الشيخ أمجد سميرالحمد لله والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذرياته وأهل بيته كما صليت على آل إبراهيم إنك حميد مجيد. أما بعد؛ فالنهارده إن شاء الله درس مختلف لمعنى، أقول إن إحنا في رمضان فهيكون له تعلق بالقرآن بتدبر القرآن، وبنتكلم دعاء إلى الله يعني الدرس خاص بالدعاء إلى الله، ومحفظين القرآن أو محفظات القرآن فبرضه له تعلق بهذا.
النهارده إن شاء الله هنحاول نتدبر صدر سورة المدثر، طبعا سورة المدثر أو صدر سورة المدثر له خصيصة، ذلك أنه من أوائل ما نزل من القرآن. القرآن أول ما نزل منه اقْرَأْ بِاسْمِ رَبِّكَ الَّذِي خَلَقَ، في قصة يعرفها الكل فمش محتاجين نقف على القصة دي، ثم نزل يَا أَيُّهَا الْمُزَّمِّلُ * قُمْ اللَّيْلَ إِلَّا قَلِيلًا، ثم يَا أَيُّهَا الْمُدَّثِّرُ * قُمْ فَأَنْذِرْ. في قول إنه نزل قبل المزمل ن ووالقلم وما يسترون، لكن خلينا على القول الأول يبقى: اقرأ باسم ربك الذي خلق، ثم يا أيها المزمل قم الليل إلا قليلا، ثم يا أيها المدثر قم فأنذر.
في هنا حاجة حصلت قبل ما تنزل سورة المدثر، حصل حاجة إنه فتر الوحي؛ يبقى نزلت اقرأ باسم ربك الذي خلق ثم يا أيها المزمل قم الليل إلا قليلا ثم فتر الوحي. حتى في الرواية أن النبي صلى الله عليه وسلم قال: «بينا أنا أمشي إذ بصوت في السماء، فرفعت رأسي فرأيت الملك الذي أتاني في حراء ففزعت»، قصة بقى طويلة، ثم ذهب فتدثر، فنزل: يَا أَيُّهَا الْمُدَّثِّرُ * قُمْ فَأَنْذِرْ. فيبقى فتر الوحي بعد نزول اقرأ ويا أيها المزمل.
طيب، يا أيها المدثر بها أرسل النبي عليه الصلاة والسلام. إحنا عندنا قول معروف أن النبي صلى الله عليه وسلم نبئ بأقرا وأرسل بالمدثر، فصار نبياً بأقرا، وصار رسولاً عليه أن يبلغ بيَا أَيُّهَا الْمُدَّثِّرُ * قُمْ فَأَنْذِرْ. ولذلك يا جماعة لو تدبرنا صدر سورة المدثر -إحنا طبعا قلنا اقرأ ثم يا أيها المزمل ثم يا أيها المدثر- معنى كده أن سورة المدثر كلها نزلت رقم ثلاثة في المصحف؟ لا مش كده، الذي نزل صدر سورة المدثر فقط. ليه؟ لأن إحنا بعد كده هيجي كلام عما حصل مع الوليد بن المغيرة، ودي قصة طويلة أنه سمع سورة غافر -سورة غافر هي السورة رقم ستة في التنزيل على حسب ترتيب النزول هي السورة رقم ستة- ثم كان ما كان من أمره، ونزل فيه قرآن في سورة المدثر، فده كان متأخراً، يبقى اللي نزل الأول هو صدر سورة المدثر.
يبق صدر سورة المدثر له خصيصة مع الدعاء إلى الله عز وجل، ليه؟ لأن به أرسل النبي عليه الصلاة والسلام: يَا أَيُّهَا الْمُدَّثِّرُ * قُمْ فَأَنْذِرْ. ثم ذكر الله عز وجل بعد كده آداب للداعية إلى الله: قم فأنذر * وربك فكبر * وثيابك فطهر * والرجز فاهجر * ولا تمنن تستكثر * ولربك فاصبر. الآيات دي نزلت علشان تلخص لنا منهج في الدعوة إلى الله عز وجل. أول حاجة عاوزين نتأامل شوية هي فكرة إنه الأول اقرأ، وبعدين يا أيها المزمل قم الليل، وبعدين فتر الوحي انقطع الوحي فترة قبل ما ينزل على النبي عليه الصلاة والسلام قم فأنذر.
فكان يا جماعة -وده أول درس اهو للدعاء إلى الله- كأنه لابد أن تسبق الدعوة فترة إعداد. طيب فترة الاعداد دي محتاجين فيها إيه؟ محتاجين حاجتين، هما الحاجتين اللي نزلوا قبل يا أيها المدثر؛ محتاجين علم، ومحتاجين حصيلة إيمانية تعبدية قبل أن ينطلق الداعية في دعوته. ليه بقول الكلام ده؟ لأن بعض الدعاة إلى الله أو بعض الشباب متحمس أنه يدعو إلى الله، إحنا الآن مش بندخل في نوايا الناس هو فعلا هم الدعوة هم الناس همه ينقذ الناس من النار، نقول له لابد من فترة إعداد الأول.
إحنا ليه؟ لأن عندنا بلاء دلوقتي أن كل واحد ماسك موبايل في كاميرا، فأي حد في أي وقت في أي مكان في أي زمان يقدر يطلع لايف، ويقدر يعمل فيديو، ويقدر يعمل مونتاج، وكله على الموبايل ده، على قد ما هو مفيد على قد ما هو خطر جداً. خطر جداً لأنه خلى الدعوة إلى الله حاجة سهلة جداً أنك تفتح كاميرا وتتكلم، دي حاجة أبسط مما يكون. يبقى إحنا أول درس للدعاء إلى الله -سواء بتحفظي القرآن وبعدين هتعلمي قرآن، سواء بتعملي دعوة في المنطقة، بتعملي دعوة في الجامعة، بتعملي دعوة على النت- لابد من فترة تسبق الانطلاق الدعوي.
الفترة دي عاوزين نعمل فيها إيه؟ هنعمل حاجين: اقرأ باسم ربك الذي خلق، وقم الليل إلا قليلا؛ باختصار: علم، حصيلة علمية لابد أن نتحصلها. ليه؟ لأنك لما تيجي تدعو إلى الله هتعمل إيه يعني؟ هتقول والله يا جماعة الدين ده جميل قوي أنا ما أعرفش في حاجة صحيح بس هو جميل، هتعمل إيه ما أنت مش عارف هتقول إيه أو هيبقى عندك حصيلة صغيرة من العلم، وهتبقى حرقت نفسك بدري في الدعوة إلى الله عز وجل، ومش هتعرف تحصل ليه؟ لأن خلاص محروق في الدعوة ليل نهار تدعو إلى الله ما عندكش وقت تحصل أو الوقت بقى قليل جداً اللي تحصل فيه علم. ولذلك نقول لك لا اصبر شوية، حصل قدر كبير من العلم الذي به تستطيع أن تدعو. هو ده شرط؟ لا مش شرط، أنا مش بقول إنه شرط، لكن بنقول دي الصورة الأكمل للداعية إلى الله عز وجل التي اختارها الله عز وجل لنبيه صلى الله عليه وسلم: اقرأ باسم ربك الذي خلق، حصّل العلم.
لأن يا جماعة أنتم عارفين الخطورة أنه اللي ما عندوش علم ده إحنا بنسميه جاهل جهل بسيط. في نوع تاني من الجهل هو أخطأ من الجهل البسيط ده، اللي هو الجهل المركب، إيه الجهل المركب؟ إن هو يبقى جاهل ومش عارف إنه جاهل، جاهل ومش عارف إنه جاهل، فده بنسميه جهل مركب. ليه؟ لأنه عنده جهلين؛ جهل بالمسألة نفسها بالحكم الشرعي أو بالمسألة التي يدعو إليها، وجهل إنه جاهل. الجاهل جهل بسيط ده هتقول له إيه حكم كذا؟ يقول لك ما أعرفش، ده جاهل جهل بسيط، إنما اللي جاهل جهل مركب هيقول لك حرام وهي حلال أو حلال وهي حرام فده جهله جهل مركب.
طب ازاي ننجو من هذا الجهل قبل ما ندعو إلى الله؟ لا يا جماعة الدعوة إحنا كمان شوية هنقول إن الدعوة خطر عظيم جداً وهو طريق الأنبياء: ﴿قُلْ هَٰذِهِ سَبِيلِي أَدْعُو إِلَى اللَّهِ ۚ عَلَىٰ بَصِيرَةٍ أَنَا وَمَنِ اتَّبَعَنِي﴾ [يوسف: 108]. فالداعي إلى الله هو متبع للنبي عليه الصلاة والسلام يسير على درب النبي عليه الصلاة والسلام، فيا له من شرف، لكن هو شرف محفوف بالمخاطر ليه؟ لأنك الآن أنت توقّع عن رب العالمين، توقّع عن رب العالمين سبحانه وتعالى أن كذا حلال وكذا حرام، أن كذا من الدين وكذا مش من الدين، أن كذا سنة وكذا بدعة، أنت توقّع عن الله سبحانه وتعالى فالمسألة خطيرة. بكلمة تبقى تتشرف بأنك من زمرة المتبعين للنبي عليه الصلاة والسلام، وبكلمة تكون متقوّلاً على الله عز وجل، فالنجاة هنا فين؟ العلم: اقرأ باسم ربك الذي خلق. فخد وقت للقراءة والتعلم.
الحاجة التانية اللي لابد لك أيها الداعية أن تتحصن بها -وإحنا لما نقول يا جماعه ده أن دي فترة إعداد تسبق ده مش معناه إنها أول ما هنبتدي دعوة هتقف، ده مش معناه كده، يعني مش اول ما هنبتدي دعوة هنوقف علم ونوقف تعبد- لا، إنما قبل ما ننطلق في الدعوة لابد أن يكون لنا رصيد من العلم ولنا رصيد من الإيمان. رصيد من العلم علشان ننفي عنا الجهل البسيط والجهل المركب. رصيد من الإيمان بقى اللي هو: يَا أَيُّهَا الْمُزَّمِّلُ * قُمْ اللَّيْلَ إِلَّا قَلِيلًا.
ثم فتر الوحي ليه؟ علشان النبي عليه الصلاة والسلام في فترة فتر الوحي دي انقطاع الوحي قيام الليل، وكان قيام الليل شكله إيه عند النبي صلى الله عليه وسلم وأصحابه في أول الأمر؟ كانوا يقومون الليل حتى ترم أقدامهم، وهو ده كان قيام الليل، وكان قيام الليل في الأول فرض مش سنة، كان فرضاً. ففترة الوحي كان فيها قيام الليل إيه؟ تثبيتاً للقلب. الداعية لابد أن يكون له رصيد من الأذكار، له رصيد من الاستغفار بالأسحار، له رصيد من الأعمال الصالحات التي تؤيده وتثبته عند الدعوة إلى الله، وده معنى هننجيله في الآيات اللي جاية إن شاء الله، إحنا كل ده لسه ما دخلناش في يا أيها المدثر، إحنا ده كله بنشوف التوطئة.
ليه هنا يا أيها المدثر ليه مش يا أيها النبي مش يا أيها الرسول؟ يعني ليه ما هو إحنا عندنا عندنا حاجات شبه كده في القرآن، يا أيها النبي يا أيها الرسول عندنا كده في القرآن، ليه هنا يا أيها المدثر؟ ليه يبقى الأول عاوزين نعرف يعني ايه مدثر وليه اتقال له هنا يا أيها المدثر؟ يعني ايه سبب أنه اتقال له يا أيها المدثر هنا علشان نستفيد نخرج بفوائد للدعاء. إحنا هنا يا جماعة بنتدبر الآيات تدبراً خاصاً بالدعاء إلى الله، يعني إيه؟ يعني مش هنقول كل الاقوال في كل الآيات، إحنا بس هنقتصر على الأقوال التي تفيد الدعاة إلى الله عز وجل.
فمن هو المدثر؟ تدثر يعني اتغطى، هذا معنى تدثر خلاص. طيب، ليه قال له يا أيها المدثر؟ أقوال؛ أول قول إن النبي صلى الله عليه وسلم اجتمعوا الكفار علشان يشوفوا هيعملوا إيه معه، اجتماع هنعمل إيه؟ هيجي الوفود في الحج هنقول لهم إيه عنه؟ فنقول كاهن، نقول ساحر، نقول شاعر، نقول إيه بالضبط؟ فعلم النبي صلى الله عليه وسلم باجتماعهم، ماشي وهم اتفقوا أو صدروا عن قول أنهم يقولوا إيه؟ سحر يؤثر، وهذا اللفظ ذكر في هذه السورة. فعلم باجتماعهم النبي صلى الله عليه وسلم، فحزن واغتم لذلك فغطى وجهه دخل بيته صلى الله عليه وسلم وغطى وجهه محزوناً. عارفين لما الواحد يقعد يعمل كده من الحزن والكآبة يعني، قومه عملوا كده فغطى وجهه وجلس محزوناً في بيته، فنزل: يَا أَيُّهَا الْمُدَّثِّرُ * قُمْ فَأَنْذِرْ.
هنا يا جماعة أول فائدة: أن الداعية إلى الله لابد أن يكون عنده صلابة نفسية. النبي عليه الصلاة والسلام لما علم بما اجتمع عليه القوم وما وبما صدروا عنه من قول أن هيقولوا سحر يؤثر، اغتم لذلك اهتماماً أقعَدَه. خلي بالكم إحنا هنا مش بنقول إن الداعية إلى الله يتخلى عن بشريته أنه لما الناس تأذيه زي ما الناس -إحنا مش بنقول إنه يتخلى عن بشريته بالكلية- إنما فكرة أن يبقى عندك الصلابة النفسية اللي بها تواجه تلك التحديات في طريقك إلى الله، في طريق الدعوة إلى الله عز وجل بحيث أنك ما تقعدش.
هنا الإشكال فين؟ النبي عليه الصلاة والسلام دخل فغطى وجهه وجلس، قعد فنزل: يَا أَيُّهَا الْمُدَّثِّرُ * قُمْ. يبقى هذا أول معنى: لابد يكون عندك الصلابة النفسية اللي تواجه بها التحديات دي. طيب، أنا ليه بقول كده؟ لأن وأنت في طريقك في الدعوة إلى الله هتقابل ده، يعني هتقابل أنواع من الأذى وهتقابل أنواع من الاضطهاد، وهتقابل أنواع من الكلام الذي يقال. ولعل هنا كمان يا جماعة يعني مسألة يعني إحنا بنقول أذى بالعموم وهنا بقى أذن أذن خاص وهو إيه؟ أنه هُيكذب عليك، وأنت في طريقك إلى الله عز وجل بتدعو إلى الله ممكن يتقال عليك كلام أنت لا عملته ولا تعرف عنه وممكن ما تقصش تعرف عنه حاجه فعلا يعني ممكن كلام بتلوك الألسنة سنوات عن داعية أو يعني رجل أو امرأة وهو أو هي نفسها ولا هو نفسه ما يعرفش حاجة عن اللي بتقال عليه ويوصل له الكلام بعد سنين ده الناس بتقول عليك كذا ده أنت بتاخد كذا بتعمل كذا بتسوي كذا.
طيب، هتحزن؟ أنت بشر، هتقعد؟ هذا الحزن وهذا الغضب وهذا هيقعد؟ لا: يَا أَيُّهَا الْمُدَّثِّرُ * قُمْ * فَأَنْذِرْ. يبقى ده أول معنى.
المعنى الثاني: يا أيها المدثر، أن النبي عليه الصلاة والسلام كان نايم عادي ومتغطي فنزل عليه يَا أَيُّهَا الْمُدَّثِّرُ * قُمْ فَأَنْذِرْ. ماشي، وهو نايم دي بقى كان ليها قصة أن النبي عليه الصلاة والسلام لما راى جبريل في السماء فسقط النبي صلى الله عليه وسلم من هول يعني منظر جبريل عليه السلام ده في المره التانية بعد فترة الوحي وحمل، فقال: «دثروني دثروني»، فدثروه غطوه ونام فنزل: يَا أَيُّهَا الْمُدَّثِّرُ * قُمْ.
يعني إيه؟ يعني مضى زمن النوم، مضى زمن النوم خلاص، يَا أَيُّهَا الْمُدَّثِّرُ * قُمْ. فبرضه يا جماعة فائدة عظيمة جداً للدعاية إلى الله أن هو مضى زمن النوم.
عهد النوم يا خديجة، لكن هو لا يعرفه كونه حديثاً، هو ده حقيقة يعني. خلاص أنت حملت أمانة، ما ينفعش بعد ما تنزل الملعب تطلع من الملعب، ما ينفعش بعد ما تنزلي الملعب تطلعي من الملعب. هو إحنا هنا يا جماعة؟ هو الدعوة إلى الله زي ما هي تشريف فهي تكليف، وأظن كلنا عارفين، كل اللي في المجلس عارفين، إن الأمر بالمعروف والنهي عن المنكر هو فرض كفاية، فإذا لم تتحقق الكفاية أثم كل قادر عالم. فدعوة إيه هي أصلاً؟ ملخص الدعوة إيه؟ أمر ونهي. يعني هو إحنا بندعي الناس ليه يا جماعة؟ بنعو الناس إن هم يصلوا، إن هم يبروا، إن هم يصلوا الأرحام، أوامر، إن هم ما يغتابوش، إن هم ما ينموش، إن هم ما يكذبوش، إن هم ما يتبرجوش، وهي أمر ونهي. ما هي دي الدعوة إلى الله عز وجل. فإذا تخلى كل من هو في الثغر، أو على هذا الثغر، عن ثغر ما، يفتكر إنه إيه؟ اه هو شرف وكل حاجة فسبته عادي. لا، هو مش عادي، مش عادي. هو زي ما هو تشريف فهو تكليف عليك. ومضى عهد النوم خلاص انتهى. ليه مضى عهد النوم؟ لأنك بوجودك على هذا الثغر، بتحصيلك للعلم ووقوفك على هذا الثغر أو للقرآن وبعدين بتروحي تعلمي غيرك، خلاص مالكش إنك بعد ما تنزل الملعب تطلع كارت أحمر لنفسك، مافيش كده، مافيش.
القول الثالث في ﴿يَا أَيُهَا الْمُدَّثِّرُ﴾، إنه المدثر هنا بدثار الخمول، خمول الذكر. النبي عليه الصلاة والسلام كان خامل الذكر، وكان يتحنث في غار حراء، قعد لوحده في الركن اللي ما حدش يعرفه فيه، ركن الراحة بتاعه، فكان في هذه المنطقة يعني. فنزل ﴿يَا أَيُهَا الْمُدَّثِّرُ﴾ بدثار الخمول، خمول الذكر، ﴿قُمْ فَأَنْذِرْ﴾. ليه يا جماعة؟ لأن بعض الدعاة أو بعض من حمل هذا الأمر وبعدين يقوم يعمل إيه؟ يقعد كده في ركن الراحة بتاعه خلاص، نقوله لا هو برض مش كده يعني لا، يعني اخرج من منطقة الراحة بتاعتك. وهو عموماً يا جماعة عموماً، ما فيش حد يتحسن في حياته في دنيته إلا لو قدر يخرج من منطقة الراحة. إنما فكرة إن أنا، أنا ليه بقول الكلام ده؟ بعض إخواننا، يعني إخواننا دي يعني شباب مثلاً ولا أنا نفسي يعني أنا بتكلم عن نفسي مش عن حد، بيعمل إيه؟ بيعطي الدعوة فضل وقتية، يعني إيه؟ يعني أنا حياتي ماشية زي ما هي، فلو أنا قبل ما أتدين كنت بنام عشر ساعات فنام عشر ساعات، لو قبل ما أتدين أنا كنت بروح الحته الفلانية وببعمل نفس نمط حياتي، وبعدين لما يبقى يتبقى وقت ندي للدعوة بقى، ندي للعلم، ندي للقرآن. لا، أنت كده مش عاوز تخرج من منطقة الراحة بتاعتك. ﴿قُمْ فَأَنْذِرْ﴾ يا أيها المدثر، قم سيبك بقى من خمول الذكر وسيبك من هذه الراحة وهذه الدعة، قم فانذر.
خلاص، علشان كده ربنا سبحانه وتعالى بدأ السورة بـ ﴿يَا أَيُهَا الْمُدَّثِّرُ﴾. يا أيها المدثر يبقى كده خلاص أول ما أنت تدخل أيها الداعية أو أيتها الداعية إلى الله، محفظة قرآن، محفظ قرآن، أول ما تسمع يا أيها المدثر على طول يجي في قلبك المعاني دي، خلاص، النوم، الراحة، والدعة. الأذى اللي بيصيبني ده ما يخليش يعني أخد جنب وأقعد وأحزن، لا ما فيش الكلام ده، ﴿قُمْ فَأَنْذِرْ﴾.
هنا الإمام القشيري ليه لمحة جميلة جداً على القول الأول بتاع ﴿يَا أَيُهَا الْمُدَّثِّرُ﴾، إن الكفار اجتمعوا وقالوا هنقول عليه إيه؟ وصدروا عن أنهم يقولوا سحر مستمر، سحر يؤثر، فالنبي عليه الصلاة والسلام حزن لذلك وجلس وغطى وجهه صلى الله عليه وسلم حزيناً كئيباً، فنزل ﴿قُمْ فَأَنْذِرْ﴾. قال الإمام القشيري: إن كنت أو ما طلبت صرفه عنك بدثار، فاطلبه بالإنذار. هو النبي عليه الصلاة والسلام لما حزن لذلك فجلس ودخل بيته وحزن وغطى وشه، هو يريد إنه يعمل إيه؟ إنه يصرف أذى القوم عنه. طب هل ده هياتي بدثار؟ هياتي بأنك تتدثر وتغطي وشه وتقعد حزين؟
يبقى أنا قلت إيه؟ قلت داعية إلى الله محتاج صلاحة نفسية، كأني في سؤال يتبادر للذهن: طب أنا إزاي أحصل الصلابه النفسية؟ طبعا ده مش هينفع دلوقتي نتكلم، بس دي حته مهمة ولازم نقرا فيها ولازم نسمع فيها، إزاي الداعية إلى الله يحصل تلك الصلابة النفسية؟ لكن واحدة من أساليب تحصيل الصلابة النفسية هي أنك تفكر كده: هو أنا لما أُذيت فقعدت، هو أنا قعدتي دي يعني أنا الأذى ده هينصرف عني؟ لا، مش ينصرف عني ولا حاجة، مش هينصرف.
وهنا بقى الإمام القشيري بيقول حاجة عجيبة جداً، بيقول: اطلبه بالإنذار. يعني أنت لو عاوز الأذى بتاعهم ينصرف عنك، ﴿قُمْ فَأَنْذِرْ﴾. هو بيقول كده، الإمام القشيري فهم الآية كده: يا أيها المدثر قم فانذر، إذا أردت صرف أذى الكفار عنك قم فانذر، مش تدخل تتدثر. فيجي واحد يقول: لا لا، واحدة واحدة بس كده، يعني إزاي؟ ما هو بياذوني عشان أنا بدعو إلى الله، فطبيعي كده لو أخدت جنب وقعدت مش هتاذي.
هنا بقى في معاني يا جماعة، أول معنى هو إيه مفهوم الأذى عندك أصلاً؟ يعني الأذى ده يعني إن دنيتك تتضرر بعض الشيء؟ هو ده الأذى اللي عندك؟ فيبقى أنت لازم تراجع أصلاً حجم الدنيا في قلبك قد إيه وحجم الآخرة قد إيه. هو فكرة إن أنا كل ما دنيتي تأثرت، سواء سمعتي، سواء راتبي، سواء حريتي بقدر ما، سواء كل ما حاجة تحصل في الدنيا، خلل ما يحصل في الدنيا يصيبني هذه الكآبة وهذا الضغط النفسي الشديد اللي يقعدني، هنا أول سؤال أسأله لك: هو أنت حجم الدنيا عندك قد إيه؟ حجم الدنيا قد إيه أصلاً؟ ما الدنيا دي لو فعلاً عندك لا تزن جناح بعوضة، فتاخد من جناح البعوضة ده حته هتقعد كده كئيب وحزين؟ لا طبعا.
يبقى الأذى الحقيقي هو أذى الآخرة، أذى الدين، أن تسلب شيئاً من دينك. يعني لو أنت قاعد عشان أنت خايف من الأذى، فأنت الأذى الذي صرف عنك من أذى الدنيا ما أوذيت به في دينك أشد، لأنك كنت واقف على ثغر من ثغور هذا الدين وتخليت، ده الأذى الحقيقي. يبقى اطلبه بالإنذار، يعني اصرف الأذى عنك بالإنذار، ده أول معنى.
المعنى الثاني ومعنى مهم جداً ولابد أنه يتحلى به الداعية إلى الله، يا جماعة هل ظننا في الله عز وجل أن نتقرب إليه سبحانه وتعالى وأن ندعو الناس إليه سبحانه وتعالى ثم هو يخذلنا ويتركنا ويسلمنا لأعدائنا؟ من ظن ذلك بالله فقد ظن بالله ظن السوء. يعني أنا لو اختفيت وما بقتش أدعو إلى الله خلاص الأذى مش هيسيبني؟ إيه ده؟ يعني أنا لما أدعو إلى الله ربنا سبحانه وتعالى يسلمني لأعدائي؟ عجيب جداً! عجيب! هو ده ظننا بربنا سبحانه وتعالى؟ ده ظننا بالله ده؟ يا جماعة ده لو عمله ملك من ملوك الدنيا يبقى ملك قليل الأصل. يعني أنت ملك من ملوك الدنيا كده، وبعدين أنت بقى الخادم المطيع بتاع الملك ده وبتدعي الناس إلى طاعة هذا الملك وعدم الخروج عن أمر الملك واحترام قوانين الملك، والملك شايف ده، يعني الملك عارف هو مطلع عليك أن أنت بتعمل ده وأن أنت خادم مطيع وأنك مخلص من جواك مش مرائي مثلاً ولا بتعمل كده بتتزل ليه عشان تاخد فلوس، خالص، مخلص أنت بتحب فعلاً الملك ده، وبعدين في عز ما أنت بتعمل ده وحارق قلبك في مملكة الملك عشان تطوع الناس لذلك الملك، راح الملك عامل إيه؟ قال لشرطة: خذوه. إيه رايك؟ هتقول إيه على الملك ده؟ ولله المثل الأعلى.
من ظن ذلك بالله فقد ظن بالله ظن السوء. تقول: طب ما احنا بنشوف ده، بنشوف إن ممكن واحد داعية إلى الله عز وجل فيصاب بأذى. نقول: أنت اللي مش فاهم يعني إيه أذى بقى، يعني إذا حدث ذلك، أولاً هو حدث لأنه يدعو إلى الله يا جماعة، عاوزين نفهم دين، عاوزين نفهم دين. لما حدث له ذلك، حدث له ذلك لأنه يدعو إلى الله، ولا حدث له ذلك بما قدم يداه من تقصير وذنوب ومعاصي؟ ده أول حاجه لازم نغير طريقة تفكيرنا. يعني لما أصابك نوع أذى في الدنيا، ده مش عشان أنت بتدعو، مش عشان أنت بتطيع ربنا سبحانه وتعالى. يبقى أول معنى أن ده بما كسبت أيدينا ويعفو عن كثير سبحانه وتعالى. خلاص، يبقى ده معنى لازم نفهمه، فده يودينا لحته إيه؟ الاستغفار والتوبة، ولما يصيبنا شيء على طول نرى ذلك، نرى أنه بما كسبت أيدينا ويعفو عن كثير سبحانه وتعالى، ده أول معنى.
المعنى الثاني أنه إذا أصابك نوع أذى في الدنيا، أو هذا الداعية أو هذا العالم أو طالب العلم أو كذا، إذا أصابه نوع أذى في الدنيا، وألهم معه الصبر أو أعل من كده الرضا بقى، يبقى دي محنة ولا منحة؟ محنة ولا منحة؟ دي منحة من الله عز وجل أتته لترفع درجاته عند الله عز وجل. وبرضه نفهم الحديث: أشد الناس بلاءً الانبياء، ثم الأمثل فالأمثل، يبتلى المرء على قدر دينه. هنا ليه يبتلى على قدر دينه؟ علشان إذا ابتلي وألهم مع البلاء الصبر أو الرضا، فهو في رفعة دائماً، ده يرتقي في الدرجات. فأيه المشكلة؟
تقول: إحنا اتلخبطنا دلوقتي، يعني هو بمعاصينا ولا هو الانبياء والأمثل فالأمثل؟ هو ما فيش تعارض بين الاتنين، أنت أول ما يصيبك شيء هتقول معصية بذنبي، فتتروح للاستغفار والتوبة وكذا وكذا وكذا، وترضى لو قدرت، ما قدرت تصبر، ده أقل شيء على ما ابتليت به، إذا فعلت ذلك كنت في رفعة. يعني هو إحنا امتى نقول إيه هو كده ولا كده؟ لو تعذر الجمع، لكن هو الجمع لا يتعارض. يعني إيه أصبت بأذى؟ عيب عيب عيب انك تقول الكلام ده مع ربنا سبحانه وتعالى، تقول: لما دعيت إلى الله أصبت بأذى! إيه ده؟ عيب! الله سبحانه وتعالى يسلمك لأنك دعوت إليه؟ عيب! أنت، يعني أنت بتفكر إزاي؟
أول ما يجيلك التفكير ده على طول افتكر مثال الملك اللي قلناه من شوي، على طول. إذا أنت بتستحيل هذا عقلاً عن آحاد البشر، ملك من ملوك الدنيا ما ينفعش يعمل ده، ما ينفعش، ملك الملوك سبحانه وتعالى يفعل ذلك؟ فيبقى مش عشان أنا بدعو إلى الله، عشان أنا بحفظ القرآن، عشان أنا ماسكة دار، عشان أُذيت، إيه ده؟ ده سوء أدب مع الله سبحانه وتعالى. لا، إحنا نقول إيه بقى؟ ده أنا عشان بدعو إلى الله، ده أنا كان زمان خسف بيا من زمان، لكن الدعوة دي هي اللي أجلت شوية الموضوع ده. ده أنا كان زمان أصابني بلاء كبير جداً، لكن الدعوة دي اللي خففت شوية الموضوع، فهمتوا يا جماعة؟ وقل مثل ذلك في جميع الطاعات.
يبقى ده بذنبي، ده بمعصيتي، ده بتقصيري في الدعوة، ده بتقصيري في إدارة الدار اللي ماسكاه، اللي ماسكاها، ده بتقصيري في تحفيظ الأولاد القرآن، ده بما أُميل إلى الدنيا والمرتب اللي باخده والدولارات اللي باخده لو بحفظ أجانب، وأصبت بهذا الأذى في الدنيا. الأذى بقى في الدنيا ده ممكن يبقى حبس، ممكن يبقى زوج يؤذيكي بشكل ما، ممكن يبقى طفل يطلع عاق، أي نوع من أنواع الأذى الدنيوي اللي بيحصل، فقدان مال في أي شيء، ده مش بالدعوة ومش من الدعوة ومش من حفظ القرآن ومش من قيام الليل، لا، ده من تقصيرنا في الدعوة، ومن تقصيرنا في قيام الليل، ومن تقصيرنا في القرآن، ومن تقصيرنا في تحفيظ الناس القرآن، ومن تقصيرنا في إدارة الدورة القائمة على تحفيظ الناس القرآن. فبما كسبت أيديكم، فنتوب نستغفر، ثم نصبر على ما أصابنا فنكون في ارتقاء. يبقى نجمع بين القولين، ما فيش مشكلة خالص.
يبى ﴿يَا أَيُهَا الْمُدَّثِّرُ * قُمْ فَأَنْذِرْ﴾. طيب ﴿قُمْ فَأَنْذِرْ﴾، أنذر من؟ هنا محذوف، ما تقالش مين، أنذر عشيرتك الاقربين دي جت، وأنذر الناس كلهم بقى مش كده؟ وما أرسلناك إلا كافة للناس بشيراً ونذيراً. يبقى هنا في برض معنى ﴿قُمْ فَأَنْذِرْ﴾ تنتبه للمعنيين: عشيرتك الاقربين وهنجي كمان شويه إن شاء الله، وبعدين تنطلق لباقي الناس. ليه بقول ده؟ لأن كثير من الدعاة، أنا أسف أنا أسف أن بقول ده يعني، أنا دايماً بقول كثير من الدعاة بيبقى في ذهني طبقة معينة من الشباب الصغير، يعني ما مقصديش إخواني ولا، لا، الإخوان والأكبر مني وكده هم أجدر أن هم يقولوا الكلام ده، لكن إحنا بنوجه الشباب الصغير اللي لسه طالع علشان يبقى المعاني دي منتبهين ليها. للأسف بيغفل أقاربه، بيغفل ولاده وزوجته وأبوه وأمّه وأخواته، وممكن يبقى هو كل اللي في دماغه إيه؟ الكاميرا والمايك والانتشار، مش بقول إن هو نيته، يعني نيته في رياء دي قصة تانية هنجي لها كمان شويه إن شاء الله، لا أنا بقول هو مشغول بده، مشغول بده.
النبي عليه الصلاة والسلام بداية دعوته كانت لمن؟ وأنذر عشيرتك الأقربين. فما ينفعش تبقي أنتِ تحفظي في الدار وأولادك ضايعين في القرآن، ما ينفعش.
أنذر عشيرتك الأقربين، ما ينفعش تبقى بتدي نازل تدي درس عن الصلاة وأهمية الصلاة وابنك جوه نايم ما بيصليش. أنذر عشيرتك الأقربين، ما ينفعش تبقي إنتِ عمالة تحضري درس عن الحجاب والحجاب الشرعي ومش عارف إيه وبنتك متبرجة. أنا مش بقول إن هو لا، يعني أقصد ما ينفعش تكوني مش مديه الحته دي مجهود وبذل، الهداية بتاعة ربنا سبحانه وتعالى.
يعني الولد ده يصلي ولا ما يصليش، تلبس حجاب ولا ما تلبسش، دي بتاعة ربنا دي مش بتاعتنا، ليس عليك هداهم، لكن تدي الحته دي مجهود وبذل. قم فأنذر، طيب قم فأنذر، أنذر بإيه؟ يعني أنذر الناس بإيه؟ هنا هنيجي بقى ترتيب الدعوة؛ فربنا سبحانه وتعالى ما سبهاش في الآية كده، قال سبحانه وتعالى: ﴿قُمْ فَأَنْذِرْ﴾ [المدثر: 2].
فكان سائلاً سأل: وما الذي أنذر به؟ فقيل له: ﴿وَرَبَّكَ فَكَبِّرْ﴾ [المدثر: 3]. دي أول حاجة تنذر بها الناس دي، أيها الداعية إلى الله، أول درس وأهم درس يوصل للناس من خلالك، إنك تعبددهم لله عز وجل، ماشي؟
ده أول معنى في معنى «وربك فكبر». هحول فيها كذا معنى، «وربك فكبر»، لكن أول معنى إن ما ينفعش دعوتك تخلو من تعبيد الناس لربنا، إنك تطلع رابط الناس بربنا سبحانه وتعالى، إنك تعظم الله عز وجل في نفوس الناس، هو ده الزاد الحقيقي للمسلم.
فجت هنا ﴿وَرَبَّكَ فَكَبِّرْ﴾. معلش كل شوية ببص على. طيب، يبقى أول معنى ﴿وَرَبَّكَ فَكَبِّرْ﴾، يبقى ده توجيه لما تدعو به. يعني إيه هي دعوتي؟ دعوتي يبقى شكلها إيه؟ أنا عاوز أقول لك، أو عاوز أقول لك: لو قدرنا نخلي دعوتنا كلها بتدور في هذا الفلك، خير وبركة، ﴿وَرَبَّكَ فَكَبِّرْ﴾.
نتفنن بقى في الدعوات إلى الله، نجي من هنا ونجي من هنا، لكن هدفنا الأخير والأسامي والأعظم: ﴿وَرَبَّكَ فَكَبِّرْ﴾ يا أيها المدثر قم فأنذر وربك فكبر. طيب، يبقى ده أول معنى: ﴿وَرَبَّكَ فَكَبِّرْ﴾.
المعنى التاني: ﴿وَرَبَّكَ فَكَبِّرْ﴾، يعني كبره، يعني الله أكبر، طب الله أكبر دي يعني ذكر، يعني تكبر الله عز وجل وتذكر الله عز وجل بالتكبير، وما والى التكبير، وما يشبه التكبير. يبقى هنا كان في إشارة إلى الذكر يا جماعة، يعني يا أيها المدثر قم فأنذر، وفي طريقك وفي دعوتك أوعى تغفل عن الذكر.
إيه ده؟ إيه العلاقة؟ لا، هو في علاقة وطيدة جداً، وفي حاجة عجيبة جداً بقى هنفهمها دلوقتي، إيه الدعوة أصلاً؟ إيه الدعوة في القرآن اللي احنا لسه قايلينها؟ ﴿قُلْ هَذِهِ سَبِيلِي أَدْعُو إِلَى اللَّهِ عَلَى بَصِيرَةٍ أَنَا وَمَنِ اتَّبَعَنِي﴾ [يوسف: 108] وإيه؟ وسبحان الله، مما قيل فيها أي: وقل سبحان الله.
قل هذه سبيلي وقل سبحان الله، حد فهم حاجة؟ يعني قل هذه سبيلي أدعو إلى الله، ويا محمد صلى الله عليه وسلم، قل سبحان الله، ما تنساش الذكر وأنت بتدعو إلى الله، ما تنساش حصيلتك من ذكر الله عز وجل، لأن هذا الذكر يثبت الداعية إلى الله عز وجل.
احنا قلنا من شوية: ﴿يَا أَيُّهَا الْمُزَّمِّلُ * قُمِ اللَّيْلَ إِلَّا قَلِيلًا﴾ [المزمل: 1-2] وفتر الوحي ليه؟ علشان نحصل حصيلة تعبدية إيمانية تفيدنا في طريقنا في دعوتنا. طب وأحنا بندعو إلى الله، أوعى تغفل عن الذكر، أوعى.
اذهب إلى فرعون إنه طغى، فقول له قولاً ليناً، قبلها على طول إيه؟ ولا تني في ذكري، قبل الدعوة روحوا فرعون أدعوه إلى الله، قبل ما يروحوا يدعوا فرعون: ولا تني، أوعوا تضعفوا، أوعوا تقصروا في ذكره، لأن هذا الذكر هيثبت عند لقاء الآية المشكلات أو التحديات في الدعوة إلى الله عز وجل، فحصيلة الذكر مهمة جداً.
يبقى قال لك حصيلة من الذكر، شيخ ابن تيمية رحمه الله، وابن تيمية قول زي ما تقول بقى، عاوز تقول عالم ماشي، عاوز تقول داعية ماشي، عاوز تقول محارب للبدع ماشي، عاوز تقول مجاهد في سبيل الله، هو جاهد في سبيل الله، جاهد التتار ماشي، عمل كل حاجة، ومع ذلك ومع كل بقى يعني هذا هذه الحصيلة من العلم والدعوة وكذا وكذا، كان ليه قعدة كده ما ما بيفوتهاش، يقعد من الفجر إلى أن تعلو الشمس، بيعمل ايه؟ ذكر كل يوم.
ذكر، ويقول: هذه غدوتي، فإن لم أتغذ قوتي. هو ده، هي القاعدة دي اللي مظبطة لي يومي، اللي مظبطة لي حياتي، مظبطة لي جهادي ومحاربتي للمبتدع ودعوتي وطلبي للعلم، هو الذكر الذكر.
يبقى يا أيها الداعية ﴿وَرَبَّكَ فَكَبِّرْ﴾، وأعظم الذكر ل يعني يعني الذكر كله عظيم، لكن لكن هنا ربنا سبحانه وتعالى خص التكبير، لأن التكبير يا جماعة فيه معنى عجيب جداً، التكبير فيه معنى عجيب جداً.
احنا احنا احنا مركزين احنا بنكلم دعاة إلى الله، يعني مش بكلم عموم المسلمين، يعني مش هقعد أفصل في التكبير نستفيد منه إيه كمسلمين، لا أنا بكلمك كداعية إلى الله، كمحفظة في دار بتحفظي أولاد ك حد على صغر.
دلوقتي يا جماعة أنا بتكلم دعاة إلى الله، مش لازم اللي قاعد قدام كاميرا ومفتوح لزوم زي حالاتي، لا، أي حد في الكواليس دلوقتي في الدرس هو داعية إلى الله، يعني يعني أنا الناس اللي رتبت اللقاء على الزوم، أنا ممكن يبقى اللي عنده الكلام موجود واللي عاوز يسمع كلام موجود لكن مش عارفين نتلاقى، مش عارفين يعني الدرس اللي احنا قاعدين ده ببديه في ساعة، ده بقاله أنا مش عارف قد ايه، يعني بس بقاله قرب الشهر مثلا بيتحضر لله تنسيقات وكده، يعني مش الدرس نفسه اللي بيتحضر.
طب اللي قام بالمجهود ده كله مين؟ ما هو ده داعية إلى الله سبحانه وتعالى، داعية إلى الله اللي قاعد دلوقتي بيصور ورا الكاميرا ما هو ده داعية إلى الله سبحانه وتعالى، يعني الدعوة إلى الله يا جماعة هي منظومة كاملة، مش لازم اللي مفتوحه خالص، أنت مع أخوك الصغير داعية إلى الله، أنت مع بنتك داعية إلى الله، أنت مع أبوك وأنت مع أمك، كلنا دعاة إلى الله، يعني ما فيش حد إلا وهيكون داعي إلى الله في موقف من المواقف.
طيب علاقة بقى التكبير ﴿يَا أَيُّهَا الْمُدَّثِّرُ * قُمْ فَأَنْذِرْ﴾ [المدثر: 1-2] وأنت بتنذر وأنت بتدعو إلى الله ﴿وَرَبَّكَ فَكَبِّرْ﴾، الله أكبر الله أكبر دي دي فايدتها إيه؟
الداعية إلى الله يا جماعة، الدعوة إلى الله أو أنت كداعية بيقابلك تحديات، أول تحدي: فتنة الضراء، لسه متكلمين عليها من شوية. تاني تحدي: فتنة السراء. ثالث تحدي: الدعوة نفسها، هتلاقوا علاج التحدي، ودي تحديات تبتلي أي داعية إلى الله، الثلاثة دول: فتنة ضراء، فتنة سراء -هنعرفهم إن شاء الله- ونفس الدعوة إلى الله سبحانه وتعالى.
فتنة الضراء: أصبت بأذى، توقفت، اتسجنت، اضطهدت، شني عليك أي حاجة. فتنة سراء: اشتهرت، الاضواء بقت عليك، ماشي في الشارع بيتسلم عليك بصدر في المجالس، فتنة سراء. أو تحصيل مال بقى مثلاً ولا حاجه، اللي يعني مثلاً حد بيحفظ قران وبياخد فلوس على تحفيظ القرآن، بالذات دلوقتي الآية البلاء الحادث تحفيظ الأجانب بالدولار ومش عارف إيه، يعني طبعا مش بقول إنه حرام وحلال، هو طبعا مسألة مسألة أخذ الأجر على القرآن فيها خلاف معروف عند الفقهاء، أنا بقول نفسيتك.
فتنة فتنة ضخمة جداً جداً، والفتنة عشان تعرفها أو تعرفيها اعرفها أو تعرفيها لما تحجب، لأن ممكن إيه أنت قاعد وأنت لا والله ده لله وفلوس إيه دي آخر حاجه أفكر فيها، طب تعال كده واحد من اللي بحفظهم خلص الحصه وما أدلكش فلوس، هتزعل ولا مش هتزعل؟ هتلاقي في نفسك، هنا بقى تبتدي تعرف قلبك هو فعلاً بيتحرك عشان المال بيتحرك يعني كده.
المهم فتن سر، وثالث تحدي بيقابل أي داعية: الدعوة نفسها. الدعوة نفسها، يعني إيه الدعوة نفسها؟ يعني التحضير، الكلام، يعني المدعوين واستقبالهم للكلام، يعني نفس الدعوة إلى الله عز وجل. المنظومة دي أو أو العملية الدعوة إلى الله، دول أكبر التحديات اللي بتقابل أي داعية، علاجهم فين؟ الله أكبر، الله أكبر، ﴿وَرَبَّكَ فَكَبِّرْ﴾.
فإذا أوذيت من شخص: الله أكبر من هذا الشخص، فيطمئن قلبك إلى الله ويركن إلى الله، ويعلم أن ما أصابك فمن الله، ليه؟ لأن الله أكبر، يعني هو الله أكبر، فمش الشخص ده اللي آذاني، لا، هو الله عز وجل هو الذي قدر ذلك، ولو لم يقدر والله ده ولا غيره، لو أن أولكم وآخركم وإنساكم وجنكم لا مش دي: واعلم أن الأمة لو اجتمعت على أن يضروك بشيء لن يضروك إلا بشيء قد كتبه الله عليك، يا غلام إني أعلمك كلمات، الحديث المعروف.
خلاص، لو الأمة، لو العالم ما مشي، لن يؤذوك، ليه؟ أصل الله أكبر، فالله أكبر من هذا الظالم، والله أكبر من هذا الطاغية، والله أكبر من هذا الذي يريدني بأذى، الله أكبر، فيطمئن قلبك.
ده أول تحدي. التحدي الثاني: تحدي السراء، فتنة السراء، الشهره والاضواء والناس اللي بتسلم والناس المعجبه والناس اللي بتتصور والناس، الله أكبر، الله أكبر. فلما أول ما تلاقي قلبك بيميل ناحية هذه الأمور، وأن أنا معروف وأن أنا مشهور وأن أنا بتصور وأن بيطلب مني مش عارف إيه، الله أكبر، يعني ما ما ينفعك إن مدحت عند الناس وأنت عند الله مذموم، الله أكبر.
فده علاج علاج الله أكبر، وردك من الله أكبر فين أيها الداعية؟ يا جماعة التكبير ملح علينا بقوة في اليوم، لفظ الله أكبر ده، احنا لو عادنا تأمله، يعني أنا أنا مش عاوز أحول الدرس على ذكر والله لا، لكن أنا بكلم الدعاة إلى الله، فكرة أن بداية كان الأذان بتسمعه خمس مرات في اليوم، تلاقي التكبير بيتكرر في الأذان أكثر من شهادة التوحيد، يعني متخيلين معنى ده؟ معنى أن الله أكبر تقال ست مرات في الأذان، ست مرات. شهادة التوحيد تقال ثلاث مرات.
التكبير أربعة في الأول واثنين في الآخر، شهادة التوحيد اثنين في الأول وواحدة في الآخر، يعني التكبير على الضعف من شهادة التوحيد من شهادة لا إله إلا الله في الأذان. قل مثل ذلك في الإقامة، خلصت إقامة، طب ادخل يلا في الصلاة، بما تفتتح الصلاة؟ الله أكبر. بما تنتقل في الصلاة؟ الله أكبر.
طيب خلصت الصلاة، تنسك، الله أكبر ٣٣ مرة. قل بقى مثل ذلك في الخمس صلوات. طب هتروح تنام؟ الله أكبر 34 مرة. شايفين يا جماعة التكبير في اليوم أيها الداعية؟ أنا بكلم داعية إلى الله لأن هو ده علاج قلبي للتحديات اللي بتقابلك.
والتحدي الثالث هو تحدي الدعوة نفسه، تحدي الدعوة نفسه، ما عنديش يعني مثلاً ضيق الوقت، مش عارف إيه، مش قادر أحضر، مش عارف إيه، الله أكبر، الله أكبر فوق كل هذه التحديات سبحانه وتعالى، فيلجا قلبك يلتجئ إليه ويعتمد عليه سبحانه وتعالى.
فمهم جداً الله أكبر، يبقى ﴿وَرَبَّكَ فَكَبِّرْ﴾ يعني أذكره، يبقى أول حاجة: الذكر المطلق، يبقى ليك ورد من الذكر، ورد من الصلاة على النبي عليه الصلاة والسلام، ورد من كذا ورد من كذا، ورد من التكبير، وتكبر يعني يواطئ قلبك لسانك، علشان تشعر بالمعاني اللي احنا عمالين نقولها دي وتفهم فعلاً أن الله أكبر دي علاج لتحديات في طريقك في دعوتك إلى الله عز وجل.
يبقى ﴿وَرَبَّكَ فَكَبِّرْ﴾ كده قلنا معنيين. ﴿وَرَبَّكَ فَكَبِّرْ﴾ المعنى الثالث: ﴿وَرَبَّكَ فَكَبِّرْ﴾ يعني صلي، يعني هنا التكبير مجاز عن الصلاة صلي.
وده بقى ياخدنا لمعنى تاني: هو أنت أيها الداعية وأيتها المحفظة للقران وكذا وكذا، أي حد على صغر، صلاتك شكلها إيه؟ ولما نقول صلاتك مش يعني قيام الليل، صلاتك يعني بداية إصلاح اصلاحك للفرض، يعني الصلاة صلاة الفرض اللي فاتت دي صليتها إزاي؟ ما هو ده زادك، ده زادك أيها الداعية، يا أيها المزمل قم الليل إلا قليلاً وفتر الوحي، يلا روح روح بقى قوم الليل، وبعدين يا أيها المدثر قم فأنذر.
فصلاة إصلاحك للصلاة أيها الداعية مهم جداً ﴿وَرَبَّكَ فَكَبِّرْ﴾ يعني صلي له سبحانه وتعالى، يعني تصلح فرضك أولاً، ثم النوافل بقى شكلها إيه؟ النوافل السنن الرواتب شكلها إيه؟ قيام الليل شكله إيه؟
لازم الإمام أحمد بن حنبل يتعجب أن طالب علم مالوش حظ من الليل، وكان طالب العلم ده يا جاي لأحمد بن حنبل من سفر، يعني مش واحد لا ده واحد جاي من سفر زمان بقى، مش أتوبيس وعربية وطيارة، لا سفر يعني بلاد تشيل وبلاد تحط وسحرة ورمال وجمال وضهره مكسر، نام، جه أحمد تاني يوم، أحمد بن حنبل لقي ركوة الماء زي ما هي، فقال له: أنت ما صليتش؟ يعني قال له: طالب علم ليس له حظ من الصلاة؟ فقال: كنت مسافراً. قال: وإن كان.
حج طاووس فلم ينم إلا ساجداً، ولا مسروق، فالي مسروق، شوفوها كده حد يجوجل ويقول ماشي، أنه يعني إيه؟ طاووس أو مسروق، أظن مسروق الله أعلم، يعني حد يشوفها لنا أنه سافر للحج، يعني أول ما وصل مكة صلا فلم ينم إلا ساجداً.
ففين ده؟ فين ده أيها الداعية؟ ﴿وَرَبَّكَ فَكَبِّرْ﴾. المعنى الرابع: ﴿وَرَبَّكَ فَكَبِّرْ﴾ طبعا في معنى الأذكار بقى، ﴿وَرَبَّكَ فَكَبِّرْ﴾ الأذكار، أذكار الصباح والمساء شكلها إيه عندنا؟ يعني يعني دي دعوة بقى لدعاة إلى الله، محفظات القرآن في الدور اللي ماسكين الدور نفسهم اللي في الحقل الدعوي، يعني أي حد خلينا بقى نستخدم الكلمة دي علشان إيه تلم كل مش كل مرة نقول الألفاظ دي اللي شغالين في الحقل الدعوي، سواء قدام الأضواء، سواء خلف الأضواء، لازم نهتم بالمياه أذكارك أذكارك المطلقة أو وردك من الذكر، أذكار الصباح القرآن أعظم الذكر القرآن.
وبعدين صلاتك، صلاة فرضك، صلاة نفلِك.
وكده وأحينا إلى موسى وأخيه أن تبوَّءا لقومكما بمصر بيوتاً في عز في عز الاضطهاد من فرعون ومن قوم فرعون اضطهاد شديد. وأحينا إلى موسى وأخيه أن تبوَّءا لقومكما بمصر بيوتاً واجعلوا بيوتكم قبلة وأقيموا الصلاة. إقامة الصلاة لها شأن عجيب في تثبيتك في دعوتك إلى الله عز وجل.
وربك فكبر. المعنى الرابع في وربك فكبر، إحنا ده كله بنثور الآيات اللي هي أول آيات نزلت على النبي عليه الصلاة والسلام. الرسول عليه الصلاة والسلام أول آيات تقول له يلا قوم قوم ادعُ إلى الله. وربك فكبر، يعني كبره بالتقديس والتنزيه عن الأنداد والأضداد في القصد والاستعانة، هذا مأثور عن بعض المفسرين. نقول الكلام ده تاني ونرجع له، والكلام ده من أخطر ما هيتقال في هذا الدرس. خلاص جبتوها ولا إيه؟ أه حجة مسروق، يبقى الإمام مسروق، ماشي جزاكم الله خيراً حج مسروق فلب ينم إلا ساجداً.
تمام، يبقى وربك فكبر، يعني كبره ونزه –يعني تكبره– التقديس والتنزيه عن الأنداد والأضداد في القصد والاستعانة. لا واحدة واحدة بقى علينا كده، وده من أهم دقائق في هذه الحلقة. يعني وربك فكبر، يعني قدسه عن الأنداد في قصدك واستعانتك. طب تعال ناخد واحدة واحدة. يبقى وربك فكبر، يعني وأنت تدعو إلى الله –إحنا مركزين في الدعوة دلوقتي– وأنت تدعو إلى الله تريد بالدعوة وجه الله. يبقى كبره، الله أكبر عن أن ينازعه شيء في قصدي. وأنا أدعو بدعو، فهل ينازعه الله عز وجل مثلاً؟ كام واحد حاضر الزوم؟ ليه أنداد وأنا بادعو دلوقتي؟ الدرس بيتصور، ترى هينزل على اليوتيوب هتشاف كم مرة؟ كم ألف مرة؟ شايفين؟ شايفين الحاجات اللي لازم نجاهد نفسنا فيها!
وأنا بحفظ القرآن ابتداءً عشان هرجع أحفظه بعد كده، فبَحفظه علشان يبقى صوتي حلو والناس تقول الله، وأول ما أبتدي أقرأ والناس... أنداد، أنداد عمالة تخش! أنا أغنى الشركاء عن الشرك، من عمل عملاً أشرك فيه معي غيري تركته وشركه. فإحنا وأنا في الدعوة، عشان كده بقول لكم يا جماعة الدعوة خطيرة، الدعوة ثغر خطير به تكون رفيقاً للنبي عليه الصلاة والسلام وبحاجات فيه كده لو ما اتظبطتش تروح في داهية، تروح في داهية.
الرجل اللي في النار تندلق أقتاب بطنه، وعارفين الحديث مش كده؟ يدور كما يدور الحمار في الرحى. إيه؟ أنت مش أنت كنت تدعو تأمر بالمعروف وتنهى عن المنكر؟ بلى، كنت آمركم بالمعروف ولا آتيه، وأنهاكم عن المنكر وآتيه. فخطيرة جداً الحته دي. يبقى وربك فكبر، كبره عن الأنداد في القصد. يبقى أنت بقى بتحفظ القرآن عشان الدولارات اللي هتجيلك من الأجانب؟ بتحفظ القرآن عشان المرتب اللي بيجيلك من الدار؟ بتحفظ القرآن علشان تبقي الشيخه فلانة أجمد واحدة في التجمع؟ بتحفظ القرآن؟ بتحفظ القرآن ليه؟ قم فانذر وربك فكبر. كبره عن الأنداد في القصد. طب علاجها ايه؟ الله أكبر والله كفاية، كفاية الله أكبر دي لو واطأ القلب اللسانة انتهت. هتبص كده للفلوس الراتب، أو إيه ده؟ الله أكبر! الدولارات بتتحول لك. الله أكبر! الشهرة والصيت والغنى والحلقة بتاعتي بحضرها مش عارف إيه، وأول ما اسمي يتقال بتتقفل حلقتي. الله أكبر، الله أكبر.
طيب، ده في القصد، وفي الاستعانة. يعني ده تكمله الجملة بقى. يبقى كبره بالتقديس والتنزيه عن الأنداد والأضداد في القصد والاستعانة. آه، خطيرة جداً دي! في القصد والاستعانة. الاستعانة يعني إيه؟ هو الاستعانة بقى يعني جميل جداً أن نُستغل الحاجات الحديثة، يبقى أنا إيه؟ الدرس بيتصور وبنجيب إضاءات. طب فجأة ما فيش كاميرا، ما فيش إضاءات، وقف الدعوة يا ابني هو إحنا ما بندعيش؟ لا بالكاميرا ولا بالإضاءات، نحن ندعو بالله. احفظوا الجملة دي يا جماعة، احفظوها أيها الدعاة إلى الله، احفظوا الجملة دي: نحن ندعو إلى الله لله وبالله. احفظوها بجد يعني، نحن ندعو إلى الله لله وبله، ندعو إليه, له, وبه سبحانه وتعالى. لله يعني قصدنا الله سبحانه وتعالى.
طبعا إحنا مش بنقول إحنا بنعمل ده، أنا بقول يعني إيه دي جملة لازم نشتغل عليها يعني وإلا يبقى إيه؟ تفاخر بما... لا هو نحن ندعو إلى الله لله، يعني نقصد الله عز وجل في دعوتنا، وبالله ندعو، لا بغيره، لا بكاميرا ولا بإضاءة ولا بمايك. حلو، أنا ليه بقول الكلام ده؟ بعض الناس ممكن الحاجات دي توقف له دعوة، يعني إيه؟ لو ما فيش كاميرا خلاص بلاش درس النهارده، لو الإضاءة نص نص نلغي الدرس! عشان يا عم اطلع وتكلموا على الله، على الله بالله بالله ندعو. شو، جماعة، علاج ده فين؟ إبراهيم عليه السلام أذن في الناس بالحج. إبراهيم واقف في الصحرا لوحده! لوحده! أذن ناس مين؟ وأذن يبلغ صوتي يعني أنا أقول يعني أذن في الناس يا أيها الناس حجوا بيت الله، صوت إبراهيم هيوصل فين؟ ماذا قال الله؟ قال: يا إبراهيم عليك النداء وعلينا البلاغ. أنت اللي عليك أن تتكلم، البلاغ دي بتاعتنا إحنا بقى.
فييبقى جميل أن نستخدم الوسائل ونحاول نحسن، جميل، إنما تبقى خلاص قلوبنا تعتمد على تلك الأسباب، أنه بالسبب ده الدعوة هتنجح، السبب ده غاب الدعوة وقعت. اوعوا! اوعوا! ما فيش حاجة توقف يا جماعة، ما فيش حاجة... يعني هو دين ربنا سبحانه وتعالى بنا أو بغيرنا ولا من غير أي حد، الدين هينتشر وهيدخل كل بيت بشرى النبي صلى الله عليه وسلم. خلاص، إحنا بس عاوزين يبقى لنا إيه لقطة كده في المشهد، مشهد نُصرة هذا الدين، ده اللي بنعمله.
طيب تقول لي لا لا، أنا والله يا شيخ يعني كلامك جميل جداً وأنا فعلاً إيه ما ببعتمدش على الحاجات دي، هو أهم حاجة الدرس اللي بحضره والعلم اللي أنا هديه... هقول لك برده لا مش بكده خالص، أهو دي من الأنداد اللي عاوزين نشيلها. يعني إيه؟ إيه ده؟ يعني إيه الأحاديث والآيات وال... آه، ما تعتمدش على كده، أنت تدعو بالله. عارف يعني إيه بالله؟ ممكن تقول لواحد يا ابني ما تيجي تصلي مخلصاً لله، حال اللي قدامه ده يتشقلب! يتشقلب! واحد تاني محضر الأدلة كلها من قرآن وسنة وأقوال سلف ويدغدغ العواطف بالمعرفش، وما حدش ممكن... يعني ممكن تلاقي تأثير لك، يعني إيه؟ واحد بيعيط ولا واحد تأثر، لكن ما أنجش شيئاً. ليه؟ لأنه لم يدعو بالله.
عارفين مصعب؟ أول سفير في الإسلام، وبعدين رايح يدعو الناس، ونزل على واحد مسلم هناك عشان يعرفه بقى مين اللي جايين. وبعدين واحد جاي عليه كده من كبار القوم، فقالوا: هذا سيد في قومه إن أسلم أسلم بإسلامه خلق كثير. فاعمل إيه بقى؟ حضر لله بقى الأدلة عشان نفحم قال له فاصدق الله فيه! فاصدق الله فيه! يقولوا يعني في بعض الروايات أن مصعب جه، الراجل ده شاهر سيف ولا رمح عاوز يقتل مصعب. قال له: اجلس فاسمع فإن رضيت وإلا كففنا عنك ما تكره. يعني والله أجلس، سمعت حبييت اشتريت، ما حبيتش هقوم وأسيب لك الحي بتاعك –هو كان راح يدعو في حي هذا الكبير– فجلسا، قال له: أنصفت، عاقل، راجل عاقل. الرواية بتقول إيه؟ ما إن بدا مصعب في الكلام –خلي بالك يا جماعة ده واحد جاي مش مهيا أن هو يستقبل منك الكلام أصلاً، ده واحد جاي جاي مديك، جاي مديك– مصعب بس بدا يتكلم بس، علت وجهه ابتسامة، قال: ماذا يصنع من أراد أن يدخلها في هذا الدين؟ فاصدق الله فيه!
فما تحضرش، حضر كويس جداً درسك، وحضري كويس جداً الآيات اللي هتقديها ومعناها من التفاسير، وبعد ما تحضر وتحضري، مفلس يا رب أنا أدعو بك لا باللي حضرته ولا باللي ذاكرته ولا باللي حفظته ولا بأي حاجة. فضلاً بقى عن الأدوات التانية بقى الكاميرا والإضاءة والتليفون والمايك والسماعات ولا بأي حاجة، تدعو إلى الله لله وبالله. وربك فكبر، يعني تكبره بالتقديس والتنزيه عن الأنداد والأضداد في القصد والاستعانة.
يا أيها المدثر، قم فانذر، وربك فكبر، وثيابك فطهر. يعني إيه وثيابك فطهر؟ أول أول معنى المعنى الظاهر، عشان بس وثيابك فطهر دي يعني قصة كبيرة شوية. ثيابك فطهر، يعني ثيابك فطهر وهنا لازم نتكلم، طهر ثيابك بالماء، وده أبسط المعاني أن احنا حملنا الثياب على الظاهر وحملنا لفظ التطهير على الظاهر. يبقى طهر ثوبك بالماء، وهنا لازم نتكلم عن النظافة الشخصية للداعية إلى الله.
خلاص، إحنا هنا يا جماعة مش بنتكلم أنك تلبس أفخم براندات وتعمل مش... طب بعض الدعاة يقول لك طب أنا بعمل ده برده إيه يعني في سبيل أن إنا بكلم طائفة معينة لازم... الإيه، أول حاجة بس نتفق عليها وبعد كده ننطلق في أي حته، أن إحنا كل اللي بنعمله ده ماينفعش قلوبنا تتعلق به تماماً، عادي هطلع أكلم حد بأي حاجة لو بالله سبحانه وتعالى ربنا يفتح القلوب، خلاص.
إنما اللي إحنا عايزين بقى نتكلم فيه دلوقتي: وثيابك فطهر، نظافتك الشخصية. يعني أنا يا جماعة اللي أنا اللي بقوله ده إحنا بنشوفه، يعني يعني بنشوف بعض الناس المتدينة اللي سنانه ما ينفعش يبقى منظرها، ماينفعش ماينفعش أنت أصلاً لو أنت بتطبق السنة فانت بتستخدم السواك على الأقل خمس مرات في اليوم، ما ينفعش أنك تبقى صفرا، ما ينفعش أنك تبقي صفرا، يعني ماينفعش أنت واحدة محافظة للقران، القرآن يخرج من فمك وقبل ده أنت سمتك، سمتك بيؤثر في الطالبات، يؤثر، ريحتك بتؤثر في الطالبات، لون سنانك بيؤثر في الطالبات. ما هو خلاص يعني، يعني إما أن طالة شافت معلمتها بالمنظر ده فهي هتطلع زيها تتأسي بها، أو هتنفر منها ومش هتمجي لها! أنتوا فاهمين يا... أنتوا فاهمين معنى أن في أوائل الآيات اللي تنزل على النبي عليه الصلاة والسلام وثيابك فطهر؟
يعني معنى برده مهم جداً، خلاص. يبقى ثيابك فطهر، منظرك إيه؟ ثوبك شكله إيه؟ هندامك عامل إزاي؟ سنانك شكلها إيه؟ ريحتك عاملة إزاي؟ النبي عليه الصلاة والسلام سيد الدعاة ما شممت مسكاً ولا طيباً ولا عنبراً قط أطيب من ريح رسول الله صلى الله عليه وسلم، فانت ريحتك عاملة إزاي؟ وأنت ريحتك... مش يعني حاطة عطر، لا بس ريحة عرق وريحة محافظة، طب فين تعظيم القرآن؟ دعك الآن بقى من طالبات، تعظيم القرآن! هذا القرآن الذي يخرج من فمك، يبقى الفم ده اللي بيخرج منه كلام الله شكله إيه؟ يبقى وثيابك فطهر.
خلاص، وفي معنى تاني وثيابك فطهر اللي هو شرط لصحه الصلاة. يبقى أنت كداعيه إلى الله ما ينفعش تبقى جاهل، يعني قلنا من شروط صحة الصلاة طهاره الثوب اللي أنت لابسه، فتبقى دي إشارة بقى لمعنى إيه؟ أن إحنا بنقول لك وربك فكبر، ومن معيتها الصلاة، طيب هتصلي وأنت جاهل بالصلاة وبس حارق نفسك في الدعوة كل شوية لايف ومش عارف إيه والمايك محطوط والكاميرا موجودة وطالع مش عارف إيه، طب تعال كده اقعد اقعدي قولي لي أركان الصلاة! يلا عدي معايا قولي لي أركان الصلاة. ما هو عارفين يا جماعة أركان الصلاة دي اللي هو مش هتسقط حتى لو جهلاً، حتى لو مش هتسقط. طب قولي لي أركان الصلاة كام؟ كم ركن عندنا في الصلاة؟ ما تعرفيش، ما تعرفش! داعية إيه؟ على أي مذهب؟ على أي قول؟ يعني مش بقولك على أي قول وأي مذهب أنت بتدرسه، ما تعرفش شروط صحة الصلاة إيه؟ ما تعرفش؟
وممكن يبقى ربنا كتب لك بقى انتشار، والانتشار ده يا جماعة خلي بالكم، اصل إحنا كتير بنخلط الأوراق، يعني هي دي منحة ولا محنة؟ هذا بلاء ولا فضل من ربنا ونعمه وكذا؟ شوف حالك معايا، عشان ده حالك معاه بيقربك لربنا أكتر ولا بيبعدك؟ يعني الشهرة دي خدتك في حته أنك لا بقيت تتعلم دين، ولا بقيت عارف أحكام عباداتك اللي هي اللي هي أركان الدين، (بني الإسلام على خمس)، تاني حاجة بعد الشهادة: الصلاة. أنت ما تعرفش صلاتك دي تصح إزاي وتبطل إزاي، واسمك عندك آلاف الفولورز ولا ملايين مش عارف السابسبرابرز ولا مش عارف إيه! ده روح يا ابني اتعلم، روحي يا بنتي اتعلمي.
وثيابك فطهر، يبقى ده إشارة إلى هذا المعنى، أنه شرط من شروط صحة الصلاة وثيابك فطهر. أو وثيابك فطهر يعني قلبك فطهر. تقول إيه ده؟ لا ثانية، هو الثياب تطلق على القلب؟ آه، يعني العرب كانوا بيستخدموا اللفظ ده وقالوا، امرؤ القيس كان ليه قال إيه:
أفاطمه مهلا بعض هذا التدللِ وإن كنت قد أزمعت صرمي فأجملي أغرّكِ مني أن حبك قاتلي وأنك مهما تأمري القلب يَفعلي وإن تكو قد ساءت مني خلائقٌ فسلّي ثيابي من ثيابك تنسلي
يعني ايه؟ يعني اديني قلبي وأنا أمشي. فسلّي –يعني لو زعلاني مني في خلق أو في خصله أو في كذا– فسلّي ثيابي من ثيابك تنسلي، يعني اديني قلبي وأنا همشي. فهو امرؤ القيس استخدم لفظ الثوب ويقصد به القلب. فمما قيل فيها: وثيابك فطهر، وقلبك فطهر أيها الداعية إلى الله. عندك ورد كده ورد تطهير القلب؟ ما ينفعش أنت داعية إلى الله ولا أنت بتحفظي قرآن ولا أنت كذا ولا أنت كذا وأجي أقول لك إيه هي آفات القلب؟ ما تعرفيش وما تعرفش! بلاش، جيت لك على آفة معينة من آفات القلب، وهي من أشهر الآفات اللي بتصيب أي داعية إلى الله: حب الظهور، حب الشهرة، الرياء، فجيت سالتك ولا سالتك طب إزاي تعرف...
أن عندك رياء، إزاي ما تعرفش؟ وما تعرفش أنك بعد ما تعرف إزاي تعالج، ما تعرفش ده أصلا مع أنك تكون مشيت في سكة العلاج؟
ده كلام، ده كلام! يبقى ثيابك فطهر، قلبك فطهر. يبقى لازم تعرف آفات القلب بالذات اللي بتصيب الدعاة إلى الله؛ آفة التوكل على غير الله عز وجل. أول ما هتيجي تصاب بأذى، أو يجيلك خبر أن الدرس يتمنع ومش عارف إيه، فتروح على طول إيه؟ طب أشوف لي واسطة في المش عارف إيه، ويبتدي قلبك يعتمد على الواسطة ويعتمد على... خطيرة جداً اللي هو فكرة التوكل، متوكل على مين؟ معتمد على مين؟ طيب إزاي أعرف أن أنا معتمد ولا مش معتمد؟ وأن مجرد باخد بالسبب لازم أعرف أنا كده ولا كده؟ طيب لو عرفت -لا ده أنا اكتشفت أن أنا فعلاً معتمد- طب أعالج دي إزالي؟ لازم أعرف، وثيابك فطهر.
يبقى ده تاني معنى في «وثيابك فطهر» ماشي، أو نفسك فطهر، والاتنين بقى بمعنى، يعني تطهر نفسك وطهر قلبك، الاتنين واحد. الثياب تطلق على النفس، أه، وذكروا ذلك في بيت أيضاً لعنترة، قال إيه؟ فشككت... بايه؟ بالرمح المش عارف إيه كده، ثيابه. حد يجيب البيت ماشي. ثيابه هنا يعني نفسه. خلاص، احنا طبعا لما نجي نستدل، بنستدل باشعار من الجاهلية، عشان نقول القرآن نزل بلغة العرب، فالرب استخدموا لفظ الثوب وأرادوا به القلب. أهو امرؤ القيس جاهلي وعمل كده، والعرب استخدموا الثوب وأرادوا به النفس، وهو عنترة عمل كده، و«وثيابك فطهر» يعني وأعمالك فأصلح. أيها الداعية، اصلح أعمالك، تقول إيه؟ هو الثوب ينفع يجي بمعنى الأعمال؟ أه، جاء في الحديث يحشر المرء في ثوبيه اللذين مات فيهما، وهنا قالوا إن المعنى في أعماله التي مات عليها، يبقى «وثيابك فطهر» يعني اصلح أعمالك.
هنا يا جماعة معنى اصلاح العمل ده معنى زائد عن العمل نفسه، يعني احنا قلنا لك ايه؟ يا أيها المدثر قم فأنذر وربك فكبر. ربك فكبر دي فيها صلاة وفيها ذكر وفيها قرآن وفيها... يعني فيها أعمال كتير. هنرجع نقول لك بقى اصلح تلك الأعمال، يعني ادخل بقى في تفاصيل الأعمال واصلحها. خلاص، عنترة إيه؟ فشككت بالرمح الاصم ثيابه، ماشي. هنا بيقول أي قلبه، اللي بعت بتقول قلبه، لكن هو قيل نفسه، يعني مما قيل إن أي... أي نفسه. على كل حال يعني صلاح النفس وصلاح القلب هنقول فيه نفس الكلام، يعني كنا بنقول إيه بقى؟ و«ثيابك فطهر» يعني اصلح أعمالك. يبقى مش كفاية أن أنا بصلي، لا، هو أنت بتصلي إزاي؟ وصلاة النهارده هي هي صلاة إمبارح، وصلاة بكره هي نفس الصلاة النهارده؟ ولا كيفيات الصلاة بتتغير وبتتتحسن وبتتجود مع مرور الوقت؟ أنا بكلم الدعاة ها، أنا ما بكلمش... ده مش خطاب لعموم المسلمين دلوقتي، يصلح لعموم المسلمين، لكن أنا بكلمك أنت أيها الداعية، ما هو ده زادك، هو ده زادك.
«وثيابك فطهر» يعني اصلح أعمالك، أو «وثيابك فطهر» يعني اصلح عشيرتك وذويك، اصلح زوجتك. تقول إيه؟ إيه اللي جاب ده للثياب؟ نقول أه، ما هو هذا يسمى ثياب، وقال الله عز وجل: ﴿هُنَّ لِبَاسٌ لَّكُمْ﴾ [البقرة: 187]. يبقى «وثيابك فطهر»، أنت فين من أهل بيتك أيها الداعية إلى الله؟ فين من أهل بيتك؟ ندوات... يعني إفنتات بتتعمل وهارية نفسي في الدار من الصبح لليل، وبنتي في البيت ما بترقعش، بنتي في البيت مسقطة الحجاب ونازلة شعرها باين، وزوجي في البيت متضايق مني ومقصرة معاه في حقوقه، فين ده يا جماعة؟ ده لخبطة في المفاهيم ولخبطة في ترتيب الأولويات. «وثيابك فطهر»، ما تنساش دول، ذويك.
يا أيها المدثر قم فأنذر وربك فكبر وثيابك فطهر والرجز فاهجر. والرجز فاهجر طبعا فيها كلام كتير، اللي يعنينا هنا في قول الهرري عاوز أقراه لكم لأنه هو جميل جداً في الحته دي، يقول: «أهجر المعاصي والآثام الموصلة إلى العذاب في الدنيا والآخرة، فإن النفس متى طهرت منها كانت مستعده للإفادة على غيرها». الله أكبر! يعني إيه بقى؟ يعني النفس متى طهرت من تلك المعاصي وتلك الآثام، كانت مستعدة أن تفيض على غيرها إفاضة تؤثر.
فأنت عاوز دعوتك تنجح وتبقى ناجحة وتبقى نافذة وتحدث تأثيراً وتغييراً مستمراً، وده المهم يا جماعة أن التأثير يكون تأثير مستمر، مش تأثير لحظي، وأن أنا... أنا في رأيي يعني من أهم... من أهم مؤشرات نجاح الدعوة هو ده، التأثير المستمر. وإن قل العدد، تؤثر تأثير مستمر في شخص ولا أنك تأثر تأثير لحظي في عشر أشخاص، اللي هو يسمعوا الدرس، الدرس جميل جداً تأثرنا وبكينا وهنطلع نقول الشيخ ده أحسن شيخ، وبعدين بكره، بعده، بعده، نسينا كل حاجة! عاوزين نبقى مركزين في ده، التأثير المستمر. أنت بتحفظي في القرآن في الدور، وبيجيلك الحلقة بتاعتك مدرسة في مدرسة، وبيجيلك طلاب في الفصل، داعية إلى الله، ركزوا في المعنى ده، احنا عاوزين تأثير يكون تأثير مستمر. خلاص.
فاللي جابها تأثير مستمر و«وثيابك فطهر» والرجز فاهجر، اللي يخلي دعوتك بالمنظر ده، حالك أنت مع ربنا إيه؟ كل اللي فات كنا بنتكلم في إيه؟ في افعل. هنا بقى: لا تفعل. «والرجز فاهجر»، اترك المعاصي، اترك الآثام. فلو كنت بالحالة دي خلاص النفس مستعدة أن تفيض على غيرها إفاضة يستفيد بها الغير ماشي.
«ولا تمنن تستكثر»، يعني فيها برض أقوال، أول قول: ولا تمنن تستكثر، يعني لا تمنن بما تفعل وتستكثر. بعض... بعضنا بيصاب ده، يعني أنا بحفظ والحلقة بتاعتي 50 واحدة، 100 واحدة، ما أعرفش الحلقات بتبقى كام يعني. فتجي كده بينك وبين نفسك، وانت قاعدة حتى لو ما تكلمتيش، يحصل نوع المن ده، اللي هو إيه؟ بتستكثر عملك. دي آفة من آفات الدعوة إلى الله أصلاً، «ولا تمنن تستكثر».
هو أولا طب إيه... إيه علاج الآفة دي بسرعة؟ أنه أن تعلمي أن ذلك بالله سبحانه وتعالى، يعني لا بجدعنتك ولا بفذلكتك ولا حولك وقوتك، بالله سبحانه وتعالى. وربنا سبحانه وتعالى ذكر ذلك في كتابه: ﴿يَمُنُّونَ عَلَيْكَ أَنْ أَسْلَمُوا ۖ قُل لَّا تَمُنُّوا عَلَيَّ إِسْلَامَكُم ۖ بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ إِن كُنتُمْ صَادِقِينَ﴾ [الحجرات: 17]. يعني ربنا هو يمن، مش أنت اللي تمني ولا أنت اللي تمن يعني. يا جماعة، هو أنا مش ممكن دلوقتي الدرس اللي بصوره ده، الزوم ده اللي بنعمله ده، مش كان ممكن ببساطة شديدة جدا الزوم يتفتح ما ألاقيش غير واحدة داخله ولا اتنين، والدرس ده ينزل على اليوتيوب بعد شويه ما ألاقيش حد سمعه أصلاً؟ هو مين اللي صرف القلوب للناس تدخل على الزوم وتترك أموراً لها في البيت؟ ومين اللي... يعني يصرف القلوب الناس تدخل تتفرج على الفيديو؟ الله سبحانه وتعالى. فقولي مثل ذلك في كل حاجة بتعمليها بقى، يعني البنات دول مش جم عشان أنا جدع، ولا ربنا سبحانه وتعالى الذي أتى بهم؟ أما أنا والله لو عرفوا سريرتي ما فيش حد هيجلسني، ولا حد... حد هيجيلي ولا حد هيعبرني أصلاً! لو عرف ما أخل به بيني وبين ربي إذا أغلقت علي بابي، ولا حد هيسال في. «ولا تمنن تستكثر» لأن ده آفة، آفة بتصيب الداعيه إلى الله، فكان لازم تختم بها الآيات، «ولا تمنن تستكثر».
أو يكون المعنى لا تمنن لا تمن على غيرك، تستكثر من الدنيا. المعنى الأول: تستكثر، يعني إيه؟ ترى أن ما تفعله كثيراً، أن ما تفعله كثيراً. المعنى الثاني: أن تستكثر من الدنيا، يعني إيه؟ أنا بقى الداعية إلى الله، فانا عاوز أبقى أعظم، وعاوز أبقى بيجيلي هدايا، وعاوز أبقى بصدر في المجالس، ولما أقعد على الأكل يتحط لي أحلى أكل قدامي أنا، ولما مش... استكثر من الدنيا وباخد مرتب من الدار أحسن مرتب... «ولا تمنن تستكثر»، لأن دي ليها واقع برض في نفوس الجماهير، مش كده؟ ﴿قُلْ مَا أَسْأَلُكُمْ عَلَيْهِ مِنْ أَجْرٍ وَمَا أَنَا مِنَ الْمُتَكَلِّفِينَ﴾ [ص: 86]، ﴿أَمْ تَسْأَلُهُمْ أَجْرًا فَهُم مِّن مَّغْرَمٍ مُّثْقَلُونَ﴾ [الطور: 40].
يبقى «ولا تمنن تستكثر» أو يكون المعنى «ولا تمنن تستكثر» أي لا تضعف. يقال حبل منين، يعني حبل ضعيف، يبقى في لغة العرب لا تمنن يعني لا تضعف، يعني لا تضعف أن تستكثر. لا تمنن تستكثر، يعني لا تضعف أن تستكثر، إيه ده؟ يعني إيه؟ يعني استكثر أه، استكثر بس من إيه بقى؟ من الدعوة، يبقى لا تضعف أن تستكثر من خصال الخير اللي كنا لسه بنقوله لكم، بلاش منطقة الراحة يا جماعة، بلاش أنا حياتي هتمشي زي ما هي، وفضل الوقت وفضل الجهد وفضل كل حاجة يروح للعلم ولا للقران ولا للدعوة، لا، لا تضعف أن تستكثر من خصال الخير ولو هتضغط في الدنيا شوية، ولو أن الدنيا هتختل... الشيء تختل على سبيل تثبت وتمدد في الدين.
في: «وربك فكبر». تعالوا نرجع لها، عشان هي بقى مناسبتها هنا دلوقتي. هل ربنا قال «وربك كبر»؟ ما قالش كده، قال: «وربك فكبر». بالمناسبه الآية دي تقرا طردا وعكسا، حد فاهم؟ حد يقول لي يلا في الآيات؟ تقرا طردا وعكسا، عاوزين نشوف، سيب لكم دقيقة كده. أيوة أحسنت، تقرا من اليمين والشمال زي بعض، تقرا من اليمين والشمال زي بعض، يعني لو قريتها «ربك فكبر» قريتها زي ما احنا بنقرا، أو قريتها العكس، هتلاقوها تقرا كده وكده، ده معنى طردا وعكسا.
خلاص هنا ربنا ما قالش ربك... ربك كبر، ما قالش كده، قال «وربك فكبر». عارفين الفاء دي؟ قالوا إيه؟ قالوا دي فاء الشرط، يعني إيه؟ يعني مهما يكن من شيء فكبر الله، يعني مهما يكن من شيء يعني مهما حصل ورزقك... ما تنساش، ما تنساش. مهما حصل ومهما يكن من شيء فكبر الله، ده فايدة حرف الفاء هنا، فاء الشرطية دي، يبقى «ولا تمنن تستكثر»، لا تضعف أن تستكثر من خصال الخير، تستكثر من الدعوة إلى الله، وتستكث... وتستكثر من قراءة القرآن، وتستكث... لا تضعف أن تستكثر.
ولربك فاصبر. لأنك بعد ما تعمل كل ده، هيحصل إيه؟ طبعا كلما... «وربك فاصبر» أنه هيحصل أذى، مش لازم أذى، ممكن فتنة السراء، ودي أشد والله يا جماعة، فتنة السراء قد تكون أشد بكثير من فتنة الضراء. ليه بقى؟ فتنة الضراء أنت لا تملك إلا أن تصبر، هتعمل إيه يعني؟ واحد ظالم باذيك ولا واحد له سلطان وله جاه وتصبر. إنما فتنة السراء دي لما نجي نقول لك هتكرر، وهتظهر بالاسم، وهيتال لك، كل الدور هتجري وراك عشان أنت شاطرة، و... ونيجي نقول لك مع كل ده بقى، اوعى قلبك يتغير، حافظ على قلبك، راعي قلبك. أيهما أشد؟ «ولربك فاصبر»، اصبر على الضراء، واصبر على السراء، واصبر على طاعاتك. «ولربك فاصبر»، أنت هتصبر على طاعة، وتصبر عن معصية، وتصبر على أقدار، الأقدار دي ممكن تبقى قدر مؤلم، أذى، ممكن تبقى قدر محبب للنفس، فتنة سراء، ما ربنا... ما ربنا أخبرنا يا جماعة أنه زي ما في بلاء بالضراء في بلاء بالسراء، مش كده؟ ﴿وَنَبْلُوكُم بِالشَّرِّ وَالْخَيْرِ فِتْنَةً﴾ [الأنبياء: 35].
فـ «ولربك فاصبر»، اصبر على كل ذلك، ون... قدم لربك. ما قالش إيه «فاصبر لربك»، يعني أن تكون... أن يكون صبرك لله عز وجل لا لغير الله. ليه بنقول ده؟ برض بعض الناس ممكن يصيبها ده أنه بيصبر على حاجات كتير جدا بس هو ليه؟ اصل أنا عاوز أبقى مشهور، فمعلش هضغط نفسي دلوقتي وهسهر ومش عارف إيه، وهعمل كتير ريلز وشورتس وفيديوهات وهرمي في كل حتة، أه أنت... أنت ليه؟ إيه اللي أنت صبرت ليه على الحياة دي؟ المحفز والمحرك: عاوز أبقى مشهور. أو واحدة تانية: أنا هتنطط من الدار دي للدار دي، ومش هقعد في البيت غير ساعتين، طب أنت إيه اللي مصبرك على الحياة دي؟ أصل هي عاوزة تجمع فلوس، أصل هي عاوزة تبقى اسمها بيتردد في كل حتة في المنطقة اللي عايشة فيها. ولذلك قدم لربك، «ولربك»، لأن الترتيب الطبيعي لأي جملة في اللغة العربية: فعل، فاعل، مفعول، مش كده؟ فالفعل... يعني الفعل يأتي أولاً، هنا الآية ما جتش «واصبر لربك»، ما جتش كده، لا، «ولربك فاصبر»، يعني وأنت بتصبر فكر دايمًا أنك بتصبر لله سبحانه وتعالى لا لغيره. يبقى فيها الحصر، فيها التخصيص، أن يكون صبرك لله عز وجل. معلش طولت عليكم، نقف هنا. نشوف لو في أي أسئلة اتبعت تجاوب عليها، ما فيش يعني.
طيب ما فيش أسئلة، أقول قولي هذا واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.