الشيخ أمجد سميرالدرس السابع من سلسلة قواعد السير إلى الله تعالى، والدرس ده مختلف ويمكن يكون خارج السياق يعني ماهواش قاعدة قوي من قواعد السير إلى الله عز وجل، وإن كان يتضمن قاعدة الحقيقة وهي اغتنام أوقات الغفلة، لكن الدرس النهارده عن شعبان، النهارده تاني يوم من شعبان، فكان مناسب إن إحنا نتكلم عن شعبان شوية.
الأصل يا جماعة في فضل شعبان أو في العمل في شعبان هو حديث أسامة بن زيد أخرجه أحمد في المسند والنسائي في السنن، أن أسامة بن زيد رضي الله عنه قال: قلت يا رسول الله، لم أرك تصوم من الشهور ما تصوم من شعبان؟ فقال صلى الله عليه وسلم: «ذاك شهر يغفل الناس عنه بين رجب رمضان، وفيه ترفع الأعمال إلى الله تعالى، وأحب أن يرفع عملي وأنا صائم». فأسامة بن زيد هنا أثبت أن النبي صلى الله عليه وسلم كان يصوم في شعبان، وأثبت أمراً فوق مجرد الصيام وهو الإكثار من الصوم في شعبان: لم أرك تصوم من الشهور ما تصوم في شعبان.
فيبقى كأن النبي صلى الله عليه وسلم كان بيصوم من شعبان صوم كتير لدرجة أنه لفت نظر أسامة، صفة صوم النبي عليه الصلاة والسلام في شعبان ما قالهاش أسامة في الحديث، لكن ورد في حديث عائشة رضي الله عنها أن النبي صلى الله عليه وسلم كان يصوم شعبان كله، كان يصوم شعبان إلا قليلاً. الزيادة دي في صحيح مسلم: كان يصوم شعبان كله، كان يصوم شعبان إلا قليلاً. طب إيه ده؟ يعني هو كان يصوم شعبان كله ولا يصوم شعبان إلا قليلاً؟ قال أهل العلم عشان يجمعوا بين الروايات أو بين الألفاظ: قالوا إن النبي عليه الصلاة والسلام كان يصوم شعبان إلا قليلاً، صحيح، يعني يصوم كل شهر إلا يومين حتى يخيل للرائي أنه يصوم شعبان كله.
فده قول عائشة: كان يصوم شعبان كله في رواية، وفي رواية: كان يصوم شعبان إلا قليلاً؛ فكانه كان بيصوم كل شعبان إلا يومين ثلاثة أربعة، فيخيل للرائي أنه يصوم شعبان كله، فدي كانت صفة صوم النبي عليه الصلاة والسلام في شعبان. فلما سأله أسامة بن زيد رضي الله عنه ليه بتعمل كده في شعبان؟ فعلل ذلك النبي صلى الله عليه وسلم بعلتين، في الرواية دي علل بعلتين، وخارج الرواية دي النبي صلى الله عليه وسلم ذكر عللاً أخرى ممكن يعني إيه نقف عليها، لكن خلونا مع العلتين دول الأول: قال: «ذاك شهر يغفل الناس عنه بين رجب ورمضان»، أو العلة: «فيه ترفع الأعمال إلى الله تعالى وأحب أن يرفع عملي وأنا صائم».
فأول علة يا جماعة أن النبي أول علة من علل كون النبي صلى الله عليه وسلم يكثر الصوم في شعبان أنه زمان غفلة، ذلك شهر يغفل الناس عنه بين رجب ورمضان، يبقى ذلك شهر يغفل الناس عنه. فكان سائل هيسال: طب ليه الناس بتغفل عن شهر شعبان؟ فأجاب النبي عليه الصلاة والسلام: بين رجب ورمضان، وقع شعبان بين شهرين عظيمين، شهر رجب وهو أحد الأشهر الحرم، واتكلمنا إحنا عن الأشهر الحرم في درس، وكان أهل الجاهلية يعظموا رجب ضمن تعظيمهم للأشهر الحرم، كانوا يعظموا الأشهر الحرم جداً، واتكلمنا عن المعنى ده في درس منفصل، وممكن اللي عاوز يرجعله يرجعله، حتى لحق بعض أهل الاسلام تعظيم رجب حتى يا جماعة لغاية دلوقتي في ناس بتظن أن الصوم في رجب أولى وأفضل من الصوم في شعبان، وهذا أنا لا أعلم فيما أعلم لا أعلم أحداً من أهل العلم قط قال به، إن صيام رجب افضل من صيام شعبان.
خلي بالكم صيام شعبان عند جمهور اهل العلم هو أفضل الصوم بعد رمضان، عند الجمهور عند الشافعية هيقولوا صيام المحرم، لكن أنا معرفش ماعارفش أن في حد قال إن صيام رجب أفضل من صيام شعبان، يعني هو الخلاف دلوقتي بين شعبان والمحرم أيها أفضل؟ فالجمهور على أن شعبان أفضل، والشافعية ذهبوا إلى أن شهر المحرم صومه أفضل. فيبقى شعبان ليه الناس بتغفل عن شعبان؟ علشان ده شهر واقع بين شهرين عظيمين، شهر رجب الفرد أحد الأشهر الحرم وكان أهل الجاهلي يعظموه جداً، ولحق هذا بعض أهل الإسلام، لحق هذا بعض أهل الإسلام فعظموا رجب.
وشهر رمضان، وشهر رمضان شهر معظم وفيه ما فيه، وإن شاء الله إيه نتكلم عن شهر رمضان في درس أو أكثر، ووقع بينهما شعبان فكان زمان غفلة، فكان يصومه. ليه بقى؟ يبقى ده أصل يا جماعة الحديث ده عندنا أصل، ركزوا بقى وهي دي القاعدة لو قلنا يعني أن الدرس ده هيكون في قاعدة من قواعد السير إلى الله عز وجل فهي: إعمار أزمنة الغفلة.
ليه؟ أول معنى يا جماعة في في زمان الغفلة، زمان الغفلة يعني زمان الناس غفلة فيه عن عبادة ربنا سبحانه وتعالى، أول حاجة أن العبادة في أزمنة الغفلة أخفى من العبادة في غيرها. طيب يعني إيه أخفى؟ يعني أنتوا عارفين يا جماعة لما يكون زمان زي رمضان كده، رمضان مثلاً هو شهر التراويح، فكل الناس التراويح دي قيام ليل بالمناسبه، فكل الناس بتقوم الليل في رمضان، وكل الناس شايفه بعض وهم بيقيموا الليل، لكن في شهر شعبان ده زمان غفلة، فاللي هيقوم الليل في شعبان ما حدش يعرف عنه حاجة، فالعبادة في زمان الغفلة أخفى من العبادة في غيرها.
طيب وإيه يعني لما تكون أخفى؟ لما تكون أخفى تكون أقرب للإخلاص وأبعد عن الرياء، صح ولا لا؟ ولذلك يا جماعة كان السلف كانوا يستحبون إخفاء العبادات، وكانوا يحرصون، كانوا يحرصوا على إخفاء عباداتهم، ويروى عنهم بقى أشياء عجيبة في الموضوع ده، يعني يروى عن أحدهم مثلاً أنه قعد سنوات طويلة، قيل عشرين وقيل أربعين سنة يصوم لا يعلم أحد بصومه ولا مراته عارفة أنه بيصوم، طبعا هو مش بيصوم يعني متصل، لكن صيامه في كل هذه السنين لا أحد يعلم بها حتى مراته.
كان إذا خرج من بيته أخذ معه رغيفين، كان راجل تاجر شغال في سوق، وهو خارج من البيت الصبح ياخد رغيفين معاه في الطريق، يتصدق بالرغيف ويروح للسوق فيظن أهل السوق أنه أفطر في بيته، ويظن أهل بيته أنه أفطر في السوق، وفضل كده، طب يعني مين عرفهم؟ هو يا جماعة كانوا السلف كانوا يخبوا عباداتهم، وأمتى بقى يشفوها؟ وهم على فراش الموت؛ لأن ده وقت الرجاء فخلاص، وده في وقت الوقت ده يا جماعة ما حدش يراعي، يعني يعني اللي على فراش الموت ده وبينه وبين الموت لحظات من السلف من كان يقول هذا بقى يبتدي يحكي اللي عمله في الدنيا ليه؟ يرجو نفسه، هو مش يعني مش بيوري اللي حواليه أنا كنت بعمل كذا وكذا، لا، هو يخاطب نفسه بما عمله فيموت وهو حسن الظن بالله، والله عز وجل عند ظن عبده به.
وكان أحد السلف كان يصوم فاشتهر بالصوم، اتقال بقى فلان اللي في البلد بتاعتنا دي فلان صوام، فكان يعمل ايه؟ كان يجي يوم الجمعة ويقف في المسجد الجامع، الناس كلها قاعدة، ويمسك كوباية الميه كده ويحطها على بقه ولا يزدرد منها شيئاً يظن الناس أنه مفطر وهو صايم ولم يدخل جوفه من الماء شيء. وبعض السلف كان في بعض في في كلامه يعني ينصح الناس بذلك، كابن مسعود كان يقول: إذا أصبح أحدكم صائماً فليدهن ولبس صالح ثيابه، يعني لو صبح صايم ما تصبحش بقى إيه ماشي مأطرسك وبتجر رجلك عشان اللي يشوفك يعرف انك صايم، لا، ده كانوا يصبحوا يعني فيهم نشاط، يعني يبالغوا في إظهار النشاط، يدهن يدهن شعره كده ويفوق عشان اللي يشوفه ما يعرفش أنه صايم.
يا جماعة مهم جداً المعنى ده، معنى انك تخفي العبادة، معنى أن يكون بينك وبين ربنا خبء. كان بعض السلف يقول: إذا استطعت أن يكون بينك وبين الله خبء فافعل؛ لأن هو هو ده اللي هينجيك يا جماعة، العبادة لما تظهر للناس قلوبنا أضعف من أنها تتحمل، مش هاقول ثناء الناس، حتى نظرة إعجاب في أعين الناس ليك، قلبنا أضعف منها تتحمل ده، أنك تشوف الناس معجبة بيك، وأنك تشوف الناس بتشاور عليك.
شوف ابن مسعود رضي الله عنه وهو من أطهار الناس قلوباً، ده صحابي جليل كان يخرج من بيته فالناس تتبعه، التابعين بقى شايفين صحابي يتبعونه، فالتفت إليهم ابن مسعود ويقول: هل لكم حاجة؟ عاوزين مني حاجة؟ فيقولون: لا، فيقول: إذاً ارجعوا فإنها ذلة للتابع فتنة للمتبوع. فتنة لي أنتم بتبعوني ليه؟ عاوزين اللي عاوز حاجة يقول لي، مش عاوزين يرجعوا، امشوا فإنها ذلة للتابع، أنتم ذالين نفسكم ليه؟ مش دي مش دي قضيتنا.
لكن الكلمة التانية بقى: فتنة للمتبوع. بتفتن ليه في ديني؟ وده معنى مهم يا جماعة، إحنا طبعا في دروسنا بنحاول نتطرق لكذا معنى، معنى إيه؟ معنى أنك ما تفرحش بالاتباع، وما تفرحش بالناس اللي بتشاور عليك، وخصوصاً في البلاء اللي إحنا عايشين فيه، السوشيال ميديا والفيسبوك واللايكس والرياكتس والحاجات الإيه اللطيفة دي دي بتموت دي بتهلك. النبي عليه الصلاة والسلام لما مدح أحدهم صاحبه يوماً قال إيه؟ قطعت عنق صاحبك! واحد بيمدح واحد بيقول له: ده أنت يعني ما شاء الله ده أنت اللي فيهم، بيمدح، قال النبي صلى الله عليه وسلم: «قطعت عنق صاحبك».
ليه؟ بعد ما حتى الواحد كان يعني بيجاهد نفسه عشان يبقى مخلص ويدفع عن نفسه الرياء، يجي واحد يقعد يمدح فيه، خلاص يميل بقلبه للدنيا ولحب الناس ولثناء ولشهر لأضواء، يضيع، ويدخل بقى في حديث إيه «وقد قيل» اللي اتكلمنا فيه قبل كده.
المعنى التاني بقى إحنا قلنا في الأصل بتاع مسعود ده معنيين: المعنى الأول: أنت ما تفرحش بالحاجات، تاني حاجة: ما تعنش الشيطان على أخيك، ما تقعدش بقى إيه شفت واحد تقعد تمدح فيه وتقعد مش عارف إيه، لا خلاص، يعني حتى لو من باب يعني إظهار الفضل، جزاك الله خيراً وكذا وخلاص.
نرجع تاني: العبادة في زمان الغفلة أخفى من العبادة في غيرها، وده أصلح ليك. شوفوا ربنا يا جماعة بيقولي في القرآن: ﴿إِن تُبۡدُواْ ٱلصَّدَقَٰتِ فَنِعِمَّا هِيَۖ وَإِن تُخۡفُوهَا وَتُؤۡتُوهَا ٱلْفُقَرَاءَ فَهُوَ خَيْرٌ لَّكُمْ﴾ [البقرة: 271]. ربنا قال كده، ما قالش كده، ربنا سبحانه وتعالى قال: ﴿وَإِن تُخْفُوهَا وَتُؤْتُوهَا الْفُقَرَاءَ فَهُوَ خَيْرٌ لَّكُمْ﴾ ما قالش لهم؛ ليه؟ الفقير ربما كان الخير ليه أن الصدقة تظهر فيتسسى غيرك بك فيتصدق، فالفقير بدل ما كان ياخد صدقة من واحد ياخد من اتنين وتلاتة وأربعة مش كده، يعني ربما كان الفقير الأصلح ليه أن الصدقة تظهر، لكن الأصلح ليك أنت إيه؟ إن تبدوا الصدقات فنعم هي، هتبدو الصدقات جميل فنعم هي، وإن تخفوها وتؤتوها الفقراء فهو لكم، لكم أنتم أيها المتصدقون ليه؟ فانه أقرب للإخلاص وأدفع للرياء.
ولذلك مهم جداً أنك تحرص على عبادة مخفية ما حدش يعرف عنها حاجة. بعض السلف مع كان يعني ليه كلام يعني يبالغ جداً يقول: وددت أن لي عبادة لا يعلم بها الملكان! تخيلوا؟ أنا نفسي أعبد ربنا عبada كده بيني وبينه الملكين ما يعرفوها أصلاً. وكان يقول بعضهم: كانوا يخفون عباداتهم كما تخفي الحائض حيضتها؛ يعني يبالغوا في ستر العبادة، مش عاوزين حد يعرف عنا حاجة، مش عاوزين. وبعضهم كانت يعني بعض السلف روى عنه أنه كانت تخنقه العبرة يعني وهو قاعد كده يتفكر في الموت، يتفكر في أحوال، فيعيط فيقول: ما أشد الزكام! طبعا هو ما بيكذبش يعني، ما يقولش أنا عندي زكام، لا، يقول كلمة كده اللي قدامه يفهم منها إيه؟ أنه عنده زكام، وهو ما عنده زكام ولا حاجة، هو عينيه سبقته عيط وهو قاعد لما تذكر الموت تذكر أحواله السيئة، فكان يعيط فيخفي يقول: ما أشد الزكام! وهكذا. يبقى لازم يا جماعة إيه نحاول نخفي العبادة تاني.
يبقى شعبان العبادة فيه أخفى، هو زمان غفلة فالعبادة أخفى، فلما كانت العبادة أخفى كانت أقرب للإخلاص وأبعد عن الرياء، فلما كانت كذلك كانت أشق على النفس. اه، العبادة لو ما فيش حظ للدنيا فيها هتلاقيها شديدة على نفسك شوية. ليه؟ إحنا دلوقتي مش بنقول بقى أن واحد مرائي، لا، خلي بالك، مش بنقول واحد مرائي، لا، واحد عاوز ربنا، حتى اللي عاوز ربنا ده لما يلقى نفسه يعبد ربنا وسط مجموعة، الدنيا بتسقى أسهل، صح ولا لا يا جماعة؟ شوفوا حالكم كده في رمضان في الصلاة وفي الصوم، وشوفوا حالكم بعد رمضان عشان تفهموا اللي أنا عاوز أقوله. يبقى أنت إحنا مش هنقول أن أنت مرائي فلما الناس بتشوفك بتنشط، لا لا لا لا، أنت راجل مخلص وبتحاول تجهد نفسك انك تكون مخلص.
طب ليه ليه ده بيحصل؟ عشان النفس يا جماعة، يا جماعة ربنا سبحانه وتعالى جبل أنفسنا على معنى هنسميه الإيه: أنك تتسلى بغيرك. يعني إيه تتسلى؟ أقعد أتريق عليه؟ لا، تتسلى، يعني لما تشوف غيرك بيشاركك في حاجة، الموضوع ده يخفف عليك الحاجة دي، دي اسمها تتسلى بغيرك، ولذلك التسلي بالغير في العبادة يخفف العبادة، والتسلي بالغير حتى في البلاء والعذاب يخفف البلاء والعذاب، وفي المثل عندنا المثل الشعبي يقول لك إيه: اللي يشوف بلاوي الناس تهون عليه.
بلوتُه ليه؟ لما تلاقي الناس كلها ماتت، تبتدي عارف أنت لو رايح جالك عياذاً بالله واحد جاله مرض ومرض وحش، يبتدي يهتم ويتنك وبتاع، فيبتي الدكتور يقول له روح اعمل التحليل الفلاني في المستشفى الفلانية، أول ما يدخل المستشفى ويلاقي كل الناس اللي فيها عندهم نفس المرض، تبتدي الدنيا إيه تخف عنده. هو إيه اللي حصل جواته؟ ابتدي يتسلى بغيره. فالنفس تتسلى بالغير؛ سواء في العبادة أو في العذاب. ولذلك ولذلك يا جماعة، تجدوا في القرآن ربنا سبحانه وتعالى أشار إلى هذا المعنى، أن النفس بتتسلى بالغير في العذاب والبلاء. قال سبحانه وتعالى عن عذاب أهل النار: ﴿لَهُمْ فِيهَا زَفِيرٌ وَهُمْ فِيهَا لَا يَسْمَعُونَ﴾.
عمرك سالت نفسك إيه لا يسمعون دي؟ يعني ربنا سبحانه وتعالى دلوقتي، احنا ربنا سبحانه وتعالى بيتكلم عن عذاب أهل النار فبيقول لك: لهم فيها زفير وهم فيها لا يسمعون. هو ده عذاب؟ يعني ما بيسمعوش زي ما بيسمعوش، يعني إيه العذاب في كده؟ قال أهل التفسير: أي لا يسمع بعضهم صراخ بعض، فيخيل لكل واحد منهم أنه يعذب وحده. يا الله! شوفوا يا جماعة، حتى التسلي حرمه أهل النار وهم فيها لا يسمعون؛ لا يسمعوا بعضهم صراخ بعض، حتى يظن أو يخيل لكل واحد منهم أن إنما يعذب وحده، فحتى دي حرمها أهل النار.
طيب، والخنساء! شوفوا الخنساء لما مات صخر أخوها وكانت بتحبه جداً، وراسته في أبيات بقى اللي هي: طويل النجاد رفيع العماد ساد عشيرته أمرد، إذا القوم مدوا بأيديهم إلى المجد مد إليه ياد، فنال الذي فوق أيديهم من المجد ثم مضى مصعداً، ترى أفضل الحمد يهوي إلى بيته، يرى أفضل الحمد أن يحمده، أو يعني كلام زي كده، كانت بتحبه جداً. قالت إيه بقى الخنساء دي لما مات أخوها صخر؟ قالت: ولولا كثرة الباكين حولي على إخوانهم لقتلت نفسي وما يكون مثل اخي، ولكن أُعزي النفس منهم بالتسلي. الباكين حولي على إخوانهم لقتلت نفسي، لولا إني ببص حواليا ألاقي ناس كتير ميت لها ناس، كان عن زماني قتلت نفسي، وما يكون مثل اخي، ولكن أُعزي النفس منهم بالتسلي. أخواتهم مش زي أخويا، أو قرايبهم مش زي أخويا، لكن أهو بشوف اللي حواليا وبتسلى بيهم.
وكذلك في في العبادة بقى، النفس بتتسلى بالعبادة في العبادة بغيرها يشاركها العبادة. ولذلك يا جماعة النبي عليه الصلاة والسلام قال إيه للصحابه لما ذكر أقوام يأتو في آخر الزمان؟ هو في حد بيقول الصوت بيقطع؟ حد تاني عنده الصوت بيقطع؟ أو لو حد الصوت عنده كويس برده يكتب لي يعني. طيب، الناس بتقول الصوت كويس، يبقى المشكلة عنده.
في العبادة يا جماعة، في العبادة هتلاقوا ربنا سبحانه وتعالى هتلاقوا النبي عليه الصلاة والسلام عفواً قال إيه للصحابه لما ذكر أقواماً يأتون في آخر الزمان؟ قال: «للعامل منهم أجر خمسين منكم». يعني هيجي ناس في آخر الزمان هيعبروا ربنا سبحانه وتعالى، اللي هيعبر ربنا فيهم هياخد أجر خمسين منكم يا صحابه، ليه عشان المعنى ده؟ قال: «إنكم تجدون على الخير أعواناً وهم لا يجدون على الخير أعواناً». هتلاقوا ناس بتعينكم على الطاعة فهتتسلوا بيهم أو هينشطوك للعبادة، وهم مش هيلاقوا ده تاني.
يبقى العبادة في شعبان؛ شعبان زمان غفلة، فالعبادة في زمان الغفلة، وقلنا لك دي قاعدة اطلع بيها من الدرس بتاع النهارده ونقدر نخليها القاعدة بتاع الدرس لو هنخلي الدرس ده في السلسلة بتاعتنا، قواعد السير إلى الله عز وجل، إيه هي القاعدة؟ اغتنام اوقات الغفلة.
خلاص، طيب ليه؟ علشان هي أخفى فأقرب للإخلاص وأبعد عن الرياء، ولما كانت أخفى كانت أشق على النفس، ولما كانت أشق على النفس كانت أثوب. هي أخفى فكانت أقرب للإخلاص وأبعد عن الرياء، فلما كانت أخفى كانت أشق على النفس، فلما كانت أشق على النفس كانت أثوب. قال النبي صلى الله عليه وسلم: «يا عائشة، أجرك على قدر نصبك». يعني كل ما هتبقى العبادة فيها تعب أزيد ومشقة أكتر، أجرك أكبر بإذن الله. فالعبادة في زمان الغفلة أشق على النفس فهي أثوب. ولذلك أهو أول حديث يدل على ده الحديث اللي لسه ذاكرينه من شوية: «للعامل منهم أجر خمسين منكم»، ليه؟ عشان بيعبدوا ربنا في زمن غفلة، بيعبدوا ربنا بنوع مشقة: «إنكم تجدون على الخير أعواناً وهم لا يجدون على الخير أعواناً». وحديث عائشة: «أجرك على قدر نصبك».
واسمع بقى الحديث العجيب ده، حديث النبي عليه الصلاة والسلام وذكر كلنا عاوزين عاوزين كلنا نخرج حافظين الذكر ده النهارده ماشي. النبي عليه الصلاة والسلام بيقول إيه؟ «من دخل السوق فقال: أشهد أن لا إله إلا الله وحده لا شريك له، له الملك وله الحمد، يحيي ويميت وهو حي لا يموت، بيده الخير وهو على كل شيء قدير». حفظت الذكر ولا لا؟ تاني، واحد هيدخل السوق، رايح سوق بقى، رايح مول، رايح مكان كله محلات، قول الذكر ده: أشهد أن لا إله إلا الله وحده لا شريك له، له الملك وله الحمد، يحيي ويميت وهو حي لا يموت، بيده الخير وهو على كل شيء قدير. ها الثواب؟ قال: «من قال هذا، كتب له ألف ألف حسنة، مليون حسنة، ومحي عنه ألف ألف سيئة، ورفع ألف ألف درجة». يا الله! يكتب له مليون حسنة ويمحى عنه مليون سيئة ويرفع مليون درجة.
إيه ده، كل الثواب ده للي يقول الذكر ده؟ لا، ما أنت بتقول اهو، لا لا لا، أنت مش هتاخد الثواب ده لو قلت الذكر ده إلا لو قلته في السوق. ليه؟ لأنه مكان غفلة، كل الناس مشغولة بالطيب، حاضر هبقى بعت الذكر أو الحديث كله بقى بعته على قناة التليجرام إن شاء الله، حد بيطلب ده إن شاء الله. اللي هكتب يا جماعة برده اللي هكتب أي سؤال ومش هرد عليه هبقى رد عليه في الآخر إن شاء الله.
كل الثواب ده مش هتاخده لو قلت الذكر إلا لو قلته في السوق. أشمغنى؟ لأنه مكان غفلة، كل الناس مشغولة بالدنيا وبالتجارة بتحصيل الأموال، وده راجل قلبه معلق بالله سبحانه وتعالى، فده زمن غفلة، ده عبد ربنا في زمن غفلة فكان الثواب عظيم جداً.
خلي بالكم، إحنا كل نتكلم في شعبان،ها، يعني اللي هيعود ربنا في شعبان ده زمان غفلة، دي أول علة النبي قالها: «ذلك شهر يغفل الناس عنه بين رجب ورمضان»، فكان النبي منتبه للمعنى ده، معنى إيه؟ إحياء زمان الغفلة، وهوريكم دلوقتي النبي منتبه للمعنى ده جداً، منتبه إنه يحيي أزمنة الغفلة، يعني أهو ادي شعبان أهو خلاص، إيه تاني؟ صلاه العشاء.
إحنا هنرجع، إحنا لسه في الحته بتاعة إنه أثوب العبادة في زمان الغفلة أخفى فكانت أشق فكانت أثوب، لسه بدري احنا. لكن تعالوا نخرج كده ونشوف إزاي النبي صلى الله عليه وسلم كان مهتم بانه يحيي أزمنة الغفلة ومركز في المعنى ده؛ يعني لما صام شعبان فاتسال، فأول حاجة قالها إيه؟ زمن غفلة، فانا مش هفوتها كده الأزمنة دي. صلاة العشاء، النبي عليه الصلاة والسلام كان يا جماعة، الأذان يأذن أذان العشاء، وبعدين الصحابة يروحوا المسجد والنبي يتاخر عليهم، يتاخر يعني إيه؟ يعني لغاية أمتی؟ لغاية نص الليل. أنت متخيلين يعني العشا دلوقتي مثلاً بتاذن سبعة وشويه، راحوا مستنيين الإمام يخرج، الإمام ما خرجش، الإمام ده اللي هو النبي عليه الصلاة والسلام، فيفضل النبي عليه الصلاة والسلام ما يخرجش ما يخرجش ليه، لغاية مثلاً ١١ ونص بالليل، وهم قاعدين، لدرجة أن إيه؟ تخفق رؤوسهم، يبتدي يسقطوا وهم قاعدين.
طيب ما خرجش النبي وبعدين خرج عليه الصلاة والسلام، أول كلمة يقولها لهم إيه؟ «أبشروا، فانه لا أحد ينتظر الصلاة على وجه الأرض أو في الأرض غيركم». فهمتوا؟ يبقى النبي منتبه للمعنى عليه الصلاة والسلام، معنى إيه؟ إحنا هنعبر ربنا أهو في زمن كل الناس اللي في الكوكب، مفيش حد غيركم دلوقتي بيصلي، مفيش حد منتظر صلاة غيركم أنتم. فهمتوا؟ فالنبي مركز في الحته دي عليه الصلاة والسلام، إنه يحيي أزمنة الغفلة، ولعل من هذا إحياء ليلتي العيدين، على ما فيها من إيه؟ خلاف في تصحيح، يعني في تضعيف الحديث أو كذا، لكن على كل حال إحنا اللي بناخد به أننا نعمل بالضعيف في فضائل الأعمال، لأن برده ليالي العيد بتبقى ليالي غفلة، بس مش وقته هنجي لها بعدين إن شاء الله ونتكلم عليها.
طيب، نرجع تاني بقى: يبقى العبادة في زمن الغفلة أثوب. يبقى أنت تقعد ربنا في شعبان، عبادتك أثوب. قلنا: «للعامل منهم أجر خمسين منكم»، وقلنا حديث ذكر السوق.
وشوفوا الحديث ده كمان، وحديث جميل جداً، النبي صلى الله عليه وسلم ذكر ثلاثة يحبهم الله عز وجل. شوفوا يا جماعة الثواب، لما أقول لك ربنا بيحبهم دي حاجة عالية قوي، ربنا هيحبك لو عملت حاجة من الثلاثة دول. إيه هم الثلاثة بقى؟ الثلاثة ربنا بيحبهم، فذكر النبي صلى الله عليه وسلم أول واحد، وشوفوا السمة المشتركة بينهم إيه؟ أول واحد ربنا بيحبه: قوم ساروا ليلتهم، الناس مسافرة بالليل حتى إذا كان النوم أحب إليهم مما يعدل به، قام أحدهم يتملقني ويتلو آياتي.
نقف بقى هنا مع لفظ، ناس يا جماعة مسافرين بالليل، مش دلوقتي راكبين عربية مكيفة أو طيارة وبتنزل لهم وجبة سخنة، لا، مسافرين بالليل زمان متخيلين، حتى إذا كان النوم أحب إليهم مما يعدل به. عارفين يعني إيه الجمله دي؟ الجملة دي يعني إيه؟ لو جيت قلت لواحد بقول لك إيه، إيه رايك ما تنامش وأديك مليون جنيه؟ يقول لك لا هنام، خلي لك المليون أنا مش قادر. هو ده معنى الجملة: حتى إذا كان النوم أحب إليهم مما يعدل به، يعني مهما هتديله هيقول لك شكرا أنا عاوز أنام. قام أحدهم يتملقني ويتلو آياتي. قام واحد فيهم في الوقت ده، وقت الغفلة بقى كله نام وهو قام، فكان ثوابه إيه؟ ربنا حبه لأنه عبد ربنا في زمان غفلة.
التاني: ورجل سأل قوماً مسألة. واحد فقير دخل على مجموعة قاعدين، أنتوا بقى بتاكلوا في مطعم، راكبين عربية وماشيين سوا. يا جماعة، الحاجات دي مهمة، شوفوا معاني بسيطة إزاي. ماشي مع أصحابك نازل، الموقف فجه واحد سألكم: يا جماعة أنا فقير وعاوز. فلم يعطوه، فتخلف أحدهم سرا فأعطاه. شوفوا يا جماعة الثواب: أحبه الله. هنا عبد ربنا في إيه؟ في زمان غفل فيه الناس. خدوا بالكم يا جماعة، هو لو كان لوحده واداه، ربنا مذكرش الثواب ده عنه ليه؟ لأن زي ما قلنا أنت لما تشوف كل اللي حواليك ما بيعطيش، أنت نفسك بتيجي في حته إيه؟ ما بتعطيضش، خلي بالكم، يعني أنت كنت ممكن تبقى أسهل لو لوحدك وتطلع، إنما لما تبقوا عشرة خمسة عشر واحد وكل يقول: ربنا يسهل، هيجي عليك الدور تقول إيه: ربنا يسهلك، ونفسك بقى أصلاً بتحب الدنيا وبتحب الفلوس وبتحب القرش اللي في جيبك، فخلاص هتتبع غيرك، فكان الثواب ده اللي هو بعد كله قال له: لا، ربنا يسهلك يا عم الحج، فواحد منهم تخلف سرا -شايفين اللفظ- فأعطاه، الثواب: أحبه الله.
التالت: سرية، قوم كانوا في سرية فانهزموا وفروا، فقام أحدهم وجاه العدو فقاتل حتى قتل. يبقى عبد ربنا بعبادة من أجل العبادات، وهي الجهاد في زمان إيه؟ غفلة، كله فر وهو ثبت لوحده في زمان الغفلة، فأحبه الله.
لو ركزت في الثلاثة، إيه المعنى الجامع بين بين الثلاثة دول يا جماعة؟ أن الثلاثة عبدوا ربنا في زمان غفلة؛ الأول في زمان غفلة الرفقة عن القيام، الثاني عبد ربنا سبحانه وتعالى في زمان غفلة الرفقة عن النفقة، الثالث عبد ربنا سبحانه وتعالى في زمان غفلة الرفقة عن الجهاد عن القتال، فكان الثواب أن أحبهم الله عز وجل.
الثواب عظيم جداً: سبعة يظلهم الله في ظله يوم لا ظل إلا ظله، منهم إثنين فيهم المعنى ده. أول واحد من السبعة فيهم المعنى معنى العبادة في زمان الغفلة، قال النبي صلى الله عليه وسلم: «سبعة يظلهم الله في ظله يوم لا ظل إلا ظله: رجل ذكر الله خالياً ففاضت عيناه». يعني عبد ربنا، ذكر ربنا وهو لوحده بعيد عن الناس، عبادة خفية ما حدش شايفها، ففاضت عيناه. كلمة خالياً مهمة، وإلا ما كانش النبي قالها عليه الصلاة والسلام.
والتاني: «رجل تصدق بصدقة فأخفاها حتى لا تعلم شماله ما أنفقت يمينه». شوفوا يا جماعة ثواب العبادة المخفيه اخفاء العبادة.
طيب، يبقى ده أول معنى في زمن في العبادة في زمن الغفلة، أنه أو ثلاث معاني بقى مرتبطين ببعض، أنها أخفى فكانت أقرب للإخلاص وأبعد عن الرياء، فكانت أشق فكانت أثوب.
معنى تاني مهم جداً وركزوا فيه بقى: أن يا جماعة أهل الديانة وأهل التقوى وأهل الإيمان في زمان الغفلة يدفع بهم البلاء عن أهل الأرض. إيه ده، إيه الكلام الكبير ده؟ أولاً يا جماعة أنا يعني أحسب أن كل اللي جه الدرس ده وفتح الزوم وقعد يتفرج على الدرس ده دلوقتي، وبالذات لو على الشرط اللي احنا متفقين عليه مع بعض، أن أنت قاعد مركز في الدرس، مش فاتح الزوم وقعد برده بتعمل شغال حياتك عادي، اللي واقفه في المطبخ واقفه في المطبخ، واللي قاعد بيكسر على الفيس بيكسر على الفيس، لا، ده أنت راجل قاعد مركز في الدرس، فأحسب أن أنت حد عاوز دين ده، حد ساب كل حاجه واقتطع وقت من عمره كده لربنا.
سبحانه وتعالى. فلو أنت ده في حضرتك واحد من اللي أنا بكلمهم دلوقتي بالكلام اللي جاي، لأن الكلام ده ما يصلح أن إحنا نكلم بيه أي حد.
ماشي، اللي هو إيه بقى؟ اللي هو معنى لازم أهل الإيمان يفهموه ويتفهموه؛ لما تلاقوا الناس في غفلة، الناس بتعصي ربنا، لازم تخافوا، ولازم تترعبوا، ولازم تجروا لربنا سبحانه وتعالى في الوقت ده. وعشان كده أنا كنت عملت فيديو صغير عن ليلة رأس السنة، رأس السنة الميلادية، وقلت لكم: قوموا الليل، وصوموا النهار، وادعوا ربنا. وأنا عارف أن في بعض أهل العلم يقول بدعة، أنا عارف ده كله يعني، وأنا قلت ده في الفيديو، لكن أنا أميل إلى القول الآخر أن ده زمان غفلة، ده لازم نعمره بالطاعة؛ ليه؟ عشان المعنى ده؛ معنى أن ربنا سبحانه وتعالى يدفع عن أهل العصيان بأهل الإيمان. المعنى ده ذكر ربنا سبحانه وتعالى في القرآن، قال الله عز وجل: ﴿وَلَوْلَا دَفَعَ اللَّه النَّاسَ بَعْضَهُم بِبَعْضٍ لَفَسَدَتِ الْأَرْضُ﴾. في بعض (أو يعني في أحد تفاسير هذه الآية): ولولا دفع الله الناس بعضهم ببعض؛ يعني ولولا دفع الله عن أهل العصيان بأهل الإيمان لفسدت الأرض، كان زمان الأرض دي انتهت من زمان. لكن ربنا بيدفع عن أهل العصيان بمين؟ بأهل الإيمان. وقال الله عز وجل للنبي صلى الله عليه وسلم: ﴿وَمَا كَانَ اللَّهُ لِيُعَذِّبَهُمْ وَأَنتَ فِيهِمْ﴾؛ يعني وجودك أمان، ربنا مش هينزل عذاب وأنت موجود يا محمد عليه الصلاة والسلام. طب هو ده النبي بس؟ لأ، وأهل الإيمان كمان. النبي بيقول للصحابه: أنا أمان لأصحابي فإذا ذهبت أتى أصحابي ما يوعدون، وأصحابي أمان لأمتي فإذا ذهب أصحابي أتى أمتي ما توعدون. شفتوا يا جماعة معنى أن الرجل الصالح وجوده أمان للناس، أمان للناس بالذات لو كثر أهل الصلاح!
في حديث -أظن في مسند البزار من رواية أبي هريرة- أن النبي صلى الله عليه وسلم قال: مهلاً عن الله، مهلاً يا جماعة بالراحة على ربنا، مهلاً عن الله مهلاً! فلولا شيوخ ركع، وأطفال رضع، وبهائم رتع، لصب عليكم العذاب صباً. مهلاً عن الله مهلاً! فلولا إيه؟ شيوخ ركع، وأطفال رضع مالهمش ذنب، وبهائم رتع، بهايم ما عملتش حاجة، يا له من رجل يرحم لأجل بهيمة! البهيمة عند ربنا أحسن منه. لولا دول بقى كان إيه اللي حصل؟ لصب عليكم العذاب صباً. يبقى لولا الشيوخ اللي بتركع، لولا الناس اللي بتعبد ربنا والناس في غفلة، كان زمان العذاب نزل. وفي حديث بقى إلهي، وده يعني أصح دليل على المعنى اللي احنا بنقول عليه، قال الله عز وجل في الحديث القدسي: «إني لأهم بأهل الأرض عذاباً، فانظر إلى عُمَّار بيوتي والمستغفرين بالأسحار فأصرف عنهم العذاب».
آه، يبقى ده معنى مهم: «إني لأهم بأهل الأرض عذاباً، فانظر إلى عُمَّار بيوتي والمستغفرين بالأسحار فأصرف عنهم العذاب».
يبقى حضرتك -أما بقول حضرتك، أقصدك أنت ياللي سبت الدنيا وجيت قعدت تحضر الدرس، وده دليل على أنك عاوز ربنا وعاوز الآخرة- حضرتك عليك مهمة، مش بس نفسك، لأ، ده حضرتك عليك مهمة على أكتافك تجاه الأمة، تجاه الكوكب اللي أنت عليه. شفتوا الكلام الكبير بقى؟ آه، أنت عليك مهمة للكوكب اللي أنت عايش عليه ده؛ إيه مهمتك؟ أول ما تلاقي الناس في غفلات، لو تفتكروا يا جماعة، أو يعني اللي شاف الفيديو بتاع ليلة رأس السنة، قلت لكم: أنا لا أعلم ليلة في السنة أكثر من هذه الليلة فجورا ومجاهرة بعصيان الله عز وجل على الكوكب. وده معنى لو تخيلتوه مرعب؛ مرعب! أنتم عارفين يا جماعة، ممكن كل بلد من البلدان، أو كل أمة من الأمم، وكل ملة من الملل ليها عيد بتخرب الدنيا فيه، للاسف حتى اعيادنا احنا اللي هي المفروض اعياد دينية، تعال كدة شوف الوقفة عاملة إزاي، سواكم اللي في الشوارع ده، سيبك من اللي بتشوفه الشوارع، البهدله والمسخرة، لا، ده روح بقى الناس اللي بتشرب والناس اللي يعني الله يعافينا، آه. كل أمة من الأمم ليها عيد بتخرب الدنيا فيه، لكن شوفوا المعنى بقى المرعب الثاني، اللي هو إيه؟ أن ليلة رأس السنة الميلادية دي الكوكب كله بيخرب الدنيا فيها، معنى مرعب، مرعب لو تخيلتوا أن أعظم ليلة يعصى الله عز وجل فيها ليلة رأس السنة. ولذلك ما كانش أنا ساعتها قلت: ما ينفعش تعدي كده، ما ينفعش حضرتك تبقى نايم، مش هقول لك ما ينفعش تعصي، ما ينفعش تبقى قاعد مرتاح، أنت لازم تبقى قلقان، لازم تبقى قلقان! ربنا سبحانه وتعالى ممكن ينظر في هذه الليلة لأهل الأرض، فتنزل الكلمة منهم بإهلاك الناس دي خلاص.
فكذلك أزمنة الغفلة بقى، أي زمان غفلة ترعب، أول ما تيجي زمان كده، زمان غفلة الناس غفلة فيه -مش هقول كمان بيعصوا، غفلة عن عبادة ربنا سبحانه وتعالى- أنت على طول تنط كده، تقوم: هصلي، هصوم، أقرأ قرآن؛ ليه؟ «إني لأهم بأهل الأرض عذاباً، فانظر إلى عُمَّار بيوتي والمستغفرين بالأسحار فأصرف عنهم العذاب». ماشي.
ولذلك النبي صلى الله عليه وسلم قال: «عبادة في الهرج كهِجْرة إليَّ»، أو «عبادة في الفتنة كهِجْرة إليَّ». يبقى ده معنى تاني في إعمار أزمنة الغفلة، أن ربنا سبحانه وتعالى يدفع العذاب عن أهل الأرض بأهل الإيمان: لولا الذين لهم ورد يصلون، وأخرون لهم سرد يصومون، لدُكَّت أرضكم من تحتكم سحراً، لأنكم قوم سوء لا تطيعون.
طيب، المعنى الثاني اللي النبي صلى الله عليه وسلم ذكره في شعبان؛ يبقى أول معنى أن شعبان زمان غفلة، فيبقى حضرتك لازم تكثر من العبادة في شعبان، اللي هي إيه العبادة؟ هنعرف إن شاء الله. لكن في معنى تاني النبي ذكره، قال: «ذلك شهر يغفل الناس عنه بين رجب ورمضان، فيه ترفع الأعمال إلى الله تعالى، وأحب أن يرفع عملي وأنا صائم».
آه، معنى في غاية الأهمية يا جماعة، اللي هو معنى إيه؟ بلاويك بتاعة السنة كلها بتترفع لربنا وتتعرض عليه في الشهر ده. فأنا هضرب لكم مثال عشان تفهموا المعنى ده أو قربوا الأذهان اللي بيسمع، تخيل كده حضرتك بين إيد ملك من الملوك، وبعدين الملك ده المخابرات العامة بتاعتة ولا أمن الدولة جايبين له تقرير عن حضرتك، وأنت واقف قدامه قدام الملك ده، وماسك بقى هو التقرير بتاعك كده وبيقرا في التقرير، فبيلاقي أن أنت في اليوم الفلاني عملت بلاوي بقى، هو بيقرا بلاوي عنك دلوقتي، في اليوم الفلاني عملت كذا، واليوم الفلاني عملت كذا، وبعدين يبص في التقرير ده ويرروح بصص لك، يلتفت إليك، فحين التفاته يرى منك وجلاً وخوفاً وانكساراً وذلاً وعيناً باكية وندماً على ما فعلت.
طيب، تخيلوا أنا مش هقول (دي لقطة)، تخيلوا السيناريو ده أو المشهد ده، مشهد تاني بقى وهو بيقرا كده وحين التفاته إليك يراك لا تعبأ به؛ واقف بقى عمال تصفر وتغني وتبص في السقف وتهرش في دماغك! إيه رأيكم، فهمتوا؟ ولله المثل الأعلى، هو ده اللي النبي عاوز يقوله يا جماعة، أنا مش بحكي حواديت، ده اللي النبي بالضبط عاوز يقوله عليه الصلاة والسلام، قال: «فيه ترفع الأعمال إلى الله، وأحب أن يرفع عملي وأنا صائم». ده ربنا بيشوف عملي دلوقتي، فلما ربنا -خلي بالكم- النبي صلى الله عليه وسلم اللي هو أكثر الناس عبادة وأكثر الناس إخلاصاً وأكثر الناس كل... يعني حط كل شيء هو أكثر الناس كل شيء عليه الصلاة والسلام، ومع ذلك يقول الكلام ده، تخيل بقى حضرتك ببلاويك بصحافتك السوداء، كل ده بيعرض على ربنا، فربنا يرى منك وقت العرض ذلاً وانكساراً وصوماً وأعمالاً تتقرب به إليه سبحانه وتعالى، إيه رأيكم؟
شهر شعبان هو شهر رفع الأعمال السنوي. خلي بالكم يا جماعة، إاحنا عندنا الأعمال بترفع، إاحنا عندنا كذا عرضة؛ في عرض يومي، وعرض أسبوعي، وعرض سنوي، اللي هو عارفين بتوع المحاسبة يسموه إيه؟ الحساب الختامي، عارفين الحساب الختامي؟ ده الحساب الختامي. وعلى فكرة يعني أنا يعني عارف الاحاديث كده تحسها أن شهر شعبان ده كأنه نهاية السنة وأول السنة، يعني تحس كده في ليه خصيصة كده يعني، شعبان بيترفع فيه الأعمال وتعرض على ربنا، وتحس كأنه زي ما بقول لك كده حساب ختامي، السنة خلصت. وبعدين في معنى تاني هنتكلم عنه في ليلة النصف من شعبان إن شاء الله الاسبوع الجاي أو حاجة، أن فيه تُنْسَخُ الآجال؛ آجال يعني الناس اللي هتموت السنة الجاية كلها، ربنا بيدي كتاب كده للملائكة، دي أسماء الناس اللي هتموت السنة، السنة الجاية دي، وكان شهر شعبان ده كأنه نهاية حاجة وبدايه حاجة، تحسوه كده.
طيب، نرجع للمعنى، سيبكم بقى من نسخ الآجال هنتكلم عنه إن شاء الله كمان مرتين كده ولا حاجة. عندنا الأعمال في عرض يومي، وفي اليوم بتتعرض، الأعمال بترفع مرتين في اليوم، وعرض أسبوعي في يومين في الأسبوع، وعرض سنوي أو أو رفع الأعمال بقى السنوي اللي هو في شعبان.
إيه العرض اليومي؟ اللي هو الصبح وبالليل، يتعاقبون فيكم ملائكة؛ ملائكة بتنزل الصبح وملائكة بتنزل بالليل، وردية كده زي ورديات، وبيجتمعوا فين؟ في صلاتي الفجر والعصر، تجتمع الملائكة بقى (يعني تسليم الوردية)؛ يعني ملائكة بتنزل الصبح وملايكة بتنزل بالليل، يجتمعوا، الاجتماع بتاعهم إيه؟ تسليم الوردية، تسليم وتسلم، بيحصل في صلاه الفجر وصلاة العصر. يجتمعون، فيسألهم الله عز وجل: كيف وجدتم عبادي؟ فيقولون: أتيناهم وهم يصلون، وتركناهم وهم يصلون.
بالله عليك، اللي بتنام عن صلاه الفجر يعني إيه؟ إيه؟ ربنا قال في القرآن: ﴿إِنَّ قُرْآنَ الْفَجْرِ كَانَ مَشْهُوداً﴾ [الإسراء: 78]. عارفين يعني إيه كان مشهوداً؟ قالوا: تشهده ملائكة الليل والنهار، اللي هما الوردين دول اجتمعوا في صلاة الفجر، فقرآن الفجر مشهود، ليه اتسمى مشهود؟ ﴿إِنَّ قُرْآنَ الْفَجْرِ كَانَ مَشْهُوداً﴾ تشهده ملائكة الليل والنهار، الورديتين بيحضروا قرآن الفجر، حضرتك فين بقى؟ حضرتك نايم! حضرتك يعني في دنيا تانية! فيبقى في ملايكة بتحضر وتاخد أعمالك ترفعها، والتانيين وهكذا، ليل نهار شغالة الحكاية دي: كيف وجدتم عبادي؟ أتيناهم وهم يصلون وتركناهم وهم يصلون.
يبقى ده العرض اليومي. عندك عرض أسبوعي، اللي هو يوم الاثنين والخميس، عرض أسبوعي اللي هو الاثنين والخميس؛ فبرضه في حديث أن فيهما ترفع الأعمال إلى الله عز وجل، والنبي كان بيصوم الاثنين والخميس وذكر أن علة الصوم كده برضه، كان بيصوم الاثنين والخميس ولا ماتسأل ليه بتصوم اثنين وخميس، قال: «فيهما ترفع الأعمال إلى الله، وأحب أن يرفع عملي وأنا صائم». نفس المعنى اللي في شعبان يا جماعة، نفس المعنى! يبقى العرضة الأسبوعية وهي بتحصل حضرتك صايم، العرضة السنووية وهي بتحصل حضرتك صايم، العرضة اليومية وهي بتحصل الفجر، بعد الفجر بتقعد تقول أذكار وقاعد للشروق.
شوفوا يا جماعة معاني تانية بقى للعبادة! آه، ده جلسة الشروق دي طلع ليها معنى تاني خالص، معنى إيه؟ أن العمل وهو بيرفع، أنت بتعمل إيه في الوقت ده؟ قاعد بتذكر. طب بعد العصر، أذكار المساء، اتكلمنا عن عن إيه؟ قاعدة من قواعد السير إلى الله عز وجل: ﴿وَاسْتَعِينُوا بِالْغَدْوَةِ وَالرَّوْحَةِ وَشَيْءٍ مِنَ الدُّلْجَةِ﴾، وقلنا الغدوة أول النهار، الروحة آخر النهار، هما دول الوقتين. عرفتوا ليه الوقتين دول يا جماعة؟ بصوا الدين كله مربوط ببعضه إزاي؟ الغدوة أول النهار، الروحة آخر النهار، ده حديث النبي، استعينوا عليه الصلاة والسلام، ودي كانت قاعدة معانا: استعينوا بالغدو أول النهار والروحة (يعني اقعد في الوقتين دول) وشيء من الدلجة (يعني بالليل).
طب اشمعنى الوقتين دول؟ اللي معاني منها المعنى ده: وقت العرض، فربنا يبص يلاقيك قاعد في المسجد قعدة الشروق، ربنا يبص يلاقيك بتقول أذكار المساء بعد صلاة العصر، واضح؟ يجي يبص عليك الاثنين وأعمالك بقى وبلاويك تعرض عليه، بلاوي الأسبوع، فيلاقي صايم، الخميس يلاقيك صايم.
كان بعض السلف إذا أتى يوم الخميس بكى إلى زوجته وبكت إليه، يقعد يعيط ويقول: الآن يعرض عملي على الله! ما هو معنى يا جماعة، معنى فعلا يأثر.
طب جه شعبان، فبيتعد- فبيتفرد بلاوي السنة، أقعد بقى أفكر في بلاوي السنة، وتخيل أن ربنا سبحانه وتعالى خلاص بقى بيعرض عليه الكلام ده بتاعك ده، فينظر إليه سبحانه وتعالى فيجد منك الصوم والأخبار والخضوع والذل والانكسار والخوف منه سبحانه وتعالى، والرجاء والطمع في رحمته وكرمه وعفوه، يجد منك هذا، إيه رايكم؟ ولا يلاقيك بقى زي صاحبنا اللي كان بيبص في السقف وبيهرش في دماغه وفاتح الفيسبوك وقاعد على الواتساب ولا في دماغه؟ فهمتوا يا جماعة؟
يبقى ذلك شهر بين رجب ورمضان يغفل الناس عنه، فيه تعرض الأعمال إلى الله، أو فيه ترفع الأعمال إلى الله، وأحب أن يرفع عملي وأنا صائم.
طيب، يبقى احنا نعمل إيه في شعبان؟ يبقى دول المعنيين اللي من أجلهم نحتفي بشعبان. طب إزاي نحتفي؟ يعني هنصوم أول حاجه، وادينا عرفنا اهو الصوم في شعبان، وهنتكلم عن الصوم في النص التاني من شعبان، بس مش هينفع النهارده عشان الوقت؛ لأن في أحكام فقهية في الحتة دي. لكن هتكثر من الصوم في شعبان، يعني اصوم شعبان إيه؟ تقدر تصوم شعبان كله صومه، إلا يومين في الآخر كده ولا حاجة خلاص؟ لا مش هقدر أصوم كله، تكثر من الصيام في شعبان. يبقى دي أول وظيفة من وظائف شعبان.
الوظيفة الثانية أن شعبان يا جماعة هو تمرين لرمضان، فتكثر من عبادات رمضان، اللي هي عبادات رمضان تكثر؟ احنا قلنا من الصوم، يبقى بتدرب لرمضان، قراءة القرآن رمضان طبعا ليه خصيصة مع القرآن.
فتكثر من القرآن في شعبان، وكانوا يسمون شعبان شهر القراء، قراء القرآن. وكان بعضهم إذا دخل شعبان أغلق حانوته وتفرغ للقرآن. يعني واحد تاجر عنده محل، يدخل شعبان يقفل الدكان وخلاص، دخل شعبان، شعبان ورمضان احنا قافلين، مغلق للتحسينات. تحسينات إيه؟ تحسينات القلب، وتحسينات النفس، وتحسينات كل حاجة، مش تحسينات المحل والتجارة والدنيا اللي هتروح، لا، مغلق للتحسينات انتهت خلاص.
يبقى تكثر، يعني إيه تكثر من القرآن؟ يعني تجيب، زي بعضه، مش هنقول ستين ختمة زي رمضان، هات لك ثلاثين ختمة في شعبان. الإمام الشافعي كان ليه ستين ختمة في رمضان في غير الصلاة، ما تقولش بقى إزاي، دي بركة في الوقت، وأنت نفسك بتحس ده، يعني تلاقي يوم إيه تصحى كده تقول إيه اليوم ما عفرت، ويوم تاني تصحى تقول هو اليوم مش راضي يخلص ليه؟ أنت بتحس بالبركة في الوقت بنحسها، ودي مش حواديت قبل النوم، لا، يعني روينا عن ناس عايشة بينا، أو يعني كانت إلى قريب، الشيخ ابن قاعود مثلاً روينا عنه إن هو كان ليه ستين ختمة في رمضان، فيعني حتى من الناس المحدثين، آه، كان في ناس بتعملها خلاص.
وفي ناس بقى من دلوقتي، يعني شفنا اللي بيجيب ختمة في ركعة، شفناها، أنا مش بتكلم مع ناس ما أعرفهاش، واحد بيقف يجيب ختمة في ركعة، الشيخ أسامة عبد العظيم حفظه الله، وهو راجل جاوز السبعين من عمره، كان، يعني آخر حاجة أعرفها عنه، بيختم في الثلاث ليالي مرتين، في الثلاث ليالي مرتين، يعني بيجيب الخاتمة في يوم ونص بالناس اللي بتصلي وراه.
خلاص فآه في ناس عايشة بينا في حتة تانية خلي بالكم، والناس دي أنا دايماً أقول، بالذات حد زي الشيخ أسامة حفظه الله، الناس دي أقامها الله عز وجل بين أظهرنا حجة علينا، عشان تيجي يوم القيامة تقول له يا رب الزمن والوقت، يقول لك كان في حد اسمه أسامة عبد العظيم معاكم وبيعمل واحد اتنين تلاتة، يعني أحسبه كذلك، طبعاً أنا لا أزكي على الله أحداً، لكن حجة لله عز وجل بين أظهرنا، الشيخ أسامة عبد العظيم، الشيخ الدبسي، الناس دي حجج لله عز وجل على أمثالنا.
الشيخ أسامة عبد العظيم مرة، يعني واحد من إخواننا إيه بيصلي وراه، وبعدين أبوه، أبوه كان أظن ظابط جيش أو حاجة، وبعدين بيقول له يا ابني أنت بتصلي فين؟ قال له عند الشيخ الفلاني، طب ما آجي أصلي معاك، راح. وبعدين فبيحكي بعدين بقى لشيخ تاني، يعني بيقول يا شيخ دخلت أصلي أنه يركع! أبداً. والراجل بقى إيه يعني ليه جيش، بيقول لدرجة قلت إيه، طب هقعد، وبعدين قلت طب أنا لو في مجند واقف بيصلي وشافني قعدت، فبيقول له بقيت أدعي ربنا الأرض تشقق بلعي، على كل حال.
فكنَّا بنقول إيه بقى؟ أما بخرج كده إيه بيبقى صعب أرجَع تاني شوية. فاحنا نكثر من العبادة في شهر شعبان للمعاني دي، وهو شهر القراء، فنكثر من قراءة القرآن، أكثر أكثر، يعني خلاص مركز، اللي يقدر يقلل شوية من شغله يقلل من شغله، اللي يقدر يسيب الشغل، اللي يقدر، يعني كان السلف يعملوا كده، يحوشوا عشان يدخل شعبان ورمضان، خلاص دول مغلق للتحسينات انتهت.
يبقى صيام، قراءة قرآن، صدقة، وكان بعض السلف يخرج زكاة ماله في شعبان، لأن طبعاً أنتم عارفين الصدقة من وظائف رمضان برضه، النبي صلى الله عليه وسلم كان أجود بالخير من الريح المرسلة، وكان أجود ما يكون فين؟ في رمضان. فدي من وظائف رمضان، فتستند للوظيفة دي من شعبان، إنك تكثر من الصدقة، حتى لو زكاة مال.
وكان زي ما قلت لكم، بعض السلف يخرج الزكاة مش في رمضان، في شعبان، ليه؟ ليعين الفقراء على العبادة في رمضان، عشان يبقى الفقير قلبه خلاص معايا فلوسي اللي هتقضي، فأنار متفرغ لعبادة ربنا سبحانه وتعالى في رمضان. فدي من الوظائف بتاعة شعبان، إنك تتصدق. من وظائف شعبان كذلك القيام، وخلاص وهنتكلم على ليلة النصف من شعبان كمان، مرتين بالذات الليلة دي بالذات ليها خصيصة هنبقى نتكلم عنها إن شاء الله، فتبقى برضه تبتدي تتدرب على القيام في شعبان.
فدي الوظائف بتاعة شعبان، مش عاوزين نطول عن كده، خمسين دقيقة كفاية قوي، نشوف لو في أي أيه أسئلة بقى.
طيب، ممكن تقول لنا جدول شعبان؟ أظن أنا جاوبت على ده. أهم ثواب شهر شعبان؟ أظن برضه جاوبت. ما فيش أسئلة تانية خلاص.
طيب، أقول قولي هذا، واستغفر الله العظيم لكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.