الحور بعد الكور (محاولة لتحليل ظاهرة سقوط بعض الكوادر الإسلامية) | د. أحمد عبد المنعم

السلام عليكم ورحمة الله وبركاته، بسم الله والصلاة والسلام على رسول الله صلى الله عليه وسلم.

إن شاء الله بإذن الله عز وجل المجلس ده عايز أتكلم فيه في نقطة أنا شايف إن هي من النقاط المهمة، ولاسيما أن النقطة اللي عايز أتكلم فيها كان النبي صلى الله عليه وسلم يكثر الدعاء فيها، كان صلى الله عليه وسلم يقول: «اللهم يا مقلب القلوب ثبت قلبي على دينك».

وكان صلى الله عليه وسلم أيضاً يدعو، والدعاء ده ممكن ناس كتير مش عارفاه أو ما سمعتش قبل كده عنه أو مش عارفة معناه؛ أن النبي صلى الله عليه وسلم كان يستعيذ من الحور بعد الكور، كان صلى الله عليه وسلم يقول: «اللهم إني أعوذ بك من الحور بعد الكور».

مسألة أن ممكن نجد إنسان -الأول قبل ما أتكلم على اللي أنا عايز أقوله- الدرس ده أو المجلس ده غالباً بيخاطب الناس اللي مشيت في طريق ربنا فترة، أو اللي احنا ممكن بنسميها إن هي بتعمل لدين ربنا سبحانه وتعالى؛ سواء أيا كان عمل بقى اجتماعي، دعوي، خيري، علمي، أيا كان العمل اللي بيعمله أو اللي احنا ممكن بنطلق عليهم اختصاراً يعني كلمة كادر من كوادر الدين.

أنا عارف إن في مشكلة للأسف بنعانيها الفترة دي أن بقى في حساسية للمصطلحات، يعني لما نجي نقول كلمة ملتزم يقول لك ما تقولش ملتزم، تيجي تقول منكس يقول لك ما تقولش منكس، فانت بتبقى إيه في عودة عايزين نسترجع مصطلحات تاني ونرجع نتفق على مصطلحات.

فالشاهد يعني أن أنا بقى عايز أتكلم عن ناس مشيت في طريق ربنا فترة وقطعت شوط، ومش أي شوط؛ اللي أنا أتكلم عنهم النهارده مش أن إنسان كان بيعمل طاعة وتركها، مش مثلاً واحد كان ملتحي وحلق لحيته، لا مش بتكلم على ده، أو واحدة كانت محجبة ومجرد أن هي قلعت الحجاب فقط، يعني الانتقال من واحدة كانت محجبة وقلعت الحجاب بس، مش ده اللي أنا بتكلم عنه النهارده.

اللي أنا عايز أتكلم عنه النهارده أن ممكن يكون شخص صار في العمل للدين وبذل وأصبح كادر، وفتح له في باب، ثم مش ترك ده؛ لا, حصل له نوع من تغير المفاهيم، يعني حصل له نوع من الانقلاب على عقبيه، أنه بدأ ممكن يؤصل لعكس ما كان يدعو، حصل له انقلاب في المفاهيم.

يعني مثلاً أن تكون واحدة محجبة وقلعت الحجاب دي مجرد أن هي معصية، وعلى فكرة مش معنى أن هي قلعت الحجاب أن هي اصبحت عاهرة، لا هي ممكن تبقى محترمة لكن هي عند الله سبحانه وتعالى هي آثمة في هذا الفعل، هي خلاص انتقلت من واحدة كانت بتعمل طاعة وتركت الطاعة، مش بتكلم على ده.

الأخطر أن هي تنتقل من مفاهيم وأفكار وبيئات وقضايا كانت بتدافع عنها لعكس ده، بل ننتقل إلى مكان آخر تدعو فيه إلى الفساد، أو شخص مثلاً كان ينصر دين ربنا سبحانه وتعالى يدعو إلى الله وكان واقف على ثغر من ثغور الدين يؤصل إلى عكس ده، ده اللي أنا عايز أتكلم عنه النهارده.

أن الواحد بقى مستغرب أن أصبحنا بنجد في الفترة ديت نوع من الانقلابات على عقبيه، نوع من الرجوع وتغير المفاهيم اللي بيحصل في حياة الناس، ده شيء عجيب جداً وفي الكوادر، أنا مش بتكلم على عموم الناس؛ لأن شخص زي ما قلت كان بيعمل معصية وتركها، واحد كان يحافظ على صلاة الفجر في المسجد وبعدين ترك صلاة الفجر، مش بتكلم على ده.

ده فيه بفضل الله كتير من إخواننا الدعاة أتقن وتكلم في مسألة كيف نحافظ على الإيمان وعوامل ضعف الإيمان وخطورة الفتور، وتكلموا على النقاط دي كتير، لا؛ اللي عايز أتكلم عنه النهارده تاني بوضح: أن إنسان يكون كادر في العمل للدين بيقدم شيء لنصرة دين ربنا سبحانه وتعالى، ثم يحدث له تغير مفاهيمي في حياته.

طيب؛ بدأت بحديث النبي صلى الله عليه وسلم، كان صلى الله عليه وسلم يستعيذ من الحور بعد الكور.

طبعا هو الدرس مجموعة من النقاط، أشبه بفضفضة عايز أفضفض معاكم يعني، النقاط مش مرتبة قوي، عايز أدردش في نقاط كتير، أنا حاسس إن كل نقطة ممكن تصلح بعد كده لمجلس أو لدرس، لكن أنا قلت أجمعها في مجلس واحد مركز، يبقى الدرس دسم شوية بحيث أشبه به أن أنا بفضفض معاكم في الإشكالية ديت لأن كلنا معرضين لده، المتكلم والمستمع كلنا معرضين لده.

والدليل على ده أن النبي صلى الله عليه وسلم كان يكثر من الدعاء: «اللهم يا مقلب القلوب ثبت قلبي على دينك»، وكان يقول: «اللهم إني أعوذ بك من الحور بعد الكور» وهنشرح دلوقتي يعني إيه، وكان إبراهيم وهو إمام الأنبياء إبراهيم عليه السلام كان يقول: ﴿وَاجْنُبْنِي وَبَنِيَّ أَن نَّعْبُدَ الْأَصْنَامَ﴾ [إبراهيم: 35].

فإذا هذه الأدعية وغيرها تدل على أن الأمر ده وارد أن الإنسان يسقط فيه، فما فيش حد بعيد عن الفتنة، ما فيش حد كبير أن هو يسقط.

طبعاً الأزمة الرهيبة اللي بنمر بيها وأزمة الاستضعاف العالمي اللي بيمر بيه الإسلام دلوقتي، وأن أغلب الدول بتتنصل من دعم أي تيار ينصر الإسلام، مع أزمات اقتصادية رهيبة ضمن الأزمة السياسية، خلت أن احنا بقالنا ما يقرب من سبع ثمان سنوات في حالة من حالات أو خمس سنوات تقريبا حالة من حالات الاستضعاف، فشل ما يسمى بالربيع العربي، أزمات اقتصادية، سقوط رموز، مجموعة من العوامل كتير جداً -وده عشان ما يبقاش دايما احنا سطحيين في تشخيص أي إشكال- مجموعة من العوامل كتير.

يعني المتضادة والمتراكمه والمتنحرة وكان عاجبني أن هي تجتمع في دولة، والتقلُّبات ما بين دولة كانت تنصر حاجة وبعد كده انقلبت أيضاً على عقبيها، دول كمان بتغير أفكارها زي السعودية مثلاً؛ كل ده خلى أن الناس بتبدأ تتنصل عن نصرة القضايا اللي بيحملها الناس المستضعفة.

خلى أن في ناس تتنصل كانت تحمل قضايا معينة، القضايا دي دلوقتي اللي بيحملها المستضعفين، فأصبح أن في تنصل يقول لك، أو مش بيقول يعني أو مش مش كلهم هيقولوا كده ممكن بعض الناس لماذا ينصر قضية في ظنه قضية مستضعفة؟ ليه ينصر قضية دلوقتي مهزومة؟ هو مش هو مش كل الناس اللي تحور أو بترجع بتقول كده.

طيب؛ نبداً، دي كانت مقدمة، نبدأ: كان صلى الله عليه وسلم يقول والعجيب أن الدعاء ده كان صلى الله عليه وسلم يقوله في أثناء سفره.

استحضر أنك مسافر في طريق، في طريق إلى الله سبحانه وتعالى، النبي صلى الله عليه وسلم في السفر العادي مش في السفر المجازي، كان في أدعية للسفر كثيرة، منها أنه كان يستعيذ في الحديث الصحيح مسلم ومسند أحمد وابن ماجه وغيرهم يعني في الترمذي؛ كان صلى الله عليه وسلم يستعيذ أثناء السفر: «أعوذ بك من وعثاء السفر»، ويستعيذ ويقول: «وأعوذ بك من الحور بعد الكور».

حار يعني رجع، الكور إما من كور العمامة أو في رواية بعد الكون؛ بعد ما استقر في مكان معين في الدين أنه يرجع عنه، لذلك أقوال جمعت لكم مجموعة أقوال العلماء يعني إيه حار؟

الحور بعد الكون في حاشية على ابن ماجه قال: النقصان بعد الزيادة، وذلك أن يكون الإنسان على حالة جميلة فيحور عن ذلك، أي يرجع يعني.

في ناس تتوقع أن الحور بعد الكور هو الكفر بعد الإيمان فقط، وده مروي عن بعض الشراح؛ أن «أعوذ بك من الحور بعد الكون» أن النبي صلى الله عليه وسلم استعاذ من الكفر بعد الإيمان، زي ما النبي صلى الله عليه وسلم قال: «ثلاث من كن فيه وجد بهن حلاوة الإيمان» يبقى من أسباب أن الإنسان يجد في قلبه حلاوة الإيمان رقم ثلاثة النبي قال ثلاث حاجات، رقم ثلاثة: أن يكره أن يعود إلى الكفر كما يكره أن يُلقى في النار.

أنك تكره الحالة القديمة، أنك تكون في وضع معين في معاصي وبعدين تنتقل إلى حالة معينة من حالات الإيمان، فتبدا تكره أن للوضع القديم ده، مش عايز ترجع له.

فهنا خد بالك من تعبيرات الشراح أن قالوا: الحور بعد الكور مش مجرد الانتقال للكفر، لا؛ أي نقصان من حالة جميلة كنت فيها أن تنزل درجة واحدة عن الوضع ده، النبي صلى الله عليه وسلم مش عايز ده.

أيضاً قالوا: الرجوع من الإيمان للكفر، زي ما قلت لكم، أو من الطاعة إلى المعصية، أو الرجوع زي ما الإمام ابن بطال يقول عن أي زيادة ابن عبد البر عن الاستقامة عموماً.

فإذا النبي صلى الله عليه وسلم لما الإنسان فينا بيرتقي درجة في الإيمان النبي صلى الله عليه وسلم بيعلمنا أنك تدعو ربنا أنك ما تنزلش هذه الدرجة.

في ناس أصبحنا دلوقتي عندها حساسية من عشان كده أنا ما نحاولش أستعمل لفظ الانتكاس أو درس عن الانتكاس، أنا قلت أستعمل لفظ نبوي يستعمله النبي صلى الله عليه وسلم عشان نخرج من دائرة الخلاف والتصنيفات، وأصل انتوا السلفيين، وأصل انتوا ليكم تصور معين بعيدا عن القصة دي كلها.

قبل أن نستعمل اللفظ النبوي أن احنا مطالبين تأسياً بالنبي صلى الله عليه وسلم نخاف وندعو، مطالبين احنا ندعو: «اللهم إني أعوذ بك من الحور بعد الكور» أن اللي يرتقي درجة في الإيمان يخاف أن هو ينزلها ويدعو ربنا أنه يثبته عليها.

بعيداً عن إيه: أصل انتوا عندكم مفاهيم متعصبة شوية في الانتكاس، أصل انتوا مضخمين، عندكم حالة من تضخيم المفاهيم في قضية الانتكاس، أنا مش بتكلم عن النقطة دي خالص.

إنسان ارتقى درجة ونزل فيها هو مطالب إنه يدعي ربنا أو يفضل إنه يدعي ربنا إنه يرتقي تاني ويرجع لنفس الدرجة دي، وأنه يتأسى على الحالة التي كان فيها.

وأيضاً أنا مش بتكلم على اللي عمل طاعة وترك؛ النبي صلى الله عليه وسلم كان بيقول على عبد الله بن عمر رضي الله عنهما: «نعم العبد عبد الله لو كان يقوم من الليل».

يعني كان، لا تكن مثل فلان كان يقوم من الليل فترك قيام الليل، ده حديث النبي صلى الله عليه وسلم، يعني ما تبقاش زي اللي كان بيعمل طاعة وترك، وده مفهوم عام مهم أن احنا نركز عليه، لكن ده برضه مش الموضوع الأساسي اللي بتكلم عنه النهارده.

الموضوع اللي بتكلم عنه أن إنسان يسير في الطريق إلى الله، والطريق لنصرة الدين عموماً صعب، في مشقات، قال صلى الله عليه وسلم: «حُفَّتِ الجَنَّةُ بالمَكَارِهِ»، ولاسيما الأمور العليا في الدين؛ نصرة الدين، الجهاد في سبيل الله، أي طلب العلم، الدعوة إلى الله، الأمور العليا دي.

ذلك لما بيجي في القرآن بيطلب منك الأمور هذه العليا، بيطلب منك بيجي تحفيز عالي؛ يعني لما بيطلب منك نصرة الدين، الجهاد في سبيل الله، بيجي تحفيز عالي جداً أن الله سبحانه وتعالى يملك لك رزقك، والله سبحانه وتعالى بيده الحياة والموت، وأن الله سبحانه وتعالى يعطيك الدرجات العليا من الجنة، يبقى لما ربنا بيطلب منك حاجة عالية بيذكرك بالمقامات العالية.

فالسير في الطريق ده صعب، أشبه بسير في الطريق في الصحراء، عايزك تركز معايا في المشهد ده.

أشبه بالسير في الطريق في الصحراء؛ طريق متعب مؤلم، الزاد فيه قليل، والصحبة فيه قليلة، وكل ما بتوغل في السير كل ما العدد اللي حواليك بقل، الناس بتسقط أو بتتوقف، يقول لك خلاص أنا أتوقف عند المرحلة دي مش عايز أكون في درجات أعلى، عايز أكون في النقطة دي.

النبي صلى الله عليه وسلم قال للصحابة فيما ورد في الحديث البخاري بعد ما قال الأركان الـ ٢٥: شهد أن لا إله إلا الله وصلى وزكى وصام وحج، قال: «دخل الجنة سواء جاهد في سبيل الله أو قعد في بيته».

الصحابة لما سمعوا يعني أنا ممكن الأركان الخمسة ممكن الواحد لو حافظ عليها وابتعد عن الكبائر والمعاصي يخش الجنة، فقالوا: يا رسول الله، سواء جاهد في سبيل الله أو قعد في بيته؟

قال النبي، كان ممكن يقول لهم أه، ما هو هو النبي لسه قايل نفس الجملة صلى الله عليه وسلم: سواء جاهد في سبيل الله أو قعد في بيته، فلما سالوه نفس السؤال اللي هو قاله صلى الله عليه وسلم ما ردش عليهم باجابة نعم.

قال: «إن في الجنة مئة درجة أعدها الله للمجاهدين، ما بين الدرجة والدرجة الأخرى كما بين السماء والأرض».

يبقى النبي صلى الله عليه وسلم بينقل تفكيرهم، مش معنى أن أنا بخاطب يبقى احنا عندنا نوعين من الخطاب: بخاطب عموم الناس، أه، أن ممكن يعمل كذا وكذا ويخش الجنة، لكن أنتم من الله عز وجل عليكم بالصحبة، ومن الله عز وجل عليكم بهذا النعيم؛ أنا بكلمك على درجات الجنة وفي الآخر أنت بتختار، يعني هم درجات عند الله، أنت براحتك بتختار درجتك في الجنة.

فلما يجي خطاب بيحاول ينقل الناس لمقام عالي، ودي هنتكلم عنها أحد الأسباب اللي ممكن سواء يققال أو هي موجودة فعلا بتخال بتؤدي إلى السقوط: الخطاب العالي.

فلما يجي حد يطرح الخطاب العالي ده، هو ده خطاب موجود أصلاً في القرآن، خطاب موجود في السنة، لكن هو محتاج فهم وكيفية التعامل معاه.

تاني أنا حاولت الأحوزة دي عشان أقول لكم تخيل أنت ماشي في الطريق، طول ما أنت ماشي في الطريق في الصحراء العدد بقل، أنت عايز ترتقي أكثر، كل ما بترتقي أكثر في نصرة الدين وفي البذل اللي معاك ممكن يتوقفوا، اللي بيحصل أحياناً أن وأنت في منتصف الطريق زادك بقل.

زادك، ده اللي هو الإيمان. أنتم كون تألمون؟ أنت عندك ألم في الطريق، ربنا قال إن الطريق إلى الله فيه ألم، ستجد ألمًا: ﴿وَإِن يَمْسَسْكُمْ قَرْحٌ﴾ [آل عمران: 140].

في سورة آل عمران، ﴿إِن تَكُونُواْ تَأْلَمُونَ﴾ [النساء: 104] في سورة النساء، يبقى فيه قرح هيصيبك أحيانًا، في ألم هيصيبك أحيانًا في الطريق: ﴿إِن تَكُونُواْ تَأْلَمُونَ فَإِنَّهُمْ يَأْلَمُونَ كَمَا تَأْلَمُونَ﴾ [النساء: 104]. أنت معك من الإيمان ما يصرف عنك الألم، وترجون من الله ما لا يرجون؛ الرجاء في الله، في ثواب الله سبحانه وتعالى، في رؤية وجه الله سبحانه وتعالى يوم القيامة، بينسيك الألم، لكنه موجود. يعني النبي صلى الله عليه وسلم لما قام -وفي درس كده ممكن ترجعوا له بإذن الله عز وجل في المعنى ده- لما قام صلى الله عليه وسلم الدرس، لما قام حتى تورمت قدماه، رجليه بتتورَّد، يبقى إذن فيه ألم، لكنه يشعر من اللذة ما يدفع بها الألم.

متى يشعر بالألم؟ أو بقى مش بنتكلم عن النبي صلى الله عليه وسلم، احنا، امتى الإنسان يقوم الليل ورجليه تتورم وما يكونش يشعر بذلك؟ وبعدين يبدأ يشعر بالألم لما تقل اللذة، لما المعاني اللي عايشها بتنضب، يبدأ يفكر: إيه ده؟ ده أنا رجلي ورمة! ده أنا وقفت بقالي فترة! ده أنا ضحيت! يبدأ ينظر إلى ما قدم، لما المعاني اللي كان عايشها بتنضب، هو ده اللي بيحصل أحيانًا في منتصف الطريق، إنه يفقد الذات، فيبدأ يبص وراه: إيه ده؟ أنا قطعت الطريق ده؟ لسه هرجع كل ده؟! يستخسر الانتكاس أو الرجوع أو التحول، يبص قدام يلاقي الطريق صعب جدا وموحش لأن الناس أصلا عمالة تسقط، وما معوش زاد يكمل، هو كان شايف الطريق بصورة وردية لأنه كان معاه إيمان، ده أخطَر نقطة بتحصل للعامل، للكادر، ممكن توديه إنه ينتحر! إنه يبقى في نص الطريق حاسس إنه دخل مكان صعب، حاسس إنه رمى نفسه في ثغر من الثغور تقيل صعب عليه، وهو في منتصف الطريق فقد الزاد الإيماني، الصحبة الصالحة، الإيمان، علاقته بكتاب الله، علاقته بالدعاء، التضرع، الاستغاثة، كل ده بدأ يفقده في منتصف الطريق.

فيبص وراه حاسس إن الأمر صعب، يبص قدام حاسس الأمر صعب، فيبدأ بقى يا إما يستقر كده ويؤدي نصرة الدين بحالة من الطقوس لا يشعر بأي معنى، أو يختار الرجوع لأنه حاسس إن الطريق صعب فيختار إنه يرجع تاني، أو يشعر بحالة من الإحباط وفقدان الأمل -والعياذ بالله- ده ممكن ينتحر، يبقى شغال وكان رايح ينصر الدين وينتحر! آه، واحد خرج مع النبي صلى الله عليه وسلم في الجهاد ومن كتر الألم انتحر، جرح ما استحملش فطعن نفسه، ما استحملش يكمل، الألم اللي وجده ما كانش في عنده لذة تدفع هذا الألم يتحمل هذا الألم.

يبقى الإشكال أن احنا أحيانًا بنقع في الأمر ده أن احنا بنقعد نطرح للناس إن الطريق كله مفروش بالورد، لا، أحيانًا في ابتلاءات، يعني النكس يبتلى، زي ما الراهب قال للغلام، ربنا سبحانه وتعالى قال للصحابة: ﴿وَتَوَدُّونَ أَنَّ غَيْرَ ذَاتِ الشَّوْكَةِ تَكُونُ لَكُمْ﴾ [الأنفال: 7]، هيكون أحيانًا في شوكة، هيكون أحيانًا في ابتلاء.

يبقى ده الإشكال، طب إيه اللي ممكن -تعالوا بقى سريعا كده- إيه اللي ممكن يخلي ده يحصل؟ رقم واحد، أنا الأرقام اللي أنا هقولها دي مش لازم أسباب، دي نقاط عايز أتكلم فيها معاكم، رقم واحد: أن أحيانًا بيحصل صراع داخل الإنسان وده من الـ- بعض الناس تكلموا عنه الفترة دي وكتب عنه منشورات كتير الفترة اللي فاتت- في الصراع بين التصور المثالي والتصور الواقعي. أن ممكن واحد يسمع طرح ديني عالي، فيبدأ يكون في مخيلته تصور مثالي عن الشخص الملتزم، عن الشخص المستقيم، عن الشخص زي ما قلنا إيه: إن بقى في حساسية من المصطلحات، فأيًّا كان اللي عايز يختار لنفسه أي مصطلح: مستقيم، على هدى، يجاهد، يحاول أن يكون أفضل، الشخص ده اللي هو ملتزم يعني، عنده تصور في مخيلته وبين إنه عايز يطبق ده في الواقع، فبيجد تصادم، مش عارف يطبق ده، ينزل الشغل، ينزل الكلية، الجامعة، الواقع، الحياة، الزواج، الأولاد، حاسس إن كل الكلام اللي بيسمعه مش قادر يطبقه، فيمكن بقى يبدأ يشعر بحالة من النفاق، بحالة إنه مش قادر يكمل، فيبدا يكفر باللي بيسمعه، ودي إشكالية إن هو مش فاهم كيف يتعامل مع الخطاب العالي، ممكن دي ممكن تنقلنا على طول لخطوة رقم اتنين.

إن في ناس تقول إيه: أصل انتم يعني لو الواحد له الشرف إنه يدخل ضمن الدعاة يعني، أصل انتم بتخاطبوا الناس بخطاب عالي عليهم. طيب احنا بنخاطب الناس بخطاب عليهم، طب ما احنا برده في مشكلة برده عايز -يعني بما إن هو درس فضفضة يعني- طب ما في ناس فعلا ارتقيت ووصلت لحال معين من الالتزام ومحتاج خطاب عالي فعلا، دي نقطة. طب والنقطة الثانية: في فعلا جُمَل عالية في القرآن وفي السنة: ﴿لَا أَبْرَحُ حَتَّىٰ أَبْلُغَ مَجْمَعَ الْبَحْرَيْنِ أَوْ أَمْضِيَ حُقُبًا﴾ [الكهف: 60]. ذو القرنين في الجهاد والانتقال من مشرق الأرض إلى مغرب الأرض، يبقى احنا عندنا نصوص عالية فعلا، نعمل إه مع النصوص العالية دي؟ يعني لما نجيء نطرحها للناس يقول لك: خاطبوا الناس بجمل الكتاب والسنة. حاضر، طب ما دي جمل من الكتاب والسنة! طب ما يبقى إذن أحيانًا اللي قدامنا -أو ده قصور برده عشان لا نتهم أنفسنا ولا نتهم الناس ونمشي دائمًا بسياسة الزبون دائمًا على الحق، خلاص احنا غلطانين يا سيدي- فيه خلل في التعامل مع هذه الجمل، أو في خلل فهم أن مش معنى إنك مش عارف تطبق دلوقتي إن أنت فاشل، لأن برده أحيانًا -ودي نقطة رقم ثلاثة، الثلاثة متصلين ببعض وهعيدهم تاني- أن أحيانًا بيكون فيه فارق عند الشخص مش عارف يفرق ما بين علو الهمة والطمع في الدين.

ثاني، هم ثلاث نقط: الصراع بين التصور المثالي والواقع، الفارق: مش عارف يفرق ما بين علو الهمة والطمع، الجمل العالية اللي موجودة في القرآن والسنة أو الخطاب العالي اللي يُلقى من بعض الدعاة اللي ممكن يكون بعض الدعاة يقصد فئة معينة بيخاطبهم أن عشان يرتقوا، زي ما في بعض الكتب مخصصة، يعني هو دلوقتي لما أنت تروح المكتبة وتلاقي كتاب متن فقهي مشروح، أو تلاقي حديث مشروح بصورة عالية، أو تلاقي حاجة في الأسانيد، أو تلاقي حاجة في التفسير متقدمة، طب ما ده ممكن لو حد جابه من عوام الناس اللي ما طلبش علم ما يفهمش، ممكن يفتن، يقول لك: أنا ضيعت فلوسي على الأرض وما هو أحيانًا الحاجات دي محتاجة تتشرح محتاجة يخاطب بها بعض الناس اللي قطعوا الشوط، فبالتالي في خطابات أحيانًا بتكون محطوطة أو بتخاطب فئة مخصوصة، فبعض الناس يفتن بها، ده وارد.

طيب، الثلاثة دول مع بعض: أول حاجة فكرة التصور المثالي الواقعي، لازم الإنسان يتعلم أن في مجااهدة، أن الصورة الملائكية اللي أنت بتحلم بيها أولا دي مش موجودة، النبي صلى الله عليه وسلم قال لسيدنا حنظلة لما كان سيدنا حنظلة بيشعر بنوع من المفارقة ما بين حالته عند مجلس النبي صلى الله عليه وسلم أنه قاعد في مجلس النبي صلى الله عليه وسلم يرى الجنة والنار رأي العين وبعد كده يروح البيت يقعد مع زوجته والولاد والضيعات، وبعد كده يشعر بنوع من التغير يقول: نسينا كثيرًا، اتهم نفسه بالنفاق، النبي قال له: ده مش نفاق. أمال امتى يبقى نفاق؟ النفاق انك تستمرئ الوضع ده وتبطل تحضر المجلس تماما وتبدأ تعمل معاصي وتبدأ تعيش حالة معينة فيها مصلحة وترك الدين تماما، هو ده، أنت كده بدأت تخسر، لذلك سورة المنافقون هي بتتكلم عن المنافقين والنفاق، باخر مقطع: ﴿يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ﴾ [المنافقون: 9] ليه؟ لأن دي أول درجة في سلم النفاق، أنت خطورة انك انت تنشغل الانشغال التام، لكن طول ما أنت بترروح المجلس ده بتاع النبي صلى الله عليه وسلم وترجع للزوجات والضيعات والأولاد وحياتك ما بين الحياتين دول: ساعة وساعة، ساعة ترى فيها الجنة والنار رأي العين، وساعة في المباحات والشغل والدنيا والزوجة والأولاد، بعد كده حياتك مستقرة، فالنبي صلى الله عليه وسلم قال له: الصورة اللي عندك دي صورة ملائكية، لو أنكم تدومون على الحال التي تكونون فيها عندي وعلى الذكر لصافحتكم الملائكة في الطرقات.

التصور الملائكي ده مش مطلوب منك، أنت مطلوب منك تصور ساعة وساعة. طب افرض واحد عايز ده؟ مش بنكلم ده، هو مع نفسه. حتى لو أنا ما اختلفوا: هل الصورة اللي قالها النبي صلى الله عليه وسلم دي ممكنة أصلا؟ يعني الصورة اللي قالها: لو أنكم تدومون، هل في بشر يطيقها أيا كان البشر ده نبي؟ هل ده في بشر يطيقها؟ بس احنا مش بنتكلم على المستوى ده، هنتكلم على المستوى اللي هو بقى إيه: خاطبوا الناس بالعموم، هو ده العموم بقى، ساعة وساعة.

يبقى في تصور أحيانًا هو غلط، سواء الداعي قالو يبقى غلط، سواء المستمع فهمه يبقى غلط، هو تصور ملائكي إنه ما بيذنبش مثلاً، إنه بما إنه هو عامل للدين أو إنه بينصر الدين وما بيذنبش، لا، كلنا بنذنب، كل بني آدم خطاء. وأحيانًا الإشكالية أن إنسان، ودي مع إشكالية الانفتاح في السوشيال ميديا، أنه عايز يبقى كل النماذج، طماع في الدين، فبيجي يجرب النموذج ده يفشل، عايز يبقى نموذج الفقيه يفشل، نموذج العالم المتخصص في مسائل معينة يفشل، نموذج مثلا مجاهد ما يعرفش نموذج كذا في متميز جدا في العمل هو بيبحث على النماذج العالية، فيحصل له نوع من الصدمات فيقول لك: أنا أصلا ما ليش في الطريق ده، يا عم أنا إيه اللي جابني وسط الناس دي؟ ويمشي. هو مش قادر يتصور إنه ممكن يبقى انسان عادي، على فكرة، أنت ممكن تبقى انسان مسلم بتطيع ربنا سبحانه وتعالى وتخش الجنة، دي إمكانياتك.

الفكرة أنا بحس إن الفكرة دي متقبلة بسهولة جدا عند اهل الدنيا أن ممكن طالب يفهم أن له إمكانيات معينة ويرضى بها وأهله يرضوا بإمكانياته، خلاص دي إمكانياته الدنيوية، ذكاء متوسط تفكير بصورة معينة فبيخش كلية معينة وبيشتغل شغلانة معينة خلاص هو راضي. ده بتصور ده في الدين أحيانًا ده وارد، لكن ممكن يكون الشخص اللي بالنسبة لنا عادي ده يبقى عند ربنا أحسن من أي حد فينا، يبقى المعاملة هناك مختلفة، لكن أنا بكلمك إن احنا إيه هو شخص يحافظ على الصلاة وما فيش أجمل من الصورة دي بس هو يعرف يحافظ على ده ويتقي الشبهات ويتقي الحرام، هو بالنسبة للشخص ده هو شايف إن هو بني آدم عادي، هو ممكن يبقى عند ربنا ليس بكاسد هو مختلف، لكن احنا نتيجة السوبرمان والشخص المميز جدا والتنوعات الرهيبة اللي بيشوفها على السوشيال ميديا وعايز يبقى زي فلان معاه لايكات كتير وفلان متميز في كذا واللي بيعمل حالة من الطمع ده مش علو همة في الدين، فالطمع اللي ما بيعرفش يحققه ينقلب بإحباط، اللي كان بيقول لك إيه: أنا فاشل، وبما إن أنا فاشل أنا مش هكمل في الطريق ده هبقى لا حصلت -وده أخطَر طريق في التفكير- هبقى لا حصلت لا دين ولا دنيا أنا ماشي!

كنت أتكلمت عن النقطة دي في درس أرجوك لا تنصرف، أن التفكير ده غلط، التفكير أن أنا لا حصلت لا دين ولا دنيا التفكير ده أصلا تركيبته غلط، اللي هو أول أور نان ده غلط، بيخليك يعني تتعامل مع الدين تعامل دنيوي.

طيب، النصوص القوية العالية هتعامل معها ازاي؟ نتعامل معها أن دي كمال النهايات مش نقص البدايات، يعني أمن هو قانت آناء الليل، أن دي مش لازم تبقى أنت مداوم عليها أولا، ودي ما بتجيش من يوم وليلة، دي مجاهدة سنوات، يعني كتير من السلف مجاهدته قيام الليل سنة أو 20 سنة، المشكلة أن واحد عايز يكون مثلا متقن لحفظ القرآن في ثلاث شهور، عايز يكون قوام وبيجد لذة قيام الليل في ست شهور، لا، ده طريق طويل، فيجي واحد يدخل سمع عن لذة القيام وسمعت عن لذة الدعوة إلى الله وهي في قمة الاحتشام وفي النقاب ووو، وبعد كده نقل الفجر، أو هو نقل الفجر فطبعا فوجئ بفجوة بين الوضع اللي كان فيه والنقل اللي راحها في الدين لم يتحملها فترك، ودي نقطة رقم أربعة.

نقطة رقم واحد: الصراع بين التصور المثالي والواقع، نقطة رقم اتنين: الفارق بين علو الهمة والطمع في الدين، نقطة رقم ثلاثة: النصوص القوية العالية اللي بتقابلنا والتعامل الخاطئ معها أن احنا أحيانًا بنتعامل بتعامل خاطئ مع النصوص العالية أنك بتفهمها أنها لازم تتطبق دلوقتي، في حين أن في نصوص تانية بتقول لك: لن يشاد الدين أحد إلا غلبه أو غلُّوا فيه، ماشي حط هدف انك توصل لجوه لكن برفق، ما تنقلش نقلة، وإن الله لا يمل حتى تملوا، والنبي صلى الله عليه وسلم وجد حبل مشدود في المسجد قال: حِلُّوا، فكُّوا الحبل ده، وإن الله لا يمل حتى تملوا.

نقطة رقم أربعة: حديث غريب حسنه بعض أهل العلم ممكن ما نتخيلوش يعني بس دي نقطة مهمة، النبي صلى الله عليه وسلم قال: لا ينبغي لأحدكم أن يذل نفسه. قال: وكيف يا رسول الله صلى الله عليه وسلم؟ إزاي الواحد ممكن يذل نفسه؟ قال: أن يتعرض من البلاء لما لا يطيقه. أنه يعرض نفسه لبلاء لا يطيقه. الحديث على العموم كده على الظاهر ممكن يحمل على أي حاجة: أنك ما تذلش نفسك ما

تحطش نفسك في مواقف أنت ممكن تتعرض فيها البلاء لا تستطيعه. بعض العلماء أو كثير من العلماء حملوا الحديث ده، زي ابن عبد البر وابن كثير وغيره، حملوا الحديث ده وضعوه في موطن دايم بيتحط، أو غالبا بيتحط الحديث ده مع حديث، يعني غالبا الحديث ده هتلاقي ابن كثير حطه في وسط أحاديث الأمر بالمعروف والنهي عن المنكر مثلا في سورة المائدة أو في سورة آل عمران. كذلك ابن عبد البر في وسط أحاديث الأمر بالمعروف والنهي عن المنكر، كذلك الإمام ابن رجب في جامع العلوم والحكم حطه في حديث: «من رأى منكم منكرا فليغيره». ليه بيحطوه في الحديث ده؟ يعني ليه بيتحط الحديث ده؟ إيه الموطن اللي يتحط وسط دول؟

إن أحيانا أنت ممكن تحط نفسك في مقام في الدين أنت ما أنتَاش قده، فتحاول تنكر منكر أنت لا تتحمل تبعات هذا المنكر، أو تبعات قصدي هذا الإنكار. تاني، أن أنت ممكن تروح تنكر منكر فتتعرض لأذى، تتعرض لأذى أنت لا تستطيع أن تتحمل تبعات هذا الأذى، لذلك العلماء اتكلموا: لو أنا رأيت منكر وإنكاري للمنكر ده هيؤدي لأذى عليا؛ أنكر ولا ما أنكرش؟ العلماء الأول فرقوا: أذى مجرد أنك أنت يعني هتتهزأ، هتسمع لك كلمتين، ده اللي هيمنعك من المنكر؟ طب أذى ضرب، سجن، قتل، يتعدى إلى أهلك، يتعدى إلى زوجتك، إلى أولادك؟ ها، تعمل إيه في الوضع ده؟ هل تنكر منكر لو أنت أذى لا تتحمله؟

يبقوا قالوا: لو لا تتحمله وأنت موقن من نفسك أنك لا تتحمل يقينا، ما تنكرش المنكر. طب أذى شديد، أنا هأتأذى، هتقتل، هيحصل أذى شديد وأنا هتحمله؟ قالوا: لو هيعود على نفسك بس أنت مش على غيرك وأنت موافق، أنت حر. وبعضهم قال: ده الأفضل أنك تتحمل الأذى، الأفضل. طب الساكت ليس عليه إثم، لكن هو نزل درجة. الساكت ليس عليه درجة. دي النقطة رقم خمسة، أنا هتني في النص لخبطت في الأرقام فما تشيلوش في الأرقام، هي شوية أرقام يعني ما تشغلوش بالكم يعني.

لا ينبغي لأحدكم أن يضل نفسه. قال: وكيف يضل نفسه؟ يتعرض من البلاء لما لا يطيق. أنك أحيانا تحط نفسك في الدين في مقام أنت مش قده. مثلا موضوع الأمر بالمعروف ممكن هنرجع له عشان النقطة رقم خمسة اللي هتيجي؛ مثلا إنه يسخن في رد على الشبهات، فسخن في رد على الشبهات، دخل نفسه فجأة لقي أن هو تلبس بشبهات بقى عايز يرد على الشخص عشان ما يبقاش أن هو اتهزم، وبعدين عايز حد يرد له على الشبهات اللي في صدره، فدخل نفسه في مطار مش قدها، ده ممكن يفطر، وده أحيانا، وده الواحد بيشوفه لبعض الناس، وده ممكن يكون سبب لبعض الناس اللي رجعت عن الطريق؛ نقلت نفسها في مكان في الدين مليء مثلا بخلافات. دخل نفسه، لقي خلاف، مداخلة مع دواعش مع بيردوا على مش عارف إيه وفرق، قال لك: إيه ده؟ أنا ما كنتش أعرف أن الدين ده كده، وقام راجع.

أو واحد دخل نفسه في قضايا خلافية وقال لك: أنا هرد على الأشاعرة والأشاعرة بيردوا على مش عارف إيه، وبعدين فوجئ، قال لك: إيه يا عم الخلافات دي؟ يا عم أنا كنت فاكر المسلمين كان عنده هو تصور إيه؟ رومانسي شوية، فاتصدم، قال لك: إيه يا عم ده؟ ده أنا كنت فاكر أن أنا بمجرد بس، ده أنا كنت متوقع أن أكبر ابتلاء في حياتي أن أنا هسيب الشهوة، البنت اللي بحبها أسيبها وخلاص، أنا كنت متوقع أن ده أكبر ابتلاء هيقابلني في حياتي، ده أنا فوجئت أن جوه الطريق ده الابتلاءات بدأت! أيوه طبعا، أنت لسه شفت حاجة؟ ده اللي هيكمل، اللي هيكمل في طريق الالتزام ياما يشوف ابتلاءات، ده أنا ببشركم يعني عشان بس تبقوا عارفين من الأول عشان ما حدش في النص يقول لي: أنت ضحكت علينا.

أن تدخل نفسك أو تدخلي نفسك في الدين في منطقة أنت لسه ما معكيش الزاد بتاعها، أو أنت مش معاك الزاد بتاعها، بل الادهى أنه يدخل نفسه في منطقة صعبة؛ منطقة خلافية، منطقة جهاد، منطقة دعوة، منطقة رد على الشبهات، ثم يتوقف عن الزاد! يعني لما دخل كان معاه الزاد، اللي هو الزاد اللي هو إيه؟ اللي هو الإيمان، الدعاء، التضرع، القرآن، أنه على طول بيحضر مجلس بقى رأي العين، الوعظ، وبعدين بدأ يسيب ده، قال لك: أنا ما عشتش محتاج من راجل برد على الشبهات، ده أنا راجل يعني في الدعوة لله، ده أنا دلوقتي بقيت داعية مشهور، ويبدا يترك ده ويفاجئ بابتلاءات بتقابله في الطريق، يشعر أن هو دخل مكان غريب ويشعر بثقل، يقول لك: أنا عايز أخرج من هنا، يعني يشعر بضغط. الغلط مش في المكان، المكان ده مكان يحب الله ورسوله، المكان ده مكان في ناس بترفع في الجنة بسبب أن هو توصل للمكان ده، الخطورة أنك سبت الزاد!

أشبه باللي بيسير في صحراء وفقد الماء، فإذا الإشكال مش في المكان، مش أنك أنت وصلت للمكان ده، المشكلة أنك تركت النور. المكان ده محتاج نور معاك، المكان ده محتاج زاد، محتاج ماء غذاء. طيب، ده هيجرنا لنقطة تانية خاصة بحديث: «لا ينبغي لأحدكم أن يذل نفسه»، والنقطة اللي أنا هقولها دي تقريبا دي من أخطر يعني في نقطتين مهمين جدا، دي من أخطر النقاط اللي عايز أتكلم فيها النهارده. نقطة سموها بقى خمسة ولا حاجة ولا أيا كان: الدين الثوري، معلش هو مصطلح أنا مش بعرف أحط أسماء يعني، بس خلينا نسمي مبدئيا كده اسمه الدين الثوري.

أن من بعد 2011 ظهر والإشكالات بقى اللي حصلت بعدها ظهر أن كتير من الشباب والفتيات بقى الدين عنده حماس، بقى محور المرتكز بتاع الدين بتاعه دفع الظلم، دي نقطة، يعني دي لما تعمل دايرة كده للدين، في مركز، في دواير، المركز إيه؟ دفع الظلم. الولاء والبراء على إيه؟ على دفع الظلم. صح وغلط على إيه؟ دفع الظلم بس. طيب، دي نقطة عظيمة في الدين، واللي عايز يعمل ده في الدين محتاج له زاد من إيمان، من علم، من دعوة، أنت محتاج بقى حاجات عشان تعرف تطبق ده. لا ما فيش، هو الموضوع حماسي، الموضوع ثوري، أن الدين أننا ندفع الظلم، وده شيء في كل الشرائع، زي الإمام القرطبي كان بيتكلم لما في موقف سيدنا موسى في سورة القصص قال: أصلا دفع الظلم ده أمر فطري في كل الشرائع، فده لا ينكر أصلا.

لكن الأخطر أنه يتحول أن هو ده مركز الولاء والبراء فقط، وأن ده هو الدين بتاع الشخص؛ يعني شخص أنت بتعمل إيه؟ أنا بدفع الظلم. طيب، التوحيد فين في منظومة الدين؟ مش عارف. طب الشرع، علوم الشريعة؟ أنت دلوقتي رايح تدفع ظلم، طب أنت أصلا عندك من العلم، وأصبح يوجب على الناس أشياء لم يوجبها الله؛ يعني كل شخص مش هيشتم الظالم ده يبقى ضايع، ده عندنا منتكس. طب هو أصلا الشرع أوجب على كل واحد أن هو يشتم الظالم؟ ولا كل بحسبه، ولا كل بوضعه، ولا ممكن ده درجة أعلى من درجة بس ده نزل في درجة أقل؟ أنت لما تيجي تقرأ كلام أهل العلم، هو مين اللي قال أن ده موجب يوجب على كل واحد؟ مين اللي قال؟

احنا لسه امبارح مثلا أحد الدعاة، لا هجمة شرسة على الحجاب، هجمة شرسة عجيب جدا، هجمة يعني واضح أن هي هجمة منظمة، يوم هو عامل درس عن الحجاب عشان يتكلم عن أهمية الحجاب، ألاقي ناس مشيرة الدرس وتشتم في الداعية ده! ده وقته تتكلم عن الحجاب؟ ده وقته؟ أنا مش فاهم! أمال هو هو مش فاهم قيمة ده وقته؟ اللي بيتكلم ده لو هو خايف مثلا على بنته وبنته كبرت وهتقلع الحجاب، ساعتها يقول لك: آه، عشان خاطري أتكلم عن الحجاب، أو يجي واحد يرد على الحجاب يقول لك: ده وقته؟ أي حاجة هعملها، هتيجي تحفظ الأطفال القرآن يقول لك: هو ده وقته؟ هتيجي مش عارف تطلب علم يقول لك: ده وقته؟ أمال إيه؟ نعمل إيه؟ كل الناس تهايج وتترك ده وتتجه في اتجاه واحد؟ هو مين اللي قال إن ده الدين؟ الدين منظومة معينة، ده مهم، وده مهم أن نؤصل أن ده ظلم. ومش قادر تقولها تصريحا، قولها تعريضا، قولها من خلال إيه، وحديث أنكر على الظالم من خلال إيه، وحديث، ترص بنصوص القرآن والسنة، أظهر إنكارك للمطبلاتية، يعني أنت ممكن تعرضها فعلا بأي طريقة.

ومنهج الشخص؛ يعني تيجي تحكم على حد، بتحكم على منهج متكامل، مش على درس أو اتنين أو موقف أو اتنين. يعني لما تيجي مثلا واحد زي الشيخ الطريفي وتحكم عنه من تويتة أو من رسالة أو من حاجة صفحة الكتاب ده غلط، ده منهج متكامل. لما تيجي واحد تقول على الشيخ الطريفي مثلا أن هو بتاع أولياء الأمور تبقى أنت ما أنتَاش فاهم، أو مثلا أنت أولت كلمة قالها وقلت عليه حاجة، أنت كده بتدلس. فالشاهد أصبح ظهر عندنا حاجه أنا قاعد شايفها: الدين الثوري. الدين الثوري ده اللي هو ما بيتعلمش، الدعوة إلى الله مش في دماغه أصلا، الإيمان وتحصيل العلم مش في دماغه.

خطورة ده حينما تفشل الثورة! خطورة ده حينما يتمكن الظالم! يشعر أن مشروعه فشل. هو أصلا فكرة إدخال السعي لإدخال الناس الجنة، ولأن يهدي الله بك رجلا، وأنك تتفقه في آية، واللهم فقهه في الدين وعلمه التأويل، كل المعاني دي مش في دماغه، هو يشعر أن حياته انتهت، فبيبدا يكفر بما سبق! وده اللي الواحد مصدوم منه؛ أن شخص مثلا أنا اتصدمت لما شفت الكلام بتاعك كان ينشد: سوف نبقى هنا، والنشيد ينتشر و و، وبعدين ينكر الحجاب! يكتب حاجة في نقد الحجاب، أو شخص تاني كان مشهور بالثورة وكان مش عارف فين ويرروح يظهر فين ويعمل إيه، وبعد كده يكتب الآن منشورات في نفي الحجاب، وأن الحجاب مش موجود، ويقول كلام تخريفي، يقول لك: أصل الحجاب كان الفرق ما بين الإماء والحرائر، وما عادش بما أن ما فيش إماء، أن الحجاب كانت بتلبسه الحرة عشان الفرق بين الحرة والأمة، وما أن ما فيش إماء فالحرة تنزل لمستوى الأمة بقى، مش الأمة تطلع لمستوى الحرة، فكله يلبس حجاب، لا لا، الحرة تخلع الحجاب وتنزل لمستوى، يعني وضع لنفسه منهج أصول استدلالي غريب لوحده.

يعني أنت مثلا بتقول له: طب أنت المنهج ده أنت هيبقى مضطرد معاك؟ يعني قصدي الكلام تخريف الكلام، ما فيش أي منهج، يعني الكلام عشوائي، الكلام هو طلبة معينين الحجاب، فقمت عامل شوية حاجات وحاططها وسط بعض. طب أنت وبعدين ممكن يجيب لك كلام للعلماء، ما هو كلام العلماء اللي أنت استدليت بيهم، نقل النووي وابن تيمية و و كله دول أجمعوا أن الحجاب فرض، يعني إيه المنهج اللي أنت ماشي فيه؟ ما فيش منهجية. هو المنهجية إيه؟ هو تأثر بحالة من الانفداد.

المهم إيه؟ عارف في كلمة كده منتشرة الفترة دي: إحنا ضحك علينا! لأن هو كان مضخم قضية، ودي خطورة يا جماعة اللي بيتربى على هم الدين بس، يعني لو احنا قلنا أن في أربع حاجات مهمين يتربى عليهم: معرفة الله، الدار الآخرة، هم الدين، وأحيانا مهم جدا أن توصل للناس الأثر الدنيوي للدين؛ أن ربنا سبحانه وتعالى أحيانا يفتح على الناس، ﴿وَلَوْ أَنَّ أَهْلَ الْقُرَى آمَنُوا وَاتَّقَوْل لَفَتَحْنَا عَلَيْهِم بَرَكَاتٍ مِّنَ السَّمَاءِ وَالأَرْضِ﴾ [الأعراف: 96]، قلت: ﴿اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُم مِّدْرَارًا * وَيُمْدِدْكُم بِأَمْوَالٍ وَبَنِينَ﴾ [نوح: 10-12]، أن فيها عطاءات للي هيدخل الدين، وده حقيقي فعلا، واللي ماشي في طريق ربنا ياما بيجد من عطاءات الله عليه، لكن اقتصار طرح الدين على النقطتين دول: الأثر الدنيوي للدين وهم الدين بس، خطر جدا، لأن الاتنين دول متقلبين في عوامل كتير بتتحكم فيهم، مش كل الناس بتشوفهم.

معرفة الله والدار الآخرة دي عوامل ثابتة. الله سبحانه وتعالى حي قيوم لا تأخذه سنة ولا نوم، لا يموت سبحانه وتعالى، لا تأخذه سنة ولا نوم، فلما بترتبط بربنا سبحانه وتعالى أنت تركن إلى ركن شديد. لما بترتبط بالدار الآخرة ثابتة؛ الجنة موجودة والنار ما انطفأت، أنت بترتبط بأشياء ثابتة، فأنت ما بيحصلكش اهتزاز مهما حصل تقلبات، استضعاف، تمكين، ثورة نجحت، فشلت، فلان انتكس، فلان خلاص، «من كان يعبد محمدا فإن محمدا قد مات، ومن كان يعبد الله فإن الله حي لا يموت». هو عنده قضايا ثابتة عايش عليها، فمهما حصل تقلبات هو ثابت.

خطورة الدين الثوري ده ونشأة جيل من الشباب ما شافش أي حاجة، لا خضم في قضايا تربوية وعاش معاني تربوية ولا معاني إيمان ولا دروس وعظ ولا طلب علم ولا دعوة إلى الله، ولا حفظ القرآن حتى، ولا حتى يستطيع أنه يقرا القرآن! أنت ممكن واحد يطلع يتكلم في قضايا يعني عايز فطاء السياسة الشرعية يتكلم فيها، يطلع يتكلم في قضايا: والصح أن الأمة كلها تعمل كذا، والصح أن الشباب يعملوا كذا، ومش عارف إيه، وبعدين مش عارف ينطق إيه! ما يعرفش أحاديث أصلا، هو الدين عنده حماسي، فيفشل هذا المشروع، جماعة مثلا تبنت مشروع معين أو طائفة تبنت مشروع معين يفشل المشروع ده، يحصل له حالة من الارتداد، يقول لك إيه: إحنا اتضحك علينا، الدين ده.

كله غلط، والدين الإنسانية والغرب طلع بيفهم واحنا ما كناش بنسمعه وعايزين نصل إلى حالة الحوار. إيه ده؟ إيه الميوعة دي في الولاء والبراء؟ فين العقائد؟ ما هو أصلا ما كانش عنده عقائد ثابتة. هو أصلا هو لم يتلق عقائد، وتلقى مشاعر. هو تلقى شوية مشاعر حماسية انطفأت مع انطفاء المشروع، أو مع الكبوة، أو مع أول بلاء. فين عقيدته؟ اين هذه العقائد المترسخة؟ فين عقيدته في الله؟ فين عقيدته في الدار الآخرة؟ فين عقيدته في الإيمان والكفر؟ فين فهمه يعني ايه قضية التوحيد وجريمة الكفر؟

هو أصلا مش معتبر الكفر جريمة، هو عنده إن نصره إن اللي يقف جنب الظالم دي جريمة أكبر من الكفر؛ الكفر عنده ده عادي، ده هو يحط إيده في إيد الكافر عادي جدا، وأن هو عادي لأي مسلم. يعني فكرة إنه وقف جنب الظالم ده عنده أخطر حاجة في الحياة. طبعا احنا قلنا دي مصيبة، وأنا مش متخلى والله العظيم، وأن ده يعني ده ده نأء أقل ما يقال عليها، وإثم عظيم. لكن جريمة الكفر جريمة عظيمة، جريمة الكفر جريمة عظيمة.

أصبح أصلا سلم الدين عندنا وأولويات الدين مش مترتبة، وده اللي اتكلم عنه كان الـ كان في بعض الانتقادات البسيطة يعني عليه، ده اللي اتكلم عنه الدكتور فريد الأنصاري في كتاب البيان الدعوي والتضخم السياسي. التضخم السياسي بيعمل حالة من التضخم، واتكلم عنه وقبله أبو الحسن الندوي في كتاب التفسير السياسي للإسلام، وقال إن أنت لما تطرح للناس الدين أو الله سبحانه وتعالى مش يعني أنك بتطرح أن هو حاكم، أن هو الدين حاكم، طب الأول الإلاله والرب وبعدين يحكم؟ أنت عايش الناس الأول الربوبية والألوهية، وبعدين تقول لهم أوامر ربنا سبحانه وتعالى.

وزي ما قلت، الطرحين عليهم بعض الانتقادات، لكن المعنى اللي هم انتقدوه موجود، ممكن الطرح اللي قدم كان جاي الناحية دي شوية. يبقى إذا خطورة وجود الدين الثوري اللي الواحد شايفه أن أنا ألاقي الفترة دي أن احنا نلاقي أشخاص بيكتبوا على الفيسبوك منشورات، كانوا إسلاميين وكانوا بيدعموا قضايا إسلامية، وكانوا بيقولوا رفع الظلم وبينادوا برفع الظلم من منظور إسلامي، مش أن هو وقع في معصية كلنا بنقع في معصية. يعني مش أن هو عمل مش عارف سمع أغani ولا اتفرج، يعني عادي أن احنا كلنا بنعمل معاصي، لا لا، ده حصل انقلاب مفاهيم، حصل انقلاب في المفاهيم.

يعني في فارق بين زي ما قلت واحدة مثلا كانت محجبة وقلعت الحجاب على قد المعصية دي وندمانة وكل شوية تدعي ربنا: «وإن شاء الله يا رب يرجعني» على قد المنطقة، لا أنا مش بتكلم على ده، لا بين واحدة كانت محجبة وبين انتقلت إلى الحزب الآخر، من المفسدين، من اللي بيشيعوا الفاحشة، لا ده هنا ده هنا انقلاب مفاهيمي، ده اللي أنا بتكلم عنه، أن شخص كان إسلامي وكان بينشد مع الإسلاميين وبعدين يبدا يأصل لقضايا عكس ده. مشارب القرآن والسنة ما عادتش موجودة.

يعني ده واحد لما تيجي تقرا هو بس ممكن يكون هو الكاتب ده مش فاهم تبعات كلامه أصلا، يعني الكلام اللي بيقوله ده ده كلام العمانيين في تاريخانية القرآن أصلا. فما قال كلامه، ما قال كلامه لوازم كلامه أو من غير لوازم كلامه، ده ده نص كلامه، أن ده أن القرآن أشبه بكلام تاريخي نزل لطائفة لوقت معين، وأن دلوقتي هدفنا تحقيق مستوى من الإنسانية معين والتعايش، ده نسف كتير من أحكام الشريعة، ده نسف كتير من أحكام الشريعة. الكلام اللي اتقال في الحجاب من بعض اللي كانوا محسوبين على الإسلاميين ومشهورين أن هم ثوريين، دي مصيبة، دي تدل أن في خلل احنا محتاجين نتداركه أنفسنا وعند الجيل ده اللي ما لحقش أي حاجة غير ثورة وفشلت. هو ما لحقش أي حاجة غير كده، فبالتالي هو كل الـ اللي شاغله الكفر بهذا الطريق أصلا، هو ما ترباش على حاجة تانية، ما فيش هموم تانية، هو لم يحمل أي عقائد أخرى.

طيب، دي كانت رقم خمسة أنا طولت فيها شوية، رقم ستة إشكالية التحليل الجزئي للمعصية وعدم النظر إليها بصورة كلية. يعني ايه؟ يعني برضه يقول لك أنتم كدعاة أو أنتم كمش عارف ايه، أنتم بتضخموا مفهوم الانتكاس أو مفهوم أن الإنسان كان بيعمل طاعة وسبق. ممكن ده وارد نقع فيه، وزي ما قلنا خلينا نقدم قاعدة: الزبون هو اللي على الحق خلاص، المدعو هو حق نحن نخطئ ولازم الإنسان يطور من خطابه الدعوي، وده بيحصل أن احنا كتير من الدعاة وكلنا منهم يعني محتاج كل شوية يبدأ يطور الخطاب بتاعنا على الاحتفاظ بالثوابت. ماشي ده بيحصل، لكن مش ده النقطة اللي عايز أتكلم فيها.

أحيانا شخص، ركزوا معايا في النقطة دي، دينه عبارة عن ثلاث أربع طاعات بيعملها؛ دينه ثلاث أربع طاعات بيعملها، فيترك، يعني واحدة مثلا واحدة كانت لبسها بعيد خالص عن ربنا وقررت تنتقل لمرحلة الحجاب وحطت الخمار ومرحلة النقاب، فالنقاب بقى بالنسبة لها شيء بتعتز به، بعيد دينها هو ما فيش حاجات كتير، يعني هي ممكن آخرها مثلا تحضر درس، وأخرها قوي قوي بتقرا شوية قرآن، وهي معتزة بده أن دي دي الطاعات اللي بتعملها، وخلاص وبتمارس حياتها بفضل الله بتاخد ثواب بقى مع زوجها، مع أولادها، مع تربية أولادها، يعني بقيت الطاعات التانية هي أعمال تانية بتحتسبها لله سبحانه وتعالى.

خلاص دي لما تيجي تترك جزء من دينها ونتعامل مع الجزء ده مثلا مش هتحضر درس، فنقول أصلا حضور الدرس مستحب، احنا عمالين نتعامل مع أجزاء. طيب الفكرة عايز أوصلها، أجيب لكم مثال وأرجع للمثال الآخر أو الاخت. تخيلوا مثلا قاتل المئة حديث مشهور اللي أنتم عارفينه لما جيت راح للراجل العالم، آخر واحد راح له، قال: هل لي من توبة؟ قال: نعم، ومن يحول بينك وبين التوبة؟ ولكن اترك أرضك فإنها أرض سوء، وانطلق إلى أرض كذا وكذا فإن بها أناسا يعبدون الله فاعبد الله معهم.

تخيل لو أنت تعاملت مع الأمر اللي قاله ده بسياسة هو الأمر ده واجب ولا مستحب؟ يعني أن أنا أسيب أرض المعصية فرض. فواحد يقول لك ايه؟ بس ده مستحب، واحد يقول لك لا ده فرض، طب ولو فرض؟ يعني لو أنا لو أنا ما ما سبتش أرض المعصية ده مجرد إثم، ما تقعدش تقول عليا منتكس وتكبر الموضوع، أنا ما تغيرتش، ده أنا مجرد أن أنا عملت معصية. لا في معصية بتعمل قلقلة، ما هو لو ما سابش أرض المعصية، المعصية هتجر مئة معصية تانية، دي المشكلة اللي الناس مش قادرة تفهمها.

أنتم مضخمين اللحية والنقاب، أنتم مضخمين ده مجرد عند حتى اللي قالوا إنه فرض، أو اللي قالوا ده مجرد أنه كان بيعمل طاعة وسابها، أنتم مضخمين الموضوع ليه؟ ما احنا مش احنا مش بنتكلم على حكم في كتاب فقهي، يعني حكم اللحية أو النقاب في كتاب فقهي هو ورقة أنت بتذاكرها خلصتها بتقلبها خلاص خلصت. لكن في حياة شخص أحيانا بيكون علامة الانتقال من مجتمع لمجتمع، علامة أن شخص كان عايش حياته بالطول وبالعرض، كان بيعمل كل اللي هو عايزه، فلما أراد أنه ينتقل من البيئة دي للبيئة دي، أحد أشكال الانتقال ده كانت هو الهدي الظاهر.

في ناس بتضخمه وفي ناس مدياها في حجمه، مش بتكلم عن الحاجة اللي أنا بتكلم دلوقتي على تحليل حاجة أنا بشوفها في نفسي وبشوفها في الناس وبشوفها في الشباب. فلما بيجي يروح الناحية هذه ويبدا نقول ايه؟ فلان فلان قلعت النقاب. ده انتكاس، لكن أنتم بتكبروا الموضوع أيا كان اسمه ايه ماشي، هي لو مجرد قلعت النقاب وبيئتها زي ما هي بترروح درسها وحفظ القرآن ومستمره في حياتها خلاص ما فيش مشكلة، مسألة خلافية الموضوع انتهى مش هنضخم الأمر.

إنما أن يكون علامة انتقال من بيئة لبيئة أن شخص كان ملتحي وحلق دقنه، ممكن ناس تضخم الموضوع وممكن ناس تتعامل مع الموضوع ببساطة. الفكرة بعد لما حلق دقنه هو ده كانت علامة إيه؟ يعني علامة أنه شافها مستحبه فقرر أنا مش عايز نعمل مستحبات، ونزل النقطة دي ولا قرر أنا كفرت بهذا الطريق أصلا بلا علم، بلا دعوة، بلا نصرة الدين، بلا تيار إسلامي، أنتم ضحكتوا علينا دي قضية فاشلة، بلا خلافة إسلامية، بلا دعوة إلى الله، بلا علوم شرعية، بلا مذاهب فقهية، بلا نصرة الدين، بلا رد على، يا عم بلا وجع دماغ، أنا أروح أشوف هاجر بلد غربية وما تكلمنيش في الولاء والبراء وما تكلمنيش في الإيمان والكفر احنا دين الإنسانية.

لا ده ده انقلاب مفاهيم، ده إرتد على عقبيه، ده نقلة تانية خالص القضية أنا مش حلق دقني مش مهم حلق دقني أصلا خالص، ده انقلاب ده اللي أنا بتكلم عنه أن أحيانا بيحصل انقلاب مفاهيمي. فانت لما تيجي تكلمه تقول له خد بالك ده هنا في علامات خطر، يقول لك بطلوا بقى ده ده مجرد طاعة وسبق. ماشي ما هو لو مجرد طاعة وسبق ده خطورة التحليل الجزئي للمعصية كجزئيات أو التحليل الجزئي للطاعة أن يقول لك ما حكم أن يترك قاتل المئة أرض السوء؟

فلو واحد جاوبه مستحب، إذا يا اخي في الله لا عليك أن تترك أرضك، ويجي له السؤال ممكن يجي له السؤال على النت ويجاوبه إيه حكم أن هل يجب عليا أن أنا أترك أرض المعصية؟ هو مش عارف مين السائل، مش عارف حال الشاب فيجاوب إجابة ممكن تؤدي إلى مش بس انتكاسة، ده ايه لو وقوعه في كبائر. ذلك العالم ده والنبي صلى الله عليه وسلم سماه عالم فقيه لما قال له اترك أرضك، هو كان ممكن يدي أوامر تانية لكن هو عارف أن الانتقال من بيئة معينة من الطاعة من المعصية لبيئة معينة من الطاعة هتعمل نقلة في حياته.

يبقى الـ الـ ما ينفعش نتعامل يا جماعة مع الأمور بالتحليل الجزئي. أنتم مضخمين قضية الحجاب والنقاب ليه؟ لأن هي ضخمة والمجتمع مضخمها بدليل أن هم بيتعاملوا معهم في الشغل ما بيشتغلوش بسهولة بدليل أن هو بيتصنف بمجرد الرداء الظاهر. في ناس ملتحين ونقابات سيئين جدا موجودين، طبعا. في ناس، وده هنتكلم عنها النماذج السيئة في الواقع اللي بتنفر الناس وبتؤدي للحور بعد الكور، آه موجودين؟ آه موجودين. ودول من الابتلاءات اللي ربنا حطها في الدنيا موجودين وهنتكلم عنها.

لكن من الإشكاليات اللي بتؤدي للحور بعد الكور أنه يبدأ دينه عبارة عن خمس ست حاجات، فيبدأ يتقال له سيب دي دي مستحبه فيسيبها، ويتقال له سيب دي فيها خلاف فيسيبها، ويتقال له سيب دي ده مجرد معصية بسيطة واستغفر ربنا فيسيبها. هو ما عادش له دين أصلا، هو دينه كان خمس ست حاجات، يعني هو ما كان بيعمل ثلاث مئة حاجة فهيسيب حاجة وهيحافظ على تسعمئة وتسع وتسعين فما يحصلش تأثر.

ده اللي هيقول له ده انتكاس، ده ده مقفور، ده ده بيستهبل ومضخم، مش هنتكلم على ده دلوقتي. ده فعلا خطاب دعوي يعني لازم نعترف آه عندنا إشكاليات في بعض الخطاب الدعوي موجود، لكن أنا بتكلم اللي دينه خمس ست حاجات شاب مثلا في الجامعة وشلة ضايعة. كلنا مرينا بده، شلة ضايعة بتعمل كل اللي هي عايزه، رحلات مختلطة بيروحوا يسافروا يعملوا كل حاجه، ضياع موبي وبعدين قرر الشاب ده صاحبه مات فجأة قرر يتوب، قرر يعمل أي حاجة اسمها يتوب اسمها يلتزم اسمها يستقيم قرر أن هو خايف من الوضع القديم. قرر، وده بقى معنى كلمة التزم أن طريقة التفكير كلها القديمة غلط، أن في مكون جديد هيدخل في حياتي اسمه الدين المكون ده ما كان موجود قبل كده.

هو ده اللي أنا قصدي عليه بمعنى مش بقى اسمه انتحى أو التزم، ده دماغه اتغيرت، ده في مفاهيم كبيرة دخلت في حياته وما كانتش موجودة. المفاهيم الكبيرة دي خلاته يسأل: هو ده حلال ولا حرام؟ هي الرحلة دي حلال ولا حرام؟ هو الشغلانة دي حلال ولا حرام؟ هو أنا ينفع أعمل كذا؟ يعني في حاجة ركبت جديدة مكون أساسي غير له نظرتهم للحياة أصلا، خلته يبدا: هو أنا ليه ما أحفظش القرآن؟ هو أنا ليه ما أنصرش الدين؟ هو أنا ليه ما أتعرفش على الصحابة؟ هم دول ليه ما يبقوش قدوتي؟ هو أنا ليه ما يبقاش قدوتي النبي صلى الله عليه وسلم؟ هو النبي هيبقى قدوتي إزاي وأنا ما أعرفش حاجة عنه؟ هو أنا ليه ما اعملش كده؟

بدأ يرتقي في الدين انتقال طبيعي أنه هيحصل أن الشلة القديمة هيبدا يحصل معانا فجوة، لأن أنا برضه من الخطابات الموجودة الفترة دي وأنا شايف أن هي ردت فعل الخطا موجود بس أنا شايف أن هي ردت فعل الخطا، يقول لك ما تعملوش ما تنفصلوش عن المجتمع، أنتم ليه عايزين تعملوا فكرة المجتمع الملتزم أو مسجد الأخوة؟ أنتم ليه عايزين تعملوا كده؟ ده نوع من الكبر أو ده نوع من الغطرسة أو من الفهم الخاطئ للدين. على فكرة هو ده بيحصل تلقائي، يعني مش أنا اللي بعمله، هو تلقائي هم شلة عايزة تقعد على القهوة تعمل اللي هي عايزاه وشلة رافضة ده أو كان واحد معاهم في الشلة فرافض ده فبيقولوا له هتيجي معانا وتعمل اللي احنا عايزينه يا تسيبنا، فبيبدا ينعزل عنهم ويبدا يدور على مجتمع آخر يفاجئ أن المجتمع الآخر برضه.

بيخرج عادي، بس مش بيقعد على القهوة. فبالتالي بيحصل نوع من الانفصال؛ بيلتقوا في الجامعة، بيلتقوا في الدراسة، بيلتقوا، لكن مش هينفع يبقوا إخوان. طبيعي هيحصل انفصال عنهم، وهو الثاني ده هيدور على مجتمع تاني يعيش معاه، يروح معاه المسجد، ويخرج يتفسح معاه، اللي بقى اسمه ملتزم أو اسمه مستقيم. طبيعي هيحصل نوع من الانفصال، ما ينفعش نعمل حيطة وحواجز طبعا عشان الدعوة إلى الله، ما ينفعش يحصل تنطيط ويحس إنه أفضل منه طبعا ماشي. التواضع حاجة وإنه ما يظنش إنه أفضل منه حاجة، وإن أنت تطالبه إنه يكسر كل الحواجز دي حاجة تانية؛ ده غلط.

ليه يكسر كل الحواجز؟ لا، لازم هيفضل فيه حواجز، طبيعي إنه هيفضل فيه حواجز. فلما نقول إن شخص التزم معناه إنه غير مفاهيم كبيرة في حياته وانتقل لطريقة تففكير مختلفة تماماً؛ ده اللي أنا قصدي عليه. يبقى آخر نقطة، مسألة أو آخر نقطة قلتها لسه ما خلصتش، يعني إشكالية التحليل الجزئي للمعصية أو للطاعة وعدم النظر بصورة كليّة.

أحياناً، وده طبيعي بيحصل يا جماعة، إن شخص مثلاً ما ينفعش نلومه إن واحد كان ملتحي فحس لما خلع لحيته بحالة من الانهزام النفسي، فعمل تراجع أو مراقبة قلع النقاب، فبالتالي حصل لها تنازلات كتير هي ممكن مش قادرة، أياً كان بقى هي مش متزنة، هو مش متزن. ده مش صح، لكن ده واقع، احنا نعترف، ده واقع إن هو بيبدأ يحصل له نوع من الانحدار. فبالتالي هنا لما أنا أجري وأخد بالي إنه لو ساب بلاش اللي هم النقاب دول بيعملوا يعني إشكاليات في الطرح والحساسية.

ساب درس بيحضر، ساب صحبة صالحة، ونيجي نتعامل معاه جزئية ما حكم ترك الصحبة الصالحة أو ما حكم عدم حضور الدروس؟ عادي، ممكن ما يحضرش دروس، مش فرض عليه، لكن الشخص ده تحدداً زي بالضبط مثلاً ما حكم القراءة في الكتب كتب معينة فكرية؟ في أنت عارف إن الشخص ده أما بيقرأ الكتب دي بينتكس أو بيقع في شبهات، شخص تاني بيقرأها عادي، يبقى إذا الأحكام تختلف.

فياريت يا جماعة بلاش نتعامل، يعني حزنت فعلاً من أحد الإخوة وظني أنه أراد إلا الإصلاح يعني إن شاء الله لما كتب مقال مسألة التضخم في الهدي الظاهر، ماشي هو ده بيحصل وكل حاجة، لكن مش ده اللي بيوقع. يعني بلاش يا جماعة إن احنا في أزمات يعني في لحظات الاستضعاف وقت السقوط إن كل حاجة احنا اللي غلطانين، ونحمل بصورة يعني على التيار الإسلامي كلهم هم اللي غلطانين، ماشي عندنا أخطاء الإنسان يقومها، لكن يعني في ناس بذلت وناس ضحت وناس أرادت الخير، وبالتالي في عوامل أكبر مننا.

يعني في عوامل أكبر مننا، يعني مسألة تضخم اللحية والنقاب ما هو المجتمع هو برضه بيعاملها بصورة فيها عنف، يعني بيعاملها برضه بصورة فعلاً، فبالتالي ده عمل نوع من المقاومة. في ناس تخطئ، في ناس تخطئ، ودي النقطة، وما أعرفش بقى رقم كام سبعة ولا حاجة النماذج السائلة اللي بتقابلنا في الواقع، وسريعا كده أشهر مثال كنت كتبت عنه منشور، أشهر مثال قصة سيدنا سلمان الفارسي.

س سيدنا سلمان الفارسي كان وصل لمنصب كبير جداً في الدين المجوسي، منصب كبير وأبوه صاحب منصب كبير، وهو يعني مسؤول كبير جداً. ساب كل ده وضحى بكل ده، كان بيبحث عن الخير وببحث عن الحق، ورأى النصارى فظن أن هم دول الخير، وراح وقال أين أصل هذا الدين؟ وعنده علو همة غير طبيعية، وضحى وأبوه ربطه عشان ما يروحش، فك القيد وساب كل حاجة، ساب المستقبل وساب والده وساب كل حاجة، وراح عشان دين ربنا، وأول راهب راح يشتغل عنده خادم، شوف التضحية! اشتغل خادم عند راهب وسافر بلاد، وبعد كده الراهب ده يطلع نصاب، يطلع عن طريق يطلع يقول للناس يدفعوا فلوس عشان ربنا وياخد هو الفلوس دي، وفضل ساكت لغاية لما الراهب ده مات وبعدين قال للناس على حقيقته، وبعدين سأل على الراهب اللي بعده وينتقل من بلد إلى بلد، أربع بلاد بينتقل إليها، حتى بصورة عجيبة قصة طويلة جداً تراجعوها، وصل للنبي صلى الله عليه وسلم.

يبقى إذا سيدنا سلمان مش أول نموذج قابله قال لا أنا يا ريتني أنا ندمت، أنا ضحيت أنا سبت والدي وسبت القصور وسبت وسبت، أنا إيه اللي خلاني أمشي ونت نصاب؟ لا، اللي السائر إلى الله يكمل، إنما السائر إلى الناس يتوقف لما الناس تطلع تعيش. فمسألة النماذج السائلة في الواقع موجودة، ربنا سبحانه وتعالى جعل ده بلاء، ﴿وَجَعَلْنَا بَعْضَكُمْ لِبَعْضٍ فِتْنَةً أَتَصْبِرُونَ﴾ [الفرقان: 20] أه، أنت ممكن تبتلى الشخص ده اللي هيتسبب في تنفير الناس عن الدين يعاقب يوم القيامة، لكن الشخص ده مش هينفع يبقى هو العذر لما يتقال لك أنت مشيت ليه تقول له أصل فلان وحش، يقول لك طب خلاص، عندي لا، أنت الاثنين تتعاقبوا، يعني أنت الاثنين تتعاقبوا.

يعني زي ما ربنا قال إن في أصدقاء سوء، يعني بدليل في القرآن إن أصدقاء السوء بيتعاقبوا مع بعض، لو كان واحد ضيع واحد فيقول لربنا يا رب ده اللي ضيعني، يقول له طب خلاص طالما ده اللي ضيعك هو ده يتعاقب وأنت تعدي، لا، بيحصل بينهم تناحر ونزاع في النار والعياذ بالله. يبقى لما واحد يترك الطريق بسبب شخص منفر، ممكن المنفر ده يعاقب عند الله سبحانه وتعالى، لكن ده مش عذر أن احنا نترك الطريق، دي أحد الابتلاءات اللي مقابلانا في الطريق، يبقى دي برضه من أسباب الحور بعد الكور.

ثاني كده سريعا؛ الصراع بين التصور المثالي والواقعي، الفرق بين علو الهمة والطمع. النصوص العالية في الدين محتاجة فهم عشان ما تجيبناش إحباط وتخلينا نرتد. النماذج السيئة اللي بتقابلنا في الواقع، أن تتحمل من الدين ما لا تطيق ده محتاج تدرج، أنك أنت ما تقبلش على الحاجة أنت ما انتاش قدها، ما تتحملش شيء ما انتاش قده، بلاش تدخل بصدرك في حاجة، ابني نفسك صح، ما تشيلش أدوار ثقيل عليك وأنت لسه ما حطيتش الأساسات.

خطورة الدين السوي اللي بيعظم قضية واحدة فقط وبيجعلها محور الدين ويوالي ويعادي عليها، بل بيحاكم الناس لهذه القضايا ويلزم الناس بها ولا زاد له من إيمان أو علم أو عبادة، ويدخل في قضايا عظيمة، ثم بعد ذلك لما تفشل هذه القضايا يرتد لأنه يترك كل حاجة لأنه ما عندوش أسس أصلاً.

إشكالية التحليل الجزئي للمعصية وانه يتعامل مع نفسه أو مع غيره لما حد يستفتيه في مسألة أن ترك ده أو عمل ده أن هي أجزاء ومش فاهم أن ده مكون في شخصيته، يعني مثلاً فتنة الإنسان الشاب مش متزوج في واقع معين زي الجامعة بتختلف عن شخص تاني في مكان معين بتختلف، لذلك العقوبة ازدادت على والعياذ بالله الشيخ الزاني لأن المفروض أن هنا المقاومة بتاعته تبقى أضعف، يعني الشهوات عنده أضعف فبالتالي عقابه زاد. يبقى إذا أنا وأنا بتعامل مع الشخص بيختلف حسب المكان وحسب الطاعات والمعاصي اللي بتحيط به.

آخر حاجتين كنت عايز أقولهم؛ تخص الدعاء إلى الله، التعامل مع الله. دول بشر، بشرية التعامل مع الله؛ دول بشر، بنغلط؟ أه، بنغلط. سيدنا موسى لما فرعون الظالم الطاغية المتكبر قال له: ﴿وَفَعَلْتَ فَعْلَتَكَ الَّتِي فَعَلْتَ وَأَنْتَ مِنَ الْكافِرِينَ﴾ [الشعراء: 19]، سيدنا موسى اعتراف قال: ﴿فَعَلْتُها إِذاً وَأَنَا مِنَ الضَّالِّينَ﴾ [الشعراء: 20] ما قالش لا ما عملتهاش الحتة دي، قال أنا اللي عملتها، لكن أنت وتلك نعمته أنت تمنها علي أن عبدت بني إسرائيل، أنت مش هتمن علي أن أنت ربيتني في القصر؟ أنت أصلاً أخذتني من عند أمي، فأنت بتمن علي بحاجة هي أصلاً سوءة في حقك، لكن قال فعلتها إذاً وأنا من الظالمين؛ دي بتنقصنا.

أن احنا بنخطئ نعترف، المفروض لما النبي احنا نغلط، أي حد بيعمل الدين أما يغلط يعترف يقول أنا أخطأت والصح كذا. فاحنا أي عامل للدين لازم يعترف بخطئه، لا يكابر بحيث أن هو يدي نفسه فرصة للرجوع. المكابرة والمنازعة بتؤدي أن هو والعياذ بالله يستمر في الخطأ.

مشكلة بقى عامل الدين اللي هو الداعية أياً كان لما يخطئ مرة واتنين وثلاثة ولا ينصح وبعدين يكابر، ويبدا يحصل حالة غريبه جداً الواحد بدأ يشوفها، ودي يعني تؤدي للحور بعد الحور سواء عنده أو لغيره. اصبحنا بنشوف نموذج أنا بصراحة مستغرربه، والواحد خايف الدرس ده كله بالنسبة لي لأن كل اللي الواحد بيتكلم فيه ده ممكن ممكن يسقط فيه، ولا عاصم إلا الله، ولا حول ولا قوة إلا بالله. كل اللي الواحد بيتكلم فيه ده النهارده.

عبد الله القصيمي كتب كتاب دفاع عن الإسلام، دفع به مهر الجنة، وبعد كده مش انتكس؟ ألحد! ألحد وبدا يهدم في الدين، يعني فعلاً الأمور مرعبة. برضه قبل ما أنسى، حالة الرعب اللي بتصيبنا لما بنسمع عن كوارث ورموز سقطت أحياناً بيدب في بعض قلوب الناس سوء ظن بالله، وبيشعر أن وكانه الحياة حبس اللي ممكن واحد ينتقل من هنا إلى هنا، فإن الله لا يظلم أحداً. أنا مش عايز نسيء الظن بالله، الله سبحانه وتعالى أتعالى وأجل. سيدنا يونس راح يدعو إلى الله ويلتقمه الحوت ثم يقول: ﴿لا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمينَ﴾ [الأنبياء: 87].

بلاش نسيء الظن بالله، أكيد في أخطاء عند الشخص، لكن أوى تسيء الظن بربنا أن ربنا أضله، ﴿وَمَا كَانَ اللَّهُ لِيُضِلَّ قَوْماً بَعْدَ إِذْ هَدَاهُمْ حَتَّى يُبَيِّنَ لَهُمْ مَا يَتَّقُونَ﴾ [التوبة: 115]، وما كان الله أشد صيغ النفي ليضل بلام الجحود ليضل قوماً الأول يهديه ويبين له كيف يتقي الضلال، لكن الإنسان هو بيصر، فأوعى تفتكر أن شخص انتقل من صورة لصورة أنك أنت أحياناً جوانا من كتر الخوف والرعب كان في نوع من الاتهام ليه يا رب؟ ليه تعمل كده؟ لا، هو أخطأ، وربنا مش بيعاقب حد من أول مرة، والواحد شايف نفسه لطالما ستره الله.

يعني الواحد لما يعني أنا جبت الكلام ده منين؟ طبعا دي الله سبحانه وتعالى أتعالى وأجل من أن احنا نستدل على ذلك، والكلام ده مبثوث في القرآن والسنة وفي نفس الإنسان، ﴿وَفِي أَنْفُسِكُمْ أَفَلَا تُبْصِرُونَ﴾ [الذاريات: 21] ياما ربنا سترك، فبلاش يعني نسيء الظن بالله.

فبرجع أقول إن في حالة صورة بتظهر غريبة شوية، حوت جربت أجيب لها نموذج تاريخي لقيت سيدنا أبو محجن الثقفي اللي بيجاهد وفي نفس الوقت بيشرب الخمر. أصبحنا ممكن نشوف النموذج ده، أن شخص متميز جداً في حاجة في الدين وبيعمل حاجة غريبة جداً في معصية. النوع ده استمراره على الوضع ده غلط وبيؤدي لكوارث في نفسه وفي غيره. أصبحنا بنجد الشخص اللي هو المجاهد شارب الخمر ده أن هو متميز جداً ممكن في الدعوة في حاجة وبعدين بيعمل مصيبة، الصورة دي تفتن مئات من الناس. مش قادر يتوقف، وده خطر، لازم يتوقف يا جماعة.

حديث مائذبان جائعان، وحديث ده برضه كنا شرحناه في خطبة، وأفضل حد شرحه سمعته الشيخ خالد السبت يا ريت ترجعوا له. حالة الجوع، مائذبان جائعان النبي قال إن في حالة جوع بتصيب الإنسان في الحرص على المال والحرص على الشرف أن الإنسان له منصب. كتير من الناس كان له شرف معين وصورة معينة سواء في الدعوة أو في غير الدعوة، مش قادر يتخلى عنها، فتوقفه عشان يتوقف ويتوب من الذنب ده محتاج أن الصورة المرسومة له هتتهز، أنه يتوقف هو مش قادر فبيختار أنه يكمل عشان يحافظ على الصورة دي؛ دي مصيبة! دي مصيبة أنك أنت لازم تعترف، مهم أنك تعترف بخطئك وتتوقف وما تكملش.

أنت هتفتن نفسك وهتفتن كتير من الناس، حالة الجوع دي محتاجة تقف، وده اللي بيخلي ناس ترتد أن هي الحرص على الشرف أو أن هي مش قادرة تتوقف ومصرة تكمل. يعني ممكن داعية وبيقع في أخا، وعارف أنه غلطان وكل اللي حواليه قالوا له أنت غلطان، بس مش قادر يتخلى عن الصورة المرسومة له اللي راسمها لنفسه، ومعنى توقفه عشان يصلح الخطأ الكبير ده معناه أن هو بيقع في الخطأ، كلنا بيقع في بلاوي، طب ما تتوقف؟ لكن لو توقف وما استمرش بالصورة المرسومة دي صورته هتتهز، بقى عبد لهذه الصورة؛ فدي برضه نقطة خطيرة جداً جداً.

أمراض النفوس المستخفية، أن الإنسان يتغافل عنها وما يعالجهاش مصيبة. يعني من الكتب الجميلة قوي اللي جزاك الله خيراً الشيخ الطريفي الفصل بين النفس والعقل، أبدع في تحليل الأفعال بنعملها وهي النفس هي اللي استأسدت وقادت العقل. كتير من النزاعات والجدال والخلاف النفس هي اللي بتتكلم مش العقل، زي ما ظهر قضية الإلحاد النفسي. بيظهر دلوقتي الإلحاد النفسي والانتكاس النفسي والتبرج النفسي أن هي القضية نفسية، القضية نفسية أصلاً القضية ويقعد يجادل بالعقل، وهو أنت بتظن أنت عمال ترد له على الشبهات العقلية وهو القضية مش عقلية، القضية نفسية.

فمسألة زي ما ربنا قال أن بعد سنين بني إسرائيل رجعوا عبدوا العجل ليه؟ لأن هم من سنين فأشربوا وأشربوا في قلوبهم العجل، حب العجل كان مركوز في القلب لم يتخلصوا منه، فبمجرد ما رأوا قالوا: ﴿اجْعَل لَنَا إِلَهًا كَمَا لَهُمْ آلِهَةٌ﴾ [الأعراف: 138] مصيبة أنك تترك شهوة تستقر وتتمكن كسرطان في القلب وهي عمالة تتمكن تتمكن وأنت متصور أن الأمر يعني استقر، تيجي الفتنة تسقط والعياذ بالله. خطورة الترك في أمراض النفوس.

آخر حاجة؛ يبقى إذا دور الدعاة إلى الله سبحانه وتعالى تعليق الناس بربهم لا بأشخاصهم، كلنا نخطئ.

كلنا كل بني آدم خطاء؛ الدعاة وغير الدعاة، العامل وغير العامل، عشان ما نفتنش الناس. احنا مش عايزين نعلق الناس بربهم، مش هدف الشخص إنه يخلي الناس ترتبط بيه أكتر، لا. النبي صلى الله عليه وسلم كان يربط الناس بالله، وكان أكتر واحد قريب من النبي صلى الله عليه وسلم هو سيدنا أبو بكر، وهو كان أكثر الناس ارتباطا بالله كذلك. وده كان شيء عجيب جدا إن أكتر واحد ثبت بعد موت النبي صلى الله عليه وسلم هو كان أكتر واحد قريب منه، في حين إن احنا في علاقتنا الاجتماعية ده حاجة عكس اللي احنا متوقعينه.

انت لما يكون ليك واحد صاحبك قريب منك جدا جدا جدا ويموت، إنت بتبقى أكتر واحد متأثر، إنت أكتر واحد محتاج حد يصبرك. فلما يكون أقرب واحد للنبي صلى الله عليه وسلم أبو بكر، رفيقه في الغار، رفيقه في الهجرة، ذهبت أنا وأبو بكر وعمر ورجعت أنا وأبو بكر وعمر، حتى رفيقه في القبر. لما يكون سيدنا أبو بكر أكتر واحد يثبت بعد النبي صلى الله عليه وسلم، يبقى النبي صلى الله عليه وسلم نجح في الدعوة إنه ربط قلوب الناس بالله مش بشخصه، وإن ارتباط بشخص النبي صلى الله عليه وسلم ده من مراد الله، احنا بنتأسى به صلى الله عليه وسلم.

فوقف أبو بكر الصديق قال: «من كان يعبد الله فإن الله حي لا يموت، ومن كان يعبد محمدا فإن محمدا قد مات». يعني كيف قالها أبو بكر إلا بشيء وقر في قلبه. فاحنا دورنا إن احنا كما قال ربنا سبحانه وتعالى: ﴿كُونُوا رَبَّانِيِّينَ﴾ [آل عمران: 79]. ازاي يا رب نبقى ربانيين؟ إن احنا نربط الناس بكتابه مش بأشخاصنا، بما كنتم تعلمون الكتاب وبما كنتم تدرسون؛ زي ابن عباس بيقول: يعلمون الناس صغار العلم قبل كباره، مش إنك تدي الناس الحاجات الكبيرة اللي تخليه ينتفش بيها وما يعرفش يبني أسس بيها ولا حتى ينتقدك بعد كده.

يبقى إذا، معلش الأمور تشعبت وكملخص سريع، إن احنا نكثر من الاستعاذة؛ كما استعاذ النبي صلى الله عليه وسلم قال: «أعوذ بك من الحور بعد الكور»، ده وارد علينا كلنا. الغرض كان الكلام على نماذج كوادر بتعمل للدين، لكن ممكن تقع بسبب فقدان الذات في منتصف الطريق، الصراع بين تصورات مثالي واقعي، فارق من علو الهمة والطمع في الدين، الخطأ في التعامل مع النصوص العالية، النماذج السيئة اللي بتقابلنا في الواقع، إن يتحمل من الدين ما لا يطيق، خطورة أمراض النفس المسكوت عنها، خطورة الدين الثوري اللي مش مبني على علم ولا دعوة ولا عبادة.

خطورة التحليل الجزئي للمعصية أو للطاعة، التعامل معها على أنها جزئيات مش النظر لها بصورة كُلّية. خطورة حالة الضعف والإحباط وسقوط الرموز وغياب الرؤية مع الأزمات الاقتصادية، وده للأسف بيئة ممتازة لانسلاخ الفكر ونصرة القضايا اللي بيتبناها للأسف الناس المستضعفين بشرية العاملين لدين الله، والدين ما بيسقطوا ممكن يقعوا في المعصية، لكن خطورة استمراء الوضع ده في حين إن هو يصل إلى مرحلة إنه بيقع بأنه بيعمل طاعة كبيرة لكن بيعمل قصادها معصية كبيرة، ممكن المعصية تتغلب ولا يواجه نفسه ويسكت على الأمراض المستقرة.

دور الدعاة في الآخر تعليق الناس بالله ليس بأشخاصهم، كونوا ربانيين وبما كنتم تعلمون الكتاب وكنتم تدرسون. أسأل الله عز وجل أن يثبت قلوبنا وأن يستعملنا لنصرة دينه، اللهم إنا نعوذ بك من الحور بعد الكور، اللهم إنا نعوذ بك من الحور بعد الكور، اللهم اجذبنا واغننا أن نعبد الأصنام، اللهم استعملنا وثبتنا، قل قولي هذا وأستغفر الله لي ولكم، سبحانك اللهم وبحمدك، أشهد أن لا إله إلا أنت أستغفرك وأتوب إليك، وجزاكم الله خيرا.