الشيخ أمجد سميرالسلام عليكم ورحمة الله وبركاته. بسم الله، الحمد لله، والصلاة والسلام على رسول الله، وعلى آله وصحبه ومن والاه. أشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد وعلى آل محمد، كما صليت على آل إبراهيم إنك حميد مجيد. أما بعد: ما زلنا مع هذه السلسلة المباركة قواعد في طريقك إلى الله عز وجل، أو قواعد السير إلى الله عز وجل.
النهاردة هنتكلم عن حديث وهو الحديث الثالث من جملة ثلاثة أحاديث عليها مدار هذا الدين. كنا قلنا قبل كدة إن الإمام أحمد بن حنبل قال: مدار هذا الدين على ثلاثة أحاديث: حديث عمر «إنما الأعمال بالنيات»، وحديث عائشة «من عمل عملاً ليس عليه أمرنا فهو رد»، وحديث ثالث وهو ده موضوع النهاردة، حديث النعمان بن بشير أن النبي صلى الله عليه وسلم قال: «إن الحلال بين، وإن الحرام بين، وبينهما أمور مشتبهات لا يعلمهن كثير من الناس، فمن اتقى الشبهات فقد استبرأ لدينه وعرضه، ومن وقع في الشبهات وقع في الحرام، كالراعي يرعى حول الحمى يوشك أن يرتع فيه، ألا وإن لكل ملك حمى، ألا وإن حمى الله محارمه. ألا وإن في الجسد مضغة إذا صلحت صلح الجسد كله، وإذا فسدت فسد الجسد كله، ألا وهي القلب».
حديث عظيم الشأن، وفيه فوائد كثيرة جداً، وصعب جداً نقف على كل فوائد الحديث في الدقائق القليلة اللي بنقعدها مع بعض، فخلونا نبتدي نذكر طرفاً من فوائد هذا الحديث. النبي عليه الصلاة والسلام بيقول: «إن الحلال بين، وإن الحرام بين، وبينهما أمور مشتبهات لا يعلمهن كثير من الناس». يعني إيه؟ يعني الحلال واضح وظاهر ومعروف للناس، والحرام كذلك. الدين كله حلال ظاهر وحرام ظاهر؟ لا، الدين مش كله كدة، الدين فيه أمور يا جماعة مشتبهة. يعني إيه مشتبهة؟ يعني ما بتبقاش واضحة هي حلال ولا حرام. هي في نفس الأمر، الحق عند الله عز وجل، إن هي إما حلال وإما حرام، الحاجة دي ما تنفعش تبقى في نفس الوقت حلال وحرام، وما تنفعش تبقى في نفس الوقت واجب ومكروه، ما ينفعش يجتمعوا في نفس الوقت، ما ينفعش نفس العين تكون موصوفة بحكمين مختلفين.
أمال إيه معنى إنها مشتبهة؟ مشتبهة يعني مش واضح حكمها. طيب مش واضح حكمها للناس كلها؟ يعني المسلمين كلهم يبقى بالنسبة لهم الحاجة دي مشتبهة؟ لا، النبي صلى الله عليه وسلم قال: «لا يعلمهن كثير من الناس»، يبقى معنى كدة إن في قليل يعلموا إن الحاجة دي هي حلال ولا حرام، واجب ولا مستحب ولا مكروه ولا حرام. وعارفين مين هم القليل دول؟ الراسخون في العلم. هنيجي للكلمة دي تاني، بس يلا نرجع، يبقى عندنا الدين يا جماعة حلال بين، حرام بين، وبينهما أمور مشتبهات.
طيب أول سؤال يتبادر للذهن: ليه ربنا سبحانه وتعالى خلى في أمور مشتبهات؟ سؤال قد يتبادر للذهن، طالما الدين فيه حلال باين وحرام بين، يعني لو سألت أي حد دلوقتي هو الربا إيه؟ ما فيش اتنين هيختلفوا، يقول لك الربا حرام. الصلاة إيه؟ ما فيش اتنين يختلفوا يقول لك الصلاة فرض. طيب ليه مش كل الدين كدة؟ وكان ربنا سبحانه وتعالى قادر إنه يعمل ده، قادر إنه يخلي الدين كله حلال بين وحرام بين. أول حاجة واجبات الدين لا يختلف عليها اثنان، ومحرمات الدين لا يختلف عليها اثنان، وكذلك المكروهات والمستحبات والمباحات. كان ربنا قادر سبحانه وتعالى بأنه لو وقفت أي واحد في الشارع وتقول له هي دي حكمها إيه؟ يقول لك أه كذا، ويبقى الناس كلها في علمها بأمور الدين واحد وسواء.
ليه ما عملش كدة؟ ما عملش كدة علشان يا جماعة إحنا للأسف في حتة كدة فاهمينها غير ما العلماء والسلف فهموها، وهي حتة إن اختلاف العلماء، وبعض الناس تلاقوهم، وأما أقول بعض الناس أقصد بعض المتصدرين للدعوة أو كدة، عاوزين يحملوا الناس كلها على قول واحد، وده حتى السلف ما فهموش ده. يعني المسألة الفلانية الحكم فيها كذا، ويبتدي بقى يعمل ده المتصدر ويربي فيه أتباعه سواء بالقول أو حتى بأحواله. فتلاقي كدة جيل طالع بالمنظر اللي أنا هقول لكم عليه ده، منظر إيه؟ إن الحكم في المسألة الفلانية كذا قولاً واحداً، وننكر على أي حد يعمل غير كدة، وننتقص من دينه، والسلف ما فهموش الدين كدة أصلاً.
ولما نفهم بقى فهم السلف هنعرف ليه ربنا عمل كدة، وليه الدين فيه الحتة دي؟ وليه الدين فيه الحتة المشتبهة دي؟ كيف كان يرى السلف الاختلاف الواقع في الفروع، يعني الأحكام الفقهية؟ الحتة دي الاختلاف فيها كان السلف شايفينه إزاي؟ هنذكر لكم بعض الآثار، وده زي ما بيقولوا كدة كتير، آثار كثيرة جداً عن السلف في المعنى ده. إسحاق بن بهلول ده كان من أصحاب الإمام أحمد، وإمام أحمد ده حاجة مش سهلة، ده حد كده فذ في الحديث وفي الفقه وفي الزهد، كان إمام في كل حاجة، لدرجة إن سموه إمام أهل السنة. أصحابنا بيقولوا إسحاق بن بهلول كان من أصحاب الإمام أحمد، فصنف كتاباً في الاختلاف، وسماه كتاب الاختلاف، اختلاف العلماء. فقال أحمد: سمه كتاب السعة. شفتم فقه الإمام أحمد؟ يرى اختلاف العلماء سعة لهذه الأمة، بيوسع الدنيا، إزاي هنعرف كمان شوية.
ابن قدامة، من أجل فقهاء المذهب الحنبلي، قال كلام كتير، منه قال في المقدمة: وجعل في سلف هذه الأمة أئمة من الأعلام، اتفاقهم حجة قاطعة واختلافهم رحمة واسعة. يا جماعة الاختلاف في الفروع، الاختلاف في المسائل الفقهية، رحمة في هذه الأمة أرادها الله عز وجل بهذه الأمة. الشيخ مرعي الحنبلي أحد مشايخ المذهب قال: إن اختلاف المذاهب في هذه الملة رحمة كبيرة، وفضيلة عظيمة، وتوسيع في هذه الشريعة السمحة. يا جماعة فهم العلماء لمسألة الاختلاف، الحق في نفس الأمر واحد، يعني ما ينفعش حاجة هتبقى عند ربنا حلال وحرام في نفس الوقت، لكن ربنا ممكن بحكمته يخفي حكمها، ما يبقاش حكم واضح كدة زي الحلال باين والحرام باين، لأ، يخفي حكمها ويحصل فيها الاختلاف لكن في الآخر حلال أو حرام.
شيخ الإسلام بيقول: الحق في نفس الأمر واحد، وقد يكون من رحمة الله ببعض الناس خفاؤه، يبقى خفي مش معروف حلال ولا حرام قطعاً قولاً واحداً، لما في ظهوره من الشدة عليه، إن الحكم ده لو ظهر مش هيسع الناس كلها أن تعمل بالحكم ده في جميع العصور وفي جميع الأماكن، هيبقى في بعض الأوقات في شدة في إلزام كل المسلمين بالقول ده.
قال بكر أبو زيد رحمه الله، من يدعو، يا جماعة ركزوا بقى في كلمة بكر أبو زيد، لأنه أولاً طبعاً هو عالم جليل، لكنه من المحدثين فكلمته برضو لها وزن، في إبطال هذه البدعة المحدثة، اللي هو إن بعض الناس طالعة عاوزة تحمل كل الناس على قول واحد، وتسفه خلاف هذا القول، وتنكر على من يتبع خلاف قولهم. وده شطط وبدعة، إحنا ما عرفنا ذلك في السلف، ما هي بدعة أصلاً. نحن جعلناها هكذا، إحنا اللي خليناها شائكة بضيق أفهامنا. تجد مثلاً واحدة منتقبة وواحدة تانية لابسة حجاب شرعي بكل بساطة، ساتر، وما بيبينش، والحاجات الشرعية اللي في الحجاب، فتنكر عليها. طب ليه؟ هي دي بقى صورة من الصور اللي إحنا بنقول فيها دلوقتي ده، اللي هو إحنا عاوزين نخلي الناس كلها ماشية على قول واحد. أو واحد واخد بوجوب صلاة الجماعة في المسجد مثلاً وواحد تاني واخد باستحباب الصلاة فحياناً لا يؤديها مثلاً، ده يا جماعة فينكر عليه إنكار من يرى أنه فعل إثماً. مين حضرتك اللي جعلت نفسك حكماً على الدين؟ مين اللي جعلت نفسك فيصلاً بين أقوال أهل العلم؟
حضرتك مين في أمة الإسلام وسط الفقهاء الكبار العظام اللي ظلوا مختلفين وماتوا وهم مختلفين، ودرست بعد كدة مذاهبهم باختلافاتهم؟ فمين حضرتك اللي جاي بعد ألف وأربعمائة سنة عشان تحسم الخلاف بين أحمد والشافعي وأبو حنيفة ومالك؟ ده بداية كده فيه نوع تزكية نفس، وأنت منهي عن ذلك، فلا تزكوا أنفسكم هو أعلم بمن اتقى، أنت شئت أم أبيت. ده فيه نوع تزكية، كأني أنا اللي جاي لكم بالحاجة اللي أحمد والشافعي وأبو حنيفة ومالك في وشي يطلعوا فيها بقول واحد، وأنا اللي جاي أفصل بينهم.
تاني حاجة، أنت أصلاً ما فهمت حكمة ربنا من إيجاد الخلاف أصلاً. شوف الشيخ بكر أبو زيد إيه بيقول: قال من يدعو إلى جمع الناس على رأي واحد أو مذهب واحد في كل ما جاز فيه الخلاف، فقد رام الشطط ونفق في غير ظرف، وتحجر رحمة الله وهي أوسع. يا سلام على فهم السلف للمسألة وحتى المحدثين اللي ماشيين على نهج السلف.
يبقى ابتديت دلوقتي الدنيا تنور قدامنا، هو ليه في متشابهات؟ ما تبقى الدنيا حلال وحرام بين؟ أيوه يا جماعة، وعمر بن عبد العزيز كان له كلام جميل، أنا كل الآثار دي لكن ما فيش وقت أني أسيب لكم الآثار كلها، لكن حتى هنزل لكم منها كتير بعد كدة على قناة التليجرام. إزاي عمر بن عبد العزيز حتى فهم إن اختلاف الصحابة، قال كلام فيما معناه: ما يسرني أن الصحابة اتفقوا، تخيلوا عمر بن عبد العزيز بيقول: أنا ما كنتش هتبسط لو كانوا الصحابة اتفقوا! إيه ده؟ ليه؟ بدل ما إحنا مختلفين. قال: لأن اختلافهم بعد كدة ييجي واحد يأخذ بهذا بقول، وده فيه سعة على الأمة يا جماعة. الأقوال اللي تنفع ناس معينة في أماكن معينة في أزمنة معينة، قد نفس الأقوال دي تكون فيها ضيق وحرج شديد جداً على ناس تانية في أماكن تانية في أزمنة تانية.
واضح الكلام، بيبقى فيه اختلاف من الفقهاء، وتجد الاختلاف ده طبعاً إحنا هنا مش بنأصل كيفية التعامل مع الخلاف، لأن أنا كواحد عامي بقى لا بتاع فقه ولا أنا أعمل إيه دلوقتي؟ يعني لما العلماء يختلفوا ده مش قضيتي، ولا جاي أتكلم فيها، ودي قضية كبيرة جداً وبتدرس في الكتب، إحنا عندنا باب كده اسمه باب الفتوى، وفيه باب في أصول الفقه: المفتي والمستفتي. من يدرس أصول الفقه يدرس الباب ده من حيثية معينة، وكتب الآداب فيها الباب ده، آداب المفتي وآداب المستفتي، وده بيدرس من حيثية تانية، لكن ده مش وقته ومش هينفع أسرد كل ده.
إنما المعنى اللي إحنا جايين نتكلم فيه حديث النبي عليه الصلاة والسلام: «إن الحلال بين وإن الحرام بين وبينهما أمور مشتبهات». كأن أول سؤال هيجي في الذهن قبل ما ندخل في الحديث: هو ليه في أمور مشتبهات يا رب؟ أول معنى، لأ ما تفتكرش أمور المشتبهات دي في ذاتها في كونها مشتبهة، ده شر، لأ، لا تحسبوه شراً لكم بل هو خير لكم، خير وفيه سعة على الأمة، ده أول معنى.
المعنى التاني إن ربنا بحكمته جعل هذه المشتبهات عشان الناس هتختلف في تعاطيها مع المشتبهات دي، خلاص وصلت إن الحتة دي بالنسبة لي فيها لبس، هعمل إيه؟ فهتلاقي واحد استبرأ لدينه وعرضه، ودي الألفاظ اللي جاية بقى في الحديث، وواحد تاني يقتحم المشتبه مش فارقة معاه، يبقى ده اختبار لك، الله عز وجل ابتلانا بوجود هذه المشتبهات علشان يختبر تعاطينا لهذه المشتبهات، هنتعامل معها إزاي؟ وده اللي يهمنا بقى في الحديث. هنيجي له بقى دلوقتي، لكن فاهمني الأول يا جماعة ده أول سؤال: إن الحلال بين وإن الحرام بين وبينهما أمور مشتبهات، طيب المشتبهات دي ليه؟ ليه بقى في مشتبهات في الدين؟ ما الحكمة؟
لماذا الصلاة واضحة جداً لنا كلنا؟ ولماذا الربا واضح لنا قوي كلنا؟ ولماذا هناك أمور ليست واضحة لنا كلنا؟ أنا أتكلم عن العلماء؛ لماذا اختلف العلماء أصلاً؟ ما أسباب اختلافهم؟ أسباب كثيرة جداً، لكن في الآخر ترجع لحاجة من اثنتين: حاجة يسمونها تخريج المناط، وحاجة يسمونها تحقيق المناط.
تخريج المناط يعني الأصل الذي يستدلون به، فتجد مثلاً حديثاً قاله النبي صلى الله عليه وسلم، بلغ بعض العلماء ولم يبلغ البعض، فالذي بلغهم الحديث قالوا به، والذي لم يبلغهم الحديث لم يعملوا به لأنهم لم يعرفوه. هنا الأفهام تختلف، وأحياناً يبلغ الحديث الطائفتين لكن طائفة من العلماء تراه صحيحاً يحتج بمثله، والآخرون يرونه ضعيفاً لا يحتج بمثله، فهنا يبتدي الحكم يختلف، ففي طائفة ستسقط هذا الحديث رأساً، وناس قالت: لا، هذا حديث صحيح وسنحتج به. وأحياناً يصل الحديث أو الآية للطائفتين لكن هؤلاء فهموها بشكل وهؤلاء فهموها بشكل، وفهم العلماء مبني على أصول وقواعد، ليس بمزاجهم.
من أكثر الكلمات التي تنرفزني، والقريبون مني يعرفون ذلك، حين يأتي أحد ويقول مثلاً: قال الحنابلة كذا ولا دليل عندهم، أو ولا دليل لهم، أو الشافعية أو المالكية. هذه الكلمة تجنني، والكلمة فيها سوء أدب وفيها تعالي وتزكية للنفس، سيبك من هذه الآفات المنتشرة في جيلنا، لكن فيها معنى آخر خطير جداً، وهي هدم لدين الإسلام.
حين أقول لكم الحنابلة أو الشافعية، نحن لا نتكلم عن أشخاص عاديين، بل طائفة من العلماء وأهل الدين الذين حملوا لنا أقوالاً فقهية تتوارثها الأجيال. عندما يأتي شخص ويكون ديدنه في كل درس أن يبين أنه الفخم الضخم الذي لا مثيل له، فيقول: قال فلان كذا ولا دليل عنده، فيصفق له الناس. تعالوا واحدة واحدة، عندما يتكرر هذا الكلام وتجرأ الناس عليه، وتصبح الناس تسمع ذلك بشكل عادي، سينقدح في ذهنك أن الحنابلة أو الشافعية يمكن أن يقولوا شيئاً من غير دليل.
هذه الصورة خاطئة، فهؤلاء أتقى وأورع وأعرف بالله عز وجل من أن يقولوا قولاً بغير دليل، أنتم لا تفهمون كيف كان يعيش هؤلاء، ولا تفهمون ديانتهم وصيانتهم للعلم وأحوالهم مع ربنا. الشافعي كان له في رمضان ستين ختمة في غير الصلاة، واحد بهذا الحال كيف يفتري على الله عز وجل؟ أحمد بن حنبل ما كان يقول حلال وحرام، ومن كتر ورعه كان يقول: يعجبني، لا يعجبني، أكره ذلك.
أنتم تتكلمون عن أئمة، ثم تقول: الحنابلة قالوا كذا ولا دليل عندهم! هل حضرتك الذي جئت بالتايهة؟ يقولون: الوسائل الحديثة ساعدتنا، وهذه الوسائل أعطتك الوهم في نفسك، بضغطة زر تجيب ما لم يجبه أحد، لأ، أنت لا تفهم شيئاً ولا تفهم ديناً. أحمد بن حنبل كان يحفظ ألف ألف حديث، والناس عرفت أكثر مما عرفته أنت ووسائلك، وفهمت ما لم تفهمه ولن تفهمه.
الله عز وجل حفظ لنا هذا الدين بأمثال هؤلاء، وليس ليأتي واحد بعنجهية وغطرسة ويقول لا دليل عندهم. هذا لا يمثل ديننا، هذا أي شيء غير الدين.
نعود لسبب الاختلاف، قلنا تخريج المناط، فمنه أيضاً أن الحديث وصل لنا نحن الاثنين، لكن هل هذا الحديث يفيد الحكم الفلاني أم لا؟ هنا نختلف. أنا وأنت لا ندخل أصلاً على الأحاديث والآيات ونعمل فيها عقلك وتقول أنا سآخذ من الكتاب والسنة مرة واحدة، أنت لست فاهماً لغة ولا أصولاً ولا مصطلحاً، لا تضحك على نفسك ولا تجعل أحداً يضحك عليك بكلام يستهويك، ففي الآخر هذا ليس الدين.
تحقيق المناط هو أننا نسلم بأن الحديث صحيح ولا معارض له، لكن هل الواقعة التي يسأل عنها الشخص تنطبق عليها هذه المسألة؟ نختلف في تطبيق الحكم على الواقعة، وهذا هو تحقيق المناط الذي يخرج لنا المشتبهات.
هذا العلم لا يعلمه كثير من الناس، بل يعلمه قليل من العلماء الراسخون في العلم، وهنا تظهر فائدة الرجوع لأهل العلم. فمن اتقى الشبهات فقد استبرأ لدينه وعرضه، ومن وقع في الشبهات وقع في الحرام، كالراعي يرى حول الحمى يوشك أن يرتع فيه.
نحن الناس العاديون ماذا نفعل؟ الحلال بين والحرام بين، الحرام نجتنبه، والمشتبهات هي التي فيها خلاف، ومن اتقى الشبهات فقد استبرأ لدينه وعرضه. شيخ الإسلام له كلمة جميلة يقول فيها: الخروج من الخلاف أحمد من الوقوع فيه.
انظروا يا جماعة، وقوع الخلاف في الأمة رحمة، فأن يقضي الله بوجود الخلاف في فروع الفقه رحمة للأمة، والخطاب يوجه للعلماء: يا علماء اجتهدوا لتصلوا لحكم المسألة، لا يرهبنكم أحد، ولا تقعوا في الإرهاب الذي يحدث.
طلع حكمك بقواعدك وضوابطك، ولا تأسر بالإرهاب الإعلامي الذي يحدث. في الآخر طلعت أنت بحكم، وهو بحكم مختلف؛ لا تزعلوا واختلافكم رحمة للأمة.
الخطاب الذي يوجه لأمثالنا، نحن الناس الطيبة التي وصلت لها الصراعات دي، سيوجه لي خطاباً: يا ابني لو أنت تقدر تتجنب مسائل الخلاف هذه فتجنبها، وقد استبرأت بدينك وعرضك. في بعض الأوقات وبعض الناس وبعض الأماكن وبعض الأحوال وبعض المواقف الخاصة، لا واحد مزنوق، هو أنا لو ما عملتش بهذا سأقع في مشقة شديدة، والعالم أفتاني، أعمل بقول العين؛ الدنيا سهلة، الدنيا أسهل يا جماعة من التعقيدات التي نحن نخلقها لأنفسنا أو ربينا عليها، فبنربي الناس كمان عليها. الدنيا أسهل من كده بكثير، والدين أيسر من ذلك. لأ، أنا سأستبرأ، عرفت أن فيه حلالاً وحراماً، لأ فيها خلاف وبتاع أنا مش هعمله. شيخ الإسلام يقول لك هنا: الخروج من الخلاف أحمد من الوقوع فيه. أحسن تخرج من الحاجات الجميلة جداً التي الحقيقة الناس التي معي من زمان عارفين أنا مهتم شوية بالفقه، فمن المواطن التي تؤثر في جداً وأنا أقرأ الفقه، ودائماً يا جماعة علم الفقه الناس تفتكره علماً جامداً، قالوا حلال وحرام ومكروه وبتاع وأدلة وردود، تحس أنه علم كأنك داخل حرب، لكن الحقيقة تعدي بلقطات كده في كتب الفقه تلاقيها تهز قلبك؛ دي حقيقة، بتربيك من جواك بمعاني.
منها في كتب الفقه تلاقي ساعات تعدي عندنا مثلاً عند الحنابلة، في أول كتاب في باب المياه، أول حاجة يكرهوا صنفاً من أصناف المياه، مش مهم الآن الدخول في تفاصيل. طب ليه بتقولوا عليه مكروه يا حنابلة مع أنهم لا يرون له دليلاً يرقى لكراهته؟ خلوا بالكم، طب ليه يا حنابلة بتقولوا عليه مكروه، ده أنتم ما عندكمش الدليل الذي يرقى للقول بالكراهة؟ قالوا: يكره خروجاً من الخلاف. ياه، والله يا جماعة الكلمة دي، وأنا أتذكر أن كل ما كنت أشرح الفقه لأي أحد أو للطلاب، كنت لازم أقف على الكلمة دي وممكن تأخذ مني وقت الدرس كله، وإزاي العلماء الراسخون هؤلاء، شوفوا أدبهم، في وجود "نحن نقول كذا والشافعية ما لهمش دليل"، ما فيش كده يا جماعة، الناس دي ما عندهاش كده، هيقول لك الماء ده مكروه، ليه يا حنابلة؟ خرج من الخلاف، هيكرهونا خلاص. طبعاً مش بقول كده في كل المسائل لأن الخلاف عندهم رتب وقصة كبيرة، مش قضيتنا دلوقتي.
الخروج من الخلاف أحمد من الوقوع فيه، فمن اتقى الشبهات فقد استبرأ لدينه. النبي قال كده عليه الصلاة والسلام، قال: «فَمَنِ اتَّقَى الشُّبُهَاتِ فَقَدِ اسْتَبْرَأَ لِدِينِهِ وَعِرْضِهِ». إيه ده؟ إيه الذي دخل العرض الآن في الموضوع؟ أهمية الاستبراء للعرض أصلاً. يعني إيه استبرأ يا جماعة؟ أن طلب البراءة، لا تتقي شبهات، مش هيقع في الشبهات، سيعمل حاجتين بذلك: طلب البراءة لدينه وطلب البراءة لعرضه. طلب البراءة للدين واضح، أني لما أعرف المسألة دي فيها شبهة فسأتركها، فأكيد أنت في الأمان من حيث الدين. طب والعرض؟ لأن مش كل الناس يا جماعة، خلوا بالكم شبهات، الحاجات المشتبهة دي أنك تقول عليها حلال أو أنت وغيرك يقولون عليها حرام، فخلي بالك اللي بيقول عليها حرام ده لما يشوفك، هيشوفك واقع في الحرام، فهمتم دي؟ هيشوفك أو أوقات يشوفك؛ هو المفروض على فكرة ما يشوفكش كده. من المواقف الجميلة كان واحد من الأحناف، أنا مش فاكر اسمه دلوقتي، لكن كان على عهد الإمام أحمد، والأحناف يرون أنه لا بأس بالنبيذ خلافاً للجمهور الذين يرون حرمة النبيذ. وده كان حنفي وكان فقيهاً كبيراً وصاحب دين، راجل فقيه، المهم كان قاعد في بيته وقدامه إزازة النبيذ، فالباب خبط، من على الباب أحمد بن حنبل، يا نهار! أحمد الإمام الجبل واقف على الباب يستأذن على الفقيه ده الحنفي، فالغلام أول ما سمع كده راح جارٍ على إزازة النبيذ يشيلها، أحمد سيدخل الآن.
الفقيه الحنفي ده قال: مه! ائتني بالثانية، هات لي إزازة ثانية حطها جنب دي، ده بيعامل ربنا، ده عمله مع أحمد، خلي بالك، أنا وهذا الذي أريد أن أقوله؛ ممكن ما يعملوش مع حد صغير، تخيل، لأن أحمد فاهم رتبة، وفاهم أن ده واخد بالقول الفقهي، وفاهم أن ده لا يقدح في دين هذا، وأنا لو شربت دي يقدح في ديني. شوفوا يا جماعة، نفس إزازة النبيذ محطوطة، هو لو مد يده وشرب لا يقدح في دينه، وأنا لو مددت يدي وشربت يقدح في ديني، ليه؟ لأني أنا واخذ بقول أن ده حرام، وهو واخذ بقول أن ده حلال. لو بصينا لها من المنظور ده هنلاقي الدنيا واسعة. صح؟ يبقى في بعض الناس تفهم ده، تفهم مراتب الخلاف، بس مش كل الناس، معظم الناس مش كده. كأني بهذا الفقيه الحنفي لو واحد ثاني من صغار الطلاب خبط عليه، الطلاب الحنابلة مثلاً، كان ممكن يخبئ الإزازة، لكن مع أحمد لأ، أحمد فاهم ده، وأحمد كان يعظم هذا الفقيه جداً، وأنا أشوف لكم القصة أهوه ممكن أضعها لكم في التليجرام إن شاء الله لو افتكرت، رؤيت في طبقات الحنابلة.
أنت كيف تستبرئ لعرضك؟ طب وده مطلوب في الدين؟ آه مطلوب في الدين أنك تستبرئ لعرضك. شوف حديث النبي عليه الصلاة والسلام: «مَنْ كَانَ يُؤْمِنُ بِاللَّهِ وَالْيَوْمِ الْآخِرِ فَلَا يَقِفُ مَوَاقِفَ التُّهَمِ». ما تقفش في حتة الذي يشوفك فيها أو في موقف الذي يشوفك فيه يتهمك. وحديث ثاني جميل جداً وفيه مراعاة للحتة دي بإشارة لطيفة كده، التي هي وإن كان ما هواش حاجة حرام لكن حاجة يستحيى من مسلم، النبي صلى الله عليه وسلم لما قال: «إِذَا أَحْدَثَ أَحَدُكُمْ فِي الصَّلَاةِ فَلْيَأْخُذْ بِأَنْفِهِ ثُمَّ لِيَنْصَرِفْ»، علشان الناس ما تقولش أنه أحدث، يعني واحد أحدث وهو في الصلاة يروح عامل كده على طول، كأنه خرج من الصلاة عشان عنده أي حاجة، عنده رعاف، عنده أي حاجة، فيأخذ كده يعمل على أنفه ويمشي علشان الناس ما تقولش أنه أحدث. ويمكن ده ما هواش حاجة حرام، لكن حاجة مما يستحى منه، فالنبي يراعي ده. الإمام علي رضي الله عنه يقول أيضاً كلاماً جميلاً جداً، قال -ركزوا يا جماعة-: "إياك وما يسبق إلى القلوب إنكاره، وإن كان عندك اعتذار؛ رب سامع نكراً لا تستطيع أن تبلغه عذراً". كلام جميل جداً للإمام علي ومتقن، "إياك وما يسبق إلى القلوب إنكاراً"، يعني أول ما الناس هتشوفك حاجة هتقول إيه ده؟ وإن كان عندك اعتذار، يعني حتى لو أنت عندك: يا جماعة لأ اهدوا، ده أنا عملت كده عشان كده، بلاش، ما تجيش للحتة دي، ليه؟ استبرئ لعرضك، رب سامع نكراً لا تستطيع أن تبلغه عذرك.
ابن عقيل الحنبلي يقول: لا ينبغي الخروج من عادات الناس؛ الناس كلها متعودة تعمل حاجة معينة طالما ما هياش حرام، ما تخرجش أنت عن عادة الناس وتعمل لي فيها المش عارف إيه، يعني مهما استطعت أن أنت توافق الناس في عاداتهم طالما في حتة واسعة في الدين، خليك زي الناس، لا ينبغي الخروج من عادات الناس. الإمام الأوزاعي يقول: كنا نمازح ونضحك، كنا بنهرج ونضحك وكده، فلما صرنا يقتدى بنا خشيت ألا يسعنا التبسم. وده في حق يا جماعة المتصدرين للدعوة وطلاب العلم، ما ينفعش نرى منهم ابتذال شديد جداً يجرئ الناس على رتبة طلاب العلم أو رتبة الدعاة أو رتبة العلماء، لا يصون ما يحمله. طب أنت مش بتصون نفسك وعرضك بس، أنت بتصون العلم كمان، الابتذال الشديد قوي الذي يخرجك عن حد الحشمة والاحترام إلى ضده، ده مش مطلوب، ده مش مطلوب، وإن كان حتى بنية حسنة، ولو عشان أجذب وعشان الناس تسمعني وعشان أعمل، ده في الحدود، يعني مش بنقول الناس تبقى، لكن في حدود أنك ما توصلش لحد أنك تبقى مبتذل، يبقى مفهوم. ابن الجوزي يلخص هذا الكلام، يقول: وإذا رأى العوام أحد العلماء مترخصاً في أمر مباح، هان عندهم. وبعد شوية يقول إيه ثاني؟ فمراعاة الناس لا ينبغي أن تنكر، ما يجيش حد ينكر علينا أننا بنراعي الناس وبنراعي أحوال قلوبهم. فمراعاة الناس لا ينبغي أن تنكر، فلا نسمع من جاهل يرى مثل هذا "رياء"، إنما فهذه صيانة للعلم، واضح كلام ابن الجوزي.
نرجع ثاني: "فمن اتقى الشبهات فقد استبرأ لدينه وعرضه". واستبرأ العرض قلنا والنبي عليه الصلاة والسلام كان يستبرئ لعرضه وهو المنزه المشرف الذي ما حدش يظن به السوء، لما اثنين من الصحابة مروا عدوا عليه وكان واقف مع صفية بالليل، فأول ما شافوه واقف هم طبعاً شايفين شبح امرأة، والنبي صلى الله عليه وسلم واقف، يعني مش عارفين مين دي، فمضوا، فقال: «عَلَى رِسْلِكُمَا، إِنَّهَا صَفِيَّةُ». إيه ده؟ هو إيه الذي النبي عمله عليه الصلاة والسلام؟ النبي يستبرئ من موقف التهمة، يستبرئ لعرضه، «عَلَى رِسْلِكُمَا، إِنَّهَا صَفِيَّةُ». فقالا: سبحان الله! لأنهم ينزهون النبي عليه الصلاة والسلام، يعني نحن هنشك فيك؟ وقال: «سُبْحَانَ اللَّهِ، إِنَّ الشَّيْطَانَ يَجْرِي مِنِ ابْنِ آدَمَ مَجْرَى الدَّمِ، فَخَشِيتُ أَنْ يَقْذِفَ فِي قُلُوبِكُمَا شَيْئاً -أَوْ قَالَ: شَرّاً- فَتَهْلِكَا». يبقى ده يا جماعة نبي يستبرئ لعرضه. نرجع ثاني: "فمن اتقى الشبهات فقد استبرأ لدينه وعرضه، ومن وقع في الشبهات وقع في الحرام، كالراعي يرعى حول الحمى، يوشك أن يرتع فيه". إيه بقى قصة حمى ومرتع وإيه الكلام ده؟ عارفين يا جماعة زمان ولغاية دلوقتي، واحد معه شوية غنم، فعاوز يرعى الغنم، يعمل إيه؟ يروح يشوف أرض فيها شوية زرع ويوقف الغنم ويأكله، أرض مباحة يعني ما لهاش صاحب، طيب. فزمان بقى كان الملوك يجيئون على حتة ويخلوها حمى، حمى لهم، لهم دي بقى حلال ولا حرام مش قضيتنا، لكن الحمى ممكن يبقى الحمى لنفسه أو حمى للمسلمين لمصالح المسلمين، يعني الزرع الذي يخرج ونحن نعمل به حاجات ثانية وكده، لكن دي مش قضيتنا دلوقتي.
الحمى ده متخيلين كده الملك لما يجي يعمل حمى على حتة، هتبقى حتة خصبة ولا حتة أي كلام؟ أكيد حتة فرز أول، من أخصب الأماكن، جميل. هو الأماكن الخصبة دي فجأة ينقطع الخصب؟ لو حطينا خط كده، فاللي جوه ده خصب وأرض منتجة، وبعد الخط بقت أرض مجدبة، ولا الخصوبة بتقل كده تدريجياً؟ أكيد ده الذي بيحصل، مش كده؟ يعني ما عندناش، جه الملك عمل حمى على الحتة دي، عمل سلك شائك أو وضع حدوداً على الحتة دي، ليه؟ أكيد لما وضعها كانت حتة مميزة، فبره الحدود دي على طول حتة ضائعة، لأ الخصوبة بتقل لغاية ما تبقى بعد كثير جداً حتة ما بتنتجش أصلاً. جميل، طب صاحبنا بتاع الغنم ده عاوز يرعى الغنم، يقوم يجي يعمل إيه؟ ما يقدرش يدخل حمى الملك طبعاً، ده لو دخل حمى الملك ستتقطع رقبته، واضح؟ لكن يروح عامل إيه؟ يجي جنب الحمى بقى في الحتة التي هي نائلها من خصوبة الحمى، ويروح سايب الغنم، الراعي يرعى حول الحمى، طيب هو الغنم ده لما تسيبه، الغنم فاهم أن الحتة دي أرعى فيها والحتة دي لا أرعى فيها؟ شوية هيعمل إيه؟ الغنم هيدخل في الحمى، صح؟ يبقى كالراعي يرعى حول الحمى يوشك أن يرتع فيه، شوية والغنم سيدخل، فهمتم الصورة يا جماعة كده؟
فالنبي عايز يقول إيه بقى؟ شوفوا يا جماعة من رحمة ربنا، والله يا جماعة دي رحمة، عشان تفهموا الحلال في ديننا كثير، والحرام هو الأقل، وعشان كده دائماً بننص على الحرام. عارفين لو الحلال الذي قال كنا قلنا كذا وكذا، حللوا الباقي حرام، لكن أنت بتلاقي العكس، بتلاقي نقول لك إيه: الخمر حرام، والنبيذ زي ما قلنا من شوية على من يراه حرام مثلاً، ده معناه إيه؟ لما نقعد نعد الحرام، أن الحلال أكثر صح؟ وإلا لو قلت لك: قل لي إيه الأكل الحلال، وإيه الشرب الحلال، هتلاقي نفسك عجزت أنك تقول، هتقول إيه؟ كله إلا واحد اثنين ثلاثة، صح؟ رجعنا ثاني أنك تعد الحرام، فالحرام أقل.
في الزواج والمناكح نقول لك: تزوج التي تريدها، إلا أصنافاً أقول لك: بلاش أختك، بلاش عمتك، بلاش خالتك، صح؟ إنما غير ذلك تزوج. فهذا يدل على أن الحرام أقل في المنح، وهكذا.
عندنا دائرة الحرام نوعين: كبائر وصغائر. عندنا دائرة التي هي أقل قليلاً اسمها الكبائر، يقوم ربنا من رحمته بنا يجعل حول دائرة الكبائر هذه دائرة أكبر قليلاً يسميها دائرة الصغائر. خلي بالك أنت عشان توصل للكبيرة ستقتحم الصغيرة أولاً. ودائرة أوسع يسميها دائرة المكروهات؛ يعني عشان توصل للصغيرة فتوصل للكبيرة، فأنت لازم تعدي على دائرة المكروهات، ودائرة أوسع يسميها خلاف الأولى، وهي المسألة ما هيش مكروه لكن خلاف الأولى، لو ما كنتش عملتها كان يبقى أحسن. وبره بقى الحلال بتاعك الذي أنت تعيش فيه براحتك، لكن يقول لك إيه؟ بلاش تقرب لخلاف الأولى.
افرض قربت فوقعت، آه لسه عندك دائرة اسمها المكروهات، حتى الآن هي ما هيش حرام. طب قربت ووقعت، عندك دائرة اسمها الصغائر لو وقعت فيها تأثم لكن إثم بسيط. وبعدين قربت فوقعت، فأنت خلاص رايح في داهية، أنت الذي رايح برجلك، فده من رحمة ربنا بنا سبحانه وتعالى. هو ده الحمى، ربنا عمال يحمي، شايفين؟ فما تجيش أنت قاعد لي على الحدود، لأ ابعد؛ ابعد علشان أنت لو وقفت على الحدود شوية سيحصل إيه؟ ستقع، ستدخل حول الحمى يوشك أن يرتع فيه.
وإحنا يا جماعة قلوبنا دي شوية أغنام، غنمة اسمها الحسد، وغنمة اسمها شهوة النساء، وغنمة اسمها حب الظهور، وجوانا غنم كده، فأنت ابعد علشان أنت لو على الحدود، الغنم اللي جواك هيدخل، الغنم اللي واقف هيدخل.
طيب، ومن وقع في الشبهات وقع في الحرام، يعني إيه؟ نرجع تاني ونقف شوية، وقع في الحرام جراء يرتع حول الحمى يوشك أن يرتع فيه. يعني إيه من وقع في شبهات يقع في الحرام؟ معناها شيئان: إما أن يكون من وقع في شبهات يقع في الحرام يعني الذي سيعمل الشبهات هذه؛ فالشبهة هذه يا جماعة في نفسها؛ الحق في نفسه إما أن يكون حلالاً أو إما... فإنه سيقعد كل ما يشوف شبهة عادي يعملها ولا يفرق، أكيد في مرة سيعمل الحرام، ما هي مش دائماً الشبهة هتبقى حلالاً، يعني ده معنى ومش عايزين نقف عليه كثيراً، لكن المعنى الثاني هو المهم قوي.
من وقع في الشبهات وقع في الحرام يعني إيه؟ يعني يا جماعة الذي سيتجرأ الآن أنه يقع في الشبهات، شوية سيتجرأ عادي على الحرام الذي هو شايفه حرام، فهمتوا دي؟ من وقع في الشبهات وقع في الحرام، يعني الذي يعمل الشبهة الآن وهو عارف أنها شبهة، شوية سيعمل حراماً وهو عارف أنه حرام؛ هم كان الأول لا يعملون. طب ده بنسميه إيه؟ التدرج. التدرج في آية مرعبة في القرآن ربنا قال إيه عن بني إسرائيل: ﴿ذَٰلِكَ بِأَنَّهُمْ كَانُوا يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ ۗ ذَٰلِكَ بِمَا عَصَوا وَّكَانُوا يَعْتَدُونَ﴾ [البقرة: 61].
آية مرعبة، ﴿ذَٰلِكَ بِأَنَّهُمْ كَانُوا يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ ۗ ذَٰلِكَ بِمَا عَصَوا وَّكَانُوا يَعْتَدُونَ﴾، يعني أقول يا جماعة هم ما جاش في دماغهم أن ممكن يوصلوا أنهم يقتلوا أنبياء ولا أنهم يكفروا بالله، لكن الأول وقعوا في العصيان واعتدوا. فلما عصوا واعتدوا المعصية يسرتهم لفين، وعشان كده بنقول المعاصي بريد الكفر.
خلي بالك ما تجيش تقول إيه؟ دي حاجة بسيطة، البسيطة ستجرك للكبيرة. النبي عليه الصلاة والسلام قال حديثاً عجيباً قوي، قال: «لعن الله السارق يسرق البيضة فتقطع يده، ويسرق الحبل فتقطع يده». أنا مش فاهم، عارفين يا جماعة أن أي واحد سيسرق ستقطع يده؟ لأ، ده لازم يسرق حاجة معينة تبلغ نصاب القطع، نصاب أن يقام عليه الحد، النصاب ده مش ثمن بيضة ولا ثمن حبل مبدئياً، يعني مش أي واحد يسرق بيضة هنقول له تعالى نقطع يدك، ولا واحد سرق حبلاً حقيراً هنقول له تعال نقطع يدك على أحد الوجهين في تفسير الحديث.
طب أمال إيه سرق البيضة إزاي؟ وسرق الحبل إزاي كان ده ما يبلغش النصاب؟ قالوا: لعن الله السارق يسرق البيضة، فلما يسرق البيضة تجسر نفسه أن يسرق ما فوق البيضة حتى يبلغ نصاب القطع فتقطع يده، ويسرق الحبل فلما سرق الحبل الذي هو الشيء الحقير تجاسرت نفسه فسرق ما هو أعظم من الحبل حتى بلغ نصاب الحد فقطعت يده، وكان مبدأه إيه؟ أنه سرق بيضة وسرق حبلاً. ﴿ذَٰلِكَ بِمَا عَصَوا وَّكَانُوا يَعْتَدُونَ﴾.
فمن وقع في الشبهات وقع في الحرام، يرتع حول الحمى يوشك أن يرتع فيه. ألا وإن لكل ملك حمى، ألا وإن حمى الله محارمه، ما تقربش من محارم ربنا سبحانه وتعالى، خلي دائماً في فيصل. ما تدخلش في المكروه وتقول ده مكروه، ما تسيبش النوافل والسنن وتقول ما هي عادي زي الناس، ليه؟ لأن دي حاجز بينك وبين أنك تترك الفرض. تعالوا كده يا جماعة، واحد بيصلي الفروض والسنن عمره ما هيسيب الفرض مرة واحدة، صح ولا لأ؟ لأ، ده الأول تهاون في السنن، فخلي بالك وانتبه للمعنى ده.
ربنا لما خلى مكروهات مش عشان يخنقك، عشان يحميك من نفسك، ربنا لما خلى فيه مستحبات مش عشان يضيق عليك، لأ، ده علشان يحميك من نفسك أنك تسيب الفرض، فهمتوا دي؟ فأوعى تقع في المكروه، أوعى تسيب المستحب، أوعى تقع في المشتبهات وتتجاسر عليها سواء أنت محتاج لها ستقع في حرج لو ما عملتهاش أو لا فتقول خلاص طالما فيها خلاف أنا أعمل. أوعى تعمل كده، ومن وقع في الشبهات وقع في الحرام فخلي بالك من دي.
ألا وإن لكل ملك حمى، ألا وإن حمى الله محارمه، وبعدين يختم النبي صلى الله عليه وسلم الحديث بجملة يعني دي درس لوحده: «ألا وإن في الجسد مضغة إذا صلحت صلح الجسد كله، وإذا فسدت فسد الجسد كله، ألا وهي القلب». إيه علاقة ده بأول الحديث؟ ودي آخر حاجة في دقيقة وبعد كده هتشوف لو في أسئلة نجاوبها إن شاء الله، أنه يا جماعة أن الحلال بين وأن الحرام بين وبينهما أمور مشتبهات، فمن اتقى الشبهات، ومن وقع في الشبهات، كل ده بقلبك.
هذا هو العلاقة يعني إيه؟ يعني عاوز يقول لنا إيه؟ عاوز يقول لنا عشان تعمل الحلال وتسيب الحرام وتتقي الشبهات اهتم بقلبك، نظف قلبك؛ لأن بقلبك ستحب الحلال، وستكره الحرام، وستتقي الشبهات. «ألا وإن في الجسد مضغة إذا صلحت صلح الجسد كله، وإذا فسدت فسد الجسد كله ألا وهي القلب»، فاهتم بقلبك. إزاي أهتم بقلبي بقى؟ ده قصة كبيرة ممكن تأخذ لنا مرتين ولا حاجة، لكن دي كانت قاعدة النهاردة، خلاص؟ التي هي إيه؟ أنك في طريقك إلى الله عز وجل اتقِ الشبهات، دي قاعدة.
قاعدة ثانية بس ما تكلمناش عليها وهي: «ألا وإن في الجسد مضغة إذا صلحت صلح الجسد كله وإذا فسدت فسد الجسد كله ألا وهي القلب»، دي قاعدة برضو في طريقك إلى الله، أن الطريق إلى الله تُقطع بالقلوب لا بالأبدان. القاعدة لكن قاعدتنا بتاعة النهاردة أنك في طريقك إلى الله عز وجل لابد أنك تتقي الشبهات.
شوف بقى لو في أي أسئلة. ماشي، النفس أمارة بالسوء، آه طبعاً، دي أنواع يعني ممكن أبقى أتكلم عليها ده درس لوحده. أول ما يحاسب عليه الإنسان هل هي النفس؟ مش فاهم السؤال قوي، إنما الإنسان سيحاسب على كل حاجة، ماشي؟ أول ما يحاسب عليه جاء في بعض الروايات أنها الصلاة، أو الذي يحاسب عليه المرء الصلاة، وإذا صلحت صلح سائر العمل، إذا فسدت فسد سائر العمل.
هل يجوز اتباع الحنابلة في بعض الأمور والشافعية في أمور أخرى؟ هتتبعها بإيه؟ يعني أنت ستفتح الكتب وتشوف الحنابلة قالوا إيه وتتبعهم في دي؟ يعني أنا سأقعد أختار ولا إيه؟ لأ، الصورة دي لأ، يعني لو أنا سأفتح الكتب لوحدي وأقعد أقول آه الحنابلة قالوا دي حلال فآخذها، والشافعية قالوا في الثانية دي حلال فآخذها من الشافعية، لأ غلط.
أمال إيه إزاي؟ أني أسأل عالماً ليستفتيه، فالعالم ده إما أن يكون هو متبعاً لمذهب، هو حنبلي أو شافعي فيفتيني بالمذهب، أو بلغ رتبة أنه ينظر فيما قاله الله أو قاله رسول الله صلى الله عليه وسلم فيرجح وكذا، بيعمل ده أو ينظر في، دي بقى حاجة ثانية بس دي في آداب المفتي، وأنه ممكن المفتي يترك القول الراجح عنده ويفتي بقول مرجوح، لكن قاله بعض العلماء رعاية لحال المستفتي، ده برضو موجود، بس دي مش بتاعتك يعني، هو سيفعل إيه ويفتيك إزاي دي مش بتاعتك، إنما أنت تسأل الذي تثق في علمه ودينه فيفتيك، فتأخذ بالفتوى التي أنت سمعتها. إنما أنا مش لوحدي سأدخل أقتحم الكتب وأنا سأقول سآخذ من دي من الحنابلة، ودي من الشافعية، ودي من الأحناف، ودي من لأ.
خلاص، بالذات يا جماعة لو اللي بيعمل ده بيتتبع الرخص، آه، شوف بعض السلف قال إيه: من تتبع رخص العلماء تزندق أو كاد، يعني إما بقى زنديق أو شوية سيصبح زنديقاً. ليه؟ ما أنت لما تأخذ من ده الذي قال إن فيه حلالاً، ستلاقي نفسك في دين كده ملفق لم يقل به أحد من الأئمة قط، يعني الصورة التي أنت فيها ما هيش صورة مسلم قالها أحد من الأئمة. أنت واخذ من ده حل كذا، ومن ده حل كذا، ومن ده حل كذا، جمعت الشرور كلها. لو أنا على مذهب واحد هل يجوز أن يكون لي أكثر من مذهب؟ أتبع مذاهب الآباء، مش فاهم السؤال ده، مذهب واحد خلاص، تتبع المذهب الذي أنت عليه الذي تدرسه وتعمل به، مش عارف إيه مذاهب الآباء دي مش عارف. قل قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك.