د. أحمد عبد المنعمالسلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم. احنا بفضل الله سبحانه وتعالى كنا انتهينا من سورة يوسف بإذن الله عز وجل. احنا نتوقف فترة كده فواصل، يعني دروس بتتكلم في قضايا تربوية، بحيث نناقش بعض الإشكاليات اللي بتمر بنا في الطريق إلى الله سبحانه وتعالى.
في طريق الالتزام كنا اتكلمنا عن بعض الإشكاليات في أكتر من درس؛ اتكلمنا في إشكالية اختيار السُّحبة قبل كده في درس، وإشكالية البناء المعرفي، وإن شاء الله نحاول نجمع مجموعة من الإشكالات اللي بتقابلنا. هنتكلم إن شاء الله قريبا، أسأل الله أن ييسر هذا الدرس، نتكلم عن إشكالية الجمع بين الدين والدنيا، ونطرق دي النهارده سريعا بس مش بنوع من التفصيل. النهارده عايزين نتكلم عن ممكن بقى مش عارف نسميه إشكالية أو معضلة؛ حلوة معضلة دي، ممكن نسميها تدين الواقع المعاصر اللي احنا عايشينه دلوقتي، سواء الأنماط بتاعته، أشكاله، أو الإشكاليات اللي بتقابل الشخص اللي عايز يتدين في الوقت الحالي.
لأن طبعا زي ما احنا عارفين إن كل فترة زمنية بتعدي بيحصل نوع من تغير الجو العام، وتغير الجو العام ده له أسباب كتير؛ يعني له أسباب تغيرات في الخطاب، تغيرات حياتية، تغيرات اقتصادية، بيتبع ده للأسف تغيرات في تدin الناس، طبيعة تدين الناس بتختلف. يعني مثلاً أحد الكتب؛ كتاب مشهور بالرغم من أن هو كتبه تقريبا سنة ألف وخمسة، كتب كتاب إسلام السوق، حاول يرصد فيه التغيرات اللي حصلت في نوعية تدين الناس في فترة الثمانينات والتسعينيات عن فترة ألفين، أو في أواخر يعني من بدايات التسعينات، وهو بدأ يلاحظ أن نوعية تدين الناس بدأت تكون مختلفة، وعمل دراسة وحاول يعني يجيب أمثلة أن حصل فيه تغيرات فعلا في نوع التدين أو في بعض الحاجات أنت ممكن مش شايف أن هي بتؤثر على ده. الغريب أن الكتاب لما اتطبع سنة ألف وخمسمائة وخمسة عشر، هو كتبه ألف وخمسة تقريبا، وترجم والدكتورة هبة رؤوف عزت قدمت له سنة ألف وخمسمائة وخمسة عشر وكأنها كانت بتسقط على الواقع عن ألف وخمسمائة وخمسة عشر من ألف وخمسة عشر سنين، بس هي شايفة أن الإشكاليات كانت ممتدة، بل إن الوضع كان أكثر سوءا.
حاول هو يلتقط أن التدين كان ماشي في اتجاه، وبعدين الوضع الاقتصادي العام ومفاهيم علمانية معينة أثرت حتى على الملتزمين، أو بالتعبير الذي يستعمله الإسلاميون أنفسهم، فغيروا نوع خطابهم. يعني كان زمان فيه خطاب حماسي معين بيتكلم في قضايا كبيرة، استعادة قضايا معينة حماسية، وجد أن الخطاب بدأ يتغير؛ مثلاً خطاب أنا بتكلم على الدعاة الذين يقدمون خطابا للناس، والذي على أساسه الناس بتتشكل على حسب الخطاب ده، وجدوا أن الخطاب نفسه اتغير؛ بدأ مثلاً خطاب دعوة إلى الاهتمام بالقضايا الإدارية أكثر، والتنظيم الإداري في شغلك العملي، والتدين الفردي، وتحقيق النجاح الدنيوي والتنمية البشرية والطبيب المسلم. يعني بدأ أن دي إيه هي الأفكار؟ مش بتكلم في صح وغلط، أنا بتكلمك عن نوعية خطاب ظهرت بكثرة، يعني ممكن يكون أصلاً تضخيم أي معنى من المعاني خطأ في الدين، لكن الفكرة أن بيلحظ أن في خطابات معينة بتسود في أوقات معينة، يعني في تعبيرات معينة بيكثر استعمالها، في مصطلحات معينة بيكثر من استعمالها، زي مثلاً -وإن كان إيه؟- هم للأسف شبعوا تريقة بتوع التنمية البشرية مثلاً، يعني فترة من الفترات دي كان الأمر الطاغي، شوية بدأ بيخفت نجمها وبيجي حاجة تانية؛ الجلسات مثلاً التأمل شوية، كل شوية بيطلع حاجة. الغريب أن الخطاب الديني بقى ممكن يتأثر بده أصلاً؛ لأن الخطاب الديني نفسه ممكن يتأثر بده، نمط الدين بتاع الناس بتغيير بده.
احنا عايزين نتكلم بقى عن الأنماط التدين المعاصر اللي احنا عايشينه. يعني الواحد لما ييجي يفتح الفيسبوك مثلاً ويقلب في الصفحات الشخصية بتاعة فيما يسمون بالملتزمين، ويقلب في التفاصيل؛ في طريقة الكلام، في الصور اللي بيستعملوها، في الألفاظ اللي بيستعملوها، في مشاريعهم الحياتية، في نظرتهم للحياة، في تقييمهم للأحداث (بيحصل أحداث معينة، أه أي حدث سياسي، اقتصادي، عالمي، ماتش كورة، ماتش مباراة، مصارعة، أيا كان)، شوف تعليقاتهم على الأحداث العالمية إزاي. هنتكلم على اللي هو المفروض أنه يسمى إسلامي أو ملتزم، يعني هو ده المفروض هو إيه تفريق أصلاً من كلمة مسلم وإسلامي؟ ليه ظهرت التفرقة دي؟ كان كتير من الكتاب ما بيحبش يستعمل التفرقة دي، وبيقول أن المفروض كل إسلامي هو مسلم، ما فيش تفرقة دي. كان الدكتور سامي عامري رفضوا التفرقة دي، وقال أن أول من عمل التفرقة دي الغرب.
لكن إيه التعريف؟ هم لما بيبحبوا حتى في الغرب يعرفوا في التقارير بتاعتهم إيه الفرق بين كلمة مسلم وبين كلمة إسلامي؟ عشان لو احنا استعملنا المصطلح ده كتير، يقول لك مسلم: اللي بيرتضي وبيقوم بالشعائر، يرتضى أن هو يعبد الله سبحانه وتعالى (يعني أيقن أن فيه إله وأن محمد صلى الله عليه وسلم رسوله)، بيقوم بالشعائر، بيصوم ويصلي ويحج، ده بيسموه مسلم. لكن اللي هيزود على ده، اللي هيزود على ده أنه عنده رؤية لإصلاح الواقع من خلال الدين، وأنه عايز يطبق تشريعات الدين في نواحي الحياة المختلفة، ده بيسموه إسلامي. تبادل هم آخر وله رؤية أخرى، أنه عايز ينقل الإسلام من واقع العبادات إلى واقع التشريعات والنواحي الحياتية، بيسموه إسلامي، اللي هو المفروض أن الدين أصلاً ما هو ده الدين أساساً، هو مين قال إن الدين هو يختزل في بعض الشعائر؟
فالشاهد نرجع بقى لكلامنا؛ انك تجد بعض هؤلاء بقى اللي بيتبنى أصلاً رؤية إصلاحية وكان بينافح فترة من الفترات، تلقى نوع من الخطاب الشرعي أو البناء العلمي، وبصوا في صفحاته لو أنت عايز تشوف (يعني أنا مش هقول لك اعمل بقى دراسة مجتمعية ولا الكلام ده)، أنت بص ده في نفسك، بص ده في صحابك، بص ده في نوعية الناس اللي المفروض أنهم بيتسموا ملتزمين؛ في أخلاقهم، في طريقة كلامهم، زي ما قلت حتى في الكوميكس اللي بيستعملوها، يعني حتى في ده، تجد أن حتى في رأيهم في قضايا شرعية (مش بقى مش مثلاً بيقدم رأيه في قضية دينية، في قضية سياسية واقتصادية، لأ)، انظر حتى وهو بيجي يقول رأيته في قضية شرعية، شوف تأثرات الشخص ده بالأطروحات الموجودة مثلاً، فده اللي احنا عايزين نبص نتكلم عنه النهارده؛ إيه الإشكاليات التي تواجه الإنسان الملتزم في الوقت المعاصر؟ أو الأول إيه الأنماط اللي احنا شايفينها قدامنا؟
يعني مثلاً عشان نتكلم كلام عملي، أنا مش همثل بقى دور باتريكا والكلام، ننزل بقى على أرض الواقع. يعني مثلاً فترة من الفترات ومش بعيدة، أواخر التسعينات مثلاً، أنا بتكلم على واقع أنا عشته؛ واقع الالتزام كان عبارة عن إيه؟ كان غالب الناس عبارة عن شاب بيكون في الجامعة أو في ثانوية عامة أو في منتصف الجامعة، في أول جامعة أو آخر الجامعة، المنطقة دي غالبا دي كانت بتبقى منطقة اللي بيحصل فيها نوع من الالتزام غالباً. وغالب اللي كان بيحصل أن الشاب أو الفتاة بتكون بعيدة عن ربنا تماماً، بيكون واقع ضايع بما تحويه كلمة ضايع تماماً، في كل شيء بقى؛ في أهدافه الحياتية، شخص مالوش أي طموح ديني، نظرته للحياة في قمة التفاهة، بيحزن على أشياء تافهة جداً، مش شاغل باله خالص بقضايا أمته تماماً، مش شاغل باله بأي حاجة؛ يعني مسألة قضايا بورما أو المسجد الأقصى، القضايا دي مش شغالاه لأنه هو مش منتمي لده، هو مشغول برضه كالعادة زي ما هو دلوقتي بماتشات كورة معينة في الدوري الإسباني، مش عارف إيه، مشغول بقضايا معينة ببعض الدراسة، أن هو عايز يخرج ويهيس ويتفسح ومش عارف إيه.
فشخص شاب بيكون في هذه الحالة عايش حياته بطول وعرض، صحابه قمة التهييص، الاختلاط (وكلمة اختلاط دي كلمة محترمة يعني اللي بيحصل) يعني اختلاط تام، رحلات فارغة دينياً، وممكن يكون ناجح دنيوياً أه، فارغة دينياً. وبعدين غالباً بيجي نقطة تحول في حياة الشخص ده؛ النقطة دي بسبب واحد صاحبه مات، بسبب حادثة ربنا نجاه منها، بسبب نور قذفه الله في قلبه، وقفة صدق وقفها مع نفسه واعتكاف، قدر لأنه دخل اعتكاف، الناس ضحكت عليه ودخلوه اعتكاف التراويح تهجد موسم رمضان يوم عرفة، أيا كان السبب أن هو بيحصل نقطة معينة في حياته أو في حياتها (ساتكلم على واقع الواحد عايشه، أتكلم أكثر عن الشباب).
فبيعمل ايه بقى اللي بيحصل؟ بيحس أن فيه نوع تعارض كبير مش صغير، ركزوا معي، ده يعني دي أهم نقطة في بداية درس النهارده بحيث إن في تعارض كبير بين الصورة الدينية التي تطرح من الدعاة؛ بيسمع مثلاً طرح هم الدين ونصرة الدين والسلف وزهد السلف وعبادة السلف، بييجي يسمع درس مثلاً الشيخ يعقوب أو للشيخ حسان ويسمع درس كبير أو في العلم للشيخ مصطفى العدوي أو الشيخ أبو إسحاق، ويسمع كلام يحس أنه ضخم، وبعدين بين واقع حياته يحس أن النقلة المطلوبة منه كبيرة قوي، تحس أن النقلة المطلوبة منه كبيرة، حاسس أن جزء كبير من حياته فيه تعارض مع الواقع، ده بيكون قدامه حل من اتنين (أنا بتكلم في الغالب، غالباً بيجي لنا واحد واثنين): أنه يأخذ هذه القفزة ويترك الشلة القديمة بالواقع القديم، ما عدش يطلع بقى الرحلات المختلطة ويرروحوا مثلاً يطلعوا الساحل الشمالي أو يطلعوا العين السخنة ولاد وبنات، ما حدش يعمل ده. طب صحابه ما بيروحوش غير أماكن كلها فيها معاصي فمش عارف يخرج معهم، فبيضطر يبحث عن صحبة بديلة، الصحبة البديلة موجودة في المسجد، نشاطات الصحبة الموجودة في المسجد مختلفة، فبيبدأ غصب عنه يحصل نوع من الاختلاف، هو مش متعمد المفصل يقول لك "اصل انتم بتنعزلوا عن المجتمع"، هو مش متعمد ده، هو عايز يطبق الحاجات اللي اتعلمها في الدين والواقع القديم كله بيستهزأ عليه بيتريق عليه، مش قادر يطبق المعاني اللي هو نفسه يعيشها معهم، حتى الشتايم (يعني مش قادر يكف أن هو يبطل) الناس بتتعامل بالشتايم بصورة طبيعية جداً، فبالتالي بيضطر أن هو حاجة من اتنين: يا إما ياخد القفزة دي وبتبقى صعبة فعلا وتقيلة عليه أنه ياخد النقلة دي، أو بيضعف، يقول لك "بص أنا مش هقدر، مش هقدر التزم".
فكان غالباً الحل ثنائي، هي كده، هي كده بنسبة كبيرة من اللي الواحد شافه في نفسه أو في الناس، بنسبة كبيرة يا بيقدر يقفز القفزة دي وبالفعل أن من الله عز وجل عليه بذلك، بيحصل تغير كبير في حياته، من أول الشكل الظاهر بتفاصيل هموم الدين. ده مش معناه أنهم لما انتقل (ودي نقطة خطيرة جداً)، مش معناه أنهم انتقل إلى واقع ملائكي، لا، ما هو الواقع التاني ده مجتمع بشري، اللي هو واقع الإسلاميين الملتزمين فيه كل حاجة لكن هي بنسب، فيه نفاق، وفيه كذب، وفيه حب شهرة، وفيه كبائر، وفيه، وفيه كل حاجة، يعني ما فيش مجتمع بيخلو من ده أصلاً. لكن بنسب المفروض تكون أقل مش ظاهرة، فيه ناس جيدة كتير بقى في المجتمع الآخر التاني، فيه ناس ضحت، فيه ناس بذلت، فيه ناس أنفقت أعمارها عشان تتعلم أحاديث النبي صلى الله عليه وسلم، فيه ناس بتبذل من وقتها ومن عمرها لله، مش عايزة أي حاجة من حد عشان تعلم الناس، فيه ناس كتير كويسة، فيه ناس كتير كويسة وفيه ناس مش قليلين مش كويسين موجودين برضه لأن ده المجتمع البشري. أنت لما تيجي تبص في مجتمع المدينة كان فيه كان فيه منافقين في عهد النبي صلى الله عليه وسلم، لكن النسب كانت قليلة، يعني حادثة الإفك حصلت فاههم لنفسك بس لكن النسب كانت قليلة.
ففكرة تصور مجتمع ملائكي أصلاً فاما تيجي تنتقد مجتمع ملتزم أو مجتمع إسلامي تقول "ده أنتم فيكم كذا"، ما هو طبيعي ولا سيما لما وركزوا في دي كمان لما تتسع رقعة الملتزمين، يعني لما يكون العدد كبير مع انتشار الكم دائماً غالباً بيحصل إشكاليات في الكيف، دي أشبه بسنة، دي سنة بشرية، غالباً لما يتسع الكم فلما حصل انتشار في بداية التسعينات والواقع انتشر وبدأ فيه ملتزمين كتير ده طبيعي أثر على الكم على الكيف أن بقت نوعية مش مش كل الناس بالنوعية دي، وبيدخل بقى إيه يعني من ليس فيهم، وبيحصل بعد كده ابتلاءات للتصفية وللتمحيص.
الشاهد أن ده كان النمط الغالب الموجود، أن الأخت مثلاً ممكن تشعر بنوع من أن هي كانت لبسها بعيد خالص عن ربنا فتنتقل إلى النقاب، ده كان ممكن بيحصل كتير فالنقلة بتبقى صدمة عليها، فيه ناس بتقع (يعني فيه ناس تيجي تاخد القفزة دي تقوم موقعة في النص ما تستحملش تقع) وظهر هنا مفهوم الانتكاس أنه بيجي يقفز مش قادر يقوم واقع، وفي ناس كانت بتقفز. الشاهد أن مفهوم الالتزام أو مفهوم التدين كان فيه وضوح؛ اتغير ولا ما اتغيرش؟ نقل ولا ما نقلش؟ أنا دلوقتي بقول لك توصيف، ده له فوائد وله سلبيات، الطريقة دي في الطرح في الخطاب أو في التدين كان لها فوائد أن هي كانت تطلع الملتزم ظاهر واضح أنه التزم نقلة لا تقل. النمط بقى اللي موجود دلوقتي، أنت مانتش عارف تشخصه، أنت تدخل صفحة الفيسبوك بتاعته أنت مانتش عارف ده إيه.
حاجة غريبة داخلة في بعضها من الشرق للغرب، حاجة متداخلة بصورة عجيبة جداً. وده هنتكلم عنه دلوقتي، فالنمط ده كان كلمة أن فلان التزم أو فلانة التزمت كلمة مش محتاجة شرح. لو سمحت، ما اسمحلكش تقول المصطلح ده! لأ عادي، ده مصطلح كان موجود وكان معروف.
يعني إيه؟ يعني ما عادش بيكلم بنات، ما عادش بيخرج في الأماكن اللي فيها فساد، ما عادش بيسمع الأغاني دي، ما عادش دي اهتماماته، بدأ يروح يحضر دروس. ده كان مفهوماً جداً، واضح إنه بدأ يتردد على مكان معين في مكتبات إسلامية، بدأ يشتري شراائط؛ لأن أياميها طبعاً كان في شراائط، بدأ... يعني بدأ ده طبيعي، ده كان بيحصل بنسبة ما يحدث الآن، مش كده؟
بنسبة كبيرة، إيه اللي بيحصل؟ إن ما عادش بيطرح عليه أنه ينقل نقلة كبيرة. يعني نفس الشاب في الجامعة -يعني البداية واحدة- الشاب في الجامعة الضايع، الضياع زاد. يعني اللي احنا كنا بنقول عليه بيوصل لمرحلة الصياعة مثلاً أو الضياع في تالتة جامعة، ده بيوصل لها في تالتة إعدادي دلوقتي.
الشبهات اللي كان بيسألها اللي عنده تلاتين سنة، دلوقتي بيسألها اللي عنده تمانتاشر سنة، ده بدون مبالغة. يعني الإلحاد، ممكن تلاقي شاب في تالتة إعدادي يقول لك: أنا عندي أسئلة في قضية الإلحاد. أنت بتستغرب، أنت فاهم أصلاً؟ يعني أنت صعب جداً أن أنت يتشرح لك الإشكال.
كان عجبني دكتور حسام حامد من اللي بيردوا على الحاجات، كان كتب مقالة في مسألة تسمم الصغار؛ الأم اللي بتسيب مثلاً مواد كيميائية في البيت زي كلوركس أو كده والطفل يشربها، فيحصل له إشكال في المريء صعب علاجه. فبيقول: أهو ده أشبه؛ بعض الأطفال بيتعرضوا لفيديوهات يوتيوب بتشككهم في دينهم، ما تعرفش تعمل له حاجة! طفل بيتعرض لإشكاليات عجيبة جداً. فالواقع بقى ازداد سوءاً، أصلاً قلة الدين المطروح على الناس، الفساد بقى صعب جداً، الإلحاد انتشر، شبهات الشهوة بقت سهل تحصيلها. يعني زمان كان ممكن واحد عشان يتعرف على واحدة قبل فيسبوك أو كده، كانت الطرق التقليدية بقى أنه قصة طويلة عشان يتعرف على واحدة في الجامعة، بيتعب.
دلوقتي الأمر... يعني بقى بالمجموعة، ما عادش... يعني الأمر بقى سهل جداً، ومن خلال طبعاً وسائل التواصل ديت فسهلت الأمر جداً. فلتخيل بقى حالة الفساد زادت، قصادها بقى الطرح الديني اللي بيطرح مش بنفس القوة بتاعة أنه بتطلب منه أنه ينقل. لأ، ما عادش حد الطرح أنه ينقل النقلة الكبيرة دي، بقا ده اسمه الطرح المتشدد للخطاب السلفي المعاصر القاصر اللي مش فاهم، ليه فيه شوية شتايم كده؟ اللي هو احنا بنتشتم كتير يعني. طيب، هو بيطلب إيه؟
بقى الصورة اللي موجودة أن في شخص اللي موجود في حالة الضياع ده، والصورة الكويسة اللي أنت عايز تنقلها له، وبيبقى فيه درجات كتير بينهم. الشخص صعب إنه ينتقل النقلة دي، بقى قدامه متاح يقف هنا في درجة عشرة أو خمستاشر أو عشرين أو تلاتين. طب ما ده كويس! طب ما ده ممكن يقدم حاجة كويسة، أن بدل ما كان يا إما ينط القفزة دي أو ما يلتزمش، بقى في فرصة أن هو يقف في منطقة في الدين، ده... ده حاجة كويسة نعم، ده من محاسن الإشكال الطرح ده، ودي من إشكاليات الطرح القديم.
أمال إيه مفاسده بقى؟ مفاسده أنه بنسبة كبيرة عموم الناس أصلاً ما عندهاش علو همة. عموم الناس أصلاً بتحتاج خطاب عالي عشان تعمل نصه، وعلى فكرة دي غالباً طريقة القرآن والسنة. يعني زي ما طريقة القرآن والسنة اعتمدت خطاب مناسب للجميع، استعملت خطاب عالي جداً. وإلا كنا هننهى الناس عن قراءة القرآن؟ يعني ما تيجي تقرأ: ﴿أَمَّنْ هُوَ قَانِتٌ آنَاءَ اللَّيْلِ سَاجِدًا وَقَائِمًا﴾ [الزمر: 9]، يعني أما تيجي تقرأ: ﴿كَانُوا قَلِيلًا مِّنَ اللَّيْلِ مَا يَهْجَعُونَ﴾ [الذاريات: 17]. بتقول: إيه ده؟ هو القرآن ليه بيتكلم عن القيام بصورة عالية كده؟ ما يقولوا يصلوا الوتر وخلاص! السنة فيها كده: «أفلح إن صدق». لكن في اختبارات عالية، كان في خطابات جادت في القرن السني عالية جداً؛ لأن النفس أصلاً بتحتاج... عارف زي اللي بيقول لك: اللي داخل يجيب امتياز بيجيب جيد جداً، واللي داخل يجيب جيد جداً بيجيب جيد، واللي يقول لك: أنا داخل أنجح بس، بيعمل إيه؟ بيشيل مادتين، ده أقل حاجة؛ لأن غالب النفس دايماً بتميل للاسترخاء، بتميل للكسل.
فأنت لما أصلاً بتققدم خطاب منبطح، خايف تعلي همة الناس، بتتكلم فعموم الناس عايز يفضل في منطقة معينة مع التداخل، اختلاف بقى الفتاوى الكبير خلى فيه حالة الناس ما عادش واثقة في حاجة. كل حاجة بقى عايزين يقولوا فيها خلاف، يعني تلاقي أخت تقلع النقاب، ليه؟ تقول لك: أصل طلع فيه خلاف. هو إيه علاقة أن النقاب طلع فيه خلاف أن النفس يقلع النقاب؟ يعني كلمة فيه خلاف ده مش دليل في حد ذاته.
ولو أنا سألت شيخ أو عالم أنا باثق في دينه على صلاة الجماعة فقال لي: صلاة الجماعة واجبة. وأنا تدينت بده وعرفت بعد كده أن صلاة الجماعة طلع فيها خلاف، لا يحل لي أن أنا أترك صلاة الجماعة. لأ، هي تظل عندي واجبة إلى أن يتبين لي أن فلان الأعلم -مش الأسهل، مش الأريح- فلان الأعلم وسألته قال لي المسألة دي. لأ، دي ومش يقول لي في خلاف، ما هو برضه لما يقول لي فيه خلاف، زي ما قال الشاطبي، هو كده بيخيرنا أتبع هوايا. لأ، يقول لي الحكم كذا، حكم المسألة بالنسبة لك، الفتوى بالنسبة لك دي مستحبة، مش أن أنا عرفت من الاقتراحات أن كذا.
وطبعاَ موضة خلع النقاب كتير للأسف الفترة دي، بقت أزمة، التعامل حتى الإسلاميين مع القضية ديت في... يعني أظن يعني في بعض الاشكاليات أنه يقول لك: إيه؟ النقاب عادي، أنا باخد بقول إنه مستحب، هو بيقول يعني: أنا باخد بالقول المستحب، وده قول معتبر. فبالتالي بما أن النقاب مستحب، نقيسه على سنة المغرب، ما هي مستحبة، دي نافلة ودي نافلة، اللي تارك سنة المغرب أو اللي تارك الوتر زيه زي اللي خلعت النقاب؟ لأ طبعاً، ده قياس مع الفارق جداً! شعيرة ظاهرة تحارب عالمياً، هو الوتر بيحارب عالمياً؟ دي شعيرة تحارب عالمياً، دي تمنع في دول، دي تجاهد مجاهدة غير عادية عشان تعملها دلوقتي.
أنا كمية الأسئلة في أخوات بيبعتوا يسألوا كتير من الدعاة في وفي اللي عايشين في الغرب على الأذى اللي بيتعرضوا له المنقبات، وخاصة في أوروبا أكتر من أمريكا، ولا سيما في فرنسا وألمانيا، كمية الأذى اللي بيتعرضوا له منقبات بسبب النقاب أذى غير عادي. المحافظة على هذه الشعيرة في هذا الوقت ما ينفعش تقيسها على الوتر، ده قياس خاطئ تماماً. ده مش معناه أن أخت تعرضت لأذى وهي بتهرب الاستحباب تخلعه، دي مش دي القضية، أنا بتكلم على الطرح العام، ده معناه أن في الآخر الناس: لن يبقى لنا شعيرة، وأي حاجة نتأذى بسببها نسيبها.
واللي مش فاهم فكرة الحرب على النقاب والحرب على الحجاب عموماً دلوقتي وشايف وبيدرس المسألة في الكتاب، وده خطورة أن اللي بيتعامل مع الدين اللي في الكتاب غير الدين اللي في الواقع؛ يعني يفتح كتاب الفقه يقول لك: يا جماعة أنتم مضخمين الموضوع ليه؟ هم السلفيين المعاصرين كده، كل حاجة ضخمة، النقاب أهو واخد صفحة ونص في الكتاب وفيها خلاف، والامر بسيط، ما تكبروش الموضوع، اتتنقبت ولا ما اتتنقبتش يعني هو وشها ده لما يتغطى هو اللي هيحل الأزمة؟
فهما فيهم نوع من القصور، عامل بالظبط زي اللي يجي يقول لك: مسألة القرآن مخلوق ولا مش مخلوق؟ ما هي صفحة أهى في كتاب العقيدة، أنتم ليه... ليه عاملين الإمام أحمد بن حنبل بطل؟ الإمام مش مخلوق، القرآن مش مخلوق أهو، أنا بطل أهو زيه. لأ، أنت روح قلها أياميها: القرآن مش مخلوق! حضرتك ارجع كده وقل لهم كده: أنا أرى أن القرآن مش... بيشوف كان هيتعمل فيك إيه مع الإمام أحمد وابن حنبل؟ فأنت حسب الواقع هي المسألة بتختلف حسب واقعها.
ممكن واحد يقول إيه؟ ما أنتم ضخمتوا مسألة القرآن مخلوق ولا مش مخلوق؟ إيه الموضوع؟ القرآن مخلوق ولا مش مخلوق؟ أهو خلاص، القرآن كلام الله مش مخلوق، أهو حد ما حدش عمل لي حاجة أهو. أيوا، ما هو حضرتك دلوقتي السياق الهجمة العالمية مش على ده دلوقتي، هم بيتبدؤوا يحددوا هيهجم على إيه في الدين، عايز يهدم إيه في الدين دلوقتي؟ فقضية المرأة قضية شغلاهم من زمان؛ ظهور الحركات النسوية في الغرب وامتدادها هنا من أربعة وتسعين أول مؤتمر ما اتعمل هنا، ده قضية كبيرة عندهم. حجاب المرأة ده ملفه، إزاي ننازع حجاب المرأة؟ ده ملف كبير، أنت مش مستوعب ده! خلاص، ما تصدرش الخطاب ده للعامة.
المهم، نرجع للنقطة اللي كنت بتكلم فيها، مسألة أن الدرجات اللي التدين دلوقتي بقت واسعة جداً، ما بقيتش تعرف، بتلاقي الشخص كل حاجة يقول لك: إيه؟ ركز بقى معي، قلنا النموذج الأولاني الشاب الضايع اللي اتقال له: وعدك على القهوة حرام، سفريات مع البنات المختلطة حرام، الأغاني وجو عمراوي وطمراوي والجو ده حرام، ومش عارف إيه، فهو بيتفاجئ أن حاجات كتير عايشها حرام، فبينقل، يلاقي القفزة صعبة، يستعين بالله ويقفز القفزة دي، بيتغير.
ما بيقدرش، يقوم مراية دلوقتي بيتقال له: الأغاني فيها خلاف، وقعدتك على القهوة أنت مش لازم تغير منكر، فيه خلاف، النظر للمرأة بدون شهوة فيها خلاف، العادة السرية فيها خلاف. تخيل لما يتقال لشاب فيه فارق بين كل مسألة من اللي أنا قلتها دي في صفحة لوحدها في كتاب منفصل عن بعضها، وبين أن أنا أجمع الصفحات دي وأحطها في آدم حي قدامي، هو لم يبقى له من دينه شيء أصلاً!
يعني الشخص ده اللي أنت بتدي له الفتاوى دي، هو أصلاً متعلم تعليم علماني، وهو أصلاً ما درسش حاجة في الدين، هو في تانية جامعة ومش عارف القصر والجمع في الصلاة أصلاً، يعني هو مش عارف أحكام الفريضة الأولى بعد الشهادتين، الركن الأول بعد الشهادتين العملي، هو مش عارفه. أنت لما تروح لشاب زي دي ويجي يسأل في واقع الفيسبوك المليء بالفتن، ويتقال له مجموعة الفتاوى دي، فيحس: طب وأنا ألتزم ليه؟ ده أنا كويس، يعني هو أنا إيه اللي... يعني إيه الإشكال؟ يعني فين اللي أنا بعمله غلط؟ فيحس إنه مش محتاج يتغير، طيب ما أعملش أي حاجة.
فيتقال له: لأ، أنت محتاج تعمل حاجة في الدنيا. أعمل إيه؟ إيه رأيك تتعلم بعض المعارف، تحضر بعض الدورات اللي تفيدك في الدين؟ فيبدأ يدخل نوع من التدين المعرفي، وحياته زي ما هي -خد بالك- حياة الشهوات والواقع وزي ما هي تماماً ما بيتغيرش، وبدأ يحضر حاجات معرفية ممكن ياخد جزء من الفقه وجزء من علم الكلام وجزء من فلسفة، وياخد حاجات في الاقتصاد، فبدأ نوع من التدوير المعرفي. بس حاسس بنوع من الخواء الروحي؛ ما هو حياته مليئة بالمعاصي، والقلب المعلومات لوحدهم مش كفاية للقلب، يعني اتغزى معلوماتياً، ده مش هيغذي القلب. الخواء الروحي ده محتاج يسده بنوع من حالة من التصوف بقى شوية، شوية قصائد في المديح وشال أخضر، وفكرة القبور بقى بدأت تظهر ونروح عند القبر ونصورو...
الكلام ده كان بيحصل مع الكبار، الغريبة أن الفترة دي بدأ ينتشر وسط الشباب والبنات: مدد، سيدنا ومولانا، وبدأت إيه؟ القصة دي تبقى موجودة بنسبة كبيرة في الفترات المتأخرة؛ لأنه محتاج يسد الخواء ده. فبدأ محتاج قسط من التصوف اللي ممكن بيسموه إيه؟ نوع من الفلكلور، يعني اللي هو إيه: تدين كده في طقوس أصلاً معينة، مش مثلاً بيتبنى قضايا عقدية، لأ، بيبقى نوع من أن هو بيحتاج يسد ده.
هل كله كده؟ لأ، مش كله كده، لكن ده نمط موجود؛ أن بدأ النقلة بتاعته هو تدين معرفي، معارف مع بعض التصوف، حياته ما فيش فيها تغيير، ما دخلش في صراع مع الباطل، ما حملش هم هذا الدين. هو ده أنا، هو إيه القضية أصلاً في التصور العلماني؟ هو التصور العلماني عايز إسلام بدون مخالب، يعني عايز إسلام مغلق؛ يعني التصور العلماني عايز إسلام زيه زي بقية الأديان دلوقتي، ينفع نحبسه في مكان وفي زمان معين، يعني نعرف نحبس الإسلام في رمضان والحج وفي مسجد وبيت. لو عرفنا نعمل كده، خلاص، احنا موافقين على الإسلام.
الغرب دلوقتي بيتكلم على إيه؟ بيتكلم على تغيير نصوص الدين، بتكلم على أن في نصوص في الدين في القرآن لازم نغيّرها لدرجة أن كنت بأسمع أحد المحاضرين بيقول إنه شاف... اه، شاكر فين؟ في فرنسا ولا في اجتماع مطالبة أظن فرنسا. تغيير، في فرنسا فعلاً، تغيير آيات القرآن، أن في آيات في القرآن لازم تتشال. فقام اللي اعتراض عليهم واحد يهودي، قال لهم: يا جماعة، أنا ما أرضاش ده بكتابي، إيه نعم أنا كتابي الدنيا ضايع بس ما قلش كده، بس أنا ما أرضاش ده. فاحنا ما ينفعش نرضي غير المسلمين، ما ينفعش نقول للمسلمين: غيروا آيات من كتابكم أو شيلوا آيات من كتابكم وهم مش هيرضوه. طب نعمل إيه؟ لا، نغيّر تفسير الآية، احنا ممكن نلعب.
في تأويل الآيات دي احنا عملناها قبل كده وبنعرف نعملها، دي بتاعتنا. سيبوا لو قلت له غير الآيات هيمسك في المصحف، مش هنغير حاجة. لا لا، قل له مصحفك زي ما هو، احنا هنشرح لك الآيات دي بشرح معاصر مناسب للواقع دلوقتي؛ لأن أنت جاهل ومش.
احنا هنفهمك، وده يعني إن شاء الله ربنا ييسر بتصوير سلسلة كده وضمنها درس في معركة النص بيتكلم في دي، ازاي اليهود بيعملوا كده عملوا كده، وازاي المعاصرين بيعملوا كده؟ فالخلاصة إن بينشأ شخص التدين مش عامل له أزمة؛ يعني التدين ما عملوش إشكال في حياته، ما عملوش صراع مع نفسه مع شهواته، صراع مع مجتمعه، صراع مع الباطل، ما شلش هموم.
وفي نفس الوقت حَسّوه إنه بيزداد معارف، وإن أنت جاهل وهو أنا بزداد في المعرفة، وفي نفس الوقت بحاول أغطي نوع من الخواء الروحي اللي عندي، التدين ده بدأ ينتشر اللي هو التدين بدون تبعات. أنت ما بتحملش تبعات معينة، ولا حتى تبعات إنك تتخلص من واقعك القديم، وبدأ لأسف بقى التدين الصورة دي تهاجم الصورة اللي أنا كنت بكلمك عنها اللي هي فيها أخطاء أكيد، اللي أنا بدأت بها.
بدأ يهاجم ويقول أنتم بتقدموا تدين متشدد، أنتم بتعملوا انعزال عن المجتمع، بتعملوا مسجد بتاعكم اسمه مسجد الإخوة، أنتم بتعملوا مفاصلة. فانت تقول له ما هو أحياناً ده بيحصل اضطراري مش اختياري، أنا بعمل ده غصب عني؛ لأن أنا لما جيت أختار صحبة معينة اخترت الصحبة اللي بتختار نفس اختياراتي. أنا مش عايز أسمع، مش عايز أروح أحضر الحفل.
البلد دي مش عايز أخلّي بنتي تطلع الرحلة المختلطة دي، فبالتالي أنا مش مش عايز أبقى وسط أقعد على القهوة دي، مش عايز، وفي نفس الوقت أنا بني آدم عايز أخرج، عايز يبقى لي ناس أتكلم معهم، الإنسان سُمّي إنساناً لأنه يأنس. فبيبحث عن صحبة أخرى، فبالتالي فعلاً بيترك صحبة قديمة وينطلق لصحبته جديدة. هي الأخت مش عايزة الواقع ده، هي برضه هي ممكن تفتن، هي امرأة وعايزة تظهر جمالها لما تشوف كل اللي حواليها بيتفننوا في إظهار جمالهم وبيتفننوا في لبس الموضة وهي لابسة اللبس ده سواء.
خمار أو نقاب وما فيهوش في الموضة، حتى الدكتورة هبة رؤوف اتكلمت على حجاب الموضة اللي بدأ يحصل تفاخر حتى عند المحجبات نفسه أنفسهن، هي بتتعرض لضغط نفسي، فخلاص كفاية ضغط، تروح تشوف حد بيدعمها، حد يعني بيثبتها. أنت بتشوف معك حد على الطريق بتثبت، ظهور التدين ده للأسف اللي هو بدأ ينتشر، بدأ يخلي إن الهم الرسالي يفقد؛ يعني ما عادش الإنسان بيلتزم صاحب رسالة، لا، هو الدين عبارة عن إيه؟ عن حياتي اترسمت كده بصورة معينة وسكنت جوة حياتي بعض الحاجات.
مش تغيير القرآن لما نزل على الصحابة عمل نقلة عمل تغيير، القرآن نزل على واقع الصحابة، هتقول لي أنت بتشبهنا بالواقع الجاهلي، أنت هتعمل زي مش عارف سيد قطب، يا عم أنا ما تدخلنيش في حيطة أبوس إيدك، أنا ما بقولكش كده، أنا بقول لك القرآن. تغيير في واقع الصحابة، فانت القرآن لما ينزل عليك لازم يعمل تغيير، ما ينفعش تفضل زي ما أنت؛ يعني مستحيل مستحيل تبقى حياتك بهذا العبث والتفاهة. كتير كتير شفت كتير من الملتزمين.
بيتكلم على الدوري الإسباني وشجّع، واسمهم إيه الدوري التاني ده لبطولة أوروبا دي اسمها دوري الأبطال أبطال الدوري الإسباني، إسبانيا دي يا جماعة كانت الأندلس دي أرضنا أخدتها، بيشجعوا أو بيشجعوا. عشان يفضلوا هم تافهين واحنا ننتصر، يفضلوا هم يلعبوا كورة واحنا، فانت بتستغرب أنت أنت فاهم يعني إيه أنك تشجع إسبانيا؟ أنت فاهم ده موقف ذكرته في إحدى المحاضرات شفته في التليفزيون.
يعني أثار في يعني يعني إيه معاني خلت الواحد يبدأ إن شاء الله يتكلم في سلسلة إن شاء الله بإذن الله نحضرها قريبة، نتكلم عن هوية. كنت بزور أحد أقربائي وكان في برنامج شغال. اسمه العباقرة، ده برنامج شبيه بزي إيه؟ صورة حديثة شوية من زي أوائل الطلبة اللي كانت موجودة، يجيبوا طلبة من مدارس ثانوي تقريبا أو إعدادي مش فاكر.
هم طلبة يعني مدارس، وبيسألوه مسائل ثقافية متنوعة، واللي بيجاوب بياخد درجات وبيكسب، وحاجة كويسة بتنمي روح الإيه؟ الثقافة قراءة، وده كان شيء جميل فعلاً، أحسن من الحاجة تبقى هايفة، أحسن ما يخلوا العيال تتهيف يعني.
فالمهم قعدت شفت البتاع، كان فريق من قنا تقريبا بيلاعب فريق من إسكندرية، أنا لما سألت بعض إخوة إسكندرية على المدرسة دي مش عارف اسمها تقريبا ولا قالوا لي دي إسلامية، فانا استغربت إن هي لأن أنا شفت الفريق بتاع إسكندرية هو الفرق لازم ولدين وبنتين، أصروا دائماً. العنصر النسائي ولدين وبنتين، فريق الإسكندرية ولدين وبنتين، البنتين مش محجبات خالص، وللما البنت بتجاوب سؤال صح بايه؟ بتسلم الولد كده هاي فايف، اه معانا الأخ معانا الأبديت على طول جاهز معانا.
كامل، اه، يبقى الحقني كده على طول، اه عاملين إيه؟ هاي فايف، خلاص، الفريق بتاع قنا اسم المدرسة إيه الدعوة الإسلامية؟ انبسطت جداً طبعا، وطبعا كنت بكل الحماس فعلاً غصب عني فعلاً والله سبحان الله! لقيت نفسي تلقائياً. متعصب اه شجعت إيه؟ فجأة دخلت جوة المود، وقعدت فين ومن بعيد شف الأسئلة مش عارف سألت الفريق اللي سحب سؤال فريق الدعوة الإسلامية رقصة مشهورة في مش عارف في ألمانيا رقصة شعبية.
مش عارفين، مش عارف شوية أسئلة في الثقافة والفنون وكلام فارغ كده، المهم إيه؟ وتسأل دي وتسأل لغاية لما جه سؤال فارق، أحد الأسئلة اللي صدمتني إن فريق الدعوة الإسلامية مش عارف يجيبها. المذيع بيقول لهم سقوط الإمبراطورية، خد بالك من التعبير العثمانية سنة كام؟ ده سؤال، والاتفاقية اللي على أساسها تم توزيع الإمبراطورية العثمانية كان اسمها إيه اللي بالقسم اتنين اسمها إيه؟ ما عرفوش. أنا اتصدمت، أولاً هي مش إمبراطورية، ده تاريخنا، دي خلافة عثمانية.
مش عارفين سايكس بيكو اللي قسمت المسلمين، مش عارفين ألف تسعمية أربعة وعشرين اللي عملوها أتاتوركي، مش عارفين، مش عارفين تاريخنا، مش عارفين هويتنا، مش عارفين ماضينا ومش عارفين تاريخنا. ما جاوبوش السؤال، لا دول طبعا ولا إسكندرية، بتوع اللايف ما جاوبوش. اه السؤال بقى اللي اللي كان لو جاوبوه كسبوا كسبوا فعلا الدعوة الإسلامية، وأنا ما بقتش عارف أفرح إن هم كسبوا ولا أزعل، وفريق الدعوة الإسلامية هو اللي كسب، سأل سؤال بيقول.
بطولة أبطال اللي هو بتاع أوروبا ده الفين وسبعتاشر كان بين مين ومين ومين اللي كسب؟ الولد مش قال له بص كان فلان وفلان والنتيجة أربعة واحد، واللي جاب الأجوان ده فلان وفلان وفلان، واللي جاب الجون فلان. بدون تردد بص أنا اتصدمت وكسبوا، وفريق الدعوة الإسلامية كسب، أنا مش عارف أفرح إن الدعوة الإسلامية كسبت! هي دي الدعوة الإسلامية دلوقتي يعني ده نموذج إيه ده! هو عارف دوري الأبطال الالفين وسبعتاشر مين كان بيلعب قصاد مين؟ الأبطال دول اللي هم أوروبا اللي المفروض جزء من البلاد دي لا كانت إسلامية أصلاً واحنا عايزين نستردها.
واللي يقرأ من المؤرخين المعاصرين الدكتور فتحي زغروت له كتاب كتاب اسمه النوازل الكبرى في التاريخ الإسلامي كتاب ضخم كده كتاب مؤلم خمس أحداث ضخمة في التاريخ الإسلامي مؤلمة. منها سقوط الأندلس وسقوط الخلافة العثمانية وسقوط الدولة العباسية واجتياح التتار، وحادثة الردة ارتداد الناس بعد موت النبي صلى الله عليه وسلم، أحداث ضخمة تقرأ الكتاب تبكي، شف سقوط الأندلس حينما تقرأ سقوط الأندلس تعايش.
ماذا فعلت إسبانيا في المسلمين؟ احنا المفروض لما ييجي أصلاً التاريخ ده نتألم، العجيب أن كتير بيشجع ويناضل. إيه اللي حرام وممكن اللي بيجادلك بيمتلك أدوات ثقافية ومعرفية ودينية أكتر منك، وأنت بفطرتك بتقولهم يا جماعة ما ينفعش، أنت لسة ملتزم جديد؟ ما ينفعش، يقول لك لأ أنت جاهل.
أنت جاهل، لا ده ده ما فيش المسألة ديت مش عارف إيه وتحليلات والأمر يعدي. لا طبعا، ازاي والسينما كتير من الملتزمين بدأ يروح سينما، إيه ده! يقول لك الأول أصل بيشوف أفلام كارتون، وبعد كده فيلم الكارتون ده فيلم هادف والفيلم الهادف.
الأنماط دي ما كانتش موجودة، هل كل اللي فات غلط؟ يعني هل كل يعني هل ده أنت شايف إن كل اللي فات غلط وأن خلاص نوصل؟ عجبني كلمة دكتورة هبة بتقدم الكتاب بتاع إسلام السوق تقول لي لو عايزة. ألخص بها الفكرة المحورية من كتاب قالت كلمة، السلسلة بقى نزلت بعدها الترجمة اللي هي تبنتها، قالت السيولة، لفظ السيولة نستعمله دوماً بعد كده في السلسلة بتاعتها الكبيرة، كل حاجة السائل حاجة السائل.
حدث سائل والحب السائل والمراقبة السائلة عملت سلسلة، فبتقول السيولة بمعنى أن ما عادش فيه كتلة صلبة كبيرة الملتزم ينتمي لها أول لما يلتزم ما عادش فيه كتلة صلبة أنا التزمت فانتميت، وده اتكسر، وده ممكن يكون كان غلط. وجود الكتل بهذه الطريقة، وما عادش فيه مفاهيم صلبة أصلاً اللي بيلتزم بيتبناها، بقت الدنيا عايمة؛ يعني ما عادش فيه مفهوم ضخم كده أنت لما تلتزم تتبنى المفاهيم دي، أمَّال بتتبنى إيه؟ اللي بيقابلك.
وبتبقى خليط؛ يعني خليط بتحزن لهزيمة برشلونة مثلاً وتزعل على المسجد الأقصى، يعني بدأت يبقى الإنسان بداخله إيه؟ خليط كده من المشاعر، هو مش ما لوش مش صاحب هوية معينة. لا ظاهرياً ولا داخلياً، هو زي ما قلت كده بيبقى عنده نوع من ده ده النشيط التدين المعرفي وبعض الإيه التصوف وانتشار بقى زي ما قلت قصائد المديح والقبور والاستغاثة.
وده انتشرت بكثرة، ده شيء عجيب جداً، هو السؤال: طب ليه ما يرجعش لكتاب الله المحفوظ بين أيدينا ويشوف القضايا الأساسية وأبعد عن الإشكاليات دي ويبني نفسه من خلال نصوص القرآن والسنة؟ يعني ليه هو أنت عندك معاني محورية نزلت على الصحابة طالبتهم بها. لقضية التوحيد ورفع هذه القضية قضية الإصلاح الأمر بالمعروف والنهي عن المنكر، أنك أنت تتبنى هذا الدين، مسئولية الدين، نقول هذه سبيلي أدعو إلى الله زي ما شرحنا في خواتيم سورة يوسف.
ليه ما تعملش كده؟ ليه شاغل بالك بالخلافات؟ ودي من الإشكاليات اللي موجودة دلوقتي في التداول المعاصر، كمية الخلاف الرهيبة اللي موجودة بين النخب، ما هو إيه اللي حصل؟ اللي حصل يمكن في كتل صلبة كبيرة. اتقسمت لمجموعات وفتافيت صغيرة كتير، كل مجموعة في حد بيوجهها، وده خلى على الساحة وخاصة على مواقع التواصل إن اللي بيوجهه كتير قوي، بقيت تسمع أسماء كتير جداً، فين واحد زيي يتكلم أصلاً كان زمان هو أعداد قليلة.
دلوقتي اللي كتير، كل واحد يقدم طرح ويقدم رؤية، هؤلاء كتير منهم ناس مخلصين بيبذلوا يبذلوا من أعمارهم وأوقاتهم وأموالهم لنصرة الدين، الواحد شاف جهد بعض الكوادر اجتهاد رائع، يعني الواحد بيحتقر نفسه أمام جهده حقيقة. وكل ما الواحد بيشوف جهود بعض هؤلاء لأن هو حس الشخص المخلص ده -أنا أحسبه كذلك- صاحب الهمَّ ده حس أن زمان كان فيه يعني كتلة كبيرة بتشيل عنه، هو دلوقتي حس أن الدين السقف نزل على دماغه، هو اللي لازم يشيل، حس المسؤولية فبدأ يجري لوحده، فتخيل شخص شغال بنّاء ومناوِل.
بيعمل كل حاجة لوحده، بيعلم نفسه، يربي نفسه، يبني نفسه علمياً، يبني نفسه ثقافياً، بيحاول يشتغل عشان يأكل من عمل يده، أزمة لقى نفسه أزمة ومطالب إنه يعمل كده، بيشتغل في نوع من التوجيه، حاول يقدم توجيه عام. ففعلاً طاحنين نفسهم، لكن الخلافات الشرسة وعدم وجود نقاط مشتركة نتفق عليها، واختيار دايماً الحل الأسهل الهدم، الطائفة دي لازم تتهدم والطائفة دي لازم عشان نشتغل على نظافة. ما هو طب حضرتك بعد ما تهدها، عندك القدرة إنك تبني على نظافة؟ لا لا، ما هو هيجي غيري أبني، طب ما هو حضرتك أنت.
لما تهد اللي موجود ده، غيرك مش هو اللي هيبني، يعني مكان اللي أنت بنيته ده هيتبنى بيت من بيوت الإلحاد، يعني اللي أنت هديته ده هيبنوا مكانه شهوات، مش هيتبنى مكانه دين. أسباب العيش في بيت واتكسر وفي إشكاليات، يقول لك الحل إن احنا نهد ونبني، معاك القدرة على البناء؟ لأ ما عنديش، طب وهتهد وأنا أقعد في الشارع اختيار حل دلوقتي.
الهدم، ودَمُّ زيني، والله أعلى وأعلم. أحد التحليل النفسية اللي الواحد حاسسها دائماً في أوقات الاستضعاف والهزيمة واليأس وأزمات اقتصادية، الناس بتبقى جواها طاقة غضبية كبيرة جداً، وعايزة تطلع الطاقة دي في حد، فأول ما بتلاقي حد يعمل مشكلة أنت اللي ضيعتنا، أنا اللي ضيعتكم؛ يعني لو أنا انتحرت الدنيا تتصلح. إيه التيار ده هو اللي.
أنتم اللي دمرتونا، احنا يعني إن هو جواه طاقة هو عنده وجواه مديون، فالطاقة دي بيطلعها في اللي يقدر يطلعها فيه، يقدر يطلعها في مين؟ في أخوه الغلبان اللي زيُّه المستضعف، ما احنا الاتنين في نفس المنطقة، الغلابة. فيطلعها في صاحبه.
اللي هو اللي شغال زيُّه، اللي هو اللي طالع عينه زيُّه وعنده أخطاء وهو عنده أخطاء، فانا جوايا طاقة غضبية أطلعها في ده، أنت اللي غلطان. وهو بيبقى غلطان فعلاً، بس بدل ما تصلحه وبدل ما تشوف نقاط مشتركة بينكم، وكثير من الخلافات اللي الواحد شايفها بيجد أن.
نقاط التوافق لا تقل عن ثمانين في المئة، والأعداء المشتركة التي بينا يعني أنا وهو المختلفين ده العدو المشترك الذي بينا يصل إلى تسعين في المئة عدو مشترك. طب خلاص، طب ما نتفق على العدو المشترك والنقاط المشتركة مع الاحتفاظ برأيك ورأيي؛ أنا مش هغير رأيي ومش هتنازل ومش هقدم تنازل عن رأيي، ولا سيما في مسائل عقدية.
أنا مش هغير ده ومش هوصَل معك لحالة من أن أنا أتمايع في هذه القضية. لا، لكن أنا بأقول مش هنطرح الخلاف ده على العام؛ لأن الخلافات، ولا سيما هذه الخلافات الكلامية، غالباً دائماً مبثوثة في الكتب وفقط، ومش مبثوثة لعموم الناس.
إحياء القضايا دي وبثها في عموم الناس، دائماً يا جماعة العموم بتحب التشجيع، ما تبقاش عارف إيه المسألة أصلاً. يعني مثلاً واحد اه قضية زي التي بدأت تنتشر؛ قضية مثلاً الاستغاثة مثلاً، واحد متبنى رأي معين هو مش عارف المسألة، فيجي يدخل: يلا يا مشركين، يا أولاد مش عارف كده. والثاني إيه عايز يخش جزئية مدد مدد مدد، يقعد هو أنتم بتعملوا إيه؟
أنت بتعمل إيه؟ هو هي بقت بيغيظوا بعض، ده بيشجع الفريق ده، وهيجي الشيخ الوقت يحط عليكم كلكم، احنا معنا على فكرة الشيخ فلان الفلاني وهيحرفكم، هيجي دلوقتي يعرفنا هو أنتم بتعملوا إيه، هو إيه اللي بيحصل؟
ويلا يا جماعة في حفلة في صفحة فلان، هو الموضوع دائماً الانتشار بيبقى فيه حالة من الإيه؟ من التشجيع، الناس عايزة تشجع. ليه تكون مشجع ليه، يعني ليه نحول هو دي النقص؟ إاحنا نعمل في بعض كده؟
ليه أصلاً نطلع هذه القضايا لعموم الناس، طب ما نختلف ويبقى الخلاف علمي. يقول لا هو هيفضل موجود؛ يعني برضه الصورة الرومانسية لحل الخلاف أن احنا بقى كلنا نبقى حاجة واحدة ونبقى كيان واحد، ده مش موجود ولا هيبقى موجود.
الصورة الرومانسية دي هي الفكرة بس كيفية إدارة الخلاف ده، فالخلاف ده عامل أزمة عند عموم الناس، مش عارف يعمل إي. أنا رأيي لك ولأي حد بيتعرض للأزمات؛ الخلاف الرهيب الذي بين النخب ده ما يشغلش باله بالقضايا الخلافية أصلاً.
ما تبقاش مشجع، ما تشغلش بالك؛ الأصول اللي ناقصاك كتير جداً، إذن استمر في بناءك. يقول لك إيه: طب ما أنا عايز أعرف عشان ما أمشيش في طريقي غلط؟ ما هو ده بيقول على ده باطل وده بيقول على ده باطل، ما أنت عمرك ما هتشوفه وأنت واقف كده.
يعني لو فضلت ميت سنة وأنت واقف عمرك ما أنت امشي وشوف وأنت جوة الطريق، زي بالضبط فكرة ارسم لي منهج علمي أمشي عليه، أمشي في الخطوات التي تقابلك، أي حاجة تقابلك مش ضلال أمشي فيها وبعد كده ابقى غير خطتك كمان سنة أو سنتين.
لا، أنا مش هتحرك أي شبر العلم غير لما يجي لي منهج متكامل ياخدني من دلوقتي من نقطة الجهل والضياع إلى شيخ الإسلام. يا عم الحاج، أمشي أنت أصلاً شبرين وهتقف، ما تتعبناش، خلص الدورتين دول وقل الحمد لله وامشي، أنت أصلاً هتتجوز كمان سنتين وكل ده هيفركش.
ما تقعدش يعني خلاص هتتجوز وهتشتغل وخلاص والموضوع هيخلص، قاعد سنتين تسأل عن المنهج العلمي لغاية لما تتجوز، كان زمانك قالت لك كده به. فأحياناً الصح أنك تمشي ما تحاولش الخناقات، وأنا عايز أعرف وشاغل بالك ليه بقضايا خلافية؟
شاغل بالك ليه بهذه القضية؟ في أصول ناقصاك، لذلك أنا أفضل لبعض الناس أنه يقفل الفيسبوك ده أصلاً، ما تشغلش بالك اقفله، أنت مالك فلان، مالك شاغل بالك ليه؟ أحياناً بيبقى الشخص والله أحياناً بيبقى أخ أو أخت مثلاً عايش حياته؛ أخت مثلاً منقبة تحضر بعض الدروس، تحفظ قرآن وتتحاول تعلم على ده، تدخل المنقبات الجاهلات اللي فاكرين نفسهم بنقابة عامة الدنيا، والنقابة فيه خلاف، وأنتم أصلاً ما قدمتوش حاجة للدين، وأنت عملت إيه لدين ربنا؟ وأنت فاكرة نفسك، أنت أصلاً ما اتعلمتيش حاجة تنصري بها أمة المسلمين وأنت جاهلة في الدنيا.
فتبدأ إه ده، ده أنا طلعت ضايع أهو، طب وأنا مستحملة الهم ده كله والتريقة والحر عشان طب ما خلاص نشيل القصة. ممكن الإنسان يتكدر ويكره الطريق الذي كان راضي به أصلاً.
اتعرض لطاقة مش قدها؛ شخص كان راضي ماشي بيحفظ القرآن وبيني نفسه وراح يتعلم وياخد درس في الحديث وفي الفقه وبيتعلم ويرتقي وبدأ يفهم وبدأ يكتشف أن في في قضايا بيهاجموا بها أمة الإسلام، وبدأ يكتشف أن في معارك تغريبية بتدخل لأمة الإسلام وأنه لازم يكون واعي لده، وبدأ يثقف نفسه واحدة واحدة.
فيفاجئ أن دخل في قضايا مش قدها، دخل في سموم، حصل له حالة من التسمم، لذلك دائماً على فكرة الانفتاح الزائد دائماً بيجيب مشاكل. أحد الكتاب زمان يقول إن كان تحليله وهو يرى أن الديمقراطية أخطر من الديكتاتورية.
الديكتاتورية رأي واحد الكل بيكرهه وعارفين أنه غلط، الديمقراطية ميت ألف رأي أنت تايه بينهم مش عارف إيه الصح. أياً كان، أنا برضه مش واجه مقارنة، لكن أنا بأقول لك إن خطورة الانفتاح الضخم ده عمل حالة بلبلة عند الناس.
والأخطر أن شخص مثلاً هو متميز في باب، يعني شخص متميز مثلاً في مذهب الشافعي، في باب، في في اللغة، هو متقن مثلاً لباب من أبواب الشعر في الباب ده، فطالما أتقن حاجة يتصدر للتوجيه العام؛ ما هو مش معنى أن أنت أتقنت، هي فكرة وما منا إلا له مقام معلوم.
هو أنا متقن حاجة، إحساس الاتقان بيدي نوع دائماً من يعني إيه الثقة في النفس، فيتصدر للتوجيه. لا، التوجيه العام لا يحسنه أي أحد، دي وده فتوى يسأل عنها الإنسان.
الفتاوى يسأل عنها إنسان، زي بالضبط الفتاوى الاجتماعية كده ممكن تؤدي للطلاق، وممكن أخت تتجرأ وتتكلم وتنصح أخت في في حياتها الاجتماعية تؤدي لطلاقها، دي جرأة. فالشاهد أن الاختلاف ده ما تشغلش بالك به.
أحياناً ما بيكونش الخلاف تناطح زي ما احنا شايفين أن الكوادر بتقطع في بعض وأنت واقف تايه وبتحبهم ومش عارف تعمل إيه وحاسس بأزمة نفسية، ما تشغلش بالك بهذه الخلافات.
شوية والدنيا هتصفى، هي السنة أو قد استضعاف الهزيمة بالفضل الناس بتفضي طاقتها الغضبية دي في بعض، شوية هتصفى على مجموعة في الآخر ﴿وَأَمَّا مَا يَنفَعُ النَّاسَ فَيَمْكُثُ فِي الْأَرْضِ﴾ [الرعد: 17]. انشغل باللي ينفعك، ما تشغلش نفسك بالقضايا دي. إحساس تفريغ الشحنة مريح؛ دخلت شتمته ورديت عليه وحطيت عليه، ده حس أنك عملت حاجة، ما بتعملش أي حاجة لما تفتش دينك بأي حاجة، كم من أناس أتقياء أخفياء يعملون في صمت.
طيب أحياناً بتكون الأزمة بقى أن يقول لك ده أنا كمية البرامج العلمية اللي مطروحة قدامي، هم مش بيكرهوا ده، هم بيحبوا بعض كثير، مش عارفة أختار أصلاً، وخاصة أن الوسط السعودي ما شاء الله ثري في المنطقة دي، كل شوية مش عارف برنامج لحفظ السنة، برنامج للتفسير، دورة مش عارف الالتحاق بالرد على الشبهات، دورة حفظ الصحيحين، دورة المذهب، إتقان المذهب الحنبلي، دورة من كتر الحاجات دي، وكل حاجة أنت بتعمل لها سيف.
معروفة، سيف بوست معروف، أو يبقى لك واحد صاحبك بتصيف عنده بتبعت له، ما بتعرفش تصيف فتبعت له الحاجات دي على طول اه في الشارع بتاع الواتساب ابعث له، أنت معتبره هو الإيه صندوق التخزين بتاعك اه.
خلاص بعد فترة بعد ما اتجمعت بقى رحت بقى لصاحبك على الصفحة على الواتس مثلاً أو حاجة، أو رحت السيف بوست بتاعتك بصيت كده يا نهار أبيض إيه ده.
أنا أصلاً اتجوزت، اقفل يا ابني، هدخل إيه، هشارك إيه؟ مش عارف، إشكالية برضه تاني ما تشغلش نفسك يعني ما تنظرش لكل حاجة، ما تبقاش طماع، ده مش علو همة، ده طمع، ابدأ في حاجة واحدة. طب ما الثانية جايز تبقى أحسن؟ مش مشكلة.
ما أنت لو فضلت تقول الثانية جايز تبقى أحسن هتفضل كده إيه لغاية لما إيه ها عرفنا بقى لغاية لما إيه؟ طب ما تتجوز لغاية لما تشتغل اه، هتفضل كده لغاية لما تموت وأنت ما عملتش أي حاجة.
طب ما جايز صناعة المحاور أحسن من تاج الكرامة، بس بيقول لك بقى سبك من الاتنين دول مساق نازل بحلته الجديدة، بص هو ده، لا بص فكك من ده كله أنا عندي لك برنامج هيطلعك في أسبوع.
ما فيش حاجة بتحصل في أسبوع، ودي بقى الإشكالية دلوقتي ممكن نختم بها أنا طولت بس في معنى مهم هختم به، لا هقول دي وأختم بمعنى تاني العزوف عن الطرق الطويلة.
يعني معروف جداً أن طلب العلم أقل حاجة عشان تبدأ تحس ببدايات أنك تمسك أداة معينة أو بعض التمكن أو أن يبقى تكتسب هذه الآليات أو المهارات، أقل حاجة تلات أربع سنين مستمر مش متوقف.
ده أقل حاجة في أي في أي علم، يعني عشان تبدأ تشم نفسك في أي علم فقه، عقيدة، لغة، حديث، وتبدأ تشعر بنوع من التمكن ويبقى لك وجهة نظر تقترح ورأي وتخالف، تقيم كتاب وتدي اقتراحات، دي عايزة على الأقل تلات أربع سنين من من العلم المستمر. الجلوس مرة في الأسبوع بتسمع قاعد بتروح، ده ما عداش موجود، الطريق الطويل ده لا لا لا لا، ده الفيديو أما بيعدي خمس دقايق ما بنشوفوش.
البوست الطويل ما بيتقراش، حد يبعت لي الزتونة، ما عادش الزتونة بقت زتونة الزتونة، يعني عايز خلاصة الخلاصة. عجبني أحد الدعاة كان بيتكلم في الإشكال ده، بيقول ده حتى عمل له برنامج اسمه الدقيقة دين.
كأنه بيشحت والله دقيقة، إحنا بنضطر تعمل كده في الآخر، ما هو الناس ما بتسمعش، أقسام بالله ما يزيد عندي عشان خاطري دقيقة واحدة الدين دي قديم أربعة وعشرين ساعة، وبعدين أنت بتتحايل عليه الدقيقة دي، خد بالك ده أنك توجه ده للمعرض ده كويس، لكن الغريب أن ده بيتوجه للمقبل مش للمعرض.
لأصحاب الصفحات الإسلامية اللي هم ملتزمين، فالعزوف عن طلب العلم والتمكن في طلب العلم أو إنه يتقن شيء، وعلى فكرة في الدين وفي الدنيا ما عادش الناس عندها صبر أن هي تتقن حاجة، لا في الدين ولا في الدنيا.
يعني هو يصبر على نفسه في الدنيا أنه مثلاً يبقى جراح شاطر أو أنه يتعلم، ده ما عادش موجود، لسه عايزين إيه؟ الشغلانة اللي بتجيب أنا عايز أشتغل شغلانة كده على رأيي، واخد واحد كان بيقول لي عايز أشتغل إيه؟ سمسار مثلاً دي فكرة حلوة اه كان بيقول النسبة، في واحد بياخد نسبة من الفلوس وهو قاعد كده، يعني في حاجة بتُحصل وهو دايماً بياخد نسبة عشرة في المية، أنا عايز أشتغل الشغلانة دي. يعني اللي هو إيه؟ أنا بحب يعني جميلة حتى لو قليلة أنا راضي، بس أنا عايز.
هو مش عايز يتعب، يعني هو عايز إيه يفضل، فحتى في الدنيا، تخيل بقى في الدين الفكر ده موجود، عايز في أي علم من العلوم، طب أنت عشان تتكلم في القضية الفقهية ديت.
أهو في أي علم، أنت محتاج تتعب وهتتمرمط وتصبر وتصبر تصبر فترات طويلة، يعني كل اسبوع في يوم هتقعدوه وتقرا كلام وتُعيده وتذاكره وتعمل كده اه، هتفضل كده واعمل ده لمدة مثلاً سنة وما اطلعش أستتم الناس على الفيسبوك وأقول لهم أنا أه لسة هتفضل برضه كده.
يعني هتعب كل ده وما أقولش رأيي في اللي بيحصل؟ لا برضه مش هأقول رأيي في اللي حصل. أمال أعمل كده ليه؟ أعمل كده ليه؟ عشان أنت تتبنى ده دين ربنا سبحانه وتعالى، تحفظ الوحي.
احفظ العلم، أنت لما تيجي تقرأ في جهود وده مهم أنك تقرأ في جهود السابقين، كيف حُفظ؟ كيف وصل لنا هذا الدين؟ اختياراتنا بقت ضعيفة، ودي إشكالية زي ما قلت في النمط بقى التدين، أن هو مش عايز اختيارات دينية تغير مسار حياته، لا لا لا بص.
أنا الأول قبل ما تعرض علي التدين اللي عندك أنا مسار حياتي أهو، أن احنا نتعامل مع ده بدون ما ينفر، ده كويس، أن احنا وده كان إشكالية فوق الطرح الذي قبل كده أن ده ما كانش له مكان.
لا، يا تيجي يا تمشي اه، قل أورمان تيجي تمشي، دلوقتي ممكن ده يلاقي له مكان، لكن الإشكال أن كل الطرح بقى مش عايزينكم تغيروا حياتكم، مش عايزين حد يضحي، ولازم تبقى متفوق دنيوياً ومتفوق مش لازم دينياً قوي بس أهم حاجة تفوق دنيوياً وتكون مش عارف تقرأ مش عارف إيه وتلصيم.
طب وفين خطاب التضحية؟ ماشي، طب ده خطاب مناسب لعموم الناس عشان ما تنفرش. طب الناس اللي عايزة تضحي، الناس اللي هتحمل هذا الدين، فين خطابهم؟ فين فين الخطاب الموجه لهم؟ الخطاب الذي النبي صلى الله عليه وسلم قاله للصحابة في مكة فين؟ يعني لما سيدنا خباب يجي له وضهره فيه حفر من التعذيب.
ويقول له: ولكنكم تستعجلون أنت متخيل؟ يعني مش بيقول له أديت ما عليك. سيدنا خباب جاي ضهره فيه حفر من التعذيب لما شافها سيدنا عمر، وسيدنا عمر شافها بعد كم سنة، يعني ده كان في مكة والعشرة قل كان آخر مكة كمان عشر سنين.
بعد كده سنتين وتلات أربع سنين في خلافة عمر، يعني خمستاشر سنة شاف ظهر خباب أغشي عليه لما شاف المنظر، قال: والله لقد أوقدوا ناراً وخلعوا ثيابي ووضعوا ظهري عليها، فما أطفأ النار إلا ودق ظهري الصديد والدم الذي نزل من ظهري هو الذي أطفأ النار.
أنت متخيل؟ والنبي صلى الله عليه وسلم يقول له إيه؟ والله ليتمن الله هذا الأمر، حتى يسير الراكب من صنعاء إلى حضرموت، لا يخاف إلا الله والذئب على غنمه، ولكنكم تستعجلون. اصبر، اللي قبلك صبر، اصبر.
فين الخطاب ده؟ طب ما هو أنت بتحتاج عشان تثبت في زمن الفتن محتاج خطاب زي ده، محتاج خطاب فيه نوع من علو الهمة، ممكن الخطاب ده يضر بعض الناس، لكن هو مهم إنه يبقى موجود.
يعني زي ما احنا عندنا يا جماعة قرآن مفصل؛ عندنا المائدة والنساء والأنفال والتوبة موجودين في المصحف، في مصحف واحد مش عاملينهم قراطيس، هو في مصحف واحد مش مفصول عن بعضه.
يعني فيه خطاب كده وفيه خطاب كده، يبقى لا يجوز ولا ينبغي أن يغيب هذا الخطاب من الواقع الإسلامي، ما ينفعش، وحجة إن هو ممكن يبقى مضر، خلاص نشوف لها حل، ما ينفعش يغيب الخطاب ده أبداً، ما ينفعش كل الخطاب إن أنت لن تغير مسار حياتك.
لأن فعلاً وربنا يكون في عونكم، فعلاً اختيار التدين العالي وعلو الهمة في الواقع صعب، الواقع اللي احنا عايشينه صعب، الأزمات الاقتصادية أصعب، زمان كان الجواز أسهل بكتير والشغل أسهل، دلوقتي الواقع بقى صعب جداً فعلاً عايز تضحية أعلى.
فتخيل شبهات أكثر، شهوات أكثر، خطاب أقل، مطالب بتضحية أعلى، طب إزاي إنك ترجع بقى إيه؟ عارف قرار تأثير كان كاتبه أحد الإخوة على الفيسبوك نقل عن أحد العلماء: اللهم لا تحرمنا مجالسة والكلام مع الموتى، قال يعني طلب العلم قراءة كتب السابقين، إنك أنت لا تحرم من قراءة سير السابقين.
من عليه الفتنة إنك أنت تقرأ ماذا قدم هؤلاء ليصل إلينا الدين، الأسماء أعداد المسلمين بالملايين اللي احنا عارفين أساميهم قلة، دول اختاروا يعيشوا حياة مختلفة، دول اختاروا يعيشوا حياة مختلفة، ما يختاروش حياة التفاهة وأنه يعيشوا خلاص كده.
كل الأسماء اللي موجودة دلوقتي هتمشي، ويبقى إما عند الله يعرفه الملائكة الذي ضحى وبذل، أو عند الناس يكتب له لسان صدق عند الناس، فالقضية إن دي فترة، واللي بيثبت هو اللي يرتفع اسمه عند الله سبحانه وتعالى.
لكل عبد صيت، كما قال النبي صلى الله عليه وسلم: له سمعة في السماء، في واحد صيته حسن في السماء، إن أنت أحياناً في طريق بقى جوة الالتزام أنت محتاج يعني زمان كنت محتاج تاخد قرار الالتزام، دلوقتي أنت جوة الدين محتاج تاخد قرار تاني إن طريقتك في الدين دي مش نافعة.
إن طريقة التدين اللي أنا مش دي مش نافعة، لا أنا محتاج أتغير، مش هينفع أفضل سايب نفسي كده الدنيا عمالة تخبط بي ومش عارف أخد قرارات.
نتكلم إن شاء الله عن مين الناس تحدداً، أمثلة للناس تحدداً، ظروف معينة محتاج ياخد القرار ده، ناس معينة بظروف معينة طال عليها الأمد وأصبح في حالة من الركود، بنجيب بعض الأمثلة وإيه القرارات اللي محتاج ياخدها؟ نتكلم في ده المرة القادمة بإذن الله، نكتفي بهذا القدر.
وإن شاء الله برضه يا ريت اللي عنده أفكار، إشكاليات، اعتراضات، شايف هو لأنه أنتم اللي عايشين الواقع أكثر، في إشكاليات معينة شايفها في التدين الموجود، إشكاليات شايفها موجودة في الواقع في الخطاب اللي بيسمعه، يا ريت برضه أي حد يعرف يوصل لي ده سواء عن طريق يكتبها هنا في الدرس، أو يبعتها على أي حاجة سواء على الواتس أو على الفيس، هستفيد منكم، جزاكم الله خيراً.
سبحانك اللهم وبحمدك، أشهد أن لا إله إلا أنت، أستغفرك وأتوب إليك، وجزاكم الله خيراً.