الشيخ أمجد سميرأعظم آية في كتاب الله عز وجل هي آية الكرسي. وقد ندبنا الشرع أن نقرأ آية الكرسي في اليوم والليلة ثماني مرات: خمس مرات بعد الصلوات المكتوبات، ومرة قبل النوم، ومرتان في أذكار الصباح والمساء.
أما فضل قراءة آية الكرسي بعد الصلوات المكتوبات، فإنه من واظب عليها لم يفصل بينه وبين الجنة إلا أن يموت. وأما قراءتها قبل النوم، فلا يزال عليك من الله حافظ حتى تستيقظ. وأما فضلها في أذكار الصباح والمساء، فهي تحفظك من النهار إلى الليل ومن الليل إلى النهار، وتحفظك وأنت نائم، فكأنك قد حفظت اليوم كله. وهناك مناسبة للحفظ مع آية الكرسي، وسنعرفها بعد قليل.
وهي أعظم آية في كتاب الله عز وجل كما في حديث أبي المنذر: حين سأله النبي ﷺ أي آية في كتاب الله أعظم؟ فقال: «الله لا إله إلا هو الحي القيوم»، فقال له: «ليهنك العلم أبا المنذر». فعلينا أن نتدبر آية الكرسي، ولماذا هي الأعظم، ولماذا هي التي تكرر في اليوم والليلة.
قال الله عز وجل: ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ [البقرة: 255]. آية الكرسي كلها تتحدث عن الله عز وجل، ولذلك كانت هي الآية الأعظم. وهل يجوز أن نفضّل آيات على آيات؟ هناك قولان لأهل العلم، ومن قال بجواز التفضيل، اختلفوا في حيثيات ذلك، فمما قيل: أن ما كان في الله فهو أفضل مما جاء في غيره؛ فآية الكرسي هي الأعظم لأنها في الله عز وجل.
افتتحت الآية بلفظ الجلالة، وكان من الممكن أن يكون السياق على غير ذلك، لكن جاء النظم الشريف بالبدء بلفظ الجلالة ثم الضمير الذي يعود عليه: ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾، فافتتحت بالتوحيد؛ والتوحيد هو أشرف شيء في هذا الدين، وهو دعوة الرسل.
التوحيد ليس فقط ألا تنذر إلا لله ولا تسجد إلا لله، بل إن توحيد الألوهية يعني ألا تُصرف العبادة إلا لله سبحانه وتعالى، ومن العبادات عبادات القلب: ألا تتوكل إلا عليه، وألا ترجو غيره، وألا تخشى سواه. وأي خلل يلحق شيئًا من تلك العبادات فهو خلل في التوحيد.
فأول اسم يمر بنا هو اسم الحي، وهو اسم تكرر في القرآن وتوكل على الحي. فألا تتوكل إلا عليه هو من أساس التوحيد، إن قلبك لا يكون معتمدًا على أحد غير ربنا. والسؤال هنا: هل هذه المعاني متحققة فينا؟ إذا نزل بك أمر، هل تتوكل على الله أم تخاف من فلان وعلان؟ ﴿إِذَا فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللَّهِ﴾ [النساء: 77]. أين خوفك؟
سيدنا النبي ﷺ لما دخل عليه الأعرابي وهو نائم ووقف عليه بالسيف وقال: من يمنعك مني؟ قال: «الله»، فسقط السيف من يده. هذا هو التوحيد؛ أن تكون متوكلاً على الله وحده، لا نرجو أباً ولا أمّاً ولا صديقاً. إن تكرار هذه الآية في كل وقت لتتحقق فينا هذه المعاني، فلا نكون كالببغاء الذي يردد الكلام دون أن يعيه، فيسقط في الاختبار عند الشدائد.
و«الحي القيوم» في قول بعض أهل العلم هو اسم الله الأعظم؛ لأنه ورد في بعض الآثار أنه اسم الله الأعظم في آيتين، وفي رواية في ثلاث آيات، والثلاثة فيها الحي القيوم. فإذا تأملنا هذين الاسمين وجدنا عجباً؛ فاسم الله الحي يدل على كمال الحياة، ويتضمن كمال صفاته كلها، واسم الله القيوم يتضمن كمال أفعاله. فكأن اسم الحي واسم القيوم تضمنا كمال الصفات وكمال الأفعال.
الحي لا يموت؛ وتوكل على الحي الذي لا يموت. لأن حياته كاملة لم تسبق بعدم ولا يلحقها زوال. وقد تتوكل على حي فيموت أو ينام، والله عز وجل حي لا ينام، فلا ينبغي أن نرجو غيره أو نعتمد على سواه. إننا نحتاج أن نعيش بالقرآن ونستشعر تلك الآيات التي نكررها، فإذا قرأت ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾، فلتستحضر أن صفاته كاملة، وقدرته كاملة، وقيوميته كاملة، فإليه المرجع وإليه التوكل.
إلى غير ذلك من الأفعال، من أفعاله سبحانه وتعالى، فاسم القيوم يتضمن كمال الأفعال. لما أنت تعرف هذا، وأنه سبحانه وتعالى قيوم؛ قائم بنفسه مش محتاج لأحد عشان يقوم، وقائم به غيره؛ فالكل محتاج له. لما تيجي تصمد، تصمد لمين؟ في اسم الله الصمد، قلنا من معاني الصمد الذي تصمد إليه الخلائق بالحوائج. لو لك حاجة ما تروحش لأحد غيره؛ ليه؟ أصله قيوم. هو القيوم، يعني من غير ربنا سبحانه وتعالى الكل يضيع.
قال سبحانه وتعالى: ﴿وَلَئِن زَالَتَا إِنْ أَمْسَكَهُمَا مِنْ أَحَدٍ مِّن بَعْدِهِ﴾ [فاطر: 41]. ﴿إِنَّ اللَّهَ يُمْسِكُ السَّمَاوَاتِ وَالْأَرْضَ أَن تَزُولَا﴾ [فاطر: 41]؛ لأنه قيوم السماوات والأرض. ﴿وَلَئِن زَالَتَا إِنْ أَمْسَكَهُمَا مِنْ أَحَدٍ مِّن بَعْدِهِ﴾. ما أحسنتم، إن هنا نافية، يعني ما أمسكهما من أحد من بعده؛ ليه؟ أصله هو قيوم السماوات والأرض. وقل مثل ذلك في نفسك، لو أسلمك الله لنفسك ضعت، ولو أسلمك لغيره أيًا كان هذا الغير ضعت، تدمرت خالص؛ لأنه القيوم سبحانه وتعالى الحي القيوم.
ولذلك ذهب بعض أهل العلم أن الحي القيوم هما الاسم الأعظم؛ ففيهما كمال الصفات وكمال الأفعال، فهما الاسم الأعظم. ولو أعطينا هذين الاسمين حقهما إحنا مش محتاجين حاجة تانية. لو أعطيت اسم الله الحي وعشت معه، يعني إيه كمال الحياة؟ يعني كمال السمع؛ فهتراقبه في كل لفظة، وهتلتذ بمناجاته لأنه يسمعك. وفيها كمال البصر؛ فهتراقبه في كل حركة وسكنة، وهتلتذ برؤيته لك في جوف الليل وأنت بين يديه سبحانه وتعالى، وتلتذ برؤيته لك وأنت صائم، محدش يعرف إنك صائم لكن هو يراك؛ لأن بصره كامل. وقل مثل ذلك في كل صفة، وأنت قاعد بتقرأ آية الكرسي بعد الصلاة متعديش عليك كده ﴿اللَّهُ لَا إِلَٰهَ إِلَّا هُوَ الْحَيُّ الْقَيُّومُ﴾ [البقرة: 255]، تحيا باسم الحي وتتدبر اسم الحي؛ علشان تثمر عملًا في قلبك قبل جوارحك. زهد قلبك في كل أحد غير الله سبحانه وتعالى، مش عاوز حد غيره خلاص؛ حي قيوم هتروح لغيره ليه؟
الحي القيوم، ثم تأتي صفات سلبية: ﴿لَا تَأْخُذُهُ سِنَةٌ وَلَا نَوْمٌ﴾ [البقرة: 255]. السنة والنوم نقص في الحياة والقيومية جميعًا. خليني أسألكم سؤالًا: لو قلت لك جيت تسألني وقابلتك كده وأقولك يا أخي اسكت أنا بقالي أربع أيام ما بنامش، هتقولي ما شاء الله إيه الجمال ده؟ ولا هتعتبر ده نقص فيا؟ هتقولي ليه كده وخير؟ طب رحت للدكتور؟ يبقى إذًا عدم النوم هو اللي نقص ولا النوم هو اللي نقص؟ في البني آدم عدم النوم نقص، والنوم نقص. آه، في حقنا نحن عدم النوم نقص، ليه؟ علشان المناسب لضعفنا هو النوم. فكرة إني ما نمتش بقالي يومين أو ثلاثة معناها إني داخل على انهيار؛ لأنا لم نخلق ألا ننام، فالمناسب لضعفنا إن إحنا ننام ونستريح، وعلشان كده في الجنة هنرد إلى كمال الخلقة فمش هيبقى فيه نوم.
فيبقى المناسب لضعفنا إن إحنا ننام، وعشان كده كان عدم النوم في حقنا نقصًا. ولذلك لو تصورنا إن فيه مخلوق بني آدم قالك أنا طبيعتي ما بنامش أصلًا ومش في احتياج للنوم، هتنبه بجد وهتحس إن هي دي حاجة جامدة. ولله المثل الأعلى، فيبقى إحنا في حقنا صحيح عدم النوم هو النقص، لكن في حق الله عز وجل الكمال عدم النوم؛ لأنه ما بيتعبش، ﴿وَلَقَدْ خَلَقْنَا السَّمَاوَاتِ وَالْأَرْضَ وَمَا بَيْنَهُمَا فِي سِتَّةِ أَيَّامٍ وَمَا مَسَّنَا مِن لُّغُوبٍ﴾ [ق: 38].
لذلك ﴿لَا تَأْخُذُهُ سِنَةٌ وَلَا نَوْمٌ﴾، والقيومية؛ السنة اللي هي بدايات النوم، قالوا السنة تكون في الرأس والنوم يكون في القلب، وهي درجات؛ ﴿فَرَنَا فَرَنَا قَدْ فِي عَيْنِهِ سِنَةٌ وَلَيْسَ بِنَائِمِهِ﴾ يعني درجات. فالله عز وجل لا تأخذه سنة ولا نوم، لأن السنة والنوم نقص في الحياة وكذلك نقص في القيومية؛ لأنه لو نام من الذي سيقوم على حوائج الناس؟ من يمسك السماوات والأرض؟ ولذلك جاء في بعض الإسرائيليات أن بني إسرائيل سألوا موسى عليه السلام: أينام ربنا؟ فقال: اتقوا الله. ثم سأل موسى الملائكة: أينام ربنا؟ فأمر الله الملائكة أن تجعل موسى لا ينام ثلاثة أيام؛ ففضل موسى ما نامش ثلاثة أيام، ثم أمر ملكًا أن يعطي لموسى قارورتين مملوءتان بالماء وقال له: خليك حافظهم؛ فضربه النعاس فانكسرتا. فأوحى الله إلى موسى أنه لو نام لذهبت السماوات والأرض، مين هيمسك السماوات والأرض؟ ﴿وَلَئِن زَالَتَا إِنْ أَمْسَكَهُمَا مِنْ أَحْدٍ مِّن بَعْدِهِ﴾.
تلك الصفة خلي بالكم يا جماعة، لما ننفي صفة عن الله عز وجل فده يتضمن إثبات كمال الضد، وإلا ما فيهوش مدح. مثلًا لما آجي أقولك العمود ده ما يعرفش يظلم، هل أنا كده بمدح العمود؟ لا، لأنه ملوش أصلاً قدرة على الظلم. امتى أكون بمدح؟ لو نفيي الظلم عن إنسان يتضمن أنه ما بيظلمش لأنه عادل، مش لأنه ما بيقدرش. وعندنا قاعدة في الصفات السلبية في حق الله عز وجل: إذا نفينا صفة عن الله عز وجل فذلك النفي يتضمن إثبات كمال الضد. لا تأخذه سنة ولا نوم فيه إثبات كمال الحياة والقيومية.
ولم يقل الله عز وجل لا يسن ولا ينام، قال ﴿لَا تَأْخُذُهُ سِنَةٌ وَلَا نَوْمٌ﴾؛ لا تأخذه يعني لا تغلبه، وكأن المعنى أن الله عز وجل هو الملك الذي لا يغلب من أي شيء ولا من أي أحد، حتى النوم. أنتم عارفين في المثل يقولوا النوم سلطان؛ لأنه إذا أمر، والله لو أنت مين، النوم سلطان إذا أمر انتهت، ولذلك هنا ﴿لَا تَأْخُذُهُ﴾ أي لا تغلبه السنة ولا النوم؛ لكمال سلطانه سبحانه وتعالى وكمال ملكه، فهو يأمر ولا يؤمر. فأنت لما تستشعر تلك المعاني لا تأخذه سنة ولا نوم، إذًا كمال الحياة وكمال القيومية هتفرق في حياتك كلها؛ أولًا كمال الحياة وكمال القيومية يعني تطمئن؛ تطمئن ليه؟ لأنه سبحانه وتعالى هو القائم عليك، فأنت قلقان ليه؟ ما هو القائم عليك هو الله وهو كامل الحياة، يعني الذي لن يغفل عنك ولا يسن ولا ينام.
ولا هو الذي ممكن يكون سلطانًا وعاوز يوصلك كل الخير لكن ما يقدرش لأن في سلطان أقوى منه؛ هو ليس كذلك سبحانه وتعالى. فأنت قلقان ليه على رزقك وقلقان ليه على بكرة؟ حي قيوم سبحانه وتعالى، خايف ليه من فلان وعلان؟ حي قيوم سبحانه وتعالى، هو القائم عليك والقائم على فلان هذا، فأنت قلقان ليه منه؟ وننفعل بقى مع تلك الأسماء، حي قيوم لا تأخذه سنة ولا نوم، فاكرين لما قلنا مسألة الحفظ إن آية الكرسي مرتبطة بالحفظ؟ هتقرأها الصبح تحفظك إلى الليل، تقرأها بالليل تحفظك إلى النهار، تقرأها عند المنام لا يزال عليك من الله حافظ. ليه بقى؟ لأنه القيوم؛ فإنه هو الذي يحفظك سبحانه وتعالى، فأنت في حفظه.
تاني حاجة تستشعرها وأنت جاي تنام تستشعر أن هذا النوم في حقك أنت كمال لضعفك، فتقول لا تأخذه سنة ولا نوم، فترى فيها كماله سبحانه وتعالى. أنا أذكر مرتين حصل لي الموقف الذي سأحكي لكم عليه، إني ما نمتش لمدة طويلة، أرق أو ضغوطات وشغل، حصل لي حاجة عجيبة جدًا، عقلي عمل شطف، يعني يفصل. كنت رايح بيتي وأنا من شبرا، قضيت طفولتي وحياتي كلها في شبرا، وبعدين عقلي فصل، فتهت. تهت مش عارف أروح، مش عارف فين بيتي، أنا صاحي وعيني مفتوحة ومش عارف فين البيت وقعدت ألف بالعربية ومش عارف أوصل للبيت؛ وده كان حاجة عجيبة جدًا. موقف تاني مرة حصل لي إني برضه ما نمتش كذا لمدة طويلة ورحت الشغل مش فاكر اسم ولا واحد من اللي أنا مقابلهم في الشغل، اللي هم زمايلي اللي ليّا 19 سنة في الشركة؛ بسلم على اللي قدامي ومش عارف اسمه إيه. فده المناسب لضعفنا نحن، إن إحنا لازم ننام.
إذا كنت تنام وتقرأ آية الكرسي؛ فأنت تزداد إيمانًا. الله لا إله إلا هو الحي، حياته غير، والقيوم يحتاج لحفظه، ولا تأخذه سنة ولا نوم، وأنت تأخذك السنة والنوم، فتشهد كمال حياته سبحانه وتعالى. لا تأخذه سنة ولا نوم، له ما في السماوات وما في الأرض. وهنا يا جماعة شوفوا التقديم والتأخير، أصل الجملة ما في السماوات وما في الأرض له، فقدم هذا الحرف «له» على ما في السماوات وما في الأرض، دي تفيد إيه؟ التخصيص، مش كده؟
يا جماعة عيشوا المعاني دي، حاشا الله سبحانه وتعالى إنه ينطق بشيء ويكون من غير حكمة ومن غير مراد له، دي تتقدم ليه ودي تتأخر ليه؟ ده مهم جدا نعيش المعاني دي، له ما في السماوات وما في الأرض، يعني إيه؟ له وليست لغيره. هو ده التوحيد الذي نريد، أهو ده التوحيد. له ما في السماوات وما في الأرض؛ يعني مش ما في السماوات وما في الأرض له، لأ، دي ما تساويش دي. له ما في السماوات وما في الأرض يعني له وليست لغيره.
وارجع تاني اسأل نفسك: أنا خايف ليه من فلان؟ بأرجو ليه فلان؟ بتوكل ليه على فلان؟ اذهب إلى ربك سبحانه وتعالى، واصمد إليه سبحانه وتعالى، وإياك أن يتعلق قلبك بغيره سبحانه وتعالى. عاوزين نخرج من منطقة إن التوحيد ألا ننذر إلا لله وألا نذبح إلا لله وألا نسجد إلا لله، مش بس ده التوحيد. وبعدين ترجع لنفسك إيه؟ الحمد لله ما بذبحش غير لربنا وما بنذرش غير لربنا، ده كده موحد؟ أين توحيد قلبك؟ وتوكل على الحي الذي لا يموت، أين توكلك عليه؟ يخشون الناس كخشية الله أو أشد خشية، أين خشيتك منه وحده سبحانه وتعالى؟ حتى إذا هددك من هددك، حتى إذا اجتمعت عليك الأرض، كل الأرض، كان قلبك مطمئنا، ليه؟ ما أصله ﴿قُل لَّن يُصِيبَنَا إِلَّا مَا كَتَبَ اللَّهُ لَنَا﴾ [التوبة: 51]. مش كده؟ فخايف من إيه؟
واعلم، والكلام ده يعلمه النبي صلى الله عليه وسلم لغلام، إحنا مربيين ولادنا على إيه؟ إحنا اللي هم أهل المسجد، الناس المتدينة، إيه المعاني اللي ربنا عليها عيالنا؟ إيه المعاني اللي إحنا أصلا متربيين عليها؟ «واعلم أن الأمة لو اجتمعت على أن ينفعوك لن ينفعوك إلا بشيء قد كتبه الله لك، ولو اجتمعت على أن يضروك لن يضروك إلا بشيء قد كتبه الله عليك». لو اجتمعت الأمة، ليه؟ أصله له ما في السماوات وما في الأرض. يعني إيه له بقى؟ له يعني عبيد له، أهو شوف بقى كام معنى في له، عبيد مربوبون مقهورون له. فخايف ليه أنت من العبد؟ بترجو ليه العبد؟ بتتتوكل ليه على العبد؟ ده كل ده له سبحانه وتعالى. يبقى له ما في السماوات والأرض عبيد له، ومن جملتهم أنت. فإذا كان له ما في السماوات والأرض فأنا عبد له، فتراعي آداب العبودية.
له ما في السماوات والأرض ملكًا، يعني هم من جملة ملكه سبحانه وتعالى. فإذا كانوا من جملة الملك، يبقى المعاني اللي إحنا قلناها من شوية، ليه ترجو حد وأنت معك الملك؟ ترجوه ليه؟ ليه تخاف من حد وأنت معك الملك؟ خايف ليه؟ له ما في السماوات وما في الأرض. ﴿مَن ذَا الَّذِي يَشْفَعُ عِندَهُ إِلَّا بِإِذْنِهِ﴾ [البقرة: 255]. أنتم عارفين يا جماعة، الشفيع يعني إيه الأول؟ واحد بيشفع لواحد، يعني بيجي يبذل جاهه مثلا عند واحد ثاني علشان يحقق لذلك المشفوع فيه مصلحة أو يدفع عنه مضرة، ده معنى الشفاعة في الدنيا. والله عز وجل يحب من منا أن نشفع، يحب ذلك منا، ﴿وَاشْفَعُوا تُؤْجَرُوا﴾، فإنك تروح تشفع في أحد ربنا يحب ده منك.
طيب، فده معنى الشفاعة، ثاني بقى، ركزوا كده في اللي هأقوله ده، يبقى واحد رايح يشفع لواحد، بيشفع بإيه؟ غالبا بيكون بيشفع بجاهه، يعني له منصب، له حظوة، له أي حاجة، مكانة مجتمعية، فرايح يشفع. طيب، اللي أنت داخل عليه ده، إيه اللي يجبره إنه يقبل شفاعتك؟ إيه اللي يجبره؟ إنك تكون أعلى منه رتبة أو منصب أو جاه، أو إنه بيقبل شفاعتك دلوقتي لأنه شوية وهيحتاجك. فلا لما يجي يحتاجك يقولك إيه؟ اقضي السبت تلاقي الأحد أو سيب الباب موارب مع فلان ده لأن هتحتاجه قريب. دي الحاجات اللي بتخلي الناس تقبل الشفاعة في الدنيا.
صح يا جماعة ولا لأ؟ هي دي المعاني اللي بتخليك وأنت قاعد في مصلحتك داخل عليك واحد، ما هو معلش يعني هو أنا دلوقتي صاحب المصلحة، رحت ساحب واحد من الشارع كده وقلتله تعالى تشفعلي عند الراجل اللي جوه ده، هيعمل إيه؟ هيقولك اطلع بره أنت وهو. مش هيقبل شفاعتك. طب ليه لما يدخل بقى واحد يقوله أنا فلان الفلاني وكيل نيابة، أنا فلان الفلاني ضابط شرطة، أنا فلان الفلاني قاضي في الحتة الفلانية، أنا فلان الفلاني صاحب المصنع الفلاني، يبتدي يديله احترامه ويقعده ويقبل شفاعته، ليه؟ هي المعاني اللي إحنا عمالين نقولها دي، إما إنه خايف منه، خايف إن يناله مكروه لو هو ما قبلش الشفاعة، أو إنه بيرجو منه هو بعد كده مصلحة فنسيب الباب مفتوح، وعشان كده إيه اللي بيحصل؟ أول ما يخلص الشغل يقولك إيه؟ طب ممكن بقى حضرتك إن شاء الله عشان لو أبعيد عليك بس ولا بتاع. ليه؟ شايله لبعدين.
طيب الله سبحانه وتعالى، يقبل شفاعة ليه بقى؟ لا هو محتاجنا، وعشان كده هو قيوم قائم بنفسه، والقائم بنفسه مش محتاجك في حاجة هو سبحانه وتعالى، فيقبل شفاعتك ليه؟ مش محتاجنا، ولا هو خايف مننا حاشاه، ولا هو ممكن تدور عليه الدوائر ما، ممكن ما يبقاش محتاجلك دلوقتي بس لما هيطلع معاش الراجل قاعد على الكرسي ده لما يطلع معاش هيبقى محتاجلك. فهو سبحانه وتعالى لا يلحقه تغير لا تدور عليه الدوائر، فلا هو محتاجلك دلوقتي ولا هو خايف يحتل يحتاجلك بعدين، فيقبل شفاعتك ليه إن شاء الله؟ تخيلوا بقى المشهد المهيب ده، عارفين إيه هو المشهد المهيب؟ إنك لما تيجي تشفع للملك جل جلاله توقف مستني الإذن بالشفاعة. في العادة يا جماعة اللي داخل يشفع ده هو مش مستني إذن، ده هو داخل بسلطانه وكبريائه وجاهه وماله ومنصبه، مش مستني إذن لا. ده أنت واقف مستني الإذن أن يقال لك اشفع.
والله يا جماعة المشهد ده مهيب، يعني لو تأملنا ذلك المشهد مشهد مرعب مهيب، «يا محمد ارفع رأسك، وسل تعطى، واشفع تشفع»، حينها يشفع، قبل كده ما يشفعش. ﴿مَن ذَا الَّذِي يَشْفَعُ عِندَهُ إِلَّا بِإِذْنِهِ﴾ [البقرة: 255]، مين ده إن شاء الله؟ مين اللي يفتح الباب ويدخل كده يشفع؟ ما فيش، ما فيش. ليه؟ أصله هو ملك الملوك جل جلاله، لا محتاجلك ولا هو خايف بعدين يحتاجلك، ولا خايف منك تلحق به ضررا مثلا. فأنت تدخل عليه دخلة المنكسر الذليل، المنتظر للإذن إنك تشفع. ما هو موقف الشفاعة ده في الدنيا هو ده من أعلى المواقف اللي بتظهر فيه سلطتك ورؤيتك لنفسك، تخيلوا في هذا المشهد؟ لأ، ده أنت منكسر، مطأطئ، ساجد، مستني أن يقال لك: اشفع، لتشفع. فلو أعطينا بس الجملة، والله يا جماعة آية الكرسي لو بس المشهد ده خد حقه، مرعب، مشهد مرعب، ويوقفك فعلا على معنى أنه ملك الملوك جل جلاله.
﴿وَكَم مِّن مَّلَكٍ فِي السَّمَاوَاتِ لَا تُغْنِي شَفَاعَتُهُمْ شَيْئًا إِلَّا مِن بَعْدِ أَن يَأْذَنَ اللَّهُ لِمَن يَشَاءُ وَيَرْضَىٰ﴾ [النجم: 26]. لا تغني شفاعتهم شيئا إلا من بعد أن يأذن الله، أول حاجة لازم يأذن، يأذن لمن؟ للشافع، ﴿لِمَن يَشَاءُ وَيَرْضَىٰ﴾ عن المشفوع فيه، فهمتوا دي؟ آه، يبقى يأذن لمن يشاء أن يشفع، ويرضى عن المشفوع فيه، ساعتها تقبل الشفاعة. ﴿مَن ذَا الَّذِي يَشْفَعُ عِندَهُ إِلَّا بِإِذْنِهِ﴾ [البقرة: 255]، لا أحد، ليه؟ أصله حي قيوم، فلا أحد يأذن عنده إلا بإذنه.
﴿يَعْلَمُ مَا بَيْنَ أَيْدِيهِمْ وَمَا خَلْفَهُمْ﴾ [البقرة: 255]، هنا يا جماعة إحنا ده كله، الكلام كله دائر حول الاسمين دول، الحي والقيوم. يعلم ما بين أيديهم وما خلفهم، إما أنه يعلم ما بين أيديهم يعني يعلموا ما فعلوه وما سيفعلوه، يعني اللي حصل واللي هيحصل، أو يعلموا ما بين أيديهم وما خلفهم يعني يعلموا الدنيا والآخرة، أو يعلموا ما كان قبل خلقهم وما يكون بعد خلقهم، أو يعلموا ما يسرون وما يعلنون، كل ده أقوال في يعلم ما بين أيديهم وما خلفهم. وكمال العلم شرط في كمال الحياة وكمال القيومية، حياة واحد حي عايش لكن ما يعرفش أي حاجة في أي حاجة، ده حياته كاملة ده؟ ما يعرف وأصلا اللي ما يعرفش أي حاجة في أي حاجة ده هيفسد، مش كده؟ سيبكم من هيفسد دلوقتي، هيفسد دي هتيجي في القيومية بقى. إنما واحد عايش بلا علم كده، ما يعرفش أي حاجة، اللي كده حتى يقولك هو أنت عايش ليه؟ كل ما تسأله حاجة يقولك ما أعرفش، تلاقي من الجمل اللي بتتقال إيه؟ هو أنت يا ابني عايش ليه؟ لما أنت مش عارف أي حاجة كده أنت عايش ليه؟ صح؟ وكأن اللي مش عارف أي حاجة ده ما يستحقش اسم حي بالنسبة له إلا في البطاقة بس يعني. أنت عايش ليه؟
وكذلك هو شرط في كمال القيومية، ما هو أنت يا جماعة عشان دلوقتي هقولك إيه؟ خد الآلة دي وحافظلي عليها، أنا هسافر ١٠ سنين وراجع، حافظلي على الآلة المعقدة دي لغاية ما أرجعلك بعد ١٠ سنين، يبقى أنت لازم إيه؟ أول حاجة تبقى عالم بطريقة حفظ الآلة دي، يعني مثلا هل لابد أن أشغلها كل ثلاث شهور لمدة خمس دقائق وإلا هتبوظ وتعطل؟ هل محتاجة تشحيم مثلا كل فترة؟ هل ما ينفعش أحطها في الشاحن أو مثلا بتاخد فولت معين مش هو اللي عندنا؟ تفاصيل لازم تبقى عارفها عشان تعرف تعمل إيه، تقوم على هذه الآلة، تحفظ هذه الآلة. فإزاي حد يقوم على حد وهو ما يعرفش طريقة؟ بلاش، الإنسان المريض بمرض معين ده، هل ينفع الممرض ولا الممرضة تدخل تعمل معاه بروتوكول زي اللي مريض بمرض تاني؟ ولا كل مريض ليه طريقة في التعامل معه لنحفظ عليه حياته؟ مفهوم يا جماعة؟ فيبقى القيوم ليكون قيومًا لابد أن يكون عالما، يبقى القيومية تدل على العلم، والحياة تدل على العلم.
ولذلك جاء هنا ﴿مَن ذَا الَّذِي يَشْفَعُ عِندَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ﴾ [البقرة: 255]، يعلم كل شيء، ما هو لما يعلم ما بين أيديهم وما خلفهم يبقى سبحانه وتعالى يعلم كل شيء. ويا جماعة علم الله عز وجل علم كامل، من كمال علمه طبعا هم يقولوا إيه؟ كعلمه كامل يعني لم يسبق بجهل ولا يلحقه نسيان، يعني مش حاشاه سبحانه وتعالى ما كانش يعلم وبعدين علم، لأ، ومش النهار ده يعلم وبكرة ممكن ينسى، حاشاه، لأ، لا يضل ربي ولا ينسى. فهذا من كمال علمه، وصفين للعلم، سعة العلم وإحاطة العلم، والوصفين جم في القرآن، ماشي؟ ﴿وَسِعَ رَبِّي كُلَّ شَيْءٍ عِلْمًا﴾ [الأنعام: 80]. والإحاطة؟ ﴿وَأَنَّ اللَّهَ قَدْ أَحَاطَ بِكُلِّ شَيْءٍ عِلْمًا﴾ [الطلاق: 12].
فعندنا، جزاكم الله خيرا، عندنا سعة العلم وإحاطة العلم. سعة العلم يعني أن علمه سبحانه وتعالى واسعة، إنما إحاطة العلم إنه يعلم دقائق الأمور، إيه الفرق بين الإثنين يا جماعة؟ أنت ممكن أجي أكلمك في الهندسة ألاقيك بتتكلم، وأجي أكلمك في الطب ألاقيك بتتكلم، وأجي أكلمك في التجارة ألاقيك بتتكلم، وأجي أكلمك في الزراعة ألاقيك بتتكلم، أول ما ألاقيك في ده كله أعرف إنك إيه على طول؟ مهندس، مش كده؟ كده عندك سعة علم، مش كده؟ إنما أجي بقى أخدك في إيه، أنا بكلمك في الهندسة، أنا بسألك في قصور الهندسة، في قصور الطب، إنما تعالى أخدك بقى في فرع من تلك الفروع، وأدخل بيك لجوة هتقع، ما تعرفش، ما تعرفش تدخل في كل التفاصيل دي، لأنك ما أنتش محيط بالعلم ده، اللي هو ده بيسموه إيه إحنا في حياتنا؟ يقولك ده مثقف، مثقف يعني إيه؟ كلمه في أي حاجة يعرف.
يأخذ ويعطي معك، هذا لا يعني أنك لو غطست فيه في علم من العلوم هذه سيغطس؛ لا، سيغرق. لماذا؟ لأنه واسع العلم، لكنه لم يُحِط علمًا بتلك المسائل. فهمتم الفرق؟ يبقى ﴿يَعْلَمُ مَا بَيْنَ أَيْدِيهِمْ وَمَا خَلْفَهُمْ ۖ وَلَا يُحِيطُونَ بِشَيْءٍ مِّنْ عِلْمِهِ إِلَّا بِمَا شَاءَ﴾ [البقرة: 255]، سبحانه وتعالى ملك، لا يحيطون بشيء من علمه إلا بما شاء، يعني حتى علمنا بإذنه سبحانه وتعالى.
يا جماعة أنتم فاهمين الحاجات التي نراها عادية في حياتنا؟ يعني تعلمت شيئًا فأنت شايف أنك اجتهدت وذاكرت فتعلمت، لا، أنت لم تُحِط بشيء من العلم إلا بإذنه سبحانه وتعالى؛ فترى الله عز وجل في كل شيء. ﴿وَلَا يُحِيطُونَ بِشَيْءٍ مِّنْ عِلْمِهِ إِلَّا بِمَا شَاءَ ۚ وَسِعَ كُرْسِيُّهُ السَّمَاوَاتِ وَالْأَرْضَ﴾.
وسع كرسيه، ما الكرسي؟ إما يكون هو العرش في قول الحسن، أو يكون أمام العرش في قول أبي هريرة، أو يكون موضع القدمين كما جاء في بعض الآثار، أو يكون الكرسي هو صفة من صفات الله وهي العلم في قول ابن عباس، هذه كلها أقوال وفي أقوال أخرى طبعًا. لكن دعوني أبتدئ بآخر قول، ﴿وَسِعَ كُرْسِيُّهُ السَّمَاوَاتِ وَالْأَرْضَ﴾ قال ابن عباس: وسع علمه السماوات والأرض؛ فعلم الله عز وجل وسع كل شيء. والكرسي يجيء بمعنى العلم ولا ما يجيء؟ يجيء في اللغة، وابن عباس سيقول هكذا وسع كرسيه وسع علمه هكذا، أكيد لا، ليس كذلك؟ لما تجيبوا صحيفة وتكتبوا فيها العلم، يسموها ماذا؟ كراس، أو كراسة. فابن عباس قال: وسع كرسيه السماوات والأرض، قال: وسع علمه السماوات والأرض.
أو وسع كرسيه على أنه أحد المخلوقات، يعني إذا هو العرش في قول الحسن، هو خلق آخر في قول الأكثر. ﴿وَسِعَ كُرْسِيُّهُ السَّمَاوَاتِ وَالْأَرْضَ﴾، مشهد مرعب. أنتم عارفين يا جماعة السماوات هذه فقط، يعني السماء الدنيا في السماء الثانية كإيه؟ كحلقة في فلاة. حد يعيش المشاهد هذه؟ يعني حد عمره تخيل أنه عنده صحراء بمساحة الصحراء ورمى فيها حلقة؛ فنسبة تلك الحلقة إلى هذه الصحراء قدر إيه؟ معدومة صح؟ يعني ممكن تؤول إلى الصفر، أهي هذه السماء الدنيا إلى الثانية.
السماء الدنيا إحنا أصلًا ما بنشوفها، مش عارفين نحيط بها علمًا، هي كحلقة في فلاة بالنسبة للسماء الثانية، والثانية في الثالثة كحلقة في فلاة، والثالثة في الرابعة كحلقة في فلاة وهكذا إلى السابعة، والسابعة في الكرسي كحلقة في فلاة. ما رأيكم؟ هذا الكرسي. ﴿وَسِعَ كُرْسِيُّهُ السَّمَاوَاتِ وَالْأَرْضَ﴾، ابن عباس يقول في هذه الآية إن السماوات السبع والأرضين السبع، طبعًا السماوات والأرض هنا الأرض يعني ليست أرضًا واحدة؛ إحنا عندنا كم أرض؟ سبعة، مش كده؟
لماذا ربنا سبحانه وتعالى ما ذكر أن الأرض هنا سبعة؟ قالوا طبعًا هو الأرض هنا الجنس فهي تشمل السبعة من حيث اللغة تمشي، لكن لماذا قالوا إن كلمة أرضين وأرضون ثقيلة؟ الكلمة هذه ثقيلة، تمجها الآذان، وليس من البلاغة استعمال تلك الألفاظ المستهجنة. علشان كده ربنا سبحانه وتعالى لما أراد أن يذكر أن الأرض سبعة، قالها إزاي؟ ﴿اللَّهُ الَّذِي خَلَقَ سَبْعَ سَمَاوَاتٍ وَمِنَ الْأَرْضِ مِثْلَهُنَّ﴾ [الطلاق: 12]، ما قال سبع أرضين، قال ومن الأرض مثلهن علشان اللفظ الذي تمجه الأذن هذا لا يقال.
متى نقول لفظًا تمجه الأذن ويبقى من البلاغة؟ لو نقصد هذا، يعني نقصد معنى، ﴿تِلْكَ إِذًا قِسْمَةٌ ضِيزَىٰ﴾ [النجم: 22]، يعني إيه ضيزى؟ جائرة ظالمة. طب كلمة جائرة وظالمة في السمع أفضل ولا ضيزى؟ جائرة ظالمة، لو قلنا تلك إذن قسمة جائرة، تلاوة أسهل وطروق للسمع، لكن النظم هنا جاء ﴿تِلْكَ إِذًا قِسْمَةٌ ضِيزَىٰ﴾ بكلمة غريبة. قالوا من البلاغة هنا أن هذه الكلمة أشارت إلى أن القسمة جائرة وغريبة، فهي ليست بس جائرة، لا، هذه قسمة جائرة وقسمة غريبة أن أنتم أصلًا تروحوا لها بأذهانكم.
ما هي القسمة أولًا؟ أنتم عارفين القسمة ولا لا؟ أفرأيتم اللات والعزى ومناة الثالثة الأخرى؟ ألكم الذكر وله الأنثى؟ تلك إذًا قسمة جائرة غريبة، غريبة لماذا؟ الإله، هم طبعًا الأنثى عندهم لا يحبونها، وإذا بُشِّر أحدهم بالأنثى ظل وجهه مسودًا، ما يحبون الأنثى، تقوموا تنسبوها لربنا للإله؟ قسمة غريبة غير أنها جائرة، فكيف نقول الكلمتين في كلمة؟ نجيب كلمة غريبة ومعناها جائرة. فهمتم هذه؟ نرجع بقى ثانية، هذا ليس له علاقة بالدرس.
يبقى ﴿وَسِعَ كُرْسِيُّهُ السَّمَاوَاتِ وَالْأَرْضَ﴾، الكرسي هنا يا جماعة لو هو المخلوق الذي ذكرناه، فشوفوا حجمه قدر إيه؟ ابن عباس يقول في هذه الآية إن السماوات السبع والأرضين السبع لو بُسِطت وتلاحمت بعضها في بعض، تخيلوا المشهد هذا، وأن كل سماء في الثانية كحلقة في فلاة، المنظر المرعب هذا لو بُسِط وتلاحم بعضها في بعض ووصلت بعضها إلى بعض، الكرسي يسع تلك السماوات والأرض، وهذا مخلوق من مخلوقات الله وليس أعظم مخلوقات الله، لأن قيل والكرسي في العرش كحلقة في فلاة.
أنتم فاهمين يا جماعة؟ أنتم فاهمين أنتم لو شفتم المخلوق هذا، لا أبالغ، نحن ممكن نموت، لو مخلوق بهذا الحجم، أنا مرة قعدت أتأمل مع الشباب، قال النبي عليه الصلاة والسلام: «أُذِنَ لي أن أحدث عن ملك من حملة العرش، ما بين شحمة أذنه إلى عاتقه مسيرة 500 عام»، هذه الحتة تقطع في 500 سنة، وساعتها قلنا إحنا للأسف ما بنعرفش نتوهَّم تلك الأرقام، ومهم أن نتوهَّم عشان نعرف احنا فين، إحنا مخلوق حقير لا يساوي شيئًا إلا بطاعة الله عز وجل وبالقرب منه سبحانه وتعالى.
إحنا لا نساوي شيئًا، قلت لكم تخيلوا، أو قلت للشباب ساعتها، تخيلوا أننا شفنا مخلوقًا فجأة رقبته قد طريق مصر إسكندرية، فجأة ظهر لك مخلوق رقبته قد طريق مصر إسكندرية الذي أنت تأخذه في ساعة ونصف، سيحصل لك إيه؟ أنتم فاهمين إحنا بنتكلم في أرقام شكلها إيه يا جماعة؟ ما بين شحمة أذنه إلى عاتقه مسيرة 500 عام، هذا شيء مرعب، والمخلوق هذا هو واحد من حملة العرش، إذن لي أن أحدث عن ملك من حملة العرش، هذا مخلوق، إحنا مش بنتكلم عن الإله، إحنا بنتكلم عن مخلوق مرعب.
طب هل هذا أعظم مخلوق؟ لا، العرش أعظم المخلوقات، يعني الملك هذا ليس أعظم مخلوق، فالله جل جلاله لا يُتوهَّم، إحنا هنا ما بنتوهمش بقى خلاص، أقف هنا. ولذلك في الآخرة من مشاهد الآخرة إنه ستأتي ملائكة السماء الدنيا، فيسألون: أفيكم ربنا؟ ما هو من عظم المخلوق الذي شايفينه هذا؛ ربنا في هؤلاء أكيد، فسبحانه لم يأتي بعد وهو آت، وبعدين تأتي ملائكة السماء الثانية أعظم، فيقولون: أفيكم ربنا؟ سبحانه لم يأتي بعد وهو آت، جل جلاله، وهكذا، مشاهد مرعبة.
﴿وَسِعَ كُرْسِيُّهُ السَّمَاوَاتِ وَالْأَرْضَ﴾، ومما قيل في هذه إن السماوات السبع والأرضين السبع في الكرسي كسبعة دراهم ألقيت في ترس، عارفين الدرع بتاع الحرب؟ درع الحرب هذا لو مسكت سبع دراهم ورميتهم في الدرع هذا كده، يعني أيضًا ما بيساويوش حاجة جنبه، أهو كذا هذا الكرسي، والمشهد الأول أعظم وأجل طبعًا. ﴿وَسِعَ كُرْسِيُّهُ السَّمَاوَاتِ وَالْأَرْضَ ۖ وَلَا يَئُودُهُ حِفْظُهُمَا﴾، يعني إيه لا يؤوده حفظهما؟ لا يتعبه، لا يثقله حفظهما. وهنا يا جماعة المشاهد هذه إحنا عشان شايفين عظم المخلوق لا نتخيل هذا الكلام، بس أنا لو جئت قلت لك أمسك حبة الرمل هذه كده، هتلاقي الموضوع بسيط، وكل المخلوقات هذه بالنسبة لله عز وجل لا شيء، لا تساوي شيئًا أصلًا. ﴿وَلَا يَئُودُهُ حِفْظُهُمَا﴾ لا يتعبه ولا يثقله حفظ السماوات والأرض وما فيهما، فناسب بعد كل تلك الصفات وكل تلك الأسماء أن تُختم الآية بقوله ﴿وَهُوَ الْعَلِيُّ الْعَظِيمُ﴾، فهو علي في جلاله، عظيم في سلطانه سبحانه وتعالى. أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.