ﴿إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ﴾ [النساء: 48]. يبقى في الآية دي ربنا قال حاجة.
الشرك لا يغفر، وأن ما دون الشرك يغفر لمن يشاء. في الآية التانية قال: ﴿إِنَّ اللَّهَ يَغْفِرُ الذُّنُوبَ جَمِيعًا﴾، لا، قال إن الشرك ما بيغفرش ولا قال لمن شاء؟ يعني قال الذنوب جميعا تغفر. إزاي بقى؟ يا عبادي، إيه تاني؟ ماشي، صح، شاطر.
إيه الفرق بين الآيتين؟ في آية بتخاطب الناس في الدنيا وهي بتكلمهم عن أحوال الآخرة. في الآخرة: ﴿إِنَّ اللَّهَ لَا يَغْفِرُ أَن يُشْرَكَ بِهِ﴾، اللي يموت مشرك بالله لن يغفر الله عز وجل الشرك، ويغفر ما دون ذلك لمن يشاء. يعني لو واحد مات وهو عامل أي ذنب دون الشرك، هو في مشيئة الله عز وجل، يعني واحد ميت معاه أصل التوحيد لكن أذنب، فهو في مشيئة الله عز وجل، قد يغفر له، إنما لو مات مشركا لن يغفر له. مفهومة دي؟
طيب في الدنيا بقى، الخطاب للناس لسه في الدنيا: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا﴾ إذا تبتم. يبقى مشرك تاب، يغفر الله له، وفضلا بقى عن إيه؟ واحد صاحب كبيرة ولا كذا، فمهما أصرّفت على نفسك ارجع إلى الله عز وجل.
وادينا تأملنا الأثر الثاني اللي هو بتاع الدّابة، وكذلك من الآثار الجميلة التي يعني توقفنا على رحمة الله عز وجل ومغفرته: «من تقرب إلي شبرا تقربت منه ذراعا، ومن تقرب مني ذراعا تقربت منه باعا، ومن أتاني يمشي أتيته هرولة». يا جماعة، يعني تدبروا أو تأملوا أن أنتم بتتعاملوا مع الرب عز وجل اللي هو لا محتاجك ولا محتاج العالمين كلهم ولا محتاج حد جل وعلا، ومع ذلك هو يدعوك جل وعلا، فإذا أقبلت مش بس تلقاك، يعني إذا أقبلت واقتربت منه عز وجل اقترب منك برحمته سبحانه وتعالى، وهو مش محتاجك وإله الدنيا والآخرة واحد. فإذا عاملتك بتلك المعاملة في الدنيا: «من تقرب مني شبرا تقربت منه ذراعا، ومن أتاني يمشي أتيته هرولة»، يبقى نؤمن في الآخرة ولا لا يُؤمَّل؟ يُؤمَّل، والله يُؤمَّل، واحنا أصلا مأملين إيه غيره أصلا؟ حد مأمل حاجة غيره؟ يعني حد مأمل عبادة؟ حد حافظ قرآن فقال مأمل القرآن بتاعه؟ ولا حد بيصلي له شوية بالليل فمأمل الصلاة؟ ولا حد عامل كده فيكم مغرور؟ ما هو ده غرور، مش كده؟
سيدنا النبي عليه الصلاة والسلام قال ايه؟ «لن يدخل أحد منكم الجنة بعمله». قال: ولا أنت؟ قال: ولا أنا. فحد مأمل بقى حاجة؟ أصل في ناس كده يعني يخلص رمضان مثلا يحس أنه إيه الفردوس الأعلى بقى؟ أنا يعني هعمل لك أكتر من يعني في ناس كده يا جماعة جواها كده بيبقى جواها كده. سيدنا النبي عليه الصلاة والسلام لما تجيلُه السيدة عائشة تقول له: لو وافقت ليلة القدر أدعو إيه بقى؟ عجيب والله يا جماعة، عجيب والله. أدعو إيه في ليلة القدر؟ ليلة القدر دي اللي هي بتيجي في آخر رمضان ولا أوله؟ آخره. طب يا سيدة عائشة طول رمضان بتعملي إيه يعني؟ قاعدة ولا عباده بقى احنا ما نعرفش نعملها؟ أكيد عبادة شديدة ها، بقى ادعو إيه بقى في ليلة القدر؟ «اللهم إنك عفو تحب العفو فاعف عني». إيه ده؟ يعني مش فردوس أعلى؟ مش مرافقة نبيك في الجنة خالص؟ «اللهم إنك عفو تحب العفو فاعف عني». فاحنا مش مأملين حاجة أصلا غير رحمته سبحانه وتعالى.
وخلونا نخلص المسألة الثانية وبعدين نختم بكلام ابن الجوزي أو ببعض الآثار يعني التي فيها ذكر شيء من رحمته سبحانه وتعالى. المسألة الثانية، وهي مسألة مهمة جدا: هو مين اللي المفروض يرجو؟ دي بقى مسألة مهمة جدا يا جماعة، وهي دي صلب الدرس بتاع النهارده. احنا قلنا احنا النهارده مش جايين قوي، ما هواش درس رجاء قوي، يعني إيه؟ مش جايين ندغدغ العواطف ونتكلم، لا خالص، احنا جايين نفهم رجاء صح، عاوزين نفهم رجاء صح، مين المستحق للرجاء أنه يرجو يعني؟ المستحق للرجاء يا جماعة اللي قدم أسباب الرجاء. احنا عندنا ثلاث كلمات: كلمة اسمها رجاء، وكلمة اسمها تمني، وكلمة اسمها غرور. ثلاث كلمات لازم نفهمهم ونعرف إيه الفرق بينهم.
قالوا: الرجاء، إيه هو الرجاء؟ يكون لمن أخذ بأسباب الرجاء. طيب، واحد لم يأخذ بأسباب الرجاء؟ يبقى اسمه مغرور. طب واحد والله ما هواش عارف هو أخذ ولا يعني الأساب اتحققت ولا ما اتحققتش؟ ده بيسموه تَمَنّي. تعالوا ندي مثال عشان نفهم الكلام ده: دلوقتي واحد اتعرفت عليه، فطول ما هو قاعد متأثر وحزين وبيتكلم عن الخلفَة: أنا نفسي يبقى عندي عيال. تيجي تاني يوم تقعد معاه: أنا مفتقد جدا العيال في حياتي. تيجي تالت يوم تقعد معاه: يا سلام لو بقى عندي ولد! فانت بتتعاطف معه وحسيت أنه إيه؟ أكيد ده بقاله كتير متجوز وما بيخلفش يعني. فجيت في يوم بقى وأنت متأثر قلت له: بقولك إهل هو أنت مدامُك دي متجوز؟ قال لك: لا مش متجوز. إيه رايك؟ هتقول عليه إيه ده؟ اهو ده اللي احنا بنعمله، ها؟ ده اللي احنا بنعمله اللي احنا أضحكنا عليه دلوقتي ده، ده اللي احنا بنعمله. والله أنا نفسي أدخل الجنة! طب أخبار صلاة الفجر؟ لا والله يعني في المواسم، صلاة الفجر دي ما أعرفش عنها حاجه. طيب أخبار بر الوالدين؟ لا ده أنا مع بيا وأمي يعني ما فيش أسوأ مني في الدنيا تشويح وأُف! ما هي أُف دي من الكبائر، مش كده؟
﴿فَلَا تَقُل لَّهُمَا أُفٍّ﴾، لا، أنا عادي ما فرقاش معايا، بعمل معاهم اللي أعمله. طب أخبار المجالس الغيبة دي؟ دي مجالسنا يا شيخ، احنا يعني هنروح فين؟ طب أنت عاوز إيه؟ عاوز أدخل الجنة! والله نفس الراجل ده: أنا نفسي في ولاد، وفي الآخر مش متجوز! طب ما يا ابني عشان يجيلك ولاد لازم تأخذ بأسباب الإنجاب: روح اتجوز، وبعد ما تتجوز وتاخذ امرأة ولود، أنت كده أخذت باللي في إيديك كله، ترجو الله عز وجل بقى الولد، يبقى أنت عملت كل اللي عليك، وبعديها ترجو الولد من الله عز وجل. مفهومة دي؟ إنما قاعد قاعد بتقول: يا رب الولد، يا رب الخلفَة، يا رب وأنت مش متجوز، ده يسموه إيه بقى؟ غرور. خلاص، احنا طبعا هنسميه عَبَط، يعني أنت بتعمل إيه؟ بس هو ده اللي هو لم يأخذ بأسباب الرجاء، ده انسان مغرور، مش مغرور في نفسه لا، يعني مخدوع، أنت بتعمل إيه؟ زي بالضبط واحد: أنا نفسي الأرض تطرح السنة دي طرح مش عارف عامل ازاي ونبيع ونعمل، طب أنت بتعمل إيه؟ ما بيعملش، طب يعني المية، البذرة؟ لا ما جبتش بذرة أصلا، ما جبتش حبوب، ما رماهاش، ما جبتش، طب يعني هتنبت إزاي؟ فيبقى الرجاء لمن أخذ بأسباب الرجاء.
ولذلك يا جماعة، كلمة الرجاء في القرآن جت لمين؟ جت لمين كلمة الرجاء في القرآن؟ قال سبحانه وتعالى مثلا: ﴿إِنَّ الَّذِينَ آمَنُوا وَالَّذِينَ هَاجَرُوا وَجَاهَدُوا فِي سَبِيلِ اللَّهِ أُولَئِكَ يَرْجُونَ رَحْمَةَ اللَّهِ﴾. مين اللي بيرجوا رحمة الله؟ ﴿إِنَّ الَّذِينَ آمَنُوا وَالَّذِينَ هَاجَرُوا وَجَاهَدُوا فِي سَبِيلِ اللَّهِ أُولَئِكَ يَرْجُونَ رَحْمَةَ اللَّهِ﴾. الآية الثانية: ﴿إِنَّ الَّذِينَ يَتْلُونَ كِتَابَ اللَّهِ وَأَقَامُوا الصَّلَاةَ وَأَنفَقُوا مِمَّا رَزَقْنَاهُمْ سِرًّا وَعَلَانِيَةً يَرْجُونَ تِجَارَةً لَّن تَبُورَ﴾. مين اللي بيرجوا؟ شوفوا يا جماعة صفات من جاء الرجاء في حقهم في القرآن، هؤلاء، هؤلاء من يرجون الله عز وجل. يبقى الرجاء لمين؟ واحد ياتي بالطاعات، واحد مذنب تاب وأناب لله عز وجل، فيرجو رحمة الله، هيعمل إيه تاني؟ أنا عملت يا رب، عملت اللي عليا، عملت مش يعني عملت عيا يعني لا، يعني يا رب ما ذكرته أو أمرتني به قد امتثلته، فأنا أرجو رحمتك.
ولذلك قال معروف الكرخي: رجاؤك لرحمتي من لا تطيعه خذلان وحمق. تاني، رجاؤك لرحمتي من لا تطيعه خذلان وحمق. وقال يحيى بن معاذ: من اعظم الاغترار التمادي في الذنوب على رجاء العفو من غير الندم. أنت مغرور، شفتوا سميناها إيه؟ مغرور. شايفين من اعظم الاغترار التمادي في الذنوب على رجاء العفو من غير ندم، وتوقع القرب من الله تعالى بغير طاعة، إزاي يعني؟
في أثر عن الحسن جميل جدا وكلنا حافظينه تقريبا، بس مش كتير يفهم الأثر ده، قال: وأن قوما أساؤوا العمل وقالوا نحسن الظن بالله، وكذبوا! لو أحسنوا الظن لأحسنوا... كلنا حافظين: لأحسنوا العمل. يعني إيه؟ حد يعرفها؟ حد عاوز يعني مسموح روح بالهبد. يعني إيه لو... يعني إيه الانسان يححسن الظن بالله فيحسن العمل؟ يعني الواحد لو أحسن الظن خلاص، يعني إيه؟ يعني محسن الظن، قول. لو أنا مثلا الظن بالله أنا أستجير لله أُحسن العمل معاك...
لا خلاص انت هتدّي الدرس، خلاص فهمت. إيه تاني طيب؟ أه، جميل. طيب، خليني أديكم مثال كده، خليني أديكم مثال ونرجع بقى نشوف معنى إحسان الظن. دلوقتي في الجامعة مثلا، أنت في الجامعة، واحد مقضيها، لا بيجي الجامعة ولا بتشوفه، ولا يعرف الدكاتره أصلا أساميهم ولا أشكالهم إيه، وبعدين جالك كده في آخر السنة، لا عامل أعمال سنة ولا مقدم الشيتات بتاعته ولا أي حاجة، برنس، راح جاي قال لك: والله أنا يعني أتمنى أو أرجو يعني أن أطلع الأول على الدُّفعة! فانت ساعتها خلاص، عرفنا هنقول عليه إيه، خلاص كده. تخيل بقى يا مؤمن أن تطلع النتيجة ويطلع عميد الكلية مطلعه الأول على الدُّفعة! إيه رأيك؟ تقول إيه على العميد ده؟ بلاش، لو أنت عارف عميد الكلية كويس قوي، وعارف أنه راجل صح وأنه لا يقبل الرشوة ولا يقبل المحسوبيات ولا كذا ولا كذا، ساعتها تقدر تحلف بالله وأنت واقف إن أنت مش هتطلع الأول، صح ولا لا؟ ليه؟ بإحسانك الظن فعميد الكلية. فإذا أحسننا الظن بالله عز وجل تيقنا أن الله عز وجل لا يسوي بين من أطاعه ومن عصاه، وهذا المعنى جاء في القرآن: ﴿أَفَنَجْعَلُ الْمُسْلِمِينَ كَالْمُجْرِمِينَ * مَا لَكُمْ كَيْفَ تَحْكُمُونَ﴾.
فإحسان الظن بالله عز وجل أنه أبدا لن يسوي بين هذا وذاك، ﴿أَمْ نَجْعَلُ الَّذِينَ آمَنُوا وَعَمِلُ الصَّالِحَاتِ كَالْمُفْسِدِينَ فِي الْأَرْضِ أَمْ نَجْعَلُ الْمُتَّقِينَ كَالْفُجَّارِ﴾ مستحيل! هذا ظننا في ربنا عز وجل، فإذا أحسننا الظن بالله أنه لن يسوي بين هذا وذاك أحسننا العمل ولا لا؟ أحسننا العمل، وعرفنا أن رحمة الله عز وجل قريبة من مين؟ ﴿إِنَّ رَحْمَتَ اللَّهِ قَرِيبٌ مِّنَ الْمُحْسِنِينَ﴾. ولا قريب؟ الرحمة مؤنث ولا مذكر؟ فين بتوع الـ... بتوع أي حاجة؟ اللغة العربية، كنت أقول بتوع القرآن، بس بتوع القرآن ممكن ما يعرفوهاش. مين بتوع مين هنا درعمي؟ حد درعمي هنا؟ حد عارف يعني إيه درعمي أصلا؟ حد يعرف؟ طب اللي أنا بقوله ده؟ قول. أنا قلت فعيل... أه أنت عارفني يعني؟ ماشي، عارفني من الأول، ماشي. طب حد ما يعرفنيش؟ ماشي. ﴿إِنَّ رَحْمَتَ اللَّهِ قَرِيبٌ﴾ مع أن الرحمة مؤنث، مش كده؟ والآية الثانية في سورة نون: ﴿فَأَصْبَحَتْ كَالصَّرِيمِ﴾ مش كالصريمة برضُ؟ خلينا دي: ﴿إِنَّ رَحْمَتَ اللَّهِ قَرِيبٌ﴾ ليه بقى مذكر مش مؤنث؟ فعيل حته كده على جنب بس يعني نفرفشكم شويّة، فعيل تاتي بمعنى فاعل وتاتي بمعنى مفعول. كلمة فعيل دي خلاص، يعني إيه فاعل وإيه مفعول؟ يعني ممكن تيجي فعيل وتبقى اسم فاعل، وممكن تيجي فعيل وتبقى اسم مفعول. فلو جت فعيل والمراد بها اسم مفعول تلزم التذكير، لا تؤنث، ماشي؟ ولو جت فعيل والمراد بها اسم فاعل تذكر وتؤنث بقى حسب اللي احنا بنتكلم عليه، ماشي. ﴿فَإِنَّ رَحْمَتَ اللَّهِ قَرِيبٌ﴾ يعني مقربة من الآيه؟ من المحسنين، ده في قول بعض أهل العلم يعني. خلاص فهمتوا الموضوع ده؟
والشاعر قال إيه بقى في الحتّة دي؟ دايما يجي يستدلوا، يستدلوا بالشعر الجاهلي عشان يقولوا ده كلام العرب. قال إيه بقى: هصرت بفودي رأسها فتمايلت عليّ هضيم الكشح ريّا المخلخلِ. واضح الكلام؟ والقيسي كان قليل الأدب، فهو أنا اللي مش واضح بقى ليه الكلام مش مهم؟ خلاص، بس هو بيقل أدبه ماشي. هضيم الكشح، الكشح اللي هو الجانب، يعني إيه؟ وكان العرب زمان ولا بلاش يا جماعة خلونا في... خلونا هنا. فرحمة الله عز وجل قريب من المحسنين، يبقى احنا يا جماعة كل اللي بنعمله إيه؟ إن احنا بنعمل اللي علينا علشان نكون أهلا للرجاء، ولذلك بعض العلماء قال: ﴿أُولَئِكَ يَرْجُونَ رَحْمَةَ اللَّهِ﴾، قالوا: يعني أولئك يستحقون أن يرجوا رحمة الله، وإلا فغيرهم بيرجوا رحمة الله برده، لكن في الآية دي قالوا: ﴿أُولَئِكَ يَرْجُونَ رَحْمَةَ اللَّهِ﴾ يعني يستحقون أن يرجوا، هؤلاء الذين يستحقون الرجاء.
يبقى احنا بنعمل إيه؟ هاقول لكم لفظ بقى نبوي، احنا بنتعرض لنفحات الرب عز وجل، قال صلى الله عليه وسلم: «ألا إن في أيام دهركم لنفحات، ألا فتعرضوا لها». بنتعرض للنفحات، فلما نتعرض لها لعلها تصيبنا أو يصيبنا منها شيء. الرجاء ثلاث درجات، هو درس النهارده تحسه درس علمي مش درس، بس هو ده مهم يا جماعة، مهم أن احنا نأصل ده علشان ما نبقاش في حته الغرور واحنا مش عارفين، أو ما نبقاش احنا ما احناش عارفين احنا محتاجين إيه دلوقتي فنروح نقعد نسمع كتير في الرحمة والمش عارف فنضيع، مش نضيع لأن السماع في الرحمة وحش، لا، لأن ده احنا مش محتاجينه دلوقتي، محتاجين نُفوق، ماشي.
فالرجاء ثلاث درجات، كل درجة أعلى من الثانية، أول درجة خلونا نقراها كده من عند الإمام الهروي: الدرجات الأولى: رجاء يبعث العامل على الاجتهاد، ويولد التلذذ بالخدمة، ويوقظ الطباع للسماحة بترك المناهي. إيه ده؟
أول رجاء يا جماعة يبعث العامل على الاجتهاد، أنت ترجو ثواب الله عز وجل فتلاقي نفسك منبعثة على العمل، مش كده؟ ليه؟ لأنك وأنت واقف تقيم الليل من الحاجات اللي بتسهل عليك قيام الليل أنك بتتذكر ثواب قيام الليل. طيب إيه اللي وقفك؟ الرجاء؛ أنك ترجو الثواب. يبقى رجاء يبعث العامل على الاجتهاد ويولد التلذذ بالخدمة.
أه، أنت هتخش في حالة تانية اللي هو أنت ملتذ وأنت تخدم سيدك ليه؟ لأنك تلمح الثواب، تلمح الرضا، ترجو ذلك فتبقى ملتذاً، ويوقظ الطباع للسماحة بترك المناهي. هنا في كلمة جميلة جداً بقى، ودي اللي عاوزين نقف معاها؛ كلمة السماحة. أنتوا عارفين يا جماعة، لما يكون معايا مثلاً مية جنيه في إيدي، خلاص، فيجي واحد يقوم إيه متعصب كده ومزعق ويخوفني يقول لك: لو ما سبتش المية جنيه دي دلوقتي أنا هعمل فيك وأسوي، هسيب المية جنيه، لكن أنا سايبها وأنا سامح؟ لأ، أنا سايبها متضرر، متضايق أني سايبها، مش كده؟ طيب لما يجي واحد تاني يقول لي إيه؟ سيب المية جنيه دي وليك عندي ألف جنيه، هسيب المية جنيه بس هسيبها بايه؟ بسماحة.
هو ده يا جماعة الفرق بين الخوف والرجاء في معاملة الرب عز وجل. فلما أجي أقول لك: سيب غض البصر، سيب إطلاق البصر، وسيب الزنا وسيب هذه الأمور بدل ما هتخش جهنم وهتتشوي، هتسيب بس هتسيب وأنت نفسك في هذا الأمر أو سايبه بلا سماحة. أما لما أجي أقول لك: ده في حور عين، وأنت كده بتضيع من إيديك الحور العين اللي أوصافهم كذا وكذا وكذا وكذا، فابتدرت نفسك تميل لهذا الآه الثواب بعينه.
أنتوا عارفين واحدة من فوائد اللي العلماء قالوها من حكم الشهوات، تركيب الشهوات في بني آدم أن ربنا عز وجل يذيقك لذة تقيس عليها لذة الآخرة. أنتوا عارفين العيل الصغير أما تيجي تقول له إيه، هات عيل صغير كده مثلاً خمس سنين ست سنين وقول له إيه: الحور العين بتاعتي، يقول لك: أنت إيه يا عم أنت فين؟ هو أصلاً وهو صغير بيقول لك: أنا ما بحبش البنات، وهو صغير مش كده؟ فانت بتقول له حور عين هو يعني مش عاوز، عاوز هو حور عين هو ما عندوش الشهوة دي. أمتى بقى يدرك هذا؟ لما يستشعر تلك الشهوة، مفهوم.
فالرجاء، الرجاء يوقظ الطباع للسماحة بترك المناهي، تلاقي نفسك وأنت بتسيب المناهي أنت بتسيبها بسماحة. أمتى هيحصل ده؟ وأنت في حالة الرجاء، وأنت في حالة الحب لله عز وجل. يعني حالة الخوف وحشة؟ ما بنقولش وحشة، في واحد يجي بكده وفي واحد يجي بكده، خلاص.
الدرجة الثانية: رجاء ارباب الرياضة، اللي هم المجاهده بقى، يبقى أول واحدة خلي بالكم دي في الأفعال الظاهرة، الأعمال هتعمل طاعات وهتسيب محرمات. الدرجة الثانية بقى من الرجاء: رجاء ارباب الرياضة، يعني المجاهدة، أن يبلغوا موقفا تصفو فيه هممهم برفض الملذوذات ولزوم شروط العلم واستقصاء حدود الحمية. إيه الكلام ده؟ بيقول: الدرجة الثانية من الرجاء هو رجاء أهل المجاهدة، ده رجاء أعلى، اللي هو إيه بقى؟ يرجون من الله عز وجل أن يبلغوا موقفا تصفو فيه هممهم برفض الملذوذات، يوصلوا لحته كده أن هم مش عاوزين أصلاً ما يلتذ به الناس، ليه؟ لأنهم جاهدوا أن قلوبهم تصفو من تلك الشهوات.
ده حصل؟ أه حصل، وحصل لبعض السلف، أنه يعني أحد السلف قال إنه كان عنده إشكال في موضوع غض بصر النساء، قال: فدعوت ربي أنه يصرف عني هذا، قال: فلا أبالي استقبلتني امرأة أو حائط. بعد كده وصل لدرجة أن اللي جاي في وشي امرأة زي اللي في وشي حائط بالضبط، مش إيه يعني ما لا تحرك له شهوة تجاه المرأة. وقالوا إن سيدنا النبي عليه الصلاة والسلام كان كده؛ حبب إلي من الدنيا الطيب والنساء، صحيح، لكن عائشة بتروي عنه شيء عجيب جداً صلى الله عليه وسلم ورضي الله عن عائشة، قالت: ولكنه كان أملككم. في روايتين هنا: كان أملككم لأربه، كان أملككم لأربه، الأرب، والأرب الغرض. فمما قيل إنه صلى الله عليه وسلم كان لا يشتهي المرأة إلا إذا أراد أن يشتهي صلى الله عليه وسلم، فدي درجة عاليه ماشي. كان أملك، كان أملككم لأربه، كان أملككم لأربه، يعني لغرضه من المرأة، خلاص.
يبقى ده الدرجة الثانية، أن احنا نرجو من الله عز وجل أن احنا نصل لدرجة أن الملذوذات ما تبقاش تبقى مرفوضة عندنا.
الدرجة الثالثة: رجاء ارباب القلوب، وهو رجاء لحاق الحق عز وجل، الباعث على الاشتياق، المنغص للعيش، المزهد في الخلق. الدرجة الثانية من الرجاء: نرجو الله عز وجل، نرجو لقاءه، نبقى عايشين في الدنيا وكل اللي قدامنا: متى نلقاه جل وعلا؟ للدرجة دي أن احنا عايشين برجاء اللقاء، لن تصفو لنا دنيا ولا هنلتذ بشيء ولا أي حاجة.
طب دي حالة البشر بيوصلوا لها؟ ده الواحد بعد الواحد، لأنه لو البشر كلهم وصلوا للحالة دي هتتعطل الدنيا، فمن مصلحة الرب عز وجل، يعني من مصلحة الناس أن هذه الحالة مش أي حد يعرف يوصل لها، دي الحالة اللي النبي عليه الصلاة والسلام قال للصحابه إيه: «لو تعلمون ما أعلم لضحكتم قليلاً وبكيتم كثيراً، ولما تلذذتم بالنساء على الفرش». فعشان كده قال لك إيه بقى الدرجة دي؟ قال: الباعث على الاشتياق، المنغص للعيش، المزهد في الخلق، نفسك مش عاوز تقعد مع حد، ليه؟ مكتفي به عز وجل، خلاص مش عاوز حد تاني.
ابن الجوزي كان ليه كلام جميل، بيقول: كانت بتمر عليه أحوال، لو قاعد معاه معروف وبشر لرايتهما زحمة. مين معروف؟ الكرخي، وبشر الحافي، إثنين من أولياء الله من العارفين بالله. ابن الجوزي بيقول: أنا كانت بتجي لي أحوال مع ربنا لو قاعد معايا معروف وبشر لرايتهما زحمة! لا عاوز معروف ولا عاوز بشر، مش عاوز حد يقعد معايا حتى لو اثنين من سادات العارفين، مش عاوزهم، اكتفاء به عز وجل، يهرب من الخلق، خلاص. فدي أعلى الدرجات.
ابن الجوزي الحقيقه من عمل حاجة جميلة جداً أنه في نهاية الكتاب منهاج القاصدين ختم الكتاب بأيه؟ قال: نختم الكتاب في ذكر سعة رحمة الله تعالى، نترجى بذلك فضله، إذ ليس لنا أعمال نرجو بها العفو. خلي بالكم، ده مش كتاب الرجاء، في هذا الكتاب ما جااش في الآخر كتاب الرجاء، في النص عادي، لكن لما خلص كتابه خالص ده آخر باب ختم بيه. نقرا العنوان: نختم الكتاب في ذكر سعة رحمة الله تعالى، نترجى بذلك فضله إذ ليس لنا أعمال نرجو بها العفو.
قال الله عز وجل: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفُذ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ﴾ [الزمر: 53]. وقال: ﴿وَمَن يَعْمَلْ سُوءًا أَوْ يَظْلِمْ نَفْسَهُ ثُمَّ يَسْتَغْفِرِ اللَّهَ يَجِدِ اللَّهَ غَفُورًا رَّحِيمًا﴾ [النساء: 110]. وقال النبي صلى الله عليه وسلم لما قضى الله الخلق كتب في كتابه، فهو عنده فوق العرش: «إن رحمتي غلبت غضبي».
وعن أبي هريرة قال: سمعت رسول الله صلى الله عليه وسلم يقول: «إن الله عز وجل خلق الرحمة يوم خلقها مائة رحمة، فأمسك عنده تسعاً وتسعين رحمة، وأرسل في خلقه كلهم رحمة واحدة، فلو يعلم الكافر بكل الذي عند الله من الرحمة لم ييأس من الجنة وهو كافر، ولو يعلم المؤمن بكل الذي عند الله من العذاب لم يامن النار». فهكذا، فكونوا نرجو رحمته ونخشى عذابه.
لسه قاريين النهارده سورة غافر في البداية خالص: ﴿غَافِرِ الذَّنبِ وَقَابِلِ التَّوْبِ شَدِيدِ الْعِقَابِ ذِي الطَّوْلِ﴾ [غافر: 3]. شوفوا يا جماعة على طول: نبئ عبادي أني أنا الغفور الرحيم، وأن عذابي هو العذاب الأليم.
وبسناده أن النبي صلى الله عليه وسلم قال: «لله عز وجل مائة رحمة، أنزل منها رحمة واحدة بين الإنس والجن والهوام، بها يتعاطفون وبها يتراحمون، وبها تعطف الوحش على أولادها، وأخر تسعاً وتسعين إلى يوم القيامة يرحم بها عباده».
وقال صلى الله عليه وسلم: «إن ربكم تبارك وتعالى رحيم؛ من هم بحسنة فلم يعملها كتبت له حسنة، فإن عملها كتبت له عشراً إلى سبعمائة إلى أضعاف كثيرة، ومن هم بسيئة فلم يعملها كتبت له حسنة، فإن عملها كتبت له واحدة أو يمحوها الله، ولا يهلك على الله تعالى إلا هالك».
واحد يا جماعة حسناته بالعشرات وسيئاته بالآحاد، خاب وخسر من غلبت آحاده عشراته، يعني! طب إيه؟ يتعمل لك إيه تاني؟ تيجي يوم القيامة تلاقي كفة الحسنات كفة السيئات راجحة بعد كل ده!
وقال صلى الله عليه وسلم: «يقول الله عز وجل: من عمل حسنة فله عشر أمثالها أو أزيد، ومن عمل سيئة فجزاؤها مثلها أو أغفر، ومن عمل قراب الأرض خطيئة ثم لقيني لا يشرك بي شيئاً جعلت له مثلها مغفرة، ومن اقترب إلي شبراً اقتربت إليه ذراعاً، ومن اقترب إلي ذراعاً اقتربت إليه باعاً، ومن أتاني يمشي أتيته هرولة».
وفي الحديث أن رجلاً أذنب ذنباً فقال: ربي إني أذنبت ذنباً فاغفره، فقال تبارك وتعالى: «عبدي عمل ذنباً فعلم أن له رباً يغفر الذنب ويأخذ به، قد غفرت لعبدي». ثم عمل ذنباً آخر فقال: ربي إني عملت ذنباً فاغفره، فقال عز وجل: «عبدي علم أن له رباً يغفر الذنب ويأخذ به، أشهدكم أني قد غفرت لعبدي، فليعمل ما شاء».
يعني إيه فليعمل ما شاء؟ يعني فليعمل ما شاء طالما أنه إذا عمل استغفر ورجع وتاب. فكلما أذنب عد، ما تيأس يا شيخ، أنت ما تعرفش أنا عملت إيه؟ أنت اللي ما تعرفش ربنا! هو أنا بقول لك أنا اللي هغفر لك، وأنا بقول لك أنا اللي هرحمك؟ أه، لو أنا ما كنتش هعمل كده كنت إديتك باللي في رجلي، صح؟ لكنه رحيم سبحانه وتعالى.
يا جماعة جاء في بعض الآثار أثر جميل جداً في الإسرائيليات أن إبراهيم عليه السلام اتاه رجل كافر يطلب منه طعاما، فأبى إبراهيم، كافر مشرك بالله بيعبد أوثان، فطبعا إيه، فلما ولى الرجل أوحى الله إلى إبراهيم: له 90 سنة وهو كافر وأنا أطعمه! فالله عز وجل معاملته للبشر غير، قال: بقى له 90 سنة كافر وأنا باكله وأشربه؟ فانت مهما بلغت ذنوبك عملت إيه، كفرت بالله؟ الحمد لله كلنا موحدون ولا إيه؟ الواحد ابتدى يشك.
فما تيأس، ويا جماعة ده مقتضى العقل، ده مقتضى يعني يعني خلاف بقى احنا بنخاطب القلوب صحيح لكن حتى بالعقل كده، دلوقتي لو أنت رايح مشوار، أنت طريق لازم تسلكه ولازم مشوار لازم هتروحه، وأنت ماشي وقعت في حفرة مش واخد بالك فوقعت في حفرة، هتقول: خلاص بقى أنا وقعت في الحفرة، خلينا في الحفرة؟ حد بيعمل كده يا جماعة ولا بتقوم وتطلع من الحفرة، تحاول تطلع ولما تطلع تنفض نفسك وتكمل؟ طب تخيل وأنت ماشي وقعت في حفرة، حظك بقى النهارده وقعت في حفرة تانية، هل بعد ثالث أو رابع حفرة عمرك هتقول خلاص بقى ما بديهاش خلينا في الحفرة؟ عمرك ما هتعمل كده، كل ما هتقع في الحفرة هتقوم وتطلع وتنظف نفسك.
كذلك وقعت في ذنب كبير صغير، اطلع من الذنب ونفض نفسك بالتوبة والاستغفار، ليه؟ لأنك كده ماشي في طريقك لربنا، ما هو أنت مش بمزاجك أنت مدفوع به، هو حد فينا يا جماعة بمزاجه؟ يعني أنا ممكن أقف ما أمشيش؟ نحن مدفوع بنا إلى أجلنا، هيجي الأجل خلاص هتموت. فاللي علينا نعمله إيه؟ كل ما نقع في ذنب نطلع من الذنب ونستغفر ونتوب.
طيب واحنا بنعمل كده هنستحضر هذا الحديث: «علم عبدي أن له رباً يغفر الذنب ويأخذ به، قد غفرت لعبدي فليفعل عبدي ما شاء». دي يا جماعة ما نتجراش فيها على ربنا عز وجل، لكن نرجوه، نرجو رحمته. أما تقع في الذنب فكر نفسك بالحديث ده، ما تنامش الليلة إلا وأنت تائب، وقعت في ذنب من النهار ما يجيش عليك سواد الليل إلا وأنت تائب، عملت ذنب بالليل ما يطلعش عليك النهار غير وأنت تائب، ليه؟ ما تعرفش هتقبض أمتى، ما تعرفش.
طب طلع عليا النهار وعملته تاني، توب تاني، عملته عاشر، توب عاشر، عملته مية، توب مية. أقول لكم الكبيرة؟ أنتوا عارفين يا جماعة لو احنا ما بنذنبش كان ربنا عمل إيه؟ كان غيرنا، «لو لم تذنبوا لذهب الله بكم ولأت بقوم آخرين يذنبون فيستغفرون فيغفر الله لهم»، لأنه عز وجل يحب أن يغفر لنا، يحب أن يغفر لنا.
اللي باقي إيه بقى؟ ألا تحبون؟ ها، ده اللي باقي، هو يحب، هو يحب، احنا بقى ألا تحبون أن يغفر الله؟ المسألة يا جماعة المسألة واقفه علينا احنا مش عليه سبحانه وتعالى هو خلاص يحب أن يغفر، باقي أن نحب نحن أن يغفر لنا، بس.
وقال في الصحيحين قال صلى الله عليه وسلم في صحيحين عن عمر رضي الله عنه قال: قدم على رسول الله صلى الله عليه وسلم بسبي، الحديث يا جماعة كلنا عارفينه بس معلش تأملوه، يعني تأملوا المشهد ده، فإذا امرأة من السبي تسعى إذ وجدت صبيا في السبي أو إذا وجدت صبيا في السبي أخذته فالصقته ببطنها فأرضعته. ابنها رضيع صغير تايه مش عارف هو فين، فقال صلى الله عليه وسلم: «أترون هذه المرأة طارحة ولدها في النار» يعني بعد ما تلاقي؟
صغيرها تطرحه في النار، كده قلنا: لا والله. تأملوا المشهد يا جماعة؛ المرأة ممكن يجي كده في ذهنك ولو بنسبة واحد في المليون أنها تاخد ابنها الرضيع ترميه في نار؟
قال صلى الله عليه وسلم: «اللّهُ أَرْحَمُ بِعِبَادِهِ مِنْ هَذِهِ المَرْأَةِ بِوَلَدِهَا». عارفين ده معناه إيه؟ إن المفروض رجانا في الله عز وجل أنه بنسبة صفر في المليون أن يطرحنا في النار، ده معنى الحديث، ده معنى حديث.
طيب، يعني ما فيش حد هيدخل النار في الآخرة؟ في ناس هتخش، حتى من الموحدين، آه. دول إيه؟ دول عملوا إيه دول بقى؟
عشان كده يا جماعة، لا يهلك على الله إلا هالك. لما هذه المرأة أبدا لا تطرح ولدها في النار، والله أرحم بنا من هذه المرأة بولدها. قال: فهذه الأحاديث مع ما ذكرناه في كتاب الرجاء تبشرنا بسعة رحمة الله تعالى وجوده، ونحن نرجو من الله عز وجل ألا يعاملنا بما نستحقه، آمين.
وأن يتفضل علينا بما هو أهله، ونحن نستغفر الله عز وجل من أقوالنا التي تخالف أعمالنا، ومن كل تصنع تزينا به للناس، في كل كتاب ألفناه أو علم أفدناه، ومن كل علم وعمل قصدناه به ثم خالطه ما يكدره ما يكدره.
فبكرمه نستشفع إلى كرمه، وبجوده نسأل من جوده، إنه قريب مجيب. أقول قولي هذا، واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.
الشيخ أمجد سمير