بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي، وأزواجه أمهات المؤمنين، وذريته وأهل بيته، كما صليت على آل إبراهيم إنك حميد مجيد. أما بعد:

المجلس العاشر من هذه السلسلة المباركة "قبسات نور". في الحقيقة ما كان في اسم في دماغي، فحكيت لهم إحنا عاوزين نتكلم عن إيه فسموه كده. في الحقيقة النهارده عاوزين نعقد مقارنة بين مشهدين: مشهد اتكلمنا عنه بالتفصيل الدرس اللي فات، وهو مشهد آيات النور: ﴿اللَّهُ نُورُ السَّمَاوَاتِ وَالْأَرْضِ﴾. الكلام ده اتكلمنا عنه المرة اللي فاتت، ومشهد ذكره الله عز وجل بعد هذه الآية. طبعاً الآية دي هي آيتان، ﴿فِي بُيُوتٍ أَذِنَ اللَّهُ أَن تُرْفَعَ وَيُذْكَرَ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالْآصَالِ * رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ يَخَافُونَ يَوْمًا تَتَقَلَّبُ فِيهِ الْقُلُوبُ وَالْأَبْصَارُ﴾ [النور: 36-37].

ثم ذكر الله عز وجل مثالين لأعمال الكفار، والحقيقة المثالين دول برضه محتاجين نقف معاهم لأن فيهم صورة عجيبة، صورة بالصاد يعني صورة المثل عجيبة. أنتم فاكرين لما قعدنا نتكلم عن صورة المثل الذي ضُرِب للنور، ساعة لما قلنا لكم مثلاً ضوء الشمس أقوى ولا ضوء الذكر؟ طيب ليه ما قالش الشمس؟ فاكرين؟ صورة المثل مهم إن إحنا نتأمل كل كلمة موجودة، خصوصاً في المثال بتاع المرة اللي فاتت لما قلنا لكم تكرار الكلمات، فاكرين؟ الزجاجة تتكرر مرتين والمصباح يتكرر مرتين، وكان في معنى إن ركزوا في الزجاجة إيه هي الزجاجة وإيه هو المصباح، فاكرين الكلام ده؟

كذلك المثالين اللي ضربهم ربنا سبحانه وتعالى لأعمال الكفار في غاية العجب، فقال الله عز وجل: ﴿وَالَّذِينَ كَفَرُوا أَعْمَالُهُمْ كَسَرَابٍ بِقِيعَةٍ يَحْسَبُهُ الظَّمْآنُ مَاءً حَتَّىٰ إِذَا جَاءَهُ لَمْ يَجِدْهُ شَيْئًا وَوَجَدَ اللَّهَ عِندَهُ فَوَفَّاهُ حِسَابَهُ وَاللَّهُ سَرِيعُ الْحِسَابِ﴾ [النور: 39]. ده أول مثال. أو ﴿كَظُلُمَاتٍ فِي بَحْرٍ لُّجِّيٍّ يَغْشَاهُ مَوْجٌ مِّن فَوْقِهِ مَوْجٌ مِّن فَوْقِهِ سَحَابٌ ظُلُمَاتٌ بَعْضُهَا فَوْقَ بَعْضٍ إِذَا أَخْرَجَ يَدَهُ لَمْ يَكَدْ يَرَاهَا وَمَن لَّمْ يَجْعَلِ اللَّهُ لَهُ نُورًا فَمَا لَهُ مِن نُّورٍ﴾ [النور: 40]. وده تاني مثال.

الحقيقة المثالين دول في غاية العجب، وعاوزين بقى نعقد مقارنة بين مثال النور، أو إن شئت فقل مثال للمؤمن ومثال للكافر. وأول حاجة ناخد بالنا منها كده في المثالين يا جماعة، هو الحالة النفسية اللي هيكون صاحب المثال واقع فيها. تخيلوا المشهد الأول اللي اتكلمنا عنه المرة اللي فاتت بالتفصيل؛ أولاً أنت قاعد في "بيت"، أنتم عارفين يا جماعة كلمة "البيت" دي، قالوا البيت من البيتوته، البيتوته إنك لما تنام بالليل كده دي بيسموها البيتوته. فهذا لا يكون إلا فيه نوع طمأنينة؛ الإنسان ما يعرفش ينام ويرتاح في النوم إلا لو هو مطمئن مرتاح.

أول حاجة أنت في بيت، بدايه كده أنت في بيت، وبعدين تخيل بقى المشهد ده: أنت في بيت، وفي ضوء في هذه يخرج من هذا المصباح اللي في الزجاجة اللي في المشكاة، فمضيء المكان. وبعدين ما أنت لوحدك، ذكر الله عز وجل رجال لا تلهيهم، فأنت تخيل المشهد إنك قاعد في بيت من بيوت الله عز وجل فيه هذا الضوء، وحولك ناس تأنس بهم ويأنسون بك، ده مشهد. ولما تعيش المشهد ده تشعر بتلك الطمأنينة، خصوصاً إيه الأعمال اللي بتحصل حواليك؟ ربنا قال إيه؟ ﴿فِي بُيُوتٍ أَذِنَ اللَّهُ أَن تُرْفَعَ وَيُذْكَرَ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالْآصَالِ﴾ [النور: 36]. أنت قاعد في مكان سامع تسبيح، سامع صلاة، سامع ذكر، سامع قرآن، حواليك ناس، رجال لا تلهيهم تجارة ولا بيع عن ذكر الله، مش قاعد لوحدك. المكان مضيء، إضاءة لا هي قوية جداً تزعج، ولا هي خافتة جداً فلا تكاد تبصر شيئاً. هو ده الحالة النفسية بتاعة الصورة الأولى.

الصورتين التانيين بقى، أول صورة قال الله عز وجل: ﴿وَالَّذِينَ كَفَرُوا أَعْمَالُهُمْ كَسَرَابٍ بِقِيعَةٍ﴾. يعني إيه قيعة الأول يا جماعة؟ القيعة هي القاع، الأرض المستوية المنخفضة المستوية. عارفين لما تيجوا في الصيف في شدة الحر في الصحرا، ممكن بعيد تحس إن في مياه، تيجي تقرب ما تلاقيش المياه. طب هو إيه ليه شفت مياه؟ لما الهواء اللي بيبقى قريب من الأرض بيبقى سخن، وبعدين الهواء اللي فوقيه أبرد وهكذا طبقات، يعني كل طبقة أقرب للأرض هي أسخن لأن الرمل سخن. طيب هو الهواء السخن كثافته أقل ولا أكبر من الهواء البارد؟ أقل كثافة، كل ما يسخن الهواء الكثافة تقل، فيبتدئ الهواء اللي سخن اللي هو تحت ده عاوز يطلع فوق، والطبقة اللي فوق عاوزة تنزل وهكذا، فيبتدئ يعمل كأن فيه تحركات، كأن فيه أمواج. وعشان كده قالوا السراب ده، عارفين الحمام أو سرب الطيور متحرك؟ فقالوا السراب اتسمى كده علشان يظهر فيه الحركة. وبعض الناس في بعض الأماكن لما بياخدوه سفاري يجيبوهم كده ويطلعوهم جبل يقول لهم بصوا بحر أهو، وفعلاً الناس اللي واقفين مع الراجل ده يفتكروه بحر فعلاً وهو لا بحر ولا حاجة، هو بس الحرارة عملت الحركة اللي إحنا، هو ده السراب.

أول حاجة هنا اتفاجئنا يا جماعة، إن المثالين اللي معانا هتجد إن ربنا لما ضرب المثل، ضرب المثل بواحد واقف لوحده. عيشوا يا جماعة النفسية دي، عيشوا عشان نعرف بقى يعني إحنا دلوقتي هنرجع نقول في الآخر الدرس اللي عاوزين نطلع بيه النهارده إيه: فكرة إن الإنسان كلما اقترب من الرب سبحانه وتعالى ومن دين الله عز وجل، إزاي أعيش في طمأنينة ويكون فيه أمان في الآخرة. فإحنا عاوزين نطلع من الأمثلة دي نفهم، لأن لو كان المقصود فقط فكرة إن الأعمال خانتهم أحوج ما يكونون إليها، والأعمال دي كانت على ضلال ولا كذا ما كانش ليه لازمة بقى المثل ده كله. يعني لو فكرة المثال التاني مثلاً إنه فكرة الظلام وإذا أخرج يده لم يكد يراها، ما هو ده ممكن يحصل في أوضة، مش كده؟ يعني أوضة ضلمة لو إذا أخرج يده لم يكد يراها، لو هي الموضوع بس مسألة عاوزين نوصف ظلام، لكن ربنا سبحانه وتعالى ما عملش كده.

أول حاجة اتفاجئنا إن المثلين لما ربنا ضربهم تكلم فيهما بصيغة المفرد، في حين المثل الأول لما تتأمله تجد إنه فجأة بيظهر لك ﴿رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ﴾، معاك مما يشعرك بهذه الطمأنينة هذه الراحة. المثال الثاني بقى، أو الأول للكفار، ربنا يبدأه بصيغة الجمع: ﴿وَالَّذِينَ كَفَرُوا أَعْمَالُهُمْ كَسَرَابٍ بِقِيعَةٍ يَحْسَبُهُ الظَّمْآنُ مَاءً﴾؛ كده فجأة يتحول الكلام عن واحد ﴿يَحْسَبُهُ الظَّمْآنُ﴾. عيش النفسية دي بقى، واحد لوحده في صحرا، هو ده المثل اللي معانا، واحد لوحده في صحرة وظمآن. ظمآن يعني إيه؟ يعني إما معاه مياه بس بخلان بيها وشايلها على جنب ولا خلاص نفد الماء، وحوش حاجة نفد الماء. وبعدين فجأة لقى مياه بعيد، ﴿يَحْسَبُهُ الظَّمْآنُ مَاءً﴾، فقعد يمد عشان يوصل للمياه دي، وصل للمياه حصل له حاجتين مش حاجة واحدة، ركزوا: أول حاجة اكتشف الخسارة الكبيرة اللي هو كان فيها إنه مالقاش مياه. بس كده؟ يا ريت! تخيلوا بقى الحالة دي: واحد في صحرا وبعدين بص لقى مياه، جري للمياه، مالقاش مياه ولقى غريم، غريم يعني إيه؟ واحد كان هو مدين له بحاجة أو واحد له عنده حاجة؛ ليه عنده فلوس، ليه عنده ثأر، ليه عنده أي حاجة، واقف عند الآية هو رايح له، يعني مش بس ما فيش مياه، لا ده خلاص يعني هو ما فيش مياه ده ظن الهلاك، وجد غريمه! خلاص ده هلاك محقق، مش كده؟ صورة مرعبة، أولاً صورة مقلقة، يعني فيها قلق وفيها... أنت لو تخيلت المشهد ده.

زمان حصل لي كده حاجة، كنت في حديث النبي عليه الصلاة والسلام بيذكر مثلاً في حديث بيقول إن الله أشد فرحاً بتوبة عبده، الحديث بتالي معروف، من رجل كان معه راحلته عليها طعامه وشرابه، وبعدين النبي عليه الصلاة والسلام قصة طويلة، المهم نايم في الصحرا، قام ما لقاش الراحلة اللي هو فالنبي عليه الصلاة والسلام بيقول (صلوا على النبي أنا عمال أتحجج إن أقول اسم النبي عليه الصلاة والسلام عشان نصلي على النبي النهارده الجمعة)، فبيقول إنه ابتدى يطلب الراحلة في كل مكان ما لقاش، الكلمة اللي بعديها بقى كانت بالنسبة لي عجيبة وكنت بضرب كف على كف منها، قال: (فقال الرجل أرجع إلى المكان الذي كنت فيه فأنام لأموت)، فكنت كل ما أقرأ الكلمة دي أتعجب، يعني أقول أي حد في مكانه مش لاقي الراحلة طب ما يمشي، يعني إيه أرجع أنام عشان أموت؟ يعني خلاص، يعني امشي بقى يمكن تتعثر في حد، تتعثر في حاجة، يمكن.

الحقيقة يا جماعة لغاية ما حصل بقى معايا أنا شخصياً موقف إن أنا تهت في صحراء، ما كناش بقى كنا في سفاري وفي الصحرا طالعين في الصحرا، وتعطل بيا الحاجة اللي معايا دي وكلهم مشيوا، وفضلت لوحدي، وحينها فعلاً أنت بتشعر هذا إني أنا يعني أنت بتبص يمين وشمال وورا وقدام ما بتلاقي حاجة، ما فيش أي علم لشيء، كلها رمال صفراء، ما فيش أي معلم يخليك تمشي في اتجاه. حينها أنا وقفت فعلاً لغاية ما الدنيا ليلت، أنا واقف مش عارف أعمل إيه، وفهمت معنى الحديث ده فعلاً، إن هو اللي في الصحرا ده اللي في وسط الصحرا، خلوا بالكم يا جماعة هما المثالين مرعبين فعلاً، اللي في وسط الصحرا ده ده في شدة الحيرة، وفي شدة الحيرة، والراجل اللي بيجري على السراب ده يعني واحد ما هواش بقى خريد في الصحراء ولا ماهر ولا يعرف الطرق ولا، لا ده واحد مش عارف أي حاجة لدرجة إنه ظن السراب ماء، فهو في شدة الحاجة أولاً، في شدة الاضطراب يعني وجل القلب واضطراب القلب عجيب، وبعدين لوحده يعني ربنا سبحانه وتعالى في المشهد ما بيذكر حد معاه، فجأة ﴿يَحْسَبُهُ الظَّمْآنُ﴾ فجأة بقى لوحده كده، واحد لوحده واقف ظمآن، عاوز مياه في شدة الحاجة، وبعدين يروح ما يلاقيش المياه ويلاقي غريم واقف عند المياه كمان! تعال بقى أنا لقيتك تعالى لي، إذا كان في ظن هلاك لا بقى هلاك محقق، انتهت، انتهى الأمر. هذا هو المثال الأول، هنفهم هو مضروب لإيه دلوقتي، بس الصورة دي نفهمها ونعيش نفسيتها، يبقى ﴿كَسَرَابٍ بِقِيعَةٍ يَحْسَبُهُ الظَّمْآنُ مَاءً حَتَّىٰ إِذَا جَاءَهُ لَمْ يَجِدْهُ شَيْئًا وَوَجَدَ اللَّهَ عِندَهُ فَوَفَّاهُ حِسَابَهُ وَاللَّهُ سَرِيعُ الْحِسَابِ﴾ [النور: 39].

الصورة الثانية مرعبة جداً: ﴿أَوْ كَظُلُمَاتٍ فِي بَحْرٍ لُّجِّيٍّ يَغْشَاهُ مَوْجٌ مِّن فَوْقِهِ مَوْجٌ مِّن فَوْقِهِ سَحَابٌ ظُلُمَاتٌ بَعْضُهَا فَوْقَ بَعْضٍ إِذَا أَخْرَجَ يَدَهُ لَمْ يَكَدْ يَرَاهَا﴾ [النور: 40]. إيه الصورة دي الأول يا جماعة؟ عاوزين نفهم بقى شوية حاجات كده في الآية. بحر لُجّي، يعني إيه لجي؟ ما هو الآية ما جتش كده، ما جتش في بحر يغشاه موج، ربنا قال في بحر لجي، فلازم نفهم يعني إيه؟ وإيه لازمة الكلمة دي هنا؟ لجة البحر يا جماعة هو المكان الذي لا ترى منه أرضاً ولا جبلاً، عارفين المكان لما تبقى في وسط البحر، زي المثال بتاع الصحراء اللي قلته لكم من شوية كده؛ يمين شمال ورا قدام مش شايف حاجة، مياه مش الشط أهو قريب، لا لا لا ده أنت مش شايف لا أرض، ده تعريف اللجة، ولا جبل، أنتم عارفين لأن الجبل بيبان من مسافة أبعد، يعني أنت ممكن ما تشوفش أرض لكن تشوف الجبل، لا ده أنت مكان مش شايف فيه حاجة خالص من كل الجهات، بحر.

فعيش النفسية دي بقى، أنت دلوقتي في مكان، وخلي بالكم في مكان ده يعني إيه؟ يعني في قارب، بعضهم قال كده لكن بعضهم قال لا، الآية مش كده الآية إنه في القاع، قال ﴿أَوْ كَظُلُمَاتٍ فِي بَحْرٍ لُّجِّيٍّ﴾ أنت جوه البحر، ولذلك بعض المفسرين هنا ابتدى يتكلم على فكرة إن قاع البحر العظيم ده بيكون أشد الأماكن ظلاماً. يعني هو بيتكلم فكرة إن المثال اللي إحنا بنضربه ده بنضربه لواحد في قاع البحر ويعيش برضه نفسية الراجل اللي في قاع البحر ده، اللي عمال خلاص، يعني ده عامل إزاي؟ ده حالته عاملة إزاي؟ وبعدين هل في أمل في النجاة بقى؟ يبقى ظلمات في بحر لجي، ظلمة، وتخيل الظلمة دي ظلمة حالكة، من فوقه موج، ﴿أَوْ كَظُلُمَاتٍ فِي بَحْرٍ لُّجِّيٍّ يَغْشَاهُ مَوْجٌ مِّن فَوْقِهِ مَوْجٌ﴾ الطبيعي يا جماعة في الموج إنه بيبقى فوق بعضه ولا ورا بعضه؟ أه، فكأن الموج من سرعة هذا الموج يركب بعضه بعضاً، الموج فوق الموج، الموج فوق.

المشهد احنا هنفهم إيه الموج ده؟ بيرمز لإيه؟ بس المشهد يعني عيشوا عيشوا. الراجل ده شكله إيه اللي في الحالة دي؟ هو في بحر لُجِّي، لا شايف أرض ولا جبل ولا أي حاجة، يمين شمال ورا قدام، وفي الظلام. وبعدين الموج عمال مش ورا بعضه، ده راكب على بعض، ﴿يَغْشَاهُ مَوْجٌ مِّن فَوْقِهِ مَوْجٌ﴾ [النور: 40]. طيب يبقى أمل إن القمر هينور، النجوم من فوقه سحاب، فكان السحاب قد غطى على نور السماء، ولذلك قال الله عز وجل: ﴿ظُلُمَاتٌ بَعْضُهَا فَوْقَ بَعْضٍ إِذَا أَخْرَجَ يَدَهُ لَمْ يَكَدْ يَرَاهَا﴾ [النور: 40]. أقرب شيء ليك تطلع إيدك كده مش شايفها! هو أصلاً يا جماعة فكرة الظلام الدامس ده الحالك ده فكرة لوحدها مرعبة، أصلاً إن مفيش أي ضوء. عارف أنت لو في حتة زي كده بس وسمعت الخبطة، تقعد بقى دماغك تودي وتجيب؛ تخيل أنت في البحر اللي أوصفه كده فنفسك عاملة إزاي.

ومرة أخرى نفاجأ إن الكلام هنا بصيغة المفرد، ما حدش معاك، ﴿إِذَا أَخْرَجَ يَدَهُ لَمْ يَكَدْ يَرَاهَا﴾، إحنا بنتكلم عن واحد، يعني أنت واحد لوحده في هذه الأجواء. نرجع تاني بقى بسرعة، خلاص عشنا النفسية دي، ارجع بقى قارن بين النفسيتين: واحد قاعد في بيت مضيء، لا هي الإضاءة المزعجة ولا الإضاءة الخافتة التي لا تضيء، إضاءة كافية، وبعدين معه ناس والجو مشحون بهذه الشحنات الإيمانية، ذكر وتسبيح وقرآن وصلاة. وبين هذين المثالين، هي دي القصة يا جماعة. أول قصة فكرة إن أنت معاك ناس وهم، والكافر ده لوحده. هو الحقيقة الكافر ده لوحده، إمتى ده هيحصل؟ هيحصل في الآخرة، والله عز وجل بين ذلك: ﴿الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ﴾ [الزخرف: 67].

ففكر إنك في هذا اليوم المزعج المقلق، يوم القيامة، الخلة هذه موجودة بقدر. وبعدين هيحشر أهل الإيمان وأهل التقوى مع بعض كده ويأتون على الله عز وجل بوصف عجيب، قال الله عز وجل: ﴿يَوْمَ نَحْشُرُ الْمُتَّقِينَ إِلَى الرَّحْمَٰنِ وَفْدًا * وَنَسُوقُ الْمُجْرِمِينَ إِلَىٰ جَهَنَّمَ وِرْدًا﴾ [مريم: 85-86]. وفد، طبعاً كلمة وفد فيها الجماعة وراكبين كمان، قال هيبقوا راكبين نجب، جمال، خلاص صفتها إيه بقى ولا هيئاتها إيه؟ المهم ده هيحصل قاله ربي سبحانه وتعالى. طب التانيين هيبقوا بيعملوا إيه؟ بيلعن بعضهم بعضاً، ربنا اللي ذكر ده، مش كده؟ ويتبرأ بعضهم من بعض: ﴿وَلَقَدْ جِئْتُمُونَا فُرَادَىٰ كَمَا خَلَقْنَاكُمْ أَوَّلَ مَرَّةٍ وَتَرَكْتُم مَّا خَوَّلْنَاكُمْ وَرَاءَ ظُهُورِكُمْ وَمَا نَرَىٰ مَعَكُمْ شُفَعَاءَكُمُ الَّذِينَ زَعَمْتُمْ أَنَّهُمْ فِيكُمْ شُرَكَاءُ لَقَد تَّقَطَّعَ بَيْنَكُمْ﴾ [الأنعام: 94]. قراءة حفص يعني اللي كلنا عارفينها، يعني لقد تقطع ما بينكم من الود والقرابة والصلة، يعني وصلكم الذي كان بينكم في الدنيا. ففكرة إن في المثال الأول أنت معاك ناس بتسبح، والمثال التاني فجأة الكافر ده لوحده، ظمآن لوحده، أخرج يده لوحده، ده حاصل يا هيحصل يوم القيامة.

فلتكثر من هذه الخلة النافعة، يبقى أنت في الدنيا شلة الإنس مش نافعك في الآخرة حاجة، مش نافعك وهتتبرأ من بعض. هكذا قال الله عز وجل، الناس اللي بتبعدك عن الصلاة، الناس اللي بتبعدك عن حجابك، الناس اللي بتجرأك على محارم الله عز وجل، على شرب، على سكر، على زنا، على مصاحبة، على أي حاجة، خلة غير نافعة وستتبرأ منها يوم القيامة، ويلعن بعضهم بعضاً يوم القيامة. فلتكثر من هذه الصحبة بقى اللي هي مين اللي اتكلمنا عنها المرة اللي فاتت؟ ﴿رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ﴾ [النور: 37]، ناس لا بتبيع ولا بتشتري وقاعدة في المساجد، مش كده؟ ما هو ﴿لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ﴾، يبقى سايبين التجارات وسايبين الدنيا وقاعدين في بيوت ربنا. قلنا ده قيل، لكن الجمهور على أن هؤلاء أناس يتجرون، دي ناس بتتاجر، ناس تجار.

أنتم عارفين يا جماعة التجارة من أكتر الحاجات اللي يتعلق بها القلب، يعني أكتر من الوظيفة؛ ليه؟ لأن الوظيفة أنت خلاص أنت مرتبك ثابت في الآخر، يعني أنت ماشي حتى لو في مثلا بونص ولا بتاع، هيروح بس أنت ليك مرتبك اللي في آخر الشهر بتأخده، فالدنيا أكثر أماناً. التاجر مش كده، التاجر بالذات لو بيتاجر في رأس ماله، هو فاهم كويس جداً إن اللحظة بتفرق إزاي، الكلمة بتفرق. وعلشان كده قلنا لكم المرة اللي فاتت، مين اللي بيكون أحرص على إتمام الصفقة، البايع ولا المشتري؟ البايع، ليه؟ لأن هي دي الصفقة. عشان كده هنا قال إيه: ﴿رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ﴾، ما هي التجارة بيع وشراء، ليه ربنا قال بعد تجارة بيع؟ ما هو خلاص قلنا لأن البائع دائمًا أحرص على إتمام الصفقة من المشتري.

أنا ليه بقول الكلام ده؟ علشان لما ده بيحصل لهؤلاء الرجال إذا كانوا تجاراً، فلو كان طالب بقى واحد في الثانوية، لا من باب أولى لا تلهيك مذاكرتك عن ذكر الله وإقام الصلاة وإيتاء الزكاة. واحد في وظيفة في شركة، في مصنع، في محل في أي حاجة، واحدة في بيتها، ﴿رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ﴾ [النور: 37]، هي دي الفئة اللي بندور عليها. يعني إيه بندور عليها؟ يعني أولاً عاوزين نكون إحنا منها، عاوزين نكون ناس مجرد ما تسمع حي على الصلاة، حي على الفلاح، تترك كل شيء. بعض السلف روي عنه أنه كان يعمل حداداً، يقعد بقى يدق على الحديد، فروي عنه أنه كان ربما رفع المطرقة اللي بيطرق بها دي فسمع النداء، فقفلت من يده، يعني رفع كده المطرقة عشان هيدب على الحديد، الله أكبر، يسيبها، ما يرجعش إيده يحطها، مبالغة في المسارعة إلى إجابة النداء، الله أكبر، يروح راميها كده إيه، لو هتعملوا ده بس ركزوا ما يكونش في حاجة وراكم ولا بتاع.

لا تلهيهم تجارة ولا بيع عن ذكر الله، لا عمل ولا تجارة ولا أي شيء. قلنا لكم في درجة أعلى من دي اللي هي إيه المرة اللي فاتت؟ أيوه ما هو لو مش عارفين يبقى ما عملناش يا جماعة. أبو هريرة رضي الله عنه كان واحد يجي يقعد يسأله عن أحاديث، وأبو هريرة من المكثرين، عندنا كم واحد من المكثرين؟ سبعة، أحسنت. فكان أبو هريرة من المكثرين عنده أحاديث كتير، ليه؟ أشمعنى أبو هريرة عنده أحاديث كثيرة؟ بقية الصحابة كان ده بيتجر وده كذا وده كذا، وأبو هريرة هو قاعد للنبي عليه الصلاة والسلام، فأخذ عنه علماً كثيراً. المهم فكان واحد يجي يقعد يسأله في الأحاديث: قل لي حديث، قل لي حديث، فابو هريرة مرة قال له: أتعمل بكل ما تسمع؟ فقال: لا، قال: فلم تكثر من حجج الله عليك؟ ده معناه إيه؟ معناه إنك ما تسمعش ولا معناه إنك تعمل؟ عشان بس الناس بتفهم برضه، يقولك يبقى أقوم أمشي بقى من الدرس، لا هو مش كده، أبو هريرة بيربيه بيقول له اتعلم بس اعمل، فاعمل ولو بالعشر، كالزكاة، تعلم العلم من ظلمات، تعمل بالعشر، يعني من كل 40 حديث، فاعمل ولو بالعشر، كالزكاة، تعلم العلم من ظلمات.

يا أهل الحديث أدوا زكاة الحديث، لو قلنا بقى ربع العشر، الزكاة طبعاً معروفة ربع العشر، مش كده؟ أدوا زكاة الحديث، فلو هنطلع ربع العشر يبقى أنت عاوز تعمل بكم حديث من كل كام؟ يعني أٌقل رقم صحيح واحد من الـ 40، حد فاهم حاجة يا جماعة؟ الزكاة ربع العشر دي مفهومة، أقل رقم صحيح يخرج لك كام؟ يبقى نجيب كام حديث عشان نطلع منها رقم صحيح؟ عشان كده دي واحدة من الحاجات خلت العلماء يصنفوا الأربعينيات. حد فاهم حاجة؟ عارفين الأربعين النووية مشهورة، أشمعنى رقم 40؟ اتقال في حاجات، في حكم، دي أصل مش بس الإمام النووي يا جماعة اللي ألف 40، احنا عندنا علماء تانيين ألفوا أربعينيات، بس هي الأربعين النووية كتب لها القبول والانتشار. أشمعنى رقم 40؟ من الحاجات اللي اتقالت فيها إنه أقل رقم ليه ربع عشر صحيح، فكان النووي بيقولك إيه: خد 40 حديث، اعمل ولو بحديث، تكون قد أديت زكاة الأربعين.

إيه اللي جاب بقى الكلام ده كله؟ إن أنا قلت لكم المرة اللي فاتت في درجة أعلى من درجة إنك تسمع الله أكبر تروح المسجد، فقلت لكم أنتم لو مش فاكرينها النهاردة قلت لو مش فاكرين يبقى ما حدش عمل بيه، اللي هي إيه بقى الدرجة دي؟ إن الأذان ما يأذنش غير وأنت في المسجد، المؤذن ما يقولش الله أكبر غير وأنت جوه بيت ربنا سبحانه وتعالى. وبعدين قلنا في درجة أعلى، إنك على طول في المسجد ما بتخرجش غير للضرورة، فاكرين؟ أقول لكم آه الناس كده تجرك: تعال عندك جامعة، تعال عندك شغل، لا سيب الجامعة، لا بروح الشغل، بس أنا بتلكك، أنا بتلكك إني أشوف فين بيت ربنا في الحتة دي عشان أروحه أقعد فيه. ساعتها لما قلت لكم: موديين ابنك التمرين، فاكرين؟ واديته تمرين وأنت في مسجد النادي في بيت ربنا؛ ليه؟ ما هي النور هناك، النور هناك، بره ظلام، بره ظلام، مشكلة، إحنا مش بنشوف النور والظلام، بره ظلام، بره تبرج، بره سفور، بره غيبة وبره نميمة، بره بيت ربنا، ظلام، اجري على النور. في الجامعة السكشن اتلغى في المسجد، أنا في المسجد، لا بقى في البوفيه ولا في الكافيتيريا ولا في الجنينة ولا ترنيب، ولا حد هنا في هندسة، اللعبة الرسمية هندسة مش كده ترنيب، أنا فين؟ في المسجد، في بيت ربنا على طول. طب في البريك؟ في المسجد، مفيش صلاة في المسجد، أنا في المسجد، أنا في المسجد.

فيبقى ده أول حاجة، أول فكرة عاوزين نخرج بـ "المقارنة الصور"، إن إحنا نكثر من هذه الثلة المؤمنة اللي هتنفعنا يوم القيامة ولها شفاعة تنفعك يوم القيامة، اللي هي دي صفتهم بقى: ﴿لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ يَخَافُونَ يَوْمًا تَتَقَلَّبُ فِيهِ الْقُلُوبُ وَالْأَبْصَارُ﴾ [النور: 37]. دول أحوالهم هتبقى إيه؟ هيبقوا قاعدين بيكلموك في الكورة، وقاعدين بيكلموك في البنات، وقاعدين بيكلموك في الشرب والضرب؟ أكيد مش دي حوادثهم، ولا في التجارة ولا في الشهادات الدنيوية. يعني معنى كده عاطلين؟ لا، هم بيعملوا ده، يعملوه بس بينو فيه الخير، لكن مش دي حياتهم. هم فاهمين كويس جداً إن هم ما اتخلقوش عشان كده، فكأنهم هم بيعملوا الحاجات دي هم بيعملوها مضطرين، آه هنعملها وهناخد الشهادة، وإذا الدنيا محتاجة إن إحنا نعلف الشهادة شوية علشان معاني معينة لن نحصلها إلا بهذا، هنعمل ده، لكن قلوبنا مش هنا.

الإبن مش كل حياتنا بقى بنتكلم عن الماجستير اللي باخده، والدكتوراه اللي خدتها، والصفقة اللي خلصت، والفلوس اللي عملتها، والعربية اللي اشتريتها، والبيت اللي جبته، إيه ده؟ إيه ده؟ قلنا لكم المرة اللي فاتت في ناس ابت إلا إنها تسحب الدنيا معاها وتجيبها جوه الجامع كمان، يعني 23 ساعة بره الجامع ما ورانش غير الدنيا، الساعة اللي بنقضيها في الجامع عمالين نسكر على الفيسبوك، وعمالين نشات على الواتساب، وعمالين نتكلم في المذاكرة وفي الصفقات وفي وفي وفي التاسك اللي عليك في شركة وفي المهم إيه يا عم؟ في إيه يا عم؟ فين ربنا؟ فين الآخرة؟

فأول حاجة عاوزين نوجد هذه الفئة يا شباب، إزاي نوجدها؟ أول حاجة إن حضرتك تكون واحد منهم، حضرتك تكوني واحدة منهم من هؤلاء، ونقيس أنفسنا على هذه الصفات: هل أنا مما يلهيني شيء عن ذكر الله، عن إقام الصلاة، عن إيتاء الزكاة؟ وبعدين نروح ندور بقى على الفئة دي عشان نكون معاهم، خلاص: ﴿وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا﴾ [الكهف: 28]، واتكلمنا في الآية دي كتير قبل كده، يبقى دي.

أول حاجة في المقارنة، المثال والمعنى، وهو الفكرة الثانية التي أشرنا إليها في وسط الكلام، وهي الحيرة والاضطراب الحاضرة بقوة هنا، وضيق الصدر الذي أصاب صاحب هذا الضمان حين فوجئ أن هذا سراب، وليس هذا فقط، بل وجد غريمه عنده، فكيف حالته؟ أنا أقول إن أصوات الأطفال نحبها جميعاً، فالطفل يبكي ويعمل ما يشاء، فلا داعي أن يضجر أحد أو يتأفف، أنا مبسوط فدعوا الأطفال تعيط براحتها.

فأنت عِش نفسية هذا الرجل الذي وصل فلم يجد ماءً، ووجد الغريم الذي سيأخذ منه ما جناه، فكيف حالته واضطراب قلبه ووجل قلبه؟ وكذلك صاحبنا الآخر الذي في البحر. الحقيقة أن الله سبحانه وتعالى ضرب مثلاً آخر في القرآن عجيباً، فكأن الله سبحانه وتعالى حصر الأمكنة الثلاثة التي يمكن أن تراها في الدنيا؛ فعندنا بر وبحر وجو، فمثال البر السراب، ومثال البحر ﴿ظُلُمَاتٌ فِي بَحْرٍ لُّجِّيٍّ يَغْشَاهُ مَوْجٌ﴾ [النور: 40]، ومثال الجو ضربه الله في قوله تعالى: ﴿فَمَن يُرِدِ اللَّهُ أَن يَهْدِيَهُ يَشْرَحْ صَدْرَهُ لِلْإِسْلَامِ وَمَن يُرِدْ أَن يُضِلَّهُ يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ﴾ [الأنعام: 125]. طبعاً بعض المحدثين قالوا إننا اكتشفنا أنه حينما تصعد لأعلى الأكسجين يقل، ففعلاً يضيق صدرك، ولهذا في الطائرة لا يمكنك التنفس إلا بضخ الأكسجين، والضغط أيضاً يؤثر على الصدر، وهذا الكلام العلمي موجود.

الفكرة هنا أنه يجعل صدره ضيقاً حرجاً، هل تعرفون ما معنى الحرج؟ الحرج هو أشد الضيق، وقالوا إن كلمة حرج جمع "حرجة"، مثل شجرة وجمعها شجر، وحرجة جمعها حرج. فما هي الحرجة عند العرب؟ هي الشجرة التي تلتف حولها الأشجار لدرجة أنه لا يمكن لأحد أن يصل إليها، لا إنس ولا حيوان وحشي، من كثرة التفاف الشجر حولها لا يوجد منفذ. كذلك قلب الكافر والمنافق لا يوجد منفذ للخير فيه؛ ﴿يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ﴾. انظروا إلى حالة الكفار، وفي المقابل حالة الطمأنينة والراحة التي فيها المؤمن في المثال الذي ضربه الله عز وجل، وهذا موجود في الدنيا. فكرة اللذة بالقرب من الله عز وجل أشرنا إليها المرة السابقة حين قلنا إن المشكاة هي البدن، وإذا أزلت منها المصباح أظلمت، فهل تذكرون الكلام عن الناس الذين يهتمون بالبدن اهتماماً زائداً؟

سأقول لكم معنى فلسفياً؛ وهو أن ما يصلح الروح غالباً يكون ضد شهوة البدن. أي أحد يتكلم في فكرة الارتقاء الروحي، حتى لو لم يكن مسلماً، اتفقوا على أن هذا يحصل بتقليل الطعام، وتقليل النوم، وتقليل الكلام. يسمونه في الثقافات المختلفة كما يسمونه، أما عندنا في الإسلام فنسميه صوماً، أي تقليل الطعام، ونسمي تقليل الكلام اعتزالاً، ألا تختلط كثيراً بالناس وتعتزل بنفسك وتكن مع ربك، ونسمي تقليل النوم السهر في الطاعة، مثل قيام الليل. فأنت هنا تعكنن على بدنك، بينما الشخص الآخر يعطي بدنه كل ما يريد فيرتاح، ولكن من مشى وراء شهوة بدنه وصل إلى الآخر.

نحن مرض العصر بلا منازع هو الاكتئاب، وهذا ليس كلامي بل كلام الأطباء، سواء كنت مكتئباً وتذهب لدكتور أو مكتئباً ولا تعرف، فعندنا نسبة اكتئاب. لماذا، ونحن وصلنا لمرحلة من الرفاهيات لم يحلم بها أجدادنا؟ سأقول لكم حديثاً واحداً قاله النبي صلى الله عليه وسلم لتفهموا أين نحن. مرة كان عند النبي صلى الله عليه وسلم ماء بارد وتمر، فقال صلى الله عليه وسلم: «والذي نفسي بيده إن هذا لهو النعيم الذي تسألون عنه يوم القيامة»، مشيراً إلى قول الله عز وجل ﴿ثُمَّ لَتُسْأَلُنَّ يَوْمَئِذٍ عَنِ النَّعِيمِ﴾ [التكاثر: 8]. هذا الحديث يفهمنا أين نحن من الرفاهية، وبداية هذا الحديث أن النبي خرج من بيته لأنه لم يجد شيئاً يأكله، فخرج يدور على طعام، فلقي أبا بكر وعمر خارجين أيضاً يدوران على طعام، فذهبوا لأبي الهيثم بن التيهان، صحابي جليل، فجاء لهم بتمر وماء فقط. فأكل النبي صلى الله عليه وسلم وشرب وقال تلك الكلمات. أنت تفتح باب الثلاجة فتجد أصنافاً كثيرة وتغضب إذا لم تجد نوعاً معيناً من المربى، نحن في رفاهية عالية جداً، فلماذا الاكتئاب؟ لأن المعادلة ليست هنا، المعادلة في روحك أين هي.

الرأسمالية تريدك دائماً تجري وراء البدن لتبيع لك، والذين يدرسون التسويق يفهمون جيداً كيف يدرسون نفسية المستهلك؛ يعرفون من أين يدخلون إليه، وفي النهاية نحن نريدكم في دائرة الشراء. تجد نفسك تعرف أن الوجبات السريعة مضرة، ومع ذلك يزقونك لتشتريها، وبعدها تمرض فتشتري الأدوية، وتدخل في حلقة مفرغة لا تنتهي، ولو تركت الشيء الأول لاسترحت. لكنهم لا يريدون راحتك، فكلما اقتربت من الله حصلت تلك الطمأنينة التي أخبر عنها من ذاقها.

نحن نقف في المنتصف، فلا انغمسنا في الشهوات لآخرها، ولا حسينا بلذة القرب. كثير من الناس حين يتوب يحس بهذا وينشرح صدره عجباً، لكن أحياناً يذهب هذا، ولذلك أسبابه، لكن من عاش في هذا مدة طويلة يحكي لنا، مثل شيخ الإسلام ابن تيمية الذي يقول: "ماذا يصنع أعدائي بي؟ أنا جنتي وبستاني في صدري". أنا في رأيي المتواضع أن عظمة ابن تيمية الحقيقية هي صلابته النفسية، كان عجيباً، لدرجة أن واحداً من ألد خصومه كان يقول: "ما رأيت مثله، كنا نؤلب عليه الدولة ليحبسوه، فلما قدر عفى عنا". ابن القيم يحكي أنه مات ابن تيمية، فدخل يعزيه فكأنه أظهر نوعاً من الفرح بموت خصمه، فنهاه ابن تيمية وخرج مسرعاً إلى بيت أهله وأعطاهم عطاء وقال: "أنا لكم مكانه، كأنه لم يمت".

ابن القيم يقول عن ابن تيمية: "كنا إذا ضاقت بنا الأحوال وساءت الظنون نذهب إليه، فما إن ننظر في وجهه حتى يذهب عنا كل ذلك، نظرة النعيم تلوح على وجهه على ما كان فيه من ضيق العيش وخلاف الرفاهية". ومع ذلك كان منشرحاً، بل كان بعض أصحابه يقول إنه كان يتمنى أن يعامله أصحابه كما يعامل هو خصومه من شدة إنصافه وعدله وفضله. كان يقول: "ماذا يصنع أعدائي بي؟ إن حبسوني فحبس خلوة، وإن نفوني فنفي سياحة، وإن قتلوني فقتلي شهادة"، فماذا سيفعلون به؟ لا شيء. وهذا الشاهد: "جنتي وبستاني في صدري". فالناس حست بهذا، وكان بعضهم يقول: "لو يعلم الملوك وأبناء الملوك ما نحن فيه لجالدونا عليه بالسيوف".

ابن الجوزي له كلام جميل، أنه كان يقول: "تمر بالقلب أوقات لو كان معي معروف الكرخي وبشر الحافي لرأيتهما زحمة". يتمنى الواحد منا لو يأتيه شيخ يجلس معه، لكن ابن الجوزي يقول: لو قيل لي تعال اجلس مع بشر ومعروف، لقلت هذه زحمة، لا أريد أحداً، من شدة الشعور الذي ينتابه من الأنس بالله وانشراح الصدر، يكتفي بربه. وهذا موجود، والشباب الذين تابوا يقولون: "أنا أول ما توبت كنت أحس أحاسيس نفسي ترجع تاني"، فهذه الحالة موجودة. والعكس أيضاً صحيح، الإمام الرازي كان إماماً في الكلام والفلسفة، وفي آخر أيامه قال شعراً: "نهاية إقدام العقول عقال، وغاية سعي العالمين ضلال، وأرواحنا في وحشة من جسومنا، وحاصل دنيانا أذى ووبال". هذا بسبب انشغاله بعلم الكلام في مداخل لم يكن ينبغي أن يدخلها، فالحالة موجودة.

من عشرين سنة، نقول إيه في الغرب؟ أصبح الشخص هناك يملك كل شيء، لا توجد حاجة لا يفعلها، كل ما يمكن أن يتمناه إنسان هو يفعله، وفي الآخر يموت منتحرًا، وفي الآخر في مصحة يتعالج من الاكتئاب، وفي الآخر حابس نفسه في الغرفة. بنشوف ده يا جماعة ولا ما بنشوفش؟ بنسمع عنه ولا ما بنسمعش؟ طب ليه؟ يعني يعمل إيه تاني؟

لا، هو ماشي غلط أصلاً، هو ماشي غلط؛ أنت بدن وروح. وقلنا لكم الفلسفة هي أنك إن أسرفت في رفاهية البدن، فأنت تضر بالروح.

خلاص، الإمام الشافعي كان له أبيات جميلة جداً يقول فيها: سهري لتنقيح العلوم ألذ لي من وصل غانية وطيب عناقي. يعني بنتكلم على لذة اللي بيحس بها أهل الإيمان. فكان الشافعي يقول: أسهر أنقح العلوم، وكذا. الإمام الشافعي إمام جبار، عقلية جبارة في تاريخنا، عقلية يفخر بها أحمد بن حنبل. عشان بس تفهموا يعني إيه الإمام الشافعي، أحمد بن حنبل كان قريباً من الإمام الشافعي في السن، ممكن تقول قرين له.

فأحمد بن حنبل يسيب مجالس الشيوخ الكبيرة ويجي يحضر للشافعي، وطبعاً ده عندهم: إزاي تعمل كده؟ أحمد بن حنبل محدث وفقيه، فيسيب مجالس الحديث اللي بياخد فيها الحديث بسند عالٍ؟ عشان تفهموا اللي أنا هقوله ده، لازم تفهموا حاجة: كلما اقتربت من النبي صلى الله عليه وسلم في السند كان شرفاً لك. يعني مثلاً "أ" بيروي عن "ب"، و"ب" بيروي عن "ج"، و"ج" بيروي عن "د"، و"د" ده عن الصحابي، عن النبي صلى الله عليه وسلم.

فـ "أ" بينه وبين النبي أربعة صلى الله عليه وسلم، "ب" بينه وبين النبي ثلاثة، فنقول إن "ب" في هذه السلسلة أشرف من "أ"، قد يكون "أ" أعلم وأشرف، إنما في السلسلة دي لأنه أقرب للنبي عليه الصلاه والسلام. فاهمين؟ طب تخيلوا كده احنا قاعدين في مجلس وأنا بروي أحاديث فبيني وبين النبي عليه الصلاه والسلام ثلاثة مثلاً، فواحد غايب من المجلس ده فمش أعيد له المجلس تاني، يقوم يجي يقول لي واحد من اللي قاعدين: أملي لي أنت الأحاديث كده. نزل درجة، لأنه بدل ما كان بيروي عني وبينه وبين النبي أربعة، بقى بيرويها عن واحد تحت فبقى بينه وبين النبي أكثر.

فكان المحدثون زمان ممكن يسافروا علشان ياخدوا الحديث عالياً لأن ده شرف. يا جماعة، العلم زمان كان حاجة تانية، مش بقى نايم على ظهرك وجوجل والمكتبة الشاملة، ما كانش فيه الكلام ده خالص. وكان العلماء يسافرون؛ ده موجود في الكتب، ممكن يسافر عشان حديث واحد. يسافر يعني إيه؟ يعني عيشوا نفسية اللي بيسافر زمان ده عشان ياخد حديث واحد عالٍ.

فأحمد بن حنبل جه الشافعي، ساب مجلس التحديث أصلاً وراح قعد للشافعي، فقالوا له: تسيب الحديث وتروح تقعد لهذا الشاب الصغير؟ قال أحمد -شوفوا فقه الإمام أحمد-: إن فاتنا الحديث عالياً أخذناه نازلاً، صحيح هقل درجة لكن هناخده، وإن فاتنا عقل هذا الغلام لن ندركه أبداً. فهمتوا؟ فالشافعي كان فذاً. الشافعي يا جماعة حط علم من أوله لآخره، راح مصنفه كده من أوله. وبعدين بقى كل اللي جم بعديه ابتدوا ياخدوا من كلام الشافعي ويزودوا عليه وينقصوا. علم إيه؟ أصول الفقه، الشافعي حطه من أوله لآخره، ودي حاجة برضو كبيرة يعني اللي فاهم يعني وضع العلوم، فدي حاجة كبيرة. احنا ما نعرفش علم حد حطه من أوله لآخره غير علمين: أصول الفقه والعروض. دول العلمين اللي جه واحد كده راح حط العلم جابه من هنا لهنا.

مين اللي حط العروض بقى؟ حد يعرف؟ طب ده واجب. أحسنت، الخليل. فإيه اللي جاب لنا الشافعي؟ آه، الشافعي كان بيقول: سهري لتنقيح العلوم ألذ لي من وصل غانية وطيب عناقي. وصرير أقلامي على صفحاتها أحلى من الدوكاء والعشاق. وألذ من نقر الفتاة لدفها نقري لألقي الرمل عن أوراقي. وأبيت سهران الدجى وتبيته نوماً، وتبغي بعد ذاك لحاقي. هنا بقى هي القضية، البيت الأخير ده؛ الشافعي لذته في إيه؟ زي واحدة وكان جوزها عالماً كبيراً وكان التعدد زمان موجود، فكانوا يجوا يقولوا لها: يا بختك ومجوز لك لوحدك! فتقول لهم: لهذه الكتب أشد علي من ثلاث ضرائر. مكتبته دي يعني يروح يتجوز بس يبعد عن الكتب، ليه؟ هو دي لذته، لذته ومتعته. لهذه الكتب أشد علي من ثلاث ضرائر. فالشافعي شوفوا يا جماعة لذته والمتعة اللي بيحس بها، متعة أشد بكتير وأكبر بكتير من متعة أهل الدنيا.

فين الإشكال؟ آخر بيت: وأبيت سهران الدجى وتبيته نوماً وتبغي بعد ذاك لحاقي. سواء بقى لحاقي في العلم أو لحاقي حتى في تحصيل هذه اللذة، ما هي اللذة يا جماعة دي ما بتجيش كده، مش أنا نايم النهارده دماغي كلها في الشهوة، هصحى الصبح ألاقي نفسي عاوز علم وعاوز دين وعاوز لا، إلا أن يفتح الله عز وجل، أنا لا أتألى على الله، آه ممكن ده يحصل، ممكن إنسان ينصلح حاله في لحظة، إنما الأصل فين؟ في كتاب الله عز وجل: ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ﴾ [العنكبوت: 69].

فالأصل إنك لازم تجاهد شوية، لازم تبقى راجل، من الآخر كده راجل: ﴿رِجَالٌ لَّا تُلْهِيهِمْ تِجَارَةٌ﴾. لازم تبقى راجل، بتعمل إيه؟ بتجاهد في الله، تجاهد نفسك، تجاهد شهوتك، مش أول ما تشوف الزحلقه تتزحلق تركب على طول، لازم تجاهد. فإذا جاهدت، أبشر، أبشر، ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا﴾. وفي الحديث: «من أتاني يمشي أتيته هرولة، إذا تقرب إلي عبدي شبراً تقربت منه ذراعاً، ومن تقرب مني ذراعاً تقربت منه باعاً، ومن أتاني يمشي أتيته هرولة». فابشر.

يبقى ده المعنى الثاني اللي عاوزين نخرج بيه: الطمأنينة والسكينة اللي هنشعر بيها في الدنيا، لكن محتاجين مجاهدة في الأول. أول ما يفتح لك هذه الطاقات وهذه الأبواب، أنت بنفسك مش هتبقى حابب ترجع، خلاص اللذة اللي حسيتها مش عاوز تفقدها. يبقى أول حاجة فكرة المجاهدة.

يلا، حد يقول لنا حاجة توافر فيها ثلاث شروط: سمعها بأذنه، ومست قلبه، وهيبني عليها. هطلع هعمل واحد اتنين تلاتة، مش لازم يقول واحد اتنين تلاتة، بس يقول آه دي أثرت فيا. يلا، مين؟ كلمة ممكن تكون مش من صلب الدرس بس كلمة سمعها وقال: آه والله، دي إزاي كده؟

اتفضل. هو بيقول إنك تسعى وراء لذة الروح، يعني أنت مش هتفضل قاعد مكانك بنفس صفاتك بنفس أفعالك بنفس حالك ومستني لذة الروح تشعر بها، لا مش هيحصل. وعرفنا الفلسفة بقى اللي هي حتة إن اللي هيصلح ده غالباً هيبقى بيعزك من بدنك، غالباً هنيجي نقول لك: صم، افطر، بطل كلام، بطل خلطة، دي الحاجات اللي بتسمن بيها الروح، فكل دي من ملذات البدن، فأنت عاوز تبقى بتعمل كل ده وحاسس بلذة الروح؟ طب إزاي؟ لا، اسعَ يا عبد.

جميل، اتفضل. هو بيقول يعني من الحاجات اللي مست قلبه وهيعمل بها: خلي بالك، عشان يلزم نفسه أنه ما يخرجش من المسجد إلا اضطراراً. يعني إيه؟ تبقى دي حالتنا يا جماعة كده، تفضل قاعد لغاية ما الراجل يجي يقفل باب، يلا لازم تخرج، تقوم مش هتخرج برضو، تقول له طب معلش سيبني شوية، عشان تبقى واحد من السبعة الذين يظلهم الله في ظله يوم لا ظل إلا ظله: «رجل قلبه معلق بالمساجد».

أحسنت، اتفضل. آخر حاجة بيقولها: البيت الأخير للإمام الشافعي، يعني على قدر البذل يكون التحصيل إن شاء الله.

مين عاوز يقول؟ اتفضل. بيقول إن الفرق الكبير هو الإيمان والكفر، والإيمان هو هبة من ربنا سبحانه وتعالى هو اللي بيجي. أحسنت، معنى جميل جداً وله شاهد في الآية. هو بيقول إن الفرق الكبير ده هو الإيمان والكفر. وهنا يا جماعة في ترتيب الآية والترتيب عجيب، قال الله عز وجل: ﴿وَالَّذِينَ كَفَرُوا أَعْمَالُهُمْ كَسَرَابٍ بِقِيعَةٍ﴾ [النور: 39]. الترتيب الطبيعي للجملة: وأعمال الذين كفروا كسراب بقيعة. ربنا ما قالش كده، ربنا قدم "الذين كفروا"، قال: ﴿وَالَّذِينَ كَفَرُوا أَعْمَالُهُمْ﴾، أتى بضمير يعود عليهم. طيب ليه؟ علشان المعنى اللي قاله، علشان ينبهنا على معنى أن ما وقعوا فيه، إنما وقعوا فيه بكفرهم؛ هذا الاضطراب، هذه الحيرة، هذا الوجل الذي في القلوب، هذا الضيق الحاصل بسبب الكفر.

طبعاً احنا خدنا كذا في دوكة ما قلنا لكمش المثالين دول. المثالين دول يا جماعة مثلان على التنويع، كل مثل في حالة من الأحوال. في دقيقة واحدة هقول لكم فرق مهم: بعض العلماء قال إن المثال الأول بتاع السراب ده في الآخرة، ومثال الظلمات في الدنيا. إزاي؟ إن السراب أنت بتبقى فاكره حاجة، إمتى بتكتشف أنه مش حاجة؟ لما توصل له. فيبقى ده مثال لأعمال الكفار في الآخرة، هم هيجوا يوم القيامة وفاكرين أن أعمالهم دي نافعة وهتنفعهم، فيفاجئوا أنه لا مش هتنفعهم. طب ربنا قال ده في القرآن؟ آه، قالوا في القرآن في سورة بتقراها كل جمعة: سورة الكهف. ماذا قال الله عز وجل؟ ﴿قُلْ هَلْ نُنَبِّئُكُم بِالْأَخْسَرِينَ أَعْمَالًا * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا﴾ [الكهف: 103-104]. هم فاكرين بيعملوا حاجة، يجوا يوم القيامة لا يجدوا شيئاً.

وبرضو بتقرأ كل جمعة في الصلاة: ﴿هَلْ أَتَاكَ حَدِيثُ الْغَاشِيَةِ * وُجُوهٌ يَوْمَئِذٍ خَاشِعَةٌ * عَامِلَةٌ نَّاصِبَةٌ * تَصْلَىٰ نَارًا حَامِيَةً﴾ [الغاشية: 1-4]. فده موجود. ﴿وَقَدِمْنَا إِلَىٰ مَا عَمِلُوا مِنْ عَمَلٍ فَجَعَلْنَاهُ هَبَاءً مَّنثُورًا﴾ [الفرقان: 23].

طب احنا نخاف من إيه؟ أولاً نخاف من الكفر، ثاني حاجة، ونختم بها، نخاف من محبطات الأعمال. أوعى تفتكر نفسك بقى أن خلاص أنا مسلم فكل الأعمال اللي بعملها، أجي يوم القيامة ألاقيها. كنت مرائي، واحد راءى في عمله، يريد غير الله، يريد الله وغيره معه، فتلاقي أنت تحسب أنك أحسنت صنعاً، فتأتي يوم القيامة وتجد الرب عز وجل يقول: «أنا أغنى الشركاء عن الشرك، من عمل عملاً أشرك فيه معي غيري تركته وشركه». يقال له يوم القيامة في حديث آخر: اذهب للذي أشركت فانظر هل تجد عنده شيئاً؟

روح للناس اللي كنت مستني بعد ما تخلص الصلاة في رمضان يجي يقولوا لك: يا عم ده أنت أحلى صوت، ده أنا باجي لك منين، وروح للناس اللي كنت بتستنى عشان ياخدوا معاك السيلفي وينزلوا الصورة على النت، روح للناس اللي كانوا يفسحوا لك في المجلس عشان يقعدوك عشان أنت الشيخ فلان ولا الأخت فلانة اللي بتقرأ ولا الأخت فلانة اللي بتدينا.

هذه هي الحاجات التي تنشطك لتعمل. اذهب يا فلان، اذهب إلى هؤلاء، قل لهم، وأول ما تسعر بهم النار ثلاثة. أقال الله فيك؟ قال لله: فيك؟ قال لله: إيش؟ كذبت، تعلمت ليقال عالم، وقرأت القرآن ليقال قارئ، وقد قيل.

خلاص، أخذت حظك في الدنيا، أليس قد قيل لك العالم الفلاني، والشيخ الفلاني، والقارئ الفلاني؟ وقد قيل، اذهبوا به إلى النار.

أقول قولي هذا واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.