الشيخ أمجد سميرأعوذ بالله من الشيطان الرجيم. بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على محمد النبي وأزواجه أمهات المؤمنين وذريته وأل بيته، كما صليت على آل إبراهيم، إنك حميد مجيد.
اليوم الدرس مختلف شوية، أو طريقته يعني مختلفة شوية. هنتكلم فيه عن مسألة مهمة جدا، هو أصل الدرس هنتكلم فيه عن ليلة النصف من شعبان إن شاء الله، لكن قبل ما نتكلم عن ليلة النصف من شعبان عاوزين نأصل المسألة يا جماعة. نحن طبعا المرة اللي فاتت، الدرس اللي فات، نحن أصلنا مسألة، وهي في موضوع الاختلاف بين العلماء، وواجبنا تجاه هذا الاختلاف، وأزاي أن العلماء كانوا يرون الاختلاف رحمة بهذه الأمة، خلافا لما يعتقده البعض الآن. النهارده برض عاوزين نأصل المسألة الأول قبل ما نبتدي نتكلم عن ليلة النصف من شعبان، لأن يبنى على هذه المسألة كثير من العمل، ومنه العمل في ليلة النصف ويوم النصف من شعبان، وهي مسألة العمل بالحديث الضعيف في فضائل الأعمال.
المسألة دي مهمة جدا؛ القول المشهور عند الناس دلوقتي أن الحديث الضعيف ده تسمع كلمة حديث ضعيف دي يعني ارميه، يعني مالكش دعوة بيه، والحقيقة ده خلافا لجماهير أهل العلم، إن لم يكن إجماعا. بعض العلماء ذكر اتفاق العلماء، ده لفظ النووي مثلا، وبعضهم ذكر الإجماع صراحة، إجماع العلماء صراحة زي الطوفي، على أن الحديث الضعيف يعمل به في فضائل الأعمال. إيه بقى الكلام الكبير ده؟ ركزوا معايا دلوقتي يا جماعة؛ نحن عندنا الدين إما أحكام حلال وحرام، يعني ده حلال وده حرام، ده آه نتشدد فيه، أو نتشدد في الأسانيد، ونفتش عن حال الرجال، رجال السند لما نجي نروي حديثا في الأحكام في الحلال والحرام. يعني إيه سند؟ أنا طبعا قدامي بيبقى ناس مستويات مختلفة، فبضطر أنزل شوية وأطلع شوية بالكلام. يعني إيه سند؟ السند الحديث يا جماعة، يعني لما نقول إيه عن فلان عن فلان عن فلان عن فلان عن النبي صلى الله عليه وسلم أنه قال كذا وكذا، عن فلان عن فلان عن فلان، ده بنسميه سند. النبي صلى الله عليه وسلم قال كذا وكذا، قال دي اللي هو الجملة يعني دي، أو الكلام اللي قاله النبي عليه الصلاة والسلام، ده بنسميه متن، متن الحديث.
فاحنا نفتش بقى عن حال السند، وعن أحوال الرجال، رجال السند دي، يعني مين فلان ده؟ ومين فلان ده؟ ومين فلان ده؟ ونتشدد في المسائل دي لما نجي نروي في الأحكام في الحلال والحرام. وزي ما قلت لكم كده، وفي فضائل الأعمال بقى وفي الترغيب والترهيب، يعني إيه فضائل الأعمال؟ يعني مثلا ثواب مخصوص يذكر في قيام ليلة النصف من شعبان أو في صيام نهارها، ده فضائل أعمال، يعني حديث يحث على فضيلة من فضائل الأعمال، حينها العلماء لا يتشددون في السند، بل يرون الضعيف، وما رووه إلا ليعمل به. تاني، العلماء يروا الضعيف في فضائل الأعمال، وليه رووه؟ عشان يعمل به، خلاص، وهنتكلم في تفصيل الحاجات دي. فاللي احنا بنقوله ده بقى مذهب جماهير أهل العلم، إن لم يكن إجماعا، يعني إذا ما كانش إجماع فهو قول الجماهير، واضح؟ وزي ما قلت لكم نقل الاجماع الطوفي، أو ذكره يعني، وذكره بلفظ الاتفاق الإمام النووي وغيرهما.
الأول طبعا أنا بس هو أنا صوتي واضح كده يا جماعة؟ لو حد بس يكتب، يعني الصوت واضح كده؟ ولا لو ممكن حد يكتب لي لو الصوت واضح أو مش واضح؟
طيب، طبعا القول المشهور دلوقتي عند الناس زي ما قلت لكم، أن الحديث الضعيف ده ارمي وما تبصش. فاحنا عاوزين نوصل المعنى ده بقى، زي ما المرة اللي فاتت أصلنا معنى الاختلاف وكيف كان يراه أهل العلم، النهارده عاوزين نتكلم شوية في المسألة دي. خلوني أبدا ننقل أو نذكر بعض النقولات عن أهل العلم، وأنا أبدا بشيخ الإسلام ابن تيمية؛ لأنه معظم عند الطوائف التي تتشدد في هذه المسألة الآن. يعني أنا بدأت به مع جلالة غيره، ويمكن أنا هجيب لكم كلام عن عبد الرحمن بن مهدي وعن أحمد بن حنبل، وهؤلاء أجل من شيخ الإسلام ابن تيمية، لكن أنا أبدأت به ليه؟ علشان هو معظم في مثل هذه المسائل عند طوائف الآن تتشدد في مثل هذه المسائل. فشيخ الإسلام في مجموع الفتاوى دي بيقول إيه بقى؟ يقول شيخ الإسلام: لكن أحمد بن حنبل وغيره من العلماء جوزوا أن يروى في فضائل الأعمال ما لم يعلم أنه ثابت، إذا لم يعلم أنه كذب.
بيذكر دلوقتي عن الإمام أحمد بن حنبل وعن غيره أنهم جوزوا في فضائل الأعمال أنه يروى ما لم يعلم أنه ثابت، بس بشرط أنه لا يعلم أنه كذب، يعني ما يكونش راويه معروف بالكذب أو وضاع للحديث. ودي بقى ألفاظ أنا مش هينفع أقرف معاها كتير، لكن يا جماعة الحديث الضعيف ماهوش كله درجة واحدة، الحديث الضعيف فيه ضعيف، وفي حديث يصل أنه كذب على الرسول عليه الصلاه والسلام وحديث موضوع مكذوب، فده لو واحد معروف متهم بأنه بيكذب على النبي عليه الصلاة والسلام، أو بيضع الحديث، لا يروون عنه حتى في فضائل الأعمال، واضح؟
يقول شيخ الإسلام: وذلك أن العمل إذا علم أنه مشروع بدليل شرعي، وروي في فضله حديث لا يعلم أنه كذب، جاز أن يكون الثواب حقا. ودي مسألة مهمة جدا يا جماعة. هو واحد هيقول لي: إحنا ليه نروي الضعيف في فضائل الأعمال؟ عشان يا جماعة ببساطه، ممكن حضرتك قلبك ينبعث لثواب مذكور في حديث ضعيف، نجي مثلا ليلة معينة أو يوم معين هنقول لك صوموا، خلاص، مثلا يوم المسألة بتاعي إحنا هنتكلم عن ليلة النصف من شعبان ويوم النصف من شعبان، لما نجي نقول لك صوم يوم النصف من شعبان، تقول لي: ليه أصوم؟ أقول لك: والله الصيام مستحب عموما، فتلاقي قلبك مش منبعث قوي، أقول لك: طب يا سيدي ده 13 و14 و15 من كل شهر هجري بصام، ودي سنة ثابته وفيها أحاديث، فتلاقي برض قلبك ممكن ما ينبعث، لما نجي أقول لك: اليوم ده بالذات بقى مروي في حديث ضعيف أن يصوم النبي صلى الله عليه وسلم، أمر به، يعني روي عنه أنه أمر بصيام نهاره وقيام ليله، وأن في الليلة دي يغفر لجميع الخلق إلا كذا وكذا، هيأتي معنى الأوصاف اللي هي مستثناة من المغفرة، أو أن الله عز وجل ينزل إلى السماء الدنيا فيقول: ألا مستغفر فأغفر له؟
ألا تائب فأتوب عليه؟ ألا سائل فأعطيه؟ إلى آخر هذا الكلام. فقلبك حينها ينبعث إلى العمل، ينبعث للقيام، ينبعث للصيام، حتى لو الحديث ضعيف، لكن في الثواب ده فما تسمع الثواب ده قلبك ينبعث، واضح؟ ولذلك هنا شيخ الإسلام بيقول ده: وذلك أن العمل إذا علم أنه مشروع بدليل شرعي، وروي في فضله حديث لا يعلم أنه كذب، ماهوش عن واحد كذاب أو واحد بيضع الحديث، جاز أن يكون الثواب حقا، يمكن الله أعلم، ولم يقل أحد من الأئمة إنه يجوز أن يجعل الشيء واجبا أو مستحبا بحديث ضعيف، وده اللي إحنا لسة قايلينه في الحلال والحرام لا، واضح؟ ومن قال هذا فقد خالف الاجماع. ده كلام شيخ الإسلام تيمية.
خلونا قبل ما نكمل يا جماعة بقية المرويات أو الآثار اللي إحنا جايبينها لكم، أو الكلام المذكور عن أهل العلم، عاوزين نفهم حته كده؛ عشان ده هيفهمني قوي الكلام. الحديث الضعيف الذي نعمل به في فضائل الأعمال ذكر بعض أهل العلم له شروطا، أي حديث ضعيف ناخده ونعمل به، ولا في شروط؟ ذكر بعض أهل العلم شروط الحديث الضعيف الذي يعمل به في فضائل الأعمال، فمن هذه الشروط مثلا المذكورة: أنه يكون يندرج تحت أصل عام في الشرع، أصل عام ثابت بغيره من الأحاديث، أو بغيره من الأدلة عموما. يعني إيه المسألة دي مثلا؟ لما نجي نقول لك في ليلة النصف من شعبان أو يوم النصف من شعبان، لما نجي نقول لك: صوم اليوم ده، أو قوم الليلة دي، فهل إحنا بنثبت عبادة ماهياش ثابتة في الشرع؟ لا. ازاي؟ هاقول لك إن زي ما قلت لك بقى، الصيام أصلا مستحب في الشرع عموما مطلقا، الصيام مطلقا مستحب، ادي أول أصل اهو، يعني شوف صيام يا جماعة النصف من شعبان ده هيندرج تحت الأصل ده، استحباب الصيام عموما في الشرع.
الأصل التاني هيندرج تحته، وده ثابت، ده طبعا ثابت بادله، لو جيت قلت لك في أدلة أن الصيام مستحب أنت نفسك هتجاوب، صح كده؟ يبقى ده أصل ثابت اهو. أصل تاني ثابت يندرج تحته هذا يندرج تحته هذه العبادة صيام النهار يوم النصف، اللي هو إيه؟ اللي هو تأكد استحباب أو الإكثار استحباب الإكثار من الصوم في شعبان بخصوصه، شهر شعبان النبي صلى الله عليه وسلم كان يكثر من الصوم فيه، وده اتكلمنا في درس كامل عن المعنى ده، خلاص، أنه كان حديث حديث أسامة لما قال له: لا أراك تصوم من الشهور ما تصوم في شعبان فكان يكفر يصوم في شعبان. يبقى ده كمان أصل يندرج تحته اليوم ده يوم النصف من شعبان. أصل ثالث اللي لسة قايلينه من شوي، اللي هو صيام 13 و14 و15 من كل شهر هجري وده يوم 15، ادي كمان أصل يندرج تحته. كل كل الأصول دي يا جماعة ثابتة بغير ما نقول حديث ضعيف في خصوص فيه فضل زائد في هذا اليوم بعينه، يبقى تحت ثلاثة أصول عامة.
واضح؟ يبقى كده ده أول شرط يذكر بعض أهل العلم، مش كل العلماء بيسهل بيذكر الشرط ده خلي بالكم، لكن أنا هاقول لكم الشروط اللي. يبدأ أول شرط: أن يكون يندرج تحت أصل عام ثابت في الشرع. طب قيام ليلة النصف من شعبان إحنا هنيجي للأحاديث بتاعة المسألة، لكن هل تندرج؟ أه طبعا تندرج، قيام الليل ده أصل ثابت ولا مش أصل ثابت؟ ده أصل ثابت في الشرع، يعني أي ليلة لو قمتها في أدلة كتير في استحباب ذلك، صح ولا لا؟ يبقى ده أصل ثابت في الشرع.
طيب يبدأ أول شرط. تاني شرط قالوه: أن لا يشتد ضعف الحديث، إحنا لسة قايلين أن ما يكونش حديث يصل إلى درجة أنه كذب أو يصل إلى درجة الوضع. إزاي؟ ما يكونش في السند واحد معروف أن هو وضاع أو واحد كذاب، فيبقى يبقى هو ماهواش ضعيف، يعني لا يشتد ضعف الحديث، كما يذكر أهل العلم. وثالث شرط ذكروه، يعني ده في مسألة الأداء فقط مش أكتر، أن هو لا ينقل على وجه الإثبات إلى النبي صلى الله عليه وسلم، بل ينقل بلفظ مثلا روي عنه أنه قال كذا وكذا، يعني دي مسألة إيه في أداء الحديث بس مش أكثر. لكن يبقى يندرج تحت أصل عام ثابت وما يشتد ضعفه، واضح الكلام ده؟
طيب إحنا كده قلنا لكم كلام ابن تيمية عليه رحمه الله، الإمام النووي في كتاب الأذكار بيقول إيه بقى؟ قال العلماء من المحدثين والفقهاء وغيرهم: يجوز ويستحب. شوف الإمام النووي هنا، الإمام النووي يا جماعة فقيه ها، الإمام النووي من أجل فقهاء الشافعية، أنا ليه بقول الكلام ده؟ لما النووي يقول لك يستحب، فهو مركز في اللي بيقوله، يعني الإمام مش واحد زينا كده يرمي كلامه خلاص، فبيقول لك: قال العلماء من المحدثين والفقهاء وغيرهم: يجوز ويستحب العمل في الفضائل والترغيب والترهيب بالحديث الضعيف، ما لم يكن موضوعا. شوفوا هنا الإمام النووي اشترط شرط واحد، ما لم يكن إيه؟ موضوعا. ما قالش يندرج تحت أصل عام، ما ذكرش الشرط ده، قال لك إحنا إيه ذكرنا ابن حجر ذكر الشرط ده عليه رحمه الله، إنما هنا ما ذكروه، هيجي كمان شوية كلام أحمد الإمام أحمد ما ذكر شرط أن يندرج تحت أصل عام ثابت في الشرع مثلا. لكن على كل حال ماشي، يعني حتى لو كده، فالإمسألة اللي معانا اللي هو صيام يوم 15 وقيام الليلة دي بعينها ده يندرج تحت أصول عامة ثابتة في الشرع، فمافيش فيه إشكال.
الطوفي بيقول: فان قيل ودي بقى مسألة مهمة جدا يا جماعة، لأن الطوفي هيذكر إشكال ويرد عليه، خلاص، ركزوا في كلام الطوفي. يقول: فان قيل، كان في اعتراض واحد هيعترض على الكلام، فان قيل: العبادات ونحوها من فضائل الأعمال إنما يتلقى عن الشرع، فاذا وقعت اعتمادا على الحديث الضعيف، كان ذلك اختراع عبادة وشرعا في الدين ما لم يأذن به الله عز وجل، وهو مذموم شرعا. إشكال واحد هيجي يقول يا جماعة: أنتم بتقولوا إيه بس؟ ده فضائل الأعمال دي مش عبادة؟ مش هي عبادة؟ أنت هتقوم تصلي وهتصوم! الطوفي بيذكر الإشكال: العبادة حتى لو في فضائل الأعمال إنما يتلقى عن الشرع، فلو عملتها اعتمادا على الحديث الضعيف كان ذلك اختراع عبادة وشرعا في الدين ما لم يأذن به الله، وهو مذموم شرعا. قلنا: الطوفي بقى بيجاوب: ليس هذا من باب اختراع العبادات.
وشرع ما لم يأذن به الله عز وجل، بل هو من باب ابتغاء فضل الله تعالى بضعف الأمارات.
ثم إن ركزوا في الكلمة الجاية جداً دي بقى، لطيفة: ثم إن إجماع العلماء على جواز العمل به يدفع هذا السؤال؛ لأن إجماعهم أقوى منه، حتى لو لم نسلم للطوفي الإجماع؛ لأن هل في من العلماء من ذكر عنه خلاف هذا القول؟ اه طبعا طبعا؛ زي ابن العربي، وزي الإمام مسلم، على خلاف في فهم كلام الإمام مسلم. خلي بالكم؛ لأن المحدثين دلوقتي من أشهر الناس اللي لما يجوا يتكلموا، المحدثين عن الناس اللي عايشة المعاصرين يعني، يجوا يتكلموا يقولوا لك: اللي هو القول المشهور عندنا دلوقتي، اللي هو الناس، كل الحديث ضعيف ده، يعني يرميه في البحر، يقولوا مين؟ البخاري ومسلم! يقول لك: البخاري ومسلم دول ما كانوش ياخدوا بالضعيف. والاثنين في ناقشه في مذهب البخاري ومسلم؛ يعني الإمام مسلم ذكر كلاماً في مقدمته اختلف العلماء أصلاً في فهمه، والإمام البخاري لم يسلم كل العلماء بأنه ده مذهبه أصلاً؛ أنه لا يأخذ بالضعيف.
بدليل يا جماعة أن الإمام البخاري نفسه لما صنف في فضائل الأعمال والأدب، الأدب المفرد للإمام البخاري لم يشترط فيه الصحيح؛ يعني لم يشترط شرطه في صحيحه. إحنا عارفين صحيح الإمام البخاري ده مشهور، والإمام البخاري معظم المتبجل حتى لو واحد حتى العامه اللي ما يعرفوش، يقول لك إيه: هو إحنا غلطنا في البخاري؟ هو حتى ما يعرفش مين البخاري، فهو معظم المتبجل رحمه الله، وصحيحه الكتاب المعروف. لكن مثلاً الأدب المفرد، والصحيح طبعا كان يتشدد فيه جداً الإمام البخاري. لما صنف الأدب المفرد، ما صنفهوش على شرط الصحيح، واضح؟
فعلى كل حال، حتى البخاري ومسلم لا يسلم بمذهبه ما في هذه المسألة. لكن من الناس اللي قال، اه يعني عند زي ما قلنا: ابن العربي المالكي ده ليه نص صريح في أن الحديث ضعيف لا يعمل به مطلقاً. ومن المحدثين بقى الشوكاني مثلاً قال بذلك. يعني ممكن نطلع كده كم واحد قالوا ده، خلاص. لكن نصوص العلماء القدامى بالذات توحي أن ده كان المسلم بينهم أصلاً، توحي كده.
فالطوفي بيقول لك: لا لا لا، إحنا، إحنا يا جماعة مش بنشرع ما لم يأذن به الله، أمال إحنا بنعمل إيه؟ قال: نحن نبتغي فضل الله عز وجل، بأن الثواب ده لو القلوب انبعثت نحو ثواب مخصوص مذكور في حديث ضعيف، لا، بس ما تجيش تقول للواحد بقى: «اوعى تعمل ده». يقول: ده، يعني يا جماعة، إحنا بنوصل لمرحلة، أنا كنت عامل فيديو عن الموضوع ده برضه صغير قبل كده عن ليله النصف من شعبان، هبقى إن شاء الله أحط لكم اللينك على قناة التليجرام، تلاقوا الناس بتتشدد جداً حتى في النهي والإنكار! يا عم ما تسيب اللي يعبد يعبد! وكأن اللي مثلاً اللي هيسيب العباده دي مثلاً هيروح يعمل، هيروح يعمل حاجة أحسن مثلاً؛ ده هيقضيها فيسبوك وهيقضيها واتساب وهيقضيها تهريج وهزار ومولات وخروج. يا عم، سيب الناس تعود ربنا سبحانه وتعالى، خلاص. يقول لك: بدعة بدعة! عند حضرتك يعني، يعني يا جماعة عاوزين نضبط المسائل دي، بدعة عند حضرتك، عند قول قال به بعض أهل العلم، لو سلمناه الجماهير على خلاف ما تقوله حضرتك، جماهير أهل العلم على خلاف ما تقوله أصلاً، فأنت ليه بتنصب نفسك حكماً على الأمة؟ ليه أنت مين أصلاً؟ يعني أنت مين عشان أنت ترسب نفسك حكماً على أهل العلم؟ وعبر القرون بقى والعصور، يعني حضرتك مين عشان تجي تقول: لا، كلام أحمد، إحنا هننقل الكلام عن أحمد وعن عبد الرحمن بن مهدي وناس، يعني والله يا جماعة أئمة لو واحد منهم عايش دلوقتي كان حال الكوكب اتغير!
الأسماء دي أنا ما بقولهاش، اللي عارفها حاسس بالحرقة اللي أنا حاسسها دلوقتي؛ يعني إيه أحمد بن حنبل يقول حاجة؟ يعني إيه عبد الرحمن بن المهدي يقول حاجة؟ الإمام النووي، الناس دي! وتيجي أنت بجرة قلم كده تشطب الكلام ده كله، وتنقل الناس وكأنه قولاً واحداً أن ما فيش غير القول في الدنيا؟ والأشنع من كده أنك ممكن تصل أنك تبتدي تسفه من القول الآخر! يعني ممكن بعض الناس يذكر يا جماعة الحديث ضعيف، لا، لا يعمل، بدعة بدعة بدعة! وده، ده إشكال كبير في دين الله عز وجل.
ده في واحد تاني بقى يعمل ايه؟ بدعة، ومن قال بغير ذلك فهو لا يفقه شيئاً ولا يعلم مش عارف إيه! الكلام الفخم ده الناس بتحبه، وبعدين تفاجأ حضرتك أن مين قال؟ أحمد بن حنبل! فايه ده اللي هو، يعني ازاي، واضح؟
طيب، الإمام أحمد بقى يقول: وقد تساهل أهل الحديث في قبول ما ورد من الدعوات وفضائل الأعمال، متى ما لم تكن من رواية من يعرف بوضع الحديث أو الكذب في الرواية. كلام صريح! وقد تساهل أهل الحديث. وأما أحمد يقول: تساهل أهل الحديث يبقى خلاص، يبقى هو بيتكلم أن ده كان الإيه؟ المشهور عندهم أصلاً. زي ما أقول لكم: لو ما كانش إجماع علماء فعلى الأقل الجمهور، ده المشهور عندهم يعني. أحمد قال لك إيه؟ تساهل بعض أهل الحديث. لا، أحمد بيقول لك: وقد تساهل أهل الحديث في قبول ما ورد من الدعوات وفضائل الأعمال، متى ما لم تكن من رواية من يعرف بوضع الحديث أو الكذب في الرواية. من منهم؟ أحمد نفسه؛ يعني أحمد بن حنبل روي عنه، عن أحمد بقى نفسه بيقول: «إذا روينا عن رسول الله صلى الله عليه وسلم في الحلال والحرام والسنن تشددنا»، ما فيهاش تهريج، حلال وحرام تشدد، «وإذا روينا عن النبي صلى الله عليه وسلم في فضائل الأعمال وما لا يضع حكماً ولا يرفعه تساهلنا في الأسانيد».
يا جماعة، دول كانوا علماء، غير أن معاهم فقه، علماء عباد عباد! فلا يرون، يرون الأحاديث دي اللي فيها ثواب تنبعث به قلوبهم نحو العبادة، وما يكونوش اخترعوا في الدين حاجة زي ما قلنا؛ لأن ده مندرج تحت أصول عامة كتير.
عبد الرحمن بن مهدي يروى عنه مثل ذلك، قال: «إذا روينا في الثواب والعقاب وفضائل الأعمال تساهلنا في الأسانيد، وسامحنا في الرجال». ما نركز قوي في الحته دي، «وإذا روينا في الحلال والحرام والأحكام تشددنا في الأسانيد، وانتقدنا الرجال». هذا كلام عبد الرحمن بن المهدي. وهذا بقى مذكور عن ابن عيينة وعن سفيان الثوري، يعني عن علماء نفس الكلام ده بالضبط كده بالنصوص دي كده، أو بما يعني إيه، بما هو قريب منها، مذكور عن كثير من أهل العلم. وعن الغزالي، والغزالي فقيه شافعي برضه، فقيه كبير عند الشافعية؛ يعني حتى إذا قال الشافعية في كتبهم: قال الشيخان، كان واحد منهم الغزالي، الغزالي والرافعي الشيخان عند الشافعية. فهو حد مش مش بسيط في الفقه الإمام الغزالي، ومع ذلك كان أيضا مروية عنه هذا، ومروي عن غيره الحقيقي.
طيب، يبقى دي أول مسألة، إحنا هنا بنبني أصول يا جماعة، إحنا هنا في الدرس بتاعنا مش بس، مش مجرد بنيجي نتكلم، لا، إحنا حتى غيرنا اسم السلسلة أنها قواعد في طريقك إلى الله عز وجل، قواعد بنبني قواعد عشان بعد كده ما تبقاش قاعد على نفسك برة وأنت مكان القواعد دي، هقيس عليها أي حاجة هتقابلك في حياتك، الدنيا هتبقى أسهل إن شاء الله.
يبقى دي أول مسألة، المسألة التانية بقى اللي برضه قبل ما نخش على الكلام واللي لازم نبقى منتبهين ليها يعني، هي مسألة أن لما نقول لك: فلان قال الحديث ضعيف، هل ده يسلم؟ قلنا لك: فلان قال حديث ضعيف، طيب، ما يمكن غيره قال إن الحديث مش ضعيف! فبلاش برضه حته إيه: أن فلان قال ضعيف فخلاص يبقى هو ضعيف، إحنا مش بنتكلم بقى. بلاش أن فلان قال ضعيف هترمي الحديث، لا، ده كمان إحنا لا نسلم بكونه ضعيفاً أصلاً من البداية كمان! ليه؟ فلان قال ضعيف، غيره قال حسن! سهلة، وحضرتك مقلد؛ يعني حضرتك لا تعرف الفلان ده لما قال ضعيف قال ضعيف ليه، ولا غيره لما قال حسن قال حسن ليه، ولا حتى لما فلان قال صحيح قال صحيح ليه، أنت ما تعرفش؛ لأنك مقلد في الحته دي.
يعني لو قلت لك إيه شروط الحديث الصحيح؟ مش هعرف تقول، واللي منا مذاكر كتاب في المصطلح فهو عارف يرص شروط الحديث الصحيح، نقوله: تعال بقى طبق! ما يعرفش يطبق؛ لأن المسألة في غاية الصعوبة يا جماعة، نقد الحديث يعني خلي بالك، درجة النقد، نقد الحديث دي درجة أعلى بكتير جداً من درجة الرواية، ولذلك كان زمان مش كل راوي يصلح أن احنا ناخذ منه بقى الحكم على الحديث بالذات في مسألة العلل، مسألة كبيرة بقى مش وقته دلوقتي، لكن يعني في حاجات كده في الأحاديث يا جماعة كان لها ناسها، مش أي حد يتكلم فيها، حتى في العصر الذهبي لرواية الحديث مش أي حد يدخل في الحته دي، يقول لك: الحديث ده صحيح، ولا الحديث ده ضعيف، ولا يتكلم في العلل. حته العلل دي بالذات مش أي حد يتكلم فيها أصلاً. فده علم خلاص انتهى، واضح؟
فيبيقى برضه بلاش تتشدد في حته أن إيه العالم الفلاني مثلاً الشيخ الألباني رحمه الله رحمة واسعة، المشهور دلوقتي إيه؟ الشيخ الألباني ضعف الحديث، فخلاص أنا مش بتكلم، يترمى الحديث! لا، يترمى الحديث خلصنا منها، إنما المسألة فيها، ضعف الألباني فيبقى الحديث ضعيف؟ طيب، أجي اقول لك: أيوه، هو الألباني ضعفه، صحيح. لكن أحمد بن حنبل حسن الحديث ده، أو أحمد بن حنبل، مش حسن يعني، أحمد بن حنبل صحح هذا الحديث مثلاً، أو نقول لك: الألباني ضعفه، لكن ابن حجر حسنه، فما تعرفش يعني، مين ابن حجر ده في الحديث ده؟ موضوعك، دي قصتك أنت.
إنما طيب، أنا مقلد يا عم، أنا مقلد للألباني على العين والراس، أنا هنا مش بتكلم في أنك تقلد الألباني رحمه الله عليه، أنا بتكلم أنك تحمل غيرك على قولك، واضح يا جماعة الفرق؟ هتقلد الألباني في التصحيح والتضعيف، يعني دي إيه، دي حته الشيخ الألباني رحمه الله، الحديث فخلاص على العين والراس، قال الشيخ الألباني في تضعيفه وتصحيحه، لكن لا تحمل غيرك على ذلك! ما تجيش تقول لي: الألباني بيضعف، فأنت يبقى الحديث ضعيف، أولا، يبقى لازم تعتقد الحديث ضعيف. أقول لك: لا مش لازم أعتقد، أنا ليه لازم أعتقد الحديث ضعيف؟ الألباني ضعفه، ابن حجر حسن الحديث مثلاً، خلاص.
فضلاً بقى عن ايه؟ أنك لازم ما تعملش الحاجه دي؛ لأن الحديث ضعيف ويبقى بدعة وضلالة لو قامت ليله النصف من شعبان، أنت كده لا فاهم دين، ولا فاهم مراتب الخلاف، ولا الكلام ده خالص، واضح يا جماعة؟
ودي بقى مسألة فقهية هنجي لها دلوقتي، هنتكلم في الأحاديث وكلام العلماء في الحته دي عشان ما طولش عليكم، نخش نخش فيها على طول. لكن أنا اللي يهمني أكثر من المسالة دي القواعد اللي إحنا بنبنيها، مسألة العمل بالحديث الضعيف في فضائل الأعمال، ده، ده قول الجماهير إن لم يكن إجماعاً فهو قول جماهير أهل العلم، فما تخافش ولا ترهب بإيه بكثره القائلين! الألباني عكس ذلك، لا ترهب بهذا، خلاص.
ودي يا جماعة من بركة بقى الرجوع كتب السلف، أن احنا ناخد و، وبالنسبة حتى من المحدثين الشيخ ابن باز رحمه الله عليه فتوى ابن باز أنه يتساهل في مثل هذه الأحاديث، خلاص، وأنا هبقى أنقل لكم الفتوى دي إن شاء الله برضه على جروب التليجرام، أنزل لكم الفتوى بتاع الشيخ ابن باز (سئل فأجاب نحو ذلك)، لكن على كل حال حتى لو قال غيره غير ذلك، فهذا قول الجماهير من المتقنين من العباد والفقهاء.
يعني أحمد بن حنبل كان محدثاً فقيهاً عابداً، الإمام أحمد فجمع الأوصاف كلها: محدث ذكرنا الأحاديث، كان عامل فيها إزاي؟ وفقيهاً، ده إمام مذهب من أربع مذاهب في الأمة، وكان عابداً، الإمام أحمد وعباداته برضه معروفة، بل كان لا يتصور أصلاً طالب علم لا يقوم الليل مثلاً. يعني لما جه واحد مرة طالب علم جايله من بعيد، فأحمد استضافه في بيت، وبعدين حط له إيه؟ زي ركوة ماء كده في مية ومشي. أحمد رجع تاني يوم على الفجر كده، أحمد بص في المية، لا المية زي ما هي، فقال له: أنت ما قمتش الليل يعني؟ فالتاني قال له: أنا جيت تعبان من السفر وبتاع، قال: طالب علم ليس له حظ من الليل!
فشوفوا إحنا أحوالنا بقى التعبانة الخربانة، إحنا لا حصلنا طلاب علم ولا إحنا عباد ولا إحنا ولا نعرف أي حاجة، بس قاعدين نطعن في الناس ونطعن في اللي بيعبد، ونزه الناس في العبادة، وليت ذلك بعلم! عارفين يا جماعة لو هي بدعة مثلاً فعل قولاً واحداً، ماشي، ب يعني إحنا هنسيب الناس تبتدع؟ لا، طبعا. لكن لما يكون المسألة بالحجم اللي إحنا بنقوله ده والخلاف فيها بالمنظر اللي إحنا بنقوله ده، فأنت بتعمل إيه بس؟
طيب، تعالوا نخش بقى في النصف من شعبان، أظن كده المسألة واضحة يعني، مش وأنا إن شاء الله هنزل لكم كل الآثار دي إن شاء الله، وكلام أهل العلم في المسألة دي.
برده على قناة التليجرام، واللي مش مشترك في القناة يشترك عشان بقى نشوف الحاجات دي إن شاء الله.
طيب، ليوم النصف من شعبان أهو، هو جاي أهو هيبقى يوم السبت أو الحد أظن في بعض البلدان، ودي برضه مسألة تانية يا جماعة؛ نتحرى في المسائل دي، نتحرى الفضل في اليومين بلاش في يوم واحد؛ عشان إيه يعني هي عشان رؤية الهلال تختلف يعني، مش تختلف يعني قد يكون هي فعلا الليلة دي أو اليوم ده، أو على بعض البلاد التانية لما شافَتِ الرؤية شافَتِ الهلال في يوم تاني. فاحنا أظن هو السبت عندنا في مصر وبعض البلدان مصر وغيرها يعني، وفي بعض البلدان هيبقى ليلة النصف ويوم النصف هو الحد، الليلة يا جماعة اللي تسبق اليوم خلوا بالكم يعني؛ لو احنا قلنا السبت هو نص شعبان فتبقى الليلة هي ليلة الجمعة، يعني الجمعة بالليل يعني.
طيب، فبرضه ناخد بالنا من الحتة دي. أول حديث يروى عن النبي صلى الله عليه وسلم في هذه المسألة؛ قال: «إذا كانت ليلة النصف من شعبان فقوموا ليلها وصوموا نهارها، فإن الله تعالى ينزل فيها لغروب الشمس إلى السماء الدنيا، فيقول: ألا مستغفر فأغفر له؟ ألا مسترزق فأرزقه؟ ألا مبتلى فأعافه؟ ألا كذا ألا كذا؟ حتى يطلع الفجر».
يبقى يصام النهار، والله لو صومت 15 لو أنت بتصوم من أول شعبان؛ عشان شعبان نكثر فيه من الصيام، همتك لم تنبعث لكل ده فجيت هتصوم اليوم ده بس، انتبه بقى من حاجة هنا مهمة، كويس أن افتكرتها برضه عشان على قول بعض العلماء يكره إفراد السبت بالصوم؛ فلو حضرتك هتصوم اليوم ده أنت مش هتصوم مش هتقوم بغيره يعني، فصوموا بس صوم يوم معاه قبله أو بعده، يعني يا تصوم الجمعة يا تصوم الأحد، فالأحسن طبعا خليها الأحد كمان عشان يبقى إيه ضربت عصفورين بحجر زي ما بيقولوا، يبقى هو إيه يوم السبت أو يوم الأحد، الخلاف بين بلدان دلوقتي في أيهما النصف من شعبان؛ هصوم سبت وحد، انما لا تفرد السبت بالصوم، لا تهد السبت بالصوم.
حديث تاني، حديث عائشة يروى عن النبي صلى الله عليه وسلم، قالت: فقدت النبي صلى الله عليه وسلم، فخرجت يعني تتحسس النبي صلى الله عليه وسلم، كان جنبها ما لقيتوش فقدته فخرجت تشوفه، فإذا هو بالبقيع رافع راسه إلى السماء، فقال: «أكنت تخافين أن يحيف الله عليك ورسوله؟». هي إيه كأنها غارت أن هو سابها وراح لبعض أزواجه ليلتها وسابها وراح لزوجة تانية. فهو ما شفى وفطن صلى الله عليه وسلم فقال لها: يعني أنت خايفة أظلمك؟ أكنت تخافين أن يحيف الله عليك ورسوله؟ فقلت: يا رسول الله ظننت أنك أتيت بعض نسائك. فشوفوا بقى هي المرأة في وادي والنبي صلى الله عليه وسلم في واد آخر، قال: «إن الله تبارك وتعالى ينزل ليلة النصف من شعبان إلى السماء الدنيا، فيغفر لأكثر من عدد شعر غنم كلب». كلب دي يا جماعة كانت قبيلة في العرب وهي أكثر قبائل العرب غنماً، عندها غنم كتير، قبيلة اسمها كده قبيلة كلب. فالنبي صلى الله عليه وسلم بيقول إن ربنا بينزل في الليلة دي فيغفر لأكثر من عدد شعر غنم كلب، واضح؟ فالعدد ده كله بيغفر له في الليلة دي.
فحضرتك تبقى إيه بقى في الليلة دي؟ تبقى نايم؟ تبقى في مول؟ تبقى في نادي؟ تبقى على الفيسبوك؟ لا، تبقى بتصلي، بتستغفر، يعني هتبقى قاعد تعمل إيه في الليلة دي؟ واضح يا جماعة؟
حديث تاني: «إن الله ليطلع ليلة النصف من شعبان فيغفر لجميع خلقه إلا لمشرك أو مشاحن». وبالمناسبه الحديث ده حسنه الألباني، عشان حتى اللي واخد مقلد للألباني في موضوع التصحيح والتضعيف، الحديث ده محسنه الألباني عليه رحمة الله: «إن الله ليطلع ليلة النصف من شعبان فيغفر لجميع خلقه إلا لمشرك أو مشاحن».
هنا بقى عاوزين نقف مع الحديث؛ أول حاجة إن يا جماعة الحديث ده وغيره من الأحاديث هيبتدي النبي صلى الله عليه وسلم يستثني أوصافاً، يعني ربنا هيغفر لكل الناس إلا ناس بمجموع الأحاديث هتقدر تجمع بعض الأوصاف يعني، اجمع كل الروايات وشوف الأوصاف اللي ذكرها النبي عليه الصلاه والسلام وضمها جنب بعض كده، حطها جنب بعض عشان تعرف، لازم تخرج من هذه الأوصاف كلها لتنال المغفرة في هذه الليلة. واضح؟
يبقى أول وصف لازم تتبرا منه؛ وصف الشرك. أيوه يا عم إحنا مسلمين، أنت بتكلم ناس كفرة يعني؟ وصف الشرك مش لازم يعني تتبرا من الشرك الأكبر والشرك الأصغر، ومش هينفع أتكلم في ده دلوقتي، لكن يعني تتبرا من الشرك كبيرة وصغيره، خلاص أنتوا بقى ادخلوا واعرفوا إيه الشرك الأكبر والاصغر لإلى ما إن شاء الله يمكن إي ربنا يفتحوا علينا ونبقى نفرد للكلام ده وقت يعني.
الوصف الثاني؛ الشحناء، إلا لمشرك أو مشاحن. يبقى وصف الشحناء إيه؟ الشحناء أنك تبقى بينك وبين أخيك قطيعة، فيبقى بينه وبين أخيه قطيعة على دنيا، لا يلحد يصلح الأمور. وتصليح الأمور يا جماعة مش لازم نبقى حبايب ونرجع، لا، ده فقط بالسلام؛ لو سلمت عليه قطعت القطيعة دي خلاص واضح. السلام عليكم، خلاص انقطعت هذه القطعة خلاص، لأن ممكن فعلا في ناس ما تتعاشرش، أو يعني الأرواح جنود مجندة، السلام وعليكم السلام خلاص، ما بقيتش أنت كده ما بقيتش مقاطع لفلان ده. طيب، وده طبعا المقصود به الشحناء على أمور الدنيا، لكن لو واحد أنا مقاطعه لدين، واحد مبتدع ضال، إحنا برضه يا جماعة إحنا مش إحنا ديننا زي ما في الرحمة والرفق في الشدة والغلظة ووضعها، كما أن وضع الرفق كما أن وضع الغلظة مكان الرفق خطأ وخلاف الحكمة، فكذلك وضع الرفق مكان الغلظة والشدة، والا كان زمان النبي صلى الله عليه وسلم شديد رفيق رحيم على طول الخط، والنبي صلى الله عليه وسلم ما كان كذلك، كان وصفه الغالب صح، لكن على طول الخط؟ لا، مش على طول الخط.
أمال مين اللي كان بيجاهد ومين اللي كان يقتل المشركين ومين اللي ربنا أمره بده؟ مين اللي ربنا أمره بده؟ النبي عليه الصلاه والسلام صح. قال: ﴿وَاغْلُظْ عَلَيْهِمْ﴾ [التوبة: 73]. ماشي يعني المهم يعني إن شاء الله تيجي وأقول لكم. فالمهم يعني النبي صلى الله عليه وسلم كان وصفه الغالب الرفق والرحمة، لكن كان في شدة وغلظة في أوقات، خلاص؟
طيب، فيبقى أنت مقاطع واحد عشان هو مبتدع، ضال، فاسق؟ اه. إنما واحد على دنيا؟ قف بقى القطيعة دي ولو بالسلام عشان تخرج من وصف الشحناء. الشحنات دي يا جماعة غريبه جدا بقى في ديننا الحقيقة، النبي صلى الله عليه وسلم سماها الحالقة، فساد ذات البين سماها الحالقة، قال: «لا أقول تحليق الرأس، ولكن تحليق الدين». فهي أمرها خطير جدا، وإن شاء الله نتكلم عنها بالتفصيل لما نجي في رمضان، لما نجي نتكلم عن ليله القدر وإزاي علم ليلة القدر رفع عن الأمة لما اثنين اتخانقوا من الصحابة، فنتكلم عنها بالتفصيل، ونكلم شويه عن موضوع الشحناء وفساد ذات البين ده، لكن مش دلوقتي.
يبقى ده دي وقفة مع الحديث ده: «إن الله ليطلع ليلة النصف من شعبان فيغفر لجميع خلقه إلا لمشرك أو مشاحن». خلونا بقى نتكلم، إخواننا طبعا أنا أدن لله عز وجل بالعمل بالضعيف فضائل الأعمال، لكن خليني أوجه كلام لإخواني اللي مش بيأخذوا بقول ده، أنا برضه أنا مش يا جماعة مش هقول لكم ما تبقوش حكام، وأنا اللي هبقى حكم برضه، يعني واحد بيأخذ بالقول ده على العين والراس، خلاص زي ما قلنا في بعض أهل العلم قائل به، وإن كانوا قلة لكن موجود، قول موجود، ماهوش مبتدع، خلاص إلا على إلا على من يرى أن ده إجماع، فلو كان إجماع اللي يرى أن ده إجماع خلوا بالكم، يبقى حرام تخلفه، أنتم فاهمين؟ يعني الطوفي بيقول لك إجماع أنه ذكر الاتفاق، اللي هيشوفه ده هيقول لك ماينفعش تخالف أصلا إجماع العلماء.
لكن لا خليني يا عم في خلاف، فانت بتاخد بالقول ده فانا بقول لك دلوقتي بوجه لك أنت الكلام، يا من يرى أهو، إحنا نجيب بقى الشخص اللي هو المشهور دلوقتي، اللي هو واخد كتير مننا أكثر الناس أظن يعني يمكن الكلامي ده كان صادم لأكثر الناس، فأكثر شايفين إنه الحديث ضعيف لا ما يعملش بيه، والأكثر ما يعرفوش حد في الحديث بصح وضعف غير الألباني عليه رحمة الله، بمجموع دول كده أنا بوجه لكم بقى الكلام ده.
الألباني يا جماعة، الشيخ الألباني رحمه الله عليه محسن الحديث ده: «إن الله ليطلع ليلة النصف من شعبان فيغفر لجميع خلقه إلا لمشرك أو مشاحن». فحضرتك عرفت أن الليلة دي بيغفر فيها للخلق، هتقضيها إزاي؟ فكر كده، هتقضي الليلة إزاي؟ يعني يا جماعة ربنا بيطالع بقى وهيغفر! ده معنى مرعب، ده معنى لو قعدت تفكر فيه كده مش هيجي لك نوم، يعني تيجي تنام تحط راسك على المخده كده تلاقي نفسك مش جايلك نوم، الليلة دي كده، لا قوم يا عم استغفر، قوم اذكر ربنا. واضح؟
طيب، حديث آخر يروى عن النبي صلى الله عليه وسلم: «إن الله ليطلع إلى خلقه ليلة النصف من شعبان فيغفر لعباده إلا اثنين: مشاحن، أو قاتل نفس». يبقى مشاحن جت معانا، قاتل نفسه؛ واحد أتى الحد فبرضه ربنا لا يغفر لها، المفروض نخرج من هذا الوصف.
حديث آخر: «إلا زانية بفرجها، أو مشركا». المشرك خلاص، أو الزاني أو الزانية برضه هذا الوصف، حتى من تلبس به يتوب إلى الله عز وجل قبل هذه الليلة.
رؤية معنى آخر في الليلة دي الحقيقة، والمعنى ده موجود في شعبان في كل شعبان، هو معنى إيه؟ أنه فيه تنسخ الآجال، وده معنى برضه يا جماعة خطير جدا. شعبان، شهر شعبان فيه تنسخ الآجال، وروي أن في هذه الليلة بخصوصها تنسخ الآجال، وجا في حديث: «فإن الرجل ينكح ويولد له وإن اسمه في الموتى».
إيه تنسخ الآجال يا جماعة؟ ربنا سبحانه وتعالى بيدي ملك الموت في الليلة دي أو في الشهر ده، شهر شعبان، صحيفة فيها أسماء الناس اللي هتموت السنة الجاية كلها، ولذلك جا في رواية: «فإن الرجل لا ينكح ويزرع ويولد له وليس له اسمه في السماء». اسمه خرج من السماء خلاص، اسمه فين أمال؟ في الصحيفة مع ملك الموت، ده هيموت في رمضان، ده هيموت في شوال، ده هيموت في المحرم اللي جاي، ده هيموت في صفر، اسمه مش في السماء خلاص. رؤية بقى أن الليلة دي بخصوصها هي اللي بينسخ فيها الآجال، ﴿فِيهَا يُفْرَقُ كُلُّ أَمْرٍ حَكِيمٍ﴾ [الدخان: 4]. روي عن بعض السلف، أظن عكرمة، أن هو يفرق كل أمر حكيم، طبعا الجمهور على أنها ليلة القدر، لكن في قول أن ف يفرق كل أمر حكيم ليلة النصف من شعبان، طب إيه اللي بيفرق فيها؟ قال: إن فيها تنسخ الآجال، وفيها يكتبوا الحاج، شوف الناس اللي هتموت على الحج، الناس اللي هتموت على الحج، أنت بقى في الليلة دي اللي ربنا بيكتب مين هيحج؟ يكتب ده في الليلة دي، فحضرتك هتقضي الليلة دي إزاي؟ واضح؟
طب هل السلف بقى مع الليلة دي ومع اليوم ده كانوا يعني بيقضوها إزاي؟ يقول ابن رجب: وليله النصف من شعبان كانت التابعون من أهل الشام كخالد بن معدان ومكحول ولقمان بن عامر وغيرهم يعظمونها ويجتهدون فيها في العباده وعنهم أخذ الناس فضلها وتعظيمها، وقد قيل إنه بلغهم في ذلك آثار إسرائيلية في تعظيم هذه الليلة، فلما اشتهر ذلك عنهم في البلدان اختلف الناس في ذلك؛ فمنهم من قبله منهم ووافقهم على تعظيمها منهم طائفة من عباد أهل البصره وغيرهم، وأنكر ذلك أكثر علماء الحجاز، ومنهم عطاء وابن أبي مليكة، ونقله عبد الرحمن بن زيد بن أسلم عن فقهاء أهل المدينة وهو قول أصحاب مالك وغيرهم، وقالوا: ذلك كله بدعة.
فالمساله فيها خلاف؟ آه، في خلاف. واختلف علماء أهل الشام في صفة إحيائها على قولين؛ طب يعني كان المساله فيها خلف، اللي هيحيي الليلة ولا لا يحييها؟ قول لأهل الليلة.
طب اللي هيحيي الليلة؟ نحييها إزاي؟ الطائفة دي عملنا شجرة كده، يبقى ناس بتقول ده بدعة، وناس بتقول لا مستحب أحيي الليلة، نجي على دول بقى. طب هنحيي إزاي؟ أنزل بقى فرعين كمان؛ أحدهما أنه يستحب إحياؤها جماعة في المساجد. إيه ده؟ يعني كمان نجتمع في المسجد ونصلي؟ اه، بعض أهل العلم قال هذا، فلو عملت ده أنت متبع لبعض أهل العلم، وإياك أن ترهب بمن يقيم نفسه حكما على الأمة، إياك، هيجي يقول لك: أنت مبتدع، أنت ضال، قول له: جزاكم الله خيرا، وأنت خلي صدرك أوسع منه، وتبقى فاهم أن المسألة فيها خلاف، مسألة بسيطة يا جماعة، لا نحجر واسعا، ويسعنا ما وسع السلف.
وياريت ياريت اللي ما سمعش الدرس بتاع مسألة اللي هو أنا مش فاكر اسم الدرس، أنا مسميه على اليوتيوب اللي هو اللي بشرح فيه حديث نعمان بن بشير: «إن الحلال بين وإن الحرام بين وبينهما أمور مشتبهات».
ممكن اسمه تاق الشبهات، أظن على اليوتيوب. اسمعوه ضروري جداً؛ لأني أصَّلت في مسألة الاختلاف، وكيف كان السلف يرون الاختلاف الواقع في الأحكام، مهم جداً جداً.
وده بيكمل، يبقى بعض العلماء قال بأنه يجوز الاجتماع لها في المساجد، آه قاله بعض أهل، إنه يستحب إحياؤها جماعة في المساجد؛ كان خالد بن معدان ولقمان بن عامر وغيرهما يلبسون فيها أحسن ثيابهم، ويتبخرون، ويكتحلون، ويقومون في المسجد ليلتهم تلك. ووافقهم إسحاق بن راهويه على ذلك على جلالة إسحاق، وقال في قيامها في المساجد جماعة: ليس ذلك ببدعة. إسحاق بيقول هذا، نقله عنه حرب الكرماني في مسائله. دي أول فئة.
طب الفئة الثانية: والثاني أنه يكره الاجتماع فيها في المساجد للصلاة والقصص والدعاء. يبقى كان الأولين بيقولوا إن ده كله ينفع، تصلي، تذكر مواعظ للناس، تدعو الله عز وجل في المسجد، كل ده ينفع. الفئة الثانية قالت: يكره الاجتماع فيها في المساجد للصلاة والقصص والدعاء، ولا يكره أن يصلي الرجل فيها لخاصة نفسه. يبقى تاني، فاكرين الشجرة بتاعتنا؟ بعض العلماء قالوا بدعة، وبعض العلماء قالوا يستحب. اللي هيقولوا يستحب دول هاتهم هنا، انزل فرعين، هتلاقي بعضهم يقول: يستحب الاجتماع لها في المساجد كمان، وندعي في المسجد، ونصلي في المسجد، ونعظ الناس في المسجد. والفئة الثانية قالوا: لا، يصلي الرجل لخاصة نفسه، يعني أنت في بيتك قوم صلي، قوم ادعي، قوم استغفِر. دي طائفة تانية، وهذا قول الأوزاعي إمام أهل الشام وفقيههم وعالمهم.
وهذا هو الأقرب إن شاء الله تعالى، يعني كان ده الأقرب اللي يراه ابن رجب الحنبلي أقرب. طب هل الإمام أحمد ده له رأي في المسألة؟ ابن رجب طبعا حنبلي فبيتكلم على الإمام أحمد بالذات قال: ولا يعرف للإمام أحمد كلام في ليلة النصف من شعبان. يعني كان أحمد مالوش رواية في المسألة دي، لكن يتخرج في استحباب قيامها عنه روايتان من الروايتين في قيام ليلتي العيدين. يعني كان أحمد ليه كلام في قيام ليلة العيد، لو فهمناه من كلام أحمد، نقدر نخرج عليه كلام في ليلة النصف من شعبان. ودي طريقة لأصحاب أحمد، يعني مش احنا اللي هنخرج، يعني أقوال للإمام هم بيعملوا ده، فانه يعني الإمام أحمد في رواية لم يستحب قيامها جماعة، بيتكلم هنا ابن رجب على مسألة الجماعة، لأنه لم ينقل عن النبي صلى الله عليه وسلم وأصحابه. واستحب في رواية، يعني أحمد له روايتين في قيام ليلة العيد.
كويس، خدوها دي بالمره بقى، يعني إه ده هو ممكن يكون ليله العيد كمان آه؟ تخيل اللي طبعا بتسمع إنها بقى إيه اللي بيعمل ده يبقى ضل في النار؟ لا، قيام ليلة العيد ما فيش مشكلة خالص، ودي من أزمنة الغفلة، وبرضه اللي ما سمعش يرجع يسمع حته لما اتكلم على درس شعبان، اسمعوه عشان احنا نتكلم في إزاي العبادة في وقت الغفلة وأهمية العبادة في وقت الغفلة إيه. فمن أزمنة الغفلة ليلة العيد؛ ليلة العيد ده يا جماعه الناس بتشرب مخدرات، والناس الناس الطيبة اللي هي مالهاش المخدرات والحاجات الوحشه بتلاقيها في المولات، وتلاقيها في النوادي، وتلاقيها سهرانة للفجر ما فيش ذكر ولا دعاء ولا عبادة ولا أي حاجة، فده وقت غفلة طبعا.
فحضرتك تفر إلى ربنا سبحانه وتعالى وتقوم الليل؟ آه، قوم ما فيش مشكلة خالص. طب انبعث قلبك للأحاديث الضعيفة اللي فيها: «من أحيى ليلتي العيدين لم يمت قلبه يوم تموت القلوب»؟ ما فيش مشكلة، ما فيش أي مشكلة، ما تخافش ولا ترهب، واضح؟ فإنه في رواية أحمد لم يستحب قيامها جماعة، يعني ليلة العيد؛ لأنه لم ينقل عن النبي صلى الله عليه وسلم وأصحابه، واستحب في رواية لفعل عبد الرحمن بن يزيد بن الأسود لذلك، وهو من التابعين. نفس المسألة بتاعتنا، حاجة ما تثبتتش عن النبي ولا الصحابة، لكن فعلها التابعون، نفس المسألة، وفيها أحاديث ضعيفة، هي هي بالضبط صح ولا لا؟
ليلة العيد لم يُروَ عن النبي صلى الله عليه وسلم ولا الصحابة أنهم فعلوا فيها شيئاً مخصوصاً، لكن رُوِيَ عن التابعين، وفيها أحاديث ضعيفة بخصوصها. ليلة النصف من شعبان نفس الكلام، لم ينقل عن النبي صلى الله عليه وسلم ولا الصحابة أنهم فعلوا عبادة مخصوصة فيها، لكن نُقِلَ عن التابعين، وفيها أحاديث ضعيفة. أحمد بن حنبل على جلالته في الفقه والحديث والعباده وكل حاجه، ليه كلام بقى في ليلة العيد؛ أول رواية إنه لم يستحب قيامها جماعة، هو بيتكلم على الجماعة، وفي رواية استحب ذلك، أن تقام جماعة. رواية عن أحمد، ليه يا أحمد إذا كان النبي ما لُقّنش ولا الصحابة؟ قال: عشان عبد الرحمن بن يزيد عملها وهو من التابعين.
فكذلك قيام ليلة النصف لم يثبت فيها شيء عن النبي صلى الله عليه وسلم ولا عن أصحابه، يعني شيء يعني يا جماعة شيء فعلي، يعني سنة فعلية لم يثبت، وثبت فيها عن طائفة من التابعين من أعيان فقهاء أهل الشام. شوفوا يا جماعه ألفاظ ابن رجب، مش أي تابعي كده، من أعيان فقهاء! كل لفظ من دول مرعب لوحده أصلاً. يعني لو قلت لك من أعيان أهل الشام ده مرعب، لو قلت لك من فقهاء أهل الشام ده مرعب، تخيل بقى اللفظين مع بعض: أعيان فقهاء أهل الشام! فدول يعني هيدخلوا كده يعبدوا كده وخلاص؟ لا. وروي عن كعب قال: إن الله تعالى يبعث ليلة النصف من شعبان جبريل. دي بقى إيه مش عاوزين نذكر دي.
ابن رجب بقى بيتكلم، هو بيتكلم بقى ابن رجب نفسه يقول: فينبغي للمؤمن أن يتفرغ في تلك الليله لذكر الله تعالى ودعائه بغفران الذنوب، وستر العيوب، وتفريج الكروب، وأن يقدم على ذلك التوبة، فإن الله تعالى يتوب فيها على من يتوب. و يتعين على المسلم أن يجنب الذنوب التي تمنعهم من المغفرة وقبول الدعاء في تلك الليلة، اللي هي زي إيه؟ زي قتل النفس، زي الشرك، زي الزنا، زي الشحناء. يتجنب هذه الذنوب، طبعا يتجنب كل الذنوب، لكن دي بعينها اللي رويت في الأحاديث. فده دي نصيحة ابن رجب الحنبلي، برضه من أجل فقهاء المذهب.
عندنا لك أيها السالك لطريق الآخرة، أيها السائر في طريقك إلى الله عز وجل، دي نصيحة العلماء ليك، مش نطول عن كده، نشوف أسئلتكم، لو حد ليه سؤال في الدرس نجاوب عليه إن شاء الله وننهي.
في سؤال: رمضان أقوله رحمة واسطة مغفرة وأخره عتق؟ هو رمضان مش يعني رمضان مش محتاج أحاديث ضعيفة، يعني في حد مش هيصوم؟ احنا يا جماعه دلوقتي بنتكلم مش في مسألة مش في مسألة الأحاديث وضعفها وتصحيحها، احنا بنتكلم في مسألة أن قلبك ينبعث للعمل بحديث ضعيف فتعمل به. إنما رمضان هو مش محتاج أحاديث ضعيفة؛ يعني رمضان كده كده هتصوم، واضح؟ احنا بنتكلم في واحد ما كانش هيقوم الليل في ليلة النصف ولا كان هيصوم النهار، فلما سمع الأحاديث دي قال: لا ده جميل، أنا قلبي انبعث دلوقتي لصيام النهار. نجي نقول لا، بدعة ما تصومش؟ لا، نقول له صوم. خلي بالكم يا جماعه، أنا دلوقتي مش بسفه القول الآخر، لكن قول الجماهير في قول الجماهير اهل العلم واضح. أو يقوم الليل مثلاً، نقول له لا قوم.
طيب، أنا مقلد، لو قلدت أن العمل معين بدعة؟ حضرتك تقصد لا أنكر على حد؛ لأن ممكن يكون ممتاز، ده اللي أقصده بالضبط. واحد بيقول: طب أنا مقلد إن المسألة الفلانية القول إن الموضوع ده بدعة. خلاص، أنت هتبقى تدين لله عز وجل أنها بدعة وتعملها، لكن لا تنكر على غيرك، لا تنكر على غيرك. طب ده في كل المسائل؟ طالما لم تحط بالخلاف في المسألة علماً لا تنكر. يعني لو مش عارف أقوال العلماء في المسألة دي إيه، والخلاف شكله إيه، ما تنكرش على حد أصلاً، واضح؟
فضل صيام في شعبان، نبدأ من أمتى استعداد لرمضان؟ لأن بصوم الشهر كله. ممتاز، نصوم الشهر كله ده حاجة جميلة، لكن نسيب يومين كده في الآخر ما نصومش. والأجر من صومي في شعبان؟ ده احنا أدينا فيه درس، لكن نسيب يومين كده، يومين في الآخر كده ما نصومهمش: لا تقدموا رمضان بصوم يوم ولا يومين.
كده الأسئلة خلصت، ماشي.
سبحانك اللهم وبحمدك، نشهد أن لا إله إلا أنت، نستغفرك ونتوب إليك. والسلام عليكم ورحمة الله وبركاته.