الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمدًا عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم إنك حميد مجيد.
أما بعد: قال الناظم: وبعد فإني سوف أنظم جملة، من الأدب المأثور عن خير مرشدي صلى الله عليه وسلم. بعد من الظروف، وهي هنا مبنية على الضم لكونها منقطعة عن الإضافة، أي بعد حمد الله والصلاة على النبي صلى الله عليه وسلم. وهذه اللفظة يستحب الإتيان بها في الخطب والمواعظ، ومن عادة البلغاء والعرب العرباء إذا تكلموا في الأمر الذي له شأن افتتحوه بذكر الله وتحميده، فإذا أرادوا الخروج إلى الغرض المسوق إليه فصلوا بينه وبين ذكر الله بقولهم: أما بعد.
وقيل هي آية فصل الخطاب الذي آتاه الله داود، ﴿وَآتَيْنَاهُ الْحِكْمَةَ وَفَصْلَ الْخِطَابِ﴾ [ص: 20]، مما قيل في فصل الخطاب: أما بعد. يعني أن أول من قال بها داود، واختلفوا من أول من قال بها على أقوال.
وقد جاءت كثيرًا في كلام الرسول صلى الله عليه وسلم، واستعملها الخلفاء الراشدون. قوله: فإني سوف أنظم جملة، يعني في المستقبل، بدليل سوف؛ فإنها تخلص المضارع للاستقبال.
المصنفون أو المؤلفون على مذهبين في كتابة المقدمات: منهم من يكتب الكتاب حتى إذا فرغ منه كتب المقدمة، ومنهم من يبدأ بالمقدمة قبل الكتاب. هذه من ملح العلم؛ أن نعرف هل المصنف كتب المقدمة قبل ولا بعد، ما هي من أساس العلم، لكن يستدلون بكلمات شبه كده. هو هنا هل الناظم كتب النظم وبعدين رجع كتب المقدمة، ولا كتب المقدمة وبعدين كتب النظم؟ فيقول لك: والله الظاهر أنه كتب المقدمة، لأنه قال: فإني سوف أنظم جملة، ما قالش فإني نظمت جملة؛ فكونه قال سوف، فهو لسه ما نظم.
قوله: من الأدب، هو بفتح الهمزة والدال، مصدر أدب أو أدب الرجل بكسر الدال وضمها لغة، إذا صار أديبًا في خلق أو علم. وقال ابن فارس: الأدب دعاء الناس إلى الطعام، عشان كده اتسمت مأدبة. قال: والمأدبة الطعام، والأدب بالمد الداعي، يعني من دعا الناس إلى الطعام هو الأدب، واشتقاق الأدب من ذلك؛ كأنه أمر قد أجمع عليه وعلى استحسانه. يعني الأدب من يدعو الناس أن يجتمعوا على الطعام، فسمي الأدب أدبًا لأنه مجمع على استحسانه. وفي الحديث: «القرآن مأدبة الله في الأرض»، يعني مدعاته، شبه القرآن بصنيع صنعه للناس لهم فيه خير ومنافع. وسمي الأدب أدبًا لأنه يدعو إلى المحامد، قاله أبو عبيد. قوله: المأثور، يعني المنقول، يقال حديث مأثور أي أن يأثره عدل عن عدل، قاله أبو عبيد أيضًا. قوله: عن خير مرشدي، المرشد الهادي، والمراد به هنا النبي صلى الله عليه وسلم.
يستحب تعلم الأدب والسمت الحسن. القصد هنا السمت معطوف على الأدب، يعني يستحب السمت الحسن، ويستحب القصد والحياء وحسن السيرة شرعًا وعرفًا. وممكن تمشي أن أن معطوف على الأدب، يعني يستحب تعلم الأدب والسمت الحسن، أن تتعلم السمت الحسن. السمت يكون في الظاهر، والقصد يعني التوسط؛ يبقى ما نبقاش عيال مدلعين فرافير، ولا نتكحرت كحرة تؤذينا في الدنيا، نلاقي نفسنا معطلانين من كتر الجوع ومن كتر المشقة دماغنا مش فينا، نبقى متوسطين.
وروى أحمد عن ابن عباس رضي الله عنهما عن النبي صلى الله عليه وسلم أنه قال: «إن الهدي الصالح، والسمت الصالح، والاقتصاد جزء من خمسة وعشرين جزءًا من النبوة». وقال النخعي: كانوا إذا أتوا الرجل ليأخذوا عنه نظروا إلى سمته وصلاته وإلى حاله، ثم يأخذون عنه. يبقى إحنا نتعلم حاجتين: أول حاجة أن إحنا ننظر عمن نأخذ، وثاني حاجة أن نتأدب بتلك الآداب خصوصًا من يؤخذ عنه. يعني المتصدر لدعوة أو متصدر لشيء من هذا؛ أنه ينبغي أنه يراعي تلك الأمور، كانوا إذا أتوا الرجل ليأخذوا عنه نظروا إلى سمته وصلاته وإلى حاله. يبقى أول حاجة نشوف بناخذ عن مين، ثاني حاجة إذا صدرنا وصرنا رؤوسًا، لا بد أن نراعي تلك الأحوال عشان ما نبقاش فتنة للناس.
إحنا عمومًا أي مسلم لا بد أنه يراعي الأحوال دي طبعًا، لكن إذا صار يسمع له ويؤخذ عنه، هيبقى فتنة للناس. فتنة إزاي؟ إما أن الناس تقول: هو ده الدين، فتبقى زيك، ولو بقت الناس زينا؛ ده إحنا دخلنا الناس النار أهو! لما يشوفوا مثلًا أمجد يقولوا إيه: يا أمجد ده هو ده الدين بقى الشيخ أمجد، الناس تروح النار على طول. طب ما أمجد يتعدل عشان الناس لما يشوفوه ويقلدوه، يبقى بيقلدوا حد عدل، مش كده؟ أو العكس، يقولوا شوفوا الهجاص بيعمل إيه، بقى ده دين ده؟ يقوم يتفتنوا في الدين. الناحيتين فتنة، الثانية يمكن أبسط شوية، لأنه عرفوا أنك هجاص ومش بتاع دين ولا حاجة، وممكن في يوم من الأيام ربنا يهديهم ويروحوا يشوفوا حد ثاني بتاع دين يأخذوا منه، إنما الأولى دي صعبة جدًا بقا، أنهم يفتكروا أن اللي أنت فيه ده هو ده الدين.
وقال عمر رضي الله عنه: تأدبوا ثم تعلموا. وقال ابن عباس: اطلبوا الأدب فإنه زيادة في العقل، ودليل على المروءة، ومؤنس في الوحدة، وصاحب في الغربة، ومال عند القلة، رواه الأصفهاني في منتخبه. وقال أبو عبد الله البلخي: أدب العلم أكثر من العلم. وقال ابن المبارك: لا ينبل الرجل بنوع من العلم ما لم يزين عمله بالأدب، رواه الحاكم في تاريخه. يبقى من نبل من الأولين وذاع صيتهم ووصلنا علمهم، ما وصلش بس عشان انكبوا على العلم، الكلام ده كنا بنقوله زمان لطلاب العلم اللي هم بيبقوا حريصين على العلم قوي، زمان كان ممكن تلاقي ناس حريصة جدًا على العلم، لكن ما بتتأدبش وما بتزكيش نفسها وما بتتعبدش، فبنقول لهم: لا بد أن يبقى فيه حظ من هذا، بل في بداية الطلب يكون الحظ الأوفر لهذا، للأدب وللتزكية وللتعبد.
وروي عن ابن المبارك أنه قال: طلبت العلم فأصبت منه شيئًا، وطلبت الأدب فإذا أهله قد بادوا. وقال بعض الحكماء: لا أدب إلا بعقل، ولا عقل إلا بأدب. كان يقال: العون بمن لا عون له الأدب؛ يعني اللي ما فيش حاجة تعينه من مال أو من حسب أو نسب شريف أو كده، الأدب عون له إذا كان ذا أدب. كان الأدب عونًا له في الدنيا وفي الآخرة، في الدنيا تلاقوا الناس تميل أنها تقضي حوائج للناس المؤدبة المحترمة، مش كده؟ واحد دخل عليك مؤدب: أنا آسف، وبعد إذن حضرتك، وأنا عارف أني بزعجك، ده أقرب أنك تتكسف وتقضي له حاجته من واحد جاي جلياط بيكلمك بجليطة ولا بقلة أدب. فالأدب يصير عونًا لك حتى في قضاء حوائج الدنيا، وكذلك في قضاء حوائج الآخرة، لأنه كما جاء في الحديث: «أحاسنكم أخلاقًا»، وإن من أقربكم مني مجلسًا يوم القيامة أحاسنكم أخلاقًا.
وقال الأحنف: الأدب نور العلم، كما أن النار نور البصر. يعني إيه؟ لو كنت بصيرًا لك بصر، وبعدين الكهرباء قطعت، هل تنتفع ببصرك؟ مش هيحصل، لو كنت زرقاء اليمامة، لو انقطع النور، خلاص بصرك ما تنتفعش به. هو بيقول لك بقا: الأدب نور العلم، يعني لو كنت عالمًا ولا أدب لك، لن تنتفع بعلمك ولن ينتفع الناس بعلمك. ومن أتت حاجة من اثنين برضه يفتن بك، لو أنت متجرئ وعندك شدة أو قلة أدب في الألفاظ أو تجرؤ على العلماء أو كذا، هتطلع لنا جيل كده شبهك، أو عندك تساهل في التعامل مع النساء وهزار وتصوير، هتطلع لنا جيل شبهك، أو عندك جرأة على والديك ويرون ذلك منك.
كنا مرة زمان وأنا في الجامعة، يعني 22، 23 سنة كده، بندرس للشيخ العام، كان يوم الخميس، وكان في مسجد قباء في مصر الجديدة، وبعدين إحنا قاعدين بناخذ الدرس، درس عام مش درس خاص، المسجد مليان لآخره، وبعدين والد الشيخ دخل، قال له: يا أسامة، فبص له قال له: تعالى عاوزك، فالشيخ قام رايح له، وإحنا قاعدين، عشر دقايق، ربع ساعة، نص ساعة، ساعة ونص، الشيخ ما رجعش، طلع عظة في مشوار حتى ما رجعش قال أنا رايح. طبعًا الحاجات دي أو مواقف شبه كده تؤثر في الطلاب، يعني يمكن تأثيرًا أشد من الدرس اللي كنا هناخده، يعني أنا النهارده أهو لو قلت لي: سمع لي درس من 23 سنة، ما أعرفش أسمع لك درس ده، إنما موقف زي ده لا، فاكره من 23 سنة فاكره. فده أحرى أنه يطلع طلاب برضه عندهم بر بالآباء لما يشوفوا مواقف زي كده وسمع وسماع لكلام الأب والأم. فاللي عاوزين نقوله بقا: الأدب نور العلم، يعني علم بلا أدب لن تنتفع بهذا العلم، زي بصر بلا نار أو بلا نور لن تنتفع بهذا البصر حتى يكون النور.
وقال ابن المبارك: قال لي مخلد بن الحسين: نحن إلى كثير من الأدب أحوج منا إلى كثير من الحديث. ويقال: مثل الإيمان كمثل بلدة لها خمسة حصون، الأول من ذهب، والثاني من فضة، والثالث من حديد، والرابع من أجر، والخامس من لبن. فما زال أهل الحصن متعاهدين الحصن من اللبن، لا يطمع العدو في الثاني. يعني كانت هذه الأبواب ورا بعض، مش جنب بعض.
الجبس والجير والحاجات التي زي كده، واللبن الذي هو الطوب. فما زال أهل الحصن متعاهدين الحصن من اللبن، لا يطمع العدو في الثاني، فإذا أهملوا ذلك طمعوا في الحصن الثاني، ثم في الثالث، حتى تخرب الحصون كلها. فكذلك الإيمان في خمسة حصون: اليقين، ثم الإخلاص، ثم أداء الفرائض، ثم السنن، ثم حفظ الأدب. فما دام يحفظ الآداب ويتعاهدها فالشيطان لا يطمع فيه. تخيلوا كده واحد حريص على الآداب؛ يعني مثلاً لا يكشف عورته وإن كان منفرداً، حتى لوحده ما يقعدش يكشف عورته. طيب، ده هيجي له الشيطان يقول له عادة سرية، ويقول له إباحية؟ ده واحد احنا طبعاً بناخدها في نفس الحتة، يعني عورة، وده واحد محافظ على الآداب؛ فالشيطان ما يطمعش أبداً أنه يخليه يترك السنن. يبقى من فوائد الآداب التي نحن عاوزين نعرفها الآن أنها كالحماية للسنن والفرائض، ثم الإخلاص واليقين.
فما دام يحفظ الآداب ويتعاهدها فالشيطان لا يطمع فيه، فإذا ترك الآداب طمع الشيطان في السنن، ثم في الفرائض، ثم في الإخلاص، ثم في اليقين. تخيلوا بقى أنه ممكن يموت شاكاً في الله؛ تخيلوا واحد يؤتى في يقينه! قال الناظم: «من السنة الغراء أو من كتاب من تقدس عن قول الغوات وجحدي جل وعلا». يبقى "من السنة" هنا كأنها متعلقة بإيه؟ يعني هو البيت الذي قبليها: «وبعد فإني سوف أنظم جملة من الأدب المأثور عن خير مرشدي، من السنة الغراء». فهمتم يعني النبي عليه الصلاة والسلام؛ هيقول فين الآداب؟ في السنة أو من الكتاب؛ يعني الآداب التي سأقولها الآن إما من كتاب أو من سنة.
تقديم السنة على الكتاب، ده مناسب ولا إيه؟ يعني هذا المعنى جاء في ذهني الحقيقة، أنه الآداب معظمها في السنة، فقد والله أعلم يكون قدم السنة هنا من هذا الحديث لا أنها مقدمة على الكتاب، وإلا فعادة العلماء أنهم يقدمون الكتاب على السنة، يقولون كتاب وسنة في الذكر. فقد يكون ذلك والله أعلم أن يكون ما أتى به من الآداب معظمها من السنة، فقدمها ليدل على ذلك، يعني هذه الآداب التي نظمها هي من السنة الغراء؛ أي البيضاء الشريفة. قال الجوهري من علماء اللغة: الأغر الأبيض، وقال: رجل أغر أي شريف. انتهى كلام الجوهري. والكتاب كتاب الله تعالى، لأن "أو" هنا المراد بها الجمع، طبعاً الحروف يأتي بعضها مكان بعض.
فهنا بيقول «أو»، أصلها على إيه؟ لا، أصل "أو" ليس الواو، بل هي تدل على معاني في اللغة منها التخيير؛ يعني أقول لك اقعد هنا أو هنا، فأنا أخيرك. ومنها برضه التنوع؛ يعني لو أخذناها على بابها أنه سآتيك بآداب من السنة أو من الكتاب، يعني بعضها من السنة وبعضها من الكتاب. وقد تأتي تدل على الشك، يعني أتى محمد أو أحمد؛ فده كله في أصل "أو". هنا جاء الحجاوي وقال: "أو" هنا المراد بها الجمع، هي ما تهياش على بابها، دي بمعنى "و"، فهمتم؟ ده اللي الحجاوي بيقوله، وقد يكون والله أعلم المراد بها يعني تكون على بابها، يعني جئتك بآداب من السنة وأخرى من الكتاب؛ يعني ممكن تمشي كده وتمشي كده، ماشي الحال.
طبعاً من المواطن أو من المعاني التي تأتي عليها "أو" وليست على بابها؛ معنى الاستدراك، اللي هو "بل". ليه بقى؟ واش معنى؟ ده اللي بقوله عشان ده أتى في القرآن: ﴿وَأَرْسَلْنَاهُ إِلَى مِائَةِ أَلْفٍ أَوْ يَزِيدُونَ﴾ [الصافات: 147]، هي في القرآن ﴿أَوْ يَزِيدُونَ﴾، فقالوا: هل يجوز على الله الشك؟ يعني أرسلنا إلى مئة ألف أو يزيد؛ يعني يا مئة ألف يا يزيدوا شوية؟ ده المعنى. فقالوا: لا، هنا "أو" على معنى آخر، معنى الاستدراك: ﴿وَأَرْسَلْنَاهُ إِلَى مِائَةِ أَلْفٍ بَلْ يَزِيدُونَ﴾. كن في الدنيا كأنك غريب، بل عابر سبيل. والكتاب كتاب الله تعالى، لأن هنا المراد بها الجمع. والسنة في اللغة الطريقة؛ اصطلاحاً ما نقل عن النبي صلى الله عليه وسلم قولاً أو فعلاً أو إقراراً. طبعاً هنا مش وقت نقاشات لأننا أخذناها في المصطلح، لكن هنا ما فيش مشكلة نأخذها إجمالاً وخلاص. قوله تقدس؛ أي تطهر وتنزه، والتقديس التطهير قاله الجوهري. يبقى تقدس الله عز وجل عن قول الغوات وجحدي. طبعاً نحن في درس اعتقاد لنرى ما هو قول الغوات وجحدي، هو هنا عشان يقفل البيت ونعديه.
الآداب هذه يا من السنة، يا من الكتاب، يا من أقوال العلماء الفضلاء والحكماء، عادي ممكن نأخذ الآداب من الناس، ما فيش مشكلة لو شيء يستحسن، عادي ما فيش مشكلة وتعرف عليه الناس، ولو عملنا غيره يقولوا لا، ده مش ماشي. بل حتى ذكروا في بعض المواطن لو صار العرف شيئاً مثلاً وجاء في حديث معنى آخر يخالفه، بعض العلماء تساهل في هذه الأمور. يعني مثلاً ترك القيام للداخل، لو عملته دلوقتي الناس تظن أنك قليل الأدب، وأنك كيف ما تقومليش؟ طيب، نقوم نقوم. طبعاً المسألة دي فيها نقاش، وستأتي معنا في الآداب، مش عاوزين نستعجل، ومن قول أهل الفضل من علمائنا، أئمة أهل السلم، يعني أهل الإسلام من كل أمجد. يبقى أنا هديكم الآداب؛ ابن عبد القوي بيقول يعني عشان ما أحبش أتكلم عن نفسي كتير، وفي هذه القصيدة من أقوال الفضلاء والعلماء من علمائنا، ومراده والله أعلم بقوله من علمائنا هنا؛ يظهر أنه من علماء مذهبنا وأصحابنا، وهم أصحاب الإمام أحمد رحمه الله تعالى.
والأئمة جمع إمام، والسلم بكسر السين المهملة وفتحها؛ هو الطاعة ظاهراً وباطناً. هنا السلم يعني ما خلاش على معنى الإسلام، قال هي الطاعة. والمجد في كلام العرب عشان كلمة أمجد؛ الشرف الواسع، ورجل ماجد مفضال كثير الخير، منقول عن أهل اللغة. قال: لعل إله العرش ينفعنا بها، وينزلنا في الحشر في خير مقعد، آمين. الضمير في قوله بها عائد إلى الجملة التي ذكرها من الآداب، ومتى ننتفع بها عند الرب سبحانه وتعالى؟ لما نذاكرها ولا لما نعمل بها؟ نعمل بها، يبقى لعل إله العرش ينفعنا بها إذا عملنا بما علمنا، وإلا كانت حجة علينا. وأبو هريرة لما كان واحد يأتي يسأله كثيراً عن الأحاديث، فقال: أتعمل بكل ما تسمع؟ قال: لا. قال: فلما تزيد من حجج الله عليك؟ نقول بس، يبقى ما نتعلمش عشان ما نزودش حجج الله! ده اللي نفهمه من كلام أبو هريرة، صح كده؟ الفهم المتشقلب بتاعكم، لا، أننا نسمع ونعمل.
ألم يقل: ﴿أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ وَأَنتُمْ تَتْلُونَ الْكِتَابَ أَفَلاَ تَعْقِلُونَ﴾ [البقرة: 44]؟ ففهموا منها أن لا نأمر؛ شيء غريب، لا، تأمر وما تنساش نفسك، مش لا تأمر. الضمير في قوله بها عائد إلى الجملة التي ذكرها من الآداب، قوله لعل هي حرف يستعمل للترجي والطلب. لعل، يبقى المسألة ممكنة قريبة، لعل إله العرش ينفعنا بها، يبقى المسألة قريبة أننا ننتفع بها؛ لو كانت المسألة بعيدة محالة يقولوا ليت، مش كده؟ يا ليت الشباب يعود يوماً، الشباب مش هيعود، يا ليتنا نرد، مين بقى يرد؟ ما فيش.
والناظم رحمه الله طلب من الله أن ينفعه بها، والنفع بها يكون بالعمل بها، ويكون بما يحصل له من الثواب من أجل من قرأها وانتفع بها. هو هنا كان الحجاوي أعاد الضمير على الناظم والله أعلم، يظهر أنه مش كده، يعني لو عادت على الناظم يبقى كأنه يعظم نفسه، لعل إله العرش ينفعني بها، مش هينكسر البيت، ما كان يخليها كده! فيظهر والله أعلم أنه "ينفعنا بها" يعني هو الناظم ومن قرأ فعمل، لكن بلا شك من جملة النفع الذي ينتفعه الناظم أننا لما نتعلم ده من كلامه يبقى كل ده في ميزانه، وهذا من شرف الدعوة إلى الله. عاوزين يا جماعة ونحن ندعو إلى الله نبقى شايفين ده، أنه شيء باقٍ لنا بعد موتنا، ده ممكن دلوقتي واحد فينا يقبض وهو قاعد دلوقتي؛ فإذا كانت دعوتنا ما هياش لله هنضيع، مش هنقول بقى إن الثواب هيقف، هو ما كانش فيه ثواب أصلاً، كان فيه وزر، إنما لو الدعوة لله لو أخلصناها لله ومتنا، كل كلمة الناس تسمعها وتنتفع بها وتعمل بها، ونحن ميتون، خلاص متنا في موازيننا.
ابن عبد القوي ميت من سنة 699، وإذ بنا عمالين نقرأ ونترحم عليه ونعمل بما كتب. رحمة الله، وأحنا قلنا إن هو من شيوخه ابن تيمية ولا هو من شيوخ ابن تيمية؟ مش فاكر، هو شيوخ ابن تيمية. ابن تيمية ميت سنة 728. قال: لأن في صحيح مسلم عن النبي صلى الله عليه وسلم أنه قال: «إذا مات ابن آدم انقطع عمله إلا من ثلاث: علم ينتفع به من بعده، أو ولد صالح يدعو له، أو صدقة جارية». وبتاعة "وينزلنا"؛ هل هو ينزلنا ولا ينزلنا؟ "إلا من له في العلم والدين رغبة، ليصغ بقلب حاضر مترصدي". قوله "ألا" هي للتمني، كقول الشاعر: ألا عمر ولا مستطاع رجوعه، فيرأب ما أثيت يد الغفلات. ويحتمل أن يكون للعرض والتحضيض، قال ابن هشام الأنصاري من أهل اللغة: ومعناهما طلب الشيء، ولكن العرض طلب بلين، والتحضيض طلب بحث. يعني في الآخر هم طلب، وتختص "ألا" هذه بالجمل الفعلية، نحو: ﴿أَلَا تُحِبُّونَ أَن يَغْفِرَ اللَّهُ لَكُمْ﴾ [النور: 22]، ومنه عند الخليل: ألا رجلاً جزاه الله خيراً، يدل على محصله، والتقدير: ألا تروني رجلاً هذه صفته، فحذف الفعل مدلولاً عليه بالمعنى. فعلى هذا يكون التقدير في كلام الناظم: ألا يوجد من له في العلم والدين رغبة، يعني نسأل الله عز وجل أن نكون ممن له رغبة في الدين والعلم وأن ننتفع بكلامه، أو يقدر فعل غير يوجد، فعلى هذا يكون ذلك تحضيضاً منه وطلباً لمن أراد العلم والدين.
وكان حريصًا ذا رغبة وفطنة أن يصغي إلى نظمه قلبه. قلبه؛ ماشي، ممكن يبقى يصغي هو قلبه يعني، أو يصغي قلبه، يعني القلب هو الفاعل. يبقى أن نبحث هل يصغي تأتي متعدية عشان تنفع قلبه ولا لا؟ هي دي بقى اللي، يعني أصغى فلان دي مفهومة، ينفع نقول أصغيت فلانا فأصغى؟ في أفعال تأتي لازمة وتأتي متعدية عادي، ممكن كده وممكن كده، فمحتاجة بحث.
مش عارف لو طلعت كده بقى قلبه ماشي، طبعًا اللي عامل المشكلة دي كلها مش الشيخ، المطبعه، المطبعه قالتها قلبه، فإحنا بنبحث. بس بتبقى فرصة يعني فرصة نشوف هي، مش شرط المطبعه، ممكن بقى المحقق ويبقى شاطر برضو يعني مش لازم.
ومعنى يصغي يميل، طبعًا بضم الباء، يبقى متعدية عندكم بقى عليها فتحة صح؟ يميل برضو بالضم، مش متشكّلة، والباء في قوله بقلب للإلصاق، فكأنه قال ليصغ قلبه. هنا بقى أهي واضحة أهي، هنا خلاص خلاها متعدية، وقلبه مفعول به، والفاعل صاحب القلب. حد مش فاهم؟ دي اللي كنت بقولها، إن هو كاتب تحت. مش مهم، إنتوا مكبّرين دماغكم يعني، ممكن مكبّر دماغك بس فاهم يعني. فاهمين بس يعني إيه عادي، إحنا عاوزين إيه يعني، كلها شكليات.
يعني ممكن مع الأمور دي ناس تحب العلم شوية مثلًا، العلم لذيذ. طبعًا منكم ده يعني يقول ربنا يخلي، ربنا يجعل مشاكلنا ربع مشاكل بتوع اللغة دول، هي قلبه ولا قلبه؟ اللي هو إنت ممكن ترزع فيديو تقول قلبه أصلًا، مش فارقة معاك.
ومعنى يصغي يميل، والباء في قوله بقلب للإلصاق، فكأنه قال ليصغي قلبه. مش يعني إيه إلصاق وكده، قوله حاضر أي متيقظ، مترصد أي مترقب حافظ. يبقى بقلب حاضر، ما إحناش قاعدين هنا وقلبنا في حتة تانية، عمال يفكر في حاجة تانية بره الدرس، مترصد للفائدة. الله أعلم بقى وإحنا بنتكلم كده في النص، تأتي كلمة تستفيد منها شيئًا تعمل بها في حياتك تنفعك، أو تأتي كلمة تحرك قلبك فتكون سبب دخول الجنة، فده محتاجين إن في مجالس الخير نوري الله منا الخير، والإقبال وعدم التأفف ولا التبرم. ولما نلاقي المجلس تقيل مثلًا أو الكلام بالنسبة لنا مش مفيد، نستغفر، إن ليه ما يبقاش بالنسبة لنا مفيد الكلام ده؟ ما هو أكيد يا جماعة الحجاوي أما جه يكتب كلام ما كتبش كلام مش مفيد، ولا كان فاضي يعني الفضى قتله فقال أقعد أكتب كلام مش مفيد، هو ما كتب الكلام كتبه وهو يراه مفيدًا، فجت إشكالاتنا بعد كده نقرا الكلام ونشوفه مش مفيد، لقصور الحجاوي؟ لعدم فهم الحجاوي إيه المفيد وإيه اللي مش مفيد؟ ولا إحنا اللي محتاجين توبة ومحتاجين استغفار عشان نرى المفيد مفيدًا.
قال ويقبل نصحًا، يقبل دي معطوف على إيه بقى؟ «إلا من له في العلم والدين رغبة ليصغي بقلب حاضر مترصد ويقبل نصحًا». ليصغي بقى، مش كده؟ عندكم ويقبل، اللام عليها إيه؟ فتحه، المفروض سكون بقى. التعليل، فين لام التعليل دي؟ بتعلل إيه دي؟ لكي، يعني إيه لكي هنا؟ شايفها لام الأمر، مش شايفها تعليل، ولو كانت بتنصب هيقول ليصغي، هيحط الياء ويحط عليها فتحه، فدي لام الأمر. فتحت ويقبل نصحًا لو هي معطوفة على ليصغي، نسخة الـ بي دي إف اللي إنتوا معاكم دي اللي في الموبايل فيها إيه؟ ويقبله، محتاجة تتشاف دي الصراحة عشان نعرف نحفظها إزاي برضو.
ماشي نكمل ما تشفش بقى دلوقتي، يعني شوفوها بعد كده، الصراحة مش جاية في دماغي دلوقتي، ممكن يبقى ليها وجه وأنا مش منتبه ليه. ويقبل نصحًا من شفيق على الورى حريصًا على زجر الأنام عن الردى، مين؟ ابن عبد القوي، بيقول لك أنا ذو شفقة عليك حريص على زجرك عن الردى، فأقبل نصحي. وممكن تبقى النبي عليه الصلاة والسلام، بس يظهر برضو الله أعلم إنه يقصد نفسه؛ لأن لو قصد نفسه شملت أنواع الآداب الثلاثة، اللي هم إيه ما جاء في السنة وما جاء في الكتاب وما جاء في أقوال العلماء؛ لأن هو جايب لك التلاتة وحاططهم لك يقول لك، إنما لو قصد النبي عليه الصلاة والسلام أخرج النصح الذي يكون في الكتاب والنصح الذي يكون في أقوال العلماء، مش كده والله أعلم. يعني أراد بالشفيق نفسه، يعني إنه ذو شفقة وحرص على الزجر عن المنكرات مرغّب في أضدادها؛ لأن من كمال خصال العالم أن يكون شفيقا. آه مهمة دي يا شباب جدًا، الداعية إلى الله لا بد أن يكون شفيقًا، وأن تظهر شفقته على الخلق، يعني يحس وأنت بتدعوهم كده إن إنت فعلًا خايف عليهم، وهو لازم تكون خايف، يعني مش إنت مش هتمثّل إنك خايف عليهم، يحسوا إنك خايف عليهم، يحسوا إنك حد قلقان على ده، أدعى إن هم يقبلوا.
فإنت لو قلبك سليم تجاه الخلق هتبقى خايف على الناس، حتى لو حد مخالفك، يعني إنت حد مخالفك بلاش مخالفك كمان، حد عدو ليك شتمك ولا عمل فيك حاجة، ولا على حسب درجة سلامة قلبك برضو هتبقى خايف، وخايف يقع في الإثم وتزعل. لو يعني ممكن يبقى من أسباب زعلك مش إنك بتُشتم، إنك بتُشتم ده كده إنت تستاهل الشتيمة أنا وأنتم يعني، فنزعل ليه؟ لو زعلين نزعل من نفسنا إن إحنا عملنا المعاصي اللي خلتنا نبقى أهل إن إحنا نُشتم، فسلط الله علينا من يشتمون، إن ممكن بقى نزعل على إيه بقى؟ على إنه فلان ده يأثم. إنتوا عارفين مين اللي من السلف لما كان باين واحد أعمى وتناعى أعرج ولا حاجة زي كده، مش فاكر وبعدين يجوا يمشوا مع بعض، فيقول له إيه ما تمشيش معايا ليه الناس هتقعد تتريق، مش فاكر وعرج أو حاجة زي كده فقال له إيه خلاص نمشي مع بعض يتريق وناخد ثواب، فقال له لا نفترق ويسلمون، ما نمشيش مع بعض عشان الناس تسلم إنت عاوز... واحد ساعات يكتب منشور وبعدين يلاقي الناس تشتم وكده، والله ساعات بحذف المنشور عشان كده، مش عشان أنا بتشتم، يعني الناس عمالة تأثم تقع في الحرام أقوم حذف المنشور، ده ما يعني مش عاوز الناس، يعني الناس تأثم ليه طيب.
فسيدنا النبي بقى عليه الصلاة والسلام شفقته بالناس بالمسلمين بس ولا إيه؟ بالـ ﴿رَّءُوفٌ رَّحِيمٌ﴾ [التوبة: 128]، إنما شفقته على الناس كانت تمتد للكفار، ﴿فَلَعَلَّكَ بَٰخِعٌ نَّفْسَكَ﴾ [الكهف: 6] دي على المؤمنين على الكفار، مش كده؟ وبعدين لو وأنا جيت قلت لك دلوقتي في واحد، وأنت راجل بقى مشهور بقى عندك فولورز كتير، بس في واحد بس محتاجك تقعد معاه شوية كده، يعني إيه محتاج يتوب أو هيكفر خلاص، تقوم إنت تستقل الموضوع ده؟ مش كده واحد اللي أقعد معاه، يروح يشوف له حد شيخ زاوية ولا بتاع يقعد مع أنا راجل مشهور مع واحد، سيدنا النبي عليه الصلاة والسلام ما فيش الكلام ده خالص، يقعد مع الواحد دوره، مش بس هو اللي يروح للواحد، مش كده؟ واحد يحتضر، يقوم يدخل عليه جري واحد، طب ده هينفعه في إيه في الإسلام؟ يعني يعني خلاص ده بيحتضر يعني مش هينفع، مش هيذب عن الدين مش هيقوي شوكة المسلمين، هو شفيق صلى الله عليه وسلم، ولذلك أول ما يقول كلمة التوحيد يخرج النبي فرحان، الحمد لله الذي أنقذ بي نسمة من النار، المعنى ده في قلوبنا، محتاجين نبقى في قلوبنا.
قال كما قيل: يراد للعالم عشرة أشياء: الخشية والنصيحة والشفقة وهذا الشاهد يعني، والاحتمال والصبر والحلم والتواضع والعفة عن أموال الناس والدوام على النظر في الكتب، وقلة الحجاب، بل يكون بابه للوعظ والرفيع الشريف. واضح الكلام في الجملة برضو، يعني ممكن كل واحدة بقى نقعد نسهب فيها ونشوف إسقاطاتها علينا وإحنا فينا إيه وما فيناش إيه، لكن مش محتاجين إحنا لأن ده للعالم، وإحنا همج رعاع أنا يعني.
قال ويحتمل إنه أراد بالشفيق النبي صلى الله عليه وسلم والله أعلم. قال فعندي مما في الحديث أمانة، عندي حاطط فتحة على الياء، عندكم كده برضو؟ ماشي، في عندي من غير الفتحة دي، فعندي مما في الحديث أمانة سأبذلها جهدي، فاهدي وأهتدي، دي يعني إنما آتاه الله من الحديث والعلم وديعة، يبقى عندي أمانة سأبذلها. ومثل هذا قول ابن أبي موسى في ديباجة إرشاده: أعاننا الله وإياك على رعاية ودائعه وحفظ شرائعه. انتهى، والوديعة يجب على المودع حفظها، ومن جملة حفظ العلم الذي أودعه الله عنده أن يمتثل أمر الله فيه؛ فإن الله تعالى أودع العلم من يشاء من عباده وأمرهم ببذله للناس وتوعدهم على كتمانه، فقال: ﴿إِنَّ الَّذِينَ يَكْتُمُونَ مَا أَنزَلْنَا مِنَ الْبَيِّنَاتِ وَالْهُدَىٰ مِن بَعْدِ مَا بَيَّنَّاهُ لِلنَّاسِ فِي الْكِتَابِ ۙ أُولَٰئِكَ يَلْعَنُهُمُ اللَّهُ وَيَلْعَنُهُمُ اللَّاعِنُونَ﴾ [البقرة: 159]. فده طبعًا وعيد شديد على كتم العلم، وقال: ﴿إِنَّ الَّذِينَ يَكْتُمُونَ مَا أَنزَلَ اللَّهُ مِنَ الْكِتَابِ﴾ [البقرة: 174]، وقال تعالى: ﴿فَلَوْلَا نَفَرَ مِن كُلِّ فِرْقَةٍ مِّنْهُمْ طَائِفَةٌ لِّيَتَفَقَّهُوا فِي الدِّينِ وَلِيُنذِرُوا قَوْمَهُمْ إِذَا رَجَعُوا إِلَيْهِمْ لَعَلَّهُمْ يَحْذَرُونَ﴾ [التوبة: 122].
مين اللي يتفقهوا؟ لا الباقيين بقى، ﴿فَلَوْلَا نَفَرَ مِن كُلِّ فِرْقَةٍ مِّنْهُمْ طَائِفَةٌ﴾، الطائفة دي نفرت للجهاد، الله طب الباقي فين؟ ﴿لِّيَتَفَقَّهُوا فِي الدِّينِ وَلِيُنذِرُوا قَوْمَهُمْ إِذَا رَجَعُوا إِلَيْهِمْ﴾، يبقى دول بيجاهدوا ودول بيتعلموا، فالمجاهدين يحتاجوا بعد كده للعلماء فيلاقوا ناس تفتيهم، قال: فحثهم على النفير للتفقه في الدين هنا، على قول آخر، يبقى كده هو طبعًا إحنا ما بنقول يعني خدوها من هنا قاعدة، اللي جاية يعني أما نيجي بنفسر آية مش معناه ده التفسير الوحيد للآية ماشي، فحثهم على النفير للتفقه في الدين، وندبهم إلى إنذار بريته كما ندب إلى ذلك أهل رسالته، ولأن بذله له سبيل إلى كثرة طلابه، يعني لو كل واحد عنده العلم قال مش هبذل، طب طلاب العلم ياخدوا العلم من مين؟
فصل: قال الإمام أحمد رضي الله عنه: طلب العلم أفضل الأعمال لمن صحت نيته. طبعًا إحنا عندنا في المذهب أفضل ما يتنفل به الجهاد، ثم النفقات في الجهاد، ثم العلم. طلب العلم أفضل الأعمال لمن صحت نيته، قيل فأي شيء يصحح النية؟ أنوي إيه في العلم؟ قال: ينوي يتواضع فيه وينفي عنه الجهل. وطبعًا أحمد بن حنبل له قول آخر في هذه المسألة، إنه ينفي عن نفسه الجهل ثم ينفي الجهل عن الآخرين، ينوي ذلك برضو، يبقى وإحنا بنتعلم دلوقتي ننوي ده، إحنا بنتعلم عشان ننفي الجهل عن أنفسنا ثم ننفي الجهل عن الآخرين. ونقل ابن منصور إن تذكار بعض ليلة أحب إلى أحمد من إحيائه، واحد يقعد يذاكر علم بعض ليلة أحب إلى أحمد من إحياء الليلة ماشي. وفي الفنون لابن عقيل: إذا أنعم الله على عبد النعمة، أحب الفنون من الكتب العجيبة بيقولوا الفنون ده 800 مجلد لكنه ذهب يعني ما مش موجود منه قطعة، وفي الفنون: إذا أنعم الله على عبد النعمة أحب أن يظهر عليه أثره، ومما أنعم الله عليّ أن حبب إليّ العلم فهو أثنى الأعمال وأشرفها، انتهى.
وقال النبي صلى الله عليه وسلم: «يحمل هذا العلم من كل خلف عدوله»، يبقى يا جماعة من فضل العلم لمن يطلبه ويأخذه بحقه، إن هذا الطلب وهذا الأخذ يكون نرجو أن يكون دليلًا على أن من يفعل ذلك من عدول هذا الجيل؛ لأن النبي اللي قال كده عليه الصلاة والسلام: «يحمل هذا العلم من كل خلف عدوله». طب لو ما أخدناش العلم يبقى معنى كده إن إحنا مش من العدول؟ مش شرط، بس نخاف بقى، الله أعلم، ينفون عنه تحريف الجاهلين وإبطال المبطلين وتأويل الغالين. وقال مهند لأحمد في هذا الحديث كأنه كلام موضوع، قال: لا هو صحيح، فقال سمعته إنت؟ قال من غير واحد. وقال صلى الله عليه وسلم: «من سلك طريقًا يلتمس فيه علمًا سهل الله له طريقًا إلى الجنة». من المعاني الجميلة اللي اتقالت في الحديث، بيقول له كأنه كلام موضوع، مهند بيقول، قال له لا ده حديث صحيح، فراح مهند قال له سمعته إنت؟ يعني إنت سمعت الحديث ده من حد عن حد؟ فقال من غير واحد، يعني واخده من كذا طريق، وفي حديث: «من سلك طريقًا سهل الله له طريق الجنة» مما قيل فيها معنى جميل، إنه سهل الله له طريقًا آخر إلى الجنة.
فقالوا: إن طلب العلم يسهل لك طرق الجنة. يعني لو مثلا مقفول عليك باب قيام الليل، روح اطلب العلم، ربنا يسهل عليك قيام الليل. لو مقفول عليك باب الصدقة، روح اطلب العلم، ربنا يخفف عليك أنك تتصدق. لو مقفول عليك باب البر، اطلب العلم، ﴿سَهَّلَ اللَّهُ لَهُ بِهِ طَرِيقًا إِلَى الْجَنَّةِ﴾. ده هذا من أحد التأويلات يعني في الحديث.
وإن الملائكة لتضع أجنحتها رضا لطالب العلم. يعني إيه تضع أجنحتها؟ يبقى إما يكون المعنى ما هوش الوضع الحقيقي، يعني أنتم جئتم بالتأويل، المعنى المؤول في الأول ماشي، يكون على معنى الآية ﴿وَاخْفِضْ لَهُمَا جَنَاحَ الذُّلِّ مِنَ الرَّحْمَةِ﴾ [الإسراء: 24]، فيبقى تضع أجنحتها، يبقى الملك يتواضع لطالب العلم. أنتم فاهمين الملك يتواضع لطالب! أو يكون أن تضع أجنحتها يعني بتجلس في مجالس العلم وتهبط وتترك الطيران. وفي الحديث: «ألا حفتهم الملائكة» من اجتمعوا. ولذلك إحنا حريصين أننا على قد ما نقدر نبقى في المساجد؛ لأن هذا الفضل جاء في المسجد. طب هل غيره يلحقه؟ يظهر والله أعلم أن طالما المسجد موجود، فلا يلحق غيره في هذه المزية. طب لو بقى أغلقت المساجد وما فيش مساجد وسعينا وما قدرناش، فالناس ما تستسهلش الخروج من المسجد.
يعني بعض الناس تلاقيها إيه، بكلمكم لأن في منكم دعاة، وناس هتلاقي إيه ممكن يبقى المساجد مفتوحة لهم وعادي حد يروح يقعد في دار مثلا، يروح يقعد في مش عارف بتقعد فين تاني، في نوادي. المسجد، ما نهجرش، لا نهجر المساجد بيوت الله عز وجل، طول ما في مساجد مفتوحة ونقدر نكون في المسجد، نكون في المسجد. «ما اجتمع قوم في بيت من بيوت الله يتلون كتاب الله ويتدارسونه فيما بينهم إلا كذا وكذا وحفتهم الملائكة». يبقى الملائكة تضع أجنحتها لطالب العلم، أنها بتنزل وتترك أو مما قيل فيها أنها تضع أجنحتها حقيقة لطالب العلم ويمشي على أجنحة الملائكة، وفي طريق العلم تنزل الملائكة تحط له جناحتها على الأرض ويمشي على جناحتها طالما هو في طريق العلم. فلو برضه توهمنا ذلك المعنى، معنى شريف جدا، وأنت ماشي ماشي على أجنحة الملائكة.
رووا قصة لبعض المحدثين، لو ما خذلتني الذاكرة، قال إسنادها كالشمس، المحدثين المعاصرين يعني، أن واحدا لبس زي أحذية كده وفيها مسامير، وبعدين بيسأل: أنت عامل كده ليه؟ قال: أكسر أجنحة الملائكة فيبست قدماه، شل. يعني يتهكم على هذا الحديث.
وإن طالب العلم ليستغفر له من في السماوات ومن في الأرض حتى الحيتان في الماء. استشعروا يا جماعة المعاني دي؛ عشان دي المعاني التي تسهل عليكم الطلب، طلب العلم في الأول صعب بلا شك، وبعدين بالذات في عصر الملهيات اللي إحنا فيه، فتلاقي حاجزك عن كثير من الملهيات والحاجات اللي اعتدت عليها. حتى إذا طال المجلس شيئا تبرمت وزهقت ويلا بقى المجلس يخلص إمتى. بعد كده طبعا من تلذذ بالعلم يبقى نفسه مجالس العلم تفضل بالساعات. اللذة دي اللي يذوقها ما يزهقش من العلم، وكثير من السلف كانوا كده ما يزهقوش من العلم، يعني تقعد مهما يقعد المجلس.
قلنا لكم أبيات الشافعي قبل كده بتاعة العلم، إنه هو كان يتبسط بالعلم وكده، كان يقول: سهري لتنقيح العلوم ألذ لي من وصل غانية وطيب عناقي وصرير أقلامي على صفحاتها أحلى من الدوكاء والعشاق وتمايلي طربا لحل عويصة في الدرس أحلى من مدامة ساقي يعني اللي بيسكر من الخمرة، أنا بقى تمايلي طربا لحل عويصة في الدرس، يعني تعمل لي دماغ أكثر من الدماغ اللي تعملها الخمرة، أحلى من مدامة ساقي، وأميل وأبيت سهران الدجى، وتبيته نوما وتبغي بعد ذاك لحاقي. عاوزك عاوز تبقى الشافعي، هتبقى الشافعي إزاي؟
ففي ناس بتتلذذ بالعلم، ومين اللي قالوا لها يا بختك، جوزك مش متجوز علي واحد من العلماء يعني، وكان التعدد زمان هو الأصل، يعني الناس بتتعدد، فقالت لهم إيه: لهذه الكتب أشد علي من ثلاث ضرائر. فلغاية بقى ما ربنا يفتح علينا ونحب العلم، نصبر يعني، نور الله عز وجل منا الصبر، ومن تصبر صبره الله.
يبقى من الحاجات بقى اللي تخلينا نصبر أننا نستشعر معنى الملائكة تضع الأجنحة. أنت البعيد عاوز إيه بقى؟ عاوز يسيب المجلس ويروح يفر يطلع بره عشان يعمل إيه، يفتح الفيسبوك ويفتح مش عارف إيه ويشوف الواتساب. وطالب العلم يستغفر له من في السماوات ومن في الأرض حتى الحيتان في الماء. وفضل العالم على العابد كفضل القمر على سائر النجوم، يعني العالم أعلى، وإن العلماء ورثة الأنبياء، الله أكبر، وإن الأنبياء لم يورثوا دينارا ولا درهما، وإنما ورثوا العلم، فمن أخذ به أخذ بحظ وافر. لما تلاقي نفسك مش قادر تأخذ العلم وزهقان، ومش عاوز تحضر مجالس العلم، ابكي على نفسك، ميراث الأنبياء دعيت لتأخذ بحظك منه، وتلاقي نفسك كاره العلم، كاره ميراث الأنبياء. ﴿مَنْ أَخَذَ بِهِ أَخَذَ بِحَظٍّ وَافِرٍ﴾ رواه أبو داود وغيره.
وروى أنس رضي الله عنه قال: قال رسول الله صلى الله عليه وسلم: «من خرج في طلب العلم فهو في سبيل الله حتى يرجع» رواه الترمذي وقال حديث حسن، كأنه في جهاد. وعن أبي أمامة الباهلي رضي الله عنه قال: قال رسول الله صلى الله عليه وسلم: «فضل العالم على العابد كفضلي على أدناكم»، ثم قال صلى الله عليه وسلم: «إن الله وملائكته وأهل السماوات والأرض حتى النملة في جحرها وحتى الحوت ليصلون على معلم الناس الخير» رواه الترمذي وقال حديث حسن.
حد مات وهو بيطلب العلم، مات في سبيل الله، قيل كده، يأخذ ثواب الجهاد. حلوة دي أهي خدمة. سلط عليك حد يقتلك إن شاء الله الدرس الجاي، تاخذ أنت ثواب الشهيد، ويسلط مين، نادر، ماشي كويس نسلط نادر يقتلك، تأخذ أنت ثواب الشهيد ويأخذ هو 25، يبقى خلصنا من الجوز وناخذ إحنا راحة بقى.
رواه الترمذي وقال حديث حسن. قال الشافعي رضي الله عنه: إن لم يكن الفقهاء العاملون أولياء الله فليس لله ولي. يبقى مين هم أولياء الله؟ الفقهاء العاملون.
فصل: في حديث أبي هريرة رضي الله عنه أن النبي صلى الله عليه وسلم سئل: أي الناس أشد عذابا يوم القيامة؟ فرحكم بالعلم أهو، انبسطتم، قال: «عالم لا ينتفع بعلمه». يبقى نتعلم ونعمل. وقال صلى الله عليه وسلم: «من طلب العلم ليماري به السفهاء أو يكاثر به العلماء أو يصرف به وجوه الناس إليه فليتبوأ مقعده من النار». فننتبه لهذا، رواه الترمذي، نجاهد عادي، نطلب العلم وندعو الناس ونجاهد أنفسنا من وقف الأعمال الصالحة.
وروى ابن ماجه، هو بيقولوا ماجه دي أمه مش أبوه، وعشان كده الابن كلمة ابن دي تكتب بالألف حتى لو كتبنا اسمه. شوفوا اللي أنا بقوله ده صح ولا غلط، الألف بتاع ابن وابن دي ساعات تتكتب وساعات ما تتكتبش. امتى بقى تتكتب وامتى ما تتكتبش؟ من المواطن اللي تكتب فيها إذا نسب إلى غير أبيه، تبقى أنت ما أنتاش فاهم هي مكتوبة ليه، وسلام بقى لو كمان تقوم جاي شاطب عليها غلط ما تتكتبش دي. فبيقولوا إن ماجه هي أمه وهو منسوب إليها، صح ده ولا أصل أنا دي سمعتها من واحد من المهتمين بالحديث ما قرأتهاش، لو السبب ده مش حقيقي الألف كده محطوط، لا هي كده كده محطوط كده، صح هو بس لو ذكر اسمه ما تتشال بقى الألف المفروض.
من حديث ابن عمر رضي الله عنهما عن النبي صلى الله عليه وسلم أنه قال: «من طلب العلم لغير الله أو أراد به غير الله فليتبوأ مقعده من النار» عياذا بالله. وعنه صلى الله عليه وسلم: «شرار الناس شرار العلماء».
وفي مسند الدارمي عن علي رضي الله عنه أنه قال: يا حملة العلم، كله يركز، اعملوا به؛ فإنما العالم من عمل بما علم، ووافق علمه عمله، يظهر والله أعلم. وسيكون أقوام يحملون العلم لا يتجاوز تراقيهم، يخالف علمهم عملهم، وتخالف سريرتهم علانيتهم، ويجلسون حلقا يباهي بعضهم بعضا، حتى إن الرجل ليغضب على جليسه أن يجلس إلى غيره ويدع معه، بقى كده تعمل لايك لفلان وأنت ما تعمليش لايك! أولئك لا تصعد أعمالهم في مجالسهم تلك إلى الله تعالى عياذا بالله.
قال: إذا علم هذا فينبغي للطالب أن يجتهد في إخلاص نيته وتصحيحها في الطلب، ثم يجد في طلب العلم مجتهدا في تحصيله، مبالغا في تجميله وتفصيله، وليكن متواضعا لأستاذه؛ فإن التواضع في هذا المقام رفعة. الشافعي عليه برضه: اصبر على مر الجفا من معلم، فإن رسوخ العلم في نفراته. قال: وليستفرغ في تبجيله وتعظيمه وسعه من غير مغالاة، وليذكر نفسه أن الآخرة خير من الأولى. ليه يذكر نفسه ده؟ علشان حاجتين، بعض الناس بتترك العلم رأسا يعني تترك العلم أو الدين أو أبواب الخير، يعني ليه؟ علشان دماغهم في العاجلة، فذكر نفسك أن الآخرة خير من الأولى، أو بعض الناس مش هيترك بقى العلم ولا الدعوة ولا كده، لكن يظل فيها يريد بها غير الله، علاج الآفتين دول إيه؟ أن تذكر نفسك أن الآخرة خير من الأولى، وأن الحفظة الكرام يضبطون ما صدر عنه فعلا وقولا.
وينبغي للطالب ألا يترك الطلب ولو وصل من العلم في ظنه إلى أعلى الرتب، ولذلك حمل مالك رضي الله عنه ما ورد عن النبي صلى الله عليه وسلم أنه قال: «من تعلم فعلم وعمل دعي في السماوات عظيما»، «ومن ظن أنه علم فقد جهل». على أن الإمام مالك حمل هذا على أن الطالب إذا ظن أنه قد كمل علمه فيبطل تعلمه، فيحصل له جهل باعتبار ما أعرض عنه، والله الموفق. يعني بيقول: من ظن أنه علم فقد جهل، جهل إيه؟ ما هو أكيد عالم، أكيد اللي ظن أنه عالم ده هو عالم حاجات، طب جهل إيه بقى؟ جهل ما أعرض عنه بظنه أنه عالم، تعال يا فلان المجلس الفلاني يقول لك: لا، أنا عارف كل حاجة في المجلس الفلاني، يبقى في حاجات ما يعرفهاش يقوم يجهل الحاجات اللي اتقالت.
قوله: سأبذلها، قوله يعني الناظم، هو بفتح الهمزة، يقال بذلت الشيء أبذله بالضم، أي أعطيته وجدت به، قوله جهدي أو جهدي يجوز فيه فتح الجيم وضمها، والجهد أو الجهد الطاقة، كله عن الجوهري، يعني كل هذا الكلام في اللغة عن الجوهري يعني في الصحاح.
وهنبتدي بقى بآداب الجوارح إن شاء الله المرة الجاية عشان ما أتعبكوش. أقول قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير