الشيخ أمجد سميرلله الحمد لله والصلاة والسلام على رسول الله وعلى آله وصحبه ومن والاه وأشهد أن لا إله إلا الله وحده لا شريك له وأشهد أن محمداً عبده ورسوله. اللهم صل على محمد النبي وأزواجه أمهات المؤمنين بيته كما صليت على آل إبراهيم إنك حميد مجيد. أما بعد.
الدرس ده تكملة لدرس قبل كده كنا ابتدينا نشرح حديث النعمان بن بشير: «إن الحلال بين وإن الحرام بين وبينهما أمور مشتبهات، من اتقى الشبهات فقد استبرأ لدينه وعرضه، ومن وقع في الشبهات وقع في الحرام، كالراعي يَرْعَى حول الحمى يوشك أن يرتع فيه. ألا وإن لكل ملك حمى، ألا وإن حمى الله محارمه، ألا وإن في الجسد مضغة». هنبتدي بقى الكلام من أول هنا: «ألا وإن في الجسد مضغة، إذا صلحت صلح الجسد كله، وإذا فسدت فسد الجسد كله، ألا وهي القلب».
أول حاجة يا جماعة عاوزين نقف معها علاقة آخر الحديث بأول الحديث. أول الحديث اتكلمنا فيه قبل كده، النبي صلى الله عليه وسلم يقول: «إن الحلال بين وإن الحرام بين وبينهما أمور مشتبهات». واتكلمنا إن الدين حلال وحرام وحاجات مشتبهة.
طيب إزاي آتي الحلال وإزاي أجتنب الحرام وإزاي أتورع عن المشتبهات؟ قلبك. النبي صلى الله عليه وسلم يختم الحديث: «ألا وإن في الجسد مضغة، إذا صلحت صلح الجسد كله، وإذا فسدت فسد الجسد كله، ألا وهي القلب».
والحديث ده يا جماعة يبين خطورة القلب جداً في الإسلام. قلبك هو محل نظر الرب سبحانه وتعالى؛ ربنا سبحانه وتعالى لا ينظر إلى جسمك ولم ينظر إلى شكلك حلو ولا وحش، ولا أبيض ولا أسمر.
ولا مفتول العضلات ولا بكرش، ربنا سبحانه وتعالى لا يعنيه كل ده: إن الله لا ينظر إلى صوركم ولا إلى أجسامكم، ولكن ينظر إلى قلوبكم وأعمالكم. فقلبك هو محل نظر الرب سبحانه وتعالى.
قبل ما ندخل في أهمية القلب يا جماعة، هتلاقوا حاجة غريبة جداً؛ ربنا سبحانه وتعالى ذكر في القرآن إن في قلب سليم وإن في قلب مريض. كلمة قلب سليم دي جَت في القرآن مرتين: ﴿وَلَا تُخْزِنِي يَوْمَ يُبْعَثُونَ * يَوْمَ لَا يَنفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ﴾ [الش الشعراء: 87-89]. فربنا ذكر إن في قلب سليم.
وذكر إن في قلب مريض في آيات كتير بقى في القرآن: ﴿فِي قُلُوبِهِم مَّرَضٌ فَزَادَهُمُ اللَّهُ مَرَضًا﴾ [البقرة: 10] مثلاً. آيات كتير قوي تذكر إن القلب ممكن يبقى مريض.
طيب؛ يعني ايه قلب سليم؟ ويعني ايه قلب مريض؟ قبل ما ندخل في أهمية قلبك أصلاً عشان نفهم الكلام ده؛ يعني ايه أي عضو فيك؟ يبقى أمتى تقول العضو ده سليم، وأمتى تقول العضو ده بقى عضو مريض؟
ببساطة يا جماعة، العضو اللي تختل فيه وظيفة من وظائفه يبقى عضو مريض. يعني لو العضو بتقدر به تعمل ما خُلِق من أجله، خلاص، ده عضو سليم. ابتدت وظائف هذا العضو تختل.
يبقى العضو ده فيه نوع مرض؛ المرض بقى مرض صغير، مرض كبير، مرض قليل، مرض شديد، على حسب الوظيفة اللي اختلت واختلت بمقدار قد ايه. واضح الكلام ده؟ زي إيدك.
طول ما أنت عارف تاخد وتدي وتشيل وتحط، خلاص، إيد سليمة. أول ما تلاقي وظيفة من دي ابتدت تختل وإيدك ترتعش، مش عارف تمسك حاجة، مش عارف تشيل، مش عارف تحط.
تبتدي تقلق تقول إيدي فيها إيه، وترروح لدكتور إيدي تعبانة مريضة. كذلك كل عضو في جسمك، كذلك القلب. القلب ربنا قال إن في قلب سليم وقال إن في قلب مريض. أمتى نقول القلب سليم؟ لو بيؤدي وظيفته اللي اتخلق عشانها.
وأمتى نقول إن القلب مريض؟ لو وظيفته أو وظيفة من الوظائف التي خُلِق من أجلها ابتدت تختل. هيجي السؤال على طول: طب إيه هي وظائف القلب أصلاً؟ تعالوا نقول إيه وظائف القلب؟ هو إيه القلب؟
ربنا يا جماعة ذكر القلب في القرآن كتير جداً؛ عشرات المرات ربنا يذكر القلب، والنبي عليه الصلاة والسلام يذكر القلب في السنة كتير، منها الحديث اللي معانا ده: ألا وإن في الجسد مضغة إلى آخره: ألا وهي القلب.
اللي هو إيه القلب ده؟ عمرك قعدت تفكر كده أنا بس عاوز أكرر وعشان إيه؛ احنا المرة دي اللايف مش على زوم، على الفيسبوك، فأرجوكم يعني الناس اللي بتابعني، هو الدرس ده مش درس ينفع على الفيسبوك خالص ولذلك أنا كنت بعمله على زوم، لكن عشان فيه مشكلة تقنية في زوم النهارده.
وعملته على الفيسبوك، أرجوكم افصلوا عن الفيسبوك ده خالص، يعني هتفتحوا الفيديو عشان تستفيد منه يا إما تترك الفيديو يا إما تترك الفيسبوك، إنما مش هينفع الاتنين مع بعض.
طيب إيه بقى وظيفة القلب أو وظائف القلب؟ الأول إيه هو القلب؟ إيه القلب اللي ربنا سبحانه وتعالى بيذكره في القرآن كتير قوي ده؟ وإيه القلب اللي النبي صلى الله عليه وسلم بيذكره في السنة كتير قوي ده؟
القلب ده اللي هو العضلة دي اللي في صدرك ناحية اليسار، دي اللي هي حتة اللحم الصنوبري دي اللي بيقولوا عليها، اللي هي القلب اللي كلنا عارفينه، يعني هو ده المقصود بالقلب؟
ما هو لو ده المقصود بالقلب يبقى وظيفة القلب إنه يضخ الدم، فطول ما بيضخ الدم يبقى قلبك زي الفل، وتبتدي تقلق لو حصل إيه؟ فيه بقى قصور في الشريان التاجي والكلام ده. لكن يا جماعة مش هو ده القلب اللي ربنا يقصده.
ولا القلب اللي النبي صلى الله عليه وسلم يقصده؛ لا لا في القرآن ولا في السنة، مش العضلة. أومال إيه القلب اللي ربنا يقصده أو النبي صلى الله عليه وسلم يقصده؟ القلب ده شيء لطيف. ولطيف يعني مش لطيف يعني ظريف وخفيف، لأ؛ لطيف يعني لا يُدرك بالحواس.
شيء لطيف، لكن له تعلق بقلبك اللي في صدرك ده لكن مش هو القلب، يعني مش هو العضلة، لكن له تعلق بالقلب ده. طب إيه الدليل إن له تعلق بالقلب ده؟
الدليل يا جماعة في القرآن: ﴿فَإِنَّهَا لَا تَعْمَى الْأَبْصَارُ وَلَكِن تَعْمَى الْقُلُوبُ الَّتِي فِي الصُّدُورِ﴾ [الحج: 46]. فده دليل إن القلب اللي ربنا يريده منك وبينظر إليه في صدرك برضه. والدليل من السنة حادثة شق صدر النبي عليه الصلاة والسلام.
لما النبي صلى الله عليه وسلم شُق صدره تلات مرات؛ مرة وهو صغير، يا إما وهو عنده سنتين وشهرين أو أربع سنين على خلاف بين أهل العلم. شُق صدره كان بيلعب مع الأطفال، والحادثة دي في صحيح مسلم.
كان بيلعب مع الأطفال، أتاه جبريل وشق صدره وطلع قلبه، اهو قلبه ده اللي هو احنا عارفينه، وطلع منه علقة، وقال: هذه حظ الشيطان منك، وغسل قلبه في طست فيه ماء زمزم.
وأعاده مكانه مرة أخرى. دي أول حادثة لشق صدره وفيها دليل على أن بقى إيه القلب اللي هو محل نظر الرب برضو له تعلق بقلبك. واضح؟ وشُق صدره مرة تانية عند البعث، واتشق صدره مرة تالتة.
في الإسراء والمعراج، خلاص. ويعني نظمها بعضهم وقال إيه: وشق صدر أكرم الأنام وهو ابن عامين وسدس عام (يعني وهو عنده سنتين وشهرين قلنا على خلاف)، وشُق للبعث وللإسراء أيضاً كما قد جاء في الأنباء.
فقلبك اللي ربنا بينظر إليه هو له تعلق بقلبك اللي في صدرك ده. طيب، يبقى فهمنا مش هو القلب ده اللي محل نظر الرب، طب قلبك بقى اللي هو اللي له تعلق ده، صحيح لكن مش هو العضلة، إيه وظيفته؟
وظيفة قلبك دي إنه يعرف ربنا سبحانه وتعالى، ويحب ربنا سبحانه وتعالى، ويخاف من ربنا، ويرجو ربنا، ويرغب في الآخرة، ويزهد في الدنيا. دي وظيفة قلبك، دي وظيفة قلبك.
هيبقى أمتى نقول قلبك سليم؟ لو عمل الوظائف دي؛ عرف ربنا، حبه ربنا، وحد ربنا، آمن بربنا، آمن بالجنة والنار، فرغب في الآخرة وعزف عن الدنيا. هي دي وظايف قلبك.
ألا؛ لو الوظائف دي بقدر تحققها في قلبك، يبقى قلبك سليم. وبقدر خلل هذه الوظائف أو وظيفة من الوظائف، يبقى قلبك مريض. فهمتم دي يا جماعة؟ عشان كده ربنا ذكر إن في قلب سليم وإن في قلب مريض.
طيب إيه بقى أهمية القلب ده؟ أهميته كبيرة جداً، منها مثلاً احفظوا بقى القاعدة دي، احنا سلسلة الدروس اللي احنا بنقدمها دلوقتي هي إيه؟ قواعد في طريقك إلى الله عز وجل، قواعد مش هينفع.
تبقى ماشي لربنا سبحانه وتعالى غير وأنت عارفها، ما ينفعش. فمن القواعد دي أن الطريق إلى الله عز وجل تُقطع بالقلوب لا بالأبدان. احفظوا القاعدة دي يا جماعة: الطريق إلى الله تُقطع بالقلوب لا بالأبدان. طب إيه الدليل على كده؟ مين قال ده؟ اللي قال ده يا جماعة ربنا سبحانه وتعالى، واللي قال ده النبي عليه الصلاة والسلام. النبي عليه الصلاة والسلام مثلاً.
شوفوا الحديث ده: مرة قال: «يتلو عليكم رجل من أهل الجنة»، هيطلع عليكم دلوقتي واحد من أهل الجنة. الصحابة قاعدين، طلع واحد من الأنصار وعدى الموقف. تاني يوم النبي صلى الله عليه وسلم قال: «يطلع عليكم رجل من أهل الجنة».
والصحابة قاعدين، طلع نفس الراجل. تالت يوم الصحابة قاعدين، فالنبي قال عليه الصلاة والسلام: «يطلع عليكم رجل من أهل الجنة»، فطلع نفس الراجل. لأ، مش هتعدي الحكاية دي؛ يقوم يجري وراه عبدالله بن عمرو بن العاص وراء هذا الرجل.
يعني إيه يختلق قصة كده إن بها يقول له أنا هقعد عندك تلات أيام؛ تلات ليالي، استضيفني عندك تلات ليالي. فرحب به الأنصاري، قال له تعال، ونام عنده تلات ليالٍ. شوفوا بقى كلام عمرو بن العاص يا جماعة.
قال: فلم أره يقوم من الليل. ما كانش بيقيم الليل أصلاً. قال غير أنه إذا تقلب من الليل (يعني لو اتقلب كده وصحي) يذكر الله إلى أن يطلع الفجر.
لكن ما بيقومش الليل، ما فيش عبادة يعني، لدرجة أن عبدالله بن عمرو بن العاص يعني كان خلاص قرب إنه يحتقر عبادة هذا الرجل. خلصوا تلات ليالي، راح رايح للراجل الأنصاري ده قال له الصراحة أنا إيه يعني الحكاية اللي قلتها دي كانت إيه، كنت اختلقتها؛ ما فيش القصة دي، بس حصل موقف غريب.
النبي صلى الله عليه وسلم قال عليك تلات مرات إنك رجل من أهل الجنة، فأنت بتعمل ايه؟ رجل عبادته قليلة وعادية يعني، يعني ما فيش عمل بدني، فأنت بتعمل إيه؟ قل لي بتعمل إيه؟ فماذا قال الرجل؟ قال.
قال هو ما رأيت، هو ده اللي أنا بعمله، غير أني لا أجد في نفسي لأحد من المسلمين غِشًّا، ولا أحسد أحداً على خير أعطاه الله إياه. يا جماعة، ركزوا هنا في حاجتين.
هو عبادتي زي ما أنت شفت، لا بقوم ليل ولا بعمل عبادة زيادة عنكم، لكن قلبي مختلف، قلبي مختلف؛ لا بغش ولا بحسد حد، فانا قلبي غير، قلبي مختلف. ده أول معنى أن القلب.
تاني حاجة يا جماعة حاجة غريبة جداً؛ الراجل ده هو سيبكم من عبادات البدن اللي هو كان مقل فيها، لكن حتى في القلب هو كان بعمل حاجة ركزوا، هو ما كانش بيعمل تاني، يعني ما تقدرش تقول إيه: الراجل ده كان مثلاً بيخبت، ينيب، يخشى؛ هو قطعا ده كله عنده المعاني دي عنده. لكن أرجى عمل أنه ما كانش بيعمله.
إنه ما بيحسدش، إنه ما بيغشش. فاهمين المعنى يا جماعة؟ فاهمين معنى العبادة ممكن تكون بالترك؟ يعني مش لازم مش لازم بنعمل، ده أنا ممكن أكون بعبد ربنا بأني ما بعملش حاجة تغضبه، ويبقى اسمها عبادة وتبقى من أهل الجنة بده. فهمتم دي؟
هو ما قالش أنا باخشع وده عمل قلبي، ما قالش أنا باخبت وده عمل قلبي، ما قالش أنا باحب ربنا وده عمل قلبي، وكل ده قطعاً عند هذا الرجل قطعا.
أنا مش بقول ده مش موجود، لكن أرجى عمل يرجوه كان إيه؟ كان إنه ما بيعملش، قال: لا بغش حد من المسلمين ولا بحسد حد على ما آتاه الله. شوفوا يا جماعة هنا وصل للجنة بأيه؟ بقلبه.
مش بأعماله البدنية. دلوقتي يا جماعة المعاني مش موجودة للأسف، المعاني مش موجودة؛ خصوصاً بقى في عصر السوشيال ميديا وعصر السرعة اللي احنا ما فيش حد مركز مع قلبه أصلاً.
أنا متأكد -أنا ليه ما بعملش الدروس دي على الفيسبوك؟- عشان متأكد دلوقتي إن جزء من اللي بيتابع هو حاططني في حتة في الإسكرين عنده وعمال على الفيسبوك، والدروس دي ما تنفعش لكده.
وأصلاً دين ربنا ما ينفعش كده، ما ينفعش. وربنا أغنى الشركاء عن الشرك؛ يعني حضرتك لو حطيت كلام ربنا في ركن في الشاشة عشان تذاكره لدنيا، ربنا هيقول لك روح مش عاوزك.
هو ده، هو ده يا جماعة، هو ده المعنى يا جماعة، هو ده المعنى. الله عز وجل عزيز، مش ما تفتكرش إنك هتزاحمه بدنياً وهيفضل، لأ؛ هو أغنى الشركاء عن الشرك.
وده معناه أنا مركز فيه جداً، عشان كده أنا ما بتواجدش في لايف على الفيسبوك إلا يعني لو في حادثة وعاوز أقول فيها كلمة ولا حاجة؛ الدروس على زوم. ليه؟ أنا اللي عاوز يلعب على على الوجين ده ما ينفعش مع ربنا، وما ينفعش في ديننا.
ما ينفعش نرجع تاني. الصحابي ده مركز قوي مع قلبه، ووصل للجنة بقلبه مش بأعماله. حديث النبي عليه الصلاة والسلام: «ما سبقكم أبو بكر بكثير صلاة ولا صيام، ولكن بشيء وقر ها هنا». أبو بكر ما كانش أكثر الصحابة، وإحنا هنعرف بعد شوية أن حتى الصحابة كلهم، كانت عبادة التابعين أكتر من عبادة الصحابة، هيجي معانا أثر ابن مسعود.
لكن خلينا في أبو بكر رضي الله عنه، ما كانش أكثر الصحابة صلاة ولا صيام، مع ذلك سبق بإيه؟ بشيء وقر ها هنا في القلب. آه، ابن مسعود بيكلم التابعين بيقول لهم إيه بقى؟ أنتم ركزوا يا جماعة، شوفوا الصحابة كسبوا بإيه. أنتم أكثر صلاة وأكثر صياما وأكثر جهادا من أصحاب محمد صلى الله عليه وسلم، وهم كانوا خيرا منكم. طب ليه كوسة يعني؟ لأ، فاستغربوا، طب بإيه؟ فقال رضي الله عنه: كانوا أزهد في الدنيا وأرغب في الآخرة. أزهد وأرغب، دي عمل إيه؟ قلب!
مش كثرة صلاة، مش كثرة صوم، مش كثرة جهاد، لكن هم أزهد في الدنيا وأرغب في الآخرة. قلوب مختلفة! قلوب مختلفة كسبوا وعدوا بها النبي عليه الصلاة والسلام. وده حديث بقى مرعب يا جماعة. حديث مرعب؛ بيقول النبي عليه الصلاة والسلام بيصف قوم هيجوا بعد كده، هم الخوارج، يعني هم فئة من الفئات الضالة، لكن شوفوا الوصف اللي النبي وصفه للصحابة.
قال صلى الله عليه وسلم لأصحابه يوما: «يخرج فيكم قوم تحقرون صلاتكم إلى صلاتهم». هتشوفوا ناس هيجوا هتحقروا صلاتكم لصلاتهم؛ يعني هتشوفوا الواحد منهم واقف بيصلي صلاة ما حدش فيكم بيصلي زيها، بيكلم الصحابة: «تحقرون صلاتكم إلى صلاتهم، وصيامكم إلى صيامهم، وتحقرون أعمالكم مع أعمالهم، يقرؤون القرآن»؛ ناس بتصلي بتصوم بتعمل الخير، حفظ القرآن. النبي قال إيه عليه الصلاة والسلام: «لا يجاوز حناجرهم». لا بيوصل للقلب ولا بيطلع للرب سبحانه وتعالى. إيه اللي مس قلبك؟ أصلا أنت مشغول بحتة قلبك دي! أنت مشغول بقلبك، أنت مهتم أنك عندك حاجة كده ربنا سبحانه وتعالى ينظر إليها.
الآية، يعني سؤال أسأله لنفسك: آخر مرة قرأت في المصحف فتأثر قلبك فبكت عينك، إمتى؟ ما هي مصيبة لو ده ما بيحصلش! مصيبة يا جماعة، عاوزين نفوق شوية من الغفلة اللي إحنا فيها دي. نفوق شوية من السوشيال ميديا اللي واخدانا. نفوق شوية من القيل والقال. فوق شوية من الدنيا، لازم تهتم بقلبك ﴿يَوْمَ لَا يَنفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ﴾ [الششعراء: 88-89]. لو قلبك مات وهو مش سليم أنت على خطر.
شيء في غاية الرعب! نرجع تاني للحديث: «يخرج فيكم أقوام تحقرون صلاتكم إلى صلاتهم، وصيامكم إلى صيامهم، وأعمالكم مع أعمالهم، يقرؤون القرآن» ها؟ «لا يجاوز حناجرهم». مالهم بقى؟ النبي عليه الصلاة والسلام يقول: «يمرِقون من الدين كما يمرُق السهم من الرمية». لأ، مش فاهمين، يعني إيه كما يمرق السهم من الرمية؟ هحكي لكم كده العرب زمان وأي حد بيصطاد يعني، بيعملوا إيه عشان تفهموا الحتة دي.
زمان العرب كانت تجيب السهم وتحطه في القوس وترمي الرمية أو الفريسة اللي بتجري، طيب، فلو الفريسة دي بعيدة، الأول إيه اللي بيحصل؟ حاجة من اتنين، يا السهم يقع قبل، أو حاجة من تلاتة: يا السهم يقع قبل الفريسة دي، يا السهم يدخل جوة الفريسة دي ويفضل فيها يستقر فيها، يا السهم يدخل جواها ويعدي الناحية التانية يعني يخرمها ويعدي منها، ماشي؟ وممكن حالة رابعة أن السهم يعدي لكن من جنبها والفريسة تجري.
طيب، فكان زمان لما يجي حد يصطاد يعمل إيه بقى؟ يرمي السهم كده، ولو الفريسة بالذات، لو الفريسة بعيد، فالسهم يجري وبعدين هو طبعا ما بيشوفش السهم من بعيد، هو رمى نشل على الفريسة ورمى، وبعدين الفريسة دي يا إما بتقع في مكانها يا إما بتجري، يقوم الراجل اللي بيصطاد ده يمشي يروح ناحية السهم يبص في الأرض، لو ما لقاش السهم يعرف أن السهم فين؟ في الفريسة، فيعرف أن الفريسة شوية وهتقع على الأرض، مش هتقدر تكمل، فيمشي يروح يتبع الفريسة عشان يشوفها ويجيبها، ده لو ما لقاش السهم، أو يلاقي السهم وهنا في حالة من احتمال من احتمالين عقليين: إما يكون السهم ده دخل في الفريسة وخرمها وخرج منها، أو السهم ما جابهاش أصلا.
صح، يعرف مين الراجل بقى؟ ما هو لو السهم دخل فيها وخرمها وخرج منها برضه الفريسة شوية وهتقع، فيمشي وراها عشان ياخدها، لو السهم ما جاش فيها أصلا خلاص، ما هو مش هيلحقها، هي فريسة يعني هتجري، يعرف منين؟ الراجل ده يبتدي يبص في السهم بتاعه لو لقى أثر دم، أثر حاجة من معدة الفريسة على السهم، يعرف أن السهم دخل في الفريسة، فيروح يشوفها هيبقى عارف أنه شوية وهلاقيها، أو يعني قريب هيلاقيها.
فالنبي بيقول عليه الصلاة والسلام: «يمرقون من الدين كما يمرق السهم من الرمية، فينظر الرامي» -ده حديث النبي عليه الصلاة والسلام- «إلى سهمه إلى نصله حتى يماري في فوقه» أو الفوقة في فوقته أو في فوقه يعني، أو كما قال صلى الله عليه وسلم. هي اسمها الفوقة، اللي هو إيه بقى؟ يبتدي الراجل يمسك السهم كده يبص على رأس السهم ما يلاقيش دم، وبعدين يبص على جسم السهم ما يلاقيش حاجة، وبعدين يبتدي يبص في الفوقة، اللي هي الحتة المتنية اللي بتحطها في القوس عشان ترمي منها، يبتدي يركز بقى هي فيها نقطة دم؟ هي طب إيه النبي عاوز يقوله عليه الصلاة والسلام؟ «يمرقون من الدين كما يمرق سهم الرمية»؛ يعني لا يكاد يوجد من أثر الدين فيهم شيء، هو ده اللي النبي عاوز يقوله بس كده عليه الصلاة والسلام، يعني زي ما صاحبنا ده عمال يروح يبص يا ترى فيه نقطة دم ولا ما فيش؟
هؤلاء يمرقون من الدين كما يمرق السهم من الرمية، يا ترى فيهم دين ولا ما فيهمش دين؟ ده اللي هم بيعملوا إيه بقى؟ الصحابة يحقرون صلاتهم إلى صلاتهم، وصيامهم إلى صيامهم، وأعمالهم مع أعمالهم، ودول بيقرؤوا القرآن. المشكلة فين؟ المشكلة في القلب يا جماعة! المشكلة في القلب ده، أنت قلبك شكله إيه؟ ولذلك يا جماعة، أبو الدرداء -هذا كله تحت نفس القاعدة- أن الطريق إلى الله سبحانه وتعالى تُقطع بالقلوب لا بالأبدان؛ يعني ركز قوي مع قلبك أكثر ما تركز مع عبادتك شكلها إيه، مع القلب، كل ما القلب علا العبادة اللي قد كده تبقى عند ربنا حاجة كبيرة جدا، وده أثر أبي الدرداء واللي هنختم في المعنى ده، معنى أن الطريق إلى الله تُقطع بالقلوب لا بالأبدان.
أبو الدرداء يقول إيه بقى؟ ركزوا قوي في الأثر ده يا جماعة يقول: حبذا نوم الأكياس وإفطارهم! يعني يا سلام على النوم والأكل! أبو الدرداء كان واحد بيقول إيه؟ يا حبذا نوم الأكياس وإفطارهم، كيف يغبنون سهر الحمقى وصيامهم؟ يعني يا جماعة الكيس الذكي الذي يفهم عن الرب مراده سبحانه وتعالى بنومه يغلب سهر من لم يفهم عن الله مراده وتعالى، يغبنون سهر الحمقى وصيامهم، بيقول إيه؟ ولا مثقال ذرة من بر مع تقوى ويقين أعظم من أمثال الجبال من عبادة المغتر.
الموضوع مش موضوع أعمال بدن، أعمال قلب! ذرة واحدة من بر مع تقوى ومع إخبات ومع إقبال على الله عز وجل ومع رجاء لثواب الله عز وجل ومع خوف من عقابه سبحانه وتعالى تغلب جبالا من الأعمال مع غياب هذه المعاني. فده أول معنى يخليك تهتم بقلبك، أن الطريق إلى الله عز وجل تُقطع بالقلوب لا بالأبدان. المعنى الثاني اللي برضه مهم جدا ويخليك تهتم بقلبك، أن النية محلها القلب، ودي قاعدة إحنا خدناها في درس لوحده يمكن ساعة أو ساعة ونص، أن النية محلها القلب، ونية المؤمن أبلغ من عمله.
يعني يا جماعة نيتك في القلب، النية محلها القلب، بقلبك تنوي ونيتك تغلب عملك، نية المؤمن أبلغ من عمله. لأ، مش فاهمين، مش فاهمين الحتة دي، تعالوا ناخد حديث النبي عليه الصلاة والسلام هيبين المعنى ده، قال صلى الله عليه وسلم: «إنما الدنيا لأربعة نفر». الدنيا اللي إحنا عايشين فيها دي كلها، البشر في الدنيا دي كلها هتلاقيهم واحد من أربعة، مش هيخرج عن الأربعة دول: «إنما الدنيا لأربعة نفر، رجل آتاه الله مالا وعلما» -وخلونا قبل ما نشوف الراجل ده عمل إيه- «ورجل آتاه الله علما ولم يؤته مالا، ورجل آتاه الله مالا ولم يؤته علما، ورجل لم يؤته الله مالا ولا علما». دي القسمة العقلية: واحد ربنا أداه مال وعلم، العلم هنا يا جماعة المقصود به العلم الشرعي الذي يفهم به مراد الرب منه في هذا المال، ومش بس في المال، في حياته كلها، ده المقصود، العلم مش يعني مهندس ودكتور خلاص، العلم هنا هو العلم الشرعي الذي يعرف -يعني معرفة الرب ومعرفة أحكام الرب ومعرفة مرادات الرب سبحانه وتعالى- هو ده العلم المقصود.
ورجل ربنا أداه مال وادى له علم، ورجل تاني ربنا أداه واحدة من الاتنين، فيا أما أدا له علم وما أدا لوش مال، أو العكس، أدا له مال وما أدا لوش علم، ويبقى الرابع ده اللي هو لا أدا له مال ولا أدا له علم. دي القسمة العقلية: «إنما الدنيا لأربعة نفر، رجل آتاه الله مالا وعلما». عمل إيه بقى اللي أداه مال وعلم؟ هو معه العلم فسلطه عليه في الحق، لهلكته؛ يعني سلط العلم على المال، فأنفق المال في وجوه البر وفي وجوه الصلة. «ورجل آتاه الله علما ولم يؤته مالا» -ركزوا بقى في هو ده المعنى اللي إحنا عايزينه نقوله- الراجل ده بيقول إيه بقى؟ «رجل آتاه الله علما ولم يؤته مالا، فهو يقول: لو أن لي مثل مال فلان لعملت فيه بمثل عمله». قال صلى الله عليه وسلم: «فهو ونيته فاجرهما سواء».
يا الله يا جماعة، الراجل ده الراجل الأول ده تخيل كده أن واحد مثلا أنفق في سبيل الله عز وجل مليون ولا اتنين مليون ولا أي رقم، وراجل ما دفعش مليم، لكن علم الله من قلبه صدق النية، فكان ماذا؟ أجرهما سواء. «ورجل آتاه الله مالا ولم يؤته علما، فهو يتخبط فيه، لا يعرف لله فيه حقا ولا يصل به رحما، ورجل لم يؤته الله مالا ولا علما يقول: لو أن لي مثل مال فلان لعملت فيه بمثل عمله» يعني لو لي فلوس كان زماني مكسر الدنيا وخاربها زي فلان، «فهو ونيته فوزرهما سواء».
يا الله يا جماعة، ده بقى هو ده اللي فعلا يعني إيه؟ لا طال دنيا ولا آخرة، يعني على الأقل التاني ده هو أتمتع في الدنيا، ده بقى لا أتمتع في دنيا ولا آخرة. الشاهد يا جماعة هنا: النية خطر! النية. طب النية دي فين؟ في قلبك. طب اسمعوا الحديث ده، النبي عليه الصلاة والسلام خرج يوما في الغزو، جهاد في سبيل الله، شوفوا يا جماعة الناس اللي قلوبها الآن تحترق تريد الجهاد في سبيل الله، أبشر، أبشر، تنالوا ثواب الجهاد وإن مت على فراشك! وده حديث النبي صلى الله عليه وسلم: «من سأل الشهادة بصدق» -الصدق ده إيه؟ قلب- «بلغه الله منازل الشهداء وإن مات على فراشه».
النبي عليه الصلاة والسلام خرج يوما مع بعض الصحابة في غزو يقول لهم إيه بقى؟ «إن بالمدينة أقواما، ما سرتم مسيرا، ولا قطعتم واديا إلا شاركوكم». في المدينة ناس قاعدة، لا خرجت ولا في حر ولا تعب ولا ماشية مئات الأميال ولا شايلة سلاح ولا سايبة أزواجها وأولادها ولا عملت أي حاجة، ومع ذلك شاركوكم الأجر! يا الله يا جماعة، يا جماعة ركزوا في المعنى ده، أنت قلبك توصل به لحته بعيدة قوي بمجرد أن ربنا يعلم، بمجرد أن يعلم الله عز وجل منك الصدق، بس، مش أكثر من كده، ربنا يعلم من قلبك الصدق هتوصل لحته تانية. طب إيه ده! طب إزاي! يعني ما بإيه؟ بقلوبهم حبسهم العذر، لولا المرض كانوا خرجوا، حبسهم العذر فبقلوبهم، ده كله بنيتهم.
واضح، والحديث التاني: «إذا التقى المسلمان بالسيفيهما، فالقاتل والمقتول في النار». فده أشكل على الصحابة: هذا القاتل فما باله المقتول؟ طب المقتول ليه؟ قال صلى الله عليه وسلم: «إنه كان حريصا على قتل صاحبه» بقلبه بقى، زيه زي اللي قتل، اتقتل وهيحاسب عند الله عز وجل. قال: «فالقاتل والمقتول في النار». ليه؟ لولا أنه اتقتل كان قتل، ده دخل النار بإيه؟ بقلبه! ده ما عملش حاجة يا جماعة، ده ما قتلش، ده اتقتل، واضح؟ بقلبه. آخر حديث برضه في المعنى ده -أنا باُكثر من الأدلة لأن كل دليل يعني له فائدة تخصه- أن رجلا قال والقصة دي عجيبة جدا برضه يا جماعة.
رجل مرة قال لأتصدقن الليلة بصدقة، فخرج بالليل متخفي كده فتصدق بصدقة، فأصبح الناس يتحدثون تصدق الليلة على غني. قال: أنا الليلة هتصدق بصدقة، فخرج كده بالليل في الخلفة ما حدش واخد باله منه، حط الصدقة في إيد حد ومشي، فأصبح الناس يتحدثون تصدق الليلة على غني! وقال: الحمد لله على غني! كأنه إيه حاسس الصدقة مش مش متقبلة يعني. فقال: لأتصدقن الليلة بصدقة، فتصدق بصدقة في الليل، فأصبح الناس يتحدثون تصدق الليلة على سارق! وقال: الحمد لله على سارق! لأتصدقن الليلة بصدقة، فأصبح الناس يتحدثون تصدق الليلة على بغي امرأة فاجرة، وقال: الحمد لله على غني، الحمد لله على سارق، الحمد لله على بغي، ونام.
فأتي في المنام قيل له: أما صدقتك فقد قبلت. خلي بالك يا جماعة الصدقة دي لو أنت عارف إن فلان ده غني ولا فلان سارق ولا فلان بغي ورحت تعطي الصدقة يعني لمن لا يستحق الصدقة واضح، ربما تلام على ذلك، ربما تلام على ذلك، لكن لما كانت نيته الخيرة أثابه الله عز وجل على نيته. أما صدقتك فقد قبلت إلى آخر الحديث، لكن أنا الحديث ده يا جماعة بقى أنا ليه بقول لكم الحديث ده؟ كتير من الناس بيقابلوا الموقف ده إنه يتصدق، وبعد ما يتصدق يعرف إن فلان ده إيه ده ضلالي، ده حرامي، ده واحد يقول له بالذات لو صدقة كبيرة، وركزوا قوي يا جماعة في معنى هنا في الحديث أنا كان دايما ياخدني المعنى ده أو أقف قدامه.
ركزوا يا جماعة، واحد قاعد في بلد، قرية صغيرة، بلد كبيرة، أيا كان، لكن اللقطة المشهد ده كده ركزوا فيه، أصبح الناس يتحدثون تصدق الليلة على غني، على سارق، على بغي. افتكروا الصدقة دي كانت جنيه ولا اتنين جنيه ولا عشرة جنيه اللي هيصبح الناس يتحدثون؟ الصدقة دي كانت شكلها إيه؟ كانت كام اللي هتبقى حديث المدينة تاني يوم؟ الصدقة دي بقت حديث المدينة، تخيل كده إن واحد تصدق بالليل على بغي بعشرة جنيه، بميت جنيه، بمتين جنيه، هيصبح الناس يتحدثون تصدق الليلة على بغي، يعني يظهر أنه لا يظهر والله أعلم ويظهر أن الصدقة دي ما كانتش عادية، دي صدقة بقت حديث المدينة تاني يوم.
كتير بيحصل له ده يا جماعة فينا، إنه ييجي يتصدق وبعدين بالذات لو بحاجة كبيرة، مبلغ كبير، واحد بقى قال لك أنا في عملية والحقني وأبويا في مش عارف فين وأمي حصل لها ايه فتدي له رقم، وبعد ما يمشي تكتشف إنه حرامي نصاب بأي بقى طريقة، حد قال لك شفت على الفيسبوك أي حاجة، فتبتدي بقى إيه تأنب في نفسك وتزعل، أما صدقتك فقد قبلت، لأن الله عز وجل ينظر إلى قلبك، فلو علم منك الصدق حال إعطائك الصدقة قبلها الله عز وجل. المعنى التالث اللي عاوزين نختم به: أهمية قلبك ده إيه؟ أن قلبك بقى هو محل نظر الرب سبحانه وتعالى، ده المعنى اللي كنا هنقوله في الأول بس أخرناه، وده معنى مهم جدا يا جماعة.
أن ربنا سبحانه وتعالى، أنت بقى شوف أنت مهتم بجسمك إزاي ومهتم لو امرأة مهتمة ببشرتها ومهتمة شكلها، ولو راجل مهتم يروح الجيم ويبقى، أهو جسمك اللي حضرتك مهتم أنا مش بقول لك ما تعملش ده، لكن لازم تبقى عارف إن ده مش محل نظر الرب سبحانه وتعالى، يعني لو مت وأنت بطل كمال أجسام، وواحد تاني مات وهو لحم على عظم، مش ده اللي هيفرق عند ربنا، مش ده. لو مت وأنت راجل بقى مليان وابهة كده في نفسك مش ده اللي هيديك وزن. الموازين الشرعية، أنا نفسي اعمل درس عن الموضوع ده يا جماعة، درس بس عن موازين الشرع وأزاي الموازين دي اتقلبت في حياتنا، يعني درس نفسي أخصصه للمعنى ده لأن فيه حاجات كتير زي اللي هقوله دلوقتي ده.
في موازيننا احنا مثلا في موازين البشر، إن الراجل اللحمة على العظم مش واحد ست مش واحد رفيع يعني هو محافظ على جسمه، لأ، الراجل لحم على عظم ده اللي هو ده راجل إيه زي بتاع بتوع المجاعة كده بتوع أفريقيا، لو شفت واحد ماشي وواحد تاني بقى ماشي مليان وسمين تقول الراجل التاني ده إيه باين عليه العز ده اللي يعني حد فخم كده؟ النبي عليه الصلاة والسلام بقى تخيل أهم الاتنين دول نفس المثالين دول بالظبط، واحد من الصحابة يطلع مرة على شجرة، اللحمة على عظم الصحابي ده، حتى إن القدمين تساوكا، بقى لفظ الحديث، بقوا يطيروا كده، فتعجب الصحابة من دقة ساقي هذا الصحابي، وقال صلى الله عليه وسلم: «أتعجبون من دقة ساقيه؟» ركزوا يا جماعة، «لهما في الميزان أثقل من أحد».
جبل أحد اللي راح منكم السعودية وشافه، مش جبل زي اللي بنرسمه كده في كراسة الرسم، جبل أحد ده جبل يعني عريض له طول، جبل أحد ده ميزان. الرجلين عند ربنا رجلين الصحابي ده في الميزان عند ربنا أثقل من أحد، في المقابل يؤتى بالرجل السمين العظيم يوم القيامة لا يزن عند الله جناح بعوضة. موازين مختلفة غير موازين البشر تماما، ربنا مش بينظر لجسمك ولا لصورتك ولا لصورتك، أمرا ربنا بينظر لإيه؟ إن الله لا ينظر إلى أجسامكم ولا إلى صوركم، ولكن ينظر إلى قلوبكم وأعمالكم. القلب محل نظر الرب سبحانه وتعالى، فانظر ما في قلبك بقى.
يعني ربنا دلوقتي بيبص لقلبك، قلبك فيه إيه؟ قلبك فيه شهوات، وقلبك فيه حسد، وقلبك فيه بغضاء للمسلمين، وقلبك فيه شحناء، وقلبك فيه حب دنيا، وقلبك فيه غفلة عن آخرة، قلبك هو ده قلبك؟ ولا قلبك فيه إخبات وخشوع وإنابة وحب للرب سبحانه وتعالى وحب للمساكين وحب لأهل الإيمان وبغض لأهل الكفر والعصيان؟ أنهي قلب؟ ربنا لما هينظر في قلبك هيلاقي إيه؟ هو ده يا جماعة المعنى لازم تنتبه له لازم نفوق له شوية. ولا حب الصور اللي عمالين نسكروه ليل نهار على الفيسبوك، صور ملت عقولنا وقلوبنا، صور دنيا وصور نساء وقرف، ربنا هيلاقي إيه في قلبك؟ فكر في المعنى ده.
لكن استدراج بقى هنا عشان الناحية التانية بقى، ربك رب قلوب! عارفين بقى الآية المقولة دي طبعا اللي هو أي حد تقول له يا فلان اتق الله ما تعمل يقول لك: ربك رب قلوب! هو حق لكن أراد به باطل، هو ربك رب قلوب صح؟ لكن ربنا حتى النبي عليه الصلاة والسلام في الحديث يا جماعة ما قالش: ولكن ينظر إلى قلوبكم وسكت، ما قالش كده النبي عليه الصلاة والسلام، قال: «ولكن ينظر إلى قلوبكم وأعمالكم». لما تيجي تقول لواحد يا فلان اتق الله وما تعملش كده ما يقولكش ربك رب قلوب، أيوه ربك رب قلوب وأعمال. بل بقى كذب هذا بحديث النبي اللي معنا اللي هو ابتدينا به أصلا اللي هو إحنا بنكمل شرح حديث النعمان بن بشير ما تنسوش: «ألا وإن في الجسد مضغة» وهنختم خلاص بالاخر الحتة دي: «إذا صلحت صلح الجسد كله، وإذا فسدت فسد الجسد كله، ألا وهي القلب».
فاللي تلاقيه خاربها وتيجي تقول له يا فلان اتق الله يقول لك ربك رب قلوب، تقول له ما أنت قلبك خربان، ما تقولوش كده يعني ما تتنططش عليه، أقصد إنه لازم يعرف ده وأنت لازم تعرف ده. سيبك من غيرك، برضه أنا بكلمك أنت وبكلمك أنت، أنت خليك في نفسك، أمتى يوم القيامة هتقول نفسي نفسي؟ فخليك في نفسك دلوقتي، خلاص؟ تدعو غيرك إلى الخير وإلى الحق طبعا، لكن انشغل بنفسك، قلبك شكله إيه؟ أعمالك عاملة إزاي؟ لو لقيت أعمالك تقول طب أنا قلبي نضيف، بس أعمالك خربانة، اعرف إن قلبك مش نضيف.
ما هو أنا هصدقك ولا هصدق النبي عليه الصلاة والسلام: «إذا صلحت صلح الجسد كله»؟ مش معناها تبقى ملاك ما بتعصيش الله عز وجل إلا البشر كلهم عصاة، لكن تعصي وترجع عن قريب، وما تستمرئش المعصية وما تستمرش فيها. «إذا صلحت صلح الجسد كله، وإذا فسدت فسد الجسد كله، إذا خشعت خشع الجسد كله»، ده حديث النبي عليه الصلاة والسلام، لو خشع قلب هذا لخشعت جوارحه. عرفت وأنت واقف في الصلاة عمال تهرش وعمال بتطلع الموبايل من جيبك وبتبص في الساعة عشان قلبك مش خاشع؟ ولو خشع قلبك لخشعت جوارحك.
كأن بقى الحديث يا جماعة بينور لنا حتة، اللي هي إيه؟ اللي هي السؤال المشهور عند كل الناس: المعصية الفلانية مش عارف أطيبها؟ فتتروح تسأل حد، فيبتدي يقول لك: اعمل واحد اتنين تلاتة، واحد اتنين تلاتة اللي هو إيه بقى؟ يعني المعصية دي حاول تبعد عن أسباب المعصية، وحاول تشوف صحبة المش عارف إيه، وحاول لو في مكان معين بيخليك تعمل معصية ابعد عن المكان. كل ده جميل، كل ده جميل، لكن كل ده من غير ما يقول لك شوف قلبك، فأنت عمال تعالج في أعراض مش في أمراض.
تاني، زي واحد راح للدكتور فقال له أنا سخن، فقال له خد اعمل كمادات، ده اللي هو إيه؟ ما فيش دكتور بيعمل كده في الدنيا، الكمادات دي عشان آه ننزل الحرارة بسرعة، لكن لازم يكشف عليك يشوف السخونية دي منين، يا ترى السخونية دي منين؟ ده جيوب أنفية ولا عندك برد ولا أي حاجة؟ أي سبب، ويعالج بقى المرض، طب المرض ده فين؟ مش في عينيك اللي بتبص بيها للحرام، المرض مش في العين، ولا في لسانك اللي بتشتم بيه وبتغتاب وبتنم، مش في لسانك، ولا في ودنك اللي بتروح تسمع بيها أغاني والغيبة والنميمة كذب والفحش، المرض مش في ودنك، ولا في إيدك اللي بتمدها عشان تصافح بها النساء، ولا في رجلك اللي بتخطو بها للحرام، دي كلها أعراض! الله! أمال المرض فين؟ في قلبك! وعشان كده يا جماعة ربنا ما ذكرش مرض الإيد ومرض العين ومرض الودن، هو ذكر إن فيه مرض في القلب، مرض شبهة أو مرض شهوة اللي فيه مذكورين في القرآن: ﴿فِي قُلُوبِهِم مَّرَضٌ فَزَادَهُمُ اللَّهُ مَرَضًا﴾ [البقرة: 10]، مرض الشبهة اللي هو آخره بقى النفاق والكفر عياذا بالله: ﴿فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ﴾ [الأحزاب: 32] مرض شهوة.
أنت قلبك هو اللي فيه المرض، فعالج قلبك. كنا المفروض نتكلم برضه عن مداخل بقى الشيطان وإزاي يعني نسد هذه المداخل، لكن ما فيش وقت لكده وما فيش أظن تعليقات ولا حاجة فنكتفي بهذا. أقول قولي هذا واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.