الشيخ أمجد سميرالسلام عليكم ورحمة الله وبركاته، هذا الدرس الثالث من دروس سلسلة الدروس التي عاملينها قبل رمضان. الدرس الأول كنا اتكلمنا فيه عن مسألة الخلق والاختيار، وأن طبعاً يا جماعة عشان بس نبقى فاهمين إيه اللي بنعمله في الدروس دي؛ الدروس دي إحنا بنذكر قواعد في طريقك إلى الله عز وجل، قواعد من قواعد السير إلى الله عز وجل. يعني وأنت ماشي لربنا سبحانه وتعالى لازم تبقى فاهم شوية قواعد كده بتساعدك في طريقك، وكان أول قاعدة خدناها في أول درس أن ربنا سبحانه وتعالى له الخلق والاختيار، وأن مناط أو المسألة اللي بيتمحور حولها العبادة هي مسألة الاختيار؛ إزاي تتعامل مع اختيارات الله القدرية والشرعية، ده كلام بؤس.
الدرس التاني اتكلمنا عن قاعدة مهمة جداً هي قاعدة أنك وأنت في طريقك لربنا سبحانه وتعالى لابد أن تسير بين مشاهدة المنة وأن طلعت عليه بالنفس والعمل، دي كانت القاعدة التانية في الدرس التاني.
النهارده بقى درس مش قاعدة واحدة، يعني هيبقى الدرس فيه كذا قاعدة هناخدها من حديث النبي عليه الصلاة والسلام اللي أخرجه البخاري في صحيحه من حديث أبي هريرة رضي الله عنه أن النبي صلى الله عليه وسلم قال: «لن ينجي أحدا منكم عمله». قال: ولا أنت يا رسول الله؟ قال: «ولا أنا إلا أن يتغمدني الله برحمة، سددوا وقاربوا واغدوا وروحات وشيئاً من الدلجة، والقصد القصد تبلغوا». وفي رواية: أن النبي صلى الله عليه وسلم قال: «سددوا وقاربوا وأبشروا»، وفي رواية أنه صلى الله عليه وسلم قال: «وإن أحب الأعمال إلى الله أدومها وإن قل»، وفي رواية أنه قال: «كل هذه روايات للحديث إن هذا الدين يسر، ولن يشاد الدين أحد إلا غلبه، فسددوا وقاربوا وأبشروا، واستعينوا بالغدوة والروحة وشيء من الدلجة».
طبعا حديث عظيم ومليان قواعد، خلينا مع أول قاعدة كده النبي عليه الصلاة والسلام يبدأ هذا الحديث بقوله للصحابة رضي الله عنهم: «لن ينجي أحدا منكم عمله». وفي رواية للحديث ده، الرواية دي مهمة عشان هنتكلم عليها، أن النبي صلى الله عليه وسلم قال: «لن يدخل أحد منكم الجنة بعمله»، وركزوا بقى في حرف الباء ده.
طيب «لن ينجي أحدا منكم عمله»، قالوا: ولا أنت؟ قال: «ولا أنا إلا أن يتغمدني الله برحمة»، وفي رواية: «برحمة منه وفضل». يبقى أول قاعدة معنا: لن ينجي أحدا عمله. يبقى وأنت في طريقك لربنا سبحانه وتعالى، إحنا في مواسم الطاعات عاوزين نستغل هذه المواسم، بندخل شعبان عبادتنا بتزيد، نخش رمضان العبادة بتزيد أكتر، وأنت في عبادتك دي خلي بالك: لن ينجي أحدا منكم عمله، ولا النبي عليه الصلاة والسلام. الجملة دي بقى خطيرة جداً ليه؟ لأنها يا جماعة بتفيد كذا معنى، ولو قلنا دي قاعدة من القواعد العظيمة، من قواعد السير إلى الله العظيمة، فهي بتفيدك كذا معنى، معنى قلبي.
أول معنى الجملة دي يا جماعة تخوف ولا تطمن؟ فكروا كده، لن ينجي أحدا منكم عمله، قالوا: ولا أنت؟ قال: ولا أنا إلا أن يتغمدني الله برحمة. الجملة دي تخوف ولا تطمن؟ الجملة دي الاتنين، يبقى الجملة دي تفيدك الخوف والرجاء معا، تفيد الطائعة الخوف وتفيد المقصرة الرجاء، صح ولا لا؟ لما أجي أقول لك وأنت طاحن نفسك عبادة: لن ينجي أحدا منكم عمل، إيه ده؟ يعني العمل ده كله ممكن يجعله الله هباء منثوراً؟ طيب لو أنت مقصر وجيت قلت لك: لن ينجي أحدا منكم عمله إنما هي الرحمة، رحمة الله عز وجل، تلاقي أن بقى عندك رجاء أو في أمل، صح؟ يبقى لن ينجي أحدا منكم عمله.
إيه تاني في الجملة دي؟ لما تفكر فيها كده، لن ينجي أحدا منكم عمله، مفيد اه، أنها بتدفع عنك العجب ورؤية العمل. تخيل كده أن أنت طائع لله عز وجل، وجيت قلت لك يا حبيبي العمل اللي بتعمله ده كله مش هو اللي هينجيك، بعد ما ممكن لو كان عندك بذرة عجب بالعمل أو بذرة رؤية العمل شايف نفسك، شايف أعمالك تختفي أو يختفي هذا العجب بالعمل، ليه؟ ما هو مش ده اللي هينجيه، مش ده اللي هيدخلني الجنة. الرواية ما تنسوهاش ها، لن يدخل أحد منكم الجنة بعمله. ما تنسوش الرواية دي عشان هنتكلم عليها كمان شوية.
كذلك بتنفي هذه الجملة عن قلبك الاتكال على العمل. خلي بالك الاتكال على العمل حاجة، والعجب ورؤية العمل حاجة. يعني ممكن واحد يبقى لا مش معجب بعمله ولا شايف عمله، لكن متكل بقلبه على عمله، عملي ده هو اللي هينجيني، عملي ده هو اللي هيدخلني الجنة. مش معجب بعملي، مش شايف نفسه، لكن بيشتغل وبيقول أن العمل ده هو اللي هيدخلني الجنة، هو ده اللي هينجيني يوم القيامة، لا، نقول له: لن ينجي أحدا منكم عمله، فتنفي عن قلبك الاتكال على العمل.
كذلك لما أجي أقول لك لن ينجي أحدا منكم عمله فتقول لي: أمال بإيه؟ أقول لك: بالرحمة. يبقى الجملة دي تفيدك إيه؟ تفيدك أنك تبقى مركز قوي في أنك تتعرض لمواطن الرحمات، تبقى ذكي في العبادة، تبقى ذكي وأنت بتعبد ربنا، تبقى ذكي وأنت بتتعامل مع ربنا سبحانه وتعالى. لما تعرف أن النجاة مش بالأعمال، أمال بإيه؟ بالرحمة. طب ربنا بيرحم مين؟ فتبتدي تدور، ربنا بيرحم مين؟ علشان تبتدي تتصف بالصفات اللي أهلها ربنا وعدهم بالرحمة.
طيب عندنا إشكال في الجملة دي، لن ينجي أحدا منكم عمله، والرواية التانية لن يدخل أحد منكم الجنة بعمله، لكن جه في القرآن قول الله عز وجل: ﴿سَلَامٌ عَلَيْكُمُ ادْخُلُوا الْجَنَّةَ بِمَا كُنتُمْ تَعْمَلُونَ﴾ [النحل: 32]. ربنا بيقول: ادخلوا الجنة بإيه يا رب؟ بما كنتم تعملون، يعني بأعمالكم ادخلوا الجنة، والنبي بيقول عليه الصلاة والسلام: لن يدخل أحد منكم الجنة بعمله، طب ازاي؟ في الآية التانية: ﴿بِمَا أَسْلَفْتُمْ فِي الْأَيَّامِ الْخَالِيَةِ﴾ [الحاقة: 24]. طب ده إشكال، يعني إيه طيب؟ اه، إحنا هنخش الجنة بأعمالنا ولا مش هنخش بأعمالنا؟ هنا العلماء اتكلموا في المسألة دي، أنا مش عاوز بقى أوجع دماغكم بأقوال كتير، أقوال كتير اوي للعلماء عشان نجمع بين أو نجمع بين الحديث وبين الآيات، هنخش الجنة بالأعمال ولا هنخش الجنة بحاجة تانية غير الأعمال؟ ربنا بيقول: ادخلوا الجنة بما كنتم تعملون، وبيقول: بما أسلفتم في الأيام الخالية، والنبي بيقول عليه الصلاة والسلام: لن يدخل أحد منكم الجنة بعمله.
فإيه الحل؟ الحل بقى أن الباء دي يا جماعة، الباء اللي هتحل لنا المشكلة، النبي بيقول عليه الصلاة والسلام لن يدخل أحد منكم الجنة بعمله، وربنا بيقول بما كنتم تعملون، باء إيه؟ بما أسلفتم في الأيام الخالية. باؤها هي الباء اللي هنا غير الباء اللي هنا، دي باء ودي باء تانية خالص. مش فاهم؟ هفهمك. الباء المثبتة هي باء السببية، والباء المنفية هي باء المعاوضة. لا برضه مش فاهم، أنت كبرها قوي عليها. خلي بالكم أنا هنا مش داخل في تفاصيل يعني كلامية ولا جدالية، أنا عاوز أخد معنى قلبي برضه، عاوز أطلع بمعنى قلبي فمش هنطول. المعاوضة يعني إيه؟ أما أجي أقول لك اشتريت مثلاً، اشتريت كتاب بعشرة جنيه، دي بيسموها، شايفين الباء دي، اشتريت كتاب بعشرة جنيه، الباء دي بيسموها باء المعاوضة. يعني إيه باء المعاوضة؟ يعني أول ما تجيك العشرة جنيه أستحق إني أخد الكتاب، ولو ما ادتنيش الكتاب ممكن اعمل لك، يعني ممكن أطالبك بالكتاب، ليه؟ أنا أديت لك العشرة جنيه حق الكتاب، والكتاب بعشرة جنيه، فالمعاوضة اهي، فيبقى أستحق عليك إني أخد الكتاب منك. الباء دي هي اللي منفية اللي النبي صلى الله عليه وسلم قال: لن يدخل أحدا أو لن يدخلها أحد منكم الجنة بعمله. يعني الجنة يا جماعة الأعمال دي مش معاوضة، يعني مش لو أنا اشتغلت أستحق دخول الجنة، يعني أجي كده يوم القيامة أقول لربنا: يا رب أنا عملت واحد اتنين تلاتة فده ثمن الجنة، وأنا أطالبك الآن بدخول الجنة، لا، ما فيش كده.
أمال إيه الباء اللي في الآية بقى؟ ادخلوا الجنة بما كنتم تعملون، بيسموها باء السببية. باء السببية عفوا. يعني إيه؟ يعني الأعمال جعلها الله عز وجل تكرماً منه سبباً لدخول الجنة، والسبب والمسبب جميعاً إليه سبحانه وتعالى. يعني لما أجي أنا أقول لك مثلاً، أجي أقول لابني مثلاً: لو إذاكر هاديك مثلاً مية جنيه ولا ألف جنيه، ويجي ابني يذاكر، ماشي؟ يبقى المذاكرة هي سبب حصوله على الفلوس دي، خلي بالكم هو الفلوس دي مش معاوضة، يعني مش هو أدان حاجة فبدي له مقابلها حاجة، فعشان يقول لي: أنا خلاص أديتك اللي أنت عاوزه، فالدقيق، لا، دي حاجة أنا، أنا اللي تفضلت، أنا ما كنت ممكن أقول له: ذاكر وما لكش حاجة، لكن أنا قلت له: تكرمًا مني هاديك ألف جنيه لو إذاكر، فبيذاكر فأديته الألف جنيه، وأقول له: مذاكرتك هي سبب أنك تاخد الألف جنيه. أما أبقى أنا متفضل عليه ولا لا؟ أبقى متفضل، أهو كده الجمع بين الآية من من الآيات والحديث، دي باء السببية ودي باء المقابلة أو المعارضة المثبتة، باء السببية باء المنفية باء المعاوضة وباء المقابلة.
طيب، يبقى ده أول قاعدة، لن يدخل أو لن ينجي أحدا منكم عمله، قال: ولا أنت يا رسول الله؟ قال: ولا أنا، إلا أن يتغمدني الله برحمة منه.
وده يا جماعة بقى تخليك كده دايماً عايش في إيه؟ بين رجاء وخوف؛ خوف أن هذه الأعمال ليست هي المنجية. وليه يا جماعة كمان الأعمال دي ما هياش هي المنجية؟ ركزوا بقى معي كده دلوقتي، ربنا سبحانه وتعالى شوفوا الصورة الكبيرة يا جماعة، شوفوا الصورة من فوق؛ ربنا سبحانه وتعالى هو اللي خلقك، وخلقك دي يعني خلق جسمك بأعضائك كلها، وخلق روحك وبثها في جسمك، وخلق القدرة والإرادة فيك، وخلق لك الفلوس اللي معك وأقدرك عليها، وخلق لك صحتك وخلق لك المسكن، خلق لك كل حاجة وهيأك أنك تكون عبد ليه سبحانه وتعالى، وبعدين وفقك للطاعة اللي هي الأعمال، فده كله أصلاً منه سبحانه وتعالى، فتخيل كده أن أنت بعد كده جاي تقول إيه؟ العمل ده ما هو أنا أستحق للجنة! يا حبيبي، ده هو أنت أصلاً كلك على بعضك بتاعته سبحانه وتعالى، ما تستحقش إيه؟ مفهوم يا جماعة؟
تاني معنى عشان تفهموا معنى أنك مش مستحق بعمل، قاعدة كده عندنا في الفقه بتقول إن نفع العبد لسيده. عارفين زمان كان فيه عبيد؟ العبد ده مش زي الخدام اللي عليه دلوقتي لا، العبد ده كان من جملة الممتلكات، أنا لو عندي عبد ده بتاعي، أبیعه سلعة، ممكن أبيعه. طيب، أنا عندي عبد، من الأحكام الفقهية بقى أن العبد ده لو راح يشتغل -يعني أنا عندي عقد، فالعبد قلت له: اطلع اشتغل نجار بقى، كهربائي، أي أي حاجة- يطلع يشتغل ويرجع معه مكسب، معه فلوس، الفلوس دي بتاعت مين؟ بتاعتي، مش بتاعتي، ليه؟ لأن نفع العبد لسيده. مين دي؟ دي قاعدة فقهية، وزمان كان ده عند العرب معروف، يعني العبد يروح يشتغل ويرجع يؤدي إلى سيده، مفهومة؟ وعشان كده يعني في أحكام بقى مش عايز أدخل لها دلوقتي، ولله المثل الأعلى، أنت عبد لله عز وجل، فنفعك له أصلاً -يعني لو أنت بتعبد فالعبادة تقع ملكاً له، مش بتاعتك، لأن نفعك له ملك له سبحانه وتعالى، وعباداتك أصلاً واقعة ملكا له سبحانه وتعالى، مش ملكا لك أنت، طيب- فهو تفضل عليك وقال لك: العبادة اللي هي ملكي أنا، واللي أنت أصلاً أديتها بأركان أنا خلقتها لك، وبروح أنا بثتها فيك، وبقدرة أنا أقدرتك عليها، وبارادة تبعاً لإرادته سبحانه وتعالى، لما أنفقت أنفقت مالاً أنا جعلتك مخولاً فيه ومستخلفاً فيه، وأنا، أنتم واخدين بالكم يا جماعة الصورة عاملة ازاي؟ تجي بعدها تقول: العمل ده أنا أستحق به جنة؟ جنة إيه؟ أنت أصلاً الحاجات دي كلها بتاعته، أنت عبادتك اللي بتقع بتقع ملكاً له أصلاً، فلن ينجي أحدا عمله.
معنى تاني في لن ينجي أحدا عمله أن العمل بتاعك ده مهما حسن ومهما كثر -فكروا كده مهما عملت، بلش منذ أن عقلت مش هقول كل عاقل يعني سبع سنين، وأنت عندك سبع سنين وبتعبد ربنا لغاية ما تموت وعبادة ما فيش بعد كده- أنت عملت إيه؟ أنت أديت شكر إيه أصلاً عشان تيجي يوم القيامة تقول بقى: جنة، أنا عملي دخلني الجنة! هو أنت أديت شكر إيه بعبادتك؟ في بعض الآثار أن عبداً عبد الله عز وجل خمسمائة عام، أنتم عارفين زمان كان أعمارهم كان الناس بتعمر، يعني نوح مثلاً عليه السلام ربنا ما ذكر في القرآن أنه إيه فلبث في قومه مائة ألف سنة إلا خمسين عاماً، يعني تسعمائة وخسمائة سنة دي فترة الدعوة فقط، مش عمر نوح لا، طيب، فكان أعمارهم طويلة، فمما جاء في الأثر أن عبد ربنا سبحانه وتعالى خمسمائة عام في مكان في جزيرة في البحر، قاعد في صومعة في جزيرة ما يعرفش حد، خمسمائة سنة بيعبد ربنا، وكان يسأل الله عز وجل أن يقبضه وهو ساجد، جبريل بيقول: فإنا لنمر عليه.
نازلين طالعين بقى عليه على العبد ده ونعلم في الكتاب أنه يبعث يوم القيامة. واللي بيحكي بيقول بيكلم النبي عليه الصلاة والسلام جاء في الأثر هنا بيقول له كنا بنقعد نازلين طالعين عليه كده واحنا عارفين في الكتاب، ربنا كأن ربنا أطلع الملائكة على هذا أنه يكون يوم القيامة أنه يبعث هذا الرجل.
فيقول الله عز وجل: أدخلوا عبدي الجنة برحمتي، ويقول: يا رب بل بعملي! لي رحمة يعني خمسمائة سنة بعبدك أصلاً، ورحمة إيه؟ أنا عاوز العمل. فيقول الله عز وجل لملائكته يقولها ثلاثة؛ يعني ربنا يقول: أدخلوا عبدي الجنة برحمته، والعبد يقول: بعملي. فيقول الله: أدخلوا عبدي الجنة برحمته، فيقول العبد: بل بعملي. فيقول الله عز وجل لملائكته: زنوا عمله بنعمي، علي. واخدين عمل الخمس مائة سنة ويحط قدامه نعمة واحدة، نعمة البصر أو غيره من النعم، ترجح النعمة دي على كل أعماله خمسمائة سنة، نعم ما لهاش ما لهاش أعمال تسبقها.
ويقول الله عز وجل: اذهبوا بعبدي إلى النار بعدلي. خدوا بقى على النار! وهو يساق إلى النار، يقول يلتفت إلى الله عز وجل، يقول: بل برحمتك يا رب، بل برحمتك يا رب. بيعلق على المشهد ده وبيقول للنبي صلى الله عليه وسلم: إنما هي رحمة الله، إنما هي رحمة الله، أنت عملك ده إيه بقى؟ يكفي إيه ولا ده شكر لإيه؟ جاء في بعض الآثار أن الله عز وجل خلق من الملائكة ملائكة خلقهم يوم خلقهم سجداً، هم سجود، هم سجود ملك مخلوق ساجد منذ أن خلق إلى يوم القيامة، ربنا خالقه على الهيئة دي ما رفعش راسه من أول ما خلقوا لغاية يوم القيامة لغاية ما يموت، هو ساجد بيعبد ربنا سبحانه وتعالى.
وملائكة ركع، ملك منذ أن خلق راكع إلى يوم القيامة، فلما يرفعوا رأسهم يوم القيامة ويروا الله عز وجل يقولون: سبحانك ما عبدناك حق عبادتك. أنت أنت فين بقى؟ أعمالك إيه؟ أعمال إيه اللي تنجي دي؟ ما أنت برضو شوف قدر المعبود سبحانه وتعالى. المسألة يا جماعة مش مسألة أنت بتعبد عبادة شكلها إيه، المسألة أنت بتعبد رب عامل إزاي؟ لأن الحاجة اللي بتهديها لرئيسك في العمل مثلاً ما تنفعش تهدى لوزير، والحاجة اللي بتهديها لوزير ما تنفعش تهدى لرئيس جمهورية، كل واحد له منزلة. أنت العمل اللي بتعمله ده بتعمله لمين؟ لله عز وجل، الله عز وجل الذي ليس كمثله شيء، قيوم السماوات والأرضين، فشوف بقى أنت قدر ربنا سبحانه وتعالى.
فأنت مهما عملت ولا حاجة، عمله لن ينجيك، لن ينجي أحداً منكم عمله، قال: ولا أنت، دايماً بقى فكر في دي، ولا أنا! النبي عليه الصلاة والسلام بيقول كده قال: ولا أنا، اللي عمل واحد منه يزن أعمال الأمة كلها صلى الله عليه وسلم، بما في قلبه من إخلاص وإخبات ومعاني القلبية دي، وهنتكلم عن المعنى ده لأنه معنى مهم، ولا ولا حتى أنا مش هتنجيني يا عم، إلا أن يتغمدني الله. طيب، لما الأعمال مش هي اللي بتنجي، أمal اللي بينجي؟ إلا أن يتغمد الله برحمه.
طيب، أنا الحقيقة في معنى، طبعا الحتة بقى بتاعة الباء والآية والحديث فيها كلام كتير لأهلي بقى، لكن أنا الحقيقة يعني في معنى واقع في قلبي، والله أعلم، ولم أجد من نص عليه، أنا أقول هذا المعنى ويعني إن كان صواباً فمن الله وإن كان خطأ فمني ومن الشيطان والله ورسوله منه براء. هنا الآية الآيات يا جماعة بتقول: بما كنتم تعملون، بما أسلفتم في الأيام الخالية، فأثبتت أن الأعمال تدخل الجنة، والحديث نفى: لن يدخل أحد منكم الجنة بعمل، أمال بإيه؟ بالرحمة.
المعنى اللي وقع في روعي الحقيقة أن الرحمة واسطة بين العمل والجنة، يعني هي مراحل عمل ورحمة، فيبقى الأعمال يؤدي إلى الرحمة، والرحمة تدخله الجنة. فلو قلنا كده أنها مراحل: عمل فرحمة فجنة، فيصح أن نقول: بالعمل دخلنا الجنة، ويصح أن ننفي أن تكون الأعمال هي التي أدخلت الجنة، ينفع الاتنين. يعني واحد قال إيه؟ العمل دخلنا الجنة، نقول له آه صح، لأن العمل هو اللي خلاك ترحم فلما رحمت دخلت الجنة. واحد جه قال لي: لأ مش الأعمال اللي داخلين في الجنة، قولوا برضو أنت صح، لأن الأعمال ما دخلتكش جنة، دي الرحمة اللي دخلتك الجنة.
طب إيه دليل أو إيه اللي خلاني يعني قلبي يميل للمعنى؟ آية في كتاب الله عز وجل، قال الله عز وجل: ﴿وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاءُ بَعْضٍ يَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ وَيُقِيمُونَ الصَّلَاةَ وَيُؤْتُونَ الزَّكَاةَ وَيُطِيعُونَ اللَّهَ وَرَسُولَهُ أُولَئِكَ سَيَرْحَمُهُمُ اللَّهُ﴾ [التوبة: 71]. خلي بالك بقى، أنا إيه؟ يأمرُونَ بالمعروف ينهون عن المنكر يقيمون الصلاة يؤتون الزكاة وبعدين جت بقى صيغة أعم من ده كله ويطيعون الله ورسوله، يعني الأعمال اللي بيعملوا الأعمال دول، إيه اللي هيحصل لهم؟ أولئك سيرحمهم الله باعمالهم رحموا بأن هذه الأعمال بقى.
فيا جماعة كده إيه باختصار كده، أنت بتعمل عشان الأعمال دي بها تتعرضوا للرحمة، لأن الله عز وجل لما يطلع على العباد كده فيجدك يجد صائماً، يجدك تالياً لكتابه، يجد قلبك وجلاً خائفاً منه راجياً له مخبتاً بين يديه منيباً إليه سبحانه وتعالى. إحنا يا جماعة إحنا إحنا بنعمل عشان بس نتعرض للرحمات، ألا إن في أيام دهركم نفحات ألا فتعرضوا لها، بنتعرض لرحمة الله عز وجل فلما نعمل الأعمال دي نرحم، فلما نرحم ندخل الجنة. دي تفيدنا إيه؟ تفيدنا أن نكون أذكياء بقى، نشوف ربنا سبحانه وتعالى رحمته كتبها لمين؟ آيتين في القرآن، أول آية قال الله عز وجل: ﴿وَرَحْمَتِي وَسِعَتْ كُلَّ شَيْءٍ فَسَأَكْتُبُهَا لِلَّذِينَ يَتَّقُونَ﴾ [الأعراف: 156]. أول صفحة الذين يتقون. الآية التانية: ﴿إِنَّ رَحْمَتَ اللَّهِ قَرِيبٌ مِّنَ الْمُحْسِنِينَ﴾ [الأعراف: 56]. يبقى إحسان وتقوى، إحسان وتقوى، يبقى أنت عاوز تتعرض للرحمة كن محسناً تقياً.
شوف بقى إحنا إحنا الدروس دي قبل رمضان، وهي عشان رمضان يعني، شوف بقى المعنى اللطيف ده تجد أن المعنيين دول الإحسان والتقوى موجودين في رمضان، لذلك يا جماعة كان رمضان هو موسم الرحمة. فين التقوى؟ أصلاً الصيام لما ربنا سبحانه وتعالى فرضه قال إيه؟ ﴿يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ﴾ [البقرة: 183]. الصيام يجعلك تحصل التقوى، مش هنشرح دقيقة إن شاء الله، هنمسح آيات الصيام دي كلها إن شاء الله ونشرحها واحدة واحدة، لكن مش هنشرحها دلوقتي. لعلكم تتقون، آه يبقى دي بتقوى في الصيام.
طب الإحسان؟ الصوم كله إحسان أصلاً، عارفين يا جماعة مرتبة الإحسان اللي هي إيه؟ لما النبي صلى الله عليه وسلم ذكر الإسلام والإيمان والإحسان، عرف الإحسان به، قال: الإحسان أن تعبد الله كأنك تراه، فإن لم تكن تراه فإنه يراك، مش هو ده الإحسان؟ طيب، حضرتك صايم لوحدك والأكل والشرب قدامك وما بتمدش إيدك عليه، ليه؟ عشان بلغت درجة الإحسان. عارف لو دي مش عندك هتاكل وتشرب، اللي منعك الإحسان أنك تعلم أن الله يراك، وهو صوم يعني إحسان وتقوى أصلاً. ودي هنتكلم عليها بعدين بقى يعني نفصل فيها، لكن يعني بالمناسبة كده لأن دروسنا أصلاً بتتكلم عن رمضان يعني أو أو تهيئة القلوب لرمضان، حياتك مناسبة يعني لهذا.
طيب، يبقى لن ينجيه أحداً منكم عمل، ولذلك يا جماعة كان السلف فاهمين القاعدة دي، قالوا: الآخرة إما عفو الله أو النار، رحمة أو نار. الآخرة إما عفو الله أو النار، والدنيا إما عصمة الله أو الهلكة. الدنيا أنت مش أنت مش بتاع ربنا عشان أنت جدع، ولا أنت غيرك مشي في المخدرات وفي السكة التانية ولا بيسمع مثلاً غناء ولا مقصر في الصلوات، وأنت اللي ماسك نفسك عشان إرادتك وعشان جدعنتك وعشان أنت ذكي، أنت عملت ده لأن ربنا سبحانه وتعالى عاصمك، فأوعى تتكبر ولا تشوف نفسك ولا تشوف عملك! الآخرة إما عفو الله أو النار، والدنيا إما عصمة الله.
محمد بن واسع ورحمة الله، أحد السلف لما حضرته الوفاة خلاص هيموت، كان يقول لأصحابه: سلام عليكم، إلى النار أو يعفو الله! لأن المسائل اللي كانت قدام عينيهم يا جماعة أن الآخرة عفو ورحمة، لأ أنا مش عمل إيه لا لا لا، سلام عليكم إلى النار أو يعفو الله! داود الطائي، لما مات داود الطائي -دا بقى يعني الحكاية يعني بعد ما نعاصر داود الطائي- قال: لو كان داود في الأمم السابقة لقَصَّ الله علينا من خبره. متخيلين يا جماعة؟ يعني من كتر عبادته وزهده وديانته، بيقول: لو كان داود ده في الأمم السابقة يعني كان من بني إسرائيل، كان زمان ربنا قص علينا من يعني كان زمان أوحى إلى النبي قل لهم قل لهم إن كان في واحد اسمه داود الطائي كان بيعمل كذا وكذا.
متخيلين داود الطائي ده مات، قام ابن السمَّاك على قبره يثني عليه خلاص الراجل ميت في القبر، فقام يثني عليه، يقول بقى: ده كان بيعمل وكان بيسوي، والناس يصدقونه على مقالته، كلهم عارفين مين داوود. قام أبو بكر النهشدي وقال: شوفوا بقى يا جماعة، قال: اللهم اغفر له وارحمه ولا تكله إلى عمله. يا جماعة دقيق فهم السلف! عبادة داود الطائي كلها يقول: اللهم اغفر له وارحمه ولا تكله ولا تكله إلى عمله. حكايات القضية دي واضحة قدام السلف، حتى الصحابة يعني روي عن بعض الصحابة أنه أظن عمر رضي الله عنه لما حضرته الوفاة دخلوا عليه عشان بقى يبشروه، لما طعن رضي الله عنه ودخلوا عليه وبشروه أظن هو أو غيره لكن هو يعني غالباً عمر رضي الله عنه لما يعني قالوا له إيه؟ فكثيراً ما كنت أسمع رسول الله صلى الله عليه وسلم يقول: دخلت أنا وأبو بكر وعمر، خرجت أنا وأبو بكر وعمر، ذهبت أنا وأبو بكر وعمر، بيبشروا يعني أن ده أنت كنت ثالث ثلاثة، النبي أبو بكر وبعدين أنت.
ماذا قال عمر؟ قال: وددت لو أن أعمالي كانت كَفَافاً لا لي ولا علي. أنا أنا عاوز أجي يوم القيامة كده يعني لو لو بس أعمالي بقت كفاف يعني إيه يعني اللي هو لا لي ولا عليا، كان المعنى ده في دماغهم، وكانوا خافوا، وكان بعضهم يا جماعة بعض السلف كان ربما يغمى عليه، يغمى عليه، بيقع يغمى عليه مش مش يعيط، من آية في القرآن اللي هي إيه؟ ﴿وَبَدَا لَهُم مِّنَ اللَّهِ مَا لمَ يَكُونُوا يَحْتَسِبُونَ﴾ [الزمر: 47]. برضوا دي نفس المعنى بتاعها: وبدا لهم من الله ما لم يكونوا يحتسبون. أنت عمال تعمل أعمال ومؤمل الأعمال دي وبدا لهم من الله ما لم يكونوا يحتسبون.
طيب، أنت عمال تخوفنا وتقنطنا من رحمة ربنا؟ أقول لك لأ. والنبي صلى الله عليه وسلم لما قال الحديث ده ما قالوش عشان كده، بالعكس! تخيل بقى بقية الحديث، يبقى ودي قاعدة تانية هنخش عليها، يبقى أول قاعدة: لن ينجي أحداً منكم أبداً. القاعدة التانية قال صلى الله عليه وسلم: سددوا وقاربوا، وفي رواية: سددوا وقاربوا وأبشروا، واغدوا وروحوا وشيئاً من الدُّلْجَة، والقصدَ القصدَ تبلغوا. سيبكم من غدوة وأروح وشيء من الدلجة دي هننجي لها بعدين، بس هاتوا بقى الحتة اللي احنا قلناها مع آخر الحديث.
سددوا وقاربوا والقصد القصد تبلغوا، التلات كلمات دول بنفس المعنى يا جماعة: سدد، اقصد، التالتة نفس المعنى اللي هو إيه؟ اللي هو توسط، يعني لا تغالي ولا تجافي أو ولا تقصر، خليك في الوسط: سددوا وقاربوا، وفي الآخر: القصد القصد تبلغوا. ليه يا جماعة؟ ليه لا تغالي؟ الأول يا جماعة أن هذا الدين يسر، ولن يشاد الدين أحد إلا غلبه، حديث النبي عليه الصلاة والسلام. في رواية تانية: يسروا ولا تعسروا، وبشروا ولا تنفروا. يبقى سددوا وقاربوا والقصد القصد تبلغوا، قلنا نتوسط في العبادة، يعني ما ما بتجيش على نفسك قوي بشوية وتتايه تبطل. ليه بطلت؟ عشان جيت على نفسك.
فأنت عارفين يا جماعة أنا عاوز أقول لكم حاجة برضه، النبي صلى الله عليه وسلم كان أحب العمل إلى إلى الله أدومها وإن قل، ودي رواية للحديث نفسه كمان: أدومها وإن قل. ليه؟ يعني يا جماعة أحب إلى الله أنك تصلي ركعتين كل ليلة عن أنك تجيب ثمان ركعات كل ليلة مثلاً لمدة شهر أو شهرين وتبطل، عارفين ليه؟ أول حاجة طبعا لما يعني تدوم على العمل أنت آه واضح أن أنت ممكن إيه تبقى عملتك أكثر يعني من حيث الكم، لكن لكن فيه معنى تاني غير ده أنا عاوز أكلمكم فيه، اللي هو إيه بقى؟
اللي هو تأثير العمل على قلبك يا جماعة، إحنا قلوبنا كلها أمراض: عندك مرض حسد، رؤية نفس، رؤية عمل، وطول أمل في الدنيا، وحب ظهور، أمراض أمراض مهلكة تودي في داهية، ورياء، ويمكن بدع قلبية عدة، يعني إيه؟ قلوبنا كلها أمراض. طب المرض محتاج إيه؟ أي مرض محتاج دواء، أنت لما جسمك بتعبه بتروح تاخد دواء، بيجي الدكتور يقول لك إيه؟ يكتب لك دواء كده مثلاً شريط برشام وأزازة دواء شرب، يقول لك: تروح النهاردة تاخد الشريط كله وتشرب الإزازة كلها؟ هيقول لك: خد حباية كل يوم، وساعات نص قرص في اليوم، وخد لك معلقة من الدواء الشرب ده على مدة أسبوعين ثلاثة. فأنت رحت بقى بدماغك.
يا عم على إيه؟ ما هو الشريط أنا هسفه والازازة أشربه، مش هيأتي بتأثير إيه يعني؟ سيبك من الأضرار، لكن مش هيأتي بتأثيره. ليه يا جماعة؟ الاستمرارية هي اللي بتأتي بالتأثير.
والمثال اللي عارفينه كلنا؛ أنك لو جبت جردل مية ودلقته على صخرة مش هيأثر فيه، نفس الجردل لو خرمت فيه خرم من تحت كده وسبته ينقط نقطة كل شوية على صخرة، تيجي بعد شوية تلاقي إيه؟ النقط اللي بتنزل دي حفرت في الصخر. هو أنت قلبك لو حجر زي الصخرة دي كده وربنا ذكر إن في القرآن إن في قلوب كالحجارة، أنت حتى لو قلبك حجر، هايلين بإيه؟ هايلين بالنقطة نقطة اللي بتنزل من يعني بوتقة الطاعات دي؛ ركعتين كل ليلة، بمية مرة استغفار كل يوم، عشر مرات صلاة على النبي صلى الله عليه وسلم في اليوم. «أحب الأعمال إلى الله أدومها وإن قل». ولذلك ماذا قال لعبدالله بن عمر؟ قال لعبدالله بن عمر: «لا تكن مثل فلان؛ كان يقوم من الليل فترك قيام الليل».
فأنت قل لنفسك كده: لم أكن لن أكون مثل فلان أو مثل نفسي زمان، كنت أقوم، كنت أقوم الليل فتركته، قيام الليل أو كنت أصوم النهار فتركت صيام النهار، أو كنت أقرأ القرآن تركت قراءة القرآن، هجرت المصحف. وهكذا، وكان النبي صلى الله عليه وسلم إذا عمل عملاً أثبته، يعني لو ابتدى عبادة عملها يثبتها خلاص، وكان عمله ديمة يداوم عليه. آه ليه؟ أديني قلت لكم المعنى؛ أنه ده هو العلاج لقلبك لقسوة قلبك، لأمراض قلبك، زي نقطة المية اللي بتنزلف على الصخرة كده. ده مش هيحصل لو أنت دوست جامد؛ في حديث النبي صلى الله عليه وسلم قال: «فإن المنبت لا أرضاً قطع ولا ظهراً أبقى».
لما تكون أنت في سفر ومعك دابة بهيمة مثلاً؛ حمار، جمل، حصان، أي حاجة، لو فضلت تضرب فيه عشان يجيب آخره، أنت لسه بادئ السفر أهو، أنت مسافر من بلد لبلد، السفر هياخد مثلاً شهر ولا شهرين، فأول ما خرجت قعدت تضرب في الحصان ولا في الجمل ولا في الحمار اللي تحتك ده عشان يجيب آخره، استعجل عاوز توصل، يحصل؟ إيه؟ مش هيكمل معاك يوم التاني وهيقع منك الحصان ده أو الدابة دي هتقع هتموت. هو ده اللي النبي قاله عليه الصلاة والسلام: «فإن المنبت لا أرضاً قطع ولا ظهراً أبقى»، لو وصل وهو كمان معاهم، الدابة بتاعتُه الظهر بتاعُه لأ ما أبقاهوش علشان يوصله.
فهمتم؟ فبدأ نوك دابتك، بدنك ده هو الدابة بتاعتك اللي بيها هتوصل لربنا سبحانه وتعالى بالطاعة، أنت مش هتطيع غير ببدن، أنت لو أتلفت بدنك أمللت نفسك وروحك شوية وهتبطل. وده حديث النبي صلى الله عليه وسلم: «إن هذا الدين متين فتوغلوا فيه برفق»، وقال: «لم يشاد الدين أحد إلا غلبه». ولذلك يا جماعة هنا بقى تبدأوا تبتدوا تفهموا ليه النبي عليه الصلاة والسلام يغضب؛ ثلاثة نفر يسألون عن عبادته عليه الصلاة والسلام، وبعدين عائشة تؤمن به عبادته، والله بيصوم ويفطر، يقوم شوية من الليل وينام الباقي، لو متزوج ومن أكتر من امرأة كمان، فكأنهم تقلوها، يعني حسوا العبادة دي قليلة، وقالوا: هو رسول الله قد غفر له ما تقدم من ذنب وما تأخر؟ قال أحدهم: لله علي أن أقوم فلا أرقد، هاقوم الليل كله مش هنام. قال الثاني: لله علي أن أصوم فلا أفطر. قال الثالث: لله علي ألا يتزوج النساء.
لما النبي صلى الله عليه وسلم جه حكيت له عائشة، غضب غضب غضب، مش مثلاً مش موافق على الكلام، غضب وخرج إلى الناس وقال: «ما بال أقوام يقولون كذا وكذا؟ ألا إني أقوم وأرقد وأصوم وأفطر وأتزوج النساء، فمن رغب عن سنتي فليس مني»، يروح بقى يشوف له دين تاني. وسمى ذلك رغبة عن السنة يا جماعة، أنتم متخيلين؟ احنا دلوقتي مش مش بنتكلم في البدعة، مش بنتكلم في البدع وده ده مجال تاني، لكن بكلمكم في حتة أنك زودت قوي العبادة عما كان يفعله صلى الله عليه وسلم، سماه رغبة عن السنة. ليه بقى؟ لأسباب منها ده؛ أن لو الناس عملت ده شوية وهتسيب الدين شوية وهتسيب العبادات. أنت ابتدي عشان ما نبقاش بنتكلم كلام نظري كتير، اعمل إيه؟
ببساطة شديدة: ابتدي، ابتدي بإيه؟ بأقل شيء وزود بعد كده، يعني النهاردة خد وعد على نفسك، أنا هقفل الفيديو بعد الدرس ده هقوم مثلاً أتوضأ وأصلي ركعتين لله، ده قيام ليل غير سنة العشاء مثلاً لو لسه ما صليتهاش، يتم قيام لك، الركعتين دول هثبت عليهم أسبوع، أسبوعين، تلاتة، شهر، بعد كده ربنا يفتح عليك تزود كمان ركعتين، يبقى تثبت عملك الأول وبعدين تبتدي تزود عليه، خلاص وقعت في النص ما فيش مشكلة، قوم تاني وكمل، أوعى تبقى يعني لازم تبقى ذكي وأنت في طريق ربنا سبحانه وتعالى لازم تبقى ذكي، لأن الشيطان مش هيسيبك يا جماعة. تخيل كده حضرتك نزلت من بيتك رايح مشوار، لو أنت ماشي وقعت في حفرة، أنا ليه بقول لكم الكلام ده؟ عشان هيحصل الشيطان مش هيسيبك فهتقع في حفرة دي يعني في ذنب، مش لازم كمان تسيب طاعة سنة، لأ هتقع في ذنوب.
احنا بشر، أنت نزلت ماشي وقعت في حفرة، هتقعد في حفرة وتقول: لا أنا خلاص بقى أنا وقعت في الحفرة، خلاص بقى ما ينفعش خلاص مش رايح المشوار، أنا في الحفرة؟ يبقى مجنون، هتعمل إيه؟ هتقوم وتطلع من الحفرة وتنفض هدومك في الاستغفار والتوبة يعني لو ذنب وتكمل طريقك. طب نكمل طريقك، فبعد شوية وقعت في حفرة تانية، هتقول: خلاص بقى رحت في حفرة تانية بقى ما أنا مش ناقص وجع دماغ خلاص بقى، هي دي أنا قاعد في الحفرة بقى مش ماشي؟ يبقى مجنون برضو، هتقوم وتطلع من الحفرة وتنفض هدومك وتكمل، صح ولا لا؟ هتقع وتقوم.
كلام جميل. الحقيقة لابن الجوزي في المعنى ده، أنا هقراه زي ما هو كده مش هعلق عليه، بس عيشوا يعني أنا عاوز بس معلش لأن طبعا إيه دي تحدي من التحديات الدروس الأونلاين دي يبقى كل واحد بقى اللي نايم، المهم إيه لأ لأ يعني فوقوا كده اقعدوا واسمعوا الكلام ده من قلبكم يا جماعة. ابن الجوزي يتكلم عن نفسه، يقول:
ولولا خطايا لا يخلو منها البشر لقد كنت أخاف على نفسي من العجب، غير أنه عز وجل صانني وعلمني وأطلعني من أسرار العلم على معرفته وإيثار الخلوة به، حتى إنه لو حضر معي معروف وبشر لرأيتهما زحمة -معروف وبشر الحافي؛ أئمة من أئمة الزهاد مش عاوزهم أنا مكتفي بربنا سبحانه وتعالى- ثم عاد فغمسني في التقصير والتفريط حتى رأيت أقل الناس خيرا مني، وتارة يوقظني لقيام الليل ولذة مناجاتي وتارة يحرمني ذلك مع سلامة بدني، ولولا بشارة العلم بأن هذا نوع تهذيب وتأديب لخرجت إما إلى العجب عند العمل وإما إلى اليأس عند البطالة، لكن رجائي في فضله قد عاد لخوفي منه، وقد يغلب الرجاء بقوة أسبابه لأني رأيت أنه قد رباني منذ كنت طفلاً، فإن أبي مات وأنا لا أعقل والأم لم تلتفت إلي، تركز في طبعي حب العلم وما زال يوقعني على المهم فالمهم ويحملني إلى من يحملني على الأسود حتى قوم أمري، وكم قد قصدني عدو فصده عني وإذ رأيته قد نصرني وبصرني ودافع عني ووهب لي، قوي رجائي في المستقبل بما قد رأيت في الماضي.
خليك كده زبدة الجوز بقى، خليك زي ابن الجوزي، خليك عارف انك هتقصر وهتشد، لا تعجب هنا ولا تقنط هنا خلاص. طيب نرجع لآخر جملة، احنا طبعا بنختصر كده يبقى احنا خدنا قاعدتين لغاية دلوقتي: «لن ينجي أحداً منكم عمله» أو «لن يدخل أحد منكم الجنة بعمله» أو القاعدة التانية «سددوا وقاربوا، القصد القصد تبلغوا»، دي القاعدة التانية، يبقى التسديد والتقريب أنك تتوسط في العبادة، لا تقصر ولا تشد جامد فبعد شوية تبطل.
القاعدة التالتة: «اغدوا وروحوا وشييء من الدلجة». وإيه «اغدوا وروحوا وشييء من الدلجة» دي بسرعة بقى عشان يعني خمس دقائق بالكتير الدرس يخلص، واغدوا وروحوا عشان مناديل، إيه اغدوا وروحوا شيء من الدرجة دي وأيه لازمتها في الوضوء؟ أو الغدوة أول النهار والروحة آخر النهار والدلجة الليل أو آخر الليل، يعني الليل كله آخر الليل كده النبي بيقولك عليه الصلاة والسلام: «اغدوا وروحوا وشيئاً من الدلجة».
لأن النبي بيديك بقى نصيحة عليه الصلاة والسلام وأنت سائر إلى الله عز وجل بيقول لك: «سدد وقارب، اقصد، بس أوعى يفوتك الأوقات دي وأنت في طريقك لربنا سبحانه وتعالى، أوعى يفوتك الأوقات دي اغدوا وروحوا وشيئاً من الدلجة». اهتم قوي بأول النهار، اهتم قوي بآخر النهار، اهتم قوي بالليل.
وهنا بقى بصوا يا جماعة حديث النبي عليه الصلاة والسلام: «واغدوا وروحوا وشيئاً من الدلجة». من أول النهار اهتم به، آخر النهار اهتم به، وهتلاقي دول طرفي النهار، وهتلاقي فيها آيات كتير بقى طرفي النهار دي، الذكر في طرفي النهار وماشي؟ ﴿بُكْرَةً وَأَصِيلاً﴾ [الأحزاب: 42]، هتلاقيها في القرآن للغداة والعشي هتلاقيها في القرآن، هتلاقوا بكير، يعني كأن برضه شوفوا المعنى إيه؟ متسق اهو المعنى اللي في السنة موجود في القرآن، وهتلاقي أن في أول النهار في أول النهار في عبادة فرض وعبادة نفل، وفي آخر النهار كده برضو العبادة الفرض في أول النهار الفجر وفي آخر النهار العصر ودول البردين. وجاء في الحديث الخلاف في الصلاة الوسطى هي الفجر ولا العصر؟ وبقدر أقول قال كده بعض العلماء قال كده كأنها إيه؟ ﴿حَافِظُوا عَلَى الصَّلَوَاتِ وَالصَّلَاةِ الْوُسْطَىٰ وَقُومُوا لِلَّهِ قَانِتِينَ﴾ [البقرة: 238].
إيه الصلاة الوسطى؟ وأشمعنى هي اللي يعني محافظة على الصلاة خلاص الصلاة الوسطى لاهميتها؟ قال العصر، خلاص مش وقت الوقت ترجيح ولا هو يعني موجود ده والموجود ده يوقفك على أهمية صلاة الفجر وصلاة العصر، وتلاقي أن ربنا شرع لك أذكار هنا وأذكار هنا؛ أذكار الصباح والمساء.
يعني أنت لو انشغلت بالسنن دي يبقى أنت كده إيه بتطبق حديث النبي: «اغدوا وروحوا»، الأوقات دي ما ينفعش تفوت، ما ينفعش تفوت جلسة الفجر في المسجد للشروق وازاي يرتب النبي صلى الله عليه وسلم عليها ثواب عظيم جداً، فاهتموا بالوقت ده: «اغدوا وروحوا وشيئاً من الدلجة»، أوعى يفوتك الليل.
يا جماعة العرب زمان كانوا بيقولوا إيه؟ كانوا يقولوا: عند الصباح يحمد القوم السرى. والنبي عليه الصلاة والسلام جاء في الحديث قال: «من خاف أدلج ومن أدلج بلغ المنزل». إيه اللي أنت بتقوله ده؟ احنا مش فاهمين حاجة! العرب زمان لما كانت تبقى طالعة في رحلة، هما ما بيتربش على الضوء على ضوء الشمس، يليل الليل القمر يعني إضاءته مش زي إضاءة الشمس فممكن الناس تنام، وكان في ناس بتنام وناس تعمل إيه؟ ناس تقول لك: لا احنا هنكمل شوية بالليل، مش مش كل الليل ما ينفعش، ما حدش يستحمل ده دول خارجين هيقعدوا شهر شهر، ما حدش يستحمل، لكن يمشوا شوية بالليل، شوية بالليل على شوية بالليل على شوية بالليل تلاقي الناس اللي مشيت بالليل دي وصلت والناس اللي ما مشيتش بالليل لسه بعيد، مين سبقوهم طيب؟ وقت يا جماعة ما دخل الليل، الناس اللي ريحت وانتخت وقالت هنام كانوا مبسوطين أوي بايه؟ بالراحة بتاعتهم مبسوطين، ويقول لك: شف يا عم الناس اللي ماشية دي يا عم شف بيعملوا ايه؟ أول ما يطلع النهار ويكتشفوا أن الناس دي سبقتهم، يحمدون أمتى؟ الصباح. زي ما كده الناس هتمجد اللي خدوا بقى شيئاً من الدلجة أمتى؟ يوم القيامة.
وكانوا بيقولوا: عند الصباح يحمد القوم السرى، لما يطلع النهار العرب يحمدوا اللي مشي بالليل. والنبي صلى الله عليه وسلم قال: «من خاف أدلج ومن أدلج بلغ المنزل». من خاف أدلج، اللي خايف أنه عاوز يوصل بسرعة هيدلج، يعني إيه يدلج؟ زي ما قلنا الدلجة اللي هي إيه؟ أنه يبتدي يمشي بالليل شوية. ومن أدلج بلغ المنزل. هيبقى لك لازم شيء من الدلجة؛ ركعتين بالليل.
طب أنا والله كل يوم أظبط المنبه وما بصحاش! الشيطان الشيطان بيلعب بك. أيوه يعني شيطان يعني ما نمش؟ لأ، صل العشاء سنة العشاء ركعتين على طول ما تقعدش تقول بقى أنام وأصحى يعني ما تعملش كده، خلاص طالما أنت بتعمل إيه؟ طالما يعني أنت هنفضل يعني كل يوم بنعمل نفس اللي بنعمله؟ لأ خلاص، احترم ضعفك، واحترم بشريتك، أنا دلوقتي أنا ضعيف، أنا مش بتاع الناصحة قبل الفجر. احترم ضعفك، صلي أول ما أول ما تخلص يا باشا، ركعتين لله عز وجل وتوتر.
يا جماعة ده مش عيب، ده مش عيب الصحابة نفسهم كانوا درجات في الحاجات دي، أبو هريرة كان فيه نوع ضعف، فالنبي، وشوفوا يا جماعة ودي كتير على الليلة دي بقى يعني دي قاعدة كبيرة في الدين كده، ازاي الدين يا جماعة يراعي المسائل دي؟ مسائل الناس مش زي بعض. فالنبي يقول: وأوصاني خليلي بثلاث، أوصاني خليلي بالثلاثة. إيه هم؟ أبا هريرة، أصوم ثلاث أيام في الشهر، وأوتر قبل أن أنام، وأصلي الضحى. أوصاني أوصاني خليلي بثلاث احتراماً لشخصية أبي هريرة لضعف أبي هريرة في الحتة دي. الناس درجات، ما فيش مشكلة، من الصحابة اللي كان ربنا فاتح عليه في في العلم، من النبي اللي فاتح عليه في العبادة، النبي اللي فاتح عليه في الغزو والجهاد، درجات.
أبو هريرة النبي صلى الله عليه وسلم يوصيه، يوصيه بأيه؟ يقول له: «يا أبا هريرة، صم ثلاث أيام، وأوتر قبل ما تنام -عشان أنت لو نمت مش هتصحى- وصل ركعتين الضحى».
واضح يا جماعة؟ نروح بقى لعبدالله بن عمرو بن العاص، والنبي يقول له إيه؟ «صم وأفطر يوم»، تقوم قيام داوود، تنام نص الليل، تقوم الثلث، تنام السدس لعبدالله بن عمرو.
ليه؟ هو أصلاً راجل كان مزود عن كده في العبادة أصلاً، دي برضو ده فقه هنا، فقه لنفسك وفقه لو حد بيسمعني، وفي باب دعوة يعني هو يدعو إلى الله وكده ينتبه للمعاني دي، الناس ما ينفعهاش خطاب واحد.
لكن على كل حال، أنت على ضعفك هذا، أو كل واحد بقى منا على قدر، يعني اغتنم الأوقات دي، ما ينفعش تفوتها وأنت، وأنت اسمع عن سنة النبي عليه الصلاة والسلام وروحوا وشيئا من الدنيا، فدي بتبقى القاعدة الثالثة ونقف هنا، جزاكم الله خيرا، والسلام عليكم ورحمة الله وبركاته.