الشيخ أمجد سميربسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي وأزواجه أمهات المؤمنين وذرياته وأل بيته، كما صليت على أل إبراهيم إنك حميد مجيد. أما بعد، فهذا المجلس الثالث، وإن شاء الله الأخير، من مجالس ذكر قصة مريم رضي الله عنها. وكنا اتكلمنا مرتين في ذكر الآيات التي تعرضت لمريم من سورة آل عمران. النهارده هنحاول نتدبر ونتأمل شوية في الآيات التي جاءت في سورة مريم. احنا مش جايين نتدبر سورة مريم ولا ليه سميت سورة مريم ولا خصائص سورة مريم ولا لنا دعوة بسورة مريم خالص. هم ثلاث مشاهد ذكرت فيها مريم عليها السلام، فعاوزين نتدبر الثلاث مشاهد دول بدايه من قول الله عز وجل: ﴿وَاذْكُرْ فِي الْكِتَابِ مَرْيَمَ إِذِ انتَبَذَتْ مِنْ أَهْلِهَا مَكَانًا شَرْقِيًّا﴾ [مريم: 16]. وده أول مشهد، هذا المشهد مع جبريل عليه السلام. المشهد الثاني: ﴿فَأَجَاءَهَا الْمَخَاضُ إِلَى جِذْع النَّخْلَةِ﴾ [مريم: 23] ده المشهد الثاني، وده مع عيسى عليه السلام. والمشهد الثالث: ﴿فَأَتَتْ بِهِ قَوْمَهَا تَحْمِلُهُ﴾ [مريم: 27] وهذا المشهد مع عيسى وقومها. فدول الثلاث مشاهد اللي ذكر فيهم مريم. وعشان برده نبقى فاهمين احنا هنا علشان ناخد القدوة من مريم عليها السلام، فمش هنتطرق لمواضيع خارج هذا الإطار أو هذا السياق.
بدايه يا جماعة، لازم نعرف معلومة مهمة. هي ذكرت في الإسرائيليات أن مريم عليها السلام لما بشرت بالولد ونفخ فيها من الروح كان عمرها قد إيه؟ روايتان: رواية أنها كانت ١٠ سنين، ورواية أنها كانت ١٣ سنة، وكانت قد حاضت حيضتين. والموضوع ده مهم جدا جدا في بناء الشخصية. الآن احنا من المشاكل الكبيرة الواقعة في بيوتنا وفي طريقتنا ونمط تفكيرنا ذكوراً وإناثاً على حد سواء، أن الولد أو البنت ممكن تصل لسن الـ ٢٠ سنة والـ ١٨ سنة وشايفينه عيل، وشايفينها لسه صغننة. وده بيترتب عليه إيه؟ أن احنا بنسامح في أمور لا ينبغي أن يتسامح فيها، سواء كانت أمور محرمة يعاقب عليها الشرع، أو أمور تخالف الآداب بحجة إيه؟ الولد لسه صغير، والبنت لسه صغيرة، الولد مراهق عندنا. فالمسألة دي لازم تحسم، لازم الله عز وجل حسمها، ما سابش القضية ليا وليكي. الله عز وجل حسم هذه القضية أنه بمجرد البلوغ يصير محاسباً مكلفاً. يعني إيه محاسباً مكلفاً؟ يعني بمجرد ما البنت هتبلغ زيها زي أمها بالضبط، فالبنت بلغت عندها ١٠ سنين، بلغت عندها ١٣ سنة، بلغت عندها ١٥ سنة، هي وأمها أمام الشرع سواء.
فما فيش حاجة اسمها بلغت وما لبستش حجاب، أو بلغت ولبسها مش مظبوط، أو بلغت ولسه سامحين لها بحاجات الشرع يحرمها. كل هذا لن ينفعها يوم القيامة وقد صارت مكلفة، ولن ينفع كذلك وليها يوم القيامة إن قصر في تربيتها وفي تعليمها تلك الأمور الشرعية قبل البلوغ. احنا هنا بنتكلم عن أنثى، وأنا متعمد أقول هذا اللفظ: مريم أنثى، خلاص ست. ست عندها ١٠ سنين! ١٠ سنين ست أه بلغت، خلاص امراة، أو ١٣ سنة بلغت، خلاص امراة. فاحنا قدام واحدة عندها ١٠ سنين أو ١٣ سنة، وهتقابل قصة من أعجب القصص، وهتقع في محنة من أعجب المحن، وهتواجه لوحدها مسألة كبيرة جدا. فمحتاجين أولاً نربي أنفسنا على هذا المعنى أن احنا رجال ونساء، ونربي أولادنا على ذلك. ما ينفعش ابني أو بنتي يبقى واصل لهذا السن وما بيعرفش ياخد قرار في حياته، ولسه ماما بتوديه وماما بتعمل له وماما بتسوي له وماما... عاوزين نربي رجالاً، وكذلك نربي نساءً خلاص فهموا القضية.
طبعاً الأمر ده تحدي كبير جدا عندنا ليه؟ لأن العالم الراسمالي لا يريد ذلك منا. طول ما الولد وطول ما البنت لسه شايفين نفسهم صغيرين يعني مزيداً من الاستهلاك ومزيداً من كل حاجة. العالم الراسمالي يريد المزيد منا، فاحنا بنحارب من الخارج بقوة. اللي في إيدينا إيه؟ طبعا وده نظام عالمي. يعني احنا أما أجي أقول لك دلوقتي الولد بينتج زمان من وهو سنه صغير، احنا عندنا معاذ ومعوذ بن عفراء اللي قتلوا أبو جهل كان عمرهم ١٣ سنة، رايحين معركة يقتلوا أبو جهل! يعني ولد بياخد القرار ده، يعني ما جتش في رواية أن دول اتزقوا عشان يقتلوا أبو جهل مثلاً، ولا خمسة ولا أبوهم ولا أمهم، هي الرواية بتقول كده: هم جم فين أبو جهل عاوزين نقتله، ولد عنده ١٣ سنة بياخد قرار أنه هيشيل سيف ويطلع معركة عشان يقتل أبا جهل! أسامة بن زيد قائد الجيش اللي أنفذه رسول الله صلى الله عليه وسلم ومات صلى الله عليه وسلم والجيش قد نفذ، هذا الجيش عمره كام؟ ١٨ سنة. أسامة بن زيد قائد جيش! احنا هنا مش بنتكلم في أنه مسألة الحرب دلوقتي، احنا بنتكلم في واحد هياخد قرار لجيش! جيش يعني حرب يعني مناورات ويعني قرارات سريعة محسوبة، قرار منهم يدمر جيش، هو قائد الجيش اللي بياخد القرار، عنده كام سنة؟ ١٨ سنة. محمد الفاتح فتح القسطنطينية عنده كام؟ ١٨ سنة أو ١٦ سنة. فدي الرموز. عبد الله بن عباس عالم قاعد والناس قاعدة بتسمع وهو شاب صغير. عبد الله بن عباس! الإامام البخاري ١٠٠ ألف عمامة من الأكابر لم تنبت لحيته بعده، ما طلعتش لسه دقنه، عالم! في النساء: مريم. مريم ١٠ سنين، حاضت حيضتين، خلاص امراة. يعني إيه امراة؟ يعني مكلفة، يعني محاسبة. فاحنا عاوزين نربي بناتنا على ده. وبعدين هيحصل معها حكاية عجيبة وهتواجه ده لوحدها، وهنشوف دلوقتي أنها تكون قد هذا البلاء بإعانة الله عز وجل لها.
قبل ما أبتدي للثلاث مشاهد أنا هبني تصور كبير أو جزء كبير من الدرس على تصور. هذا التصور من قراءتي فإن كان صواباً فمن الله، وإن كان خطأ فمني ومن الشيطان والله ورسوله منه بريئان. هذا التصور الذي بنيت عليه هذا الدرس أو معظم الدرس سيتبني على هذا التصور: أن السيدة مريم عليها السلام كانت في مرتبة ونزلت عن تلك المرتبه ثم عادت إليها مرة أخرى، ونزولها لفائدة. هنذكر بقى إيه يعني هنذكر التصور، هذكر لكم التصور كامل إن شاء الله وبعدين نبتدي الدرس، علشان الدرس مبني على ده. دلوقتي السيدة مريم كانت في المحراب، وده اتكلمنا عليه المره اللي فاتت في درس المحراب الدرس الثاني، وقلنا إن كان بيجي لها زكريا: ﴿كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِندَهَا رِزْقًا﴾ [آل عمران: 37]، وقلنا فاكهة الصيف يلاقيها في الشتاء وفاكهة الشتاء في الصيف منين؟ ما فيش سبب! ما فيش سبب، ربنا سبحانه وتعالى فجأة الأكل موجود. منين؟ ما فيش سبب لده. خلاص، ركزوا في دي كويس.
طيب وبعد شوية مريم، طبعاً مريم وهي في المحراب هي في قوة كامل قوتها. طيب بعد شوية هتحمل وبعدين هتولد وهتبقى نفساء، فهي حالتها أضعف. فلو قلنا هي محتاجة لهذا الرزق بلا سبب في أي الحالين هي أحوح؟ حال أنها نفساء! يعني محتاجة فجاه تلاقي رزق قدامها كده من غير ما تعمل حاجة خالص، فجأة تلاقي الرزق قدامها، ربنا ما عملش كده. ربنا وهي في المحراب وهي في كامل قوتها كان الرزق بيجي لها بلا سبب: ﴿قَالَتْ هُوَ مِنْ عِندِ اللَّهِ إِنَّ اللَّهَ يَرْزُقُ مَن يَشَاءُ بِغَيْرِ حِسَابٍ﴾ [آل عمران: 37]. في بعض التفاسير: بغير حساب يعني بغير حسبان، يعني من حيث لا يحتسب المرء، أن الله يرزق من يشاء بغير حساب، فكان ياتيها الرزق بلا سبب. في حالة ضعفها وهي نفساء، أبى الله عز وجل إلا أن يكون ثم سبب! وهي نفساء هيتقال لها إيه: ﴿قَدْ جَعَلَ رَبُّكِ تَحْتَكِ سَرِيًّا * وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا﴾ [مريم: 24-25]. تعالوا كده نتصور الصورة دي: نهر بيجري من تحت السيدة مريم، يعني لو عاوزه مية هتعمل إيه؟ هتعالج النهر، هتنزل للنهر وتجيب مية من النهر بقى برجردل تنزله بركوة بايديها، هتعالج، هتعمل حاجات علشان تحصل على المية. طيب الطعام؟ لا، ده إنت هتهزي، هتهزي جذع نخلة! ده أنا نفساء، هتروحي تهزي جذع نخلة؟ طب جذع النخلة هيعمل إيه؟ هيساقط عليك رطب جنياً. الرطب دي هتنزل في حتة واحدة ولا منثورة؟ طبيعة الرطب. فهتبتدي تعارجي جمع هذا الرطب علشان تاكلي وأنت نفساء. فأبى الله عز وجل أن يرزقها إلا بأسباب. وهنتكلم شوية عن فكرة الأسباب دي، وإن كان فيها نوع برده كرامه وكده، بس ده مش وقته، احنا بس عاوزين نوصل للصورة الكاملة.
طب ليه؟ ليه يا رب، ما إنت في المحراب رزقتها بلا سبب، أشمعنا هنا لا في أسباب؟ وبعد شوية هترجع مريم تاني أنها تنصر بلا سبب منها خالص، يعني ما فيش حاجة، لما ترجع: ﴿فَأَتَتْ بِهِ قَوْمَهَا تَحْمِلُهُ ۖ قَالُوا يَا مَرْيَمُ...﴾ إلى آخر الكلام، ﴿فَأَشَارَتْ إِلَيْهِ﴾ [مريم: 27-29]. خلاص هي مش مطلوب منها حاجة دلوقتي، ربنا اللي هينصرها بأنه ينطق هذا الغلام. فكأن مريم كانت في حالة نزلت عنها ثم صعدت إليها مرة أخرى. أولاً: ليه كانت في حالة ونزلت عنها وبعدين صعدت إليها؟ لأن مريم، ركزوا بقى من أول هنا يا جماعة، كانت في كمال الشهود فكانت في تمام الرعاية والعناية.
ثانياً: مريم كانت في كمال الشهود في المحراب، لو تفتكروا قلنا قلنا قلنا الدرس اللي فات: ﴿أَنَّا لَكِ هَٰذَا ۖ قَالَتْ هُوَ مِنْ عِندِ اللَّهِ﴾ [آل عمران: 37]، ما قالتش هذا. قلنا ساعتها أن هذا اسم إشارة، وهو اسم وهو ضمير غائب، نقول هو يعني حد مش موجود، هذا يعني حد موجود. فطبيعي زكريا يقول إيه: أَنَّىٰ لَكَ هَٰذَا؟ لأن الأكل موجود، هي مش مع الأكل خالص، قالت: هو. طب هي مع مين؟ مع ربنا في تمام الشهود. ﴿هُوَ مِنْ عِندِ اللَّهِ إِنَّ اللَّهَ يَرْزُقُ مَن يَشَاءُ بِغَيْرِ حِسَابٍ﴾ [آل عمران: 37]. فلما كانت في كمال الشهود كانت في تمام العناية الإلهية.
فكان الأكل يجي لها ما تعرفش منين، لأنها في تمام العناية، لأنها في كمال الشهود. طيب وبعدين حصل إيه؟ طبعا كمال الشهود يقتضي حاجة تانية، أن هي حاجة كده يسموها تسقط تسقط التدبير. تسقط تدبير نفسها. الدرس ممكن يكون فيه ألفاظ كبيرة شوية، لكن هي دي المعاني الإيمانية يا جماعة اللي لازم نتربى عليها، هي دي المعاني الإيمانية لازم نتربى عليها. يعني إيه تسقط التدبير؟ يعني يا رب أنا في أي وضع طالما الوضع ده هو اختيارك لي، أنا فيه... هاديكم مثال بسيط ونرجع تاني: سيدنا ابراهيم لما اتحط في المنجنيق عشان يترمي في النار، روي أن جبريل أتاه، قال: ألك حاجة؟ فقال إيبراهيم: أما إليك فلا، ومنك؟ أنا مش عاوز حاجة. وأما إليه -يعني إلى الرب سبحانه وتعالى- فأحب الأمرينه إليه، أحبهما إلي. هو ده إسقاط التدبير! أن مع اختيار ربنا ماليش اختيار. أنت يا جبريل ماليش مش عاوز منك حاجة، طب من ربنا أحب الأمرينه إليه أحبهما إلي، يعني ربنا لو أحب الأمرينه إليه أن القى في النار فأحرق تمام، أنا راضي. لو ربنا أحب الأمرينه إليه أن ينجيني تمام، أنا راضي. فمريم كانت في الحتة دي. فلما كانت في الحتة دي كان معها تمام العناية الإلهية.
وبعدين نزلت عنها. نزلت عنها فين بقى؟ تعالوا نتأمل بقى المشهد الأول. المشهد الأول بين مريم وبين جبريل: ﴿فَاتَّخَذَتْ مِن دُونِهِمْ حِجَابًا فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا﴾ [مريم: 17]. رايحه تتعبد في، وطبعاً هنا التفاسير مختلفة كالعادة، ده مش احنا مش جايين نفسر فبناخد تفسير واحد اللي يخدم السياق. اتخذت مكاناً شرقياً، تبدات من مكان شرقية واتخذت حجاباً لتخلو بالله عز وجل، عاوز أبد ربنا مش عاوز حد يشوفني، أنا مع الله. آه، طب ما هو تمام شهود اهو! هو في بعد كده؟ نقول لا، وواحدة واحدة بس. جالها الملك، وبعدين استعاذت -هرجع تاني للكلام ده- استعاذت بالله منه إن كانت تقيا. ﴿قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلَامًا زَكِيًّا﴾ [مريم: 19]. فوجئنا بمريم بتقول حاجة عجيبة جداً: ﴿قَالَتْ أَنَّىٰ يَكُونُ لِي غُلَامٌ وَلَمْ يَمْسَسْنِي بَشَرٌ وَلَمْ أَكُ بَغِيًّا﴾ [مريم: 20]. مريم التفتت إلى الأسباب! مريم في المحراب لم تكن ملتفتة للأسباب، كانت مع الله والأسباب مش في دماغها أصلاً. فلما كانت كذلك، فلما كانت كذلك خليك خليك خليك، فلما كانت كذلك كانت في تمام العناية. طب لما نزلت عن الرتبه دي وابتدت تلتفت للأسباب؟ لأن الرد عجيب جداً يا جماعة، هي قالت: أَنَّىٰ يَكُونُ لِي غُلَامٌ وَلَمْ يَمْسَسْنِي بَشَرٌ وَلَمْ أَكُ بَغِيًّا. ﴿قَالَ كَذَٰلِكِ قَالَ رَبُّكِ هُوَ عَلَيَّ هَيِّنٌ﴾ [مريم: 21-22]. هو الكلام ده واحدة زي مريم محتاجه تسمعه؟ أو بلاش محتاجة تسمعه، عذراً، الكلام ده مريم ما تعرفوش. يعني فكرة أن ده على ربنا هين السيده مريم ما تعرفش الكلام ده. لكن من الصدمة هي ذهلت عن ذلك، وأحتاجت أن تذكر به.
فلما نزلت عن تلك الرتبه اللي هو كمال الشهود وابتدت قلبها يلتفت للأسباب -يعني بالأسباب الدنيوية أنا المفروض ما أحملش- فقلبها التفت للأسباب. فلما حصل ذلك نزلت رتبه العناية شيئاً مش... يعني يعني الله عز وجل لم يخرجها من من عنايته، لا، بس نزلت رتبه العناية شيئاً، ووكلت إلى الأسباب شيئاً. مش أنت التفتي إلى إلى الأسباب؟ تمام، عاوزه تاكلي وتشربي بقى روحي للأسباب: ﴿قَدْ جَعَلَ رَبُّكِ تَحْتَكِ سَرِيًّا﴾، انزلي بقى عليج النهر وهاتي مية، ﴿وَهُزِّي إِلَيْكَ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا﴾ وقعدي لمي الرطب. يا الله! بعد ما كان بيجي لها فاكهة الصيف في الشتاء وفاكهة الشتاء في الصيف بلا سبب، ووكلت شيئاً ما إلى الأسباب. خلي بالكم هي
لسه في في عناية الله عز وجل. احنا عاوزين نخرج من المشاهد دي أولاً بأن السيدة مريم عليها السلام هي كانت في لطف الله برضه، لكن ووكلت إلى الأسباب شيئاً ما.
طيب، إحنا هنرجع تاني للمشاهد، بس إحنا عاوزين نشوف الفكرة الكلية اللي هنبني عليها التصور بتاعنا. وبعدين خلي بالكم مريم برضه في المشهد الثاني وهي مع عيسى عليه السلام هي لسه مستحوذ عليها الأسباب شيئاً ما، ولذلك قالت إيه: ﴿يَا لَيْتَنِي مِتُّ قَبْلَ هَٰذَا وَكُنتُ نَسْيًا مَّنسِيًّا﴾ [مريم: 23]. ده كلام حد أسقط التدبير؟ أو يرى اختيار الله عز وجل؟ أو يعني يلمح معنى اختيار الله عز وجل؟ لا دي بتقول: يا ليتني مت قبل هذا وكنت نسياً منسياً. لا هي كده إحنا بعيد عن المرتبة دي دلوقت. وبعدين ناداها من تحتيها قال لا تحزني؛ مش ألا تخافي. خلي بالكم، تخزي، يعني هي في وضع حزن، هي حزينة. الحزن إيه هو؟ الحزن على شيء فائت، حاجة فايتة أو حاجة موجودة دلوقت، إنما الخوف من شيء مستقبلي، ده الفرق بين الخوف والحزن. فمريم ربنا ما عيسى عليه السلام مالهاش لا تخافي، لو كانت هي خايفة من مواجهة قومها كان قال لها إيه؟ لا تخافي. إنما مالهاش لا تخافي، قال لها لا تحزني. فكأنها حزينة على وضعها الحالي.
فده كله يدل على اللي أنا بقوله ده، أنها نزلت شيئاً ما عن الرُّتبة. وبعدين لما رجعت إلى تلك الرُّتبة وقوي قلبها واختارت اختيار الرب لها، فاتت به قومها تحمل. كلمة تحمل دي عجيبة جداً هنا، وتدل على المعنى اللي أنا عاوز أقوله، المعنى الكلي ده. لو قلنا يا جماعة لو جاء القرآن: فاتت به قومها؛ هل يتصور غير أنها تحمله وهو طفل صغير رضيع؟ فأكيد إية هي جاية تحمله، ما فيش تصور تاني يعني. ليه القرآن أتى بلفظ تحملُه؟ العلماء قالوا هنا: أتت به قومها تحملُه؛ يعني تظهره غير مبالٍ. كان ممكن تعمل إيه بداية المواجهة؟ تسيبه في حته وتروح لقومها، وبعدين واحدة واحدة تمهد لهم أو أي حد كان ممكن يعمل كده، يعني مش وقت دلوقت أظهر هذا الطفل أخبيه وابتدي أروح. لا، كلمة تحملُه دي تدل أن خلاص رجعت تاني لرتبة التفويض: يا رب أنت اخترت لي هذا، خلاص. فاتت به قومها تظهر غير مبالٍ. فلما رجعت تاني للرتبة دي ربنا سبحانه وتعالى نصرها، خلاص مش مطلوب منك حاجة بقا تمام، أنا خلاص رجعنا تاني لتمام العناية، فما كان منها إلا أشارت إليه، اصرفوا بقى مع الجنين ده.
طيب، ليه القصة الطويله اللي أنا بحكيها دي؟ يعني ليه تنزل مريم تلك الرتبة؟ هاقول لكم ليه بقا. حكمة الله عز وجل، والله أعلم في هذا، عشان إحنا نتعلم. دلوقت يا جماعة لو جينا قصة مريم كلها، هي في كمال الشهود، فهي في تمام العناية. كم في المشرق بيوصل للمرتبه دي أصلاً؟ يعني لو كانت مريم ظلت من أول القصة لآخرها الحكاية كلها ماشية بلا أسباب ليه؟ لأنها في كمال الشهود، ولأنها أسقطت تدبيرها، ساعتها إحنا هنستفيد إيه؟ معظم البشر مش هيستفيدوا حاجة. عشان إحنا نستفيد، كان لازم مريم تنزل عن تلك الرُّتبة ونراها في رتبة أدنى، اللي هي رتبة البشر. إحنا كم واحد فينا ما بياخدش بالأسباب؟ وكم واحد فينا بيصل لكمال الشهود؟ فمش محتاج، مش يعني إحنا الكلام ده سمعناه في كم حد؟ يعني سمعناه إيه في صحابي اللي هو لقوا العنب في إيديه وهو في السجن عارفين القصة؟ وهو في السجن ولا عود العنب وليس في مكة ثمرة. سمعناها بقا كام مرة الحكاية دي على مدار التاريخ؟ إنما بقية البشر العادية، بقية البشر لا، إحنا إيه عندنا أسباب بناخد بيها وعندنا، وكمان الشهود ده ممكن نصل إليه في لحظة من اللحظات، لكن ده مش الغالب على البشرية، فعشان نستفيد من مريم كان لازم تنزل ونراها وقد التفتت شيئاً ما إلى الأسباب، فوكلت شيئاً ما إلى الأسباب. عشان لما نجي ندرس سيرة مريم نتعلم، تبقى مناسبة لنا، مناسبة لمعظم الناس. فلذلك والله أعلم، هذا الذي يظهر لي في قصة مريم.
ماشي، عاوزين نبدأ بقى المشاهد ونتاملها عشان نستفيد منها. يبدأ أول مشهد: مريم ذات العشر سنين أو 13 سنة، وبعدين حاضت حيضتين، صارت امرأة خلاص. وانتبذت من أهلها مكاناً شرقياً فاتخذت من دونهم حجاباً. ليه؟ عشان تعبد ربنا سبحانه وتعالى في خلوة. فارسلنا إليها روحنا فتمثل لها بشراً سوياً. فجأة بقت راجل قدامها، أولاً راجل، ثانياً لا تسل عن جماله وجلاله؛ لأن اللي أخبر عنه النص، ربنا، ربنا بيقول كده أولاً: مَلَك وتصور في صورة بشر، فهو يعني هيبقى بشر جميل، وبعدين ربنا بيصف أنه إيه: فتمثل لها بشراً سوياً كاملاً؛ فلا تسأل عن جماله، وبالتبعية لا تسأل عن فتنته للمرأة. مريم أول ما تشوف البشر: ﴿إِنِّي أَعُوذُ بِالرَّحْمَٰنِ مِنكَ إِن كُنتَ تَقِيًّا﴾ [مريم: 18]. شوفوا يا جماعة تعلق قلب مريم بالله عز وجل. إحنا عاوزين مريم القدوة دلوقت، إحنا مش جايين نحكي، لا جايين نتدبر آيات ولا جايين نحكي حدوتة، جايين نشوف مواطن القدوة فين. فأول حاجة تعلق القلب بالله سبحانه وتعالى في مواطن من الفتن: أستجير بالله منك لو هتهجم عليا، ومن فتنتك برضه، مفهومة دي؟ يبقى أنا أستجير بالله عز وجل منك لو جاي تهجم عليا، لو جاي تتعدى عليا فأنأ أستجير بالله منك، وكذلك أعوذ بالله من فتنتك، أعوذ بالرحمن منك من فتنتك. فهذه مريم الموصولة بالله عز وجل، فإحنا أول معنى، أول معنى من معاني القدوة: أن يكون القلب متعلقاً بالله عز وجل، متوكلاً على الله عز وجل، وأن ما فيش فتنة هتُدفع إلا بالله سبحانه وتعالى، وأنه لا حول ولا قوة إلا بالله سبحانه وتعالى. وده معنى ندندن حوله كثيراً في الدروس.
فهنا واضح جداً في قصة مريم: اعوذ بالله منك إن كنت تقياً. قال: ﴿إِنَّمَا أَنَا رَسُولُ رَبِّكِ لِأَهَبَ لَكِ غُلَامًا زَكِيًّا﴾ [مريم: 19]. طبعا إحنا عندنا هنا مواطن بلاغية، لكن مش عايزين ندخل برضه في البلاغة عشان الوقت ماشي. فقال: ﴿إِنَّمَا أَنَا رَسُولُ رَبِّكِ لِأَهَبَ لَكِ غُلَامًا زَكِيًّا﴾ وهنا كانت الصدمة التي جعلت مريم تلتفت شيئاً ما إلى الأسباب. مريم الموصولة بالله، اللي في مقا- اللي في تمام الشهود، اللي ما شافت حاجات، أه هي كفاية الأكل اللي كان بيجي لها ده، هنا التفتت هذه الأسباب، قالت: أَنَّىٰ يَكُونُ لِي غُلَامٌ. خلي بالكم يا جماعة هنا مريم التفتت إلى الأسباب، لكن قلبها ما زال متعلقاً بالله عز وجل. إيه ده؟ منين دي؟ تعالوا كده نروح نشوف نفس الآية دي في سورة آل عمران، قالت إيه؟ قالت: ربي أَنَّىٰ يَكُونُ لِي. مين اللي بيكلمها دلوقت؟ الملك اللي في سورة أُنسِيَّه، التفتت عنه، قالت ربي، يبقى لسه القلب فين؟ مع ربنا سبحانه وتعالى. لكن في نوع التفات للاسباب، رب يكون لي غُلام غُلام ولم يمسسني بشر، ده في سورة آل عمران. هنا قالت: أَنَّىٰ يَكُونُ لِي غُلَامٌ وَلَمْ يَمْسَسْنِي بَشَرٌ وَلَمْ أَكُ بَغِيًّا.
وكان الجواب صادماً، قال: ﴿كَذَٰلِكِ قَالَ رَبُّكِ هُوَ عَلَيَّ هَيِّنٌ﴾ [مريم: 9]. صادم؟ صادم ليه؟ لأن أن تُذكَّر مريم بتلك المعاني غريب، لكن لقدر الله عز وجل ولحكمة الله عز وجل زي ما قلنا أنها تنزل عشان إحنا بقا نبتدي نتعلم بقا. أهي نزلت عن تلك الرتبة اللي يعني إي- لا يعني يكاد يجود الزب- واحد يصل إلى تلك الرتبة؛ رتبة الشهود. فلا، هي نزلت، يلا يتعلموا بقا الناس اللي زينا، يلا اعلموا بقا. قال: ﴿كَذَٰلِكِ قَالَ رَبُّكِ هُوَ عَلَيَّ هَيِّنٌ وَلِنَجْعَلَهُ آيَةً لِّلنَّاسِ وَرَحْمَةً مِّنَّا ۚ وَكَانَ أَمْرًا مَّقْضِيًّا﴾ [مريم: 21].
فقال: ﴿فَحَمَلَتْهُ فَانْتَبَذَتْ بِهِ مَكَانًا قَصِيًّا﴾ [مريم: 22]. هنا يا جماعة برضه إحنا قلنا مريم نزلت بقى عن الرتبة فابتدا تاخد بالأسباب، فليه؟ عشان إحنا نتعلم وناخد بالأسباب. لأن أنت خلاص أنت مش مرتبة كمال الشهود دلوقت، فخد بالأسباب. فمريم ابتدت تاخد بالأسباب، فحملته فانتبذت به مكاناً قصياً، راحت حته بعيدة أول ما حست بالحمل، اختفت. نتعلم إيه هنا؟ أول حاجة: أن ممكن في وقت من الأوقات الحل يكون في أننا نبعد شوية، أننا نختفي شوية، أننا لا نواجه دلوقت. ده حل؟ ده من ضمن الحلول يا جماعة، من ضمن حلول الأزمات: إني خد جنب، اختفي، ابعد. ليه ده مش وقت المواجهة؟ مريم عملت كده، حملته فانتبذت به مكاناً قصياً، راحت مكان بعيد، راحت بيه مكان بعيد، فيبقى ده معنى برضه في قدوة مريم نتعلم منها ده. خلي بالكم يا جماعة، أنتوا عارفين لو مريم كانت في كمال الشهود كان ولا كان زمان ما بنحكيش حاجة دلوقت، عادي جداً حمل، خلاص اختيارك يا أحب الأمارين إليك أحبهما إلي، وقاعدة وسط قومها ما كناش هنتعلم حاجة. فنزولها ده ده بقى اللي أنا عاوز أقوله لكم، نزولها عن الرتبة دي عشان نبتدي نتعلم نعمل إيه، يعني هي قدوة لينا حتى وهي في نزولها عن تلك الرتبة العالية التي كانت عليها.
واللي بالمناسبه بالمناسبه مش لازم البشر يبقوا ثابتين على الأحوال، قال صلى الله عليه وسلم لأصحابه: «لو تدومون على ما تكونون عليه عندي لصافحتكم الملائكة». مش كده في الطرقات وفي الفرش؟ سيدنا النبي بقا عليه الصلاه والسلام آه يفضل كده، بدليل الملائكة بتكلمه وهو على الفراش. ما هو قال لهم إيه؟ «لو تدومون على ما تكونون عليه عندي» كان زمان الملائكة بتكلمكم أنتوا في الفراش، وأحنا عارفين أن هو سيدنا النبي عليه الصلاه والسلام الملائكة بيتكلمه وهو في الفراش، بيجيله جبريل حديث عائشة معروف: فأخفى منك فاجبته، فأخفيت منك وكرهت أن أوقظك، فكان سيدنا جبريل ياتيه وهو في في الفراش عليه الصلاه والسلام. فهو حاله علي على رسول صلى الله عليه وسلم طول الله، يعني هو في كمال الشهود على طول آه، سيدنا النبي على طول في كمال الشهود عليه الصلاه والسلام. طب ليه كان بياخد بالأسباب؟ عشان برضه يعلمنا.
يعني يا جماعة سيدنا النبي عليه الصلاه والسلام لو في، عشان بس نقفل دي ماشي، هي بعيد عن المري بس لازم تتقفل، لو كان في الهجره ما طلعش مستخبي وما قعدش في الغار وكان هيتقتل، ما كانش هيتقتل طبعا، ما كانش هيبقى لحد سلطان عليه ولا يصل ليه إيد بني آدم، مستحيل. والله يعصمك من الناس، الله! طب عملت كده ليه؟ عشان إحنا نتعلم، مش عشان هو لو ما كانش عمل كده كان اتقتل. والله ما كان هيتقتل، والله سيعصمه. طب هو كان جوا المعنى ده؟ أيوه جوا المعنى ده أنه معصوم، لكن عشان إحنا نتعلم. ولذلك لما تروح الحيل خالص ونرجع بقا لحته القدوة دي، القلب المتعلق بالله لما هتروح منه الحيل والأسباب ويفتح عينيه كده يلاقي الراجل واقف فوقيه بالسيف: من يمنعك مني؟ قال: الله. ما فکرش، قال: الله. فسقط السيف من يد الرجل.
يبقى أول معنى من قدوة مريم: قلبها موصول بالله عز وجل، فين؟ قالت: ﴿إِنِّي أَعُوذُ بِالرَّحْمَٰنِ مِنكَ إِن كُنتَ تَقِيًّا﴾ [مريم: 18]. وبعدين تأخذ بالأسباب، من الأسباب اللي نواجه بيها مشاكلنا، بالذات المرأة، بالذات المرأة ليه؟ لأن المرأة في أو المرأة طبيعتها كده هي عاطفية فتندفع، ففي أول المشكلة يكون الاندفاع أكبر وأكثر، والاندفاع الأكبر يعني غلط أكبر. طيب أعمل إيه؟ انتبذي مكاناً قصياً، ابعدي، اتعلمي من مريم، ابعدي، رتبي أوراقك بهدوء. أنا مش بقول المرأة يبقى الرجل، لا، الرجل كمان محتاج ده، بس المرأة لأن اندفاعها أكبر، لأن عاطفتها تغلب، فبيكون غلطها أكتر، ولذلك المرأة تلاقوا دايماً في الإيه في المشاكل لسانها غلاط عن الرجل، ليه؟ لأن اندفاعها أكتر، لأن عاطفتها غلابة. ماشي.
فمريم اتخذت فحملته فانتبذت به مكاناً قصياً، بعيد. فاجاءها المخاض إلى جِذع النخلة. هنا نلمح الأمرين بقا يا جماعة، أول حاجة أن ابتدت الإيه تمام العناية تقل، هنا ربنا بيهيئ الأمر لأن بعد شوية هيوكلها إلى شيء من الأسباب. فاجاءها المخاض، اضطرها المخاض، المخاض خلاص، ألم الولادة خلاص، هتولد بقا، إلى جذع النخلة. هنا ما قالش إلى جذع نخلة، لو كان في نخل كتير كان يقول إلى جذع نخلة. التعريف: جِذع النخلة، العلماء قالوا ما كانش في غير نخلة واحدة. طب والباقي؟ شجر. هي نخلة واحدة. طب ليه اتكلموا في هذا الأمر بقا؟ وأشمعنا النخل؟ اتكلموا بقا أن النخل هو يعني الزرع الوحيد اللي يلقح الذكر الأنثى، قصة طويلة كده مش عاوزين ندخل فيها؛ لأن ما تفيدناش هنا في درسنا شيء.
المهم: اضطرها المخاض إلى جذع النخلة. هنا الله، ركزوا بقا، ركزوا جداً، الله عز وجل هنا لما لما خاطبنا في سورة مريم نسب الأمر إلى السبب برضه: فاجاءها المخاض إلى جذع النخلة، اضطرها المخاض، يعني إيه اللي لو سالتك بعد ما قريت مريم مريم كده هو إيه اللي ودى مريم عند جزع النخر؟ هتقول إيه؟ المخاض، صح، السبب. فهنا تلمح السبب. لكن ربنا له لطف، قلت لكم في قصة هنلمح الاثنين، فين لطف ربنا؟ شوفوا كده في الآية الثانية: ﴿وَآوَيْنَاهُمَا إِلَى رَبْوَةٍ ذَاتِ قَرَارٍ وَمَعِينٍ﴾ [المؤمنون: 50] اللي هو نفس المكان ده، لكن هناك ربنا نسب الإيواء إليه، وآويناهما، إحنا اللي وديناهم هناك، تلمح فيه لطف الله عناية الله. مريم هنا نزلت صحيح رتبة، لكن هي ما زالت في العناية، مش في تمام العناية صحيح، لكن ما زالت في العناية وما زالت في اللطف. لكن لما القلب التفت شيئاً ما إلى الأسباب ووكلت شيئاً ما إلى الأسباب، فتلاقوا اللفظ هنا: فاجاءها المخاض.
اللي وداها عند النخلة المخاض سبب. ومن وراء السبب يعمل لطف الله وعناية الله. وآويناهما إلى ربوات مكان مرتفع، ذات قرار في حتة ممهدة تقعد فيها. شوف يا جماعة لطف ربنا، مش حتة معراة، ذات قرار ومعين اللي هو النهر، اللي هو السري معين تراه العين، لأن البئر ماء البئر لا تراه إلا العين. معين من كلمة عين، معين يعني يرى بالعين. فالماء برده فيه لطف ربنا: ﴿وَجَعَلَ رَبُّكِ تَحْتَكِ سَرِيًّا﴾ [مريم: 24] ماء جاري معين تراه العين؛ فسهل إنك تحصلي منه الماء، مع إن بعد شوية هتتعبي عشان تجيبي مية، بس برضو في لطف من ربنا إنه معين، فتحصيل الماء منه سهل لأنه معين قريب الماء قريب شايفاه بعينك. فنلمح دايماً في قصة مريم الاتنين؛ الأخذ بالأسباب ومشاهدة العناية واللطف من الله عز وجل. احنا محتاجين ده، محتاجين واحنا في حياتنا أن حتى واحنا بناخذ بالأسباب لابد أن نكون في محل اللطف والعناية. طب إزاي؟ بالمقدمات، بالمقدمات.
إيه المقدمات؟ أن مريم كان لها رصيد عند ربنا سبحانه وتعالى، كان لها رصيد. بالرصيد بتاع مريم لم تسقط سقوطاً بالغاً، لا، فضلت لسه في محل العناية. أنتم عارفين في قصة يونس عليه السلام لما نادى يونس بتلك الكلمات من بطن الحوت: ﴿لَّا إِلَٰهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ﴾ [الأنبياء: 87]، قالت الملائكة: يا رب صوت معروف من مكان غريب! الصوت ده احنا عارفينه بس مش عارفين نميز صوت مين. وبعدين من مكان غريب قوي اللي في بطن حوت في ظلمة الليل وظلمة البحر! يا رب صوت معروف من مكان غريب. قال: أما تعرفون؟ أما تعرفون من هذا؟ قالوا: لا. قال: هذا عبدي يونس. قالوا: عبدك يونس الذي ما زال له عمل متقبل ودعاء مرفوع؟ قال: نعم، يونس العبد الصالح اللي ليه أعمال كتير كان بيعملها وليه عمل دعاء وليه... فقالوا: يا رب أما ترحمه فيما هو فيه من البلاء بما كان فيه وقت الرخاء؟ أو كما قالوا؛ يعني يا رب طب الأعمال دي كلها ارحمه؟ قال: أجل أففعل. فإيه اللي نجى يونس؟ ربنا قال في القرآن: ﴿فَلَوْلَا أَنَّهُ كَانَ مِنَ الْمُسَبِّحِينَ * لَبِثَ فِي بَطْنِهِ إِلَىٰ يَوْمِ يُبْعَثُونَ﴾ [الصافات: 143-144]؛ يعني في الماضي على أحد التفسير كان من المسبحين، لالبث في بطنه إلى يوم يبعثون. فإيه اللي نجى يونس؟ أنه كان في زمان الرخاء من المسبحين، من المصلين، فده اللي نجاه من بطن الحوت.
كذلك مريم اللطف بتاع ربنا -اللي احنا عمالين ماشيين بقى شايفين اللطف ولسه هنشوف اللطف تاني إن شاء الله- والعناية الإلهية لمريم بايه يا رب؟ أيوه ما هي كانت من المسبحات، وربنا قال كده: ﴿إِنَّهُمْ كَانُوا يُسَارِعُونَ فِي الْخَيْرَاتِ وَيَدْعُونَنَا رَغَبًا وَرَهَبًا﴾ [الأنبياء: 90]. ربنا قال كده بعد ما ذكر قصص أنبياء وذكر قصة مريم ﴿وَالَّتِي أَحْصَنَتْ فَرْجَهَا﴾ [الأنبياء: 91] ده ختم بيها، وبعدين: ﴿إِنَّهُمْ كَانُوا يُسَارِعُونَ فِي الْخَيْرَاتِ وَيَدْعُونَنَا رَغَبًا وَرَهَبًا﴾ كانوا يسارعون في الخيرات، فلما يقعوا في البلاء لا هيبقى في عناية وفي لطف. هيبقى دي تاني أو ثالث حاجة؛ مريم قدوة فيها الأعمال السابقة واللي احنا اتكلمنا بقى فيها في درس المحراب.
يبقى فاجأها المخاض إلى جذع النخلة، وما زالت مريم لها نوع التفات إلى الأسباب، قالت: ﴿يَا لَيْتني مِتُّ قَبْلَ هَذَا﴾ [مريم: 23]. وطبعا خلاص آويناهما بقى إلى ربوات ذات قرار معين فيها اللطف والعناية. قالت: ﴿يَا لَيْتني مِتُّ قَبْلَ هَذَا﴾. شوفوا يا جماعة سورة مريم يعني أو هذه المشاهد واضح جداً فيها حضور الأسباب، حتى نسبة نفس الأمر في مريم للسبب المخاض في موطن أوآويناهما نسبة إلى الله عز وجل، لكن هنا مناسب إنه يذكر السبب. قال سبحانه وتعالى: ﴿فَأَجَاءَهَا الْمَخَاضُ إِلَى جِذْعِ النَّخْلَةِ قَالَتْ يَا لَيْتَنِي مِتُّ قَبْلَ هَذَا وَكُنتُ نَسْيًا مَّنسِيًّا﴾ [مريم: 23].
طبعا يا جماعة تمني الموت، المؤمن له أن يتمنى الموت إذا خاف البلاء؛ البلاء فين؟ في دينه، أنه يفتن في دينه. والذي يظهر في قصة مريم أن هي ما كانتش خايفة فتنة دين، مريم ما كانتش خايفة فانها تفتن في دينها، وانما استحوز عليها شعور الحزن للحالة التي هي فيها، لأنها من بيت صلاح مثلاً، ولأن إيه اللي هيتقال عليها، ولأن وهكذا؛ الحزن استحوز عليها. ده الظاهر والله أعلم يعني، إنما لو كان واحد خايف يبتلى في دينه فحينها قال: طبعا الأولى أن الإنسان لا يتمنى الموت أصلاً. هذا الأولى أنه لا يتمنى الموت، وهذا بنص حديث النبي عليه الصلاة والسلام: «لا يتمنين أحدكم الموت لضر نزل به، فإن كان لا محال فليقل: اللهم أحييني ما كانت الحياة خيراً لي، وتوفني إذا كانت الوفاة خيراً لي». هنا النبي بيقول عليه الصلاة والسلام إيه؟ لو لمحال يعني مش قادر، يبقى قول كده، ما تقولش يا رب موتني، لو الوفاة خير لي موتني. هنا حتى دي مريم عليه السلام ما قالتش كده، قالت: ﴿يَا لَيْتني مِتُّ قَبْلَ هَذَا وَكُنتُ نَسْيًا مَّنسِيًّا﴾ [مريم: 23]، وهذا ورد عن بعض الصحابة أنهم قالوا كلام زي ده. خلاص، إنما الأولى أنه لا.
طب ليه الأولى أنه لا؟ ما انت فيه اختيار الله لك. نرجع تاني إسقاط التدبير؛ ما انت فيه، ما نزل بك هو اختيار لك، خلاص يا رب راضي، أحب الامرين إليه أحبهما لي، راضي يا رب. لكن يا رب ممكن بقى يبقى الدعاء إيه؟ صبرني يا رب. عارفين المرأة التي كانت تصرع؟ حديث معروف، وبعدين الحديث ده مهم جداً يا جماعة والله الحديث ده مهم. وامرأة سبحان الله يعني احنا درسنا للنساء هي امرأة، يعني أنا أنا مش محضر الكلام ده بس هو يعني من رزق الله عز وجل؛ امرأة تصرع وتتكشف، فجت للنبي عليه الصلاة والسلام تقول له إيه بقى؟ يدعي لها أنها لا تصرع. عليه الصلاة والسلام يدعي لها أنها لا تصرع.
طب خلي بالكم يا جماعة، لو دلوقتي واحد مريض وبيدعي ربنا يا رب يشفيني، الدعاء ده فيه حاجة؟ هو ما فيهوش حاجة خلي بالكم يعني عشان بس نضبط المسالة، ما فيهوش حاجة. في رتبه أعلى؟ آه، فيه رتبه أعلى! يبقى اللي قاعد يا رب اشفيني ما فيهاش أي حاجة. طب الرتبه الأعلى؟ يا رب صبرني على البلاء. ليه؟ كأنه تلمح أن الحالة التي هو عليها هي اختيار الله عز وجل له بس يا رب أعني على أمرك الشرعي في ذلك الأمر القدري، بس. يعني خلاص أنا يا رب راضي، وأسقطت تدبير نفسي وحيلة نفسي واختيار نفسي، الاختيار بارك يا رب، لكن أنت لك أمر شرعي في هذا الاختيار القدري اللي هو إيه؟ طالما ابتليت ابتليتك، أحب أن أرى منك الصبر، أعني بقى على ده يا رب؛ يعني إيه أعني على أمرك الشرعي في ذلك الأمر القدري يا رب؟ ده رتبه أعلى. طب اللي هيدعي أنه ربنا يشفيه مش حرام، ما بنقولش أن ده حرام.
فالمرأة جت كده: ادعي ربنا أني لا أصرع يعني إيه ادعيني بالشفاء، الكلمه العادية اللي كل الناس بتقولها لبعض ادعي لي بالشفا. ماذا قال النبي عليه الصلاة والسلام؟ قال: «إن شئت دعوت لك، وإن شئت صبرت ولك الجنة». الحديث ده عميق جداً جداً، لأن هو ده المعنى، معنى إيه؟ يعني إيه أن شئت صبرت؟ يعني إن شئت سلمت لاختيار الله القدري، وامتثلت أمر الله الشرعي في ذلك الاختيار القدري اللي هو الصبر، فان فعلت فلك الجنة؛ لأنك عملت حاجتين مش حاجة واحدة: سلمت لاختياره القدري، وامتثلت أمره الشرعي بالصبر. فانت عاوزه إيه دلوقتي؟ قالت: لا أصبر ولكني أتکشف! شوفوا بقى يا جماعة هنا، النبي هنا بقى ما عادش الكلام عليه الصلاة والسلام: ولكني أتکشف فادعو الله لي ألا أتکشف. فدعى لها الله لي، لأن ده أمر شرعي بقى هنا أن المرأة تتكشف لا. شوفوا يا بنات، يا نساء، يا نساء اتقين الله في أجساكن! المرأة شوفوا حرصها أنها لا تتكشف وقت الصرع الذي هو مش محاسبة أصلاً، عقلها مش فيها والعقل مناط تكليف، اللي بتروح بمزاجها وتكشف شعرها وتكشف رأسها وتكشف دراعاتها وتكشف رجليها بمزاجها، شوفوا النساء الصالحات تقول له لا خلاص هصبر، لكن يا رسول الله بتكشف، مش عاوز أتکشف. هنا سيدنا النبي عليه الصلاة والسلام ما قالهاش بقى إيه لا تتكشفي، لا، ده أمر شرعي، الستر أمر شرعي، فدعى ربنا ليها قال: تتكشف فكانت بعده تصرع ولا تتكشف.
خلاص يا جماعة، فحملته فلما حست به في بطنها انتبذت به مكاناً قصياً. عشان نستفيد منها؛ ابعدوا عن المشكلة، اهدوا، فكروا، خدوا قرار بهدوء. فانتبذت به مكاناً قصياً. ﴿فَأَجَاءَهَا الْمَخَاضُ إِلَى جِذْعِ النَّخْلَةِ قَالَتْ يَا لَيْتَنِي مِتُّ قَبْلَ هَذَا وَكُنتُ نَسْيًا مَّنسِيًّا * فَنَادَاهَا مِن تَحْتِهَا أَلَّا تَحْزَنِي قَدْ جَعَلَ رَبُّكِ تَحْتَكِ سَرِيًّا * وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا * فَكُلِي وَاشْرَبِي وَقَرِّي عَيْنًا ۖ فَإِمَّا تَرَيِنَّ مِنَ الْبَشَرِ أَحَدًا فَقُولِي إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنسِيًّا﴾ [مريم: 23-26]. كلام سيدنا عيسى في الموطنين كلام خطير جداً جداً وكلام عميق العقل السطحي ما يفهموش. تعالوا في الموطن ده وبعد شوية نشوف الموطن الثاني، يا رب بس نلحق يعني.
دلوقتي يا جماعة المرأة في في تلك النفسية؛ امرأة حملت بلا رجل بلا ذكر، امرأة حملت بلا ذكر، وبعدين في نفسية صعبة جداً. المفروض أي واحدة تبشر بالحمل بتبقى فرحانة؛ ليه، حياة طبيعية، واحدة متجوزة فمبسوطه أن حامل هترجع لقومنا حامل وفرحوا بيها وكده يعني، لا، دي بتستخبى، ما هو أنا هيتقال عليا إيه؟ وأنا من بيت بيت صلاح، وده اللي هيقولوه فعلا، ماشي، ﴿يَا أُخْتَ هَارُونَ مَا كَانَ أَبُوكِ امْرَأَ السَّوْءِ وَمَا كَانَتْ أُمُّكِ بَغِيًّا﴾ [مريم: 28] أنت بيت صلاح، إزاي تعملي كده؟ فكأنك شايفه كل ده، ويعني حازز فيها، محزنها.
فيجي سيدنا عيسى يقول كلام غريب جداً، يقول لها إيه؟ ﴿أَلَّا تَحْزَنِي﴾ [مريم: 24] ماشي، وبعدين ﴿قَدْ جَعَلَ رَبُّكِ تَحْتَكِ سَرِيًّا * وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا * فَكُلِي وَاشْرَبِي وَقَرِّي عَيْنًا﴾ [مريم: 24-26] إيه ده؟ في إيه؟ هو إيه اللي كلي واشربي وقري إيه ده؟ إيه اللي بيحصل دلوقتي يعني؟ الرد ده رد على واحدة شايلة الهم ده، فاهمين؟ الرد فيه مشاكل يعني، احنا مستنيين إيه؟ ده قدر ربنا سبحانه وتعالى، ما تخافيش، ربنا هيجبك، لا، احنا سامعين الكلام وفي الآخر خالص أقول لها إيه؟ ﴿إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنسِيًّا﴾ [مريم: 26]. سيبيها بقى على ربنا في الآخر بقى يعني هو ماشي. والله أعلم هل مريم كانت تعرف إيه اللي هيحصل؟ الله أعلم، مش عارفين يعني. بس رد عيسى هنا رد أي واحد في مكان سيدنا، لو أنت اللي واقف ولقيت واحدة كده مش هتقول لها بتقول لها، مش هتقول إيه ما تزعليش بقى روحي كلي واشربي وتبسطي؟ هو ده بالضبط ده رد سيدنا عيسى: ما تزعليش، روحي كلي واشربي واتبسطي. ده يا جماعة الرد ده يعني يدرس الآن يعني، حتى بتوع علم النفس بقى يعدوا الكلمتين دول ويطلعوهم من العلم بتاعهم واسقاطات بقى.
تعالوا كده نتأامل بقى اللي حصل: ﴿قَالَ أَلَّا تَحْزَنِي قَدْ جَعَلَ رَبُّكِ تَحْتَكِ سَرِيًّا * وَهُزِّي إِلَيْكِ بِجِذْعِ النَّخْلَةِ﴾ [مريم: 24-25]. فاكرين لما قلت لكم مريم نزلت رتبه عشان نتعلم؟ تعالوا بقى نتعلم دلوقتي. لو في حاجه تحزنك، حاجة أحزنتك، أشد وقت بيمر عليك في اليوم أنهي وقت؟ قبل النوم، صح؟ قبل النوم، ليه؟ وقت انقطاع الأشغال فيبتدئ بقى دماغك تشتغل في الحاجة، طب طول اليوم ممكن تبقى ملغي، ممكن تبقى مليء عن الحاجة دي بأمورك الدنيوية فمش مافيش وقت قوي في التفكير، أول ما تقعد لوحدك وتقفل عليك النور وتحط راسك على المخدة تدمر، صح؟ فكان جزء من العلاج: انشغلي.
تعالوا نرجع تاني بقى، عرفتوا ليه أن الأكل ما جالهاش؟ ربنا شغلها. ومع أن ربنا شغلها كان برضو في لطف وعناية أن المية كانت معين باين، يعني مش هنتعبك قوي بس احنا عاوزين نتعبك عشان احنا نتعلم بعد كده بقى، احنا عاوزين نتعبك: انشغلي، ﴿قَدْ جَعَلَ رَبُّكِ تَحْتَكِ سَرِيًّا﴾ [مريم: 24]. طب عشان أشرب يا رب وأنا يا ست نفساء أعمل إيه؟ لا انزلي انزلي انزلي بقى النهر ودوري على حاجة تجيبي بيها مية وهاتي المية واتعبي، فلما تتعبي تقعدي ترتاحي شوية عقلك مش فاضي يفكر في الأزمة اللي أنت فيها. وبعدين ﴿وَهُزِّي إِلَيْكِ بِجِذْعِ النَّخْلَةِ﴾ [مريم: 25]، ما فيش رطب هتنزل علي، طب يا رب يعني حتى لو مش طعام الشتاء في الصيف وطعام الصيف في الشتاء رطب علاء، لا قومي هز النخلة، اتعبي، انشغلي؛ ليه؟ ده علاج للحالة اللي أنت فيها، أشيلي نفسك، ﴿وَهُزِّي إِلَيْكِ بِجِذْعِ النَّخْلَةِ﴾ [مريم: 25].
هو يا جماعة بس بالعقل كده لو راجل بشنبات ومجانس وعضلات وبتاع وواقف هز جزع نخلة، هتوقع رطبة واحدة؟ النخل يا جماعة اللي ما شافش منكم اللي عاوز يجيب بلح من النخل بيعمل إيه؟ يا بيقعد يحدف طوب عشان بيطلعوا بحزام فوق عشان يجوا، ما فيش حد بيقف يهز جزع جزع نخلة إلا لمازه هيوقع، ده ما فيش كده. فهز مريم للجزع يقيناً في قانون الأسباب لا ياتي بالرطب، لكن ربنا سبحانه وتعالى طبعا غير المعنى بقى اللي هي إيه؟ نزلت رتبه، وقلنا ليه نزلت رتبه؟ عشان نتعلم اللي احنا عمالين نقوله ده، وإلا ما كانش زمان في درس، وإلا ما كانش زمان مريم قدوة لينا. شوفوا بقى تربية ربنا لمريم، علاج ربنا في هذه الآيات للحالة اللي مريم فيها.
وثاني بكرر، بتوع علماء النفس أو الأطباء النفسيين أو كده لو يطلعوا الكلام ده من عندهم ويحطوه يبقى كويس يعني. فربنا شغلها وتعبها وهي أصلاً تعبانة امرأة نفساء، فالمية هتعالج؟ هتعالجي النهر عشان تشربي مية، طب والرطب؟ لا هتقومي تهزي النخلة، مش ما فيش رطب كده مجاناً، قومي هزي النخلة، ده علاج ليكِ.
علاج في إيه؟ في الانشغال والتعب، الاتنين؛ هنشغلك، الشغل يتعبك، فطول ما أنتِ مشغولة ذاهلة عن الموضوع إيه اللي محزنك ده. طب فرغتي من الشغل، تعبانة؟ فالتعب الجسدي ربما يرجو عن تعب النفس، فيشغلك برده شوية عن إيه عن اللي أنتِ الحاجة اللي تعباكِ دي. وبعدين زي ما قلنا في قانون الأسباب، هتهزي النخلة، الرطب مش هتنزل في مكان واحد، فروحي بقى لفي على الرطب بقى لمي الرطب، فده من الحاجات اللي ربنا أخرج بها مريم من على لسان عيسى عليه السلام.
حاجة تانية ومعنى آخر، اللي هو إيه؟ إنه ما تبقيش محصورة في الأزمة خصوصاً لو مش في إيديكي حاجة تعمليها، وعيشي لحظتك. وكان المعنى هنا إيه؟ لا تحزني وقت لقاء القوم نبقى نشوف هنعمل إيه، طب دلوقتي كلي واشربي. يعني دلوقتي أنتِ لو قعدتي تفكري دلوقتي في الأزمة اللي هتحصل هتعملي إيه؟ يعني ولا حاجة، هتتعبي على الفاضي، إنما أنتِ دلوقتي محتاجة للأكل والشرب لأنك نفساء أو لأنك بني آدمة أصلاً يعني محتاجة الأكل والشرب، فدليقتي كلي واشربي وقري عيناً، هدي نفسك.
يبق من المعاني يا جماعة اللي تعالج تلك الأحزان، ومن المعاني اللي اللي تخرجنا من هذه الحالة، حالة الاكتئاب، حالة إن أن نعيش اللحظة الحاضرة. والحاجة اللي أنتِ خايف منها أو الحاجة اللي حزناك قبل كده أو الحاجة اللي مش عارف إيه، مش هتفيدك حاجة أنك تقعد تحاوط نفسك بيها. كنا سميناها قبل كده في قصة يوسف الاستغراق في اللحظات الحاضرة بس هنا اللحظة الحاضرة كانت لحظة الحزن، احنا عاوزين نستغرق في لحظات الحزن؟ احنا عاوزين نخرج من لحظات الحزن.
فنعملها إزاي؟ اشغل نفسك أول حاجة حتى لو بأمور الدنيا. تاني حاجة، مع هذا الانشغال حاول تتعب نفسك، اتعب بدنك عشان حتى لما ينقطع عنك الانشغال تنام على طول، يعني ما تبقيش في وقت خلاص من كتر ما أنا تعبان هنام، دي تاني حاجة. ثالث حاجة، أنك انشغل بما يصلح اللحظة الحاضرة، دلوقتي كلي واشربي. طب ده أنا هاتي قومي بعدين هجيب لك حل بقى، نشوف بعدين قومك دول إيه اللي هيحصل معهم بس دلوقتي تفكيرك مش هيؤدي لحاجة، الولد جه خلاص وكده كده هيتعرف. فده برده علاج لتلك الحال اللي فيها مريم، يبقى لا تحزني.
وعشان لا تحزني، اه هنقول بقى في حاجة رابعة كان المفروض نبتدي بيها وهي أن تتلمح أن تتلمح لطف الله في أثناء البلاء. إيه ده؟ فين ده؟ ﴿قَدْ جَعَلَ رَبُّكِ تَحْتَكِ سَرِيًّا﴾ [مريم: 24]. يبقى ربنا اللي آواهما إلى ربوة ذات قرار ومعين، كان ممكن تروح لحته تانية جردآء وما فيهاش، لا ربنا جعل تحتك نهراً سرياً معيناً باين لعينيكي، فشوفي ده شوفي ده يا مريم. يبقى سيدنا عيسى بيقول لها إيه؟ لا تحزني، وتلمحي لطف الله، وتلمحي معية الله، وتلمحي عناية الله بكِ إذ جعل تحتك سرياً، وكان ممكن ما يبقاش هذا السري.
وبعدين ﴿وَهُزِّي إِلَيْكِ بِجِذْعِ النَّخْلَةِ﴾ [مريم: 25] ومن لطفه ﴿تُسَاقِطْ عَلَيْكِ رُطَبًا جَنِيًّا﴾ [مريم: 25] مع أن هزك للنخلة في قانون الأسباب ما يعملش حاجة. فتلمحي لطف الله سبحانه وتعالى ومعيته وعنايته، ومن تلمح ذلك ربنا سبحانه وتعالى هيتم علي نعمته، إزاي؟ ما أعرفش. يا جماعة ساعات ربنا سبحانه وتعالى يلجئ أولياءه إلى هذا، أنك ما تبقيش عارف إيه اللي هيحصل.
أنا قلت لكم من شوية كان مريم يعني لسه الصورة مش واضحة قدامها، أنا هخرج من الأزمة دي إزاي قدام قومي؟ ده بقى واضح جداً في قصة موسى عليه السلام. موسى لما وصل للبحر ربنا أراد ذلك، أنه يلجئ وليَّ موسى عليه السلام إلى أضيق الأمر، لغايه ما قومه يقولون: ﴿إِنَّا لَمُدْرَكُونَ * قَالَ كَلَّا ۖ إِنَّ مَعِيَ رَبِّي سَيَهْدِينِ﴾ [الشعراء: 61-62]. معنى سيهدين دي عارفين إيه؟ أن موسى لغايه ما قال الكلمة دي هو مش عارف إيه اللي هيحصل، هو هيهديني؟ هو لسه أنا ما أعرفش إيه اللي هيحصل، ﴿كَلَّا إِنَّ مَعِيَ رَبِّي سَيَهْدِينِ﴾. محتاجين هذا اليقين في في خضم الازمات والابتلاءات.
﴿قَدْ جَعَلَ رَبُّكِ تَحْتَكِ سَرِيًّا * وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا﴾ [مريم: 24-25]، والمفاجأة كمان أن قالوا إن النخلة دي كانت يابسة ما كانش فيها رطب أصلاً، لو فيها رطب الهزة ما تجيبش رطب، ما بالكم أنها كانت يابسة لا رطب فيها أصلاً. وقالوا أنتم عارفين بيحتفلوا بالكريسماس فين؟ في الشتاء، والنخل بيثمر فين؟ البلح فين؟ في الصيف، البلح صيفي، ماشي. بعض إخواننا -وده يظهر أنه غلط منهم- يقولوا إيه؟ يجوا يقولوا له إيه؟ أما يجوا يردوا على النصارى يقول لك إيه: وبتحتفلوا بكريسماس في الشتاء وأصلاً بقى ميلاد عيسى ما كانش في الشتاء بدليل ﴿وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا﴾ والرطب بتنزل في الصيف. لا، هم علماء التفسير أصلاً قالوا هذه النخلة كانت يابسة لا رطب فيها، فده ممكن يقوي أن ممكن يبقى ميلاده يعني، مم أنا مش باحرر ميلاد عيسى كان أمتى، مش باحرر ده، بس المثال ده لا يصلح في الاستدلال، لأن بعض المفسرين ذكر اللي أنا بقوله ده أن هي أصلاً كانت لا رطب فيها وفجأة هيبقى فيها رطب فتلمحي ذلك يا مريم.
يبقى يبقى تاني، الحاجات اللي تخرج المرأة بالذات من الأزمات والرجال كذلك: أول حاجه أنك تتلمح لطف ربنا سبحانه وتعالى، احنا هنعيد الترتيب لان ده كان المفروض يبقى اول حاجة، تتلمح لطف الله ومعيته وعنايته وتدبيره لك في اثناء المحنه والبلاء، كان ممكن يبقى بلاء أكبر من كده. ثاني حاجة، اشغل نفسك أو أشغلي نفسك. ثالث حاجة، اتعبي نفسك، ممكن اشغل نفسي بس بحاجة ما تتعبش، لا أهلكي نفسك عشان لما تخلصي تتعبي يبقى بدنك تعبان، تنامي بقى، تعب البدن يطغى على تعب النفس وتعب الروح التعب الذهني، فدي برده اعمليها. رابع حاجة إيه؟ فكروني.
آه، لا تحزني إيه؟ ﴿قَدْ جَعَلَ رَبُّكِ تَحْتَكِ سَرِيًّا * وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا﴾ [مريم: 24-25]. آه، ﴿فَكُلِي وَاشْرَبِي وَقَرِّي عَيْنًا﴾ [مريم: 26] اللي هو إيه؟ عيشي اللحظة. عيشي اللحظة دلوقتي، إيه؟ كلي واشربي وقري عيناً وبعدين ربنا هيدبرها يا ستي، ربنا هيدبرها من عنده. ﴿فَكُلِي وَاشْرَبِي وَقَرِّي عَيْنًا ۖ فَإِمَّا تَرَيِنَّ مِنَ الْبَشَرِ أَحَدًا فَقُولِي إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنسِيًّا﴾ [مريم: 26].
معنى إن مريم قدوة لنا فيه وهو ما تخبيش حد ليه؟ اصل الكلام ما فيش منه فايدة هنا. ده أول معنى ذكره المفسرون على فكرة اللي هو إيه؟ اللي هو في وقت كلامك مالوش معنى الأحسن اسكت، ما تتكلمش. أنت لما تروحي لقومك والله لو قلت لهم إيه، لابساكي لابساكي جاية لنا بعيل، مالوش في الوقت ده إيه؟ اسكتي.
هذا المعنى وقع لعائشة رضي الله عنها في حديث الإفك، عائشة ما كانتش تعرف حاجة، هم عاملين يتكلموا هي ما تعرفش حاجة، ما تعرفش أن في حديث يعني ما فيش، ما تعرفش أن في كلام بتاع. بس الحاجة الوحيدة اللي واخدة بالها منها إيه؟ أن النبي متغير عليه الصلاة والسلام ما بيعاملهاش زي ما كان بيعاملها، بس ما تعرفش حاجة. طب لما عرفت عملت إليه؟ ولا حاجة، كانت الأول بتعيط، لما سمعت كده وقفت دمع وقالت -وكانت ساعتها بتقول ما كنتش أحفظ من القرآن كتير- قالت كلمة يوسف: ﴿فَصَبْرٌ جَمِيلٌ ۖ وَاللَّهُ الْمُسْتَعَانُ عَلَىٰ مَا تَصِفُونَ﴾ [يوسف: 18] وسكتت. اصل الكلام ما فيش منه فايدة، فمهم جداً تعرفي تختاري معارك، وتختاري المعركة اللي الكلام فيها مجدي فنتكلم، والمعركة اللي الكلام فيها غير مجدي فما ترهقيش نفسك وما تتعبيش نفسك.
كل الكلام اللي بقوله ده على فكرة ذكره العلماء، بل مذكور عن ابن مسعود. شوفوا الأثر ده جميل جداً عن حارثة، قال: كنت عند ابن مسعود فجاء رجلان، فسلم أحدهما ولم يسلم الآخر. العادي الناس بتدخل سلام عليكم، فالاتنين دخلوا، واحد قال سلام عليكم والتاني ما سلمش. فقال: ما شأنك؟ -ابن مسعود بيساله- أنت ليه ما سلمستش؟ قال: أصحابه، هو ما تكلمش، هو قال أصحابه: حلف ألا يكلم الناس اليوم. فكان ابن مسعود تلمح إنه بيقتدي بمين؟ بالسيدة مريم. فقال عبد الله بن مسعود: كلم الناس وسلم عليهم، فإنما تلك امرأة -ركزوا بقى يا جماعة- علمت أن أحداً لا يصدقها أنها حملت من غير سوء، ليكون عذراً لها إذا سئلت.
ابن مسعود بيقول إيه؟ بيقول: لا أنت اتكلم وبتاع، إنما كانت امرأة علمت أن ما حدش هيصدقها، فعشان يبقى عذر لها أنها ما تكلمنيش قالت إيه: ﴿إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنسِيًّا﴾ [مريم: 26]. الصوم يعني الامساك، مطلق الامساك، فهي صوماً، أما أن الصوم كان ساعتها يصحب عندهم بالسكوت أو هي أرادت الصوم عن الكلام. مفهومة دي؟
طيب ليه عملت كده مريم؟ عشان يبقى عذر ليها أن انا مش هتكلم. طب ليه ما تتكلميش يا مريم؟ الكلام ما فيش منه فايدة، فما ترهقيش نفسك وما تهلكيش نفسك وما تضيعيش طاقتك، اسكتي. فدي برده مريم قدوة فيها، ﴿فَإِمَّا تَرَيِنَّ مِنَ الْبَشَرِ أَحَدًا فَقُولِي إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنسِيًّا﴾ [مريم: 26].
ويخلص المشهد الثاني، المشهد كان مع جبريل وخرجنا منه بمعنى واحد في القوة وهو القلب مرتبط بالله: ﴿إِنِّي أَعُوذُ بِالرَّحْمَٰنِ مِنكَ إِن كُنتَ تَقِيًّا﴾ [مريم: 18]. وبعدين المشهد تاني مع عيسى عليه السلام وخرجنا منه بحوالي خمس معاني من معاني القدوة من مريم.
وبعدين يجي المشهد الثالث، وهو مشهد مركب لأنه بين مريم ومريم هنا عليها السلام مالهاش قوي في المشهد ده حاجة غير معنى واحد بس، وبعدين الكلام بقى بين القوم وبين عيسى عليه السلام. هنا مريم عملت إيه؟ ﴿فَأَتَتْ بِهِ قَوْمَهَا تَحْمِلُهُ﴾ [مريم: 27] وكأن مريم تعود مرة أخرى إلى الرتبة العلية، وكأن مريم تعلمت فاختارت اختيار الله لها، ما ابتدتش تتحايل. هنا مريم عملت إيه؟ ما خبتش الولد، ما حطتوش في حتة وراحت لقومها وابتدت تمهد، ابتدت تداري، ابتدت تعرض بالكلام، وواحدة واحدة نقول لهم وواحدة واحدة.. لا، مريم رجعت تاني تحمله، تظهره غير مبالٍ اختيار ربنا سبحانه وتعالى، ورجعت لقوتها، فرجعت لتمام العناية.
فربنا صرف عنها بأن الولد يتكلم، خصوصاً على قول من قال من المفسرين فناداها من تحتها جبريل وليس عيسى، المفسرين اختلفوا هنا على قولين فندهها من تحتها في الآية اللي قبل كده إنه اللي ناداها جبريل: ﴿لَا تَحْزَنِي قَدْ جَعَلَ رَبُّكِ تَحْتَكِ سَرِيًّا﴾ [مريم: 24] و﴿وَهُزِّي إِلَيْكِ بِجِذْعِ النَّخْلَةِ﴾ [مريم: 25] إن ده كله كلام جبريل، ده قول بعض المفسرين. لو ركبنا الصورتين دول على بعض فكأن مريم هتبقى أول مرة تفاجأ بعيسى بيتكلم امتى؟ في المشهد مع القوم: ﴿فَأَتَتْ بِهِ قَوْمَهَا تَحْمِلُهُ﴾ [مريم: 27] تظهر خلاص بقى عرفنا.
وهنا قدوة مريم لنا في هذا: ﴿قَالُوا يَا مَرْيَمُ لَقَدْ جِئْتِ شَيْئًا فَرِيًّا * يَا أُخْتَ هَارُونَ مَا كَانَ أَبُوكِ امْرَأَ السَّوْءِ وَمَا كَانَتْ أُمُّكِ بَغِيًّا﴾ [مريم: 27-28]. هنا يا جماعة الكلام على إيه؟ اتهام مريم بالزنا عليها السلام وحاشاها. فأشارت إليه، مستنيين عيسى يقول إيه بقى؟ أمي بريئة، أمي لم تزني.
عيسى عليه السلام ما جابش سيرة أمه أصلاً. كلام عيسى عليه السلام في المرتين عجيب، عجيب جداً. احنا هنا في محل إيه؟ دفع التهمة، فكان يكفي أمي بريئة، صح كده؟ كلام كبير وطويل ما فيهوش تبرئة للأم صراحة، وإن كان لازم الكلام كده لكن ما فيهوش تبرئة للأم صراحة. وننهي بكلمة: ﴿قَالَ إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيًّا * وَجَعَلَنِي مُبَارَكًا أَيْنَ مَا كُنتُ وَأَوْصَانِي بِالصَّلَاةِ وَزَكَاةِ مَا دُمْتُ حَيًّا * وَبَرًّا بِوَالِدَتِي وَلَمْ يَجْعَلْنِي جَبَّارًا شَقِيًّا * وَالسَّلَامُ عَلَيَّ يَوْمَ وُلِدتُّ وَيَوْمَ أَمُوتُ وَيَوْمَ أُبْعَثُ حَيًّا﴾ [مريم: 30-33].
إيه ده؟ فين تبرئتك لأمك؟ وإن كان الكلام لازمه كذا، لأن مش هيكون نبي من نسل حرام، يعني مش هيكون ابن زينة ونبي، يعني ده لازم، لازم الكلام، لكن إيه المعنى اللي ناخده يا جماعة؟ احنا احنا احنا في قضية كبرى، فاتهام الشخص في هذه القضية يذوب ويضمحل، احنا جايين نعبد الناس لربنا، احنا جايين نعبد الناس لربنا، فالداعية يتهم لا يلتفت، الداعية يشتم لا يلتفت، الداعية يرمى بكذا لا يلتفت، ليه؟ احنا عندنا قضية أكبر بندعو ليها، فيوم ما أنا هتكلم كلم عيسى عليه السلام، مش هقف أدافع عنك، أنا جاي أرسل القضية الكبرى: ﴿إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيًّا﴾ [مريم: 30]. نعم، في ضمن ده هيبقى في تبرئة ليِكي، لكن احنا هنا مش جايين نبرئ ساحة الداعية ولا جايين نرد على الداعية ولا خالص.
شوفوا يا جماعة وهذا برده ده رزق كده أنا مش محضر الكلام ده، بعد غزوة أحد يقف أبو سفيان بعد ما كسب الكفار: أفيكم.. أفيكم محمد؟ قال: لا تجيبوه. هنا الكلام عن الداعية ها، أفيكم أبو بكر؟ قال: لا تجيبوه. أفيكم عمر؟ قال: لا تجيبوه. قال: أعلُ هبل، قال: ألا تجيبوه؟ احنا احنا مش جايين ندافع عن دعاة ولا جايين ندافع عن أنفسنا ولا جايين نرد شتيمة بشتيمة، كل ده تحت رجليه، كل ده تحت رجلي، لكن قضايا الدين: أعلُ هبل؟ ألا تجيبوه؟ قالوا: وما نقول؟ قال: قولوا الله أعلى وأجل.
ده حصل، كأن مريم مستنية بقى إيه يعني يذنب عنها، وما وإن كان حصل، حصل لكن ضمناً. لكن نتعلم إيه من هنا؟ أنت عرضك مش أغلى من الدين وشتمتك ما هياش هي دي، بعض الدعاة بيقع في..
وهذا، وبعض النساء بالذات النساء بقى؛ لأن المرأة ممكن ما تستحملش، وتبقى داعية وتبقى محفظة قرآن وتبقى مش عارف إيه، تلاقي تكرس حياتها كلها في الرد على اللي بتشتمها، يا ستي ما تتشتمي! كان أحد مشايخنا يقول لنا من القواعد الشرعية: الشتيمة ما بتلزقش، الشتيمة ما بتلزقش؛ اتشتي وخليكي مكملة في طريقك ما تلتفتيش. فده تتعلميه من موقف عيسى عليه السلام، قال: ﴿إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيًّا * وَجَعَلَنِي مُبَارَكًا أَيْنَ مَا كُنتُ﴾ [مريم: 30-31]. احنا لولا المغرب أمتى بيأذن؟
يعني آخر حاجة أختم بيها هي لولا، بس احنا مش جايين نتدبر سورة مريم بس يا جماعة، احنا قدام قضية كبيرة وهختم بيها بس في دقيقتين. احنا قدام مشهد هيصير بعد شوية أعظم فتنة في التاريخ، تاريخ، خلي بالكم. مشهد إيه؟ ولادة عيسى من غير أب، بعد شوية ده بعد سنين سيصير أعظم فتنة في التاريخ. احنا النهارده 8 مليار بني آدم على الأرض، 3 مليار أو قرب المليار نصراني يعتقدون ألوهية عيسى، وكان دي ممكن ما تبقاش موجودة بس لو كان عيسى ولد لأب. احنا قدام قضية كبيرة بس احنا مش نتدبر سورة مريم لأن احنا دي بس بنقولها: امتى إن عيسى أول كلمة قال: إنّي عبد الله؟
الناس بتقعد إيه القراء حبايبنا يجي يقرا القرآن (إنّي) ويعلي صوته فيها، خلي بالك عيسى وهو بيقولها في الوقت ده القضية مش موجودة. عيسى في الوقت ده ما حدش بيقول عليه إنه ابن ربنا أصلاً، ولا حد ده بيقولوا ابن زنا، يعني اللي واقفين بيقولوا عليه ابن زنا. عيسى في الوقت ده بيبرئ نفسه من حاجة هتيجي بعد سنين تتقال عليه، عشان بقول لكم في قضية كبرى احنا مش فاضيين دلوقتي نقعد نذب عن عرض الدعاة يجي ضمنا ماشي، إنما احنا عندنا القضية الكبرى احنا هنعبد الناس لربنا فانا هيتقال عليا بعد سنين إن ابن ربنا، فمن دلوقتي بقول: إنّي عبد الله آتاني الكتاب وجعلني نبياً.
شوفوا نسبة الحاجات لربنا كلها: وجعلني مباركاً أينما كنت، إلى آخر الآيات. أظن هذا القدر يكفي، أقول قولي هذا واستغفر الله العظيم لي ولكم. سبحانك اللّهم وبحمدك، نشهد أن لا إله إلّا أنت، نستغفرك ونتوب إليك، والسّلام عليكم ورحمة الله وبركاته.