د. أحمد عبد المنعمالسلام عليكم ورحمة الله وبركاته، بسم الله والصلاة والسلام على رسول الله صلى الله عليه وسلم. بإذن الله سبحانه وتعالى، كنا ماشيين في سلسلة من أصول الانحراف يقرب من ثلاث دروس تقريبا.
الدرس الأول لاستعادة الثقة في الوحي مرة أخرى، وأن الوحي قادر على حل مشاكلنا التي نجدها في عصرنا الحالي، ثم تكلمنا عن أصلين من أصول الانحراف، ويعني درس النهارده أشبه باستراحة بين هذه السلسلة، لنعود مرة أخرى بإذن الله سبحانه وتعالى المرة القادمة الحديث عن الأصل الثالث من أصول الانحراف. الاستراحة اللي هناخدها اليوم دي هي مش استراحة قوي يعني، يعني هي إشكالية من الإشكاليات التي كنا توقفنا عنها شوية بحيث إنها كان في باقي مجموعة من الإشكاليات ما تحدثناش عنها، لكن إشكالية النهارده ممكن الواحد أشار إليها في أكثر من درس ولا سيما للأسف التي تلاحقنا كثيرا، وتظهر هذه الإشكالية في كثير من الخطابات أو بعض المنشورات، أو في الفضفضة بين الأصدقاء وبعضهم البعض، تظهر بعض كلمات تعبر عن هذه الإشكالية.
فضلا عن أن هذه الإشكالية ملموسة في واقع كثير من العاملين بدين الله سبحانه وتعالى، ودائما أنا بأكد أن كثير من هذه الدروس هي بتخاطب الشخص، يعني بتخاطب فئة قررت بفضل من الله سبحانه وتعالى تلتزم بدين الله، وتحاول تفعل شيء لهذا الدين بحيث إن الخطاب يكون معروف وبيوجه لمن، زي ما يكون في كتاب بيكون مخصص لعلم معين، فكذلك الدروس دي بتكون مخصصة لطائفة معينة. الإشكالية اللي هنتكلم عنها النهارده ممكن نسميها إشكالية اليأس والإحباط وترك العمل لدين الله سبحانه وتعالى.
أحيانا السائر في الطريق إلى الله سبحانه وتعالى بيزيد على مرتبة الصلاح، بينتقل إلى مرتبة الإصلاح، يعني بيبقى عايز ينتقل من منزلة الصلاح إلى منزلة الإصلاح، ثم يسير في هذا الطريق، يعني مش عايز يكتفي بمجرد أداء الفروض في المسجد أو أعمال الخير التي يستطيعها قدر الاستطاعة بدون تضحية أو بذل زائد، وبقية الحياة فيها نوع من الاستقرار الدنيوي، لا هو يريد أن يضيف، يريد أن يلتحق بصف العاملين لدين الله سبحانه وتعالى أيا كانت الثغور، اتكلمنا في مسألة اختيار الثغور في درس إشكاليات اختيار الثغر، لكن القضية أن بعد فترة أو الإشكالية اللي عايزين نتكلم عنها النهارده، اللي بعد فترة من هموم الصلاح والإصلاح يصيبه حالة من اليأس والإحباط، ويصل يعني ملخص درس النهارده: ما فيش فايدة، أكمل ليه؟
أو بدأ يصيبه حالة، مش حالة انتكاس، يعني مش حالة انقلاب مفاهيمي اللي أتكلمت عنها بالتفصيل في درس الحور بعد الكور، الجزء الأول تحديدا، وأرجو أن الدرس ده بتاع النهارده هو أشبه بتكملة أو يعني جزء تاني لدرس الحور بعد الكور، أن الحور بعد الكور بيخاطب أيضا نفس الطائفة التي صارت في الطريق لفترة، وعملت للدين، سواء في العلم أو في الدعوة أو في العمل الخيري، أيا كانت الأعمال التي بذلتها نصرة الدين، ثم في منتصف الطريق اصابتها أو أصاب كديا أو حجر أصابت حجرا جعلهم يتوقفون عن السير. لكن الحور بعد الكور كنت بتكلم على اللي حصل له انقلاب مفاهيمي، يعني كفر بهذه المبادئ، انقلب وارتد على عقبه فأصبح بيرد على التي كانت فيه، هو أصبح والعياذ بالله ينازع فيما كان فيه، لذلك هو اسمه الحور بعد الكور، وكان النبي صلى الله عليه وسلم.
لا، النهارده إحنا مش بنتكلم على اللي حصل له انقلاب مفاهيمي، لا، هي مش كفر بالطريق، لكن هي حالة من اليأس والإحباط اصابته أثناء الطريق جعلته يقول: ما فيش فايدة، أنا أيا كان الأسباب اللي هنحاول نذكرها النهارده مع قدر المستطاع، طبعا بعض الحلول عارفين إحنا ما بنقولش أي حدود، بس قدر المستطاع يعني يكون فيه بعض الحلول للخروج من هذه الحالة التي ليست بعيدة عن أي أحد، بل كلما زاد هم الإنسان، ازداد هذا الهم والدافع والشحنة الدافعية على قدرة، أحيانا لما بيكون الإحباط -أنا أحيانا- السرعة اللي بيتجه بها في الطريق أحيانا بتكون نفس السرعة التي تكون سرعة الارتداد أحيانا، فليس الأمر ببعيد عن أحد، لا المتكلم ولا السامع ولا أي شخص بتسمع عنه من العلماء أو الدعاة أو أو، ليس بعيد عن هذه الحالة التي اعترت بعض الكتاب أو العلماء عند كتابة سيرهم في لحظات صدق بيكتب أنه مر بلحظات ضعف أو لحظات ألم كاد أن يترك طريق العلم والتعلم أو العلم الشرعي، وأنه شعر بحالة من عدم جدوى ما يفعل، وكانت غالب الحالات دي بتكون نتيجة مقارنة الأوضاع العامة التي هو فيها بما يفعل، فبيشعر بحالة أن ما فيش فايدة، هذا ما أفعل لن يؤتي شيئا ولن يجني ثمارا، خلاص ما لوش لازمة.
فده الدرس اللي عايزين نتكلم عنه النهارده: إشكالية اليأس والإحباط وترك العمل لدين الله سبحانه وتعالى. خلينا نتفق الأول أن مسألة ترك العمل لدين الله سبحانه وتعالى بعد أن كنت في شيء من الله عز وجل عليك به ثم تترك هذا الشيء، هذا من مراد الشيطان. خلينا نتفق الأول أن الشيطان يبحث عن هذه اللحظة، سواء لحظات اليأس من رحمة الله والقنوط: ﴿وَلَا تَيۡأَسُواْ مِن رَّوْحِ ٱللَّه﴾ [يوسف: 87]، أو ﴿وَلَا تُلْقُوا بِأَيْدِيكُمْ إِلَى التَّهْلُكَةِ﴾ [البقرة: 195] وأداة الشيطان إلى ظفر منكم بهذه: إن الله لا يمل حتى تملوا، أو ده في مسألة طريق الصلاح أو في طريق الإصلاح أن تترك ما كنت تفعل.
لذلك قال الله سبحانه وتعالى مبينا أن من أغراض مكر شياطين الإنس: ﴿وَإِذْ يَمْكُرُ بِكَ الَّذِينَ كَفَرُوا لِيُثْبِتُوكَ أَوْ يَقْتُلُوكَ أَوْ يُخْرِجُوكَ﴾ [الأنفال: 30]. يبقى أول غرض من أغراض المكر من أهل الباطل بالدعاة إلى الله سبحانه وتعالى أن هم عايزين يوصلوه لحالة إيه؟ يثبتوك. اتكلمنا على مسألة يعني إيه يثبتوك، يسجنوك، وقيل أن يثبتوك حالة من لفظ الكلمة: الثبات، أنك تكون مش ثابت على مبادئك، طبعا هم مش عايزين كده أبدا، لا، الثبات هنا يعني عدم الحركة، أنك تكون مستقر في مكان لا تتحرك بهذا الدين لا تعمل بهذا الدين، زي ما أتكلمت قبل كده مقالة ديناميكية القرآن الكريم والتي كانت تدور حول قول الله سبحانه وتعالى: ﴿أَوَمَن كَانَ مَيْتًا فَأَحْيَيْنَاهُ وَجَعَلْنَا لَهُ نُورًا يَمْشِي بِهِ فِي النَّاسِ﴾ [الأنعام: 122]، فانك أنت تثبت وتثبت هذا النور في مكان حتى ينطفئ، هذا ما يريده أهل الباطل.
يبقى إذا خلينا نتفق أن ترك العمل للدين بعد أن فتح عليك، وكما ذكرت في أكثر من موطن كلام شيخ الإسلام ابن تيمية رحمه الله أن كثيرا من الأعمال قد تلزم الإنسان، أي تصبح واجبة في حقه بعد أن كانت نافلة، تلزم الإنسان بالشروع فيها، يعني قبل ما يدخل فيها كانت نافلة عليه، بعد ما دخل فيها زي الجهاد في النافلة أو الحج بعد ما دخل فيها اصبحت واجبة عليه، فبيقول أن فيه أعمال قد تقاس على الجهاد والحج ومنها العلم والتعليم، أن إذا من الله سبحانه وتعالى على الإنسان بشيء من هذه الامور، ولا حاجة لأن يترك هذا الأمر، فليس له أن يتركه هكذا اعتباطا أو عبثا. فمسألة ترك العمل للدين أمر -نسأل الله الثبات- أمر مؤلم على النفس، لكن الإنسان قد يعتاد عليه، وهذا من مراد الشيطان للعامل لدين الله سبحانه وتعالى.
قال ربنا سبحانه وتعالى: ﴿مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ﴾ [الأحزاب: 23]. للانسان حينما يعاهد الله سبحانه وتعالى على أمر أن يثبت على هذا الأمر، هذه منقبة عظيمة، يعني ده يستحقوا الوصف بالرجال. كتير مننا في بداية السير في الطريق الطموحات والأماني لنصرة الدين والأماني والحماس المشتعل، مع طول الطريق وكثرة الابتلاءات وكثرة السقوط والأحجار والكدة اللي بتجابل الإنسان تجعله يخفت، تجعل هذا الحماس ينطفئ. ﴿مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ﴾، فمنهم من هؤلاء الرجال ربنا سبحانه وتعالى هنا في سورة الأحزاب بيتكلم أن الرجال الحقيقيين أو الرجال ينقسمون إلى قسمين لا ثالث لهما: القسم الأول عاهد الله سبحانه وتعالى ووفى لما عاهد واستمر على هذا الوفاء حتى مات: ﴿فَمِنْهُم مَّن قَضَى نَحْبَهُ﴾ ومات، فقيل حقق أمنيته وظل ثابتا عليها حتى مات. الإمام الشوكاني له هنا شرح جميل في فتح القدير في هذه الآية راجعوه، منهم من قضى نحبه.
ومنهم القسم التاني من الرجال اللي عمل إيه؟ يقول: ﴿وَمِنْهُم مَّن يَنتَظِرُ﴾. ومنهم من ينتظر، يعني إيه ينتظر؟ يعني يظل ينتظر اللحظة التي يقضي فيها نحبه وهو على الطريق، قضية أن تموت على الطريق، يعني مش سهل أنك أنت في البداية -مش سهل يعني مع بعض وصعوبات- أنك تصل إلى الطريق، أو أنك تضع يدك على ورجلك على أول الطريق. المشكلة أنك تكمل. وكان في درس بعنوان في منتصف الطريق أو عنوان جانبي اسمه: فما وهنوا، برضه أرجو أن ترجعوا إليه، أتكلم في القضية دي أن بتصيب الإنسان في منتصف الطريق، ودرس الحور بعد الكور أتكلمت على توصيف الحالة النفسية التي تصيب الإنسان في منتصف الطريق عندما يقل الزاد الإيماني يحدث نوع من انقلاب المفاهيم التي كانت عليها.
إذا مسألة ترك العمل للدين أو لا تؤمن أن تنصره أو أو غير ذلك، ده مسألة من مراد الشيطان وحذر الله سبحانه وتعالى منها، بل أثنى الله سبحانه وتعالى على الثابتين الذين يموتون على ما عاهدوا الله عليه. طيب، يعني الحالة بتاعة: ما فيش فايدة، أو ما فيش أمل، أو حالة زي ما قلت، في فارق بين واحد انتكس أو انقلب مفاهيميا وكفر بما كان يؤمن، وفي واحد لسه المبادئ، لكن اصابته حالة من اليأس والإحباط، القى سلاحه، خلاص فقد الحماس وفقد الدافع، هذا اللهيب المشتعل أصبح منطفئا. ده اللي إحنا عايزين نتكلم عنه.
طبعا أسباب كتير، إن أحط بها، حاولت سببين تلاتة بس اللي نتكلم عنهم النهارده، وزي ما قلت هذه الأسباب موجودة مفرقة، أو نوع من التفصيل شوية في درس الحور بعد الكور. فيه تلت شبهات رئيسية أو تلت قضايا رئيسية عايز أتكلم عنهم النهارده. القضية الأولى، اللي هو ممكن متكلم مع واحد يقول لك: أنت مش شايف الظروف اللي حوالينا عاملة إزاي؟ عملت دي إيه؟ يعني مش أنا بحب الدين وفعلا كان نفسي أعمل حاجات كتير للدين، وأول لما بدأت أسير في هذا الطريق كان لي طموحات، انت مش شايف الظروف حوالينا؟ مش شايف الأزمات الاقتصادية؟ شايف الوضع؟ مش شايف حالة التفرق؟ حالة الشتات؟ حال المسلمين؟ الضعف الموجود عند المسلمين؟ شايف الأوضاع دي؟ بالإضافة إلى أنا واحد فوجئت أن طاقاتي ضعيفة وقدراتي ضعيفة، وبعدين فوجئت أن أنا بادئ في الطريق مع -طبعا الانفتاح وسائل التواصل- بدأ يقارن نفسه بالناس، فوجئت أن أنا مش هلحق أحصل، الحاجة الناس سبقاني بكتير. أنا واحد في جامعة ولسه بادئ أفكر أصلا أسير في الطريق، ولا خلصت جامعة وعندي مشاكل اقتصادية وما عنديش وقت لنصرة الدين بهذه الطريقة، وبعدين أقارن نفسي بالناس، فلان في علم الحديث يعني يقول كلام وصل لمرحلة يعني إيه التنين المجمع في ابنها، ولا التاني فلان، يعني كفاية اسمه، كاتب اسمه أصلا السلفي الأثري الحنبلي مثلا، وأنا وتاني الشافعي الأزهري وأسماء، أنا أصلا ما ليش أهل يسألوا علي، ما ليش يعني أنا أما أجيب يعني أنا آخري، يوم ما أحط لنفسي اسم، يعني أنا كنت باكتب في، يعني ده أقصى حاجة أنا كنت بأعرف.
فأنت أما جيت أدخل وكان نفسي أنصر الدين، أنا فوجئت أن الموضوع طلع كبير، أنا فوجئت -يعني أنا في الأول كنت كنت داخل طيب ونيتي كويسة جدا- أنا فوجئت أن الموضوع طلع ضغط، أنا بقى هجيب وأقتل ده منين أصلا؟ يعني أنا مش كفرت بالمبادئ، أنا شايف أن ما فيش فايدة من الإبحاش، عشان ما أعدش أتكلم معاك كتير، هو ما فيش فايدة وخلاص، يعني أنا أيا مهما قعدت أحكي لك على الحالة النفسية اللي أنا وصلت لها، أنا وصلت لحالة أن أنا بقيت محبط، ظروف ضغط مستمر علي، ما فيش وقت، اقتصاديا شايف الوضع عامل ازاي، شتات أصلا وتفرق، كل طريق بمشي فيها ما أقدرش أكمل فيه، كل طريق وأفاجأ أنه محتاج لسنوات، ففي الآخر أنا وصلت لقناعة إني ما فيش فائدة. خلينا نشوف حاجة تانية أعملها، أو خليني أعيش يعني إيه طيب وراضي وعلى قدي، ما أعدش استثير مشاعر نصرة الدين اللي كل شوية تستثار وتتخبط في صخرة الواقع كل شوية، فخليني أحسن بعيد عن القصة دي.
ده مدخل من مداخل الشيطان، طبعا لا شك أن مداخل الشيطان ومن حلول القضية دي هو أصلا بيحتاج إلى إعادة تصحيح التصور عن العمل اليومي، بل للأسف مش إعادة تصور عن العمل دي فقط، إعادة تصور عن مفاهيم العبودية أصلا، يعني إعادة قراءة أحاديث غرس الفسيلة عندما تقوم الساعة، أحاديث الكلمة الطيبة، أحاديث أثر الكلمة الواحدة، يتكلم بالكلمة من رضوان الله لا يلقي لها بالا، أحاديث وآيات وآثار ومواضيع التي أتكلمت عن: ﴿وَلَنَهْدِيَنَّهُمْ سُبُلَنَا﴾ [العنكبوت: 69]، وأن سبل إرضاء الله كثيرة، لا توقف على ثغر واحد، محتاج يعني يعيد فهم قضية العبودية والإنجاز. اتكلمنا عنه قبل كده.
انت مش داخل سباق، مش داخل تنافس. داخل ترضي الله سبحانه وتعالى، محتاج يعيد تصور عن أن الله سبحانه وتعالى ينمي العمل كما يربي أحدكم فلوه، بالصدقة تكون مثل جبل أحد. كذلك قد يكون العمل البسيط ينمى لك؛ سواء أثراً في الدنيا أو ثواباً في الآخرة.
المشكلة أن إحنا لا نريد إلا الأثر الدنيوي الملموس، فده بيحتاج الشخص اللي وصل للمرحلة دي وبدأ يفكر بهذه الطريقة أو ممكن يسميها الطريقة الرقمية في التفكير، أن هو بيحاسب نفسه رقمياً زي ما بيحاسب نفسه موظف في شركة وعايز يحسب السيف بي بتاعه، بيتبدأ يفكر في الدين كده تفكر خاطئ. بل أقول لك أحياناً اللي شايف نفسه أن هو مش مفيد أو أن هو مش عارف يوصل لمرحلة الوحش في علم كذا ولا مرحلة مش عارف إيه في علم كذا، وحاسب أن هو بعيد جداً عن... وهي دي أحياناً.
كل هؤلاء يحتاجون إلى جهدك أنت، ما هو كل دول أصلاً لو أنت أنت اللي بتتحرك، أنت ممكن تكون بتتحرك في الواقع وليك أصدقاء كتير، أنت ممكن اللي تدعو الناس أصلاً للسماع. يعني دول ممكن يقعدوا عطلانين من غيرك، يعني كل الثغور تحتاج إلى بعضها البعض. يا جماعة، ثغور الدين أشبه بمدينة متكاملة، يعني زي ما المبنى ده بيخلص، المصلحة الحكومية محتاج، المستشفى محتاج، السوبر ماركت محتاج لوسائل النقل.
خلي بالك، كل المدينة معتمدة على بعضها البعض عشان تقوم، فكذلك الثغور. نعم، هنا الثغور أشرف من الثغور، وجاءت الشريعة بترتيب ذلك، لكن الكل يحتاج إلى كله. مش معنى أن إحنا بنقول، ودي كلمة كتير كان بيستعملها شيخ الإسلام، مش معنى أن إحنا بنقول أن جنس شيء أفضل، يعني أما نقول مثلاً جنس العلم أفضل من ثغر آخر، مش معناه أن كل من تلبس بالعلم أفضل من أفراد اللي قاموا في ثغور أخرى، بالعكس، بل من هؤلاء نسأل الله السلامة والعافية.
كما قال النبي صلى الله عليه وسلم: «من تعلم العلم ليجاري به العلماء ويماري به السفهاء ويصرف وجوه الناس إليه فهو في النار». يعني والعياذ بالله، ممكن تكون الثغور العلية التي تنظر إليها قد تكون من أسرع الطرق إلى النار والعياذ بالله. أول ثلاثة سير بهم النار من هذه الثغور العلية اللي بيتنافس عليها.
ليس هذا، ليس معنى هذا الكلام أن تنصرف عنها، لكن أقول: ابحث عما يرضي الله سبحانه وتعالى منك. القضية مش أنك رايح تقلد فلان أو تكون مثل فلان. فمسألة تصور ما فيش فايدة، يعني إيه ما فيش فايدة؟ ما فيش فايدة في إيه تحديدا؟ ما فيش فايدة أنك تخش الجنة؟ أطلعت الغيب؟ ما فيش فايدة أنك تصل الفردوس الأعلى؟ ما فيش فايدة أنك تكون زي فلان؟ وهل أنت مطالب بهذا؟ ما فيش فايدة من إيه تحديدا؟
يعني قبل ما نقعد نرد على اللي وصل لحالة الإحباط، يا إلياس، ما فيش فايدة في إيه؟ أنك تعمل أنت هذه الكلمة البسيطة في مسجدي قريتك أو في مسجد منطقتك التي تقرأ على الناس أحاديث النبي صلى الله عليه وسلم من رياض الصالحين؟ من الذي يدريك أن هذا العمل لا يبارك الله فيه ويتقبل منك وترفع به درجات؟ حتى فقط من صلاة الناس على النبي صلى الله عليه وسلم أثناء كلامك وأثناء حديثك، لا تحقرن من المعروف شيئاً.
أن اللي بيقول ما فيش فايدة، ما فيش فايدة في إيه؟ لماذا ألقيت عصاك؟ لماذا ألقيت سلاحك؟ لماذا توقفت عن السعي؟ أين تلك الهمة التي كانت بداخلك وأنت في طريقك إلى الجامعة؟ فكروا في هذا وأن تدعو هذا وأن تعطي هذا -كنت هقول تعطي ده شريط، الشريط ده كان شريط أيام زمان، ما عادش شريط دلوقتي، اديه أي فلاشة وشوية حبوب يعني- اديه أي حاجة، المهم أنك أنت فين همتك في الحركة؟ فين أنك أنت عايز تكلم فلان يسمع، تبعت له لينك على الواتس، حتى تكلمه أو تفكروا أو تقابلوا في مسجد الكلية؟
فين الهمة دي انطفأت ليه؟ يعني لماذا للاسف، وكلنا مشاركون في ذلك، حال مساجد الجامعة الآن، المساجد الموجودة في الكليات كانت زمان مشتعلة، كانت تلاقي مقرأة وتلاقي إخوان بيتخانقوا مع السلفيين وتلاقي مش عارف إيه، دلوقتي ما فيش فيها حد ليه؟ يعني أي محاولة للتذرع أصل فيه منع، لأ، هو ما حدش منعك أنك تقعد تقرأ قرآن، أنت جربت؟ يعني القضية اشتغل دعوة فردية.
أين هذه الحماسة؟ لماذا انطفأت كلمة ما فيش فايدة؟ في إيه ما فيش فايدة في إيه؟ في الناس؟ من قال هلك الناس فهو أهلكهم، أو أهلكهم. ليه؟ يعني لماذا وصلت إلى هذه القضية؟ يعني خلينا نحلل بحيث أن غالباً كل هذه الأعذار ليست حقيقية، والحقيقية أنطفاء الإيمان الحقيقي، الحقيقة آه انطفاء الإيمان الدافع الوازع، بينطفئ، الشعلة تنطفئ، هذه هي الحقيقة.
كثير من الأعمال متاحة، كثير من الثغور مفتوحة. فمسألة أصل أنا أما اكتشفت موهبتي، واكتشفت أصل أنا مشغول، لأ، مهما كان الانشغال، مهما كان الانشغال الله سبحانه وتعالى يعذرك، لكن هل أنت استفرغت الوسع؟ هل الواحد بذل غاية ما استطعت؟ هل هذا ما تستطيعه؟ يعني يا جماعة، اللي بيفكر في نصرة الدين على أنك تخيل معايا مشهد أن ده ابنك الوحيد، لو واحد رزق بولد بعد طول صبر وطول انتظار، ثم مرض هذا الطفل ابنه سخن بالليل يوم الخميس بالليل ما فيش عيادات فاتحة، أو يوم الجمعة بالليل ما فيش عيادات فاتحة، يعمل إيه ابنه الوحيد؟
هذه الشفقة بداخل الوالد تمنعه من الجلوس، يقول لك إيه؟ الولد عمال يسخن، وهو منطقياً العيادات قافلة دلوقتي، ومعقول هيفكر كده؟ معقول هيتعامل بهذا البرود يوم الخميس؟ طيب نستنى يوم السبت؟ لا، هو ممكن ينزل ومش عارف استقبال فين، طوارئ فين، هو ممكن ينزل يلف على المستشفيات. هو في شيء بداخله يدفعه دفعاً ألا يفكر بهذه الطريقة الباردة. هنتكلم على مسألة البرود اللي بيصيب بعض الناس لأسباب سنذكرها بإذن الله سبحانه وتعالى.
فمسألة أن ما فيش فايدة، ما فيش فايدة في إيه؟ يعني خلينا نعترف بالأسباب الحقيقية، مسألة عقد المقارنات بين الناس المتقدمة وضعفي وعجزي وقلة ذكائي وقلة قدراتي الحفظية وقدراتي التعلمية ومواهبي اللي أنا مش حاسس أن لها مكان في الواقع، أو دعك من هذا، ساعت كان هذا، أنت ممكن تبذل لنصرة الدين في أي شيء.
أي شخص لما يقعد مع نفسه كده يحاول يفكر على مستوى الدوائر المحيطة القليلة ثم يتسع، ومع تنوع الثغور يفاجئ أن في كم من أبواب الخير مفتوحة أمامه، لكن هو عنده مشكلة أما قلبية أو مشكلة في التفكير، هو بيفكر أن النصرة دي بطريقة خاطئة، هو له تصور معين وأشرت إليه كثيراً في درس الحور بعد الكون، له تصور معين لنصرة الدين: هعمل عمل يستلزم من هذا العمل مباشرة ربط مباشر بخط التمكين.
اللي هو يسأل -وده الشبهة التانية اللي بتمنع الناس عن نصرة الدين أو بتوصله لحالة اليأس والاحباط والعجز وضان الحماس وترك العمل للدين، مش مسألة ما فيش فايدة أو عقد المقارنات أو أو، لا- المسألة تقول لك إيه؟ طب يا عم أنا هشتغل خلاص، أنا اقتنعت، أنا كويس، يا عم أنت اقتنعتني، هنعمل ايه بقى؟
طبعاً أولاً اللي بيتكلم بالصورة دي هو غالباً هو داخل يتخانق أصلاً، فمش هكمل النقاش معه، يعني أما يهدى شوية كده أشرب ليمون بالنعناع ولا أي حاجة وبعدين نبقى نتكلم عنه، لكن اللي بيتعامل: ها هنعمل إيه؟ وأول ما هتيجي تنطق، وبعدين إحنا بقى لسه خلصنا، حفظنا القرآن والسنة، وبعدين هو يعني أصلاً طريقة التفكير بتاعته بعدين دي، ده خلل. يا عم أنا دماغي كلها غلط، أيوه دماغك كلها غلط، أمَال أنا عامل الدرس ده عشان إيه؟ أيوه ما هو التفكير ده غلط.
يعني فكرة وبعدين دي، هو أنت متصور زي زي فكرة ما فيش فايدة فانت بتسأله ما فيش فايدة في إيه، فبعدين هو أنت أصلاً كنت بتعمل عشان إيه؟ يعني هو أنت متصور أن أنا لازم هعمل دي يحصل قصادها تغير مباشر؟ هو أنت بتلعب لعبة أنك هحط الطوبة دي هيتبنى قصادها كذا أو الطوبة دي قصادها كذا وخلاص وبعد مثلاً عشر سنين أو خمس سنوات هنكمل البيت وهنكسب؟ هو يعني إيه وبعدين؟
وبعدين يقول لك إيه: هنعمل إيه أكثر من اللي اتعمل؟ ناس جابت آخرها، أديك شايف الوضع عامل ازاي، كيف الحالة والوضع عامل ازاي، يعني هنبقى أحسن منهم؟ يعني إيه اللي هنعمله جديد؟ مش قادر يفهم أن رقم واحد قبل أي إجابة وقبل أي تفاصيل وقبل أي نقاش وقبل أي مفاهيم وقبل ما نقرأ القرآن قبل أي حاجة، أنت تنجو.
يعني بس قبل ما نتكلم ونحلل كلمة وبعدين أو نسترجع التجارب السابقة أو غير ذلك، أنت تعمل للدين لتنجو، لترتفع درجتك في الجنة، لتسير على هدي النبي صلى الله عليه وسلم. يعني عجبني جداً الكلمة المعبرة الرائعة لأنس بن النضر، أنس بن النضر في منتصف المعركة والمسلمين بيتهزموا، يعني خلاص هم في حالة انهزام وأشيع مقتل النبي صلى الله عليه وسلم.
أشيع مقتل النبي صلى الله عليه وسلم، تخيل واحد في غزوة المسلمين بيجروا في الاتجاه ده الهزيمة، بيسأل عن النبي عليه الصلاة والسلام قالوا له مات، فوجد الناس بدأت تلقي السلاح، هو بالمفاهيم دي، سواء بقى المفاهيم الرقمية أو مفاهيم الانتصار أو مفاهيم وبعدين وهنحارب ليه وبعدين، وليه نحارب؟ النبي صلى الله عليه وسلم في زعمهم في هذه اللحظة قتل والمعركة اتغلبنا، ليه نكمل؟
فبكل بساطة مفاهيم أساسية بديهية استقرت في قلب أنس بن النضر جعلته بكل بساطة يقول: قوموا، مش أنتم أتباع النبي صلى الله عليه وسلم وهو قد مات؟ إذاً قوموا فموتوا على ما مات عليه. يعني قوم موت على الطريق، ما قلتلكش انتصر، أنا بقول لك على الأقل تلقى الله سبحانه وتعالى وقد مت على هذا الطريق.
قوموا، ما تموتش وأنت قاعد، تموت وأنت قاعد ليه؟ يعني تموت ليه وأنت بتبذل؟ لأ ليه؟ ليه تموت عاجز؟ يعني ما الذي استفدته؟ يعني أنت البذل مش هيحقق حاجة والترك هيحقق؟ يعني الحركة والبذل ومحاولة البحث عن أي ثغر وسد أي ثغرة ولو بورقة، تقول لي هتعمل ايه في هذا الثغر والرياء؟ أحا هتعمل إيه يا سيدي؟ أنت تنجو، والله سبحانه وتعالى يبارك في الجهود ليس بجهدك.
وثانياً هو الترك هو اللي ينفع؟ يعني هو تركه ولا ينفع؟ فبكل بساطة سيدنا أنس يطبق منهج الاتباع، اتبعناه حياً صلى الله عليه وسلم فلنتبعه في ظننا كما نُظن الآن أنه مات صلى الله عليه وسلم فلنتبعه ميتاً: قوموا فموتوا على ما مات عليه.
أعلم؟ نعم، أنا أعلم أن الأمر صعب، ده أمر صعب أن الواحد يعمله، لذلك النبي صلى الله عليه وسلم أخبر أن الله سبحانه وتعالى يعجب -قيل ويضحك- من هذا الصنيع، يعجب الله أو عجب الله أو ضحك أو يضحك، أكثر من رواية وأكثر من رواية فصلت إلى رجلين وفي رواية ثلاثة منهم رجل كان في غزوة كان في معركة وانهزم أصحابه فأبى، فعلم ما عليه من الرجوع وعلم ما عليه من الميزان فثبت حتى استشهد.
هذا يعجب الله من صنيعه. أنا بحاول أثناء الكلام نقول المشكلة والحلول، الحلول الهامة بإحضار ثواب هذا الفعل: ﴿لَا يَسْتَوِي مِنكُم مَّنْ أَنفَقَ مِن قَبْلِ الْفَتْحِ وَقَاتَلَ ۚ أُولَٰئِكَ أَعْظَمُ دَرَجَةً﴾ [الحديد: 10]. لازم تستحضر أن ثواب الثبات أثناء الانهزام وأثناء الاستضعاف ثوابه أعظم، يعني أحياناً ما تضجر منه قد يكون فرصة للقفز درجات في الجنة، ولو أنت في وقت فيه ارتخاء وفيه تمكين وفيه حالة من الاستقرار قد لا تستطيع أن تصل إلى هذه الدرجات.
قد تصل إليها باصطفاء الله سبحانه وتعالى لك بوجودك في هذا الزمان، يعني أنت تحققت لك فرصة عظيمة لا تقبل فيها. يعني أحياناً الابتلاء ده زي بالضبط موقع الآية اللي هي آية الصبر على البلاء بسورة التغابن، اللي هي: ﴿وَمَن يُؤْمِن بِاللَّه يَهْدِ قَلْبَهُ﴾ [التغابن: 11]. الآية هنا في سورة التغابن، وكأن الله أعلى وأعلم من الإشارات، والصورة رائعة في الإشارات إلى مسألة قضية التغابن، المصيبة المؤمن لا يغبن فيها، ما بتضيعش عليه، بيستغلها وبياخد أجرها وبيسترجع في المصيبة، فتتحول المصيبة ويتحول البلاء إلى سلم يصعد عليه بدرجات الجنة.
أحياناً الوضع الاجتماعي الاقتصادي السياسي اللي أنت بتضجر منه ده، ده ممكن يكون فرصة الصعود للفردوس الأعلى، ممكن يكون فرصة اللحاق بصاحب النبي صلى الله عليه وسلم، كما أخبر النبي صلى الله عليه وسلم -والتمس لنا عذراً صلى الله عليه وسلم- حينما أخبر أنه يأتي أقوام يكون العامل فيها له أجر خمسين منكم، قالوا: منا أم منهم يا رسول الله؟ قال: بل منكم. في إحدى الروايات التعليلية التي يعذرنا النبي صلى الله عليه وسلم فيها قال: «لا يجدون على الخير أعواناً».
فمسألة أنك شغال لوحدك والباقي منهزم، هذه تجعل ثوابك مضاعفاً. هذه تجعل ثوابك مضاعفاً، يعني مسألة الانفراد في العمل والكل بينهزم مما يضاعف الثواب، لذلك النبي صلى الله عليه وسلم قال: «لا يجدون على الخير أعواناً». أحياناً أو هنا في الحديث من القيود التي ذكرها النبي صلى الله عليه وسلم من أسباب المضاعفة تأخذ أجر.
عمل في أوقات لا تجد فيها أعواناً، يعني الذي أنت تشتكي منه أن أنا ما فيش حد، والناس مشغولة، والناس بتنفض، واحنا بالتوصيف الحالي لواقعنا الآن: ﴿وَإِذَا رَأَوْا تِجَارَةً أَوْ لَهْوًا انْفَضُّوا إِلَيْهَا وَتَرَكوكَ قَائِمًا﴾ [الجُمُعَة: 11]. في هذه الأوقات الثبات له زي ما له ثمن صعب، له ثواب عالي عند الله سبحانه وتعالى. فمسألة هنعمل إيه، وإيه اللي هنعمله جديد، ومهما عملنا إيه اللي هنحجدده؟ التفكير؛ التفكير ده قبل أي شيء قبل ومعهم بالتفاصيل وتحليل هذه الشبهة والخروج به من حالة اليأس والإحباط أولاً على النجاة الفردية، ثانياً تبدأ تتكلم بقى -ما فيش مشكلة من تصليح الأخطاء السابقة- الله سبحانه وتعالى يبارك في الأعمال.
دي سنن نصرة هذا الدين. نبدأ نتكلم بجو من الهدوء ونفصل وفي تفاصيل. وطبيعي جداً أن الأسئلة اللي بتكون في اوقات الأزمات، زي أن هذا في سورة آل عمران في وقت الهزيمة، بتكون أسئلة مربكة، الإنسان يبحث عن الفهم لأنه بيكون مضطرب. عدم الفهم في وقت الأزمات يجعل الإنسان بالفعل يلقي سلاحه، والبصيرة والإيمان والفهم في هذا الوقت تجعل الإنسان يعود مرة أخرى إلى ساحة المعركة. طيب أيضاً ياتكلمنا على مسألة التعلم والاعتذار بالظروف، وسواء الظروف المحيطة قضية أو غير ذلك، أو ظروف الشخص، ويقارن نفسه بين الناس اللي سبقت أو الناس اللي شغالة في الدين، يقول لك: أنا مستحيل أبقى زيهم، يعني أنا مهما عملت أنا مستحيل أبقى زي فلان أو فلان أو فلان. اتكلمنا عن النقطة دي: أن أنت ترضي الله سبحانه وتعالى، لا ترضي فلان ولا تريده أن تكون مثل فلان.
ثانياً: الله سبحانه وتعالى مطلع عليك، يعلم ما تنظر. ثالثاً: وما يدريك أن الثغر الذي سقف فيه ليس مهمًا إلا لك؟ الواحد كل شوية بيكتشف شباب أعز ينقب ويدور ويحفر وفق لعمل بسيط مش مش يعني مش حاجة يعني. احنا مشكلتنا بنفكر ازاي؟ النبي بيقول: «أدومه وإن قل». احنا بنفكر: أكثره وإن انقطع. أنا عايز أعمل حاجة كبيرة، طيب ما هو النبي صلى الله عليه وسلم بيقول لك: «أحب الأعمال إلى الله أدومه وإن قل». احنا بالنسبة لنا ده بيجيب لنا ملل، يعني حديث واحد يومياً أو أشرح آية مرة في الأسبوع للناس، أو أكلم واحد صحبي مرة في الأسبوع أدعوه إلى الله، أدومه وإن قل، عندنا لنا ملل. لأ، أنا عايز أكثره وإن انقطع. طب ليه هنا؟ يبقى أنت هنا مش هتبحث عن إرضاء الله سبحانه وتعالى، المقارنات دي خطأ. وزي ما قلت، مين قال إن الثغر اللي الواحد كل شوية بيلاقي مجموعة من الشباب يوفق لصغر من الصغور عجيب! كيف وصلوا إليه؟
يعني ازاي فهموا أن الدعاة والعلماء ناقصهم حاجة، هم يعني ممكن يعطلوا من غير ده؟ وزي ما قلت، الدنيا بتصب في بعضها؛ زي ما المؤسسات الدنيوية بتساعد بعضها، هو الدين كده، اللي عنده مال، واللي عنده مسجد، واللي عنده معارف، واللي عنده أفكار، واللي عنده خبرة. يعني الدين مين قال إن كل هذه الأمور لا نستطيع أن نسخرها لخدمة الدين؟ بالعكس، وأصحاب التخصصات الدنيوية الدقيقة لما بيتلقى علوم شرعية يبدع، يعني يساعد أهل الفقه في فهم قضايا لم يكونوا ليستوعبوها بدون ما بدأوا يبذلوا معهم هؤلاء. اتكلمنا في النقطة التانية: إيه الجديد اللي هنعمله؟ خلاص، الناس اشتغلت وفشلنا. قلنا ده محتاج إعادة تصور لمسألة النجاة الفردية، وإعادة تصور أن مافيش، احنا عندنا إيه؟ تصور يعني عن الزمن أن الزمن بيمشي كده، يعني إيه؟ أن الزمن احنا واقفين هنا وبعدين هيمشي يمشي يمشي يمشي ودي النقطة دي أحسن نقطة احنا هنوصل لها. ده الوحش واقف هنا، احنا هنطلع كده ونموت ونوقف هنا. فهو قاعد بصص على الزمن كده، فيلاقي الزمن ماشي كده عادي جداً، حاجة يعني، الزمن بالنسبة له حالة من الركود. أو متصور أن احنا إيه، يعني بكرة هيبقى غير النهاردة، والسنة اللي جاية هتتبقى غير، فممكن يقعد خمس سنين يبص كده يلاقي الوضع ماشي كده كمان، فيصيبه حالة من الإحباط واليأس، يقول لك: طب لازمته إيه؟
اتكلمنا هنا إن دي أحياناً بتكون فرصة للعمل، وفرصة لأجر خمسين صحابي. طيب، نقطة تالتة مهمة، وأرجو أن الواحد يوفق في طرحها، أن أصبح فيه مع الاهتمام الزائد في الفترة الأخيرة القراءة في الكتب الفكرية وكثرة القراءة في عالم الأفكار. عالم الأفكار عالم واسع مافيش فيه حدود. الأرضية اللي يعني فيه حدود في الواقع، يعني أنت على أرض الواقع عايز تيجي تشتغل فيه حدود تقف أمامك، سواء إمكانيات، سواء ظروف أنتم عارفينها، سواء أياً كان يعني الموانع والعوائق التي تقف أمامك. عالم الفكر أنت ممكن تقعد تفكر وتبدع وتعيش مع الفكرة وترد عليها، عالم فيه سعة. ففي اتجاه، وده بيحصل كتير، اتجاه لكثرة القراءة في الكتب الفكرية. أنا هنا هتكلم على نقطة: حينما لا يصاحب هذه القراءة والتوسع الفكري عمل على أرض الواقع تاني؛ حينما لا يصاحب هذه القراءة الفكرية أعمال على أرض الواقع، حتى لو أعمال صالحة؛ لأن هو القراءة الفكرية بتجعلك يعني إذا كان الإتنين الأولانيين بيقولوا مافيش فايدة عشان هو بيقول مافيش فايدة في نفسه شايف أن هو أقل، ده أحياناً بتخليه يقول مافيش فايدة في التيار الإسلامي؛ يعني أنتم مش فاهمين حاجة ولا عمركم هتهفهموا، وماشيين غلط، وأبقى قابلوني لو عملتم حاجة. هو من كتر ما هو بيقرأ وفعلا بيفهم حاجات كتير، زيادة الفهم بتخلي فيه فجوة رهيبة بين الفهم اللي هو فيه وبين الواقع، والفهم عمال يزداد، والقراءة في خطط الأعداء بتزداد، وخطط مش عارف تقرير بقى مؤسسة راندا ومش عارف مين والاستخبارات، ويقعد يقرأ ويفهم والواقع وتفاصيل العلمانية وتفاصيل الليبرالية ومية سبعة وستين كتاب بالعلمانية وميتين خمسة وستين كتاب في الليبرالية، وقراءة والفهم والعمق.
أنا هقول دلوقتي أنا مش ضد ده، لكن هقول يا أصحاب، وشيء آخر؛ يعني احنا عايزين تخصص ده مع فجوة وعدم وجوده في بيئة واقعية، وعدم وجوده في فريق يعمل أو هو له أعمال على الأرض أو حتى القيام بالأعمال الصالحة، بيخلي فيه فجوة. فكلما نظر إلى الواقع قال إيه؟ يا نهار أبيض مافيش فايدة! ده بيبص على الواقع من فوق مافيش أمل، هو شايف الواقع في قمة السواد، في قمة اليأس والإحباط. هيتصلح إيه؟ كل ما بيزداد فهماً كلما ازداد نظرة سوداوية إلى الواقع، فيقرأ أكتر، ينعزل أكتر، فينظر الواقع ومافيش أمل أكتر ويدخل في الدائرة دي. كثرة القعود يا جماعة للعمل سواء ده سواء أياً كان من الأسباب التلاتة بتعمل حالة من التيبس، يعني ده الواحد حتى بيلحظه في أبسط الأشياء. يعني مثلاً في خطبة الجمعة لو الواحد قعد أسبوعين تلاتة ما يخطبش الجمعة يجي حد يقول له: تيجي تخطب، يشعر بثقل. قعد فترة، تخيل لما تقعد سنة ما تخطبش جمعة! واحد تخيل كان بيخطب كل أسبوع واللي بيخطب كل أسبوع وعايش معاني الدين ومرتبط بالوحي، تكون خطبة الجمعة ليه؟ فيها نوع من السهولة وحب نشر الخير للناس، خلاص كسر الرهبة والمعاني المستحضرة والاستشهادات والإسقاطات على الواقع والنصوص حاضرة فبيكون في المود بتاعنا. يقعد سنة بيقول له خطبة جمعة، قل للناس إيه؟ الناس سمعت كل حاجة أصلاً، هنقول لهم تاني؟ وبعد ما نقول لهم تاني اللي هيستفادوا؟ هو نسي مجرد ما ييجي أول خطبة وواحد يتأسر واللي بعدها ويشعر بلذة العمل. العمل يجيب عمل، دائرة الأعمال بتجيب أعمال، واللي بينعزل تماماً القعود بيجيب قعود.
كانت والدة واحد صحبي زمان أما كنا نجي نذاكر مع بعض، مثلاً إيه؟ عايز أريح شوية وهو يروح شوية، قوم ذاكر، فكانت تقول لنا كلمة زي ما تكون: تقاوي النوم نوم، تقاوي عن اللي زي البذور أو اللي يعني، يعني إيه؟ نعرف ده اللي بيزرع، أن أنت كده كل ما أنت هتنام يعني هتنام ساعتين هيجيبوا كمان ساعتين، هتنام تلاقي النشيط اللي ينام النوم قليل، طب أعتقد اللي هينام عشر ساعات هيصحى فايق هيكسر الدنيا؟ ينام عشر ساعات هيصحى مدروخ ويشرب كوباية كابتشينو وكوباية شاي وكوباية قهوة وبعدين طب أريح كمان ساعة وأنتم تعلمون، عارفينه ده أيام الإمتحانات، هو بالظبط كده القعاد بيجيب قعاد بيجيب حالة من التيبس لازم يصاحب القراءة عمل. فاللي بيدخل في الدائرة الفكرية دي وما بيخرجش منها أصبح شايف الواقع من بعيد، عارفين بالظبط زي ايه؟ وده الواحد شافه اتصدم فيه، لما اللي بيتابع واقع أي دولة؛ نقي أي دولة وأنت بتابع الواقع بتاعها من خلال الإعلام، من خلال مثلاً السوشيال ميديا، من خلال أي حاجة، من خلال الفيسبوك مثلاً، أنت بيبقى عندك صورة وهمية عن الواقع.
أنت ممكن مثلاً الفترة دي مثلاً إيه بيسموها إيه اللي بيتعمل في الرياض دي؟ اسمها إيه؟ فعاليات كل شوية مش عارف مصارعة، أنت ممكن متهيأ لك هتنزل الرياض تحس انك هتنزل مكان في قمة الضياع، لأ عادي، أنت هتنزل تلاقي ناس ملتزمين وهتلاقي المساجد، يعني أنت أحياناً بتتصور الإعلام، حد كان بيقول لي: احنا أما كنا بنتابع الأوضاع في مصر من كام سنة احنا قلنا إن اللي هيمشي في الشارع هيتخطف، هو كان متصور وقعد كذا سنة خايف ينزل، كنا عايشين، وهو بيتابع الحالة من بعيد، أو كذلك اللي عايز يصلح الواقع من خلال القراءة فقط وقاعد يقرأ في فهم الواقع والسياسات والأفكار والدول والخطط والمكر، الراجل قاعد يبص على الواقع عايز يقرأ كده، قاعدين نبص على الواقع لا حول ولا قوة، ده أنتم كلكم عالم فشل يا جدعان، هتعملوا إيه في الدين أنتم هتنفعوا؟ أنتم ما أنتواش نافعين أصلاً! وبعدين الواقع يحتاج إلى كوادر متخصصة في مش عارف إيه، بقى لون كذا وكذا، وبعدين يبص لا كوادر ولا أي حاجة موجودة أصلاً. طب أنتم أنتم اللي هتنصروا الدين؟ طب خليني أقرا كمان! يقرأ كمان، ده طلع الاحتياجات أكتر، وبعدين ينزل يلاقي الفجوة عمالة تزداد فبيزداد إحباطه، مثلاً يقول: يا جماعة انسوا والله مافيش أمل. فاكر أن دول ويبدأ كلهم التلاتة دول الحل عندهم في الطوفان، هم التلاتة بيئتفقوا أن الحل أن الطوفان ييجي ونبدأ من جديد.
والتصور ده تصور خاطئ، يعني التصور الإصلاحي ده طب اللي هيشوف الواقع أيام الجاهلية؟ واقع بعثة الأنبياء كلهم، مواقع بعثة الأنبياء شوفوا الواقع شوفوا هم كانوا بعملوا إيه. يعني اللي يقرأ في التاريخ فترة سيدنا عيسى عليه السلام وسيدنا زكريا وسيدنا يحيى، وإن كانت المصادر مش أوي يعني، اللي يقرأ في المنطقة دي أنت العالم مليء بالحروب يعني ممالك ونقاشات، يعني سيدنا زكريا ييجي يعمل إيه؟ ولما يطلب ولد لأنه خايف على الدين خايف على قومه ﴿فَهَبْ لِي مِنْ لَدُنْكَ وَلِيّاً * يَرِثُنِي وَيَرِثُ مِنْ آلِ يَعْقُوبَ﴾ [مريم: 5-6] هو خايف عايز حد يشيل الدين، وهو هييجي واحد هيعمل إيه أصلاً؟ أنت لو أنت واحد بتفكر بالعقلية دي لو أنت بتفكر بالعقلية المتشائمة دي اللي احنا بننقدها في الدرس دي، قاعد بتقرأ قصة لا حول، قصة إذا كان هيعمل إيه أصلاً لو أنت وبعدين تجد أن سيدنا زكريا يطلب الولد والولد اللي أنت بتطلبه ده هيعمل إيه؟ اهو مات اهو، سيدنا يحيى جه ومات، مش قلت لك مش هيعمل حاجة؟ هو أنت أصلاً قاعد بتفكر وأنت أصلاً طريقة تفكيرك غلط. ومين اللي قال لك إن هو اسمه يحيى ومات شهيداً، وقيل لأنه لا حياة خالدة، ومين قال لك إن هو كدة ما انتصرش؟ ومين اللي قال لك إنه لما قال فزت ورب الكعبة؟ عبدالله بن حرام أن هو كدة ما فزش؟ ما هو احنا في تصوراتنا عن العبودية غلط، ربنا سبحانه وتعالى بيقول: ﴿ذَلِكَ وَلَوْ يَشَاءُ اللَّهُ لَانْتَصَرَ مِنْهُمْ وَلَكِنْ لِيَبْلُوَ بَعْضَكُمْ بِبَعْضٍ﴾ [محمد: 4]. أنت في امتحان، أنت في ابتلاء، فكرة أن الخروج عن فكرة الامتحان وأنك أنت مصحح وأنك أنت جاي مشرف على الواقع ده غلط، أنت من ضمن أنت جزء من أجزاء الواقع ساهم بقدر الاستطاعة.
ما نقرأش؟ ما حدش قال له ما نقرأش بالعكس، يعني نفتقد للتخصص في كل شيء، فما فيش مشكلة بالعكس، الإنسان يتخصص، بالعكس الواحد كل ما بيشوف حد من اللي تخصص في المجال المجال بيبدع فيه، لكن بلاش الانعزال التام عن الواقع، بل وده أحياناً للأسف بيحصل: كثرة القراءة في الكتب الفكرية مع مش بس عدم العمل في الواقع، الأعمال الإيمانية بتقل، فتجد عدم المحافظة على الصلوات، الفروض الخمسة في المسجد، تكبيرة الإحرام، كثرة الأذكار، قراءة القرآن، التدبر في خلق الله، معايشة أسماء الله الحسنى، معاني الإيمان التأله التي تكلم عنها ابن القيم وابن تيمية كثيراً، غياب المعاني دي مع كثرة القراءة في الكتب الفكرية أشبه بشخص عنده حالة من إيه؟ يعني نوع من التشوه، يعني دماغه كبيرة وبدنه ضعيف وقلبه ضعيف، فمشلول لا يستطيع أن يتحرك. يعني أنت لو شفت مخلوق كده ممكن، أكيد في شخصية كرتونية بالشكل ده ممكن تتخيلوه، أنا عارف أن انتم.
يعني دماغه كبيرة جدا وجسمه كبير، وقال له فتلاقيه يصعب عليه، دي حالة من الشلل. ده لو افترضنا إن القراءة الفكرية دي بتنمي الفكر حقيقةً فقط بدون وعي، ده فيه خلل، فبالتالي فعلاً هيكون يؤدي إلى حالة من الشلل مش عارف يتحرك.
الثقل ده مع الضعف العملي وضعف الإيمان، أنا ممكن أشوف يعني ممكن في مصطلح شبه به الحالة دي أو بوصف به الحالة دي، ممكن نسميه الإرجاء المعرفي، عارفين لفظ الإرجاء؟ المرجئة اللي هم قالوا إن الإيمان بالقول فقط، مراحل بقى قول بس ولا من غير عمل ولا أنواع كتير، بعيدا عن يعني ده المرجئة اللي هو ما بيدخلش العمل في الإيمان. أياً كان برضه مش هتدخل في تفاصيل عقدية، أياً كان ما بيدخلوش كشرط.
ولا في عندنا إرجاء من نوع آخر، أن اكتفى بالمعرفة عن العمل، فهؤلاء اكتفوا بالقول وعن العمل، وهؤلاء أولئك المعاصرون اكتفوا بالفكر عن العمل. كفى بحالة الأفكار دي والفهم عن العمل، ودي مصيبة اللي هو ممكن نشأ عندنا حاجة معلش دي هتبقى طالع كده شوية. أنت كده حاسس إن أنتم أصلاً والدرس أصلاً الإحباط واليأس، يعني المشكلة إن إحنا نزودها شوية، يعني نشأ حاجة اسمها إيه؟ الفكر لأجل الفكر والعلم من أجل العلم. يعني هو بيقرأ عشان القراءة، وبيحب الفكر عشان الفكر هي لذة فقط يعني مش هو صاحب هم رسالي، بيقرأ في الأفكار الباطلة يريد هدمها، ينظر إلى الأصنام المنصوبة يتمنى لحظة فجعلهم جذاذا، لا خالص بالعكس، الهم الرسالي ده عنده ده نوع من عدم الحيادية ونوع من عدم الأكاديمية ونوع مش عارف منين. لأ، هو الفكر لأجل الفكر، اللي هو فبالتالي بيحب كل الأفكار الباطل والحق عادي، يقرأ لكل الأفكار، فقد الهم الرسالي ده، اتكلمنا عنه في النقطة دي.
المعاصر الجزء التاني فكرة أصلاً الفكر لأجل الفكر هي غريبة على الدين الإسلامي، فأنا هذكر الوقت ده، إن الإسلام عندنا كدين ما فيهوش الفكرة بتاعت الفكر لأجل الفكر، بل أتقالت، وده طبعا في مسألة القراءة في الفلسفة كثيراً بعيداً عن الشريعة. بل يعني اللي خلى بعض الناس في مسألة نشأة الفلسفة وهل الفلسفة قديمة وهل مسألة المصريين القدماء ولا الهنود ولا مين ولا الحضارات، إيه اللي بدأت الفلسفة، ليه اليونان هي اللي مشهور بالفلسفة وهل نشأة الفلسفة يونانية صرف ولا لأ؟ فمن النقاشات المشهورة اللي بتناقش لأ الفلسفة قديمة، طب ليه كتير من الناس المعاصرين الغرب بيقولوا نشأة الفلسفة في اليونان فقط، كنا قبل كده العالم كان فاقد للفكر والتفلسف، بعضهم بيقول لأن ده المركزية الأوروبية والرجل الأبيض شايف نفسه هو مركز الكون، فشايف نفسه هو اللي بدأ يفكر وقبل كده الناس ما كانتش تفكر، ده تحليل.
في تحليل تاني سقوطه أحد الناس كان بيقول لا إن الفكر لأجل الفكر بالفعل نشأ في اليونان، قبل كده كان في فكر وفي حضارة بس كان لها أغراض، حتى لو أغراض مثلاً أخروية ضالة. زي مثلاً إن هم يعملوا المعابد في مصر مثلاً والأهرام، ويعملوا ده أفكار ضالة، سواء كان بيفكر لأغراض دنيوية أو دينية ولو ضالة، يعني بيفكر لغرض ديني أو دنيوي، لأجل الفكر فقط ده نشأ في اليونان، فدي أصلاً مش عندنا فكرة إن أنا بفكر عشان أفكر عشان في لذة، أنا بقرأ عشان قرأت وخلصت الكتاب فهقرأ اللي بعده واستمتعت فهقرأ اللي بعده وقاعد بقرأ فقط، ده مع فقدان همك السليم.
ده فين يعني ده فين عندنا في الدين؟ يعني من الكتب الرائعة اللي ببساطتها تنسف الفكرة دي ببساطتها كتاب اقتضاء العلم العملي للخطيب البغدادي، أنصح أن أنتم تقرأوه، بل إن كل فترة أن تعودوا قراءته اقتضاء العلم العملي. وعشان بس الوقت يعني بصراحة كان فيه يعني كان في بعض النقولات الهامة فيه، يعني ممكن أخد منكم بس. بيقولوا أهل الجمع: كتب العلم إلا كجامع الفضة والذهب، وهل المنهوم بها إلا كالحريص الجشع عليهما؟ وهل المغرم بحبها إلا ككانزهما؟ وكما لا تنفع الأموال إلا بإنفاقها كذلك لا تنفع العلوم إلا لمن عمل بها وراعى واجباتها. وبعد كده جاب آثار كتير حتى وإن كان فيها ضعف تصلح للاستشهاد لأن المعنى صحيح. يروى عن علي بن أبي طالب رضي الله عنه وإن كان في السند انقطاع: يا حملة العلم اعملوا به فإنما العالم من عمل، وسيكون قوم يحملون العلم يباهي بعضهم بعضاً، أتعرسموا على بعض أنا خلصت كذا وأنا خلصت طب أنا قريت كذا طب أنا قريت طب أنت عندك كده العلم للتباهي حتى إن الرجل ليغضب على جليسه أن يجلس إلى غيره، أولئك لا تصعد أعمالهم إلى السماء.
الكتاب مليء بالآثار حتى لو اختلفت مع بعض التوجيهات لهذه الآثار، يمكن المعنى العام معنى محوري اقتضاء العلم العملي، إن إحنا دينا مرتبط بالاثنين. لذلك أيضاً، أه شيخ الإسلام بما أن هي نقولات نقولات وأنتم كده كده نايمين، شيخ الإسلام في المجلد الثالث عشر صفحة مية وواحد بيتكلم هنا في منطقة جميلة قوي، أه لما حصل حالة اليأس والاحباط الموجودة الحالية دلوقتي عند كتير من الناس، بدأت الناس تفكر في كان نفسي اعمل درس اسمه النخب والاشتباك مع الواقع، نفسي اعمل درس اسمه إيه؟ نخب والاشتباك مع الواقع، ما عدناش بنشتبك مع الواقع، يعني الواقع له احتياجات، الشباب لهم احتياجات، الأمة الإسلامية لها احتياجات.
في ناس تقرأ لها أو تسمع لها، يعني أنا قبل ما أجي قارئ منشور على تلجرام ليه؟ أحمد السيد ربنا يحفزه يا رب، المنشور أنا حاسس المنشور ملتهب، الكلام بيطلع نار، يعني الكلام أحسبه والله حسيبه، الكلام يعني مليء بالهم، يعني مجرد قلب صادق خالي من يسمع الكلام ده يشتعل، عايز إنه يعمل أي حاجة للدين. في ناس محافظة على الحماسة بتاعتها وعلى الاشتعال بتاعها، ربنا يثبته يا رب، ففي ناس ما فقدتش الاشتباك مع الواقع، قاعد مشغول يعني هو لولا بس الوقت كنت قرأت عليك المنشور، المنشور رائع يعني مقدمة مؤلمة عن الواقع والظلم والفساد والأزمات اللي في الواقع ولابد من الحل ولابد وقال إنه هيعمل مقطع وشرح فيه الفكرة، يعني كلام أي صاحب دين وهم صادق ينفعل، لا يملك إلا ذلك.
فأصبح أحياناً في هروب من الاشتباك مع الواقع، يعني رفض للواقع يأس زي ما قلنا قرأ كتير وحس إن كل اللي موجودين ما بيفهموش حاجة، كل اللي موجودين ما فيش منهم أمل، كل التيار الإسلامي فاشل، وصل لحالة من الاحباط واليأس سواء، وانعزل عن حالة الهروب من الواقع يبقى إحنا مطالبين أو مش قصدي إنكم يعني كل الناس مطالبة إن هي تشتبك مع الواقع ده، لأن الدين بتاعنا دين واقعي، القرآن ما نزلش كاملاً في كهف وبعدين نزلوا يطبقوه واحدة واحدة، لأ القرآن كان بينزل بالتطبيق، كانوا بيتعلموا عشر آيات بعشر آيات، بل كان يحدث الموقف والمجتمع ينتظر الوحي، مش الوحي خلص خالص وبعدين نزول تطبيق، لأ مش ده اللي حصل، يعني إن الوحي نزل تدريجياً، ليه؟ لأن في كل خطوة من الخطوات كان النبي صلى الله عليه وسلم بيتحرك فيحتاج الوحي، لذلك لما قالوا لو نزل عليه القرآن جملة واحدة كذلك لنثبت به فؤادك أثناء التحرك.
ففكرة إنك تخلص خالص فهم ورايا، وبعدين تنزل أنت مش هتنزل، ده بيأذيه ده يزيدك انعزالاً، طيب ما فيش يعني قلة أياً كان يعني مش مهم الوصف قلة ولا كذا فيه هروب من الاشتباك مع العلماء، الهروب ده من فين؟ إحنا قلنا أنا مش بتكلم على اللي حصل له انقلاب مفاهيمي، الانقلاب ده فين؟ في مناطق آمنة بعيداً عن الواقع، أكبر منطقتين موجودين الوقتي وبيحصل لهم هروب: منطقة الفكر ومنطقة التصوف.
في حد ذاته من حيث هي يعني الفكر والتصوف ليست مذمومة على الإطلاق أصلاً، بالعكس يعني ده أنا لسه بقول لك كلمات ابن القيم اللي يعني تصوف المنضبط مدارج السالكين ده كل فترة يحتاج رسائل، كل فترة محتاج إنك تقرأ في هذه الكتب وهذه الأمور، معايشة أسماء الله الحسنى، إنك تجيب كتاب أو سلسلة من أسماء الله الحسنى تعيش معها شهر شهر ثلاثة، ما تستعجلش، ده الزاد اللي بتكمل به طول عمرك.
لكن في واحد بيهرب تماماً للمنطقة دي تماماً، يعني انعزال وحالة من الانعزال التام عن الواقع، لسه في تقرير قرأته اتكلم على هروب خاصة الفتيات، مسألة التصوف والبحث عن الشيخ المريد وده كان شيء جديد، محاولة لدراسة إيه الأسباب لده؟ زي ما يعني خلينا يا جماعة إحنا نكون صرحاء، كل شوية بتطلع ظواهر ممكن تكون الظاهرة دي عبارة عن حقيقي ومواكبة للواقع وممكن تكون هروب من الواقع، خلينا نبقى صادقين في تحليل صغير، ممكن أنا أكون مخطئ، ممكن حد يقدم حل.
أنا شايف إن في جزء كبير من الهروب للروايات، الهروب للكتب الفكرية، الهروب للتصوف، والواقع يزداد فساداً، يعني اللي يقرأ كتيب الفجور السياسي لفريد الأنصاري هيفهم إن ممكن الداعية أو المصلح يحصل له حاجة الواقع يزداد فجوراً، الواقع مليان أعمال بيزداد بيزداد بيزداد فجوراً، فين الناس فين فين المسلمين فين فين الإيجابية في الواقع؟ فين ده؟ يعني عارف لو أنت في شارع في منطقة راقية وناس متعلمة والشارع فيه كومة زبالة عمالة تكبر أنت مستغرب، أنت يعني لا خلاص الحل إيه؟ امشي من طريق تاني، طب ليه ما حدش يساهم؟ ليه الوضع بيزداد سوءاً؟ أكيد فيه قلة بتحاول تجد، لكن ليه فيه انفضاض؟ ليه فيه هروب للأماكن الآمنة؟
فالخلاصة يعني إن شيخ الإسلام التقط معنى جميل قوي في مسألة إن في حد يعظم فكرة التصوف أو فكرة الفكر قضية الفكر أو التصوف، على إن شيخ الإسلام كان الإكثار من علم الكلام أكثر، وفيه كان جانب تصوفي أكثر، وكان شيخ إسلام بيسمي دول أهل النظر وبيسمي دول أهل الإرادة، فكان التقط إن في ناس بيغلب عليها الجانب ده وفي ناس بيغلب عليها الجانب ده. وده طبيعي، يعني طبيعي إن شخص بيميل إلى جانب التفكير أكثر فتجد ثغره في الدين في المنطقة دي، لكن لا ينسى نصيبه من العمل، وشخص حركي بطبعه فلا ينسى نصيبه من العلم والتأمل.
وشيخ الإسلام بيقول: فالإيمان المنضبط قول وعمل وموافقة السنة، وأولئك عظموا النظر وأعرضوا عن الإرادة، وعظموا جنس النظر، فكرة إن الفكر ده أعلى حاجة، وكمان ما فكروش بالطريقة الشرعية ولم يلتزموا النظر الشرعي، فغلطوا من جهة كون جانب الإرادة لم يعظموه، غلط إنه هو ما عظمش فغلطه لم يعظمه جانب الإرادة أو التصوف أو الإيمان، وإن كانوا يوجدون الأعمال الضارة. وكذلك الصوفية عظموا جنس إرادة القلب وذموا الهوى وبالغوا في ولم يميز كثير منهم بين الإرادة الشرعية الموافقة لأمر الله ورسوله وبين الإرادة البدعية، بل أقبلوا على طريق الإرادة دون طريق النظر.
صفحة مية وواحد مجلد ثالث عشر اللي عايز يلجأ يعني بديعة وجيدة رسالته الفرقان، فان أحياناً ناس تهتم بالجانب ده وتترك الجانب ده، الجنين يعني هنقول إن الدين نفسه الدين اتبنى متكامل، لما تشوف الجنين يبقى أنا سبحان الله الله خلقه بصورة متكاملة، الجنين بيكبر متكامل، مش الراس بتخلص بالمخ بكل حاجة وبعدين الرجلين والإيدين، لا هو بيكبر الجنين بنشوف واحد بيكبر يعني حتى أنت ممكن ما تلحظش ده، تلاقي كل الخلايا بتكبر مع بعض، الجسد بيكبر متكاملاً، كذلك أنت لما تحب تنمو في الدين خلي البناء بتاعك يكون فيه نوع من التكامل قدر المستطاع، مش تعظم جانب على جانب.
طولت أنا في منطقة الإرجاء المعرفي ديت، طيب يعني أنا قلت هتكلم في ثلاث نقاط ونتكلم هنا في بعض الحلول مسألة ما فيش فايدة، أنا أصلاً مواهبي أو إمكانياتي ضعيفة أو فاشل، وأن هنعمل إيه جديد أو أنا لما قرأت وفهمت اكتشفت إن مستحيل أصلاً يحصل حلول.
هنا إحنا قلنا إن الإنسان محتاج يستشعر ثواب المجاهد والدين الله في مثل هذه الأوقات، لابد أن يستحضر إن ثوابه مضاعف. من أجمل السور اللي بالنسبة لي يعني لما بقرأها أو في ثلاثية كده لما الواحد بقرأها ممكن تخرجه من حالة الاحباط واليأس لحالة العمل: سورة الليل والضحى والشرح، يعني هذه الثلاثية حقيقة يعني أشعر فيها بمعني، فكان يعني ممكن ترجعوا لقراءة السور دي في التفاسير أو تسمعوا الدروس الثلاث سور دول تحديدا، خاصة سورة الليل بالرغم من إن وأشار ده ابن عاشور في أول سورة الليل بالرغم من أول السور الثلاثة دول سورة الليل واسم السورة بيوحي بالواقع المظلم، الواقع هنا واقع مظلم، وبالرغم من ذلك الصورة بتدعو للعمل.
يعني سورة الشرح اللي بتتكلم إن العسر موجود وإن إحنا بنستبشر إن شاء الله اليسر هيجي، طب أعمل إيه في العسر؟ ﴿فَإِذَا فَرَغْتَ فَانصَبْ﴾ [الشرح: 7]، بالليل، ﴿فَأَمَّا مَنْ أَعْطَى وَاتَّقَى * وَصَدَّقَ بِالْحُسْنَى﴾ [الليل: 5-6] الدنيا هتتيسر فسنسيره لليسر. الخروج من حالة الإحباط يكون بالعمل، يعني إحنا أحياناً بنتصور إن الخروج أيضاً يكون بالخروج المفاهيمي إن أنا محتاج اقتنع، مش هتخرج من الحالة دي غير بالأعمال، وده كتير حتى في الأطباء النفسيين اللي بيجي يتكلم في مسألة الاكتئاب ومن أسباب الاكتئاب القعود والفشل وعدم وجود.
شيء ناجح فيه الإنسان، أو شيء الإنسان يكون متميز فيه، أو الإحساس بعدم القيمة، أو الإحساس بعدم الأهمية، أو الإحساس بعدم الحب، أو اللامبالاة، أو أن هو شخص مش مركزي في حياة أي إنسان؛ كل هذه المشاعر بتدفع للاكتئاب.
فبيكون مش من الحلول اللي بتقدم له الطبيب، مش من الحلول إنه مجرد يقنعه. الإقناع ده مهم، وكنت أتكلمت في درس إعادة ضبط فكرة لما أتكلموا على فكرة إعطاء المعنى للحياة اللي هو اللوجو ثيرابي. وقلنا إن القرآن بيعطي أكبر معنى هناك.
مش بس إعطاء المعنى، لأ، بيطلب منه أعمال صغيرة ينجح فيها. بيقول له: أنت بلاش تفكر في الأعمال الكبيرة، خليك اعمل أعمال صغيرة لتدوم وإن قل، وحافز على ده؛ فأصلاً القعود... درجة بعض التحليلات إن يقول لك مثلاً في أنواع اكتئاب بتيجي في الشتاء. وأنواع الاكتئاب دي من أنواع التحليلات إن مثلاً هذه الفصول فيها حالة من قعود.
إن في بعض الدول الثلج بيغطي البلد ما فيش حركة. قلة الحركة دي بتعمل نوع من الاكتئاب، فأصلاً قلة الحركة زي ما قلت بتدخلك في حالة ما بتعرفش تروح تطلع منها.
وزي ما قلت: خلاص إيه؟ ما فيش أمل، وما فيش يأس، والناس هتستفيد إيه؟ ما احنا قلنا، واللي هنقوله هنرجع نقوله تاني، وما احنا قلناه الأولاني واستفاد، وحالة من عدم الإقبال. شف نفس الشخص، خد بس بايده –وده الواحد شافه كتير– خد بايده ويبدأ يعمل حاجة واحدة ناجحة، حاجة واحدة بس، وبعدين يعمل اللي بعدها، وبعدين يكلم حد، ويقرا معلومة، ويعمل حاجة، فيفاجئ إن هو رجع تاني يتنفس ورجع عايز ينزل الحياة، وبقى عنده أمل، واللي ينزل شاب تاني في الجامعة ينزل بالتفاؤل ويكلم ده ويتصل بصاحبه.
فين الشخصيات كده؟ ليه غياب الشخصيات دي يا جماعة هو اللي بيعمل حالة من الركود؟ ما هو الغالب قاعد على مكتب زيي كده، ما هو ده حالة من القعود، هو في ناس لازم تتحرك، الناس محتاجة اللي هي تلف الواقع. يعني اللي بيتحرك دول هم دول الأحجار اللي بتحرك الماء الراكد؛ مؤسسات ومساقات ومنصات وبرامج. وبعدين هتعطل كان كل ده بيتعامل، جزاهم الله خيراً القائمين على كل هذه الأمور وهذا ما يستطيعونه، وعذروا أنفسهم أمام الله سبحانه وتعالى.
لكن ما هو لازم أشخاص تانية تفعل الواقع، تنشر الخير، تكلم الناس، ده دور المسلمين –مش عايز أقول الإسلاميين– ده دور المسلمين. فليه الإنسان يلقي حالة اليأس ويلقي السلاح، وما فيش أمل وهستفاد إيه؟ وبعد ما استفدنا إيه؟ ليه يوصل للحالة دي؟ زي ما قلت: أنت لو بتتعامل إن ده ابنك الوحيد عمرك ما هتفكر كده، لو بتتعامل بشعار قوموا فموتوا على ما مات عليه عمرك ما هتفكر كده.
لذلك زي ما قلت لكم الحديث الرائع: «يعجب الله سبحانه وتعالى من رجلين» أو عجب ربنا من رجلين؛ رجل غزا في سبيل الله فانهزم أصحابه، وعلم ما عليه في الانهزام وماله في الرجوع، قعد يفكر: طب أنا لو رجعت مش أنا اللي هنصر الدين، ما أرجع وخلاص، بس أنا ممكن ربنا يسألني أنت رجعت ليه؟ وعارف إن أنا لو ثبت هيكون ثوابي عالي، بس هثبت ولوحدي. فقعد يحسبها، علم ما عليه في الميزان وماله في الرجوع فقرر فرجع حتى أهريق دمه، فيقول الله للملائكة: «انظروا إلى عبدي»، يباهي الله به الملائكة: «انظروا إلى عبدي».
عارف لما دفعة كاملة ما حدش بيفكر فيها في إدارة التربية إلا أنت أو مجموعة من الناس بتشتغل وتحاول تشتغل وتتحرك، أو منطقة كاملة وواحد قاعد بيعافر إن الناس تحافظ على الصلاة، وبيعافر إن ما يبقاش فيه منكرات في الشارع، وبيعافر لأن شباب المنطقة يتعلموا قراءة القرآن ويعمل لهم مقرأة، بيعافر. فيقول الله سبحانه وتعالى: «انظروا إلى عبدي، رجع ليه؟ رجع ليه؟» كان ممكن يمشي رجاءً فيما عندي وشفقتاً مما عندي، فيباهي الله سبحانه وتعالى به الملائكة.
فاستحضار المعاني دي مهم، إن في حالة الانقضاض الله سبحانه وتعالى يحب الثابتين، لذلك الحديث المشهور النبي صلى الله عليه وسلم في أول بعثة لما ورقة بن نوفل قال له: إن قومك سيخرجون، قال: أو مخرجيهم؟ فقال ورقة: ليتني أكون فيها جذعاً، أي شاباً حيلتاً يخرجك قومك. سيدنا ورقة لما اختار إنه يعمل للدين، اختار إنه يعمل في أشد أوقات الاستضعاف، لذلك النبي صلى الله عليه وسلم قال في روي عنه: «لا تسبوا ورقة فإن له جنة أو جنتين». لا تسبوا ورقة فإن له جنة أو جنتين.
يبقى إذا الإنسان ده ييأس مهما كانت الأسباب التي تدعيها وتزعم؟ أنت ما لكش عذر إلا متحرفاً لقتال أو متحيزاً إلى فئة. أما تقول لي إيه؟ يعني أنا ما ينفعش أتوقف تماماً، طب المفروض أتوقف عشان أطور نفسي. جميل، طور نفسي. أنا اكتشفت إن أنا فيه وسائل وادوات وعلوم محتاج أحصلها، أحصلها، بلاش الانعزال التام، خلي فيه شعرة بينك وبين الواقع، زي ما قلت: خطورة الانعزال التام إنه بيصنع حالة من التيبس. «إلا متحرفاً لقتال أو» خلاص تكون مجموعة تعملوا أي حاجة مع بعض، أي حاجة أنتم مجموعة في الدفعة تعملوا أي حاجة، أي نوع من أنواع المدافعة.
يعني الواحد بيتبسط جداً لما يلاقي شاب بيكلمه يقول له: الدفعة عايزة تعمل، بيسموه إيه اللي بيتعمل ده في... ولا التاني بتاع التخرج وأسمه حفل التخرج ما لوش اسم تاني صح هو الفان داي؟ هو لا، الفان داي غير، بيعملوا ايه في حفل التخرج؟ كويس، جمع بين النوايا ده مهم جداً جداً، ده فقه عالي. جمع بين النوايا في العمل الواحد ده باب عظيم من أبواب الفقه أصلاً.
وإن كان الفقهاء اختلفوا في المسألة دي؛ يعني هل هياخد ثواب الفان داي بس والثواب ولا ياخد ثواب الاتنين؟ دي فيها خلاف. المهم يعني إن تلاقي حد جاي وبيتألم على المنكر اللي بيحصل، وإزاي نعمل بديل؟ طب وإن هو متحمس إن كويس أصلاً إن لسه في حد بيفكر فيها، إن تلاقي حد جاي يقول لك: يعني ممكن لو كلمنا حد من الدعاة نرتّب ندوة؟ ياه! ندوة! دي الكلمة دي ده أقصى أقصى حاجة سمعتها، إيفنت! ما عدش حد بيقول ندوة دي، ده أنت قديم أصلاً.
يعني فين لما الواحد يستشعر إن لسه في ناس قاعدة بتعافر، ويجي عنده امتحانات وعنده مشاغل وعنده أزمة اقتصادية وبيقول لك: طب أطلب العلم ازاي؟ طب أنا عايز أتعلم، ومش شاغل باله بقى إن أنا هبقى زي فلان ولا زي فلان، ولا ما في أمل ولا ما فيش أمل، أهو مش شاغل باله، واحد المشايخ كان بيحكي مجلس؛ كان الشيخ ده كان في مجلس، شيخ من المشايخ الكبار اللي نسأل الله أن يرحمهم.
فالشاهد يعني كان بيقول لي: يحافظ معنا على المجلس لسنوات، رجل شيبة ولحيته بيضاء ورجل كبير السن ويجي من مسافة سفر، وبعدين يقول لي بعد فترة كده بتكلم مع لقيته بيقول لي: تعرف يا فلان؟ أنا تقريبا مش فاهم حاجة من الفلوس دي كلها، أنا بس بحافظ، عايز أخد بركة المجلس، وهم القوم لا يشقى بهم جليسهم ونبأهم وقاعد يعافر وكبير.
الواحد لما بيشوف مقرأة تلاقي شاب عايش وسط المنطقة بقاله سنين، وفين لما يفكر يعمل مقرأة؟ يفاجأ إن كتير من أهل المنطقة مش عارفين يقروا القرآن، داخل يقول لك: أصل أنا ما كنتش لاقي لي دور، اللي حواليك مش عارفين يقرأوا القرآن أصلاً، يعني كمية الأخطاء، اللحن الجلي، كمية الأخطاء في القراءة مش طبيعية، أصل أنا ما كنتش لاقي حاجة أعملها.
ويعجب من حرص كبار السن والتواضع أن يجلسوا لهذا الشاب ويصححوا القراءة عليه عادي جداً، وأنت اللي مش عايز تستحمل وتتعب وتتعلم. فيعني الواحد بيشوف نماذج، نماذج في البرد داخلين على الشتاء، كبار السن هم اللي بيحافظوا على صلاة الفجر، الشباب مش هم اللي بيحافظوا على صلاة الفجر في المسجد.
فالإنسان لا يعذر نفسه ويحاسب نفسه، أعتذر أنا طولت عليكم، دينك دينك لحمك ودمك، قوموا فموتوا على ما مات عليه. ﴿مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِمْ فَمِنْهُم مَّن قَضَى نَحْبَهُ﴾ [الأحزاب: 23] دي فاتتك خلاص، أهم رجال قسمين؛ قسم أدى ما عليه ومات، ما عدش قدامك غير قسم واحد، ﴿وَمِنْهُم مَّن يَنتَظِرُ﴾ من مواصفات هؤلاء: ﴿وَمَا بَدَّلُوا تَبْدِيلًا﴾ [الأحزاب: 23]. إياك أن تبدل وإياك أن تغير.
أسأل الله سبحانه وتعالى أن يستعملنا، أقول قولي هذا واستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك، وجزاكم الله خيراً.