د. أحمد عبد المنعمالسلام عليكم ورحمة الله وبركاته، بسم الله والصلاة والسلام على رسول الله صلى الله عليه وسلم. بإذن الله عز وجل، مجلس اليوم ممكن نسميه إعادة ضبط. احنا النهاردة إن شاء الله عايزين نتكلم عن القرآن؛ يعني الواحد لما بيقعد فترة يبعد الكلام عن القرآن تحس أن القلب يقسو، فعايزين النهاردة نتكلم عن القرآن.
احنا ماشيين بفضل الله في سلسلة الإشكالات التي تخص الشباب، ولا سيما الشباب الملتزم. فالنهاردة حاجة ممكن تتحط ضمن التربويات وضمن الإشكالات، يعني هنشوف حسب ما الموضوع يوضح بإذن الله. لو احنا بنتكلم مع بعض قبل ما أبدأ أتكلم عن القرآن، عايز أدي مقدمة مهمة. ليه النهاردة؟ يعني أو ليه تحديدا الكلام عن القرآن؟ أو الكلام عن القرآن واسع؛ يعني الكلام عن القرآن بحر لا ينتهي، فهنتكلم عن إيه في القرآن تحديدا؟ يعني إيه الموضوع اللي عايز أتكلم عنه تحديدا في القرآن؟ فهنقدم بمقدمات معينة، من خلالها نوصل للمعنى اللي أنا عايز أوصله.
أول حاجة، العالم دلوقتي أما تيجي تبص نظرة عامة على العالم كله، بيمر بأحداث غير مسبوقة ما حصلتش قبل كده، ولا سيما لو هتبص من داخل الأمة الإسلامية؛ يعني أنت كمسلم لك انتمائك للأمة المسلمة، وبتبص على حال المسلمين وبتلص على حال العالم، هتجد أول شيء أن الأمة الإسلامية بتمر بحالة غير مسبوقة. الوضع الحالي وضع غير مسبوق قبل كده بسبب نقطتين مهمين جداً.
لو حد مثلاً -طبعا دي محاولة للبحث عن الفروق- لكن إيه أهم فارق أو إيه أهم النقاط الفارقة ما بين وضع المسلمين دلوقتي في الوضع الحالي وبين وضع المسلمين في الماضي؟ يعني لغاية حتى وجود الخلافة العثمانية، أنا في ظني والله أعلى وأعلم أن في فرقين مهمين جداً مؤثرين، ممكن يكون في فرق تاني كتير مؤثرة، لكن أنا ظني الاتنين دول مؤثرين أو من أهم العوامل المؤثرة.
الفارق الأول ما بين حالنا دلوقتي الأمة الإسلامية دلوقتي وفي الماضي: أن في فارق تقدم دنيوي رهيب بينا وبين الأمم الأخرى، بين الأمة الغربية تحديدا أو حتى بقية الأمم، أن أصبحنا في حالة من التخلف الدنيوي الغير مسبوق. يعني كده كده أصلاً العالم بيمر بتقدم دنيوي غير مسبوق، إن صحت كلمة تقدم -على مش عايز أدخل برضه في الخلاف في المصطلح- لكن الشاهد يعني أن في تطور دنيوي في بالتمكن من الأدوات والقضايا والحاجات الدنيوية، لدرجة أما تيجي تقرأ في الاكتشافات مثلاً، فترة من الفترات اكتشاف الطباعة عمل نقلة في العالم، عمل تغيير في العالم، تغيير في الثقافة مجرد الطباعة؛ ما بالك دلوقتي كمية الاكتشافات الرهيبة اللي عمالة تكتشف!
فالعالعالم أصلاً دلوقتي غير العالم القديم بسبب التقدمات دي. بالنسبة لنا بقى كأمة إسلامية، أن في فارق ضخم، احنا كأمة متأخرين جداً جداً في الباب ده؛ فخلّى أن أي مقارنة أو أي فارق بينا وبين الأمم الأخرى الغير مسلمة، فريق ضخم على كل المستويات، وخاصة حتى على مستوى الأسلحة مثلاً، أو على مستوى التكنولوجيا، أو على أي مستوى، فدايماً أنت غالباً بتكون تابع، أنت مش مستقل، ما لكش إرادة كأمة إسلامية، أنت فاقد لإرادتك بسبب التقدم ده وبسبب الانهزام أمام التقدم ده.
الفارق التاني بينا كأمة إسلامية في الوقت الحاضر وقبل كده: أن كان فيه على الأقل رابط، حتى لو كان بيمر بأحوال من الهشاشة والانكسار والتقلبات، لكن كان في رابط بين كل المسلمين، أو أغلب المسلمين، أو حتى أجزاء من المسلمين لو قامت أكثر من خلافة -اسمها الخلافة- كان في رابط، المسلم كان يشعر بنوع انتماء أنه كوحدة واحدة، حتى لو اختلفت الأقطار والأمصار والولايات، لكن كان في الآخر في إحساس أن في أمة كبيرة اسمها الأمة الإسلامية تمام، وكان في شخص كبير اسمه الخليفة، كان ممكن بقية الأمم تعمل له حساب؛ لأن لما كانت مثلاً أي أمة أخرى أو أي دولة أخرى تحصل بينها وبين المسلمين خلاف، هي بتعرف دلوقتي أن المشكلة مع أمة ضخمة ممكن تستدعي جيوشها وقوتها من العالم الإسلامي كله، فقد أصبحنا دويلات، أصبح كل دولة لوحدها.
يعني هما أوروبا دلوقتي عملوا الاتحاد الأوروبي، وأمريكا هي مجموعة ولايات متحدة أكثر من خمسين ولاية، فإنما احنا بقى الأمم الإسلامية حاولوا يطلعوا أفكار تجمع كقومية أو أو الوطنية أو العربية، كل الأفكار دي شبه بقت بنوع من فشل، وفي حالة من أن كل دولة لها حدودها واستقلالها بذاتها.
الفريقين دول بيخلوا الأمة الإسلامية في الوضع الحالي اللي احنا عايشينه بتمر بحالة ما مرتش بها قبل كده، فبالتالي أي شخص يفكر في أنه ينهض بالإسلام وينهض بالأمة الإسلامية بيقابله العقبتين دول: أن أمة متفرقة، دول مختلفة كتير، كل دولة لوحدها بحدودها، بشخصيتها، بعالمها، بثقافتها، حتى بلهجتها. أنت ممكن -وده الواحد بيشوفه كتير في الحرم- اتنين بيتكلموا مع بعض مش عارفين يتكلموا مع بعض وهما الاتنين عرب، بس ده بلهجة وده بلهجة، فبيخلص بيقول له صديق وبتاع، وبيشوف لغة تانية إيه؟ لغة حيادية يتعاملوا بها.
فدي كانت المقدمة الأولى في درس النهاردة: أن أمتنا الإسلامية بتمر بوضع لم تمر به من قبل، بسبب حاجات كتير أو الفوارق بين الوقت الحالي والوقت الماضي أكثر من فارق، أنا شايف أن أهمهم نقطتين. الفارق بقى ضخم؛ يعني كان زمان لما بتكون بيحصل تناحر أو تنازع بين الأمة الإسلامية وبين أي أمة أخرى، بيكون الفارق سهل، دول معاهم منجنيق، دول خلاص معاهم مش عارف سلاح آخر، يعني كانت الفوارق بسيطة، الوقت الفارق ضخم جداً.
فده بيعمل حالة من اليأس؛ يعني ده بيعمل عند كثير من المسلمين حالة من الخلاص؛ يعني الحال أن احنا بدنا نكون تبعه ما نكونش احنا ندعي أن احنا أم مميزة وأمة لها ثقافتها أو حضارتها أو تملك شيء مش عندهم، خلينا نقلدهم وخلاص في كل شيء، مش مثلاً نقلدهم في شيء أو نستفيد منهم في اللي سبقنا فيه دنيوياً، لأ، أنت لك ثقافتك ولك هويتك، لا، هو بيحصل بقى إيه؟ التقليد في كل كده.
اللي كانوا دايما يفرقوا إيه الفارق ما بين انك تعمل تحديث وبين الحداثة؟ أنك أنت بتستورد القيم منهم، ولا أنت بتستورد التطور الدنيوي وتنقله عندك طب وتحتفظ بهويتك؟ يبقى ده الفارق الأول. الفارق التاني: التشتت والتفرق اللي حتى بقى مش بس على مستوى الدول، حتى على مستوى الأفراد والجماعات، وللاسف ده مرض بينخر في الأمة الإسلامية، زي ما النبي صلى الله عليه وسلم قال أن الشيطان قد يأس أن يعبد في جزيرة العرب ولكن في التحريش بينهم، أصبح يعني قضية الخلافات والاختلافات دي قضية بتشغل جداً المسلم، كمية اختلافات رهيبة.
يعني لدرجة أن كل مجموعة بتتخانق مع المجموعة التانية، وكل شخص، كل مسجد يعني بقى فيه خلافات بطريقة رهيبة، في حين أن المفروض الإنسان يعمل على زي ما النبي صلى الله عليه وسلم قال أنه يتم الصف؛ زي ما بيتم صف الصلاة يتم صف أهل الإيمان. والنبي صلى الله عليه وسلم قال: «ما من خطوة أحب إلى الله من خطوة تصل بها صفا». يعني لما يكون في الصلاة صف فاضي وأنت تاخد خطوة عشان تتم الصف دي، دي من أحب الخطوات إلى الله، هذا في الصلاة، فأيضاً كذلك في الدين، أنك أنت تسعى أنك تكون مفتاح للخير، أنك تصل بين الصفوف، مش تكن عنصر شاق وتفرقة، محاولة ايجاد حتى الرؤى المشتركة، وتأجيل قضايا خلافية معينة، ويبقى فيه فقه للأولويات في التعامل مع الخلاف.
لكن للأسف كلنا ذلك الرجل كان بيسقط في الإشكال ده، مسألة التفرق اللي بقت منتشرة بصورة عجيبة جداً.
المقدمة التانية أن الحالة ديت اللي أنا وصفتها، طبعا ولدت عند كتير من المسلمين حالة من الانهزام، ولدت حالة من الانهزام النفسي، فبالتالي أن هو بقى بيقلد الغرب في كل حاجة، بقى يستورد منه ثقافته، بقى يستورد منه هو إيه الإنسان المسلم بقى فاقد أن هو له انتماء، بقى قاعد بيحث له عن انتماء، بيحاول لأي حضارة ينتمي لها، لأي ثقافة ينتمي لها، بقى مقلد ده في العموم يعني.
اللي زود الاشكال أن الحضارة المتقدمة سواء الغربية أو غيرها اللي هي الغير مسلمة بتعمل على تجريف الدين، حتى الدين اللي عندهم. يعني لما تيجي تقرأ مثلاً في تطور نشأة الدولة الحديثة أو تطور نور الدين عندهم، وازاي أن العلمانية وصلت للحالة ديت وتجاوزت الكنيسة، وأن الكنيسة انحسرت إطارها في دور محدد، وأن العلمانية هي اللي ابتدت، وأن باعترافهم تم علمنة أو الدين عندهم وصلوا أن الدين -المهم في الآخر أن الدين إيه؟ برضه عن الخوض في التفاصيل دي- أن تم تحييد الدين في مكان محدد، ده أشبه باعتراف بانهزام الدين هناك.
ومش بس بيحصل تجريف للدين، هو تجريف لمفهوم العبودية والإله وأن الإنسان عبد، ده تجريف للانسان حتى كإنسان؛ يعني الحضارة دي للأسف -وطبعا عشان الوقت- لما تيجي تشوف أصلاً هو فكرة حضارة التقدم عندهم، أو فكرة السعادة، أو حضارة البهجة، أو التطورات اللي عمالة تحصل في الإنسان هي بتمسخ الإنسان، الإنسان بيبقى مجرد مسخ. يعني حتى الإنسان كإنسان سوي، كفطرة سوية، بيمسخ؛ يعني الواحد مش عارف يتكلم ازاي كلام زي ده في المسجد، لما مثلاً قضية الشذوذ لما الأمر ده ينتشر ويقنن ويمنع الكلام فيه ويجرم اللي يتكلم عنه بس يجرم، يعني لما لدرجة أن بعض العيادات النفسية هناك لما تحاول بس تقول احنا بنقدم علاج للي عايز، للي شايف نفسه عايز يرجع طبيعي، يقول لك لأ، ما هو الشاذ ده المفروض تعترف أنه طبيعي، ما تعملش ما تقولش كده. شوف الانتكاس في الفطرة صورة عجيبة جداً.
ففي انهيار في قيمة الإنسان كإنسان أصلاً، الإنسان بقى مجرد مادة، لأن الإنسان بقى مجرد عدد ساعات وظيفية، بقى مجرد ورقة بيحصلها أو دخل بيدخله، ده قيمة الإنسان، فالإنسان نفسه فقد قيمته. وكمية الكتب اللي اتكتبت منهم قبل مننا عن بطولة ده كتير جداً، أن الإنسان انه أصبح ما عدش إنسان أصلاً، فقد: ﴿وَلَقَدْ كَرَّمْنَا بَنِي آدَمَ﴾ [الإسراء: 70]، فقد هذا التكريم أصلاً، فقد نفخة من روح الله سبحانه وتعالى، فقد هذه الروح وبقى مجرد إنسان طيني أشبه كالأنعام. ما هو إيه الفارق بين الإنسان والأنعام؟ الله سبحانه وتعالى كرم الإنسان نفخ فيه من روحه، وأشهد له ملائكته؛ فلما تتخلى عن الارتباط بهذه النفخة العلوية بالروح بالوحي النازل من السماء، أنت خلاص بقيت إنسان مجرد طين، لأن الإنسان لما بتنزع منه الروح هو بيدفن في الطين، لأن ده خلق من الطين، فخلاص كل تفكيره يبقى تفكير طيني مجرد شهوات بيحصلها وخلاص.
فالإشكال بقى كمان أن في ظل انهزامنا المادي دوت وتأخرنا وتفرقنا، الحضارات الأخرى تحارب الدين، ومش بس بتحارب الدين، بتحارب الإنسان كإنسان، بتحارب الفطرة، يعني بتحارب الواحد يخجل أنه بس يتكلم عن يعني كمية الشهوات المنتشرة أو الأمر وصل لغاية فين من انتكاس الفطرة، لأ، الأمر تجاوز ده بكتير، يعني مهما الواحد قعد يوصف، وزي ما قلت هما نفسهم كتبوا خوف على أن الإنسان ما عدش إنسان، وأن هم محتاجين أي حاجة.
لذلك بدأ دلوقتي في كتير من الأماكن في الغرب بيحثوا على أي زاد للدين، فبدأ يحصل اتجاه أن هم يروحوا بقى للحضارات للشرقية، للبوذية، مسألة التأمل، لأن هم فاقدين أي حاجة للروح؛ فبدأ بالرغم أن فيه انتشار للالحاد، لكن عايزين أي غذاء للروح، فبدأوا يدوروا على الغذاء الروحي في الديانات الهندية مثلاً؛ لأن هي برضه بتغذي الروح بعيداً عن التدخل أو بيعتقدوا ذلك أنها بتغذي الروح بعيداً عن التدخل في تفاصيل الحياة، ومش عايزين حد يحكم تفاصيل حياتهم إلا هما، ما تقوليش وحي، ما تقوليش أن في دين هو اللي يحكم.
المقدمتين دول تأخر الأمة الإسلامية وتفرقها، مع أن الإنسان كإنسان والمسلم قبل ما هو يبقى أو يعني بعد ما هو إنسان المسلم كصاحب دين، كل قيمه بتتم تجريفها وبتحارب وهو بيمسخ، ما عدش له هوية، ما عدش يعرف يَعَرِّف نفسه كمسلم. يعني لما كان الصحابي يروح يقابل حضارة أخرى ويقول له انتم مين؟ من أنتم؟ يعني انتم عايزين إليه؟ هو كان بيعرف يجاوب إجابات محددة، هو موصف نفسه: نحن قوم ابتعثنا الله لنخرج العباد من عبادة العباد إلى عبادة رب العباد، ومن ضيق الدنيا إلى سعة الدنيا والآخرة، هو عارف توصيف لنفسه كويس، عارف توصيف نفسه كمسلم، كعبد، كإصلاح في المجتمع، كإصلاح في العالم، هو يعرف يوصف نفسه كويس.
أنت كمسلم مش عارف أوصف نفسي، يعني أنا مش فاقد التوصيف ده، يعني أنت إيه انتماءاتك؟ ممكن تعرف نفسك حسب وظيفتك، دكتور، طيب، بس ده كويس دي وظيفتك، وزوج، طيب، بس، واب جميل، فين بقى توصيفك الديني انتمائك الديني؟ يعني لما تسأل في القبر في أسئلة تسأل عليها القدوة والانتماء: من نبيك؟ وما دينك؟ مين قدوتك؟ وكنت بتنتمي لأي دين؟ هتتسأل على ده. فلما تيجي تعرف نفسك، تعرف نفسك كمسلم في ظل الانهزام اللي الأمة بتعيش فيه ده؟ هو مجرد تابع.
يعني هو ما يعني إيه؟ يعني إيه أنا مسلم؟ هو بيقلد، وزي ما قلنا التقليد وصل لكل حاجة؛ في اللبس، في الشكل، في حلقة الشعر، في كل التفاصيل، في الكلام.
يعني إنت كتير جداً تمشي في شوارع بلاد إسلامية وتدخل محلات إسلامية، تدخل في بلاد مسلمة يعني يعني أمبارح كنت يعني مع عهد إخواني كده في مطعم أبهى مطعم بنشرب حاجة، فقاعد فعلاً تبص في تفاصيل المكان كله لا يمكن حد يظن أن ده في دولة مسلمة، يعني التفاصيل -مش هتكلم في الحلال والحرام- بتكلم في التفاصيل، الكلام الحائط كله بالإنجليزي، الأشكال والثقافات والرسومات وشكل الأزايز، كل حاجة واخدة نمط غربي كله بلا استثناء، يعني ما فيش معلم واحد من المعالم موجود يدل إن إنت في دولة مش بس إسلامية، إن إنت في دولة عربية.
طب هو ليه؟ ليه كده؟ واللي قاعدين كلهم مسلمين عرب، يعني اللي قاعدين أول مكان مثلاً ضيق، إحنا ستة، ستة في المكان، السيستم بيلزمه إنه يشغل أغاني، وإحنا السيستم، إحنا الستة ما عندناش مشكلة إنه يشغل القرآن، بس هو السيستم كده أهو، مين اللي حط السيستم ده ومين اللي يعني؟ يعني إنت بقيت مجبر إنك تعيش في ثقافة مش ثقافتك، وإن كده أفضل حاجة، يعني إنت بتمشي في الشوارع نادراً نادراً إنك تلاقي اسم المحل مثلاً الاسم عربي، نادراً إنك تلاقي، ده ممكن لما لما يحب يعملها مش اعتزازاً بلغته، كنوع من الاختلاف بقى، كنوع من التنويع إنه يبقى مختلف؛ لأن خلاص كله الإنجليزي، فيعمل اسم مختلف شوية، خلاص نعمله عربي، نعمله يعني إيه يعمل اسم مختلف فيبقى جاذب شوية، يعني إيه؟ مش حتى اعتزازاً بلغته العربية.
فتخيل الأم حتى فقدت لغتها، معروف يعني من عوامل انهيار أي أمة أن لغتها تنهار، فالشاهد المقدمتين دول دایماً بيشغلوا يعني المفروض أي حد بيبحث عن الإصلاح، الناس وخاصة إصلاح أعمدة المجتمع، هم الشباب، اللي لما يكون في طائفة كبيرة منهم وكتلة كبيرة منها من الشباب بيحمل الهم ده بفضل الله بيحصل تغيير، فدول من دي من القضايا اللي بتشغل الإنسان؛ إزاي نقاوم التجريف ده؟ إزاي الشخص اللي ممكن من أول لما يتولد لغاية لما يتجوز، يكبر ويشتغل ويتجوز ويخلف، ما يمرش أصلاً على أسس الدين؟
يعني الدين بيتعرض له قضايا هامشية، جزئية، بسيطة خالص، إزاي مر عليها؟ من خلال التعليم، أو من خلال برنامج حلقة فضائية أسمعها، أو من خلال مقطع شافه على الفيسبوك، أو من خلال حد صاحبه بعت له حاجة على الواتس، دي مصادر الدين عنده، كمان المشكلة إن الهجوم قوي والمناعة ضعيفة، يعني الهجوم، الأمم اللي بتحاربك متقدمة دنيوياً، عندها أدوات قوية للتجريف، تسيطر على الإعلام، يعني الهجوم قوي جداً، طب والمناعة في قمة الضعف؟ ما فيش مناعة أصلاً، ما فيش مقاومة.
يعني الشاب ده، الشاب لما تبص على أي شاب، الواحد لما يمشي في الشارع شوف كم الشباب أو يلف بطبيعة شغله في الجامعة، وهو مثلاً روح العصر، شوف كم من الشباب المهول ده، ده بيعمل ايه حتى ديناً ودنيوياً؟ بيعمل ايه؟ هو أحياناً فقد الأمل أصلاً، وعايش مرحلة معينة وخلاص لغاية لما يعني يتخرج وايه ويصطدم بالواقع المر، لكن الشاهد هو طب هويته هو كمسلم فين دول؟
فالتجريف الحاصل ده لازم له مقاومة، فالسؤال هنا بقى جه هنا سؤال: ما دور القرآن في هذا؟ أن كل واحد يسأل المشكلة الضخمة اللي إنت عملت تضخمها دي، إيه دور القرآن في حلها؟ يعني ما هو دور القرآن في مقاومة هذا التجريف أو المسخ أو عدم الشعور بالانتماء أو عدم الشعور بالهوية؟ إيه دور ده؟ إيه دور القرآن في الإشكال الكبير ده؟
الأول أن بنعمة ربنا على هذه الأمة أنه حفظ لها كتابها، الوحي ﴿إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ﴾ [الحجر: 9]، فنحن أمة لها كتاب محفوظ، وهذا لا يوجد عند أي أمة من الأمم، يعني الآن في الآن نتكلم الآن في اللحظة ديت بالرغم من قمة التفرق والتخلف الدنيوي اللي إحنا فيه واتكلمنا يعني بإشارة سريعة عنه إلا أن الأمة تمتلك ما ليس عند غيرها، لازم تكون موقن بده، نحن حضارة النص، نحن حضارة ابتعثت للحياة من خلال نص نزل إليها من السماء، يعني نحن أمة ابتعثت بعد أن كانت مبعثرة، بعد أن كانت لا شيء، كان في حضارة رومانية وحضارة فارسية والعرب كانوا شوية قبائل متفرقين في الصحراء، ابتعثت باقرأ، بنص نزل لها، بوحي، وبنموذج طبقه هو النبي صلى الله عليه وسلم فكان خلقه القرآن.
حصلت القومة للأمة دي، حصلت البعثة للأمة دي بعد أمة متفرقة تظل الحرب بينها لسنوات لأجل ناقة، أمة يعني منهارة أخلاقياً ما لهاش دستور تتحاكم إليه، القوة هي المعيار الوحيد اللي بينها، ابتعثت من تخيل النص! هذا النص الذي بعث الأمة في أول أمرها موجود الآن، يعني دي ده الامل أن هذا الوحي موجود كما هو محفوظ، فهذه الحضارة التي قامت لأول مرة، حضارة النص، حضارة الإسلام، هذا النص الذي بفضل من الله سبحانه وتعالى ولابد أن تفرح لذلك، ﴿قُلْ بِفَضْلِ اللَّهِ وَبِرَحْمَتِهِ فَبِذَلِكَ فَليَفْرَحُوا هُوَ خَيْرٌ مِمَّا يَجْمَعُونَ﴾ [يونس: 58].
فامتلاك النص ده دي نقطة البداية اللي كانت نقطة البداية الأولى ونقطة البداية لأي قومة لأي بعثة، فإنت دلوقتي حاسس بحالة موات، حالة يعني أشبه بحالة إغماء بلاش نقول موات؛ لأن الأمة دي لم تمت ولن تمت، الأمة دي لم تمت ولن تمت ولابد أن الأمة تبقى فاهمة كده إن هي لم تمت، حد يفهم الأمة وشبابها اللي هي عبارة عن أفراد أنها لم تمت، وإن بقدرتها بإذن الله أن تستعيد القومة، أن فيه روح تبث فيها مرة أخرى تشعرها، تشعر الأمة دي أن لديها ما ليس عند غيرها، أن هي بتمتلك نص من السماء، تمتلك وحي.
العالم من غير أي العالم كله من غير وحي من السماء، من غير دستور ينزل لها من السماء متخبط، ليه؟ لأن أي شيء ممكن من غير نص، من تاني من غير كلام علوي وإحنا كبشر أنا لي إرادة وإنت لك إرادة، أنا لي شهوة وإنت لك شهوة، فلو ما فيش حد يحكمنا، لو ما فيش كلام علوي من فوقنا خلاص أنا هامشي إرادتي، واحد له شهوة معينة هيقول إن هي ما فيش فيها مشكلة، واحد عايز يفرض مثلاً أن الأطفال اللي اتولدوا بنوع من الإعاقة يقتلوا، وأن الرجال اللي عدوا سن معين من الإنتاج اللي في الدولة يقتلوا ويشرعن ده عادي، ممكن واحد يوصل لكده وهذا ما أقوله قد قيل بالفعل.
واحد بعد فترة شايف أن الزنا مش مش فيه إشكال، وبعد فترة أن الإقطاع نفسه ما فيه ما فيش إشكال، حد كان تخيل لغاية على فكرة الستينات، يعني لغاية مثلاً ألف تسعة مية وستين الحضارة الغربية ما كتش بهذا السوء في انتشار الشهوات، وإن كان قبلها مرت يعني بتفاصيل كتير فيها يعني انهيار أخلاقي، لكن ما كانش حد متخيل بتعميم الفساد بصورة بتقنين، مش بس تعاميم أنه يمنع انك تنتنق مسائل في الشذوذ، ده حتى ممكن يكون من سياسات الفيسبوك المنع من الانتقاد ده أصلاً.
يعني إنت إنت متخيل التقنين ممكن يوصل لغاية فين؟ أنك تمنع من ده، تمنع من الانتقاد ده، أنك لما تيجي على مستوى الواتس حتى وإنت بتبعت رسالة، على مستوى الإيموشنز اللي موجودة أنه يبدأ يضيف ده، أن يبدأ يضيف الشذوذ حتى في الإيموشن اللي موجود عندك على التليفون عندك في الواتساب، أن ده لازم يقر عالمياً، إنت متخيل ده بيوصل التجريف اللي ممكن يحصل على مستوى العالم إزاي؟ وتصدير ثقافتهم وإحنا بننتلقى.
طب إيه دور القرآن بقى في البعثة دي؟ يعني ده سؤال بيشغل الواحد: ما هو دور القرآن؟ لما نجي نبص الأول قدر القرآن في الدين وممكن الإجابات هنا تختلف حسب تخصص الشخص، يعني لو اللي هيجيب على السؤال ده شخص مثلاً فقيه أو أصولي يعني في أصول الفقه أو الفقه، هيقول لك القرآن مصدر الأول من مصادر التشريع، أصول الفقه عبارة عن أدلة وكيفية التعامل مع هذه الأدلة، الأدلة دي ممكن توصل لحداشر أو اتناشر دليل أولها هو القرآن.
فبالتالي يبدأ يكلمك عن القرآن كان هو الدليل الأول والحجة الأولى وبعد كده كيفية التعامل مع هذا الدليل؛ مسألة النسخ، مسألة العموم والخصوص والمطلق والمقيد، هنا الفقيه بيتعامل هنا في دور القرآن في التشريع في الأحكام التشريعية والأصول الأول في اعتباره دليل.
ممكن حد من اللغة وأهل البلاغة والبيان يقول لك ده أعلى درجات الإعجاز البياني، فيتعامل مع القرآن هنا أنه في أعلى درجات الإعجاز اللغوي ويتناول القرآن هنا تناول بياني، ممكن حد في التفسير يتعامل أن دورنا أن إحنا نفهم الكلمات والتراكيب اللغوية ونفهم المعنى ده، ممكن حد حتى خارج العلوم -طبعا لو قعدنا نفصل كل علوم الشريعة بتحتاج إلى القرآن، حتى خارج العلوم الشرعية العلوم الدنيوية- تجد أن مثلاً شخص يقدم بحث الإدارة من خلال الجزء الثمانية وعشرين، أو الإدارة من خلال سورة يوسف، أو علم الاجتماع من خلال سورة النساء، أو إعطاء الحقوق من خلال السبع الطوال، أو تجد أبحاث كثيرة ولا سيما خاصة أبحاث الماجستير والدكتوراه أو الأبحاث المفتوحة اللي بتستخرج أن دور القرآن مش بس في العلوم الشرعية، لأ، دور القرآن في العلوم الدنيوية.
كل اللي أنا قلته ده عن دور القرآن نافع جداً جداً ومهم جداً جداً ونحتاج إليه، ولا سيما أهل التخصص يحتاجون إليه، أنا مش بتكلم على ده، أنا بتكلم على احتياج عموم المؤمنين للقرآن، يعني ليه القرآن إحنا مطالبين بقراءته وحفظه والاستماع إليه وتكراره ويبقى لك ورد ويتلى على مسامع الناس في التراويح وفي قيام الليل؟ ليه بنرجع للقرآن كتير كده؟ يعني لو على قد الحكم الفقهي طب ما الفقيه يرجع للقرآن، لو على قد المعنى البلاغي طب ما اللغوي يرجع للقرآن والنحو يرجع للقرآن.
لكن لعموم المؤمنين مطالبين بالتعرض للكم الكبير للقرآن، يعني ليه إنت تلات مرات من خلال الخمس صلوات بتستمع للإمام جهرياً وبيقرأ عليك القرآن وأنت واقف في الصلاة؛ في صلاة الفجر والمغرب والعشاء وفي الصلوات السرية إنت بتقرأ ولك ورد يستحب أن إنت تختم المصحف في شهر وتستمع للقرآن في التراويح وفي قيام الليل وتقرأ القرآن؟ ليه القرآن تحدداً مش أي حاجة تانية إنت بتتعرض ليه بهذا التكرار الضخم؟
يبقى أكيد في معنى، وده اللي بحاول الواحد يوصل له، وأكيد مش معنى واحد، معاني كثيرة ممكن الناس يفتح عليها، لكن المعنى اللي أنا عايز أتكلم عنه النهاردة في معنى خطير، في معنى مهم، في معنى كلي ضخم مش جزئي، مع احتياجنا للمعاني الجزئية زي ما ذكرت كأحكام شرعية أو أخلاقيات أو آداب أو تفاصيل دنيوية حتى تستخرج من القرآن.
لكن واضح أن في معنى لتعرض الأمة كأمة للقرآن بهذا الكم، يعني أما تيجي تشوف الأفعال اللي إنت مطالب تعملها تجاه القرآن؛ أنك تقرأه وتستمع وتسمع وتنصت ويبقى لك ورد وتصلي به، يعني كل حاجة تقدر تعملها مع القرآن وتحفظها، تحفظ القرآن، كل ما يمكن أن تفعله مع القرآن تفعله، وتحسن النطق وتقوم بفهمه وتبسيطه وشرحه للناس، أكثر نص خدم هو القرآن، أما تشوف كمية الكتب اللي ألفت حول القرآن تفسيراً وأصولاً وعلوماً، علوم القرآن ضخم جداً مكتبة ضخمة نباهي بها العالم.
هذا الاهتمام تجاه القرآن أكيد له سبب، أن الأمة تتعرض كأمة، عموم المسلمين، أن إنت مغرب وعشاء وفجر يومياً الإمام يقرأ عليه القرآن، وأنت مستحب لك يومياً تمسك وردك من المصحف وتقرأ القرآن، في معنى أن إحنا نتعرض تكراراً للقرآن، تخيل مثلاً -عشان برضه أوضح المعنى اللي أنا عايز أوصله- تخيل مع الفارق الرهيب في التشبيه، تخيل أن في مثلاً قصة أو رواية أو فيلم إنت مطالب أنك تشاهده أسبوعياً، إنت متخيل هو هو نفس الفيلم ونفس الرواية ما اتغيرتش، يعني ما بيحصلهاش أبديت.
إحنا القرآن عندنا ما بنعملش فيه أبديتس، يعني مش بيحصل مجمع ونتجمع وبعدين نقرر أن الحتة دي تتشال وهنضيف، أو أن مثلاً عندنا اختلافات مثلاً يعني يعني ما بين البروتستانت والأرثوذكس والكاثوليك في اختلاف أصلاً في عدد الأسفار ممكن يوصل اختلاف لثلاثاشر سفر مش موجودين، إحنا ما عندناش كده.
التعرض ده، تخيل بقى إنت لو مطالب أنك تقرأ رواية أو قصة أو تشاهد مسلسل أو فيلم أسبوعياً شهرياً، طب على مدار قد إه؟ على مدار عمرك، طب تخيل ليه؟ هتسأل لو لو تخيل لو حد قال لك كده هتقول له ليه؟ أكيد واضح أن في رسائل واضحة ورسائل خفية بتوصل لك من كل مرة بتفرّج على الرواية، بيترسخ جواك معاني.
يعني مثلاً لما تيجي تشوف الرواية بتاعة ألف تسعة مية أربعة وثمانين دي، الرواية دي بتوصل معنى معين وبتعرفك إزاي بيتم السيطرة على عقول الناس بصورة معينة، وغيره من الكتب الرائعة في ده كتاب الإعلام وصناعة الواقع وطبعا أشهر من كتب في الموضوع ده لوبان في كتابه سيكولوجية الجماهير، واتكلم أن من أخطر الوسائل أن عموم الناس تنصر قضية واحدة، قضية تلت حاجات: تأكيد، وبعد كده اتكلم على التكرار، مش مهم التالتة لأن ليها شرح شوية اللي هيا العدوى ليها شرح طويل مش قصتنا يعني، لكن أنا بتكلم على مسألة التأكيد وتكرار معنى صورة معينة على عموم الناس بيصنع جواهم انتماء معين.
هو نفس المعنى، ما فيش جديد، بنفس الأدوات. أنت رؤيتك لنفس الإعلان كذا مرة بيخليك تحفز الإعلان وتمشي في الشارع تكرر كلمات الإعلان، ولما تلمح المنتج تلقائيا تبقى عايز تجيبه، حتى لو أنت ما بتشعرش. وكمية دراسات اتعملت في ده كتييرة جدا، وإزاي إن ممكن التكرار ده يصنع جواك -لما تتعرض لتكرار معين- يصنع جواك سعادة باقتناء المنتج ده، حتى لو أنت مش محتاجه.
طبعا ده بالنسبة لأهل الدنيا. الله سبحانه وتعالى حينما أنزل هذا الوحي وأمر أن هو يتلى من وظائف النبي صلى الله عليه وسلم، من أهم وظائف النبي صلى الله عليه وسلم: يتلو عليهم آياته. يعني دي وظيفة نبوية، تلاوة الآيات على الناس دي وظيفة من وظائف النبي صلى الله عليه وسلم، وبالتالي من أراد أن يسير على درب النبي صلى الله عليه وسلم يبقى فيه معنى واضح: أن احنا في هدف من أن احنا نتعرض للقرآن بهذا التكرار، يعني واضح أن في معنى كبير بيحصل لنا حتى لو احنا مش واخدين بالنا، بس الكلام ده إيه؟ للذين يتلونه حق تلاوته، يعني اللي بيقروا القرآن صح بيحصل جواهم تغيير وهم مش عارفين، وده اللي حصل مع الصحابة، تغيير في كل حاجة، إعادة ضبط. الإنسان اتولد على الفطرة السليمة، طول ما الإنسان بيكبر -وخلينا نتكلم على الوضع اللي احنا عايشين فيه- بيحصل له نوع من التشويه في العقل، تشويه في طريقة التفكير، تشويه في الفطرة، تشويه في المشاعر، تشويه في الحب والكره، الذوق -مش قصدي يعني بيذوق حاجة، طريقة تقييمه للحاجة- كل ده بيحصل فيه تغيير. ييجي القرآن يقوم عامل إيه؟ إعادة ضبط، يخليه: كيف يفكر تفكيرا سليما كمسلم؟ كيف يفكر تفكيرا شرعيا سليما؟ إزاي أنت ترجع القرآن لو اتعرضت له صح يعمل لك إعادة ضبط أنك تقبل الأحكام التشريعية بكل سلاسة، مش حاسس أن فيها مشكلة، أن العبودية.. القرآن بيرجع يضبطك على العبودية تاني: أنت عبد!
بيعمل ده ازاي؟ هأتكلم سريعا، يبقى القرآن تاني: احنا بنتعرض له بصورة فيها نوع من التكرار، وزي ما قلت لك لو عايز تتخيل الصورة بنوع من الوضوح، تخيل أن فيه قصة أنت بتقرأه أسبوعيا، هتلاقي مشاعرك بقت شبه مشاعر القصة، هتلاقي ذوقك.. الأبطال اللي في القصة وتصدروا أن هم أبطال، كانوا بييكرهوا حاجات هتبقى أنت تلقائيا عايز تكرههم؛ لأن دول الأبطال، واللي تم توصيفه في القصة على أنه جريمة أنت بقيت تلقائيا بتصنفه على أنه جريمة، واللي اتصنف في قصة أو في الرواية اللي بقت عالمية وبتكرر وكل الناس بتقرأها، اللي اتصنف فيه على أنه خير بيبقى جواك هو ده الخير، شر يبقى هو ده الشر، وأن ده العدل يبقى هو ده العدل. بقيت بتتلقى القيم من الشيء اللي أنت بتتعرض له للتكرار. عارفين القرآن بيعمل إيه؟ تحديدا بالظبط: النواة، الخلية.. الجسم عبارة عن خلايا، والخلايا فيها أنوية، نواة، والنواة دي جواها الدي إن إيه. الدي إن إيه ده -مش عايز أدخل وطبعا في تفاصيل بتقدير من ربنا هو اللي بيحدد شكلك وصفاتك- لما حد بيحب يغير في الصفات ممكن يقوم عامل طفرة في الدي إن إيه ده.
أهو، القرآن بيغير في الدي إن إيه بتاعك، بتاع روحك إن صح التعبير، بيغير في الأصول لو تعرضت للقرآن صح كمجمل، أنا مش بتكلم دلوقتي على التعامل الجزئي مع القرآن -اللي هو نافع، قراءة القرآن قراءة فقهية، قراءة عقدية، قراءة لغوية، كل ده مهم جدا في بابه- أنا بتكلم على مجموع القراءات دي وتعرض عموم المسلمين.. أي مسلم يقرأ القرآن، والكتاب اللي أنت تقدر تقول لعموم المسلمين اقرأوه يوميا هو القرآن، والكتاب اللي له قداسة في عموم قلوب المؤمنين هو القرآن، يعني ده المنطلق اللي المفروض تبدأ منه، الكتاب اللي فيه إجماع عليه هو القرآن، فده المنطلق اللي المفروض تبدأ منه. طب القرآن ده مش أيقظ أمة؟ طب ما بيعملش ده معنا ليه؟ يبقى في دور للقرآن غائب في حياته، في دور للقرآن غائب في حياته! كثرة التعرض.. قصص القرآن، والأمثلة القرآنية، والحقائق القرآنية، والعقائد القرآنية، والأحكام القرآنية، والأخلاق القرآنية، كثرة التعرض له لو أنت سلمت نفسك، لو أنت دخلت زي ما أثر يروى عن ابن مسعود: دور مع القرآن حيث دار، لو أنت داخل قابل للتشكل، سايب نفسك تتشكل مع القرآن. يعني هأديكم مثال: مفهوم.. فيه مفاهيم بيتعرض لها نوع من التشويه، بتتشوه؛ زي مثلا لو جينا نتكلم: الإنسان، الحداثة، المساواة، الحرية، المواطنة، التقدم، عمارة الأرض، السعادة، الطموح، الإنجاز، العلاقات الاجتماعية، الحب، الكره، الهدف، الغاية، معنى الحياة، ليه فيه موت، صدمة الموت، اليأس، الإحباط، الدنيا، المال، الخلود، الفناء، القوة، الضعف، كل دي مفاهيم كإنسان -لسه ما أتكلمناش الدين، الرب، المؤمن، الفاسق، المنافق، الكافر- كل دي مفاهيم.. بتجيب تعريف ده منين؟ تجيب التعريفات دي منين؟
خلينا ناخد مثال من أشهر المفاهيم الموجودة دلوقتي: مفهوم الإنجاز، أو الفوز، أو الفلاح، ومفهوم العقل. يقول لك: أهم حاجة إيه؟ الخطاب يكون عقلي. تخيل لو أنت بتستقي مفاهيمك من القرآن، أنا حبيت أعمل في مرة درس بس ما أديتهوش يعني، كنت بجمعه لنفسي كده اسمه: خليك عاقل. أما حد يقول لك إيه: خليك عاقل. طب أنا عايز أبقى عاقل، أبقى عاقل ازاي؟ جمعت كلمة "تعقلون" و"يعقلون" في القرآن، اعمل أنت الواجب ده: جمع كلمة "لعلكم تعقلون" أو "يعقلون" أو "إن في ذلك آيات لقوم يعقلون"، جمع كل "يعقلون" لو أنت بتستقي مفاهيمك من القرآن، لو أنت عايز تبني شخصيتك من خلال القرآن، لو أنت عايز تكون الشخصية القرآنية اللي لها هوية مسلمة وقابل أنه يقبل التشريع بكل بساطة! فما حد يقول لك: خليك عاقل. أيوه، اللي هو عاقل ده اللي هو يعني إيه؟ ما هو ممكن مفهوم العقل عند واحد غير مفهوم العقل عند واحد. ده من أكبر المفاهيم اللي فيها يعني حتى خلاف فلسفي، هو إيه العقل ده أصلا؟
قيمة بقى القرآن: أنه بيتجاوز الخلافات الفلسفية دي للتطبيق. لذلك من أجمل الكلمات اللي قرأتها في اللي كتبه في تفسير التاريخ، لكن الصحابة لم ينشغلوا بتفسير العالم، ولكن انشغلوا بتغييره. الصحابة ما قعدوش يتكلموا في فلسفات معينة، نزل القرآن، غير فيهم حاجات، اتحركوا تطبيقا، العالم اتغير. مفهوم العقل: جمع "يعقلون"، وشوف الأوامر والعقائد اللي جت مع العقل وعكسها، يبقى ده مش عقل. يعني جمع كده، جمع: لما تلاقي أمر مثلا في الصلاة وتلاقي معه عقل، أمر في الولاء والبراء وتلاقي معه العقل، أمر في حقارة الدنيا وتجد أن ده العقل، تطلع بمفهوم أن كلمة "خليك عاقل" دي من خلال القرآن ده مفهوم ضخم، ده مفهوم كبير أن أكون عاقل بس على المستوى القرآني مش على تعبيرات البشر ولا الأمة الغربية ولا الشرقية.
لأ، مفهوم الفلاح: إيه انسان ناجح؟ مين اللي أفلح؟ من الذي فاز؟ مين اللي عمل ده؟ ما تقرأ القرآن وكل شوية تكرار، تخبط: ﴿قَدْ أَفْلَحَ﴾، ﴿الْمُفْلِحُونَ بِمَا صَبَرُوا﴾، مين دول؟ تبص على صفاتهم، أنت عايز تكون انسان ناجح؟ خليك زي الصفات دي. طول ما أنت ماشي بقى في القرآن عمال تتلقى مفاهيم، عمال تكرر: الدنيا، الآخرة، الفردوس، الرب، القدرة المطلقة، المشيئة المطلقة، الحب، المشاعر، الكره، كل ده بتجيبه منين؟ لو أنت اتعرضت للقرآن بصورة متكررة وسايب نفسك من غير ما تقعد تفكر ده يتعمل فيك ازاي؟ يعني مش نقول إيه: سورة المؤمنون بتتكلم عن الفلاح من خلال تلات مستويات اه، قلنا ده تكلمنا في إيه؟ ده الدرس اللي في إشكالية التفكير الهندسي. لا، أنا عايزك: اقرأ القرآن، سيب نفسك مع القرآن.
لما شخص يسافر بلاد مش مسلمة ويفاجئ أنه في البلاد دي بيتمتع بكافة الحقوق اللي هو عايزها، هو يا أما يفاجئ أنه بيتمتع بكافة الحقوق اللي هو عايزها، ثم ماذا؟ ثم لا يجد أي إقامة للشعائر الدين وقيمة التوحيد، اللي هي "لا إله إلا الله"، قيمة منخفضة! قيمة التوحيد قيمة منخفضة، يقول لك: مش مهم، رأيت.. اسمها إيه؟ إسلاما بلا مسلمين! رأيت إسلاما بلا مسلمين. طب فين قيمة التوحيد؟ هو القرآن.. قارئ القرآن قيمة التوحيد كده بأنك أنت تبقى عندك قيمة فرعية؟ مش ممكن ده! ده لا يمكن يكون يتلونه حق تلاوته مستحيل، ده من أكبر القيم المركزية في الوحي: قيمة التوحيد.
ثلث القرآن: ﴿قُلْ هُوَ اللَّهُ أَحَدٌ﴾. هو إيه أكثر سورة بنكررها؟ الفاتحة، صح؟ حتى من معانيها من أسماء الفاتحة: السبع.. الآية، المثاني. العلماء اختلفوا في كلمة "مثاني" يعني إيه؟ حد عارف "مثاني" يعني إيه؟ من الاقوال اللي أتقالت: "مثاني" يعني إيه؟ أما فيها الثناء أو الأشهر: "مثاني" بمعنى إيه؟ تكرر في سبع آيات بسبع مفاهيم، أنت محتاج تكررهم على نفسك يوميا سبع عشرة مرة، تخيل! ده قيمة التكرار في مفاهيم، مفاهيم رب العالمين: الرحمن الرحيم، مالك يوم الدين، وأنك أنت عبد تطلب أن ربنا يوفقك للعبادة وتطلب الهداية، وخايف من الضلال، خايف من المغضوب عليهم ومن الضالين. المعاني المحورية دي دي المفروض تتبنى جواك، دي "السبع المثاني"، أنت محتاج تكرر ده سبع عشرة مرة؛ لأن ده أقل حاجة، ده اللي بيصلي، باحفظ على الخمس فروض، تخيل بقى بيرقي نفسه بالفاتحة، بيصلي نوافل، وده إيه؟ أقل حاجة، يعني مش بنتكلم بقى لسه هيقرأ إيه. في معاني مركزية هتتبنى جواك.
مستحيل حد فاهم يعني إيه ﴿اهْدِنَا الصِّرَاطَ الْمُسْتَقِيمَ * صِرَاطَ الَّذِينَ أَنْعَمْتَ عَلَيْهِمْ﴾ [الفاتحة: 6-7] بيستحضر نموذج الصحابة وخايف، ﴿غَيْرِ الْمَغْضُوبِ عَلَيْهِمْ﴾ اليهود ﴿وَلَا الضَّالِّينَ﴾ النصارى، خايف أنه يحصل له ده. مستحيل إنسان بيكرر ده ويقلل من قيمة التوحيد، أو من قيمة العبادة، أو يقول لك: أنا مش عارف احنا وظيفتنا إيه في الأرض، احنا لسه بقى مش بنتكلم على استنباطات من آية: ﴿وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً﴾ [البقرة: 30] أو بنتكلم على جرد السور المكية لاستخراج مركز الواحد، لا، ما تتكلمش في الفاتحة، بتكلم في السبع المثاني: تعرضك المتكرر للقرآن بيبعث فيك.. ده اللي عمله القرآن في عموم الصحابة.
مركز بقى للي عايزين نطلع به: فبقى فيه ناس متميزين في بعض المجالات، فين الصحابة؟ ده عالم في الفرائض، وده عالم في مسائل معينة، وده مجاهد وتحفظ القرآن، وده بيقرأ القرآن، وده عالم في التفسير، وده عالم في كذا، في ثغور متوزعة، لكن عموم المسلمين عندهم معنى عام، بيجيبوه منين؟ بيجيبوه من التعرض الدائم للوحي. في تفاصيل ممكن تغيب، يعني في تفاصيل وكان ممكن بعض من كبار الصحابة يغيب عنه فقه مسألة زي عمر بن الخطاب رضي الله عنه أو الصديق، كان ممكن في مسألة في المواريس أو مسألة معينة كانت تغيب عنه ويكون الأعلم بها زيد مثلا أو معاذ بن جبل. يأتي يسبق العلماء يوم القيامة رمية بحجر: أعلم الصحابة معاذ بن جبل، أو ناس متميزة في إقراء القرآن زي ابن مسعود، لكن عموم المؤمنين كان يتلقى روحا معينة، كان له انتماء معين.
ده كان عايز أقول لكم أثر بس عشان الناس ما يفهموهش غلط -خاصة مع الموجة الطعن في السنة-: عمر بن الخطاب رضي الله عنه فيما يروى عنه أنهم كانوا في أثناء السير في الفُتوحات مروا على قرية لهم قرية مسلمة، لهم بالقرآن دوي كدوي النحل، القرآن، فبدأوا ناس يكلموهم في تفاصيل دينية تانية ويخبروهم ببعض الأحاديث، قال: لا تشغلوهم، سيبوهم مركزين في النقطة دي! هو هنا سيدنا عمر -طبعا هو من أكبر من نصر السنة- لكن المقصد أن في لازم معاني معينة تعمم على عموم المسلمين. ده خطاب عام، وده خطورة إشغال عموم المؤمنين بقضايا خلافية خاصة، زي ما بنشوف دلوقتي على صراعات ما بين بعض الأفاضل على الفيسبوك مثلا، أن مسألة المفروض محلها النقاش الأروقة العلمية الكتب، ما ينفعش تصدر لعموم الناس، ما ينفعش عموم الناس يشاركوا في الخلافات دي أصلا، ما لهمش علاقة بده. عموم المسلمين المفروض يتلقوا معاني ضخمة في العبودية، في مركزية الدار الآخرة في حياتهم، في كون مسلم في دينه، قيمة دينه بالنسبة له يعني ايه؟ فيما معنى أنه عبد، في المعاني اللي القرآن كررها في المثاني اللي اتكررت في القرآن، ده المفروض يتلقاها وتكرر عليه.
لذلك من الصور اللي بتسمع كتيير في الصلاة: المفصل فيه ذكر الجنة والنار، تسمع كتير أنت مطالب تسمع كتير عن الجنة والنار، لما تسمع كتير عن الجنة والنار الدنيا.. زي ما نيجي مثلا: هو أنا ليه قلت الدرس ده في وسط سلسلة إشكاليات؟ لأن أنا شايف أن من أكبر المشكلة أن عقولنا وأذواقنا وفطرتنا تم تغييرها. لما تيجي تتكلم في قضايا المرأة تلاقي فيه ممانعة، تلاقي بعض النساء الأخوات ممنعات، تيجي تتكلم في الجامع بين الدين والدنيا تلاقي كتير من الناس اللي بيعي أنه ملتزم ممانع من الكلام، يقول لك: إيه الكلام ده غلط؟! تستغرب، أنت بتقول له آية وحديث، أنا لا أترض أن ممكن يكون في طرح خاطئ فينقد، لكن لما بتكلمه بنصوص هو بقى فيه ممانعة من قبول النصوص؛ لأن ذوقه تغير، طريقة تفكيره في الحياة، قيمة المساواة وكلمة الحرية غيرت جواه مفاهيم، غيرت جواه في الفطرة أصلا، فبقى مش قابل أنه يصبح عبد، مش قابل ده، أن المال اللي معه ده مال الله يحكم فيه ما يشاء هو مش قابل ده. القرآن بيرجعه بيعمل له إعادة ضبط أن هو يصبح: كيف يفكر كمسلم؟ أنت دلوقتي أنت بتفكر خيالاتك يعني، من أول ما الطفل بيبدأ يتعرض لأفلام الكارتون سبيس تون وغيرها، ويترعرض لده، ويترعرض للثقافة التانية من وهو صغير ويكبر، أفكاره نفسها بتتغير.
ما بيفكرش كمسلم، يعني حتى لما يبقى بطل بيفكر نفسه زي، يعني حتى لو يتصور نفسه أو عايز يبقى بطل تاني، خلاص يبقى عنكبوت، يعني شوف، يبقى سبايدرمان مثلا، أو يبقى خفاش، يبقى باتمان. يعني شوف دي لما يحب الطفل يصور نفسه إنه بطل ما بيتخيلش مثلا خالد بن الوليد، ده ما بيجيش، هو ما تلاقاش إن دول القدوات.
فتعرضنا المتكرر للقرآن بيعيد صياغة الذهن، بيعمل لك إعادة ضبط، هيحل كتير من النقاشات والمشادي، ودي الكلمة الرائعة المقال الرائع اللي لا أمل فعلا من قراءته، وأنصحكم أنكم تقرؤوه كثيرا؛ مقال إبراهيم السكران: تطويل الطريق. اسمه تطويل الطريق؛ مقal ممتع. لذلك قال في ختام المقال: أعطني ختمة واحدة بتجرد. بيتكلم على الانهزام الفكري وسلطة الثقافة الغالبة، وأن أمة برضه بنفسها أشبه بنفس المقدمات، وأن في حلول فكرية عشان نحافظ على الشباب، الشباب بيحصل له.
يعني كل فترة ألاقي ممكن والد أو أم يتصل بي: ابني بيقول إنه ألحد، أو بنتي بتقول إن هي ألحدت، أعمل معه إيه؟ ده سؤال أصبح للأسف متكرر كتير، ابني مش عارف طالب في طب، ابني طالب، بنتي في كلية مش عارف إيه، وألحد. طبعا الحادث يعني ما فيش قيم ثابتة، يعني إنت متوقع تعمل أي حاجة ما هو ما فيش قيم ثابتة، وممكن وخاصة يعني مرحلة الشباب ولد أو بنت ممكن يفكر إنه يعمل أي حاجة، ما فيش، ما فيش موانع، ما فيش قيم واصلة للمجتمع، ما فيش قيم شرعية تضبطه، ممكن يعمل أي حاجة.
ففعلا الأب يبقى هينهار والأم، يعني الابن ممكن يضيع. فالتجريف ده إنت محتاج مقاومة، أقصد بأن المناعة ضعيفة جدا فإنت محتاج مقاومة صعبة، فبيقول في الآخر: أعطني ختمة واحدة بتجرد، يعني إنت عايز منتج، منتج كويس، بدايات إسلام كويس ختمة واحدة بالتجرد اللي بيتكلم ده. وزي ما أتكلمت قبل كده عن ماتش الدوري المعاصر الجزء التاني، قيمة كلام إبراهيم السكران إنه جاب آخر الطريق ده أو مشي في طريق الكتب الفكرية وقرأ بلغته الإنجليزية، واللي يقرأ كتابه تأويل الحداثي للتراث يعلم مدى إتقانه لكلام المستشرقين، فاما تيجي منه الكلام ده يعرفك فعلا إن في حل في القرآن إحنا رافضينه ومصممين نعالج الإشكال اللي موجود عند عموم الشباب معالجة فكرية معينة، هو القرآن اللي هيصنع المناعة دي.
يعني لما حد يقول: إحنا عايزين درس عن إشكالية الجمع بين الدين والدنيا، وأخته تقول: عايزين درس عن إشكالية الخطاب النسوي المعاصر، وأن المرأة، تصور الإسلام عن المرأة، وأن بقى فيه بتضارب، كل الإشكاليات دي من أسبابها إن هو محتاج الشاب أو الفتاة محتاجة بس يعملوا إعادة ضبط الأول، يعني يفكر كمسلم، فبالتالي هيتلقى الأمور ببساطة، يعني يتفرمط، يعمل له إعادة ضبط.
ده بيعمله القرآن، التعرض التكرار، إيه جزافا كده؟ إحنا فتحنا أهو الفاتحة، قلنا السبع المثاني، المعاني التي تكرر. البقرة، تقرأ البقرة، تفاجأ أمة كاملة استبدلت بني إسرائيل عشان كانت بتراوغ مع الشريعة تبدأ من الأول لحظة مهيبة، ربنا بيقول للملائكة: ﴿إِنِّي جَاعِلٌ فِي الْأَرْضِ خَلِيفَةً﴾ [البقرة: 30]. إحنا إحنا نبقى في الأرض ربنا بيقول علينا خليفة؟ ولما الملائكة قالت: ليه؟ يعني بيستفهموا: يا رب أتجعَل فيها من يفسد فيها ويسفك الدماء ونحن نسبح بحمدك ونقدس لك؟ قال: ﴿إِنِّي أَعْلَمُ مَا لَا تَعْلَمُونَ﴾ [البقرة: 30]. أي سيخرج منهم من يقوم بطاعات لا تستطيعونها. إيه ده؟ أنا ممكن أبقى الشخص ده؟ طب أبقى الشخص ده إزاي؟ ما تبقاش زي الأمة اللي انحرفت، أمة بني إسرائيل. طب انحرفت؟ اتعملت إيه؟ كانت بتراوغ، كانت بتتبدل، كانت بتغير، كانت بتحرف، كانت بتؤول، كانت بتتكاسل.
يعني الأمر اللي طبقوه، يعني كل الأوامر، الأمر اللي طبقوه البقرة اتسمت السورة باسمه، يعني أنا يعني إنت كان ممكن تسمي يعني الواحد كان متوقع لو هو يسمي السورة يسميها أصحاب السبت، يعني جريمة كبيرة إن هم راوغوا وبدلوا ﴿فَبَدَّلَ الَّذِينَ ظَلَمُوا قَوْلًا غَيْرَ الَّذِي قِيلَ لَهُمْ﴾ [البقرة: 59]. يسميها جريمة التبديل. لكن حتى الأمر اللي طبقوه كان فيه تكاسل، لأ الطريقة دي في التعامل مع الشريعة مرفوضة، الطريقة: سمعنا وأطعنا.
وبعدين تقرا تدخل آيات تحويل القبلة، إيه ده؟ يعني ما عادش القبلة للمسجد الأقصى بقت الكعبة؟ ده معناه إيه؟ معناه إن إحنا اللي استلمنا راية الخلافة، يعني معناه إن الأمة دلوقتي هي المسؤولة عن التغيير، إنت الأمة الإسلامية المسؤولة عن تغيير العالم: ﴿تَبَارَكَ الَّذِي نَزَّلَ الْفُرْقَانَ عَلَى عَبْدِهِ لِيَكُونَ لِلْعَالَمِينَ نَذِيرًا﴾ [الفرقان: 1]. تدخل بعد كده تجد آيات غريبة جدا، آيات قصاص، وبعد كده آيات وصية في المال، وبعد كده آيات صيام، وبعد كده آيات مال في التجارة، وبعد كده آيات حج، وبعد كده آيات قتال، وبعد كده آيات حج تاني، وبعد كده آيات قتال تاني، وبعد كده طلاق، وبعد كده آيات الصلاة، وبعد كده آيات طلاق تاني، وبعد كده أمة بتنهض... وبتروح وبتجي، وبعد كده آيات إنفاق.
وختام ده كله إنك بتدعي يوميا، يستحب لك تقرا الآيتين دول قبل ما تنام، ربنا، وتدعي بقى لربنا، ربنا، التلات آيات آخر خواتيم سورة البقرة، وبتكرر: سمعنا وأطعنا غفرانك ربنا وإليك المصير. دي سورة تصنعك أصلا من غير ما تقرا تفسيرها، إنك تقرا السورة دي على بعضها، تقوم تصلي به، دي بتصنعك. خلصت؟ إنت بتصنع أمة مش هتتساب، هتهاجم، هتهاجم على مستوى الشبهات، زي شبهات النصارى، وهتهاجم على مستوى الحرب المادية، زي غزوة أحد، زي المشركين. تقعد تقرأ وإزاي إن في سورة آل عمران إزاي يواجهنا ده؟ وإزاي عندنا محكمات بنرجع لها؟ وإزاي إن في متشابهات أهل الباطل هيستغلوها؟ وإزاي أنها تحدث أحداث قدرية مش فاهمينها ونقول إن هذا، وربنا يفهمها لنا ويبقى المشكلة عندنا. وتختم السورة إنك خايف تضل ولا ﴿رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا﴾ [آل عمران: 8] زي ما دعيتها في أول سورة، خايف من انك أنت تزيغ.
تتدبر في القرآن وتتدبر في الكون، وتختم إنك لابد أن تصبر وتصابر وترابط. تدخل في النساء وتفاجأ بالعدل المبهر في النساء وتوزيع الحقوق الغير طبيعي، إن كل واحد بياخد حقه. اليهودي اللي افترى عليه واحد، كان ظاهريا مع الأنصار، كان منافق، افترى على واحد يهودي، تنزل الصفحة كاملة في المصحف عشان تقول إن اليهودي بريء. إيه ده؟ سورة النساء.
تفاجأ: يحكم ما يريد، أول ما تبدأ في المائدة، ﴿اللَّهُ يَحْكُمُ﴾ [المائدة: 1]. طب إيه هي أحكام ربنا عشان ألتزم بها؟ تجد في كل شيء، حتى في طعامك، حكم ربنا في الأطعمة، في التفاصيل، في العلاقات الخارجية، في الولاء والبراء. تخلص المائدة تدخل في الأنعام، وهكذا، ما فيش سورة تدخل فيها من غير ما تقعد تسأل: ما هو موضوع السورة؟ وما هي تقسيمات المواضيع؟
سلم نفسك للسورة، سلم نفسك للمصحف، هتلاقيك بتتغير، هتلاقيك بتتشكل، هتلاقيك بيعاد تشكيلك كمسلم. إنت لسه بقى ما درستش فقه؟ لسه ما درستش عقيدة؟ لسه ما درستش؟ إنت دلوقتي بيعاد تشكيلك، كيف كمسلم؟ ما هي هويتك؟ ما هي وظيفتك؟ ما هو انتماؤك؟ ده بيحصل دلوقتي، ده بيعاد من خلال تعرضك المستمر لآيات القرآن.
الفجوة الرهيبة اللي حصلت بينا وبين النص، بين الوحي بسبب أزمة اللغة، الانهزام النفسي، ما بنديش وقت، ما فيش تعليم ديني، عملت الفجوة دي. دورنا ودورك كإصلاح إنك تكسر الفجوة دي، يعني الدور الرئيسي لأي إنسان مصلح إنه يكسر الفجوة اللي اتعملت بين الناس وبين القرآن، وانه يسلم قلوب الناس للقرآن، ده أهم دور، إنك ما تتدخلش إنت، إنت دورك تعريض الناس لهذا النور وتشيل الحواجز اللي مانعة. الإمام بقرأ آيات تهز جبال في صلاة التراويح، فيش تغيير، أنا مش أقصد تغيير إنه بيعيط، لا، ﴿إِنَّا سَنُلْقِي عَلَيْكَ قَوْلًا ثَقِيلًا﴾ [المزمل: 5]. المعاني اللي بتسمعها دي وانت واقف بتصلي دي معاني غيرت أمة.
المطلوب منك ضخم قوي، يعني المطلوب منك في الآيات اللي بتتقال دي مطلوب ضخم، ثقيل، مهمة ضخمة، بس إنت بتلقاهم كل آية لوحدها جزئيات. لا دي دي آيات غيرت أمة، الآيات دي لما نزلت على الصحابة كاد قلبي أن يطير، آيات غيرت... يعني حاولت في أكتر من درس، والواحد كل فترة بيحاول يوصل للنقطة دي، بس لسه مش عارف القرآن عمل إيه في الصحابة، يعني في خطبة بعنوان: كيف غير القرآن الصحابة؟ في درس بعنوان: التغيير بالقرآن والواقع العلماني. في محاضرة مع إخواننا جزاهم الله خيرا برنامج تاج الكرامة، في برضه: كيف غير القرآن الصحابة؟ في محاضرة بعنوان: مشاعرنا تجاه القرآن. كل دي محاضرات بحاول أوصل له: القرآن عمل إيه في الصحابة؟ يعني إيه المعنى المحوري الكلي اللي اتغير في صحابي؟ الأصول اللي لما اتغيرت في الصحابة بقوا هم دول.
يعني أما تيجي تقرأ واقع الفلسفة، واقع المتفلسفة، واقع الصحابة اللي تعرضوا، ما هو الفلسفة يقول لك: إحنا هنعرف نوصل، أنتم محتاجين واحد؟ إحنا مش محتاجين وحي، إحنا نعرف نوصل، أنتم عايزين توصلوا للحكمة؟ إحنا ممكن نوصل للحكمة، أنتم عايزين توصلوا للأخلاق؟ إحنا ممكن نوصل للأخلاق، أي حاجة إنت عايز توصل لها وبتدعي أن لا يمكن الوصول إليها إلا بالنص، أنا بقول لك: أنا ممكن أصل إليها من غير نص. ده من أهم الفوارق الأساسية بين الفلسفة والوحي؛ الفلسفة قائمة على الشك، وهذا قائم على اليقين لا ريب فيه من أول آيات القرآن. مش مهم برضو التفاصيل، ما تشوف واقع الصحابة مختلف.
لكن القرآن لما نزل، وأختم بده عشان طولت عليكم وكان نفسي أطول أكتر من كده، القرآن غير على مستوى العقل، خلى أن في أماكن يقول: العقل ما تروحش هناك. يعني بصوا يا جماعة، الإنسان بطبيعته مش قابل إن هو ينضبط، محتاج حاجة تضبطه، يعني الإنسان: ﴿بَلْ يُرِيدُ الْإِنسَانُ لِيَفْجُرَ أَمَامَهُ﴾ [القيامة: 5]. يعني الإنسان ما بيحبش القيود بتعبير الشيخ الطريفي يقول لك: أي قيود بتتحط على الإنسان بيرفضها حتى لو هو القيد اللي اتحط عليه ده ما كانش هيعمله أصلا، يعني يقول لك حتى جاب مثال: لو قلت لشخص بينام يوميا من الساعة اتناشر بالليل للساعة خمسة يوميا، قلت له: أنت ممنوع من الكلام من الساعة اتنين بالليل للساعة تلاتة بالليل، هيحس أن هو قاعد متضايق، طب هو أصلا الفترة دي ما بيتكلمش، يقول لك: لأ ليه يمتنع؟ ويقفل قاعد اليوم ده سهران ومتضايق، يعني دايما أي الإنسان لما بيتحط لأي قيود بيرفض ذلك، وده من الهوى والنفس والشيطان.
يعني الجنة كانت واسعة جدا وهي شجرة واحدة: ﴿وَلَا تَقْرَبَا هَذِهِ الشَّجَرَةَ﴾ [البقرة: 35]. الشيطان خلى إن دي أحسن شجرة في الجنة، مليانة أشجار دايما اسمها جنة، يعني هي مش باينة من الشجر، يعني تسمى جنة، يعني الأرض الجن الاختفاء، كأن الأرض لما بتقول على بستان جنة يعني الأشجار ملتفة لدرجة أن الأرض مش باينة، ولقى يقول له: هي دي، طب ما تجنن هي دي أحسن شجرة، هي دي.
فالإنسان ما بيحبش الضم، فالإنسان بطبيعته عقله بينطلق ونفسيته بينطلق وقلبه ومشاعره بتنضبط. يجي القرآن يعمل ضبط، يقول له: المنطقة دي من التفكير ما تفكرش فيها مش هتفيدك، هتضيع، هتضيع عمرك فيها. والمنطقة دي من المشاعر ما تروحش هناك. وفي التعامل مع المرأة والعكس، تتمرن مع الرجل ما تعملش كذا عشان ما تدمرش نفسيتك ومش هتوصل لحاجة، هتجيب آخر طريق الشهوات مش هتشبع، بتشرب من مية مالحة. يقول لك: اضبط نفسك كده ومش هتتظبط غير كده.
فالقرآن على مستوى العقل، مستوى النفس، مستوى الروح بيضبطك، بيعيد تشكيلك تاني، تصبح هنا تفكر تفكير، ممكن إنت ساعتها توصل، تستنتج طبعا، بس ده مش حكم شرعي، يعني مش هينبني عليه أي عمل، أنك تبقى كأنك عارف الحكم الشرعي من قبل ما تسمعه، أنك تبقى حاسس أن هي أمر بدهي، يعني تيجي تتسأل على أحكام معينة في التعامل بين الرجل والمرأة أو أحكام معينة في تفاصيل معينة، إنت تلقائيا بدأت تفهم: لأ، طب ما ده ما ينفعش، ما ينفعش ليه؟ أنا مش بقول لك استنتج الحكم الفقهي كده، بس أنا بقول لك إن ده بتبقى إنت بتفكر تفكير شرعي، أو لما بيطرح عليك الأمر الشرعي.
لأن يا جماعة الشرع منظومة متكاملة، ودي أخطَر نقطة في التعامل مع الشرع، يعني مثلا قضايا المرأة، أن يتم تجزئة، يقول لك إيه؟ المرأة مظلومة، ليه؟ ويجيب حكم فقهي معين ويعرضه للناس، كان برضه الشيخ الطريفي في كتاب صِفن العقلية الليبرالية جاب مثال أيضا جميل جدا، بيقول: تخيل لو واحد جاء إلى وجه امرأة حسناء، امرأة جميلة، ومما زاد هذا الحسن في وجه المرأة أن في شامة سوداء في حسنة سودا صغيرة موجودة في وجه المرأة، زاد وجه المرأة إيه؟ حسنا، خلاص؟ تخيل بيقول: لو إنت جبت عدسة مكبرة وركزتها بصورة كبيرة على الحسنة السودا دي وأظهرتها للناس وطلعت مثلا، طبعا أنا إيه، أنا بجود في المثال من عندي هو ما قالش التفاصيل دي كلها، اه هو قال الفكرة عشان أما تيجي ترجع تقول: إيه ده هو ما قالش الموضوع ده.
تخيل لو واحد عرض على الناس صورة، صورة مكبرة من العدسة من الحسنة السودة دي، وبيقول للناس: اللون ده إيه؟ أسود في الوش ده ولا مش في الوش؟ في الوش، اتفضل يا عم، شوف والوش أسود. فيه ناس تانية كده مع الدين، يجيب لك حكم: عندكم ده؟ عندنا يخص المرأة؟ اتفضل يا عم، شوف الدين بيعمل المرأة؟ أيوه، بس استنى بس، اعمل كده إيه؟
ارجع برة كده، يعني ارجع بص نظرة عامة كده، هتجد أن ده بيزيده جمالاً أصلاً، ده ضمن منظومة، على فكرة أنت ممكن كده تعمل كده في الرجل؛ يعني ممكن تطلع راجل مظلوم.
يعني ممكن تطلع إن الراجل ما بياخدش حقه مادية كاملة، بيتفحت، بيجاهد، صلاة جماعة، بيعمل حاجات كتير جداً مطلوبة منه مش مطلوبة من المرأة؛ أهو الراجل مظلوم في الإسلام! يعني أنت أي نظرة تجزيئية ممكن تطلع بها، نظرة مجتزأة تطلع بها أن ده فيه خطأ.
فالإسلام منظومة متكاملة، ده بتتلقاه من تكرار سماع القرآن على بعضه، أنك تخلص الحل المرتحل -إن كان الحديث في ضعف لكن المعنى جميل- الحل المرتحل لما بيخلص ختمة يدخل في اللي بعدها، تكرار بس يتلونه حق تلاوته. هو الآن يُعاد تشكيل عقله وروحه، يُعاد تشكيل العقل وتشكيل الروح والنفس يُعاد مرة أخرى، بعد كده يفاجأ أن أحكام الشريعة أشبه بالواضحة، دي كانت واضحة جداً؛ يعني يجي له حكم شرعي يحس أنه متناسب مع فطرته.
يجي له حكم في قضية المال، في التعامل الربوي، في التعاملات الاجتماعية، في العلاقات، في التعامل مع الكافر، في التعامل مع المسلم، في التعاون مع المرأة؛ أي قضية شرعية هتجي له، هيجد أن هو خلاص بقى حصل له إعادة ضبط.
المشكلة أنك تقعد تيجي تعالج -وده اللي حصل للأسف لما حصلت المناظرات كتير بين الإسلاميين والليبراليين- قبل ما يتم عرض كليات الدين، بقى فيه ممانعة لكل حكم شرعي، رفض ونقاشات وخلافات، لا هو المفروض كنا نرجع خطوة لورا، كليات الدين تطرح، معنى العبودية الأول، ممكن هو يظل رافض، بس نتكلم على الطرح الأفضل للدين.
يبقى إزاي اللي أنا كنت عايز أقوله النهاردة: أن كتير من الإشكاليات اللي احنا عمالين نقول فيه إشكالية كذا وتدين معاصر وقضايا المرأة وجمع بين الدين والدنيا؛ كتير من الإشكاليات جزء كبير منها هيتحل لما تفكر شرعياً صح.
لما تفكر تفكير كمسلم، هتفكر ده صح إزاي؟ ما تفقدش هويتك إزاي؟ ما تنجرفش إزاي؟ إزاي ما يحصلش جواك مسخ لمعاني وأنت مش واخد بالك؟ إزاي مفاهيم غلط ممكن تترسخ جواك وتتصدر وتكرر: العدل، المساواة، الحرية.. لأ، مفاهيم معينة بتصور معين عندك، هو مش تصور شرعي وبيرسخ جواك وأنت مش عارف؛ إزاي تعمل ممانعة لده، وإزاي يبقى عندك مناعة قوية لده، وإزاي تبقى أنت عندك الهجوم أصلاً؟ ده من خلال التعرض المستمر للوحي.
خلال التعرض الصحيح ﴿يَتْلُونَهُ حَقَّ تِلَاوَتِهِ﴾ [البقرة: 121]، ده يعني أحد المعاني اللي الواحد بيحاول يوصل لها: ماذا يقدم لنا القرآن في ظل هذه الأزمة الضخمة التي نعيشها؟ أنه بيرجع يبث الروح مرة أخرى.
لما يتعمل أرضية كده بقى من عموم المسلمين، أرضية كده قرآنية، بتزهر بقى نباتات التخصصات؛ طيب، يروح للعلم، وده للحركة، وده بيروح للدعوة نبتت. لكن فيه أرضية واحدة إسلامية كده واحدة، عقلية ونفسية قرآنية، قابلة للاستسلام للشريعة، بس ده مهم جداً في عموم الناس.
وإذا قلت لك مهم جداً أن عموم المسلمين بيعظموا القرآن؛ كل المسلمين بيعظموا القرآن، ابدأ من القرآن، ابدأ على نفسك ومع الناس من القرآن، ابدأ من النقاط المشتركة اللي موجودة في الوحي، اتحرك منها، لا خلاف في الوحي.
فده كانت فكرة النهاردة، إعادة ضبط للفطرة، للروح، للعقل، للقلب النفسي من خلال القرآن. أسأل الله سبحانه وتعالى أن يجعلنا وإياكم من أهل القرآن الذين هم أهله وخاصته. وأستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك. جزاكم الله خيراً.