الصخرة

وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم إنك حميد مجيد.

أما بعد، في الصحيحين من حديث عبد الله بن عمر رضي الله عنهما، أن النبي صلى الله عليه وسلم قال: «انطلق ثلاثة نفر ممن كان قبلكم». في الصحيحين من حديث عبد الله بن عمر رضي الله عنهما، أن رسول الله صلى الله عليه وسلم قال: «انطلق ثلاثة نفر ممن كان قبلكم حتى آواهم المبيت إلى غار فدخلوه، فانحدرت صخرة من الجبل فسدت فم الغار، فقالوا: إنه لن ينجيكم اليوم إلا أن تدعوا الله بصالح أعمالكم. قال أحدهم: اللهم إنه كان لي أبوان شيخان كبيران، وكنت لا أغبق قبلهما أهلاً ولا مالاً، فنأى بي طلب الشجر يوماً حتى ناما، فلم أرح عليهما، فحلبت لهما غبوقهما، وكرهت أن أغبق قبلهما أهلاً أو مالاً، فلبثت والقدح على يدي والصبية يتضاغون عند قدمي حتى استيقظا فشربا غبوقهما. اللهم إن كنت فعلت ذلك ابتغاء وجهك ففرج عنا ما نحن فيه، فانفرجت الصخرة شيئاً غير أنهم لا يستطيعون الخروج.

قال الثاني: اللهم إنه كانت لي ابنة عم، وكنت أحبها كأشد ما يحب الرجال النساء، فأردتها عن نفسها فامتنعت حتى ألمت بها سنة، فأعطيتها مئة وعشرين ديناراً على أن تخلي بيني وبين نفسها ففعلت، فلما قعدت بين رجليها قالت: اتق الله ولا تفتض الخاتم إلا بحقه، فقمت عنها وهي أحب النساء إلي. اللهم إن كنت فعلت ذلك ابتغاء وجهك فافرج عنا ما نحن فيه، فانفرجت الصخرة شيئاً غير أنهم لا يستطيعون الخروج.

قال الثالث: اللهم إنه كان لي أجراء فأعطيت كل أجير أجره إلا واحداً ترك الذي له ومضى فثمرت له أجره، ثم إنه أتاني فقال: ادفع إلي حقي. فقلت: كل الذي ترى من الإبل والبقر والغنم والرقيق هو أجرك. قال: اتق الله يا عبد الله ولا تستهزئ بي. قلت: لا أستهزئ بك، فأخذه فاستاقه كله فلم يترك منه شيئاً. اللهم إن كنت فعلت ذلك ابتغاء وجهك فافرج عنا ما نحن فيه، فانفرجت الصخرة وخرجوا يمشون».

حديث الصخرة حديث عظيم، وهو حديث اليوم وحديث كل يوم. وهذه الصخرة التي انحدرت فسدت عليهم فم الغار إنما تنبئ عن كل صخرة جثمت على صدورنا اليوم، فإن جثمت على صدرك صخرة غلاء الأسعار تذكرت تلك الصخرة التي انحدرت فسدت الغار، وإن جثمت على صدرك صخرة ما يحدث بإخوانك تذكرت تلك الصخرة التي انحدرت فسدت فم الغار. فكل صخرة جثمت على صدر واحد من أهل الإيمان اليوم إنما هي مذكرة له منبئة عن تلك الصخرة التي انحدرت من الجبل فسدت فم الغار. وانفراج هذه الصخرات التي جثمت على صدور أهل الإيمان انفراجها لن يكون أبداً إلا بجنس ما انفرجت به تلك الصخرة، فإذا أردنا اليوم أن تنفرج عنا تلك الصخرات وأن تبتعد عن صدورنا التي جثمت عليها عقوداً طويلة فعلينا أن نتدبر هذا الحديث حديث الصخرة.

ولذلك حديث الصخرة هو حديث اليوم وحديث كل يوم. وتعالوا بقى نبتدي القصة من الأول، وكعادتنا نصور الحديث ونتوف به قبل أن ندخل في تضاعيف الحديث. الحديث يا جماعة حديث عجيب وقصة عجيبة، والمعنى الأول والأكبر والأهم والذي ندندن حوله كل السنين اللي فاتت دي هو معنى أن نرى فعل الله عز وجل في كل شيء. وتعالوا بقى نبتدي القصة كده من الأول، واحنا بنعيد الحديث هندخل ألفاظ روايات أخرى يعني.

القصة من الأول أن ثلاثة نفر خرجوا يمشون يتمشون كما في إحدى الروايات، حتى آواهم المبيت إلى غار. فجأة كده يعني آواهم المبيت إلى غار ولا إيه اللي حصل؟ يعني هم خرجوا يمشون ثلاثة مع بعض، كل واحد ساكت كده ولا كعادة الناس ده بيتكلم وده بيتكلم وده بيحلم إمتى هيرجع بيته ويرتاح، وده بيتكلم عن أبيه وأمه الشيخين الكبيرين الفانيين الضعيفين -الروايات كلها جت- وده بيتكلم عن أولاده عاوز يربيهم إزاي، وده بيتكلم عن مش عارف إيه، ولا يدري واحد منهم أنهم على موعد بعد دقائق مع أعجوبة من أعاجيب القصص التي ستظل تذكر إلى يوم القيامة.

محدش يعرف منهم، وده أول معنى مهم؛ معنى أنك وأنت في طول أملك ربما كان القدر قد خبأ لك شيئاً غير ذلك، وتبقى أنت قاعد عمال بتحلم أنا إمتى هروح من الدرس وإمتى هعمل وإمتى هحضر شنطتي عشان السفر والغردا اللي مستنيني والزوجة والعيال والمش عارف إيه، ولعل ملك الموت الآن الآن في مسجدنا، ولعل أحدنا لن يخرج من المسجد. ممكن ولا مش ممكن؟ ممكن. ولعل هذا الواحد أنا أو أنت، ما نعرفش.

تبقى أنت عمال تحلم، وعارفين الرسمة اللي رسمها النبي عليه الصلاة والسلام المربع اللي خارج منه خط، الأجل دائمًا أملك معدي أجلك دائمًا. تبقى أنت في طول أملك وأجلك اليوم أو الليلة، فهذا يدعونا إلى قصر الأمل، وأنك مهما فررت من قدرك وقضائك فأنت ملاقيه. ﴿قُل إنّ الموتَ الذي تفرُّونَ منهُ﴾، لما بتفر من حاجة تبقى هي الحاجة دي فين؟ وراك ولا قدامك؟ إيه رأيكم؟ واحد بيجري من إيه؟ تقول له أنت بتجري من إيه؟ يقول لك بأجري من كذا. يبقى أنت كده بالعقل كده محتاج تقول له هو الكذا ده ورا ولا قدام؟ ولا أنت خلاص عرفت إنه بيجري كده يبقى الحاجة دي فين؟ ورا. ربنا قال إيه بقى؟ ﴿قُل إنَّ الموتَ الذي تَفِرُّونَ منهُ فإنهُ مُلاقيكُم﴾، فإنه جاي في وشك، أنت رايح له، أنت بتفر منه ده أنت رايح له، هو جاي في وشك.

ثبت وهذه القصة صحيحة، أن سليمان عليه السلام كان بينه وبين ملك الموت نوع مصادقة، كان ملك الموت يزوره لكن في هيئة رجل. فملك الموت مرة جه زار سليمان عليه السلام وراجل داخل على سليمان، فكان عنده واحد، فملك الموت قعد يحدق في هذا الرجل يعني بيبرق له، وقعد شوية مع سليمان اتكلموا ومشي. فالراجل قال له: مين ده؟ قال له: ده ملك الموت. قال له: يا ويل أمي! قال له: مالك؟ قال: مالي؟ ألم ترى كيف كان ينظر إلي؟ مالي إيه؟ ده من ساعة ما دخل ما شالش عينه من علي. ثم سأل سليمان بالله أن يأمر الريح أن تحمله إلى بلد كذا وكذا، أبعد بلد يعرفها. فأمر سليمان الريح فحملته. ومضت الأيام وملك الموت جاء لسليمان بعد كده بفترة، فسليمان سأل ملك الموت يعني مال الراجل ده كنت بتبص له ليه؟ قال له: أرسلت لأقبض روحه في بلد كذا وكذا، اللي هو كان قال له وديني البلد دي، فتعجبت لما رأيته عندك، أنا هخلص معك ورايح أقبض روحه، فهو هنا إزاي ده؟ فهو عشان كده كان بيبص له. ثم قلت: ليس من أمر الله بد، أنا مأمور أقبض روحه هناك فهروح. قال: فذهبت فوجدته فقبضت روحه. ﴿قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ﴾.

فهؤلاء الثلاثة خرجوا يمشون يتمشون حتى آواهم المبيت إلى ذلك الغار. والقصة برضه ما هياش يعني ما تعديش كده، هو يعني ليه آواهم المبيت؟ أول حاجة فضلوا يتمشوا لغاية ما الليل دخل عليهم، والليل عشان يدخل عليهم يرجعوا بقى في الصحرا، مش أي حد يعرف يمشي في الصحرا بالليل. وبعدين حاجة تانية حصلت عجيبة برضه في الرواية هنا مش موجودة لكن في إحدى الروايات أصابهم المطر. يبقى هو ابتدى الليل يدخل وبعدين الدنيا مطرت، فقالوا: إيه طب خلاص ندخل الغار ده عشان المطر، فندخل الغار نقعد لغاية الصبح صباح رباح المطر يكون وقف الأرض نشفت نخرج نرجع البلد بتاعتنا.

ويبقى الله عز وجل هو الذي أخرجهم، وهو الذي نأى بهم عن ديارهم، وهو الذي أنزل المطر وجعل ذلك يحدث بالقرب من ذلك الغار سبحانه وتعالى، ليلمح أحدهم الغار فيشير عليهم يلا ندخل الغار. وكأني بهذا الرجل لما رأى الغار كأنه أعجب بنفسه، يعني إيه؟ أنا اللي شفت الغار وأنا قلتلكم يلا نخش، ولا يدري أن القدر هو الذي ساقه، وأنهم إنما أتي بهم إلى هنا ليدخلوا الغار لتنزل الصخرة لتكون هذه الأعجوبة لتروى بعد ذلك ولنستفيد نحن منها نشاهد فعل الرب في كل شيء سبحانه وتعالى في كل شيء.

وكأن تلك الصخرة التي انحدرت من الجبل خلقت يوم خلقت لهذا اليوم. ولا هي بسيطة كده إن حجرة تنزل من الجبل فسدت فم الغار، يعني لا جت كده سنة ولا كده سنة بحيث إن يقدر الناس تخرج، صخرة مأمورة أنت خلقت عشان في اليوم الفلاني هتقعي وهتسدي فم الغار. وفي بعض الروايات أنهم لما دعوا الله عز وجل قالوا: اللهم أفرج عنا الصخرة نرى السماء، يعني الصخرة دي كأنها إيه؟ على المقاس، مش شايفين السماء، حتى مفيش حتة مفتوحة نشوف منها السماء، نرى السماء.

فحاجة تانية عجيبة حصلت، إنه المطر لما نزل، هيعمل إيه المطر؟ غير إنه هيبل، المطر بيبل دي ما معروفة مش محتاج حد يقولي هيبل، المطر هيعمل حاجة تانية عجيبة؛ دلوقتي يا جماعة لو إحنا في صحراء وتهنا، وهيجوا بقى الناس اللي هم بتوع الصحراء دول اللي بيعرفوا يمشوا في الصحراء هيمشوا ويوصلوا لنا إزاي؟ بإيه؟ بآثار الأقدام، مش كده؟ هيمشوا ويتتبعوا آثار الأقدام. طب لما الدنيا مطرت إيه اللي هيحصل؟ هذه الآثار هتمحى. في بعض الروايات لما انحدرت الصخرة قال أحدهم: سقط الحجر وعفا الأثر ولا يعلم بمكانكم إلا الله. ما فيش أمل. يعني لو ما كانتش مطرت كنا هنهدى، بكرة الصبح هيقلقوا علينا، هيبعتوا حد يشوف، هيلاقوا أقدامنا، يوصلوا، ينادوا، نزعق لهم، عرفوا إن احنا جوه. المطر عفا الأثر، سقط الحجر وعفا الأثر، ولا يعلم بمكانكم إلا الله. وكأن القدر له شأن آخر، وكأن الرب سبحانه وتعالى لما قدر ذلك على هؤلاء الأولياء له حكمة عظيمة فهمها هؤلاء فنجوا.

تعالوا نكمل القصة كده؛ يبقى عفا الأثر سقط الحجر. لما سقط الحجر نتخيل كده الحجر وقع وهم الثلاثة جوه الغار، ففضلوا قاعدين مكانهم وقالوا إيه؟ إنه لن ينجيكم اليوم إلا أن تدعوا الله بصالح... عملوا كده يعني؟ يعني ولا أول ما سقط الحجر هعملوا إيه؟ هيقوموا يزقوا الحجر وبإيديهم وبرجليهم وبظهرهم ويستجمعوا قواهم هم الثلاثة ويلا زقة واحدة لغاية ما يحصل إيه؟ يئسوا. فيقعدوا بعد كده يقولوا الكلمتين دول اللي هنجي لهم بعد كده، وبعدين يدعي الأول فتنفرج الصخرة شيئاً، فيفضلوا قاعدين يقولوا للثاني يلا الدور عليك، ولا أول ما يحسوا إن الصخرة تنفرج هيعملوا إيه؟ هيجروا تاني على الصخرة مش كده؟ ويحاولوا بإيديهم وظهرهم ورجليهم لغاية ما مش قادرين، فيقولوا للثاني الدور بقى عليك، وبعدين تنفرج الصخرة شيئاً لا يستطيعون، ما انفرجت الصخرة شيئاً آخر فيقولوا للثالث بقى دورك بقى إحنا جربنا ولا برضه هيجروا؟

جاء في رواية طبعًا ده مقتضى البشرية أصلًا يعني ده مقتضى البشرية، لكن جاء هذا في رواية أن الأول لما دعا، وفي رواية قال: فانصدع الجبل فطمعوا في الخروج فلم يستطيعوا، فطمعوا في الخروج فلم يستطيعوا. وهذا كما قلنا مقتضى البشرية يعني حتى لو الرواية ما جتش كده لو تأملنا أي بني آدم هيعمل كده، مش هيفضلوا قاعدين يقولوا لا الثاني أنت ادعي مش هنقوم دلوقتي مش هنجرب نطلع ادعي أنت، مش هيعملوا كده هيجروا على الانفراجة دي عشان يحاولوا. انصدع الجبل فطمعوا في الخروج فلم يستطيعوا، فالثاني دعا وبرضه كده فانصدع الجبل فطمعوا في الخروج فلم يستطيعوا، فدعا الثالث.

فكأن رسالة الله عز وجل لهم التي هي رسالة الله لنا الآن، نركز بقى يا شباب. فكأن الله عز وجل يقول لهم برسائله القدرية: أنا لم أخرجكم من بيوتكم وأتي بكم إلى هنا، وأنزل الأمطار وأجعل أحدكم يرى الغار فيشير عليكم بدخوله فتدخلوا، ثم آمر الصخرة أن تنحدر فتأتي على فم الغار لتدفعوها فتنډفع، ما أنا ما عملتش ده كله عشان تيجوا أنتم بعد ما الصخرة تقع على فم الغار تموتوا تيجوا تدفعوا الصخرة تندفع! لا لا، أتيت بكم إلى هنا لمعنى آخر فحاولوا معنى آخر.

مفهومة دي يا شباب؟ مفهوم إسقاطه على واقعنا، سواء بقى تلك الصخرة هي صخرة في خاصة نفسك، حاجة أصابتك أنت، بلاء أصابك أنت فقعدت تجري عمال تدور على الأسباب والأبواب كلها تتقفل قدامك ومافيش ولا سبب راضي يتفتح لك، أو صخرة أصابت دولتك اللي أنت فيها غلاء أسعار ولا أي شيء، أو صخرة أصابت حتة ثانية من الأمة أو صخرة أصابت عموم الأمة، وحاولنا ونحاول ولا شيء يحدث وربما ازدادت الصخرة تضيقا علينا.

فكأن رسالة الله عز وجل كأن رسالة القدر: ليس هذا الذي نريده منكم، حاولوا شيئاً آخر لتندفع به الصخرة. هؤلاء الثلاثة فهموا عن الله مراده سبحانه وتعالى فنجوا، ولو لم يفهموا مراده لكان الغار قبرهم، يعني لو فضلوا قاعدين يقولوا إيه ما هو ما فيش حل غير إن إحنا نقعد نزق في الصخرة، ويلا بقى نشوف حاجة نعمل بها ونعمل بها ومش عارف إيه ونحط حاجة تحت الصخرة ونزقها يمكن تتدحرج.

ولعلهم فعلوا ذلك، لكن انغماسهم في الأسباب في الوقت ده يعني إيه؟ يعني هلاكهم، مش كده؟ لو انغمسوا في الأسباب ونسوا الله عز وجل وتدبيره، وأن لا يكون في كونه إلا ما أراد سبحانه وتعالى، لو نسي كل ذلك لهلكوا وما كان الغار قبرهم، وما كان زماننا قاعدين القعدة دي ولا بنحكي قصة دلوقتي.

لكنهم فهموا عن الله عز وجل مراده، وهذا أول معنى كبير لازم نخرج به، وده إحنا المفروض اتربينا عليه كتير في المسجد هنا، أن نرى فعل الله في كل شيء في كل شيء يا جماعة. ما هو مش لازم عشان نرى فعل الله يبقى صخرة في جبل ووقعت يعني ما فيش حد زقها، فلو بس حد زقها يبقى ده مش فعل ربنا مين قال كده؟ يعني لو حد زق الصخرة فوقعت يبقى ده فعل مين؟ فعل ربنا برضه، مش كده؟

الآية اللي دايما نقولها لكم: ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112]. يبقى لما يجي حد يزق الصخرة فتقع فتسد علينا الغار، يبقى ربنا اللي سلط البني آدم ده إنه يزق الصخرة فتقع فتسد علينا الغار، بسيطة. ما ننشتغلش بقى بالبني آدم اللي زق الصخرة وننسى فعل الله عز وجل. لا، نرى فعل الله عز وجل. بل نرى فعله في كل شيء. ﴿وَلَوْ شَاءَ اللَّهُ لَسَلَّطَهُمْ عَلَيْكُمْ فَلَقَاتَلُوكُمْ﴾ [النساء: 90]. مش ده قرآن يا جماعة؟

يبقى لما ناس كفار يحاربوا ناس مسلمين، يبقى ده قدر ربنا ولا ده خارج عن قدره سبحانه وتعالى؟ إيه رأيكم؟ قدره، يبقى نرى فعل الله فيه برضه، ﴿وَلَوْ شَاءَ رَبُّكَ مَا فَعَلُوهُ﴾ وهو الذي كف أيديهم عنكم. يبقى يا جماعة الآيات دي محتاجة، يبقى ربنا هو اللي يسلط الكفار على المسلمين وربنا هو اللي يكف أيدي الكفار على المسلمين، وربنا هو اللي لو شاء ما فعلوه. بعد ده كله ننشغل بفعل الناس وننسى رب الناس سبحانه وتعالى؟

هل ده معناه إحنا نقول يبقى الكفار حلوين ولا لا؟ ما بنقولش كده، عشان بس أنا عارف دايما الناس تحمل الكلام فوق ما يحتمله أصلا. لكن أن تتعلق قلوبنا بالله عز وجل، وأن نرى كل شيء في الكون فعله سبحانه وتعالى. ﴿إِنَّا كُلَّ شَيْءٍ خَلَقْنَاهُ بِقَدَرٍ﴾ [القمر: 49]. تسليط الكافر على المسلم أليس شيئا؟ طب ﴿إِنَّا كُلَّ شَيْءٍ خَلَقْنَاهُ بِقَدَرٍ﴾.

طيب ضيق الأحوال اللي عليك، غلاء الأسعار اللي بتحصل، نرى فيه فعل من؟ فعل الله عز وجل. يعني ما نشوفش بقى إن الحكومة مش عارفة تعمل، أنا ما بقولش كده، أنا بقول أن لا ننسى أن الله عز وجل هو الذي يقدر. إحنا المشكلة فين يا جماعة؟ المشكلة فين أن الله عز وجل لما يجري بعض الأقدار على أيدي البشر، بيبقى صعب علينا نشاهد فعل الله، بخلاف إذا حدث نفس الفعل لكن من غير تدخل بشري دي بتبقى سهلة علينا شوية أن إحنا نشوف فعل ربنا فيها. حد فاهم أنا بقول إيه؟

زي ما قلت لكم من شوية، الصخرة لما وقعت من الجبل ممكن كل الناس تقول ده فعل الله، أه طبعا ده قدر ربنا ومش عارف إيه. هو هو نفس الشخص ده لو رجع لورا شوية كده ورفع رأسه وبص لقى أربعة خمسة رجالة بيزقوا الصخرة، هينسى ربنا خالص ولا كأن فيه ربنا في الكون، وهينشغل بإيه؟ أه يا ولاد اللذين بقى أنتم اللي عملتم، مش كده يا جماعة؟ طب هما دول لما زقوا، من الذي سلطهم عشان يروحوا يزقوا الصخرة مين اللي سلطهم يعني؟ ربنا سبحانه وتعالى. ليه؟ هو ده الدرس بقى، ليه؟ إذا كان ربنا لو شاء ما فعلوه، ليه؟ إذا كان ربنا لو شاء لكف أيديهم عنكم، ليه؟ هي ليه دي؟ بس بداية ليه؟

المعنى الأول اللي هو إيه؟ أن نرى فعل الله في كل شيء. غلاء الأسعار مثلا ده فيه حديث بخصوصه، لما غلت الأسعار في المدينة، طب غلت الأسعار دي يا جماعة أن إحنا نمنا صصحنا لقينا الأسعار غليت؟ ولا بيحصل شوية حاجات بتغلي السعر، وشوية الحاجات دي بتتحصل منها حاجات على إيد بشر؟ يعني فلان يحتكر، وفلان البضاعة ما تجيش من اليمن، ومش عارف كم حاجة كده تحصل مع بعض، ويمكن شوية أموال من المدينة مثلا تخرج تروح في حتة تانية، كم حاجة حصلت ملابسات غلت الأسعار، مش كده؟

غلت الأسعار، أتوا النبي صلى الله عليه وسلم يشتكون غلاء الأسعار ويقولون سعر لنا. فبأي شيء أجابهم؟ قال: «إن الله هو المسعر القابض الباسط الرازق». إن الله هو المسعر. غلت الأسعار، من أغلاها؟ الله. يعني هي دي دعوة يا شيخ إن إحنا ما نحاسبش المخطئ؟ أنا ما بقولش كده خالص، لعل يكون رسالة من رسائل الرب سبحانه وتعالى في موقف إنك تحاسب المخطئ، يعني عادي جدا، مش ربنا سبحانه وتعالى من شرعه إن إحنا نأخذ على أيدي الظلمة؟ اه، ممكن يبقى في الأوقات دي رسالة من الرسائل، لكن ممكن تبقى رسالات أخرى أنت مش دريان بيها لأنك مش شايف ده.

يعني ممكن تبقى رسالة موجهة لك أنت ولي أنا، لكن لأننا مش شايفين فعل ربنا سبحانه وتعالى في الأمر، فكل دماغنا فين؟ في السبب المباشر، في السبب المباشر، وناسيين خالص تقدير الرب سبحانه وتعالى. فكأن رسالة الله عز وجل لهم في هذا الموقف: أنا ما جبتكوش هنا ونزلت مطر وخليتكم تفضلوا ماشيين لغاية الليل، ولا خليتكم تلمحوا الغار وخليت واحد منكم يقترح عليكم ده فتوافقوا، ما هو كل ده بفعل ربنا سبحانه وتعالى. وخلقت يوم خلقت صخرة عظيمة فوق فم الغار، علشان يوم ما تنحدر تنزل على فم الغار، عشان ببساطة تزقوا الصخرة فتتزق فتخرجوا.

لا لا لا لا لا، أنا أريد شيئا آخر. حاولوا شيئا آخر. طبعا ده الاهتداء إليه أسهل مع انقطاع الأسباب، ركزوا يا شباب، أصعب مع وجود الأسباب. يعني إيه اللي أنا بقوله ده؟ يعني هؤلاء إحنا قلنا إيه؟ هما الصخرة ما نزلتش فضلوا قاعدين مكانهم ما اهدوا أهده بس ما فيش ما تقلقوش الصخرة يلا ندعي، ما حصلش كده. كأنهم حاولوا كل سبب يستطيعون، وفي قدر الله عز وجل وفي قضائه إن هو يقطع عنهم الأسباب أصلا.

يعني إيه؟ يعني نزول المطر ده قصة لوحده، وفكرة إن واحد خلاص يهتدي للمعنى ده: سقط الحجر وعفا الأثر. الله يريد أن يقطع عنهم كل سبب ليه؟ علشان القلوب تخلص له وتتوكل عليه سبحانه وتعالى. يبقى يا جماعة في انقطاع الأسباب عنا نرى جميل قدره سبحانه وتعالى، ما نشوفش ده. أنا ما فيش مش أنا كل ما أجي أكلم واسطة يقفل في وشي، أنا كل ما أجي أشوف باب بيتقفل، يا ابني ربنا سبحانه وتعالى يريدك له، ويريدك له ويقطع عنك الأسباب لترجع له، لتتوكل عليه، لئلا ترى غيره، لئلا يعتمد قلبك على غيره، أنت اللي مش فاهم. ومعنى إنك مش فاهم عارف إيه؟ إنك هتعيش وتموت وأنت جوه الغار، والصخرة اللي على صدرك دي هتعيش وتموت وهي على صدرك، لأنك لم تفهم رسالة الله لك.

رسائل الله شرعية وقدرية؛ آيات شرعية تتلى ونجيب كلام المفسرين عشان نفهم مراد الله، وآيات قدرية نعيشها عايشينها واقع. الله عز وجل لما قدر كذا وكذا حاشاه أن يقدر ذلك عبثا حاشاه، لما يقدر أن كذا وكذا يستمر شهر واثنين وثلاثة والسنة والسنة تتكسر ونفضل فيما نحن فيه، حاشاه أن يكون ذلك عبثا حاشاه وجل وعلا. لكن المعنى: حاولوا شيئا آخر، فلما فهم هؤلاء الأولياء مراد الله عز وجل نجوا.

في بعض روايات الحديث يا جماعة إنه تعالوا بقى نرجع كده بال يعني فلاش باك زي ما بيقولوا، هم الثلاثة دول لما دخلوا الغار وبعدين شوية والصخرة هتنفرج، هتنفرج بأعمالهم مش بالأعمال هنعرف كمان شوية يعني بس في أعمال مهمة حصلت. يعني الأعمال دي لو ما كانتش حصلت، الأعمال دي لو ما كانتش حصلت ما كانوا هيلاقوا حاجة يدعوا الله بها، فالصخرة مش هتنفرج، مش كده؟ فيبقى لازم نلمح معنى تاني، وهو معنى أن قدر الله عليهم تلك الأعمال.

حد فاهم حاجة؟ يعني ربنا قدر عليهم إن هم يخرجوا ويلقى بهم والليل ييجي عليهم والمطر ينزل ويدخلوا الغار وتنزل الصخرة، تقدير الله. لأ، ده في تقدير سابق، وهو تعالوا بقى نستمتع بقدر ربنا يا جماعة، نستمتع بقدر ربنا، قدر ربنا اللي هو إيه ظاهره لنا مؤلم. أول واحد في رواية عجيبة جدا لهذا الحديث: أول واحد خرج يرعى، وإحنا تكلمنا بقى عن راعي الغنم قبل كده والكلا والقصة دي مش هنعيدها تاني، خرج يرعى، فتأخر في الرعي، ليه بقى في الرواية؟ ثم إن الكلا تناءى علي. الرواية دي وقفتني وعجيبة جدا، ثم إن الكلا تناءى علي، الكلا بعد، الكلا اللي هو العشب اللي الغنم بيروح يأكله، تناءى بعد.

طيب تعالوا نرجع كده نعيش نفسية هذا الرجل، اللي الكلا تناءى عليه دي حاجة هينبسط بيها يعني إيه رأيكوا؟ ما انبسطش، مش كده؟ ليه يعني أنا ده أنا أصلا خارج وهلكان وبتاع وبعدين عاوز أروح أنا وبعدين أبويا وأمي ممكن يناموا، قصة كبيرة، فلعلي به في هذا الموقف يتبرم ويتضجر وليه بقى كده ومش عارف هي يوم باين من أوله، ولا يدري المسكين أن الله عز وجل يدبر له أمرا، وأنك يا مسكين لو لم يتناءى عليك الكلا ورجعت فوجدت أباك وأمك فشرب غبوقهما، لا كان فيما بعد الغار قبرك، وأن هذا القدر الذي تراه مؤلما إنما هو غاية الرحمة، القدر اللي أنت شايفه مؤلم ده ده رحمة عظيمة جدا أنت اللي مش فاهم، أنت اللي مش فاهم. طب هتفهم إمتى؟ ممكن بعد سنين تفهم، بعد سنين هتدخل غار وصخرة هتقع ومش هتلاقي حاجة تدعو بها يا مسكين إلا موقف بدايته إن الكلا تناءى عليك وكنت متضايق وكنت بتشتكي، ولا تدري أن ربا رحيما ودودا حليما يدبر لك أمرك، فاطمئن لقدره سبحانه وتعالى، اطمئن لقدره.

شوفوا يا جماعة الأمر بيدبر من إمتى؟ الثاني إحنا إحنا ممكن ممكن لو في وقت هنقتل تفاصيل يعني مهمة في الثلاث قصص. الثاني المعنى اللي عاوز آخده بس، القصة بتاعة التاني دي يا جماعة لو حكيناها لـ 100 واحد أنا بقول لكم نسبة 99% مش هيشوف مشهد النقاء، وهيفضل حاطط هذا الرجل في خانة الراجل الندل اللي ما بالذات لو دخلنا في تفاصيل القصة في القصة دي فيها تفاصيل؛ هذه المرأة مين ومتزوجة وراحت له وجات، ثلاث قصة هنعرفها كمان شوية.

لكن ربنا سبحانه وتعالى شأنه شأن آخر، شأن آخر. كذا مرة أقول لكم يا شباب يعني الله عز وجل كما يرى فعلك يرى تركك، فاكرين الكلام ده؟ قلنا لكم الشاب اللي بيروح يعمل حاجة غلط أو يقع في حاجة غلط ويشوفوه الناس ويستنقصوه وكذا وكذا وكذا، هو هو الشاب ده اللي جاهد نفسه ألف مرة مئة مرة قبل ما يقع في دي، يعني مئة مرة كان ممكن يقع في الغلط لكنه جاهد نفسه ولم يقع، دلوقتي جاهد ولم يقع، يعني ترك. مين شاف ترك ده؟ مين شاف الترك؟ محدش شاف، محدش بيشوف الترك، الناس ترى الفعل، لا ترى الترك، الله يرى الترك والفعل ويحاسبك على الترك كما يحاسبك على الفعل.

يعني هذا الرجل يا إخواننا كل اللي عمله إيه؟ إنه ما عملش، حد فاهم حاجة؟ يعني يعني أنت تخيل كده أجي أقولك دلوقتي إيه؟ أنا أرجى عمل أرجوه إني عمري ما زنيت. تقول إيه اللي عمرك ما زنيت؟ عادي ما كل الناس عمرها ما زنت يعني، يعني فكرة إنه إيه؟ إنه أرجى عمل يرجوه وهو في الغار إنه لم يزني، إنه ما عملش، وهنعرف إن دي مش عادية يعني، بس المهم إنه ترك، ماشي؟

وكذلك الثالث. الأجير، وبعدين ربنا يبتلي الثالث ده ابتلاء عجيب جدا، إحنا دلوقتي بس إحنا في معنى واحد مش عاوزين نخرج عنه، إن ربنا لما قدر القصة قدرها من زمان، إنه رتب الثلاث مواقف دول، رتب الثلاث مواقف. الموقف الثالث برضه عجيب وإحنا عاوزين نشوف بس من المنظور ده، منظور إيه؟ إنه ابتلاء، إنه ابتلاء شديد ممكن يزعل اللي فيه، اللي هو إيه بقى؟ إنه هو أجير يترك أجره؛ أجر بسيط حقير، نصف درهم، فرق من أرز، ثلاثة أوسق يعني تقريبا 10 كيلو دلوقتي، 10 كيلو أرز.

فربنا يبتلي الراجل ده، مش الأجير، الراجل اللي هو دخل الغار، ابتلاء عجيب جدا، إنه ابتدأ ينمي مال هذا الأجير، يعني عمل إيه؟ زرع له الأرز ده، فأض وجنبه من أمانته عشان إيه؟ لما يجي الراجل ده يرجع تاني يقوم يقول له إيه؟ هم شوية المحصول، فجنبه ما بعده عن محصوله هو. فأضعف، كان من بلائه أن الأرز بتاع الأجير ده بقى يخرج أضعاف اللي المحصول العادي يخرجه، بلاءً لمين بقى ده؟ لصاحبنا ده.

وبعدين ابتدأ يثمره، يعني يجيب بقى بيه حاجات لغاية ما بقى فيه كل أنواع المال. أنتم عارفين ممكن واحد يبقى ما بيحبش بلغة العصر يعني؛ ما لوش في العربيات قوي، إنما ليه في العقارات، أو واحد ما لوش في الاثنين بس يحب الذهب، أو يعني في كده نوع معين من المال إيه يستهويه.

العجيب بقى إن هذا المال لما أضعفه، ابتدأ منه بقى فيه كل أنواع المال اللي موجودة عندهم. لما جه له، قال له إيه؟ كل ما ترى من الإبل والبقر والغنم والرقيق هو لك، عشان لو قلبه متعلق بالإبل أهو في المال الإبل، لو بالبقر أهو في مال البقر، لو بالرقيق أهو في رقيق، لو بالغنم أهو في غنم.

ده بلاء لمين؟ لصاحبنا اللي هيدخل الغار. مش كده؟ وكأني به وهو بيدي له بيقول إيه؟ ما يمكن يسيب لي، يمكن مش عارف. إحنا هنيجي نشوف المشاهد دي إن شاء الله بشكل تاني كمان شوية، بس إحنا دلوقتي بنركز في معنى واحد، وهنرجع نركز في معاني تانية في كل مشهد.

إيه المعنى؟ إنه كل واحد منهم متألم لشيء، ولا يدري أن ذلك من عظيم رحمة الله به، وإن نفس الشيء اللي أنت بتتألم له ده هيكون سبب في يوم في نجاتك. عايزين يا جماعة ننظر لمقادير ربنا سبحانه وتعالى نظرة مختلفة؛ نظرة نحب بها ربنا، نتذلّذ بقدر الله فينا، وكل ما يجري منه سبحانه وتعالى، وهو أرحم بنا من أمهاتنا.

ولا حد عنده شك في دي؟ يعني أمك تُورِدك المهالك؟ ترميك في النار كده ولا ترميك في العطب؟ طب لما تلاقي أمك اللي أنت بقى متأكد بترميك في حتة كده، أنت وأنت صغير عقلك مش مستوعب، لكن لما تكبر شوية تعرف إن إيه؟ إنها كانت أه ما هي كانت هي عملت كده عشان أنشف في الحتة دي، عشان أتصرّف، فمش عا- مش كده؟ طبعًا دلوقتي عشان ماسكة الموبايل ومش واخدة بالها مني أصلًا فوقعت واتعورت. أنا بتكلم على الأمهات يعني بتوع زمان، مش بتوع دلوقتي.

فأهو ربنا سبحانه وتعالى أرحم بك من أمك. ترون هذه ملقية ولدها في النار؟ قالوا: لا. فالله أرحم بعباده من هذه بصغيرها أو بولدها. فهذا ربك سبحانه وتعالى وهذا قدره، فاطمئن لقدره سبحانه وتعالى. زي ما قلت لكم مش فاكر بقى الجمعة اللي فاتت هنا ولا كان في الخطبة، قلت إيه؟ إنك تطمئن لقدره وتحبه وترضى به أكثر من اقتراح عقلك. أنتوم فاهمين دي يا جماعة؟

يعني لو جيت قال لك إيه رأيك؟ تحب إنه لم يكن ما كان؟ تقول: أنا ما بحبش. طب ليه ما تحبش؟ لأن اللي كان وحدث مراده سبحانه وتعالى، ومراده أحب إلى قلبي من مراد نفسي، فأنا ما بحبش، لا أنا ما بحبش. يعني هو اللي كان مش هو اللي قدره؟ اه، هو اللي كان يكون، هو اللي كان هو اللي يكون، وهذا أحب إلى قلبي. مع كل اللي فيه؟ اه، مع كل اللي فيه.

طب ليه؟ لأني مع كل اللي فيه ده احنا ده اللي احنا شايفينه. إيه الغيب بقى؟ طب الأقدار دي مخبية إيه؟ ما حدش يعرف، ما حدش يعرف. فالثلاثة فهموا فنجوا. إحنا عاوزين نفهم بقى، عاوزين نفهم.

نفهم إيه؟ بأي شيء استدفعت تلك الصخرة؟ لنستدفع تلك الصخرات. إيه الحاجة اللي طلبوا بها دفع الصخرة؟ ده اللي لازم نتأمله بقى. لازم نتأمل شوية، يعني إيه هو؟ إيه هي؟ بلاش الأعمال لأن الموضوع أكبر من أعمال. إيه هي الحاجات اللي بها استدفعت الصخرة، يعني طلبوا دفع الصخرة بها؟

يلا بقى نتأمل ده، عشان هو ده نجاتنا، هي دي نجاتنا يا جماعة النهاردة، نجاتنا في هذا العصر. خلاص؟ أول حاجة إن في أعمال اتعملت، وبعد شوية هيدعوا بها وهنيجي للكلام ده إن شاء الله. يبقى أول حاجة إحنا محتاجين أعمال نستدفع بها الصخرات، الأعمال دي ليها أوصاف. تعالوا نتأمل شوية أوصاف تلك الأعمال.

أول وصف من أوصاف هذه الأعمال، يعني يجتمع فيها تلك الأعمال، إنه لن ينجيكم اليوم إلا أن تدعو الله بإيه؟ بصالح أعمالكم. في رواية: بخالص أعمالكم. في رواية: بأصدق أعمالكم، أو إنه لن ينجيكم اليوم إلا الصدق. يبقى أول حاجة يا جماعة إحنا محتاجين أعمال فيها إيه؟ فيها إخلاص. عمل صالح فيه إخلاص. يبقى ده أول معنى، عاوزين عمل فيه إخلاص.

وحديث الإخلاص حديث ذو شجون، بالذات في هذه الأعصار اللي فيها الفيسبوك واللي فيها الإنستجرام واللي فيها اليوتيوب، اللي هو ببساطة شديدة أي عمل عاوز تحبطه في دقيقة للأسف. أول ما بتاخد الإجازة بتاعة القرآن، أول ما بتاخدها قبل ما تروح، كاميرة الموبايل وتك وتنزل: الحمد لله الذي بنعمته تتم الصالحات. إنت بتعمل إيه يا ابني؟ بتعمل إيه؟ ليه كده؟ ليه؟ ده يمكن قبل ما يروح ياخدها: ختمت القرآن. ليه يا ابني بتعمل كده؟ تعمل كده ليه؟ عجيب.

ما يا جماعة إحنا قلوبنا أضعف، يعني إحنا الـ يعني أنا هقولكم قاعدة كده: كلما استطعت إنك أن يكون عملك بينك وبين ربك فافعل. إحنا عندنا أعمال غصب عنا، يعني دعوة إلى الله، إحنا دلوقتي أهو بدعو إلى الله غصب عني لازم الدرس يتسجل ولازم عشان يصل لأكبر ناس. إنما أنا بقى عشان أقيم الليل، لازم الساعة 3:00 الفجر، شوف بقى الحديث بقى عشان ما إيه ما يقولش أنا هقيم، يقولك إيه: قيام الليل رحمكم الله الساعة 3:00 الفجر وأنت بتكتب، يبقى أنت إيه بتعمل إيه؟ هو لولا الملامة كان كتب ده، لولا الملامة كان صور نفسه سيلفي ونزلها وهو بيقيم الليل. بتعمل إيه يا ابني؟ بتعمل إيه؟ عمرة؛ لازم بالإحرام قدام الكعبة وفي المطار وفي الطيارة وفي... بتعمل إيه؟ ما تروح وترجع ومحدش يعرف عنك حاجة.

ولما تعمل كده يعني لعله يتقبل أصلاً. يعني زمان كان الناس بتجاهد نفسها في الإخلاص ومفيش كل ده، ومع ذلك يتهموا نفسهم اللي هو يعني كم واحد هيعرف أي حاجة يعني تخيلوا كده الناس اللي السلف يعني يقعدوا يتهموا نفسهم في الإخلاص وفي الرياء وفي المش عارف إيه وبتاع، آخرهم يعني كم واحد هيعرف أي حاجة من اللي بيعملوها؟ إيه، بيتين ثلاثة يعني اللي حواليه. أنت النهاردة بضغطة زرار كل اللي عندك عرفوا أنت الساعة 3:00 الفجر صاحي وبتقوم الليل، عرفوا أنك مسافر عمرة، عرفوا أنك مش عارف إيه. ليه كده؟ ليه؟

يدخل يصلي إمام بالناس، يصور نفسه في الصلاة. ليه بتصور نفسك في الصلاة ليه؟ إيه لزمة كاميرا وأنت بتصلي؟ يعني أما أتفهم أن في كاميرا درس ماشي أه، الناس هتتفرج على الدرس أه، إنما الناس هتتفرج عليك وأنت يعني هيشوفوا إيه يعني أنت بتصلي، هم عاوزين يسمعوا صوت مثلاً حتى لو صوتك جميل ما بتسجل صوتك، إنما ليه كاميرا على وشك وأنت بين يدي الله عز وجل في أعظم المواطن؟ ليه؟

يبقى أول حاجة يا جماعة عاوزين عمل فيه إخلاص، لأن الأعمال المخلصة هي المنجية. أهو أديكم عرفتوا، لن ينجيكم اليوم إلا الصدق، إلا أن تدعوا الله بصالح عملكم، بخالص أعمالكم، وكل واحد دعا قال إيه: اللهم إن كنت فعلت ذلك ابتغاء وجهك ففرج عنا ما نحن فيه. روايتان. تخيل بقى أنت قاعد كده وحاجة حياتك كلها مشاع؛ فيسبوك وانستجرام، وأنت بقى الرابع وجاي بقى هتعمل إيه بقى؟ فين بقى اللي فعلته من أجلك دي؟ ده أنت يدك بتأكلك في كل حاجة إنك لازم نشير ولازم نبين ولازم. إيه الـ يعني لو قعدت بينك وبين نفسك كده، إيه العمل الذي ترجو فيه الإخلاص؟ أنا مش مش بحبط الناس ولا حاجة، أنا بكئبكم بس يعني مش، لكن يا جماعة لازم وقفة، يعني لازم وقفة مع موضوع الإخلاص ده، لازم وقفة، وقفة لأن الموضوع بقى فعلًا مستشري ومستفحل وخطير، خطير.

يبقى دي أول حاجة، يبقى أول صفة اشترك فيها الثلاثة أن أعمالهم كانت لله سبحانه وتعالى. دي أول حاجة.

المعنى الثاني اللي اشترك فيه الثلاث أعمال، إن الثلاث أعمال من جنس ربما لا يتفطن له معظم الناس المتدينة. يعني السؤال ده أنا نزلته لكم على الفيسبوك وعلى التليجرام، قلت لكم لو كنت أنت نلعب لعبة، لو كنت أنت الرابع في الغار -كان زمانهم ماتوا طبعًا، كانت القصة خلصت، لو كنت أنت الرابع في الأول دعا انفرجت، مش عارفين الثاني، الثالث، واقفة على هذا، طزان ما أنت كلهم واقفين، طب أنت أول واحدة هتموت هيمسكوكي إيه؟ واقفة عليك أنت بقى، ماشي؟- فقولي كده، جنس الأعمال اللي دماغك راحت فيه دلوقتي إيه؟ فهتلاقي غالباً قبل ما تقرأ البوست غالباً هتلاقي إيه؟ قيام ليل، صيام نهار، ختمة بتدبر، عمرة، حجة، الجنس ده.

تخيلوا أن جنس الأعمال ده ولا واحد دعا بحاجة منه، اللي هو إيه جنس الأعمال ده؟ الأعمال اللي نفعها لازم. لازم ده مش يعني لازم يعني لا يتعداك، يعني أنت بتصلي لنفسك، بتصوم لنفسك، اعتمرت لنفسك، ما عملتش حاجة للناس اللي حواليك يعني. الثلاثة يا جماعة ولا واحد ولا واحد يعني مش واحد من الثلاثة دعا بده، والاثنين الثانيين دعوا بالجنس الآخر، لا. الثلاثة دعوا بجنس ثاني أصلاً من الأعمال. الثلاثة كل واحد منهم رجا جنساً آخر.

يعني الثلاثة دول ما كانوش لا بيصلوا ولا بيصوموا يعني على شريعتهم أكيد، مش كده؟ أكيد كان لهم صلاتهم وصيامهم وكل الحاجات دي، يعني كانوا بيعملوا ده، والصوم ده إحنا مش مختصين بيه، مش كده؟ ﴿كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ﴾ [البقرة: 183]، فالصوم موجود في الشرائع، كذلك الصلاة. لكن ولا واحد راح للحته دي أصلاً.

الثلاثة يا جماعة راحوا للحته اللي المتدينين دلوقتي بيزوغوا منها، مش شايفينها؛ يا فلان تعالى في إطعام مش عارف إيه، أصل أنا عندي حفظ قرآن. يا فلانة تعالي عندنا زيارة لأختنا المريضة، أصل أنا حلقة الـ مش عارف إيه. يعني إحنا بنقول جنس الأعمال الأول ده غلط؟ لأ مش غلط، لكن الثاني مهم، اللي إحنا بنزوغ منه ده مهم، اللي هو إيه بقى؟ اللي نفعه متعدي للغير. اللي نفعه متعدي للغير؛ الأول نفعه متعدي للأبوين، وهنيجي لكل تفصيلة من دي إن شاء الله، الثاني نفعه متعدي لابنة عمه، والثالث نفعه متعدي للأجير. الثلاثة يا جماعة شايفين هي دي الأعمال المنجية، وهي كذلك، وهي هي المنجية.

فصنائع المعروف بتعمل إيه؟ تقي مصارع السوء، منجية، صنائع المعروف منجية. طيب، شوفوا الحديث العجيب ده عشان ما نطول في كل نقطة بس؛ أحب الناس إلى الله الصوامون القوامون الـ كذا، أحب الناس إلى الله أنفعهم للناس. إيه رأيكم؟ أحب الناس إلى الله أنفعهم للناس، وأحب الأعمال إلى الله سرور تدخله على مسلم. أحب الأعمال إلى الله أن تدخل سروراً على مسلم، تكشف عنه كربة، أو تقضي عنه ديناً، أو تطرد عنه جوعاً.

مين يا جماعة مهتم لده دلوقتي؟ مين لما بيظهرله حاجة زي دي بيشوفها فرصة ما ينفعش تتفوت؟ لا، ده احنا الـ أصل حلقة القرآن، أصل يعني إيه أسيب حلقة القرآن؟ لا، اعمل الاثنين، ليه تسيب حلقة القرآن؟ اعمل الاثنين، أنت وراك إيه؟ أنت وراك إيه؟ ما أصل يا شيخ لو ده حصل هفوت حاجة مش عارف، ما تفوت الدنيا يا سيدي، فوت الدنيا، إيه يعني لما الدنيا تختل شوية؟ ليه عاوزين الدنيا 100% وبعدين يجي الدين بقى؟ يعني نخلص دنيتنا 100% على أكمل وجه نقدره، ولو تقدر على أكثر من كده كنت رحت عملت ده، وبعدين دول بقى شوية اللي باقيين لربنا.

فشوف بقى أنتم عاوزين إيه بقى يا روح حلقة قرآن، يا روح أوزع إطعام، يا روح درس علم، يا روح ألف على المساكين في بيوتهم؟ لا، لا عاوزينك في حلقة القرآن، ولا عاوزينك تلف على المساكين، و﴿مَنِ أَغْنَى فَاللَّهُ أَغْنَى﴾. خلي بالك. هتعامل ربنا كده؟ الله أغنى. و﴿إِن تَتَوَلَّوْا﴾ إيه هنتحايل عليكم؟ مش هيحصل، مش هيحصل، و﴿إِن تَتَوَلَّوْا يَسْتَبْدِلْ﴾. فحضرتك هتتولى، أنت حر، ما حدش هيتحايل عليك، والله غني عنك وعني وعن البشر، ولو كان أولنا وآخرنا وإنسنا وجننا على أتقى قلب رجل واحد ما زاد ذلك في ملكه شيئاً، خلي بالك. فهو ده ربنا اللي بتعامله، فأنت بقى عاوز تعامله كده؛ أنا دنيتي تتقفل الأول وبعدين وقت فراغ أديهولك. لا محتاجينك ولا محتاجين وقت فراغك، وتتسلل في دنيتك.

ما هو تتسلل في دنيتك دي أيضاً قدره، تاني، تتسلل في دنيتك دي أيضاً قدره. ﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً وَلَٰكِن كَرِهِ اللَّهُ انْبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ﴾ [التوبة: 46]. فانشغالك بالدنيا وتبص يمينك وشمالك، تلاقي نفسك في وسط أهل الدنيا، ﴿وَلَٰكِن كَرِهِ اللَّهُ انْبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ﴾. بإيه يا رب؟ هو العدل، لم يظلمك، لأنك لم ترد الخروج، ولو أردت الخروج لأعددت له العدة.

تيجي تقول: مش عارف أروح الدرس الفلاني، مش عارف أواظب على المقرأة الفلانية، مش عارفة أحافظ على صحبتي الفلانية اللي بيقولوا لي النقاب والـ والـ والخمار ومش عارف إيه، مش عارفة آه، ليه مش عارف؟ عد العدة، زي ما لو عندك بكرة امتحان مهم.

تضبط بدل المنبه اثنين وثلاثة وأربعة، وتعطل كل شيء في دنيتك عشان تلحق امتحانك. زي ما لو عندك إنترفيو بكرة، هتوقف كل حاجة عشان الإنترفيو ده في شركة محترمة، ولو فاتني مش هعرف أجيب غيرها. بتعرف تعمل ده ولا ما بتعرفش؟ بتعرف تقول لأ لحاجات ولا ما بتعرفش؟ بتعرف، بس إمتى؟ لما بيتروح لك دنيا.

أول ما بييجي الدين لأ، أصلي بتكسف أقول لأ، أصلي ما ينفعش أقول مش عارف، أصل القعدة الفلانية ما ينفعش أعتذر عنها، أصل تجمع العيلة ما ينفعش. ولو تجمع العيلة وقت امتحانك هتقول الكلمتين دول؟ لو وقت الإنترفيو بتاع شغلك هتقول الكلمتين دول؟ مش هتقول الكلمتين دول. يا جماعة لازم نفضح أنفسنا أمام أنفسنا؛ هو ده إحنا -إلا من رحم الله- هو ده إحنا. فمستنيين إيه عشان تنصلح أحوالنا، فتنصلح بإنصلاح أحوالنا أحوال الأمة؟

الثلاث أعمال يا جماعة كانوا من جنس تاني، أحب الأعمال إلى الله: سرور تدخله على مسلم، أو تكشف عنه كربة، أو تقضي عنه دينا، أو تطرد عنه جوعاً. شوف بقى الكلام اللي جاي ده ولأن أمشي مع أخ لي في حاجة حتى أقضيها له -ركزوا يا جماعة ركزوا- أحب إلي من أن أعتكف في هذا المسجد -أي مسجد؟ مسجد النبي المسجد النبوي- أحب إلي من أعتكف في هذا المسجد شهراً. إيه رأيكم؟

تخيل كده لما أجي أقولك بقولك يا فلان: والله إحنا قدامنا مصلحتين شرعيتين، تاخد أنهي فيهم؟ في واحد من إخواننا ليه حاجة وعاوزينك تمشي معاه في حاجته لغاية ما تخلص، ولا تأشيرة عمرة وشهر اعتكاف في المسجد النبوي؟ يا جماعة من غير هزار، كم واحد هيختار الأولى؟ صفر، أنا عارف اللي بقوله، صفر في المية. إحنا محتاجين نظبط الموازين، الأحب إلى النبي ﷺ أن يمشي في حاجة أخيه حتى يقضيها.

طب فلان اللي بيتصل بيك، وفلانة اللي بتتصل بيكي، وأنت عارفة إنه هيطلب، تقوم عامل إيه؟ ما تردش، بعت لك رسالة ما تفتحهاش عشان ما تبانش إنها "سين"، لأنك عارف إنه عاوز يطلب مش عارف إيه. أنت حر، هو أنت كده بتحرمه؟ أبداً والله، تحرم نفسك. ولو قدر الله عز وجل إن الحاجة دي تنقضي بغيرك من غير حد خالص هتنقضي، لكن الله عز وجل ساق إليك يا مسكين يا محتاج، ساق إليك خيراً فأنت رفضته. بلاش، أنت حر، ارفض براحتك.

يبقى ده تاني معنى، يبقى أول معنى مشترك في الأعمال كان الإخلاص، صحصحوا. المعنى التاني المشترك في الأعمال المنجية من تلك الصخرة: أعمال نفعها متعدٍ إلى الغير. محتاجين ده، محتاجين نخرج من المسجد النهاردة، كل واحد يدور على أعمال جمعت الصفات اللي إحنا بنقولها دي، ولو عمل واحد في حياتك يبقى جامع كل هذه الصفات: عمل فيه الإخلاص، وعمل نفعه متعدٍ إلى الغير.

المعنى التالت اللي اشترك فيه الثلاث أعمال: إن الثلاث أعمال كانت مع ناس محتاجة ضعيفة، ولا ناس مستغنية؟ تعالوا نتأمل كده الألفاظ: ﴿اللَّهُمَّ إِنَّهُ كَانَ لِي أَبَوَانِ شَيْخَانِ كَبِيرَانِ﴾، في رواية "ضعيفان فانيان"، في رواية "ليس لهما راعٍ غيري". يبقى ناس أضعف ما تكون. الأولى اللي هي الثانية -النفع متعدٍ للغير- الغير ده يا جماعة إما يكون قريب أو يكون بعيد، والقريب ده إما الأبوين أو غير الأبوين. فكانت الثلاث قصص على الثلاث محاور دول عشان ننتبه، يبقى عندك حق الأبوين أعظم الحقوق، وبعدين حق الأقارب اللي تمثله في القصة دي بنت عمه، وبعدين حق الأجانب اللي بيمثله في القصة دي الأجير.

الثالث إن الناس دي كانت ضعيفة؛ فالأبوان شيخان كبيران ضعيفان فانيان ليس لهما راعٍ غيري. وبنت عمه، تعالوا بقى نتأمل القصة بتاعة بنت عمه دي، القصة يا جماعة عجيبة جداً بمجموع الروايات. هذه امرأة متزوجة، وكانت امرأة تقية، وجاتله. الأول كان هو يراودها عن نفسها وهي تأبى ذلك، وطبعاً ولد عم مش عاوزة تفضحه، امرأة تقية ومتزوجة، ويراودها وهو يحبها وهي تمتنع حتى ألمت بها سنة.

دلوقتي ألمت بها سنة، وهي عارفة نية هذا الرجل، تروح له ولا تروح لغيره؟ تروح لغيره. طب ليه راحت له؟ عشان ما لقتش غيره. مين قال إنها ما لقتش غيره؟ في رواية من روايات الأحاديث أنها ترددت عليه ثلاث مرات، وهو في كل ذلك يقول: لا والله ما دون نفسك. ده يحصل إزاي؟ إنها راحت له، قال لها كده مشيت، مشيت قعدت في بيتها عشان تاني يوم تروح له، ولا مشيت تشوف غيره؟ مشيت تشوف غيره، عاوزة محتاجة فلوس ما لقتش، تضطر ترجع له يمكن ربنا يهديه. وكأني بها وهي ذاهبة إليه عمالة تدعي ربنا وتلجأ إليه، تاني مرة: لا والله ما دون نفسك، إنسي. ثلاث مرات.

يا له من مجتمع يحوج امرأة لهذا. لما تجيء لك واحدة محتاجة، ما تحوجهاش تروح للناس دي. طبعاً أنا هنا ما أقصد الناس دي، ماليش دعوة بهذا الرجل، هذا الرجل صار ولياً لله. في عربية هوندا سيفيك واقفة برة قافلة على الناس اللي ورايا، يا جماعة أرجوكم بعد كده محدش يقفل على حد، مش عاوزين نأذي الناس، أهو إحنا لسه بنتكلم عن إيه. فكنا بنقول: بلاش نحوج النساء أن تذهب لهؤلاء الرجال قليل الدين والمروءة، ولا أقصد هذا الرجل تاني، هذا الرجل صار ولياً لله. يبقى جاتلك واحدة وأنت شاكك، إديها إديها، عشان لو أنت ما إديتهاش وغيرك ما إداهاش هتعمل إيه الست دي؟

في رواية بقى وجعتني جداً، أن هذه المرأة ذهبت لزوجها وأخبرته، كانت هي مش راضية تقول لحد مش عاوزة تفضح ابن عمها ولكن هي ممتنعة، أخبرت زوجها فقال لها زوجها: أغني عيالك. رجل كأنه في شدة العوز وشايف عياله في الحالة دي، لدرجة -شوفوا يا جماعة- قهر الرجال الذي استعاذ منه النبي ﷺ، قهر الرجال، يعني هذا الرجل حالته بقى النفسية وهو يعلم أين تذهب امرأته لأنه مش عارف يعمل حاجة، فيقولها أغني عيالك.

إحنا بنتكلم عن معنى واحد؛ إن الثلاث أعمال اشتركوا في إن الخير أسدي لواحد في شدة الفقر في شدة الضعف في شدة العوز. فدي الأبوين كانوا أبوين شيخين كبيرين ضعيفين فانيين ليس لهما راع غيره بمجموع الروايات. المرأة تأملنا قصتها، فيقول إن الست دي كانت محتاجة فعلاً ومش لاقية.

الثالث تعالوا نتأمل قصته عشان برضه نوصل للمعنى ده، المعنى إنه هو ما كانش فقير عادي، الثالث يا جماعة كان أجير. بمجموع الروايات كان له "فرق" من الأرز، الفرق ثلاث آصع، والصاع أربع أمداد، الصاع ده اللي هو اللي بيخرج في زكاة الفطر تقريباً 3 كيلو رز. فالثلاث آصع اللي هم الفرق يبقوا حوالي 10 كيلو رز. دول كام يساووا كام وقتها؟ في بعض الروايات إنه كان له نصف درهم، ده أجر حقير جداً، قليل قوي.

طيب، النصف درهم ده الـ 10 كيلو رز دول أنتجوا إبل وغنم وبقر ورقيق في أسبوع مثلاً أو شهر؟ محتاج مدة كبيرة صح؟ طيب تعالوا نرجع تاني، إحنا ما بنتكلمش دلوقتي في اللي إداهوله، إحنا بنتكلم في حالة الراجل ده بس. واحد ليه نص درهم، هو الأول سابه ليه وما خدوش؟ حصل مشكلة بينه وبين صاحب الشغل، قاله إنما عملت عمل رجلين أنا اشتغلت شغل نفرين أنا عاوز درهم، فأبى صاحب العمل، فمشي مغاضباً وساب النص درهم متضايق.

حط نفسك مكان الأجير ده، ليك نص درهم عند واحد وفات عليهم سنين، هترجعله؟ إمتى ترجعله؟ ده أنت واحد مش خلاص، أنا هموت أنا بموت، لأن غالب الظن كده لأي بني آدم، أرجع أقوله إيه؟ أقوله من سنين ليا نص هو هيفتكرني؟ روح إلعب بعيد، طب ما خدتوش ليه؟ إيه اللي يرجعه يسأل عن نص درهم بعد مدة؟ إلا إنه في شدة العوز، في شدة الفقر، في شدة الاحتياج. يبقى ده ثالث معنى موجود في كل الأعمال، إنه كان موجهاً لفئة في شدة العوز، في شدة الضعف والاحتياج. فكان أثوب.

وكان في حاجة تانية بقى، كأننا استنطقنا هؤلاء الضعفاء الذي بهم ننصر. تعالوا كده نرجع تاني نعيش القصص، القصة الأولى الأبوين؛ فضل واقف وشايل القدح والصبيان يتضاغون لغاية ما يصحوا يشربوا، صحوا لقوا الولد على هذه الحال شربوا وناموا، وانطلقت ألسنتهم بما يكون في مثل هذا: الله يبارك لك يا ابني، روح إلهي يدفع عنك كل سوء، روح إلهي يفرج عنك كل كرب.

القصة الثانية، قمت عنها يا أحب نسائي إلي وأعطيتها الذهب الذي أرادت، مش قام عنها بس ده قام واداها الذهب، الذهب عارفين ده قد إيه؟ في الرواية بتاعتنا أعطيتها 120 ديناراً، وهي طلبت 100 دينار. طب هو كان مثلاً غني ومريش وعنده الفلوس دي؟ ما كانش عنده، فضل يطلب هذا المال ويشتغل لغاية ما جمع وحوش الفلوس علشان يديها لهذه المرأة، فالمال بالنسبة له ذو قيمة. وبعدين أداها الفلوس، كأنها شكرت له ودعت الرب سبحانه وتعالى له وأنه يفرج عنه وأنه ما يوقعوش في ضيقة أبداً.

الأجير الثالث ده، لما جه يسأل النص درهم، لقى كل اللي حصل ده وهنتأمله، لقى كل اللي حصل ده من غنم وبقر ومش عارف إيه، فاستاقه كله فمضى به، مضى به كده يعني؟ لقى كل ده بتاعه، شكراً وراح واخده وماشي؟ ولا عادة الناس أن يشكر لهذا الرجل الذي لم يظلمه ماله وأن يدعو الله له؟ أهو إحنا محتاجين ده، محتاجين نصل لهؤلاء الناس.

يبقى زكاة مالك، صدقتك بتروح فين؟ بلاش تبقى شايفها حمل وعبء عليك، أنا بطلع زكاة مالي بس بشوف أي حد بيوزع خد بقى وأنت ما توجعش دماغي. ليه ما يوجعش دماغي؟ ما تقعد معاه. طبعاً الأعلى مقاماً إنك أنت اللي تروح تقوله لأ، أنا عاوز أشوف الناس دي وعاوز الناس دي تشوفني. ليه تشوفك؟ مش أنا بقى أنا اللي بديكو لأ، تشوفني عشان أنا أحوج إلى دعائهم منهم إلى مالي، أنا محتاج الناس دي أديها علشان وأنا بديها تصيبني دعوتهم. فهمتوا يا جماعة المعنى ده؟ آه معنى دعاء هذا المحتاج ليس بينه وبين الرب سبحانه وتعالى حجاب.

فإحنا مساكين والله يا جماعة مساكين. لا عارفين اللي بيطلع زكاة عارف زكاته بتروح فين، ولا عارف صدقته بتروح فين، وهو أي حد عاوز حاجة بيديله؛ يعني حد من الناس اللي بتلم الصدقات والزكوات عشان توزعها، ولا شاغل دماغه. طب ما تشغل دماغك شوية، وشوف الناس الأكثر عوزًا واحتياجًا وروح لهم. أهي دي حاجة؛ معنى ثالث يبقى عشان ما نطولش: إخلاص، نفع متعدٍ، إنه كان ذاهب لأكثر الناس عوزًا واحتياجًا وفقرًا وضعفًا. ده معنى ثالث.

المعنى الرابع الذي برضه مشترك في الثلاث قصص، ركزوا بقى في المعنى ده قوي: أن كل واحد منهم فعل فعلًا غير عادي. فات قد إيه كده؟ يا خبر، تعبتم؟ مش عاوز أصوات المعارضة، إحنا عاوزين اللي تعب. حد تعب؟ ما حدش يتكسف، اللي تعب يمشي، معلش. طيب إيه رأيكم؟ طب ادوني كمان عشر دقائق، ماشي؟ هو اللي تعب الناس واقفة بره يا عيني، طبعًا فلو حد ممكن ماشي.

رابع حاجة إنه كل واحد منهم فعل فعلًا غير عادي. الأول يا جماعة كان ممكن قوي لما يروح يلاقي أبوه وأمه نايمين يعمل إيه؟ يسيب لهم اللبن بتاعهم ويروح يرتاح، ما هو جاي بقى من تعب، ويروح يرتاح وينام. ما عملش كده، لأ، ده فضل واقف والقدح في يده ينتظر أبويه، قمة في البر، فعل غير عادي.

الثاني فعل فعلًا غير عادي برضه، «قمت عنها وهي أحب النساء إلي». فلما قعدت منها مقعد الرجل من امرأته، ولما كشفتها في هذا الموقف، فعل فعلًا غير عادي، ما حدش يقوم من ده؛ قمت عنها وهي أحب النساء إلي، وبعدين أعطيتها المال الذي أرادت. كان ممكن يديها نص المال، كان ممكن يديها ويقول لها روحي بقى شوفي بالباقي، لأ، إداها كل حاجة، وهو مش الراجل الموسر، لأ، ده المال ده طلبه حتى قدر عليه. إداها المال، ما إداهاش المئة دينار، خلي بالكم إداها المئة وعشرين دينار. يعني كان ممكن بقى بعد ما الشرط فسد، طب هات بقى العشرين دينار، يعني خد المئة اللي أنت، لأ، ساب لها المئة وعشرين دينار. فعل غير عادي.

الثالث لو كان الأجير ده جه قال له اديني أجري، وراح مدي له النص درهم، والله كان زمان الأجير ده ماشي بيشعر في الراجل. تخيلوا يا جماعة بعد سنتين رحت له، إداني الفلوس عادي كده. صح يا جماعة ولا لأ؟ الراجل ما عملش كده، ده ثمره له. كان ممكن يعمل حاجة تانية إنه يقول له: أنا عملت لك في هذا المال، يعني أنا نقسم بقى الكلام ده. من أصلاً لو إداله نص ده، ده كان زمان التاني ده رجع طيران من الفرح؛ أنتوا شفتم وتأملتم إنه كانت حالته عاملة إزاي؟ بيقدم رجل ويأخر رجل لأنه مش خلاص، يعني ما عندوش حيلة غير النص درهم. ده اللي يخليه يروح لواحد بقى له سنين ليه عنده نص درهم. كان ممكن يقول له: أنا بقى اشتغلت لك في المال فلي نص المال وأنت لك نص المال؛ كان التاني ماشي عامل إزاي؟ متجنن من الفرحة، مش كده؟ ما عملش كده، قال له: كل ما ترى هو لك. ما خدش منه حاجة، فاستاقه كله، فلم يترك منه شيئًا.

عمل غير عادي، محتاجين ده يا شباب. محتاجين يبقى في حياتنا عمل غير عادي. يعني إيه عمل غير عادي؟ يعني عمل قدرنا واجتهدنا إن نوصل فيه للسقف، ونعدي فيه السقف كمان. اللي هو مش إيه يعني هو إيه الواجب عشان أعمله؟ لأ مش كده. طب إيه العمل؟ ما أعرفش. كل واحد يطلع النهارده يدور على عمل غير عادي، يرجو به يومًا كيوم الغار. عمل غير عادي، ده رابع معنى.

يبقى إخلاص، عمل نفعه متعدٍ، مع أحوج الناس وأفقرهم وكذا وكذا، عمل غير عادي، خامس حاجة مشتركة: كل عمل من الأعمال دي استعلى صاحبه به على شهوة من شهوات نفسه. أعظم شهوات النفوس ذكرها الله في القرآن، قال الله عز وجل: ﴿زُيِّنَ لِلنَّاسِ حُبُّ الشَّهَوَاتِ مِنَ النِّسَاءِ وَالْبَنِينَ وَالْقَنَاطِيرِ الْمُقَنْطَرَةِ مِنَ الذَّهَبِ وَالْفِضَّةِ وَالْخَيْلِ الْمُسَوَّمَةِ وَالْأَنْعَامِ وَالْحَرْثِ﴾ [آل عمران: 14]. كل دي أموال، مش كده؟ يبقى نساء وبنين وأموال، هم دول أكبر ثلاث شهوات في الدنيا.

كل قصة من دي استعلى صاحبها فيها على شهوة من هذه الشهوات الثلاثة. الأول استعلى على شهوة البنين والأبناء والصبيان يتضاغون عند قدمي، وهذا رجل قلبه رقيق، ممكن تقول إيه القلب الحجر ده؟ لأ ده قلبه رقيق لدرجة إنه شايل هم أبويه وكذا. طبعًا العلماء لهم نقاش في مسألة الصبيان يتضاغون، نقاش فقهي مش وقته، إنما المهم استعلى على شهوة حب الأبناء. وبالذات يا جماعة الأب والأم لما يكبروا ويبقوا فانيين وكذا، قلب الوالد الطبيعي اللي هو في الوسط، هو أميل لابنه ولا لوالده؟ للابن بلا شك. مش كده؟ استعلى على شهوة حب الولد، والثاني استعلى على شهوة حب النساء، والثالث استعلى على شهوة حب المال.

فكل واحد من دول استعلى على شهوة من شهوات نفسه، فإحنا خمس أوصاف للأعمال المنجية باختصار؛ خمس أوصاف، احفظوهم وأسقطوهم على حياتكم. بهذا الجنس من الأعمال الذي جمع تلك الأوصاف تنفرج الصخرات. أقول قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.