دخولتسجيل الدخول

وظائف شهر شعبان و إعمار أوقات الغفلة

أمجد سميرالشيخ أمجد سمير
  • مدة الدرس:
  • قراءة

السلام عليكم ورحمة الله وبركاته. الدرس السابع من سلسلة قواعد السير إلى الله تعالى، والدرس مختلف ويمكن أن يكون خارج السياق؛ فليس قاعدة من قواعد السير إلى الله عز وجل، وإن كان يتضمن قاعدة الحقيقة وهي اغتنام أوقات الغفلة. لكن درس اليوم عن شعبان؛ واليوم ثاني يوم من شعبان، فالمكان مناسب أن نتكلم عن شعبان قليلًا.

الأصل يا جماعة في فضل شعبان أو في العمل في شعبان هو حديث أسامة بن زيد، أخرجه أحمد في المسند والنسائي في السنن، أن أسامة بن زيد رضي الله عنه قال: قلت يا رسول الله، لم أرك تصوم من الشهور ما تصوم من شعبان؟ وقال صلى الله عليه وسلم: «ذاك شهر يغفل الناس عنه بين رجب ورمضان، في طوفان الأعمال إلى الله تعالى، وأحب أن يرفع عملي وأنا صائم».

فأسامة بن زيد هنا أثبت أن النبي صلى الله عليه وسلم كان يصوم في شعبان، وأثبت أمرًا فوق مجرد الصيام وهو الإكثار من الصوم في شعبان. لم أرك تصوم من الشهور ما تصوم من شعبان؛ فيبقى كأن النبي صلى الله عليه وسلم كان يصوم من شعبان صومًا كثيرًا لدرجة أنه لفت نظر أسامة. صفة صوم النبي عليه الصلاة والسلام في شعبان ما قالها أسامة في الحديث، لكن ورد في حديث عائشة رضي الله عنها أن النبي صلى الله عليه وسلم كان يصوم شعبان كله، كان يصوم شعبان إلا قليلًا. الزيادة دي في صحيح مسلم: «كان يصوم شعبان كله، كان يصوم شعبان إلا قليلًا».

طب إيه ده؟ يعني هو كان يصوم شعبان كله ولا يصوم شعبان إلا قليلًا؟ قال أهل العلم عشان يجمعوا بين الروايات أو بين الألفاظ، قالوا أن النبي عليه الصلاة والسلام كان يصوم شعبان إلا قليلًا، صحيح؛ يعني يصوم كل الشهر إلا يومين ثلاثة، حتى يخيل للرائي أنه يصوم شعبان كله؛ فده قول عائشة «كان يصوم شعبان كله» في رواية، وفي رواية «كان يصوم شعبان إلا قليلًا»؛ فكأنه كان يصوم كل شعبان إلا يومين ثلاثة أربعة، فيخيل للرائي أنه يصوم شعبان كله؛ فدي كانت صفة صوم النبي عليه الصلاة والسلام في شعبان.

فلما سأله أسامة بن زيد رضي الله عنه ليه بتعمل كده في شعبان؟ تعلل لذلك النبي صلى الله عليه وسلم بعلتين في الرواية دي، وبعيدًا عن الرواية دي النبي صلى الله عليه وسلم ذكر عللًا أخرى ممكن نقف عليها، لكن خلونا مع العلتين دول الأول. قال: «ذاك شهر يغفل الناس عنه بين رجب ورمضان» أو العلة فيه ترفع الأعمال إلى الله تعالى، «وأحب أن يرفع عملي وأنا صائم»، تاني علة.

يبقى أول علة يا جماعة من علل كون النبي صلى الله عليه وسلم يكثر الصوم في شعبان أنه زمان غفلة: «ذلك شهر يغفل الناس عنه بين رجب ورمضان». فكأني سائل سيسأل: طب ليه الناس بتغفل عن شهر شعبان؟ فأجاب النبي عليه الصلاة والسلام: «بين رجب ورمضان»؛ وقع شعبان بين شهرين عظيمين: شهر رجب وهو أحد الأشهر الحرم، وتكلمنا إحنا عن الأشهر الحرم في درس، وكان أهل الجاهلية يعظمون رجب ضمن تعظيمهم للأشهر الحرم؛ كانوا يعظمون الأشهر الحرم جدًا، وتكلمنا عن المعنى ده في درس منفصل وممكن اللي عاوز يرجع له يرجع له، وحتى لحق بعض أهل الإسلام تعظيم رجب، حتى يا جماعة لغاية دلوقت إحنا في ناس بتظن أن الصوم في رجب أولى وأفضل من الصوم في شعبان، وهذا أنا لا أعلم -فيما أعلم- لا أعلم أحدًا من أهل العلم قط قال به أن صيام رجب أفضل من صيام شعبان.

خلوا بالكم، صيام شعبان عند جمهور أهل العلم هو أفضل الصوم بعد رمضان عند الجمهور، وعند الشافعية سيقولون صيام المحرم، لكن أنا ما أعرفش أن فيه أحد قال أن صيام رجب أفضل من صيام شعبان؛ يعني هو الخلاف دلوقت بين شعبان والمحرم أيهما أفضل؟ فالجمهور على أن شعبان أفضل، والشافعية ذهبوا إلى أن شهر المحرم صومه أفضل.

طيب، فيبقى شعبان ليه الناس بتغفل عنه؟ علشان ده شهر واقع بين شهرين عظيمين: شهر رجب؛ رجب الفرد أحد الأشهر الحرم، وكان أهل الجاهلية يعظمونه جدًا، ولحق هذا بعض أهل الإسلام فعظموا رجب؛ وشهر رمضان شهر معظم وفيه ما فيه، وإن شاء الله نتكلم عن شهر رمضان في درس أو أكثر، ووقع بينهما شعبان فكان زمان غفلة، وكان الرسول صلى الله عليه وسلم يصومه.

ليه بقى؟ يبقى ده أصل يا جماعة، الحديث ده عندنا أصل، ركزوا بقى، وهي دي القاعدة، لو قلنا أن الدرس ده سيكون فيه قاعدة من قواعد السير إلى الله عز وجل، فهي: إعمار أزمنة الغفلة. تاني، يبقى دي قاعدة في طريقك إلى الله عز وجل لا بد من إعمار أزمنة الغفلة.

ليه أول معنى يا جماعة في زمان الغفلة؟ زمان الغفلة يعني زمان الناس غافلة فيه عن عبادة ربنا سبحانه وتعالى؛ أول حاجة أن العبادة في أزمنة الغفلة أخفى من العبادة في غيرها. طيب يعني إيه أخفى؟ يعني أنتم عارفين يا جماعة لما يكون زمان زي رمضان كده، رمضان مثلًا هو شهر التراويح، فكل الناس التراويح دي قيام ليل بالمناسبة، فكل الناس بتقوم الليل في رمضان وكل الناس شايفة بعض وهم بيقيموا الليل، لكن في شهر شعبان ده زمان غفلة، اللي هيقوم الليل في شعبان ما حدش يعرف عنه حاجة، فالعبادة في زمان الغفلة أخفى من العبادة في غيرها.

طيب وإيه يعني لما تكون أخفى؟ لما تكون أخفى تكون أقرب للإخلاص وأبعد عن الرياء، صح ولا لا؟ ولذلك يا جماعة كان السلف يستحبون إخفاء العبادات، وكانوا يحرصون على إخفاء عباداتهم، ويروى عنهم بقى أشياء عجيبة في الموضوع ده؛ يعني يروى عن أحدهم مثلًا أنه قعد سنوات طويلة، قيل عشرين وقيل أربعين سنة، يصوم لا يعلم أحد بصومه، ولا امرأته عارفة أنه بيصوم، طبعًا هو مش بيصوم متصل، لكن صيامه في كل هذه السنين لا أحد يعلم بها حتى امرأته. كان إذا خرج من بيته أخذ معه رغيفين، كان رجل تاجر شغال في سوق، وهو خارج من البيت الصبح يأخذ رغيفين معه، في الطريق يتصدق بالرغيفين، ويروح للسوق ويظن أهل السوق أنه أفطر في بيته، ويظن أهل بيته أنه أفطر في السوق، وفضل كده، مين عرفهم؟ هو يا جماعة كانوا السلف يخبون عباداتهم، وأمتى بقى يكشفوها؟ وهم على فراش الموت؛ لأن ده وقت الرجاء، فخلاص، وده في وقت الوقت ده يا جماعة ما حدش بيرائي، يعني اللي على فراش الموت ده وبينه وبين الموت لحظات، من السلف من كان يقول هذا؛ بقى يبتدي يحكي اللي عمله في الدنيا، ليه؟ يرجّي نفسه؛ هو مش بيوري اللي حواليه "أنا كنت بعمل كذا وكذا"، لا، هو يخاطب نفسه بما عمله فيموت وهو حسن الظن بالله، والله عز وجل عند ظن عبده به.

وكان أحد السلف كان يصوم فاشتهر بالصوم، اتقال بقى فلان اللي في البلد بتاعتنا ده صوّام، فكان يعمل إيه؟ كان يجيء يوم الجمعة ويقف في المسجد الجامع، الناس كلها قاعدة، ويمسك كوباية الماية كده ويحطها على بقه ولا يزدرد منها شيئًا، يظن الناس أنه مفطر وهو صائم، ولم يدخل جوفه من الماء شيء.

وبعض السلف كان في بعض كلامه ينصح الناس بذلك؛ ابن مسعود كان يقول: «إذا أصبح أحدكم صائمًا فليدهن وليلبس صالح ثيابه»، يعني لو صابح صايم ما تصبحش ماشي مطقطق رأسك وبتجر رجلك عشان اللي يشوفك يعرف أنك صايم، لأ، فكانوا يصبحون فيهم نشاط، ويبالغون في إظهار النشاط، يدعي أن يدهن شعره كده ويفوق عشان اللي يشوفه ما يعرفش أنه صايم. يا جماعة مهم جدًا المعنى ده، معنى أن يكون بينك وبين ربنا خبء، كان بعض السلف يقول: "إذا استطعت أن يكون بينك وبين الله خبء فافعل"، لأن هو ده اللي هينجيك يا جماعة، العبادة لما تظهر للناس، إحنا قلوبنا أضعف من أنها تتحمل، مش هقول ثناء الناس حتى نظرة إعجاب في أعين الناس لك، ربما أضعف من أنها تتحمل ده، أنك تشوف الناس معجبة بك، وأنك تشوف الناس بتشاور عليك.

شوف ابن مسعود رضي الله عنه وهو من أطهر الناس قلوبًا، ده صحابي جليل، كان يخرج من بيته فالناس تتبعه، التابعين شايفين صحابي فيتبعونه، فيلتفت إليهم ابن مسعود ويقول: «هل لكم حاجة؟» عاوزين مني حاجة؟ يقولون له، فيقول: «إذًا ارجعوا فإنها ذلة للتابع، فتنة للمتبوع، فتنة لي». أنتم بتتابعوني ليه؟ اللي عاوز حاجة يقول لي، واللي مش عاوز يرجع، امشوا. فإنها ذلة للتابع، أنتم زالين نفسكم ليه؟ مش دي قضيتنا، لكن الكلمة التانية بقى "فتنة للمتبوع"، بتفتنوني ليه في ديني؟ وده معنى مهم يا جماعة، إحنا طبعًا في دروسنا بنحاول نتطرق لكذا معنى، معنى أنك ما تفرحش بالاتباع، وما تفرحش بالناس اللي بتشاور عليك، وخصوصًا في البلاء اللي إحنا عايشين فيه؛ السوشيال ميديا والفيسبوك واللايك والرياكشن والحاجات اللطيفة دي، دي بتموت، دي بتهلك.

النبي عليه الصلاة والسلام لما مدح أحدهم صاحبه يومًا، قال إيه؟ «قطعت عنق صاحبك». واحد بيمدح واحد بيقول له "ده أنت ما شاء الله ده أنت اللي فيهم"، قال النبي صلى الله عليه وسلم: «قطعت عنق صاحبك»، ليه؟ بعد ما حتى الواحد كان بيجاهد نفسه عشان يبقى مخلص ويدفع عن نفسه الرياء، يجيء واحد يقعد يمدح فيه، خلاص يميل بقلبه للدنيا ولحب الناس وللثناء وللشهرة والأضواء، يضيع ويدخل بقى في حديث «وقد قيل»، اللي اتكلمنا فيه قبل كده.

طيب، المعنى التاني بقى -إحنا قلنا في القصة بتاعة ابن مسعود دي معنيين- المعنى الأول أن أنت ما تفرحش بالحاجات، تاني حاجة ما تعينش الشيطان على أخيك؛ ما تقعدش تشوف واحد تقعد تمدح فيه وتقعد مش عارف إيه، لأ خالص، حتى لو من باب إظهار الفضل، جزاك الله خيرًا وكذا وخلاص.

نرجع تاني، يبقى العبادة في زمان الغفلة أخفى من العبادة في غيرها، وده أصلح لك؛ شوفوا ربنا يا جماعة بيقول إيه في القرآن: ﴿إِن تُبْدُوا الصَّدَقَاتِ فَنِعِمَّا هِيَ ۖ وَإِن تُخْفُوهَا وَتُؤْتُوهَا الْفُقَرَاءَ فَهُوَ خَيْرٌ لَّكُمْ﴾ [البقرة: 271]. ربنا قال كده، ما قالش "لهم"، ربنا سبحانه وتعالى قال: ﴿فَهُوَ خَيْرٌ لَّكُمْ﴾، ما قالش "لهم" ليه؟ الفقير ربما كان الخير له أن الصدقة تظهر فيتأسي غيرك بك فيتصدق؛ فالفقير بدل ما كان يأخذ صدقة من واحد يأخذ من اثنين وثلاثة وأربعة مش كده؟ يعني ربما كان الفقير الأصلح له أن الصدقة تظهر، لكن الأصلح لك أنت: ﴿إِن تُبْدُوا الصَّدَقَاتِ فَنِعِمَّا هِيَ﴾ هتبدي الصدقات جميل فنعم ما هي، ﴿وَإِن تُخْفُوهَا وَتُؤْتُوهَا الْفُقَرَاءَ فَهُوَ خَيْرٌ لَّكُمْ﴾ لكم أنتم أيها المتصدقون، ليه؟ لأنه أقرب للإخلاص وأدفع للرياء. ولذلك مهم جدًا أنك تحرص على عبادة مخفية ما حدش يعرف عنها حاجة.

بعض السلف كان له كلام يبالغ جدًا، يقول: "وددت أن لي عبادة لا يعلم بها الملكان"، تخيلوا! أنا نفسي أعبد ربنا عبادة كده بيني وبينه، الملكين ما يعرفوهاش أصلاً. وكان بعضهم يقول: كانوا يخفون عباداتهم كما تخفي الحائض حيضتها، يعني يبالغوا في ستر العبادة، مش عايزين حد يعرف عنا حاجة. وبعضهم روي عنه أنه كانت تخنقه العبرة وهو قاعد كده يتفكر في الموت، يتفكر في أحواله، فيعيط، يقول: "ما أشد الزكام". طبعًا هو ما بيكذبش، يعني ما يقولش "أنا عندي زكام"، لأ، يقول كلمة كده اللي قدامه يفهم منها أنه عنده زكام، وهو ما عنده زكام ولا حاجة، هو عينيه سبقته عيط، وهو قاعد لما تذكر الموت وتذكر أحواله السيئة، فكان يعيط فيخفي ويقول: ما أشد الزكام! وهكذا، يبقى لازم يا جماعة نحاول نخفي العبادة.

يبقى شعبان العبادة فيه أخفى، هو زمان غفلة فالعبادة أخفى، فلما كانت العبادة أخفى كانت أقرب للإخلاص وأبعد عن الرياء، فلما كانت كذلك كانت تشق على النفس؛ العبادة لو ما فيش حظ للدنيا فيها هتلاقيها شديدة على نفسك شوية. ليه؟ إحنا دلوقت مش بنقول أن واحد مرائي لأ، خلي بالك مش بنقول لواحد مرائي لأ، واحد عاوز ربنا، حتى اللي عاوز ربنا ده لما بيلاقي نفسه بيعبد ربنا وسط مجموعة الدنيا بتبقى أسهل، صح ولا لا يا جماعة؟ شوفوا حالكم كده في رمضان في الصلاة وفي الصوم، وشوفوا حالكم بعد رمضان، عشان تفهموا اللي أنا عايز أقوله؛ يبقى إحنا مش هنقول أن أنت مرائي فلما الناس بتشوفك بتنشط، لأ، أنت راجل مخلص وبتحاول تجاهد نفسك أنك تكون مخلص. طب إيه ليه ده بيحصل؟ عشان النفس يا جماعة، ربنا سبحانه وتعالى جبل أنفسنا على معنى هنسميه "أنك تتسلى بغيرك"، تتسلى يعني أقعد أتريق عليه لأ، تتسلى.

لما تشوف غيرك بيشاركك في حاجة، الموضوع ده بيخفف عليك الحاجة دي، ودي اسمها تتسلى بغيرك. ولذلك التسلي بالغير في العبادة يخفف العبادة، والتسلي بالغير حتى في البلاء والعذاب يخفف البلاء والعذاب. وفي المثل الشعبي عندنا: اللي يشوف بلاوي الناس تهون عليه بلوته. لما تلاقي الناس كلها مبتلاة، بتخف الدنيا عليك، هو إيه اللي حصل جواك؟ ابتدى يتسلى بغيره. النفس تتسلى بالغير سواء في العبادة أو في العذاب، ولذلك تجدوا في القرآن ربنا سبحانه وتعالى أشار إلى هذا المعنى، أن النفس تتسلى بالغير في العذاب والبلاء.

الله سبحانه وتعالى عن عذاب أهل النار قال: ﴿لَهُمْ فِيهَا زَفِيرٌ وَهُمْ فِيهَا لَا يَسْمَعُونَ﴾ [الأنبياء: 100]. هو ده عذاب؟ ما بيسمعوا زي ما بيسمعوش، يعني إيه العذاب في كده؟ قال أهل التفسير: أي لا يسمع بعضهم صراخ بعض، فيخيل لكل واحد منهم أنه يعذب وحده. يلا شوفوا يا جماعة حتى التسلي حرمه أهل النار، ﴿وَهُمْ فِيهَا لَا يَسْمَعُونَ﴾، لا يسمعوا بعضهم صراخ بعض حتى يظن أو يخيل لكل واحد منهم أنه إنما يعذب وحده. فحتى دي حرمها أهل النار.

والخنساء لما مات صخر أخوها وكانت بتحبه جداً، قالت: ولولا كثرة الباكين حولي على إخوانهم لقتلت نفسي وما يبكون مثل أخي ولكن أعزي النفس منهم بالتسلي. أهو، لولا إني ببص حواليا ألاقي ناس كتير ميت لها ناس، كان زماني قتلت نفسي، وما يبكون مثل أخي ولكن أعزي النفس منهم بالتسلي. يعني هو صحيح أخواتهم مش زي أخويا أو قرايبهم مش زي أخويا، لكن أهو بشوف اللي حواليا وبتسلى بهم. وكذلك في العبادة، النفس بتتسلى بغيرها يشاركها العبادة.

لذلك يا جماعة النبي عليه الصلاة والسلام قال إيه للصحابة لما ذكر أقواماً يأتون في آخر الزمان؟ قال للعامل منهم: «أجر خمسين منكم». يعني هيجي ناس في آخر الزمان هيعبدوا ربنا سبحانه وتعالى، اللي هيعبد ربنا فيهم هياخد أجر خمسين منكم يا صحابة. ليه؟ عشان المعنى ده؛ قال: «إنكم تجدون على الخير أعواناً وهم لا يجدون على الخير أعواناً». هتلاقوا ناس بتعينكم على الطاعة، فهتتسلوا بهم أو هينشطوكم للعبادة، وهم مش هيلاقوا ده.

يبقى العبادة في شعبان؛ شعبان زمان غفلة، فالعبادة فيه عبادة في زمان الغفلة، وقلنا لك دي قاعدة اطلع بها من الدرس بتاع النهاردة، ونقدر نخليها القاعدة بتاعة الدرس: اغتنام أوقات الغفلة. طيب ليه؟ علشان هي أخفى، فهي أقرب للإخلاص وأبعد عن الرياء. ولما كانت أخفى كانت أشق على النفس، ولما كانت أشق على النفس كانت أثوب، قال صلى الله عليه وسلم: «يا عائشة أجرك على قدر نصبك». يعني كل ما هتبقى العبادة فيها تعب أزيد ومشقة أكثر، أجرك أكبر بإذن الله. العبادة في زمان الغفلة أشق على النفس فهي أثوب.

ولذلك، أول حديث يدل على ده الحديث اللي لسه ذاكرينه من شوية: «للعامل منهم أجر خمسين منكم». ليه؟ عشان بيعبدوا ربنا في زمن غفلة، يعبدوا ربنا بنوع مشقة، «إنكم تجدون على الخير أعواناً وهم لا يجدون على الخير أعواناً»، وحديث عائشة: «أجرك على قدر نصبك».

واسمع بقى الحديث العجيب ده، حديث النبي عليه الصلاة والسلام، كلنا عاوزين نخرج حافظين الذكر ده النهاردة، النبي عليه الصلاة والسلام بيقول: «من دخل السوق فقال: أشهد أن لا إله إلا الله وحده لا شريك له، له الملك وله الحمد، يحيي ويميت وهو حي لا يموت، بيده الخير وهو على كل شيء قدير، كتب الله له ألف ألف حسنة، ومحا عنه ألف ألف سيئة، ورفع له ألف ألف درجة». كل الثواب ده مش هتاخده لو قلت الذكر ده إلا لو قلته في السوق. ليه؟ لأنه مكان غفلة، كل الناس مشغولة بالدنيا وبالتجارة وبتحصيل الأموال، وده راجل قلبه معلق بالله سبحانه وتعالى، ده زمان غفلة، فعبد ربنا في زمن غفلة، فكان الثواب عظيماً جداً.

خلي بالكم احنا كل ده بنتكلم في شعبان، يعني اللي يعبد ربنا في شعبان يا زمن غفلة! دي أول علة النبي قالها: «ذلك شهر يغفل الناس عنه بين رجب ورمضان». فكأن النبي منتبه للمعنى ده، معنى إحياء زمان الغفلة. وهوريكم دلوقتي النبي منتبه للمعنى ده جداً، منتبه أنه يحيي أزمنة الغفلة. هو ده شعبان، طيب إيه تاني؟ صلاة العشاء، النبي عليه الصلاة والسلام كان يؤخرها لغاية نص الليل، لدرجة أن تخفق رؤوس الصحابة وهم قاعدين. وبعدين خرج عليه الصلاة والسلام، أول كلمة يقولها لهم: «أبشروا، فإنه لا أحد ينتظر الصلاة على وجه الأرض غيركم». فالنبي مركز في الحتة دي عليه الصلاة والسلام أنه يحيي أزمنة الغفلة.

ولعل من هذا إحياء ليلتي العيدين على ما فيها من خلاف في تصحيح أو تضعيف الحديث، لكن على كل حال إحنا اللي بنأخذ به أننا نعمل بالضعيف في فضائل الأعمال، لأن برضه ليالي العيد بتبقى ليالي غفلة.

نرجع تاني، العبادة في زمن الغفلة أثوب، يبقى أنت أما تعبد ربنا في شعبان عبادتك أثوب، قلنا للعامل منهم أجر خمسين منكم، وقلنا حديث ذكر السوق. وشوفوا الحديث ده كمان، حديث جميل جداً، النبي صلى الله عليه وسلم ذكر ثلاثة يحبهم الله عز وجل، شوفوا يا جماعة الثواب، لما أقول لك ربنا بيحبهم دي حاجة عالية أوي، ربنا هيحبك لو عملت حاجة من الثلاثة دول. إيه هم الثلاثة؟

أول واحد: قوم ساروا ليلتهم، حتى إذا كان النوم أحب إليهم مما يعدل به، قام أحدهم يتملقني ويتلو آياتي. ناس يا جماعة مسافرين بالليل، حتى إذا كان النوم أحب إليهم مما يعدل به، يعني لو جيت قلت لواحد: إيه رأيك ما تنمش وأديك مليون جنيه، يقول لك: لا، هنام. قام أحدهم يتملقني ويتلو آياتي. كم واحد فيهم في الوقت ده؟ وقت الغفلة بقى، كله نام وهو قام، فكان ثوابه أنه ربنا حبه لأنه عبد ربنا في زمان غفلة.

الثاني: ورجل سأل قوماً مسألة، فلم يعطوه، فتخلف أحدهم سراً فأعطاه. شوفوا يا جماعة الثواب، أحبه الله، هنا عبد ربنا في زمان غفل فيه الناس، لأنك لما تشوف كل اللي حواليك ما بيديش، أنت نفسك بتقول: ما أنا كمان ما تجيش. إنما لما تبقوا عشرة خمسة عشر واحداً وكلهم يقولوا له: ربنا يسهل لك، ونفسك بتحب الفلوس، فواحد منهم تخلف سراً فأعطاه، ثوابه أحبه الله.

الثالث: سرية قوم كانوا في سرية فانهزموا وفروا، فقام أحدهم فقاتل حتى قتل. يبقى عبد ربنا بعبادة من أجل العبادات وهي الجهاد، في زمان غفلة، كله فر وهو ثبت لوحده، فأحبه الله. لو ركزت في الثلاثة؛ إيه المعنى الجامع بينهم؟ أن الثلاثة عبدوا ربنا في زمان غفلة؛ الأول في زمان غفلة الرفقة عن القيام، والثاني في زمان غفلة الرفقة عن النفقة، والثالث في زمان غفلة الرفقة عن الجهاد.

جواب عظيم جداً، سبعة يظلهم الله في ظله يوم لا ظل إلا ظله، منهم اثنين فيهم المعنى ده، رجل ذكر الله خالياً ففاضت عيناه، ورجل تصدق بصدقة فأخفاها حتى لا تعلم شماله ما تنفق يمينه. بصوا يا جماعة ثواب العبادة المخفية. يبقى ده أول معنى في العبادة في زمن الغفلة أنها أخفى فكانت أقرب للإخلاص وأبعد عن الرياء، فكانت أشق فكانت أثوب. معنى تاني مهم جداً وركزوا فيه بقى، أن أهل الديانة وأهل التقوى وأهل الإيمان في زمان الغفلة يدفع بهم البلاء عن أهل الأرض.

أيها الإخوة، احسب أن كل من جاء إلى هذا الدرس وفتح "الزوم" وقعد يتفرج، وبالذات لو على الشرط الذي اتفقنا عليه، وهو أنك قاعد مركز في الدرس ولست فاتحاً للزوم وقاعد تمارس حياتك عادي؛ سواء من كانت في المطبخ أو من كان يتصفح "فيسبوك"، لا، بل أنت رجل قاعد مركز في الدرس، فأحسب أنك شخص يريد الدين، شخص ترك كل شيء واقتطع وقتاً من عمره لربنا سبحانه وتعالى.

إذا كنت واحداً ممن أكلمهم الآن، فاستمع للكلام القادم، لأن هذا الكلام لا يصلح أن نتكلم به أي أحد. له معنى يجب على أهل الإيمان أن يفهموه ويتفطنوا له جيداً؛ عندما تجدون الناس في غفلة، والناس تعصي ربنا، يجب أن تخافوا وتترعبوا وتجروا إلى ربنا سبحانه وتعالى في هذا الوقت. وعشان كذا كنت عملت فيديو صغيراً عن ليلة رأس السنة الميلادية، وقلت لكم قوموا الليل وصوموا النهار وادعوا ربنا، وأنا عارف أن في بعض أهل العلم يقولون "بدعة"، وأنا عارف هذا كله، لكنني أميل إلى القول الآخر: أن هذا زمان غفلة، ويجب أن نعمره بالطاعة؛ لماذا؟ من أجل هذا المعنى، معنى أن ربنا سبحانه وتعالى يدفع عن أهل العصيان بأهل الإيمان.

هذا المعنى ذكره ربنا سبحانه وتعالى في القرآن، قال الله عز وجل: ﴿وَلَوْلَا دَفْعُ اللَّهِ النَّاسَ بَعْضَهُم بِبَعْضٍ لَّفَسَدَتِ الْأَرْضُ﴾ [البقرة: 251]، وفي أحد تفاسير هذه الآية: "ولولا دفع الله الناس بعضهم ببعض" يعني لولا دفع الله عن أهل العصيان بأهل الإيمان لفسدت الأرض، كان زمان الأرض انتهت من زمان، لكن ربنا يدفع عن أهل العصيان بأهل الإيمان. وقال الله عز وجل للنبي صلى الله عليه وسلم: ﴿وَمَا كَانَ اللَّهُ لِيُعَذِّبَهُمْ وَأَنتَ فِيهِمْ﴾ [الأنفال: 33]، وجودك أمان، ربنا مش هينزل العذاب وأنت موجود يا محمد عليه الصلاة والسلام.

طيب هل هو النبي فقط؟ لا، وأهل الإيمان أيضاً؛ النبي يقول للصحابة: «أنا أمنة لأصحابي، فإذا ذهبت أتى أصحابي ما يوعدون، وأصحابي أمنة لأمتي، فإذا ذهب أصحابي أتى أمتي ما توعد». رأيتم يا جماعة معنى أن الرجل الصالح وجوده أمان للناس؟ أمان للناس، بالذات لو كثر أهل الصلاح. في حديث في مسند البزار من رواية أبي هريرة، أن النبي صلى الله عليه وسلم قال: «مهلاً عن الله، مهلاً، فلولا شيوخ ركع، وأطفال رضع، وبهائم رتع، لصب عليكم العذاب صباً».

فلولا ماذا؟ شيوخ ركع، وأطفال رضع ليس لهم ذنب، وبهائم رتع، بهائم لم تفعل شيئاً؛ يا له من رجل يرحم لأجل بهيمة، البهيمة عند ربنا أحسن منه! لولا هؤلاء كان ماذا حصل؟ لصب عليكم العذاب صباً. يبقى لولا الشيوخ الذين يركعون، الناس الذين يعبدون ربنا والناس غافلة، كان زمان العذاب نزل. وفي حديث إلهي، وهذا أسرح دليل على المعنى الذي نقوله، قال الله عز وجل في الحديث القدسي: «إني لأهم بأهل الأرض عذاباً، فأنظر إلى عمار بيوتي والمستغفرين بالأسحار، فأصرف عنهم العذاب».

إذاً هذا معنى مهم. يا حضرتك عندما أقول حضرتك أقصدك أنت، يا من تركت الدنيا وجئت لتحضر الدرس، وهذا دليل على أنك تريد ربنا وتريد الآخرة؛ حضرتك عليك مهمة، ليس فقط لنفسك، لا، بل حضرتك عليك مهمة على كتافك تجاه الأمة، تجاه الكوكب الذي أنت عليه؛ رأيتم الكلام الكبير؟ أنت عليك مهمة للكوكب الذي أنت تعيش عليه هذا. ما هي مهمتك؟ أول ما تلاقي الناس في غفلات، لو تذكرتم يا جماعة -أو من رأى الفيديو بتاع ليلة رأس السنة- قلت لكم أنا لا أعلم ليلة في السنة أكثر من هذه الليلة فجوراً ومجاهرة بعصيان الله عز وجل على الكوكب، وهذا معنى لو تخيلته مرعب، مرعب.

أنتم عارفين يا جماعة، ممكن كل بلد من البلدان أو كل أمة من الأمم وكل ملة من الملل لها عيد تخرب الدنيا فيه، للأسف حتى أعيادنا نحن التي من المفروض أنها أعياد دينية، تعال وانظر للوقفة، كيف عاملة؟ الذي في الشوارع، سيبك من الذي تراه في الشوارع من بهدلة ومصخرة، لا، روح للناس التي تشرب والناس التي... الله يعافينا. كل أمة من الأمم لها عيد تخرب الدنيا فيه، لكن شوفوا المعنى المرعب الثاني، وهو أن ليلة رأس السنة الميلادية هذه الكوكب كله يخرب الدنيا فيها، معنى مرعب لو تخيلتم أن أعظم ليلة يعصى الله عز وجل فيها ليلة رأس السنة.

ولذلك أنا قلت ساعتها، ما ينفعش تعدي كذا، ما ينفعش حضرتك تكون نائماً، لن أقول لك ما ينفعش تعصي، لا، ما ينفعش تكون قاعد مرتاح، يجب أن تكون قلقاً، ربنا سبحانه وتعالى ممكن ينظر في هذه الليلة لأهل الأرض فتنزل الكلمة منه لإهلاك الناس هذه خلاص. وكذلك أزمنة الغفلة، أي زمان غفلة تترعب، أول ما تحس أن هذا زمان غفلة، الناس غافلة فيه، مش هقول كمان بيعصوا، غفلة عن عبادة ربنا سبحانه وتعالى، أنت على طول تنط، تقوم: سأصلي، سأصوم، سأقرأ قرآناً، لماذا؟ «إني لأهم بأهل الأرض عذاباً، فأنظر إلى عمار بيوتي والمستغفرين بالأسحار، فأصرف عنهم العذاب».

ولذلك النبي صلى الله عليه وسلم قال: «عبادة في الهرج كهجرة إليّ»، أو «عبادة في الفتنة كهجرة إليّ»، يبقى هذا معنى ثانٍ في إعمار أزمنة الغفلة، أن ربنا سبحانه وتعالى يدفع العذاب عن أهل الأرض يا أهل الإيمان، لولا الذين لهم ورد يصلون، وآخرون لهم سرد يصومون، لدكدكت أرضكم من تحتكم سحراً، لأنكم قوم سوء لا تطيعونه.

طيب، المعنى الثاني الذي النبي صلى الله عليه وسلم ذكره في شعبان، بأول معنى أن شعبان زمان غفلة، يبقى حضرتك لازم تكثر من العبادة في شعبان، العبادة سنعرفها إن شاء الله، لكن في معنى ثانٍ النبي ذكره، قال: «ذلك شهر يغفل الناس عنه بين رجب ورمضان، فيه ترفع الأعمال إلى الله تعالى، وأحب أن يرفع عملي وأنا صائم». هذا معنى في غاية الأهمية يا جماعة، معناه ماذا؟ بلاويك بتاعة السنة كلها تترفع لربنا وتتعرض عليه في هذا الشهر. فأنا سأضرب لكم مثالاً لتفهموا هذا المعنى أو تقربوا الأذهان لمن يسمع:

تخيل حضرتك في يد ملك من الملوك، وبعدين الملك هذا المخابرات العامة الخاصة به أو أمن الدولة جايبين له تقريراً عن حضرتك، وأنت واقف قدامه، قدام الملك هذا، وماسك هو التقرير بتاعك ويقرأ فيه، يقرأ بلاوي عنك الآن: في اليوم الفلاني عملت كذا، واليوم الفلاني عملت كذا، وبعدين يبص في التقرير هذا ويروح باصص لك، يلتفت إليك، فحين التفاتته يرى منك وجلاً وخوفاً وانكساراً وذلاً وعيناً باكية وندماً على ما فعلت. تخيلوا السيناريو هذا أو المشهد هذا. مشهد ثانٍ: وهو يقرأ كده، وحين التفاتته إليك يراك لا تعبأ به، وعمال تصفر وتغني وتنظر في السقف وتهرش في دماغك، ما رأيكم؟ فهمتم؟ ولله المثل الأعلى، هو هذا الذي النبي يريد أن يقوله يا جماعة، أنا لا أحكي حواديت، هذا الذي النبي بالضبط يريد أن يقوله عليه الصلاة والسلام.

قال: «فيه ترفع الأعمال إلى الله، وأحب أن يرفع عملي وأنا صائم». هذا ربنا يرى عملي الآن، فلما ربنا... خلوا بالكم، النبي صلى الله عليه وسلم الذي هو أكثر الناس عبادة وأكثر الناس إخلاصاً وأكثر الناس... هو أكثر الناس كل حاجة، ومع ذلك يقول الكلام هذا، تخيل بقى حضرتك ببلاويك بصحائفك السود، كل هذا يدار على ربنا، فربنا يرى منك وقت العرض ذلاً وانكساراً وصوماً وإخباتاً تتقرب به إليه سبحانه وتعالى.

ما رأيكم؟ شهر شعبان هو شهر رفع الأعمال السنوي. خلوا بالكم يا جماعة نحن عندنا أعمال ترفع، نحن عندنا كذا عرض: عرض يومي، وعرض أسبوعي، وعرض سنوي، الذي هم بتوع المحاسبة يسمونه "الحساب الختامي"، عارفين الحساب الختامي؟ آه، هذا الحساب الختامي. وعلى فكرة أنا عارف الأحاديث هكذا تحس أن شهر شعبان كأنه نهاية السنة وأول... تحس فيه خصيصة كده، شعبان ترفع فيه الأعمال وتعرض على ربنا، وتحس كأنه كما أقول لك حساب ختامي، السنة خلصت.

وبعدين في معنى ثانٍ سنتكلم عنه في ليلة النصف من شعبان إن شاء الله الأسبوع الجاي، أن فيه تنسخ الآجال، الآجال يعني الناس التي ستموت السنة القادمة كلها، ربنا يعطي كتاباً للملائكة، هذه أسماء الناس التي ستموت السنة القادمة هذه، وكأن شهر شعبان نهاية حاجة وبداية حاجة، تحسوه هكذا. طيب نرجع للمعنى، سيبكم من نسخ الآجال سنتكلم عنه إن شاء الله كمان مرتين كده، عندنا الأعمال فيها عرض يومي، وفي اليوم تعرض الأعمال، ترفع مرتين في اليوم، وعرض أسبوعي في يومين في الأسبوع، وعرض سنوي، أو رفع الأعمال السنوي الذي هو في شعبان.

ما هو العرض اليومي؟ الذي هو الصبح وبالليل، يتعاقبون فيكم ملائكة، الملائكة تنزل الصبح وملائكة تنزل بالليل، ورادي كده، ويجتمعون أين؟ في صلاة الفجر والعصر، تجتمع الملائكة؛ يعني تسليم الوردية. يبقى ملائكة تنزل الصبح وملائكة تنزل بالليل، يجتمعون، الاجتماع بتاعهم ماذا؟ تسليم الوردية، تسليم وتسلم يحصل في صلاة الفجر وصلاة العصر. يجتمعون ويسألهم الله عز وجل: كيف وجدتم عبادي؟ يقولون: أتيناهم وهم يصلون وتركناهم وهم يصلون.

بالله عليك يا من تنام عن صلاة الفجر، ماذا قال ربنا في القرآن؟ ﴿إِنَّ قُرْآنَ الْفَجْرِ كَانَ مَشْهُودًا﴾ [الإسراء: 78]. عارفين يعني إيه مشهود؟ قالوا تشهده ملائكة الليل والنهار، هؤلاء هم الوردية الذين يجتمعون في صلاة الفجر، وقرآن الفجر مشهود، لماذا سمي مشهوداً؟ أن قرآن الفجر كان مشهوداً، تشهده ملائكة الليل والنهار، الورديتان يحضرون قرآن الفجر. حضرتك أين؟ حضرتك نائم، حضرتك في دنيا ثانية، فيبقى فيه ملائكة تحضر وتأخذ أعمالك ترفعها، والثانيون وهكذا، ليل نهار شغالة الحكاية هذه. "كيف وجدتم عبادي؟ أتيناهم وهم يصلون وتركناهم وهم يصلون"، يبقى هذا العرض اليومي.

عندك عرض أسبوعي، الذي هو يوم الاثنين والخميس، عرض أسبوعي، الذي هو الاثنين والخميس، فبرضه فيه حديث أن فيه ترفع الأعمال إلى الله عز وجل، والنبي كان يصوم الاثنين والخميس وذكر أن علة الصوم هكذا برضه، ولما سئل لماذا تصوم الاثنين والخميس؟ قال: «فيهما ترفع الأعمال إلى الله، وأحب أن يرفع عملي وأنا صائم»، نفس المعنى الذي في شعبان يا جماعة، نفس المعنى! يبقى العرض الأسبوعي وهي تحصل حضرتك صائم، العرض السنوي وهي تحصل حضرتك صائم.

العرض اليومي وهي تحصل حضرتك بعد الفجر تقعد تقول أذكار وقاعد للشروق، شوفوا يا جماعة معاني ثانية للعبادة، جلسة الشروق هذه لها معنى ثانٍ خالص، معنى ماذا؟ أن العمل وهو يرفع أنت تفعل ماذا في هذا الوقت؟ قاعد تذكر، طيب بعد العصر أذكار المساء، تكلمنا عن قاعدة من قواعد السير إلى الله عز وجل: «استعينوا بالغدوة والروحة وشيء من الدلجة». وقلنا الغدوة أول النهار، الروحة آخر النهار، هم هذان الوقتان، عرفتم لماذا الوقتان هؤلاء يا جماعة؟ بصوا الدين كله مربوط ببعضه، الغدوة أول النهار، الروحة آخر النهار، هذا حديث النبي عليه الصلاة والسلام، استعينوا، ودي كانت قاعدة معنا، استعينوا بالغدوة أول النهار والروحة، يعني أوعوا تفوتوا الوقتين هؤلاء، وشيء من الدلجة يعني بالليل.

طيب اشمعنى الوقتين هؤلاء؟ لأن المعنى منها هذا، وقت العرض، فربنا يبص يلاقيك قاعد في المسجد قعدة الشروق، ربنا يبص يلاقيك تقول أذكار المساء بعد صلاة العصر، واضح؟ يأتي ليبص عليك الاثنين وأعمالك وبلاويك تعرض عليه، بلاوي الأسبوع فيلاقيك صائم، الخميس يلاقيك صائم. كان بعض السلف إذا أتى يوم الخميس بكى إلى زوجته وبكت إليه، يقعد يعيط ويقول: الآن يعرض عملي على الله، هو معنى يا جماعة معنى فعلاً يأسر.

طيب جاء شعبان، بطائرة بلاوي السنوات بقى، أفكر في بلاوي السنة، متخيل أن ربنا سبحانه وتعالى خلاص بقى يعرض عليه الكلام هذا بتاعك، فينظر إليك سبحانه وتعالى فيجد منك الصوم والإخبات والخضوع والذل والانكسار والخوف سبحانه وتعالى والرجاء والطمع في رحمته وكرمه وعفوه، يجد منك هذا، ما رأيكم؟ ولا يلاقيك بقى زي صاحبنا الذي كان يبص في السقف ويهرش في دماغه وفاتح الفيسبوك وقاعد على الواتساب ولا في دماغه، فهمتم يا جماعة؟ يبقى ذلك شهر بين رجب ورمضان يغفل الناس عنه، فيه تعرض الأعمال على الله، وأحب أن يرفع عملي وأنا صائم.

يبقى احنا هنعمل ايه في شعبان؟ يبقى دول المعنيين اللي من أجلهم هنحتفي بشعبان. طيب إزاي نحتفي؟ هنصوم. أول حاجة وادينا عرفنا الصوم في شعبان، وهنتكلم عن الصوم في النصف التاني من شعبان، بس مش هينفع النهاردة عشان الوقت؛ لأن فيه أحكام فقهية في الحتة دي.

لكن هتكثر من الصيام في شعبان. تقدر تصوم شعبان كله صومه إلا يومين في الآخر كده، ولا حاجة، خلاص لا مش هقدر أصوم كله، تكثر من الصيام في شعبان. يبقى ده أول وظيفة من وظائف شعبان. الوظيفة التانية إن شعبان يا جماعة هو تمرين لرمضان، فتكثر من عبادات رمضان، اللي هي عبادات رمضان. تكثر من الصوم، يبقى بتتدرب لرمضان. قراءة القرآن: رمضان طبعًا دي خصيصة مع القرآن، فتكثر من القرآن في شعبان، وكانوا يسمون شعبان شهر القراء، شهر القراء، قراء القرآن. كان بعضهم إذا دخل شعبان أغلق حانوته وتفرغ للقرآن. يعني واحد تاجر عنده محل، يدخل شعبان يقفل الدكان ويقعد. خلاص، دخل شعبان؛ شعبان ورمضان إحنا قافلين، مغلق للتحسينات. تحسينات إيه؟ تحسينات القلب، وتحسينات النفس، وتحسينات كل حاجة، مش تحسينات المحل والتجارة والدنيا اللي هتروح.

لا، مغلق للتحسينات انتهت خلاص. يبقى تكثر من الغيان إيه؟ وأكثر من القرآن، يعني هات لك تلاتين ختمة في شعبان. كان له ستين ختمة في رمضان في غير الصلاة، ما تقولش بقى إزاي، دي بركة في الوقت وأنت نفسك بتحس بده. يعني تلاقي يوم تصحى كده تقول: اليوم معفرت، ويوم تاني تصحى تقول: هو اليوم مش راضي يخلص ليه؟ أنت بتحس بالبركة في الوقت؟ بنحسها، ودي مش حواديت قبل النوم. لأ، روينا عن ناس عايشة بينا أو كانت إلى قريب، الشيخ ابن قاعود مثلًا، روينا عنه إن هو كان له ستين ختمة في رمضان، يعني حتى من الناس المحدثين، آه كان فيه ناس بتعملها.

وفي ناس بقى من دلوقتي، شفنا اللي بيجيب ختمة في ركعة، شفناها، أنا مش بتكلم على ناس ما أعرفهاش، واحد بيقف يجيب ختمة في ركعة، الشيخ أسامة عبد العظيم حفظه الله، وهو راجل جاوز السبعين من عمره، كان آخر حاجة أعرفها عنه بيختم في التلات ليالي مرتين، تلات ليالي مرتين، يعني بيجيب الختمة في يوم ونص للناس اللي بتصلي وراه، خلاص آه، فيه ناس عايشة بينا في حتة تانية، خلوا بالكم. والناس دي أنا دائمًا أقول بالذات حد زي الشيخ أسامة حفظه الله، الناس دي أقامها الله عز وجل بين أظهرنا حجة علينا، عشان تيجي يوم القيامة تقول له يا رب الزمن والوقت، يقول لك كان فيه حد اسمه أسامة عبد العظيم معكم وبيعمل واحد اتنين تلاتة، يعني أحسبه كذلك طبعًا، أنا لا أزكي على الله أحدًا، لكن حجة لله عز وجل بين الشيخ أسامة عبد العظيم، الشيخ الدبيسي، الناس دي حجج لله عز وجل على أمثالنا.

آه شوفوا أسامة عبد العظيم مرة، واحد من إخواننا كان بيصلي وراه، وبعدين أبوه كان أظن ضابط جيش أو حاجة، وبعدين بيقول له يا ابني أنت بتصلي فين؟ قال له عند الشيخ الفلاني، طب ما أجي أصلي معك، راح، وبعدين فبيحكي بعدين بقى لشيخ تاني: دخلت أصلي إنه يركع أبدًا، والراجل بقى له هيبة وجيش، بيقول لدرجة قلت إيه طب هقعد، وبعدين قلت طب أنا لو فيه مجند واقف بيصلي وشافني قعدت، هو بيقول له بقيت أدعي ربنا الأرض تتشق وتبلعني. على كل حال كنا بنقول إيه بقى؟ أما بخرج كده بيبقى صعب أرجع تاني شوية، آه فإحنا نكثر من العبادة في شهر شعبان للمعاني دي.

وشهر القراء؛ فنكثر من قراءة القرآن، أكثر أكثر يعني خلاص ركز، اللي يقدر يقلل شوية من شغله يقلل، اللي يقدر يسيب الشغل، كان السلف بيعملوا كده؛ يحوشوا عشان يدخل شعبان ورمضان، دول مغلق للتحسينات انتهت. يبقى صيام، قراءة قرآن، صدقة، وكان بعض السلف يخرج زكاة ماله في شعبان؛ لأن طبعًا أنتم عارفين الصدقة من وظائف رمضان برضو، النبي صلى الله عليه وسلم كان أجود بالخير من الريح المرسلة وكان أجود ما يكون في رمضان. فدي من وظائف رمضان، فتستعد للوظيفة دي من شعبان إنك تكثر من الصدقة، حتى لو زكاة مال، وكان زي ما قلت لكم بعض السلف يخرج الزكاة مش في رمضان في شعبان، ليه؟ ليعين الفقراء على العبادة في رمضان، عشان يبقى الفقير قلبه خلاص، معي فلوسي اللي هتقضيني فأنا متفرغ لعبادة ربنا سبحانه وتعالى في رمضان، فدي من وظائف شعبان إنك تتصدق. ومن وظائف شعبان كذلك القيام، وهنتكلم على ليلة النصف من شعبان، الليلة دي بالذات لها خصيصة، هنبقى نتكلم عنها إن شاء الله، فتبقى برضو تبتدي تتدرب على القيام في شعبان، فدي الوظائف بتاعة شعبان. مش عاوزين نطول عن كده، خمسين دقيقة كفاية قوي، نشوف لو فيه أي أسئلة بقى، ممكن تقول لنا جدول شعبان؟ أنا جاوبت على ده، أهم ثواب شهر شعبان؟ أظن برضو جاوبت، ما فيش أسئلة تانية خلاص.

أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.