السلام عليكم ورحمة الله وبركاته. الحمد لله وحده، والصلاة والسلام على من لا نبي بعده، محمد صلى الله عليه وسلم.

إن شاء الله بإذن الله عز وجل عايزين نتكلم مع بعض عن حلقات معينة عن أهمية القرآن، وخاصة القرآن في رمضان. هنتكلم عايزين نعرف يعني إيه قرآن؟ ليه القرآن مهم بالنسبة لنا؟ نعمل إيه تجاه القرآن؟ وليه هذه الخصوصية تحديدًا؟ ليه قبل رمضان؟ ليه في الحملة بتاعة رمضان قرب؟ ليه تحديدًا عايزين نقول إن القرآن مهم في رمضان؟ هل احنا اللي قلنا هذه الخصوصية ولا ربنا سبحانه وتعالى اللي قال هذه الخصوصية؟

عشان نفهم موضوع أهمية القرآن، عايزين نحكي قصة من الأول. وما تخافوش مش معنى إن أنا أحكي القصة من الأول إن احنا هنطول، لا، الموضوع هنعمل بس تصور سريع عشان تبقى فاهم إيه احتياجك للقرآن. لازم تبقى شايف الموضوع من فوق. أنا هقولك هديك مثال مثلًا. تخيل لو طفل بيلعب بلايستيشن وبعدين جه أخوه خد الدراع منه وبعدين بيلعب من غير ما يسأله اللعبة دي بتتلعب إزاي ولا عارف أي حاجة. فمسك وقعد يلعب وبعدين وهو بيلعب وبعدين جاب جون وفرح. فأخوه قال له: أنت بتعمل إيه؟ أنت جبت جون في نفسك. قال له: طب وأنت ما قلتليش ليه؟ قال له: ما أنت ما سألتنيش إيه اللي المفروض يتعمل. هو ده اللي بيحصل. احنا الناس ممكن تتحرك في الأرض من غير ما تسأل. نعمل إيه؟ هو المفروض نعمل إيه؟ هو ربنا يرضى علينا إزاي؟ هو لو غلطنا إيه اللي هيحصل؟

القصة بدأت إن ربنا سبحانه وتعالى قال: ﴿وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً﴾ [البقرة: 30]. السماوات ربنا سبحانه وتعالى علمنا إن السماوات فيها الملائكة تعبد الله عز وجل لا يعصونه طرفة عين. الله عز وجل أراد أن ينزل مخلوق في الأرض، والأرض طينة الأرض فيها شهوات الأرض. فالمخلوق اللي هينزل هيبقى مواصفات معينة. هيبقى عنده تنازع بين شهواته وبين مراد ربنا سبحانه وتعالى. فربنا قال: أنا أريد إن في مخلوق ينزل الأرض إني جاعل في الأرض خليفة. فالملائكة استغربت مع طبيعة الأرض وشهواتها أتجعل فيها من يفسد فيها ويسفك الدماء ونحن نسبح بحمدك ونقدس لك؟ قال الملك سبحانه وتعالى: إني أعلم ما لا تعلمون. أعلم من فضل هذه المخلوقات ما لا تعلمون، أن منهم من سيجاهد ويبذل وينصر هذا الدين.

المهم لما ربنا خلق سيدنا آدم وكان في الجنة قال له: لا تأكل من هذه الشجرة. الغلطة في الجنة الأثر السيئ بتاعها بيظهر مباشرة. لما أكل منها مباشرة بدت السوءة. يبقى الغلطة في الجنة اللي ربنا قال عليها السوءة وتعرف إن دي مشكلة، فعلطول لما أكل عمل حاجة غلط ظهرت السوءة، فالعقاب إنه ينزل الأرض. وقبل ما ينزل الأرض سيدنا آدم غلط. طب هو ما غلطش قبل كده؟ طب واللي بيغلط يعمل إيه؟ لو واحد غلط يعمل إيه؟ خلاص كده يموت نفسه مثلًا؟ إيه الحل؟ فكانت فكرة التوبة أول مرة يعرفها سيدنا آدم. عرفها منين؟ خرج من أزمة الغلطة دي إزاي؟ الذنب والخطأ ممكن يعمل تأثير نفسي على الإنسان، ممكن يخليه يموت نفسه، ممكن يخليه يكره نفسه، ممكن يبقى محبط. إبليس أصلًا سمي من معاني إبليس الإبلاس اليأس التام، إحباط ويأس تام من المغفرة. فإبليس عايزك توصل لنفس المرحلة. فسيدنا آدم لما غلط: طب أعمل إيه؟ ﴿فَتَلَقَّىٰ آدَمُ مِن رَّبِّهِ كَلِمَاتٍ فَتَابَ عَلَيْهِ ۚ إِنَّهُ هُوَ التَّوَّابُ الرَّحِيمُ﴾ [البقرة: 37]. من غير هذه الكلمات سيدنا آدم ما كانش يعرف يخرج من المشكلة. فنزلت الكلمات لتحل مشكلة الخطأ بتاعة سيدنا آدم. فلما نزلت الكلمات قالها آدم فتاب فأصبح تائبًا فتاب الله عليه. يبقى اتحلت مشكلة الغلطة بكلمات تلقاها آدم من الله.

بعد ما تلقى الكلمات لازم العقاب كان يستمر ونزول الأرض. قلنا: اهبطوا منها جميعًا. طب هينزلوا الأرض. هو لما كان في الجنة كان بيتلقى الخطاب من ربنا سبحانه وتعالى. لما كان بيغلط في الجنة كان الخطأ المباشر بيظهر. طب هو هينزل الأرض يعمل إيه؟ مين أعداؤه في الأرض؟ مين صاحبه؟ مين اللي يبقى معاه؟ ومين اللي يبقى ضده؟ عشان ما يبقاش زي ما قلنا المثل إنه يجيب جون في نفسه. أتساعد مين؟ ما تساعدش مين؟ إيه اللي يرضي ربنا؟ الخطأ اللي ممكن ما يبقاش له أثر فوري. يعني أنت ممكن تعمل خطأ في الدنيا. واحد أكل حرام، الدنيا ما يشترطش فيها إن لو عملت حاجة حرام يظهر على طول السوءة زي ما حصل في الجنة. نعرف الحاجات دي كلها إزاي؟ فربنا قال له: قلنا اهبطوا منها جميعًا فإما يأتينكم مني هدى. أنا مش هسيبك، أنت هتنزل الأرض بس بلطف ورحمة مني هنزل لك وحي. هنزل لك كلام أتكلم به. كلام يتكلم الله به عشان تعرف تتحرك إزاي. فكأن أنت في غربة وما تعرفش مين صديقك، مين عدوك، هتتصرف إزاي، تمشي في الاتجاهات إزاي.

واحد نزل في مكان غريب وما يعرفش. يعني تخيل واحد أول مرة ينزل في غابة وما يعرفش يعني إيه شجرة، وما يعرفش يعني إيه سكينة، وما يعرفش يعني إيه أسد، وما يعرفش، هو نزل جه من كوكب ثاني نزل في غابة، فمش عارف يتصرف إزاي. فواحد نزل له كتاب عرفه كل حاجة، تمشي إزاي. وخواد بالك لو قابلت مخلوق شكله كذا وكذا ده أسد، خذ بالك ده هيفترسك، ما تروحش تلعب معاه. والشجر دي اه ده بيتاكل منها كذا. والمية النهر بيتعمل فيه كذا. فطبعًا عشان يعرف يتحرك تمسك بهذا الكتاب عشان يعرف يتحرك في الغابة دي وإلا هيهلك. ﴿فَمَن تَبِعَ هُدَايَ فَلَا خَوْفٌ عَلَيْهِمْ وَلَا هُمْ يَحْزَنُونَ﴾ [البقرة: 38]. اللي هيمشي وراء الوحي فلا خوف عليهم في الدنيا ولا هم يحزنون بعد الموت، لأنه خلاص سمع كلام ربنا. طب وبعدين؟ ﴿وَالَّذِينَ كَفَرُوا وَكَذَّبُوا بِآيَاتِنَا أُولَٰئِكَ أَصْحَابُ النَّارِ ۖ هُمْ فِيهَا خَالِدُونَ﴾ [البقرة: 39]. لأنه ابتعد عن الوحي.

من هنا نفهم حديث النبي صلى الله عليه وسلم. صلوا عليه. حديث النبي صلى الله عليه وسلم: «إن هذا القرآن سبب يعني حبل طرفه بأيديكم وطرفه بيد الله». الله أكبر. استحضارك إنك عايش في الأرض ماسك الحبل. أمشي إزاي يا رب؟ يمين ولا شمال؟ ده صديقي ولا ده عدوي؟ ده هيهلكني ولا ده هينقذني؟ أمشي إزاي؟ ماسك الحبل، لإن أنا لو سبت الحبل في أي لحظة أهلك. هو ده قول النبي صلى الله عليه وسلم: «تركت فيكم ما إن تمسكتم به لن تضلوا». تمسكتم مش أمسكتم. أمسك يعني عمل كده. تمسك تكلف المسك، يعني تعب عشان يمسك. تمسكتم به. ليه تمسك؟ لإن في حد هيحاول يشيل منك الوحي. إبليس فاهم. طول ما أنت ماسك القرآن عارف الصح من الغلط، عارف تتحرك إزاي. فإبليس إما يلعب على شهواتك، يعني يخليك عارف الصح من الغلط وتعصي، أو يخليك أصلاً تتوه، تعيش في ضلال، يغير لك المسميات والمصطلحات. زي ما ربنا قال له: ما تأكلش من الشجرة. راح قال له: لأ، ده ما اسمهاش شجرة وحشة، ده اسمها شجرة حلوة، دي شجرة الخلد، هل أدلك على شجرة الخلد؟. عشان ما تتغيرش المسميات، عشان الناس ما تتوهش. لذلك في مقدمة سورة البقرة ورايحين بنبني مجتمع جديد في المدينة: ﴿الم ذَٰلِكَ الْكِتَابُ لَا رَيْبَ ۛ فِيهِ ۛ هُدًى لِّلْمُتَّقِينَ﴾ [البقرة: 1-2]. أوعوا تسيبوا الكتاب. لا ريب فيه. ما فيش فيه شك. هدى. عايزين هدى؟ هدى للمتقين.

فربنا سبحانه وتعالى بيقول: أقسام الناس تجاه هذا الكتاب ثلاثة. فرقة متأثرة، وفرقة متجحرة. فرقة متأثرة أهل الإيمان، تلقوا القرآن زي ما سيدنا آدم تلقى الكلمات. فرقة متجحرة: ﴿إِنَّ الَّذِينَ كَفَرُوا سَوَاءٌ عَلَيْهِمْ أَأَنذَرْتَهُمْ أَمْ لَمْ تُنذِرْهُمْ لَا يُؤْمِنُونَ﴾ [البقرة: 6]. سبحان الله، وصلوا لحالة صفرية، إن القرآن قراءته وعدم قراءته سواء. شوف الكلمة: سواء عليهم أأنذرتهم. يعني سواء قلت لهم قرآن، قرأت عليهم قرآن، أو لم تقرأ القرآن، الدنيا عندهم سواء. إيه السبب في كده؟ ربنا يقول: ﴿خَتَمَ اللَّهُ عَلَىٰ قُلُوبِهِمْ وَعَلَىٰ سَمْعِهِمْ ۖ وَعَلَىٰ أَبْصَارِهِمْ غِشَاوَةٌ﴾ [البقرة: 7]. إذاً اللي بيوصل لحالة صفرية، تلقي القرآن زي عدم تلقي القرآن. يخاف من كلمة ختم الله.

طيب، عشان ما نتوهش، احنا قلنا هنحكي القصة من الأول عشان نفهم، يعني إيه قرآن؟ القرآن كلام الله، الله عز وجل تكلم بهذا الكلام حقيقة، حتى لا نضل، عشان الشيطان ما يضحكش علينا، عشان ما يجيش حد يقولنا ده صديق وهو يبقى عدو، عشان ما حدش يقولنا اعملوا دي، دي شجرة الخلد دي حاجة كويسة وتطلع حاجة تضرنا، حتى يرضى الله عز وجل عنا، ربنا ما سابناش لوحدنا في الغربة. ربنا جعلنا صاحب القرآن، تتصاحب مع القرآن، إن لله أهلين. من هم؟ أهل الله وخاصته، أهل القرآن. تخيل، أهل القرآن، هم أهل الله وخاصته، لما تعيش في الأرض في الغربة، بعيدًا عن الجنة الوطن الأصلي -ربنا يرزقنا الفردوس الأعلى يا رب- لما تعيش في الغربة، عشان ما تعيش لوحدك في الغربة، ربنا نزل لك القرآن.

وحفظ القرآن من التبديل، من لحظة الكلام والنزول، ومحاولة الشياطين لاستراق السمع. ليه الشياطين عايزين يسترقوا السمع؟ ليه الشيطان؟ أنت تتخيل الشياطين تقعد تطلع فوق بعضها وتقف، عشان تسمع كلمة واحدة، ويحرق مئات الشياطين، ليه المجهود الرهيب ده؟ ليه الشياطين بتتحرق وتبذل كل ده؟ عشان إيه؟ عشان عارف إن الناس تبعد عن القرآن، ولو بكلمة واحدة عن القرآن، الناس هتضل. الكفار عارفين كده: ﴿وَقَالَ الَّذِينَ كَفَرُوا لَا تَسْمَعُوا لِهَٰذَا الْقُرْآنِ وَالْغَوْا فِيهِ لَعَلَّكُمْ تَغْلِبُونَ﴾ [فصلت: 26]. في سورة فصلت، ربنا بيقولك إن الآيات مفصلة وواضحة، ذلك في ختام سورة فصلت: ﴿سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ حَتَّىٰ يَتَبَيَّنَ لَهُمْ أَنَّهُ الْحَقُّ﴾ [فصلت: 53]. الكفار لما لقوا الدنيا واضحة والدنيا مفصلة، قالوا مش هينفع، لازم نتحرك. وقال الذين كفروا، لا تسمعوا، مش لا تستمعوا. يعني لو أنت معدي، معدي وسمعت القرآن، اجري. مش قالوا مثلًا ما تروحش تقعد في مجالس القرآن، لا، لا، أنت لو معدي وسمعت القرآن قدرًا، اجري بعيدًا عن القرآن، لا تسمعوا لهذا القرآن. طب افرض معدي والقرآن بيقرأ، ومش عارف تتصرف تعمل إيه؟ وألغوا فيه، اعملوا أغاني وألغوا فيه. قيل وألغوا فيه يعني في كل كلمة وحرف منه. أوعى المشركين بيقولوا أوعوا تخلي كلمة من القرآن توصل لقلوبهم، وألغوا فيه. ليه؟ لعلكم تغلبون. شوف إحساسهم بالهزيمة. يعني الحل مش إن هم يعملوا كلام قصاد القرآن، فشلوا. مش الحل إن هم يموتوا أهل القرآن لأن بيطلع غيرهم والقرآن بيصنع غيرهم. مش الحل إن إحنا نواجه القرآن بقرآن ثاني، فشلوا. الحل الوحيد إن إحنا نلغو أثناء القرآن. ده الحل الوحيد اللي ممكن نعمله جايز نكسب. شوف إحساسهم بالضعف أمام القرآن، لعلكم تغلبون.

فهم إبليس وفهم أعداء الله مقدار عظمة القرآن، ونحن نقصر في هذه العظمة. عشان نطلع من الحلقة عايزين نتمسك بالحبل. دي أخطر نعمة ربنا إداها لك. ﴿اللَّهُ وَلِيُّ الَّذِينَ آمَنُوا﴾ [البقرة: 257]. أعلى صور الولاية. الله ولي الذين آمَنوا بيعملهم إيه؟ يخرجهم من الظلمات إلى النور عن طريق القرآن. إن ولي الله. الله ولي الذين آمنوا يخرجهم، دي البقرة. الأعراف: ﴿إِنَّ وَلِيِّيَ اللَّهُ الَّذِي نَزَّلَ الْكِتَابَ﴾ [الأعراف: 196]. أعلى صور الولاية. سورة الشعراء التي بدأت بالوحي وختمت بالوحي: ﴿وَكَذَٰلِكَ أَوْحَيْنَا إِلَيْكَ رُوحًا مِّنْ أَمْرِنَا ۚ مَا كُنتَ تَدْرِي مَا الْكِتَابُ وَلَا الْإِيمَانُ وَلَٰكِن جَعَلْنَاهُ نُورًا نَّهْدِي بِهِ مَن نَّشَاءُ مِنْ عِبَادِنَا﴾ [الشورى: 52]. سورة الشورى بدأت بوحي وختمت بوحي، وكذلك أوحينا إليك روحا من أمرنا. ما كنت تدري ما الكتاب ولا الإيمان، ولكن جعلناه نورًا. شوف، روحا يعني حياة. وبعد ما يصير روحا من أمرنا، ما كنت تدري ما الكتاب ولا الإيمان، ولكن جعلناه نورا يمشي. يبقى تخيل منظر واحد كان نايم، الحياة جت، النور جه، بدأ يتحرك. هذا لا يكون بغير القرآن. إياكم ثم إياكم أن تتركوا هذا الحبل فتهلكوا وتضلوا. أقول قولي هذا وأستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك. والسلام عليكم ورحمة الله وبركاته. وعليكم السلام.