الشيخ أمجد سميرأما بعد؛ في حاجة عاوز أبتدي بيها، عاوز أقولها لكم كل يوم، كل مرة، يعني وبنسى: أنا بحبكم في الله. يعني عارف إن الوقت صعب يعني وقت الدرس أنا عارف إنه صعب. فالحقيقه الواحد مستبشر خيرا باللي بيسيب حاجات وراء، عارف يوم الجمعة بيبقى يوم راحة للناس، وبعدين يوم التجمعات العائلية، وفي نص اليوم، عارف يعني المواضيع دي كلها، لكن يعني إن شاء الله يعني الأجر على قدر النصب، ومن ترك شيئا لله عوضه الله خيرا منه. فجزاكم الله خيرا، تعبكم معايا، معلش، النهارده الدرس الكام؟ التاسع! التاسع ولا... تاسع! الدرس التاسع في هذه السلسلة المباركة «قبسات نور» والتي بنحاول نتدبر فيها سورة النور. والنهارده الدرس مع آية النور، وآية النور آية محببة إلى النفوس: ﴿اللَّهُ نُورُ السَّمَاوَاتِ وَالْأَرْضِ ۚ مَثَلُ نُورِهِ كَمِشْكَاةٍ فِيهَا مِصْبَاحٌ ۖ الْمِصْباحُ فِي زُجَاجَةٍ ۖ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِنْ شَجَرَةٍ مُبَارَكَةٍ زَيْتُونَةٍ لَا شَرْقِيَّةٍ وَلَا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ ۚ نُورٌ عَلَى نُورٍ ۗ يَهْدِي اللَّهُ لِنُورِهِ مَنْ يَشَاءُ ۚ وَيَضْرِبُ اللَّهُ الْأَمْثَالَ لِلنَّاسِ ۗ وَاللَّهُ بِكُلِّ شَيْءٍ عَلِيمٌ﴾ [النور: 35]. الحقيقه آية عظيمة جدا، ويمكن احنا أشرنا إلى بعض فوائدها قبل كده.
تعالوا نخش في الموضوع على طول: أوله الأمر، أن الله عز وجل لما أراد أن يضرب -أنا هقعد أتكلم في شوية حاجات كده يعني بدون ترتيب، وبعدين نجمعها مع بعض- لما أراد أن يضرب مثلا لنوره سبحانه وتعالى: ﴿اللَّهُ نُورُ السَّمَاوَاتِ وَالْأَرْضِ مَثَلُ نُورِهِ كَكَذَا وَكَكَذَا وَكَكَذَا﴾. الأول يا جماعة، احنا كنا قلنا قبل كده أن على أهمية هذا النور؛ احنا محتاجين النور ده ولا لا؟ فهاديك مثال بشكل تاني غير اللي احنا قلناه قبل كده. دلوقتي لو أنت قاعد في البيت والنور قطع، وأنت قاعد في البيت، أول حاجة بتعملها إيه؟ تروح مطلع موبايلك، فاتح إيه؟ الكشاف بتاع موبايلك، وتبتدي تمشي بكشاف موبايلك لغايه ما تجيب إيه؟ الكشاف اللي أنت شحنه، تولع، تروح قافل كشاف موبايلك، وتسيب بقى الكشاف اللي هو مشحون ده ينور لغايه ما يجي النور، النور يرجع تاني. تروح عامل إيه؟ طافي الكشاف اللي أنت جبته ده، اللي هو مشحون ده. وبعدين يطلع النهار والشمس تطلع، تقوم فاتح الشبابيك وطافي نور بيتك. مش كده؟ مش ده اللي بيحصل معانا كلنا؟ وكان المعنى أن أنت ما بتلجأش إلى نور أضعف إلا في غياب النور إيه؟ الأقوى، وهذا العقل يقوله، مش كده؟
حتى إذا أتى نور أقوى من النور اللي معاك، استغنيت عن النور الضعيف اللي معاك ولجأت للنور الاقوى. وبعد شوية يجي نور أقوى من اللي معاك اللي هو أصلا أقوى من النور اللي كان ضعيف خالص ده، تقوم تركن النور التاني على جنب وتستخدم النور الاقوى لغاية ما تطلع الشمس التي هي نور الله عز وجل. تقوم الشمس تغنيك عن كل نور بقى من إيه؟ أنوار البشر، عن اللمض وعن مش عارف الكشافات. وعن مش كده؟ المثال اللي قلته لكم قبل كده، ده مثال تاني. المثال اللي قلته لكم قبل كده، لو تفتكروا، قلت لك لما تكون سايق عربيتك بالنهار، وتلاقي واحد مشغل النور، تقوم عامل له إيه؟ مش كده؛ يعني اطفي النور! لأن مش منطقي أن حد يبقى مولع نور وهو ماشي في الشمس. تلاقي نفسك أول ما تنزل نفق أنت نفسك بتروح عامل إيه؟ مولع النور، مش كده؟ أول ما تخرج من النفق تطفي النور، مش كده يا جماعه؟
يبقى هكذا التعامل؛ نور الله عز وجل يحجب كل نور. نور الله في المحسوسات اهو يحجب كل نور، وأي استخدام لنور تاني معاه هو ضرب من العبث، كان واحد بالضبط ماشي في ضوء الشمس ومولع كشاف العربية؛ عبث! يعني ما حدش يعمل ده. كان واحد بيته منور وأزاز ويقوم مولع لك الانوار كلها والشمس داخله بيته؛ عبث! ما حدش بيعمل كده يعني، ما حدش بيعمل ده. كذلك في الأمور المعنوية، في المعنويات، كذلك في المعنويات نور الله عز وجل يطمس كل نور، فاستخدام لأي نور مع وجود نور الرب سبحانه وتعالى أيضا عبث. عبث! فلما يجيلك حكم من الله عز وجل في كتابه، خلاص، اطفي بقى كل الانوار، لا تقولي بقى نور العقل، ولا تقولي نور المعرفة، ولا نور التجربة، ولا نور القوانين الحديثة، ولا نور العلم المعارف؛ اطفي الانوار كلها! اطفي كل الانوار! نور الله أقوى. فزي ما بتعامل مع نور ربنا سبحانه وتعالى في المحسوسات، كذلك ينبغي أن تتعامل معه في المعنويات، في الأمور المعنوية. خلاص، المسالة دي احنا قلناها قبل كده؛ يبقى نور ربنا سبحانه وتعالى هو نور قوي.
طيب، لما يجي يضرب المثل هنا: ﴿اللَّهُ نُورُ السَّمَاوَاتِ وَالْأَرْضِ مَثَلُ نُورِهِ كَالشَّمْسِ﴾ إيه رايكم؟ نور الشمس في أقوى من نور الشمس؟ مافيش! لكن ما قالش كده، ودي حاجة عجيبة، يعني مثل نوره كنور الشمس، لا، الآية مش كده. وبعدين لما هنضرب المثل هنلاقي مثل بنور إذا ما قور مثلا بنور الشمس أو بضياء القمر ضعيف، يعني هو هو احنا هنعرف كمان شويه أنه هو من أكمل الانوار، بشويه صفات هنقولها، لكن في الآخر، أو بنقارن نور بنور أو ضياء بضياء أو إنارة بإنارة، فيجي إيه الصورة دي تجي إيه؟ تشبيه الصورة دي بنور الشمس مثلا، ومع ذلك ربنا سبحانه وتعالى ما قالش: مثل نوره كالشمس، ما قالش كده! وبعدين ولا مثل نوره كالقمر، ما قالش كده سبحانه وتعالى. ليه؟ ده أول سؤال نسأله.
نسأل سؤال تاني عشان نجمعهم وندخل بقا على السؤال التاني: أنتم عارفين دايما في قول كده أن إيه البلاغات الإيجاز، يعني لو تعرف تقول كلام كتير في كلمتين ثلاثة ورحت أنت جايب اربع خمس ست كلمات، نقول لك لا، كلما أوجزت كان أبلغ ودل على أنك متفنن ومتبرع في العرب، مش كده يا جماعه؟ ده معروف يعني. طيب لما يجي واحد بقى بليغ وشاعر ولا بتاع، وبعدين يطنب، يطنب يعني يزود في الكلام، نقوم نعرف أن في إن هنا! هو ليه أطنب؟ هو ليه ليه زود في الكلام؟ ماشي، ما نقدرش نقوله أنه مش بليغ، ليه؟ ده هو شاعر، ده يضرب به المثل في البلاغة وفي الفصاحة، فكونه أطنب، وعشان كده الإطناب بيبقى إيه ضربة من ضروب البلاغة في وقت عارفين بلاغة ولا إيه ماشي.
طيب تعالوا بقى كده، الآية مش الآية، احنا هنقرا: ﴿اللَّهُ نُورُ السَّمَاوَاتِ وَالْأَرْضِ مَثَلُ نُورِهِ كَمِشْكَاةٍ فِيهَا مِصْبَاحٌ فِي زُجَاجَةٍ كَأَنَّهَا كَوْكَبٌ دُرِّيٌّ﴾. المعنى استقام ولا لا؟ استقام! المعنى هو هو المعنى هو هو ماشي، لكن في إطناب في الآية، ويمكن الناس مش واخدة بالها منه، وهو حاجة في البديع بيسموها إعادة الأطراف. ربنا ما قالش يعني الآية ما جتش زي ما أنا قلت كده: مثل نوره كمشكاة فيها مصباح في زجاجة كأنها كوكب دري؛ الآية مش كده! الآية قالت: ﴿مَثَلُ نُورِهِ كَمِشْكَاةٍ فِيهَا مِصْبَاحٌ ۖ الْمِصْباحُ فِي زُجَاجَةٍ ۖ الزُّجَاجَةُ كَأَنَّهَا كَوْكَبٌ دُرِّيٌّ﴾. ليه يا جماعة ده كله؟ احنا عاوزين في الآخر نطلع بحاجات نفهمها نشتغل بيها ماشي، يعني ده فايدة الدرس ده. فليه ليه هذه الأعادة؟ إعادة الأطراف دي ليه؟ مع أن كان لو بنقول بقى الإيجاز مع حذف هذه الأطراف المعنى استقام، فليه أعيدت الأطراف؟ فكاني بقى جمعوا السؤالين: ليه مش مثلا درية كشمس ولا كقمر ولا ككوكب؟ احنا في النص هنلاقي الكوكب الدري له ذكر، وليه الكلمات دي بتتعاد؟ الزجاجة تتعاد والمصباح ليه؟ كل ده؟
فكان في معنى تاني لازم نفهمه بقا، كان الصورة دي لما أقال الصورة يعني يعني هذا التشبيه محتاجين نفهم حاجة، الموضوع مش بس أن احنا عاوزين نقول أن النور قوي، لا، ده احنا عاوزين ندخل في تفاصيل الحاجات دي، يعني المشكاة، المشكاة الأول يعني إيه مشكاة؟ نعرف، وبعد ما نعرف طب دي شبه إيه؟ يعني ربنا سبحانه وتعالى لما ضرب بها المثل المفروض نفهم إيه من المشكاة؟ ونفهم إيه من المصباح؟ ونفهم إيه من الزجاجة؟ ونفهم إيه من زيت الزيتون؟ ونفهم إيه؟ يعني الصورة ليه هذا التركيب؟ لماذا؟ ده مقصود قطعا مقصود، اللي علينا بقى أن احنا نفهم أمثال الله عز وجل، ولذلك أمثال ربنا مش كل الناس بتفهمها، مش كده؟ ﴿وَمَا يَعْقِلُهَا إِلَّا الْعَالِمُونَ﴾ [العنكبوت: 43]. الأمثال مش كل الناس تفهمها، أمثال الله عز وجل في القرآن، فكان الأجزاء دي مرادة لذاتها؛ تدبرها! تدبروا المشكاة وافهموا إسقاطها عليكم شكله إيه؟ تدبروا المصباح وافهموا إسقاطه عليكم شكله إيه؟ تدبروا الزجاجة وافهموا إسقاطها عليكم شكله إيه؟ تدبروا مسألة الزيت الذي يكاد يضيء ولو لم تمسسه نار، وإسقاطه عليكم إيه في الدنيا؟ الشجرة التي أسهب الله في ذكر وصفها وده أمر عجيب، يعني إيه كمشكاة مالهاش وصف خالص؟ المشكاة هنا فيها مصباح، المصباح هيجي له كمان شوية الكلام عنه، المصباح في زجاجة، الزجاجة كأنها كوكب دري، يوقد، هو إيه اللي يوقد؟ المصباح لأن الزجاجة لو جاز كان إيه توقد، أن هو المصباح اللي بيقدم، يبقى الكلام رجع للمصباح: ﴿يُوقَدُ مِنْ شَجَرَةٍ﴾، شوف بقى الإسهاب في ذكر الشجرة: ﴿مُبَارَكَةٍ زَيْتُونَةٍ لَا شَرْقِيَّةٍ وَلَا غَرْبِيَّةٍ﴾، يعني أطول عنصر تم إيه وصفه في كل التركيب ده هو الشجرة: ﴿يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ نُورٌ عَلَى نُورٍ﴾.
فايه ده بقى؟ إيه ليه الصورة دي؟ أولا، أول ما أقول لكم شمس حد بيجي في ذهنه ولو للحظة الظلام؟ ما حد يعني، كلمة شمس دي خلاص هي بتنكح كده، مش كده؟ مايجيش خلاص الظلام. الصورة اللي احنا ضربناها من شويه دي اللي هي أو ضربها الله عز وجل في كتابه: الأول المشكاة عشان الناس تفهم المشكاة، عارفين يا جماعه زمان كانوا لما يجيبوا اللمبة الجاز دي، يكونوا عاملين زي إيه؟ فتحة في الجدار، يعني الجدار تلاقيه تخين شويه وعاملين فتحة في الجدار بس ماهياش نافذة للناحية التانية، يتحط فيها إيه؟ اللمبة الجاز دي، تتحط في إيه؟ فتحة، هي زي الكوة كده بس الكوة نافذة بقى للناحية التانية، مشكاه ما تبقاش نافذة للناحية التانية، ماشي، يعني هي حيطة سد صحيح لكن فتحة، اه حتة مجوفه، صح كده، مجوفه، حتة مجوفه في الجدار، ماشي كده، يتحط فيها المصباح ده، هي دي المشكاة، هي دي المشكاة، فهو مشكاة المشكاة فيها مصباح، والمصباح عليه زجاجة. لو لم الجاز كلنا مستحضرين شكل لمبة الجاز، مش كده؟ المصباح إيه هو المصباح؟ هو الفتيل اللي بولعه، إيه القماشه دي اللي طالعه ولا الفتلة اللي طالعه دي اللي بتولعها بالكبريت ولا بالولاعة، وبعدين تروح جايب الإزازة بتاعة إيه لمبة الجاز وتحطها فوق إيه المصباح ده. فالمصباح في زجاجة، ربنا وصف الزجاجة قال: ﴿كَأَنَّهَا كَوْكَبٌ دُرِّيٌّ﴾.
يعني إيه كوكب دري؟ كوكب يعني مضيء، ودري قالوا إما من الدر يعني يعني في لمعانه وفي بهائه وكذا وكذا وكذا، أو الدري هو الكبير الحجم الضخم، فده معنى كوكب دري، وذكروا أن ده لصفائها وبهائها وكذا وكذا. احنا نرجع لكل الكلام ده بس عشان نتخيل الصورة، وبعدين الصورة الذهنية يعني تبقى في دماغنا ونرجع نشوف إيه المقصود بالكلام ده. وبعدين يتبقى بقا الوقود اللي هنولع بيه، فربنا وصف الوقود اللي هو زيت زيتون وكمان مش أي زيت زيتون ده من صفائه ونقائه وكذا وكذا يكاد يضيء ولو لم تمسسه نار، تحس إنه إيه هينور لوحده كده من كتر ما هو بيلمع وإيه بيتلألأ. هذا الزيت بمجموع هذه الأمور لما نشرحها كمان شوية هتلاقي أن الضوء اللي هيخرج من هذا المصباح هو أبهى ضوء وأقوى ضوء في هذه إيه الفئة فئة المصابيح؛ هو أقوى ضوء وأبهى ضوء وأنظف ضوء وكذا وكذا، ماشي كده؟ وهنعرف ليه دلوقتي ما اما نخش في التفاصيل إن شاء الله، فهي دي الصورة الذهنية.
نرجع تاني بقى: ليه الصورة؟ ليه مش الشمس؟ ليه مش كالشمس مثلا؟ ودي أول فايدة يا جماعه، أول فايدة معانا اهو هتظهر دلوقتي، قلنا لكم لو قلنا لكم الشمس ما حدش بيجي في دماغه خالص ظلام، ما حد يعني ما حدش إيه أن ظلام، الظلام طلعت الشمس فزالت، ما حدش بيجي في دماغه المعاني دي خلاص. إنما أول ما تسمع الصورة دي أنت هتحس وكانك قاعد في المكان الأصلي فيه إيه؟ الظلام! أنا من غير ما نتكلم، أنا أنا مش بوجهكم، الحق هو ده فعلا، يعني أما تسمع الصورة إما نستحضر الصورة الذهنية دي أن أنت قاعد المكان في مكان الأصل فيه الظلام ولولا هذا المصدر للضوء أو للنور لما رايت شيئا، صح ولا إيه؟ صح كده؟ ودي أول فايدة أن يا جماعه أول حاجه نور ربنا سبحانه وتعالى، هذا النور اللي هو إيه نور ربنا نور ربنا؟ هذه كل أقوال هدي قیلت: القرآن نور والنبي محمد نور صلى الله عليه وسلم، وده كله تال في الآية: مثل نوره قال النبي محمد نوره صلى الله عليه وسلم، أو القرآن، أو النور الذي يقذفه في قلب المؤمن، أيا كان أيا كان هذه الانوار التي من الله عز وجل.
وجل هي المضيء، هي التي تضيء لك حَوَالِكَ الظلمات. اللي هي بقى الظلمات؛ ظلمة الشهوة، وظلمة الشبهة، ظلمة الكفر، ظلمة المعاصي، ظلمات؛ الظلمات كتير والنور واحد، صح ولا لا؟ ربنا قال كده في القرآن: ﴿اللَّهُ وَلِيُّ الَّذِينَ آمَنُوا يُخْرِجُهُم مِّنَ الظُّلُمَاتِ إِلَى النُّورِ﴾ [البقرة: 257]. النور واحد والظلمات كثيرة، ﴿وَالَّذِينَ كَفَرُوا أَوْلِيَاؤُطَّاغُوتُ يُخْرِجُونَهُم مِّنَ النُّورِ إِلَى الظُّلُمَاتِ﴾ [البقرة: 257]. فالظلمات كثيرة والنور واحد من الله عز وجل. نور الله عز وجل هو الذي يضيء لك هذه الظلمات.
يبقى أنت تستشعر في الجو النفسي اللي احنا عشناه ده؛ كأنك قاعد في أوضة ولا في بيت -ولو ركزوا بقى في دي- المصباح اطفأ! خلصت المعنى ده. احنا مش بنحسه قوي، احنا بنقول شمس، مش كده؟ ما حدش بياخد باله إنه قاعد وهو في ضوء الشمس، لو الشمس راحت -لو- مع أن ده حقيقي يعني لو الشمس راحت خلاص يعني، إنما مش بنحس الإحساس ده. يبقى دي أول حاجة، أول حاجة عشان تستحضر معنى الخوف والوجل من انطفاء نورك؛ فتبقى حريص أشد الحرص على أن النور ده يفضل مولع، لأنه لو انطفأ هذا النور أنت في ظلمات، أنت في ظلمات! المعنى ده يوصل لك بهذا الإحساس من الخوف والوجل والطمأنينة لمصدر النور، لما نضرب المثال ده بقى؛ مش كَأَنّ فيها مصباح، المصباح إلى آخره الآية. المثال الذي ضربه القرآن يبقى ده أول معنى.
المعنى التاني؛ انك تبتدي تتفكر في اجزاء هذا الوصف. يعني الله عز وجل ما قالش: مثل نوره كمصباح، والمصباح الصورة الذهنية ليه مش اللمبه دي بقى يعني خلاص؛ الناس كلها فاهمه إن المصباح بتاع زمان اللي هو بيتولع بس ما جتش كده! لا، ده احنا ذكرنا مشكاة وزجاجة ومصباح وزيت قصة، فكأني مقصود أنك تنتبه لكل عنصر من هذه العناصر، وإيه اللي بيشير إليه هذا العنصر في المثال.
طبعا هنا برضو العلماء اختلفوا؛ يعني المشكاة إيه والمصباح إيه؟ اختلاف كبير، مش هذكر كل الاختلافات التي ذكرت، خلينا نضرب مثلا واحدا أو مثلين. فمما قيل فيه؛ المثلين شبه بعض عشان كده هضربهم، يعني مما قيل فيه أن احنا قلنا أن ده تشبيه للنبي محمد صلى الله عليه وسلم، قالوا: آل النبي صلى الله عليه وسلم هو المشكاة أو جوفه هو المشكاة صلى الله عليه وسلم، والزجاجة قلبه، والمصباح ما في قلبه من الإيمان والمعاني القلبية التي في قلب النبي محمد صلى الله عليه وسلم، والزيت الذي يوقد به هذا المصباح هو بقى العلم والإيمان، ماشي؟ قرآن العلم والإيمان.
طيب، المثال الثاني هو هو نفس ده أو قريب منه، لكن المؤمن؛ يعني مما قيل في الآية أن ده مثال للمؤمن. فسواء النبي صلى الله عليه وسلم أو المؤمن عامة يعني؛ المؤمن مشكاة، قلبه زجاجة المصباح، ما في قلبه من معاني ومن ومن إيمانيات وكذا وكذا، والزيت المادة الخارجية التي تمد هذا القلب. بالله خلونا في المثالين دول؛ لأن هما دول المهمين لينا، ماشي كده؟ وتعالوا بقى نفصص شوية المثال علشان نفهم احنا المفروض نستفيد إيه من الآية دي؟ الآية دي الناس كلها بتحبها، بس يعني لو قلت الحق طب تعال اشرح لي أنت فاهم إيه من الآية؟ مثل طويل وتفاصيل كتير وتشبيهات كتير، فاهم إيه؟ ما الذي يريده الله عز وجل منا في هذه الآية؟ مهم جدا نفهم يا جماعة؛ لأن زي ما قلت لكم احنا دلوقتي خلاص بقى نعيش نفسية اللي خايف يطفي نوره؛ لأنك لو طفى نورك أنت في أوضة ضلمة، في أوضة ضلمة! عارفين يا جماعة اللي طفى نوره ده ربنا ذكره بعديها بكام آية؟ ماشي، وذكر ليه وصف عجيب كده، قال: ﴿إِذَا أَخْرَجَ يَدَهُ لَمْ يَكَدْ يَرَاهَا﴾ [النور: 40]. إيدك اللي هي أقرب حاجة ليك؛ إذا أخرج يده لم يكَدْ يراها! أنتو فاهمين احنا فين؟ هنبقى فين لو النور ده اطفأ؟ فمحتاجين النور، ومحتاجين النور يفضل منور، ومحتاجين النور اللي منور ده ما تجيش حاجة تعكر ضوءه، وهنفصل ندخل في تفاصيل المثال علشان نفهم.
يلا بقى نبتدي: مثل نوره كمشكوة. قلنا المشكاة دي إيه؟ فجوة في الحيطة، مش كده؟ الفجوة دي من غير مصباح وزجاجة تساوي شيئا في عالم الإضاءة؟ لا تساوي شيئا! عشان كده المشكاة من غير مصباح ظُلمت. فلو قلنا إن المشكاة هي جوفك أو بدنك؛ فكذلك أنت، بدنك اللي حضرتك مهتم بيه ده أو المناهج الأرضية الحديثة خليتك مهتم بيه -أنتو عارفين الرأس مالية التي نحيا فيها الآن هي بتعظيم البدن جدا، ليه؟ لأنك طول ما أنت مهتم ببدنك أنت مستهلك، حبيبنا ماشي؟ البدن ده بقى كناية عن كل ما هو إيه يعني غير الروح، يعني أنت مستهلك وحبيبنا هتاكل إيه النهارده؟ وهتشتري اللبس الفلاني والمكملات؟ هتلاقي نفسك طول ما أنت عايش بتصرف، طول ما أنت عايش؛ فالرأس مالية قائمة على كده. خلاص بدنك اللي هو المشكاة دي نرجع بقى للمثل؛ المشكاة من غير مصباح وزجاجة في قانون الإضاءة ما لهاش لازمة! ماشي، فدي أول مسألة.
يبقى اهتمامك بالبدن الزائد ده على حساب قلبك؛ أنت عمال تطفي النور، عمال تطفي النور! دي أول مسألة. المسألة الثانية -طبعا المشكاة قبل ما نكمل بس هي المشكاة هي إيه فايدتها؟ قالوا بتركز الضوء، يعني بتخليه بدل ما هو منتشر بتجمع خلاص، بس يعني مش وقته دلوقتي ممكن نرجع له كمان شوية. يبقى دي المشكاة.
طيب، المشكاة فيها مصباح، المصباح فيه زجاجة. خدها من بره لجوه كده: يبقى الأول مشكاة، تاني حاجة الزجاجة، المصباح فيه زجاجة. يبقى لو احنا داخلين من بره لجوه هتلاقي: مشكاة، زجاجة، مصباح، مش كده؟ يبقى مشكاة، زجاجة، المصباح. الزجاجة دي تعالوا بقى نرجع للمثل اللمبة الجاز بتاعتنا دي أو الزجاجة اللي بتتحط على المصباح؛ الزجاجة دي كلما كانت أصفى كانت أنفذ للضوء، وكلما كانت أنفذ للضوء تلاقي المشكاة دي منورة ولا مضلمة اللي هي أصلا كانت إيه؟ مضلمة، فتلاقي الضوء ده ينفذ من الزجاج، ومن المشكاة يشع هذا النور إلى خارج المشكاة بقى، صح كده؟ كذلك قلبك.
يبقى احنا لسه ما جيناش للضوء أصلا، احنا ما شفناش إيه الضوء ده ولا المصباح ولا الزيت ولا بس افهم ده، إن ممكن الأول يا جماعة الضوء في المثال بتاعنا من جوه لبره ولا من بره لجوه؟ من جوه لبره، واضحة جدا مش كده؟ فممكن يبتدي كده شعله في قلبك، تيجي تخرج ما تلاقيش منفذ، تيجي تخرج ما تلاقيش منفذ هذه الشعْلة، ليه؟ أصل أنت قلبك عمال يتلطخ، اللي هو الزجاجة دي. والزجاجة سبحان الله عجيبة! الزجاجة دي حاجة عجيبة جدا، ليه عجيبة؟ الزجاج ينفذ الضوء لكن لا ينفذ الأجسام، يعني تلاقي الضوء ينفذ من الزجاج وتبص تشوفه من الناحية التانية، إنما الهواء لا ما يعديش من الزجاج. وأصلا دي فايدة الزجاجة أصلا، انتو عارفين بتوع هندسه بقى وعلوم والناس دي؟ دلوقتي أنت اللي منكم -مش بتوع علوم وهندسه، اللي منكم عموما- ولع لمبة جاز، بتلاقي أول ما تولع اللمبة تبتدي تطلع دخنة سودا، أول ما تحط الازازه الدخنة السودا تروح! حد يعرف ليه؟ هندسة وعلوم وإيه؟ حد يعرف ليه لما بنحط الازازه الدخنة بتتروح؟ حد يعرف؟ يمنع الاكسجين! فان شاء الله تطفي خالص، ما فيش ما فيش احتراق من غير اكسجين.
الضغط قوي، عندنا حاجة بيسموها الأير تو فيول ريشيو، حد يعرف حد سمع المصطلح ده قبل كده؟ إيه بقى الأير تو فيول ريشيو؟ نسبة الهوا مع نسبة الوقود، آه. لو الهوا زاد يحصل الدخنة دي، لو الهوا زاد عن نسبة معينة يحصل الدخنة دي. ماشي من غير ما أدخل في تفاصيل يعني، هو ده اللي عاوز يدور عليه يدور على اللي أنا قلته ده. فالزجاجة لما بتحطها بعد ما الهواء كان جاي من كل حته لا، هي قننت دخول الهواء بس مش أكتر، فضبطته دي بين الهواء وبين الوقود.
خلاص، المهم قلبك بقى اللي هو زجاجة ده حافظ عليه، حافظ على صفائه، حافظ على صفائه ليه؟ عشان ينفذ النور، فيفيض ذلك النور على بدنك أولا، ثم يفيد على من حولك. ربنا يا جماعة ضرب المثال ده في القرآن: ﴿أَوَمَن كَانَ مَيْتًا فَأَحْيَيْنَاهُ وَجَعَلْنَا لَهُ نُورًا يَمْشِي بِهِ فِي النَّاسِ﴾ [الأنعام: 122]. تبقوا أنت منور وبتنور لغيرك، أنت منور وبتنور لغيرك! صحيح، أضاءت أضاءت أنت أقوى لما تيجي تبص لمشكاة، تلاقي المشكاة منورة من جوه نور ضخم جدا، لكنها منورة بره برضه صحيح، مش بنفس الضخامة، أنت منور أكتر، منورين. فالزجاجة دي بقى حافظ على صفائها، ده شرطك.
ولذلك يا جماعة القرآن يلح على هذا المعنى بأكثر من لفظ؛ الرَّين، والختم، والطبع، والأَكِنَّة؛ كل الألفاظ دي في القرآن بيحذرك منها: ﴿كَلَّا بَلْ ۜ رَانَ عَلَىٰ قُلُوبِهِم مَّا كَانُوا يَكْسِبُونَ﴾ [المطففين: 14]، والطبع: ﴿فَطُبِعَ عَلَىٰ قُلُوبِهِمْ﴾ [التوبة: 87]، والختم: ﴿خَتَمَ اللَّهُ عَلَىٰ قُلُوبِهِمْ﴾ [البقرة: 7]، بل قلوبهم في أكنة. شوف الألفاظ دي كلها إزاي مش منتبهين لكل ده! الحديث اللي هنا قلناه كذا مره بقى ويلخص الموضوع: «تعرض الفتن على القلوب كعرض الحصير عودا عودا، فأيما قلب أُشْرِبَها نُكِتَت فيه نكتة سوداء». تخيلوا بقى تخيلوا المشهد ده يا جماعة؛ الزجاجة الصافية دي والنهارده نقطة سودا على الزجاج، لسه بتعدي نور بس في نقطة، في نقطة، في نقطة إلى أن تصير القلوب قلب اسود مُرْبَادا. تخيلوا بقى اللفظ النبوي ده؛ لفظ النبي عليه الصلاة والسلام. استَحْضِرْ في المشهد بتاعنا كده زجاجة اتلطخت اسود كلها، ما نفعك بهذا المصباح؟ إيه رايكم ما نفعك؟ هتنفع بالمصباح اللي ينور زي ما ينور؟ خلاص ما فيش نور طالع، ما فيش نور طالع!
فيبقى لازم نظف بقى؛ يبقى اللي منا -طبعا احنا كلنا قلوبنا ملطخة محتاجة تتنظف، محتاجة تتنظف- خلي بالكم يا جماعة احنا بنقول إن القلب ده عجيب برضو؛ القلب بيستقبل ولا بيرسل؟ الاتنين. احنا في المثال بتاعنا هذا احنا مركزين على إرسال القلب، لكن هو القلب بيستقبل وبيبرسل. يعني أنت ممكن بقى إيه؟ تخيلوا الزجاجة دي بقى من كتر التلطيخ اللي عليها ابتدت كمان فتحات الزجاجة تتقفل! الزجاجة ما تبقاش مصمتة، بيبقى فيها فتحة فوق، وساعات بيبقى فيها فتحات من الجنب، تخيلوا بقى أن عمال تلطخ في ران ران ران لغايه ما قفل كمان الفتحات، بقت لا بتستقبل ولا بترسل، ولا الدنيا خلاص باظت! خلاص، الحل إيه؟ لازم تنضف الأزاز.
لازم كان شيخ الإسلام ابن تيمية -وإن كان كلامه ما هواش قوي بالمعنى ده، لكن سبحان الله يعني أن وفق لأن قال هذا المثال- كان ابن القيم طبعا ابن القيم تلميذ ابن تيمية فكان كتير يجي لشيخ الإسلام تيمية يحكي له شبهة، فكان شيخ الإسلام آنَسَ من ابن القيم -رحمهم الله- أنه ابتدى يعني عنده نوع تأثر يعني من الشبهة وعاوز إزالة الشبهة، فقال له كلمة عميقة جدا، قال له: يا محمد، اجعل قلبك مثل الزجاجة ولا تجعله مثل الاسفنجة. اجعل قلبك مثل الزجاجة ولا تجعله مثل الاسفنج! الاسفنج أول ما ينزل عليه أي حاجة الاسفنجة تشربها، إنما الزجاج من خصائصه أنه أملس، تنزل عليه الحجة تدحرج إيه وتنزل ماشي.
الشاهد بقى نرجع تاني؛ عاوزين قلوبنا دي نشوفها كده يا جماعة، نشوف قلبك ده زجاجة. وعلى فكرة هذا الوصف مش وصفي، ده وصف الأوائل، يعني ابن عباس هذا وصفه، قال إن ده قلب النبي، الزجاجة دي قلب النبي عليه الصلاة والسلام. وفي رواية أخرى أظن ابن عباس أو غيره أن احنا بنتكلم عن المؤمنين؛ ماشي، فقلبك ده إزاز فإذا حافظ عليه نقي. ما تجيش بقى تشتكي تقول: أنا أقرأ قرآن مهما أقرأ ما ألاقيش أثر على الجوارح! وهقول لكم بقى كلمة دلوقتي يقول لك: والله بحس بتاثر في قلبي، لكن أحوالي خيبانة خالص يعني؛ آه بتأثر بقلبي، لكن طب قمت النهارده كان الدرس عن قيام الليل وتاثرت جدا، قلبي تاثر فعلا، طب قمت ليل؟ والله ما صليت العشاء! مش مقصود الليل بقى ده ما صلاش العشاء أصلا! فين المشكلة؟ فين المشكلة؟ أنت قلبك تاثر بس النور مش عارف يخرج منه، أنت حاسس جوه قلبك في حاجه فعلا، بس النور عاوز يخرج؛ الرين بقى والطبع والختم، خلاص هيخرج منين؟
فده درس نخرج بيه، أول درس أن جسمك ده هو المشكاة، مضلم، مضلم وهيفضل مضلم لغايه ما تهتم بالمصباح، بمكونات المصباح اللي احنا عاملين نحكي فيها، اللي هو أول مكون من مكوناته الزجاجة اللي فوق المصباح دي، اللي هو قلبك. طب إزاي أهتم بقلبي؟ انك تحافظ على صفاء هذا القلب، وكلما كان أصفى كانت إفاضات الانوار على بدنك أتم. لمبة الزيت دي لما نجيب زجاج فخم وغالي غير اما نجيب ازاز اللي هو إيه؟ معاد تدويره ويبقى خشن ويبقى الإضاءة مختلفة، قطعا قطعا! مش كده؟ الناس اللي عندهم عربيات ويجي يغير الفانوس -مش الفانوس كله، البتاعة اللي بره دي الباغة دي ولا بيسموها إيه؟ آه- فيقول لك: لا، حط لي الأصل، الأصل التاني بيصفر. شوف التفاصيل! طب يصفر اللمبة اللي جوه قوية؟ نقول: لا، لو حصل إيه هيحجز دي شويه وتصفر اللمبة أصلي صحيح، لكن مش هتلاقي نفسك شايف حاجة بالليل! طب دي اللمبة أصلي، اعمل إيه تاني؟ الإزاز.
فقلبك هو الأزاز، فاهتم بقلبك. وبعدين المصباح؛ تعالوا بقى نركز بقى في كلمة المصباح دي بقى يا جماعة؛ المصباح ده علشان يضيء، يضيء كده ذاتيا ولا محتاج مدد؟
محتاج مدد، اللي هو الوقود، واللي ربنا ذكره برضه في الآية، مش كده؟ المصباح ده الفتيلة دي عشان تولعها فنور، لازم يكون في خزانها وقود، أول ما خزان الوقود يخلص النار هتطفي.
تعالوا نرجع: يعني إيه؟ كأنك أنت يا اللي خايف وشايف الضلمة اللي أنت قاعد فيها وأملك كله في أنك تنجو في هذه الظلمات، هو مصدر الضوء. أنت شايف ده كله، أنت مستحضر ده، كأنك دلوقتي ابتديت تنتبه لمعنى أن في وقود لو انقطع إمداده هيطفي النور، شئت أم أبيت، لو اتشقلبت انتهى، مش هيولع المصباح.
عايزه يولع؟ هات له وقود. فكأنك دلوقتي ابتديت تركز في حاجة، هي إيه؟ هذا الإمداد، لا ينقطع الإمداد الخارجي ده، يفضل مستمر عشان يفضل المصباح منور. يبقى دي أول مسألة: المدد الخارجي لازم يفضل موجود، خارجي من خارج القلب، وداخل القلب هنشوف إيه المدد ده.
لكن المدد ده بقى مش أي مدد؛ لأنك لو رحت جبت وقود تعبان وفيه شوائب هينور بس إضاءة غير إضاءة الوقود الذي وصفه الرب: ﴿يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ﴾ [النور: 35]، في غاية النقاء والصفاء. مثال دلوقتي عربيتك حديثة وموديل السنة دي، وحاجة جواها البنزين قتلة، حط لي 80، أنت بتعمل إيه في عربيتك؟ بتدمرها، مش كده؟ هي مش هتمشي، هتمشي شوية وبعدين هتركن وتقف. بس لما تحط 95، هو كده بالضبط.
فهنا ربنا سبحانه وصف الزيت، وصف الوقود، وصف المدد الخارجي اللي من غيره الضوء هيختفي. اللي هو إيه بقى المدد ده؟ أول حاجة العلم، أحسنتم، العلم اللي هو أعظم كتاب الله عز وجل، وقد ذكر الله عز وجل أو وصف القرآن بالنور في كتابه سبحانه وتعالى: ﴿وَأَنْزَلْنَا إِلَيْكُمْ نُورًا مُبِينًا﴾ [النساء: 174]، قيل هو القرآن.
ده مدد خارجي محتاجه. يعني إيه محتاجه؟ يعني حضرتك بقى لك مش هقول لك أسبوع وشهر، يوم سايب وردك، ما تجيش تشتكي بعد كده وتقول أنا قلبي بيتغير، ما هو أنت قلبك بيظلم، طب ليه بيظلم؟ ما هو أصل المدد مش موجود. المدد فين؟ المدد يبقى لازم تمد قلبك بهذا الزيت، بهذا الوقود: علم، وإيه تاني؟ إيمان. الإيمان اللي هو أعمال صالحة تمد القلب.
عشان كده قلنا لكم القلب بيعمل الاثنين يا جماعة: القلب بيستقبل وبيرسل. يعني إيه بيستقبل وبيرسل؟ قلت لكم قبل كده هنا حاجة برضه، معلش يعني إيه استحملوني، بتوع هندسة يعرفوها اللي هي بيسموها cause and effect، حاجة بتكون سبب ونتيجة في نفس الوقت. يعني لو جيت قلت لك دلوقتي هسألك سؤال شرعي بقى، سيبكم من الهندسة: هو القلب اللي هيخليك تعمل الصالحات، ولا لما تعمل الصالحات القلب ينصلح؟ تقولي الاثنين، يعني هو القلب لما ينصلح تعمل صالحات، ولما أعمل صالحات القلب ينصلح، هي ماشية كده، هي دايرة كده فعلاً.
والاتنين عليهم أدلة، يعني لو جبنا الأدلة من القرآن والسنة هتلاقوا الاثنين موجودين، ففهموا الدايرة دي؛ قلبك ينصلح تعمل صالحات، تعمل صالحات قلبك ينصلح وتفضل في هذا الترقي، أو العكس تنزل. فمحتاجين المدد اللي داخل القلب اللي هو علم، وأعظم العلم القرآن. ليه علم يا جماعة؟ لأن العلم بينور.
أنت مسألة مش عارف تتصرف فيها غيرك اتصرف ليه؟ لأن هو عارف حكم ربنا فيها. واحد راح يتعلم فقه مش أكتر، فدخلتوا أنت وهو في صلاة جنازة مثلاً، وأنت مش مصلٍّ، فلقيته داخل معاك في كل طمأنينة، راح عمل حاجة وأنت واقف متكعبل. محتاج اللي ينور لك، إيه الفرق بينكم؟ هو أعلم، فعرف إن لو قابل الموقف ده هيعمل كذا، أنت متعلم مش أكتر. العلم ينور.
ولذلك يا جماعة الآية اللي قبل الآية دي على طول: ﴿اللَّهُ نُورُ السَّمَاوَاتِ وَالْأَرْضِ﴾ [النور: 35]، آية عجيبة اتكلمنا عنها قبل كده، قلنا ماجتش في القرآن كله غير ثلاث مرات. الآية اللي قبل دي على طول: ﴿وَلَقَدْ أَنْزَلْنَا إِلَيْكُمْ آيَاتٍ مُبَيِّنَاتٍ﴾ [النور: 35]. قلنا آيات بينات جت في القرآن كتير، لكن آيات مبينات ماجتش في القرآن كله غير ثلاث مرات، مرتين منهم في سورة النور، فاكرين الكلام ده؟ طب اللي فاكر المرة الثالثة كانت سورة إيه؟ أحسنت، المرة الثالثة كانت سورة الطلاق.
فعلاً، إيه الفرق بين بين ومبين؟ بين هو واضح، مبين يعني مبين لغيره، ودي صفة الآية. النور مش كده، يعني نحن دلوقتي قاعدين في ضلمة والنور قاطع، ما حدش شايف حاجة، أول ما النور يجي يبين الأشياء على حقيقتها؛ أشوف بقى فلان نايم، وفلان بيلعب في الموبايل، وفلان مش كده. فرنا ذكر آيات مبينات قبل الآية دي على طول.
أنتم عارفين مثلاً الطاهر بن عاشور يا جماعة قال أصلاً الله نور سواه الأرض، دي جملة اعتراضية وبعدين الكلام يرجع إلى آيات مبينات، يعني هو شايف كده بيقول إيه: ﴿وَلَقَدْ أَنْزَلْنَا إِلَيْكُمْ آيَاتٍ مُبَيِّنَاتٍ﴾، مثل نوره كمثل... ده كله عائد على آيات مبينات. هي دي النور، القرآن نور.
عشان نلخص، القرآن نور، وإحنا هنا بقى بنقول إيه؟ القرآن هو مصدر خارجي من خارجك يمد قلبك بهذا الوقود، لأن القرآن يا جماعة مش بيدك بالعلم بس، القرآن بيدك بالعلم وبالإيمان، بالاثنين. وعشان كده الصحابة كانوا ينزل القرآن يحفظوه بسرعة، ولا يعملوا إيه؟ عشر آيات، عشر آيات، عشر آيات، عشان يتعلموا القرآن والإيمان جميعاً، ما يتجاوزوا الست آيات غير لما يفهموا العشر آيات ويعملوا بها، فتعلموا العلم والعمل معاً.
كل ده في القرآن. طب أنا عاوز بقى النور يقوى، أنت عرفت الطريق، النور يقوى يبقى تزود وردك، بتقرأ جزء من النهارده، خلاص عهد مع ربنا جزئين، لا أنا بقرا جزئين من النهارده خمسة، زي ما أنا ماشي، طيب لا أنا ببقى عندي أيام شغل وبتاع، يبقى يوم الجمعة وهكذا، زود براحتك، مد بوقود براحتك، أو امنع أنت حر، بس يبقى المشهد قدام عينيك، تبقى أنت بتعمل إيه بقى؟ حضرتك عمال تلطخ في الإزاز وتمنع الوقود وتيجي تشتكي بعد كده؟ يعني مش مثلاً تلطخ الإزاز وفي جوه ضوء، فتهف الإزاز ويطلع، ده أنت وقفت الضوء كمان، أنت منعت وقود فطفت الشعلة، انطفت.
يبقى محتاجين نحافظ على المدد الخارجي، أوله القرآن وأعظمه، وآجله تاني حاجة الإيمان والأعمال الصالحة، وأحوال نحافظ عليها سواء مع ربنا، سواء مع الناس، سواء مع الأقارب، مع أي حاجة بقى تشوفها من هذه الأعمال الصالحة، اعتبرها وقود لقلبك، شوفها كده مدد.
حافظ على هذا النقاء، وإلا يا جماعة ربنا سبحانه وتعالى لماذا ضرب المثل بنقاء الزيت؟ نحن نحتاج أن نفهم لماذا يقال: ﴿يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ﴾ [النور: 35]؟ لماذا؟ عشان نستفيد أن هذه الشجرة المباركة، الزيتونة التي ليست بشرقية ولا بغربية، التي هي الشرع الحنيف، زيتها على هذه الصفة من النقاء والنظافة. هتسيب أنت الشرع وتروح تدور على وقود تاني أنت حر، قلبك يهبب، وأول ما يهبب النور الذي طالع ده هيعمل إيه؟ هيطخ القزاز من جوه، يعني ليس من بره، القزاز يتلطخ من جوه من الهباب الذي خارج من الشعلة دي، من الفتيلة.
فين المشكلة؟ أنت سبت الشرع الصافي النقي ورحت تقرأ في الفلسفة، رحت تقرأ الفلسفة المضرة التي تناقض الشرع، رحت تقرأ لأهل البدع. عشان كده يا جماعة تفهموا ليه السلف كانوا حريصين جداً أنهم لا يسمعوا من أهل البدعة؛ حتى سفيان -أظن- قال: لو قال لك مبتدع اجلس أقرأ عليك ﴿قُلْ هُوَ اللَّهُ أَحَدٌ﴾ قل له لا، وروي عنه هو أنه حصل كده معه، قال له تعال أناظرك، قال لا، قال ولو ﴿قُلْ هُوَ اللَّهُ أَحَدٌ﴾ قال فأقرأ عليك ﴿قُلْ هُوَ اللَّهُ أَحَدٌ﴾، طب تعال اقرأ، قال لا، فلما سئل بعد كده قال: خشيت أن يدخل فيها شيئاً يقر في قلبي. هذا عالم، أنا أتكلم عن عالم ليس واحداً مثلنا، لماذا؟ هو شايف الصورة دي واضحة قدامه.
بعض الناس، وأنا أعرف أن هذا يحدث، الشباب يكون متحمساً فيقول: أنا أسمع لكل الناس وأقرأ لكل الناس، وتلاقيه مشتركاً في صفحات كل حد، كل الناس يقرأ لهم ويسمع لهم وكذا وكذا وكذا؛ ربما تأثرت بكلام أهل البدع، بكلام أهل الخرافات، بكلام أهل الثقافات المخالفة لدين الإسلام، ربما تأثرت، بل نحن نشوف ذلك، نشوف التأثر في فلتات اللسان؛ أحياناً تعرف أن فلاناً هذا متأثر بالخطاب الفلاني. طب أنت لماذا سايب الشجرة التي هذا وصفها وهذا زيتها، ورايح تحط بنزين 80؟ لماذا لا ترجع تشكي أن أرواحنا في وحشة من جسومنا؟ من الذي قال هذا؟ الغزالي ولا الرازي؟ الرازي كان من هؤلاء المتكلمين، ولما جاء يشرح حاله، قال أبيات شعر منها: وأرواحنا في وحشة من جسومنا، وغاية سعي العالمين ضلالة، ولم نستفد من بحثنا طول عمرنا سوى أن جمعنا فيه قيل وقالوا، وأرواحنا في وحشة من جسومنا، هو ده الشاهد.
لماذا أرواحنا في وحشة من جسومنا؟ لأننا رحنا لهذه المصادر. هل المصادر دي بتجيب اليقين؟ أبداً والله، هم راحوا عشان يجيبوا اليقين، رجعوا بالشك، هم الذين يقولون هذا عن أنفسهم؛ راحوا عشان يجيبوا اليقين رجعوا بالشك والوهم، حاجة خيبة خالص، فخليك في الشرع، في هذه الشجرة المباركة الزيتونة التي ليست بشرقية ولا غربية.
يعني إيه لا شرقية ولا غربية؟ هي شجرة في مكان الشمس تقع عليها طول النهار، لا تميل شرقاً ولا غرباً، يعني هي شرقية غربية على طول الشمس خبطة فيها. طبعاً هو قيل غير ذلك في التفسير، لكن هذا أولى الأقوال والله أعلم. وعشان كده ﴿يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ﴾، يبقى أول درس عندنا: تعرف قيمة جسمك الحقيقية، جسمك هذا ما هو إلا دابة كل وظيفتها في الدنيا يا ابن الحلال أن تسير بك إلى الله، بس كده، هو ده جسمك.
هل أبطل الأكل والشرب؟ ما قلتلكش اعمل ده خالص، لكن تعامل مع جسمك هكذا، واهتم بقلبك الذي هو مصدر النور. ادي المشكاة، وبعدين الزجاجة؛ ثاني حاجة اهتم بصفاء الزجاجة الذي هو قلبك، لا من بره ولا من جوه يتلطخ هذا الزجاج من الران، الختم، الطبع، أعمال سيئة، شبهات، شهوات، كل ده بيأثر، الانغماس في الدنيا حتى لو مباح بيأثر، محتاجين نستدل على ده ولا كلنا في ده أصلاً؟ عشان كلنا في ده مش كده؟ لكن ربنا سبحانه وتعالى ذكر ده في الموطن ده: ﴿رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ ۙ يَخَافُونَ يَوْمًا تَتَقَلَّبُ فِيهِ الْقُلُوبُ وَالْأَبْصَارُ﴾ [النور: 37].
مش بتوع دنيا، الدنيا ما سحلتهم لدرجة نسوا الذكر ونسوا الصلاة ونسوا الزكاة. يبقى حافظت على قلبك، الزجاج ده لا يتوسخ من بره، وحافظت أنه ما يتوسخ من جوه؛ كيف يتوسخ من جوه؟ بنقاء الوقود، لأنك لو دخلت وقود فيه شوائب هيطخ الزجاج من جوه، فيبقى محافظ على مدخلاتك.
آخر حاجة في المثال ده أنك بتحافظ على المدد، نحن جايبينها من بره، دلوقتي المشكاة جسمك، الزجاجة قلبك، المصباح هذه المعاني التي تتولد في قلبك فتنير. يبقى المدد الخارجي الذي هو أنت؛ بتحافظ على وردك من القرآن، ورد قراءة، ورد مراجعة، ورد حفظ، ورد تدبر، ورد تفسير، حياتك حول القرآن. يا جماعة شيخ الإسلام ابن تيمية هذا الذي هو الموسوعة، الذي ترك ما ترك من هذه العلوم فانتفع بها الناس، وهو بيموت يندم! يندم على إيه في أواخر حياته؟ يندم على أنه ما قضى حياته كلها للقرآن، ده حقيقي. شيخ الإسلام ندمه في آخر حياته قال لك: أنا ندمان أنني ما وهبت حياتي للقرآن، أنا مش عارف هو وهبها لإيه، يعني لو شيخ الإسلام ما وهب حياته للقرآن، أنتم عارفين هو مات في السجن ختم القرآن من حفظه أكثر من ثمانين مرة، مات بقرآن ﴿إِنَّ الْمُتَّقِينَ فِي جَنَّاتٍ وَنَهَرٍ * فِي مَقْعَدِ صِدْقٍ عِندَ مَلِيكٍ مُّقْتَدِرٍ﴾ [القمر: 54-55]، وفاضت روحه رحمه الله.
يندم ويقول: كنت أتمنى أن عمري كله يبقى للقرآن. طب نحن قد إيه من يومنا للقرآن يا جماعة؟ ما هو عمرك يوم ويوم ويوم، فاليوم لو 24 ساعة، وأنت أعطيت ساعة للقرآن، أنت عارف كده قد إيه من يومك؟ 4%، ده لو أعطيت للقرآن ساعة، فاعتُبرنا أن وردك ده لا تنزل عنه كل يوم، فأنت من حياتك التي هي 100%، 4% للقرآن، أنتم متخيلين؟ عشان بس نحن بنحط أرقام قدامنا عشان نعرف نحن فين من القرآن، أنا أقول ده مش عشان أبط، بس تبقى كل واحد منا شايف نفسه.
طيب ﴿فِي بُيُوتٍ﴾، هو إيه اللي في بيوت؟ أنتم عارفين حرف الجر لابد له من متعلق يتعلق به، دي حاجة بيقولوها في اللغة؛ لما أقول لك برجلي وسكت تقول لي: هو إيه اللي عملته برجلي؟ لأن حرف الباء لا يجيء طائراً في الجو، لازم يتعلق بحاجة. فأفاجئكم بجملة كلنا بنقولها وعمرنا ما انتبهنا أنها ناقصة: ﴿بِسْمِ اللَّهِ الرَّحْمَنِ الرَّحِيمِ﴾، هو إيه اللي بسم الله؟ دوروا عليها، هو هنا فعلاً في محذوف، الجملة ما كملتش، بس من كثر ما نحن بنقولها مش منتبهين. نرجع بقى تاني: ﴿فِي بُيُوتٍ أَذِنَ اللَّهُ أَن تُرْفَعَ﴾ [النور: 36]، هو إيه اللي في بيوت؟ كانك دلوقتي ابتديت تتحفز أننا فهمنا المثال، وأنا فعلاً محتاج النور ده، أو محتاج هذا المدد، محتاج ألاقيه فين؟ جاء لك الجواب: ﴿فِي بُيُوتٍ﴾. طيب عاوز النور أو عاوز مصدر النور، المدد الذي به تنور قلبك ستجد هذا المدد: ﴿فِي بُيُوتٍ أَذِنَ اللَّهُ أَن تُرْفَعَ وَيُذْكَرَ فِيهَا اسْمُهُ﴾، في المساجد.
ولذلك كان فتحاً كبيراً جداً في الدعوة مسألة الدروس الأونلاين بلا شك، لكن يبقى الأصل يا شباب إتيانك لبيت الله، ﴿مَا اجْتَمَعَ قَوْمٌ﴾، نحن هنا عاوزين لازم الصورة دي كلها تتحقق علشان يحصل الثواب المذكور: ﴿فِي بَيْتٍ مِّن بُيُوتِ اللَّهِ﴾. عاوزين يا جماعة نوصل إلى هذه الحال، شيخنا عبد العظيم رحمه الله، شيخ مسجده كان في الإمام الشافعي، وكان المقابر الناحية الثانية، فسؤال جاء له من زمان من قرابة 30 سنة، بيقول له واحد بعث له سؤال في ورقة: أنا أعرف إزاي أنني خلاص كده قلبي حلو وجميل؟ قال له الشيخ، رد عليه رحمه الله: أنك ما تبقاش عاوز تخرج من هنا غير على قابر. فهمتوا؟ أنك تجي المسجد مش عاوز تخرج غير على مقبرة، لما أموت تعالوا خدوني من المسجد، غسلوني وكفنوني وادفنوني.
الشيخ يبالغ؟ عليه الصلاة والسلام، ليست مبالغة، ﴿رَجُلٌ قَلْبُهُ مُعَلَّقٌ بِالْمَسَاجِدِ﴾، في رواية: رجل قلبه معلق في المساجد، عارفين يعني إيه يا جماعة؟ يعني واحد بيدخل المسجد، يجي الوقت الذي سيخرج فيه من المسجد هو قلبه جوه، هو خارج للدنيا اضطراراً؛ تخيل أنك سايب قلبك في حتة هتبقى عاوز تخلص كل حاجة تجري ترجع لقلبك، هعيش إزاي من غير قلب؟ رجل قلبه معلق في المساجد، كأنه بيخرج من المسجد للضرورة، خلصت الضرورة، فين أقرب مسجد؟
عاوزين نرجع لده تاني، عندك وقت فاضي روح المسجد. ودي ابنك للتمرين، وصله التمرين، وادخل مسجد النادي اقعد في المسجد بنية إيه بقى؟ ﴿فِي بُيُوتٍ أَذِنَ اللَّهُ أَن تُرْفَعَ﴾ [النور: 36]، بنية التماس النور، التماس ذلك المدد، قد عرفت أين هو، فالزم. ﴿فِي بُيُوتٍ أَذِنَ اللَّهُ أَن تُرْفَعَ وَيُذْكَرَ فِيهَا اسْمُهُ﴾ [النور: 36].
النهاردة بعد الخطبة جالي واحد، أظن تركي، أنا على قدر ربنا مسجدي فيه كل الجنسيات، أول مرة أشوف تركي. المرة دي عندنا سودانيين وليبيين وسوريين وصومال، لقيت واحد جايلي وعربي مكسر وشكله تركي، فجاي بيقول لي: تخففوا على الناس، طبعاً الخطبة كانت حاجة و40 دقيقة، فهو جاي بيقول لي: حسبنا الخطبة النهاردة من أول ما خلصت 38 دقيقة، أو 34 دقيقة مش فاكر، والخطبة المرة اللي فاتت كانت 33 دقيقة. أنا عاوز أقول له أنت قاعد تحسب؟ فقدر أن الخطبة بتتسجل عندي، وأنا بفتح التسجيل من قبل ما أدخل المسجد، وبعدين بطلع على المنبر وأقعد وأتأذى شوية بعد الأذان وأقوم أخطب، فطلعت قلت له: ده التسجيل كله على بعضه 32 دقيقة، جت منين 38 دقيقة دي؟ قال: بقولك إحنا حاسبينها على.. بيجادل في الدقائق. الشاهد يا جماعة إيه الإشكال في الدقائق؟ سيدي خلاص يعني 3 أو 4 دقائق وهو شاب صغير، الشاهد يا جماعة أقعد في بيت ربنا، أقعد وانوِ اعتكاف، أقعد وامسك المصحف.
﴿فِي بُيُوتٍ أَذِنَ اللَّهُ أَن تُرْفَعَ﴾ ركزوا بقى يا جماعة؛ لأن ده برضه فائدة مهمة جداً: ﴿أَن تُرْفَعَ﴾ رفعاً حسياً ورفعاً معنوياً، ﴿أَن تُرْفَعَ﴾ أن تشيد وتبنى، وكذلك ﴿أَن تُرْفَعَ﴾ أن تعظم. ما تقعدش في بيت ربنا وعمال تجيب في صور نساء متبرجات على تليفونك، لا تقول لي يا شيخ ما بعملش، لا بتعمل، ده أنت وأنت بتقلب على الفيسبوك بيحصل، جوه بيت ربنا، أنت لست معظماً لبيت الله عز وجل، والله أذن أن يرفع بيته، أن يعظم بيته. ما تقعدش في بيت ربنا وتتشات على الواتساب على دنيا؛ لأن من تعظيم بيت الله عز وجل أن تجنبه الدنيا، ولذلك الصفقات لا تعمل في المسجد، والتجارات والبيع والشراء، كل ده منهي عنه بنصوص شرعية، حتى الضالة لا تنشد في المسجد؛ لأنها من جملة الدنيا، وبيت الله أذن الله أن يرفع عن ذلك، أن يعظم عن أن تدخله الدنيا. مش حضرتك داخل بيت ربنا وقاعد فيه زي ما أنت قاعد في أوضتك عادي جداً، بتشات مع أصحابي، بسكرول على الفيسبوك، بتشات مع صاحبتي، عادي جداً في المسجد، أين تعظيمك لبيت الله؟ ﴿فِي بُيُوتٍ أَذِنَ اللَّهُ أَن تُرْفَعَ﴾، أنت داخل بيت ربنا، فانت داخل مكان مهيب، مش بنهزر.
إيه تاني تعمل في بيت ربنا؟ عظمت بيت الله عز وجل ونزهته عن أن تأتي فيه بمثل هذه الأمور حتى لو مباحة، مش داخلين نهزر. إحنا عارفين إحنا بنعمل إيه بالضبط، إحنا في الدنيا بره وبعدين داخلين جايبينها من قفاها معانا جوه المسجد، لا إله إلا الله، يا عم سيب الدنيا بره. ده حتى قالوا من أسرار الصلاة أنك وأنت بترفع إيديك كده، ليه بترفع إيديك؟ بترمي الدنيا ورا. الشيخ أسامة حامد كان يقول لنا: وأنت تعمل كده تتخيل الدنيا الكرة الأرضية اتقسمت نصين، وكل نص على ضهر إيدك كده، وروحت عامل كده، ما تبصش خلاص، اترمت خلاص، فانت بترمي الدنيا وراك. فكذلك وأنت داخل بيت ربنا سبحانه وتعالى، خلاص الدنيا وراك. ﴿فِي بُيُوتٍ أَذِنَ اللَّهُ أَن تُرْفَعَ﴾، طب هدخل أعمل إيه بقى ما فيش دنيا؟ ﴿وَيُذْكَرَ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالْآصَالِ﴾ [النور: 36]، أنت داخل تذكره سبحانه وتعالى وتصلي، يسبح له فيها يعني يصلي له فيها.
هذا المدد هتلاقيه في البيوت، قيل الشجرة في البيوت، هذه الشجرة اللي احنا قلنا الوصف بتاعها في البيوت، في هذه البيوت، أو المصباح تجده في هذه البيوت، أو المشكاة تجدها في حيطان البيوت. المهم أقوال كتير، كل الأقوال دي ممكن ما تستقم مع الوصف اللي وصفناه الأول، لكن هذا كله قيل. في الآخر يا شباب عاوز النور، عاوز مصدر النور، عاوز إمداد النور، فين؟ في بيوت، في المسجد. احضر أونلاين براحتك وجميل وخير وكل حاجة، لكن لك حظك من بيوت الله عز وجل، أقل شيء الفرائض الخمسة. ده أقل شيء، يعني إيه أقل شيء يا جماعة الشباب اللي قاعدين يسمعوني دلوقتي؟ يعني من النهارده ما فيش حاجة اسمها ما بصليش فرض في المسجد. ما فيش حاجة اسمها كده، الخمس فرائض في المسجد. ﴿وَلَقَدْ رَأَيْتُنَا وَمَا يَتَخَلَّفُ عَنْهَا إِلَّا مُنَافِقٌ مَعْلُومُ النِّفَاقِ﴾، مين اللي قال كده؟ ابن مسعود، ﴿وَلَقَدْ رَأَيْتُنَا يُؤْتَى بِالرَّجُلِ يُهَادَى بَيْنَ الرَّجُلَيْنِ حَتَّى يُقَامَ فِي الصَّفِّ﴾، عارفين يعني إيه ده؟ واحد مش قادر يمشي فواحد ماسكه من اليمين وواحد ماسكه من الشمال ورجليه بتجر في الأرض كده، ده معنى يهادى. ابن مسعود شاف ده بعينيه، الصحابة شافوا ده، ﴿يُؤْتَى بِالرَّجُلِ يُهَادَى بَيْنَ الرَّجُلَيْنِ حَتَّى يُقَامَ فِي الصَّفِّ﴾.
أنا دلوقتي مش جاي أقول لك هو حكمها إيه في المسجد، ولا يعنيني اختلاف العلماء دلوقتي خالص، أنا جاي بكلم واحد عاوز نور، فما ناش فرض هتتعمل، سنة هتتعمل زيها زي الفرض، ليه؟ أنا راجل عاوز نور، فالخمس فرائض في بيت ربنا سبحانه وتعالى. خلصت الفرض على طول بقى رجلك بتأكلك تخرج بره؟ رايح فين يا ابني؟ رايح فين؟ اقعد. الشيخ الدبيسي -حفظه الله- كان زمان كنا نروح له، خلص الخطبة وبعدين كان عنده درس في المجموع للإمام النووي، يقعد بقى وبعدين أذكار، فمثلاً خلص الدرس ووقت الأذكار فيلاقي واحد يقول رايح لمين؟ طالع لمين؟ اقعد، تعال اقعد، وراك إيه؟ اقعد. حرمنا إحنا والله هذا الجيل كان جيل مربي، دلوقتي تشكلنا إحنا، لا حول ولا قوة إلا بالله، الموضوع باظ خالص. فالمهم عاوزين كده، عاوزين واحد نقف نصلي وراه، فنخلص على الفجر وخلاص، حد وراه حاجة؟ خليك. الشيخ أسامة والشيخ الدبيسي عاوزين الناس دي كده، يعني عاوزين ناس تيجي تصلي ورايا، خلاص بقى ناقص ركعة الوتر وهو ختم، فالناس فرحانة، يقوم إيه جايب البقرة في ركعة الوتر.
فاقعدوا في بيوت ربنا سبحانه وتعالى. أنا بتكلم على مساجد يعني تدخل مسجد الشيخ أسامة عبد العظيم، ما فيش بقى كده، ما فيش مكان لرجل، الناس دي جاية تعمل إيه؟ جاية تصلي من المغرب للفجر في رمضان، ما همش بيصلوا ما بيعملوش أي حاجة غير إن هم يصلوا. فأنا اللي عاوز أقوله يا جماعة في ناس بتعمل ده، في ناس عايشة بينا بتعمل ده، فهم مش أجدع مننا، نحاول بقى أنا وأنتم نتشبه بيهم. فين هنلاقي ده؟ في بيوت، خلي بالكم الناس دي هيجي ذكرها بعد شوية لأننا محتاجين ناخد الصورة كلها على بعض، الصورة التشبيهية دي: ﴿فِي بُيُوتٍ أَذِنَ اللَّهُ أَن تُرْفَعَ وَيُذْكَرُ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالْآصَالِ * رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ﴾ [النور: 36-37].
هو البيع ده مش من التجارة؟ هي التجارة بيع وشراء، صح ولا لا؟ فربنا قال: ﴿لَّا تُلْهِيهِمْ تِجَارَةٌ وَلَا بَيْعٌ﴾، طب ليه؟ قالوا إن البياع دائماً هو حرص على إتمام الصفقة، في الغالب البياعة. وهنا ذكر البيع بعد التجارة مع أن البيع أصلاً هو جزء من التجارة؛ علشان كده لا تلهيهم تجارة، حتى لو هو اللي بيبيع، ما تلهيه تجارته، لا تلهيهم تجارة ولا بيع. وعشان كده في سورة الجمعة: ﴿فَاسْعَوْا إِلَىٰ ذِكْرِ اللَّهِ وَذَرُوا الْبَيْعَ﴾ [الجمعة: 9]؛ لأن اللي هيذر البيع هيذر الشراء من باب أولى.
فدول لا تلهيهم تجارة ولا بيع، يعني ما بيجوش قاعدين في المسجد على طول؟ والقول الآخر وهو الأقوى من حيث الدليل في هذه الآية أن لا، دول تجار لكن لا تلهيهم تجارة ولا بيع عن ذكر الله، هم تجار، وذلك كان من السلف من إذا رأى أهل السوق وقت الأذان يتركون الأسواق ويذهبون إلى المساجد، يقول في هؤلاء نزلت، هم دول لا تلهيهم تجارة ولا بيع عن ذكر الله وإقامة الصلاة وإيتاء الزكاة. يبقى إحنا دي وظيفة تانية ليك، يبقى ده كله في بيوت ربنا في المساجد يا شباب. الوظيفة الأخيرة اللي هي إيه؟ تدور على دول فين دول عشان تبقى معاهم وتلزق لهم، دي أول حاجة، وبعد شوية تبقى واحد منهم، اللي ما بتلهيش تجارتك ولا منصبك ولا أي حاجة عن ذكر الله وإقامة الصلاة وإيتاء الزكاة، تسمع الله أكبر تسيب كل حاجة وتروح على المسجد. في درجة أعلى من كده، إن أصلاً الله أكبر ما تسمعها غير وأنت في المسجد، ده أنت حريص تبقى في المسجد قبل الأذان.
﴿فِي بُيُوتٍ أَذِنَ اللَّهُ أَن تُرْفَعَ وَيُذْكَرُ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالْآصَالِ * رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ يَخَافُونَ يَوْمًا تَتَقَلَّبُ فِيهِ الْقُلُوبُ وَالْأَبْصَارُ﴾ [النور: 36-37]. أشمعنى القلوب والأبصار؟ أوعوا تنسوا يا جماعة أن آية النور جت في سورة النور، سورة النور الموضوع الرئيسي بتاعها إيه أصلاً؟ العفاف وغض البصر، والحتة دي أهم عنصرين فيهم القلب والبصر، إطلاق البصر وشهوة القلب، دول أهم عنصرين. شوفوا بقى إيه اللي هيحفظ قلبك وبصرك هي الحاجات دي، ﴿يَخَافُونَ يَوْمًا تَتَقَلَّبُ فِيهِ الْقُلُوبُ وَالْأَبْصَارُ﴾. والله يا جماعة لو ما فكرناش غير في الختم ده بس، ختم الآية ده كفاية جداً أنها تشيل شهوة قلبك، بلاش تشيل لأن شهوة القلب مطلوبة، تضبط شهوة القلب وتضبط نظر العين.
أنا هقول لكم تفسير واحد مما قيل: تتقلب فيه القلوب والأبصار على الجمر، أعاذنا الله وإياكم، تتقلب على جمر النار، أنت متخيل المعنى ده؟ أن قلبك بيتشوي وبيتقلب وأنت مش ميت في النار، ﴿لَا يَمُوتُ فِيهَا وَلَا يَحْيَىٰ﴾ [الأعلى: 13]، لكن هو ما هو بميت، قلبك بيتقلب على الجمر، عينك بتتقلب على الجمر، لو أوليت هذا المشهد حقه من التأمل والتدبر، هتلاقي قلبك ده راح يشتهي حرام، ولا عينك دي رايحة تنظر لحرام. فاكرين المثال اللي قلته لكم؟ قلت لكم يا جماعة اللي يخرج الشهوة من القلب قلنا لكم حاجة من اثنين، منهم خوف مقلق، وقلنا لكم مثال: لما النبي عليه الصلاة والسلام قال لعائشة رضي الله عنها أن الناس تحشر حفاه عراة غُرلاً، فعائشة استشكلت الأمر، يعني إيه عراة؟ ينظر بعضهم إلى بعض؟ ماذا قال النبي؟ الأمر أشد من ذلك، ينظر إيه وما ينظر؟ هي النساء كلها عراة، هتنظر في أي حد غير نفسك؟ نفسي نفسي، تبحثوا عن نجاة نفسك، الأمر أشد من ذلك.
قلنا لكم مثال في الدنيا، فاكرين قلنا لكم واحد وقف بالمسدس على دماغك وقال لك تخرج الآن امرأة من هذا الباب هي أجمل نساء العالمين، لو عينك طرفت مش بصيت -هقتلك- عينك طرفت بس، مين منا عينه هتطرف؟ ولا واحد. الله! ده أنت اللي ما بتصدق تشوف صورة في إعلان ولا واحدة معدية، إيه اللي حصل لك؟ دي أجمل امرأة في الكون، خايف، الخوف هذا الخوف المزعج أو المقلق، المهم الخوف ده طرد شهوة قلبك. انتهت، حديث النبي عليه الصلاة والسلام: «لو تعلمون ما أعلم، صلوا على النبي النهاردة يوم جمعة يعني نكثر من الصلاة عليه صلى الله عليه وسلم، لو تعلمون ما أعلم لضحكتم قليلاً ولبكيتم كثيراً، وكذا وكذا، ولما تمتعتم بالنساء على الفرش».
الخوف يمنع، يحجم، فختم الآية ده مرعب والله يا جماعة. وله مناسبة، شمعنى القلوب والأبصار؟ إحنا أصلاً كلامنا في إيه؟ ما تنسوش، آية النور دي جت أصلاً عقيب ذكر غض البصر: ﴿قُل لِّلْمُؤْمِنِينَ﴾ و﴿قُل لِّلْمُؤْمِنَاتِ﴾، بعديها عقيبها يعني بعديها بشوية ﴿اللَّهُ نُورُ السَّمَاوَاتِ وَالْأَرْضِ﴾ [النور: 35]. وقلنا إن في علاقة هنا، إن البصر من أشد المنافذ تأثيراً في هذا القلب؛ أصلاً اللي بيعمل الران، وبيعمل الطبع، وبيعمل الختم، والهباب اللي بيحصل على القزاز ده، هو اسمه كده، اسمه هباب، يعني اللي بيحصل على الزجاج ده من أوسع المنافذ البصر. ولذلك أتت آية النور عقيب آية غض البصر، مش عارف أغض، مش عارف ما هيش تتقلب فيه القلوب والأبصار. الختم ده لوحده هيجيبك لبيت ربنا، وهيخليك تقعد خايف تطلع؛ مش بقى يعني حتى لو مش حابب تقعد فإنت خايف تطلع.
كده ناخدها من بره لجوه، دقيقتين نختم بيهم الدرس. جسمك من غير قلبك ملوش أي لازمة، حياة البهائم، أكل وشرب وجماع، حياة بهائم. خلاص، هو ده المشكاة؛ قلبك زجاجة صافية حافظ عليها من الخارج، لا معاصي ولا شهوات ولا شبهات، ومن الداخل المصدر اللي إنت جايبه يبقى مصدر نقي. المصدر الاشتعال في قلبك له مدد يمده، حافظ على هذا المدد، لأن بانقطاع هذا المدد هينطفئ النور، ولو انطفأ النور إنت في ظلمات حالكة. هذا المدد أساسه القرآن، كلام الله، شرع الله سبحانه وتعالى.
فين هتلاقي كل الكلام ده؟ في بيوت الله عز وجل، مع من؟ مع هذه الثلة المباركة التي وصفها الله عز وجل، ناس بتذكر، بتعظيم، بتصلي؛ ﴿لَا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ﴾ [النور: 37]، لا تلهيه دنيا عن هذه الأمور. أقول قولي هذا، وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.