د. أحمد عبد المنعمحقيقة كنت بقرأ أمس مقال بعنوان إشعاع آية. الأخ أظن الكاتب اسمه عزام تقريبًا، المقال بيقول: الأخ الكاتب كان بيتكلم مع صديق له بيشتكي يعني من الأحوال انتشار المعاصي، وإزاي كيف يواجه الدعاة قضية انتشار المعاصي. وبعدين الحديث، يعني قعد ياخد جوانب كثيرة لغاية لما اتكلموا على مسألة القرآن وتأثير القرآن، فصاحبه يقول له: أنت متخيل أنا عايز أقول لك على حاجة. فقال له: قول. أنا طبعًا بقول بالعامية يعني ما قالوش عايز أقول لك على حاجة، هو سعودي أصلًا فما يعرفش يعني إيه عايز أقول لك على حاجة.
فالمهم قال له: أنا عايز أقول لك على حاجة، أنت عارف إن أنا التزمت، سبب التزامي كان آية. فالأخ اللي هو كاتب المقال بيقول: أنا شردت بالذهن في معنى أيًا كانت هي إيه الآية اللي أثرت فيه يعني، قال يعني ممكن آية تغير مسار إنسان. يعني آية تغير أحلام وطموحات وشكل ومبادئ وتصورات إنسان. يعني ده ممكن يحصل، ده بالفعل بيحصل مع ناس كتير، بيقول لما رجعت بقى البيت وقعدت ودورت في التاريخ وفي الآثار وإزاي إن ياما ناس حياتها اتحولت بآية، وقصص بنسمعها كتير إن قاطع طريق ويتحول بآية. يعني مستقبل وطموحات وأمنيات بيتغير مسار إنسان بيتغير بآية.
شوفوا ده من إعجاز القرآن، زي مقالة جميلة جدًا أيضًا للشيخ إبراهيم السكران كان اسمها سطوة القرآن. سطوة القرآن ده بيعده العلماء من إعجاز القرآن، اللي هو إن ممكن إنسان يجد أثر عجيب على عقله وعلى نفسه وعلى قلبه وعلى إيمانه من القرآن، قالوا: ده من دلالة أن هذا الكلام ليس من كلام البشر. وأثر القرآن كان على المشركين، ده كان من دلالة حتى لو لم يؤمنوا. يعني حتى لو لم يؤمن ولكن جحد والعياذ بالله، لكن لما سمع الوليد بن المغيرة القرآن قال: هذا ليس من كلام بشر. قال: إن عليه لحلاوة، وقال: هذا كلام عجيب. ففعلًا القرآن له سطوة، لما تقعد تفكر في المعنى ده، معنى إن آية تغير مسار إنسان تذكرت مشهد السحرة سحرة فرعون.
لما شافوا آية، الآية عملت لهم صدمة، يعني هو طول عمره ساحر، طول عمره شغال في سحر. وفرعون لما طلب ما طلبش أي سحرة، طلب أساتذة؛ لأن ده تحدي، ده تحدي الآن بيهد العرش يهدد العرش وخايف على ملكه، فطلب أحسن سحرة في مصر، مصر أصلًا مشهورة طول عمرها، مشهورين بقضية السحر، سواء سحر الأيدي أو سحر الإعلام، فأيًا كان طلب أساتذة السحر. وقفوا أمام موسى، فلما موسى مجرد ما ألقى العصا سجدوا، قالوا: لا لا، دي حاجة عجيبة. طب سجودهم ده له توابع، يعني هم عارفين فرعون وعارفين ما يحدث في القصر الفرعوني، وبالرغم من كده أخذوا قرار السجود، ليه؟ ده مسار حياتهم بيتغير، ده أحلامهم وطموحاتهم بتتغير، ده هم كانوا جايين عايزين فلوس ومناصب، ﴿إِنَّا نَطْمَعُ أَن يَغْفِرَ لَنَا رَبُّنَا خَطَايَانَا﴾ [الش شعراء: 51]، ده هم جايين عايزين فلوس.
لهم طموحات دنيوية، كل ده اتغير، وقالوا: آمنا بربنا ليغفر لنا خطايانا وما أكرهتنا عليه من السحر. إيه ده؟ ده المسار بيغير. ممكن فعلًا إنسان يحصل له صدمة، زي مثلًا موت واحد صديقه فجأة بدون مقدمات، ممكن يحصل له صدمة، كذلك لابد أن تفعل الآيات في قلبك في رمضان، إن الآية تعمل لك تغيير مسار، إن الصورة أو مجموعة من الآيات القرآنية تستقر في قلبك. ويبقى تغييرنا مع الآيات، يا ريت نتغير بسهولة. في ناس، يعني كنت قاعد بقرأ المقالة بتاعة إشعاع آية دي قبل الفجر ونزلت صليت الفجر، فالإمام قرأ ﴿إِذْ قَالَ لَهُ رَبُّهُ أَسْلِمْ﴾ [البقرة: 131]. قال إيه؟ أسلمت، إيه ده بس على طول؟ قال: أسلمت. أسلم لسيدنا إبراهيم المطلوب منه، يعني ما كانش مثلًا يبطل سجاير، يعني المطلوب منه كان حاجة كبيرة أوي، إنه هو يحط السكينة على رقبة ابنه، إنه هو يترك زوجته وابنه في الصحراء، إنه يبني الكعبة، ده كان مطلوب منه أشياء ضخمة، ببساطة يتقال له: أسلم. قال: أسلمت. يعني مش محتاج في واحد عشان يتغير محتاج تعب.
ممكن في ناس تقول لك: أنا عايز دليل، عايز برهان، زي مثلًا لما تيجي تقارن ما بين ﴿إِذْ قَالَ لَهُ رَبُّهُ أَسْلِمْ قَالَ أَسْلِمتُ﴾ [البقرة: 131]، وما بين قول بلقيس: ﴿وَأَسْلَمْتُ مَعَ سُلَيْمَانَ لِلَّهِ رَبِّ الْعَالَمِينَ﴾ [النمل: 44]. برضه بلقيس ما جاتش بسهولة، سيدنا سليمان هددها بالجيش وبعث جاب العرش وجابها، وقال لها: إيه العرش؟ ما رأيك في العرش؟ قالت: كأنه هو. عمل لها صرح ومرت في القوارير، بعد ما انبهرت في الآخر قالت: خلاص أنا أسلمت. في واحد فعلًا بيحتاج مجهود، بس بيسلم في الآخر، يسلم. لكن في واحد بعد كل المجهود والمعاناة ورؤية الآيات برضه ما بيسلمش، مش قصدي يعني يكون كافر ولا يسلم، لا يستسلم، ما يبقاش لين كده مع أوامر ربنا، في واحد عنده مقاومة.
تيجي تكلمه وتقنعه يقول لك: دليل، تجيب له دليل يقول لك: اشرحه لي، تشرحه له، مين اللي قال؟ تقول له: الأئمة الأربعة. بيحتاج تحلف وتقسم وتجيب عشان يبدأ يتغير شبر. ليه؟ في آيات زي ما قلنا غيرت مسار أناس. دايمًا الناس الكمل في علاقتهم بالله بيتغيروا، بيضحوا بأقل الإشارات، زي ما قالوا على سيدنا إبراهيم كده، لو كان بيقدم أغلى التضحيات بأقل الإشارات، إنه هو يشوف رؤيا يقوم يذبح ابنه، حلم، طبعًا رؤيا الأنبياء حق، لكن كان ممكن سيدنا جبريل ينزل، ما هو سيدنا جبريل كان بينزل، يعني كان ممكن في إنه هو أمر الله عز وجل بذبح إبراهيم لابه، كان ممكن ينزل له مجموعة ملائكة يطمنوه الأول ويقنعوه ويشرحوا له الوضع وما تخافش، وأول لما تيجي تذبحه هينزل خروف على طول ما تقلقش. لكن مجرد إنه يرى رؤيا يقوم مباشرة ﴿يَا بُنَيَّ إِنِّي أَرَى فِي الْمَنَامِ أَنَّي أَذْبَحُكَ﴾ [الصافات: 102].
قاعدين بنسمع، يعني أنا عايز أقول لكم على حاجة، صلوا على النبي. الواحد أحيانًا بيقعد يفكر هو لو ربنا يستعملنا جميعًا في الدعوة لله يعني، لو الواحد عايز يشتغل في الدعوة، نفسي أقول إيه للناس؟ أنا بقعد أفكر كده، إيه اللي نفسنا نوصله للناس؟ فأقعد أفكر، أه إحنا عايزين نتكلم الناس عن العقيدة وعن ربنا وعن اليوم الآخر وعن الولاء والبراء وقضايا، وبعدين في قضايا الواحد نفسه يتكلم فيها مع الناس بس هي قضايا شائكة شوية، الناس مش هتتقبلها بسهولة ولازم مقدمات ولازم نشرح. وبعدين من الحاجات اللي عملت لي صدمة في رمضان ده، مع إنها المفروض حاجة عادية يعني، إن تقريبًا أغلب إن لم يكن كل اللي الواحد بيفكر فيه ونفسه يقوله للناس القرآن بيقوله بوضوح، بيقو بيقول حقائق مجردة بسيطة كده.
يعني مثلًا إيه، ﴿وَلَن تَرْضَى عَنكَ الْيَهُودُ وَلَا النَّصَارَى حَتَّى تَتَّبِعَ مِلَّتَهُمْ﴾ [البقرة: 120]، يا نهار أبيض، إيه ده؟ ده أنا كنت عايز أدي عشان أقول الجملة دي للناس، ده أنا كنت محتاج أشرح مقدمات وأقول لهم بس خدوا بالكم ما تفهمونيش غلط، وعايز أشرح، إيه ده؟ القرآن ببساطة وبوضوح، فبقول إيه ده؟ يعني كل القضايا والكلام اللي عايزين نقوله موجود آيات في القرآن. الأغرب إن الناس بتسمع الكلام ده في التراويح، والأغرب إنه ما فيش حاجة بتتغير. يعني أنتم فاهمين اللي أنا عايز أقوله إيه، يعني كل الكلام اللي ممكن ناس تعتقد إنه صادم وكلام عقائد وكلام مغير وكلام قلب الصحابة وغير حياة الصحابة إحنا بنسمعه عادي، إحنا لسه سامعين.
أنتم سمعتم سورة البقرة، قصة بني إسرائيل واليهود مع الأحداث بقى اللي بتحصل الحالية دلوقتي في نقل السفارة، تحس وقضية نقل القبلة عندنا هنا ﴿سَيَقُولُ السُّفَهَاءُ مِنَ النَّاسِ مَا وَلَّاهُمْ عَن قِبْلَتِهِمُ﴾ [البقرة: 142]، وهم بينقلوا هناك السفارة، وتحس بتطابق عجيب وبيشرح لك الأوضاع وقصة اليهود ومن أولهم لآخرهم وإن الحرب بيننا مستمرة. كل اللي نفسك تقوله عن الحدث بتاع نقل السفارة موجود في سورة البقرة، والناس سمعته، أمال الإشكال فين؟ مش يمكن في حواجز. هذا الشعاع اللي هو بتاع الآية، إشعاع الآية لا يستقر في القلب.
هل بقى الصارف عنه مثلًا إيه؟ الفطار الثقيل مثلًا، ولا عدم التركيز، ولا عدم الفهم، ولا إن إحنا مش مخاطبين بالآيات؟ في إشكال لازم يتحل، لو اتحل هتجد إن بكل بساطة الحل أن نقرأ على الناس القرآن، وهي دي كانت وظيفة النبي صلى الله عليه وسلم، النبي صلى الله عليه وسلم أمر أن يتلو القرآن، من الأوامر التي أمر بها النبي صلى الله عليه وسلم أن يتلو القرآن على الناس، من وظائف النبي صلى الله عليه وسلم يتلو عليهم آياته ويزكيهم ويعلمهم الكتاب والحكمة، من أهم الوظائف تلاوة الآيات على الناس.
النبي صلى الله عليه وسلم بيقول إن من فقه الرجل، الرجل الفقيه إنه هو يعمل إيه؟ إنه لما ييجي يخطب يقول كلمتين صغيرين، اللي هو قصر الخطبة، تبقى قصيرة ويطيل الصلاة عشان الناس تسمع قرآن كتير، فتأثرها يبقى أكبر. لكن الإشكال اللي بيحصل إن إحنا ممكن نسمع قرآن ولا نتأثر، هذا الإشعاع أحيانًا لا يستقر في القلب. ربنا مش عايز يطول عليكم أكثر من كده، كل عام وأنتم بخير. أسأل الله عز وجل أن يجعلني وإياكم من أهل القرآن ومن الذين تغيروا بالقرآن واستسلموا لوطأة القرآن، ويجعلني وإياكم من العابدين الصالحين في هذا الشهر الكريم، وأن يبلغني وإياكم ليلة القدر. أقول قولي هذا وأستغفر الله لي ولكم، سبحانك اللهم وبحمدك، أشهد أن لا إله إلا أنت، أستغفرك وأتوب إليك.