الشيخ أمجد سميرالسلام عليكم ورحمة الله وبركاته، هذا هو الدرس الخامس من سلسلة اغتنام أوقات الطاعة. الدرس الماضي كنا قد بدأنا في حديث «إنما الأعمال بالنيات». الغرض من هذه السلسلة هو أن نستعد لرمضان وأن نفهم بعض القواعد في طريقنا إلى الله عز وجل، فهي قواعد لا يسع المسلم السير إلى الله من دون فهمها. لقد تناولنا بعض القواعد في الدروس السابقة، واليوم سنأخذ قاعدة جديدة مرتبطة بما سبق.
لقد تناولنا في المرة الماضية قاعدة «إنما الأعمال بالنيات» وتحدثنا عن خطر الإخلاص، واليوم نبدأ بقاعدة «وإنما لكل امرئ ما نوى». هاتان الجملتان جاءتا في حديث هو أصل من أصول هذا الدين، وهو حديث عمر بن الخطاب رضي الله عنه: «إِنَّمَا الْأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى، فَمَنْ كَانَتْ هِجْرَتُهُ إِلَى اللَّهِ وَرَسُولِهِ، فَهِجْرَتُهُ إِلَى اللَّهِ وَرَسُولِهِ، وَمَنْ كَانَتْ هِجْرَتُهُ لِدُنْيَا يُصِيبُهَا أَوِ امْرَأَةٍ يَنْكِحُهَا، فَهِجْرَتُهُ إِلَى مَا هَاجَرَ إِلَيْهِ» متفق عليه.
لقد ذكرنا في المرة الماضية أن النية يتكلم عنها نوعان من العلماء. النوع الأول هم الفقهاء، وهم يتكلمون عنها من حيثيتين: الأولى النية التي تفرق العبادة عن العادة، والثانية النية التي تفرق العبادات بعضها عن بعض، ونحن لن نتحدث عن هاتين الحيثيتين. الفئة الثانية هم علماء التزكية والتربية والآداب والسلوك، وهؤلاء يتحدثون عن النية في ثلاثة مباحث: المبحث الأول هو الإخلاص، وقد تكلمنا عنه في قول النبي ﷺ: «إنما الأعمال بالنيات».
بقي مبحثان لم نتحدث عنهما، وهما: نية الخير فيما نثاب عليه في المباحات، وأن تنوي أكثر من نية في أعمال الطاعة. ولكي نفهم لماذا ركز العلماء على هذه المباحث، ولماذا كان السلف يلقبون بـ "تجار النوايا"، يجب أن نفهم قيمة الوقت. القصة هي أن الوقت محدود جداً، ولكي تستفيد منه أكبر استفادة يجب أن تفهم قيمته، وقد أوضح الإسلام ذلك في القرآن والسنة.
لقد أقسم الله سبحانه وتعالى بالوقت في آيات كثيرة، مثل: ﴿وَالْفَجْرِ * وَلَيَالٍ عَشْرٍ﴾ [الفجر: 1-2]، و﴿وَالضُّحَى﴾ [الضحى: 1]، و﴿وَاللَّيْلِ إِذَا يَغْشَى﴾ [الليل: 1]، و﴿وَالْعَصْرِ﴾ [العصر: 1]. وكذلك نبه النبي ﷺ على أهمية الوقت بقوله: «نِعْمَتَانِ مَغْبُونٌ فِيهِمَا كَثِيرٌ مِنَ النَّاسِ: الصِّحَّةُ وَالْفَرَاغُ». لكن السؤال الأهم: لماذا أحسوا بأهمية الوقت ونحن لا نشعر بذلك؟
الوقت هو رأس مالك الحقيقي، وهو شيء مقلق لأن رأس المال هذا إذا خسرته لا يمكنك استعادته. لو خسرت مالاً يمكنك تعويضه، أما اليوم إذا ذهب فلن يعود أبداً. تأمل قول الحسن البصري رحمه الله: "ما من يوم إلا وينادي يا ابن آدم، إنما أنا خلق جديد، وعلى عملك شهيد، فإذا ذهبت فلن أعود إلى يوم القيامة، فاغتنمي". وتأمل قول ابن مسعود رضي الله عنه: "ما ندمت على شيء ندمي على يوم غربت شمسه، نقص فيه أجلي ولم يزدد فيه عملي".
دعونا نتخيل هذا الرعب الذي نعيشه. إذا كان عمرك ستين عاماً، فإن ثلثه يضيع في النوم، أي عشرين سنة. وإذا أضفنا سنوات الطفولة قبل البلوغ، نجد أن جزءاً كبيراً من عمرك قد ذهب. ثم أضف وقت الدراسة والعمل، ستجد أن خمسين سنة من عمرك قد ذهبت في مباحات! لا أقول حراماً، بل هي مباحات، لكن تخيل أنك أنفقت أغلب عمرك في "البالونات" بدلاً من التجارة الرابحة.
لولا رحمة الله بنا، فبأي عمل ننجو؟ إن الصورة توضح الآن، فنحن نحتاج لاستحضار المعنيين الآخرين: نية الخير في المباح، وتعدد النوايا في الطاعة. إن المباح إذا خلت منه النية ضاع هباءً. هل لهذا أصل في الشرع؟ نعم، انظر إلى قول النبي ﷺ حينما قال: «وَفِي بُضْعِ أَحَدِكُمْ صَدَقَةٌ». قالوا: يا رسول الله، أيأتي أحدنا شهوته ويكون له فيها أجر؟ قال: «أَرَأَيْتُمْ لَوْ وَضَعَهَا فِي حَرَامٍ أَكَانَ عَلَيْهِ فِيهَا وِزْرٌ؟ فَكَذَلِكَ إِذَا وَضَعَهَا فِي الْحَلَالِ كَانَ لَهُ أَجْرٌ». هنا يشير النبي ﷺ إلى أن تنتبهوا، فلا تضيعوا عاداتكم دون نية.
وضعها في حلال كُتب له أجر. أنا بس اللي عامل اسمه نقطة يغير اسمه بعد إذنكم؛ يعني أنا محتاج منكم اللي عامل اسمه نقطة يغير إن شاء الله، نقطتين تلاتة أي حاجة، بس ما حدش يسيب اسمه نقطة واحدة بعد إذنكم. بس دقيقة عشان حاجات إدارية كده، ممكن نقطتين أو تلاتة براحتكم لكن بلاش نقطة واحدة.
كنت بقول إيه بقى؟ فصلت. ابتدي بقى، أنا مش فاكر صراحة كنت وقفت فين. كنا بنقول إن الشرع والنبي عليه الصلاة والسلام نبهنا على المعنى ده؛ معنى إنك تنوي الخير في المباح. وقال: «وفي بُضع أحدكم صدقة»، وهتلاقيه بقى كتير يعني؛ تبسمك في وجه أخيك صدقة. إنك تضحك في وش اللي بتقابله دي عادة، إن واحد بيقابلك فإنت متعود أما أشوفك أضحك، فالنبي نبهك لأ، انوِ بها الخير، فتبسمك في وجه أخيك صدقة.
ده معنى هتلاقيه برضو بيصب في الحتة دي. إيه تاني؟ حتى اللقمة يضعها في في زوجته، قاعد مع مراتك على الأكل فديتها اللقمة في بقها من حسن المعاشرة، عادة عند الناس إن واحد يأكل الشخص اللي بيعزه أو بيحبه، لأ، النبي عليه الصلاة والسلام يقول لك تاخد بها الثواب لو نويت الخير مع أنها في الأصل عادة، فاهمين يا جماعة؟ وده كتير في الأحاديث. يعني تتبعوا ده في الأحاديث هتبتدوا تفهموا المعنى؛ يعني خلوها كده تحت المظلة الكلية دي، إيه ده! ده النبي لما قال كده ده عاوز ينبهنا لمعنى أكبر، أكبر من مجرد التبسم وأكبر من مجرد وضع اللقمة في فم الزوجة، أكبر من ده؛ اللي هو عمرك ما يروحش كده في مباحات. مفهوم يا جماعة؟
طيب الشغل، الشغل اللي إنت بتروح تشتغله ده، الشغل ده بقى عجيب جداً، لنقوم به صح كده؟ والنبي عليه الصلاة والسلام نبه على مسألة الشغل، وكأن يا جماعة ما هو ما ينفعش يبقى تلت عمرك رايح في حاجة شبه كده والنبي يسيبها. هيقول لك إيه؟ يقول لك: «كفى بالمرء إثماً أن يضيع من يعول»، وفي رواية: «أن يضيع من يقوت». طب أنا عشان ما أضيعش عيالي أعمل إيه؟ لازم أشتغل. فأخبر كذلك أن من الذنوب ذنوباً لا يكفرها إلا السعي؛ ذنوب ما يكفرهاش غير إنك تسعى على عيالك. شف النوايا دي لو حطيتها في المباح، يبقى حضرتك من تمانية الصبح لأربعة العصر بتاخد حسنات، بعد ما كنت بتروح الشغل من تمانية الصبح لأربعة العصر وساعة قبل بتحضر وساعة بعد بترجع لبيتك في الهوا بلالين بتشتري بلالين، الله يصاحبنا اللي اشترى بتسعميت ألف جنيه بلالين ده، لأ، ده النبي عليه الصلاة والسلام بيقول لك إنت بس حط نية إن ده عشان ما تضيعش من تقوت، وإن ده علشان تكفر لك ذنوبك، ذنوب مش هيكفرها غير ده، «اليد العليا خير من اليد السفلى» إلى غير ذلك من المعاني اللي ممكن تحطها في الحتة دي.
طب ليه الشغل ده عجيب بقى إنه لو خلا من النية يبقى اسمه تهريج؟ لعب! الشغل اسمه لعب. أنتم عارفين في الدنيا لما واحد يبقى من البيت للشغل ومن الشغل للبيت يقولوا ده راجل إيه! ده راجل جد، ده راجل جد ما لوش في اللعب ما لوش في الهزار ده من البيت لشغل، البيت أهو! الراجل الجد ده حضرتك ربنا سماه إنه بيلعب، ربنا سبحانه وتعالى قال: ﴿أَفَأَمِنَ أَهْلُ الْقُرَى أَن يَأْتِيَهُم بَأْسُنَا بَيَاتًا وَهُمْ نَائِمُونَ * أَوَأَمِنَ أَهْلُ الْقُرَى أَن يَأْتِيَهُم بَأْسُنَا ضُحًى وَهُمْ يَلْعَبُونَ﴾ [الأعراف: 97-98]. واقف هنا شوية، عارفين وقت الضحى ده يا جماعة؟ وقت الضحى بعد الشروق مثلاً بتلت ساعة يبتدي وقت الضحى؛ يعني دلوقتي هو بتاع سبعة الصبح كده مثلاً، وقت الشغل. ربنا قال إيه بقى: ﴿أَفَأَمِنَ أَهْلُ الْقُرَى أَن يَأْتِيَهُم بَأْسُنَا ضُحًى وَهُمْ يَلْعَبُونَ﴾؟ قال: أي في حال شغلهم وغفلتهم.
إيه رأيكم بقى يعني الراجل اللي من البيت للشغل ومن الشغل للبيت ده بيعمل إيه؟ ده بيلعب، لا لا مش جد، ده مش بيشتغل ده بيلعب ده بيهرج ده واحد بيضيع حياته. واحد خد رأس ماله وراح اشترى به بلالين، ده بيلعب. لما يبقى راجع عشان ينام تمن ساعات تسع ساعات عشان يقوم تاني يوم فيشتغل ويطلع ويترقى وياخد البونص ويزيد علاوة، ده بيلعب! عجيب أوي موضوع الشغل ده، شوفوا النية خدته من فين، من إنه لعب وتهريج لإنها عبادة ويكفر ذنوبك، بالعكس ده هيكفر ذنوب ما فيش حاجة غيره تكفرها. فلذلك يبقى ده إحنا ابتدينا في إيه؟ إن إزاي الشرع يسيب حتة زي دي ما ينبهش عليها ويقول لك لا، ده نبه عليه وأديتك أمثلة، وفي أمثلة زي دي كتير في السنة، ولما تسمعها تبتدي بقى تفهم وتتذوقها بشكل مختلف وتحطها في سياقها العام، إن النبي هنا بينبهك لمعنى أكبر من مجرد الحديث، بينبهك لمعنى إنك ما تضيعش عمرك.
ولذلك هتجدوا أن السلف عملوا ده؛ لم يقل أحدهم: إني لأحتسب نومتي كما أحتسب قومتي. يعني إيه؟ هو أنا رايح أنام؟ أيوة دي حاجة تانية. إحنا قلنا الشغل بتقضي فيه تلت عمرك، طب النوم؟ وتلت عمرك يا جماعة ما برضه ما تقولش إنت كمان، يعني النوم أقول لك إنت حر مش عاوز تنوي ما تنويش، مش عاوز تستحضر نوايا وإنت بتنام إنت حر، لكن هتيجي يوم القيامة تلت عمرك راح، إنت حر. لكن إنت واحد ذكي مستحيل تسيب تلت عمرك رايح منك، عشرين سنة يروحوا منك؟ يا جماعة إزاي! إزاي يا أخي؟ ده أنا لو قلت لك تلت رأس مالك من الفلوس هيروح هتموتني، أنا بقول لك تلت رأس مالك اللي هيدخلك جنة أو نار رايح منك. وده بقى اللي هنتكلم فيه دلوقتي، معنى هو ليه الوقت كان عزيز عليهم وإحنا مش حاسين به؟ في أول معنى هو المعنى ده؛ إن لما جينا حسبنا بالورقة والقلم كده يا جماعة، إنت إيه! إنت ولا حاجة، إنت بتتكلم في خمس سنين، ست سنين دول اللي إنت عايشهم.
فلازم تنوي الخير في التلتين عمرك دول، الشغلة دي إحنا عرفناها والنوم إنك تتقوى على عبادة الله عز وجل، وتبتدي تقلل من ساعات نومك، مش عشان تصحى تهرج، مش عشان تصحى تفتح الفيسبوك تقعد عليه بالساعات، لأ، إنت في قلب ساعات نومك عشان تصحى تعبد ربنا سبحانه وتعالى. والعبادة بمفهومها الشامل الواسع، يعني وأنا بقول العبادة دلوقتي يا جماعة بلاش نقتصر أذهاننا على فكرة العبادة اللي هي الصلاة والصوم والزكاة وقراءة القرآن، ودي من أجل العبادات، لكن العبادة بمفهومها الواسع الشامل؛ لأن تضييق العبادة على المفهوم ده بيخرج ناس كتير جداً إلى الـ "لا حاجة" إلى الغفلة. العبادة مفهومها أوسع من كده وأشمل، ممكن تكون زيارتك لصاحبك عبادة، اتصالك بأبوك أو بأمك عبادة، قعدتك مع ابنك أو بنتك عبادة، قعودك مع زوجتك عبادة، وهكذا.
مفهوم العبادة الأوسع خلاص مش هنتكلم عنه، ده ممكن نفرد له لأن دي برضه قاعدة مهمة في طريقك إلى الله عز وجل، إنه ﴿مَّا عَلَى الْمُحْسِنِينَ مِن سَبِيلٍ﴾ [التوبة: 91]. يعني مش كل المسلمين هيمشوا في طريق واحد، دي قاعدة على فكرة قاعدة في السير إلى الله. بعض الناس يشوف فلان العالم فيقول لك أنا نفسي أبقى عالم لكن سبحان الله ربنا أغلق عليه باب العلم، فيه بيبان كتيرة غير العلم ممكن تدخل فيه تدخل منها على ربنا وتسبق دول. وكذلك واحد شاف واحد عابد ربنا مضيق عليه باب العبادة، ما أقعدش، لأ ممكن يبقى ربنا كل ميسر لما خلق له. دي كلها قواعد يا جماعة، طريق إلى الله مش هيستقيم لك سير إلا إنك تعرف القواعد دي. كل ميسر لما خلق له، واضح؟ بس ده مش درس النهاردة إن شاء الله ممكن نبقى نعمل له درس.
طيب نرجع تاني؛ يبقى النوم لازم تنوي فيه الخير، الشغل، الأكل، الشرب. يعني إيه أنوي الخير؟ أنوي الخير يعني إيه الأول؟ إحنا قلنا إيه يعني انبعاثة قلب، يعني إيه برضو عشان ما تبقاش إيه؟ يعني أنا بقول لها لو جيت أنام أو جيت آكل أو جيت أشرب أو جيت أروح الشغل فقلت أنا بقى ناوي إن شاء الله بنومي ده نتقوى.. لأ، لازم قلبك ينبعث، القلب ينبعث إزاي؟ قلبك ينبعث باللي إحنا عمالين نقوله ده، إنك تفكر نفسك إن أنا لو ما عملتش كده أنا لابس في الحيط، أنا مش قلت كده عمرى بيروح مني.
تاني حاجة بقى؛ هم ليه حسوا بقيمة الوقت وإحنا مش حاسين بقيمة الوقت؟ إحنا إزاي يعني أنا وأنتم مش أنتم بس حتى أنا، إحنا إزاي ممكن الواحد منا يمسك كده الموبايل ويقعد بالساعتين تلاتة بيعمل ولا حاجة، إزاي بنعمل ده؟ والسلف كان حالهم عجيب، وهنيجي لحاجات هقرأ لكم كمان شوية السلف كانوا بيعملوا إيه والوقت ده كان عندهم شكله إيه. لكن من الحاجات المهمة جداً اللي فرقت بينا وبينهم يا جماعة إننا مش عارفين قيمة الوقت؛ يعني إيه قيمة كلمة "قيمة" دي؟ تعالوا بس عشان نفهم القصة دي أقول لحضرتك حاجة؛ الجيل خلاص إحنا كبرنا لدرجة بقيت أقول جيلي دلوقتي، جيلي والجيل اللي أكبر منه، لو إنت ماشي دلوقتي وبعدين وقعت منك خمسة جنيه مثلاً، وبعد شوية فتش له ما لقتش الخمسة جنيه هل يعني هتركز أو إنك ترجع تشوف الخمسة جنيه وقعت منك في أنهي حتة؟ ما أعتقدش، أو يعني المعظم المتوسط من الناس، خمسة جنيه، هي هي الخمسة جنيه دي هي هي، ارجع كده خمسة وعشرين تلاتين سنة لورا والخمسة جنيه وقعت من جيبك، كنت ممكن ترجع تبص، أه، ليه؟ علشان قيمة الخمسة جنيه النهاردة مش زي قيمة الخمسة جنيه من تلاتين سنة، القيمة. طب عاوز تقول إيه؟ عاوز أقول لك احسب وقتك بقيمة وقتك هتحس إنت بتضيع إيه.
لأ مش فاهم، هفهمك يعني إنت مثلاً مش عارف إن لا حول ولا قوة إلا بالله كنز من كنوز الجنة، عارف إنت الحاجات دي، طيب لا حول ولا قوة إلا بالله دي عشان تقولها بتستغرق وقت اللي هو أنا قلت فيه دلوقتي اللي هو تقريباً ثانيتين تلاتة، احسب التلات ثواني دول إنك لو قلت فيهم لا حول ولا قوة إلا بالله فإنت قد أحرزت كنزاً من كنوز الجنة، ولو ما قلتش فيهم فإنت فرطت في كنز من كنوز الجنة. إحنا بنفكر في الوقت بقيمة الوقت معي.
طيب عارفين حديث إن اللي هيقول: «سبحان الله وبحمده» مائة مرة غفرت خطاياه وإن كانت مثل زبد البحر، عارفين الحديث كلنا طيب، سبحان الله وبحمده مائة مرة بتاخد وقت قد إيه؟ تلات أربع دقايق، احسب إن التلات أربع دقايق دول قيمتهم مغفرة ذنوبك، يا قيمة الوقت! وهكذا يبقى ده منظور تاني لأحاديث لفئة أو لطائفة أخرى من الأحاديث، خلوا بالكم إحنا كمان بنرتب دماغنا نفهم دين إزاي، يبقى إنت لما تقرأ أحاديث النبي صلى الله عليه وسلم اللي فيها بينبهك على إنك تحط نية في المباحات، ابتديت تحطها كده إيه تفهمها بمفهوم شمولي، النبي صلى الله عليه وسلم بيلح على معنى أكبر وهو إنك ما تضيعش عمرك.
في طائفة تانية من الأحاديث بقى لما هتقرأها هتفهمها برضو بإيه في سياق أشمل وأوسع، اللي هي أحاديث إيه؟ الأحاديث اللي هي فيها خصال خير تحرز بها ثواب كبير، فكأن النبي هنا بينبهك على قيمة الوقت؛ يعني اللي هيصلي الفجر في جماعة ويمكث في مصلاه إلى أن تطلع الشمس وبعدين يصلي ركعتين هياخد أجر حجة وعمرة تامة تامة تامة. إنك تقعد من لغاية الشروق وتصلي ركعتين، وقت قد إيه؟ ساعة! احسبها بقيمتها، قيمة الساعة دي الحاج عمرة تامة تامة تامة، ابتدي إنت لما تفكر كده قيمة الوقت غالية. الخمسة جنيه اللي وقعت منك النهاردة والخمسة جنيه اللي وقعت منك من تلاتين سنة، قيمة الوقت هي دي، إزاي تضيع إزاي تضيع وقت ده قيمته سمينة جداً، نتكلم في القيمة بقى. واحد جزاه الله خيراً بيقول والمشي إلى صلاة الجمعة إن كل خطوة بتحط خطيئة وتكتب حسنة وترفع درجة، ده إلى المسجد عموماً، في صلاة الجمعة اللي هو إيه: «من غسّل واغتسل وبكّر وابتكر ومشى ولم يركب» كُتب له أجر سنة صيامها وقيامها، ماشي أو وكانت كل خطوة، مش فاكر أوي نص الحديث اللي هو إيه يكتب له بها إيه؟ ألف ألف حسنة وتمحى بها عنه ألف ألف سيئة ويرفع بها ألف ألف درجة، طيب أه فيبقى هنا القيمة قيمة الوقت اللي إنت ماشي فيه من البيت للمسجد.
وعشان كذا تفهم شف يا جماعة الدين كله في سياق واحد إزاي؟ لما النبي صلى الله عليه وسلم يقول لبني سلمة: «دياركم تكتب آثاركم». بنو سلمة كانوا بعيداً شوية عن المسجد النبوي، وكانوا عشان ييجوا يصلوا مع النبي صلى الله عليه وسلم بيمشون، فقالوا: نبني أو نقرب شوية من المسجد النبوي، فقال لهم النبي صلى الله عليه وسلم: «يا بني سلمة دياركم»، يعني الزموا دياركم تكتب آثاركم.
أنا أعرف ناس من اللي عايشين دلوقتي كانوا بيحرصوا أنهم يروحوا في صلاة الجمعة لمسجد بعيد، وكان في ناس بتمشي، ممكن تنزل تمشي ساعتين وثلاثة قبل صلاة الجمعة عشان تروح لمسجد بعيد. يعني مش مسجد بعيد ربع ساعة مشي أو نصف ساعة، لا، ده فيه ناس كانت بتطلع الفجر، وفيه ناس كانت بتطلع تصلي الفجر في المسجد وتصلي فيه الجمعة. أنا بتكلم عن ناس عايشة معنا يا جماعة، ناس فهمت المغزى من وجودها في الدنيا.
نرجع تاني، ليه هم فهموا أو كانوا حريصين على الوقت وإحنا مش حريصين؟ عشان إحنا ما حصلناش وقت بقيمته؟ لا، أنا عارف قيمة الوقت، لكن معي منه كتير. عارفين زي إيه؟ واحد يقول لك أنا عارف قيمة الجنيه بس أنا ملياردير، إيه يعني لما جنيه يقع مني هنا أو جنيه يروح مني هناك؟ أقول لك آه معك منه كتير، دي حاجة تانية بتخليك تسرح، اللي هي إيه يا جماعة؟ الغفلة وطول الأمل.
حضرتك تضمن أنك تخرج من الدرس ده أصلاً؟ كنت مرة بدي درس في مسجد في صلاة الفجر، كنت أقعد أدي فيه درس في القاهرة قبل ما آجي إسكندرية، المسجد ده كان على طريق سريع ومطروق جداً، فالمهم الأتوبيس وقف ونزل ناس منه تصلي، المسجد مليان بقى رجال ونساء كانوا رايحين عمرة ونزلوا يصلوا الفجر. وجاء بعد الدرس وأجرى الله على لساني أن أتكلم عن الموت، وأن الموت يأتي بغتة، وقلت نصاً: ممكن يكون ملك الموت بيننا دلوقتي، وإن في واحد منا دخل مش هيخرج. وسمعنا صوت عند النساء؛ واحدة ماتت من اللي كانوا في الأتوبيس. يا جماعة إحنا ممكن درس الزوم ده يكون برضه نفس الشيء، في واحد مش هيخرج من الدرس، مين قال لك أنك معك منه كتير أصلاً؟
فده يقطعه عنك حديث النبي صلى الله عليه وسلم: «ما لي وللدنيا؟ إنما أنا كراكب استظل تحت شجرة، ثم راح وتركها». والحديث الثاني بقى اللي أشرف من ده: «كن في الدنيا كأنك غريب أو عابر سبيل». أنتم عارفين يا جماعة الغريب ده ممكن يكون إيه؟ الغريب هو واحد سافر الخليج، ربنا فتح عليه وهيقعد في الخليج شوية، فاسمه غريب، كده كده هيرجع مصر في يوم من الأيام، لكن هيبني بيته وممكن يجيب أجهزة كهربائية، ده الغريب. فالنبي بيقول لك: «كن في الدنيا كأنك غريب»، ورجع قال لك: «أو عابر سبيل»، لا لا حتى الغريب لأ، «عابر سبيل». عابر سبيل اللي هو إيه بقى؟ اللي هو معدي بس كده وماشي مش قاعد، عابر السبيل ده بقى تلاقيه يجيب لك الأجهزة؟ لأ، هو فكره في الدنيا اللي هو إيه يا عم ده أنا عابر سبيل، إنما أنا كراكب استظل تحت شجرة ثم راح وتركها.
فلا حضرتك ما معكش كتير، أنت ما معكش كتير من ده، ما معكش كتير من رأس مالك، لأنك أصلاً ما تعرفش أنت معك قد إيه، أنت ممكن يكون النهاردة هو آخر يوم في رأس مالك. وده برضه اللي هيفسر لك اجتهاد بعض السلف اجتهاداً شديداً، كل ليلة امرأة أبي حبيب كانت بتقول حاجة عجيبة جداً، قالت: أوصاني قبل أن ينام، هو نام فمات وهو نائم، قال: إذا أنا مت الليلة فابعثي إلى آل فلان بكذا وكذا وابلغي فلاناً كذا وكذا. فاستغربوا، يعني إيه ده؟ هو عرف منين أنه هيموت؟ فقالوا: رأى رؤيا، يعني هو شاف رؤيا، استغربت قولهم وقالت: هذا يقوله كل ليلة، كل ليلة قبل ما ينام بيقول لي كده أصلاً، ده راجل بينام بيقول مش هصحى.
ده كلام ابن عمر بيعقب على حديث النبي «كن في الدنيا كأنك غريب أو عابر سبيل»، قال ابن عمر: إذا أصبحت فلا تنتظر المساء، وإذا أمسيت فلا تنتظر الصباح. عارفين لما بنيجي نقول صلي صلاة مودع؟ معنى عميق جداً وهو المعنى ده، ومش عاوز أطول فيه، هختم بالأثر اللي هو صلي صلاة مودع. يا جماعة في صلاة هتصليها هي آخر صلاة، يعني إذا ما لحقت صلاة الفجر اللي جاية فهي صلاة الظهر اللي جاية، ما لحقت الظهر فهي العصر، فيقيناً دي صلاة هتصليها، هي صلاة مودع، هي الصلاة الأخيرة. مين أعطى لحضرتك صك ضمان أن مش الصلاة دي؟
طب بالله عليك لو نودي عليك من السماء الآن يا فلان ابن فلان: الصلاة القادمة هي الصلاة الأخيرة، هتصليها إزاي؟ فكر كده، لو نودي بصوت من السماء سمعته: فلان، الصلاة الجاية آخر صلاة لك، هتصلي الصلاة دي إزاي؟ طب مين قال لك أن الصلاة الجاية مش الأخيرة؟ لو صليتها الحمد لله وجاء عليك ميعاد تاني، قل لنفسك كده: هي دي الأخيرة. جاء الميعاد الثالث، قل لنفسك كده: هي دي الأخيرة، صل صلاة مودع. يبقى إحنا دلوقتي نفينا عن قلوبنا معنى أن الوقت ده رخيص، قلنا لك احسب الوقت بقيمته، ونفينا عن قلوبنا معنى أنك معك منه كتير.
بقى إيه اللي يخليك ما تستثمرش وقتك؟ ما يبقاش غير حاجة واحدة بس، هو دناءة الهمم، طبعاً ده كله يا جماعة بعد توفيق الله عز وجل، أول حاجة وآخر حاجة وكل حاجة توفيق ربنا له سبحانه وتعالى، إحنا بنتكلم في الأسباب. أول حاجة معنى أنك تعرف قيمة وقتك أي أنه وقتك قليل مش كتير، ما عدش منه كتير ولا حاجة، ده أنت مضحوك عليك، أنت في غفلة ففاكر أنك معك منه كتير، فطلع ما معكش منه كتير أصلاً. الحسابات بالورقة والقلم يا جماعة، بالورقة أنك ما عملتش منه كتير.
ثالث حاجة بقى دناءة الهمم، ودي بقى مش هينفع أتكلم عليها في الفيديو ده، لكن إزاي نعلو بهمنا؟ واحدة من الأسباب ودي اللي هختم بها أنك تقرأ أحوال السلف وأقوالهم، الناس دي كانت عايشة إزاي؟ كانت شايفة الوقت إزاي؟ طبعاً تقرأهم في كل حاجة، يعني في كل ملاحق حياتهم كانوا عاملين إزاي؟ لكن خليها بسرعة كده، مثلاً عندك ابن عقيل، ابن عقيل ده من جهابذة الفقهاء والأصوليين المعروفين، يقول إيه ابن عقيل؟ يقول: إني لا يحل لي أن أضيع ساعة من عمري، شايف أنه حرام عليه يضيع ساعة من عمره، حتى إذا تعطل لساني عن المذاكرة، تعبت لدرجة مش قادر أتكلم، مش قادر أذكر ربنا، مش قادر أقرأ قرآن، وتعطل بصري عن المطالعة، مش قادر أبص، أعملت فكري في حال راحتي وأنا منطرح، فلا أنهض إلا وقد خطر لي ما أسطره. الراجل تعب، لا قادر يبص في مصحف ولا في كتب علم ولا قادر يذكر بلسانه، ينام على ظهره كده ويفكر، يقوم يكتب.
ابن عقيل ده بقى كان حالته عجيبة جداً، أنا هقول لكم ابن عقيل في الآخر إيه نتاجه العلمي، ابن عقيل كان في كلام يعني ممكن أحكيه لكم، بس أنا أفضل أني أقرأه لابن عقيل. بصوا ابن عقيل بيأكل إيه، دي شفتم بيتعامل إزاي مع النوم، بيقول إيه ابن عقيل في الأكل بقى؟ يقول: وأنا أقصر بغاية جهدي أوقات أكلي، حتى أختار سف الكعك وتحسيه بالماء على الخبز، لأجل ما بينهما من تفاوت المضغ، بيقول لك أنا لسة هقعد أمضغ؟ ما عنديش وقت، أسف كعك وأشرب مية وخلصنا، توفراً على مطالعة أو تسطير فائدة لم أدركها.
ابن عقيل بقى كان نتاجه كتاب واحد من كتبه اسمه "كتاب الفنون"، عارفين كام مجلد؟ ثمانمئة مجلد، أنتم فاهمين الرقم طبعاً! هذا الكتاب فقد ولم يكن منه إلا مجلدات قليلة، أظن مجلدين أو أكثر، المهم ده نتاج كتاب واحد من كتب ابن عقيل، كتاب الفنون ثمانمئة مجلد. عثمان الباقلاني كان دائم الذكر لله تعالى، قال: إني وقت الإفطار أحس بروحي كأنها تخرج، وقت الإفطار وقت ما بآكل بحس أن روحي بتخرج، مش من كثر الأكل زينا لأ، أمال ليه؟ قال: لأجل اشتغالي بالأكل عن الذكر. إيه المعاني المرعبة دي يا جماعة؟ دي ناس فاهمة هي عايشة، فاهمة الوقت اللي إحنا بنتكلم فيه دلوقتي.
آه ما أعرفش إيلون ماسك، إيلون ماسك هو صاحب شركة تسلا وشركات كتير قوي غيرها، وهو أغنى راجل في الكوكب اللي إحنا عايشين عليه دلوقتي، هو بيلعب في رقم واحد أو رقم اثنين، يعني هو وبتاع أمازون ده يطلع وده وهكذا، يبدلوا مع بعض. أغنى رجل على الكوكب إيلون ماسك كان له تصريح قرأته من حوالي شهرين كده، أنه بيدرس أنه يجيب فريق طبي يركبوا له أنابيب يغذي جسمه عشان مش لاقي وقت يأكل، أو مش عايز يضيع وقت في الأكل. الأمثلة دي موجودة طبعاً هو عشان دنيا، لكن موجودة عندنا أهو عند السلف أهو، واحد يسف الكعك ويشرب مية، الثاني داوود الطائي كان يستف الفتيت ويقول: بين سف الفتيت وأكل الخبز قراءة خمسين آية.
بصوا يا جماعة، بيحسبوا الوقت بإيه؟ بالقرآن بقيمة الوقت، قراءة خمسين آية دي، ما بتفكركوش في حاجة بالحديث بتاع ما بين السحور وأذان الفجر؟ يا جماعة أنتم بيقضوا وقتهم بإيه؟ بقراءة القرآن. إحنا داخلين على رمضان أهو، الحديث ده مشهور وبيتقال كتير، اللي هو كم كان بينهما اللي هو السحور والأذان؟ قال: قدر خمسين آية. دي قيمة الوقت عندهم أهو.
داوود الطائي بيقول نفس الكلام ما يأكلش، يقول ليه؟ بينهم قراءة خمسين آية، أنا فاضي آكل؟ عثمان وقلنا عثمان الأكلاوي قال إيه؟ عمار بن رجاء شوفوا يا جماعة كله في نفس الحتة، يقول: سمعت عبيد بن يعيش يقول: أقمت ثلاثين سنة ما أكلت بيدي بالليل، قعدت ثلاثين سنة من عمري ما أكلت بيدي بالليل، أمال كان بيعمل إيه؟ كانت أختي تلقمني وأنا أكتب الحديث، ثلاثين سنة ما يأكلش، هو عمال يكتب وأخته قاعدة جنبه تعمل له لقمة تديها له في فمه وهو بيكتب. متخيلين يا جماعة؟ ابن تيمية بجد صاحب المسودة دي، شيخ الإسلام ابن تيمية ده الحفيد، جده بقى كان بيقول إيه؟ عبد الرحمن ابن تيمية قال عن أبيه، كان الجد ابن تيمية، إذا دخل الخلاء داخل الحمام يقول لي: اقرأ في هذا الكتاب وارفع صوتك حتى أسمع، ما بيضيعش وقت وهو فين؟ وهو في الحمام. والكلمة دي تفكرنا برضه بمين؟ بعبد الرحمن بن أبي حاتم، كان بيزورها برضه لمصنفات كتير قوي، فمستغربين هو كان سمع من أبوه أبو زرعة الرازي أحاديث كتيرة قوي، فبيسألوه أنت سمعت ده كله إمتى أصلاً منه؟ يقولوا لعبد الرحمن أبي حاتم: ربما كان يأكل (أبوه أبو زرعة) وأقرأ عليه، هو قاعد بياكل وأنا بقرأ عليه الحديث، ويمشي وأقرأ عليه، ويدخل الخلاء وأقرأ عليه، ويدخل البيت في طلب شيء، يعني هم الاتنين خرجوا من البيت، فأبوه راجع بس يدخل نسي حاجة يجيبها، ما يضيعش وقته، عبد الرحمن بن أبي حاتم يدخل البيت في طلب الحاجة وأقرأ عليه. يعني أمثلة في غاية العجب.
الخليل بن أحمد الفراهيدي إمام ولغوي وصاحب علم، هو اللي أنشأ لوحده علم العروض، قال: أثقل الساعات عليَّ ساعة أكل. وإلى غير ذلك من الكلام ده. الحقيقة أنا عاوز أختم بأثر واحد عشان الوقت ما أطولش عليكم، الحسن البصري وده يا جماعة الفرق بيننا وبينهم بقى من الآخر كده، الحسن البصري بيكلم التابعين، تخيلوا بيكلم التابعين هيلومهم، هيلوم التابعين، يقول: لقد أدركت أقواماً (يعني الصحابة) كانوا على أوقاتهم أشد حرصاً منكم على أموالكم. هو ده الفرق ببساطة، لما الحسن بيقول للتابعين أنتم حريصين قوي على الدنيا على الفلوس، أنا بقى أدركت أقواماً اللي هم الصحابة كانوا أحرص على الأوقات من حرص أحدكم على ماله.
هديكم مثالاً سريعاً للحرص على الوقت وإزاي كانوا يقدمون الوقت على المال، محمد بن سلامة، محمد بن سلام كان من شيوخ البخاري عليهما جميعاً رحمة الله، فكان وهو في حالة طلب في مجلسهم، كان لسه طالب علم، مش ما بقاش شيخ، قاعد في مجلس إملاء، يعني الشيخ زمان مجالس الإملاء الشيخ قاعد يحدث والطلاب قاعدين بيكتبوا.
القلم انكسر، عقبال ما يجري القلم في وقت تدريب، اليوم كانوا يكتبون القلم، عقبال ما يجري يعني هياخد وقت قد إيه؟ ثلاثين ثانية، أربعين ثانية، دقيقة، وهيفوت شيء من العلم مش هيلحق يكتبه، بيعمل إيه؟ تخيلوا كده محمد سلامة فنادى في المجلس: قلم بدينار، فتطايرت الأقلام عليه. عارفين أم دينار يا جماعة؟ دينار أربعة وربع جرام ذهب، النهاردة حاجة كبيرة قوي، وكان زمان حاجة كبيرة برضو، مش مطبعة وربع جرام، شوف جرام الذهب دلوقتي بكام واضربه في أربعة وربع، هو ما عندوش وقت إنه يفاصل، مش هقول لهم قلم بعشرة جنيه فيبتدي واحد يقول لي طب تسعة، أنا مش فاضي لك، لا ده أنا هقول قلم بعشر آلاف جنيه، ليه؟ عشان ما أضيعش ثانية، هي دي اللعبة بقى، هي دي الخلاصة، كانوا أحرص على الوقت من حرص أحدنا على أمواله، فنادى قلم بدينار فتطايرت الأقلام، كله رمى، اللي معه قلم زياده، طبعاً هم مش هم رجل العلم وما كتبوش يعني هم زيه برضو، لا يعني معهم أقلام زيادة، رموا له القلم عشان يأخذوا الدينار.
الذي عاوزين نخرج به يا جماعة القاعدتين التانيين أو القاعدة التي ينبني عليها مسألتان، وإنما لكل امرئ ما نوى، يعني إيه بقى إنما لكل امرئ ما نوى؟ إحنا ما قلناش أصلاً، وإنما لكل امرئ ما نوى يعني مهما نويت من خير أثبت عليه، ده معنى من خمس أو ست معاني اختلفوا فيها العلماء، إيه الفرق بين أن أعمل ونويت وإنما لكل امرئ ما نوى؟ اختلفوا على خمس أو ست أقوال، لكن أحد هذه الأقوال وده معنى واحد الذي تكلمنا عليه، كنا نفسنا نتكلم على قول ثاني لكن ما فيش وقت، لكن من الأقوال إنما لكل امرئ ما نوى يعني مهما نويت من خير أثبت عليه.
طب هنستفيد إيه من دي؟ إنك تنوي الخير في المباحات، مباحاتك دي ما تروحش كده، وقت أكلك، وقت شربك، وقت نومك، وهتلاقي بقى فكر في نوايا حتى ودك مع زوجتك، حتى وعدك مع أولادك، كل مباح، يعني النهاردة يا جماعة عاوزين وقفة، إيه المباحات التي بعملها في حياتي، وإيه النوايا التي أقدر أحطها في المباحات دي وأدرب نفسي إني أحط فيها نوايا، وإيه الطاعات التي بعملها، وإزاي أكتر من النوايا في الطاعة الواحدة؟ إزاي أكتر من نية في الطاعة الواحدة؟ يبقى أنا لو رايح المسجد عشان أصلي، فهنوي الخطى التي أنا رايح بها للمسجد، وهنوي اعتكافاً في المسجد، وهنوي ﴿سَبْعَةٌ يُظِلُّهُمُ اللَّهُ فِي ظِلِّهِ يَوْمَ لَا ظِلَّ إِلَّا ظِلُّهُ﴾ [البخاري: 660]، منهم رجل قلبه معلق بالمساجد، أقعد أنوي، أنوي، أنوي نيات كثيرة، تذاب على كل هذه النوايا، ليه؟ وإنما لكل امرئ ما نوى.
المباح سنشوف ابن الرسول بيقول إيه في متن الزبد: وخص ما يباح باستواء الفعل والترك على السواء، لكن إذا نوى بأكله القوى بطاعة الله له ما قد نوى. يعني لو نويت في الرياضة، واحد بيسأل ما هي النية في ممارسة الرياضة؟ النوايا كتير، أول حاجة إنك تنوي ﴿الْمُؤْمِنُ الْقَوِيُّ خَيْرٌ وَأَحَبُّ إِلَى اللَّهِ مِنَ الْمُؤْمِنِ الضَّعِيفِ وَفِي كُلٍّ خَيْرٌ﴾ [مسلم: 2664]، فمن القوة قوة البدن، منها إنك تنوي ﴿وَأَعِدُّوا لَهُم مَّا اسْتَطَعْتُم مِّن قُوَّةٍ وَمِن رِّبَاطِ الْخَيْلِ تُرْهِبُونَ بِهِ عَدُوَّ اللَّهِ وَعَدُوَّكُمْ﴾ [الأنفال: 60] وأنت لا تدري متى يأتي هذا اليوم بممارسة للرياضة، يعني في نوايا، آه في نوايا كتير حتى في الرياضة، وأظن في مصنف في الموضوع ده في الرياضة أحاديث جاءت في الرياضة، أظن اسمه الأربعون في الرياضة أو حاجة زي كده.
طيب يبقى ده أول حاجة، ثاني حاجة الطاعات تنوي فيها أكثر من نية، يتبقى حاجة أخيرة، إحنا تقريباً ثلاثين واحد بيسمع الفيديو هنا في الحدود دي على الزوم، واللي هيسمعني بعد كده حتى في اليوتيوب أو غيره، شيل الفيسبوك من على الموبايل، ما فيش وقت والله يا جماعة، ما في وقت للكلام ده، تطبيق الفيسبوك مع الموبايل لو أنت الفيسبوك ده ما بتستخدموش في حاجة لله سبحانه وتعالى، أشيله وأعمل ديأكتيفيت للأكونت أصلاً، والله ما له لازمة، والله بيسرح عمرك على الفاضي، طب أنت واحد بتستخدمه في طاعة الله عز وجل، على الأقل شيل التطبيق، استخدمه من على اللاب توب، ادخل من على البراوزر الذي على الموبايل، بلاش التطبيق، شيله.
ستحسوا يا جماعة بالغبن الشديد يوم القيامة، ربنا سماه يوم التغابن، ﴿يَوْمَ يَجْمَعُكُمْ لِيَوْمِ الْجَمْعِ ۖ ذَٰلِكَ يَوْمُ التَّغَابُنِ﴾ [التغابن: 9]، عارفين إيه الغبن يا جماعة؟ الهضم، لما يكون معك سلعة غالية جداً وتبيعها بالرخيص، أنت كده مغبون، هو ده الغبن، معي حاجة بألف جنيه رحت بعتها بخمسة جنيه، أنا كده مغبون في السلعة دي، طب هو يوم القيامة يوم التغابن؟ لأ، التغابن كان في الدنيا، كان معك رأس مال خسرته في ولا حاجة، طب ليه تسمى يوم التغابن؟ هو اليوم الذي يظهر فيه الغبن، الغبن ده للكافر بس؟ لأ، اقروا التفسير يا جماعة، الغبن ده للكافر والمؤمن، قالوا يظهر غبن الكافر لتركه الإيمان، ويظهر غبن المؤمن بتركه الإحسان، كنت على فيسبوك مضيع يومك، مضيع عمرك، شيلوا الفيسبوك يا جماعة ما له أي لازمة، حافظوا على أوقاتكم وحافظوا على حياتكم التي باقي من عمركم، بعد ما شلنا منه كل الزيادات ثلاث سنين، أربع سنين هتدخلوا فيهم فيسبوك كمان. السلام عليكم ورحمة الله وبركاته.