الحور بعد الكور (2): الثبات في وقت الفتن | د. أحمد عبد المنعم

السلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم.

درس اليوم بإذن الله عز وجل يعتبر تكملة للدرس السابق الحور بعد الكور، وممكن نسميه الحور بعد الكور الجزء الثاني. تكلمنا في الدرس الأول عن معنى الحور بعد الكور، وخطورة الرجوع والنكوس، أو أن الإنسان ينزل إلى درجة لم يكن فيها، وكأن الله سبحانه وتعالى من عليه بالارتقاء في الدين ثم نزل إلى درجة معينة أقل مما كان فيها. تكلمنا في الدرس اللي فات أن الدرس موجه -وده أيضاً بإذن الله سبحانه وتعالى- خصوصاً للعاملين لدين الله، اللي واقف على ثغر من الثغور، واللي حاول يشتغل في أي ثغر من الثغور ينصر به دين ربنا سبحانه وتعالى، مش مجرد أن إنسان كان يعمل طاعة وتركها.

عموم الدروس اللي هتلاقوها إن شاء الله حتى عندكم على الموقع تحت تقسيم التربويات هي بتخاطب الملتزم السائر في طريق الله سبحانه وتعالى، فبالتالي لو حد سمع أي مجموعة من هذه الدروس وحس أن الكلام صعب أو كده، ده بيبقى نوع نتيجة من التدرج، وده طبيعي زي ما ذكرنا في الدرس اللي فات أن الإنسان أثناء السير إلى الله سبحانه وتعالى يحتاج إلى تدرج.

طيب درس اليوم، المرة اللي فاتت احنا حاولنا نتكلم قدر المستطاع، وزي ما قلت هو كان أشبه بفضفضة مش استقصاء، عن الأسباب التي ممكن تؤدي أن إنسان كان شغال في الدين ويقع، وحاولنا نجيب بعض العوامل. درس اليوم أنا عايز أتكلم على محور تاني شوية، ممكن الدرس اللي فات كان نوع من الإحباط شوية والاكتئاب والنظرة السوداوية، أنت قلت أن الواقع والآزمات وكذا، ده بيخلي كتير من الناس تقع وذكرت أسباب الوقوع، اليوم أنا عايز أتكلم عن الثبات بقى، يعني حتى لو هنحاول نحط عنوان الحور بعد الكور الجزء الثاني، بس أسباب الثبات في زمن هذه الفتن والابتلاءات اللي بنمر بها.

طبعاً ممكن أسهل وسيلة لأسباب الثبات هي عكس الأسباب اللي فاتت، يعني ممكن درس اليوم يلخص بكل بساطة ونخلص أننا نعكس السبع ثمان نقاط اللي احنا قلناها المرة اللي فاتت ونعكسها، فهنضيف للنقاط اللي هنذكرها اليوم -طبعاً ده أمر بدهي- نعكس الحاجات اللي فاتت، فعشان كده أنا أفضل أن الدرس ده يتسمع بعد الدرس الأولاني، يعني ما يفضل إنك ما تسمعش الدرس ده الأول، تسمع درس الحور بعد الكور الجزء الأول وبعدين تسمع ده، لأن في نقاط هقولها هي بتترتب على ما قيل في الدرس الماضي.

طيب يبقى احنا ذكرنا أن أحياناً بتمر على الأمة الإسلامية من لدن بعثة النبي صلى الله عليه وسلم بل من لدن آدم إلى قيام الساعة تمر مراحل قوة ومراحل ضعف، وده من تدبير الله سبحانه وتعالى ومن حكمة ربنا سبحانه وتعالى، قال ربنا سبحانه وتعالى: ﴿وَتِلْكَ الْأَيَّامُ نُدَاوِلُهَا بَيْنَ النَّاسِ﴾ [آل عمران: 140]، الدولة بمعنى الغلبة تكون مرة للمسلمين ومرة للمشركين، ربنا سبحانه وتعالى له حكمة من ذلك: ﴿وَتِلْكَ الْأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا﴾ [آل عمران: 140]. إذاً لو الوقت كله على طول انتصار، لو الوقت كله على طول تمكين، بعض ضعاف الإيمان مش هيظهروا، أو هناك عبوديات لن تظهر، فهناك عبوديات لا تظهر إلا في وقت الاستضعاف، هناك عبوديات من البذل والتضحية ونصرة الدين، يعني عبوديات تخرج في وقت الأزمة لا يمكن تخرج في وقت التمكين، ممكن من الحكمة أن هذا يحدث، لذلك قال ربنا سبحانه وتعالى: ﴿وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنْكُمْ شُهَدَاءَ﴾ [آل عمران: 140]، وكيف تظهر الشهادة إلا في موطن قتال وموطن أن ممكن الإنسان يستضعف فيبذل روحه ودَمَه نصرة لدين الله سبحانه وتعالى؟

طيب ده الواقع اللي بنمر به، قلنا إن فيه أزمات اقتصادية، أزمات سياسية، صراحة يعني احنا في الفترة دي فترة الناس حاسة بضعف الدين، وبقى أشبه بموسم الحجاب، موسم الابتعاد عن الدين، من كتر الضيق اللي ممكن بتمر به الإنسان السالك في الطريق إلى الله العامل لدين الله. وده لما أقول كلمة الملتحي المنقبة لا أقصر برضه عشان ما نخشش في الحساسيات والمصطلحات، لا أقصى أن الملتحي والمنقبة أن دول حاجة معينة أو أن هو ده معنى علامة التزام معين، لكن ده بالتأكيد زي ما ذكرت في الدرس اللي فات، أن أحياناً بيكون دي علامة انتقال من واقع العمل، وحتى اللي بيحب يرخم على حد ملتزم يرخم على الملتحي والمنقبة، لأن ده العلامة الظاهرة يعني.

فأحياناً نتيجة الظروف اللي بيتعرض لها ضغط الملتحي أو المنقبة أو أي حد بتظهر عليه علامات التزام أو بيبذل أو داعية أو غير ذلك، من كتر الضغط عليه أنه مثلاً سائر في طريق معين فيوقفه الملتحي ويرخم على المنقبة، فأحياناً يشعر في وقت بقى استضعاف وما فيش نصرة دين وما فيش جو الدين العام، يقول يعني أنا اللي مانعني أن أعدي زي بقية الناس أو أن حياتي تبقى زي بقية الناس، ما أحلقها، النقاب يتم إقلعه، يعني اللي مانعني أن أحياناً الوسوسة اللي عند يعني في وقت ضعف الإيمان تقول لنفسها إيه، يعني أنا اللي مانعني أن أعيش حياتي زي بقية الناس وأتحرك بحرية أن أنا أقلع النقاب؟ طب ما أقلع النقاب، يعني هي حتة القماشة دي اللي هتفرق في الدين؟ ويبدأ القضية أن مش مجرد خلع نقاب ولا مجرد حلق لحية، ده ده علامة أن عمال بينزل. زي ما قلت في فارق بين واحد ترك طاعة معينة ويمارس كل أنواع الطاعات، زي مثلاً حد اخت مثلاً تكون بتعمل في الدعوة في الغرب وحصل مضايقات لقضية النقاب، فخلعت النقاب واستمرت في كل أعمال الدين من الدعوة إلى الله سبحانه وتعالى أو القرآن أو تربية الأولاد أو غير ذلك، هنا دي ما بنقولش عليه انتكاس أبداً، ده هي خلاص ده في ظروف معينة خاصة لو بطلب الاستحباب ده ما حصلهاش أي حاجة، بالعكس ممكن يكون الأفضل في حقها أن هي تفعل ذلك، أو واحدة تانية لو هي رمز معين وبطلب الوجوب الأفضل لها الثبات، مش ده اللي أنا بناقش فيه، أنا اللي بناقش فيه أن إنسان زي ما قلت المرة اللي فاتت بيحصل له نوع من التغير المفاهيمي، فمزيج الضعف الإيماني يقول إيه، طب ما أنا أتحرر من القيود دي، قيود الالتزام أو قيود الدين وعيش زي بقية الناس.

وللأسف -وكويس أن أنا اتذكرت وأنبه عليه- للأسف بعض نتيجة الأزمات والاكتئاب اللي بنمر بها ناس بتتجه للدكاترة النفسيين، وبعض الدكاترة النفسيين أنا فوجئت الموضوع ده بيتكرر للأسف ممكن بدأوا يدوا نصائح للمسلمين المنقبات يقول لها اخلعي النقاب وعيشي حريتك والنقاب بيقيدك، وده للأسف يعني أنا مش متخيل مدى فهم الدكتور نفسه ازاي يعمل كده، ولماذا يظن أن النقاب عائق أو أن الحل في أن ده بيعطي نوع من التحرش؟ الشاهد أنا واجب بس التحذير على النقطة دي أن الأخوات ما يسمعوش بصورة استسلامية لموضوع الدكاترة النفسيين في قضية خلع النقاب، وأنا سمعت أكثر من حالة في الموضوع ده.

يبقى إذاً احنا في حالة من الارتخاء الديني أن بقى بكل سهولة أن ليه ليه أتأذى؟ ليه اتحط في نوع من الاضطرار؟ ليه أعيش حياة من الضيق؟ وخesa وخاصة زي ما قلت أن كان أحياناً بتيجي فترات أن بقى السوق الرائج أن هو يلتحق أو هي تنتقل، بقت ممكن هي عشان تجوز تنتقب، لأ دلوقتي العكس بقى دلوقتي العكس عشان هي تجوز تقلع النقاب، فأحياناً تمر أزمات ليرى الله سبحانه وتعالى أنت تعبد الله سبحانه وتعالى في كل الظروف ولا الإنسان بيتقلب حسب الظروف؟

طيب احنا دائماً لازم نرجع لهدي النبي صلى الله عليه وسلم ومواقف من الصحابة مع النبي صلى الله عليه وسلم، ده الزاد بتاعنا اللي نرجع له، هل مر مواقف على النبي صلى الله عليه وسلم حصل حالة من الانفضاض أن الناس كانت بتمشي زي ما احنا شايفين دلوقتي الناس بتمشي؟ فترة من الفترات كان درس ممكن شيخ من المشايخ الكبار يحضره الألوف المؤلفة، دلوقتي أصلاً ما فيش دروس أساساً، ولو فيه تجد عدد قليل، وتجد الإقبال زي ما ذكرت المرة اللي فاتت على طلب العلم بقى قليل جداً، والإقبال على الدعوة والإقبال على حفظ القرآن وتحفيظ القرآن أصبح فيه قلة في ده، لكن في ناس ثابتة بفضل الله.

طيب هل في مواقف مرت على النبي صلى الله عليه وسلم في حالة من الانفضاض؟ في أكثر من موقف، أشهر ثلاث مواقف الإنسان لما يعيشهم ويعايشهم يجد فعلاً أن الدين كان بيمر بأوقات أن في ناس بتمشي وفي ناس بتثبت: موقف قول الله سبحانه وتعالى: ﴿وَإِذَا رَأَوْا تِجَارَةً أَوْ لَهْوًا انْفَضُّوا إِلَيْهَا وَتَرَكُوكَ قَائِمًا﴾ [الجمعة: 11]، النبي صلى الله عليه وسلم ظل قائماً في وقت خطبة الجمعة، جمعة الفتنة، وإذا أو لهوا انفضوا إليها، سواء أن الإنسان محتاج ضيق في الرزق فمحتاج تجارة، أو أحياناً مضغوط عايز نوع من يظن يعني أنه محتاج نوع من الترفيه واللهو، تجارة أو لهو دي أكثر الأسباب اللي تخلي الإنسان ينفض: ﴿وَتَرَكُوكَ قَائِمًا﴾ [الجمعة: 11]، النبي صلى الله عليه وسلم زي في صحيح مسلم بقي معه ما يقرب من اثناشر رجل، اثناشر واحد فضلوا مع النبي صلى الله عليه وسلم، وفي بعض الروايات ذكر روي عن النبي صلى الله عليه وسلم وإن كان الحديث مروي عن التابعين يعني عن قتادة أبو الحسن وغيره، أن النبي صلى الله عليه وسلم قال: «لو تتابعوا جميعاً» يعني لو كل الناس قامت «لاشتعل عليهم الوادي نارهم».

يبقى إذاً اللي جالس ده كان هو عنصر الأمان، يعني أنت ثباتك أنت بثباتك ده اللي هيخلي بفضل الله أن في عنصر أمان عام. طب أنا بقول النقاط دي دلوقتي؟ أنا بقول النقاط دي ليه؟ أنا قلت أنا عايز أذكر اليوم في الدرس عشان بس دماغنا تبقى مترتبة، عايز أذكر أسباب الثبات، أول عنصر من عناصر الثبات -وده كنت عايز أؤجله بس أقوله لكم دلوقتي- أن تتذكر ثواب الثبات في وقت الفتن، في وقت الابتلاءات، في وقت انفضاض الناس، في وقت هروب الناس، في وقت بعد الناس عن الدين، أن تثبت أنت، ده ثوابه عالي جداً. لذلك النبي صلى الله عليه وسلم قال إن اللي مكثوا ولم ينفضوا إلى التجارة ولا هؤلاء كانوا هم الأمان.

ربنا سبحانه وتعالى أيضاً في الموقف التاني -قلت أذكر ثلاث مواقف- الموقف الأول: ﴿وَإِذَا رَأَوْا تِجَارَةً أَوْ لَهْوًا انْفَضُّوا إِلَيْهَا﴾ [الجمعة: 11]. الموقف التاني: في غزوة أحد: ﴿إِذْ تُصْعِدُونَ وَلَا تَلْوُونَ عَلَى أَحَدٍ﴾ [آل عمران: 153]، تنطلقون في صعيد الأرض أو بتصعدوا على الجبل، انتم عمالين تجروا وسايبين النبي صلى الله عليه وسلم، ولا تلوون على أحد ولا تلتفتون. وده أحياناً يححصل دلوقتي أن الناس بدأت تترك الدين وتترك ثغور الدين، ومش بيلتفت مين اللي هيمسك مكانه الثغرة، ما بيلتفتش لحد مكانه يقول له اخلفني في قومي أنت تحمل عني الثغر، لأ ممكن واحد يهاجر ويترك كل ثغور الدين، طب مين اللي هيحمل مكانك؟ واحد فتح الله عز وجل عليه في العلم، واحد فتح الله عز وجل عليه في الدعوة، ثم يترك ثغره بدون ما يستخلف حد مكانه، طب وهذه الثغور تتساقط؟ هو لا يلتفت وما عادش شاغل باله أصلاً مين اللي هيحمل هذا الثغر؟ ﴿إِذْ تُصْعِدُونَ وَلَا تَلْوُونَ عَلَى أَحَدٍ﴾ [آل عمران: 153]. في هذا الوقت ثبت أناس مع النبي صلى الله عليه وسلم وكان ثوابهم عالي. ثبت ناس مع النبي صلى الله عليه وسلم في خطبة الجمعة، ثبت أناس مع النبي صلى الله عليه وسلم في غزوة أحد.

ويوم حنين: ﴿وَيَوْمَ حُنَيْنٍ إِذْ أَعْجَبَتْكُمْ كَثْرَتُكُمْ﴾ [التوبة: 25]. يوم حنين لما قال أحد -نسمع في وسط الغزوة كده- قال لن نهزم اليوم من قلة، هذه الكلمة ودي خطورة الكلمات أثرت في بعض نفوس المجاهدين مع النبي صلى الله عليه وسلم، فحسوا بنوع من الاسترخاء، الموضوع مش محتاج بذل قوة، وإن هو مش محتاج بذل جهد وأن احنا عددنا كبير ده احنا عشر آلاف أو أكثر، مش محتاجين أن احنا نايه نفس العدة والعتاد والافتقار إلى الله سبحانه وتعالى، فكان الأمر أن تعرضوا لهزيمة في أول الأمر: ﴿إِذْ أَعْجَبَتْكُمْ كَثْرَتُكُمْ فَلَمْ تُغْنِ عَنْكُمْ شَيْئًا﴾ [التوبة: 25]، وحصل أن كأن الأرض ضاقت عليهم وبدأت الناس فعلاً تفر وتركوا النبي صلى الله عليه وسلم على بغلتهم، وكان النبي صلى الله عليه وسلم بجواره العباس وكان جوار الصوت وقال يا عباس نادي على الناس. العباس لما نادى أمره النبي صلى الله عليه وسلم أن يعادي أن ينادي على الناس عشان ترجع، هو ده المشهد اللي بيحصل دلوقتي، أن الناس بتنفض واحنا عايزين حد ينادي على الناس عشان يرجعوا تاني. فالعباس نادى على مين؟ ما ناداش على أي حد، في بعض الروايات قال يا أصحاب سورة البقرة ويا أصحاب السمرة البيعة بيعة الشجرة، الناس اللي بايعت، الناس يا جماعة اللي في أول التزامها كانت واخدة عهد مع ربنا أن هي تكمل في الطريق، الناس اللي حفظت سورة البقرة، الناس اللي كان عندها معاني إيمانية عالية في أول الطريق، أين هذه المعاني؟ ننادي عليهم الآن ارجعوا إلى هذا الطريق، اثبتوا على دين الله سبحانه وتعالى، أن تستمر في نصرة هذا الدين مهما مر عليك من ابتلاءات، من فتن، من تضييق.

أيا كانت الأسباب لابد أن تستمر حتى تضع قدمك في الجنة. القضية مش قضية التوقف في منتصف الطريق، فما وهنوا لما أصابهم في سبيل الله وما ضعفوا وما استكانوا. أن تستمر في الطريق ثوابه عالي جدا. قال النبي صلى الله عليه وسلم: «عبادة في الهرج كإهجرة إليّ». زي ما قال الإمام النووي: هذه لا يفعلها إلا أفراد.

هو ده اللي بيحصل دلوقتي، أن ما عادش الثبات ثبات جماعي، بقى الوقت اللي بيثبت فيه مجرد أفراد. عبادة في الهرج كهجرة إليك يأخذ ثواب الهجرة. النبي صلى الله عليه وسلم كان بيقول للصحابة: إن من ورائكم أيام الصبر، هيجي أوقات تحتاج إلى أن تصبر أن تجاهد نفسك. الصبر في هذه الأيام كقبض على الجمر.

أنك أنت تتألم، تخيل اللي بيمسك جمرة هو بيتألم وبيشعر بحرارة، الطبيعي أن اللي بيمسك جمرة رد فعله أنه يلقيها. لذلك في رواية في حديث تاني من علامات السقوط والوقوع والانتكاس أن النبي صلى الله عليه وسلم قال: «كجمر دحرجته على رجلك»، أنك قررت ترمي الجمرة، لكن في الرواية: «كقبض على الجمر».

للعامل فيهن أي في هذه الأيام، خد بالك للعامل، مش بس للعابد الذي يحيي الليل ويصوم النهار، لذلك احنا دايما بنكرر كلمة العامل لدين الله. قال صلى الله عليه وسلم: «للعامل فيهن في هذه الأيام أيام الفتنة أيام الصبر أيام الابتلاءات». وكتير ممن ذكروا الحديث ده زي أبو داود وابن ماجه وغيره كانوا بيبوبوا تحت أبواب الفتن أن دي في زمان الفتنة وإعجاب كل ذي رأي برأيه والناس بتنفض عن الدين للعامل فيهن أجر خمسين رجل.

يعني ليه؟ لأن ثباته كأنه بثبات خمسين واحد. أجر خمسين رجل. فالنبي صلى الله عليه وسلم قال كلمة يعني الصحابة استغربوها شوية: أجر خمسين رجل منكم. يعني النبي صلى الله عليه وسلم بيقول لهم هيجي ناس بعد كده، مش الوقتي، هيحصل فيه فتن وانفضاض وإعجاب كل ذي رأي برأي والناس مش هتقبل الأمر بالمعروف والنهي عن المنكر والناس مش هتقبل النصائح، اللي هيثبت في هذه الأوقات له أجر خمسين رجل منكم. فالصحابة ظنوا: إيه يعني؟ أحبوا يقولوا للنبي صلى الله عليه وسلم: تقصد منهم؟

منهم يا رسول الله؟ قال: «بل منكم»، أجر خمسين صحابيا. أن تثبت في زمن الفتنة أن تستمر في هذا الطريق بالرغم من انفضاض الناس ثواب الهجرة. ثواب خمسين صحابي أن تثبت. النبي صلى الله عليه وسلم قال عن زيد بن عمرو بن نفيل أنه يبعث أمة وحده، لماذا؟ لأنه ثبت في وقت لم يكن معه أحد. قال عن ورقة بن نوفل فيما يروى عنه حديث صححه بعض أهل العلم أو أحسنه وفي ضعف، يعني ولو في ضعف ضعفه يسير، عن ورقة بن نوفل قال أنه رآه له الجنة أو الجنتين، ثوابه كان مضاعف، ليه ورقة الإمام فثوابه مضاعف؟ لأنه آمن في وقت لم يكن يؤمن فيه أحد، بل كان يتمنى نصرة النبي صلى الله عليه وسلم في وقت الاستضعاف.

قال: يا ليتني أكون فيها جذعا، أي قويا. ورقة بن نوفل بيقول للنبي صلى الله عليه وسلم: يا ريتني أكون شابا حين يخرجك قومك. ورقة بن نوفل اختار أشد أوقات استضعاف الدين، وهو وقت إخراج النبي صلى الله عليه وسلم. دي أشد أوقات مرت على الدين، لذلك لما ربنا سبحانه وتعالى ذكر أن الله قادر على أن ينصر هذا الدين في وقت استضعافه اختار هذه اللحظة: ﴿إِلَّا تَنْصُرُوهُ فَقَدْ نَصَرَهُ اللَّهُ إِذْ أَخْرَجَهُ الَّذِينَ كَفَرُوا﴾ [التوبة: 40]. يبقى لما ربنا أراد أن يبين أن الله هو قادر سبحانه وتعالى أن ينصر هذا الدين في وقت الاستضعاف اختار لحظة إخراج المشركين للنبي صلى الله عليه وسلم.

كذلك اختار هذه اللحظة ورقة وقال: ليتني أكون فيها جذعا أي شابا قويا حين يخرجك قومك. أغلبنا بيتمنى لحظة التمكين عشان ينصر دين ربنا، ونهرب جميعا ونفر من لحظات الاستضعاف. لذلك حتى لما تيجي تقرأ أسبوعيا يستحب لك أن تقرأ سورة الكهف، تقرأ الكهف قيمة الاستضعاف: طائفة الشباب المستضعفين اللي سابوا وفروا بدينهم وانطلقوا إلى الكهف، أو صاحب الجنتين مع المؤمن وهو بيدعوه وأيضا مستضعف.

وتيجي تقرأ قصة ذي القرنين تجد تمكين، أغلبنا بيحب قصة ذي القرنين، ليه؟ لأن دي وقت التمكين والانتقال بين المشرق والمغرب. السورة لم تسمَ بذي القرنين، سميت بوقت الاستضعاف. اللي بيثبت هنا هو الذي يمكن. قال الشافعي: لا يمكن المرء حتى يبتلى. فأغلبنا دايما عايز يوصل للنهاية، مش عايز يبذل الصعوبات اللي في أول الطريق.

يبقى إذا ثواب أن تتذكر ثواب الثبات في أوقات الفتنة مهم جدا: تتذكر ثبات زيد بن عمرو بن نفيل، ثبات ورقة بن نوفل، ثبات... وده كان مشهد عجيب جدا. يعني واحد يقول لك: أثبت ازاي وأنا ما معييش صحبة؟ أنا أذكر دلوقتي أيضا أسباب الثبات، لكن ممكن كل الأسباب اللي نقولها تكون مش موجودة، أنت بتثبت ازاي؟

يعني لما تتخيل مشهد صلح الحديبية والنبي صلى الله عليه وسلم وقف مع الصحابة وكانوا نفسهم يروحوا يعملوا العمرة ومُنعوا عن البيت، وده أصلا في حد ذاته مشهد مؤلم. وبعدين بيكتبوا، سهيل بن عمرو النفيدي وقريش رفضوا. قالوا: لأ، احنا ما نتاخدش فجأة، العرب بتقول علينا إيه؟ احنا تيجي تعملوا العمرة فجأة كده؟ لأ، ترجعوا وتبقوا ترجعوا تعملوا عمرة من العام القادم. فقال له: خلاص نعمل صلح. كتبوا صلح، النبي صلى الله عليه وسلم واقف مع سهيل بن عمرو. سهيل بن عمرو اشترط أن أي حد هيجي من المشركين يروح يؤمن للنبي صلى الله عليه وسلم من الرجال النبي يرده، أو كان الشرط عام الأول وبعد كده نزلت الآية في استثناء النساء. أن حد اللي هيجي من المشركين يؤمن ويرروح للنبي صلى الله عليه وسلم النبي يرده، واللي هيجي من المؤمنين يروح يشرك قريش لا ترد.

فوافق النبي صلى الله عليه وسلم، وقال النبي صلى الله عليه وسلم إن اللي هيجي منهم لمؤمن والنبي رجعه وربنا هيجعله فرجا ومخرجا، والمؤمن اللي هيرتد يروح مشرك أغنانا الله عنه. ولسه بيتفقوا على النقطة دي ولسه ما خلصوش اتفاق، جاء أبو جندل ابن سهيل بن عمرو اللي بيكتب أصلا الصلح مع النبي صلى الله عليه وسلم، فجاء يرسف في قيوده، أبوه كان رابطه، سهيل بن عمرو كان رابطه، كسر القيود وجاي في بقية القيود يرسف ورمى نفسه وسط المسلمين. عارف الحقوني!

فكل المسلمين هاجوا وماجوا: لأ، ده تسيبه. فقال سهيل بن عمرو: وفي، لن أترك لك هذا، أول واحد يطبق عليه الشروط. فالنبي صلى الله عليه وسلم قال له: احنا لم نتم الشرط بعد. قال له: أبدا، ده لازم يرجع. فالنبي قال: أجيزوا لي. قال: أبدا، ده أول واحد هنطبق عليه يا إما ما فيش صلح أصلا.

فالنبي صلى الله عليه وسلم قال له: «ارجع، فإن الله جاعل لك فرجا ومخرجا». تخيل أبو جندل! أنت لو مكانه، أنتم هتسيبوني؟ يعني أنا جاي لكم أنتم تسيبوني؟ طب أنا غلطان أصلا! كان ممكن واحد يتصرف ويتصرف! طب أنا غلطان أصلا! يعني أنا سايب أبويا وسايب المشركين وجايين لكم في قيودي وأنتم ترجعوني!

أحيانا يا جماعة بيحصل ظروف، أحيانا بيحصل اضطرارات، أحيانا تحدث أقدار وابتلاءات لينظر كيف ستفعل أنت. ليه مشغول بردود أفعال الناس اللي حواليك؟ ليه مشغول؟ ماشي هو أخطأ مثلا لو الشيخ... طبعا مش أقصد النبي صلى الله عليه وسلم ده أمر ده يوحى إليه النبي صلى الله عليه وسلم يفعل ذلك، لكن أحيانا تمر بظروف أحيانا الشيخ أخطأ وعَبَس في وجهك والشيخ ده أعرض عنك والأخ ده عاملك غلط، هم أخطأوا، طب وانت؟ يعني هم أخطأوا طب أنا عرفت خلاص هم أخطأوا... طب وانت؟ يعني أنت ماذا ستفعل؟ هل سترجع؟

أبو جندل موقف غريب جدا، صعب! قال لهم: أنتم هترجعوني؟ فالنبي صلى الله عليه وسلم قال له: «إن الله جاعل لك فرجا ومخرجا». وبعدين أبو جندل راجع، سيدنا عمر مش مصدق، اللي هنرجعه ازاي؟ وسيدنا عمر كان يحب إخوانه من الصحابة، ازاي وكان عنده الشهامة ازاي هنرجعه؟ ويرروح يسأل النبي صلى الله عليه وسلم: ألست على الحق؟ ويروح يسأل أبو بكر: ألست على الحق؟ وسيدنا أبو بكر يقول: أيها الرجل، الزم غَرْزَه، إنه رسول الله صلى الله عليه وسلم وليس يعصيه. سيدنا عمر برضو مش قادر يسكت، فهو أبو جندل راجع سيدنا عمر قام ماشي جنبه كده وماسك السيف بتاعه بيحركه ويقول إيه: اصبر يا أبا جندل، إنما دم أحدهم كدم كلب، وقاعد يحركه يعني سيدنا عمر عايز يقول له إيه: خد مني السيف واضرب رأس أبوك، هي تولع نخبط بعض خلاص الموضوع خلص الصلح يخلص.

فقالوا لكن الرجل ظن بأبيه خيرا. والحمد لله، أنا ما عملتش كده يا أبو جندل، التزم بأمر النبي صلى الله عليه وسلم، وبالفعل جعل الله فرجا لأبي جندل لأنه صبر احتسابا لوجه الله سبحانه وتعالى، ما انشغلش: أنتم رجعتوني، أنا بعد ما جيت لكم ترجعوني؟

لو قعدنا نذكر كمية الأحداث اللي مرت على سواء أنبياء أو صحابة أو تابعين أو غيرهم وكانوا بمفردهم، كانوا لوحدهم. لذلك في درس -آه، عشان ما أطولش في النقطة دي ممكن ترجعوا له وتكلمت فيه بالتفاصيل- الثبات في الأمر بالمعروف والنهي عن المنكر ولو لوحدك، الثبات في الدعوة إلى الله ولو لوحدك، الثبات في الجهاد ولو لوحدك، الثبات في الإيمان ولو لوحدك، الدرس اسمه: حتى لو لوحدك. يعني لا... بلاش فكرة أن أنا مش لاقي حد معي، فبالتالي هأبعد، الدرس بعنوان أرجو أن ترجعوا له بعنوان: حتى لو لوحدك؛ عشان نتجاوز النقطة دي وننتقل إلى بقية النقاط.

يبقى إذا ثوابك أثناء انفضاض الناس مختلف تماما. وصريحة آية بتوضح الأمر: ﴿لَا يَسْتَوِي مِنْكُمْ مَنْ أَنْفَقَ مِنْ قَبْلِ الْفَتْحِ وَقَاتَلَ أُولَئِكَ أَعْظَمُ دَرَجَةً مِنَ الَّذِينَ أَنْفَقْتُمْ مِنْ بَعْدُ وَقَاتَلُوا وَكُلًّا وَعَدَ اللَّهُ الْحُسْنَى﴾ [الحديد: 10]. اللي بذلوا أوقات الاستضعاف وأوقات الفتن وأوقات الابتلاءات وأوقات انفضاض الناس ثوابهم أعلى بكتير. ماشي، الكل إن شاء الله له ثواب وكلا وعد الله الحسنى، لكن لن يستويان، لن يستويان أبدا، لن يستوي أبدا، مش ممكن! لا يستوي منكم من أنفق من قبل الفتح وقاتل، قبل الهجرة أو قبل فتح مكة على خلاف بين أهل العلم، أو الفتح المقصود فيه الحديبية، أيا كان فترات الفتح والتمكين، اللي بيبذل فيها ثوابه عظيم جدا.

فأحيانا تحدث أوقات زي اللي احنا فيها دي، الأوقات دي فرصة، يعني الأوقات دي فرصة أن ترتقي في الجنان، فرصة للصعود إلى أعلى درجات الفردوس الأعلى، مش فرصة للهروب، مش فرصة للانفضاض، مش فرصة لترك الثغور، مش فرصة تقول: طب أنا إي اللي يخليني استحمل الضيق والبهدلة ويا عم أهي يا عم، أنتم تاعبيني ليه ووجعين دماغي ليه؟ الواحد يعيش بقى خلاص زي بقية الناس ويفكر زي بقية الناس، والدين يصبح مكون بسيط ضمن مكونات حياتي وخلاص. يعني خلاص، يعني أنتم عايزين مني إيه يعني؟ مش هصلي؟ ولو معي فلوس أبقى أطلع أعمل عمرة، مش ده المطلوب مني؟

ويصبح الدين بعد ما كان... أنا قلت الدرس ده واللي قبله يخاطب الكادر العامل، أنه لأ، ده بيرجع يقول لك: لا يا عم، أنا عايز أبقى واحد عادي. وكنت اتكلمت لو دي طاقته ودي إمكانياته وكان محمل نفسه ما لا يطيق خلاص ما فيش مشكلة، لكن في فرق بين الارتداد في المفاهيم وخور العزيمة والوهن اللي بتدوبه في القلوب وانه يعترف بده وبين أن ده إمكانياته.

دي كانت النقطة الأولى: مسألة من أهم عوامل الثبات أن تتذكر ثواب الثابتين في زمن الفتنة ثوابهم عظيم ثواب القابضين على الجمر. كُن منهم واسأل الله سبحانه وتعالى، اسأل الله سبحانه وتعالى أن تكون منهم، اطلب من ربنا أنه يثبتك. ثوابهم عظيم، تذكر الثابتين، اقرأ في سيرهم، دعك من المعاصرين، الحقيقة لا تؤمن عليه الفتنة، ربنا يثبتنا جميعا يا رب.

أذكر المرة اللي فاتت أن تكثر من دعاء: اللهم إني أعوذ بك من الحول بعد القوة. اللهم يا مقلب القلوب ثبت قلبي على دينك. أجنبني وبني أن نعبد الأصنام. تكثر من الدعاء، أنت لن تثبت بقوتك، بل بالافتقار إليه سبحانه وتعالى.

النقطة الثانية: بعد ما ذكرنا أمثلة للناس الثابتين وتذكر ثوابهم، أحيانا من أسباب الثبات -احنا قلنا المرة اللي فاتت أسباب الحور بعد كده أسباب الثبات، الدرس اللي فات لو عكست أسبابه هتحصل على أسباب الثبات، ودرس النهاردة لو عكست أسبابه هتحصل على أسباب الانتكاسة- من أسباب الثبات: عدم الالتفات للقضايا والخلافات والجدليات والشكاليات. أحيانا الإنسان بيدخل نفسه في المشاكل اللي هو مش قدها، زي ما اتكلمنا المرة اللي فاتت على مسألة: «لا ينبغي لأحدكم»، حديث النبي صلى الله عليه وسلم، «أن يذل نفسه». قالوا يا رسول الله: وكيف يذل نفسه؟ قال: «يتحمل من البلاء ما لا يطيق». وأشرنا لنقطة اللي بيرمي نفسه وبيدخل نفسه في حاجات في الدين هو مش قدها، أحيانا ده بيحصل، أن الإنسان يدخل نفسه ويشغل باله بقضايا هو مش قدها، هو مش قد القضايا دي، فبالتالي بيقعد يتحمل إشكالياته وهو مش قدها، لماذا؟ أنت انشغل بما تقدر عليه.

النقطة دي مع النقطة رقم ثلاثة -هأقول نقطة رقم ثلاثة وأفسر في النقطتين دول عشان نفهم أنا قصدي إيه- النقطة رقم ثلاثة: إذا لم تستطع فكر التغيير فعليك بفكر النجاة.

رقم ثلاثة: إذا لم تستطع فكر التغيير فعليك بفكر النجاح. يبقى رقم واحد: تذكر ثواب الثابتين في الفتنة. رقم اتنين: عدم الالتفات إلى القضايا اللي بتؤدي للوقوع في الخلافيات والجدليات والإشكاليات والابتلاءات اللي أنت مش قدها، ما تقحمش نفسك فيها طالما لسه ما عندكش الزاد بتاعها.

رقم ثلاثة: إذا لم تستطع فكرة التغيير فعليك بفكر نجاة. رقم اتنين وتلاته بقى، يعني إيه اللي أنا عايز أقوله؟ أحياناً أنك أنت بتفكر في قضايا أُمَميَّة كبيرة، وتقعد تقرأ زي ما اتكلمنا في مسألة الدين الثوري في المرة اللي فاتت، قضايا سياسية ضخمة جداً وتقعد تقرأ في الصراع العالمي بين الدول وتقرأ في الأزمات الاقتصادية الكبيرة وأنت في الآخر فرد، والجماعات عمالة تنهار وأنت فرد مش عارف تعمل إيه، فتبدأ توصل من كتر التفكير -ركز معي في الكلمة اللي أنا هاقولها- التفكير المفصل في هذه القضايا والاهتمام بكل هذه المجريات من حولك وكل ما يجري من حولك من أحداث، الاهتمام التفصيلي بها وأنت ما عندكش زاد أصلاً لها ولا عندك القدرة على التغيير فيها ومصمم أنك تُحْدِث تغيير، وتيجي تتحرك تفاجأ أن كل أعمالك، كل اللي أنت بتعمله في الدين ما بيعملش أي تغيير في المنظومة العالمية دي ولا بيغير في الأزمة الاقتصادية حاجة ولا بيغير في الأزمات السياسية حاجة، والناس زي ما هي في ابتلاءاتها والمسلمين زي ما هم مستضعفين، فتبدأ تحبط، فتبدأ يجي لك إحباط.

طيب، حل ده إيه عشان أثبت؟ واحد يقول لي: أنت قصدك أن أنا ما اهتمش بأمر المسلمين وأنكب على نفسي وأكون منعزل وما ليش بأي حاجة؟ لأ، أنا قبل ما أصدق دي -دي ممكن نوصل لها- لكن أنا أقصد أنك تتوازن بين حاجة اسمها التفكير الفردي والتفكير الأُمَمي. يعني إيه؟ التفكير الفردي أنك أنت كفرد محتاج حاجات، محتاج تصلي، محتاج تذكر الله، محتاج عوامل ثبات كفرد. أنت كفرد محتاج تطلب العلم، محتاج تقرأ القرآن؛ كتير من الناس اللي بيقرأوا كتب سياسية وضخمة ومش عارف كتاب مين في الأزمات الاقتصادية السياسية العالمية وكتاب كذا، هو لا يستطيع أن يقرأ القرآن، هو لو اتقال له صفحة قرآن ولا يستطيع أن يقرأها أصلاً، هو يعني هو في الدين في قمة الضعف، طب كيف هيثبت؟

يا جماعة، احنا عايزين ننصر الدين ولا عايزين نحقق إنجاز؟ يعني دلوقتي أنا عايز أعمل تغيير عالمي في الواقع ولا أنا عايز أصل إلى الفردوس الأعلى؟ ما هو اللي عايز يرضي ربنا يمشي على طريق ربنا، احنا عندنا الوسائل لها أحكام الغايات، فأنت إزاي هتغير بدون زاد؟ النبي صلى الله عليه وسلم لما طلب الله منه سبحانه وتعالى أن يخرج الناس من الظلمات إلى النور، بدأ معه بالزاد، بقيام الليل، بقراءة القرآن: ﴿قُمِ اللَّيْلَ إِلَّا قَلِيلًا﴾ [المزمل: 2]، وكذلك الصحابة، فرض عليهم القيام عام كامل بيصلوا قيام الليل فرض عليهم. ده من الزاد، لن تستطيع أن تغير بدون زاد، بدون نقطة رقم أربعة اللي هتكلم فيها؛ مسألة ضعف إيه؟ أو لو احنا بنتكلم في أسباب الثبات، أهمية وجود هذا الزاد في حياتك.

يبقى أحياناً بيحصل نوع من -أو الأول قبل الأحيان- احنا محتاجين نوازن بين التفكير الفردي والتفكير الأُمَمي. التفكير الفردي: علمك، عبادتك، تحصيل العلم. أحياناً ممكن واحد يقول إيه: وأدرس نحو ليه؟ ده هيغير إيه في مشاكل الأمة؟ وأدرس مصطلح حديث ليه؟ وده يغير إيه في مشاكل الأمة؟ أهتم بصلاة الضحى ليه؟ أحفظ القرآن ليه؟ ما القرآن مكتوب. يعني ده لما بيضغط التفكير الأُمَمي على التفكير الفردي، وأحياناً يضغط التفكير الفردي على التفكير الأُمَمي يقول لك: أنا مالي، أنا مالي باللي بيحصل في فلسطين، وأنا مالي باللي بيحصل في بورما، وأنا مالي باللي مش عارف إيه. لأ، ده غلط، أنت محتاج توازن التفكير الفردي والتفكير الأُمَمي. التفكير الأُمَمي دايماً خليه على حسب طاقتك وإمكانياتك؛ أنت فرد عادي لا بتنتمي لمجموعة كبيرة ولا لك قرار تغييري ولا أفكارك دي هتؤدي لنوع من التغيير في قرارات العالم الإسلامي، فانت بالتالي حاول التفكير الأُمَمي ما يبقاش طاغي، خليه مجمل مش مفصل، خلي التفكير الأُمَمي هنا إيه؟ مجمل، بلاش تتابع تفاصيل التفاصيل التفاصيل، خليك بتابع المجمل مع أحياناً بعض التفاصيل في القضايا، والتفكير الفردي لازم يحصل بينه توازن.

طيب، يبقى ماذا سيحدث إذا طغى أحدهما على الآخر؟ طيب، لو طغى أحياناً التفكير الفردي على التفكير الأُمَمي، يعني إيه؟ واحد مش مشغول خالص بقضايا أمته، ولا شاغل باله باللي بيحصل في الواقع ولا إيه الأزمات اللي موجودة ولا إيه اللي بيحصل من انتشار الشبهات والشهوات ولا إيه اللي موجود في الواقع خالص، ولا الناس واقفه فين في الدين ولا إيه مرحلتها ولا محتاجين إيه قبل إيه، هو: يا عم أنا قاعد مع نفسي في مكتبتي قافل عليَّ أو في صومعتي أو أو. ده لما بيطغى عند ده، الشخص ده ممكن أصلاً يدخل المسلمين في صراع قضايا هما مش محتاجينها، ممكن أعيش في قضايا وهمية ندخل -وزي ما بنشوف دلوقتي أحياناً على الفيسبوك- في صراع بعض الناس مدخلين الناس في صراع في قضايا كلامية جدلية محلها الكتب والأبحاث والقضايا، مش محلها عموم المسلمين خالص، بل بالعكس المفروض يُنْهَى عن نشر هذه القضايا أمام أمور المسلمين.

طغيان التفكير الفردي ده على التفكير الأُمَمي وعدم الاهتمام بقضايا الواقع وفهم الواقع السياسي والاقتصادي أحياناً بيؤدي أن الشخص ده يُلْعَب به، وأن الشخص ده يكون أداة في بعض الأدوات أو بعض أدوات الظلم والتفكير السياسي العالمي، يلعب ويكون أداة لضرب إخوانه وهو مش عارف لأنه مش مطلع على إيه اللي بيحصل، فمهم جداً يكون عنده نوع من الاطلاع أو مش لازم هو، غيره فيرجع إلى غيره، ويحدث نوع من التعاون: أنا متميز في باب الحديث وأنت متميز في باب السياسة وده متميز في باب الاقتصاد وده متميز في التفسير، يحدث نوع من التعاون والتكامل، ونرجع لبعض ونستفيد من بعض، فالشخصية الحركية تستفيد من الشخصية العلمية، والشخصية العلمية تستفيد من الشخصية اللي عندها نوع من المعرفة الاهتمام المعرفي والثقافي، عشان لطغيان التفكير ده وانعزاله وعدم استفادته من إخوانه ده ممكن يؤدي أنه يلعب به.

العكس بقى: طغيان التفكير الأُمَمي على التفكير الفردي؛ واحد شاب ما تلقاش أي تعليم شرعي، ما حصلش أي تدرج في البناء العلمي، اهتمامه التعبدي صفر، نادراً أصلاً يقوم الليل ويطيل قيام الليل والدعاء والتضرع والكلام ده زي ما بنتكلم في نقطة رقم أربعة، وتلاقيه مهتم جداً بالقضايا العالمية والتغيير والثورات ومش عارف إيه، طبعا هو في الآخر بيحصل له إيه؟ أن ده بيفشل، وده وارد النشأة زي ما كنا ذكرنا المرة اللي فاتت فيحبط، وييأس، ويكثر من الصياح والولولة بدون عمل، وأمامه أعمال ينجزها وما بيعملهاش. يعني دلوقتي هو قدامه الشخص ده اللي بيضغط عليه التفكير الأُمَمي على التفكير الفردي: قدامه أنه يحفظ، قدامه أنه يدعو، قدامه أنه يرد على شبهة الملحد ده، قدامه أنه يتعلم ويُعلم الناس كيف تصلي، قدامه أنه يكلم الناس اللي قاعدة على القهوة تقول لها قومي تصلي، قدامه أنه ينصح. لا، يقول لك: لأ لأ لأ، أنا عايز أعمل تغيير علني. أيوه يا إبني، ما هو التغيير العلني بيتدرج، يعني أنت مش هتحصل تغيير عالمي بعصا سحرية، لأه، وكل اللي أنتم بتعملوه ده بيضيع الدين واهتمامكم بالجزئيات دي يؤدي إلى مش عارف عدم الاهتمام باسترجاع المسجد الأقصى وبهدم الهيمنة الأمريكية. ما هو يا إبني ده هنعمله ازاي؟ يعني لو احنا نقدر نهدم الهيمنة الأمريكية على دماغهم هنعملها، بس دي هتتعمل ازاي؟ بلاش أنك تضخم قضايا احنا ما عندناش أدواتها وتعيش جواها وتعيش في بوتقة جواها ورافض أي جزئيات من القطاعات تعملها.

يعني ما اهتمش، ما حدش قال لك ما تهتمش بده وما تدرسش الملف ده، لكن يكون توازن؛ التوازن إما يكون على مستوى الشخص اللي في نفسه يحدث توازن، أو بينه وبين إخوانه، حد يغطي النقطة دي وحد تاني يغطي النقطة دي، حد يكون بيقرأ تقارير مثلاً مؤسسة راند وعارف إيه اللي بيحصل والتخطيط وأزاي بيصنفوا الدعاة وأزاي بيتم استغلالهم، وحد يكون مهتم بالعلم الشرعي والقضايا دي وإزاي نستفيد من بعضنا في القضايا دي. يبقى دي نقطة رقم اتنين ونقطة رقم ثلاثة.

نقطة رقم ثلاثة، كنت بقول نقطة اللي عند العجز عن فكرة التغيير؛ طب افرض أنا حصل انهيار في المجموعات الكبيرة والقيادات العالم الإسلامي ولا تحس بحالة من الإحباط، اعمل إيه؟ انتقل بقى لفكر النجاة، ده مش غلط، ده مش غلط. النبي صلى الله عليه وسلم بيقول في صحيح مسلم: «من خير معاش الناس له» أفضل ناس، مين هما؟ ذكر نوعين النبي صلى الله عليه وسلم، الأول وده الأفضل: «رجل ممسك بعنان فرسه، يطير على متنه كلما سمع هيعة أو فزعة طار إليها يبتغي الموت مظانه». يبقى ده الأول، ده أحسن واحد.

طب لازم كلنا نعمل كده؟ لأ، التاني أو «رجل في غنيمة» جاب شوية رأس مال صغيرين أيامها كان شوية غنم خدهم «في رأس شعفة من هذه الشعف» أو في «في بطن واد من هذه الأودية» بيعمل إيه؟ انعزل جنب جبل وقعد جنب السهل وجنب الماية وجنب البئر على قد زاده أو أي بقى حاجة شبهها في وقتنا المعاصر، بيعمل إيه؟ يقيم الصلاة، ويؤتي الزكاة، ويعبد ربه حتى يأتيه اليقين، «ليس من الناس إلا في خير» ما يأذيش الناس. إيه ده! طب ما ده عازل الصراع؟ ما هو ما كانش عنده القدرة على المواجهة، ده في زمن الفتنة وما كانش عنده القدرة، يعني بلاش نحمل الناس كلها زي ما ذكرنا المرة اللي فاتت، بلاش تحمل كل الدعاة أنهم يقوموا ويعملوا نفس الفعل، مش لازم.

النبي صلى الله عليه وسلم أيضاً في صحيح مسلم في الحديث اللي قبله ده على طول، سُئل النبي صلى الله عليه وسلم: أي الناس أفضل؟ فقال رسول الله صلى الله عليه وسلم: «مؤمن يجاهد بنفسه وماله في سبيل الله». ده أفضل واحد. قال: ثم من؟ قال: «رجل معتزل في شعب من الشعاب يعبد ربه ويدع الناس من شره».

يبقى أنا مش قادر دلوقتي، أنا حصل لي حالة من -خلاص خلينا نتكلم لولا الصراحة- أنا يا عمي فقدت الامل أن الإسلاميين يعملوا نوع من الإصلاح العالمي والتغيير العالمي، أو ما أكفر بالقضية؟ أروح انطلق في الشهوات والشبهات؟ أنت تنجو، أنت تصل الفردوس الأعلى على قدر طاقتك، أنت تصل ولوحدك. هتقول لي: ما أنا مش عارف أعمل تغيير؟ اعمل تغيير على مستوى نفسك، على مستوى أسرتك، على مستوى منطقتك، على مستوى مسجدك الصغير، الزاوية اللي بتصلي فيها. يعني بلاش الحل أورمان، يعني يا إما أبقى مجاهد في سبيل الله يا إما منتكس في سبيل الشيطان، يعني هو ما فيش اختيار في النص؟

فإذا لم تستطع فكرة تغيير، انتقل إلى فكر النجاة زي ما النبي صلى الله عليه وسلم قال. مش مهم تناقشني في المصطلحات -يعني لو أنت معترض على كلمة فكر التغيير في الفكر ده- مش مهم، خلينا في الحديث، يعني خلينا في اللي ما فيهوش نقاش، خلينا في حديث النبي صلى الله عليه وسلم: أنت مش قادر تكون الصنف الأول، انتقل إلى الصنف الثاني. خلاص، مش قادر قلنا الأفضل الأول، زي بالضبط -ودي نقطة رقم خمسة أو نقطة رقم أربعة- تذكر الثواب رقم واحد، النقطة رقم اتنين: عدم الالتفات للمشاكل والقضايا اللي تدخلك في قضايا أنت مش قدها، رقم ثلاثة: فكر النجاة وفكر التغيير.

رقم أربعة: واحد يقول لي طب ما أنا أحياناً باجي اتحرك لوحدي، أو مجموعات أو نوع من العشوائية، أنا عايز منهجية وعايز خطة تنقلني من اللحظة الراهنة إلى وضع التمكين، أنا عشان بقى اتحرك ما -وما نضيعش وقت ونوصل التمكين في أسرع وقت ممكن-. اللي بتطلبه حضرتك ده بصراحة يعني هو مش موجود، يعني ممكن تطلب حاجة تانية؛ يعني اللي أنت طالبه ده الصنف ده مش موجود فيما أعلَم، يعني أن حد ييجي يقول لك أنا هرسم لك خطة من اللحظة اللي احنا فيها لنقطة التمكين المرجوة اللي هي ممكن تكون متوهمة، هي مش موجودة أصلاً بس ممكن يعني أن احنا نوصل لمرحلة أن احنا قتلنا الوحش وقاعدين يعني بنسمع قرآن وما فيش مشركين في الدنيا وما فيش أي صراع نفسي ولا صراع مع الباطل وخلاص وصلنا، ده مش موجود يا جماعة، يعني إلى أن تقوم الساعة في صراع وفي حروب بين المسلمين وبين اليهود، وبعدين المسيح الدجال، ففكرة أن احنا هنوصل لمرحلة الانتخاخ في الدين وأن ما عادش فيه أي نوع من أنواع المجاهدة ده مش موجود، يعني أما الناس كانت في مكة بتتعذب كان نفسهم في مرحلة التمكين، راحوا المدينة انتقلوا إلى أحكام أخرى، فبدل ما الحكم هنا كان الصبر على الضرب، الحكم هنا روح أنت اضرب جاهد، الحكم هنا أن احنا هنقيم الصلاة ونعمل أفعال البر عشان ما عندناش لسه تطبيق لبقية الشريعة، لما رحنا المدينة نزلت أحكام كتير جداً جداً هنطبقها، فهنا كنا مشغولين بعبادات وهنا مشغولين بعبادات، في الاستضعاف أنت مشغول بعبادات وفي التمكين مشغول بعبادات، طول ما أنت حي أنت مطالب أنك تجاهد وتعبد ربك حتى يأتيك اليقين اللي هو الموت.

يعني ما فيش حالة هنوصل لها أننا قاعدين كده وأيه ومأنتخين، يا فاكر أيام المجاهدة، لأ ده مش هيحصل، ده في الجنة إن شاء الله.

﴿عَلَى سُرُرٍ مَّتْكِئِينَ﴾ [الطور: 20] أو ﴿عَلَى الْأَرَائِكِ يَنظُرُونَ﴾ [المطففين: 23]. أنت قاعد مروق في الجنة في الصحبة الصالحة مع إن شاء الله ربنا يرزقنا ذلك، مع النبي صلى الله عليه وسلم تتذكر جهادك وبذلك. لكن ده في الدنيا مش موجود، بتمر أوقات كده أحياناً لحظات آه، لكن مش هتبقى دي اللحظات الدائمة. يعني ما فيش راحة في الدنيا هنا، راحة الصدر. ﴿وَأَصْلَحَ بَالَهُمْ﴾ [محمد: 2]، واللي يرجع اللي عايز تفصيل الآية دي في تفسير سورة محمد، شرحتها بالتفصيل أن حتى اللي في وسط الأزمات زي المجاهدين ربنا يصلح لهم بالهم.

طيب، يبقى يجينا نقطة رقم أربعة اللي بيسأل: أنا عايز منهجياً، طب يعني اتحرك عشوائي؟ اتحرك عشوائي؟ القاعدة اللي أنا عايز أقولها برضو ممكن تعترض عليها، أنا يهمني تطبيقها؛ المنهجية أفضل من العشوائية، ولكن العشوائية أفضل من التوقف. المنهجية أفضل من العشوائية، عندك منهجية معينة في أي شيء، دعوة، علم، أي تغيير، إصلاح مجتمعي، أياً كان، عندك منهجية معينة وبصورة معينة اتحرك فيها، ما فيش، اخبط، اخبط. العشوائية أفضل من التوقف، التوقف ده يا جماعة شيء مخيف، التوقف شيء مؤلم، التوقف شيء محبط. النفس بصراحة البشرية بتحب أن يبقى عندها نوع من الإنجاز تمسكه في إيدها.

يعني النفس تحس أن هي يعني حتى يعني أما حد يكون محبط، بعض دكاترة علم النفس يقول لك ايه؟ اعمل لنفسك، حط لنفسك اهداف صغيرة عشان تحققها عشان تعرف تنجح. لكن أنت تحط نفسك قضايا كبيرة فتفشل، تحس أن جبل أتهد على دماغك فما فيش أمل، لأ. أنك تتحرك بصورة ولو مش منظمة أفضل من التوقف، التوقف ده حالة من الإحباط واليأس. ده الواحد لما يكون بيخطب جمعة كل جمعة وبعدين يتوقف تلات أسابيع وييجي يرجع خطبة الجمعة يحس أن هي ثقيلة جداً على صدري، إيه ده أنا كنت بخطب بقاله سنتين؟ المتوقع اللي بيحفظ قرآن وبفضل الله مدارك الحفظ عنده واسعة جداً وتلاقيه بيلقط الآية بسرعة، يتوقف شهر، شهرين ييجي يرجع، إيه ده! أنا حاسس بصعوبة! طب ما مش لازم نحفظ قرآن؟ لأن التوقف بيعمل حالة من نوع من التيبس، فعشان ترجع تاني بترجع تحتاج تلين تاني، في كل حاجة، في قيام الليل، في الصلاة، في المسجد، في الصيام. يعني شوف اللي صام رمضان كان حاسس أن ما عندوش مشكلة، توقف شوية عن الصيام، ييجي يصوم تلاقي إيه ده يا! ده النهار طويل قوي! طب ما أنت كنت بتصوم نهار طويل قوي في رمضان! التوقف أمر سيء، إياك أن تتوقف. معلش أنا طولت عليكم، سريعا كده نقطة رقم دي كانت نقطة رقم أربعة.

نقطة رقم خمسة؛ من أسباب الثبات الربانية، وساعة العبادة، زاد الطريق. ربنا سبحانه وتعالى في أول سورة ص، لما ذكر جهد المشركين وهم بيوصوا بعض أن امشوا واصبروا على آلهتكم، الصفحة الأولانية في سورة ص مليئة بحركة المشركين ومحاولة منهم لهدم الدين ونشر الشبهات والاستهزاء: ﴿عَجَّل لَّنَا قِطَّنَا قَبْلَ يَوْمِ الْحِسَابِ﴾ [ص: 16]. الجو الحركي ده بتاع رصد حركة المشركين أنت متوقع أن ربنا يقول للنبي صلى الله عليه وسلم في آخر الآيات دي: اصبر على ما يقولون. طب يا رب أنا محتاج زاد للصبر! اصبر على ما يقول أمريكا وروسيا والملاحدة والشبهات؟ اصبر إزاي يا رب؟ ده ده أمر للمؤمن ثقيل على قلب المؤمن، اللي بيحمل هم هذا الدين بيتقطع لما يشوف ده، اصبر على ما يقولون. طب اصبر إزاي؟ ﴿وَاصْبِرْ عَلَى مَا يَقُولُونَ وَاذْكُرْ عَبْدَنَا﴾ [ص: 17]. أنا كنت متوقع مثلاً أذكر عبدنا إبراهيم إذ حطم الأصنام، أو موسى إذ وقف أمام فرعون، واذكر عبدنا داود ذا الأيد إنه أواب. ثم لحظات العبادة والتسبيح وتجاوب الكون مع تسبيح داود وتسخير الجبال والطير يسبحن معه بالعشي والإشراق، لحظات الخلو والعبادة هي الزاد للصبر.

يا زاد المؤمن، هذه اللحظات التي تنقلك إلى عالم الغيب، هذه اللحظات التي تستشعر فيها أنك جزء من هذا الكون العظيم الذي يسبح بحمد الله وتجاوب الجبال والطير مع تسبيح داود، استحضار أن الكون كله من جنود ربنا: ﴿وَلِلَّهِ جُنُودُ السَّمَاوَاتِ وَالْأَرْضِ﴾ [الفتح: 4]. أن تعايش عالم الشهادة فقط -ركز معي في الجملة دي- أن تعايش عالم الشهادة فقط أثناء الصراع بين الحق والباطل أمر مدمر نفسياً. لابد أن تستعين بعالم الغيب، لابد في كل فترة من الفترات أن تنتقل وتشاهد عالم الغيب وترى الملائكة حافة من حول العرش، ما من موضع أربع أصابع في السماء إلا وفيها ملك ساجد وقائم، أن تستشعر البيت المعمور ويدخله كل يوم سبعون ألف ملك، أن تستشعر جنود الله سبحانه وتعالى من الرعد والبرق والزلازل والبراكين، أن كل الكفار يهلكهم الله بصيحة واحدة، أن هذه الأرض أصلاً هي ذرة في فلاة في هذا الكون، من هم هؤلاء المشركون الذين يعاندون الله؟ إنهم علق. إنهم علق، ﴿كَلَّا لَا تُطِعْهُ وَاسْجُدْ وَاقْتَرِب﴾ [العلق: 19]، جاءت مع سورة العلق. أن أبا جهل هذا الذي يأمرك أن تدع الصلاة هو مجرد علق.

أن تستحضر هذه المعاني لن تستحضرها إلا بالسفر لعالم الغيب. والسفر لعالم الغيب، إذا ما ذكرت في درس موسم العشر والذكر، حكم وآثار، السفر لعالم الغيب يكون بالأفكار، بالقرآن، بالعبادة، بالخلوة الطويلة مع الله سبحانه وتعالى بعيداً عن الناس، زي ما كان شيخ الإسلام ابن تيمية يقول: هذه خلوتي، هو عن الخلوة يقول: هذه غدوتي. أن ده الزاد بتاعك، إن لم تتقاضاه تسقط، إن لم تحصل على طعامك تسقط، كيف تريد أن تدافع الهيمنة الأمريكية وأن تنصر الحق وأن تدافع الباطل وأن تدافع وأن تدفع الظالم بدون زاد؟ هتعمل دي إي؟ أنت هنا تعتمد على قوتك؟

كان صلى الله عليه وسلم يقول: «اللهم بك أصول وبك أجول وبك أحول وبك أقاتل». بك وحدك سبحانه وتعالى، لا أعتمد على أحد، ولا حتى على من معي من الناس. في هذه اللحظات لابد منها في طريق لنصرة هذا الدين، وقلنا الدروس دي تخاطب الذي يريد أن يعمل لنصرة دين الله سبحانه وتعالى: «للعامل فيهن أجر خمسين». تذكر الثواب، عدم الالتفات للقضايا التي تؤدي إلى السقوط والاهتمام بالمجريات، وهنا ممكن في النقطة رقم اتنين تقرا كتاب المجريات بتاع إبراهيم السكران. نقطة رقم تلاتة: فكر النجاة عند العجز عن فكر التغيير. نقطة رقم أربعة: المنهجية أفضل من العشوائية، ولكن العشوائية أفضل من التوقف، إياك أن تتوقف. نقطة رقم خمسة: سعة ربانية، زادك في الطريق إلى الله سبحانه وتعالى: ﴿وَاصْبِرْ عَلَى مَا يَقُولُونَ وَاذْكُرْ عَبْدَنَا دَاوُودَ ذَا الْأَيْدِ إِنَّهُ أَوَّابٌ﴾ [ص: 17].

في النقطة الربانية دي ممكن واحد يقول لك إيه؟ يا عم أنت هتدروش علينا؟ لأ، ما هو مش معنى أنك أنت تاخد لحظات ربانية أنك أنت ما تخططش وما تبذلش وتطلع على خطط أهل الباطل، هي مزنة. زي ما ربنا سبحانه وتعالى قال في سورة سبأ: داود من فضله: ﴿يَا جِبَالُ أَوِّبِي مَعَهُ وَالطَّيْرَ وَأَلَنَّ لَهُ الْحَدِيدَ * أَنِ اعْمَلْ سَابِغَاتٍ وَقَدِّرْ فِي السَّرْدِ﴾ [سبأ: 10-11]. مشهد قمة العبادة والخلوة، وألن له الحديد، أن اعمل سابغات وقدر في السرد. بعض أهل العلم يقدر في السرد يعني وهو بيلين الحديد وبيضبط الحديد عشان يعمل الدروع أني أضبطها بالضبط، ويحط الحلقة دي في الحلقة دي، أو الحلقة دي في الحلقة دي تكون سابغة، يعني الدقة والإحكام والاتقان في التخطيط والترتيب. الآية دي جمعت التوازن بين الربانية وبين أن تبقى شخص عندك ترتيب وتنظيم وتبقى شخص حركي، أحياناً بيحصل عندنا نوع من التضاد؛ يا تلاقي شخص منعزل تماماً عشان يحاول يحافظ على قلبه، أو شخص بيتحرك وما بيقضيش وقت لقلبه تماماً، لأ، محتاج توازن بين النقطتين دول.

نقطة رقم كده يبقى النقطة رقم ستة تقريباً؛ خطورة التفكير بسياسة الأثر الفوري للعمل. ودي أشرنا إليها قبل كده في النقاط السابقة، أن بعد كده النقاط دي هقولها بسرعة، أغلبها أشرنا التفاصيل أشرنا لها قبل كده. من أسباب الثبات: ألا تنشغل بالأثر الفوري للعمل، لأن ده خلل في مفهوم التغيير، ودي ذكرناها في نقطة فكر النجاة وفكر التغيير، بلاش فكرة أنا هعمل ده عشان يحصل كذا، طب افرض ما حصلش كذا هترك العمل ده؟ لأ، خلي التغيير اللي أنت عايزه تغيير أخروي، يعني سبحان الله وبحمده أحدثت تغيير الآن في صحيفتك، في الجنة نخلة ساقها ذهب، الدعوة إلى الله أن تدعو إلى الله وينصرف الناس عنك أحدثت تغيير في صحيفتك، في درجتك في الجنة، يأتي النبي وليس معه أحد، يأتي النبي وليس معه أحد، بلاش تظن أن لازم يحصل نجاح دنيوي، ممكن ترى النصر، ممكن تموت ولا ترى النصر.

طيب، سريعا حاول من أسباب الثبات حاول تتقن ثغرة وتمسكه وتمسك به، ده هيخليك تثبت، لأن زي ما ذكرت قبل كده إحساسك بالنجاح في ثغر معين يخليك تكمل فيه، يعني لما بيحصل حالة الانفضاض وأنت ما عدتش قادر تكمل في يعني الدين ككل أو نصرة الإسلام ككل، لو أنت ماسك حاجة، لو أنت بتحفظ قرآن أبسط حاجة، لو أنت عندك علم من العلوم الشرعية بتدرسها، حاجة بسيطة خالص، لو أنت دارس حاجة معينة في الرد على الشبهات، لو أنت بتعلم الناس الخير، ده هيخليك تكمل لغاية لما تستعيد عافيتك وقوتك وترجع تاني لبقية الثغور، لكن امسك في حاجة. يعني ساعة لما يحصل حالة الانفضاض وأنت مش قادر، ده يا جماعة إيه؟ دي كلها طرق ازاي تغير طريقة تفكيرك عشان ما تقعش؟ أنت كان تفكيرك عالي جداً، طب حصل حالة من الانفضاض، كان عندك طموح عالي جداً، طب ده نهار، خلاص أسيب كل حاجة؟ لأ، ارجع تاني قبل بقية فكر النجاة، ممكن أرجع لفكر الثغر، يبقى أنا عندي فكر التغيير العام فشلت فيه، فكر الثغر فشلت فيه، فكر النجاة، المهم أن لا أتوقف، المهم أن لا ألقي الراية، أن أنا فقدت الأامل أن الدين بدل ما كان مكون ضخم في حياتي أصبح أنه مكون هامشي، أن هو يعني رسة حياتي كده زي ما العلمانية عايزة أن الدنيا طاغية والدين جوة المسجد في رسمة صغيرة كده، فأصبح الدين عندي في حياتي كده، عمرك كل أربع سنين وليمة عملها أو حاجة مثلاً للمساكين كل سنة، حاجة بسيطة كده وحاجة إيه تديني دعم روحي وخلاص، لأن ده أنا ده أنا بكلم العامل اللي كان ضايع خالص وبيعمل ده هو يرتقي، أنا بتكلم أن ازاي يكون كان له هم ونصرة الدين وبعدين يرجع يرجع يرجع لغاية لما يقع والعياذ بالله أن هو هدفه بقى ضعيف جداً جداً.

لأ، حاول ترتقي، إياك أن تتوقف وأن تلقي الراية وأن تنطفي هذه الجمرة. يبقى قلنا محاولة إتقان ثغرة من الثغور والتمسك به، يعني شعورك بالانجاز هيجعلك تكمل، وهنا ممكن نسمع درس إشكاليات اختيار الثغر، ترجعوا له، طب أنا مش عارف اختار ثغري؟ أتكلمت فيها بعض التفاصيل ممكن يحتاج جزء تاني للي مش عارف أصلاً يختار الثغر أو مش لاقي لنفسه أي مواهب خالص برده يكمل في حاجة كنت ذكرتها هناك: الدين العام.

طيب رقم تسعة تقريباً فيما أظن يعني أنتم أعدوا بقى براحتكم يعني ممكن فكر المجموعات. إيه فكر المجموعات؟ من أسباب الثبات؟ يبقى احنا قلنا من أسباب الثبات محاولة إتقان ثغرة من الثغور. طيب مش عارف أعمل ده لوحدي زي ما قلنا حتى لوحدك حاول فكر المجموعات. إيه فكر المجموعات؟ الواقع القديم اللي هو لسه كان ماضيه يعني بسيطة كان عبارة أن الواقع الإسلامي سريعا كده بتبص عليه؛ أما أن تجد شيخ من المشايخ الكبار أهل العلم المشهورين المنتشر، أو جماعة كبيرة من الجماعات، ممكن مع تغيرات وتحولات معينة دون الخوض في تفاصيل فيها ده ما عدش موجود بالصورة المثلى عند كثير مننا. حصل نوع من الانهيار أما سقوط بعض الرموز أو تشويش يعني التشويش عليهم أو إلقاء الشبهات عليهم، فما عدش بيتصدر أما إشكال في الشخص نفسه أو إشكال في الشبهات اللي بتلقى عليه، أو جماعات برده انهارت بسبب هم وقعوا في فساد مبين وودعم للظلم وغير ذلك فبالتالي سقطوا أو أياً كانت أسباب، كل ده ما عدش موجود بصورة مرضية لنا.

أطب أعمل إي؟ طب أنا أعمل مجموعات صغيرة، مجموعات صغيرة تبدأ تهتم هي بحاجة؛ مجموعة علمية بسيطة، مجموعة دعوية بسيطة، مجموعة خيرية بسيطة، بحيث يسهل أن هي تتحرك وتعمل نوع من الإنجاز. دايماً حتى على فكرة في معروف يعني أن مثلاً لما تبقى عربية نقل كبيرة بمقطورتين مثلاً أما تيجي تحود وتحرك حركتها صعبة، العربية الصغيرة يعني أو اللي راكب مثلاً موتوسيكل أو توكتوك تلاقيه عمال إيه يتحرك برة. أنا ما بقولكش كن توكتوك، بس احنا ما فيش إمكانية غير كده، يعني ما عندناش إمكانية دلوقتي الحاجات الضخمة الكبيرة خلاص دلوقتي في أزمة. فانت أما تيجوا مجموعات صغيرة يسهل أن أنت تتحرك وتاخد خطوات للأمام، اتفاقكم هيبقى سهل؛ نعمل كذا ولا كذا؟ خلاص كذا، يلا نتحرك. فاحاول توجد مجموعة بينكم نوع من التوافق، ولا سيما التوافق النفسي والتوافق في الاهتمام وتبدأوا تاخدوا خطوات للأمام أياً كانت المجموعات. الخطر بس في قضية فكر المجموعات دي اللي محتاجين أن احنا نتعلم؛ علاقة المجموعات دي ببعض، ما تهدمش بعض وإلا ده يؤدي إلى خلايا سرطانية كتير في المجتمع الإسلامي.

وأن علاقتها ببعض ما تفقدوهاش، ما تفقدوهاش علاقتهم بأهل العلم، أو نسميهم النخب العلمية، أو يعني مش معنى أن هم مجموعة حركية دعوية علمية خير أياً كان التصنيف، يبقى في ارتباط بينهم وبين بعض كويس جداً، ويرتبطوا بأهل العلم يبقى فيه مرجعيات لهم، والمرجعية التعليمية تحترم المجموعات.

ده من التصورات ممكن إن شاء الله نشرح في تصور المجتمع الإسلامي العامل لدين الله من خلال سورة الحجرات، أن ده إن شاء الله ممكن نحاول أشرحه لكم في مرة تانية إن شاء الله يعني، هو تصور قابل برضو للنقد يعني، فكرة أن إحنا حجرات، علاقة الحجرات ببعضها، علاقة الحجرات بالبيت الكبير، علاقة الحجرات بأهل العلم، إزاي يبقى بيننا علاقات جيدة.

لذلك شروط الحجرات كنت ذكرت أنها جت بعد سورة القتال اللي أدى للفتح لسورة محمد اللي أدى للفتح بعد كده سورة الحجرات حتى لا يضيع الفتح، يعني مهم جداً إحنا عشان نحافظ على أي مكاسب يبقى بيننا أخلاق كويسة مع بعض.

برضو مهم جداً خطورة لو أنا برضو إيه مسألة التربية على الذاتية، ده من أخطر النقاط وده أختم بها إن شاء الله، كان نفسي أزود عن كده بس أنا حاسس أن أنا للأسف الدرس طول مني، إحنا بنقول إيه أصلاً الفكرة من المحورية حتى لوحدك، وأنك تستمر وثواب عالي، ربي نفسك على الذاتية، يعني إيه أربي نفسي على الذاتية؟ أنا بزهق من القراءة، حاول تقرأ معلش، بزهق من السماع، حاول تسمع، بلاش كل اعتمادك على الغير، أنا لسة بقول فكر المجموعات الصغيرة بس حتى فكر المجموعات الصغيرة ممكن يفشل، ممكن يحصل أن أصلاً المجموعة دي عشان تقوم محتاج شخص يقودها أصلاً.

في حاجة اسمها ثواب الأوائل، في حاجة اسمها أن أنت تكون أنت راس الحربة اللي تفتح الطريق لغيرك، في حاجة اسمها أن واحد محتاج أن الناس محتاج حد يسفلت لهم الطريق، مين اللي هيسفلت لهم الطريق؟ يعني إحنا كلنا قاعدين وأنا بقول فكر المجموعات الصغيرة يبقى أنا محتاج إيه؟ آه أنا محتاج مجموعة صغيرة أنضم لها، ما هو مين اللي هيعمل المجموعة دي؟ لو أنا فضلت مستني المجموعة الصغيرة دي تنشأ، وأنت مستني المجموعة الصغيرة تنشأ، وده مستني المجموعة الصغيرة تنشأ، هنبقى قاعدين برضو مش هيحصل أي تغيير، لازم حد هيدفع ثمن ده، لازم حد هيقوم ويضحي ويحاول يجمع الناس ويتحايل على ده معلش يعني يصبر على خامة ده وعلى كسل ده وعلى بذل ده القليل وعلى مواعيد ده المضروبة وعلى ده اللي أصلاً كل شوية يوعدنا ما بيجيش، وعلى فلان اللي جاي أصلاً عشان ياكل ويمشي، مش مشكلة واحد يصبر على كل ده ويتعب ويحاول يجمع الناس ويقترح عليهم أفكار، يبقى في حد عنده ذاتية، ما هو مش هيحصل أن حد ممكن يقوم إلا بأن لازم حد يكون عنده نوع من الذاتية لازم.

فبالتالي فكرة زرع الذاتية والتربية عليها عامل بالضبط زي اللي بيروح الجيم هيتعب، هيتعب فعلا هيتبهدل ويقاوم ما يكره، أنا مش قادر أسمع أنت بتقول لي اتبنى علميا ما فيش مشايخ، طب اسمع السلسلة دي، اتبنى مثلاً في باب معين من أبواب الفقه مثلاً أو في الفقه، مر على الفقه، كم السلسلة دي عام؟ مية وستين درس، نعم، اسمع لوحدي، لأ ده أنا كنت عشان أصلي الفرض محتاج حد يتابعني، ما هو لازم حد يتعلم ده يا جماعة، لازم حد يكون عنده بناء ذاتي.

على فكرة حتى اللي كانوا بيروحوا للمشايخ أيام ما كانت الدنيا مفتوحة أو بيروح يطلب العلم أو حتى من قديم الزمن، اللي بيتوقف عند الحد الذي يضع له شيخه، أن الشيخ مش هيديك كل حاجة في الدنيا، ده كان ما بيرتقيش، الشخصيات اللي بترتقي وبتقود هي اللي عندها ذاتية، يعني الشخصيات اللي هتجمع الناس دي لازم هي اللي عندها على فكرة في أي حاجة، يعني حتى في اللي عاوزين نلعب كورة، أن شخص ينزل ويلف ويحجز ومش عارف يجمع ويكلم، لازم حد يتحرك، في أي حاجة في الدين أو في الدنيا لازم حد يتحرك، كن أنت هذا الشخص في زمن الفتن في زمن الانفضاض، كن أنت الذي تسير على درب النبي صلى الله عليه وسلم، واستحضر كلمة وتركوك قائماً، كن أنت القائم الذي يرجع الناس إليه، يعني لما الناس انفضت من الخطبة رجعوا لقوا النبي صلى الله عليه وسلم وتركوك قائماً، كن أنت الشخص هذا الذي يثبت ويكون النواة اللي ترجع تلتف الناس حواليها تاني.

كن أنت اللي يعمل المجلس في المسجد اللي يفتح كتاب أي كتاب رياض الصالحين ويقرأه والناس تلتف حواليه، أنت اللي يعمل بداية العام الخيري اللي يجمع خمسين جنيه ويديها للأسرة الفقيرة، أنت تكون البداية، أن تكون النواة، الناس محتاجة أنوية تلتف حواليها، وده أصلاً أحد التصورات للحياة يعني أن في أنوية والناس بتلف حواليها، وحسب قوة النواة وذاتية النواة ونور النواة القوي العدد اللي بيلف يبقى أكبر، في نواة هنا حواليها ناس بتلف أكتر وفي نواة هنا، لازم علاقة الأنوية دي ببعضها تكون جيدة وأن إحنا نسمح أن ممكن حد وهو بيلف حوالين النوادي يرجع يلف حوالين النوادي ويحصل نوع من التقارب بين هذه الأنوية، فكن أنت نواة قوية يلتف حولها الناس، كن أنت من الناس اللي عندها ذاتية، ده هيثبتك وهيشجعك، وتذكر ثواب ده هيخليك تكمل بإذن الله عز وجل، معلش أنا طولت عليكم.

حد يقول لي أنت ما قلتليش أسباب مقنعة، أنا كنت متوقع تقول لي مثلاً الدعاء، الحفاظ على كذا أنك تعمل واحد اتنين تلاتة، لأ أنا أناقش أفكار، أغلب الحاجات دي اللي أنا عايز أخطبهم عارفينها وبيدوها دروس وكتبوها وقالوها، أنا طبعا الدعاء والافتقار ده من أهم الحاجات، لكن أنا كان هدفي أن أنا أناقش بعض القضايا اللي هتساعدنا في الثبات، بعض المفاهيم اللي ممكن تكون خطأ، فبالتالي لما نصلحها هتساعدنا في الثبات، أرجو أن الدارسين دول يتحاوروا بعد الكورس واحد واتنين يكونوا ساعدونا على الثبات في الأزمات اللي إحنا بنمر بها.

لابد أن نلهج بالدعاء: اللهم إنا نعوذ بك من الحور بعد الكور، اللهم ارزقنا الثبات، اللهم استعملنا ولا تستبدلنا، اللهم يا مقلب القلوب ثبت قلوبنا على دينك، نلهج بالدعاء ونفتقر إلى الله سبحانه وتعالى.

والنصيحة الختامية: إياك أن تتوقف، إياك أن تلقي الجمر من يدك، إياك أن تطفئ الجمر التي بداخلك، إياك ثم إياك استمر إلى أن تموت واعبد ربك حتى يأتيك اليقين.

أقول قولي هذا وأستغفر الله لي ولكم، سبحانك اللهم وبحمدك، أشهد أن لا إله إلا أنت أستغفرك وأتوب إليك، وجزاكم الله خيراً.