د. أحمد عبد المنعمأهلاً وسهلاً بكم في هذا اللقاء. أسأل الله سبحانه وتعالى أن يجعله خالصاً لوجهه الكريم. بإذن الله سبحانه وتعالى نلتقي اليوم في لقاء بعنوان مركزيات الوحي.
في ناس بتسأل الأول إيه معنى العنوان؟ قبل ما نتكلم في تفاصيل الموضوع اللي هنتكلم فيه مع بعض إن شاء الله. إيه معنى العنوان؟ وليه اخترنا العنوان ده؟ تعالوا نقسم كده العنوان بسرعة: كلمتين، مركزيات الوحي.
مركزيات أقصد بها بمعنى إن في أمور ثابتة، في أمور تكررت، في أمور ما ينفعش يدخل فيها الشك، ما ينفعش يبقى الإنسان عنده الموضوع بالنسبة له شيء نسبي. يعني زائد أو ناقص يقبل أو لا يقبل. إحنا للأسف أصبحنا في زمن بتعبير بعض الناس كده اللي هو زمن السيولة، إن كل حاجة مقبولة وإن كل حاجة ممكن نرجع نقبلها أو نرفضها. كل شيء أصبح للأسف فيه نوع من عدم الثبات.
فلذلك إحنا محتاجين نرجع يكون عندنا ثوابت في حياتنا. وإحنا لما نرجع للثوابت إحنا كمسلمين محتاجين نرجع لثوابت من الوحي، من كتاب الله سبحانه وتعالى وسنة النبي صلى الله عليه وسلم. فكانت الفكرة إن إحنا نحاول وإحنا بنقرأ القرآن ما هي الأمور التي ركز عليها القرآن كثيراً؟ ما هي الأمور التي كررها القرآن كثيراً؟ تكررت لتتقرر في قلوبنا.
يعني عشان نفهم الموضوع بصورة أبسط، ببساطة جداً. أنا عايزك تتخيل معايا الصحابي إنه هو كان فترة من الفترات على الشرك. تخيل كده الصحابي اللي نزل عليه القرآن وهو كان في عهد النبي صلى الله عليه وسلم. قعد فترة على الشرك. الصحابي ده قبل ما ينزل القرآن على النبي صلى الله عليه وسلم، قبل ما النبي صلى الله عليه وسلم لأول مرة يسمع كلمة: اقرأ باسم ربك الذي خلق. يسمعها من جبريل.
تخيل كده الصحابي ده كان بينظر للحياة إزاي؟ يعني كان شايف الحياة إزاي؟ كان عايش تفكيره إزاي في الطعام؟ في الشراب؟ في الشهوة؟ في المعاملات؟ في القوي؟ في الضعيف؟ في مفهوم الانتصار؟ مفهوم الهزيمة؟ الحياة؟ الموت؟ كان متصور إزاي قضية الموت؟ كان متصور إزاي أي شيء هو لا يراه؟ عالم كامل مثلاً اسمه عالم الغيب. أي ما يغيب عن رؤياه، ما يغيب عن ناظريه. تخيل هو كان بيشوفه إزاي؟ أو كان متخيله إزاي؟
تخيل ده، الصحابي ده، لما نزل عليه الوحي وقعد لأول مرة يتلقى المفاهيم دي. أول مرة يسمع سورة العلق، سورة المدثر وسورة المزمل. تخيل كده الصحابي ده اللي كان قاعد فترة حياته كلها مفتوحة. اللي هو عايزه بيعمله. يعني اللي هو ممكن التقاليد تؤدي به إنه هو والعياذ بالله يدفن بنته، ممكن يدفن بنته عادي. يشرب الخمر، ممكن يفعل ما يشاء. كما قال ربنا سبحانه وتعالى عن الإنسان حينما يغيب عنه الوحي: ﴿بَل يُرِيدُ الْإِنسَانُ لِيَفْجُرَ أَمَامَهُ﴾ [القيامة: 5].
طب أنا عايزك تتخيل لأول مرة بيسمع سورة الأنعام. لأول مرة بيسمع سورة الزمر. أول مرة بيسمع سورة فاطر، سورة سبأ. قاعد بيسمع وخاصة القرآن المكي، ثلثين القرآن تقريباً والقرآن المكي، قاعد بيسمع معاني معينة. وبعدين بيفاجأ إن في معاني بتتكرر. في مواضيع معينة بس بأساليب مختلفة بتتكرر. لذلك ربنا سبحانه وتعالى قال عن القرآن إنه من أوصاف القرآن إنه مثاني.
يعني إيه مثاني؟ أحد معاني هذه الكلمة، كلمة مثاني اللي ربنا وصف بها القرآن، مثاني أي تثنى، أي تكرر. والفاتحة قيل سميت بالسبع المثاني لأن السبع آيات بتاعة سورة الفاتحة، في سبع معاني مهمة في سورة الفاتحة هنشير إليها اليوم إن شاء الله، لابد أن تتكرر، تثنى في كل صلاة، تكرر. يبقى إذاً في معاني محورية. لازم المسلم هذه المعاني لا تغيب عن ذهنه، لا تغيب عن عقله وهو بيسير في الحياة.
قبل ما المسلم يتعامل مع الناس، قبل ما المسلم يسأل حلال أو حرام، قبل ما المسلم أصلاً يتعامل في حياته في الماديات أو يتعامل، لازم يكون مستحضر معاني معينة. لازم في تكون قضايا محورية مركزية كررها القرآن. لذلك كان من العجيب جداً إنك تجد إن الصحابة مثلاً فاهمين الإسلام الشامل، عندهم فهم شامل للإسلام. حتى لو اختلفوا في جزئيات، يعني لو حصل إن بعض الصحابة يختلف في بعض الفروع الفقهية أو في بعض معاني القرآن وإن كان غالب خلاف الصحابة في القرآن خلاف تنوع مش خلاف تضاد، لكن مع الخلافات اللي ممكن تجدها بين الصحابة، لكن الإسلام، فهم الإسلام الشامل، الفهم العام للإسلام متفقين عليه. في مركزيات استقرت بداخلهم فأصبحت أسس ثوابت. مهم إن الإنسان يتعرف على هذه المركزيات.
الحقيقة إن مجرد بس الإشارة إن في مركزيات وفي ثوابت مش متغيرات، في ثوابت عندنا في الوحي، ده أمر مهم إن إحنا نقرره حتى لو لم نصل ما هي هذه المركزيات. ليه؟ لأن مجرد إن الإنسان يقبل على كتاب الله سبحانه وتعالى إقبالاً بقلبه ويطلب من الله سبحانه وتعالى التوفيق والسداد وهو بيقرأ القرآن هو نفسه هيفاجأ إن القرآن بيعرفه بمواضيع متكررة. القرآن بيكرر الكلام عن مواضيع لكن بصور مختلفة.
طيب يبقى إحنا قلنا إن ربنا سبحانه وتعالى قال إن القرآن من معانيه مثاني، يبقى إذاً مثاني تكرر. إن ربنا سبحانه وتعالى قال: ﴿هُوَ الَّذِي أَنزَلَ عَلَيْكَ الْكِتَابَ مِنْهُ آيَاتٌ مُّحْكَمَاتٌ هُنَّ أُمُّ الْكِتَابِ وَأُخَرُ مُتَشَابِهَاتٌ﴾ [آل عمران: 7]. يبقى عندنا في القرآن في آيات ممكن نسميها أم الكتاب، يعني آيات محكمات. إن إحنا لما بنختلف في معنى آية، تكون هذه الآية من المتشابهات نردها إلى المحكمات.
يعني مثلاً لو في آية، لو افترضنا مثلاً آية ظاهر معنى الآية أو قد يتبادر إلى الذهن من فهم هذه الآية مثلاً إن الإسلام إن التوحيد ليس حقاً مثلاً. تخيل مثلاً. طبعاً التوحيد ده من المحكمات. اليوم الآخر من المحكمات. إن الله أنزل وحياً وأرسل رسل ده من المحكمات. دي محكمات. فأي حد إن الإسلام هو الدين الحق الأوحد الآن، ده من محكمات الدين، من محكمات القرآن. فلما حد يجيب لنا آية من القرآن ويحاول يستدل من هذه الآية أو من ظاهر هذه الآية إن كل الأديان اللي موجودة الآن حق وإن الإنسان يسعى إنه يكون مسلم أو غير مسلم، لا ده كلام باطل. حتى لو حاول يستدل بالكلام ده، ده كلام باطل. إحنا عندنا محكمات، عندنا مركزيات في الوحي ثابتة، مستقرة عندنا. القرآن كررها كثيراً وثناها علينا كثيراً.
يبقى إذاً ليه إحنا مهم إن إحنا نتعلم إيه هي مركزيات الوحي؟ لأن زي ما حصل تغيير للصحابة، بدأ التغيير للصحابة بتغيير نظرتهم للحياة، تغيير نظرتهم للكون، تغيير نظرتهم لبعض، تغيير نظرتهم للعالم الآخر. يعني القرآن لما يكلمهم مثلاً عن عالم الغيب، أنت متخيل الصدمة المعرفية اللي تحصل لصحابي ويسمع عن تفاصيل عالم هو لا يراه.
تخيل لما القرآن يكلمهم مثلاً عن اليوم الآخر وهنتكلم إن ده من المركزيات. إن أنت غالب عمرك، يعني كأن كل عمرك أنت بتقضيه في العالم الآخر ما عدا فترة بسيطة جداً بتقضيها في الدنيا اللي أنت بتشوفها دي. فتخيل لما تكون ده تصورك عن الحياة. تخيل مفهوم الخلود، مفهوم الحياة، مفهوم الموت، مفهوم العبودية، مفهوم الإيمان، مفهوم الكفر، مفهوم الفسق، مفهوم النفاق. لما تتعرض لمثل هذه المفاهيم وأنت قاعد بتتعرض لها بصورة متكررة من خلال القرآن. أنت كل مفاهيمك بتتغير. لذلك كان في درس ممكن برضه يساعدنا في فهم هذه الحلقة، ممكن ترجعوا له إن شاء الله. درس بعنوان اسمه إعادة ضبط. إزاي القرآن بيعيد ضبط تصوراتنا عن الحياة؟ كل الحياة بيعيد القرآن ضبط تصوراتنا عنها.
يبقى إذاً مركزيات الوحي مهمة لأنها اللي غيرت الصحابة. هي اللي تكررت في القرآن كثيراً. وأن الله سبحانه وتعالى مستحيل يخبرنا بأشياء وهذه الأشياء تتكرر في القرآن إلا وهذه الأشياء تكون مهمة. يعني مثلاً لما نأخذ أمر من الأمور التعبدية مثلاً ونجد إن الصلاة تكررت كثيراً في القرآن. يبقى إذاً الأمر بالصلاة ده أمر مهم. لما نجد إن قضية التوحيد تكررت كثيراً في القرآن. بل إن النبي صلى الله عليه وسلم لما يخبرنا إن في سورة، سورة الإخلاص تعدل ثثلث القرآن، وإن السورة دي بتتكلم مجملاً عن التوحيد، يبقى إذاً قضية إخلاص العبادة لله وإن الإنسان يصمد بقلبه إلى الله سبحانه وتعالى، ده معنى ضخم جداً في القرآن. يبقى إذاً في معاني محورية.
يبقى ليه مركزيات الوحي مهمة؟ لأنها اللي تغير بها الصحابة. لأن دي أمور تكررت في القرآن والله سبحانه وتعالى حكيم. وطالما الأمور دي تكررت في القرآن يبقى لحكمة معينة. ثالثاً إن أحياناً الإنسان لما بينشغل بالفروع قبل الأصول بيطبق الفروع غلط. وده أحياناً بنجد إن إنسان بيضيع أمور عظيمة في الدين ويهتم بأمور، كل الدين مهم، لكن ضيع أمور أقل أهمية.
يعني مثلاً تجد إنسان مفرط في الصلاة. ويتكلم مثلاً في مسألة أخلاقية معينة مركز عليها جداً. وهذه المسألة أخلاقية نعم هي من الدين. لكن حينما نتفرط، حينما نتفرط في الصلاة، العهد الذي بيننا وبينهم الصلاة، فمن تركها فقد كفر. حينما يتعامل الإنسان مع قضايا عظمها الوحي وتعامل معها بنوع يعني لا مبالاة. والعكس إنه يعظم أمور فوق التوحيد مثلاً. يتعامل إن قضية التوحيد قضية هامشية. يعني يقول لك قضية الإيمان والكفر أنتم مكبرين الموضوع ليه؟ يعني الموضوع بسيط. الموضوع بسيط. هو أنت حضرتك ما بتقرأش القرآن ولا إيه؟ اقرأ كده القرآن وشوف قضية الإيمان والكفر. ده من أول لحظة بدأت أنت بتفتح المصحف كده، من أول لحظة إن ربنا سبحانه وتعالى بيخبرنا في سورة البقرة أن الناس انقسموا منهم مؤمن ومنهم كافر ومنهم منافق، وإنهم انقسموا بسبب نزول الوحي، منهم من أقبل عليه ومنهم من أعرض عنه ومنهم من نافق في التعامل معه. يبقى إذاً قضية الإيمان والكفر قضية عظيمة، قضية مركزية، إزاي ما نهتمش بها؟
قضية فهم ثوابت ومركزيات الوحي بتفيدنا في إيه؟ بتفيدنا إن إحنا لما نيجي نبني بناء الإسلام بداخلنا. سواء في الباطن أو في الظاهر. في حاجة اسمها ممكن نسميها مجازاً بناء الإسلام. يعني إيه بناء الإسلام؟ يعني مثلاً واحد الإسلام بتاعه عبارة عن إيه؟ الدين بتاعه عبارة عن إيه؟ الدين بتاعه عبارة عن بعض العقائد، على بعض الأعمال، هو المبنى بتاعه بسيط شوية. في واحد مبنى الإسلام بتاعه ضخم. عقائد ومبادئ وعبادات وأخلاق وتكاليف، أوامر ونواهي، مبنى ضخم.
طيب إيه هي الأسس اللي إحنا محتاجين نبني عليها الإسلام ده؟ لما النبي صلى الله عليه وسلم يقول: «بني الإسلام على خمس». يبقى إذاً في حاجات هي أسس أنت محتاج تحطها الأول عشان تعرف تبني بناء الإسلام ويكون بناء الإسلام بناء صحيح.
يبقى النبي صلى الله عليه وسلم مثلاً لما أرسل معاذ بن جبل إلى اليمن، قال: «إنك تأتي قوماً أهل كتاب». طيب اعمل إيه؟ محتاج تحط أسس الأول. «فليكن أول ما تدعوهم إليه شهادة أن لا إله إلا الله». يبقى قضية التثليث أو قضية عيسى بن الله ده شرك. الأول تدعوهم إلى التوحيد، شهادة أن لا إله إلا الله وأن محمداً رسول الله صلى الله عليه وسلم.
يبقى أنت محتاج تحط أسس في الأول. عشان بعد كده نبني الفروع على هذه الأسس. يبقى مركزيات الوحي بتبني بداخلك أسس تجعل بقية بناء الإسلام بناء سلس. فبالتالي لو الإنسان استقر بداخله هذه المركزيات وهذه الثوابت، حينما يتلقى بقية أوامر الشريعة يتلقاها بسلاسة، يتلقاها بيسر. مش هتجد نوع ممانعة. يعني بتيجي تكلمه في بعض أحكام المعاملات المالية مثلاً، وتقول له إن المعاملة المالية دي حرام. وإن المال ده هذا لا يجوز أن تأكله.
هيقعد نقاشات طويلة لو هو متأصل عنده ثوابت إنه هو عبد. وإن في يوم آخر. ﴿وَإِنَّ الَّذِينَ يَأْكُلُونَ أَمْوَالَ الْيَتَامَى ظُلْمًا إِنَّمَا يَأْكُلُونَ فِي بُطُونِهِمْ نَارًا﴾ [النساء: 10]. وإن المال الحرام ده سماه الله ناراً لأنه سيؤول به يوم القيامة إن لم يتب. أو يتوب الله عز وجل عليه، سيؤول إنه هو يكون ناراً في بطنه والعياذ بالله يوم القيامة. يبقى إذاً محتاج إنه يؤمن بـ إنه هو عبد، وإن في إله بيأمر، وإن في يوم آخر سيحاسب. محتاج يؤمن بهذه القضايا الأول قبل ما هو بكل سلاسة يترك هذا المال.
لذلك الصحابة لما اتحطت عندهم المركزيات وتأسست كثيراً في مكة، لما راحوا المدينة وكانوا من عشاق الخمر، الخمر دي كانت المشروب الرسمي في جزيرة العرب. يعني الخمر دي كانت بتساعدهم على الشجاعة، وكانوا بيستدفئوا بها في الشتاء، وكان المشروب الرسمي بتاع الخمر. يعني كان ما حد يجي له ضيف بيقدم له الخمر.
فتخيل لما فجأة ينادي منادي لرسول الله صلى الله عليه وسلم يسير في طرقات المدينة أن الخمر قد حرمت. فطلحة يقول لأنس: "قم يا أنس". هو كان بيخدم القوم. "اسمع إيه اللي إيه الصوت ده؟ إيه المنادي ده بيقول إيه؟" فقال: "إن منادي رسول الله صلى الله عليه وسلم يقول إن الخمر قد حرمت". فقال له: "أهرقها يا أنس". إذاً بكل بساطة كده؟ يعني يدخل لما عنده من خمر ويرقها وتسير الخمر في طرقات المدينة. إزاي ده حصل؟ إزاي ده؟ لما اتحطت الأسس صح. لذلك أمنا عائشة بتفسر المعنى اللي أنا عايز أقوله في حديث في البخاري بتقول أمنا عائشة رضي الله عنها: أول ما نزل من القرآن المفصل فيه ذكر الجنة والنار. يبقى دي من المركزيات.
يبقى إحنا لما نقول إحنا عايزين نعمل في الدعوة.
وعايزين نبلغ للناس الوحي. من المركزيات اللي لازم نبلغها للناس الجنة والنار. أمنا عائشة بتقول: أول ما نزل من القرآن المفصل فيه ضمن المفصل. ده المفصل ده فيه حاجات كتير، فيه ذكر الجنة والنار. لما الناس تلقوا المفصل تلقياً صحيحاً، حتى إذا ثاب الناس، ناس عادت إلى ربنا سبحانه وتعالى، فنزل: لا تشربوا الخمر، فأهرقوا الخمر، لكن لو كان أول ما نزل: لا تشربوا الخمر، لقالوا: نشرب.
يبقى إذاً الإنسان فايدة كثرة مداولة معنى مركزيات الوحي، وإن الإنسان المعاني دي تستقر بداخله، إنها تخليه عنده نوع من السلاسة في تقبل أوامر الله سبحانه وتعالى. بعد كده لما يأتيه أمر صعب على نفسه، يعني من الآيات الجميلة جداً الواحد بيقرأها، عشان بس أنت لما تيجي مثلاً إيه؟ تنازع نفسك الوقت في إنك أنت أمر من أوامر ربنا ثقيل عليك، أو مثلاً صلاة الفجر في البرد ده.
فلما أجي أقرأ قول الله سبحانه وتعالى سيدنا إبراهيم وهو بيقول: ﴿يَا بُنَيَّ إِنِّي أَرَى فِي الْمَنَامِ أَنِّي أَذْبَحُكَ فَانْظُرْ مَاذَا تَرَى * قَالَ يَا أَبَتِ افْفَعَلْ مَا تُؤْمَرُ سَتَجِدُنِي إِنْ شَاءَ اللَّهُ مِنَ الصَّابِرِينَ﴾ [الصافات: 102]. سيدنا إبراهيم شاف منام، طبعاً هي رؤيا الأنبياء حق، لكن كان ممكن سيدنا جبريل ينزل له، كان ممكن سيدنا جبريل ينزل في مجموعة من الملائكة ويقولوا لسيدنا إبراهيم الموضوع خطير وموضوع مهم ومحتاج تهيئة والموضوع، وخذ الموضوع بالراحة ويصبروه. لا، هو الموضوع مجرد إنه رأى رؤيا من الله سبحانه وتعالى.
في إيه؟ ده الأمر جاء له إزاي؟ الطريقة، إيه هو الأمر؟ أن يذبح أحب الناس إليه، ابنه الذي طالما انتظره وفي مرحلة بلغ معه السعي، ويقوم إبراهيم بكل سلاسة لينفذ أمر الله سبحانه وتعالى: ﴿فَلَمَّا أَسْلَمَا وَتَلَّهُ لِلْجَبِينِ﴾ [الصافات: 103]. الاثنين، شوف ألف التثنية دي، أي أسلم إبراهيم إلى أمر الله وأسلم إسماعيل إلى أمر الله عليهما السلام. لما نفذ أمره: ﴿وَنَادَيْنَاهُ أَنْ يَا إِبْرَاهِيمُ﴾ [الصافات: 104]. شوف سلاسة إبراهيم عليه السلام في الاستجابة، وشوف إحنا الممانعة اللي عندنا لاستجابة أوامر الله سبحانه وتعالى.
يبقى إذاً مركزيات الوحي بتساعدنا إن إحنا نتغير، بتساعدنا يبقى في سلاسة في تلقي أوامر الله سبحانه وتعالى، بتساعدنا إن بناء الإسلام يكون بناء متكامل. بناء يعني للأسف إحنا دلوقتي بنجد مع انتشار قضية العلمانية ومسألة العلمانية دي بتحتاج شرح طويل، لكن يعني فيها نوع من الخلاصة كده إن أصبح الدين بيحيد في قضايا معينة، والدين ممكن يستجلب في قضايا معينة، يعني بعض القضايا الأخلاقية مع بعض القضايا التعبدية، ويتم تحييد الدين في مكان زي المسجد أو زمان معين زي مواسم العبادات، لكن الدين يتغلغل في كل نواحي الحياة، هذا العلمانية بترفضه.
كتير من المجتمعات الإسلامية لما فرضت عليها العلمانية قسراً، بعض المجتمعات تشرب ده. يعني بعض أفراد المجتمعات الإسلامية تشرب العلمانية، فبقى هو ممكن في حياته بيعمل فعل من التعبد من العبادات، وفي نفس الوقت عنده أفكار بتتضارب مع أصول في الدين. يعني عادي ممكن واحد يقول لك إحنا ننكر السنة، إيه اللي محتاجينه في السنة يعني؟ أهم حاجة القرآن. هو مش فاهم قيمة السنة، أو إنه هو مثلاً يبدأ عنده قضايا شبهات يقول لك: هو ليه موضوع إن الإسلام هو الدين الحق الأوحد؟ طب ما نقول إن كل الأديان جميلة وأهم حاجة إن إحنا نبقى كويسين وما نوسخش الطرقات، ونقول شوية حاجات كده ظريفة تبقى هي دي اللي تجمعنا ونعمل دين جديد كده، وده بالفعل يعني بيتكلموا فيه، نسميه دين الإنسانية، ومش لازم بقى الموضوع إن الأديان تفرق ونقول إن الإسلام حق ولا باطل ونرد.
هو ده ممكن في ناس تتبنى ده، أنت تخيل ناس مسلمين، ممكن في ناس مسلمين تتبنى ده؟ إن كتير من الإحصائيات أحياناً اتعملت إن ممكن يعني يأخذوا آراء بعض المسلمين في بعض الدول الإسلامية: إيه رأيك في مسألة تطبيق الشريعة؟ هل أنت شايف إن الشريعة ممكن صالحة للتطبيق؟ ممكن في ناس بترفض، هو مش قادر يفهم يعني إيه إسلام؟ يعني إيه كمال الاستسلام لله؟ يعني إيه شريعة؟ دي من المركزيات، من الأسس، مش قادر يفهم ده. فإذاً أحياناً بيكون بناء الإسلام فيه نوع من التشويه حصل، حصل. طبعاً هو حصل بقصد ممن ادعوا قضية الاستعمار، وبثوا الأفكار بتاعتهم. الاستعمار دلوقتي بقى أصبح فكرياً وليس عسكرياً فقط، مع بقاء الاستعمار العسكري زي ما إحنا شايفينه في كتير من الدول.
يبقى إذاً الشاهد إن بناء الإسلام أحياناً بيكون مشوه، بل الآن للأسف أصبح كثيراً. إحنا دلوقتي بنتلقى الدين منين؟ يعني دلوقتي عموم الشباب، يعني سواء الشباب أو الفتيات بيتلقوا الدين منين؟ يعني هو عقلية الإسلام هيفكر بها إزاي؟ إزاي يصبح مسلماً حقاً؟ يعني إزاي الصحابي لما بكل بساطة كده انتقل من حضارة الإسلام اللي كانت بتبنى في المدينة، ولم تكن بنفس المستوى المادي المادي اللي عند فارس والروم، ويخرج واحد من الصحابة ويروح لحضارة أخرى زي فارس والروم يدعوهم إلى الإسلام؟ وأول لما يوصل ويشوف القصور، ويشوف الفرش، ويشوف الزينة اللي موجودة، تخيل إزاي ما يحصلوش حالة الانبهار؟ وإزاي يمشي بالربع بتاعه على الأسرة كده؟ بل حتى يقطعها ويقول له كلمة تخلد كشعار من شعارات الإسلام الآن في انتشار الإسلام: نحن قوم ابتعثنا الله لنخرج العباد من عبادة العباد إلى عبادة رب العباد، ومن ضيق الدنيا إلى سعة الدنيا والآخرة.
أنت متخيل المعنى العام اللي قدر يصيغه بكلمتين، بالرغم ممكن يكون النبي صلى الله عليه وسلم ما حفظوش الكلمتين دول ولا حاجة، هو فهمها، هو فهم يعني إيه مسلم، هو فهم إيه دوره، هو فهم ما معنى العبودية، هو فهم دوره تجاه نشر الإسلام، هو فهم ده، فبالتالي لما قابل حضارة أخرى قدر يتكلم عن الإسلام بعزة، قدر إنه ما يفقدش هويته كمسلم. لكن إحنا للأسف مع أي التقاء بحضارة أخرى غير الإسلام، إحنا بنفقد هويتنا، حتى لو الإسلام بيمر بكبوة، حتى لو الإسلام بيمر بأزمة، ودي حقيقة للأسف، الإسلام بيمر بأزمة، بيمر بكبوة، لكنه لن يموت أبداً، فتجد ناس بتتخلى عن الإسلام، وبيظهر هنا قضية ممكن نسميها سلطة الثقافة الغالبة، اللي تكلم عنها إبراهيم السكران في كتابه سلطة الثقافة الغالبة.
يبقى إذاً مركزية الوحي بتساعدنا إن إحنا نفرق ما بين، ركزوا معايا في النقطة دي، إن إحنا نفرق ما بين الإسلام، وأحياناً أسلمت بعض الأفكار التي هي أصلاً غير إسلامية، يبقى إحنا محتاجين نفرق ما بين الإسلام وبين أسلمت بعض الأفكار التي هي أصلاً في الأساس ليست أفكار إسلامية، هي بتضاد الشريعة. طبيعة الإسلام، أنت عشان تتخيل ما هو الإسلام وإيه معنى العبودية والألوهية في الإسلام، توحيد الربوبية، توحيد الألوهية، وإزاي تفهم مفهوم اليوم الآخر والشريعة، كل ده أصوله ذكرت في الوحي، تكرار ده، مرورك على القرآن بصورة متكررة بيجعل دي أسس عندك، فلما تيجي فكرة مضادة بتخالف أصل من أصول الشريعة، أنت بترفضها تلقائياً.
يعني ربنا سبحانه وتعالى بيقول إيه؟ في سورة الأنعام: ﴿كَذَلِكَ نُفَصِّلُ الْآيَاتِ وَلِتَسْتَبِينَ سَبِيلُ الْمُجْرِمِينَ﴾ [الأنعام: 55]. لما ربنا فصل الآيات في سورة الأنعام، قال بعدها: ﴿وَلِتَسْتَبِينَ سَبِيلُ الْمُجْرِمِينَ﴾، إحنا قراءة حفص بتاعتةنا مرفوعة: سبيلُ المجرمين. في قراءة: ولتستبين أنت يا محمد صلى الله عليه وسلم، الفاعل هنا محمد صلى الله عليه وسلم، سبيلَ المجرمين، أي لتتبين أنت، أي فصل الله لنا الآيات في القرآن لنتبين نحن ما هو سبيل المجرمين من سبيل أهل الإيمان. القراءة بتاعتنا بتاعة حفص: ﴿وَلِتَسْتَبِينَ سَبِيلُ الْمُجْرِمِينَ﴾، أي إذا فصلت الآيات ووضحت للناس، استبانت وظهرت طرق المشركين للناس وطرق أهل الضلال أصبحت واضحة، بمعنى أوضح.
وبتوضح المعنى ده بصورة تفصيلية في درس ماذا لو غاب القرآن، اللي عايز يرجع له، ماذا لو غاب القرآن؟ المعنى ببساطة إن لو إحنا شرحنا للناس الوحي وعرضنا للناس لنور القرآن بصورة مفصلة، موضحة، وبيّنا لهم هذه الأسس التي تعرض لها القرآن كثيراً، الناس بكل بساطة حينما يعرض عليها فكرة ضالة تصادم أصل من أصول الدين، الناس هترفضها ببساطة. لكن الآن ممكن يعرض فكرة على كثير من المسلمين يتقال لهم الإسلام مش هو الدين الحق الأوحد، بلاش تدعوا احتكار الحقيقة، ممكن يكون الإسلام صح وغلط، هناك أديان أخرى قد تكون أديان حقيقية وأديان ليست باطلة، الآن. فأنت تستغرب إن في ناس ممكن تقبل لهذا الهراء، هذا العبث.
إزاي و﴿مَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ﴾ [آل عمران: 85]؟ إزاي ده الآيات مركزية واضحة وتكررت كثيراً؟ طب ولما هو أي دين تاني ممكن يقبل؟ ليه؟ يعني عشرات النداءات نزلت في القرآن لكل الناس: يا أيها الناس، دعوة للإسلام؛ يا أهل الكتاب، نداءات كثيرة لأهل الكتاب إنهم بيدعوا إلى الإسلام زي ما في سورة المائدة. طب ولما هو إن ممكن أي حد يختار اللي هو عايزه، طب وليه الوحي نزل على محمد صلى الله عليه وسلم؟ وليه محمد صلى الله عليه وسلم النبي صلى الله عليه وسلم سعى وجاهد في الأرض لنشر الدين؟ وإزاي الصحابة قبورهم توزعت في أطراف الأرض عشان ينشروا الإسلام؟ فهي أفكار أنت بتتعجب منها، إزاي أصلاً مسلم يقبل ده؟ يبقى إذاً في الأسس خوّية، المركزيات مش محطوطة صح.
يبقى بنتكلم على أهمية المركزيات لفهم الإسلام الشمولي، وعشان نفهم الإسلام الحق بعيداً عن الأسلمة المشوهة. طيب، عايزين نبدأ ناخد نموذج تطبيقي بقى للي أنت بتقوله ده، أنت بتقول المركزيات والكلام الكبير اللي أنت عمال تقوله ده، أنت وصل لنا اللي أنت عايز تقوله. طيب، إحنا هنتكلم بطريقتين، الطريقة الأولى: إما هنحاول نشرح فكرة المركزيات من خلال سورة الفاتحة، أو هنتكلم إن إحنا نحاول نشرح فكرة المركزيات من خلال استقراء بعض النصوص بحيث إن إحنا نوصل لثلاث مركزيات بيتفرع عنها بقية كل حاجة.
أنا كنت محتار بصراحة أبدأ بإيه، لكن خلينا الأول أشرح فكرة قبل ما أبدا سواء بسورة الفاتحة أو الفكرة التانية، خلينا أشرح لكم فكرة ممكن تبقى صعبة شوية، لكن أقولها بصورة مبسطة وأحيل على مصادر اللي عايز يرجع لها. على مدار التاريخ هناك أفكار كثيرة، وأغلبها كانت أفكار ضالة، بتحاول يعني تجاوب على أسئلة بداخل النفس، يعني النفس دائماً بتسأل عن المجهول، الشيء الغائب عنها، يعني النفس بطبيعتها بتسأل ماذا بعد الموت؟ هل هناك إله؟ هل هناك في قوة أكبر مننا؟ اللي إحنا ممكن بنسميها الفلسفات الكلية التي ممكن بتسير حياة الناس.
يعني إيه؟ يعني مثلاً تجد إن ناس ممكن تتبنى حاجة اسمها الليبرالية، ممكن ناس تتبنى الاشتراكية، دي كلها ممكن نسميها الحداثة أو غيرها، يعني أياً كان نوع المسميات، مش عايز أدخل في التفاصيل دي، دي فلسفات، مش بس مجرد بتعبيرنا اللي بيحب الواحد يقول كلام مش مفهوم يقول له إيه: أنت بتتفلسف. لا، دي مش كلام مش مفهوم، دي فلسفات، دي رؤى ليها اختيارات حياتية. يعني ممكن إنسان بيترك زي الإلحاد مثلاً، ده فلسفة لنظرة للحياة، ده واحد بينظر للحياة إن ما فيش إله، إن ما فيش يوم آخر، وبالتالي يبقى لما بيحط أسس معينة، دي أسس مركزية عند الملحد: إن ما فيش إله، ما فيش بعث، وبالتالي من حقه يعمل اللي هو عايزه، وبالتالي ما فيش حق مطلق، وبالتالي يبقى كل التفريعات دي نتيجة الأسس المركزية اللي حطها.
كل فلسفة ليها مركزيات بترجع لها. يبقى تاني كده ركزوا معايا، أي فلسفة في الدنيا، أي تصور، أي رؤية حد بيطرحها، غالباً بتعود إلى مركزية معينة. يعني لما نقول مثلاً الليبرالية، الليبرالية بتعود إلى مركزيات معينة؛ الاشتراكية، الإلحاد، أياً كان الصورة الفلسفة اللي بتطرح علينا، اللي إحنا بنسمعها ديت العلمانية، كل دي بتعود إلى مركزيات، يعني ممكن تبقى الفكرة كبيرة أوي. يعني ممكن تيجي تقرأ كتاب ضخم عن العلمانية، أو كتب سلسلة ضخمة عن الليبرالية، إحنا بنقول إيه؟ عايزين الخلاصة.
يعني إيه الخلاصة؟ يعني أصول الأفكار دي بتعود إلى إيه؟ يعني الفكرة دي بتراعي إيه؟ لقوا بعض اللي حاول يجمع في الفلسفات، لقوا إن غالباً أي فكرة بتعود لحاجة من ثلاثة على مدار التاريخ، أي فكرة لما قعدوا يحللوها ويجيبوا الفكرة المجردة بتاعتها يعني، آخر الفكرة دي، الفكرة دي كانت بتراعي إيه؟ أهم حاجة في الفكرة دي كانت بتراعيها؟ لقوا غالباً أي فكرة على مدار البشرية بتراعي حاجة من ثلاثة. إما يكون الفكرة المركزية في الرؤية أو في الفلسفة أو في التصور ده، الفكرة المركزية هي الله، أو الإنسان، أو المادة.
خلينا ناخد نموذج. المسيحية مثلاً على إن هي بتحرفها، لكن حتى خلينا نتكلم قبل الإسلام، إن لما المسيحية بتقول إن المركز، يعني الحاجة وكل الأديان مش المسيحية بس، الأديان بتقول إن المركز هو إن إحنا حق الله، وإن الله سبحانه وتعالى هو الذي خلق، والله سبحانه وتعالى هو الذي رزق، والله سبحانه وتعالى هو الذي يأمر وينهى. ففي حصل تحريف في الأديان، فجاء الإسلام وهيمن على كل هذه الأديان، يبقى الأديان لما بتتكلم بنرجع إن الفكرة المحورية بتاعتها الله.
بعد كده نشأت أفكار لا لا لا، مش مهم إن إحنا نقول ماذا يريد الله وحقوق ربنا، لأ، أهم حاجة الإنسان، أهم حاجة الإنسان ده إيه اللي يبسطه؟ وإيه اللي يسعده؟ وإيه هي حقوق الإنسان؟ حتى لو، وإحنا بنتكلم على احتياجات الإنسان ده هم بيقولوا كده، حتى لو حاجات حرام مش مشكلة، يعني مش مهم قضية حلال وحرام، دي مش معنى مركزي عندهم، قضية الله ماذا يريد الله؟
ما الذي يحبه الله؟ لذلك نشأ مصطلح حقوق الإنسان؛ حقوق ربنا ما عادش حد بيتكلم عنها، يعني ما فيش هيئات تدافع عن حقوق ربنا.
اللي هي المفروض إن دي الشريعة اللي ما بتطبق. لأ، هو دلوقتي بقت المنظمات وهي بتتكلم عن حقوق الإيه؟ الإنسان؛ يقولك الإنسان كإنسان مش مهم مؤمن وكافر، التقسيمة أصلاً مؤمن وكافر دي مش موجودة، لغى التقسيمات اللي مبنية على الدين، ليه؟ لأن المركز عنده فكرته هو الإنسان، أصبح إن أهم حاجة نتكلم عنها الإنسان.
بعد كده ممكن تيجي فكرة تانية بتتكلم، لا لا لا، أهم حاجة هي المادة، أهم حاجة الفلوس، أهم حاجة اللي يجيب قرش، ده المركز. الفكرة بقى الرأسمالية؛ أهم حاجة المادة، أصبح الإنسان نفسه سلعة، يعني الإنسان لما تقول له فلان يقولك بكام؟ يعني لما تيجي تكلمه عن إنسان، زمان هو كان بيحترم الإنسان كإنسان، دلوقتي تقول له إنسان يقولك أيوه، الإنسان ده بكام؟ شهاداته، بيجيب كام، يقدر يدخل دخل قد إيه، بيشتغل كام ساعة في الأسبوع؟ أصبح تسليع الإنسان، أصبح الإنسان في حد ذاته كسلعة.
أصبح المركز الآن، وده اللي إحنا الواقع اللي إحنا عايشينه... البشرية مرت بالعصور كده؛ كانت فترة الفكرة المركزية الله، بعد كده بقى الإنسان، بعد كده دلوقتي الفكرة المركزية الغالبة دلوقتي على العالم، سواء الغربي أو الشرقي، العالم دلوقتي أغلب ما يسيره قضية المادة، ونشأت فكرة الشركات العابرة للقارات، وإن بقى أغلب اللي بيسيطر في التحركات دلوقتي هو تحصيل المال، ده أغلب شيء بيسيطر.
دي الفلسفات، سواء ضالة أو سواء حقيقية، أو حتى اللي تبنت إن المركزية الله، تصورات مشوهة عن ربنا. تعالوا بقى نروح للإسلام، إحنا كده قلنا الناس بتفكر إزاي، عموم الناس، الأفكار الضالة بتفكر إزاي. الإسلام، إيه المركزيات اللي عنده؟ يعني إذا كان ده شايف المركزية في المادة وأنت اعترضت، أو ده شايف المركزية في الإنسان وأنت اعترضت، أمال إيه هي المركزيات اللي عندنا إن القرآن تكلم عنها كثيراً؟ موقع الإنسان، إن إحنا بشر، موقع الإنسان بيستفاد من إيه؟ يعني قيمة الإنسان.
يعني لما ربنا مثلًا عندنا في القرآن: ﴿إِنَّ أَكْرَمَكُمْ عِندَ اللَّهِ أَتْقَاكُمْ﴾ [الحجرات: 13]. آه، تعالوا نشوف بقى كلمة أتقاكم دي، إيه المعنى؟ إيه المعاني المحورية؟ إحنا قلنا بقى هنشرح ده، إن فيه مثلث كده كل الفلسفات بتعود في الآخر لحاجة له؛ الفكرة المركزية: الله، الإنسان، المادة. إحنا نرسم مثلث تاني، هنجد إن من المفاتيح اللي ممكن تقودنا لفهم ده قول الله سبحانه وتعالى: ﴿وَمَا قَدَرُوا اللَّهَ حَقَّ قَدْرِهِ﴾ [الزمر: 67].
لما نجي نشوف الآية دي: وما قدروا الله حق قدره، المعنى ده أنا بحاول أكرره كتير في كتير من الدروس عشان يستقر عندنا. وما قدروا الله حق قدره، نجد إن الآية دي اتكررت في أكتر من سورة: سورة الأنعام، سورة الحج، سورة الزمر، وفي كل موطن كانت بتتكلم في سياق معين؛ مرة في سياق الخالقية، الصفة التي يتفرد بها الله سبحانه وتعالى سورة الحج: ﴿لَن يَخْلُقُوا ذُبَابًا﴾ [الحج: 73].
ومرة مع إنزال الوحي: ﴿وَمَا قَدَرُوا اللَّهَ حَقَّ قَدْرِهِ إِذْ قَالُوا مَا أَنزَلَ اللَّهُ عَلَى بَشَرٍ مِّن شَيْءٍ﴾ [الأنعام: 91]. ومرة مع اليوم الآخر، يوم القيامة: ﴿وَمَا قَدَرُوا اللَّهَ حَقَّ قَدْرِهِ وَالأَرْضُ جَمِيعًا قَبْضَتُهُ يَوْمَ الْقِيَامَةِ﴾ [الزمر: 67]. عايزك بقى تتخيل كده معايا المركزية دي تلاتة كده نعمل مثلث: الله، الوحي والهدى والنور والشفاء، اليوم الآخر.
المثلث ده، ده من أهم المركزيات عند المسلم، ما ينفعش يغيب عنه حاجة منه. في ناس كفرت بالله؛ الملاحدة أنكرت وجود ربنا، وفي ناس أثبتت وجود ربنا وأنكرت البعث، زي المشركين، أي حد ينكر البعث غالباً ينكر الوحي غالباً، وفي ناس آمنت بالله وآمنت باليوم الآخر وحرفت في الوحي، زي اليهود والنصارى.
يبقى إحنا عندنا تاني المثلث بتاع المركزيات بتاعنا المسلمين: الله، نؤمن بالله سبحانه وتعالى. ما هي أسماء الله؟ ما هي صفاته؟ ما هي أفعال الله سبحانه وتعالى؟ نتعرف عليها منين؟ من الوحي. الفكرة المركزية ببساطة اللي عندنا: أن الله سبحانه وتعالى خلق هذا الكون، وأن الله سبحانه وتعالى لم يترك الخلق سدى، ولكن هؤلاء الخلق سيبعثون يوم القيامة يحاسبون على كل أفعالهم. ما هو المنهج الذي سيحاسبون عليه؟ لأجل ذلك أنزل إليهم الوحي.
ده ببساطة كده فكرة مركزية الوحي، يعني اللي أنا قلته السطرين دول، ده الملخص اللي القرآن بيكرره كتير، اللي هو: ﴿وَمَا خَلَقْتُ الْجِنَّ وَالإِنسَ إِلاَّ لِيَعْبُدُونِ﴾ [الذاريات: 56]. الله خلقنا، وما خلقت الجن والإنس إلا لنعبده على مراده ثم نحاسب على ذلك يوم القيامة. يبقى عندنا المركزية، ركزوا معايا، الله سبحانه وتعالى، لكن إحنا بنتعرف عن رب على ربنا مش بمزاجنا، مش بنقعد ندخل بقى في تفاصيل وخناقات كده في علم الكلام وندخل ونقعد نشغل دماغنا، لا لا لا، إحنا بنتعرف على الله سبحانه وتعالى من خلال: قال الله، قال رسول الله صلى الله عليه وسلم.
لأن فيه عندنا عالم اسمه عالم الغيب، ده ما بنعرفش عنه حاجة غير إن ربنا اللي يخبرنا به أو النبي صلى الله عليه وسلم اللي يخبرنا به؛ عالم الغيب. يعني فيه عندنا عالم ضخم اسمه عالم الشهادة، تخيل كل المخلوقات التي تراها والأحداث والأزمنة التي تعيش فيها، كل ده اسمه عالم الشهادة، لكن فيه عالم آخر موازي، عالم مخلوقات، عالم آخر، الملائكة والجن وأوامر الله سبحانه وتعالى وتقدير، عالم آخر اسمه عالم الغيب، ده اللي بيخبرنا به ربنا سبحانه وتعالى.
ركز معايا تاني عشان ما نتوهش؛ المثلث كده: الله، الهدى، الله سبحانه وتعالى خلقنا، ثم يبعثنا ليحاسبنا، على ماذا؟ على الهدى الذي أنزله الله سبحانه وتعالى. الاختلافات اللي حصلت في البشرية نتيجة اختلاف في حاجة من التلاتة أو في التلاتة أو في اتنين زي ما أنا ذكرت؛ في ناس أنكرت وجود ربنا، في ناس تصوراتها عن ربنا تصورات مشوهة أصلاً، يعني في ناس فاهمها ورؤيتها وبيتكلم عن ربنا وهو مش فاهم، هو بيتعامل مع ربنا -تعالى الله عما يقولون- زي ما يتعامل مع البشر، يعني زي ما اليهود قالوا: ﴿يَدُ اللَّهِ مَغْلُولَةٌ﴾ [المائدة: 64].
في ناس بتقعد يعني لما ربنا يأمر بأمر يقعدوا يسألوا: ليه؟ وليه مش؟ ويقعدوا يسألوا ربنا سبحانه وتعالى: ﴿لا يُسْأَلُ عَمَّا يَفْعَلُ وَهُمْ يُسْأَلُونَ﴾ [الأنبياء: 23]. هو مش فاهم يعني إيه ربنا أصلاً. وفي واحد اليوم الآخر مش في حساباته، فبالتالي المركزيات عنده مش منضبطة أصلاً.
لو إحنا حبينا نقول؛ أنت دلوقتي بتقول الله والهدى واليوم الآخر، طب وبقية مواضيع القرآن فين؟ يعني أنت دلوقتي عمال، القرآن مليان قصص، والقرآن مليان أوامر، وفيه نواهي، وفيه أخبار. يعني بقية القرآن فين؟ أنت بتقول إن دي مركزيات اللي إحنا ممكن نحاول نرجع معظم الآيات للأسس دي، فين الكلام ده؟
تعالوا برضه هنرجع للمثلث ده تاني، تعالوا كده نبص على سورة الفاتحة عشان يبقى أنا شرحنا الفكرتين وننطلق من خلالهم. تعالوا نرجع كده، أنا مش عايز أطول عليكم، تعالوا نرجع كده لسورة الفاتحة، ربنا قال إن الفاتحة، النبي صلى الله عليه وسلم أخبرنا إن الفاتحة دي سبع المثاني، ربنا قال: ﴿وَلَقَدْ آتَيْنَاكَ سَبْعًا مِّنَ الْمَثَانِي وَالْقُرْآنَ الْعَظِيمَ﴾ [الحجر: 87].
طبعاً وفيه خلاف في عد السبع آيات؛ هل بسم الله الرحمن الرحيم زي ما عندنا في المصحف الكوفي قراءة حفص هي واحد، والآية الأخرانية هي الآية الطويلة الآية السابعة، ولا العد بيبدأ من الحمد لله رب العالمين؟ بعيدًا عن هذا الخلاف، ده مش موطن ترجيح، لكن خلينا نشوف نعد كده، نقرأ مع بعض سورة الفاتحة، نشوف إيه هي المعاني؟ لأن الفاتحة دي أم الكتاب، دي المعاني المحورية اللي ذكرت بصورة مركزة في أول القرآن، وبقية القرآن بيصب، بيشرح تفاصيل سورة الفاتحة.
يبقى إذًا فيه مركزيات مذكورة في سورة الفاتحة، إيه هي ديت؟ ﴿بِسْمِ اللَّهِ الرَّحْمَٰنِ الرَّحِيمِ * الْحَمْدُ لِلَّهِ رَبِّ الْعَالَمِينَ﴾ [الفاتحة: 1-2]. أول معنى مركزي هام: رب العالمين. نعم، رب العالمين، الثناء على رب العالمين. إذًا من أول لحظة وأول مفهوم مركزي: الكل مربوب، الكل يحتاج إلى رب. كل المخلوقات حتى تربو، حتى تنمو، بحاجة إلى خالق، بحاجة إلى الله. لذلك كلمة الرب؛ هل السيد؟ هل المنعم؟ هل المدبر؟ كل دي معاني تدخل ضمن الرب.
يبقى من أول معنى مركزي بيبدأ به المصحف، بيبدأ به الفاتحة، بيبدأ به القرآن ويتكرر كثيراً: العالمين، كل العوالم، جمع، كل العوالم التي تراها هي بحاجة إلى رب، الله خلقها ويرزقها ويدبر أمرها، لو تركها لسقطت، تفنى، تضيع. لا تكلني إلى نفسي طرفة عين.
أول معنى محوري: وهذا الرب أهل للثناء لذاته ولأسمائه ولصفاته ولأفعاله، الحمد لله مطلقاً يثنى عليه، ده معنى محوري. يعني إنك مش فاهم يعني إنك مربوب، ده أسس من أسس الدين ناقصة، فبالتالي لما تيجي الأوامر والنواهي، مبنى الإسلام يتبنى ناقص، لأن الأسس فيه نوع من الزلزلة والخلخلة فيسقط البناء، عدم مفهوم يعني إيه إن أنا مربوب؟ يعني إيه إن أنا ضعيف؟ يعني إيه إن أنا مخلوق؟ يعني أنا محتاج إلى رب، وأنه سبحانه وتعالى يثنى عليه بكل الأسماء الحسنى والصفات العلى سبحانه وتعالى، الحمد لله خالص له سبحانه وتعالى.
رب العالمين؛ ده معنى مركزي في القرآن، اقرأ سورة الأنعام وسورة الرعد وسورة فاطر، سور استفاضت في الكلام عن الله سبحانه وتعالى لتعرف ما معنى رب العالمين. لما فرعون سمع الكلمة قال: ﴿وَمَا رَبُّ الْعَالَمِينَ﴾ [الششعراء: 23]؟ سيدنا موسى جاوب، أنت محتاج لما تتسأل: ما رب العالمين؟ تجاوب: ﴿رَبُّ السَّمَاوَاتِ وَالأَرْضِ وَمَا بَيْنَهُمَا إِن كُنتُم مُّوقِينَ﴾ [الشعراء: 24]. رب المشارق والمغارب، رب المشرق والمغرب، ربكم ورب آبائكم الأولين، رب كل شيء سبحانه وتعالى، ﴿لا يَضِلُّ رَبِّي وَلا يَنسَى﴾ [طه: 52]. سيدنا موسى بيجاوب لأنه عايش المعنى ده.
يبقى أنت كمربوب محتاج تعيش المعنى ده، ده معنى محوري، ده معنى مركزي. كيف تبني طاعتك؟ كيف تبني طاعتك أنت بدون فهم هذا المعنى؟ إزاي وأنت ساجد تقول: سبحان ربي الأعلى؟ أنت مربوب، تقول: يا رب، أنت ربي، ليس لي رب سواك، أنت سيدي، أنت المنعم علي، أنت المتفضل، أنت الخالق، أنت المدبر، أنت الرازق، أنت الأعلى. وفي الركوع: أنت العظيم، أنا عبد، أعترف وأقر بذلك.
ده معنى محوري، اللي بيفقد المعنى ده، لما بييجي يتلقى الأوامر والنواهي ما بيتلقهاش صح، هو مش فاهم عظمة الله، يعني لما تقرأ: ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82]. شوف، يعني آية عظيمة: إذا أراد شيئاً أن يقول له: كن فيكون. أي شيء مهما تتخيله ربنا يريده يقول له: كن فيكون. زي ما ربنا قال: ﴿هُوَ عَلَيَّ هَيِّنٌ﴾ [مريم: 9]. ببساطة كده؟ آه، ببساطة، هو عليه هين سبحانه وتعالى.
ده معنى عظيم، وأخص صفة من صفات هذا الإله العظيم، من رب العالمين، أخص صفة: الرحمن الرحيم، دي أفردت، يعني الحمد لله رب العالمين دي آية، في آية تانية أفردت لها معنى الرحمة، ده من أعظم المعاني المبثوثة في الكون. أنت لما تشوف الأم وهي رايحة تغطي ابنها في الشتا، أو أولياء الأمور وإحنا في أيام الامتحانات وهم بيستنوا أولادهم قدام لجنة الامتحان، أو الأم اللي تقعد يعني ساعات طويلة ليالي مع ابنها في مستشفى، روح مستشفى الأطفال، روح مستشفى الأورام الأطفال مثلاً.
وشوف قد إيه الأم من غير ما حد بيديها أوامر هي اللي بتعمل ده وهي اللي تسعى ولا تشتكي لأحد، دي، ده معنى الرحمة مبثوث في الكون، كل ده جزء من تسعة وتسعين جزء من رحمة الله سبحانه وتعالى. ده معنى عظيم، ده مركزي، لكن لابد إن أنت يكون أهم وصف عندك تتعامل به مع الناس وصف الرحمة، أهم حاجة، وفي حاجات ربنا اللي هو اللي هيقول لك: ﴿لاَ تَأْخُذْكُم بِهِمَا رَأْفَةٌ﴾ [النور: 2]، لكن الأصل إنك أنت بتتعامل بالرحمة مع الناس، الأصل ده: الرحمن الرحيم سبحانه وتعالى.
ده مركز، ده معنى أساسي في الوحي: أن الله سبحانه وتعالى هو الرحمن، هو الرحيم سبحانه وتعالى.
وبعد كده المعنى المحوري الثالث أو المركزية الثالثة: ﴿مَالِكِ يَوْمِ الدِّينِ﴾ [الفاتحة: 4]. نرجع تاني لفكرة المثلث، إحنا قلنا المثلث بتاعنا المركزيات بتاعتنا: الله، الوحي، الدار الآخرة. أول آيتين اتكلموا عن الله، يعني أول آيتين واحد واتنين لو إحنا تجاوزنا البسملة على الخلاف الطويل المشهور اللي ذكرته، من أول الحمد لله رب العالمين الرحمن الرحيم، الآيتين دول عن ربنا.
الآية الثالثة بدأت انتقال عجيب وربط عجيب بين الكلام عن الله للكلام عن اليوم الآخر. شوف الانتقال والآية اللي هي اللي إحنا بنكررها كثيراً في الفاتحة؛ ما جتش الحمد لله رب العالمين الرحمن الرحيم هناك يوم الدين، في يوم بعث. لا لا لا، هذا اليوم لا يملكه إلا الله، لا يقضي فيه إلا الله، الكل يسكت لا يتكلم فيه أحد، الله سبحانه وتعالى هو الذي يقضي بين العباد، ﴿لِمَنِ الْمُلْكُ الْيَوْمَ لِلَّهِ الْوَاحِدِ الْقَهَّارِ﴾ [غافر: 16].
مالك يوم الدين ومالك يوم الدين؛ يبقى شوف الانتقال كده، عايزك تتخيل تاني رسمة المثلث، الانتقال بالكلام عن الله لأن المؤمن من المركزيات الأساسية اللي عايشة أن هناك يوم يبعث فيه الناس، لازم في يوم أنا هناك يوماً يبعث فيه الناس، اليوم الآخر.
والعجيب هنا إن ربنا اصطفى واختار أن يكون الاسم اللي يتقال في الفاتحة يوم القيامة اسمه يوم الدين، يوم الدين بيحمل معنى الخضوع ومعنى الحساب، معنى يوم الدين بيحمل معنى يوم يخضع فيه الجميع لله، ويوم تعليك حسابات هتتحاسب، يعني مش عبث، مش إحنا كده ﴿أَفَحَسِبْتُمْ أَنَّمَا خَلَقْنَاكُمْ عَبَثًا وَأَنَّكُمْ إِلَيْنَا لاَ تُرْجَعُونَ﴾ [المؤمنون: 115]، ﴿أَيَحْسَبُ الإِنسَانُ أَن يُتْرَكَ سُدًى﴾ [القيامة: 36].
لا أبدا، كل فعل بيحدث. إياك تفتكر إن الأحداث اللي بتحصل حواليك دي كلها كده هتعدي. يقولك فلان عمل المصيبة دي وعدت، وفلان اتقتل ومحدش خد باله، وفلان اتسرق ومحدش وقف جنبه، وفلان اتظلم ومحدش حس بيها. أبدا، دي دار ابتلاء، في دار جزاء، في هناك دار الجزاء. كل ده مكتوب، كل ده إيه؟ حساب خمسين ألف سنة.
لذلك ربنا اختار إن الاسم يكون اسمه يوم إيه؟ يوم الدين. الكل يخضع والكل يحاسب، حتى الأنبياء يقولون: يا رب، سلم سلم، تتخيل؟ لذلك أنت بتدعي: يا رب، أدخلنا الجنة بغير سابقة حساب ولا عذاب. لأن زي ما النبي صلى الله عليه وسلم قال: «من نوقش الحساب عבד».
فإذا شوف النقلة المركزية الثانية، يوم الدين ربنا سماه الدين، خضوع، المحاسبة، المجازاة، والذي يملكه هو الله فقط. يبقى أنا لو أنا خايف من يوم الدين، يعني مثلا عندي امتحان وفي حد هو اللي بيملك وضع الامتحان، هو اللي بيحاسب، هو اللي بيضع الامتحان، هو اللي بيصحح، أنا بكون هدفي إن أنا أرضيه، اللي هيقول عليه في المنهج هأذاكره، هأسمع كلامه، لو قال في امتحان شفوي هأروح أحضر، أحاول اللي هيقوله لي، ليه؟ لأن هو اللي بيملك وضع الدرجات. هو بما إن إحنا داخلين في امتحانات التيرم أو أنت بتشوف المدرس أو دكتور المادة، وأنت بتشوف إيه الطلبات، إيه كيفية الامتحان، بتسأل. ولله المثل الأعلى.
في يوم الدين الذي يملكه هو الله وحده سبحانه وتعالى. من رحمة ربنا عشان ما تبقاش رجل فيه شركاء متشاكسون، تكون رجل سلما لرجل: ﴿هَلْ يَسْتَوِيَانِ مَثَلًا﴾، عشان لما تحب تنجو يوم القيامة، أنت لا تفكر إلا في رضا الله بس. ده مركز، ده من مركزيات الوحي، أنك ستبعث، وأن كل الناس سيحاسبون، سيبعثون يوم القيامة. ده مركز، ده مركز عندك، فبالتالي لما تحدث أحداث غريبة مش فاهمها، وتشعر أن الظلم انتشر، أنت كمؤمن أنت فاهم إن لسه يا جماعة الموضوع ما انتهى.
لما تنظر لآخر مشهد، آخر مشهد في قصة أصحاب الأخدود في صحيح مسلم، اللي النبي صلى الله عليه وسلم أخبرنا به، آخر مشهد إيه في القصة؟ آخر مشهد، الملك الظالم بعدما قتل الغلام -يا أخي، أنت بتقرأ الحديث وبتعيط، الغلام مات، الذي دل الناس على الله مات، وهو الذي دل الملك الظالم على طريقة قتله ليؤمن الناس، ضحى بنفسه- وبعد ما الناس قالوا: آمنا برب الغلام، كل الناس آمنت، إيه اللي حصل في الآخر؟ إيه آخر مشهد؟ إيه اللي حصل؟
آخر مشهد كان ممكن أنت دائما اللي بيتعجل العاقبة في الدنيا متخيل إيه؟ إن الناس دي موتت الملك الظالم. تخيل إن الملك الظالم هذا المجرم حفر الأخدود في الأرض، وأوقد فيها النار، وألقى الناس في النيران. آخر مشهد بيقصه علينا النبي صلى الله عليه وسلم في الحديث: أم تمسك طفلها الرضيع، خايفة تنط في النار عشان طفلها الرضيع، فكانت تراود نفسها، هل تنطق بالكفر وتعود ولا ترمي نفسها؟ فأنطق الله الغلام، وقال الغلام الرضيع: يا أمه، اصبري فإنك على الحق. ده آخر مشهد، وتلقى في النار.
ده آخر مشهد في الدنيا، النبي صلى الله عليه وسلم يخاطب أهل الإيمان، يعلم أننا على يقين أن كل هؤلاء سيحاسبون مرة أخرى. ﴿إِنَّ الَّذِينَ أَجْرَمُوا كَانُوا مِنَ الَّذِينَ آمَنُوا يَضْحَكُونَ * وَإِذَا مَرُّوا بِهِمْ يَتَغَامَزُونَ * وَإِذَا انقَلَبُوا إِلَى أَهْلِهِمُ انقَلَبُوا فَكِهِينَ﴾ يعودوا يتريقوا عليهم، ﴿وَإِذَا رَأَوْهُمْ﴾ أهل الإجرام والكفر إذا رأوا أهل الإيمان قالوا: ﴿إِنَّ هَٰؤُلَاءِ لَضَالُّونَ * وَمَا أُرْسِلُوا عَلَيْهِمْ حَافِظِينَ﴾ ده إيه؟ كل ده فين؟ في الدنيا.
فاليوم، يوم القيامة، فاليوم إيه اللي بيحصل بقى؟ تنعكس الآية: ﴿فَالْيَوْمَ الَّذِينَ آمَنُوا مِنَ الْكُفَّارِ يَضْحَكُونَ * عَلَى الْأَرَائِكِ يَنظُرُونَ * هَلْ ثُوِّبَ الْكُفَّارُ مَا كَانُوا يَفْعَلُونَ﴾ [المطففين: 34-36]. شوف بدأت: ﴿إِنَّ الَّذِينَ أَجْرَمُوا كَانُوا مِنَ الَّذِينَ آمَنُوا يَضْحَكُونَ﴾ اتعكست يوم القيامة: ﴿فَالْيَوْمَ الَّذِينَ آمَنُوا مِنَ الْكُفَّارِ يَضْحَكُونَ﴾. شوف، لأن إحنا بنؤمن باليوم الآخر، فبالتالي عايزك تتخيل المشهد ده.
مثال بضربه كتير عشان تتخيل قيمة الآخرة، إن ده مركز من المركزيات عندنا: تخيل لو في خط طويل مسافة طويلة جدا، نفترض إنها ألف كيلو متر، مسافة طويلة جدا، وأول اثنين متر في حدث معين بيحصل، تخيل واحد مشغول بالأحداث اللي بتحصل في أول اثنين متر وسايب بقية الألف كيلو متر إلا اثنين متر وأحداث ضخمة، ويقولك شوف اللي بيحصل؟ هي دي الدنيا بالنسبة للآخرة! نفس موضع إصبعه في اليم بحر محيط. تخيل كده أنت رحت بحر عظيم الأرجاء واسع، حطيت إيدك في البحر، طلعت إيدك كده وقعد الإصبعك فيه حوالي بقايا نقاط، فقال النبي صلى الله عليه وسلم: «ما الدنيا في الآخرة إلا كما يجعل أحدكم إصبعه في اليم، فلينظر بما يرجع». هي دي الدنيا يا جماعة، شوية النقط، شوية النقط دي هي دي الدنيا بالنسبة للآخرة، بالنسبة للبحر يعني. اعمل بقى النسبة، مقارنة؟ ما فيش مقارنة أصلا، وده حاجة تقريبية، الخلود أنت متخيل؟
يبقى اليوم الآخر ده من المركزيات: ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَومِ الدِّينِ﴾ [الفاتحة: 2-4].
طيب، أنت قلت دلوقتي الله الدار الآخرة، قضية الوحي فين؟ ﴿إِيَّاكَ نَعْبُدُ وَإِيَّاكَ نَسْتَعِينُ﴾ [الفاتحة: 5]. هنا ظهر الإنسان من بين العالمين، الحمد لله رب العالمين، هنا ظهر الإنسان أهم مخلوق من المخلوقات الآن الذي يقدم العبودية، ظهر الإنسان ﴿إِيَّاكَ نَعْبُدُ﴾، ظهر المؤمن في المشهد في سورة الفاتحة، وظهر وهو بيقوه بيقول لربنا، بيحدد الوجهة ويخاطب الله سبحانه وتعالى، ويقول يا رب، أنا أعبدك لكن أعبدك أنت وحدك يا رب، فقدم ﴿إِيَّاكَ نَعْبُدُ﴾، أي أفردك بالعبادة.
لكن يا رب، أنا لا أستطيع أن أعبدك، أطلب منك الاستعانة: ﴿وَإِيَّاكَ نَسْتَعِينُ﴾. ويا رب، حتى أقوم بهذه العبادة، أحتاج إلى منهج، أحتاج إلى طريق، أحتاج إلى هدى، أحتاج إلى نور، فأقول يا رب: ﴿اهْدِنَا الصِّرَاطَ الْمُسْتَقِيمَ﴾ [الفاتحة: 6]. هنا يأتي الوحي. لذلك لما قال: ﴿اهْدِنَا الصِّرَاطَ الْمُسْتَقِيمَ﴾ في الفاتحة، قال الله في أول سورة البقرة: ﴿ذَلِكَ الْكِتَابُ لَا رَيْبَ ۛ فِيهِ ۛ هُدًى لِّلْمُتَّقِينَ﴾ [البقرة: 2]. لو قلنا إن لا ريب فيه جملة معترضة على خلاف بين المعربين، ذلك الكتاب هدى للمتقين، أو ذلك الكتاب لا ريب فيه هدى للمتقين، أو ذلك الكتاب لا ريب فيه، هدى للمتقين، أيا كان حسب الوقف الابتدائي والإعرابات المختلفة، لكن هذا الكتاب هدى، أنت طلبت الهدى، هذا هو الهدى.
اللي هو الركن الثالث من أركان المثلث، الهدى، الوحي، اللي على أساس الهدى تكون العبادة، ويكون الإيمان، وعكسه يكون الكفر، ويكون الفسق، ويكون النفاق. الناس بتنقسم، يعني الوحي بينزل كده بيعمل تقسيمات في الأرض، الأرض مش بتقسم بالحدود، الأرض بتقسم بمؤمن وكافر. هذه التقسيمة الحقيقية، لذلك كان الفقهاء يقولوا دار إيمان ودار كفر. يبقى التقسيمات كانت على حسب تعامل الناس مع الوحي، استجابة الناس للوحي.
زي ما ربنا قال في أول سورة البقرة: ﴿ذَلِكَ الْكِتَابُ لَا رَيْبَ ۛ فِيهِ ۛ هُدًى لِّلْمُتَّقِينَ﴾، أخبر الله سبحانه وتعالى عن أصناف الناس في التعامل مع الهدى، منهم من أقبل عليه ومنهم من أعرض عنه إعراضًا كليًا، ومنهم من كان من المنافقين يقبل في حالة انتصار المسلمين، كلما أضاء لهم مشوا فيه، وفي حالة الهزيمة يفر وإذا أظلم عليهم، دي مقدمة سورة البقرة.
وبعد كده، هذا الهدى: أتحدّاكم أن تأتوا بمثله، ثم قصة نزول الهدى للأرض، قصة نزول آدم واحتياجه إلى الهدى: ﴿فَإِمَّا يَأْتِيَنَّكُم مِّنِّي هُدًى﴾ [البقرة: 38]. دي قصة نزول الهدى إلى الأرض اللي ربنا أخبرنا بها، كنت شرحت طلب التفصيل في درس اسمه خليفة، موجود اللي عايز قصة شرح مقدمة سورة البقرة. إن قصة نزول الوحي الأرض، الناس يحتاجون إلى وحي، لن يعرفوا مراد الله إلا من خلال الوحي، مستحيل. عايزين نعرف تفاصيل الشريعة نجيبها منين؟ فبالتالي إحنا هنتحاسب على إيه يوم القيامة؟ إحنا محتاجين هدى نتحاسب عليه.
يبقى المركزية إحنا عندنا دلوقتي، أنت دلوقتي قلت لي في قصص لأهل الإيمان وقصص لأهل الكفر، وفي أخلاق وفي تكاليف في القرآن. أمال أنت قلت لي إن المركزيات الله والوحي والدار الآخرة؟ ما هو الوحي ده هو اللي قسم الناس إلى مؤمن وكافر، الوحي هو اللي جاء بالأوامر والأخلاق والعقائد والتكاليف والأوامر والنواهي، الوحي ده هو اللي لمن أقبل عليه كان من أهل الإيمان، من أعرض عنه كان من أهل الكفر.
العذاب اللي ذكر للأقوام السابقة هو فرع من اليوم الآخر، هو عذاب عجل لهم في الدنيا، لكن من بعد بني إسرائيل ما فيش عذاب عام. يبقى إذًا استحضار المركزية دي، نرجع تاني لسورة الفاتحة عشان ما نتوهش: الحمد لله رب العالمين اتكلمنا عنها، الرحمن الرحيم المركزية الثانية، المركزية الثالثة الآيتين دول اللي هي: ﴿مَالِكِ يَومِ الدِّينِ﴾.
بعد كده بدأت قصة الهدى من إن في ناس تبحث عن الهدى: ﴿إِيَّاكَ نَعْبُدُ﴾، عرفوا الناس دول: ﴿رَبَّنَا مَا خَلَقْتَ هَٰذَا بَاطِلًا سُبْحَانَكَ فَقِنَا عَذَابَ النَّارِ﴾ [آل عمران: 191]. اللي ينظر للكون يعلم أن هذا الكون لم يخلق عبثًا: ﴿رَبَّنَا مَا خَلَقْتَ هَٰذَا بَاطِلًا سُبْحَانَكَ﴾. عرفوا إن في مطلوب، وإن في حساب، وإن لم يقوموا بالمطلوب سيـ يعذبون، فقالوا: ﴿سُبْحَانَكَ فَقِنَا عَذَابَ النَّارِ﴾. ﴿إِيَّاكَ نَعْبُدُ وَإِيَّاكَ نَسْتَعِينُ﴾، ﴿اهْدِنَا﴾ طلب الهدى، ﴿الصِّرَاطَ الْمُسْتَقِيمَ﴾.
آخر آية من المركزيات الهامة جدا في القرآن اللي بيغفل عنها، إن الناس بينقسموا إلى فريقين تجاه هذا الهدى: ﴿صِرَاطَ الَّذِينَ أَنْعَمْتَ عَلَيْهِمْ﴾ [الفاتحة: 7]، اللي هم أهل الإيمان، أهل التقوى، أهل الحق. ﴿غَيْرِ الْمَغْضُوبِ عَلَيْهِمْ وَلَا الضَّالِّينَ﴾، أهل الباطل، وبينهما صراع إلى يوم القيامة. بس هي دي مركزيات الوحي، إن في الآخر بعد نزول الهدى انقسم الناس إلى فريقين.
طب بعد ما انقسموا الفريقين، فريق الهدى وفريق الحق هيعيش في نص الكرة الأرضية اللي فوق، والباطل هيعيش في نص الكرة الأرضية اللي تحت، ويقسموها ومش هيتخانقوا؟ مش هيحصل، سيظل صراع مستمر إلى يوم القيامة. لذلك أنت تطلب من الله سبحانه وتعالى يوميا أكثر من عشر مرات سورة الفاتحة، وتقول: يا رب، أنا خايف يضحك علي، أروح للمغضوب عليهم أو أروح للضالين، أنا خايف.
من هم المغضوب عليهم؟ الذين عرفوا الهدى ثم لم يطبقوه. من هم الضالون؟ الذين طبقوا بغير هدى. يبقى التقسيمة كلها: ناس قبلت الوحي، ناس عرفت الوحي وأعرضت عنه، ناس ضلت وحرفت وبدلت وغيرت، المغضوب عليهم ولا الضالين. ثم الصراع بين الحق والباطل مستمر إلى يوم القيامة، فإما أن تكون من جند الحق أو من جند الباطل.
يبقى المركزيات، أنت لما تبحث عن نفسك في وسط هذه المركزيات: ما رب العالمين؟ ما هو رب العالمين؟ من هو رب العالمين؟ هل تعرفت على الرحمن الرحيم؟ ما هي علاقتك بتفاصيل اليوم الآخر؟ أحداث اليوم الآخرة المبثوثة من أول أحداث الزلزلة والانفطار والأنشقاق والتكوير. النبي صلى الله عليه وسلم يروى عنه حديث حسن الشيخ الألباني قال: «من سره أن ينظر إلى القيامة رأي العين فليقرأ»، يعني اللي عايز يشوف يوم القيامة الحل الوحيد إنه يرجع للوحي يقرأ: ﴿إِذَا الشَّمْسُ كُوِّرَتْ﴾ [التكوير: 1]، وإذا السماء انشقت، وإذا السماء انفطرت، أنت متخيل؟ إن القرآن بيخليك ترى اليوم القيامة رأي العين، لأن ده من المركزيات، لازم توصل إنك تراها رأي العين.
زي حديث حنظلة: نكون عندك يا رسول الله صلى الله عليه وسلم فتذكرنا بالجنة والنار كأن رأي عين. يبقى إذًا ﴿مَالِكِ يَومِ الدِّينِ﴾، أن تطلب الهدى، أنت لازم تطلب، تقول: يا رب، أنا عايز أعبدك، يا رب، لا أستطيع أعبدك إلا بتوفيق منك، ﴿وَإِيَّاكَ نَسْتَعِينُ﴾ لا أستعين إلا بك.
اللي ربنا قال عليهم إن هم من أهل الحق، ما قالش إن يعني شوف ركز: ﴿اهْدِنَا الصِّرَاطَ الْمُسْتَقِيمَ * صِرَاطَ الَّذِينَ أَنْعَمْتَ عَلَيْهِمْ﴾ هو ربنا اللي أنعم. يعني أنت لما توفق -حتى لا تغتر بنفسك- لما توفق وتكون من أهل الإيمان، اعلم أن ذلك فضل ونعمة من الله سبحانه وتعالى تستحق الشكر: ﴿صِرَاطَ الَّذِينَ أَنْعَمْتَ عَلَيْهِمْ﴾. إذًا المنهج ده قابل للتطبيق، محدش يجي يقول لي أصل المنهج بتاع القرآن ده مش قابل للتطبيق، لا، في ناس طبقوه، في ناس ساروا على الصراط المستقيم، وأنت تطلب من الله أن تسير على خطاهم.
وأنت بتطلب من الله سبحانه وتعالى أن يحفظك على الصراط المستقيم: ﴿غَيْرِ الْمَغْضُوبِ عَلَيْهِمْ وَلَا الضَّالِّينَ﴾، أن تتخطفك الفتن، أن تتفرق بك السبل، أنت خايف لأن في صراع مستمر بين الحق والباطل. أي معنى في القرآن ممكن نعيده إلى مركز من المركزيات المذكورة في الفاتحة أو من اللي إحنا ذكرناها، أي معنى: قصة فرعون مع موسى عليه السلام، قصة الشيطان عليه لعنة الله مع آدم عليه السلام، قصص الأنبياء كلهم، تعذيب الأقوام التي كفرت، الأوامر والنواهي، التكاليف، تمرد بني إسرائيل. أي معنى، أي قصة في القرآن ممكن نردها إلى هذه المركزيات، التي لو استقرت بداخلنا نقدر نفهم.
لذلك سورة البقرة، ودي سورة عظيمة محتاجين إن إحنا نقرأها كثيرا، ختمت بأن هناك طائفة قبلت بالوحي: ﴿آمَنَ الرَّسُولُ بِمَا أُنزِلَ إِلَيْهِ مِن رَّبِّهِ وَالْمُؤْمِنُونَ ۚ كُلّْ آمَنَ﴾ [البقرة: 285]. يعني الطائفة اللي هم الذين أنعمت عليهم دول اللي في سورة الفاتحة هم دول آمنوا بما أنزل الله وتفاصيل الوحي كله: بالله وملائكته وكتبه ورسله واليوم الآخر، وبالقدر ذكر في سورة الناس خيره وشره، آمنوا بالإيمان، قضاء الإيمان.
﴿آمَنَ الرَّسُولُ بِمَا أُنزِلَ إِلَيْهِ مِن رَّبِّهِ وَالْمُؤْمِنُونَ ۚ كُلٌّ آمَنَ بِاللَّهِ﴾ خلاص الآية. ثم بعد ذلك: ﴿لَا يُكَلِّفُ اللَّهُ نَفْسًا إِلَّا وُسْعَهَا﴾ [البقرة: 286]. هناك تكاليف، عشان محدش يعترض ويقول طب أنا عايز أسير خلفهم، أسير خلفهم لكن أنا أخاف من التكاليف، يعني أنا.
عايز أكون من اللي ربنا قال عليهم: ﴿آمَنَ الرَّسُولُ بِمَا أُنزِلَ إِلَيْهِ مِن رَّبِّهِ وَالْمُؤْمِنُونَ﴾ [البقرة: 285]. عايز أكون منهم، بس أنا خايف من التكاليف. فربنا يقول لك: ﴿لَا يُكَلِّفُ اللَّهُ نَفْسًا إِلَّا وُسْعَهَا﴾ [البقرة: 286].
وبعد كده مجموعة من الأدعية، ثم ختمت: وانصرنا على القوم الكافرين. يبقى إذًا الكافرين أهل الضلال مش هيسيبوا أهل الإيمان يطبقوا الدين، لن يتركوهم. هيحصل صراع، فأنت تطلب من الله سبحانه وتعالى أن يثبتك.
لذلك أول ما قلت في ختام سورة البقرة: انصرنا على القوم الكافرين، جاءت سورة آل عمران بتقول لك إن الحرب بدأت عليكم. حرب شبهات حصلت على طول من النصارى، وحرب من المشركين في قريش حصلت في غزوة أحد. يعني سيستمر الصراع بين الحق والباطل، هذا من المركزيات.
يبقى الإنسان لما يكون مسلم ويقول لك مافيش يا جماعة موضوع صراع الحق والباطل، وأنتم بتخترعوا وفاكرين نفسكم العالم مركز معاكم، والإسلام أصلًا محدش حطه في دماغه ولا حد بيفكر فيه والناس تجاوزتكم؛ هو ده ماعندوش مركز، من الأسس من المركزيات الوحي مش موجود عنده. الصراع مستمر إلى يوم القيامة، يقول النبي صلى الله عليه وسلم: «لا تقوم الساعة حتى يقاتل المسلمون اليهود». صراع مستمر. إن الشيطان لكم عدو فاتخذوه عدوًا.
وفي بما إن الشيطان الشيطان يا جماعة أختم ده. الشيطان لما طلب طلب واحد، طلب إن المعركة مستمرة، قال: أنظرني إلى يوم يبعثون. هو مستني لغاية يوم القيامة، المعركة مستمرة: أنظرني إلى يوم يبعثون. وربنا بيقول إن الشيطان استطاع أن يجند معه جنودًا. فقاتلوا أولياء الشيطان، هو معاه جنود، في حزب الشيطان. فكذلك في أولياء لله، في حزب الله سبحانه وتعالى، انصروا دينهم. ودي سريعًا كده محاولة النظر في المركزيات.
طبعًا كان نفسي بس الوقت خلص نجيب بعض النماذج التطبيقية. كنت هتكلم على نموذج الوظيفة وظيفتنا، بس ده ممكن ترجعوا لدرس خليفة، إيه مركزية الدار الآخرة وخطورة الخطابات الدعوية اللي بتهمش من خطاب الآخرة وبتعظم من الخطاب الدنيوي، في حين إنه مش ده الطرح القرآني. ارجع للطرح القرآني وشوف.
سيبك من كلامي، ارجع أنت، اقرأ القرآن كثيرًا، فتش في القرآن كثيرًا. ما هي المواضيع التي تكلم عنها القرآن بكثرة؟ المواضيع المتكررة. العجيب إن الإنسان ممكن يلتقط آية ويستخرج هو يستنبط مفهوم، وبعد كده يضخم المفهوم ده، وده مش مفهوم قرآني أصلاً. فهم المركزيات زي ما ذكرنا في الأول هيساعدك على بناء الإسلام الصحيح إنك تقدر قدر المستطاع، إن صح التعبير، إنك تفلتر أي فكرة خارجية عن الإسلام؛ لأن أنت فهمت خلاص الأسس اللي اتبنى عليها الدين.
يعني كان نفسي أطول معاكم أكثر من كده، لكن نكتفي بهذا القدر. سبحانك اللهم وبحمدك، أشهد أن لا إله إلا أنت، أستغفرك وأتوب إليك.