دخولتسجيل الدخول

الخوف

أمجد سميرالشيخ أمجد سمير
  • مدة الدرس:
  • قراءة

ابن القيم رحمه الله له كلمة ينقلها عن بعض أهل العلم: أن العبد في سيره إلى الله عز وجل كالطائر له رأس وجناحان، أما الرأس فمحبة الله عز وجل، وأما الجناحان فخوف ورجاء، فإذا قطعت الرأس مات الطائر، وإذا عدم الجناحان بطل طيرانه ما يعرفش يطير. ونحن في طريقنا إلى الله عز وجل لابد لنا من محبة وخوف ورجاء. الدرس اللي فات ما كانش هنا كان عن الرجاء، ودرس اليوم إن شاء الله عن الجناح الآخر وهو جناح الخوف، وهحاول الدرس يبقى ما نطولش فيه قوي علشان بعد كده في تكريم اللي كسبوا في مسابقة القرآن إن شاء الله.

الصوت بقى. الخوف من أعلى مقامات السائرين إلى الله عز وجل. ولما نيجي نتكلم عن الخوف يا جماعة فاحنا عندنا خوف خوف محمود وخوف مذموم، أو إن شئت فقل: عندنا طرفان ووسط؛ طرف الخوف فيه بيكون ضعيف جداً، وطرف الخوف فيه بيكون زائد عن الحد المطلوب، وطرف وسط وهو الخوف الممدوح. إيه الفرق بينهم؟ الخوف الممدوح إيه هو؟ الخوف الذي يحملك على فعل الطاعات وترك المنكرات، ده الخوف الممدوح. اللي هو لما تخاف، احنا نعرف هنخاف من إيه دلوقتي، احنا إيه يعني ممكن واحد يقول: لما تخاف من ربنا، صح ولا غلط؟ ها، إيه يا جماعة عاوزين نصحصح كده صح؟ لما تخاف من ذنوبك، صح ولا غلط؟ صح. لما تخاف سوء الخاتمة، صح. لما تخاف من النار، صح. يعني في حاجات كتير قوي ممكن نخاف منها، وهنفصل فيها لأن الخوف درجات. المهم لما تخاف، فهذا الخوف يحملك على أن تفعل الطاعات وأن تترك المنكرات، هذا خوف ممدوح.

في خوف آخر هو خوف أضعف من ده، اللي هو هنسمع درس النهارده عن الخوف، هنسمع درس عن النار، هنسمع درس عن أي صفة من صفات الجلال لله عز وجل، فنطأطئ الرؤوس وتنزل مننا دمعتين، ونخرج من باب المسجد نرجع لحالتنا اللي كنا عليها عادي، اللي بيشات مع واحدة بيشات مع واحدة، واللي بيتفرج على الاباحية بيتفرج على الاباحية، واللي بيعمل العادة السرية بيعمل العادة السرية، واللي بيشوح في أبو أمه بيشوح في أبو أمه. وعادي رجعنا لحالتنا الأولى زي ما احنا، أو واحد محترز من الحاجات دي لكنه مصهين على السنن، ما بيصليش سنن، عادي طلع ما ما زودش في السنن، سايب قيام الليل فما ما انبعثش قيام الليل. طبعا واضح الفرق بين ده واللي قبله؛ اللي قبله واقع في الحرام، وده لم يزد من المستحبات. فهذا الخوف خوف مذموم، ليه؟ لأنه ضعيف لم يحمل صاحبه على فعل الطاعة، ولم يمنع صاحبه عن معصية.

في بقى حالة ثانية من الخوف هي أيضاً مذمومة، وهو الخوف الزائد عن حده الذي يخرج العبد إلى إلى حالة اليأس والقنوط. يعني واحد من كتر خوفه خلاص هي خربانة خربانة، فيعمل إيه؟ اللي هيوصل لحالة إن خربانة خربانة دي هيعمل إيه؟ هيعمل خلي بالكوا هو الخوف اللي في الناحية دي اللي هو في إفراط، عندنا في حالتين؛ حالة اللي هو إنه يفضل زي ما هو في المعاصي والموبقات ما هي كده كده إيه أنا في جهنم وبئس المصير، يقنط من رحمة الله عز وجل. عارفين زي مين كده؟ زي قاتل التسعة وتسعين مش المئة، قاتل المئة نفس ما كانش في حالة قنوط مش كده، ما هو راح للعالم رجاه وطمنه خلاص وتاب، إنما هو قاتل التسعة وتسعين وراح للراهب وقال له: لي توبة؟ قال: لا، فقتله. حد تامل اللفظ ده قبل كده؟ ليه قتله؟ ما هو اللي قتل تسعة وتسعين نفس ده القتل عنده زي صباح الخير كده، يعني ممكن يبقى قتل عين، يقول السلام عليكم وراح إيه قتله. فقتله ليه؟ خلاص هو قانط قال له مالكش توبة، خلاص بقى ما أنا هستمر في القتل مش كده؟

فده القانط عارفين كده الحديث اللي قال لأبنائه إيه؟ إن أنا مت فاحرقوني وايه ثم ذروني، فوالله لإن قدر الله علي ليعذبني عذاباً لا يعذبه أحداً من العالمين. قدر الله علي يعني لو ربنا سبحانه وتعالى عذبني ليعذبني عذاباً ما عذب أحداً من العالمين، ف عشان قدر دي فيها شوية تفصيل كده بس مش وقته بقى. فلما بعثه الله عز وجل، الله عز وجل أوحى إلى الأرض أن ردي ما أخذت، وإلى البحار أن ردي، وك المهم قام هذا الرجل قال: ما حملك على ذلك؟ قال: خشيتك يا رب. فالخوف الشديد ممكن يقنط العبد من رحمة الله عز وجل فيقعد عن العمل. وممكن يعمل حاجة تانية يا جماعة الخوف الشديد، وهو أيضاً مذموم، ممكن يعمل إيه؟ يخلي العبد يستغرق الأوقات في الطاعات استغراقاً يأتي على نفسه وعلى من يعول، يبقى من كتر الخوف يأتي يعطل الدنيا تعطيلاً يأثم به. أنا هنا بعمال أجيب احترازات ليه؟ أجيب احترازات علشان عادي ممكن الإنسان يعطل الدنيا نوع تعطيل عادي يعني ما الدنيا تخرب شوية، فيها مشكلة؟ ما اصل احنا برده احنا عاوزين الدنيا مئة فل وستاشر، وبعد ما تخلص الدنيا مئة في المئة نبقى نشوف الآخرة بقى! هذا مش مطلوب برده، هذا مش مطلوب يعني ده لو هنلحقه هنقول لا ده ده الخوف الضعيف. ما هو لما نيجي أنت تخاف، ما هو لازم يحصل حاجة، فلو الدنيا هتتعطل شوية وهتنزل في الدنيا شوية علشان آخرتك تعلو، ما فيش مشكلة عادي يعني.

إنما الخوف المذموم وما فيش مشكلة دي يا جماعة يعني يعني هو ده حال السلف أصلاً، وحال النبي عليه الصلاة والسلام، وحال الصحابة، والحالة التي اختارها الله لنبيه عليه الصلاة والسلام ما هياش أحوالنا اللي احنا عايشين فيها دي خالص، مش كده؟ ولما أقول ما هياش أحوالنا يعني ما هياش أحوال أفقر واحد في الموجودين. سيدنا النبي عليه الصلاة والسلام طعامه عامل ازاي؟ إزاي يمر عليه شهرين هلال تلو الهلال تلو الهلال ولم يوقد في بيته نار؟ طب كان طعامكم إيه؟ الأسودان: التمر والماء. لمدة شهرين تمر ومية، ده طعامه صلى الله عليه وسلم. فعلى طول بقى شبعان هو من التمر بقى ولا إيه أحواله في الجوع والشبع؟ لا، يربطوا الحجر علشان ما يحسوش بالجوع، فيكشف عن بطنه الشريف صلى الله عليه وسلم فإذا به رابط الحجرين. يعني مثلاً مش الأسودان التمر والمية ومتوفرين فبناكل لغاية ما نشبع، لا. ده في ناحية الأكل، ناحية اللبس ربما لبس الإزار بلا رداء صلى الله عليه وسلم. وبعدين المنامة بتاعته عاملة ازاي؟ حصير يؤثر في جنبه الشريف صلى الله عليه وسلم. دي الحالة اللي كان النبي فيها عليه الصلاة والسلام.

فمش فاحنا مش بنقول لما نيجي نقول بقى الخوف اللي يعطل الدنيا ما نقصدش يعطل الدنيا نوع تعطيل أو يؤثر على الدنيا نوع تأثير فتضطرب بعض أحوالها أو كد، ده ممكن يبقى ممدوح برده ما فيش مشكلة. إنما الخوف الذي يعطل الدنيا بالكلية بحيث إنك تبتدي الدنيا تختل اختلالاً لا تستقيم معه الحياة، بالذات لو ليك ناس بتعولهم أطفال، ولا كفى بالمرء إثماً أن يضيع من يعول أو من يقوت، مش كده؟ والنبي عليه الصلاة والسلام لما رأى يوماً الحبل في المسجد، وبعدين قال: لمن هذا؟ فقالوا: لإحدى زوجاته تصلي من الليل حتى إذا فترت تعلقت بالحبل. فواضح جداً دي عبادة ستؤثر على أولاً على صحة هذه المرأة، وعلى نهارها بقى تيجي بالنهار خلاص مش قادرة تعمل حاجه. فقال: «حلي، ليصلي أحدكم نشاطه، فاذا فتر فليرقد» صلى الله عليه وسلم.

ويبقى الخوف المحمود بقى، وهذا الخوف الذي في الحقيقة برده احنا نفقده؛ الخوف المحمود وهو الخوف الذي يحملك على الطاعة ويحجبك عن المعصية. إيه اللي المفروض يكون الخطاب فيه أكبر؟ نتكلم عن الخوف كتير ولا عن الرجاء الأول؟ إيهما أفضل؟ الخوف ولا الرجاء؟ إيه رايكم؟ الخوف؟ الخوف يرفع إيده مع بعض، ماشي نزلوا إيديكم. كتير الخوف، الرجاء؟ طب الباقي إيه؟ ماشي، طب الاثنين؟ ده في ناس رفعت إيديها الناس داخلة في دورين! طيب، هو السؤال غلط، فما فيش حاجة ما فيش حاجة اسمها إيهما أفضل الخوف أو الرجاء؟ قلنا إيهما أفضل الخوف أو الرجاء كقولنا إيهما أفضل الخبز أو الماء؟ فنقول والله الخبز أفضل للي جعان، والماء أفضل للعطشان. واضحه؟

فيبيقى إيهما أفضل؟ ما فيش حاجة اسمها إيهما أفضل كده مطلقا الخوف ولا رجاء. آه، إنما إيهما أصلح لأحوال العباد؟ نبتدي بقى نتناقش هنا. فقالوا إنه قول بعض أهل العلم: إنه الأصلح للعبد في الدنيا أن يغلب جانب الخوف، فاذا كان في انقطاع من الدنيا وإقبال على الآخرة وقت الاحتضار غلبنا له جانب الرجاء. مفهومة دي؟ يبقى طول ما أنت في الدنيا هذا الذي يصلح أحوال غالب الناس. أما آحاد الناس ما يصلحهاش ده لأن هو أصلاً خوفه شديد، فده احنا محتاجين نكلمه في الرجاء، مفهوم؟ إنما غالب الناس لا محتاجين يسمعوا في الخوف كتير.

كان ابن الجوزي ليه كلمة احنا قلناها في درس الرجاء يعني وشرحناها، بس احنا عاوزين ناخد منها حته صغيرة، يعني كان بيقول إيه؟ عشان كان بيتكلم عن زمانه هو. ماذا قال؟ قال: وهذا الزمان زمان لا ينبغي أن يستعمل فيه مع الخلق أسباب الرجاء. في زمان ابن الجوزي بيقول: هذا الزمان زمان لا ينبغي أن يستعمل فيه مع الخلق أسباب الرجاء، بل المبالغة في التخويف. ليه؟ لأن ذكر أسباب الرجاء يرديهم بالكلية، هيدمرهم. لأن معظم الناس محشوة بححب الدنيا وبالشهوات وبالغفلة، فنيجي احنا نكلمهم في الرجاء يزدادوا تمادياً. لا، ده عاوزين حد يخوفهم، ليه؟ علشان يعتدل الخوف والرجاء؟ لا، مش عشان يعتدل، احنا الذي يصلح غالب الناس في الدنيا أن جانب الخوف هو اللي يكون أزيد. طيب، إذا كان بقى في الاحتضار؟ طب لو خاف هيعمل إيه؟ هو في الاحتضار مش هيعرف يعمل حاجه خلاص، الراجل بيموت، فنريد منه أن يموت ويحسن الظن بربه سبحانه وتعالى، حينها غلبنا له جانب الرجاء، نكلمه عن سعة رحمة الله وعن فضله وعن تجاوزه وعن مسامحته لعباده وكذا وكذا، فيموت وهو محسن الظن بالله عز وجل. يبقى دي أول مسألة خلاص.

المسألة الثانية: نخاف من إيه؟ نخاف من إيه؟ لأن بعض الناس ما هواش واعي احنا ليه بنخاف أصلاً. خلونا كده نقرا كلام للهروي في منزلة الخوف. الإامام الهروي قال الله تعالى: ﴿يَخَافُونَ رَبَّهُم مِّن فَوْقِهِمْ﴾ [النحل: 50]. الخوف الانخلاع عن طمانينة الأمن بمطالعه الخبر. يعني هو ده تعريف بقى الخوف، اللي هو إيه؟ الخوف أصلاً بيقول لك الخوف الانخلاع عن طمانينة الأمن بمطالعه الخبر؛ يعني إنك ما تبقاش مطمئن، ليه؟ لما عرفت أخبار الوعيد فبتدي تخاف. احنا هنخش في الكلام ده إن شاء الله، بس تعالوا نشوف احنا المفروض نخاف من إيه يا جماعة. قال: وهو على ثلاث درجات. الدرجات الأولى: الخوف من العقوبة. يبقى عندنا ثلاث درجات للخوف خلونا نقولها بسرعة: خوف من العقوبة احفظوها، دي درجة أولى. الدرجة الأعلى: خوف من المكر؟ خوف من الله جل وعلا.

وكأني دلوقتي جاي إيه ده، يعني هو الاتنين الأولين دول مش بيخافوا من ربنا؟ كله بيخاف من ربنا، لكن الخوف من الله لله هيدي الدرجة الأعلى. يعني إيه؟ هنعرف كمان شوية إن شاء الله. يبقى أول درجة يا جماعة من الخوف: إنك خايف العقوبة، خايف تخش نار، أو خايف تفضح في الدنيا، لأن الفضيحة نوع عقوبة، وستر الله عز وجل عليك ربما كشفه لعظيم جرمك أو لتماديك في هذا الجرم. اوعى تفتكر، اوعى تفتكر أصل في ناس ممكن عقاب الدنيا هو اللي يخوفها أكتر، وده برده مسكين لأنه محجوب؛ اللي خايف من الفضيحة مثلاً، اللي بيقعد يتفرج على أباحيات مثلاً بل والعصر، وبعدين وهو في عزّه يتفرج على الاباحيات، لو بس الهواء حرك باب الأوضة كده مثلاً فكأن حد داخل عليه، فقلبه يقع في رجليه! أن حد يراه على تلك الحال فضيحة كبيرة جداً. ويا سلام بقى لو كان اللي يتفرج على الاباحيات ده معروف عنه الصلاح، ولا له سمت، ولا كذا، ويتفضح بقى إنه بيعمل الحاجات دي. ابن القيم بيقول: إن اضطراب قلبك إذا حرك ستر الدار وأنت على المعصية أشد من المعصية. ليه؟ لأن معنى كده إنك خايف إن فلان ده يشوفك، وما انتش خايف إن ربنا مطلع جل وعلا. أنت عادي جداً ربنا يراك يراني وعادي أب بارزه المعاصي، أول ما الباب بتاع الأوضة تبقى قفله وأي كلام كده مثلاً اللسان ماهواش مقتفتح مثلاً فجأة فتلاقي قلبك يكاد يقف! ليه؟ هتُرى على تلك الحال الرديئة الذميمة؟ طب يا ابني ما ربنا شايفك وفي ملائكة موكلة، لماذا اضطرب قلبك لتحرك الباب أو لتحرك الستر؟

فقال الخوف من العقوبة: إنك تبقى خايف من العقوبة، العقوبة اللي هي إيه بقى؟ أما عقوبة دنيوية، إنك يرفع عنك الستر فتفضح. طيب، هو ممكن يعملها معاك إيه اللي يمنعه جل وعلا؟ إيه يمنعه؟ ولا حاجة.

هو لا يفعلها، لأنه سبحانه وتعالى يمهلك، وهو سبحانه وتعالى ستير يحب الستر. إنما هتتمادى في عصيانك تفضح. بتعاق بابيك وأمك، إيه يمنع يشل إيديك دي اللي عمال تشوح بيها ولا يخرسك، يخرس لسانك اللي بتعلي صوتك عليهم بيه؟ إيه يمنعه يعني؟ ولا حاجة، هو إمهاله جل وعلا، وإنما أمره إذا أراد شيئاً أن يقول له كن فيكون. فلان يخرس، تخرس في لحظة، يتشل، تتشل في لحظة، يبقى تخاف العقوبة، تخاف العقوبة.

الفلوس الحرام اللي عمال تتحيل عشان تاخدها دي، تاخد قرض ولا تاخد مال فيه شبهة، ولا مبلطق في الشغل وما بتعملش اللي عليك وفي آخر الشهر بتستحل الفلوس، ما يمنعه إنه يجي لك سرطان تصرف عليه اللي وراك واللي قدامك؟ ولا حاجة. حريص قوي على المال، طيب في لحظة يروح منك كل المال.

أول نوع من الخوف أن تخاف العقوبة، والعقوبة الأشد عقوبة الآخرة بقا. إيه أشد عقوبات الآخرة؟ ﴿كَلَّا إِنَّهُمْ عَن رَّبِّهِمْ يَوْمَئِذٍ لَّمَحْجُوبُونَ﴾ [المطففين: 15]. دي أشد عقوبة، لكن احنا عشان احنا محجوبين في الدنيا ما احناش حاسين بالايه، ما احناش حاسين بالعقوبة دي للأسف. نقعد بقى نضرب أمثله للناس عشان نفهمهم بس يتصوروا فكرة الحجب دي، فنقول: لو أنت، كل واحد كده فينا يعني إيه يستحضر أكتر حد في الدنيا بيحبه، أكتر حد اللي هو ما يعرفش يستغنى عنه، اللي هو كده حاسس جوه لو فلان ده بعد عني أنا أموت خلاص، وبعدين قيل لك: إيه رأيك، تعالى قابل فلان ده في خرابة أو تقعد في إيه، قصر وانهار، بس تحجب عن فلان ده، فلان ده مش هتشوفه، معظم الخلق إن ما كانش كل الخلق يختارون إني أكون مع فلان اللي بحبه، آيوه، هتقعد على الأرض وما... مش عاوز القصر ولا عاوز الانهار ولا عاوز ال... عرفتوا ليه بقى أن نعيم أهل الجنة رؤية الرب عز وجل؟ هو عشان كده بس، لأن احنا محجوبين أصلاً فاحنا مش مستشعرين أن دي نعمة وأن ده نعيم، لكن أول ما ندي بقى الأمثله التعبانة اللي بناديها دي، آه‌، نبتدي نحس المعنى: آه‌ لا، أنا أحب أبقى قاعد مع فلان، أحب إني ما أقومش من معاه حتى لو هقعد في أي حته، وتروح بقى الانهار وتروح القصور وتروح، تروح مطرح مطروح. ليه؟ لأن نعيمي بوجودي مع فلان اللي بحبه ده هو الأعلى.

أنتم إيه، أنتم حاسس كده من وشوشكم إن لا، نقعد في القصر وبتاع ويولع هو بقا، نجيب نجيب غيره هنا في القصر بعد كده ولا ما بتحبوش حد؟ ما فيش حد قلوبكم حجر؟ فتستحضر عقوبة الآخرة بقا، خوف العقوبة، عقوبة النار، والنار دي مش حاجة سهلة يا جماعة، نقول عقوبة النار دي شيء مرعب. أوصاف النار في القرآن مرعبة، إيه، تطلع على الأفئدة، إيه الآية؟ فين اللي حافظين، مش في حاجة وستين؟ ها، إيه؟ نار الله الموقدة التي تطلع على الأفئدة، التي تطلع على الأفئدة يعني إيه تطلع على الأفئدة؟ يعني تاكل كل حاجة لغاية ما تصل إلى إلى الفؤاد. دي النار، فاحنا مش بنتكلم في حاجة سهلة، ماشي. يعني أخف، أخف الناس في النار رجل بتوضع تحت أخمصيه جمرتان من النار، تحت رجله، يغلي منهما دماغه، يبقى معنى كده أن الجسم كله إيه؟ بيغلي، ما هو لما أعلى حته بتغلي يبقى بقية الجسم إيه؟ بيغلي، وما فيش موت، يعني أنت أسباب الموت في النار جايلك من كل حته لكن ما فيش موت. فتقعد تقرا في أوصاف النار، تسمع في أوصاف النار، فتخاف العقوبة، ده دي أول درجة من الخوف، احنا لسه ما تكلمناش عن درجات تانية، دي أول درجة من الخوف، أن تخاف العقوبة. قال: الدرجة الأولى الخوف من العقوبة، وهو الخوف الذي يصح به الإيمان. ليه يصح به، يصح به الإيمان؟ لأن الله عز وجل جعله شرطاً للإيمان، قال: ﴿وَخَافُونِنِ إِن كُنتُم مُّؤْمِنِينَ﴾ [آل عمران: 175].

قال ويتولد، كأنِّي بقى السؤال: طب إزاي أخاف؟ أنا الصراحة أنا الخوف اللي عندي خوف ضعيف جداً، لا منعني من معصية ولا محمسني على طاعة، أعمل إيه؟ قال: يتولد من تصديق الوعيد وذكر الجناية ومراقبة العاقبة. ثلاث حاجات يا جماعة احفظوها بقى، واحنا لسه بنتكلم في أول درجة من الخوف اللي هو خوف العَامّة بيسموه كده، اللي هو المفروض كل المسلمين يبقوا خايفين الخوف ده، في درجتين أعلى من ده، أنتم متخيلين؟ اللي هو إيه بقى خوف العَامّة؟ خوف العقوبة، خايف تخش نار، خايف تتفضح في الدنيا، آه، لما قلت لك حتى العاقل اللي خايف من فضيحة الدنيا، ما يتذكر بقى فضيحة الآخرة، يعني أنت دلوقتي أنت بس إيه، قلبك واقف في رجلك أن بني آدم واحد هيشوفك، في فضيحة الآخرة أن تفضح على رءوس الأشهاد، أنت متخيل الفضيحة دي؟ أنت متخيل أن أن من هؤلاء الأشهاد الأنبياء؟ من عاش على شيء مات عليه، ومن مات على شيء بعث عليه، يعني الذي قبض وهو بيتفرج على الإباحية، ودي بعيدة؟ لا مش بعيدة، بنسمع عنها، طب ما يمكن أنت كده، يعني أنت، أنت إيه الأمان اللي أنت فيه ده؟ يعني إيه الأمان ده؟ فإذا قبضت على تلك الحال، احنا سمعنا عنها يا شباب، ها. امرأة، واحد من الدعاة بيحكي، واحدة كلمته، امرأة كلمته، وهو عارف يعني في صلة بينهم، تعال بسرعة ومش عارف إيه، راح لها، قالت له: اطلع لفلان في الأوضة، ابنها فتح الباب ميت وهو بيتفرج على الإباحية وبيمارس العادة السرية، والداعي هو اللي بيحكي الحكاية دي حصلت وهو شافها بعينه.

ومن غير ما يحكي، يعني إيه، يعني احتمال عقلي موجود أنك تموت على الحالة دي، ما هو يا جماعة برضه، خلوني يا جماعة، سيبكم من احتمال، يا قانون الاحتمالات، أن معظم اللي بتعمله في يومك بقانون الاحتمالات، يعني بغض النظر بقى أن في أجل محسوب مكتوب وأمتى أجلك، يبقى النسبة الأكبر أنك هتموت عليه. يعني مثلاً لو أنت يومك بتقضيه سبعين في المية على كذا، عشرين في المية على كذا، عشرة في المية على كذا، فبنثبت بقانون، بقانون عقلي بحتة، نسبة أنك تموت على الحاجة اللي هي سبعين في المية دي نسبة قد ايه؟ سبعين في المية، حد فاهم أنا بقول ايه؟ ده النسبة العقلية، يعني ماشي، فما يكون أنت معظم يومك في الغفلة، يبقى نسبة أن يجيلك الموت وأنت في الغفلة سبعين في المية، إذا كان معظم يومك في العصيان باختلاف المعاصي مش لازم معصية بعينها فنسبة أن تموت على المعصية هي النسبة الأكبر أياً كان بقى إيه هي المعصية، فتبعث على تلك المعصية، فتفضح على رءوس الأشهاد، اللي هم مين الأشهاد بقى؟ اللي هم الأنبياء والصالحون والأولياء، يبقى، يبقى واحد قايم كده في عرصات القيامة، شايف وأنت من بعيد عمال ينزف دم وريحة المسك مغرقة المكان، ليه؟ لأن هو آخر عمل عمله لربنا أنه بذل روحه. وذلك الشقي البعيد قايم بيعمل إيه بقا؟ فضيحة ما بعدها فضيحة.

فخوف العقوبة أن تخاف من العقوبة، طب أنا، طيب أنا مش قادر مش عارف أعملها، ثلاث حاجات احفظوها، إزاي نحصل ذلك الخوف المحمود، إزاي نغلب الخوف؟ قال: يتولد من تصديق الوعيد وذكر الجناية ومراقبة العاقبة. ثلاث حاجات، حد يعرف يقول الثلاثة عشان عاوزين نحفظهم؟ تصديق الوعيد، وذكر الجناية، ومراقبة العاقبة. اللي هو إيه بقى تصديق الوعيد؟ يبقى أول حاجة لازم نعرف الوعيد عشان نصدقه، مش كده؟ يبقى عليك واجب النهارده وطول حياتك، يبقى ليك مجالس بتسمعها بتحضرها بتذكرك بالوعيد، مش مش أي حاجة في الدين، احنا بس بنتكلم في الوعيد. يعني إيه مجلس بتسمعه بيفكرك النار دي عاملة إيه؟ بيفكرك أخذ الرب الشديد للأمم السابقة كان شكله إيه؟ بيذكرك بالعذاب، عذاب القبر، وهكذا. لما تعلم الوعيد هتصدق به، إنما نقول لك تصديق الوعيد، طب أنت أنت أصلاً فقير في معلوماتك عن النار، فقير في معلوماتك عن عذاب القبر، فقير في معلوماتك عن معاقبة الرب عز وجل لعباده في الدنيا شكلها إيه العقوبات دي؟ فيقول لك تصديق الوعيد، اعرف الوعيد الأول.

وذكر الجناية، صدقت الوعيد بقا، انظر في نفسك وحالك، حالك تلك، حال جنة ولا حال نار؟ هو ده ذكر الجناية، أنك ترجع لنفسك وتقول: آه، أنا العبد المذنب، الجاني، العاصي، الآبق، فأنا المستحق لذلك الوعيد. هو ده ذكر الجناية. ولذلك يا جماعة من اعظم المجالس التي تنتفع بها مجلس تفكر. وللاسف العصر اللي احنا عايشينه، سرعة هذا العصر واقتحام، اقتحام الدنيا علينا حتى في غرف النوم، هذا الجهاز الخبيث التليفون، ما بتكلمش في حرام، ما بتكلمش في حد بيعمل حاجة حرام زي صاحبنا الأولاني ده، بس بقت الدنيا ما فيش وقت تعرف تخلو فيه بنفسك أو بربك. يعني كان زمان الناس بقا القديمة شوية قبل التليفونات ما تنتشر، كان، آه، أنا ممكن تلاقي مجلس خلوة، أنت قاعد مع نفسك كده بتفكر في نعم الله عز وجل عليك، في ذنوبك ومعاصيك، في مالك إن مت على تلك الحال. النهارده أول ما تيجي تقعد تلاقي إيه، تن على طول إشعار، تفتح، تتسحل في التطبيق ده ولا تطبيق تطبيق ده، ولا بقى تقعد تتنقل من التطبيقات وأنت داخل نيتك أنا عاوز مجلس لله، خلاص مجلس تفكر. يعني أنا، أنا أزعم أن لو قلت لأي حد مثلاً أقرب مجلس تفكر ليه من شهر فات، يرفع إيده، ممكن ما تلاقيش واحد في المسجد، ممكن أصلاً يقول لك: إيه مجلس تفكر ده، عمرنا ما عملناه أصلاً. وتفكر ساعة خير من عبادة ليلة. أنتم، أنتم فاهمين احنا بنتكلم في عبادة ممكن واحد عاش لغاية اللحظة دي ما سمعش عنها أصلاً، واحد سمع عنها وإلى اللحظة دي ما عملهاش ولا مرة في حياته.

يبقى ذكر الجناية، صدقت الوعيد، اذكر جنايتك، وترى تلك الجناية التي أنت عليها مهلكتك ومرديتك، ولو فضلت على كده هينالك هذا الوعيد الذي صدقت به.

والمسألة الثالثة مراقبة العاقبة، يعني عدم الغفلة بقى عن قدوم هذه، هذا الوعيد. مراقبة العاقبة، ممكن واحد يبقى مصدق بالوعيد وذاكر الجناية، لكن عنده طول أمل، فاهمين؟ فهتوب بكره، هتوب بعده، هتوب السنة، لما أتجوز أبقى ألبس الحجاب، مثلاً. طيب، في نار؟ آه‌، هي عارفة إن في نار. طب أنت على معصية وعلى جناية؟ آه، أنا. طيب إيه؟ عندها طول أمل، إيه الشرط الواقع هنا؟ مراقبة العاقبة، ماشي.

طيب، هذا هو خوف العامة. الدرجة الثانية من الخوف: خوف المكر. هنقرا طبعاً كلام الهروي، كلام فخم يعني مش أي حد. فهو بيقول إيه بقى؟ خوف المكر في جريان الأنفاس المستغرقة في اليقظة المشوبة بالحلاوة. إيه رايكم؟ حلوة. إيه، إيه الدرجة الثانية من الخوف يا جماعة؟ ده خوف الخصوص. إذا كان الخوف الأول خوف العموم، خوف الخصوص إيه بقى؟ الخصوص اللي هم مين الأول؟ اللي هم في اليقظة، اللي هم في العبادة، اللي هم في لذة الطاعة، دول خايفين من إيه؟ من مكر الله عز وجل أن يسلبوا تلك الحلاوة. عارفين ذاق طعم الإيمان، فطاعات لها حلاوة، والاستغراق في اليقظة أنك على طول صاحي مع ربنا سبحانه وتعالى له حلاوة. اللي بيدوق هذا الطعم بيبقى خايف من أن يسلبه، عارفين دي بنلاقيها في مين كتير؟ في اللي لسه تائب. فتلاقيه لسه تائب، يعني إيه؟ يعني واحد كان بعيد جداً ولسه راجع بقى لربنا، فنسمع الكلام ده كتير يقول لك: أنا حاسس بلذة عمري ما حسيتها في حياتي، أنا خايف يا شيخ، بنسمع الألفاظ دي، أنا خايف اللذة دي تروح مني. هو ده الخوف اللي بنتكلم عليه، خوف المكر.

روي أن آدم عليه السلام لما أخرج من الجنة، جلس جبريل وميكائيل يبكيان. فقال الله: ما يبكيكما؟ قال: سبحانك، لا نأمن مكرك. قال: هكذا فكونا. فإيه الأمان اللي أنت فيه ده؟ يعني إيه بقى يا جماعة؟ يعني أنت النهارده قاعد في مجلس علم، أنت ليه عندك الأمان أن النعمة دي لن تسلبها؟ ليه الأمان ده جايبه منين؟ لا، أنت النهارده، النهارده في مجلس علم، أنت بكره ممكن نجيبك من مجلس أنس بتلف سيجارتين، أنا، آه‌، أنت، آه‌، أنت. فليه الأمان ده؟

يا جماعة، مش احنا عارفين القصص لناس كانت في قمة الطاعة وبعدين راحت لفين؟ للشرك بل، نوه الله عز وجل على بعض هذه القصص في القرآن: ﴿فَمَثَلُهُ كَمَثَلِ الْكَلْبِ﴾ [الأعراف: 176]. نزلت في مين؟ بلعام بن باعوراء. بلعام ده كان إيه إن شاء الله؟ مين بلعام ده؟ كان، يعني كان حد وحش، ولا بدايته كانت إيه؟ ده كان واحد عارف اسم الله الأعظم، الذي إذا سئل به أعطى وإذا دعي به أجاب. وبعدين كان رسول موسى لأحد الملوك، يعني أنتم عارفين لما يجي نبي يرسل واحد بالنيابة عنه لملك يدعوه، هيرسل أي حد كده، يعني يروح يجيب أي حد كده يروح له، أنت روح أنت الملك، ولا حد حاز من العلم ما حاز، وحاز من الصفات ما حاز، مش كده يا جماعة؟ وبعدين راح اهو، واحد علم ما فيش كده، وأكيد حكمة ما فيش كده، موسى اختاره يروح للملك، الملك يقول له: سيبك بقى من الشويتين دول، خد دنيا، فيخد دنيا. إلى آخر قصة ابن باعوراء.

قارون، قارون ده كان إيه؟ قارون كان ابن عم موسى، وكان من علماء بني إسرائيل، وكان يلقب بالمنور لأن كان صوته في التوراة حلو جداً. راح قارون، الآية: ﴿كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءُ مِّنكَ﴾ [الحشر: 16]. نزلت في مين؟ عابد بني إسرائيل. عابد بني إسرائيل عبد ربنا قد كده، وبعدين...

قصة طويلة بقروها أنتم في كتب التفسير: في الآخر الشيطان يفضل معاه لغاية ما يقع عليها يزني بها تحمل. طبعا كانوا بيسافروا بالشهور، تحمل، يخوفه أن هو هيتفضح أمره: اقتلها وادفنها وهم هيصدقوك أنها ماتت. يعني ما أحدش هيدور وراك، هتقول لهم ماتت ودفنتها. قتلها ودفنها.

وبعدين رجعوا أخواته، أخواتها سألوه: دي ماتت؟ ودفنتها. يقوم الشيطان يجي لهم في الحلم، هم الثلاثة، يصحوا الثلاثة مفزوعين: أنا شفت رؤية، الثاني يقول: أنا شفت رؤية، والثاني إن إيه إن اختنا حصل فيها كذا كذا، هتفونا في المكان الفلاني. ويرروحوا ينبشوا، يلاقوا اختهم ميتة بهذه الصفة؛ حامل ومقتولة.

قوم الشيطان، الشيطان يروح، يروح على العابد، ويتبدى له: أنا الذي ما زلت بك حتى فعلت كذا وكذا، والآن إن لم تسجد لي سجدتين خلعت بيني وبينك. فسجد للشيطان، فولى الشيطان هارباً وقال: إني بريء منك، إني أخاف الله. وهذا هو لفظ القرآن: ﴿كَمَثَلِ الشَّيْطَانِ إِذْ قَالَ لِلإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِّنْكَ﴾ [الحشر: 16].

فأنت إيه الأمان اللي أنت فيه ده؟ أن أنت في حال معينة؛ حال حفظ قرآن، حال قيام ليل، حال طلب علم، حال أي حال، ما يؤمنك؟ لابد أن تكون خائفا من مكر الله عز وجل بك، ﴿وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ﴾ [الأنفال: 30]. هكذا كون، سبحانك لا نأمن مكرك. قال: هكذا كونا، خليكوا كده، لا تأمنوا مكري.

يبقى دي المرحلة الثانية من مراحل الخوف، وهي أعلى من الأولى. ليه؟ لأن دي بتصيب الإنسان أمتى؟ وهو في الطاعة. وأنا في الطاعة، خايف. خايف من إيه؟ خايف أن أُسلب حلاوة الطاعة، خايف أن أنا النهارده في جملة المصلين، بكره في جملة الزانين، بكره، آه بكره، مش بكره يعني السنة الجاية، بكره. الخوف من المكر.

قال: خوف المكر في جريان الأنفاس المستغرقة في اليقظة المشوبة بالحلاوه. كده الجملة نورت شوية. خوف المكر في جريان الأنفاس، يعني الأنفاس المستغرقة في اليقظة، أنفاسك هذه التي يستغرقها في اليقظة في القرب من الله عز وجل، المشوبة بالحلاوة التي تشعر فيها بحلاوة القرب وحلاوة المناجاة. وأنت في هذه الحال -طبعا أنت معاك رجاء، بس النهارده ما فيش كلام عن الرجاء، الرجاء اتكلمنا عنه المرة اللي فاتت وخوفناهم الحمد لله في الرجاء- فالنهارده الدرس عن الخوف. وأنت في تلك الحال، صحيح في أنس بالله عز وجل، لكن في خوف؛ خوف أن تسلب تلك الحال.

وليس في مقام أهل الخصوص وحشة الخوف، إلا هيبة الجلال، وهي أقصى درجة يشار إليها في غاية الخوف. آه، عاوزين نقف هنا بقى شوية. احنا قلنا لكم الخوف ثلاث درجات؛ خوف العقوبة، خوف المكر -ساعتها أنا قلت- وخوف إيه؟ خوف الله. فقلت لي إيه: ما كله بيخاف ربنا؟ قلت لك: لا، أنت بتخاف الله لله. وقلت لكم هفهمها لكم، يعني إيه؟ ركزوا يا جماعه في الكلام اللي جاي ده، كلام خطير جدا.

أعلى درجة في الخوف، وده خوف العارفين، أنهم يخافون الله. هم تلاشت عندهم معاصيهم، وتلاشت عندهم طاعاتهم؛ لا شايفين معصية، ولا شايفين طاعة. يعني لا شايفين معصية فخايفين العقوبة، ولا هم شايفين طاعة فخايفين المكر. بيخافوا ربنا لربنا، كده يعني إيه؟ هديكم مثال عشان نفهم بقى.

يعني السبع، الأسد، هل أنت تخاف الأسد لسوء جنايتك، ولا تخاف الأسد للأسد؟ يعني إيه؟ يعني لو اثنين ماشيين وكانوا لسه بيتكلموا مع بعض، فواحد بيقول للثاني: إيه ده؟ أنا بحب الأسود وباحترمهم، ده ملك الغابه! فتعمك: أسود يا عم؟ نحترمه؟ دول هفاءات! فجأة طلع الاثنين أسد، مين اللي يخاف؟ ليه؟ ده الأولاني ده بيحترم الأسد وبياكل عليه كلام حلو، هو هنا اللي خاف ما خافش لجنايته، هو خاف الأسد للأسد؛ هو الأسد يخشى؟ أنت بقى جنيت، ما جنيتش، هو الأسد يخشى. مفهومة دي؟

ابن الجوزي ليه كلام خطير جداً في الحته دي في منهاج القاصدين، نقراه بقى سوا لأنه خطير الحقيقه. يقول: طبعا الأول احنا عندنا أثر في الحته دي أن الله عز وجل أوحى لداوود: يا داوود، خفني كخوفك السبع. فالعلماء تأملوا الكلمة دي، يعني إيه خفني كخوفك السبع؟ يعني إيه خاف مني زي ما بتخاف من الأسد؟ يعني إيه؟

قال ابن الجوزي: ركزوا يا جماعة، الكلام ده خطير جداً. قال: والحاصل أن السبع يخاف لبطشه لا لجناية تقدمت -عشان أنا عملت مصيبة فأنا خايف من الأسد- لا، السبع يخاف لبطشه لا لجنايات تقدمت، وإنما يفعل ما يفعل ولا يبالي. الأسد ده لو دخل، فرتك عشرة، هتفلاقي خلص وراح ماشي، مديهم ضهره بهدوء خالص وماشي، وبيهز ديله وهو ماشي، لا يبالي. وإن قتلك لم يرق قلبه ولم يتألم، وإن تركك لم يترك شفقة عليك، بل أنت عنده أخس من أن يلتفت إليك، حياً كنت أو ميتاً. صح يا جماعه؟ مش هي دي؟ هو ده السبع، هو ده الأسد.

بلك، ألف مثلك وأهلاك نملة عنده سواء. مت أنت وألف واحد زي ما ماتت نمله. ليه؟ مش فارقة عند الأسد، إذ لا يقدح ذلك في عالم سبعيته، هو كده كده ملك الغابه. مش فارقة معاه مين يموت ومين يعيش، هو ملك الغابه. فألف نفس تروح عند الأسد زي نملة ماتت، مش فارق معاه. قتلك، مش هيقف يعيط عليك، هيديك ضهره ويمشي. سابك؟ سابك عشان أنت خسيس لا قيمة لك. هذا هو الأسد.

قال: إذ لا يقدح ذلك في عالم سبعيته وما هو موصوف به من قدرته وسطوته. ولله المثل الأعلى، يخاف لأنه الله جل وعلا، ولله المثل الأعلى. ماذا قال سبحانه وتعالى لما خلق الخلق؟ قال: هؤلاء في الجنة ولا أبالي، وهؤلاء في النار ولا أبالي. أنت، لا يبالي الرب بك أصلا، هؤلاء في النار ولا أبالي. فهذا هو الإله يخاف.

وهذا خوف العارفين، لذلك كلما كنت له أعرف، أو كنت به أخشى. قال صلى الله عليه وسلم: «ألا إاني أعرفكم بالله، وأكثركم له خشية». لا أبالي. إيه في القرآن والله مرعبة! قال الله عز وجل مخاطباً نساء النبي: ﴿يَا نِسَاءَ النَّبِيِّ مَن يَأْتِ مِنكُنَّ بِفَاحِشَةٍ مُّبَيِّنَةٍ﴾ هنعاقبها زي غيرها؟ أمال إيه اللي هيحصل؟ ﴿يُضَاعَفْ لَهَا الْعَذَابُ ضِعْفَيْنِ﴾ [الأحزاب: 30]. ختام الآية مرعب، الكلام على نساء النبي. تخيل مين هم بقى نساء النبي عليه الصلاة والسلام؟ يعني تخيلهم كده قدامك، مين هم؟ ختام الآية إيه يا جماعة؟ ﴿وَكَانَ ذَلِكَ عَلَى اللَّهِ يَسِيرًا﴾ [الأحزاب: 30].

أن تعاقب عائشة، بل أن يضاعف لها في العذاب، كان ذلك على الله يسيراً. فأنت مين حضرتك؟ أنت وانا ولا حاجة، ولا حاجة، وهؤلاء في النار ولا أبالي. الخوف من الله لله، مش لانك جاني فخايف العقوبة، ولا لانك طائع فخايف تحرم حلاوة المناجاة وحلاوة ولذه العباده، لا، أنا خايف منه. ولان المثال ده ما كان يفهم إلا بضرب المثال، مثال يعني الذي يقربه ضرب بقى لنا من الجوزي هذا المثال. وأنا حابب أعيد تاني كلام الجوزي من غير ولا تعليق بقى، يعني نقرا بقى الكلام تاني كده عشان نفهم يعني إيه خايف من ربنا.

قال ابن الجوزي: والحاصل أن السبع يخاف لبطشه لا لجناية تقدمت، وإنما يفعل ما يفعل ولا يبالي. فان قتلك لم يرق قلبه ولم يتألم. وإن تركك لم يترك شفقة عليك، بل أنت عنده أخس من أن يلتفت إليك، حيا كنت أو ميتا. بل ألف مثلك وإهلاك نملة عنده سواء. إذ لا يقدح ذلك في عالم سبعيته، وما هو موصوف به من قدرته وسطوته. ولله المثل الأعلى. وقد قال: هؤلاء في الجنة ولا أبالي، وهؤلاء في النار ولا أبالي.

يعني المفروض كان في كذا حاجة، بس عاوزين بقى نختم بذكر شيء من قصص الخوف. ذكر خوف الملائكة؛ قال الله عز وجل في صفَتِهم: ﴿يَخَافُونَ رَبَّهُمْ مِنْ فَوْقِهِمْ وَيَفْعَلُونَ مَا يُؤْمَرُونَ﴾ [النحل: 50]. وهذه الآية مما يستدل بها على خوف الله لله؛ يخافون ربهم، يعني هم خايفين العقوبة؟ يخافون ربهم، خايفين المكر؟ يخافون ربهم.

يعني إيه بقى يخافون ربهم التي قلناها؟ يخافون ربهم. وفيها قال الله عز وجل: ﴿وَيُحَذِّرُكُمُ اللَّهُ﴾ [آل عمران: 28] مش عقوبته، ولا يحذركم الله مكره، يحذركم الله نفسه جل وعلا. احنا مش بنهزر، احنا مش بنلعب يا جماعة، أنت بتتعامل مع إله الكون. ففكره أن احنا التواني والكسل والامن اللي احنا فيه ده، أنت لو تعاملك مع رئيس دولة، كنت هتبقى عينك في وسط راسك، ليه؟ في ثانية هتروح. فاحنا نتعامل مع إله الكون.

﴿يَخَافُونَ رَبَّهُمْ مِنْ فَوْقِهِمْ وَيَفْعَلُونَ مَا يُؤْمَرُونَ﴾ [النحل: 50]. وقد روينا عن النبي صلى الله عليه وسلم أنه قال: «لله ملائكة ترعد فرائصهم من مخافته، ما منهم ملك تقطر دمعة من عينه إلا وقعت، إلا وقعت ملكا قائما يسبح». ولله ملائكة سجود... يعني أثر طويل، خلينا ناخد الحاجات الخفيفة.

يقول صلى الله عليه وسلم: «لما كان ليلة أسري بي، رايت جبريل كالحلس البالي، ملقى من خشية الله عز وجل». الحلس البالي؛ الحاجة اللي بتتحط على الدابة كده عشان نقعد على الدابة، وبالي يعني متقطعة. رايته كالحلس البالي ملقى من خشية الله عز وجل.

وبلغنا أن جبريل جاء إلى النبي صلى الله عليه وسلم وهو يبكي، فقال: «ما يبكيك؟» قال: «ما جفت لي عين منذ خلق الله جهنم، مخافة أن أعصيه فيلقيني فيها». هذا وهو المعصوم، الملائكة مالهاش قدرة أصلا على المعصية. قال الله عز وجل في حق الملائكة: ﴿لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ﴾ [التحريم: 6]. ومع ذلك خايف جبريل!

طب هو، ما هو أصله يا جماعة، إيش اللي يؤمنه؟ يؤمن جبريل أن الله عز وجل لا ينزع عنه العصمة؟ فاهمين دي؟ ما هو في الآخر هو ليه ما بيعصيش؟ لأنه معصوم. طب ما يؤمنه أن الله عز وجل لا ينزع عنه العصمة؟

فما بالكم احنا بقى؟ احنا اللي ما فيش عصمة أصلا عندنا. ﴿لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ﴾ [التحريم: 6]. يعني إيه الفرق؟ يعني كلمتين زي بعض يا جماعة؟ لا يعصون الله ما أمرهم ويففعلو ما يؤمرون، ولا في فرق؟ يعني كلمتين توكيد لبعض؟ يعني لا يعصون الله ما أمرهم ويفعلون ما يؤمرون، هي، ولا في فرق؟ خلينا أديكم مثال عشان نفهم.

دلوقتي لو جيت قلت لحد: بقول لك إيه، خد المايك ده كده مثلا وديه عن هناك كده. فراح شايل المايك وداه هناك، هل هذا عصاني؟ ردوا. طيب، فعل ما أمرت؟ يبقى الاثنين زي بعض، صح كده؟ طيب، فلما ودَى المايك قلت له: جزاك الله خيراً بقى. بقول لك إيه، العمود ده؟ قال لي: آه. قلت له: خده بقى، انقل العمود ده من هنا، بس وديه آخر المسجد عشان إيه الناس مش شايفيني. فراح رايح، حاول يشيل العمود، وأفرغ وسعه في أنه يشيل العمود بس ما عرفش يشيله. هل هذا عصاني؟ لا. هل فعل ما أمرت؟ لا برضو.

يبقى: لا يعصون الله ما أمرهم، وعندهم القوة اللي مهما يتقلهم عليها هيعملوه؛ ويفعلون ما يؤمرون. فهمتوا دي؟

قال محمد بن المنكدر: لما خُلِقت النار، طارت أفئدة الملائكة من أماكنها. ربنا خلق دي لمين؟ فلما خلق آدم، عادت... آه، يبقى في خلق ثاني خلقت له النار.

ومن ذكر خوف آدم، عن أشرس عن وهب قال: بكى آدم على الجنة ثلاثمائة عام، وما رفع رأسه إلى السماء بعد ما أصاب الخطيئة، كأنه يستحي.

وقال وهب بن الورد: لما عاتب الله تعالى نوحاً في ابنه فقال: ﴿إِنِّي أَعِظُكَ أَن تَكُونَ مِنَ الْجَاهِلِينَ﴾ [هود: 46] بكى ثلاثمائة عام حتى صار تحت عينيه أمثال الجداول من البكاء؛ عشان ربنا عاتبه بكلمة واحدة: ﴿إِنِّي أَعِظُكَ أَن تَكُونَ مِنَ الْجَاهِلِينَ﴾ [هود: 46].

وقال أبو الدرداء: كان يسمع أزيز صدر إبراهيم عليه السلام إذا قام في الصلاة من بعيد؛ تسمع صوت صدره خوفاً من ربه عز وجل. يعني في غيرهم من الأنبياء، أما نبينا صلى الله عليه وسلم فعن عائشة قالت: ما رايت رسول الله صلى الله عليه وسلم قط مستجمعا ضاحكا حتى أرى منه لهواته، إنما كان يتبسم. وكان إذا رأى غيماً أو ريحاً عرف ذلك في وجهه، فقلت: يا رسول الله، الناس إذا رأوا الغيم فرحوا رجاء أن يكون فيه المطر، وأراك إذا رأيته عرفت الكراهة في وجهك؟ فقال: «يا عائشة، ما يؤمني أن يكون فيه عذاب؟ قد عذب قوم بالريح، وقد رأى قوم العذاب فقالوا: هذا عارض ممطرنا».

وكان أبو بكر رضي الله عنه يمسك لسانه ويقول: «هذا أوردني الموارد». وقال يوماً لطائر: «ما أنعمك يا طائر! لا حساب ولا عذاب عليك، يا ليتني مثلك». وقال: «ليستني شجرة تعضد ثم تؤكل». وكذلك قال طلحة وأبو الدرداء وأبو ذر.

وكان عمر رضي الله عنه يسمع آية فيمرض فيعاد أياماً. وأخذ يوماً تبنة من أرض وقال: «يا ليتني كنت هذه التبنة! يا ليتني لم أك شيئاً مذكوراً! يا ليت أمي لم تلدني!». وكان في وجهه خطان أسودان من البكاء.

وقال عثمان رضي الله عنه: «وددت أني إذا مت لم أبعث». احنا بنتكلم يا جماعة، يعني الناس دي كلها، يعني عرف... يعني احنا عملنا ايه هم ما عملوهوش عشان احنا نبقى في الأمن ده؟ يعني إيه الطاعات اللي عندنا اللي عملناها فاحنا لا، احنا زي الفل؟ قال: «وددت أني إذا مت لم أبعث».

وقال علي رضي الله عنه يوم الجمل: «وددت أني مت قبل هذا بعشرين سنة».

وقال أبو عبيدة بن الجراح: وددت أني كنت كبشاً فذبحني أهلي فأكلوا لحمي وحسبوا مراقي. يا جماعة، الناس كلها مش عاوزة يبقى عليها حساب؛ يعني فكرة بس والله يا جماعة الفكرة دي لو قعدنا نتخيلها، فكرة إن احنا علينا حساب يوم القيامة، وهتقف للحظة ما انتش عارف أنت في جنة ولا في نار، لو بس ما فكرناش في أي حاجة غير الفكرة دي تنغص الحياة والله.

ولذلك جاء عن بعض السلف أنه قال: لو قيل لي يوم القيامة: تختار أن تعرف منزلك من الجنة أو النار، أو أن تكون رماداً لاخترت أن أكون رماداً. يعني لو تقال يوم القيامة كده، وأظن ده كان صحابي كمان، اتقال لي: ها، إيه رأيك بقى، عاوز تعرف أنت جنة ولا نار، ولا تصير رماداً؟ لا يا رب أكون رماداً.

وقال زيد بن وهب: ابن مسعود، يعني هذا الأثر جاءه وقال زيد بن وهب: ورأيتُه بكى، يعني ابن مسعود، حتى أخذ بكفه من دموعه، فقال به هكذا، يعني دموع كتير وقعت في إيديه لدرجة أنه يدلقها يرميها. وقال عمران بن حصين: يا ليتني رماد تذروه الرياح. وقالت عائشة: يا ليتني إذا مت كنت نسياً منسياً.

أما خوف التابعين ومن بعدهم فقال هُريْم بن حيان: وددت والله أني شجرة أكلتني ناقة فقذفتني بعراً ولم أكابد الحساب يوم القيامة، إنني أخاف الداهية الكبرى. وقال وكان علي بن الحسين إذا توضأ اصفر وتغير، فيقال له: ما لك؟ فيقول: تدرون بين يدي من أريد أن أقوم، ما لي أنا رايح وبين إيد ربنا! فكانت تتغير أحواله ويضطرب ويصفر لونه، يقولون: ما لك؟ فيقول: تدرون بين يدي من أريد أن أقوم؟

وقال عبيد الصيرفي: أتيت الحسن سنة ما خطاني يوم أن أتيته، ما خطاني يوم أن أتيه فما مر علي يوم خطاني أن أرى دموعه تتحاضر على لحيته؛ سنة كل يوم يروح للحسن ما فيش ليلة غير يلاقيه بيعيط. وقال مالك بن دينار: دخلت مع الحسن السوق فمر بالعطارين، فوجد تلك الرائحة فبكى ثم بكى ثم بكى حتى خفت أن يغشى عليه، ثم قال لي: يا مالك، والله ما هو إلا حلول القرار من الدارين جميعاً، الجنة أو النار، ليس ثم منزل ثالث، من أخطأته والله الرحمة صار إلى عذاب الله. ثم جعل يبكي فلم يلبث إلا يسيراً حتى مات.

وكان محمد بن واسع بكى عامة الليل لا يكاد يفتر. وقال مالك بن دينار: وددت أن الله تعالى يقول لي يوم القيامة: يا مالك، فأقول: لبيك، فيأذن لي أن أسجد بين يديه سجدة فأعرف أنه قد رضي عني، فيقول: يا مالك كن اليوم تراباً. وكان سعيد بن جبير يبكي الليل حتى عَمِس وفسدت عيناه، يعني ضعف بصره.

وقد روينا عن زرارة بن أوفى أنه صلى بأصحابه الغداة، صلى صلاة الصبح بهم، فلما قرأ: ﴿فَإِذَا نُقِرَ فِي النَّاقُورِ﴾ [المدثر: 8] خر ميتاً. وقال إراهيم بن عيسى اليشكري: نختار يعني بعض الآثار دخلت على رجل بالبحرين قد اعتزل الناس وتفرغ لنفسه، فذاكرته شيئاً من أمر الآخرة وذكر الموت، فجعل والله يشهر حق خرجتْ نفسه.

وهذا سمعناه، يعني يا جماعة، في السلف أن الناس تموت، تموت من إيه؟ سيدنا عمر رضي الله عنه كان يمرض من إيه؟ يمرض فإن نرى الموتى في من دون عمر، آه نشوف ده. وكان يزيد بن مرثد يبكي دائماً ويقول: إن الله قد تواعدني إن أنا عصيته أن يسجنني في النار، والله لو تواعدني أن يسجنني في الحمام لكتت حرياً ألا تجف لي عبرة. وقيل لعطاء السلمي: ما تشتهي؟ فبكى وقال: أشتهي والله أن أكون رماداً لا يجتمع منه ذرة في الدنيا ولا في الآخرة، وأشتهي أن أبكي حتى لا أقدر أن أبكي، وكان يبكي الليل والنهار تلك حالته. وقال داوود الطائي: لوددت أن أنجو من النار وأصير رماداً. يا جماعة يعني الناس دي مع عبادتها وولايتها يعني مش في دماغهم أن نخش جنة، هو بيقول بس أبقى رماد، أنا عاوز أبقى رماد في الآخرة بس.

نقف هنا. قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.