الشيخ أمجد سميرالنبي عليه الصلاة والسلام قال: «سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي، وأبوء بذنبي، فاغفر لي، إنه لا يغفر الذنوب إلا أنت».
وأخبر صلى الله عليه وسلم أن من قال هذا الدعاء الصباح ثم مات من يومه دخل الجنة، ومن قالها في المساء ثم مات من يومه دخل الجنة. فهنقف برضه مع كام معنى وهي قواعد في طريقك إلى الله عز وجل.
القاعدة الأولى: النبي صلى الله عليه وسلم بدأ الحديث بقوله: «اللهم أنت ربي». عارفين يا جماعة، اللهم اللهم في اللغة يعني يا الله، وبعدين قال: «اللهم أنت رب»، وكأنه أتى بالألوهية كأنه بيسأل ربنا سبحانه وتعالى بألوهيته وبربوبيته، يعني يا الله يا رب.
طيب، عاوزين ندردش شوية أو يعني في دقائق معدودة حوالين الله والرب عشان نفهم إيه الفرق بين الله وبين الرب. الله يا جماعة معناه المعبود، الله في اللغة يعني الإله في اللغة هو المعبود، والله عز وجل هو المعبود بحق سبحانه وتعالى، وكونه معبود دي كأنها تقتضي بقى إيه صفات العلو والقهر والعظمة، يعني الصفات اللي شبه كده في سبحانه وتعالى.
الرب من معانيه في اللغة يعني المربي، يعني السيد، يعني المالك، ولذلك تلاقوا أن اسم الله عز وجل الرب يقتضي الخلق، الرزق، التدبير، الصفات اللي شبه دي.
طيب، لو الموضوع زي كده، يبقى الأحسن أو مش الأحسن، أنت تلاقي قلبك يميل أكتر أنك تدعو الله عز وجل بكونه إلهاً ولا بكونه رباً؟ يعني تلاقي كده لسانك لو أنت عرفت المعنيين دول: معنى الله يعني المعبود بحق، ومعنى الرب يعني المربي المدبر والخالق والمصرف، المعاني دي تلاقي لو حبيت تدعو، قلبك يميل أكتر يقول يا الله ولا يقول يا رب؟ عاوز حد يجاوب.
لو أنت قلبك يميل لإيه أكتر؟ عاوزين حد مين يجاوب؟ قل يا محمد، قل اكتب، اكتب فلشات كده يا محمد. ماشي، يا رب، في حد تاني ولا كله يا رب؟
طيب، يا الله، ماشي، طيب اللي قال يا رب تمام، واللي قال يا الله تمام برضه، ليه بقى؟ حسب الدعاء. الدعاء يا جماعة عندنا نوعين، فيه دعاء مسألة، وفيه دعاء ثناء.
هتلاقي نفسك لو أنت عاوز تقعد كده تدعو الله عز وجل ثناء عليه سبحانه وتعالى، تلاقي القلب يميل أكتر لـ«يا الله»؛ لأن فيه صفات العظمة، وصفات الجمال، وصفات الكمال. لو دعاء مسألة، يعني أنت عاوز حاجة، محتاج حاجة، فتلاقي قلبك بلا شك يميل «يا رب»، ولذلك هتلاقوا المعنى ده في القرآن بقى: اللهم. اللهم يعني إيه الله؟
وده لما بتيجي تدعي ربنا بتقول له إيه: اللهم كذا وكذا. جت في القرآن خمس مرات بس، في القرآن كله خمس مرات بس، بعكس ربي أو ربنا اللي هي في الدعاء كتير، يبقى دي أول حاجة.
تاني حاجة، لو مسكت الخمس مرات اللي جت فيها كلمة اللهم، هتلاقوا منها تلاتة في الثناء. يبقى اللهم جت في القرآن خمس مرات بس، تلاتة منهم كان دعاء ثناء مش دعاء طلب، هم إيه التلاتة بتوع دعاء الثناء؟
أول واحدة: ﴿قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ ۖ بِيَدِكَ الْخَيْرُ﴾ [آل عمران: 26] إلى آخر الآيات. دعاء ثناء، ما فيش طلب هنا، ده دعاء واحد بيثني على الله عز وجل.
الموطن التاني اللي جت فيه اللهم: دعواهم فيها سبحانك اللهم، هذا يوم القيامة. سبحانك اللهم، هنا ما فيش دعاء طلب، لكن ده دعاء ثناء على الله عز وجل ودعاء تقديس الله سبحانه وتعالى، سبحانك اللهم.
الموطن الثالث: ﴿قُلِ اللَّهُمَّ فَاطِرَ السَّمَاوَاتِ وَالْأَرْضِ﴾ [الزمر: 46] إلى آخر الآية. برضه ده دعاء ثناء، ما فيش طلب.
طيب، يتبقى موطنين في اللهم، منهم الموطنين دول طلب بقى، يبقى خمس مرات في القرآن جت اللهم بس، خمسة بس، منهم تلاتة كانوا في الثناء، ومرتين في الطلب. مرة كانت استهزاء برسول الله صلى الله عليه وسلم.
آه، كده الدنيا باينة ولا إيه؟ طيب، مرة كانت استهزاء بالنبي عليه الصلاة والسلام وبالله عز وجل، إذ قال: ﴿اللَّهُمَّ إِن كَانَ هَٰذَا هُوَ الْحَقَّ مِنْ عِندِكَ فَأَمْطِرْ عَلَيْنَا حِجَارَةً مِّنَ السَّمَاءِ أَوْ ائْتِنَا بِعَذَابٍ أَلِيمٍ﴾ [الأنفال: 32]. فدي خارجة أصلاً عن السياق، يعني ما نقدرش نقول إيه آه، دا دعاء طلب بلفظ الجلالة الله.
والمرة التانية كانت على لسان نبي وقرنها بالرب، لما قال عيسى: ﴿اللَّهُمَّ رَبَّنَا أَنزِلْ عَلَيْنَا مَائِدَةً مِّنَ السَّمَاءِ تَكُونُ لَنَا عِيدًا لِّأَوَّلِنَا وَآخِرِنَا﴾ [المائدة: 114]. فقال: اللهم ربنا، برضه.
يبقى كده لفظ الجلالة الله تلاقي قلبك يميل له في الدعاء اللي هو دعاء ثناء، لو دعاء طلب بقى العكس، القرآن بقى كله بعد كده أي دعاء كان برب أو ربنا. القرآن كله زي مثلاً: ﴿رَبِّ اغْفِرْ لِي وَلِوَالِدَيَّ وَلِمَنْ دَخَلَ بَيْتِي مُؤْمِنًا﴾ [نوح: 28]، وزي: ﴿رَبِّ اجْعَلْنِي مُقِيمَ الصَّلَاةِ وَمِن ذُرِّيَّتِي ۚ رَبَّنَا وَتَقَبَّلْ دُعَاءِ * رَبَّنَا اغْفِرْ لِي وَلِوَالِدَيَّ﴾ [إبراهيم: 40-41]. شوفوا رب، ربنا، ربنا، على لسان إبراهيم عليه السلام.
﴿رَبَّنَا افْتَحْ بَيْنَنَا وَبَيْنَ قَوْمِنَا بِالْحَقِّ﴾ [الأعراف: 89]. ﴿رَبِّ اشْرَحْ لِي صَدْرِي * وَيَسِّرْ لِي أَمْرِي﴾ [طه: 25-26] إلى آخر القرآن كله بقى. يبقى دي أول مسألة.
سؤال تاني: لو عرفنا أن الله، هنا بقى هنرجع للاختيار، مسألة الاختيار يا جماعة، لو عرفنا أن الله يعني المعبود بحق، والرب يعني الخالق الرازق المدبر، وطبعا كونه معبود بحق، العبادة تقتضي التكليف، وتكليف من اللفظ أصلاً، هم سموا التكليف تكليف ليه؟ لأنه في كلفة على العباد، في مشقة، التكليف فيه نوع مشقة فلذلك اتسمى تكليفاً.
فالعبودية تحمل في طياتها معنى التكليف المشقة، والرب معناه الخالق الرازق المدبر. لو أنت عاوز تحمد الله عز وجل، من قد إيه من زمان، طيب هو الميكروفون كان اتقفل، أنا مش عارف بقى الميكروفون اتقفل من أمتى بس يعني هنعيد.
كنا بنقول يا جماعة أو المعنى التاني، مش عارف بقى ده الميكروفون اللي اتقفل من الحتة دي ولا لا، بس يعني هنبتدي منها وخلاص. الله يعني المعبود بحق، والرب يعني الخالق الرازق المدبر.
طيب، وقلنا معبود بحق، عبادة يعني تكليف، وعبادة يعني تكليف، وتكليف يعني مشقة، يبقى أول ما تيجي لفظ الجلالة الله كده في ذهنك، معبود بحق، عبادة يعني تكليف، تكليف يعني اعمل وما تعملش. فاعمل وما تعملش دي فيها مشقة، فيها تقييد. ورب يعني خالق رازق مدبر.
طيب، لما تعرف أن دي الله ودي الرب، لو عاوز تحمد الله عز وجل، تحمد ربنا سبحانه وتعالى، تلاقي قلبك يميل لأنهي اسم أكتر أنك تحمده به أو تحمده عليه؟ الله ولا الرب؟ قطعا يعني قلوبنا كلها تميل إلى الرب. فأنَا لو هحمد ربنا سبحانه وتعالى ولا أحمده يعني في قلبي يميل أكثر إلى أني أحمده على أنه رب، أنه خلقني ورزقني ويدبر أمري ويرعاني إلى هذه المعاني، مش لأنه إله معبود فكلفني بالتكاليف التي تقيد حركتي. لأ، تلاقي القلب يميل لده أكثر.
تجد القرآن جاء على عكس هذا: أول آية في المصحف، الحمد يقدم الألوهية قبل الربوبية، الحمد لله رب العالمين. الله العظيم محمود على الأمرين جميعاً، محمود على كونه إلهاً، ومحمود على كونه رباً، لكن قدم الحمد على الألوهية قبل أن يحمد على الربوبية، يعني محمود لأنه معبود، محمود لأنه شرع شرائع.
متخيل؟ طب ليه؟ مع أن القلب زي ما قلنا يميل أكثر لأنه يحمد لكونه رباً، لكونه خلق ورزق ويدبر ويرعى وكذا، عن أنه كونه كلف وقيد الحركة وقال افعل ولا تفعل. ليه القرآن ما جاش على هذا النسق؟ ليه ما قالش الحمد لرب العالمين؟ لأ، نقدم الحمد لله قبل رب العالمين، ليه بقى؟
لأن الله عز وجل طبعا كونه محمود عليه أنه رب دي لا ينازع فيها أحد أصلاً، واحنا اتكلمنا على أو لا ينازع في أصلها أحد، أصل الخلق ما حدش هيجي ينازع ربنا في الخلق. لكن أهل الإيمان بقى يلحظوا معنى فوق ده يا جماعة، بمعنى إيه؟ أن لولا التشريع من الله عز وجل لما انتظم نظام الحياة أصلاً.
تخيلوا كده أن ربنا خلق ورزق وساب الكون كده، اللي عاوز يعمل حاجة يعملها بقى، يعني الكون ده تحول لإيه؟ كان زمان الكون ده تحول لغابة. لكن الله عز وجل لما خلق ورزق، أراد سبحانه وتعالى أن ينتظم نظام الكون، فاتت الشرائع.
معنى تاني يخليك تحس بكلمة الحمد لله، يعني الحمد لله، الحمد لله على الشرع، أن الله عز وجل -أنتم عارفين يا جماعة والمعنى ده كنا المفروض نقوله الفيديو اللي فات كمان لكن ما جتش فرصة-. أي آلة، أجرى واحد بالآلة دي صانع الآلة، ولذلك تجد أنت لو جاب حاجة غالية شوية، جهاز غالي، قبل ما بتفتح الجهاز، قبل ما تعمل أي حاجة، تعمل إيه؟ تفتح المانيوال اللي جاي معه ولا الكتالوج ده، تقرا إرشادات مين؟ إرشادات المصنع.
ليه تقرأ إرشادات المصنع؟ لأن المصنع بيقول لك الجهاز اللي في إيدك جديد لأنك نضيف، لو عملت واحد اتنين تلاتة وما عملتش واحد اتنين تلاتة هتحافظ على الجهاز. حضرتك بقى قريت إرشادات المصنع ورميتها ورحت تتصرف مع الجهاز بدماغك، الجهاز هيبوظ، ولله المثل الأعلى.
بالظبط هو ده اللي ربنا سبحانه وتعالى عمله معنا بالشرع، بالأوامر والنواهي. الله عز وجل خلق، وأدرى واحد بك اللي خلقك، ولهذا قال الله عز وجل إيه في القرآن: ﴿أَلَا يَعْلَمُ مَنْ خَلَقَ﴾ [الملك: 14]؟ شوفوا يا جماعة، القرآن يخاطب العقول في هذه: ﴿أَلَا يَعْلَمُ مَنْ خَلَقَ﴾.
إذا كان الصانع هو أعلم الإنسان بصنعته، فالخالق هو أعلم بمخلوقاته. ألا يعلم من خلق؟ هنا "من" أما تكون على الفاعلية، يعني ألا يعلم من خلق، يعني من خلق ده اللي هو ربنا سبحانه وتعالى، ألا يعلم من خلق؟ أو تكون "من" على المفعولية والفعل محذوف، يبقى: ألا يعلم الله من خلقه، يعني مخلوقاته؟ ألا يعلم مخلوقاتي ما يصلح المخلوقات وما يفسدهم، فيأمرهم بما فيه صلاحهم، وينهاهم عما فيه فسادهم؟
هيبقى الشرع ده ما تاخدوش إنه تكليف فتقييد، لأ، انظر للشرع نظرة أخرى بقى، أن الأوامر دي هي أوامر لتهذيب نفسك، أوامر للإبقاء على فطرتك. يبقى ربنا كأننا إيه بقى؟ نرجع كده للآلة، الآلة جاية لك جديدة لسه، حضرتك بتتولد نضيف، بتتولد على الفطرة، حديث النبي عليه الصلاة والسلام: «كل مولود يولد على الفطرة»، نضيف، نضيف، فطرتك التوحيد، «كل مولود يولد على الفطرة، أبواه يهودانه أو ينصرانه أو يمجسانه».
والنبي صلى الله عليه وسلم ما قالش: أو يسلمانه. ما قالش كده ليه؟ لأن الإسلام هو الفطرة أصلاً، بكونك اتولدت على الفطرة أنت كبرت بقيت مسلم، هذا امتداد للفطرة الطبيعية، هذا امتداد طبيعي، يعني أنت ما تحولتش.
إنما لو ولدت على الفطرة فتهودت فتنصرت فتمجست فالحدت، أنت كده مللت عن الفطرة، ده قال: «فأبواه يهودانه أو ينصرانه أو يمجسانه»، أنما لو فضلت مسلم فانت على الفطرة.
يبقى حضرتك اتولدت نضيف على الفطرة، وربنا نزل لك كتاب من السماء يقول لك اعمل واحد اتنين تلاتة أربعة خمسة، ما تعملش واحد اتنين تلاتة أربعة خمسة، هتفضل على الفطرة وبقدر تمسكك بالواحد اتنين تلاتة أربعة خمسة وابتعادك عن الواحد اتنين تلاتة أربعة خمسة دول، بقدر التمسك بده والابتعاد عن ده بقدر ما أنت على فطرتك، وبقدر أنك تسيب دول وتروح لدول بقدر انتكاسك وابتعادك عن تلك الفطرة.
يبقى الحمد لمين بقى؟ الحمد لله، الحمد لله، الحمد لله أن شرع الشرع كده. تحب الشرع؟ أيوه، كده تحب الأوامر، كده تلتزم، دي بقى بداية أنك تلتزم بالعبادة. احنا دروسنا عاوزين نطلع مبسوطين بالعبادة، عاوزين ندخل على رمضان بقلوب مختلفة.
طيب، الله هو الرب، ده كله لسه هقول كلمتين في حديث سيد الاستغفار: اللهم أنت ربي. فلي اللهم ولي ربي، يبقى الله والرب فيهم معنى تاني بقى وده الربط بالدرس اللي فات، معنى إيه؟
الله، أول ما تقول الله كده ييجي في دماغك الاختيار الشرعي، وأول ما تقول الرب ييجي في دماغك الاختيار القدري، فكأنك بتسلم لله عز وجل باختيارك باختياراته الشرعية وتسلم له باختياراته الإيه؟ القدرية.
فقال النبي صلى الله عليه وسلم: «اللهم أنت ربي لا إله إلا أنت»، ودي كلمة التوحيد مش عاوزين نقف معها، دي ممكن يبقى لها درس لوحدها، «خلقتني وأنا عبدك». أنا الصراحة عشان برضه الوقت سرقنا، فانا في معنى مهم عاوز أوقف عليه، فمش هينفع أوقف على كل معاني الحديث.
«وأنا على عهدك ووعدك ما استطعت». الكلمتين الجايين دول بقى ودي قاعدة في طريقك إلى الله عز وجل، ما ينفعش تبقى سائراً إلى الله عز وجل من غير ما تعرف القاعدة الجاية، اللي هي: «أبوء لك بنعمتك علي، وأبوء بذنبي».
التلات كلمات دول بالترتيب ده: «أبوء لك بنعمتك علي، وأبوء بذنبي، فاغفر لي»، إيه بقى الترتيب ده وإيه قصته؟
بصوا يا جماعة، في طريقك إلى الله عز وجل لن يستقيم سيرك إلا بأمرين: مشاهدة المنة ومطالعة عيب النفس والعمل. وأنت رايح لربنا، وأنت ماشي لربنا، لما تكون عاوز آخرة، مش هينفع غير بحاجتين: مشاهدة المنة ومطالعة عيب النفس والعمل. إيه، يعني إيه مشاهدة المنة؟
مشاهدة من أنك ترى كل ما أنت فيه من فضل ونعمة فمن الله، وهذا كلام نظري سهل تطبيقه على درجتين؛ في درجة أصعب من درجة، وتطبيقه ليس بالسهولة بتاعت الكلام؛ أنك تقول ده نظري، لكن لما تنزل بقى للتطبيق أنك فعلاً قلبك يستشعر معنى أني أنا كل نعمة أنا فيها من ربنا سبحانه وتعالى، هتلاقي التطبيق ليس بالسهولة بتاعت الكلام، وزي ما قلنا؛ في درجة أصعب من درجة.
إيه الدرجة الأسهل؟ اللي هي برضو ما هياش سهلة قوي زي الكلام، بس يعني هي أسهل من اللي بعديها، أنك تستشعر في النعم الدنيوية؛ النعم الدنيوية، يعني الفلوس، الجمال، الصحة، الزوجة الصالحة، الأبناء؛ تلاقي كتير من الناس يحمدوا الله عز وجل فعلاً وشايفين ده، ده من ربنا سبحانه وتعالى، ومنهم بيقول لا ده بزكائي وبخبرتي، وأنا درست في جامعة مش عارف إيه، وأنا أصلاً ذكي والحاجات دي.
طيب، الدرجة الأصعب إيه بقى؟ ودي اللي عايزين نقف معها في مواسم الطاعات؛ أن من النعم التوفيق للطاعة، أن من النعم التوفيق للطاعة؛ يعني لما تصوم تشوف أنك صمت دي نعمة من ربنا سبحانه وتعالى، ولو شاء لخذلك، وكم من أناس أصبحوا مفطرين في رمضان في نهار رمضان، بيحصل ولا ما بيحصلش؟ بكونك تصوم، لا هو بجدعنتك ولا هو عشان أنت عندك إرادة، بتوفيق الله عز وجل لك صمت، ولو خذلك لما صمت، يبقى تشوف كونك صمت نعمة من ربنا سبحانه وتعالى تستحق الشكر.
لو ختمت المصحف تشوف أن ختمك للمصحف نعمة من الله عز وجل، معلش بقى الصورة ممكن تبقى إيه مش قد كده، نعمة من الله عز وجل تستحق الشكر، حفظت القرآن، قمت الليل في رمضان، الصلوات المكتوبات، السنن النوافل؛ كل حاجة، كل عبادة بتعملها تشوفها نعمة من ربنا سبحانه وتعالى، طيب ولما تشوفها من نعمة من ربنا تشاهد المنة، تشاهد منة الله عز وجل عليك.
ورbنا قال في القرآن: ﴿يَمُنُونَ عَلَيْكَ أَنْ أَسْلَمُوا قُلْ لَا تَمُنُّوا عَلَيَّ إِسْلَامَكُمْ بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ إِنْ كُنْتُمْ صَادِقِينَ﴾ [الحجرات: 17]، المعنى ده واضح: يمنون عليك أن أسلموا، ييجوا كده يمنوا أنا مسلم؛ يعني أحمد ربنا أني أسلمت، فلا تمنوا علي إسلامكم، أمال مين اللي يمن؟ بل الله يمن عليكم؛ شهادة المنة أن هداكم للإيمان إن كنتم صادقين، فهمتم المعنى ده؟ ولو شاء قلنا لخذلك.
ولو أرادوا الخروج؛ ركزوا في الآية دي، الآية دي مرعبة يا جماعة: ﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً وَلَكِنْ كَرِهَ اللَّهُ انْبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ﴾ [التوبة: 46]، مرعبة؛ كره الله انبعاثهم فثبطهم، يبقى ربنا يمن وربنا يثبت، أول ما تلاقي نفسك في طاعة، في عبادة، في زمرة الصالحين، في قوافل الصائمين القائمين الحافظين لكتاب الله عز وجل التاليين له، أوعى، أوعى تشوف نفسك.
أوعى، يبقى أول حاجة هنجيلها إيه؟ وبعدين هنجيلها بقى، بس نخلص دي عشان نقول أوعى بجد بقى، أول حاجة مشاهدة منة، تاني معنى: مطالعة عيب النفس والعمل، شهادة المنة؛ شفت أن الصيام والقيام والذكر والقرآن وعبادتك وكل حاجة من ربنا سبحانه وتعالى، طيب في المقابل أنت عملت إيه بقى في النعم دي؟ يعني ربنا سبحانه وتعالى وفقك للصلاة، صليت كما ينبغي؟ ولا وقع في صلاتك التقصير؟ واقف تصلي وأنت سرحان ودماغك في المطبخ، ودماغك في ماتش الكورة، ودماغك في الشغل، ما أنت عارف صليت كم ركعة؟ مش عارف الإمام قرأ إيه أصلاً في الصلاة.
مشاهدة منة أن ربنا جابك للصلاة، وبعد ما جيت، مطالعة عيب النفس والعمل؛ مرائي، سرحان، لم أتأدب مع الله عز وجل وأنا بين يديه، صمت؛ عرفت أنه منة من ربنا، مشاهدة المنة، عملت إيه في الصيام؟ صمت كم المنهج؟ صامت جوارحك؟ صامت خطراتك؟ وده أعلى؛ يعني أول حاجة الصيام عن الطعام والصلاة دي الرتبة بتاعة الناس كلها، اللي هي أصلاً يعني ما ينفعش الصيام من غيرها.
رتبة أعلى؛ أن جوارحك تصوم عن المعاصي، إيه اخبار جوارحك في الصيام؟ رتبة أعلى؛ أن قلبك يصوم عن الخطرات الدنية، ما تفكرش في دنيا أصلاً، بعضهم كمان بيقول بقى أن فيه مرتبة أعلى؛ أنك تصوم عن غير الله، ده أنت طول فترة الصيام ربنا بس اللي في قلبك، ربنا بس اللي في دماغك، ما فيش حاجة غيره، فحضرتك فين؟ سيبك من حضرتك فين، حضرتك أصلاً اجتهدت أنك تصل لده ولا هو طعام وشراب؟ طب ما هو طعام وشراب، ده ربنا سبحانه وتعالى وفقك لهذا.
اجتهدت؛ ربنا بقى شاف منك، شاف منك اجتهاد أن يا رب كما وفقتني للصيام لاصومن، لتصومن جوارحي، ليصومن قلبي، فيعينك برضه، من تقرب إلي شبرا تقربت إليه ذراعا، هيعينك وهيبقى برضه ده توفيق منه سبحانه وتعالى، يبقى شاهدت المنة، ثم طالعت عيب النفس والعمل؛ القرآن؛ حفظت القرآن مش عشان أنت جدع، حفظت القرآن؛ ربنا سبحانه وتعالى أعانك على حفظ القرآن، فأنت شهادة المنة، تطالع بقى عيب النفس والعمل.
بعد ما حفظت القرآن كنت من أهل القرآن، أحللت حلاله وحرمت حرامه، وقفت عند حدوده، قمت به آناء الليل، ما هو هو ده يا جماعة، هو ده شكر النعمة، طب لو ما عملتش كده فانت كده بتطالع عيب النفس والعمل؛ يا رب أنت أعنتني على حفظ القرآن، لكن أنا ضايع، أنا لا قمت بالقرآن، ولا وقفت على حدود القرآن، ولا أحللت حلاله ولا حرمت حرامه، أنا زي ما أنا، وهكذا في كل العبادات.
طيب، شاهدت المنة وطالعت عيب النفس والعمل، بالله عليك عين تسأل حاجة؟ لك عين بعد دول تسأل جنة؟ تسأل فردوس أعلى؟ ولا هتلاقي قلبك على طول راح ناحية إيه؟ ناحية الاستغفار، أنا ما بقولكش هتستغفر من الذنب دلوقتي، أنا مش بقول لك الاستغفار عشان أذنبت، لا، ده أنت هتلاقي قلبك رايح ناحية الاستغفار بعد الطاعة مش بعد معصية.
أنا بكلم ناس داخلة على مواسم الطاعات، ناس داخلة هنا الدرس بمزاجها عشان تسمع كلام ربنا سبحانه وتعالى، فدي ناس عاوزة تطيع، أنا عاوز أقول لك في مواسم الطاعات بعد ما تطيع أوعى تشوف نفسك، أوعى، ده أنت بعد ما تطيع استغفر، لأ مش فاهم، مش فاهم إيه ده دينا كله كده، اللي أنا حكيته لك ده هيحل لك ألغاز بقى، الصبر.
أول ما بتقول: السلام عليكم ورحمة الله، السلام عليكم، أول ما بتقول كده، أول ذكر بتقوله إيه؟ استغفر الله، استغفر الله، استغفر الله، أول ذكر؛ عمرك سألت نفسك استغفر الله على إيه؟ ده أنا كنت بصلي، هو أنا كنت بسرق ولا بشرب خمر ولا بكذب ولا بغتاب؟ ده أنا لسه مخلص صلاة، استغفر الله على إيه؟
عشان كده المفروض أنتم تقولوا: السلام عليكم ورحمة الله، السلام عليكم ورحمة الله، عقلك بيفكر في حاجتين؛ مشاهدة منة ربنا جابني ووقفني في الصلاة، ومطالعة عيب نفس وعمل؛ سرحان، متضايق، الإمام طول، أقول يا ريتني ما نزلت المسجد، الإمام قرأ إيه ما نيش عارف، صليت ركعة ولا دريان؟ فجنة إيه اللي أسألها وفردوس أعلى إيه؟ استغفر الله، استغفر، أول حاجة.
طيب، قيام الليل؛ خلصت قيام ليل ودخل وقت السحر، بتعمل ايه؟ ﴿كَانُوا قَلِيلًا مِنَ اللَّيْلِ مَا يَهْجَعُونَ﴾ [الذاريات: 17]، معظم الليل صاحيين بيصلوا، بعدها: ﴿وَبِالْأَسْحَارِ هُمْ يَسْتَغْفِرُونَ﴾ [الذاريات: 18]، عمرك سألت نفسك ليه؟ يهجعون ناس معظم الوقفة بتصلي ومن أسحار هم يسألون الفردوس بقى؟ وبالأسحار هم يسألون مرافقة النبي بقى عليه الصلاة والسلام؟ لأ، وبالأسحار هم يستغفرون.
كان الحسن يقول: سبحان الله، مد الصلاة إلى السحر ثم جلسوا يستغفرون.
طيب، حديث عائشة، وقبل ما نقول حديث عائشة يا جماعة رضي الله عنها، متخيلين عائشة رضي الله عنها صيامها في رمضان وأحوالها القلبية في رمضان وعبادتها وقيامها وتلاوتها للمصحف كان شكله إيه؟ يعني زينا كده ولا؟ أكيد لأ، هتيجي تسأل النبي عليه الصلاة والسلام، تقول: يا رسول الله، أرأيت إن وافقت ليلة القدر ماذا أقول؟ عائشة جاية تسأل النبي عليه الصلاة والسلام، ليلة القدر بتبقى فين يا جماعة؟ في الأواخر.
بعد ما صمنا وقمنا وختمنا المصحف مرات ليلة القدر بقى، يلا ندعي بقى، عائشة النبي عليه الصلاة والسلام، أقول إيه في ليلة القدر؟ مولاها النبي عليه الصلاة والسلام: «قولي: اللهم إنك عفو تحب العفو فاعف عني»، لأنها قولي يا رب الفردوس ولا قال لها قولي يا رب مرافقة نبيك ولا قال لها قولي يا رب؟ اللهم إنك عفو تحب العفو، ليه بقى؟
اللي بنقوله ده يا جماعة؛ مشاهدة المنة ومطالعة عيب النفس والعمل، وبعدين خلي بالكم النبي ما يقولهاش عليه الصلاة والسلام؛ يعني مش يقول لها أئسلي العفو وبعدين قل إيه؟ يا رب أنا صمت فاعف عنا، يا رب أنا قمت فاعف عني، يا رب أنا ختمت المصحف فاعف عني.
يعني مش بس ما قالهاش مثلا إيه بس عيش الفردوس، لا اللي بيقول لها أسألي العافية وأسألي العفو مش عشان أنت جدعة، ولا عشان أنت صمت ولا قمت ولا حفظت المصحف ولا قريت ولا تصدقت ولا اعتمرت، أسألي العفو علشان أنت عفو، بس ده بقى بيسموه إيه؟ ركزوا في الكلمة اللي جاية دي، بيسموه دخول المفلس.
اللي النبي صلى الله عليه وسلم عمله مع عائشة ده، أو أحال عائشة أو درب عائشة عليه، أو أمر عائشة به، بيسموه دخول المفلس؛ عارفين إيه مفلس؟ واحد مفلس، واحد ما معهوش حاجة فبيسأل، هو ما معهوش حاجة سلبيها فبيسأل، عشان أنت بس يعني أنت كريم في الدين، إنما أنا مش لاقي حاجة عملتها أقول لك أديني عشان أنا عملت واحد اتنين تلاتة، ولا ألاقي حاجة قلتها فأقول لك أديني عشان أنا قلت واحد اتنين تلاتة، ده اسمه دخول المفلس.
بعض العلماء يقول لك: أوسع باب تخش منه على ربنا باب الافلاس، أوسع باب تدخل منه على ربنا سبحانه وتعالى باب الإفلاس، بعضهم يقول باب الإفلاس المحض، يعني إفلاس لا يشوبه شائبة رؤية نفس ولا رؤية عمل ولا رؤية حال، إفلاس محض؛ اللهم إنك عفو تحب العفو فاعف عني، فاعف عني.
طيب، دي عائشة، أبوها؛ أبو بكر رضي الله عنه، صديق الأمة، مين بقى عبادته زي عبادته؟ مين إيمانه زي إيمان أبو بكر يا جماعة؟ لو وزن إيمان أبو بكر بإيمان الأمة كلها يا جماعة، ركزوا في الكلام ده، ده كلام النبي صلى الله عليه وسلم، جبنا كده الإمام أبو بكر حطيناه في كفة وإيمان الأمة كلها، عارف يعني إيه من أمة كلها دي؟ يعني إيمان من أول عمر كده رضي الله عنه، وأنزل بقى عمر وعثمان وعلي وطلحة والزبير والعباس و... يعني كل الصحابة والتابعين ومتابعي التابعين إلى يوم القيامة.
حطينا إيمان دول كلهم كده في حتة وإيمان أبو بكر في حتة، يرجح إيمان أبي بكر، أبو بكر ييجي يسأل النبي عليه الصلاة والسلام، عاوز يدعو بدعاء في الصلاة، والدعاء ده موطنه قبل السلام، يعني بعد التشهد وقبل السلام، فبيسأل النبي: ادعوا لي في الصلاة، أبو بكر، والنبي قولوا لي: اللهم إني ظلمت نفسي ظلما كثيرا، وفي رواية: ظلما كبيرا، بعض العلماء قال يجمع بينهما: اللهم إني ظلمت نفسي ظلما كثيرا كبيرا، ولا يغفر الذنوب إلا أنت فاغفر لي مغفرة من عندك وارحمني إنك أنت الغفور الرحيم.
أبو بكر، إيه رأيكم؟ اللهم إني ظلمت نفسي ظلما كثيرا كبيرا؛ مطالعة عيب النفس والعمل، ولا يغفر الذنوب إلا أنت؛ مشاهدة المنة، هتخش دخول إيه دلوقتي؟ دخول مفلس، فاغفر لي مغفرة من عندك، أنا ما عنديش حاجة بقى، خلاص، أنا ما عنديش حاجة أقولها، ما عنديش حاجة أدعو بها.
دخول مفلس ليه؟ لأن مشاهدة منة ومطالعة عيب نفس عمل، فدخلت دخول مفلس تسأله المغفرة، طيب كده قلنا الصلاة وقلنا قيام الليل، الحج؛ ﴿ثُمَّ أَفِيضُوا مِنْ حَيْثُ أَفَاضَ النَّاسُ وَاسْتَغْفِرُوا﴾ [البقرة: 199]، في الحج أعظم شعيرة أهو، وجمعت بين العبادة المالية والبدنية، شعيرة عظيمة جداً وفي بلد حرام وفي دخول مفلس.
طب ليه يعني؟ عمرك سألت نفسك الأسئلة دي يا عم يعني إيه ثم أفيضوا واستغفروا؟ نستغفر ليه هنا؟ بتستغفر ليه بعد الصلاة؟ نستغفر ليه في السحر؟ عشان اللي أنا بقوله ده مشاهدة منة، عمل دخول مفلس انتهينا، الجهاد؛ ﴿وَمَا كَانَ قَوْلَهُمْ إِلَّا أَنْ قَالُوا رَبَّنَا اغْفِرْ لَنَا ذُنُوبَنَا وَإِسْرَافَنَا فِي أَمْرِنَا وَثَبِّتْ أَقْدَامَنَا﴾ [آل عمران: 147]، وكان من نبي قاتل معه ربيون كثير، وبعدين كان دعاؤهم إيه بقى؟ وما كان قولهم إلا أن قالوا ربنا اغفر لنا ذُنوبنا وإسرافنا في أمرنا وثبت أقدامنا وانصرنا على القوم الكافرين، الجهاد أعظم العبادات يا جماعة، يصاحبها يقارنها ختم بالاستغفار.
طيب، عمر النبي عليه الصلاة والسلام، احنا هنا اتكلمنا عن العبادات عن الأعمال حتى الأعمال الفاضلة، عمر النبي عليه الصلاة والسلام، حياة النبي كان شكلها إيه؟ فكر أنت بقى وقل؛ يقوم ربنا يأمره بإيه قبل ما يموت النبي صلى الله عليه وسلم، نعيت إليه نفسه بسورة في القرآن، سورة إيه؟ ﴿إِذَا جَاءَ نَصْرُ اللَّهِ وَالْفَتْحُ﴾ [النصر: 1]، دي صورة أول صورة نزلت في القرآن، نعت النبي صلى الله عليه وسلم قرب أجله، النبي لما نزل الصورة دي عرف أنه خلاص اهو بيموت، ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا * فَسَبِّحْ بِحَمْدِ رَبِّكَ وَاسْتَغْفِرْهُ﴾ [النصر: 1-3]، فاعلم يا محمد.
إن دورك في الدنيا قد انتهى، خلاص الناس آمنت وبدأت تدخل في الدين أفواجاً، دي لحظة بقا إيه؟ الانتقال إلى الرفيق الأعلى. أديت ما عليك، طيب يعني اعمل إيه يا رب؟
﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا * فَسَبِّحْ بِحَمْدِ رَبِّكَ وَاسْتَغْفِرْهُ ۚ إِنَّهُ كَانَ تَوَّابًا﴾ [النصر: 1-3]. يا جماعة النبي صلى الله عليه وسلم بعد ما قضى حياته كلها في طاعة الله عز وجل، الله عز وجل يأمره في نهاية عمره قبل أن يموت -نسأل الله المغفرة-: سبح بحمد ربك، استغفره. طب استغفره عشان أنت النبي؟ استغفره عشان أنت اللي عملت وسويت يا محمد؟
استغفر الله عز وجل، وأنت تستغفر ادخل عليه دخول المفلس واستغفره إنه كان تواباً، استغفره عشان هو تواب مش عشان أنت نبي، استغفره عشان هو هو المعنى ده واضح ومتسق في الدين كله. يعني بعد معرفتك بالمعنى ده هتلاقي بقا الدين ابتدى يظهر لك كده بشكل تاني وهتلاقي الدين يعني حاجات ما كنتش فاهمها ابتديت تفهمها، الأمور متسقة كلها متناسقة شبه بعض. ولذلك النبي عليه الصلاة والسلام يقول: «لن ينجي أحداً عمله»، قال: ولا أنت؟
أعمالك اللي بتتنطط بيه ده ولا حاجة. كنا بنقول خلاص كده شاهدت المنة، طلعت عيب النفس والعمل ولم يبق لك إلا أن تدخل على الله عز وجل دخول المفلس. ولذلك بقا في سيد الاستغفار هتلاقوا المعنى ده: أبوء لك بنعمتك علي مشاهدة منا وأبوء بذنبي، وطلعت عيب النفس والعمل، اغفر لي اغفر لي، هي دي القاعدة اللي عاوزين نختم بها الدرس، أنك تدخل عز وجل في مواسم الطاعات، احنا داخلين يوم شعبان وبعدين رمضان، ادخل عليه دخول مفلس.
تشاهدوا المنة، تطالع عيب نفس العمل، فلا تجد إلا تسألوا الله عز وجل المغفرة والعفو لأنه عفو غفور، مش لأنك بتعمل حاجة. السلام عليكم ورحمة الله وبركاته.